رواية بنات للزمن الفصل التاسع والأربعون 49 - بقلم سارة الشمري

الكاتبة : سارة الشمري 🕊

( تفاعلو بالقصة حبايبي وعلقو عالفقرات .. احبكم ❤️)

توجهنا لبيت هذا الشخص وطول الطريق حارث ويانة عالخط يدلينة بالطريق وهمة بالسيارة الورانة ..

وصلنة لبيتهم ..
دگينة الباب مرتين ..
وبالمرة الثالث انفتح الباب ..

طلعتلنا وحدة متوسطة العمر وحاطة شال على راسهة ..
باوعتلنا اني وعامر بتساءل : نعم ؟
عامر : اخيتي بس ردنة نسأل عن صاحب البيت ..
انتبهت تباوعلنا بحذر : ما موجود هنا ؟ منو انتو بلا زحمة ..

طلعت تليفوني وطلعت صورة جبران : احنا جايين ندور على هذا .. نطلبة فلوس وهو مختفي .. واكو جماعة كالو شفناه اكثر من مرة يجي لهنا ..
اخذت التليفون وشافت الصورة وحجت رأساً : ايي هذا بأخر فترة اجة اكثر من مرة على امين ..

عامر : امين منو ؟
ردت : امين زوجي .. ويعرف الي بالصورة ..
عامر : شوكت اخر مرة شفتي الي بالصورة ..
حجت بسرعة : قبل يومين لو تلاثة .. اتذكر اجة الغروب ومدري شحجو هو وامين وتعاركو وامين طردة من البيت ..

هزيت راسي وباوعت لعامر : مادام تعاركو معناها اكيد ما يندل مكانة .. امشي ندور علي بغير صفحة ..
صعدنة سيارتنة اني وعامر ومشينة ..
بس حركتهة دگ علية حارث الي يراقب من بعيد وية رياض : ها شو رجعت ؟

راسم : اي جا شسوي بعد .. خل نوصل واحجيلكم ..
وصلت للمعمل وحجيتلهم الي گالتة المرة بالحرف الواحد ..

هنا وجان يدخل علينة هادي ووياه جبران ..
عيوني تثبتت على جبران .. شلون ما لاحضت التغيير بي طول هالفترة .. ضعفان ووجهة مسومر وسواد جوة عيونة .. وفص عينة احمر ..

حارث گام بسرعة لجبران : جبران وين جنت .. بيك شي .. تحس بشي .. متأذي ؟؟
جبران وخر ايد حارث : شنو شبيك شو وخر .. شنو هالتصرفات ..

هادي جان مخابرة حارث وگايلة على كلشي وعن موضوع المخدرات .. بالوقت الي جنة احنة ابيت صاحبة ..
گعد عالكرسي بعصبية : لگيتو هذا الزفت ؟؟

هزيت راسي : لا من رحنة ما موجود بالبيت ..
رياض كمل : وحطيت مراقبة عالبيت .. اذا شافوه اجة يخابروني وينطوني خبر ..

جبران يباوعلنة طابگ حواجبة : عليمن تدورون .. وشكو خبصتوني بالتليفونات وهادي سحبني سحب لهنا .. شكو ؟؟

بهاللحضة دخلو رضوان وعمي عاصم وعمي ضافر ..
من شكلهم الواحد يگدر يتأكد ان عدهم علم بالموضوع ويدرون ..

عمي عاصم خزر جبران : وييين جنت ؟؟ ويم منو ؟
جبران طبگ حواجبة بعصبية : زعطوط اني عدكم .. شكو كلها ملتمة علية وتدورون .. وتستجوبون وتصيحون ..

عمي مد ايدة بجيبة وطلع مجموعة اشرطة مال حبوب وطشرهن عالميز بعصبية : هذني الممممن ؟؟؟؟
جبران تحول وجهة احمر وعيونة حمر ..

گعد على ركبة بسرعة لم الاشرطة وشالهن : الي هذني .. منين جبتهن .. وين لگيتهن ؟ ليش تمد ايدك على اغراضي ..

