رواية بنات للزمن الفصل الخامس والأربعون 45 - بقلم سارة الشمري

الكاتبة : سارة الشمري🕊

الحزن هو أن أفتح لكِ مدن أحلامي وأسكن معكِ في قصر من الخيال ثم ينهار القصر على رأسي..

ريم // اليوم الثاني

فزيت من النوم على صوت ضرب قوي عالباب ..
كمزت بسرعة فتحت الباب : حارث ؟ شكو شبيك ؟؟
حارث : البسي عباتج بسرعة .. هويدة يمكن راح تجيب .. خل ناخذهة للمستشفى ..

فتحت عيوني بعدم استيعاب لان بعدني ما مصحصحة : هااا ؟؟
عاط بوجهي : فضيييييههههة .. شهالثووول ..

شهكت بخوف واسمع صوت بابا من جوة : حااارث فضووهة ..
طبگت الباب بوجه حارث ورحت للحمام غسلت وجهي بسرعة حتى اصحصح ..
سحبت عباتي وشالي من التعلاگة وطلعت اركض ..

نزلت جوة شفت بابا ساندهة وهي تتلوى وتبجي ..
رحت لزمتهة من ايدهة ..
طلعناهة للسيارة ..
وحارث يسوق ..

الالم يزيد عليهة وهي لازمة ايدي ضاغطة عليهة وتبجي ..
حطيت ايدي على بطنهة واقرى ايات قرءانية وگمت ابجي وياهة ..

التفتت على ابوي : بابا فدوة استعجلوا .. خاف خطر عليهة لان بعدهة ما داخلة بشهرهة .. يعني ولادة مبكرة ..
حارث ساق بسرعة ووصلنة للمستشفى ..

مباشرةً اخذوهة لصالة الولادة ..
بابا وحارث بقو برة .. بس اني وياهة وتايهة كلشي ما اعرف ..
حتى تليفوني نسيتة بالبيت ..

الدكتورة گالت ولادة هسة .. لان مي الراس طاك ..
طلعت لبابا اخذت تليفونة وخابرت حنين گتلهة تروح للبيت تجيب جنطة خالتي الي محضرتهة للطفل .. وتجيبلهة جم غرض ..

خالتي بس تبجي وتتألم واني لازمة ايدهة ..
اخر شي وخرتني الدكتورة واجن جم وحدة وياهة والتمن عليهة ..
طلعت برة لاگتني ام عامر اخت خالة هويدة ووياهة براء وحنين ..

اخذت منهن الجنطة ودخلت جوة ووياي ام عامر ..
الدكتورة طلعتني وبقت بس ام عامر لان اني ابجي وية خالتي ..
گعدنة عالكراسي اني والبنات ..

حنين : ريمي هذا تليفونج .. وصيتيني علي ..
ابتسمت : مشكورة حنونة ..
دنگت راسي واني متوترة وخايفة وادعي لخالتي ..

براء حطت ايدهة على متني : ريم لا تخافين انشالله تگوم بالسلامة .. ما عليهة شي ..
هزيت راسي : ان شاء الله ..

باوعت لبابا وحارث ووياهم رياض واگفين بعيد ببداية الممر تقريباً ..
مر ساعتين تقريباً واني اعصاب ما بقت عندي ..
وبراء تهدي بية .. كل ما اريد ادخل يطلعني ..

اخر شي طلعت ام عامر : بشري خالة ..؟؟
ابتسمت : بالعافية وبالخير يمة يتربى بعزكم .. خالتج واخوج ثنينهم بخير ..

تنفست براحة : الحمدالله والشكر ..
ام عامر : روحي بشري ابوج واخوج ..
حنين بضحكة : ورجلج ..
ابتسمت ورحت بأتجاهم ..

ابوي حجة : ها بابا بشري ..
ابتسمت : الحمدالله ولدت وجابت ولد وثنينهم بخير ..
تنهدو براحة واصواتهم متفرقة : الحمدالله ومبروك ويتربى بعزك ..

بابا راح على جهة يتصل ..

جرني حارث وباسني براسي : تعاي احبج لان گمزتج من النوم وعطت بيج .. بس مو بيدي جنتي مطفية ..
رياض تنحنح : اححم .. ابو عباد مو وكتهة الحبة منا العالم .. تباوع عليك ..

