رواية بنات للزمن الفصل الرابع عشر 14 - بقلم سارة الشمري

الكاتبة : سارة الشمري🖤

لاتحزن بعد وتبچي على الراح
وعوف ادموع عينك لا تبديهه
ووگف على الجرح لاتصرخ وياه
وراح اكتب قصيدة والك اهديهَ
مدينة الم روحي لاتظــن ترتاح
وانه ابن المدينة وتيهت بيه
يل عندك جرح وتگلي مجروح
انه جروحي فاضت وين اودّيه

مريم //

جنت واكفة بالمطبخ اسوي عشا لراسم لان اليوم جان عندة شغل واجة متأخر ..

كليت طماطة وعليهة بيض وطلعت خيار كصصتة ..
حطيت بيض عالطباخ لان هو راد بيض سلگ ..

علاقتي براسم علاقة سطحية ..
اني قايمة بواجبة من ناحية ملابسة واغراضة واكلة .. ماريد اقصر بشي ..

هو اغلب الوقت برة واذا اجة للبيت يگعد يم حبوبتي وبليل من يريد ينام ..
افرشلة بالگاع .. واني ورضا عالجرباية .. هو هيج راد .. واني مرتاحة لهالوضع ..

بعدني اسوي بالعشا ..
شوية ودخلت نعمة من باب المطبخ وگالبة وجهة ..

رفعت ايدهة وشايلة الالعاب الي جابنهن البنات لزينة ..
شمرتهن بالكاع وطشرتهن ..: هذني رجعيهن لخواتج الفگور .. يردن يحشن راس بتي ويفرنهة بهذني السوالف ..

تأففت : شنو سالفتج .. يعني شصار اذا جابن شي لاختهن الزغيرة .. ليش هالگد تفكيرج متعصب ..

لزمتني من زندي : سمعي ولج .. سوالفجن هاي مال اختي واخوي بطلنهة .. وگلي لخواتج خل يضبن روحهن لا والله اني اضبهن .. وخصوصاً هذيج اختج ام عيون واوي .. اذا ما تعقل اني اتصرف وياهة ..

نفضت ايدي منهة وحجيت بعصبية : خواتي ما مسويات شي .. وجيلان متحجي شي اذا مو انتي الي تبدين .. كفي شرج عنهن وهنة ميحاجنج .. وعلى فكرة ترة گلوبهن صافية ونضيفة ويحبن زينة وجبران وهادي بس لان اخوانهن .. ومو لشي ثاني مثل تفكيرج ..

سحبتني من دشداشتي : اشوف لسانج طولان ولج .. شو من اجت امج ام الزلم وانتي تواگحتي .. ترة خاف عبالج مستقوية بأمج .. ادوس على راسج وراس امج وياج سمعتيني لو لا ..

احاول افك ايدهة مني : فگيني شبيج تخبلتي .. ما تايهتلج اني .. واحترمي نفسج ..
لزمت فكي بيدهة : لا تايهتلي .. من زغرج تايهتلي .. وهسة اشوفج شلون بعدج لهسة تايهة الي ..

ما اشوف غير شالت القوري اليفور مال البيض السلگ وصبتة فوگ ايدي ..
عطت عيطة حسيت روحي طلعت : اااااااااه .. ايدي ..

دفعت ايدي حيل وحجت : طبج طوب ..
دخلن البنات جيلان وديلارا خايفات ووراهن امي ..
راسم دخل يركض من برة لان جان بالحديقة ..

امي بسرعة لزمت ايدي واني سحبتهة بألم ودموعي تنزل : ااااييي ..
لزمت ايدي على كيف : شبيج امي تأذيج .. بس خل ابردهة لا تلتهب ..

ما حسيت غير انسحبت من راسم لجهة المجمدة ..
فتحهة ودخل ايدي بس عالبرودة ..

غمض عيوني حيل من الالم .. احسهة تگطع بگلبي مو بس ايدي ..
راسم يرفع بالردان على كيف واني اصيح : لا فدوة عوفة والله تحرگني ..

راسم طابگ حواجبة : ما يصير تلزگ على ايدج .. تحملي لان اذا بقت توجعج بالزايد ..

