رواية بنات للزمن الفصل الخامس والعشرون 25 - بقلم سارة الشمري

الكاتبة : سارة الشمري🖤

ري العمر مشوار تكضي أيامه وتعدي
ولو أدري الوكت دولاب ياخذبينه ويودي
جا ما شمت الشمات بيه ولا خنت ودي
ولاخليت دمعي يسيل تيزاب وحرك خدي
مو انته الكلت ما أعوفك واخلف بوعدي
أشو نص الدرب يفلان وتبريت من عندي
لحيمي ودج عليه الريش وجناحك كوه بجبدي
كل هذه التعب والطيب ضيعته وصرت ضدي

بنات للزمن //
البارت الرابع والعشرون ..

جيلان //

نفتر بالبيت ومخبوصين نحضر بأغراضنة ..
بابا گال نروح كلنة للمزرعة مال جدو نغير جو وناخد يومين ونرجع حتى وراهة بيومين نحضر لعقد ديلارا ..

اجة جبران جايب المسواگ الي ناخذة ويانة ..
رتبناهن بسلال وحبوبتي كلساع وصاحت خاف نسيتن فلان شغلة ..

دخل هادي الي وصيناه على الحلويات والحبشكلات وهالسوالف ..
شايل بيدة ورقة الطلبات : اريد افتهم منو الكاتبة الشاني خمس مرات .. ماخذة نص الورقة هو عمى لو ثول ..

ابتسمت : اني .. حتى أكد عليك متنساه ..
حطهن يمي وراح ينزل باقي الاغراض ..

كملت واني متحمممسة لان جدو جان دائماً يحجيلنة على مزرعتة ويگللنة يجي يوم واخذجن تشوفنهة وامشيجن يم النهر .. ويشوفنة صور الة بالمزرعة ..

واكبر فرحة الي من گالت نعمة اني ماروح هاي العايزة اطلع وية زمن وبناتهة.. يابة ردت اگوم ابوسهة واگللهة براحتج يگلبي ..

دخلت ريم من برة هستوهة جاية حتى تروح ويانة ..
رحتلهة بسرعة سلمت عليهة : ريييما .. همزين اجيتي ..
ابتسمت هي بحماس : ايييي واخيراً راح نروح للمزرعة .. صارلي هواي مرايحة .. عندي هواي شغلات اريد اشوفهة الج هناك ..

هزيت راسي : ايي واني اشتريت حبشكلات وهالسوالف ..
ريما : وجبران عزم اهل بسمة اخوهة وامهة بس علمود هي تروح ..
ضحكت : اكبر لوتي ..

هذا كلة احنة نسولف بالباب ..
التفتت شفت حارث مايل جسمة عالباب ويباوعلي وصافن علية ..
ريم : احححم .. ابو عَباد نزل الغراض لا تصفن ..

ابتسم ودار وجهة راجع للسيارة واني بلعت ريگلي ..
لابس بدي ابيض ضاب جسمة وبارز عضلات ايدة ..
وياهة بنطرون اسود .. شدعوة هالكد حلو ..

دخلت بسرعة من سمعت ريم صاحتني ..
حضرنة الغراض وصعدت احضر روحي ..
سبحت وعفت شعري مبلل مفتوح ..

بدلت ملابسي .. لبست جينز ازرگ ووياه قميص ماروني قصير .. حطيت شال على رگبتي والعباية بيدي واخذت جنطة ملابسي والجنطة اليدوية ونزلت ..

ديلارا طول الوقت هادئة .. مريم تحضر بملابس ابنهة وملتهية بي وتحضر بملابس راسم .. راسم ما يروح ويانة هسة بس العصر من يخلص دوام يلحگنة ..

صعدنة السيارات .. اني وديلارا وريم وماما وية جبران ..
ومريم وابنها وحبوبتي وية بابا ..
السيارة الثالثة جان بيهة هادي وحارث والاغراض ..

مشينة والطريق كلة احنة ناكل ..
خالة هويدة مسوية كيك ودازتة بيد ريم وگاعدين ناكل ..

ورة ساعة او اكثر تقريباً وصلنة للمزرعة .. واتوقع المزرعة خارج كربلاء ..

اول ما نبدي نوصل الطريق طويييل وترابي ضيق واطرافة قصب وخضار .. منضر حلوو ..

وصلت السيارات لباب المزرعة وسيارة بابا دخلت اول شي ..
اباوع رجال جبير بالعمر فتح الباب الخارجي مال المزرعة حتى السيارات تدخل ..

