رواية بنات للزمن الفصل الثالث والثلاثون 33 - بقلم سارة الشمري

الكاتبة : سارة الشمري🖤

تعال ولا تظني عليك زعلان
چا هو الگلـب من نبضه يزعل
صدگني أبد ما همني الصار
ولا زهرة محبتك عندي تذبل
مو انه دفنتك حدر العيون
أشوفن بيك ساعه وبيك آندل
عذبني هواك ومرمر الروح
وآگـولنّ ما يهم هو يتدلل

عباس : ولج يعني اخت عامر .. وج ليلو اخت عامر ..
ليلى : فدوة بس على كيفك عباس ..

عباس : جنتي تدرين لو لا .. بس جاوبيني ..
ليلى : والله ورة فترة دريت .. ها بيوم الي كتلك اني احبك .. انت اجيت لبيتنة من عزمك عامر واني شفتك بوقتهة ..

عاط بية : ولييييش ما حجيتي .. ليش ما كتيلي بيومهة .. ليش خليتيني اسوي هيج .. وج اني اخون صاحبي واحاجي اختة .. تعرفين شني اخون صاحبي ..

ليلى : والله خفت .. خفت لا تعوفني .. ادري بيك ما راح تقبلهة على نفسك .. واني ماكدر اعيش بدونك .. ادري غلطت من ضميت هالشي .. بس والله خفت ..

عباس : اذا تدرين بية ما ارضاهة على روحي شلون تسوينهة بية وتضمين علية هيج سالفة .. شلون احط عيني بعينة بعد ..

ليلى : عباس افهمني والله خفت لا تعوفني ..

سكت شوية : ليلى اسمعيني زين .. انة راح اخطبج من عامر .. وانتي من يسألج توافقين .. بلا دراسة بلا بطيخ .. عود تكملين يمي ..

حجيت بسرعة : لا عباس اذا وافقت عليك راح يشك .. انت تدري قبل اسبوع خطبني واحد وكلت ماريد اتزوج هسة لان اريد اتخرج .. اذا وافقت عليك هسة اكيد راح يشك .. فدوة مو هسة ..

حجة بعصبية : اي خوش هيج صارت .. منا لوكتهة ديري بالج تخابريني .. ماريد اسمع صوتج وانتي مو على ذمتي .. كافي لهسة النار شاعلة بگلبي شلون اشوفة وجهي ..

حجاهة واني كمت ارجف : عباس لا فدوة ..
سد التليفون بوجهي واني كعدت ابجي ..
شنو يعني هيج عافني .. بعد ما اسمع صوتة ..
هذا الي جنت خايفة منة هسة صار ..

مريم //

دخلت للغرفة شفتة طابگ حواجبة ..
ذبيت شالي عالكرسي ورحت للمراية بدون ما اباوعلة ..

لزمت الكلينس المرطب وكعدت امسح بمكجياتي حيل وافرك بعيوني عبالك اطلع حرگة گلبي بيهن ..

اجة وگف وراي احس بي بس ما اباوعلة ..
لحد ما انسحبت الكلنسة من ايدي ..
رفعت عيوني باوعلتة طابك حواجبة : شبيج گطعتي رموشج .. عليمن متعصبة ..

تنهدت بتأفف : هيج مابية شي ..
راسم : لا واضح مابيج شي .. اتصل عليج مساع اكثر من مرة ما تردين.. وسبحان الله حارث من اول رنة تردين ..

رفعت راسي الة وابتسمت : سوولك طريق حتى كدر ت تصعد لغرفتك مو ..
طبگ حواجبة : اي غير نسوان ..
گمت وگفت : شوف هسة لو بيت وحدنة جان ميحتاج يسوولك طريق ..

رفعت الشال من الكرسي : شوف حتى شال ميحتاج البس بالبيت واذبة بغرفتي ..
راسم : مريومة شبيج .. ليش تحجين هيج ..