التفتنة لجيلان الي هجمت على نعمة وجرتهة من شعرهة : وج هي حية .. انتي ما تمشين بالحجي .. وج وصلت بيج تحرگينهة .. احرگ عشيرتج كلهة ..

راسم راحلهن ونعمة گامت تعيط وتغلط ..
راسم : ها ها جيلان .. معودات فكن ..
فكهة گوة ودفع جيلان ..

التفت وعاط بنعمة : امشيي اطللللعي برة .. وعلي اذا بعد مديتي ايدج عليهة .. بس تعاملي مو وياج .. وية عمي .. يلة امشي ..

طلعت وهي تعد وتصف ..
التفتت واشوف امي لازمة ايدي وتنفخ عليهة ..
راسم اجة علية وهو معصب لزمني من ايدي الثانية : امشي اصعدي فوگ بين ما اجيبلج مرهم ..

امي حجت : لا عوفهة هنا .. خاف ايدهة توجعهة ..
راسم : عمة ما يحتاج .. اذا تردين اصعدي يمهة ..
واني اروح اجيبلهة المرهم من الصيدلية واجي ..

طلع راسم واني صعدت فوگ وامي والبنات وياي ..

اباوع لأيدي صارت حمممرة وبدة بيهة يبين اثر الانتفاخ .. الحرگ صار بساعد ايدي .. يعني مو بالجف .. بس هواي حرگ والالم مو طبيعي ..

گعدت عالجرباية وتذكرت : رضا .. رضا بقة وحدة جوة .. فدوة ديلارا جيبي لا يگعد ويخاف وحدة ..

راحت ديلارا تجيبة ..
رجعت شايلتة وحطتة بصفي وغطتة ..

شوية واجو هادي وجبران خايفين ..
هادي : مريومة بيج شي .. شو ايدج ..
جبران : خاف توجعج .. اروح اجيبلج علاج ..

هزيت راسي وگوة ابتسمت من الالم : لا حبيبي ما بية شي .. راسم راح يجيب علاج .. لا تخافون ..

هادي نزل راسة : مريم اسف والله ..
قاطعتة ولزمت ايدة : دير بالك تلوم روحك .. عمري كلة ما زعلت منكم على تصرفهة .. انتو بجهة وهي بجهة .. ما الومكم على شي بالتلي هي تبقى امكم ..

تقرب باسني بگصتي .. جبران دنگ يبوس بيدي ..
ابتسمتلهم وادعي بگلبي الله لا يحرمني منهم .. صدگ الاخوان نعمة .. الحمدالله محد منهم طلع على نعمة ..

جيلان واگفة ومتخوصرة وتهز برجلهة بعصبية ..
جبران ابتسم : جلاتينة اعصابج .. ترة عفت ابوي يتعارك وياهة ..

جيلان وعبالك جانت محتاجة احد يحجيهة : يطبهة طوب .. هي هاي ام لو انتقام .. شلون متحملينهة .. ليگول سعلوة ..

امي عاطت بيهة : جييييلللاااان ..
سحبتهة من زندهة وطلعتهة ..

ديلارا : لا تزعلون منهة ترة هي دوم هيج لسانهة متسيطر علي ..
هادي : ولا يهمج .. عاذرهة ..

التفت علية وباوع لأيدي : خو ما متأذية حيل ..
هزيت راسي واني الالم بي و ما يزيد بس احاول ابين اقل گدام الولد : لا احسن شوية .. هسة يخف ..

دخل راسم وبيدة علاگة العلاج ..
الولد وديلارا استأذنو وطلعو ..

راسم : گومي البسي شي للعكس حتى الف ايدج ..
گمت طلعت تراك صيفي اسود لبستة ورجعت گعدت .. هو رجع دخل ..

اجة گعدگدامي وطلع عصارتين وخلط ثنينهن سوة بصحن ..
مديت ايدي وهو لزم جف ايدي بأيد وايدة الثانية ياخذ بيهة المرهم ويحط على ايدي ..