ابتسمت على جمال المكان كلة خضار وطبيعي ..
نزلنة ودخلنة جوة .. الولد نزلو الغراض ..

البيت حلو ومرتب ..
اول ما دخلنة رتبنة الاغراض ..

واحنة حجزنة النة غرفة بوحدنة اني والبنات ..
امي وحبوبتي بالصالة ..
وبابا والولد بالديوانية ..

ريم سحبتني من ايدي : كومي عود بعدين نعزل اغراضنة .. خل نروح نفتر بالمزرعة شوية ..
گمت وياهة : ماشي .. يلة دلوو ..

ديلارا باوعتلنة وهزت راسهة : مالي واهس .. روحو انتو .. اني تعبانة من الطريق ..
تنهدت عفتهة براحتهة ..
رضا جلب ويانة الا يروح .. اخذناه ومشينة ..

طلعنة نتمشى اني وريم ورضا وهي متحمسة واني مثلهة ..
نتمشى وهمة اصواتهم عالية فارشين بساط برة وكاعدين يضحكون ..

اخذتني ريم لغير جهة وتمشي تأشر على كل مكان وتحجيلي عنة ..
اشرت عالشجرة : شوفي هاي النخلة جنت اكعد اني ومريم ونحفر ونضم هنا بصفهة ومن نرجع نجي مرة ثانية نطلعهن ونحط بمكانهن .. بس نلگاهن خربانات لان يتبللن من يسگونهن ..

رجعت اشرت عالعربانة ام التاير الحديد بيهة سندانات مال زرع .. اتذكرهة يشيلون بيهة العمالة طابوك ..

ريم بضحك : شوفي هاي العربانة .. جان اكو وحدة مثلهة وراسم يصعدنة بيهة اني ومريم من جنة زغار ويدفعنة ..

مشينة شوية شفت فرس بيضة ..
ابتسمت بحماس : فرررس .. هاي المن ..
تنهدت بحزن : ام هاي الفرس جانت لجدو .. كلش يحبهة ..

ابتسمت وكملنة تمشي ..
گمزت وعطت : تتتتكييييي ؟؟؟؟
ريم حطت ايدهة على گلبهة : يممممة گمزتيني ..

رضا اشر عالشجرة ويجر بريم : عمة اريييييد ..
فركت ايدية واني روحي راحت عالتكي الي جنة لون الدم وكبار واني اضعف گدام الفواكه الحمرة وابسط دليل حبي للشاني .. : انييي هم اريييييد ..

ريم : عوفوها بعدين اگول للولد يجيبولجن ما تشوفون الشجرة عالية .. امشو ..
رفعتلهة عيوني : كولي والله .. من كل عقلج امشي بدون ما اكل ..

ريم تخوصرت : وشلون تصعدين بلة ..
باوعت لگيت گونية بيضة بالگاع ..
فرشتهة جوة الشجرة ..

لگيت جذع شجرة حيل متين الي يكصوهن من الشجر الكبار ..
دهربتة بالكاع ودفعتة وحطيتة يم الشجرة ..

ريم فاتحة عيونهة : راح تصعدين ؟؟
هزيت راسي بأبتسامة : يسسسس .. اصعد واهز الشجرة والي يطيح عالگونية ناكلة ..
ريم : ومنو يگول الگونية نضيفة .. وبعدين لا تطيحين ..

هزيت راسي : حبيبتي بيتنة القديم جان بمزرعة .. يعني لا تخافين .. واذا عالگونية ترة نغسلة للتكي قبل لا ناكلة ..

حطيت رجل على الغصن الجبير ..
ورجل ثانية رفعتهة عالشجرة وايدي متمسكة بغصن الشجرة ..
بثانية صرت فوك الشجرة وعبرت رجلي اليمنة عالغصن ..

رضا يگمز : اريد اصعد اني هم ..
ريم : لا حبيبي هاي مسودنة معليك بيهة .. انت بعدك زغير ..
نتر بيهة : اني مو زغير .. عمو راسم ايگول انت جبير ..
برطم وزعل ..

اني هزيت الشجرة وگام يطيح من كل جهة التكي ..
حتى شعري وگع علي تكي وتراب ..
كملت وردت انزل .. اباوع شو هاي النزلة تخوف مو مثل الصعدة .. الگاع بعيدة ..

