رواية بنات للزمن الفصل الثالث عشر 13 - بقلم سارة الشمري

الكاتبة : سارة الشمري🖤

زعـلان عـنـك بـس احـبـك حـيـــــــــــــــل
لان تـجـري بـغـيـابـك دمـعـه مـفـضـوحـه
جـرحـت كـلـبـي بـكـلامـك بـس بـقـيـت اهـواك
رغـم كـلـبـي بـكـلامـك هـاجـن جـروحـه
مـا اتـخـلـه عـنـك انـت روحـي تـصـيـر
هـم شـايـف بـشـر يـتـخـلـه عـن روحه .؟
...

دخلت للغرفة لان توقعت يكون راسم نزل وراح لامة ..

فتحت الباب ودخلت لگيت راسم مشغل المكيف ونايم على وجهة عالقنفة ..
استغربت : مو گال راح اروح لامي ..

مشيت على كيف واخذت ملابسة الي ذبهن هسة حتى اغسلهن ..

حطيتهن بالحمام ونزلت ..
شفت جبران هستوة دخل ..

گعد بالصالة يم البنات يسولف وياهن والتلفزيون مشتغل على قناة كربلاء ..

جيلان تنهدت وهي تباوع عالامامين : اوووف والله متمنية اروح ازور .. من جنت زغيرج واتمنى هالشي ..

جبران طبگ حواجبة : ليش انتن ابد ما زايرات كربلاء .. يعني الناس تجي حتى تزور وترجع بنفس اليوم .. انتو ما جايين ولا مرة ..

هزت راسهة : لا .. ماما مجانت تقبل .. ابد مجايين هنا وما طالعين اربيل الا للحاجة .. مثلاً بالسفرات مال المدرسة او طلعات ونسة للسليمانية .. ومرة بالكلية صارت سفرة لمتاحف بغداد وماما ما قبلت اروح ..

جبران بتركيز : وليش ما تريدكم تجون .. يعني ادري قصدها خاف ابوي ياخذجن .. بس هو ما جان يعرفجن بذاك الوكت .. معناها حتلو ما شافجن ما راح يعرفجن ..

ديلارا : مو ماما متگدر تدزنة وحدنة لان تخاف علينة .. واكيد لازم تجي ويانة .. واذا اجت تخاف يشوفهة احد يعرفهة من جانت هنا ..

جيلان حكت راسهة بتفكير : جبران اريد اسألك سؤال ..
جبران : اسألي ؟

جيلان : انتو مو ما عدكم اي شغل بأربيل ..
هز راسة : اي ما عدنة ..

جيلان : لعد حارث شيسوي ذيج المرة بأربيل .. يعني تقريباً ورة وفاة ضياء بفترة ..
طبگ حواجبة مستغرب : وانتي وين شفتي حارث ..

جيلان : بالكلية .. اني جنت اداوم .. وشفتة .. حتى يعرف دلاور زميلي بالكلية ..
جبران باوعلهة مصدوم : دلاور ؟؟ جان وياج بنفس الكلية ؟؟

هزت راسهة : ايي وكل يوم اشوفة .. يعني مثل ما گتلك زميلي ..

ضحك جبران : اول شي دلاور صديقي اني مو صديق حارث .. وحارث يتخبل منة ايگول جنة بنية ..
جيلان : شلون واني شفتهم سلموا على بعض بالكلية ..

جبران : يعني اكيد ما راح يگلة بوجهة اني اكرهك ..
بذيج المرة حتى اني جنت رايح لاربيل وية حارث .. رايحين بشغل مودينة بي جدي للحجي ابو جليل صاحبة .. واني من قبلهة جنت اعرف دلاور عالانترنت بس ومن جنت اجي لاربيل هوة يستضيفني واكثر من مرة اروحلة وياخذني وياه للكلية

وبوقتهة من رحنة اني وحارث .. وگتلة راح اجي لاربيل بس گتلة هالمرة بشغل يم الحجي .. وهو راد يشوفني وطلب اجي للكلية حتى اخذة يم الحجي واشوفة الاغراض الي موصيني بيهن .. بس صادف بيومهة جان عندي شغل وما گدرت اعوف الحجي ...

وحارث من گتلة يروح بمكاني ويجيب دلاور ويجي لان ما يندل معمل الحجي .. حارث ما رفض ابد وكيف اصلاً لان يروحلة للكلية وعلى گولتة بنات اربيل غير عن بنات كربلا ..