تقربت منة : راسم مو تريد نعزل ابيت وحدنة .. خلص شتريد تسوي سوي ماعندي مشكلة ..
موافقة اروح وياك مو انت تريد هالشي ..

حط ايدة على خدي : مريم بس فهميني شجاج فجأة .. منين طلعتي هالموضوع بهالوقت ..
غورگت عيوني : راسم اني شنو گتلك .. مو سألتك اذا جنت مرتاح لو لا .. انت گلت مادام انتي موجودة اني بعز راحتي .. صح لو لا ؟؟

راسم : صحيح بس شنو الموضوع ..
نزلت دمعة من عيني : ليش جذبت علية راسم .. ليش ما گتلي ما مرتاح هنا من خواتج ومضغوط عالطبة والطلعة ..

طبگ حواجبة : اوگفي اوگفي منين تجيبين هذا الحجي ..
مريم : راسم اني من سألتك ردت اعرف جوابك .. ليش ما گلتهة بوجهي .. ليش رحت شكيت لامك .. والله لو گايلي ما مرتاح هنا جان وافقت نعزل بلحضتهة .. ليش تروح تشكي من خواتي كدام امك وتدري بيهة ما تحبهن وما تطيقهن ..

فاتح عيونة : منين تجيبين هذا الحجي .. منو الشاكي وفاتح حلگة ..
وخرت عنة : امك اليوم اجت حجاتني كالت راسم ايگول اني ما مرتاح واريد اعزل ومريم ما ترضى .. تعودت على اخواتهة واني ماقيد بوجودهن ..

لك والله تفشلت كدامهة ..
مو تدري بية تكرهني ليش تخليهة تجي تتشمت بية .. شلون تنطي بية كدامهة ..
حتلو امك بس اني هم مرتك ..
والحجي الي بيناتنة ما لازم يطلع ..

فرك وجهة ورص على سنونة بعصبية : باوعي مريم .. اني لا شاكي ولا فاتح حلگي لامي .. البارحة من رحت گالت ليش ما تعزل حتى اجيك شوكت ماريد .. كتلهة مو هسة يمة اريد ارتب اوضاعي .. بس هالشي حجيتة لا شكيت ولا گلت ما مرتاح ..

نترت : لعد منين جابت هذا الحجي .. الفتة من يمهة وطلع مثل ما انت واني حجينة .. منو يعرف بحجينة غيرنة حتى رضا ما جان موجود ..

اكيد انت حجيتلهة .. بالتالي تبقى امك واكيد ما تنطي بيهة ..
جرني من زندي : مرييييم صووتج لا تعلينة علية .. وامي اي تبقى امي وما انطي بيهة .. بس من اگول حجاية ما خايف من احد واجذب بيهة ..

جريت ايدي منة : لعد شمدريهة انت ما مرتاح هنا .. وخصوصاً من خواتي وانت البارحة تتشكى ودائما تتشكى لان جيلان جم مرة دخلت بدون قصد ..

الكاتلني ليش ما كتلي ورحت حجيت لامك ..
ليش تجيب حجاية علية راسم ..
راسم : مريييم كااافي كتلج صوتج لا يعلى .. ماريد حجاية ثانية ...

باوعتلة بعصبية : شنو ماريد حجاية .. راسم مو تدري بيهة ما تطيقني .. وانت انطيتهة فرصة من حجيتلهة هالشي ..

بس نيتهة واضحة امك .. تريد تخطبلك من بنات اخوهة لو خواتهة .. تريد تكسر خشمي مثل ما رفضت ديلارا ابن اخوهة .. تريد تمشي الي ابالهة ..
اعرفة لتفكيرهة امك ..

بثانية رفع ايدة وانسطرت بنص خدي وكعني بالكاع ..
حطيت ايدي على خدي احس نمل وحرارة سرت بي واذني كامت تصفر ..