ريم تخوصرت : وهسة شلون تنزلين ..
ابتسمت وشبكت اصابعي ببعض : هيج سوي ايدناتج خل احط رجلية عليهن ..
فتحت عيونهة : لا بلة ..

توسلتلهة : يلة حبابة .. عليج الله جا ابقى هنا ..
باوعتلي بعصبية ..
شبكت اصابعهة مثل ما گتلهة وحطيت رجلي عليهن ورجلي الثانية عالغصن ونزلت ..

شلت الگونية ورجعنة للبيت ورضا الطريق كلة مطنگر ..
دخلت وغسلت التكي وگعدت بالمطبخ اكل اني وريم ..

دخل حارث مبتسم ..
اشر لريم : يحلوة جيبيلي الشاحنة المتنقلة مالتي .. اخذتيهة وبعد ما رجعتيهة ..

گامت وهي تأفف وراحت لغرفتنة : افف هسة شصار من شحنت بيهة شوية ..
باوع علية ومد ايدة اخذ من التكي الي بالماعون واكل ..

باوعلي وطبگ حواجبة وتقرب مني ..
رجعت ضهري ليورة مستغربة .. : شبيك ؟.
ما رد علية ومد ايدة بأتجاهي ..
طبگت حواجبي شديسوي ..

ايدة راحت لشعري وسحب منهة شي .. : حارث شنو هاي التصرفات ..
باوعلي ببرائة ورافع بيدة ورقة شجر يابسة : شبيج شمسوي .. ورقة شجرة لازگة بشعرج ووخرتهة ..

باوع للورقة وياجي بيهة : هنيالج عمي .. وين جنتي حاطة .. الله يطينة من حضج شوية ..
وجهي صار احمر ودنگت اكل تكي حتى لا اباوعلة ..

تنهد وحجة بحسرة : تكي وياكل تكي ..
رصيت على سنوني ووجهي شاب نار : حااارث ..
ضحك على شكلي : طراطيش گلبة ..

دخلت ريم وبيدهة الشاحنة : هاك شاحنتك .. وروح بسرعة ترة صوتك عالي .. مفضوح بعد اختك ..

ليلى //

گاعدة بالصالة مال بيتنة بعد ما جبرتني امي انزل يمهة لان صارلي اسبوع حابسة روحي بالغرفة ..
وعباس لهسة ما اتصل علية .. واني گلبي وعقلي يمة ..

دخل عامر من برة يخابر ويضحك : انت اليوم جنك مطلگة وماخذين جهالهة .. لا جبران ولا حارث يمك ..

.. ولا يهمك حبيبي جا اني وين رحت ..
.. تسلم گلبي ما تقصر ..
.. خوش مادام انت وحدك واني وحدي تعال تغدة يمنة اليوم ..
.. يمعود لا زحمة ولا شي .. دتعال نگعد نسولف ..
.. هايهية انتضرك ..

تنهدت بملل .. معناهة تعالن اگعدن سون غدة ..

سد التليفون وباوعلي عامر : ام اللول شبيهة صارلهة اسبوع مو على بعضهة .. ليش ما نشوفج ..
خنگتني العبرة اجيت اگلة لا تشكوني ترة ابجي : تعاركت اني وصديقتي وزعلت مني .. وهسة احاول اراضيهة بس ماعرف شلون ..

ابتسم وگرصني بخدي : شوفيهة هي شتحب تسويلهة انتي وتفرحينهة وسوي الهة .. حاجيهة بكلام حلو .. اذا تحبينهة هالگد معناها خوش صديقة .. لا تخسرينهة بسهولة وراضيهة اذا جنتي انتي الغلطانة ..

ابتسمتلة وفعلاً كلامة صحيح ..
هو باوع لامي الي دخلت هسة : يمة اليوم عازم صديقي عالغدة .. سوولنة اكل على گدنة .. لا تكثرين ترة بس اني وياه ..

گمت اني وعفتهم يسولفون ..
صعدت لغرفتي وقفلت الباب ..

طلعت تليفوني واني طفح الكيل عندي ..
قلقانة علي .. عباس ميسويهة ويگطع بية هيج ..

طلعت رقمة ولاول مرة اتصل علي ..
ورة جم رنة اجاني صوتة : ليلو بيج شي ؟؟
دموعي نزلت وگعدت بالگاع وابجي : انت بيك شي ؟؟ ليش عفتني هيج ؟ مو والله ردت اموت من القلق ..

