رواية بنات للزمن الفصل الثالث 3 - بقلم سارة الشمري

الكاتبة : سارة الشمري ✍🏻

اليذكروني عفتهم لجل شوكي وياك
واني اتذكّرك وانت الي ناسيني
بايعني برخص واني بغلاة أشريك
مو انت الگلت بالروح تشريني ؟
روح وداعت الله بس أگلّـك ها
الي رب كريم الصبر ينطيني

ريم //

مر تقريباً ٣ اسابيع على وفاة ضياء ..
البيت كئيب وكل واحد ملتهي بروحة ..

الجدة مثل العادة دائماً قوية وتتخطى المشكلة بأسرع وقت وتنشر قوتهة على الي حوالينهة وتجبرهن يحاولون يتناسون بكلامهة مثل : دموعجن ما تردة .. لا تندبن مو زين عالويلاد ..

بس جدو اكثر واحد تعب .. صحتة ابتدت تتراجع ..
هو مريض اصلاً لان عمرة جبير .. وادور موتت ضياء ذبلت عودة .. وهم تعامل راسم الة من اجة ..

هو مو شي جديد على راسم .. بكل مرة يجي يتحاشى يحجي وية جدو .. ودائما ما يطلع من المكان اذا دخل جدو .. يعني مو شي جديد لان من ابتديت اوعى عالعالم وهو تعامل راسم هيج بكل مرة يجي من السفر .. وكل ما نسأل السبب محد يعرف غير ان قبل صاير خلاف بينهم ..

والي لاحضتة ان جدو الي يحاول يتقرب منة ويفتح مواضيع وياه بس هو الي يترفض لقربة منة ..
واكثر من مرة جدو يدزلة فلوس للسعودية بيد رضوان او هادي من يرحولة مرات بس اسمعة يصيح من يدري بي مرجعهن وما قابل ياخذهن ..

قاطع تفكيري الباب الي انفتح ودخل جبران ابن عمي واخو مريم : ها ريمي وين صافنة ..
تنهدت : بحالة البيت .. وبصحة جدو .. خايفة علي لان هالمرة كلش تعب ..

كعد كدامي : هو هذا جدو بكل مرة هيج يصير بي من يسافر راسم .. وهالمرة اثرت بي وفاة ضياء وصار يخاف على راسم اكثر ..

طبگت حواجبي : وراسم شعلي بوفاة ضياء ..
جبران : جدي كام يخاف على راسم اكثر .. لا سامح الله يخاف يصير بي نفس الي صار بضياء .. وخاصاً وهوة بعيد عنة وبغير دولة .. سمعتة قبل جم يوم يكول لأبوج لازم اخلي يرجع ويصير كدام عيوني لان هوة ورضوان امانة ابني المرحوم حافظ ..

ريم : والله ما اتوقع يقتنع راسم ويرجع ..
جبران : الله كريم .. الا صدك اكلج .. سمعت مرت ابوج جاية للفاتحة .. سلمتي عليهة ..

تنهدت بملل : اي لا تذكرني .. اصلاً اضطريت اسلم لان طلعت للحوش وهي كدامي مادري بيهة .. وصاحتني عمة نعمة كالت سلمي على مرت ابوج .. سلمت ومشيت بسرعة ..

جبران : خو ما سمعتج حجاية ..
رفعت اكتافي : بصراحة لا .. وحتى سلامهة حلو وهلة حبيبتي شلونج وعظم الله اجرج .. وحضنتني هم .. بس مو ايكولون ياما تحت السواهي دواهي .. لو بيهة خير ما جان سحبت ابونا كل هالسنين وما نشوفة الا من الجمعة للجمعة وهم يجي ساعتين ويروح ..

جبران : يلة خليهة بعيدة عنج ومكفيتج شرهة وخيرهة .. همزين عازلة وبعيدة ..