باوعلي بعصبية وزمخ : الزمي لسانج من تحجين على امي .. تكرهج وتكرهينهة افتهمتهة بس ما تحجين عليهة وتطولين لسانج كدامي .. سمعتي ..

غمضت عيوني حيل ..
عضيت خدي من داخل بسنوني ..
وخرت ايدي عن خدي حسيت بطعم الدم بشفتي لان من ضربني شفتي انجرحت بسني ..

گمت وگفت وهو يباوعلي ..
من وخرت ايدي ارتخت حواجبة واجة علية بسرعة : اوگفي شفتج بيهة دم .. خل اشوف ..

رفعت ايدي بوجهة ورجعت ليورة : لا تقرب مني راسم .. دير بالك ..
سحبت شالي وفتحت الباب وطلعت من الغرفة ونزلت جوة دخلت لغرفة ديلارا بما ان الكعدة مال البنات بغرفة جيلان ..

رحت للحمام غسلت وجهي واباوع لخدي اثر اصابعة طابعة وواضح ..
نزلت دموعي واغسل بحلگي والدم ينزل بالزايد ..
دقايق ودخلت ريم : مريم شبيج ..

طلعت من الحمام واحس المغص زاد ابطني : مابية شي .. شمدريج اني هنا ..
ريم : راسم خابرني كال شوفيهة ..
تمددت عالفراش وغطيت راسي : عوفيني ريم بوحدي .. طفي الضوة وسدي الباب ..

ريم : شأكول لراسم .. كال رجعيلي خبر ..
نترت : رييم كليلة راحت لجهنم الحمرا .. بس عوفوني .. ماريد اشوف احد .. مالة شغل بية ..

طلعت وطفت الاضوية وسدت الباب ..
شديت اللحاف علية وكمت ابجي ..
الالم نفسة متعودة علي .. مو شي جديد ..
بس ما متعودتهة من راسم ..

مررت اصابعي على خدي وبجيت بالزايد ..
متعودة على اصابعة يحطهن بحنية على خدي ..
تعودت يبوسني بخدي مو يضربني ..
ليش هيج سوة .. ليش يصير مثل نعمة ..
اني من عصبيتي هيج حجيت ..

مو دائماً امة تحجي علية حتى اكثر من هيج ..
وتغلط علية وعلى اخواتي .. اصلاً ولا مرة شافتني اذا ما سمعتني حجي ودعت علية وغلطت ..
هالمرة اني لان حجيت الصدك ما قبل وضربني ..

مرت تقريباً نص ساعة ..
انفتح الباب اني غمضت عيوني ..
دقايق وحسيت بأيد على كتفي لان اني متغطية كلي ..
وخرت اللحاف عن وجهي ..

شفت امي كاعدة على ركبهة ونازلة لمستواي ..
تباوعلي بقلق .. : شبيج مريم .. تعبانة ..
حطت ايدهة على گصتي : ما عندج حرارة .. لعد ليش نايمة هنا ..

بلعت ريگي وحمد الله ان الاضوية طافية وبس ضوا من برة لان الباب مفتوح .. همزين ما ينشاف اثر الراشدي ..

باوعتلهة وهزيت راسي : مابية شي .. تعاركت اني وراسم .. طلعت من الغرفة اريد ارتاح شوية .. روحي انتي لا يضل بالج ..

مررت اصابعهة على شعري : تمام .. نامي وارتاحي .. اصلاً تعب اليوم كافي ..
هزيت راسي وهي كامت وسدت الباب ..

غمضت عيوني ونزلت دموعي مرة ثانية ..
حتى امي جاي احس اكو شي يمنعني منهة ..
مو المفروض بهالضرف احضنهة وابجي ..
بس احس عادي .. حتى علاقتي بديلارا وجيلان ولهفتي وسوالفي وياهن اقوى منهة .. احس ببرود اتجاهة ..

بقيت بيومهة نمت بالغرفة ..
دزيت ديلارا على رضا كالت طلعلي راسم وگال نومتة ..

