رواية بنات للزمن الفصل السادس والأربعون 46 - بقلم سارة الشمري

الكاتبة : سارة الشمري🕊

مشتاكلك والليل وحشة
ودمعتي التنزف ثكيلة
وصوتها من اطيح عالي
وحتى محد يدري بيها ،،

وفتحت خط : الو .. نعم ..

كمت بسرعة وگفت على طولي واني اسمع صوتهة تبجي وتشهگ بأسمي : حاارث ..
غمضت عيوني حيل واجر بأنفاسي .. الله يلعن الشوگ شسوى بية ..

شكد مشتاگ لصوتها : گلبة ونفس ريتة .. شبيج تبجين ياهو الوياج ..
شهكت شهگة فطرت گلبي : حارث فدوة ماريد اتزوج غيرك .. ماريد هذا الي خاطبني ..

ضربت ايدي عالطاولة : ومنو الگالج راح اخليج تتزوجينة .. من كل عقلج انتي مفكرة هذا راح يقرب منج .. لو الامة تنگلب ماخليج تتزوجينة ..

تبجي وتصيح : والله لو اموت ما اتزوجة .. اذا فكر بابا يخليني اتزوجة والله اموت روحي .. خليني اموت ولا اتزوج غيرك ..

نترت : جيلان انتي جاي تسمعين شجاي اگول .. شهالحجي هذا .. شني اموت روحي .. كتلج ما تتزوجينة .. جا انة مو زلمة شني ..

جيلان : حقك انت ما شفت بابا شلون يحجي وياي .. كال تتزوجينة لو شيصير .. محد راح يمنعني .. واني كتلك بعد لو اموت ما اتزوجة .. والله اذب على روحي نفط واحرگهة وارتاح ومعلية بأحد ..

رصيت على سنوني واحس النار وشعلت بگلبي ..
سديت التليفون وطلعت من المكتب ومن المعمل كلة ..
ركبت سيارتي وشخطت بكل سرعتي وحجيهة يتردد بأذني ..
شني تحرك روحهة .. والله احرگهم كلهم ..

رحت للجامعة اليدرس بيهة هذا الصخام ضيغم مدري شسمة ..
وصلت هناك .. وكفت السيارة كبال الباب ونزلت الجامة حاجيت الشرطي الواكف يم الباب : السلام عليكم ..

: وعليكم السلام ..
حارث : خوية ردت اسأل على دكتور ضيغم .. طلع لو بعدة ؟؟
اشر على سيارة زرگة : هذا هو هالحركت سيارتة راح يمشي ..

هزيت راسي : مشكور ..
حركت سيارتي وراه ..
بقيت امشي وراه .. لحد ما وصل بشارع فارغ .. ودنيا الضهر كلهة ببيوتهة ..

قدمت سيارتي كدامة وقطعت علي الطريق ..
هو داس بريك وگف سيارتة ودگ هورن ..
نزلت من السيارة ورحت لسيارتة ضربت عالبنيد (الغطاء) مال السيارة حيل واشرتلة : انززززل ...

فتح باب السيارة ونزل يباوعلي طابگ حواجبة مستغرب : خير شنو المشكلة ..
جريتة من ياختة وطبگتة عالسيارة : تريد اشوفك المشكلة شني .. انت المشكلة بحذ ذاتهة ..

حط ايدة فوك ايدي يحاول يفكها : اول شي نزل ايديك وفهمني شنو الموضوع ومنو انت ؟؟
غرزت اصابعي بفكة : لا تطول لسانك لا اگصة سمعت لو لا ..

رفع ايدة على وجهي ضربني بوكس خلاني تراجعت لورى خطوتين .. : ليش تجبرني اضربك .. فهمني شنو سالفتك ؟؟
تقدمت علي ضربتة بوكس اقوى على خشمة طيحتة بالكاع ..

لزم خشمة وغمض عيونة بألم : ااااه ..
دنگت علي ولزمتة من فكة : وترفع ايدك هم .. فوگ شينة گواة عينة .. لك احرگك واحرگ عشيرتك كلهة تسمع لو لا ..

باوعلي وهو متألم من خشمة الي صار ينزف : هسة غير تفهمني ليش ؟؟ اكلتني حاصل فاصل .. ليش ما عندك اسلوب تفاهم ..