غورگت عيوني : شلون جافيتني شرهة وهي ابسط شي ماخذة ابوي مني .. تدري انتضر الاسبوع من الجمعة للجمعة بس حتى اشوفة .. واصلاً مبين عليهة يعني اصغر من ابوي بهواي وهم حلوة تخبل .. ايكولون مرت الاب كل ما جانت زغيرة تصير شرسة اكثر ..

مسح دموعي وحضني : يلة عاد ريمي كلشي ولا دموعج .. لا تخليني اگابلج واگعد وابجي وياج هسة .. ترة الدمعة بطرف عيني ..

ابتسمت وسمعنة صوت عمي محمد يصيح على جبران وهوة راحلة ..

اني ريم دخلت بعمر ٢٢ سنة .. امي من جابتني توفت وعافتني اني واخوية الجبير حارث .. ربتني نعمة مرت عمي ورضعتني هي لان جانت ترضع جبران الي عمرة ٩ اشهر  ..
يعني جبران اخوي بالرضاعة .. بس احسة توأمي واكثر ..

ابوية قبل ٧ سنوات يلة وافق يتزوج ..
ومن يوم زواجة لهاليوم ما شفنة مرتة الا تقريباً ٤ مرات .. وهوة ما نشوفة الا من الجمعة للجمعة ..

اخوي حارث من توفت امي جان عمرة ١٤ سنة ويفتهم .. هوة تأثر اكثر مني .. وخاصاً بعد زواج ابوي هوة صارلي الاب .. يعاملني مثل بنتة لان فرق السن هواي بيناتنة ..

ابتسمت مشتاقتلة النسونجي .. اكيد هسة صاف وية وحدة ومالة خلگي ..
رفعت تليفوني ودكيت علي ..
ورة رنتين اجاني صوت بنية تتماوع : آآلــو ..

تأففت : افففف انطي التليفون لحارث مالي خلگج ..
اجاني صوتة وهوة يضحك : اعصابج شبيج منفوخة ..

رديت بأنزعاج : حارث جم مرة گتلك لا تخلي صاحباتك يردن علية .. والله انزعج ..
حارث : شسوي اريد اعصبج شوية ..
ريم : قابل اني حبيبتك لو خطيبتك حتى تنرفزني .. اكلك صدك انت وين بس لا تماديت بسوالفك وسويت شي بالبنية ..

بين الانزعاج بصوتة : شقصدج .. يعني انتي تدرين بية اوصل لهالمرحلة .. كل ما بالموضوع نگعد بمكان عام واعزمهة واسولف وياهة .. يعني اطلع من جو الشغل شوية مو اكثر ..

تنهدت ادري زعجتة بكلامي بس لازم يحس .. كافي بنات يومية مخابر وحدة لو طالع وية وحدة ويشوفة واحد من عمامي لو جدو ويرزلة .. والمصيبة ما يطلع الا بمكان عام واهلي يرحولة ..

ريم : ماشي بس ترة حطني بين عيونك مو تتجاوز .. خاف علية .. وبنات الناس مو لعبة ..
كملت جملتي باوعت للتليفون لكيتة سادة بوجهي .. اكيد عصب .. بس خلي احسن خل ايكول عندي خوات ..

سمعت صوت صياح جوة ..
نزلت لكيت رضا يبجي ويمة زينة اخت مريم الزغيرة وعمرهة ١٠ سنوات ..

عمة نعمة لازمة رضا من زندة وتصيح علي : اذا بعد لزمت شي من غراض بتي ايديك اكصصهن سمعت لو لا ..
رحت بسرعة وسحبتة منهة : عمة تصدكين تجذبين شجاج .. شنو اكصصهن هوة طفل شيفتهم ..

نعمة : لا يفتهم شمالة ما يفتهم .. ما تشوفينة حاط عينة على لعابة بتي ..
زينة بصياح : ماما والله اني انطيتهة الة .. هو معلي .. جنة نلعب سوة وانتي اجيتي تصيحين ..

عاطت بيهة امهة وخزرتهة : انتي انلصمي حيوانة ولاتتدخلين بسوالف الكبار ..
تخوصرت بوكاحة ومشت : والله الا اكول لبابا عليج ..