ردت اسحب ايدي بس هو لازمهة حيل .. لزمت ايدة الي بيهة المرهم : فدوة عوفهة ماريد مرهم والله تحرگني .. عوفهة ..

راسم وبدة يعصب : اذا ما حطيت مرهم تلتهب بالزايد .. مريم مو طفلة انتي ..

طنگرت : هي هاي بيهة طفولة شنو .. ايدي توجعني اگلك وانت تگلي طفلة ..

جر نفس بصبر : مريم خليني احطلج المرهم لا تتأذة ايدج اكثر .. وعلى كيفج لا يگعد رضا واذا شاف ايدج يخترع ..

باوعت لرضا وعضيت شفتي وعفت ايدة الي لازمتهة ..
شال المرهم وصار يحط لأيدي وينفخ عليهة واني مغمضة عيوني حيل لان صارت تحرگني بالزايد وخايفة لا تتشوه ايدي ..

حجة بهمس : بعدج خوافة ما تغيرتي ..
رخيت عيوني وفتحتهة علي : ميسمونة خوف .. هذا الم ..

ابتسم ابتسامة جانبية : يعني تقنعيني هسة انتي ما خايفة لا تتشوه ايدج لو يبقى اثر ..
فتحت عيوني وهو دنگ يگمل وصار يلفهة بشاش خفيف : يبقى لو لا ؟؟ يعني تتشوه ؟؟

راسم : لا تخافين اثر حرگ المي والدهن والبخار كلة يروح .. بس لسعة الحديد والحرگ بالنار هذا يبقي اثر بمكانة ..

تنفست بأرتياح ..
حجة وهو يگوم : خلصت .. انتبهي لا تنامين على ايدج لا تنزلغ .. حطي مخدة جواهة حتى لا تنسين ..

حط العلاگة عالميز : هاي عوفيهة هنا حتى باجر اغيرلج الشاش ..
هزيت راسي : شكراً .. بس راسم انتة ما تعشيت ..

ابتسم وهز راسة : نامي نامي .. الهبطة مال عيطتج شبعتني ..
سكتت ورجعت حجيت : زين خل اگوم افرشلك فراشك ..

حجة بحدة : دنامي يا بوية نامي .. وينج ووين الفراش .. انة افرشة ..
راح للغرفة الثانية يجيب فراشة ..

راسم //

جبت الفراش من الغرفة الثانية وفرشتة بالگاع ..
تمددت وتغطيت واتذكر من اشوفهة شلون تتلوى من الم ايدهة ..
احس انة المحترگ مو هي ..

والله لو ما نعمة مرة جا عرفت شلون اتصرف وياهة ..
رجفة ايدهة وخوفهة وهي لازمة ايدي ما تريدني احطلهة المرهم كلهن يلسعن بگلبي ..

تنهدت وفركت وجهي ..
گمت اتگلب اريد انام ماكو ..

اباوعلهة هي هم تحوس وتأفف وكلساع رافعة ايدهة وتباوعلهة ..

راسم : شبيج ما تنامين ..
مريم : ايدي توجعني .. واني متعودة احطهة جوة راسي وانام .. وهسة من الالم حتى نومتي طارت ..

تنهدت : حتى انة نومتي طارت .. شلون بلة ..
ضحكت مريم : سحبت خط مني شنو ..
ابتسمت على ضحكتهة : شسوي اذا انتي تقلقين الواحد ..

باوعتلي وفتحت عيونهة : ياااا اني شعلية .. انت حجيت وياي ..
باوعتلهة : هسة شلون تنامين .. تردين احجيلج قصة ؟؟

ابتسمت : تعرف ؟؟
راسم : اعرف بس مو مثل قصصج الملك والملكة والارانب والبزازين التسولفينهن يومية لرضا ..

رفعت ايدهة وتنفخ عليهة : لعد شلونهن ؟؟
راسم : انة الاعرفهن قصص حقيقية مال گبل .. اقراهن بكتب الشعراء ..

ابتسمت : يعني قصة وشعر ..
هزيت راسي : اي ..

حطت راسهة عالمخدة ولازمة ايدهة المحروگة : يلة احجيلي ..

