رواية بنات للزمن الفصل السادس عشر 16 - بقلم سارة الشمري

الكاتبة : سارة الشمري 🖤

احس متغير اني ومـــــــالي خلك الناس
وأحس تعبان كَلبي. من الوكت مــــــقهور
مثل غيمة حزن تمـــــطر علي كبـــــريت
وانه بنار عايش والدمـــــوع. تــفــــــــــــور
كل يوم الامس مثل الفلــــــم ينعــــــــاد
وباجر والامس والجاي نفـــــــس الطــــور
ناعور الوكت يســـــــگيني جان. اشـــعار
وافتر الوكت وانه الــــــصرت ناعـــــــــــــور

راسم //

رضا : عمو راسم كملنة الرسمة ..
هزيت راسي : اي حبيبي حلوة ..
رضا : اكتبلي اسم ماما فوگاهة ..

گتبتلة الاسم وبهاي الاثناء طلعت مريم من الغرفة ..
رضا اخذ الورقة وگام راحلهة بحماس .. : ماما شوفي هاي انتي .. رسمناهة اني وعمو راسم ..

مريم نزلت لمستواه : شگد حلوة .. شكراً حبيبي الك ولعمو راسم .. الوردة الي بالفستان احلا شي ..

رضا : لا عيونج احلا شي .. احلا من عيون باجي زمن ..
باستة بخدة : والله انت ال احلا شي حبيبي ..

عفتهم وطلعت من دگ تليفوني رقم رضوان ..
رفعتة : ها رضوان ..

رضوان بعصبية : راسم تعال شوفلك جارة وية امي مو والله طگت روحي ..
راسم : شكو شبيك رضوان .. شبيهة امي ؟؟

رضوان ينافخ : يعني شبيهة ؟ نفس الموضوع .. رجعت فتحتة هسة .. مو والله اختنگت وابتليت على عمري من سويت خير ..

تنهدت : استغفر الله .. رضوان على كيفك .. وين انت هسة ..
رضوان : افتر بالسيارة .. عفت البيت وطلعت ..

راسم : رضوان لا تستعجل بالسياقة وعلى كيفك .. ارجع للبيت لا تخلي امي وحدهة ..
رضوان : راسم ما ارجع هسة .. ولا تخاف مو وحدهة .. عهد هنا هي ورجلهة اجو قبل شوية ..

تنهدت وسديت التليفون منة ..
خابرني عمي محمد گال مر علية هسة لان عندة اوراق يريدني اخذهة ولازم باجر من الصبح اوديهن للشغل لان جاي اشتغل هسة بالمستشفى و بعدني اخطط اريد افتح عيادة ..

بدلت ملابسي ومشيت ..
رحت لبيت عمي محمد وگعدنة بالديوانية انطاني الاوراق وجابلي جاي ويسولف وياي ..

اندگ الباب .. گام عمي محمد فتحة واسمع صوتة : هلا بحارث .. منو شامرك علينة اليوم ..
دخل حارث ومبين معصب : افتريت وما عندي مكان اروحلة واجيت لهنا .. البيت خانگني ..

گعد يمي وهستوة ينتبهلي .. : الله بالخير دكتورنا ..
هزيت راسي : الله بالخير .. شعندك اليوم حواجبك مضيعة دربهة .. منين معصب ..

عمي محمد : حويرث لازم مسويلك دبرة ..
حارث : لا والله عمي كلشي ما مسوي .. بس صارت سويلفة خلتني اتعصب ..

ردت اسألة شنو السالفة واندك الباب ..
گام عمي محمد : ديلة بالله منو ادور ..
فتح الباب ودخل وياه جبران وهو معصب ..
بدون ما يحجي شي دخل وشمر سويجة عالقنفة وگعد وطابك حواجبة ..

عمي محمد باوع علينة ورجع باوع لجبران ..
عمي محمد : وعليكم السلام شيخ جبران .. والله احنة بخير اذا انت بخير ..