ريم //

ثاني يوم الزفة رجعت اني للبيت ووياي خالتي هويدة ..
الحمل متعبهة خطية وضعفانة .. باقيلهة اسبوع وتدخل بالسادس .. اني احسب وياهة ..

كاعدة بغرفتي بتعب الساعة جانت ب ٣ العصر ..
كمت نزلت يم خالتي .. كعدنة بالمطبخ سولفنة شوية وهي دگ تليفونهة ..

اني گمت اسوي بعصير البرتقال الهة ..
واسمعهة تحجي ..
شد انتباهي من سمعت اسمة : اي سيد رياض والله اسأل نفسك صارلك فترة ما جاي علينة ..

اني اسوي بالعصير واذني يمهة ..
خالتي : شوكت تروح انشالله ..
.. ها بالسلامة .. زين ما تمر علينة اليوم .. يلة انتضرك ..

سدت التليفون وابتسمت : ريمي حبيبتي بلا امر عليج .. سوي گلاص ثالث لان خالج جاي بالطريق ..
دگ كلبي بلعت ريگي : تمام .. هلا بي ..

سويت گلاص ثالث ..
حطيتهن بالصينية ورتبت المواعين مال الكيك ..
شوية وسمعت صوتة المميز وهو يسلم على خالتي ..

غمضت عيوني يالله شبية هيج اختبصت ..
صارلي شكد ما سامعة صوتة ولا شايفتة ..
شلت الصينية ورحت لجهة الديوانية ..

وصلت يم الباب واسمع خالتي تگلة : عليمن هالكشخة هاي .. ترة ماكو بنات يباوعلك هنا ..
رياض : ليش مو هنا بت رجلج ..
خالتي : استحي على وجهك .. انت مثل خالهة ..

رياض : منين اجيت خالهة .. ابتليت على عمري وصرت اخوج .. انتي مثل امهة اي بيهة مجال .. بس اني بعدني زغير مو مال خال .. كافي علية بنات اخوج ..

طلعت صوت ودكيت الباب ..
طلعت خالتي اخذت الصينية : تعبتج حبيبتي .. تسلم ايديناتج ..
ابتسمتلهة : عافيات ..

سمعت صوتة صاح : هويدة اذا مو گهوة ذاك اليوم ما اشرب ..
باوعت لخالتي : كهوتنة مخلصة .. كليلة مو لازم يشرب ..

درت وجهي ومشيت ..
اخذت كلاصي مال العصير ورجعت صعدت لغرفتي ..
بقيت كاعدة بالغرفة وافكر ..
شبية هيج كاتلة نفسي على شوفتة ..

بس والله مفتقدتة صارلي شهرين مشايفتة ..
عيونة الزرگ الخبلني من اول مرة شفتة ..
لو حواجبة وخلطتهن الخفيفة من النص ..
ابتسامتة الي كلهة غرور وجاذبية ..
حتى عصبيتة الي مالهة داعي هم مفتقدتهة ..

گمت وگفت : هاي شبية هيج اكول .. شنو مفتقدتة ..
فتحت عيوني وضربت على خدي : عزا العزاج ريم بس لا حبيتي .. لا لا ما حبيتة .. عزاا ..

مو اني معتبرتة خالي .. شلون كمت افكر بي هيج ..
شگد عيب يالله ..
سمعت صوت من جوة ..
طفرت بسرعة للشباك ..

وخرت شوية من البردة ..
اباوعلة بالحوش وخالتي وراه ..
باس راسهة وطلع وخالتي سدت الباب وراه ..

تنهدت يمة هاي شطالع ..
لابس بنطرون اسود وقميص نيلي ..
وبيدة الجاكيت مالتة .. الا شوية جان ذبت من كمية الجاذبية الي بي ..

طويل .. واكتافة عريضة وعضلات بارزة وية القميص الضيگ نوعاً ما ومفتوحة اول دگمة ..

