رواية بنات للزمن الفصل الثامن عشر 18 - بقلم سارة الشمري

الكاتبة : سارة الشمري✍🏻

أريد أعلن حداد وللعشك ماعود
وأريد أنساك ونسى البينك وبيني
وشك دفتر غرامك خاطر إنه أنساك
ودير الوجه عنك من تلاكيني
ما ريدك بعد لو أنت روحي اتصير
وما ريدك لون من موت تحييني
ملح بعيوني أحطن وانسى حتى النوم
أخافن بالمنام طيوفك تجييني
إذا شافتك عيني وفرحت بملكاك
والله أتبرّى منه وهاي مو عيني

حارث //

طلعت اركض مثل المخبل ..
وين راحت بهالهوسة ..

طلعت اركض بالشارع واتلفت .. الناس مخبوصة بالعركة بين ثنين ولد بالگهوة وجاية الشرطة يردون يفاككونهم وضاربين بالسلاح ..

اووف منج جيلان وين رحتي .. الا تطلعين اليوم .. بس خل الزمج ..

ربي دخيلك كون ما صاير بيهة شي بهالهوسة ..؟خابرت عالبيت سألت خاف راجعة بس گالن ماكو ..

اسألمن عليهة بلة العالم ملتهية بالعركة ..
افتريت الشوارع اليم بيتنة بس ماكو ..

خابرت گلت لمريم تنطي التليفون لرضا احاجيه ....
رضا : ها عمو ..
حجيت بهدوء حتى لا اخوفة : رضا حبيبي انت من شفت عمة جيلان شگالتلك ؟ يعني ما گالت وين رايحة ؟

رضا : اي گالت رايحة اشتري من المحل بسكت ابو الولد وككواية عمار ..
سديت التليفون : والله دنعل ابو الولد لابو عمار وياه ..

رحت ارگض لابو المحل الي بشارعنة : خير حارث بوية شبيك تركض ..
حجيت واني الهث : عمي هم اجتك بنية شابة لابسة عباية .. هيج بيضة وعيونهة كبار وطويلة ..

هز راسة : اي بوية اجت .. اني هم استغربت شكلهة وگتلهة منين انتي ما شايفج هنا گالت اني بت عاصم ابن حجي خضر .. يعني بت عمك ..

حجيت بلهفة : اي عمي وين راحت .. من شوكت طلعت ..

طبگ حواجبة : عمي طلعت من زمان صارلهة تقريباً ساعة لو اكثر .. رادت بسكت ابو الولد بس گتلهة ما عندي وسألت اذا اكو محل ثاني وگتلهة اكو محل بس بعيد شوية گالت ميخالف .. وصفتلهة الطريق وهي مشت ..

تشكرت منة وطلعت ادور عالمحل الثاني واني عصبيتي عامية عيوني .. خايف عليهة لا واحد متعرضلهة .. شلون تطلع وحدهة بدون متگول لاحد ..

دورت عالمحل من وصلت وسألت گالو اشترت وطلعت من زمان ..
اجيت اتخبل وامشي واصيح : والله لو الگاج ..

رجعت اركض واتلفت بلكت اشوفهة تمر ..
وفعلاً شفتهة من بعيد تمشي وشايلة بيدهة علاگة وبيدهة الثانية باكيت بسكت وتاكل ..

ما صدگت عيوني ورحت ركض عليهة .. : ربي الحمدالله والشكر مابيهة شي ..
هي شافتني جاي عليهة استغربت : حارث ؟

جريتهة من زندهة وعطت بيهة : ويين جنتي .. شلون تطلعين بدون محد يدري ..
طبگت حواجبهة وتتلفت بالشارع : حارث منا العالم .. نزل ايدك ..

ضغطت على ايدهة بالزايد : وج يا عالم .. تدرين قطرة دم ما بقت بية .. فريت الشوارع ادور عليج .. ويييين جنتي ..

جيلان : حارث ايدي اذيتني .. والله طلعت اشتري شبيك ..
حارث : وج طالعة تشترين بسكت صخام وامج بلبيت مگطعة روحهة ..