جبران انتبه لنفسة وعدل گعدتة : احمم اسف عمي بس والله ما منتبه .. اعذرني ..
محمد : شبيك انت الثاني وجهك هم مگلوب ..

جبران : عمي ماگدر اگعد بالبيت .. التفكير ماكل راسي واذا ضليت گاعد انفجر ..
محمد : وبيمن تفكر بلة ؟؟

ما كمل حجايتة الا والباب اندگ ..
عمي محمد رفع ايدة : ربي انة معلك راية خضرة ابابي اليوم شني ؟

راح فتحة ودخل رضوان ..
محمد يهز بأيدة : تفضل رضوان تفضل ..
دخل رضوان شافنة گاعدين ..
استغرب : بسم الله .. شعدكم هنا ..

عمي محمد يأشر على رضوان وعالولد : انة الاسألكم شعدكم هنا ؟؟ متفطنين علية اليوم ..

گعد رضوان : عمي انة متعارك وية الوالدة و جنت افتر بالسيارة وما عندي مكان اروحلة .. اجيت عليك ..

عمي محمد : جمعة خير انشالله ..

واندك الباب ..
عمي محمد : هذا اكيد هادي ..
اشر لجبران : گوم ولك افتح الباب طاحت رجلية ..

گام جبران فتح الباب وفعلاً جان هادي ..
طبگ حواجبة من شافنة : السلام عليكم .. شلونك عمي ؟

عمي محمد ابتسم : واخييييراً تذكر واحد منكم يسلم .. وعليكم السلام هادي استريح ..

هادي باوعلنة : مجتمعين من وراي ؟؟ خونة ..
عمي محمد : تعال هم اشمر سبحتك واگعد نافخ هنا وگول متعارك لو مختنگ من البيت ..

هادي رفع اوراق بيدة : لا عمي انة جاي بشغل .. مو حاجيتك مساع بالمعمل وگتلي بليل مر علية ..

عمي محمد : اييي نسيت ..
گعد هادي يمنة ..

باوعتلهم .. بلة رضوان اعرف شبي .. و جبران هم اعرف ليش معصب .. الا حارث شعندة ..

عمي محمد حاطهم گدامة ويستجوبهم ..

جبران حجالة على سالفة بسمة وهو معصب لان جايينهة خطابة وهو يريدهة ..

وجه نضراتة لحارث : اي ابو عَباد .. سولفلي انت شبيك هيج مطنگر .. جنك ابوك من يزهگ يرفع حاجب وينزل الثاني ..

حارث عدل حواجبة وگعدتة : احمم .. هيج عمي ما بية شي بس من ضوجة البيت وهالسوالف ..
رفعتلة حاجبي واني ممقتنع بحجية اصلاً محد اقتنع ..

عمي محمد : اهاا گتلي البيت ..
التفت لرضوان الي بدون ما يسألة جاوب من شافة يباوعلة : عمي انة متعارك وية امي من ورة نفس السالفة ..

عمي محمد : سالفتيش ؟؟
رضوان : سالفة هيام بت خالي اكو غيرهة .. يومية تگلي يمتة تخطبهة والبنية ويومية جايينهة خطابة ..
الله وكيلك ليگول الملكة الزابيث وخابصتني بيهة ولا تفوتهة من ايدك وعيب من خالك ..

تورطت من حليتلة العركة ووگفت وياه .. حرجني گدام العالم ويگلي بتي الك ..
جبران : وانت ليش ما تخطبهة وتريح امك وخالك ..

رضوان : خاب هي شحالهة .. زعطوطة عمرهة ١٦ سنة .. من تشوفني تضل فاكة حلگهة ليگول ما شايفة .. معصلة جنهة زرزور مهلس ..

باوعنة واحد بوجهة الثاني وطگيناهة ضحكة على تشبيه رضوان ..