لزمت رگبتة : لك حيوان تخطب بت عمي وحبيبتي وتريدني اگعد اتفاهم وياك ..
تحولت ملامح الالم من وجهة لضحكة خفيفة وهز راسة : هسة افتهمت ليش متسودن علية .. يمعود هسة بس وخر وخل نحجي ..

تنهدت بغضب ووخرت ..
كام هو وحط ايدة على خشمة بألم ..
باوعلي بأبتسامة وهو يطلع كلنس ويحطة على خشمة : مبين تحبهة والله ..

نترت بوجهة بعصبية : مالك شغل بهالسوالف انتة ..
ضحك : لعد المن جاي علية ..
تقدمت علي : شوف لك لا تختبر صبري ورحمة امي هنا اموتك ..

هز راسة بأبتسامة : لا يابة هايهية .. مالي شغل بيك ولا ابنت عمك ..
رفعت حاجبي : غصباً عليك ..

تنهد : استغفر الله ربي واتوب اليه .. خوية لا تخاف .. عوف السالفة علية واعتبرنة لا خطبنة ولا دگينة بابكم ..
باوعتلة مستغرب : اكيد ؟؟

لزم شاربة : اكيدين .. واخذهة من هالشارب .. اليوم اني اسد السالفة .. واذا تريد هسة بس ارجع اخابر ابوهة واگلة بطلت .. بعد شتريد ؟

رجع ابتسم ولزم خشمة بألم : اني سمعت باليحبون يتسودنون .. بس ولا مرة شفت بعيني .. بس من شفت حالتك يعني والله رغم عصبيتك بس مبين خوش رجال ..

لزم خشمة الينزف : وهذا الخشم الانكسر اكبر دليل ..
حكيت راسي بأحراج لان تفهم بكل هدوء على گولتة عندة اسلوب تفاهم .. بس يا تفاهم هي مشمش خلت عندي تفاهم ..

باوعتلة : احم .. يحتاج اخذك للمستشفى .. يعني تشوف خشمك خاف مكسور ..
هز راسة : لا ما يحتاج مشكور يا .. صدك شسمك ؟
جاوبت : حارث ..

كمل جملتة : حارث .. مشكور حارث .. بس هسة شلون اشوف دكتور راسم وهاي حالتي ..
ابتسمت صار زراك جوة خشمة ومن جهة اليمين : لا لا تخاف بعد ما يحتاج يجي ..

طبگ حواجبة : ما فهمت .. انت تعرفة ؟؟
هزيت راسي بضحكة خفيفة : دكتور راسم ابن عمي .. وگال نروح نتفاهم وياه ونحاجي بالموضوع .. بس اني فقدت اعصابي وما تحملت ..

ضحك : مبين انسان عاقل دكتور راسم .. هسة لو انت جاي وياه وكاعدين نشرب جاي ومتفاهمين مو احسن من كسرة خشمي وعدمت السترة تراب وهاي اول لبسة .. شحلاتة التفاهم .. واسلوب دكتور راسم ..

هزيت راسي : ايي بعد معشر الدكتوراه .. عاقلين ماشالله ..

اعتذرت منة وتشكرتة ومشيت واني احس هم وانزاح عن گلبي ..

صعدت سيارتي وخابرت على ريم : ها ريمي وين انتي ؟؟
ريم : ابيت جدو .. ليش رايد شي ؟؟
حارث : من شوكت رحتي ؟؟
ريم : قبل شوية اجيت ورة الغدة بابا وصلني لان باجر عقد دلو واجيت اساعدهم بالترتيبات .. ما گتلي ليش ..

ابتسمت : اول شي وصلي سلامي لمشمش وگليلهة لا تبجي ولا تخاف حليت السالفة وسديتهة ..
ريم : يعني شنو ؟ شسويت حارث ..

حارث : ريمي لا تطولين السالفة سوي مثل ما گتلج وهايهية ..
سديت التليفون منهة ..

بعدة التليفون بيدي ورجع دك ( راسم )
فتحت خط وحجيت براحة وابتسامة : حييي الله ابو حافظ ..
راسم : خير شهالهدوء .. وبعدين وينك انت مو لازم نروح سوة للدكتور .. الساعة ب٤ وانت ماكو ..

ابتسمت : لا ما يحتاج يعني حليت الموضوع بيني وبينة .. جان خوش رجال ..
راسم : جان ؟؟؟؟؟ ولك حارث شسويت ..

