رواية بنات للزمن الفصل السادس والعشرون 26 - بقلم سارة الشمري

الكاتبة : سارة الشمري🖤

اريد اعلن حداد وللعشك ماعود
واريد انساك ونسة البينك وبيني
وشك دفتر غرامك خاطر انة انساك
ودير الوجه عنك من تلاكيني
ماريدك بعد لو انت روحي اتصير
وماريدك لون من موت تحييني

راسم //

وگفت على حيلي بسرعة وكلهة وگفت وياي وعيونة على جبران ..
سمعت صوت صياح من جوة ..

رحت بسرعة للبيت صارت بوجهي جيلان : شكو .. رضا وين ؟؟
جيلان بخوف : مادري عبالنة يمكم من مساع لهسة ..

فتحت عيوني : شلون ما تدرون بي ..
دخلت للبيت ونزلت ريم من السطح تركض : ماهوة .. مموجود فوك .. مو اگللجن شفتة طلع من مساع .. عبالي راحلهم ..

شفت مريم كعدت بالگاع وتبجي وتضرب على وجهة : يمة ابني وين راح ..
لزمت ايدهة حيل : اووكفي .. وين يروح يعني .. اكيد يفتر بالمزرعة .. ما طلع برة لان البيبان مقفلة ..

باوعتلي بترجي ولزمت ايدي : فدووة راسم جيبلي ابني .. دورلياه .. والله اذا ما لگيتة اموت روحي ..
لزمتهة من خدهة : كافي كتلج .. رايح ادورة وما ارجع الا هو وياي لا تخافين ..

حطت ايدهة على حلگهة وغمضت عيونهة ..
گامت بسرعة وخرت مني وراحت للحمام .. اجتهة حالة الغثيان ..

طلعت اني من البيت بسرعة ..
رحت ادور بالمزرعة اني والولد كل واحد راح من جهة وهي المزرعة بساتينهة كبار ..

اركض من كل جهة واصيح : رضاااا ..
الولد كلهم يصيحون ..
ادري بي بداخل المزرعة وما طلع لان البيبان مقفولة ..

بقينة ساعتين ندور واني الخوف بدة يزيد عندي اكثر واكثر ..
حارث اجة علية : ماكو بالمزرعة كلهة .. امشي ندور برة ..

هزيت راسي : ما يطلع حارث ما يطلع .. مو سألت ابو عوض گال البيبان مقفولة وهو طول الوقت برة كال ما شفتة طلع لجهة الباب ..

نتر بوجهي : جا وييينة ما تگلي .. مو گلبنة الزرعة علي وهو ماكو .. ومريم هسة ملخت روحهة .. صارلهة ساعتين ماكو وهو طفل .. اكيد هم يخاف ويرجع اذا هنا ..

انطيتة ضهري ومشيت : انت ارجع .. انة اضل ادور .. ما اطب البيت اذا مو رضا وياي .. اطيت حجاية بمريم .. ما ارجع الا هو وياي ..

اجة وراي والدنيا ضلمت ..
اني لازم ضوة التليفون فوگ اضوية المزرعة هاف واگع شو وين ..

اجانة جبران : دورت اطراف المزرعة من برة وماكو اثر حتى .. وكلة گصب .. ومريم متخبلة وملخت روحهة ..

درت وجهي ادور واهز براسي : الكاه .. ما اكعد لحد ما الكاه .. ابن اخوي هذا .. امانة اخوي .. يعني ابني .. اذا صار بي شي المزرعة كلهة احرگهة ..

بقيت ادور هواي واباوع للساعة ٧ ونص ..
الولد هم رجعو يدورون من شافوني ملزم الا ادور بداخل المزرعة ..

مركز ضواي بالكاع واشوف حذاء بالكاع ..
دنگت شلتة واباوع هذا حذاء رضا اي اني جبتة الة هو رادة لونة اسود مثل لون حذائي ..

شلتة وركزت تليفوني بنفس المنطقة ..
رفعت راسي لجهة الشجرة البعيدة مال التكي ..
شفت رجل زغيرة مبينة منهة ..

فتحت عيونة وركضت مثل المخبل ..
هذا رضا فوگ الشجرة ..
وصلت يم الشجرة ..

اباوع هذا رضا .. معبر رجلة حول الشجرة ..
مدنگ عليهة وساند جسمة على نفس الخصن الكاعد علي .. حاط ايدة جوة خدة ونايم ..

باوعت شلون صعد لهنا .. موجود غصن مال نبگ ..
صعدت علي وگدرت اوصل لمستواه لان طويل ..