فتحت عيونهة : امي .. والله طلعت اشتري وملگيت الي اريدة هنا واجيت لهذا المحل .. من رجعت شفت سيارات شرطة تفتر هنا .. خفت امر من يمهم .. لگيت كرسي جوة ذيج الشجرة وگعدت .. من راحت الهوسة اجيت ..

حارث : هي هاي عملة .. شلون تطلعين بدون ما تگولين ..
سحبتهة وامشي بيهة للبيت وهي تحجي : شمدريني ما خطرلي .. گعدت من النوم ما اشتهي الاكل المسوينة .. وطلعت اشتري .. يلة ماصار شي ..

نترت بيهة : ادور اتگلي ما صار شي .. وج البيت انگلب عليج حتى ابوج طلع يدور ومخابر الولد ..

جيلان : اييي افتهمت فكني اگدر امشي وحدي راح تطيحني .. على اساس العباية ما مكفية ..
ما اهتميت بحجيهة واجر بيهة ..

وصلتهة للبيت ودفعتهة : امشي جوة .. رجلج اكسرهة بعد اذا عتبت الباب ..
جيلان : اووووي ايدي شبيك ..

عطت بيهة : وجعوووي .. امشي جوة ..
طلعت مريم على صوتنة : جيلان ..

ركضت حضنتهة وجيلان طابگة حواجبهة ..
مريم تبجي : وين جنتي انتي .. مو گلوبنة راحت .. شلون تطلعين بدون محد يدري ..

جيلان دخلت : اهووو لا تسوونهة سالفة شكبرهة .. طلعت اشتري .. شصار يعني ..

عفتهة وطلعت من البيت صعدت سيارتي ..
وحركتهة ..
مشيت مدري شگد .. وگفت السيارة على جهة ..

رجعت راسي عالكشن .. التقط انفاسي ..
رفعت ايدية بعدهن يرجفن ..
فركت وجهي وونزلت ايدي اتحسس گلبي الي يدگ بشكل مو طبيعي ..

شلون هيج خفت عليهة .. روحي رادت تطلع ..
شوية واتخبل ..
فكرة ان صاير بيهة شي خلتني مثل المخبل ..

اني جنت اگول معجب بيهة بس ..
بس هذا كلة مو بس اعجاب .. هذا حب ..
احبهة .. اي احب جيلان ..

ابتسمت حسيت براحة من اعترفت لنفسي بهالشي ..

مريم //

دخلت جيلان للصالة حبوبتي من شافتهة گامت بلهفة ..: ويين جنتي ولج .. وعلي مال واحد يحش رجولج حش ..

جيلان : بيبي والله اسفة مو قصدي .. بس ما عبالي هيج تخافون .. من جنة بأربيل عادي اطلع اشتري بدون ما اگول لامي ..

حبوبتي ضربة على رجلهة بعصتها : وعبالج هنا مثل اربيل ..
وگفت گدامهة : جدة على كيفج ..

اجت ديلارا من الغرفة وشهكت : جيلان ..
حضنتهة وتبجي : خوفتينة عليج .. والله لو ما رضا گال راحت تشتري جان عبالنة مخطوفة ..

طلعت امي من الغرفة ووجهة مصوفر ..
من شافت جيلان اجت عالسريع ..
ضربتهة راشدي طيحتهة بالكاع ..

جيلان حطيت ايدهة على خدهة واني شهگت ..
جيلان باوعتلهة وعيونهة مغورگة : ماما ..

امي گعدت يمهة وسحبتهة لحضنهة وگامت تبجي : شلون هيج تسوين بية .. واني عبالي نايمة .. جم مرة كتلجن ماكو طلعة الا لمن تگللي ..

جيلان : اسفة ماما والله نسيت .. مو بقصدي ازعلج واقلقج .. گلت اروح عالسريع هو المحل بهذا الشارع ..

دخل بابا للبيت ووراه جبران وهادي ورضوان ..
هادي عاط بيهة : وييييين جنتي ؟؟
جبران بنفس النبرة : وعلي مال الزمج حضج اطيحة هسة ..