حارث باوعلة : وانت تغار شني .. لان ما سلمت عليك ولا باوعتلك .. ساحبة عليك ..
رياض حط ايديناتة بجيوبة ورفع اكتافة : اندري .. اسألهة هي ..

عضيت شفتي بأحراج .. نسيت ما سلمت ..
ريم : اسفة والله ما انتبهت بس من فرحتي نسيت ..
هز راسة بأبتسامة : ولا يهمج ..

رجعت يم البنات ..
طلعو خالتي اخذوهة لغرفة خاصة والطفل اخذو للخدج لان انولد قبل وقتة ..
دخلت يم خالتي وهي تون من الالم ..

ام عامر يمهة وتمسح بوجهة بخاولي مبلل ..
دنگت بستهة : مبروك خالة .. يتربى بعزكم انشالله ..
ابتسمت : يتربى بعز اختة .. ياريت يطلع يشبهج ..
ابتسمتلهة : اهم شي تمام الخلقة ..

شوية واجت الدكتورة تفحصهة ..
اني طلعت برة كعدت عالكرسي لان كالت خل ترتاح لان تعبت هواي ..
اجة رياض وگف گدامي ..
رفعت راسي علي : ضمي گذلتج .. طالعة من العباية ..

دنگت وضميت شعري ..
هو گعد بصفي بأبتسامة : نسيت ما باركتلج .. مبروك .. يتربى بعزكم ..
ابتسمت : الله يبارك بيك .. مبروك الك هم .. صرت خال ..

هز راسة : انة خال من زمان ..
باوعلي بترقب : واضح التعب بيج .. شكلج ما نمتي البارحة زين ..
ابتسمت : اي بفضلك نمت كلش زين ..
ضحك : خذتني السوالف شسوي .. هو انتي ينمل منج ..

سكتت ما حجيت شي ..
مد ايدة رفع العباية طلع طرف رجلي طابگ حواجبة : هاي شلابسة ؟؟
رفعت اكتافي : تراك .. يعني بجامة نوم ..

رفع حاجبة : جاية للمستشفى ببجامة نوم وردية ..
ضحكت : ليش انت شفت شكلي من طلعت .. حالتي حالة .. حتى تليفوني نسيتة .. وجواريب ما لبست ..

فتح عيونة على وسعهن وباوع لرجلية ..
من الخوف رجعت رجلية ليورة جوة الكرسي ..
باوعلي : طلعيهن خل اشوف .. حذائج مقفل مو ..
هزيت راسي بلا .. طلعت رجلية ..

لابسة حذاء اسود مفتوح من گدام وطالعة اصابعي واضافري المصبغتهن بماروني من البارحة صبغتلي ام الصالون ..
باوعلهن ثواني .. مد ايدة فرك راسة بعصبية مكتومة ..

رص على سنونة : مو ماريد اشتم .. اكو وحدة تطلع من بيتهة بدون جواريب ورجليج طالعات .. ادور ملونتهن بأحمر ..
ريم : اي حقك مو ما شفت خالتي شلون جانت .. زين مني واندليت العباية وين ..

رياض : كومي طبي جوة بالغرفة .. ممنوع تعتبين الباب ..
هزيت راسي وگمت بسرعة دخلت للغرفة ..

ورة ساعة تقريباً اجت الدكتورة وگالت تگدرون تطلعونهة .. ووضعهة زين لان ولادة طبيعية وكلشي تمام ..
جابو الطفل .. والحمدالله وضعة زين ..
باوعتلة مبتسمة .. كزكزت علي ناعم وخدودة حمر ..

شالتة ام عامر انطتة لخالتي رضعتة ..
لميت الاغراض بالجنطة ..
اندگت الباب ..
رحت اني افتحة حتى لحد يدخل لان خالتي جاي ترجع بالطفل ..

فتحت الباب شفت رياض .. حجيت لا ارادياً : دقيقة خالو متگدر تدخل هسة ..
رفع تك حاجب ومعاجبة : خالو ؟ ..

انتبهت لنفسي شحجيت ..
عضيت شفتي : اسفة والله ما انتبهت .. لساني ماخذ عليهة هالكلمة ..
جر نفس بقلة صبر : هاي عضة الشفة بطليهة كدام العالم .. هاج ذني .. البسيهن قبل تطلعين ..