عباس : اسم الله ياروحي.. عذريني يا بعدهم كلهم .. ردتج تحسين بية لو شوي ..
ليلى : وهيجي تخليني احس بيك ؟؟ تگطع بية ومتحجي وياي .. شنو لان گتلك صديق .. عمي جذب والله مو صديق ..

عباس : بسج بجي والله مردتي گلبي .. عمي انة الاسف .. والله ماتحمل گلبي شكثر اكلج احبج وانتي تگولين صديق .. شتحمل بعد ..

هزيت راسي : مو صديق .. اني هم احبك والله .. لو تدري شصار بية من ما حجيت وياي ..
قاطعني : شلون شلون ؟؟ عيدي شگلتي ؟؟

ابتسمت من بين دموعي وگلبي يدگ الف : احبك عباس والله احبك .. وهسة اكتشفت هالشي من بعدت عني ..

صوت تنهيدتة وصل لعندي : بوووية وينك حويرث وابوسنك من شاربك ..
طبگت حواجبي ما فهمت : شنو ؟؟

عباس : لون ادري جا من الاول وگطعت ..
طبگت حواجبي بزعل : هاي شنو لا تحجي هيج ..
عباس : والله جا عايفتني اجر بحسراتي بوحدي ..

ابتسمت : اسفة بعد ما تنعاد وانت هم لا تعيدها ..
عباس : وج ليلو ؟
ليلى : والله مشتاقة لهالكلمة منك .. گول ؟
عباس : والله اعشگج ..

تنهدت وجان يندگ الباب گمزني وصوت شهد : وج لولو انزلي ماما اتگول خل تجي نحضر الغدة راح يجي صديقة لعامر ..

رفعت صوتي : اي جاية ..
حجيت بصوت ناصي : عباس لازم اسد التليفون .. ماما تصيحني ..
عباس : اخذي راحتج يگلبي ..

سديت التليفون منة واني احس هم وانزاح من عن گلبي .. اوووف هسة ارتاحيت من سمعت صوتة وحجيت الي بگلبي ..

شمرت التليفون ونزلت نفسيتي متغيرة عن مساع حتى امي انتبهت ..
سوينة الغدة ونفسيتي انفتحت عالطبخ ..
تفننت بالمقبلات وزينتهن مادام بس ماعونين هنة لان گال بس هو وصديقة ..

اجة عمار تفحص الاكل گال شوية ويجي صديقي ولا تفشلوني اول مرة اعزمة ابيتنة ..
حضرنة الاكل ..
شوية واجة عمار سد الباب مال المطبخ لان مفتوح عالطرمة حتى يدخل صديقة ..

شايلة بيدي الماعون الفارغ اريد اقطع بي الفواكه ..
اختي شهد مثل كل مرة بلگافة ركضت للشباك تريد تشوف صديقة لعامر ..

ابتسمت : والله طلع حلو صديقة .. باعي مبين من لبسة وجراويتة شروگي ..
رحت باوعت بفضول .. شفتة داير وجهة : وينة ما يبين ..
شهد : هسة من يريد يدخل وجهة يصير لهالجهة وشوفي ..

دار وجهة هو وعامر يدخلون للديوانية ..
فتحت عيوني بصدمة واحس الدنيا طاحت فوگ راسي ..: عباس ؟؟
شهد باوعتلي مصدومة ..

طاح الماعون من ايدي وانكسر جم قسم ..
گمزت على صوت طيحتة ودمعة طفرت من عيني ..
دخلت امي بسرعة من الصالة : شكو شنو الانكسر ..

اني مدنگة عالماعون ومسحت دمعتي ..
شهد بسرعة : ماكو شي ماما الماعون طاح من ايدهة .. هسة انضفة ..
امي : يلة فدوة ما صار شي .. بس نضفي الگاع زين حتى لا تنجرحن ..

طلعت امي للصالة تكمل صلاتهة ..
شهد دنگت علية وگومتني : شبيج انتي شجاج هيج انبلعتي من شفتي .. ومنو عباس ؟؟
هزيت راسي ودموعي نزلت واشر عالديوانية : هذا عباس .. صديق عامر .. عباس هو صديقة لعامر ..

سحبتني بسرعة وصعدتني فوگ ..
طبگت الباب وباوعتلي بخوف : ليلى منين تعرفينة لهذا .. احجي شبيج خفتي ..

