رواية بنات للزمن الفصل السابع عشر 17 - بقلم سارة الشمري

الكاتبة : سارة الشمري 🖤

أصبّر الرّوح بيش وإنت بيه الرّوح
وإذا تطلع أظلّن بس جسد خالي
لكيتك من جنت ما لاكي كل النّاس
أنت أول محبّ وأنت صرت تالي
يلكلّك محبّة وأنت أحنّ مخلوق
معقولة الحمامة تصير كتالي
صح ماكو بجمالك أني أدري بهاي
وروجه رقّتك ما كظها أي جالي
حرام عليك تزعل وأنت الصّوج
أجيك أنا أعتذر وبلا ذنب خالي

مريم //

بغرفتي .. سبحت رضا وبدلتلة ملابسة .. مشطت شعرة وعطرتة ..
هو مكيف لان راح يروح لحبوبتة (ام راسم ) ..
يحبهة كلش ايگول تشتريلي حلويات وتحبني ..
واليوم هنا عهد بت عمي ودازة علي ومن تجي بعد شوي تجيبة وياهة ..

كملتلة ونزلتة جوة لگيت رضوان وراسم واگفين يسولفون على موضوع هيام بت خالهم الي لزگوهة برضوان المگرود ..

استغربت راسم اليوم جاي من وگت ..
انطيت رضا بيد رضوان : فدوة دير بالك علي مو يطلع للشارع ..

رضوان : لا تخافين يابة بيد امي ..
اخذة رضوان وطلع ..
راسم التفتلي .. حجيت بأستغراب : اليوم جاي من وكت ..

راسم : عندي طلعة .. وانگلب الجاي على قميصي .. اجيت ابدلة ..

صعد للغرفة واني رحت للصالة شفت جيلان گاعدة وتشرب شاني وحبوبتي ترزل بيهة مدري عليمن مثل العادة ..

صعدت فوگ .. ردت اذب الشال ..
طبگت حواجبي بألم .. الشال لازگ بشعري وبس اسحبة ينجر شعري عبالك بي صمغ .. : ااااه شنو هاي ..

دخلت للغرفة واني مدنگة : فدوة راسم شعري مدري شبي .. الشال لازك بي ..
رفعت راسي شفتة بس بالكيمونة شامر القميص ويدور على قميص يلبسة ..

من شافني هيج اجة علية : شو اوگفي خل اشوف ..
استحيت بعد ارجع وهو بهالحالة ..

رفع ايدة لفوگ راسي وبس رفع الشال اني لزمت ايدة : اااييي .. مو اگلك لازگ بشعري لا يتگطع مدري شبي ..

ابتسم وهو يباوع لشعري : هذا علج لازك بشعرج ..
طبگت حواجبي : منين اجاني العلج ؟؟

حك راسة : الحلويات الجبتهن البارحة لرضا جان من ضمنهن علج .. خاف منهن ..
تأففت بقهر : يبووو هسة شلون .. هذا لازك ببداية الخصلة يعني الا تنگص من فوگ ..

نزل راسي بيدة وتقرب مني .. صرت قريبة منة حيل : خل اوخر الشال اول بداية ..
غمضت عيوني حيل : اي يلة بس لا تگطع شعري ..

ايدة تفك بالشال من العلج واني سطرني العطر مالتة ..
رفعت عيوني الة بدون ما ارفع راسي ..

عيونة مرتكزة على شعري وطابگ حواجبة عبالك عندة عملية صعبة ..
عيونة السود وناعسات وحواجبة ثخينة بس مرسومة ..

بشرتة السمرة فاتح ولحيتة الخفيفة وشواربة الثخينة ما خلتني انزل عيني ..
نزلت عيوني لرگبتة الي تفاحة ادم واضحة بيهة وتتحرك كل ما يبلع ريگة ..

ذب الشال بالكاع : وهذا الشال وخرناه .. هسة نطلع العلج ..
صحيت على نفسي وهزيت راسي : ها شلون ..

راح للثلاجة وطلع قطعة ثلج من الفريز بالقالب ..
رجع وگف قريب علية ومد ايدة فك القراصة الي بشعري ..

حط قطعة الثلج فوك العلج : هسة يجمد وينشال بسهولة ..
هزيت راسي واني مرتبكة من قربة مدري شبية ..

رفعت عيوني علي شفتة يباوعلي ..
ما شال عيونة عن عيوني ..
لحد ما الثلج بدة يذوب ويقطر على رگبتي ..
شهگت وصلبت ضهري : هييييي ..