دار وجهة ومشة ..
دخلت وفتحت العلاگة .. طلعن جواريب جديدات لونهن اسود بس مشجر بي نقشة ..
براء ضحكت : هذني جواريبي مشتريتهن جديدات للدوام .. عمو رياض راح جابهن حتى لا تطلعين بدون جواريب ..

حنين : جا مو حقة .. انتي دباوعي للرجلين جنهن زبد .. الحذاء اسود والرجلين بيض .. ومصبغة الاضافر ماروني .. شلون ما يجيبلهة جواريب ..
ضحكت وفتحتهن ولبستهن ..

ديلارا //

دخلت لغرفتي فرحانة .. هستوني رجعت خبر لامي بموافقتي .. اصلاً ميحتاج افكر .. هالشي منتضرتة من زمان ..

طلعت تليفوني واتصلت على ريم لان سمعت من ماما ان مرت ابوهة اليوم جابت ..
باركتلهة وحجيت وياهة شوية .. وسديت التليفون ..

كمت اريد اروح لجيلان ..
من البارحة سادة الباب بحجة نايمة وهي تبجي ..
فتحت باب غرفتي ..
شفت بابا هستوة طالع من غرفة جيلان ونازل معصب ..

خفت بس لا ضربهة ..
رحت بسرعة فتحت باب غرفتهة ..
شفتهة گاعدة بالگاع يم الجرباية وتشهك وتبجي ..

ركضتلهة لزمتهة من وجهة : جيلان شبيج .. شسوالج .. ضربج ؟؟
شهكت ببجي : ياريتة ضاربني .. عالاقل ارحملي من ان يغصبني اتزوج واحد ما احبة .. ديلارا فدوة ماريد اتزوج غير حارث .. يريد يجبرني عالزواج ..

فتحت عيوني : شنو يجبرج عالزواج .. ميصير هيج ..
جيلان : هددني اذا گلت لا راح يگول لماما اني جان عندي علاقة بحارث .. وانتي تدرين بماما شيصير بيهة اذا عرفت .. فدوة دلو حاجي اقنعي ماريد اتزوج ..

اخذتهة بحضني وهي شبعانة بجي ..
احاول اهديهة .. وهي تزيد ببجيهة ..
وجعتلي گلبي ..

اخذتهة للحمام غسلت وجهة ..
خليتهة تمدد عالجرباية وهي تناشغ ودموعهة تنزل ..
غطيتهة وطلعت من الغرفة ..

نزلت جوة لاگتني اختي زينة تركض وضربت بية ..
وكع الدفتر مالتهة واقلامهة : الله الله .. على كيفج ليش تركضين ..
زينة : اريد اشوف لبيبي رسمتي ..

دنگت الم بأغراضهة شلت الدفتر ودنگت اريد اخذ الاقلام ..
شفت زجاجة زغيرة مال محلول الابرة الي يصير بداخلة مسحوق طحيني ويتخلى وياه مي مقطر وبعدين ينسحب بالابرة ..

رفعتة بأيدي طابگة حواجبي : زينة شنو هذا ؟؟ وين لگيتي ..
باوعتلي ورفعة اكتافه : دورت قلم بجيب السترة مال جبران هو عايفهة بالصالة ورايح للحمام .. اني لگيتهة بجيبة ..

ازداد استغرابي .. مال شنو هاي ؟؟ وليش جبران شايلهة بجيبة ..
اخذتهة .. لازم اعرف هاي مال شنو ؟؟ وماكو غير راسم اسألة : زينة هاي راح اعوفهة عندي .. بس لا تگولين لاحد انطيتينياهة ..

هزت راسهة واخذت اقلامهة ومشت ..
صعدت ضميتهة بكنتوري ..

راسم // بعد يومين ..

گاعد يم حارث .. بالمعمل ..
اباوعلة مشغول بأوراق ومركز بيهن ..

دگ تليفوني .. (رضوان)
فتحت خط : الو ها رضوان ..
حجة وصوتة تارستة الفرحة : هلا ابو حافظ ..
ابتسمت على فرحتة : عساهة دوم الضحكة .. فرحني وياك ..

رضوان : عمي عاصم رجعلي خبر هسة وموافقين عالزواج .. لك راسم ما مصدگ ..
ضحكت : لا صدك هالمرة .. الله يتممهة عليك حبيبي .. وافرح بيك وبجهالك هم ..