حطيت ايدي على خدة : رضا بابا فتح عيونك .. تسمعني ..
طبگ حواجبة وفتح عيونة ..
فركهن بنعاس وباوعلي : بابا ..
رفعت راسة بيدي اتفحص ملامح وجهة : ها حبيبي .. متأذي ..

هز راسة بلا : صعدت هنا بس ماگدرت انزل خفت لا اطيح .. وصيحت بس محد اجة .. بعدين نمت ..
بستة بخدة ونزلتة من فوگ الشجرة هو تألم : اااي ..

راسم : شبيك ؟
رفع رجلة واباوع رجلة مزلغة من الركبة .. ومن الجف مال رجلة بيهة دم يابس على رجلة : نسيت رجلي تعورت لان وگع حذائي ..

شلتة بيدية وهو حط راسة على جتفي : حبيبي تحس بشي .. تعبان ؟
هز راسة : لا بس بردان واصبعي يوجعني ..

حضنتة حيل ورجعت للبيت ..
شافوه بيدي واجو يركضون ..
رضوان اخذة من ايدي ويبوس بي : شلون تطلع بدون ما تگول .. بيك شي متعور .. وين لگيتة راسم ..

تنهدت : صاعد فوگ شجرة التكي ..
حارث طبگ حواجبة : شوداه لشجرة التكي ..

رضا شمر روحة علية : وديني لماما ..
اخذتة ودخلت للبيت واني شايلة ..

صحت واني بعدني بالباب : مريووومة ؟؟
طلعت مريم تركض ووجهة احمر وعيونهة حمر ..
شافت رضا وصرخت : يممممة ابني ..

اخذتة من ايدة شالتة وتبوس وتشم بي وتبجي : شلون تطلع وتعوفني .. مو گتلك ابقى يمي لا تبتعد .. تدري شصار بية واني عبالي بيك شي ..

رضا : اسف ماما والله بعد ما اعيدهة لا تبجين ..
حجيت واني گلبي وجعني من منضرهة اليگطع الگلب : مريم ترة اصبعة متعور وراح يصخن لان مستبرد طول الوقت برة .. اخذي غسليلة وبدليلة وجيبي حتى اشوف شبي ..

هزت راسهة : شكراً راسم والله لو ما انت ماعرف شجان راح يصير بية ..
هزيت راسي : لا تتشكريني .. ابن اخوي هذا .. وواجبي ..

دخلت هي جوة واني رحت للديوانية ..
تگعدت واحس رجلية متكسرة من الركض والمشي ..
سوو عشا خفيف واجلو الشوي ..

تعشينة وكملنة ..
خابرت مريم علمود رضا گالت احنة بالغرفة الزغيرة ..
رحت للبيت ومباشرةً رحت للغرفة ..

لگيت ٣ فراشات .. فراشين سوة وواحد على جهة وعرفتة ذاك فراش رضا لان هاي بطانيتة الزغيرة ما ينام الا بيها ..

طلعت مريم من الحمام وشايلة رضا ولافة الخاولي علي..
رحت اخذتة منهة لان كبر ماشالله وثكيل مو مال تشيلة هي ..

هو ابتسم بفرح : عمووو راسم .. تدري عمة جلاتين وعمة ريمي يگللي انت بعدك زغير وما تگدر تصعد عالشجرة .. بس اني گلت عمو راسم گال انت جبير مو زغير ..

كرصتة من خشمة وانشف بشعرة بالخاولي : لا حبيبي انت صح رجال وجبير .. بس مو كلشي نشوفة لازم نسوي .. اكو اشياء زينة واكو اشياء لا .. وانت اليوم من صعدت فوگ الشجرة هالشي مو زين وخطير ..

رضا : بس عمة جلاتين صعدت ..
ضحكت : عمتك مسودنة مو صاحية .. لا تسوي مثلهة ..
اجت مريم لبستة ملابسة ومبتسمة تباوع علينة ..

جبت المشط ومشطت شعرة ..
نام هو عالفراش واني گعدت اضمد برجلة وركبتة ..
باوعت لگيتة غافي .. غطيتة بالبطانية وگمت اريد اطلع ..

مريم : راسم ابقى نام هنا ..
التفتت عليهة مستغرب ..
هي كملت : حبوبتي گالت راسم ما ينام بالهوسة .. وهم انت تعبت اليوم .. گالت افرشو بهاي الغرفة لان فارغة ..

هزيت راسي وبقيت لان فعلاً تعبان ..
اباوع لمريم نايمة هي ورضا عالفراشين السوة وحاضنتة وتسويلة كمادات وتقرة على راسة ..