فتحت عيونهة وركضت وراهة تريد توگفهة .. بس هيهات تلزمهة .. زينة اذا رگضت حتى اسرع من بيب بيب ..
التفتت على رضا ونزلت لمستواه ..

يمسح بدموعة ويناشغ : حبيبي لا تزعل ترة هي مو قصدهة تزعلك بس خافت عليك لا تطيح ..
رفع ايدة لعيونة وزاد بالبجي : وديني لماما خاف هاي تكصص ايدية .. 
مسحت دموعة : لا حبيبي تتشاقة وياك .. قابل منو يخليهة تلزمك ..

اخذتة وصعدتة فوك لغرفة مريم وضياء ..
مريم بس شافتة طفرت واجت علي : يمة شبي رضا .. منو وياه .. شنو طاح .. تعور ..

هزيت راسي بلا وحجيتلهة السالفة ..
دفعتني وتريد تطلع بعصبية : هاي ما تمشي بالحجي شنو .. شلون تمد ايدهة على ابني .. وخري والله الا اعلمهة ..

جريتهة وفوتتهة : وييين يمعودة كولي يالله .. وبعدين زينة حتاخذلج حقج لا تخافين ..
تأففت بعصبية : زينة شنو لخاطر الله .. ما كفاهة السوتة بية .. ادور هسة راجعة على ابني ..

ريم : بس انتضري ثواني واسمعي الي راح يصير .. زينة راح توصلهة لابوج وعاد تعرفين زينة من تركض ..

كملت جملتي وسمعت صوت عمي يصيح : وللللج نععععمممة ...
ريم : شوووفي .. شگتلج اني .. الزمي رضا واني انزل اشوف شيصير ..

نزلت وعفت مريم بالغرفة لان بعدهة بالعدة وما تطلع من غرفتهة الا للضرورة حتى تتجنب اي لقاء وية الولد ..

نزلت الدرج واني اسمع صياح عمي عاصم عليهة ..
لا وادور مو بس هوة ..
عزا العزاج زينة موصلتهة للقيادة العليا ,,الجدة,,

ابو هادي : نعمممة وتاليهة وياج شلون .. شسوي بيج بعد .. لا حجي يمشي وياج ولا صياح يمشي وياج .. يعني عاجبتج المهاين التحصلينهة كدام ولدج يومية ..

نعمة : واني شمسوية .. لا تذب السالفة براسي .. هي بنتك نحس ومن تجي تجيب المشاكل وياهة .. فگر بت فگر مثل امهة ..

شهگت وحطيت ايدي على حلگي ..
كلنة نعرف ان عمي كلشي ولا نجيب طاري هذيج مرتة (ام مريم) لان يتخبل من طاريهة ..

اجة يريد يهجم عليهة بس حبوبتي وگفت كدامة ولزمتة : وللللج بت الـ..## صمي حلگج لا افرگة بالكاع .. والعباس اذا ما ضبيتي لسانج اني اضبة الج وما احسب لكبرتج ولا اگول ام ولدي ..

نعمة لطمت على خدهة : هااااي تاليهة تريد تضربني علمود زمن وبتهة .. هو شمحصلة منك غير الصياح والرزايل .. تهجم علية لأن گلت الصدك .. على ام الزلم الذبت بتهة منا وراحت تزوجت منا وولا باوعتلك بعد .. هي هاي المحروگ گلبك عليهة ..

ضربت على خدي عزا العزاني هاي بعد شيسگتها ..
كمت اسحب بيهة من ايدهة بس هي ضخمة وتدفع بية وتصيح ..

اباوع لعمي وجهة صار احمر وعگدة حواجبة انطبگت من العصبية : يمممممة لخاااطر محمد وخرري من گدامي خل اسحلهة واحرگ اهلهة .. ولج اني تحجين وياي هيج يا نعمة ..