عمي محمد باوعلهم وحجة : بوية احد گاللكم انة حلال مشاكل .. كل واحد يتعارك لو يضوج يجي يمي ..
حارث بوية شايف هنا مدينة ترفيهية وجاي لان ضايج من البيت ..

گمت اني واضحك : عمي انة اسمحلي شغلي خلصتة ..
استأذنت منهم وطلعت ..

رجعت للبيت ..

ليلى //

لازمة تليفوني واحاجي بعباس الي كل يوم يراسلني ..

عباس : يعني تونستي اليوم ؟
ليلى : اييي حيل .. بت رجل خالتي اليوم اجت وححيل حبابة .. يعني يرادلهة فترة شي وتبدي تاخذ على اجوائنة ..

عباس : هو انتي ياهو الما ياخذ على حجاياتج ..
ابتسمت : شسوي احب اختلط .. وهي هم مبينة تحب تختلط بس بعدهة تستحي ..

عباس : ليلو ..
ليلى ابتسمت احب اسمي من يسويه ليلو : ها ..
عباس : انتي گلتي هاي الجاية اخر سنة الج بالكلية لو غلطان ..

ليلى : لا ما غلطان .. اي اخر سنة ..
عباس : وانتي گلتي ماتتزوجين الا تتخرجين ..
ليلى : اي بالضبط ..

عباس : وانة شلون بية .. شيصبرني لحد ما تتخرجين ..
عزةة والله استحيت : شنو عباس شگلنة احنة ..

عباس : وشمسوي هسة انة .. رايد اخطبج حالي حال اي واحد يخطب .. بالحلال يعني ..
ليلى : الموضوع ما اختلف عندي وما اتزوج الا لمن اتخرج .. وبعدهة السنة ما بادية ..

عباس : الله كريم عود الله يجزيهن بسرعة .. اكلج صدك على طاري الكلية .. انتي تلبسين عبا لو لا ؟

ليلى : اي البس طبعاً غير علوية وميقبلون الا عباية ..
عباس : ها خوش حجي .. عفية ..

جبران //  ورة يومين

گاعد يم امي بالصالة مال بيتنة ..
گتلهة اريد اخطب بسمة واريدهة تحاجي خالتي وتگللهة لا يرجعون خبر للعالم هسة حتى اضمن الموضوع ..

امي باوعتلي وابتسمت : لا تخاف ما راح توافق عالخطابة الجايبن عليهة ..
جبران : وشمدريج ..

كملت وحجت بهدوء : ادري بيك تحبهة وهي هم تحبك .. ومن زمان حاجيت اني كتلهة اريد بسمة لجبران واعتبريهة محجوزة لبين ما يتزوج هادي ..

فكيت عيوني : وشمدريج اني احبهة ..
نعمة : مبين عليك مثل عين الشمس من تشوفهة تضل فاك حلگك وتنزرع يمي تگابلهة وتگعد ..

حكيت راسي بأحراج .. هيج مبين علية ..
جبران : هسة المهم ارجعي خابري خالتي واكدي عليهة لا تنسى ..
تأففت مني وگمت جبتلهة التليفون وهي خابرتهة ..

فتحت السبيكر وهي سلمت على امي ..
نعمة : اگول وعاد سمعت جايين خطابة على بسمة .. بعدنة على اتفاقنة مو ؟؟

خالتي وعاد تلعثمت بالحجي : والله يا نعمة مادري شأگلج .. انة هم جنت محتارة شلون احاجيج واگلج ..

نغزني گلبي من كلامهة ..
امي ردت : ليش شكو .. احجي ..

وعاد : والله مادري شأكلج .. بس البارحة حاجيت بسمة بهالسالفة وگتلهة اذا سألج اخوج گليلة ماريدة لان جبران ابن خالتج رايدج وخالتج حاجزتج الة ..

نعمة : اي وشگالتلج ..
وعاد : والله البنية بس گتلهة هيج طفرت بوجهي گالت ماريدة .. شنو تحجزوني بكيفكم .. وخابري خالتي وگليلهة ماريد جبران واني راح اوافق على الي متقدملي ..