ضربت على رجلية : ولج هذا عباس الي احبة .. صارلي فوك الشهرين احجي وياه ويحبني .. والله مادري بي صديق عامر ..
ضربت على خدودهة : عزا العزاج على هالعملة .. وج شمسوية ؟.

مسحت دموعي : والله هو راسلني وضل يحجي وياي من شافني مرة بالمجمع اني وبراء .. وبعد ما شفتة ابد .. بس شهد والله احبة تعلقت بي .. شسوي اني بعد گليلي .. شلوون بية شهد .. طلع صديق اخوية ..

شهد : وهو يدري شنو ..
هزيت راسي بسرعة : لا ميدري والله .. اصلا لو يدري مستحيل يبقى وياي .. هو دوم ايگول ربعي عندي بالدنيا .. وما اخونهم لو على گص رگبتي ..

شهد : زين بلكي انتي ما ركزتي بشكلة .. يمكن مو نفسة ويتشابهون بس ..
هزيت : اعرفة كلش زين .. يدزلي صورة .. وعندة صور بهاي دشداشتة ..

شهد باوعت من الشباك وحجت : ليلى هذا طلع .. راح يدخل للحمامات يمكن يتوضى .. شوفي بلكي مو هوة ..

گمت وگفت يم الشباك واخذت تليفوني وفتحتة واتصلت على رقمة ..

رافع ردانات دشداشتة وشكلة يتهيئ يريد يتوضى ..
شال الجراوية من فوگ راسة وحطهة على كتفة ..
مد ايدة بشعرة الثخين يحركة من بعد ما شال الجراوية ..

مد ايدة بجيبة وطلع تليفونة ..
باوع للتليفون وابتسم ..
فتح خط واني اباوعلة من فوگ : ها ليلو بسرعة واحشج ..

مسحت دموعي وسويت نفسي اضحك : يوو اتصلت عليك .. ردت اتصل ببنت خالي .. اعذرني ..
ضحك واني اباوع لضحكتة وغمازتة الخفيفة مبينة من ورة لحيتة : اي بوية تصير تصير .. سبحانة الما يغلط ..

سديت التليفون والتفتت على شهد وهي تباوعلي ..
شهد : ليلى عوفي .. والله عامر بس يدري يگلب الدنيا عليج وعلي ..
هزيت راسي : لو اموت ما اعوفة .. اني اسبوع مگدرت ابقى بدون ما احجي وياه .. شدتحجين انتي ..

شهد : لعد شلون .. گليلة انتي .. كولي اني اخت عامر صديقك ..
وگفت : اذا درى هو يعوفني متأكدة من هالشي ..

هزت راسهة متنهدة : واذا درى بيج ضامة عنة هالشي شلون بعد يثق بيج .. لشوكت تبقين ضامة هالشي .. اذا فعلاً نيتة يخطبج معناها اول وتالي يدري ..

سكتت ماعرف شنوارد بس ماريد اخسرة .. ما اگولة شي ..

بسمة //

وصلنة للمزرعة اني وماما واخوي صلاح (بابا متوفي) ..
دخلت رحت يم البنات ..
التمينة وجمعتنة حلوة ..

شوية وخابرني جبران ..
طلعت من يم البنات على جهة ..
فتحت خط وهو حجة : المزرعة هسة يلة صار بيهة هوى واوكسجين وخضار .. جانت خنگة ..

ابتسمت : بوجودي يعني ؟
جبران : لا بوجود خالتي ام صلاح الله يحفضهة ويطول بعمرهة ..
رفعت حاجبي : ها خوش .. خلي خالتك تفيدك لعد ..

ضحك : وج بسومتي مشتاقلج .. وين اشوفج ..
بسمة : لا عيب منا اهلك ..
جبران : شني عيب .. بايگ ناهب ؟ غير مرتي .. اگللهم راح اطلعهة ونتمشى وفنة اليفتح حلگة .. يلة حضري روحج انتي ..

ابتسمت : ماشي اگول لامي بالاول .. واشوف البنات ..
عاط بية : البنات شني .. وحدنة بوية وحدنة .. شصخم بيهن البنات ما شايفهن شني ؟؟

ضحكت : اعصابك اتشاقة والله ..
سديت التليفون منة ورحت گلت لماما گالت روحي بس لا تتأخرين ..

رحت لبست شال ومثل صاية خفيفة كلش فوگ البنطرون وتبقى مفتوحة من گدام لونهة بنفسجي غامق واطرافهة ابيض ..