رفعت راسي ليفوگ وحجيت : اسولفلج قصة الشاعر حسين العبادي ..

شاعر قديم ويعتبر هو الاسس الابوذية شعر وطور ..
العبادي بشبابة حب وحدة من حية اسمهة (فطومة) ..

على گد ما جان يكتب بيهة الشعر وحبهة حب بس الله يعلم بي ..
صارو القاصي والداني يعرفون بحب الشاعر العبادي لفطومة ..

جان العبادي كل ما يخطب فطومة ما يطونهة الة .. لان مو من عشيرتة وهي اهلهة ما يطونهة لغريب ..
وهو جان يحاول بكل وسيلة حتى يطونة فطومة بس ما فاد ..

وبيوم جان الشيخ الجبير ناصر باشا السعدون الجانو يلقبونة ب ناصر الاشگر .. جان يتمشى بالقارب مالته بالشاطي .. ووصل يم المنطقة الساكن بيهة الشاعر حسين العبادي ..

التفتت عليهة شفتهة حاطة ايدهة السالمة جوة حنجة ورافعة راسهة وتستمعلي بتركيز ..
من شافتني باوعتلهة حجت بحماس : كمل ..

ابتسمت واني اشوفهة مركزة وياي ونست الم ايدهة وهذا الجنت اريدة من حجيت القصة حتى تشتت انتباهة عن ايدهة وتنساهة ..

كملت : من شاف الشاعر العبادي جية الشيخ ناصر باشا .. راح وسوة دائرة فارغة خالية من الزرع .. وجاب الدابة مالتة وصار يفتر بيهة على الدائرة ..

من وصل الشيخ ناصر وحاشيتة لحافة الشاطي وشاف حالة العبادي استغرب ..
طلب من حاشيتة يوگفون القارب وراح للعبادي وهو يعتقد ان العبادي مسودن من الجاي يسويه ..

صاحة الشيخ وسألة عن سبب حالتة ..
جاوبة العبادي وشكالة حالة ابيت شعر وعن حالتة بدون حبيبتة فطومة وگال ..:

هايم واسكن البيده بلا هام ..
وسعيد البات دلالة بلا هام ..
يباشا هم شفت دايس بلا هام ..
هذا حكم فــــطــومـة علية ..

مريم : اللله .. كمل فدوة شصار بعدين ؟؟

راسم : من سمعة الشيخ ناصر .. وعرف حالتة ..
گال ما امشي منا لحد ما ابذل جهدي واخلي العبادي ياخذ حبيبتة ..

راح الشيخ لاهل فطومة وتوسط عدهم حتى يطون فطومة للعبادي ..
وهمة ماگدرو يرفضون طلبة وجيتة الهم وما خجلوه وانطوه فطومة ..

ومن هاي الواقعة .. انعقدت صداقة قوية بين الشاعر حسين العبادي والشيخ ناصر الاشگر ..

مريم ابتسمت : همزين يعني تزوج فطومة بالاخير ..
راسم : اي تزوجهة من بعد ما شاف الضيم ..

حطت ايدهة على حلگهة تتثاوب ..
ابتسمت : نامي نامي .. نعستي انتي ..
هزت راسهة : ماشي تصبح على خير ..
راسم : وانتي من اهلة ..

نامت واني اباوع لشعرهة الذهبي الطويل الفاكتة ومتناثر ونازل من طرف الجرباية لان هي نايمة يم الحافة ..
تنهدت وغمضت عيوني .. صبرك ربي ..

ريما // ثاني يوم ..

گاعدة بالصالة بملل واتفرج عالتلفزيون ..
اجت خالتي هويدة گعدت : ها ريمي شو صافنة ..
رفعت اكتافي : ضايجة ..

ابتسمت : اليوم جمعة .. والعشى يم اهلي .. البنات اگلن گلبي يومية يگللي شوكت تجيبينهة .. ليش مترحين وياي اليوم ..

رفعت اكتافي : مادري خالة .. استحي منهم لان مشايفتهم من قبل واول مرة ..
حطت ايدهة على خدي : لا تخافين .. والله حبابات .. وانتي هم من تشوفينهن تتونسين وتتأقلمين ..

