رواية بنات للزمن الفصل السابع والعشرون 27 - بقلم سارة الشمري

الكاتبة : سارة الشمري🖤

اذا صاير شمس انه ابقه دوم بليل
وما ريد الضوة وبلظلمه خليني
تذكرمن لكيتك والعطش واليك
وكلتلي امعود اترجاك روييني
عصرت اجفون عيني وشلييت دموع
وشربتك بديه وانت تدرييني
ومن مرني العطش صرت انت جربة ماي
كصدتك معتني ومديت جفيني
وانت بكل وكاحة وكل صلافة عين
درت بجفوفي سم وردت تنهيني

حارث //

خابرني راسم گال انتضرك بالمعمل ..
رحت للمعمل ..

بالطريق دگ علية رقم غريب ..
فتحت خط : الو ..
اجاني صوت بنية : حاارث فدوة لا تسد التليفون .. اني طيبة ..

طبگت حواجبي : طيبة منو ؟؟
طيبة : هاي شبيك حارث صدك نسيتني .. مو جنت تحبني ..
تأففت بداخلي : لا حب ولا بطيخ .. كلشي راح بوقتة .. وهسة ما فارغ لهاي السوالف .. الله وياج ..

طيبة : شنو ما فارغ .. حارث شنو نسيتني ..
حارث : والله تردين الصدك حتى ما اتذكرج منو انتي .. وهسة يبنت الناس اكلج انسيني وانة هسة احب وحدة وعفت هالسوالف ..

هي عاطت : شنو تحب .. واني شنو جنت لعبة عندك حارث .. والله ابتلي بيك ..
حديت صوتي : لا تصيحين وولي يلة .. ما تهميني ..

سديت الخط بوجهة .. هي هاي العايزة .. ما ناقصني غيرج .. طيبة مدري منو ..

عندي مشمش مالية گلبي .. شصخم بيجن ..
طلعت تليفوني وكتبتلهة (احبج) ..

وصلت للمعمل لگيت راسم ينتضرني ..
كعدت اني وياه بالمكتب ..

راسم : وين جنت ؟ ليش ما جاي اليوم للمعمل ..
هزيت راسي وطلعت جگارة وشغلتهة : هويدة تخربطت واخذتهة للدكتورة ..

راسم : خير شبيهة ..
ابتسمت : انت توقع ؟
رفع حاجبة ..
حارث : هويدة حامل .. وما تتخيل الفرحة الي بعين ريما ..

راسم ضحك : اووو بالعافية .. الله يسهللهة ..
ابتسمتلة : يوم الك ..
تنهد وسكت ..
رفعت حاجبي : ها شبيك ؟

راسم : خليهة على ربك ..
حارث : ليش ما حاولت وياهة ؟؟
جر حسرة : ما خليت شي ما سويتة حتى بينتلهة حبي بأكثر من طريقة .. بس هي تتهرب مني ..يعني كل ما شافتني احاول اتقرب منهة هي تطلع وتعوفني وتتحجج بشغلات تافهة ..

باوعتلة واني اسحب نفس من جگارتي : لا تجبرهة على شي .. خليهة براحتهة لحد ما تبدي تتقبلك شوية شوية ..
هز راسة : الله كريم ..

ضلينة نسولف .. وراهة اجة عامر وگعد يمنة ..
شربنة جاي ..
مر تقريباً ساعة ..

بعدنة على گعدتنة و نسمع صوت رصاص برة ..
گمنة بسرعة وطلعنة نرگض ..
طلعت واشوف واحد لازم بيدة السلاح ويصيح : حااارث ويين ؟؟

وگفت گدامة : خيييير .. شهالهوسة هاي .. وين داخل انت .. شتريد ؟
وجه السلاح علية : الي اسمة حارث ويينة جاوبوني ..

عامر : اول شي ذب سلاحك وهاي السوالف مال المزعطة عوفهة .. وبعدين احجي انت منو ؟؟ وشتريد من حارث ..

راسم : ماكو شي ينحل بالسلاح .. عوفة من ايدك وافهمنة السالفة ..
عاط بيهم : لحد يتدخل .. جاوبوني .. منو بيكم حارث ؟؟؟

طبگت حواجبي : انة حارث ..
وجه السلاح علية وعيونة احتدت : انت حارث مو .. اليوم اطلع بروحك اليوم ..

ردت اهجم علي بس لزمني راسم : وييين اوگف ..
حارث : وخررر راسم خل اشوفة يطلع بروح منو .. هالزعطوط هذا يهددني ..

عامر تقدم منة خطوتين : نزززل سلاحك .. وفهمنة شتريد ؟؟

الي بالمعمل كلهم طلعو برة وراسم گاللهم لحد يتدخل ..