ضحكت : شبيك ابو حافظ .. يعني شسويت تفاهمت وياه بهدوء .. وطلع خوش رجال وتفهم الموضوع وكال اعتبرهة منتهية السالفة ..
سكت شوية : حارث تعال للمعمل نتفاهم .. حتى تحجيلي الصار .. بدون جذب ..

ضحكت وسديت الخط .. وتوجهت للمعمل ..

جيلان //

رحت رجعت التليفون مال ديلارا لغرفتهة واني جنت ماخذتة بدون ما تدري ..
رجعت لغرفتي وكعدت ابجي .. هي هاي حالتي من وقت ما بابا اجة حاجاني وصيح علية ..

دقاقيق وافتحت باب الغرفة وسمعت صوت ريما : جلاتينة گاعدة حبيبي ..
مسحت دموعي بس حتى الاعمى واضحة عندة ان اني جنت ابجي من صوتي وخشمي المسدود ووجهي عيوني مورمة وخشمي احمر ..

جيلان : تعاي ريما .. كاعدة ..
شغلت الضوة وباوعت لحالة الغرفة : شنو هالحالة هاي .. والگئابة العايشة بيهة ..
اجتني باستني بخدي : گووومي ولج مشتاقتلج هيج تستقبليني ..

كامت سحبت البردات و فتحت الشبابيك : خل تتهوى الغرفة شوية شنو هاي مسويتهة ضلمة ودليلهة الله ..
وشنو هاي الهوسة .. شوفي الملابس شلون مطشرة ..

كعدت تلم بيهن وذبتهن بالسلة مال الملابس ..
راحت للمراية وترتب العطور الي عليهة ..
تنهدت بملل : ريما انتي على شنو جاية ..
حجت بدون ما تباوعلي ومنشغلة ترتب : باجر عقد دلو واجيت اساعدهة وارتب وياهة ..

كتفت ايدية : بس اني مو دلو حبيبتي .. هذيج غرفة دلو خاف متدرين .. انتي جاية تحسيني اني مهملة ووصخة ..
التفتت علية وحجت بثقة : احسسج ؟؟؟ .. حبيبتي رسمياً اني راح اگول انج وصخة ومهملة وغير مرتبة ومستهترة من ناحية الترتيب ..

رجعت تكمل ترتيبها وحجت بتنهيدة : الله يعين حارث شلون راح يتحملج .. لا طبخ ولا ترتيب ..
خنگتني العبرة : ما يحتاج تگولين هيج .. وما يحتاج يتحملني اصلاً .. منو گلج راح اصير الة اصلاً .. تتوقعين من كيفج ..

تخوصرت : لا حبيبتي مو من كيفي .. حارث اعرفة بگد ما اعرف نفسي .. وادري بي مستحيل يخليج تتزوجين ومستحيل يخليج تكونين لغيرة ..
عجييب عليج شلون انتي خايفة هيج ومو متطمنة .. اني واثقة ان حارث ما راح يگعد راحة وراح يتصرف ويوگف هالمهزلة .. واذا ما صار هيج تعاي وعاتبيني ..

باوعتلهة بأمل : صدك ريم .. متأكدة ..
ابتسمت بتأييد : متأكدة مثل ما متأكدة جاي اشوفج كدامي ..
كلامهة وكلامة هو خلى عندي شوية امل ان مراح يخليني اتزوج هذا الي متقدملي ..

اجت سحبتني من ايدي : گووومي يلة غسلي وجهج وخل ننزل ..
هزيت راسي بنفي : لا ما انزل جوة .. خاف بابا يجي ..
تنهدت : تمام لا تنزلين .. عالاقل تعاي يمنة بغرفة ديلارا وشاركيها بفرحتهة .. ترة هي هم ضايجة علمودج ..

فعلاً كلامهة صحيح .. كمت للحمام غسلت وجهي وطلعت ..
اجت ريم بيدهة قلم الكحل : تعاي احطلج كحلة ..
وخرت راسي : لااا ماريد شنو وين رايحة للمريخ .. هي هاي الغرفة ..

ريم : لج غبية .. امج كلساع تدخل .. انتي تصرفي طبيعي .. لحد ما يجيج العلم الحلو من حارث .. وتصرفي گان طبيعي وما صاير شي .. متأكدة اليوم راح يتصرف حارث .. لان باجر عقد رضوان واكيد ما يجي ويسوي مشكلة .. وعگب باجر يعني يصادف عقدج وهو ماراح يخربهة بيوم العقد حتى لا تجيج سمعة .. انتي فكر بيهة ماكو غير اليوم ..

