رواية بنات للزمن الفصل الرابع والعشرون 24 - بقلم سارة الشمري

الكاتبة : سارة الشمري🖤

صفة رسمك حلم عذب حنايا الروح
  مثل طيفك أبد ما شايف بعيني
نهر طولك عذب صافي ويرد الروح
وأنه الميت عطش وبكطره ترويني
أكتبلك شعر وأسطرلك الأبيات
وانته بلا بخت بالفركة تجويني
قيس بعام واحد وتيبّس من الشوك
وآنه سنين مرّت ما غفت عيني

جيلان //

منتضرين جواب ديلارا ونباوعلهة بترقب ..
هي متوترة اعرف كل حالاتهة ..
تفرك بيديهة وتبلع بريگهة ..

بابا سألهة : ما جاوبتيني ؟ موافقة على سمير لو لا ؟؟
نزلت راسهة متوترة وحجت : مــوافــقـة ..

ابتسم ابوي بأرتياح وباسهة براسهة : بيهة كل الخير انشالله ..
گامت هي ومنزلة راسهة وتفرك بيديهة : من رخصتكم ..
حجتهة وطلعت ..

مريم حطت ايدهة على گلبهة وتنهدت : الحمدالله ..
ابتسمت وحضنتهة وهمست : همزين الله خلصنة من عجوزج البومة ..
ضربتني على ايدي : عييييب ..

ارفعت اكتافي بدون اهتمام : خل تولي .. امشي وياي نشوف العروس ..
سحبتهة ورحنة لغرفة ديلارا الي هي غرفة مريم القديمة صارت لديلارا واني غرفة ريم ..

لگيناهة متلفلفة باللحاف ..
رحتلهة سحبت اللحاف وهي مجلبة بي : گووومي ولج خل نساعد ماما بالغدة ..
حجت من جوة اللحاف : نعسانة .. اليوم دورج مو دوري ..

مريم : جيلان عوفي الشغل .. بعد ديلارا متشتغل شي لحد ما تتزوج .. مو زين ..
ديلارا : اي عفية .. عوفوني وحدي ..

سحبت اللحاف مريم عنهة : شو گومي خل نشوفج .. شنو هاي التصرفات .. مستحية من عدنة شنو ..
گعدت بملل عالجرباية وتنهدت : مو مستحية .. بس ضايجة مدري شبية .. احس ممرتاحة ..

گعدت اني يمهة من جهة ومريم من جهة وحضناهة : اي حبيبتي هذا شعور التوتر قبل الخطوبة .. لان متعرفين الولد ولا شايفتة .. وهم هذا مستقبل يعني مو يوم ويومين .. اكيد راح تتوترين ..

نزلت راسهة .. مريم رفعتة وباوعت بعيونهة : لا تخلين هالتفكير يسيطر عليج .. المفروض تهتمين بنفسج وتبدين تترتبين من ناحية المضخر ولو انتي معايزة شي بس تجهيزات العروس وهالسوالف ..

بقينة نسولف وياهة ونحاول نطلعهة من جوهة واني متأكدة رضوان اثر عليهة بحجية واكبر دليل نضراتهة من حجتلي علي البارحة من رجعنة ..

اندگ الباب ودخلت ماما ..
ابتسمت من شافتنة متحاضنين .. : گومن صبن الغدا وياي وافرشن السفرة .. يلة ماما ..

مريم گامت بأبتسامة : جايين ماما .. يلة جيــلان ..
انتبهت لحجايتهة .. گالت ماما ..

ماما صافنة عليهة متفاجأة ..
اني وديلارا ابتسمنة ..

مريم باوعتلنة مستغربة : شكو ؟ شبيجن..
امي ابتسمت ممصدگة : انتي گلتي ماما ؟؟

مريم توترت وكأنهة انتبهت لحجايتهة ..
هزت راسهة بسرعة وهي تطلع تضيع السالفة : مادري .. يلة خل نطلع ..

طلعت مريم واحنة ابتسمنة ..
گمت بست ماما بخدهة وديلارا هم ..
باوعت هي لديلارا وباستهة : فرحتيني بردج ماماتي ..

حضنتهة ديلارا وابتسمت ..
اني ابتسمت : اي همزين تروح ديلارا وتبقى امي بس الي .. محد يعاكني على النومة بحضنهة .. 
ديلارا ضربتني : ماما گليلهة خل تسكت ترة ابطل ..