الجدة عاطت بعلو صوتهة : من احترگو اهيلتج اي والله .. موش نعمة لا والله انتي نقمة واجت فوگ راسي .. امشي منا ولي لبيتج لا تخليني اچيب عشيرتج واكومهة هنا ..

جبران يسحب بأمة وهادي لازم ابوه ويحاول يهدي : يممممة لخاطر محمد اسكتي بس خل يهدئ .. لا يصير بي شي من وراج ..

هادي : يابة اروحلك فدوة بس صلي على محمد .. تدري بيهة ما تلزم لسانهة .. لا تاخذ بحجيهة وصلي عالنبي لا يصير بيك شي ..

جبران اخذ امة وطلعهة اكيد اخذهة لبيتهم الي لزك ابيت جدو ..
الجدة تصيح : امشيي لا بارك الله بيج ولا باليوم الجبتج بي جنة لبيتي ومرة لأبني .. دولبتنة من دولبجن الحمزة ..

هادي اخذ عمي ودخلة للديوانية ..
التفتت على حبوبتي الي كامت تراجف بديهة وتصيح : موش مرة هيج تتراعش من الصلافة والوكاحة .. ما الله ياخذهة ويفگني .. اكلت عمر الزلمة وهوة توة عمرة ٤٥ .. صار شايب من وراهة يومية ضغطة صاعد ..

لزمت حبوبتي وگعدتهة عالقنفة : جدة كولي يالله .. الله يهديهة ..
ردت بعصبية : كولي الله ياخذهة مو يهديهة .. هاي ما تنهدي لو يجي مدري ياهو ..

دخلت زينة تمشي ولا عبالك صاير شي ..
حصرتني الضحكة من كالت : حتى بعد لا تصيح على ابن اختي .. جا غير اني خالتة ..

حبوبتي شالت عوجيتهة : امشي منا بريجة ام العلوم .. جا ما اجيتي وگتيلي انة .. لو الا تهيضين ابوج وتدرين بي ما يرضى على اخيتج واذا درى يگلب البيت .. بس ما ينعتب عليج مهورشة مثل امج ..

زينة : اهوووو لا تگليلي مثل امج ..

قاطعنة دخول ابوي وعمي محمد ..
ابتسمت لا اراديا من شفتة ..
عمي محمد : خير يمة شبيج .. عليمن معصبة ..

الجدة : من ورة محروگة اللشة مرت اخوك .. انة شمسوية بحياتي والله يبليني بهيج جنة ..

رحت لبابا وحضنتة وهو اخذني لصدرة وباسني براسي ..
حجة وهوة بعدة حاضني : شلون صرتي اليوم ..

عرفت يقصد عالصخونة لان قبل يومين صخنت : الحمدالله احسن ..
باوع على حبوبتي ورجع حجة بصوت خفيف : خو ما الج ايد بالعركة ..

رفعتلة راسي وابتسمت : لا اصلا اجيت لگيتهة جاهزة العرگة ..
هز راسة : خوش .. خابرتي اخوج .. وينة ليش ماكو اليوم وما مر علية للمكتب ..

ارتبكت يعني شأكلة .. اذا عرف اكيد يتعارك وياه واكيد حارث راح يعرف اني الگتلة  .. : اي خابرتة كال عندة شغل وية واحد من جماعتة ومن يخلص يجي ..

هز راسة وهوة ما عاجبة الحجي : اممم اي يصير خير .. خل يجي ونشوف ..
رجع باوعلي وحجة بتفحص : وانتي خو ما تحتاجين دكتور .. علاج الربو ملتزمة بي ؟؟

ابتسمتلة : اي والله ملتزمة اصلاً خف عندي ما يجي الا من التراب او الدخان .. يعني حتى من اركض ميأثر ..
تنهد وهز راسة : خوش .. الحمدالله ..

حبوبتي حجت : شتبسبسون انتة وبتك صارلكم ساعة .. مو اليكول انة كاعدة ..
ابتسم ابوي : السموحة يمة بس مشتاك لبتي شسوي ..