تنهدت وادعي بداخلي يكون كلامهة صح ..
جابت القلم وحطتلي كحلة بداخل عيني ..
ابتسمت بألم على شكلي لان ادري حارث يحب عيوني الناعسات من احطلهن كحلة ..

كمت اني وريم ورحنة لغرفة ديلارا ..
شفتهة مخبوصة وتطلع بالاشياء الي اشترتهن البارحة من السوگ من طلعت هي وامي .. اني تحججت تعبانة ومالي خلگ اطلع ..

ابتسمت من شافتني : هلاا جوجو .. واخيراً نورتي غرفتي ..
ابتسمتلهة واحاول اغير من مزاجي حتى لا اضوج واضوجهة وياي واخرب فرحتهة : اي واخيراً .. اشوف بلة شوفيني شنو اشتريتي ..

كعدت بحماس تشوفني بالغراض الي اشترتهن ..
طلعتلي فستانها الي راح تلبسة باجر ..
واني اشاركهم الحديث ..

دخلت ماما ابتسمت من شافتني : جيلان هنا .. صارلة زمان القمر ما بان .. هذا كلة نوم ..
هزيت راسي بهدوء وهي باوعتلنة : يلة تعالن انزلن جوة .. اجن مريم وبسمة .. وميگدرن يصعدن عليجن وخاصاً بسمة خطية تعبانة .. يلة انزلن يمهن خطية ..

باوعت لريم .. قبل لا احجي سحبتني ..
وگفت باوعت لامي : ماما وين بابا هنا ؟؟
ابتسمت وهي كل تفكيرها اني خجلانة منة : لا ماما مو هنا .. انزلي اخذي راحتج .. راح للمعمل قبل شوية ..

نزلنة اني والبنات جوة ..
جانن موجودات مريم وبسمة ..
تونست وياهن .. وبسمة خطية ما تشارك بالحديث هواي .. وين جانت بسمة قبل الضحكة ما تفارگ شفتهة وتسولف وتضحكنة وياهة بسوالفهة الحلوة ..

گامت ديلارا جابتلنة عصير ..
حبوبتي تباوعلنة مبتسمة : يممة هذا الشهر شهر خير .. ريما انخطبت ورضوان ودلة باجر يخطبون .. وجويلة وراهم بيوم .. وهادي الله هداه وگال اريد اعرس ويريد من بيت سيد عجاج

ريم فتحت عيونهة : صددددك .. گاللكم بيبي ..
باوعتلهة بصدمة : شگاللهم .. يريد منو ؟؟
ريم ابتسمت : حنين بنت خالو ابو عجاج ..
ديلارا ضحكت : هاي حنين ام لسان ترهم وية هادي .. شلوون رهمتوهة ..

مريم ضحكت : يعني انتو جبتو الشرق وطبگتو وية الغرب .. هادي وحنين شلون ..
امي جاوبتهة : بعد هو اختارهة وبكيفة وبعدين شبيهة حنين .. عين الله عليهة .. مبينة خوش بنية وهادي يستاهل هيج وحدة ..

حبوبتي : اي يمة الله يسعدهم .. هل كلكم راح تعرسون .. ضل المگرود حويرث ..

زعجني الحديث .. جريت الكلاص وكمت اشرب ..
امي حجت : هم يجي يوم عمة ونفرح بي انشالله ..
حبوبتي : لالة انا باجر من يجي ضافر احاجي .. اخلي يخطبلة من بنات سيد عجاج هم شو حليوات ويخبلن عدهم كومة بنات ..

اسمع كلامهة وشرگت بالعصير كمت اگح .. لدرجة عيوني دمعت ..
ريم يمي تضرب على ضهري : اسم الله حبيبتي شجاج ..
امي اجتني بسرعة : اسم الله ماما .. شبيج .. شو جيبي مي ..

ديلارا جابت مي وانطتنياه واني شربتة وگمت : عن اذنكم .. اروح ابدل لان ملابسي كلهة عصير ..

طلعت من يمهم واني عيوني كامت تحرگني ..
حجي حبوبتي خنگني ..
اخذت ملابس وبدلت الي لابستهن ..
خلصت ودخلت ريم بسرعة متحمسة : اني شگتلج ؟ مو گتلج ما يسمت وراح يسوي شي يوگف هالسالفة ..