ضحكت هي ورحنة وياهة للمطبخ ..
گاعدين نصب بالاكل وسمعنة اصوات الولد من برة ..

ابتسمت وكلبي دك .. من سمعت صوتة .. من بينهم كلهم ميزت صوتة لان عبالك يحجي بخشمة وبي بحة وصوتة عالي ..

لبست شالي عدل .. اصلاً مو ملتزمة بي بس هيج مرات البسة ومرات لا ..
اسمع اصواتهم العالية بالصالة .. ومبتسمة ..

مريم : الوووو .. ويامن احجي ..
التفتتلهة : هاا ؟؟
مريم : وين مفهية ما تسمعيني .. مو اگلج اخذي المرگ ورة ديلارا ..

شلت الصينية .. اخذتهة ودخلت سلمت واني واگفة الكل ردو السلام وكملو سوالفهم عادي .. بس ماجابو طاري ديلارا .. شكلهم محد يدري ..

حطيت الاماعين بالسفرة ..
باوعت لحارث شفتة يباوعلي ..
درت وجهي وكملت شغلي ..

التمو الولد عالسفرة هادي وجبران وراسم وحارث وناقصهم بس رضوان ..
شوية ودخل بابا وصارت هدوء ..
گعدو يتغدون واحنة بالمطبخ نتغدة ..

رضا عاف امة ومشة : اني رجال واكل وية الزلم بعد .. عمو راسم هيج گال ..
دار وجهة ومشة للصالة ..

مريم ابتسمت ..
خلصنة اكل وسوينالهم جاي ..
اخذت مريم الجاي الهم للصالة ..

اني گاعدة بالمطبخ واشرب جاي ..
اجتني رسالة على تليفوني من رقم حارث : تعاي اكعدي يمنة .. خل اشوفج ..

كتبتلة : لا ميحتاج .. هنا احسن .. اخذو راحتكم انتو ..
كتب : اذا ماتجين .. اخطبج من ابوج هسة ..

شرگت بالجاي وگمت اگح ..
امي ضربتني على ضهري وديلارا گامت جابتلي مي : سمالله ماما شجاج ..
گلبت التليفون على وجهة وشربت مي ..

هزيت راسي وگمت : ماكو شي ماما شرگت .. عن اذنكم ..
عدلت شالي ورحت للصالة ..

دخلت وهمة ملتهين يسولفون بالشغل مدري شنو ..
حارث من شافني باوعلي برفعة حاجب وابتسامة ..

رحت اني گعدت يم حبوبتي ..
ابوي باوعلي : شبي وجهج احمر بوية .. مريضة شني ..
هزيت راسي : لا بابا شرگت بالجاي وگحيت ووجهي صار احمر ..

هز راسة وكمل سوالفة ..
حارث حط ايدة على حلگة يمنع ضحكتة ..
باوعتلة بعصبية ..

حارث //

رجعت للبيت ورة الغدة ..
ريم گاعدة بالصالة تگلب بالقنوات ..
استغربت : وين هويدة اليوم .. شو وحدج ؟
ريم : نايمة بغرفتهة .. خطية تعبانة ..

اجتني رسالة من رقم جيلان ابتسمت : ترة حركتك ماجان الهة اي داعي .. شنو هالتصرف هذا ..

حارث : شسوي غير مشتاقلج .. واريد اشوفج وانتي شاردة ..
جيلان : شنو شاردة .. اني جنت گاعدة وية ماما وديلارا .. يعني لازم الزك بيك يلة ترتاح ..

ابتسمت : ياريييييت .. شريد بعد من الله ..
جيلان : شگد متستحي .. والله تفكيرك سگط .. بس ما تنلام ابو النسوان ..

حارث : صارت قديمة ابو النسوان .. هسة وحدة بس وماخذة گلبي وما افكر بغيرهة .. وهي ما تفكر بية .. شالعة گلبي ..

جيلان : تستاهل .. يوم الك ويوم عليك ..
حارث : بسيطة مشمش .. والله ادري بيج تحبيني .. واكبر دليل هسة تاحجيني وما گالبة وجهج علية من بعد ما گتلج احبج ..

جيلان : اضحك على روحك بهالحجي .. مادام ما سامعهة مني .. معناها ماكو هيج شي ..
حارث : يجي يوم وتگليلي احبك حارث .. وشوفي ..