فتح باب سيارتة وراد يصعد بس وگف وايدة على باب السيارة ..
طبگت حواجبي مستغربة ..
فجأة رفع راسة لجهة الشباك مالتي ..
شهگت ورجعت البردة بسرعة عالشباك ..

البردة جانت خفيفة كلش مثل التور ..
اباوع من ورة البردة علي ..
ابتسم من شافني سديت البردة ..
يبوووو والله فشلة هسة شيگول تراقبني ..

تحولت ابتسامتة لضحكة ..
هز راسة بضحك وصعد بالسيارة ..
هسة عبالة كاتلة روحي على شوفتة ..
وبعدين هو ليش يباوع ما كمل طريقة ..

تأففت وگمت .. اي اي ضحكي على نفسج بهالحجي ريم ..

براء //

دخلت للصالة شفت حبوبتي كاعدة ..
وامي يمهة يسولفن ..

كعدت يمهم : لعد البنات وين ..
حبوبتي باوعتلي : وعليكم السلام ..
ابتسمت : حبوبة غير قبل شوية جنت يمج .. يعني كلساع السلام ..
طبگت حواجبهة : ويروح نصج من تسلمين ..

براء : حقج حبوبة .. اسفة .. السلام عليكم .. البنات وين ؟؟
امي ضحكت : حنين بالمطبخ مثل كل يوم تخترع طبخات .. واسماء بغرفتهة ..

باوعت للساعة : الولد محد منهم هنا ؟؟ اريد اروح للمكتبة محتاجة جم شغلة .. اوراقي البيض خلصن .. واريد اقلام سوفت ..

حبوبتي : حگهن يخلصن .. ليل ونهار حاطة راسج بالكتاب مدري الدفتر .. اخذي نفس شوية ..
ابتسمت : حبوبة اني ادرس صيدلة .. ماكو مجال للنفس هنا .. لازم اشد حيلي ..

التفتت لامي : وعمو رياض وين مو رجع من الشغل .. بلكي هو ياخذني للمكتبة ..
امي : رياض اجة ورجع طلع ..

طلعت حنين من المطبخ وتاكل ..
حطت الماعون عالميز بي موز وفراولة وفوگاهن نوتيلا ..
حبوبتي باوعت للماعون : صارلج ساعتين بالمطبخ .. كلت راح تسوي مفطح ..

حنين : حبوبة نعمة الله وطلع مني هذا .. وبعدين المفطح هذا طبخج .. اني طبخي حسب المشتهاة .. هسة مثلاً اذا اگلت مفطح .. معناهة ما راح اتعشى .. لهالسبب اكل هاي حتى اسد جوعتي منا للعشة ..

انفتح الباب ودخل عمي رياض ..
منطرب وحاط السويج بأصبعة ويفر بي ..
يغني بأحساس بس صوتة نشاااز ..

رياض :
ميحانة ميحانة .. غابت شمسنة الحلو ما جانة ..
حيك .. حيك بابا حيك .. الف رحمة على ابيك ..
هذولة العذبوني .. هذولة المرمروني ..
على جسر المسيب .. سيبووني ..

حنين وگفت تهز بأيديهة وترگص وياه ..
وهو جرهة من خدهة ويغني وهي تحرك بأيدهة على اساس تعزف ..

ضليت انا سهران .. ورا نجومي ليش ما جانة ..
واتسامر وية الليل .. واتسامر وية الليل ..
واجمع همومي الحلو خلانة .. 
واجمع همومي الحلو خلانة ..

حنين غنت وياه : حيييك .. حيك بابا حيك .. الف رحمة على ابيك .. هذولة العذبوني .. هذولة المرمروني على جسر المسيب سيبوني ..

حبوبتي تباوعلة وفاتحة حلگهة : يا يا يا .. راحت هيبتك ..
اجة باسهة براسهة : شمسوي يمة .. اطربكم بصوتي .. خليني مرتاح هيج ..