رصيت سنوني وطلعت بدون ما اسمع شي من صياح امي وراي ..
طلعت ولاگاني حارث هستوة جاي من اهلة ..

لزمني : هوب هوب شبيك جنك ثور هايج .. وين رايح وكت غدة ..
دفعتة اريد امشي : لك يا زقنبوت دوخرررر ..

جرني من ياختي : انت مو مال عيني واغاتي .. اصعد بسيارتي لا اسحلك سحل .. امشي خل احاجيك ..

صعدت بسيارتة واخذنة لحديقة .. نزلت من السيارة ورگعت الباب بكل قوتي ..
حارث شهگ بخوف : كسسسسسر بيدك وبرجلك انشالله على هالعملة .. الله لا يطيك ..

نزل بسرعة يتفحص باب السيارة ويدردم : الله يطلعهة بيك كون .. شلون تضربهة هيج .. هاي اغلى منك يالثور ..

عفتة ومشيت اريد ادخل للحديقة وهو يمشي وراي يدردم : على كيفك لا تكسر التبليط ونروح نبتلي نگعد نعمر .. ادور حتى ما متغدي .. عود اجيت اتغدة وياك ..

التفتتلة وعطت : حااارث اسكككت ترة ما گتلك جيبني وياك .. انت گطعت دربي وجبتني ..
گعدت اني عالكرسي ..

حارث تربع بالگاع عالثيل (العشب) .. : اي سولف شبيك ..
حجيتلة الي گالتة خالتي وية امي وهو يباوعلي بتركيز ..

من كملت باوعلي بهدوء : وما احلاهة توافق عليك .. يعني ندري بيهة هيج راح تجاوب ..
فكيت عيوني : شنووووو ..

حارث : شبيك بابا صدك تحجي .. يعني متوقعهة من يگلولهة جبران خطبج هي تطير من الفرحة وتگول بدون تفكير اكيد موافقة .. اصحى على نفسك ابوية ..

من ورة عملتك السودة لطشت السالفة كلهة ..
البنية گامت تخاف منك وما عدهة ثقة بيك ..

يحجي واني احس الدنيا ضايگة بية ..
اختنگت : وشسوي هسة گلي ..

حارث : شوفلك طريقة واحجي وياهة .. اعتذر منة وفهمهة انك ما جنت متقصد او احجيلك شي المهم تسد سالفتك الگشرة .. ودير بالك تجفص بحجاية تخرب الاول والتالي .. يعني شتحجي هي انت خليك هادئ وتحمل ..

هزيت راسي : شلون اشوفهة بلة .. اگيد ما اروح لبيتهم واگلههم اريد اشوف بسمة .. واذا طلبت منهة تجي لبيتنة مستحيل اكيد ما توافق ..

رجع ضهرة عالكرسي الوراه وطلع جگارتة وشعلهة ..
تأففت : حارث طفيهة رحمة لاهلك .. والله اكره ريحة الجگاير .. شهالسم هذا .. وحاجيني شلون اشوف بسمة ..

سحب نفس قوي من الجگارة وبعدين حطهة بالگاع ومردهة وطفاهة : شوف مالك غير حل واحد وهو وحدة من البنات تخليهة تطلب منهة تجي للبيت بحجة تساعدهة بشي لو تعزمهة .. وبهاي الاثناء اطلب منهة تدبرلك طريقة حتى تشوفهة ..

طبگت حواجبي افكر .. : مريم مستحيل ترضى لان من يوم ما شافت بسمة بجت ذاك اليوم من وراي وهي تلومني تگلي اكيد مسوي شي للبنية .. وحتى ضايجة مني ..

حارث ابتسم ابتسامة جانبية : غير مريم ..
جبران : ديلارا ذاك اليوم اتگول علاقتي مو قوية بيهة لان اني مو من النوع الي اختلط بسرعة ..