جيلان : عوف حارث هسة .. نسيت اگلك ..
حارث : شنو ؟
جيلان : ديلارا رجعت جواب لبابا ..

عدلت گعدتي بأهتمام : وشگالت .. رفضت ؟
جيلان : لا سمالله ليش ترفض .. وافقت ..

طبگت حواجبي : مشمش لا تتشاقين وياي بهالسالفة هاي .. احجي الصدك ..
جيلان : مجذبة عليك قبل اني ؟؟ هي وافقت على سمير لان خوش ولد .. وهذا الصح ..

باوعت لريم : عندج خبر بموافقة ديلارا على سمير ؟؟
گعدت : لا .. شنو وافقت ؟
فركت وجهي : اي وافقت .. وهسة رضوان شلون اگلة .. شيصير بي ..

ريم تنهدت : مادري والله .. خطية ..
گمت من يمهة وطلعت من البيت ..

رحت للمعمل الجبير مو الي اشتغل بي اني ..
سألت على رضوان گالو جوة يم المكاين ..

دخلت سلمت عالشباب ..
شفت رضوان صاعد فوگ المكينة .. رافع ارداناتة فوگ العكس .. وجهة احمر ويصب عرك وبيدة معدات تصليح وعاض شفتة مركز بالگدامة ..

صحت علي بصوت عالي لان هم يلة يسمعني من ورة صوت المكاين : رضووان .. شجاي تسوي .. انزل احاجيك .. الولد يسوونهة ..

التفتلي ورجع دار وجهة يكمل : روح حارث .. خليني ملتهي بالمكينة وشاغل بالي بيهة ولا بغير شي ..

فهمت علي تنهدت على حالة : انزل يابة هي شبيهة المكينة ..
بدون ما يباوعلي ويحجي : تطلع صوت ..

نترت بي : ولك هي مكينة .. اكيد تطلع صوت ..
هز راسة : احطلهة زيت .. من تنفتح تطلع صوت قوي ..

صاح واحد من الشباب : والله اول البارحة زيتت المكاين كلهن .. وكل صوت ما بيهن .. بس رضوان اصر الا يصعد عالمكينة ويزيتهة .. گلنالة بس ما يسمع ..

عطت بي : ولك انزززل احاجيك .. رضوان لا تخليني اصعدلك .. اسمع الحجاية ..
شمر المفك من ايدة بعصبية ..

طفر من فوگ المكينة وتعداني ومشة ..
مشيت وراه وهو راح للمكتب ..
گعدت اني بالمكتب وهو دخل للحمام يغسل ..

طلع وينزل برداناتة وغاسل وجهة وحتى شعرة جوة المغسلة ..
گعد مقابيلي : اي احجي .. عليمن خبصتني ..

حارث : اول شي هدي اعصابك .. واسمعني زين ..
تأفف بعصبية : شعليك بأعصابي .. تحجي لو شلون .. ترة واصلة لخشمي ..

تنهدت : اليوم ديلارا رجعت جواب لابوهة ..
ابتسم بسخرية : وافقت على سمير مو ؟
هزيت راسي ..

هو ضغط على ركبتة بيدة ..
وجهة گلب احمر وحواجبة احتدت ..

گام وگف واني وگفت وياه ..اباوعلة بترقب لردة فعلة ..  : رضوان ؟
رفس الطبلة الزغيرة الي بالنص برجلة ..

تطشرن الفناجين والدلة الي جانن ديكور بس ..
صحت : رضوووان .. هدي شبيك .. عبالك من تكسر تنحل ..

فرك وجهة بثنين ايدي ..
باوعلي بقهر : ما فاد .. مو گتلي حاجيهة وتقتنع .. ما فاد بشي .. حتى توسلتلهة .. مو اگلك ما تحبني بس ما صدگتني .. گتلي يمكن تحبك بس ما تبين .. ما افتهمت علية .. ما اهتمت لحجيي واعترافاتي ..

حطيت ايدي على كتفة : رضوان على كيفك ..
سحب السويج مالتة يريد يطلع : خليهة بكيفهة .. مو هي رادتة .. ما اذل روحي اكثر من هيج ..

طلع من المعمل .. ما لحگتة يمكن يريد يبقى وحدة ..

مريم // بعد اسبوع ..

ابوي رجع خبر الموافقة لابو سمير ..
ديلارا مطنگرة مدري شبيهة ..