ابتسمت : اكو بنات بگدي ..
هويدة : اكو بگدج واكو اصغر منج بشوية ..
ريما : ماشي اشوف بابا اذا قبل اروح ..

ابتسمت هي وگامت وسحبتني وياهة : ماشي لعد .. گومي خل نحضرلهم الاكل بين ما يجون ..

گمت وياهة وورة شوية اجة ابوي وحارث وتغدينة سوة ..
حجيت وية ابوي : بابا خالتي هويدة گالت اليوم تعالي وياي للجمعة مال اهلهة .. اروح ؟؟

ابتسم : روحي بابا وية خالتج شكو بيهة .. وهمة هم يعتبرون خوالج ..
ابتسمت وخالتي كيفت ..

گمنة غسلنة المواعين .. ورتبنة المطبخ ..
من خلصنة هي راحت لغرفتهة ورى بابا واني صعدت لغرفتي ..

خابرتني جيلان وحجيتلهة على الي گالتة خالتي ..
بقيت احجي وياهة شوية وسديت التليفون منهة ..

گمت دخلت سبحت حتى اطلع ابدل لان گالت خالتي ان بابا من يطلع ياخذنة وياه يذبنة على اهلهة .. وبابا يومية يطلع ب ٤ لو ب ٣ ..

لبست بنطرون قماش اسود عريض .. ووياه قميص اسود ضيگ وردانة عريضة يسموهن ردان علاء الدين .. لفيت شالي الاسود ولبست عباتي وحذائي الاسود ونزلت ..

لگيت خالتي وابوي هستوهم نازلين ..
ابتسمتلي خالتي : يلة بما ان ريما جاهزة .. خل نمشي ..

اخذنة ابوي وياه ووصلنة لبيت اهل خالتي ..
مشيت وياهة متوترة لان ناس اول مرة اشوفهم ..

دخلنة للبيت ماشالله كلش حلو وجبير ..
اول ما دخلت شفت مجموعة بنات بالباب واگفات ..

خالتي من شافتهن : بسم الله .. شكو اليوم متجمعات بالباب ..
حنين : وعليكم السلام عمة ..

خالتي ضحكت وضربتهة على كتفهة : ام لسان ..
تقدمن سلمن على خالتي ..
اجن يسلمن علية وخالتي تعرفني عليهن : هاي براء وهاي اسماء وهاي حنين وهاي شهد وهاي ليلى ..

سلمن علية بهدوء وابتسامة حلوة ..
الا اخر وحدة الي جان اسمهة حنين .. سلمت علية برارة زايدة .. خالتي دخلت جوة ..

حنين : يختي واخيراً شفتج .. طگ گلبي على ما شفتج ..
ليلى گحت والبنات منحرجات منهة : حنييين ..

حنين بدون اهتمام : اووو وخري انتي وياهة .. اخيراً شفت بت عمتي الجديدة ..
سحبتني من ايدي واني امشي وراهة بكل طواعية .. ذكرتني بجيلان ..

شهد : حنين ترة البنية تگدر تمشي وحدهة شبيج .. وبعدين وين ماخذتهة .. غير تدخل تسلم بالاول ..

حنين : ها اي صح ..
اخذتني لجهة الغرفة الي دخلت الهة خالتي ..
بعدني ما داخلة واسمع صوت مرة جبيرة : يمة هويدة جا وين بتج .. شو ما جبتيهة اشوفهة واحبهة ..

انحرجت اشو الكل معتبريني بت بتهم .. معتبريني من العائلة وهمة بعدهم مشايفيني ..
تذكرت حجاية بابا من گال همة هم يعتبرون خوالج .. معناها لازم اعتبرهم خوالي مثل ما همة محترميني ..

دخلت اني والبنات ..
حنين : هاي بتهة حبوبة جبتهة ..
شفت مرة جبيرة بالعمر لابسة هاشمي وبيدهة عوجية ومبينة الهيبة بيهة تذكرت حبوبتي ام ضافر ..