بابا عاط بيهم : كافي انت وياه ..
جيلان گامت من بعد ما طلعت امي من الصالة ..
لزمهة بابا من خدهة وحجة بلهفة : ما بيج شي ؟ خاف احد اذاج ..

جيلان بجت وحضنتة : كلهة تصيح علية .. هو اني بس طلعت اشتري والله .. من شفت الهوسة بقيت گاعدة لحد ماراحو الشرطة ..

اجيت وحارث الطريق كلة مسح بية الگاع بالصياح .. وامي ضربتني وححبوبتي رزلتني وضربتني بالعصا .. وهسة الولد يصيحون علية .. طلعوهة زقوم علية ..

ابوي حاضنهة ويبوس بشعرهة : كافي بابا كافي .. وانة اگول جيلان قوية .. من خوفهم عليج يصيحون .. قابل شعدهم وياج .. بس غير صايرة عركة برة وصارت بالسلاح وخفنة يصيبج شي ..

وخرت وتمسح بدموعهة : مو شفتوني مابية شي .. ليش تصيحون بعد ..
جبران راص على سنونة : فوگاهة هي الما راضية ..

ابوي خزرة : جبررااان ..
جبران : يابة شني والله جسمي لهسة يرجف من الخوف .. كلت هايهية اجتهة طلقة تايهة ..
هادي : مرة ثانية لو ردتي تطلعين گلي لواحد منة .. مو تتصرفين من كيفج ..

جيلان دارت وجهة وطلعت زعلانة ..
ابوي طلع وهمة وراه ..
شلت علاگة جيلان واخذتهة الهة وهي ما رضت تاخذهة ..

جانت عدنة مثل سقيفة بالسطح ومرات نگعد بيهة ..
صعدت جيلان گعدت بيهة وزعلانة ..

صارت الساعة ب ١٢ ونص ..
صبينة الغدة ..
اجو الولد هادي وجبران ..
هادي : صيحي جيلان خل تتغدة ..

مريم : جيلان معتكفة بنفسهة فوگ بالسطح .. وزعلانة .. حتى البسكت ما قبلت تاخذة ..

هادي ابتسم وگام : صبيلنة الغدة بصينية خل احنة نصعد يمهة ..
گمت بسرعة حضرت الاكل بالصينية على گدنة ..

شالهة هادي وگمنة وياه اني وجبران وديلارا ..
صعد للسطح هي بس شافتهم دارت وجهة وطابگة حواجبهة زعلانة وتحجي بالتليفون : ريما احجي وياج بعدين ..

سدت التليفون من ريم ..
هادي حط الصينية گدامهة : محد فتح نفسي عالغدا ..
جبران : گاعدة هنا وهايفتلي ذني الثنين گدامي .. الله يرضاهة ..

هادي مرر اصابعة على خدهة الاحمر من راشدي امي : جلاتينة والله من خوفنة عليج صيحنة .. انتي ما شفتي شصار بينة ..

جبران طلع البسكت مالتهة وياكل منة : وانتي معتبرتهة سالفة هينة وطالعة علمود بسكت ..

جيلان سحبتة من ايدة : جيييبة .. مو حصلت رزالة وراشدي ادور ما احصل البسكت ..

هادي : يلة جلاتينة عوفي الزعل وتغدي ويانة ..
جيلان دارت وجهة : ماريد ..

جبران شال الماعون مال التبسي : تبسي سمج من ايد مريم بس ريحتة تسطر ..
نزل الماعون وشال ماعون المرگ مال البامية ويشم بي : مرگة بامية ووياهة ضلوع مال لحم ..

ابتسمت : ووياهة ثوم هم ..
جيلان تباوعلنة بطرف عينهة ..
ديلارا ضحكت وطلعت من العلاگة البيدههة قواطي الشاني ووزعتهن علينة : وقواطي شاني ..

جيلان فتحت عيونهة : خييييير منو گلج صيري كريمة ووزعي القواطي مالتي .. اني مو داحستهن ورة صندوگ الطماطة الي بالثلاجة ..

هادي ضحك وخرب شعرهة وجر راسهة لحضنة وباسة : وج جلاتينة والله ما يلوگلج الزعل .. طلعي لسانج طلعي ..