فز وانتبه : شبيج ؟
مريم : الثلجاية ماعت وتقطر علية ..
ضحك وهز راسة : دوگفي اوكفي خل اكمل ..

رفع الخصلة ويمشي قطعة الثلج عليهة ..
شوية وبدة يشيل بالعلج قطعة قطعة زغار ..
لحد ما شالة كلة ..

بعدة يوخر بي اخر شي وجان ينفتح الباب بسرعة ودخلت جيلان مثل العاصفة ووراهة بسمة ..

شهگت من شافتنة واگفين هيج ..
بسرعة اعتذرت وطلعت ..
اني وخرت بسرعة منة بس شعري شكل بساعتة : ااايييي ..

راسم ضحك وفرك وجهة بيدة الثانية ..
اني منحرجة : لا تضحك شبيك راسم فكهة ..
هز راسة ومد ايدة وفك شعري من الساعة ..

وخرت اني وافرك بشعري مكان العلج ..
دخلت سبحت حتى يروح الدبگ ..
طلعت من الحمام لگيتة طالع ..

مشطت شعري وبدلت ونزلت ..

جيلان //

من نزلت من مريم واني افتر : عزززة والله عيب من راسم ..
بسمة تلبس عبايتهة : اني ماشية .. ما اشوف وجهي لراسم ..

نزلت وياهة اوصلهة .. دخلنة للمطبخ ..
ودخل ورانة راسم مبدل يريد يطلع ..
شافنة وابتسم واحنة وجوهنة انطعنت حمر ..

الا شوية اعض ثوبي واشرد ..
راسم : بسمة شلونج ..
بسمة بدون ما تباوعلة وحجت بصوت گوة ينسمع : زينة ..

طلع راسم من البيت وبسمة غمت كصتهة : لو ضالة فوگ مو احسن .. امداني ..
جيلان : امداني اني الي نزلت وياج .. شهالاحترام شنو قابل ما تندلين الباب ..

طلعت بسمة واني گعدت بالمطبخ ..
كل ما اتذكر الموقف اموت بدمي ..
لو نازلة احتمي بحبوبتي مو احسن ..

دخلت مريم للمطبخ ..
بس شفتهة درت وجهي للجهة الثانية ..
مريم : شعدهة الحلوة گاعدة وحدهة ..

هزيت راسي وگمت : هيج ما بية شي .. اني اروح يم حبوبتي ..
لزمتني من ايدي : شبيج متباوعيلي ..

رفعت عيوني الهة : منحرجة .. والله ما جنت ادري براسم بالغرفة ..
مريم ابتسمت : شبيج جلاتين ما صار شي .. اصلا مجان اكو شي من البالج .. بس جان ..

قاطعتهة : لا لا لا على شنو تبررين .. المفروض اني ابرر .. بسمة ركضت وراي واني اجيت احتمي بيج .. بس ما جنت ادري انتو بوضع مخل للأدب ..

فتحت عيونهة : جيللان .. وج العلج جان لازك بشعري وهو يوخر بي .. وانتن دخلتن ..

جيلان : حتلوو .. ما جان لازم ادخل وهو بالغرفة .. وبعدين انتو الله يهديكم عدكم الليل بطولة ما تطلعون رومنسيتكم الا بالنهار ..

فتحت عيونهة : وج جيييلللان .. احجي صيني اني .. يا رومنسية ..
هزيت راسي : عادي حبيبتي ليش معصبة .. بالتالي انتو متزوجين اكيد اكو رومنسية ..

عفتهة ورحت لحبوبتي وديلارا .. وهي عوزهة شوية وتكتلني ..

اجت هي وگعدت يمي ..
حبوبتي باوعتلنة وحجت : امجن وين .. شو ماكو ..
احنة وحدة باوعت بوجه الثانية ..

ديلارا : ليش شنو اليوم ابد ما طلعت من الغرفة ..
حبوبتي : لا طلعت بس من ورة الغدة لهسة ماكو وهي يومية تسويلي جاي هيج وكت وتگعد تسولف وياي ..

گمت بقلق : اروح اشوفهة ..
ديلارا : اني هم ..

فتحت الباب بهدوء ..
لگيت الغرفة ضلمة ..
حجيت بهدوء : ماما ..  گاعدة ؟

حجت بصوت مبحوح : تعاي ماما گاعدة ..
رحتلهة وگعدت يمهة على طرف الجرباية اني وديلارا ..
لزمت ايدهة : بيج شي تعبانة من شي ..