شعرهة الاشگر مفتوح وعيونهة حمر من البجي صايرات احلا ..
گمت يمهة من شفت رضا وجهة صار احمر ..
حطيت ايدي على راسة مصخن ..
هي باوعتلي بخوف : حرارتة ..

هزيت راسي : لا تخافين بس بدلي هذا المي مال الكمادات صار حار ..
گامت بسرعة بدلتة بمي بارد ..
گمت امسح اديناتة ورجلي بالمي البارد ..

رحت للسيارة مالتي بيهة علاجات ..
جبت شراب خافض حرارة ..
شربتة منة هو فتح عيونة : عمو راسم ..

ابتسمتلة : ها حبيبي ..
غمض عيونة ويحجي : جيبلي سيارة ام الحوض مثل سيارة عمو رضوان ..
ابتسمت : صار .. انت نام ومعليك ..

رجع حجة : عمو راسم .. اريد تشتريلي وياهة بطاريات حتى تضل تشتغل .. جيبها ام الريموت ..
ابتسمت وبستة براسة : هاهية ام الريموت بعد شتريد ..
ما رد علية شكلة غفى ..

رفعت عيوني لمريم شفتهة تباوعلي وبعينهة دمعة ..
من شافتني باوعتلهة حطت راسهة عالمخدة : تصبح على خير ..

تنهدت وگمت من يمهم ..
تمددت على الفراش الصاير على جهة بس غمضت عيوني غفيت من التعب ..

ديلارا //

الساعة صارت ١١ ..
اباوع البنات بسمة وجيلان وريم يسولفن بصوت ناصي واني مسوية روحي نايمة ..

صارل يومين مخنوگة .. من رجعت جوابي لبابا ولهسة احس شي وانحط على صدري ..
ابد مو شعور وحدة انخطبت وراح تتزوج ..
المفروض افكر بسمير .. بس هو حتى لو شوية ميجي ابالي .. كل تفكيري بشخص واحد وهو رضوان .. عيونة متروح من بالي وحجية يرن بأذني ..

حاسة بذنب .. كسرت گلبة من رفضتة .. ادري صعبة علي .. بس مو بيدي فكرت بعقلي .. وخفت ..
ردتة يجي للبيت بس حتى اعتذر منة وابررلة موقفي وليش رفضتة .. بس هو ما اجة بعد ..

گمت بخنگة جريت الصاية لبستهة ووياهة الشال ..
ريما باوعتلي : وين دلو ؟ كلهة نايمة .. وين طالعة ..

ما باوعتلهن حتى وهنة يباوعلي بتساؤل : اريد اشم هوة واتمشى .. لا تخافن ما اضيع .. شوية واجي اريد ابقى وحدي ..

طلعت من الغرفة ومن البيت كلة ..
الاضوية مال البيت طافية بس اضوية المزرعة مشتغلة ..
الهوى جان بارد بليل .. اخذت نفس شكد طيب الهوى ونقي هنا ..

حطيت ايدية بجيب الصايرة وگمت اتمشى ..
افكر بحالي وشسويت .. او بالاحرى شسوى بية رضوان ..
بكم كلمة اخذ تفكيري واستحلة ..
النفروض افكر بسمير حالياً ..

بس سمير شنو ؟ اني وين اعرفة ؟ ما مفكرة بي حتى .. منين طلعلي صفح ..
حسيت بندم لان تسرعت ووافقت علي ..

جان ممكن اشرح لبابا واگلة ماريد اتزوج هسة وهو يفهم ان مو بسبب رضوان رفضت ..
بس خوفي من بابا .. وتهديد ام رضوان وكلام مريم .. خلاني اتسرع وما افكر بأحد ..

بعدني اتمشى ولمحت حركة من يم غرفة گرفان مشتغلة اضويتهة ..
تمشيت بخفيف ..
انتبهت هذا رضوان ؟ شديسوي هسة ؟

انتبهت بيدة ادوات تصليح ومدري شيشتغل ومفكك هواي شغلات يمة ويباوع وعاض شفتة بتركيز ..
بقيت اباوعلة وكلساع يرفع ايدة من جهة عكس ايدة ويمسح كصتة وعيونة عرگان ..

هاي فرصتي الوحيدة اكدر احجي وياه ..
يمكن بعد ما اشوفة ..
رحت بأتجاهة واتلفت خاف اكو احد ..

تقربت يمة وكفت بعد جم خطوة ..
حجيت حتى ينتبه لوجودي : شلونك رضوان ..
هو رفع عيونة ليگدام متفاجئ بس ما باوع بأتجاهي ..