اسمع كلامهم ومبتسمة .. الصدفة كلشي تسوي ..
جيلان : يعني انت جنت دائما تجي للكلية مالتنة وممكن اكون شايفتك اكثر من مرة بس ممركزة بيك ..

جبران ابتسم : اي ممكن حتى اني اكون شايفج بس ما حطيت ابالي ..
ديلارا : سبحان الله .. باع الصدفة .. دلاور جان خط وصل بينكم قبل جم سنة وانتو هسة يلة تعرفتو ..

جيلان : جبران عليك الله خل اطلب منك طلب ..
جبران : وليش تحلفيني يا بوية .. گولي ..
جيلان : فدوة اخذنة نزور الحرمين ..

اشر على خشمة : على هالخشم .. مو تتدللن .. بس مو هسة .. خل يخلص اربعين جدي يلة .. هو هم ما بقالة شي ..

التفتلي جبران وحجة : مريومة ليش ساكتة ..
رفعت اكتافي : شأحجي ..
جيلان حضنت ايدي وحجت بنبرة ترجي : مريومة حبابة روحي ويانة من نروح نزور ..

ابتسمت : الله كريم .. ليش لا ..
جيلان لزمت ايدي وحجت : مريم تدرين شكد جنت متمنية اشوفج واتعرف عليج .. شكد جان جدو يحجي عنج ..

ديلارا كملت : ايي .. حتى صرت اتخيل شكلج بمخيلتي لان جدو ما جابلنة غير صورج وانتي زغيرة يعني بالابتدائية .. رسمتلج صورة ابالي .. بس من شفتج طلعتي احلا ..

ابتسمتلهن وحجيت بهدوء : انتو احلا .. ما راح اجذب بشي بس بصراحة وجودجن غير هواي علية .. يعني مثلاً جيلان من اگعد وياهة انسى كلشي واندمج بضحكتها وسوالفهة .. وديلارا تخلي الواحد يبتسم لا ارادياً على خجلهة وفطارتهة وعفويتهة .. ببساطة محبوبات ..

تقربن مني وكل وحدة حضنتني من جهة ..
جيلان : محبوبات لان اخواتج ..
ديلارا : وهم حلوات لان اخواتج ..

جبران يباوعلنة وشكلة متأثر : كافي گلبتنهة مسلسل .. شو وخرن خل اصير بالنص ..
اجة گعد بالنص بيني وبين ديلارا ..

رفع ايدي وحطهن على اكتافنة ..
جيلان تباوعلة برفعة حاجب وحضنتة بضحكة : مو بيدك حشري مثل امك ..
ضربهة بخفة على راسهة : لا تشور بيج ..

جيلان : يااا هذا حضي .. منين يجيهة البخت .. من اعمالهة الزينة ..
جبران ضحك : شمدريج ايجوز يطلع عدها بختات متطايرات منا منا ..

قاطعنة رضا الي گام هو وزينة : خالة جلاتين ..
جيلان : ها حبيبي ..
شال سيارتة يريد يطلع : خلصنة لعب .. گومي اكنسي ..

جيلان فتحت عيونهة : كششش .. ولا ينسى ..

ريم //

مر اسبوعين تقريباً من اجيب لبيت ابوي ..
علاقتي صارت اقوى بهويدة ..
شوية حاجز الخوف انشال من اشوفهة تحاول تتقرب مني بكل الطرق وكلامهة ماكو احلا منة ..
وتهتم بية ودائماً اتگلي انزلي خل نسولف لان اضوج وحدي ..

گاعدين بالصالة ..
واني احاجي بجيلان بالتليفون .. وهي ماشالله عليهة ما تخلي شي ما تسأل علي .. خطية تحب تستفسر بت عمي ..

دگ تليفون هويدة وهي رفعتة : مية هلا ب ابو فضل ..
.. صدك والله .. شوكت اجيت ..
.. وليش ما گتلي ؟؟
.. يلة يلة راح افتحلك الباب ..

سدت التليفون منة والتفتتلي وهي توگف : هذا اخوي رياض .. واگف بالباب .. راح اروح ادخلة للديوانية ..

راحت هي دخلتة للديوانية .. واجت تريد تروح للمطبخ : ها خالة ..اشو رجعتي ..
هويدة : اي غير اسويلة ضيافة ..

گمت اني وذبيت التليفون وابتسمتلهة : انتي روحي يم اخوج .. واني اسوي الضيافة ..
هويدة : لا حبيبتي ماريد اتعبج ..
باوعتلهة بأصرار : ماكو تعب .. انتي روحي وشوية وتعاي اخذيها ..