يحجي وهو يرجف وحجية مسطر كوة تطلع حجايتة ..
دنگ عمي جرة من ياختة ووگفة : وفرحاان تحجيهة عادي هذني الك .. ولك يا عااار مخدرررااات .. مدمممن؟؟ .. تاليتك تطلع مدمن وممنوعات .. ليش ولك ليش ..

جبران دفع ايد عمي عنة وحجة بتوتر : معليك .. عوفني ..
رفع راسة ويباوع بوجوهنة واحد واحد ..

شفت تنفسة مو منتضم ورجفة ايديناتة ..
عمي راد يهجم علي واني صرت گدامة : عمي لا .. عوفة اني احجي وياه ..
عاط بية : شتحححجييي وياه .. ولك دمررر نفسة هذا .. دمر حياتة ..

اشرت للولد بحواجبي على عمي ..
اجة رياض لزمة : عمي هدي اعصابك .. خليهم يتفاهمون .. ترة بالصياح ما ينحل شي ..

التفتت لجبران وسحبتة من ايدة وطلعتة اخذتة لمكتب عامر وطبگت الباب ..
لام الاشرطة على صدرة ..
مديت ايدي اخذتهن منة وهو طبگ حواجبة بعصبية : عوووفهن راسم .. ما عندي غيرهن ..

تنهدت وگعدتة عالكرسي وگعدت مقابيلة : جبران انت تعرف هذني شنو صح .. وتاليتهن شنو ؟
هز راسة بأيجاب وحجة بهدوء : ادري .. كلشي اعرف .. مو غبي اني ..

تنهدت : لعد ليش تتصرف هيج .. ليش ما تذبهن ..
باوعلي : ما عندي غيرهن .. اذا خلصن منو يجيبلي .. امين وطردني لان ما گمت انطي فلوس ما عندي ..

راسم : جبران .. بعد سبع اشهر انت راح تصير اب .. حاط هالشي ابالك لو لا .. ابدال ما انت تذب فلوسك على مرتك وتجهز لابنك .. جاي تذبهن على هالسم هذا ..

باوعلي بنضرات مكنسرة وعيونة غورگت : مو بيدي .. راسم هذا التسمي سم اذا ما اخذة احس روحي راح اموت بأي لحضة .. حاولت اشغل روحي .. حتى شرب شربت .. كلت خل اتعود عالشرب حتى انسى هذني وبعدين اعوفة لان اسهل من اريد اعوفة .. بس ما گدرت ..

نزلت دمعة من عينة مسحهة بسرعة : جم مرة رحت لبسمة وردت احجيلهة .. بالمقابل هي تصدني وتبعدني وعبالهة أذيهة عن قصد ..
بس راسم والله تصرفاتي مو بيدي ..

جايين تصيحون علية وتلوموني ..
وعبالك الشغلة من ايدي .. اني اعرف هالسم هذا ..
واولكم اني جنت اكرهة وضدة ..
بس هذا كلة من امين .. هو البدة يحطلياه بالعصير لو بالجاي .. من اول مرة رحتلة ..

وبعدين من گمت اروحلة ويشربني العصير ويبدي الم براسي .. هو يجيبلي حباية من هذا وايگلي تهدأ الالم ..
اني اخذ الحباية وهي تطلعني من عالم ثاني ..
لحد ما صرت ماكدر بدونهة واحتاجهة ..

اني سامع عالادوية والمهدئات الي الشخص يصير مدمن عليهن واذا ما اخذ منهن يتخربط .. وتوقعتة واحد منهن ..
طلبت منة اسم العلاج حتى اجيبة .. هو گال هاي مو علاج هذا مخدر ويريح الاعصاب ..

بوقتهة يلة اكتشفت الي جاي اخذة مخدرات ..
بس اكتشافي جان متأخر .. بساعتهة ردت ابلغ الشرطة .. وهو گال اذا بلغت بعد ما تحصل من هذا ..

وانت دكتور وتعرف المدمن شنو يصير بي من ياخذونهة منة ..
وانتو هسة تلومون بية .. ولك والله هذني اسوأ ايام عشتهن بحياتي ..

كلكم صرتو تكرهوني .. عبالكم ما يأذيني هالشي ..
لهسة ما تروح من بالي نضرة بسمة ..
وهي خايفة مني وشاردة وما تريدني الزمهة .. وتصيح وتستنجد بعمة زمن توخرني تطلعني من يمهة ..