هزت راسهة بلا وگامت ديلارا فتحت الضوة ..
شفت وجه امي احمر وعيونهة حمر ..
باوعتلهة بخوف : ماما باجية .. منو وياج ..

ديلارا : منو مزعلج .. احد مسمعج حجاية ؟
گمت بسرعة : اكيد نعمة منو غيرهة .. والله اني اعلمهة ..

امي جرتني من ايدي : جيللللان شگد ابقى اگلج لا تلاسنين نعمة .. ليش ما تسمعين الحجي ..
جيلان : ما اسكت ماما والله ما اسكت .. شوفيهة شلون مخليتج تبجين ..

امي : حبيبتي والله نعمة مالهة شغل .. اصلاً ما شفتهة اليوم ..
ديلارا : لعد شبيج تبجين ..

اخذتنة بحضنهة ثنينة وباستني براسي : والله ما بية شي .. لا تخافن ماما .. مجرد اشتاقيت لعمي وما ردت ابجي گدام عمتي ..

باوعتلهة بشك واني ممقتنعة : بس ؟؟
هزت راسهة : اي بس .. 

رفعت راسي بستهة بخدهة ..
ديلارا هم باستهة بخدهة ..
رفعت حاجبي : ليش تغارين ؟؟

ديلارا : وحد عنج شنو ؟ هم امي وابوسهة ..
جيلان : امي اني وتحبني اكثر .. واني احبهة اكثر منج ..
ديلارا تخوصرت : لا بلة على اي اساس ..

امي عصبت : مادام بديتن تتعاركن معناتهة اطلعن برة ..
رفعت ايدهة وبستهة : ماشي طالعين بس انتي هم تعاي ورانة لان بيبي تسأل عليج ..

هزت راسهة : يلة راح اجي ..

طلعنة من الغرفة ورحنة للصالة ..
واني كل تفكيري يم امي منو الي مزعلهة ..
ماريدهة تضوج .. احس اني اختنگ اذا شفتهة زعلانة من شي ..

مريم باوعتلنة وحجت بتردد : احم .. وينهة ؟؟
ابتسمت وگعدت يمهة : هسة تجي جانت نايمة لان تعبانة شوي ..

سكتت ما حجت شي ..
دخل جبران : السلام عليكم .. شلونج ام حافظ (حبوبتي) ..

حبوبتي باوعتلة وساكتة ..
شوية ورفعت شيلتهة حطتهة على وجهة وگامت تنعى بكلمات ما مفهومة ابد ..

حكيت راسي مو فاهمة شي ..
مريم طابگة حواجبهة مستغربة ..
جبران فاتح ايدي ببرائة : شحجيت هسة انة ؟؟

حبوبتي مسحت دموعهة بشيلتهة : ولك خضر وين رحت ..
جبران : ها حبوبة شو صار ولك وخضر .. جنتي تطگطگين منة ..

حبوبتي خزرتة : انجب ولك .. اوف يخضر وحشة عليك .. ادور هذا الاغبر يشبهك ..
جبران فتح عيونة : منو الاغبر ؟ بس لا علية ..

حبوبتي : اكو اغبر غيرك هنا ؟؟
جيلان : حبوبة جبران يشبه جدو ؟
حبوبتي : اي عمت عيني .. بشبابة حباية ومگسومة منة .. ادور هسة طب يگلي ام حافظ ..

جبران : عمي اسفين بعد ما اگلج ام حافظ ..

ريم //

گاعدة يم ابوي وهويدة ويسولفلنة على جبران ويريد يخطب بسمة ..
ابتسمت : بس بابا مو بعد وكت .. يعني عالاقل يمشي جم شهر .. جدو هستوة متوفي ..

ابو حارث : اي بوية جا هو مو عرس .. بس خطوبة هسة .. وعود بعدين يتزوج ..
هويدة : انشالله شايف كل الخير .. وانشالله يوم لحارث وتفرح بي يارب ..

ابتسم ابوي وتنهد : امين بوجودج .. يرادلهة بخت ويعقل حارث ويجي يگلي اخطبلي ..
ابتسمتلة اني : انشالله بابا ميخليهة بنفسك ويتزوج .. قابل هو زغير شنو ..

اجتني اشعارات على تليفوني ..
دخلت استغربت گروب (گهوة العگيد حنين) ..