راسم ضاج حيل من سمع بيهة وافقت على سمير وبيومهة بقة الليل كلة يتگلب ما نام ..

بليل الساعة ٩ دخلت للغرفة شفتة ممدد نص جسمة عالقنفة وضهرة عالحافة .. لابس نضارات طبية وبيدة كتاب .. ولابس تراك مال بيت ..

رفع عيونة الي ورجع نزلهن للكتاب ..
حطيت كوب الحليب گدامة مثل كل يوم ..
سحب الكوب وشرب منة بدون ما يباوعلة وعينة عالكتاب ..

طبگ حواجبة مستغرب الطعم وباوع للكوب : شنو هذا ؟؟ شبي الحليب ؟
رفعت اكتافي : كاكاو .. جابة اليوم هادي .. وگلت احطة وية الحليب ينطي طعم اطيب .. اصلاً مادري شلون تشربة هيج ادور بدون شكر .. ويع ماحب المر ..

ابتسم واخذ رشفة من الكوب : متعود عالمرورة .. لدرجة صار لساني ما يتجرع الحلا .. اخذ طعمة عالمر ..

رفعت اكتافي : ما يصير هيج .. جرب اشياء جديدة .. انت حتى حلويات متاكل .. دائما مر ومابيهن حلا الي تاكلهن .. ضيف شي جديد ..

ذب الكتاب عالقنفة ..
والكوب عالطبلة ..

تقرب مني بأبتسامة ونضرات غريبة ..
سحبني من ايدي حيل وانضربت بصدرة ..
باوعتلة متفاجئة ..
وبدون مقدمات حط ايدة على خدي واخذ شفتي بين شفافة ..

غمضت عيوني واحس بمغص بمعدتي ..
گلبي يدگ بشكل مو طبيعي ..

لا ارادياً وبدون شعور .. رفعت ايدي وحطيتهة على خدة وصرت ابادلة ببوستة الهادئة ..
حاوط ايدة الثانية على خصري .. وايدي فوگ ايدة الي محاوطتني ..

فصل بوستة بس بعدة قريب مني .. خشمة ملاصق لخشمي ..
انفاسة مو منتضمة ابد ..
فتحت عيوني شفتة يباوعلي بعيون ذبلانة ..

من شافني باوعتلة ابتسم ..
حجة بهمس : تردين اضيف شي جديد غير المر ؟
حط كصتة فوك كصتي وحجة : اني حياتي جانت بدونج مابيهة طعب غير المرورة .. وما بيهة لون ..

مرر اصابعة على شفتي : هسة صار بيهة حلا لدرجة يرتفع السكر ..
رفع اصابعة عن شفتي ومررهة على طرف عيني اليمنة : صار بيهة لون لدرجة ماريدج تنامين وتغمضين حتى ابقى اباوعلهن ..

يحجي واحس گلبي راح يطلع من مكانة ..
بلعت ريگي .. شسويت اني .. شلون فقدت نفسي بيدة .. شلون سيطر علية بثواني معدودة ..

تقرب يريد يبوسني مرة ثانية واني تراجعت ليورة ..
باوعلي مستغرب ..
هزت راسي : لا لا ماكدر ..
طبگ حواجبة : ليش ؟

درت وجهي وطلعت بسرعة من الغرفة بدون ما احجي شي وياه ..
نزلت من فوك ودخلت لغرفة جيلان اول غرفة كدامي ..

رجعت ضهري عالباب واتنفس بسرعة ..
غبية مريم شسويتي .. شنو الي يحب يفقد نفسة هيج ..
كلامة يحسسني عبالك مو اني .. يهتم بية حيل .. واني لاول مرة احد يهتم بية هيج ..

طلعت جيلان من الحمام لافة شعرهة بالخاولي ولابسة تراك ..
استغربت وضعي : مريم ..
باوعتلهة بتشتت : ها ..

تقربت مني .. ابتسمت ..
قربت راسهة مني واخذت نفس تشمني ..
اعتلت ابتسامتهة : العطر خليجي رجالي جنة مال عود ..

باوعت بوجهي وضحكت : شفتج فلم ثاني .. حمرة ..
ضربتهة على كتفهة : جيللااان ..
ضحكت : ادري شعندج شاردة يمي .. مگرود راسم ..