حجت : مية هلا بيهة .. تعاي احبنج ..
تقدمت منهة ودنگت عليهة بست راسهة : شلونج حبوبة ..
سحبتني يمهة وحبتني بخدي وبراسي : يبعد حبوبتج .. فدوة لهالحلگ .. شلونج ..

هزيت راسي : الحمدالله بخير ..
ام فاضل : عساج .. خاف هويدة تغثج بس گليلي ..
هويدة : يااا يمة .. بعدنة بسم الله شبساع گلبتي علية ..

ابتسمت اني : لا والله حبوبة خالتي هويدة كلهة خير وبركة .. محد يوصلهة ..
ابتسمتلي خالتي : سمعتيهة بأذنج يمة .. هسة صدگتيني من اگلج والله احبهة واعتبرهة مثل بنتي ..

ام فاضل : جا يمة هسة انة شحجيت شگلت .. جا ما اعرف بتي واعرف گلبهة .. وهلى نياتهة الله اطاهة هالوردة هاي ..

حنين : يووو حبوبة راح تگلبينهة مسلسل واحنة نريد ناخذ البنية ..
ام فاضل : اخذيهة دهر دهر لسانج ..

گمت سلمت على اخت خالتي هويدة الي سلامهة هم جان حلو مثلهن وكلة ترحيب ..

گمت وية البنات وگعدني بغرفة ثانية ..
اكثر وحدة تسولف هي حنين .. او بالاحرى تسأل ..

حنين : والله طلعتي حلوة حتى احلى من اخوج الصاك ..
ابتسمتلهة : حبيبتي انتي هم حلوة والله ..

حضنتني حيل : يختتتييي وين جنتي من زمان .. هذني هبطن معنوياتي گد ما يگللي ام كفشة والقزمة ..

ابتسمت : حرام عليكم منو گال الي شعرهة كفشة مو حلوة .. بالعكس والله كلج برائة وكيوت وتخبلين حتلو قصيرة ..

ليلى فتحت عيونهة على وسعهن : برائـة ؟؟؟
براء : هي گالت برائة لو اني سمعت غلط ..
اسماء : يمكن گالت ..

حنين صاحت بصوت خشن : خييييير انتي وياهة .. اليسمعجن ايگول مشمرتجن بحجار يومية ..

شهد : لا حشاج حبيبتي .. البرائة تخر من اذاناتج وخشمج ..
ضحكت على كلامهة ..
حنين گلبت وجهة : هيهيهي بايخة يالمقرفة ..

ليلى : حبيبتي ريم معليج بيهة ترة هاي مكسرة من كل الجهات لا خلقة ولا اخلاق ..
حنين حطت ايديهة على اذاناتي : لا تسمعين منهة ريم ترة ذني حتى مسيلمة الكذاب يتعلم منهن ..

ضحكت : ليش شادات وياهة .. حلوة وطبعهة احلا .. وانتي حنين لا تتأثرين بكلامهم ..
حنين بغرور حركت شعرهة الكيرلي : هه اصلا اطبب منا اطلع منا ..

خلصناهة سوالف اني والبنات لحد ما صاحتهن امهن يجن يصبن العشا ..
گامن واني گمت اساعدهن .. گالن ماكو داعي للعباية الولد ما يدخلون الا يتحمحمون واحنة نگللهم ..

دخلت وياهن للمطبخ وگمنة نصب بالعشا وما خلت من سوالفهن وضحكهن .. فعلاً يونسن الواحد ويطلعنة من الجو مالتة ..

البنات شالن السفرة وفرشنهة وانطن سفرة الزلم وصارن يطلعن الهم الاكل برة وهمة يجون ياخذونة بدون ميدخلون للمطبخ سمعتهن يحجن عجاج وعامر وحامد لا تدخلون هنا بت عمة هويدة صارو ياخذون الاكل وهمة برة ..

خلصن من سفرة الزلم وبلشن يشيلن اكل النسوان ..
البنات اخذن الاكل كلة وبقت اخر صينية شالتهة شهد واني واگفة يمهة ..

ليلى صاحت وهي بالصالة : شهد جيبي الخواشيگ وياج ..
شهد جانت شايلة الصينية ..
حجيت : اني اجيبهن بس وينهن ..