رفع راسة حارث : غير ديلارا .. بقت جلاتين ..
حكيت لحيتي وافكر : جلاتين ..

حارث : حسب ما اعرف اختك جلاتين تختلط بسرعة ومن گعدة وحدة تاخذ وتنطي ارقام .. اكيد علاقتهة زينة ببسمة .. خليهة هي تساعدك ..

هزيت راسي : اي صح .. ماكو غيرهة جلاتين .. بس لازم اتلوگ اول شي .. شآخذلهة .. ككو نوتيلا ..
حارث : لا مو نوتيلا ..
جبران : جا شآخذ هنة البنات يحبن النوتيلا ..

حارث شبك اصابعة ومدهن يتمغط ويطگطگ رگبتة : اخذلهة كارتونة قواطي شاني ..
استغربت : شاني ؟

حارث : سمعت من ريم گالت جيلان تحب قواطي الشاني و عدهة استعداد تشرب شكد متريد بدون متمل ..

گمت بسرعة : گوم لعد اخذني لمحل اشتري القواطي واروح لجيلان ..
اخذني حارث لمحل اشترين القواطي ورحت للبيت ..

مگابل جيلان اقنع بيهة ..
جيلان : لا تحاول ..
جبران : يلة عاد جلاتينتي .. جلاتينة ام الشاني ..
شلون گلبج يطيج تعوفين الكارتونة ..

طبگت حواجبهة وباوعتلي : احد گايلك اني جوعية ..

عدلت گعدتهة وحجت بجدية : جبران ترة احجي صدك .. البنية ضايجة منك حيل .. ومتريد تشوفك .. ولازم انت مضوجهة بشي ..
وبما انك نسونجي معناها اكيد لاگفتك وية وحدة من صاحباتك ..

خليك تستاهل التسوي بيك .. اني انسانة اناصر المرأة بهالسالفة ..
اخذهة عبرة الك ولابن عمك المغرور ..

تنهدت ورخيت وحجيت بحزن واني احاول اثر عليهة : جلاتينة مو احبهة .. عالاقل انتي ساعديني .. اذا ما شفتهة اليوم وحجيت وياهة معناهة راح تروح من ايدي وتتزوج لان جايينهة خطابة ..

ارتخت ملامحهة وحكت شعرهة تفكر : ها .. تتزوج ؟
جبران : اي تتزوج .. واني اريد احاجيهة حتى ترفض واني اخطبهة ..

سكتت ما حجت شي ..
حجيت بصوت هادئ : جيلان اذا هي تزوجت اني اموت ..

جيلان : يووووو باع الحجي شلونة .. اكعدي راحة حياة الفهد ..
ابتسمت بحزن : مو حقج ما حاسة بشعوري ..

جيلان : ديلة يلة ترة ماحب الدراما .. راح اخابرهة ..
رادت تطلع والتفتتلي : گوم حط الكارتونة مال الشاني بالثلاجة بين ما اجيب التليفون .. بس خاف امك السعلوة تجي تشربهة ..

فكيت عيوني : جيييييلان ..
كمزت هي ورخت صوتهة : اصلا عادي اشربة حار ..
طلعت راحت جابت تليفونهة ..

خابرت عليهة وطلبت منهة تجي وهي رفضت گالتلهة مابية حيل ..
جيلان گالتلهة تعاي يمي نعزل الغرفة اني وياج لان هاي ديلارا كلشي متعرف وفاهية .. بالكوة قبلت تجي وگالتلهة ما اتأخر ..

بقيت انتضر تجي ..
من اندك الباب اني صعدت فوگ واكيد قبلهة حاجيت جيلان كتلهة اذا سألت كليلهة انتي معليج بالسالفة وما تدرين بية راح اجي لان ماريد علاقتهن تخرب بسببي ..