لو ابوي وهادي الي صارت نضرتهم كلهة اشمئزاز مني لان مديت ايدي على بسمة ..
محد منكم حاول يفتهمني .. خفت احجي وتمنعوني منهن .. واني اموت اذا ما اخذت من هالحبوب ..

تنهدت بحسرة على حالة : زين انت تريد تخلص منهن ؟
حجة بسرعة : اريدد اخلص منهن .. بس ماااكدر .. صارلي ساعة شأحجي .. هذا سم هذا .. دخل لجسمي بدون علمي واخذ راحتي وعافيتي واهلي وناسي مني .. ورغم هالشي جسمي يريدة ومتمسك بي ..

راسم : تگدر تتعالج جبران .. اذا خليت عندك ارادة وهدف ان تتخلص منة .. راح تگدر وكلنة نوگف وياك .. انت بس گلي جم ابرة اخذت منة .. يعني حقنة كوكائين ..

هز راسة : ولا وحدة .. ما اخذت غير الحبوب ..
جريت نفس : جبران لا تجذب علية .. احجيلي بصراحة حتى اگدر اساعدك .. جم حقنة اخذ جسمك ؟

جبران : ولا وحدة والله .. ما حقنت ابر ..
طبگت حواجبي : لعد والابرة الي لگيناهة بجيب سترتك ..
ابتسم بسخرية : طلعتو انتو الماخذينهة .. واني الرحت هديت على امين كتلة انت بگتهة ..

بس على كولاً جاي اگلك ما حقنت ابر .. هي هاي جانت اول ابرة استلمهة من عندة .. وانتو اخذتوهة واني تعاركت وياه وهو طردني .. من بعدهة ما اخذت منة اي شي .. بقيت اخذ بهذني الحبوب وشايل هم اذا خلصن شسوي ..

تنهدت براحة .. باوعت للاشرطة وشلتهن وهو يباوعلي ..
رحت للحمام وشمرتهن بالبلوعة (تكرمون) مال الحمام ودست عالصرف ..

هو اجة يتخبل من شافني سويت هيج ..
گام وگف يباوع عليهن واني لازمة : راسسم شسووييت .. ليش هيج لك راسم ماعندي غيرهن والله ..

سحبتة وگعدتة عالكرسي حيل : جبررررااان اسمممعني ..
هو يباوعلي ويتنفس بسرعة : ليش ذبيتهن ..
لزمت وجهة : بعد ماكو مخدرات جبران تسمعني لو لا .. انت مو ضعيف لهالدرجة .. سيطر على نفسك ..

هز راسة بنفي : ماكدر راسم ماكدر .. اتخبل ..
رصيت على سنوني : جبرران تتحمل مو بس لنفسك .. لبسمة و لأبنك .. لا تخلي يطلع للدنيا وانت هذا وضعك .. كلنا راح نوگف وياك .. تتخطاها والله ..

بلع ريگة وسكت ثواني وبعدين هز راسة بأي ..
ابتسمت حبيتة براسة وگومتة وياي ..
اخذتة ورجعت يمهم ..

كلهم باوعو علينة ..
وجهت نضراتي على رياض : سيد رياض .. جبران راح يعوف المخدرات ويتعالج .. وراح يساعدك وينطيك المعلومات الي تحتاجهة عن امين ..

رياض هز راسة : استريح جبران .. خل نسولف ..
گعد جبران عالكرسي المقابيل رياض .. وبدة يسألة وهو يجاوبة على الي يعرفة .. حجالة كل الي حجاه الي ..

حارث حجة بفرحة : يعني جبران ما ماخذ حقن مو .. يگدر يتعالج ؟
جبران رفع اكتافة : مادري ؟

هادي صار وراه ولزمة من اكتافة ودنگ باسة براسة : لا تگدر .. غصباً عليك تتعالج .. اني وياك وفنك تفك حلگگ وتگول اريد من هذا السم بعد .. تنساه جبران تنساه .. سمعتني ..
هز راسة بهدوء ..