نتر : اريد اطلع بروح هذا .. ضاحك على بت عمي وخطيبتي وگايللهة احبج .. واليوم سمعتهة تحجي وياه وهو سد التليفون بوجهة .. ومن هددتهة يلة گالت اسمة الكامل وعرفتة حفيد حجي خضر ..

دفعت راسم وتوجهت علي : لك ابن الـ.. اذا انت ما تگدر تلزم خطيبتك اني شعلية ..
صار بوجهي عامر ولزمني حجة بصوت ناصي : حااارث هذا مبين مو صاحي .. خل اجرة بالحجي واخذ سلاحة منة .. ولا ترة والله تطلع طلقة تايهة ولو تجي بيك لو بغيرك ..

ادفعة اريد اوخرة : انيي مو صاحي اكثر منة .. وخر عاامر ..
راسم اجة سحلني ورجعني ليورة ..
نترت : ولك الجبان بيك خير ذب السلاح وتعال واجهني بعضلاتك مو مستقوي بقطعة حديد ..

: ليش اتعب روحي .. طلقة وحدة اطلع روحك بيهة .. الناس تحلف بيكم وبكرمكم واخلاقكم .. طلع كلة جذب وخريط .. من جدك خضر والك ..

ردت اهجم علي بس عامر رفس ايدة الي بيهة السلاح وطيح السلاح بالكاع وراح بعيد عنة ..
انطاه بوكس بوجهة طيحة بالگاع : ولك انت مو مال عيني واغاتي .. مو انت التحجي بأخلاق حجي خضر ..

هو گمز بسرعة وسحب سجينة من جيبة ..
عامر ضحك بسخرية : جبان ما ترد ضربتك بالمثل ..

هو باوع لعامر وهجم علي يريد يضربة ..
عامر دفعة وطاح يم رجلية اني وراسم الي لازمني ..

گام هو ورفع السجينة علية يريد يضربني وراسم دفعني بالگاع وسمعت صوت راسم فز بألم ..
باوعتلة بسرعة لازم صدرة : رااسم بيك شي ؟

هز راسة وطابگ حواجبة : شخطة سطحية لا تخاف ..
هو يباوعلنة بشر ..
هجمت علي ودفعتة بالگاع وضربتة جم بوكس بنص وجهة .. وجم رفسة ابطنة ..

لحد ما سحبني عامر من فوگة : كوووم كافي شبيك فقدت ..
باوعت لراسم قميصة كلة دم ولازم صدرة ..

رحتلة بسرعة : راسم شبيك ؟ امشي نروح للمستشفى ..
راسم : دوگف خل نشوف هذا .. لا يسوي شي ..

باوعتلة يتلوى بالگاع من الكتل ..
عامر : انتو روحو .. اني اتصرف وية هذا .. وهم الولد خابرو عالشرطة راح تجي تسحلة ..

سحبت راسم لسيارتي وهو جرحة ينزف حيل مبين عميق .. وهم بالعرض ..
قمصة انترس دم ..
وجهة صار اصفر ويفرك بعيونة ..

سحبت باكيت الكلنس وشگيتة واخذت صفطة وحطيتهة عالجرح : هاك لا تبقى لازمة بيدك ..
اخذة من ايدي وحطة على صدرة واباوعلة يسد بعيونة حيل ويرجع يفتحهن مثل الي عيونة مغوشة ويريد يركز ..

باوعت للكلنس صار عبارة عن دم كلة ..
سقت سريع للمستشفى واني اشوف حالتة ..
باوعتلة بقلق : راسم شتحس ؟؟
عيونة يفتحن ويغمضن : دايخ ..

وصلنة للمستشفى ..
رحت فتحت الباب الة ونزلتة ..
بس حط رجلة بالگاع ووكف ..

غمض عيونة وطاح من طولة ..
لزمتة بسرعة : راسم .. فتح عيونك .. وييينكم ؟؟
اجو مجموعة ولد شالوه ودخلناه للمستشفى ..

اخذوه للطوارئ ..
بقيت برة افتر لان طلعوني ..
الموبايل صارلة ساعة يدگ واني مو يمة ..

رفعت التليفون مكالمات من رضوان ومن جبران ومن ابوي .. واكثر المكالمات من مشمش ..
خابرت جبران وگتلة على اسم المستشفى وسديتة ..

ورة ربع ساعة دخلو كلهم ..
رضوان حجة ويرجف : وينة راسم .. شبي .. عامر گال انصاب بالسجينة ..
هزيت راسي : شخطة سطحية وهسة هو جوة .. لا تخاف مابي شي ..