تأففت : جيلان كافي ..
انفتح الباب ودخلت ديلارا مطنگرة وعوزهة شوية وتبجي ..
جيلان : خير شبيج انتي الثانية ؟؟

ديلارا : خابرو بابا گالولة نحدد موعد للعقد بالاسبوع اليجي ..

ليلى //

مر اسبوع .. عباس ممراسلني ..
مگابلة التليفون وگاعدة .. گلبي باقي يمة .. خاف بي شي ..

تعلقت بي كلش .. وحبيتة ..
بس اخاف اگول هالشي .. شگد اشوف قصص حب الانترنت شنو نهايتهة .. بس هو دائما يگلي اخطبج واني اريد اكمل دراستي يلة ..

بكل مرة من يحجي وياي شي بي غزل اسكتة وهو ياخذهة بضحك ..
بس ذاك اليوم مدري شجاه .. رزلني وسد التليفون ..
اني ممتعودة اني الي اراسل .. كل مرة هو يدز ..

صارلة اسبوع ما داز واحس شي ناقص مني ..
يومية يراسلني اكثر من مرة باليوم يسأل عن اخباري ويسولفلي هو شسوة بيومة ..

مگابلة التليفون وطاحت دمعة من عيني ..
شنو معقولة قسيت وياه .. هو يگلي ما ارتاح اذا ما احاجيج .. شو هسة ممراسلني .. 

بقيت الوب .. مشتاقتلة .. وافكر شنو الغلط السويتة ..
مجرد گتلة انت صديق بس .. قابل اگلة انت حبيبي ..

اليوم الجمعة .. ومثل العادة الكل ينجمع ابيت جدو .. من ضوجتي وخوفي علي خاف بي شي .. حتى مالي خلگ للروحة .. گلت لماما مااروح واعتذريلي من حبوبتي والبنات .. هي ما لحت من شافتني ضايجة ..

دگ تليفوني .. گمزت رغم ادري بي ميدگ هو بس يراسل ..
حسيت بأحباط من شفت رقم حنين .. ادري تريد ترزلني لان ما رحت للجمعة ..

رديت عليهة بملل : ها حنييين ..
اجاني صوت حبوبتي ام فضل : وووجججعة .. من يمتة وحدتجن تتخلف عن جية الجمعة ولج ..

بلعت ريگي : حبوبة مريضة مابية حيل .. اعذريني ..
عصبت : سدي حلگج وگومي بدلي .. رياض راح يجيج هسة وتجين غصباً عليج .. سمعتي لو لا ..

تنهدت بملل شهالتحكم : بيبي والله مالي خلگ ..
نترت : ولج ليلو  تكسرين حجايتي .. فضيهة ..
غورگت عيوتي من گالت ليلو .. مشتاقتلة من يگولهة الي : لا العفو بيبي .. ماشي بأمرج راح احضر روحي ..

سديت التليفون منهة تنهدت بقهر وگمت : هسة هي گوة ماريد اروح ..

گمت بدلت ملابسي وگعدت انتضر خالو رياض ..
وتليفوني بيدي اگول بلكي يدز ..
وكلساع اتأكد من النت خاف طافي وما يجيني اشعار ..

وبداخلي خوف لا بي شي ..
هو مايسويهة ويگطع بية هيج .. كل مرة من اتأخر بالرد يگلي اشتاقيتلج .. وهسة اسبوع ممراسلني .. يمة والله بي شي ..

براء //

نباوع لحبوبتي المعصبة لان ليلى ما اجت ..
رجعت عاطت بحنين : خابري عمج ضياء بسرعة گليلة يروح يجيبهة ..
حنين كمزت من عيطتهة : حبوبة على كيفج والله انجبس وما اتزوج اذا تضلين تگمزيني ..

حبوبتي خزرتهة ..
حنين خافت : صار حبوبة هسة اخابرة ..
طلعت تليفونهة وانطتة لحبوبتي ..
حبوبتي حجت وياه يروح يجيب ليلى وگالتلة خل تروح وياك وحدة من البنات ..

سدت التليفون وحنين گمزت تلبس بنعالهة : انييي اروووح ..
اني وگفت : وليش انتي ؟؟ اني اروح ..

حبوبتي خزرتنة : بسسسجن .. روحن ثنينجن .. واخذن ريما وياجن ..

ريم الي جانت ساكتة طول الوقت احتراماً لعصبية حبوبتي : لا حبوبة اني ميحتاج اروح ..
هزت راسهة : لا روحي وياهن .. تونسن سوة ..