راحت هي من بعد ما تشكرتني ..
اني طلعت كيك من الي مسويتة هويدة الي ما يخلى البيت من الحلا الي تسوي هويدة بيدهة ..

طلعت الجدرية مال الگهوة ..
طلعت گهوة وذوبتهة على نار هادئة وحطيت وياهة حليب جاف وجكليت بطعم الكراميل وشكر .. خليتهة لخد ما فارت شوية ..

اتذكر من جنت اسويهة ببيت جدو الولد يتسابقون عليهة وخاصاً جبران حيل يحب الكهوة الي اسويهة .. لا كلش طيبة .. وكلشي ميبقة منهة ..

اجت هويدة واني ضيفت الگهوة وحطيت الباقي بقوري كزاز زغير وحطيتة وية الفناجين بالصينية وانطيتة الهة وية الضيافة ..

استغربت هويدة : اول مرة راح اضيف گهوة ..
ابتسمت : جربيهة وانطيني رأيج ..
هويدة : متأكدة طيبة لان بس ريحتهة تخبل ..

اخذت الصينية واني رجعت گعدت واشرب من كوب الگهوة الي گدامي ..
جيلان تراسل بية وشلون حبوبتي دازة عالخياطة تفصللهن عبي وهي مكيفة حتى تروح بيهة للزيارة ..

بنات عمو عاصم صح ما صار هواي من تعرفت عليهن بس تعودت عليهن وحبيتهن .. خاصاً جيلان .. تخلي الشخص يحبهة غصباً عنة ..

شوية واجت خالتي هويدة من مشة اخوهة ..
اتگلي الگهوة كلش طيبة واخوهة يگللهة اول مرة اشرب هيج گهوة حلوة لان مثل ما اسمع من الولد ان گهوة الرياجيل تكون مرة وبدون حلا ما تنجرع ..

ورة ٣ اسابيع ..

جيلان //

ببيت جدو .. لابسين عباياتنا اني وديلارا ومريم وريم لان نريد نروح للزيارة .. شگد جنت منتضرتهة ..

اربعين جدو خلص .. احسهن دهر مو ٤٠ يوم ..
مشتاقة لصوتة ولشوفتة ..
من رحنة للنجف كلنة گمنة نبجي جبير وزغير وخاصاً مريم الطريق كلة روحة ورجعة وهي خاطة راسهة عالكرسي وتبجي ..

وريم وديلارا نفس الشي ...
اني من وصلت دخلت خط وياهن وگمت ابجي وخاصاً من شفتهم حاطين صورتة ..

اتذكر بوقتهة من رحنة .. راسم اخذ رضا وگعدو يم قبر ضياء .. ودنگ يبوس بالقبر ورضا بكل براءة يسأل ليش حاطين صورة بابا هنا وماما اتگول هو راح بعيد ..

سمعنة صوت هورن برة ..
ريم : اجة حارث .. يلة ..
طبگت حواجبي : ليش حارث هم يروح ؟؟

ريم : اي لعد منو الياخذنة ؟؟ غير حارث وجبران ..
تأففت : وليش مو جبران وبس ..
مريم وهي تسد السترة السبورت مال رضا : لان جبران سيارتة بالغسيل .. وحارث ميخلي احد يسوق سيارتة ..

عوجت حلگي : ليش يعني ؟ سيارة الوزير ..
مريم سحبتني من ايدي : امشي لا تطولينهة .. بس لو افتهم ليش هالكد تضوجين منة ..

طلعنة لگينة جبران واگف يم السيارة بالحوش ..
قبل لا نطلع طلع راسم من الديوانية ..

صاح رضا ورضا راحلة ركض ..
دنگ لمستواه وحجة وياه ومدري شحط بيدة ودخل للديوانية ..

اجانة رضا وطلع فلوس بيدة وانطة لمريم : ماما هذا عمو راسم دزهن بس گال گول من يمك لان انت الرجال وتنطيهم المصرف ..

ضحكت على براءتة : شگد فطير انتة ..
اجة احنة هم انطانة بدون ميوزع گال : لكل وحدة خمسين واني الي ٢٥ ..

ديلارا : فلسناه للرجال .. شگد عيب .. خل يرجعهن ..
مريم : انصحج مترجعيهن لان ميقبلون .. يعصبون من هالسالفة ..

ريم : بالضبط .. من ينطون يعتبرون نفسهم مسؤولين عنج وواجبهم هذا .. وانتي من تحاولين ترجعينهة تحسسينهم مو گد المسؤولية ..