ضحكت حبوبتي : دوومهة الراحة يمة جا انة شأريد .. وانشالله يوم اشوفك مرتاح اكثر وية مريتك ..
تنهد عمو رياض : وصلنة لهاي السالفة .. استأذن اني ..

ابتسمت : لحضة لحضة عمو .. اممم وين جنت ..
رياض : جنت يم دكتور راسم بالعيادة .. وبعدين مريت شفت هويدة وهسة اجيت .. ليش تسألين ..

براء : وديني للمكتبة فدوة .. محتاجة جم شغلة ..
ابتسم : مو تدلل الصيدلانية الحلوة .. مو مثل بعض ناس .. درسو دبلوم وتالي گعدو بالبيت ..

حنين : والله هي بت اخوك تدور بالعالي .. اني طلعلي بالمعدل دبلوم .. هوة سنتين درستة وخلصت .. شلي بدوخة الراس ..

براء : عمو عوفك منهة .. شوكت توديني ..
رفع ساعتة : الساعة بالخمسة ونص .. انتضريني للساعة ستة وربع الگاج جاهزة ..
ابتسمت : ماشي .. 

صعد لغرفتة اني كعدت يم حبوبتي ..
حنين اخذت ماعونهة وطلعت ..
باوعت لحبوبتي وتدنيت يمهة وابتسمت : حبوبة شفتي شلون مروق اعصابقة .. ويغني هم ..

طبگت حواجبهة : اي شفتة .. يعني شني واذا ..
تنهدت : حبوبة لازم تزوجين عمو رياض ..
حبوبتي : وما نعتة انة شني .. ما تشوفينة هو ما يرضى ..

ابتسمت : حبوبة عمو رياض ما يريد يدخل بتجربة جديدة .. يعني يحس العزوبية احسن .. وهو متمسك بهالفكرة .. لازم تغيرين رأية ..

باوعتلي بأهتمام : شلون اغير راية .. شكد حاجيتة ..
باوعتلهة بخبث : حبوبة الحجي ما يفيد .. لازم افعال حبوبة افعال .. يعني تصرفي ..

امي باوعتلي مستغربة : براء يمة شجاي تحجين .. من الاخير احجي .. دوختينة ..
باوعت للدرج ورجعت باوعتلهة : اني عندي شك بفد موضوع .. يمكن عمو رياض عاجبتة ريم بت رجل عمتي هويدة ..

حبوبتي شهگت : هاااااه .. رياض يحب ريمة .. لالا ما اضن .. غير خالهة ..

تنهدت : حبوبة هي مو بت اختة .. يعني يصير يتزوجهة .. وبعدين ترة اني ممتأكدة .. بس اشوف نضراتة الهة .. وهسة اجة من يمهم شلون فرحان ..

حبوبتي تنهدت : يممة يوم المنى .. بس خل يگلي اخطبيلي .. وين الگى مثل ريما .. جمال واخلاق وادب ..

باوعتلي : بس خاف هي ما تريدة لان حاسبتة خالهة ..
هزيت راسي : لا حبوبة .. هاي كلهة رسميات .. هو لا خالهة ولا شي .. لا تگطعون السالفة ..

هزت راسهة : انشالله يجي ايگلي اخطبيلي ..
غمضت عيوني بملل : اوووهووو جدة .. اذا تنتضرينة على ما يجيج يگلج اخطبيلي معناها ايسي .. كتلج تصرفي الحجي ما يفيد ..

هزت راسهة : يمة جا شسوي .. اروح اخطبلة بدون ما يدري ..
ابتسمت : لا .. اني عندي حل .. وشوفي اذا ما اجة بنفسة وگالج اخطبيلياهة .. بس اسمعيني ..

الكاتبة : سارة الشمري🖤
مرحبا للكل .. اعذروني عالتقصير بس والله الاوضاع ابد متسوي واهس .. 🖤

احبكم .. ولا تنسون صوتو وعلقو وكلشي ينداس دوسو ..