دنگت عليهة وهمست : مادام معصبة احسلج لا تناقشين وگومي ..
ابتسمت وگامت ..
رحنة لبسنا عباياتنة ..

طلعنة لگينة عمو رياض بالسيارة ومدنگ عالتليفون ..
فتحت اني الباب الگدام وصعدت هو ابتسم : اوو هلا ببراوة ..
ابتسمتلة : بيك اكثر عمو ..

شغل السيارة وانفتح الباب وصعدت حنين : الله بالخير ..
التفت خزرهة : انتي المن جاية ؟؟
حنين عاطت : اوووهووو .. شنية والله ترة ابجي .. كلساع واحد مرزلني .. شمسويتلكم .. دشوف ترحيبك ببراء وشوف اسلوبك وياي ..

باوعلة بعصبية : انزلي .. انزلي .. وعلي اسحلج من كفشتج .. جنهة مكناسة .. تراددين ام عطوب ..
حنين : لا لا والله اشاقة وياك .. التوبة ما اعيدهة ..

مدت راسهة من بين الكرسيين وحبتة بكتفة : وهاي حبة بس لا تنزلني ..
وخر ليگدام : حنييين جم مرة گتلج لا تبوسيني .. بطلي هالسوالف ..

حنين : ديلة ليسمعك ايگول بايسين شباك العتبة المقدسة ..
خزرهة ..

راد يحرك بس گتلة : انتضر عموو .. بعد ريم هم تروح ويانة ..
ارتخت حواجبة وتحمحم .. عدل ياخة الدشداشة ..

اباوعلة مستغربة ..
انفتح الباب الي بالجهة الوراي وصعدت ريم حجت بصوت هادئ : السلام عليكم ..

ردينة اني وحنين السلام .. : وعليكم السلام ..
عمو خلانة نكمل يلة رد : وعليكم السلام ورحمة الله وبركاتة ..
ريم تباوعلة مستغربة طريقتة..

حرك السيارة هو شبه مبتسم وراايق ولا جنة الي هستوة معصب ويرزل بحنين ..
حسيت بشي يمشي على رگبتي ..
گمزت وعطت : ااااااه ..

هو ضرب بريك : شبيج ..
التفتت على ريم لان هي الكاعدة وراي : ريييما شنو هاي ..
ريم باوعتلي ورفعت ايديهة : والله حنين مو اني .. حطت ايدهة على رگبتج ..

حنين تضحك : اااخ يمة بطني .. والله شكلج تحفة من گمزتي ..
عمو رياض عاط بيهة ودار جسمة عليهة : حنيييييين ..

تحولت ضحتهة لشهكة خوف ..
تباوع لعمو رياض ترجف ..

ريم لزگت بالباب من شافتة صار قريب عليهن من دار وجهة ..
حصرتني الضحكة على شكل حنين المخلوسة وتباوع على عمو رياض ..

اني حبست ضحكتي بس شكل ريم ما كدرت تحبسهة وگامت تضحك وشوية شوية صارت تقوى ضحكتهة ..

كلت هايهية راح يرزلهة عمر رياض وعيب من البنية ..
واشوف عمر وياض مفهي بوجهة وبضحكتهة الي جنهة بلبل ..

ريم شافتة يباوعلهة حطت ايدهة على حلگهة : اسفة خالو والله ماكدر اسيطر على ضحكتي ..

هو تحمحم .. ودار وجهة يكمل سواقة ..
اباوعلة ورافعة حاجبي .. متوتر ويفرك بكصتة وضحكة ريم مستمرة بس هالمرة بس الشهكة تطلع لان عود كاتمتهة .. وهو يباوعلهة بالمراية ..

حنين : عمو اذا تضل تمشي هيج ما نوصل منا لباجر وما نلحگ عالمعلاك المسويتة حبوبتي ..

هز راسة متوتر : اي اي ..
ريم شكلهة نست وحجت بصوت واضح : شبي توتر فجأة ..
هو سمعهة وتوتر بالزايد .. ويفرك بوجهة ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤

هلو حبايبي .. اليوم خميس معناها باجر وعكبة ماكو بارت ..
لهالسبب خليت البارت بدون قفلة حماس ..

رأيكم بالبارت .. احبكم .. ولا تنسون صوتو وعلقو وكلشي ينداس دوسو ..