عرفتة گروب البنات ..
ابتسمت وحجيت : البنات مدخليني بگروبهن ..
خالتي هويدة ضربت على راسهة : يبوو الله يفشلهن ..

ابوي جاوبهة مستغرب : ليش ؟؟
هويدة : هو گروب لو ليگول حمام نسوان .. شكو سالفة يناقشنهة بهذا الگروب .. ما يسكتن ابد ..

ابوي ضحك : خليهن يتونسن شتردين منهن ..

دزيت رسالة : هلو ..
البنات انهالن علية بالترحيب الحلو وعادي الا حنين ..

كتبت : هلا هلا بالدقة والرقة والحسن والجمال والدلال والحسب والنسب .. هلابج يبنت الاصول ..

ضحكت : بيج اكثر حبيبتي فديتج ..
حنين : فداج الكون ونضر العيون وقصر فرعون وكارتونة صابون وعلاگة صمون وكلمن عندة ايفون ..

ليلى ردت على رسالتهة : دهر دهرج كافي ..
شهد : منين تجيبينهن ذني بس اريد افتهم ..
حنين : لا تتدخلن باباتي .. هذا نمط خاص بية ..

براء : حنين بس اسكتي شوية .. خل نحاجي البنية ..
حنين : غردي اختي غردي ..

ليلى : ريم حبي دخلناج بالگروب حتى هم نسولف وهم نعزمج عالغدا يمنة بالبيت .. يعني بس احنة البنات وردناج ويانة .. شتگولين؟؟

ابتسمت : مادري والله ..
رفعت راسي لبابا : احم بابا .. البنات عازميني عالغدا يمهم يعني گعدة بنات .. عادي اروح ؟؟

ابتسم : مادام حبيتي البنات وارتاحيتي وياهن شلون تتوقعين اگلج لا .. روحي بابا .. ومن يجي حارث اخلي يوصلج ..

رجعت خبر للبنات ..
باوعت للساعة جانت ب ٩ الصبح ..
بابا گام وطلع للمعمل ..

بقيت اني وخالتي نسولف .. علاقتنة صارت قوية وهي تحب تشاركني بكلشي تسوي ..
مرات من تشوفني كاعدة ضايجة تگلي تعاي نسوي كيك نتونس بي .. تعلمت جم طبخة منهة بطلب مني ..

صارت الساعة ١١ رحت بدلت ونزلت لگيت حارث گاعد بالصالة ينتضرني ..
نزلت واني لابسة عبايتي ..

هز ايدة من شافني : خوش مكيفة عالسفافة .. شتردين بعد يومية حاطة وجهج بين العالم ..
مشيت گدامة وطلعت : شعلية اني هنة البنات عزمني ..

حارث : وانتي ما گلتي باطل .. والله فشلة من السادة .. تاليتهم يملون ويگولون بعد لا تجيبونهة ملينة ..

تأففت : دگول يا الله هي هاي ثاني مرة اروح .. وبعدين انت شفتهم ملو منك شنو .. اشو يومية مگابل ابنهم بالمعمل ..

حارث : هذا شغل .. وهاي سفافة ..
ريم : اهوو ديلة يلة .. والله حبابات البنات ما يحجن شي .. اصلاً هنة اصرن الا اجي معتبراتني منهن ..

هز ايدة وسكت .. هو هذا حارث دوم هيج يتحرش بية بالحجي ويحب يعصبني ..

وصلني لبيتهم ومشة گال رايح لبيت جدو ..
دگيت الباب وطلعلي اخو هويدة رياض ..
شافني وابتسم وفتحلي الباب حتى ادخل : يا حي الله بت هويدة ..

هزيت راسي وابتسمت : شكراً خالو ..
باوع وراي : ياهو الجابج ..
حجيت بهدوء لان ممتعودة احجي وياه بس هوة يسولف ماكدر اعوفة وامشي عيب : حارث وصلني وراح .. اجيت عالبنات ..

ابتسم : اتفضلي يابة اتفضلي ..
دخلت من باب المطبخ وهو دخل للديوانية ..
لگيت ام عجاج تشتغل بالمطبخ سلمت عليهة كالت البنات ينتضروني بالصالة ..

رحت للصالة واشوف البنات حنين وبراء واسماء لابسات عباياتهن ومبدلات وگاعدات ..

حنين : واخييييراً .. جنة منتضرينج حتى نروح ..
سلمت عليهن وباوعتلهة : وين نروح ؟؟
براء : لبيت خالتي ام عامر .. شبيج مو البارحة گالت ليلى ان العزيمة ابيتهم ..