جيلان : يووو .. شگد حساسين انتو ..
جبران : بعد خو ما تردن اجيبلجن جاي .. فضنهة اصعدن ..

ريم : غير يجي حارث .. وين راح ..
جبران : يم ابوج گاعدين بالديوانية هسة يجي ..
صعدنة السيارة ..

ريحة السيارة عطر رجالي ممزوجة بريحة الجگاير ..
منطيتهة عطر طيب .. مع ان اني اكره ريحة الجگاير .. بس حسب ما سمعت ان حارث يدخن .. ولا مرة شفتة يدخن بالبيت لان يحترم وجود ابوي وعمامي .. حسب كلام ريم ..

جبران بالكرسي الكدام ورضا وياه ..
ترتيبنة جان مريم يم الجامة وبصفهة ديلارا وبصفهة ريم واني يم الجامة الثانية وبالكرسي الي ورى السايق ..

كلساع اعدل بعبايتي لان ممتعودة على العباية العراقية .. بس همزين مريم نقذتني وخيطت بيهة لاستيكة حتى تثبت براسي ..

شوية واجة حارث صعد بالسيارة : تأخرت عليكم ..
جبران : وين جنت ما تگلي ..
حارث : شسوي ابوي لزمني .. لا تمشي سريع ودير بالك على خواتك .. واخذهن يتمشن لان ما طالعات من اجن لهسة ..

رفع عيونة للمراية وباوعلنة : يابة شتأمرن اليوم بس گولن .. وهذا هم مصرف من الوالد لان البنات اول مرة يزورن كربلاء ويدخلن اسواقهة ..

طلع الفلوس وانطاهن بيد ريم وهي انطتنياهن كل وحدة ١٠٠ .. شگد عيب والله كلفناهم ..
ديلارا : شدعوة .. والله ميحتاج مو راسم داز ..

جبران ابتسم : هذا حقجن واقل هم ..
طلعنة من البيت واني كلشي شوق وترقب لزيارة امامي ابا عبدالله الحسين واخيه القمر ابا الفضل العباس عليهم السلام ..

الطريق جان سوالف وضحك .. بس اني ما اشارك الا للضرورة ..
جبران : اگول جلاتين شو هادئة اليوم .. مو من عوايدج ..

صغرت عيوني علي : قصدك اني يومية اخبصك ؟؟
جبران : اي والله اكثر وحدة تسولف انتي .. تفتحين مواضيع مدري منين ..

سلهمت عيوني عنة : اليوم رايحة ازور .. خليني بأجوائي الروحانية .. وحرانة هم من ورة العباية ولفة الحجاب ..

ضحك جبران ..
من حجيت هيج وجان تنزل الجامة مالتي عالنص ..
رفعت ايدي خاف اني دست الدگمة بدون ما ادري بس لا مو يمهة ..

رفعت عيوني لحارث لگيتة يباوعلي بعيون مبتسمة ..
درت عيوني عنة ..

شوية ووصلنة وخلو السيارة تدخل داخل القطع لان عدهم باج .. وهذا الباج خاص بس لأهل كربلاء ..

نزلنة من السيارة ومشينة ورى الولد ..
اباوع على المناراة والقبة واحس قشعر جسمي ..
ابتسمت لا اراديا ..

مشينة لحد ما دخلنة بين الحرمين ..
شعور مينوصف .. الجو جان يخبل .. صيف بس مغيمة والشمس مو قوية ..

دخلنة للتفتيش ..
اول ما طلعنة وصرت بالباب كفختني البرودة والعطر اليخبل من داخل الصحن ..
غمضت عيوني واتنفس .. احلا من هيج اوكسجين ماكو ..

كلشي جنت اشوفة بالتلفزيون هسة صرت اشوفة حقيقي كدامي ..
بس مختلف تماما .. الشعور حيل مختلف ..

دخلنة للأمام وزرنة واني احس بخشوع والدمعة بطرف عيني ..
صلينة وقرينة الزيارة .. صلينة كلنة ركعتين لروح جدو ..

طلعنة واحس ماريد اطلع لان المكان والاجواء تجنن ..
توجهنة وزرنة الامام العباس (ع) ..

خلصنة زيارة وطلعنة وية الولد لگيناهم ينتضرونة ..
جبران ابتسم : تقبل الله ..

جيلان : والله لو مو بالشارع جان حضنتك .. همزين جبتنة .. شگد جنت اتمنى اجي واشوف الاحواء بعيني من بعد ما جنت اشوفهة بالتلفزيون ..