ضحكت جيلان : اصلاً ما زعلانة بس اتغلا .. وگلت اخلص مكالمة وية ريم وانزل اتغدى ..
جبران ضحك : جنج فتون بمسلسل الحيالة .. گاعدة بالسطح وزعلانة ..

جيلان : اي صدك عوزني بس نرگيلة وكرزات ..
هادي ضربهة على راسهة : قليلة الادب ..
جيلان باوعتلة صفح : وانت مانع ..
اشرت على جبران : وهذا دواس ابو النسوان ..

باوعتلي وضحكت : وانتي حكيمة وهاي خطر ..
ديلارا ضربتهة : خطر بعينج ..

جبران : كاافي خل نتغدة متت من الجوع ..
گعدنة نتغدة وكلساع يقلدون على جيلان ..

خلصنة غدة ونزلنة كلنة ..
جيلان راحت اعتذرت من امي ..

كعدنة بالصالة شوية واجة راسم وصعد فوك ..
حبوبتي باوعتلي : گومي ورة رجلج شوفي خاف ما متغدي ..

هزيت راسي وحطيت الاستكان عالطبلة ..
جيلان كاعدة يمي همست : گومي عيني جولييت .. خوب ما صدگتي ..
شلت المخدة مال القنفة وضربتهة على راسهة ..

راسم //

صعدت للغرفة بدلت ملابسي ..
بلشت اموري تستقر من فتحت العيادة ..
واليوم اول يوم داومت بيهة ..

بعدني محد يعرفني بيهة ..
طلعت من وكت ورحت للمعمل الثاني اليشتغل بي حارث ..
ما لگيت حارث بس عامر من شافني گال عازمك عالغدة ما گدرت اخجلة وطلب اكل من المطعم وجابوه وتغدينة بالمكتب ..

من دخلت للغرفة شفت الشال مال مريم على كرسي المراية ..
ابتسمت وتذكرت البارحة وكبسة جيلان وواضح ان فهمت الموضوع غلط ..

بوقتهة جنت متعمد اتأخر واني اوخر العلج ..
انتبهت لتوترهة من تقربت منهة .. ورجفتهة من نزل المي على رگبتهة ..

قطع تفكيري دخولهة للغرفة ..
باوعتلي وحجت بهدوء وهي تشيل ملابسي الي ذبيتهن هسة : اجيبلك غدا ..
هزيت راسي : لا تغديت برة ..

ما حجت شي ..
اني تذكرت وسألت : مريم ..
رفعت راسهة : ها ؟

سألت بدون مقدمات : ضياء ليش ما جان يعامل رضا بطريقة زينة .. ليش يضربة ؟
تحولت ملامحهة للصدمة ..

حجت بتوتر وهي تبعد عيونهة وتلهي نفسهة بالملابس : لا جذب ماكو هيج شي منو گال ..
طبگت حواجبي : رضا گال .. گال مرة ضربني ومن بجيت گام يبجي وياي .. شنو هالموضوع هذا مريم ..

مريم : موضوع شنو راسم .. عادي يعني .. هو ابو ومن شافة تصرف خطأ راد يعاقبة .. وجان يجي تعبان من الشغل مالة خلگ سوالف .. بهالسبب رضا جان يخاف منة ..

رفعت حاجبي ما مقتنع بكلامهة : متأكدة بس هيج ..
هزت راسهة بتوتر : اي متأكدة قابل اجذب عليك ..

گمت تقربت منهة وهي واگفة ..
حجيت بهدوء ونزلت راسي عليهة وحطيت ايدي جوة حنجهة ورفعت راسهة وحطيت عيني بعينهة : حطي عينج بعيني ليش تتهربين ..

باوعتلي وبلعت ريگهة وحجت متوترة : ما .. ما اتهرب ..
ابتسمت : مريم انتي ما تعرفين تجذبين .. اذا جذبتي بشي يبين عليج بعيونج .. يعني مفضوحة ..