هزيت راسي : اي گالت بس راح من بالي ان هي مو هنا بيتهم .. يعني عبالي هنا ..
اسماء : يلة لا نتأخر على عمو رياض ..

طبگت حواجبي : لحضة عمو رياض شنو ؟؟
اسماء : اي لعد منو يوصلنة .. هو اليوم عندة اجازة .. وگلنالة گال اوصلجن ..

ريم : لا عفية استحي منة .. شنو اصعد وياه ..
حنين سحبتني من ايدي : دمشششي هو هم خالج ..

دگت الباب وهو طلعلهن : يلة خلصتن ..
حنين : اي خلصنة .. يلة نطلع ..

طلع گدامنة وشغل السيارة واني مدنگة وامشي ..
حنين فتحت الباب تريد تگعد گدام هو خزرهة : براء الجبيرة هي تگعد كدام ..

حنين تأففت وصعدت ليورة .. وبراء ليگدام ..
حرك السيارة ..

زمن //

لازمة بيدي ماعون الشوربة وگدامي رضا اوكلة ..
گاعدة عمتي وجيلان وديللارا ..

دخل عاصم .. بس شفتة ذبيت الماعون وگمت من الصالة والبنات يباوعلي ..
دخلت للغرفة واني اتذكر البارحة من شفتة بالمطبخ .. جمن گاعدة اعزل بالمطبخ وحدي ..  وهو اجة ..

هم نفس الشي من شفتة گمت اريد اطلع ..
حجة : ما تگدرين تباوعين بوجهي .. انتي نفسج شايفة تصرفج خطأ من ضميتي عني بناتي ..

التفتتلة وحجيت بسخرية : انت صدگ هيج تفكر هسة .. معتبرني مخطئة .. وعبالك خجلانة ما اگدر اباوع بوجهك ..

طابك حواجبة : اي واكبر غلط السويتي .. حرمتي اب من بناتة .. وين اكو اب ٢٢ سنة ما يدري عندة بنات .. كبرتيهن بعيد عني ..

غورگت عيوني : معتبر السويتة غلط .. ليش وانت شنو تعتبر نفسك .. مو هم حرمت ام من بنتهة .. عالاقل انت ما جنت تدري اصلاً عن وجودهن الا اني الي جنت اتحسر على شوفتهة واشم بهدومهة واباوع بصورهة بس ماكدر اشوفهة طول هالسنين ..

رفعت راسي وحجيت : اني مغلطانة .. واذا يرجع وينعاد الزمن هم اسوي نفس الشي وما اگلك على بناتك .. ومن ما جاي اباوع بوجهك ترة هذا مو خجل .. بس نفسيتي ما جاي تتقبل شوفتك ..

وجهة صار احمر وطبگ حواجبة بعصبية : يعني گارهتني ؟؟

رفعت اكتافي : وليش لا ؟؟ انت تدري شسويت بية ؟؟
ضلمتني .. شكيت بية .. ضربتني .. حرمتني من بنتي .. اخذتهة من حضني وطردتني .. فوگ كل هذا وتسألني كارهتني ؟؟

نزلت دموعي وارتخى صوتي : انت حتى من بعد ما عرفت حقيقتي وعرفت مالي ذنب بشي ما فكرت ابد ان تجي تعتذر او تصلح خطأك ..

دار وجهة ما يباوعلي : شلون تردين اجي وانتي موديتلي طارش تگولين خل يطلگني لان اريد اتزوج ..

رصيت على سنوني : شفت شلون ثقتك جانت معدومة بية .. لو جان عندك ثقة ولو شوية بية ما جان صدگت اني اتزوج غيرك .. بس انتة ما گلت باطل وگبل رحت للمحكمة انطيت موافقتك عالطلاگ ..

بقيت عايشة لبناتي .. وما فكرت ولا لحضة اني اتزوج ..
اي حرمتك منهن .. وجنت كل يوم احمد الله على الي سويتة وما گتلك عليهن ..

بكل مرة اسمع حجي عمي على معاملة نعمة لمريم واگول همزين ما گتلك على بناتي ..
ولا جان اخذتهن مني وخليتهن تلاثتهن جوة ايد نعمة وجان مصيرهن هسة مثل مريم .. مزوجهن بعمر زغار وصايرات امهات وهنة مراهقات ..