عمي عاصم عاط بية : ارتاحيت هسة ؟ هاي تالي سوالف  المزعطة والفرة ورة النسوان .. ما تصيرلك جارة انت وما تبطل ..
هزيت راسي : عمي والله هاي السالفة من زمان ومو هسة ..

ابوي نتر بوجهي : اسكت لا تسمعني صوتك ..
تأففت وگعدت عالكرسي ..
جبران اجة گعد بصفي حط ايدة على جتفي : خو ما تأذيت انتة ؟؟
هزيت راسي : مابية شي .. همزين واحد منكم تذكر ..

دگ تليفوني وفعتة شفتة رقم عامر ..
گمت على جهة حاجيتة وطمنتة وهو گال هذا الولد صار بيد رياض ..

رجع دگ تليفوني شفتة رقم مشمش ..
باوعتلهم وابتعدت شوية عنهم ..
فتحت خط واجاني صوتهة اليرجف : حااارث وييينك ليش متجاوبني ؟ تأذيت مو ..

عصرني گلبي من نبرة صوتهة : يروحي ليش تبجين .. ما بية شي والله وما تأذيت حتى ..
گامت تبجي بالزايد : والله گلبي راد يوگف من الخوف .. عبالي صار بيك شي ..

ابتسمت : اسم الله على گلبج يبعد روحي .. هيج خايفة علية ..
عاطت هي : شوف شيحجي ؟ اگلة گلبي راد يوگف يگلي هيج خايفة علية ..

رجعت ضهري عالحايط : وليش خفتي ؟؟ اهمج يعني اني ؟؟
جيلان : حارث لا تستغبي يعني تدري انت شنو بالنسبة الي ..

طبگت حواجبي : لا ما ادري .. قابل اشم ايدي اني .. احجيهة انتي حتى اعرف ..
سكتت ثواني ..
شفتهة طولت : مشمش وياي ؟؟

ردت : اي وياك ..
تنهدت : دوم انشالله .. مشمش گوليهة وريحي گلبي ..
سكتت شوية ورجعت حجت : احبك حارث ..

جريت نفس : اووووف واخيييراً .. ولج انة اموت بيج واعشگج .. مشمشة گلبي ..
حسيت بضربة على رگبتي من ورة : اااخ ..
التفتت شفتة عباس : وكتة هذا الحجي هسة بنص المستشفى .. امشي الوادم طبت عد راسم وانت برة ..

سديت التليفون من جيلان والتفتتلة : تحمدلي بالسلامة بالاول .. گبل ضربت ..
ضرب على اكتافي حيل : كلشي مابيك .. جنك بغل ماشالله ..

دفعتة ومشيت : قل اعوذ برب الفلق ..
دخلنة يم راسم ..
باوعتلة ممدد والجرباية مرفوعة من يم ضهرة ..
وبدون قميص والشاش ملفوف حوالين كتفة وصدرة ..
وجهة اصفر ابتسم من شافني ..

گعدت گدامة : شسويت بية .. احد گالت ادفعني ..
راسم : الحمدالله اجت على هيج ومو اكثر ..
هزيت راسي : شگال الدكتور ؟ ليش فقدت وعيك ..

راسم : نزفت دم هواي وضغطي هبط .. والجرح خيطوه ٨غرز .. وگال يتأخر شوية يلة يلتأم لان عميق شوية ..

رضوان : ويمتة يطلعونك ؟؟
راسم : شني السالفة بس يخلص المغذي اطلع .. هو خياط .. قابل عملية ..

وفعلاً خلص المغذي .. بس اجة رياض ووياه جم واحد .. گعدو سألونة على الي صار يعني اجراءات طبيعية وهمة سجنوه لان تهجم علينة بالسلاح ..

خلصنة واخذنة راسم ورحنة للبيت ..

راسم //

رجعت للبيت .. الم بصدري ودوخة ..
دخلنة گعدنة بالديوانية لان ويانة عامر ورياض وعباس ..
بقو شوية وبعدين مشو ..

ساعدوني الولد واخذوني لغرفتي ..
شوية وطلعو ..
ثواني وراهم ودخلت مريم وجهة احمر وعيونة مورمة من البجي ..
طبگت حواجبي : مريومة شبيج ؟؟

اجت عالسريع گعدت يمي عالجرباية وايديهة حاوطت رگبتي وحطت راسهة على جتفي وگامت تشهگ ..
رفعت ايدية وحضنتهة : ليش ليش يروحي ليش البجي ..

حجت والكلمة گوة تطلع وبس تشهك : خفت والله .. ماريد يصير بيك شي .. ما اريد افقدك .. اذا صار بيك شي والله اموت ..

حضنتهة حيل : اسم الله عليج يروحي .. والله مابية شي .. جم غرزة وباجر عگبة يطيبن .. كلشي مابية وداعتج .. امسحي دموعج ولا توجعين گلبي ..