غورگت عيونهة .. ارتخت اعصابي وكل تركيزي صار بس على عيونهة ..
صارت اشبه بالبحر الازرك .. ما شايف واحد من يبجي عيونة تصير حلوة .. لونهن ازرك فاتح وكبار ..

نزلت دموعهة وحجت وشفتهة ترجف : ضياء ما جان يكره رضا .. ليش متصدگني ..
حطيت اصبعي الابهام على شفتهة : ششش .. لا تبجين .. عيونج احلا وهنة يضحكن ..

تباوعلي ورمشت مرتين ..
مررت اصابعي على حواجبهة وهي غمضت ..
نزلت بأصابعي على جفنهة الواسع ..
ايديهة ترجف ..

تقربت من جفنهة وبستة بخفة وهي رجفت ومغمضة ..
رفعت شفتي وحطيتهة على گصتهة وبستهة ..
اخذت نفس قوي واشم عطرهة الي ياما تمنيت قبل تكون حلالي واتنفس عطرهة ..

وخرت وهي فتحت عيونهة ورمشت وحجت برجفة وتريد توخر : راسم شجاي تسوي ..
وخرت وانتبهت لنفسي : اسف .. ما تحملت اشوف دموعج .. اخذج عهد على جدي ان ما انزل دموعج ..

هزت راسهة وطلعت من الغرفة ..
فركت وجهي .. شبيك راسم شجاي تسوي .. شتگول عليك هسة ..
ربي امتحانك صعب .. احبهة واعشگهة بس ماريد اجبرهة على شي واخليهة تكرهني ..

حارث //

عباس مگابلني وگاعد ..
حارث : شبيك فاتح حلكك ..
عباس هز ايدة : خوية والله سالفة ما تطب بالمخ .. حارث يحب .. جاي احاول استوعب .. بس مو گادر ..

ضحكت : ليش شگالولك علية ..
عباس : والله محد گالي .. انة احجي شوف عيني .. انتة مية وحدة رقمت وولا مرة اجيت وگلت منعجب بيهة ..

حارث : شسوي يخوي .. هاي مو مثل باقي البنات ..
عباس : والله باينتهة جارتك جر وما عاطيتك وجه وهالتركض وراهة انتة ..

ضحكت : انجب ولك .. شنو اركض وراهة ..
عباس : مو توك تگول فريت الشوارع كلهة ونفس ما ضال بية وخايف .. جا هذا شني مو رگض ..

سحبت نفس من جگارتي : اوووف لا تذكرني .. شسويت بيهة .. خلصتهة عليهة صياح ورزايل .. ادور التوت ايدهة من دخلتهة للبيت ..

عباس غمني : اهمداك اي والله .. انت ما شايف بالمسلسلات من تضيع حبيبتة شيسوي .. يروح ياخذهة بالاحضان وخايف عليهة وهي تحتمي بسدة .. مو انت خالس البت لو ضالة ضايعة ارحملهة من رزايلك ..

حارث : كششش فالك ما گبلناه .. انة من خوفني حاجيتهة هيج ..
عباس : طاحظك وحظ خوفك ..

اجتة رسالة على تليفونة وهو رفعة وابتسم وگام يكتب ..
ضحكت : بعدك على نفس البنية ..

باوعلي بعصبية : وما احاجي غيرهة .. عبالك انة مثلك انت وابن عمك يومية محاجي وحدة .. هاي وماخذة عگلي وگلبي .. وگتلهة اخطبج وهي اتگول اتخرج يلة ..

ابتسمتلة : على كيفك يابة الله يهنيك .. شبيك عصبت ..
دنگ يكمل مراسلة وية الي يحبهة وحتى ما يرضى يگول اسمهة ..

طلعت تليفوني ودزيت رسالة لجيلان : مساء الخير .. مشمش بعدهة زعلانة ؟
ورة شوية ردت : لا ما زعلانة .. صالحت الكل قابل بقت عليك ..

حارث : ليش منو مزعلج بعد ..
جيلان : اووو عبالك بس انتة مكبر السالفة .. حبوبتي ضربتني بالعصا .. وامي ضربتني راشدي لهسة طابع بخدي الاثر .. والولد رزلوني وصيحو علية ..