حارث التفت على رياض : سيد خابر على ذولة الحاطهم مراقبة .. شوفة بالله هذا الزفت ما اجة لهسة ..
رياض : لو جاي جا خابروني .. ولا تستعجل حارث .. ما نريد نخرب الشغل ..

تنهد بعصبية حارث ..
عمي ضافر حاجاني : راسم شوكت تاخذة للمستشفى .. علمود التحاليل والعلاج ..

راسم : العلاج يگدر ياخذة بالبيت اني انطي الة .. روحاتة للمستشفى قليلة تصير يعني بس علمود المهدئات ..

ورة نص ساعة طلع رياض من بعد ما وصاه حارث يمكن الف مرة اذا اتصلو بيك مباشرةً اتصل علية ..

رحت اني للبيت .. وصحت على مريم حجيتلهة الي صار حتى تگول لبسمة وتهيأهة للموضوع .. لان وجودهة مهم هسة يم جبران .. لازم ما ينترك وحدة ولا لحضة ..

بسمة //

استمع لكلام مريم واني بكامل صدمتي ..
دموعهة تنزل واني احس نفسي متجمدة ..

باوعتلي ولزمت ايدي : بسمة والله راسم ايگول كل تصرفاتة جانت مو بيدة .. المخدرات تأثر على اعصابة ..

گمت وگفت بسرعة فتحت المجر وطلعت عبايتي ..
دموعي گامت تنزل ..
لزمتني مريم من ايدي : وين رايحة بسمة ..

جريت ايدي منهة : رايحة لجبران .. ما اعوفة هالمرة حتى لو هو طلب هالشي ..
مريم : بس خاف يسويلج شي وانتي حامل بسمة .. خاف يأذيج ..

بسمة : ما يهم .. اني غبية وعفتة وحدة طول هالفترة .. لو جنت موجودة جان ممكن اكتشف هالشي لو الگى الحبوب لو المشروب واتصرف وامنع هالشي ..

وهسة من بعد ما عرفت السبب تردين اعوفة هم ..
اذا ما وگفت وياه هسة شوكت اوگف وياه بعد ..

مريم : ماشي بكيفج .. سوي الي يريحج .. بس انتضريني البس عباتي واروح وياج ..
هزيت راسي وهي طلعت ..

لبست عبايتي وطلعت من الغرفة ..
لاگاني راسم گاعد بالصالة .. 
من شافني لابسة عبايتي گام وگف : بسمة اخذي حذرج هالمرة اكثر ..

هزيت راسي : لا تخاف .. هالمرة عندي علم بالوضع ..
راسم : لا بسمة .. هالمرة الوضع اصعب .. قبل جان يتعاطى .. بس هسة راح يتعب بالزايد وخاصاً من يبدي جسمة يحتاج للحبوب .. راح يبدي يتهستر ويصيح وممكن كلشي يسوي .. وحتى ممكن يأذيج ..

افرك بيدية خايفة : زين شلون اگدر اسيطر علي .. يعني شلون اتصرف بهالحالة ..

راسم : هي صحياً لازم ياخذ ابر مهدأ حتى ينام .. بس علمياً والافضل تحاولين بأي طريقة تنسينة الحبوب .. يعني سولفي وياه وافتحي مواضيع وابدي اسألي وخلي يلتهي بالسوالف .. بالمختصر يعني اشغلي تفكيرة عن الحبوب ..

حاولي شگد ما تگدرين تذكيرنة بالشغلات الي يحبهة ..
ذكريات حلوة هو عاشهة ..
عيشي جو هاي الذكريات وسولفي عنهة ..
ترة انتي اكثر وحدة تگدر تساعدة بسمة .. الاعتماد عليج من بعد الله ..

هزيت راسي وفعلاً حسيت بالمسؤولية ..
لازم اوگف وياه واخلصة من الي هو بي ..
اصلاً لازم اطلع من دوامة الحزن هاي ..
مثل ما گال راسم لازم يتذكر الاشياء الحلوة ..

طلعنة امي ومريم ورحنة بأتجاه بيتنا ..
دخلنة للمطبخ ونسمع اصواتهم بالديوانية ..