حجيت بگلبي .. اذا مشتاگ لبتك ليش تبعدهة عنك .. ليش تخليهة تتدولب وراك ..
كمل كلامة : وهسة طالعين انة ومحمد رايحين لابوي عدنة شغل وياه ..

حبوبتي : مودعين بالله .. اخذوا عاصم وياكم لا يضل هنا ويطك من ورة مدهورتة .. مو مرة فلك الله وكيلكم ..
وين الكاج بعد يا رجاء .. ريت كل الجناين مثلج .. بس الله اخذ الزينة وعافلي المدهربة ..

ضغطت على ايدي من جابت طاري امي ..
ابوي دار وجهة للجهة الثانية وهوة رافع حاجب ومنزل الثاني دليل على انزعاجة بهالحرگة الي ورثهة عنة حارث بنفس الحركات والشكل ..

بدون ما يحجي شي دار وجهة وطلع ..
تنهدت وطلعت ورحت لغرفة مريم ..

تلگتني بلهفة خوف : شصار شنو هالصياح ..
سمعت ابوي يصيح .. خو ما ضغطة صعد .. اكيد نعمة عصبتة ..

كعدت عالقنفة الزغيرة : اكيد يعني منو غيرهة يخلي يعصب لهالدرجة .. وتعرفين بي شلون يصير من تجيب طاري امج .. يتخبل ويريد يهد عليهة .. همزين حبوبتي وگفت كدامة ..

مريم : هاي شبيهة .. شنو من مرة .. مو تدري بي ما يقبل ينجاب طاريهة .. اي شكو تفك حلگهة بعد ..

ريم : اندري .. بعد نعمة وانتي تعرفينهة ..
دنگت راسهة وصارت تفرگ بي : يربي شلون وياي .. اضل هيج طول عمري .. اضل دوم جوة حجي نعمة .. ابتليت على عمري من عافتني التتسمى امي وصارت مثل الوصمة بحياتي ..

كعدت بصفهة وحطيت ايدي على جتفهة : كولي الحمدالله على كل حال .. وبعدين شنسوي .. مجبورين وقسمتنة هاي .. مكتوبلنة ما تكون النة ام وما نكول هالكلمة ..

رفعت راسهة الي : لا ريم .. لا تقارنين امج بأمي .. عالاقل انتي تدرين بأمج ما عافتج بأرادتهة .. تدرين بيهة عافتج بأمر رب العالمين ومالج اعتراض علي .. بس اني شأكول .. شأحطلهة اعذار .. اكول عافتني علمود واحد تريد تتزوجة وبعد ما رجعت ولا سألت علية .. هاي مو ام هاي .. هاي ماعدهة گلب ولا عدهة امومة .. احمد الله ان حرمني من هيج وحدة ..

حتلو عافلي نعمة والي شفتة منهة مو قليل .. بس عالاقل اذا سوت شي ادري بيهة مو امي وادري ما تحبني وما الومهة بصفتهة مرت ابو ..

خليتهة كملت كلامهة وكوة تمالكت روحي وطلعت من الغرفة ورحت لغرفتي ..
طبگت الباب وانفجرت دموعي على خدي ..

شأكول يا مريم .. اذا انتي انحرمتي من امج ..
اني انحرمت من امي وابوي ..
ما تردين تقارنين امج بأمي .. واني ماريد اقارن ابوج بأبوي ..

صح ابوي هو الجبير بس شكد تمنيت ياخذ ابوج كقدوة الة .. ردتة يتعلم منة ولو شوية من محبتة لولدة ولبناتة ..
انحرمت من امي .. ولازم اكون محتاجة لأب بس هوة حرمنة منة حتى وهوة عايش ..

من الاسبوع للأسبوع يلة اشوفة ولمدة ساعة او ساعتين مو اكثر .. وبرغم هالشي ولا مرة اعترضت .. او گلت ليش او ناقشتة بهالشي ..
اكول تكفيني شوفتة بهالساعتين ..
او ممكن الي مسكتني هو تعامل نعمة وية مريم ..
اخاف اني هم تعاملني مرت ابوي بهالطريقة ..