انقهرت عليهة .. : لا صدك .. وهسة شلونة خدج خو ما يوجعج ..
دزت سمايل (😒) : لا ايدي توجعني اكثر ..

عرفتة بسمار : عمي اسف وحقج علية .. بس خوفتيني عليج .. انتي ما شفتيني شلون افتر بالشوارع ادورج مثل المخبل ..

جيلان : يلة عادي ما صار شي .. اني هم ما جان لازم اطلع بدون محد يدري .. ما حطيت ابالي ..

ابتسمت : خوش تعلمتي درس ..
جيلان : لا مو معناهة بعد ما اطلع .. وهم اليوم عزمتني ريم ابيتكم .. ما اوصيك عود هم رزلني ..

ابتسمت : لا يابة شعندي مرزلج .. تردين امر عليج اجيبج لبيتنة ..
جيلان : لا مشكور .. جبران تبرع يوصلني لان بسمة تروح ويانة وهو ما فوت هالشي ..

انهيت المحادثة وية جيلان لان هذا الاغبر يريد يمشي واني جايبة بسيارتي ..
ضربتة : هسة هذا وكتك ..

يضحك علية .. وصلتة لبيتهم ومشيت للبيت ..
لگيت ريم وهويدة يحضرن انواع الاكلات ..

جيلان //

گاعدين بالصالة وفرحانين لفرحة جبران لان اخو بسمة رجع خبر الموافقة ..
هي عود اعتذرت متگدر تروح ويانة لريم عود تستحي وهالسوالف ..

حبوبتي باوعتلة : ويمتة تخطبهة .. دير بالك تطولهة ..
جبران : لا حبوبة .. ابوي گال هاي الجمعة العقد .. يعني بعد ٥ ايام ..

حبوبتي : اي خوش .. گومن انتي وياهة ..
احنة استغربنة : وين بيبي ..
حبوبتي : اخوجن وراح يخطب .. ثوبجن الاسود بعد المن لابساتة .. يلة كومن غيرن ثيابجن والبسن الوان ..

مريم : لا بيبي ما اذبة ..
حبوبتي خزرتهة : انتي اول وحدة تذبينة .. ما يصلح على رجلج .. ما شايفة وحدة اول ليلة وية رجلهة لابسة اسود .. كووووومي ..

مريم : حبوبة ابيش زاعجج الاسود ..؟؟
حبوبتي : انتي ابيش فايدج الاسود .. راح يرد جدج اذا ضليتي لابستة .. ما يجيب بس النحس والخنگة ..

التفتت علينة : وانتن عليش ضالات .. گومن يلة بدلن .. وباجر تنزلن للسوگ تشترن ثياب لخطبة اخوجن و تاخذلجن جم ثوب حلوات تلبسنهن بالبيت ..

گمنة فعلاً ذبينة الاسود لان صدك ميفيد بشي ..
بدلت ملابسي حتى نروح لبيت عمي ضافر ..

طلعت واني لافة حجابي ..
مريم وديلارا هم بدلن .. مريم طلع شكلهة من لبست الوان لان هي حلوة اصلاً ماشالله ..

بعدنة ما طالعين ومنتضرين جبران ..
وجان تدخل علينة مرت عمي حافظ (ام راسم)

دخلت تصيح : وينهة وينهة ام الزلم السحارة هي وبناتهة ..
حبوبتي عاطت بيهة : خايبة وككرص .. شعندج تتصايحين جنج هايشة ترغي ..

باوعت لامي الطلعت على صياحهة : شوووفي ولج .. مو بتج الجبيرة موتت ابني واخذت الثاني وسكتتلج .. وهسة رادة ابتج الثانية تردين تحطينهة برگبة ابني .. والله ما اخليهة ..

فكيت عيوني .. هاي شبيهة شتحجي ؟

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤
يابة اعذروني عالتأخير بس والله مطر كلش قوي يمنة والكهرباء طافية وماكو نت .. هسة يلة اشتغلت ونزلتلكم البارت ..

احبكم .. ولا تنسون صوتو وعلقو وكلشي ينداس دوسو .. ❤️