ردنا ندخل للصالة بس وگفنة صوت خالتي نعمة وهي تبجي وتنحب .. : ربيي كلشي ولا ولدي .. ماريد شي من الدنيا والله .. حتى عاصم ماريدة ..

لا تعاقبني على افعالي بولدي .. ادري غلطت هواي .. والسويتة مو قليل .. بس سامحني ربي ..
عاقبني اني .. دخيلك ربي لا تطلع حوبة مريم بجبران .. لا تعاقب ابني على افعالي ..

التفتت لمريم شفت دموعهة تنزل وشفتهة ترجف ..
حجت بصوت يرجف : لا .. الجاي يصير بجبران مو حوبتي .. جبران ما اذاني بيوم .. ليش هو هيج يصير بي .. هو شعلي بأفعال امة ..

مسحت دموعهة ودارت وجهة وطلعت ..
دخلت اني للصالة وخالتي التفتت علية وگامت بسرعة : بسمة اجيتي .. فدوة لا تعوفينة وحدة .. جبران محتاجج هسة ..
هزيت راسي : اي خالة اني يمة .. ما اعوفة ..

صعدت فوگ لغرفتي ..
بس دخلت تنهدت واني اباوع لكل ركن بيهة ..
اشتاقيتلها حيل .. احسها مملكتي مو بس غرفتي ..
صدك الواحد ما يرتاح بس ابيتة لو مهما توفرلة ..

رغم مريم ما جانت مقصرة وياي بشي ودوم تجيبلي الي احتاجة حتى بدون ما اطلب ..
بس رغم هالشي هنا غير .. هذا المكان يخصني .. اندل كل مكان هنا .. كل غرض بهالغرفة يخصني ويخص جبران واندلة .. وكلشي اگدر اغير بيهة ..

ذبيت عبايتي .. الغرفة جانت منضفة ومرتبة ..
اكيد عمتي نضفتهة ..
رتبت ملابسي الي جبتهن من بيت راسم ..

طبعاً وضعي الصحي تحسن لان مريم حيل اهتمت بية ..
وقبل يومين رحنة اني وياهة للدكتورة لان اني صار الي شهرين .. وگالت وضعج احسن وتمام ..

خلصت تعزيل الملابس ..
انفتح الباب ودخل جبران ..
من شافني تفاجأ ووگعت مفاتيحة من ايدة ..

رحتلة بهدوء .. دنگت شلت المفاتيح مالتة ..
حطيتهن بصفة عالميز ..
رفعت راسي الة واباوع بوجهة .. شگد متغير يالله ..

واخيراً حجة : بسمة .. شعجب رجعتي ..
رفعت اكتفي : ليش .. ما تريدني ارجع ؟
فرك وجهة : لا مو هيج .. بس مو جنتي تخافين .. أئذيج ..

هزيت راسي : اي جنت اخاف لان وضعي مو زين .. وعلى گولة جيلان طفلج مركد تركد .. واني خفت تضربني من جديد ..
غمض عيونة وهو يتنهد : وهسة ؟

ابتسمت : هسة وضعي تمام .. الدكتورة گالت وضعج احسن .. واذا گدرت اتجاوز الشهر الثالث هيج معناها بعد ماكو خطر ..

باوعلي لحضات وعيونة تحجي انواع الندم ..
بذات اللحضة شمرت نفسي بحضنة وهو تمسك بية حيل وصوت انفاسة العالي وهو يشمني ..
دموعي نزلت واني متمسكة بي .. : اسف .. بسمة اذا تردين روحي .. اخاف عليج مني ..

تمسكت بي اكثر : لا ماروح .. ماعوفك بعد .. اني وابني محتاجيلك .. محتاجين جبران القديم .. الي حبيتة .. الي يخاف علية اكثر من كلشي .. وراح ارجعة لجبران حبيبي ..

رفع راسي وابتسم ويباوع بعيوني : ابقي يمي وخليني ارجع جبران القديم .. مليت من نفسي هسة ..
هزيت راسي بأي ..
دنگ باسني بگصتي ورجع اخذني بحضنة ..

مرن اسبوعين ..
مگدرو يلزمو لهذا الي اسمة امين لان بعد ما رجع للبيت مالتة .. شكلة عرف بيهم جاي يدورون علي ..