حجيت بسخرية : هذا انت .. مستقوي .. بس نعمة متگدرلهة ..

واكبر دليل انك ماگدرت توگفهة عند حدهة واختاريت طريق الهروب وزوجت مريم حتى تبعدهة عنهة .. نعمة هي المتحكمة بيك ..

عيونة حمر ووجهة احمر من العصبية ..
جرني من زندي وحجة : محد يگدر يتحكم بية لا نعمة ولا غيرهة .. وازني حجيج ..

طبگت حواجبي : اوازن حجيي ها .. تذكر اني شسويت عاصم .. عفت مدينتي ودراستي وبيتي واجيت وياك وتزوجتك مع ان عاداتك مو مثل عاداتي بكلشي مختلفين .. رغم هالشي گلت يحبني وهالشي يكفيني حتلو متزوج ..

تذكر من جبتني لهنا شگالت نعمة ..
گالت هاي اني وهذا انت يعاصم اذا خليتك تتهنى وياهة .. والله لاخليك تسحلهة وتشمرهة بالشارع بيدك والله ..

وما مر غير ٣ سنوات وشصار بعدهة ها ..
نزلت دموعي : سويت الگالتة .. سحبتني من بيتك واخذت بتي مني ..

نفضت ايدي منة : وهسة تگلي وازني حجيج مو ..
روح راجع نفسك بالاول ولا تلوم احد على اغلاط انت مرتكب اضعافهة وانت سببهة ..

عفتة وطلعت من المطبخ ..

فزيت على صوت الباب الي يندگ ..
مسحت دمعتي بسرعة ..
فتحت الباب شفت مريم ..

ابتسمت : ها مريومة ..
مريم : احم .. انتي بخير ؟
استغربت : ها ؟؟

مريم : يعني اسأل لان البارحة شفت عيونج حمر وهسة گاعدة وحدج بالغرفة .. محتاجة شي ؟؟
هزيت راسي : لا شكراً حبيبتي ما بية شي بس تعبانة شوية ..

هزت راسهة ودارت وجهة ومشت ..
تنهدت واني احس اكو شي يمنعني عنهة ..
من جانت بعيدة عني جنت احسب الايام يوم يوم وساعة ساعة حتى اشوفهة بس من شفتهة حسيت مشاعري تبخرت مادري ليش .. ولحد هسة ..

طلعت من الغرفة .. رحت للمطبخ شفت ديلارا ..
زمن : ديلارا ماما وين جيلان ..
ديلارا : ماما اتوقع نايمة لان لهسة ما شفتهة ..

استغربت : نايمة لهسة الساعة ١١ ونص .. امشي روحي گعديهة واذا ما گعدت اني اجيهة ..

گامت ديلارا تگعد جيلان ..
بهاي الاثناس واسمع صوت طلقات سلاح ومبينة قريبة .. يا ساتر ..

رحت للصالة لگيت عمتي ومريم  ..

عمتي : شنهي هاي .. استر يربي ..
زمن : شكو عمة شصاير .. شنو هذا الصوت ..

دخل حارث وعاصم مستعجلين ..
عاصم راح لغرفة ابوه وحارث واگف ينتضرة ..

مريم : حارث فهمونة شكو .. شنو هذا الطلق ..
حارث : عركة صايرة برة .. وصار بيهة سلاح .. انشالله ماكو شي ..

مريم : شلون سلاح وشلون ماكو شي .. فدوة لا تطلعون ..

دخلت ديلارا بسرعة : ماما جيلان ماكو .. دورتهة بالغرف كلهة حتى بالطابق الفوگ ماكو ..

رضا حجة وهو لازم ايد امة : خالة جلاتين لبست عبايتهة وطلعت .. گتلهة خل اطلع وياج بس ما قبلت ..

لطمت على صدري : وييين طلعت .. وين راحت بنتي بهالهوسة ..
حارث فتح الباب وانرگع بالحايط من قوتة وطلع ..

گعدت اني بالگاع الطم : يممة راحت بتي .. هسة تنضرب .. هسة يصير بيهة شي بهالهوسة ..

مريم ركضت لابوهة تگلة على جيلان وهو طلع يصيح وبسرعة ..
بقيت املخ بروحي لحد ما الدنيا اسودت بعيوني ..

الكاتبة : سارة الشمري 🖤

هلو حبايبي شلونكم . توقعاتكم عالسريع ..
انشالله حبيتو البارت .. لا تنسون صوتو وعلقو وكلشي ينداس دوسو ..