سمعت صوتهة جوة سلمت عالبنات ..
جيلان جابتهة ودخلتهة لغرفتهة الي هي غرفة ريم القديمة ..
اني اباوعلهن من ورة الدنگة ..

اسمع جيلان تگللهة اخذي راحتج بالغرفة بين ما اروح اسوي جاي ..
طلعت جيلان من الغرفة باوعتلي عضت اصبعهة بعصبية ونزلت ..

توجهت بسرعة للغرفة دخلت وسديت الباب وهي ناطيتني ضهرهة ..
بسمة : ها جيلان شو رجعتي ..
التفتت شهگت من شافتني ..

بسمة //

نفسيتي زفت .. وحيل متغيرة ..
هذاك اليوم ميطلع من بالي ..

شلون اني غبية .. خايفة علي لان دايخ وتعبان ..
وهو استغل خوفي علي ..
بألي سواه كسر ثقتي بي ..

خفت منة حيل وحسيتة مو هذا جبران الي احبة ..
مو هذا الي تعلقت بي والي يرتبك من يشوفني ..

صرت ما اروح لبيتهم بس حتى لا اشوفة ..
مجرد ميذكرون اسمة واني احس ودي ابجي ..
ومن شفتة ابيتهم ذاك اليوم ما سيطرت ودموعي نزلت لان تذكرت الي سواه ..

صرت اخاف من شوفتة ..
حبي الة تحول لخوف وعدم ثقة وانكسار ..

الي جايين متقدميلي اخوي يگول خوش ناس وگال فكري ورجعيلي خبر ..
بيومهة اجت امي وگالت ارفضي لان جبران يريدج وخالتج حاجزتج مدري شنو ..

اني تخبلت مجرد التفكير .. ماريدة هذا مو جبران الحبيتة .. طلع بداخلة انسان ثاني يمشي ورة رغبتة .. وبالعناد گتلهة راح اوافق على الي متقدملي ..

واني اصلاً ما راح اوفق لان مستحيل اتزوج واحد واني احب واحد ثاني .. احسهة خيانة ..

اليوم عزمتني جيلان ابيتهم .. ماردت اروح ولا حتى مجرد تفكير ان المحة ..
بس هي اصرت اروح واساعدهة والا شوية تگلي راح ازعل منج .. واني وافقت استحيت اكللهة لا ..

رحت لبيتهم ومباشرةً رحت لغرفتهة حتى اتجنب اشوفة ..
راحت هي تجيب جاي ..

واگفة اني اعزل بالشالات المشمورة عالجرباية ..
سمعت صوت وراي عبالي جيلان ..
التفتت وشفت اخر شخص اتمنى اشوفة ..

تراجعت لورى وحجيت بعصبية : انت شجابك هنا .. اطلع برة بسرعة .. ماريد اشوفك ..
تقرب خطوتين مني وحجة بنبرة ترجي : بسمة فدوة بس اسمعيني ..

هزيت راسي حيل : لا ما اسمع شي واطلع يلة ..
جبران : بسمة والله ما حسيت على نفسي شلون سويت هيج .. اصلاً بهذيج الفترة عقلي كلة جان مشوش ومخربط وما منتبه لنفسي ..

نزلت دموعي وضربت رجلي بالكاع : مو عذر مو عذر .. انت تدري شسويت بية ..
حتى ثقتي بيك انكسرت ..

بس تدري مو صوجك .. صوجي اني الغبية شلون دخلتك للبيت واني وحدي ..شلون جنت شايفتك من اهلي وتخاف علية من نفسك بس لا جنت غلطانة .. انت ثبتت هالشي ..

جبران : لا ما غلطانة بسمة .. والله اخاف عليج واحبج .. ورحمة جدي خضر ما يوم فكرت بيج بطريقة مو زينة الا بذيج اللحضة الشيطان لعب بعقلي .. اني نفسي ما مستوعب شلون سويت بيج هيج ..