جبران تجي حالات يتخبل .. يضل يصيح ويكسر ويدور بالبيت مع ان يدري مموجودات الحبوب .. بس عقلة ما يرضى يستوعب ..

صرت امشي بنصائح وتوصيات راسم ..
ابدي اذكرة بذكريات حلوة عشناهة سوة ..
ومرات يفيد ومرات لا واضطر اتصل براسم يجي ينطي منوم ..

مرة اذكرة بيوم زواجنة وابدي اسألة وهو يجاوبني ويبدي ينسى الحبوب ..
يسولفلي شلون جان فرحان ولما رگصو جوبي هو والولد .. ومن حنو .. وكل هذا واني اسأل عن كلشي ..

ومرة اذكرة لما رحنة للمزرعة وطلعنة وحدنة نفتر ..
طلعتلة الصور الي اخذناهن سوة بوقتهة ..
صرنة نتذكرهن سوة وهو يضحك ..

هو ينام واني اگعد ابجي .. يصعب علية اشوفة بهالحالة .. ضعيف حيل .. حتى اكلة قليل ..

رياض //

جنت گاعد بالمركز .. مثل كل يوم مية الف شغلة عندي ..

دگ تليفوني رفعتة برقم اسامة الي كلفتة يراقب بيت امين : نعم ؟
اسامة : سيدي .. المطلوب قبل شوية اجة للبيت ..

گمت وگفت : متأكد ..
اسامة : اي سيدي .. بس ..
رياض : بس شنو احجي ..

اسامة : الشخص الي هذاك اليوم جان صاعد وياك .. اليوم موجود بسيارتة وواگف گدام هذا البيت .. ما ردت اتصرف قبل لا انطيك خبر سيدي ..

رصيت على سنوني : حاااارث ..
اسامة : سيدي تسمعني ؟ شلون تحب نتصرف ..
گمت بسرعة : ابقى بمكانك راقب البيت .. واذا شفتة طلع من بيتة قبل لا اوصل .. الحگة وابقى وراه وحددلي المكان ..

سديت التليفون منة واتصلت على حارث ..
رد علية : ها سيد ..
رياض : وييين انت متگلي ؟

حارث : من هاي طريقة كلامك معناها تعرف اني وين ..
حجيت بعصبية : حارث هسة ترجع .. هالشغلة صارت بيد القانون وانت ما تگدر تتدخل بيهة .. تنفرض عقوبة عليك ..

حارث : يعني هسة انت تخوف بية شني .. والله لو العقوبة سجن مؤبد .. هم الزمة الزمة .. اطلع السواه بأبن عمي من بين عيونة .. وهسة اعذرني رايح اشوفة شغلة ..

رياض : حااارث .. ابقى بمكانك انتضرني اني جاي ..
حارث : لا سيد .. اني مو صارلي اسبوعين انتضرة يجي ومراقب البيت حتى انت تگلي لا تتحرك ..

سد التليفون قبل لا احجي كلشي ..
طلعت اركض وصعدت سيارتي واسوق بكل سرعتي ..

اسوق وتليفوني يدگ ( ريمي ) ..
گطعت اتصالهة واتصلت على دكتور راسم ..
انطيتة خبر بألي راح يسوي حارث المسودن ..

وصلت للمكان والتجمع صاير بالباب مال البيت ..
الكم شرطي الي دازهم اني .. لازمين حارث يمنعونة عن امين ..
وبالمقابل امين وجهة مدمة ولازمينة ثنين من الشرطة ..

بعدني يم السيارة وصحت : حاارث ..
التفت علية حارث الي جان يصيح .. الشرطة كلهم التفتو علية ..

هالشي انطة فرصة لأمين يمد ايدة للشرطي ويسحب السلاح من ايدة ومباشرةً وجهة على حارث ..

بنفس اللحضة اطلق رصاصة استقرت بجسم حارث ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🕊

بصراحة بعد ما اكتب شي ولا ابرر .. لان كل ما اكتب شي اتگلولي تجذبين وتطلعين اعذار .. ومحد يتفهم ..

السكوت افضل 👍🏻