اشرتلي على مجر : هناك بالمجر .. حطيهن بماعون وجيبيهن ..
هي طلعت واني رحت طلعت الخواشيگ غسلتهن وحطيتهن بماعون ..

طلعت وصلت للباب الا وانلطخ بجسم صلب ما انتبهت لان وية ودخلتة اني اطلعت ..
الخواشيك تطشرن بالكاع وبس الماعون بقة بيدي ..

اجيت اطيح ليورة بس انجريت من زندي حيل وعاط بية : عمممى وثوول غير تنتبهين ..

رفعت عيوني بسرعة ومباشرةً صارت گدامي عيونة الزرگ ..
بس باوع بوجهي ارتخت حواجبة ورمش بعيونة مصدوم ..
فك زندي وحجة : منو انتي ؟؟ عبالي وحدة من البنات ..

اني من صدمة الموقف والاحراج وعلى گد ما سمعتهم اليوم يرددون بت هويدة بت هويدة ..
حجيت لا ارادياً : اني بت هويدة ..

اعتلت ابتسامتة على شفتة وحجة : حي الله بت اختي هويدة ..
طبگت حواجبي : اختك ؟؟
حجة بأبتسامة : اي اختي .. انة رياض ..

فتحت عيوني مصدومة هو هذا رياض والي يسمونة ابو فضل .. والله توقعتة جبير بالعمر ..

حجة بهدوء : وين صفنتي بوية .. اخذي راحتج اعتبري نفسج ابيتج ..
هزيت راسي منحرجة : شكراً خالو ..

اجت ليلى : ها ريم وين صرتي .. خالو رايد شي ؟؟
رياض التفت عليهة : اي ..
ليلى : شنو هو ؟
رياض : نسيتة ..

ليلى باوعت على الخبز الموجود عالميز : اجيت عالخبز مو .. لان هذا هنا ..
رياض : اي عالخبز ..

ليلى التفتتلي : ريم حبيبتي روحي اني راح اجيب الخواشيك وياي ..

اجيت اريد اطلع بس هوة ماشالله ساد الباب بعرضة : احم .. شوية خالو ..
ابتسم وسوالي مجال : فوتي خالو فوتي ..

مشيت واني احس قطرة دم ما بقت بوجهي ..
شگد فشلة .. ادور الخواشيگ ترست الگاع ..
تذكرت شكلة يشبه ليلى حيل ..

هزيت راسي انفض افكاري ودخلت يمهن ..

جيلان //

گاعدين بالمطبخ ..
يمنة اخت نعمة (ام بسمة).. بس سبحان الله فرق من السما للگاع .. هاي الواحد من يباوعلهة يرتاح ولا جنهة اختهة ..

بسمة گاعدة يمنة بالمطبخ ..
دخلت مريم وسلمت على بسمة : وييين بسومة صارلج كومة مجايتنة .. شدعوة هالگد گاطعة ..

بسمة ارتبكت : ها .. لا بس مشغولة وامي ملتهية بأختي هستوهة جايبة واني يمهة ..

استغربت ارتباكهة .. وما مشة علية عذرهة ..

شوية وانفتح باب المطبخ بسرعة ودخل جبران : جلاتين جيبي مفتاح المخزن من حبوبتي اريد الــ ..

وگف من شاف بسمة گاعدة ..
يباوعلهة متفاجئ ومرتبك ..
طبگت حواجبي : جبران شتريد ؟؟

ما رد علية وحتى ما التفتلي وعيونة بس على بسمة ..
بسمة گامت وانصدم من اشوف عيونهة مغورگة وطلعت من المطبخ وطبت جوة ..

مريم حجت بصوت حاد : جبران شبيهة بسمة ؟؟

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري ✍🏻

هلو بنات شلونكم 😘😘 يمكن متصدگون اذا كلتلكم اكثر قصة متحمستلهة هي قصة جبران وبسمة 🖤
توقعاتكم عالسريع 😍

احبكم كوووومة .. ولا تنسون صوتو وعلقو وكلشي ينداس دوسو ..