حارث رفع راسة علية مبتسم ..
رضوان : يطول بعمرك حبيبي ابو حافظ .. بس ترة ها محتاجك هالمرة تختارلي القاط .. لان العقد بعد ٣ ايام ..

ضحكت : اي مو تدلل .. قاطك علية .. بس شعجب بعد ٣ ايام .. يعني عمي لو يأخرهة كلش لو مستعجل كلش ..
رضوان : بعد احسن خلي مستعجل .. وهم گال اعقدوا قبل جيلان .. لان عقدهم ورانة بيوم يعني بعد ٤ ايام ..

فتحت عيوني باوعت لحارث : شنو ٤ ايام .. ليش هو رجع جواب الهم .. انت متأكد من هالشي ..
حارث باوعلي طابگ حواجبة وحس بالموضوع ..
رضوان : يابة هستوني جنت احجي وياه .. وگال هسة خابرتهم وانطيتهم الموافقة .. انة هم تفاجأت شلون جيلان وافقت ..؟؟

سديت التليفون من رضوان..
حارث : شكو شبيك ؟؟ ليش وجهك انگلب ..
تنهدت : عمي عاصم مرجع خبر للجماعة .. وموافق ينطيهم جيلان .. والعقد بعد ٤ ايام ..

شمر الاوراق من ايدة ..
حط عكوس ايدة عالطاولة ولزم راسة وغمض عيونة حيل ..
وخر بسرعة وجر تليفونة واتصل : الو عباس .. هذا الزفت رجع من بغداد لو بعدة ؟؟

رگع التليفون عالطاولة بعصبية : لانعل ابوه لابو الجابة .. ادري جلبت ابغداد ..
باوعلي بعصبية : مو گتلك خل انة اروحلهة لبغداد وما خليتني .. شلووون هسة فهمني شلون ..

تنهدت .. عود اتفقنا اني وياه نروح نحاجي هذا الخاطبهة ونقنعة يبطل من الزواج هذا ويلغي من يمة .. بس من سألنة علي گالو ابغداد صارلة جم يوم عندة شغل ..
حارث راد يلحگة لبغداد بس اني منعتة ..

گام حارث يريد يطلع ..
لزمتة من ايدة : ويييين ؟؟
جر ايدة : راسم عوفني .. رايحلة لبغداد .. غصباً علي يرفض الزواج ..

راسم : لك انت مخبل شبيك ؟؟ تروحلة لبغداد وين تلگاه .. انت تعرف وينة اصلاً ..
هو اكيد على جية بهاليومين .. اكيد يجي علمود العقد ..

ضرب رجلة بالكاع : راسم لا تگلي عقد لا تگلللي عققد .. والله احرگهم قبل لا يعقدون ..
جريتة اريدة يگعد : اي افتهمت .. بس اگعد ومعليك .. انة بنفسي اروح احاجي ..

كعد عالكرسي ويفرك براسة : اريد اشوف تاليهة شني وياك ..

هادي //

الساعة ٤ العصر ..
دخلت للبيت .. من بعد ما وصلت امي لبيت عمي ضافر حتى تتباركلهم عالمولود الجديد ..

دخلت للصالة ..
وگفت بالباب واباوع جبران يشمر بالمخاد مال القنفات ومبين يدور شي ..
اباوعلة ما منتبهلي ومركز كدامة يدور باطراف القنفات ودنگ جواهن يباوع وعالطبلات ويم ميز التلفزيون ..

يحجي بعصبية ويفرك بوجهة : وين راحت ؟ ليش تلعبون بأغراضي .. متأكد هي بجيبي ما وگعت مني .. منو اخذهة .. اذا امي مو هنا .. منو الاخذهة ..

طبگت حواجبي : شبيك تسولف وية روحك ؟ وشتدور ..
التفت بسرعة بتوتر يباوعلي مصدوم وعبالك ممتوقع جيتي : هـ هادي ..

رفعت حاجبي : شبيك اختبصت .. وليش خايف ؟ على شنو جنت تدور ..
فرك وجهة بتوتر ويحاول يهدئ نفسة : ادور .. على .. اا .. اي قلم .. ادور على قلمي .. ما موجود بالسترة ..