رحتلهة بلهفة واني ما مفتهمة السالفة : شـ شنو الموضوع .. شصار ؟؟
لزمت ايدي : هسة خابرني حارث وكال وصلي سلامي لمشمش وگليلهة لا تبجي ولا تخاف حليت السالفة وسديتهة ..

ابتسمت بفرحة : والله ؟ هو هيج گال .. يعني شسوة ..
اختفت ابتسامتهة : والله مادري شسوة ما گلي .. بس مادام سدهة هايهية .. ثقي بكلام حارث ..

جريت نفس وحسيت هم وانزاح عن صدري ..
رجعت نزلت يمهن ونفسيتي متغيرة تماماً .. مادام حارث كال هيج معناها هايهية اعتمد .. شگد احبة يربي ..

ورة ساعة تقريباً
گمنة نسوي بالعشا ..
حبوبتي وامي يعاملن بسمة مثل المي بالصينية .. وهي التعب مبين بوجهة من ورة الحمل والتفكير ..

على وگفتنة بالمطبخ وانفتح الباب ودخل بابا مبين معصب ..
كمزت اني من شفتة .. هو عيونة ارتكزت علية .. عظ شفتة بعصبية مكتومة وهز راسة بغيض ..
بلعت ريگي بخوف من شكلة ..

اجت علي ريم ومريم سلمن علي هو سلم بهدوء بس بعدة معصب ..
عافنة وراح صعد فوگ واسمعة صاح : زممن .. تعاي ..

امي راحت وراه ..
البنات يباوعلي ومتوترات مثلي ..
ريم هزت راسهة بمعنى اهدي ..
حاولت اركز بشغلي بس ماكدرت ..

حتى اجواء الضحك والسوالف غابت .. والبنات توترن وياي ..
لحد ما اجة رضا وبيدة تليفون ريم : عمة ريم تليفونج صارلة ساعة يدك .. وهي اخذتة ..
باوعتلهة اني بلهفة : منو ؟؟

ابتسمت وباوعتلنة : جنتنة المستقبلية .. اسمعن شلون راح ترد ..
فتحت خط وفتحت سبيكر : هلا بحنونة ..

اجاهة صوت كلة عصبية هي فتحت عيونهة : وعم حنونة من يدگ عليج ما تفتحين خط مو .. ليش صارلي ساعة ادگ ما تجاوبين .. ومن ادك من تليفون حنين تجاوبين .. شني معناتهة هاي الحركة ..

احنة وحدة باوعت بوجه الثانية وهي مصدومة تباوع للتليفون ..
سدت السبيكر وطلعت تحجي بالغرفة مال بيبي ..
ديلارا بضحكة : خطية .. راحت بيد حضرة الملازم رياض عجاج ..

شوية وصاحتني ماما من فوگ ..
خفت ورحت .. لاگاني بابا عالدرج هستوة نازل ..
باوعلي بعصبية وحجة بغيض : اعرف انة ياهو الورة السالفة ..

نزلت راسي بسرعة وسرعت خطواتي صعدت الدرج ورحت لامي ..
صاحتني كعدتني يمهة وكعدت تحاجيني وكلشي قسمة ونصيب ولا تضوجين مدري شنو وعبالهة راح ازعل لو اضوج .. ما تدري فرحتي هاي ..

هزيت راسي : ماما شنو الموضوع ليش تحجين هيج ..
ماما : خطيبج .. قصدي الي خطبج ذاك اليوم ..
هسة راجع مخابر ابوج وگالة يمكن راح انقل شغلي لبغداد لغير جامعة .. وما مستقر بعدني وما جاهز لهذا الزواج واهلي اتخذوه بسرعة حتى يتقربون منكم واني وافقت بدون تفكير .. وهسة يعتذر ..

باوعتلهة .. بالگوووة ضامة ضحكتي الا شوية جان هلهلت .. وحضنتهة من الفرحة ..
هزيت راسي اصطنع العصبية : يلة بعد احسن .. الي ميريدنة منريدة .. على شنو اضوج .. عشتووو .. خلينة هسة بزواج دلو وعود بعدين افكر بنفسي ..

ابتسمت هي : متأكدة ما زعلانة ..
وگفت اني : ماما اليسمعج ايگول جنت احبة وهسة عافني .. خلي يروح يجون غيرة ..
دنگت بستهة بخدهة : الا اذا جنتي انتي ضجتي لان ماراح تخلصين مني ..