مريم قوية وتعودت على هالشي من طفولتهة ..
وهي بطبعهة تتحمل .. كلشي تتعرضلة تبلعة وتسكت ..
بس اني ما اتحمل .. ما متعودة عالقسوة ..
حتى نعمة ما تعاملني بقسوة ..

اصلا بالعكس تعاملني طبيعي ومرات حتى تخاف علية .. يمكن لان اني مو بت رجلهة ..
ما تعودت عالمعاملة القاسية والصياح والضرب ..
حتى دلال اخوي حارث الي زاد من ضعف شخصيتي ..
صرت ابجي بسرعة ودائما يسموني (ام دميعة) ..

قاطع تفكيري دك الباب ..
مسحت دموعي وكمت فتحتة ..
شفت حارث ولازم بيدة علاگة ..

طبگ حواجبة وحط ايدة جوة حنجي : شبيهن عيونج حمر .. منو وياج ..
هزيت راسي : ما بية شي .. هيج يعني ما تدري بأختك على اقل شي وتبجي .. شفت مريم تبجي وبجيت وياهة ..

رفع حاجبة : اهاا ..
ابتسمت واني احاول اغير السالفة : اي شجايب وياك .. جبتلي نستلة نمبر وان ..
ابتسم ورفع العلاگة : جبتلج نمبر وان وجبتلج جبس بوشار مثل ما طلبتي ..

اخذتهن من ايدة واني افتح العلاگة : اشكرك تعبناك ..
حجيت واني هستوني اتذكر : ايي صدك نسيت .. ترة بابا جان هنا وسأل عليك .. كتلة عندة شغل وية واحد من جماعتة ومن يخلص يمر عليك ..

حارث : زين سويتي ..
دك تليفونة ورفعة : ها حبيبتي ....
.... هستوني عفتج شوكت لحگتي تشتاقيلي
.... تردين الصدك انة اشتاقيتلج اكثر يروحي ..

هزيت ايدي وتأففت بعصبية واني اشوفة يجذب على بنات العالم ..

حارث : كووولي والله موديتلي صورتج ....
.... جا اوگفيلي خل افتح انترنت حتى اشوفهة ...
.... صدك جذب حبيبتي اكيد امسحهة ...
.... شنو ما عندج ثقة بية لا تخليني ازعل عليج ..

كرصتة من ايدة حيل وهوة طفر : ااااااخ نعلا على بليسج .. وج شجاج تسودنتي .. بوية اللحم انشلع ...
صحت بي بعصبية : تستاهل حتى لا تضحك على بنات العالم وتخليهة تحبك وتاليهة تعوفهة .. ما تستحي ..

عفتة ومشيت وهوة يصيح ..
التفتتلة : وصدك خاف تريد تشوف ابوي ترة راح للمعمل لان عندة شغل وية جدو .. وانتة هم مر عالمعمل شوية وگابل الشغل احسن ما مگابل البنات .. ترة جدو تعبان ..

ديلارا // ...

اتمشى بالحديقة وبيدي الصوندة وارش عالزرع ..
الجو بداية صيف وحلو .. شمس عالية بس الهوى شوية بي برودة .. بعدة الصيف عالابواب ..

تنهدت بملل .. ماعندي شي اسويه .. جيلان بالكلية واني من العام تخرجت لان اني تسجلت قبلهة اصلاً ..

دخلت جيلان وطبگت الباب الحديد الخارجي : مساء الفل ..
ابتسمتلهة : مساء النور .. اليوم راجعة من وقت .. شكو ؟.

شمرت جنطتهة عالطاولة : والله ماكو شي .. ما عندي محاضرات .. وامتحاناتنة قربت .. كلت ارجع احسن من السفافة بالكلية واگابل دلاور المايع ..

شمرت الصوندة وگعدت كدامهة : جوجو مشتاقة لجدو .. صارلنة اسبوع ممخابرينة ..
رفعت تليفونهة : افا عليج .. هسة اخابرة لان اني هم مشتاقتلة ..