طلعت لگيتة ينتضرني بالباب لابس دشداشة رمادي ..
ابتسم من شافني ومد ايدة اتجاهي : هلة بهالطلة ..
مديت ايدي وحطيتهة بيدة : هلا بيك ..

مشى بية للجهة الثانية مال المزرعة بعيد عن جهة الزلم ..
رفع ايدي وباسهة ..: تدرين عزمت اهلج كلهم بس حتى اشوفج ..

رفعت حاجبي : لا تجذب عمو عزمهم ..
طبگ حواجبة : غير اني گاعد يمة واتوسل يلة وافق ايگول شأكللهم هذا يريد خطيبتة تروح وياه ..

ابتسمت : امم يعني متگدر تجي للبيت تشوفني .. بس مرة وحدة اجيت ..
سحبني من ايدي يتمشى بية ويأشر عالزرع : ليش هالزرع والخضار مو احسن من البيت ..

حاوط ايدة على كتفي وقربني من صدرة : ادور انتي يمي .. شرفة عيونج وية هالهوة النضيف .. الواحد شيريد من ربة بعد .. بنص النعمة والخير ..

حطيت راسي على صدرة وغمضت عيوني : اني وجودك يمي هو بحد ذاتة خير من الله ..
رفع ايدي وباس راحة الكف(باطن) : بسومتي تدرين اتمنى اضل منا لسنة ساكت وما اسمع غير صوتج .. طمأنينة والله .. بلا صوت جلاتينة بلا ريمي ..

ضحكت : حرام عليك ترة احبهن وما ارضى عليهن ..
رفع حاجبة : هااا اشوف اجتمع حزب الجنة والحماة ..

بقينة نفتر ونتمشى .. فرحتي وضحكتي ما فارقتني ..
هذا حلم طفولتي يتحقق .. احبة واعشقة وهسة حلالة ..

اخذنة صور سوة .. افترينة يم البطات وصورنة وياهن ..
وبعدين رجعنة للبيت ..

راسم //

وصلت للمزرعة اباوع للساعة ٣ العصر ..
نزلت اني ووياي رضوان الي بقيت الح علي وخابرني عمي عاصم گال جيبة وياك اني منعتة من دخلة البيت خاف يشوف البنات بس گتلة حدك للديوانية .. وهسة حتى للمزرعة ما يرضى يجي ..

سحبتة وياي وجبتة للمزرعة ..
نزلنة اني وياه ..
لاگانة العم ابو عوض .. الي عايش بالملحق مال المزرعة هو ومرتة بس ولدة متزوجين كلمن ابيتة .. وهو هنا يهتم بالمزرعة ..

سلم علينة بفرحة : ياا هلااا بولد الغالي .. والله نورتو المزرعة ..
ابتسمت وسلمنة علي .. : بيك اكثر عمي منورة بوجودك ..

باوع لرضوان : الله جابك .. رايدك بمهمة ..
رضوان : امرني عمي ..
ابو عوض : مادام انت تعرف بالتصليح والكهرباء .. ما تشوفلي المبردة شمالهة .. صارلهة بالشهر تعتعت ..

رضوان : عمي يا مبردة .. الشتا اجانة ..
ابو عوض : بوية تفيدنة بالشتا نشغلة تدفي مو تبرد .. هي عدنة من زمان جابهة الحجي ابو حافظ الله يرحمة .. وتشتغل كلشي مابيهة .. بس گتلك صارلهة شهر ومدري اجتهة عوينة ..

رضوان ضحك : هاهية عمي صار تدلل .. بعد شوي نروح انة وياك نفكهة ونفصخهة ونشوف شبيهة ..
هز راسة : انة گلت محد الهة غير رضوان ..

دخلنة شفناهم گاعدين عالبساط برة ويحضرون الفحم يردون يشوون شكلهم ..
من شافونة الولد وبينت الفرحة بوجوهم من شافو رضوان ..

گعدنة ودگ تليفون جبران : ها مريم ..
طبگ حواجبة : اوگفي شبيج ..
استغربت وباوعتلة ..

هز راسة : تتشاقين وياي شني .. رضا مو يمنة وما اجة علينة اصلاً .. شلون مو يمج .. وين راح ؟؟؟

الكاتبة : سارة الشمري🖤
هلو شلونكم مشتاقتلكم ..
اتمنى حبيتو البارت .. ولا تنسون صوتو وعلقو وكلشي ينداس دوسو ..