دنگ يكمل شغلة بس هالمرة طابگ حواجبة ..: شجايبج هنا ؟
بلعت ريگي من نبرة صوتة الجافة : اريد احجي وياك ..

حجة وهو على وضعة بدون ما يباوعلي : لا يجي ابوج ويشوفج وياي ويگول اكو شي بيني وبينج .. مو هذا الشي التخافين منة .. امشي ارجعي للبيت ..

غورگت عيوني : ماارجع .. اريد احاجيك .. معلية بأحد ..
ضحك بسخرية : معليج بأحد .. ادري ادري ..
نترت بعصبية : رضوان ليش تحجي وياي بهالطريقة .. اسمعني ..

شمر الحديدة الي بيدة بالگاع وگام وگف اول مرة يباوعلي : ليش شلون تردين احاجيج .. اگعد اترجى بيج مثل ذاك اليوم واتوسل .. ولج هم ياريت فاد الحجي ..

نزلت دمعتي : انت خليتني اسمعك ذاك اليوم .. وهالمرة اسمعني ..
رفع راسة وباوعلي ورجع دار وجهة : احجي .. اسمعج ..

مسحت دمعتي وباوعتلة تقربت منة خطوة : اسفة ..
رفع حاجبة : على ؟؟

هزيت راسي مادري شنو احجي : على الي سويتة وياك ..
طبگ حواجبة : شسويتي انتي ؟ ما سويتيلي شي .. انتي مجرد خوافة .. ما تثقين بنفسج .. وعندج تفكير الناس اهم من تفكيرج ..

رمشت ودرت وجهي وخنگتني العبرة : اني مو خوافة ..
رضوان : لا خوافة .. شوفي هاي عيونج دموعج وجيتج حتى تحجين وياي تدل على ان عندج شي بگلبج الي .. بس ما تعترفين لروحج .. وتعذبين روحج وتعذبيني وياج ..

بلعت ريگي : اني لازم ارجع ..
ضرب ايد بأيد : مو اگلج خوافة ..

تقدم وصار مقابيلي : خفتي من امي .. خفتي من ابوج خفتي من امج .. اخواتج ملن براسج حجي .. وانتي اخذتي برأيهن ..
ادري انتي ما عندج شخصية ؟ ما تگدرين تفكرين وتاخذين قرارج وحدج ..

درت وجهي وما اباوعلة : ميفيد الحجي بعد .. رجعت خير لبابا وهو رجع جواب لسمير ..
طبك حواجبة ورص على سنونة : لا تجيبين اسمة گدامي ..

هزيت راسي ومشيت : تصبح على خير ..
اسمعة يحجي : هو منين يجي الخير ..

رجعت للبيت ..
مباشرةً غطيت راسي باللحاف وگعدت ابجي ..

ريم // ورة يومين ..

رجعنة من المزرعة .. اني رجعت لبيتنة ..
گعدت سولفت لخالتي كلشي صار وياي هناك ..
وحيل مشتاقتلهة ولبابا رغم هنة يومين ..

للعصر گاعدة واخابر بحنين بالصالة ..
حارث بغرفتة .. وخالة بالمطبخ ..

حنين : شتگولين نطلع لو لا ..
ريم : بكيفجن .. اذا قبل بابا اطلع .. اني هم محتاجة جم شغلة .. وهم ناخذ خالتي ويانة ..

حنين : مو گلنة ما نريد عجايز ويانة ..
فتحت عيوني : عجوز بعينج .. والله انتي العجوز .. وين اكو مثل خالتي .. ترحيلهة فدوات ..
حنين : اگول لا تدعين .. استغفري ربج .. كلمن يروح لروحة فدوة ..

ابتسمت : ما گلتيلي .. براء تروح ويانة للسوگ ..
حنين : لا حبيبتي هاي سجاجة مگابلة الگتاب اريعة وعشرين ساعة ما تشوفينهة دخلت صيدلة .. وجاي تدرس .. ما تقبل تروح ..

هزيت راسي : خوش لعد .. اشوف بابا ونروح اني وياج والبنات .. ليلى تروح مو ؟
حنين : غصباً عليهة تروح .. معتزلة بنفسهة مدري شمالهة صارلهة جم يوم .. بس يرادلهة گرصة اذن .. ولا تسأليني عن اسماء وشهد ترة هنة اول الرايحات ..

خلصت مكالمتي وية حنين ..
رحت للمطبخ اريد اگول لخالي ..
شفتهة واگعة بالكاع ..
شهگت بخوف : خااالة .. 