باوعتلة ممصدك كلامة : وهاي العصبية والهوسة والتوتر .. بس علمود قلم ..
هز راسة : القلم هذا عزيز علية .. وجايني هدية ..
هادي : هدية منين ؟؟.

لبس السترة يريد يطلع : اهوو هادي .. جاي تستجوبني انت .. شو وخر خل اطلع ..
وخرت عن الباب وهو طلع واني ما عاجبني وضعة ابد ولازم اعرف شبي ..

رحت لغرفتي بدلت ملابسي ونزلت رحت لبيت جدي ..
دخلت للصالة لگيت حبوبتي وعمة زمن يسولفن على زواج اخواتي البنات .. وخطوبتهن قربت ..

كعدت وورة شوية اجة ابوي ..
شفت هذا انسب وقت احجي بالموضوع وية ابوي ..
هادي : احم يابة ردت احاجيك بموضوع ..

التفتلي : ها بوية گول ..
ابتسمت بهدوء : يابة انة اريد اكمل نص ديني .. يعني الحمدالله ما بقى شي يمنعني عن الزواج ..
باوعلي بفرحة : اي هذا الحجي العدل .. واخيراً فكرت بالسالفة ..

حبوبتي : يمة هاي الساعة المباركة .. انة فرحانة برضوان وانت كملت فرحتي بيك ..
رفعت ايديهة للسما تدعي : وانشالله ربي يفرحني بحويرث ..

زمن بأبتسامة : اي هادي .. ما گلتلنة .. عندك وحدة ابالك لو ندورلك ؟؟
رديت الابتسامة : والله اكو يعني .. حاط ابالي اخطب بنت ابو عجاج الوسطانية ..

ابوي باوعلي برفعة حاجب : وانت منين تعرفهة وحددت الوسطانية ..

ضحكت : لا يروح بالك ابعيد يابة والله ما عندي شي وياهة وولا محاجيهة .. بس سألت ريم اذا اگدر اخطب منهم وگالت الجبيرة جاي تدرس صيدلة ومتريد تتزوج هسة تريد تتخرج بالاول .. وگالت الثانية متخرجة وكاعدة بالبيت .. يعني اشوف هالشي مناسب ..

زمن توسعت ابتسامتهة : حنين ؟ فدوة والله خوش بنية ومرحة .. زين ما اختاريت ابو علي ..
ابتسمت ..
ابوي : بيهة الخير وعلى بركة الله .. اخابرهم واحاجيهم .. ونشوف شنو يردون ..

ابتسمت براحة لان حجيت ..
وامي من حاجيتهة بالموضوع هم فرحت وما عارضت وتحمد بحنين ..

ليلى //

حطيت المبخرة عالميز ..
تنفست من العطر بأبتسامة ادري بي يحب ريحة العود والبخور ..
رفعت تليفوني باوعت للساعة .. ب٤ العصر اكيد هسة على جية ..

طلعت من الديوانية لاگاني عامر مبتسم برفعة حاجب : شتسوين بالديوانية ؟؟
ارتبكت بخجل : انضفهة ..
ابتسم : خطيبج هسة خابرني وراح يجي .. ولو ما يحتاج اگلج .. من ريحة البخور مبينة تدرين ..

نزلت راسي بخجل ومشيت لغرفتي ..
طلعت نفنوف طويل وردانة للعكس .. لونة بني وبي حزام اخضر زيتوني واسود .. عفت شعري مفتوح .. بس شلت خصلة صفح بماشة .. ما حطيت هواي مكياج لان هو يحب طبيعتي اكثر .. اخر شي رشيت عطر ..

سمعت صوت شهد : لولة تعاي عامر ايگول خل تجي تسلم على خطيبهة ..
نزلت جوة .. لاگاني عامر وهو يطلع ..
ابتسم كرصني من خدي ومشة ..

دخلت للديوانية .. شفتة كاعد عالقنفة لابس دشداشة لونهة كحلي ويباوع للباب ومنتضرني ادخل ..
من شافني كام وگف بأبتسامة ..
فتح ايديناتة : حيي هالوجه .. حي هالعيون الزرگ ..هلا بهالطول ..

ابتسمت : هلا بيك ..
تقرب مني وباس گصتي وهو ياخذ نفس ..
غمضت عيوني من حسيت بأنفاسة على جبهتي ..
سحب خصلة من شعري وباسهة : ول يا فرحة گليبي ..