كعدت عالجرباية وگمت ابجي بالزايد : خفت عليك من شفتك تعبان .. كلبي وجعني من شفتك ضايج ومقهور على جدك .. وانت استغليت هالشي .. والله لهسة كل ما اتذكر جسمي كلة يضل يرجف .. كرهت روحي ..

تقدم مني وگعد بالكاع گدامي : بسمة حبيبة مسحي دموعج .. اني غبي وما فكرت بعواقب ذيج اللحضة .. عاقبيني شلون ما تردين بس لا توافقين عالزواج هذا .. اذا وافقتي علي معناهة اني انتهي ..

سكت شوية وهو يباوع بعيوني وبعدين كمل : بسمة والله انتي حلم عمري من جان عمري ١٨ سنة .. بالبداية گلت حب مراهقة وينتهي بس اكتشفت يوم عن يوم حبج يزيد بگلبي .. وما جنت اكدر اخطبج لان هادي اكبر مني وما متزوج وهم اني جنت بعدني زغير ..

بس هسة هادي ما عندة مشكلة ..
وابوي وافق اخطبج .. لا تحرميني من عيونج ..
گليلي اي .. اذا اجيت وخطبتج من اخوج ..

اباوع بعيونة بعتب ..
ابتسم وباوعلي : زين واذا گتلج بداعة زاك ايفرون (ممثل اجنبي) توافقين ؟؟
بعز حزني ضحكت ..

رفع حاجبة : اشوف من جبت اسمة ضحكتي .. بعدج تحبينة .. اتذكر جنتي خابصتنة بي ..
ابتسمت : وراح اضل احبة .. هذا حب مراهقتي ..

جبران : شوف شوف ..
انفتح الباب ودخلت جيلان بيدهة قوطية شاني  : ما خلصتو فضوهة .. حبوبتي كلساع وكالتلي ما تستحين البنية جاية عليج وانتي مگابلتني وعايفتهة فوگ .. شأگللهة بلة ..

گام جبران لجيلان وباسهة بخدهة حيييل : همزين امج طلعت حامل بيج گبل لا تعوف ابوي .. عمي انتي نعمة نعمة ..

جيلان مسحت خدهة : وييييع .. لا تگلي نعمة .. هي هاي العايزة يشبهني بنعمة ..
جبران ضحك : وج قصدي نعمة من الله مو نعمة امي ..

دار وجهة يريد يطلع والتفت علية ابتسم وطلع ..
اني مبتسمة واباوع للباب ..
جيلان : ايييي عمي هاي الناس العاشگة مو اني .. بخخخخخت ..

شلت المخدة وهجمت عليهة : اني تسوين بية هيج دگة .. تردين تعزلين الغرفة مو يالجذابة ..

جيلان فتحت عيونهة وفتحت الباب وشردت واني وراهة ..
صعدت الدرج للطابق الفوگ مال راسم ومريم ..

جيلان : يممممة عفية عوفيني ترة اعيط وتجيج حبوبتي ..
صعدت هي واني وراهة ..
وصلت لغرفة راسم ومريم وفتحت الباب عالسريع وصاحت : مريم اقذينـــ ..

دخلت هي واني وراهة ..

ونشوف راسم بدون قميص وبس بالكيمونة الرجالية السودة ..
ومريم يمة وقريبة كلش علي راسهة يم صدرة وهو مخلي ايدة بشعرهة المتناثر على طول ضهرهة ..

التفتو لجهتنة متفاجئين من دخول جيلان بهالطريقة ..
جيلان بلعثمة : اسفة ..

طلعت وطبگت الباب ..
ضربت على خدهة : يبووووو .. دوريلي حفرة اطم روحي بيهة ..
نزلت وهي وجهة احمر واني مو اقل منهة : بعد ولا اشوف راسم وجهي والله .. 

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري ✍🏻

هلو حبايبي مشتاقتلكم .. ارائكم بالبارت ..
احببببببكم .. ولا تنسون صوتو وعلقو وكلشي ينداس دوسو ..❤️