دنگت عليهة حركت راسهة ودموعي نزلت : خالة شبيج فتحي عيونج ..
همهمت بدوخة وفتحت عيونهة :ريم .. اسنديني ..
لزمت ايدهة وايدي الثانية جوة ضهرهة : على كيفج خالة ..

گعدتهة عالكرسي : راح اصيح حارث حتى ناخذج للطبيب ..
هزت راسهة : لا حبيبتي والله مايحتاج .. بس تعب ..
هزيت راسي : لا ماكو هيج تعب .. راح اجيب عبايتج واصيح حارث ..

رحت لحارث گتلة يجي ياخذهة للطبيب ..
جبت عبايتهة وعبايتي بسرعة ..
اخذنة حارث للدكتور .. مجرد بس شافهة گال اخذوهة لطبيبة نسائية ..

رحنة لدكتورة نسائية وحارث بقة برة ..
اني وخالتي دخلنة للدكتورة ..
حطتهة عالجرباية وتفحص بيهة وحاطة جهاز على بطنهة : ارهاق طبيعي يصير عندج يعني اعراض طبيعية .. بس الطفل ضعيف بسبب قلة الاهتمام بالاكل ..

فتحت عيوني وخالتي جاوبت متفاجأة : طفل ؟؟؟
الدكتورة طبگت حواجبهة : الج ٣ اشهر حامل .. شلون متدرين ..
خالتي دموعهة نزلت ومسحتهة : مادري عبالي خربطة هرمونات دائماً تصير وياي ..

تقربت يمهة وحضنتهة : مبروووك خالة الله يتممة انشالله ..
حضنتني وتمسح بدموعهة : الله يبارك بيج يعمري .. فدوة لوجهج الخير علية ..

ابتسمت وگمنة والدكتورة كتبتلهة علاج ومثبتات ..
طلعنة شفنة حارث ينتضرنة يم العيادة : ها سلامات خو ماكو شي ..
ابتسمتلة اني بحماس : راح يجيني اخو غيرك ..
طبگ حواجبة : شنو ؟

هزيت راسي : خالة هويدة حامل ..
ابتسم وباوعلهة : مبروك هويدة الله يتممة انشالله ..
هي الفرحة تشع من عيونهة : الله يبارك بيك وانشالله يوم الك ..

فتح عيونة : شنييييي ؟
ضحكت اني : قصدهة تصير اب مو تصير حامل ..
حارث : هااااا .. اي فهمت ..

وصلنة حارث واجاه اتصال من راسم گالة انتضرك بالمعمل ..
وصلنة راح للمعمل ..

جيلان //

رجعنة للبيت .. ديلارا وجهة مگلوب وما تتحاجة ..
مريم بس تتصفن ..
حارث يومية يراسلني يذب جم حجاية ويمشي ..
بس اليوم ما دزلي اي رسالة ..

گاعدة اني و مريم بالصالة ..
وحبوبتي موجودة وامي ..

اجتني رسالة عالواتساب من رقم حارث ..
ابتسمت لان اليوم كلة ممراسلني ..
فتحت الرسالة بيهة كلمة وحدة ( احبج ) ..

ابتسمت ما رديت علي .. 
مريم باوعتلي طابكة حواجبهة : عليمن تبتسمين ..
رفعت اكتافي : هيج ماكو شي .. بسمة دازتلي نكتة ..

مريم : ضحكينا وياج ..
باوعتلهة وقفلت تليفوني : طفة شحن ..
باوعتلي برفعة حاجب : اهاااا ..

ورة ساعة تقريباً ..

دخل جبران يركض ويصيح : والله اموتهم بدية .. انة يضربون ولد عمي ..
كمنة بخوف ..
حبوبتي : شني سالفتك ولك يا ولد عمك الضاربينهم ..

دخل لغرفة جدي وطلع بيدة سلاحة ..
يريد يطلع بس حبوبتي وگفت كبالة : خايب احجي مو وگفت گلبي شمالهم ولد عمك ..

حجة بصياح وعصبية نار : جدة مدري منو همة .. بس هاجمين على راسم وحارث بالمعمل وضاربينهم ..

لطمت على خدي ..
مريم لزمتة من ايدة : رااسسم شبيييي ؟؟ شنو ضاربينهم ..

الكاتبة : سارة الشمري🖤
هلو شلونكم حبايب قلبي ..
اتمنى حبيتو البارت وعجبكم .. ولا تنسون صوتو وعلقو وكلشي ينداس دوسو ..