جبران : صدك جذب .. كل ما تردين تجين بس گليلي واني اجيبج ..
جيلان : اصلاً ولا بودي اطلع .. بس راح يأذن وتبدي صلاة الجماعة وبعد منگدر نطلع ..

واگفين منتضرين مريم وديلارا يجن لان راحت تشرب ابنهة مي لان خبصهة يريد مي ..

حارث : جبران وين ناوي تاخذهن هسة .. حتى اشوف اذا ترهم اگرط حامض حلو ..

ريم خزرتة : حاااااارث !!
جبران لزم وجه حارث ودارة يمنة ويسرة : منا الحسين ومنا العباس دخيلهم وانتة تفكر بالبنات .. ولك عالاقل مو هنا خل نطلع ..

هزيت راسي وحجيت بصوت ناصي : اووي شكد ميستحي .. حتى واحنة وياه يريد يرقم ..
ريم شكلهة سمعتني .. ابتسمت .. واني انحرجت ..

اجن البنات ومشينة ..
بقينة نفتر بالسوگ ونتمشى ..

دخلنة مجمع جبير .. وتوزعنة نتفرج عالملابس ..
بقيت اگلب .. شفت فستان طويل مال محجبات حلو .. گمت اگلب بالالوان مالتة ..

سمعت صوت قريب مني : اخذي المشمشي يلوگلج ..
التفتت بس اصلاً عرفتة من صوتة ..
ما اهتميتلة ..

حارث : سؤال ؟؟
حجيت ببرود واني اريد امشي : لا جواب ..
حارث : ليش تتهربين ؟؟

التفتتلة وطبگت حواجبي : اتهرب ؟؟؟
هز راسة : اي .. سؤالي بسيط وعادي .. كل ما شفتيني انزعجتي وگمتي وما تردين تتواجدين بمكان اني موجود بي .. الكل لاحظ هالشي موبس اني .. سؤالي الج ليش ؟؟ سويتلج شي ؟؟

باوعتلة ببرود واعد على اصابعي : فشلتني بالكلية .. كلام جدو عنك واطباعك من تضحك عالبنات واني ماحب هذا النوع من الرجال .. كلامك علية ذاك اليوم وغلطك .. كون الك صورة مو حلوة وتعصبني من اشوفك ..

يباوعلي ورافع حاجب ومنزل الثاني : بلة كلة افتهمتة .. الا الغلط .. شوكت غلطت عليج اني ؟؟

رفعت اكتافي : تذكر انتة شسويت من جنت گاعد بالمعمل واني اتصلت اريد احجي وية الحاج خضر وحضرتك رديت علية ..

ارتخت حواجبة وفتح عيونة : يعني هاي جانت انتي ؟؟
هزيت راسي : اي اني .. وتذكر كلامك .. كتلي شايفة روحج .. وولي .. وجذابة .. وكلام مو حلو واسلوب يرفع الضغط ..

يسمع كلامي وهو متفاجئ .. : عرفت هسة ليش اتعامل بهالطريقة ..
عفتة ومشيت ..

طلعنة من المجمع والسوگ اني والبنات واشترينة جم شغلة ..
اخذونة لمحل مال ايسكريم وكعدنة شربنة عصير ..
اني طلبت شاني مشروبي الي اموت بي ..

رجعنة للبيت وويانة اغراض هواي ..
ونسولف وية حبوبتي وهي مكيفة على فرحتنة ..

متجمعين بالصالة ونشوف حبوبتي شنو الي اشتريناه ..
شوية ودخل ابوي للصالة : السلام عليكم ..
ردينة السلام .. وامي مثل العادة من يدخل هي تطلع تگعد بالمطبخ ..

اباوع عيون ابوي وراهة ..
التفتت لزينة المطنگرة لان من رحنة جانت نايمة وما اخذناهة ويانة ..
رفعت بيدي لعبة بگارتونة اشتريتهة الهة تجي وياهة فناجين وعود قوري مال جاي مال اطفال نايلون ..

گعدت بصفهة وحطيتهة بحضنهة ..
تحولت طنگورتهة لفرحة : هاي الي ؟؟
هزيت راسي بنفس نبرتهة : ايي الج ..
ديلارا : تعاي شوفي اني شجبتلج ..

گمزت بسرعة وشالت الكارتونة وراحت يم ديلارا ..
بابا صاحني اجي اگعد يمة اني وديلارا ..