دگت علي مرتين وما يرد ..
جيلان : يمكن ما يسمعة .. راح ادك عالرقم مال المعمل .. اكيد هوة هيج وگت هناك ..
ايدتهة وهي دكت على رقم المعمل ..

حطتة جيلان عالطاولة وشغلت مگبر الصوت ...

ورة رنتين اجانة صوت غريب ومو صوت جدو ..
بس مبين صوت شاب يحجي بخشونة ..: معمل الحاج خضر سليمان للنسيج .. تفضل خوية ..

حطيتة كتم وباوعتلهة : هذا اكيد واحد من اليشتغلون بالمعمل .. سوي روحج زبونة وكليلة نريد نحجي وية صاحب المعمل الحجي خضر ..

فتحت الكتم وحجت جيلان : العفو اخوية بلا زحمة ممكن نحجي وية صاحب المعمل وتحديداً الحاج الخضر مثل ما انت تفضلت ..

سمعنة صوتة تغير جذرياً وتحول لبحة هادئة وتجذب من سمع صوت جيلان : امريني .. اني الحاج خضر بشحمة ولحمة .. امر خدمة اغاتي ..

فتحت عيوني شهالوقاحة ..
جيلان : ترة نعرف الحاج ومحاجينة قبل علمود طلبية .. نريد نحجي وياه هوة .. ممكن تنطي التليفون .. بس اول شي منو وياي ..

حجة بصوت وقح : ماكو فرق .. ووياج الحارث حفيد الحاج ..
فتحت عيوني وباوعت لجيلان ..
جيلان ما اهتمت : اها حفيدة گتلي .. زين يلة يشاطر روح انطي التليفون لجدك ..

حارث : عليمن مستعجلة .. ما بيهة مجال نسولف شوية .. ترة ما اگلج والله .. بس احب اتعرف ..
جيلان رصت على سنونهة وحجت : شتسولف ابن الأوادم .. روح انطي التليفون لا اسدة بوجهك .. والله الا اكول للحجي يطردك من الشغل .. ما تستحي ابو النسوان ..

تحولت نبرة صوتة ورجعت خشنة : وعلى گيفج هسة اني شگتلج وگبيتي .. طالب منج قرض لو بايگ رصيدج .. هنة سوالف .. وهم بطلت ماريد احاجيج .. عفية لسان ..

جيلان بعصبية : ولللي ولك .. انتة منو حاطك عالتليفون مال المعمل .. كل التدك تتغزل بيهة .. ما تستحي على وجهك تخرب سمعة الحجي ..

رد عليهة ومبين عصب : والله ما جنة ندري بالنسوان هم عدهن شغل بمعامل النسيج .. ترة حاطين التليفون هذا علمود العمال يخابرون والزبائن اهل الشركات التبيع والتغلف .. انتي شني داگة بلة تلقين التحية لو عندج رصيد وحايرة وين تولين بي ...

جيلان وجهة گلب طماطة من العصبية : ادور يذب الصوج بية .. اذا حاطين التليفون للشغل شكو تتغزل وتسمع حجي ..

عاط بيهة بصوت عالي : خايبة وزقبوووت .. هو اني يمتة تغزلت بيج .. عليمن شايفة روحج انتي .. كتلج خل نسولف وهايهية .. بعد سويتيني تغزلت بيج .. شلج بهالجذب .. شفتيني غنيتلج ام ثوب احمر نص ردان .. شو ولي ..

سد التليفون بوجهة .. جيلان تخبلت لان سدة بوجهة وما گدرت ترد على اخر كلامة : ااانيي يگلي وزقنبوت .. اني يگلي ولي .. اني يگلي شايفة روحج ...

كعدتهة عالكرسي بالكوة : يمعودة كولي يالله .. ترة جدو دوم يكول على هذا حارث ابو البنات .. معليج بي .. ترة هوة قليل ادب ..
طلعت امي على صوت جيلان : شكو شعدجن تصيحن ..