ضحكت هي وضربتني على راسي : شهالتفكير هذا ولج ..
جريتهة : يلة لعد گومي نلحگ عالمخلمة الي مسويتهة مريم تدرين بيهة ما تتفوت ..
ماما : يلة روحي هسة اجي وراج ..

نزلت جوة ودخلت للمطبخ ..
طگيت اصبع بالنص وهزيت كتفي بفرحة وارگص : العريس شرد .. المعرس انهزم .. الزواجة تفلشت مو بس انلغت ..
البنات يضحكن علية ..

ديلارا حضنتني : هسة اكدر اگول مبروك ..
مريم اجت باستني بخدي : مبروووك جلاتينتي ..
حضنتهن بفرحة مالية گلبي .. فديت حروثي عند كلمتة ..
فدوة لطولة ..

كعدنة نتعشى .. بعدين طلبنة من هادي ياخذنة لشارع السناتر نتسوگ اني وريم وديلارا لباجر للعقد .. الاجواء بليل تصير تخبل بكربلاء ..

اليوم الثاني // براء ..
بالجامعة ..
كاعدة بالستيج الاخير ويمي صديقتي افنان تسولف ومنتضرين الدكتور ..

دخل علينة دكتور ضيغم .. هستوة متعين صارلة اسبوعين وهو ما داوم غير اسبوع واحد الطلاب مرتاحين ايگولون من بدايتهة مخلصهة ابغداد ..

جنت مركزة بالاوراق الكدامي ..
افنان ضربتني بعكسهة : اگلج هذا شبي خشمة مزورك ..
رفعت راسي باوعتلة فعلاً خشمة جان اطرافة ازرگ على بنفسجي ..
هزيت راسي : شمدريني شبي خشمة .. ايجوز واگع ..

افنان : يا حلاوتج .. لج هذا مبين مكتول لو متعارك .. طلعت مو هين دكتور ضغومي .. هم مستقوي ويسوي مشاكل .. بس علينة مسوي روحة افندي ومثقف ..

ضحكت على كلامهة : اشش لا يسمعج كافي ..
ابتسمت هي : دسكتي شيسمعني .. والله مقهورة منة .. اني تالي عمري بدرسني واحد اكبر مني ب٣ سنوات .. واحترمة واگلة دكتور وهو نافخ روحة علينة .. امداااني ...

ضحكت بصوت خفيف ..
هو جان منطينة ضهرة ويكتب عالسبورة بالقلم ..
حجة بدون ما يلتفت علينة : الي بالاخيييررر .. الموضوع هناا .. خلو تركيزكم وياي ..

افنان عوجت حلگهة تقلد علي حجت بصوت ناصي : مركزين عيني ابو خشم مزورگ ..
بلش يشرح ويحجي واني مثل العادة اركز بالشرح ..
الصيدلة حلمي .. وولا مرة استخفيت بأي شي وما احب اقصر بأي واجب او انقص درجة ..

بس اليوم الشيطان تربع كدامي .. 
ما كدرت اصبر لحد ما تخلص المحاضرة وسحبت ورقة من السجل وشگيتهة ..
كتبت عليهة ( صدگ ما گتلج اليوم انعزمت على عقد من ارجع منا مباشرةً نروح الهم )

دنيت الورقة على افنان وهي سحبتهة تقراهة ..
رجعت كتبتلي ( لمنو العقد ؟ وشراح تلبسين )
اخذت الورقة نفسهة وكتبتلهة ( العقد عد عيال خالتي يصير ابن عم وبت عم مرت عمو رياض واذا عاللبس عندي فستان اسود راح البسة )

مديتلهة الورقة هي ضحكت وكتبت ( ايي اكشخي زين وتعدلي بلكي تلگين العريس اكيد عدهم ولد حلوين مو بلة)

سحبت الورقة بعدني اريد اكتب ومدنگة عالورقة وشفت ايد انحطت على الورقة بكبرهة ..
فتحت عيوني وبلعت ريگي ورفعت راسي لدكتور ضيغم ..

الكاتبة : سارة الشمري🕊
مرحباً للكل انشالله تكونون بألف خير .. اسفة دا اتأخر عليكم ..
اتوقع اذا كدرت راح ارجع للتنزيل اليومي او بين يوم ويوم ..

اتمنى حبيتو البارت وعجبكم وعلقو عالفقرات ..
لا تنسون صوتو وعلقو وكلشي ينداس دوسو .. احبببكككم 🕊🕊