گعدنة كل وحدة من جهة ..
حاوط اكتافنة بأيدي وحجة : تونستن اليوم .. خو ما احتاجيتن شي ..
ديلارا بحماس : اي حيل تونسنة .. والزيارة تخبل .. من العمر ..

التفت علية وحجة : شعجب امجن ما راحت وياجن ..
رديت بهدوء : اتگول تعبانة وأجلتهة لان محد تبقى يم حبوبتي اذا رحنة كلنة ..

سكت وما حجة شي ..
ابوي دائماً يحاول يتقرب من عدنة ويسولف ويانة .. يلاگي الفرحة بوجه ديلارا وهي نفس الشي تحاول تسولف وياه وتتقرب منة ..

بس مني ميلگة غير الهدوء .. واجاوب بأختصار وعلى گد السؤال ..
مو بيدي ممتعودة علي ..

اني انسانة ما عندي بهالدنيا شخص اعز من امي ..
ومنضهرة من جنت قبل اشوفهة شلون تبجي وتنقهر ميروح من بالي ..
وهسة من تشوفة تضوج وتگوم ..
وامي متزعل من فراغ ..

اكيد هو ضلمهة وسببلهة اذية والم خلاهة هيج تبقى مقهورة وشايلة بگلبهة ..
ولا تگولون انتي معليج والموضوع ميخصج ..
تگولون تزعلين على زعل امج اگللكم اي ..
مجرد ما اشوفهة ضايجة لو مقهورة احس بودي الزم الي يضوجهة واخنگة بيدية .. لهالسبب احس اكو حواجز بيني وبين ابوي ..

بيومهة ريم بقت لليل وراحت وية حارث لبيتهم ..

بليل الساعة جانت ب ٩ تقريباً ..
كاعدة بالصالة اني وديلارا .. حبوبتي بغرفتهة راحت تنام ..

رضا نايم عالقنفة وراسة بحضن ديلارا ..
مريم بالمطبخ تسوي عشا لراسم لان اجة متأخر جان طالع بشغل ..

رفعت البردة اباوع للحديقة ..
شفت راسم لابس تراك اسود نص ردن وبيدة كتاب وگاعد بالديوان المفروش بالحديقة ومرجع ضهرة عالمخاد ..
لابس نضارات طبية منطيتة زرانة وجاذبية اكثر ..

طلعت تليفوني وگعدت اراسل بريم ..
ما عندي شغلة بالتليفون غير اراسل ريم لو تارا ..

اجتني رسالة من رقم حارث ..
حارث : مساء الخير مشمش ..
رديت : شهالميانة 😒
حارث : الحمدالله بخير انتي شلونج ؟؟

كتبت : اذا داز حتى تصنف من هسة گلي ..
حارث : لا يابة والله ما مراسل اصنف .. بس ردت أگلج ان بيوم الي خابرتي بالمعمل ترة حتى اني ترزلت وانضربت هم .. وفوگ هذا كلة ترة حتى انتي ما قصرتي وكلامج مو اقل من كلامي ..

جيلان : اي بس انت البديت .. ولوما انت حاجي مجان حجيت اني وياك هيج .. يعني انت الجبتهة لروحك ..

حارث : زين هسة شلون ؟؟ تضلين گالبة وجهج علية للدوم وما تنسين ؟؟
جيلان : وانت ليش مهتم بوجهي لهالدرجة ..

حارث : مو مهتم بس محتار منج لهالدرجة شايلة بگلبج وما ناسية .. شنو من گلب ..
جيلان : ترة مو لهالدرجة حقودة اني .. بس ماحب احد يغلط وياي .. اليحترمني احترمة ..

حارث : ماشي لعد .. نبدي من جديد .. احترمج وبالمقابل تفكين وجهج من تشوفيني .. يعني طبيعي حالي من حال الولد .. شككتي العالم بية عبالهم مسويلج شي ..

جيلان : ماشي .. نبدي صفحة جديدة .. ماكو مشكلة ..

على گعدتنة وسمعنة صوت شي طاح بالمطبخ ووراهة عيطة مريم ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري 🖤

هلو حبايبي شلونكم ..
بما ان بلش الصيف يجي معناها اني بديت انتعش 😂
واليوم الجو يخبل .. ونفسيتي مرتاحة الحمدالله 😘 نزلتلكم البارحة بارت واليوم بارت ..

راح ابدي احاول انزللكم بشكل يومي ..
ركزو وياية احاااااااااول مو اكيد 😅 لان والله مو بيدي ..

احبكم كووومة .. ولا تنسون صوتو وعلقو كلشي ينداس دوسو ..