گرصت جيلان حتى تهدئ لان امي اذا درت بينة محاجين احد من اهلنة تگلب الدنيا علينة ..
جيلان ساكتة بالكوة وتهفي على روحهة بالملزمة ووجهة احمر ..

رديت بضحكة : هيج ماما ماكو شي .. بس جيلان حرانة وتدرين بيهة من تجيهة الحالة تعصب على اقل شي .. مو صح جيلان ؟؟

هزت راسهة بدون ما تحجي بس تنافخ ..
باوعتلنة بشك : ايييه .. عوفن الحر هسة .. كومن ادخلن جوة شوية ويجي المغرب ومو زينة الگعدة برة .. ادري بيجن من تگعدن برة تنسن روحجن وعادي عدجن تضلن لليل ..

دخلت امي واني التفتت على جيلان : عزا العزاج لو فاضحتنة ..
ضربت الملزمة عالطاولة حيل واشرت بأصبعهة على روحهة : اني هيج يرزلني ؟؟؟

ديلارا : اوووهوووو ..
جيلان : بس والله الا اكول لجدو علي .. اذا ما خليتة يرزلة ما اطلع جيلان ..

كومتهة ودخلنة للبيت ..
امي واگفة تسوي بالعشا ..
وجيلان تگصص بالخيار وتهز برجلهة بعصبية ..

شنو من بنية .. مرت نص ساعة وهي لهسة معصبة ومنفوخة ..
دك تليفونهة .. طفرت من شافتة رقم جدو ..
اخذتة وطلعت للحديقة واني وراهة ..

حارث //

كاعد بالمصنع لان ابوي رزلني .. وجدي كال اكعد بمكاني بين ما افتر عالعمال وارجع ..

اعصابي مفولة .. رزالة ابوي كدام عمي محمد وجدي .. ادور كملتهة علية هاي ام السان مدري منين طلعتلي .. شلون لزگة الا تحجي وية الحجي خضر ..

دك تليفوني رفعتة وشفت رقم وحدة من البنات الي اخابرهن ..
رفضتة وشمرت التليفون : هي عايزتج انتي بعد ..

دخل جبران وطبگ الباب : السلام عليكم ..
رديت علي من ورة خشمي لان مالي خلگ ..
جبران : مادام الحاجب مرفوع معناتهة اكو شي .. شبيك مطنگر ..

حارث : سوالف ماصخة .. ترزلت من ابوي .. وادور حاجتني بنية مدري منين طلعتلي صفح .. مو لسان عليهة .. ليكول مركبة بيكيسي بلسانهة ..

طلعت جگارة وهو ضحك : لا لا مادام تدخن معناتهة صدك معصب .. دگوم خل نطلع .. نفرفر بالسواگة والمولات .. هم نغير جوك وهم نرقم اجم وحدة ..

سحبت نفس من الجگارة وگمت .. اخذت سويجي وموبايلي : والله مااگول لا .. من زمان ما گارط حامض حلو (مرقم بنات)..
رفعلي تك حاجب : ولك وين من زمان .. جا و الگرطتهن البارحة وين راحن .. بالجيب ؟؟

نفخت الدخان من حلگي : اهووو هسة تطلع لو شلون .. بس اكلگ صدك واذا اجة جدي وما لگلني شلون ؟؟
جبران : والله عاد هاي مشكلتك .. مادام تگول مترزل معناتهة اني ماأكدر احلهة ..

ردت احجي بس انفتح الباب ودخل علينة جدي ووجهة احمر ..

الكاتبة : سارة الشمري 🖤

هلو شلونكم 😘 اعذروني ما نزلتلكم شي بس والله جانت عدنة ضروف عائلية 👍🏻 وهم مريضة والنبي وصارلي يومين مخلصتهة نوم من العلاجات 🖤 ادعولي ..
ردت انزللكم اعتذار بس گلت خل انزللكم بارت وياه ..

احبكم .. ولا تنسون مثل كل مرة .. صوتو وعلقو وكلشي ينداس دوسو