كعد و كعدني يمة عالقنفة .. : ليش ساكتة يابعد هلي كلهم ..
ليلى : شنو اگول .. انت تتغزل وما بقيتلي شي اگولة ..
ضحك : جا شسوي والله گلبي طاير بالسما .. بس شوفة عيونج تكفيني وترد سبع عافيات بروحي ..

ضحكت : شفت شلون جاي تحجي .. اني ما اعرف احجي مثلك .. ما اعرف اتغزل هيج ..
تنهد : عمي لا تتغزلين ماريد غزل .. بس باوعيلي بهاي العيون .. هنة كلشي يسولفن ..

حارث // بعد يومين

كاعد بالمكتب وكدامي راسم لازم بيدة التليفون ويخابر ..
راسم : يعني حضرتك موجود بالدوام اليوم .. دكتور ضيغم ..

جريت نفس ورفستة برجلة هو خزرني .. لا فوگاها يمدح بهالزفت ..
راسم : لا انشالله خير .. يعني موضوع مهم نريد نحجي وياك بي .. شوكت نگدر نشوفك ؟؟

راسم : هايهية دكتور مادام انت تطلع من الدوام ب ٣ .. وبين ما ترتاح .. نجيك ب ٥ ؟ شتگول ؟
ابتسم راسم : هايهية دكتورنا مشكور .. انشالله ما نتعبك ويانة ..

سلم علي وسد الخط ..
باوعتلة بعصبية : بعد اجيبلك نرگيلة .. مكيف حضرتك انطلقت بالسوالف .. ادور يگلهة دكتور ..
ضحك راسم : اي جا شأكلة .. هو دكتور جامعي .. ووالله مبين من كلامة مثقف وخوش ولد ..

حارث : لا صدك .. يعني خوش سمعة زينة عندة ماشالله .. ما اتقارن بي مو .. هو دكتور واني مهندس .. شجااب شجاب ..؟؟

ضحك راسم : لك غبي شبيك انت ؟ يعني قصدي مثقف وخوش ولد وراح يتفهم من نحجي وياه .. وممكن يساعدنة ..
حارث : لا مو ممكن .. غصباً علي يساعدنة .. مو بكيفة ..

فرك وجهة راسم : حارث اذا بقيت بهذا اسلوبك .. ابقى انت هنا واني اروح اتفاهم وية الرجال ..
طبگت حواجبي : شني شبي اسلوبي .. شمسوي هسة اني ..

راسم : شبي اسلوبك ؟ هو انت شايف روحك جنك ثور هايج .. كوة لازمك اني ..
حارث شوف ترة جاي احجي صدك .. هدي اعصابك .. وحاول تحل الموضوع بهدوء وتفاهم .. بهالطريقة هذا الولد راح يفهمك .. وهم ما تسبب مشكلة وية عمي تخلي يعاند وياك اكثر .. وانت تعرف عمي شلون يفكر ..

تنهدت بقلة صبر ..
محد راح يحس بية .. نار واحسهة مشتعلة بصدري ..
يردون ياخذون مشمشتي مني .. والله الدنياً اگلبهة عليهم .. محد ياخذهة مني .. هاي روحي هاي ..

شوية وطلع راسم گال ب٤ونص امر عليك حتى نروح لهذا الولد ..
كمت اريد اشغل روحي بالشغل حتى لا افكر بالسالفة ..

قاطعني تليفوني دگ ..
شفتة رقم غريب .. ما رديت ..
رجع دگ مرة ثانية ..
شلتة وفتحت خط : الو .. نعم ..

كمت بسرعة وگفت على طولي واني اسمع صوتهة تبجي وتشهگ بأسمي : حاارث ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🕊
مرحبا للكل .. اول شي كل عام وانتو بألف خير وصحة وسلامة ..
مراح اگول ينعاد عليكم .. لا انشالله السنة التجي افضل واحسن من هالحال على العراق وعلى امة محمد اجمعين يارب ..

واسفة لان جاي اتأخر عليكم بس والله ماعندي مجال اكتب ..
والواتباد هم يشكل عندي .. اتمنى تعذروني وعلى كيفكم وياي ..

ولا تسون صوتو وعلقو وكلشي ينداس دوسو .. 🕊🕊 احبكم