مسحت دموعهة ووخرت عني ..
باوعت لصدري : اني جنت حاضنتك وجرحك منا .. اذيتك والله ما انتبهت ..
قربتهة مني وبست گصتهة : انتي ما تأذيني .. انتي دوا لكل جروحي .. جروحي ما تطيب الا بوجودج ..

بلعت ريگهة ونزلت دمعة من عينهة ..
مسحتهة بأصبعي : هسة ليش هالدموع .. شحجيت اني ..
هزت راسهة وگامت : راح اجيبلك اكل .. جبران گال هبط ضغطة ونزف دم هواي .. يرادلك تغذية ..

طلعت وطبگت الباب ..
تنهدت .. بس لو افتهم ليش تتهربين مني ..
وخرت الغطا عني وگمت للحمام ..
غسلت ايدية من الدم ..

بللت الخاولي ومسحت صدري وبطني من الدم ..
دخلت راسي جوة المغسلة وغسلتة ..
نشفت شعري بالخاولي وطلعت ..
لبست بدي البيض وبجامة رصاصي ..

رجعت تمددت ..
انفتح الباب ومد راسة رضا ..
ابتسمتلة : تعال رضا ليش واگف هناك ..

اجة يمي وتقرب من الجرباية ..
گعدتة يمي : شبيك ضايج .. منو وياك ..
باوعلي : انت هم ردت تروح مثل بابا ؟؟
هزيت راسي : لا حبيبي ما بية شي .. جرح بسيط ..

رضا : بس ماما گامت تبجي حيل وتضرب بخدودهة .. وتسوي راح مني .. ولا يصير بي شي ..
اخذتة بحضني .. وافكر اذا مريم تحبني ليش هيج مبتعدة عني ؟؟

شوية ودخلت وبيدهة صينية الاكل ..
حطت الصينية عالطبلة وقربتهة مني ..

هستوني رفعت الخاشوگة اريد اكل من الشوربة وانفتح الباب حيل ..
دخلت امي تصيح : يمممة ابني يتصاوب ومحد يگلي .. هيج ولك يمة راسم ما تخابرني ..

راسم : يمة بس على كيفج والله مابية شي .. جرح بسيط ..
التفتت على مريم : كلة من وراح .. انتي فگر وبت فگر .. موتي ضياء وهسة رديتي على راسم ..

راسم : يممممة كافي .. هي هاي جيتج الاجيتيني بيها .. اني تعبان وانتي جاي تعاركين فوگ راسي على سوالف تافهـة .. الف مرة گتلج مريم لا تگولين عليهة فگر .. حرام تحجينهة والله هذا امر الله ..

باوعتلي ما عاجبهة كلامي : اييي يمة اشوفك گلبت على امك .. حتى بالجذب محد خابرني لا انت ولا اخوك وما كتولي انت منصاب ..

فركت وجهي : يمة اليسمعج ايگول صارلي شهر من انضربت .. هي قبل شوية ..
نترت بوجهي : والله لو ما نعمة مخابرتتي وگايلتلي جا حتى ما دريت .. وضليت بدون علم ..

راسم : يلة هسة شصار من دريتي .. اجيتي گلبي علية الدنيا وما خليتيني اتزقنب .. هسة ردت روحج مو ..

بقت شوية گاعدة يمي ومريم من البداية طلعت ..
ورة تقريباً نص ساعة مشت ..
تمددت اني اريد انام ودخلت مريم .. : هاي شنو راسم ؟

استغربت : شنو ؟
مريم : الجو بارد وانت لابس نص ردن ..
طلعت فانيلة ردانهة طويل ..
اني حركت فانيلتي العلية : اني هاي وميت من الحر .. رجعيهة ماريدهة ..

مريم : مو بكيفك .. والله الجو بي برودة .. ومو زين على جرحك ..
باوعتلهة : وج مريم اگلج حارة .. هاي اذا البسهة اختنگ ..

رضا ضحك : عمو البسهة ترة ماما تسويلك مثلي وتذبهة الك غصباً عليك وتلبسك هاي .. وتخليك تنام بدون ما تشوف التلفزيون عقاب الك ..

مريم : رضااااا .. ماما شهالحجي ..
ابتسمت : العقاب قوي .. حقة يخاف ..

مريم رفعت البدي الي بيدهة : هاك بدل ..
كتفت ايدية مثل حركة رضا من يطنگر ورفعت اكتافي بعناد : اماء ..

تحولت ملامحهة لضحكة : هاي شنو شهالحركات .. يلة راسم بلا عناد والله صدك احجي .. البرودة مو زينة على جرحك .. هاي وانت الدكتور ولازم بدون ماحجي تفتهم ..

باوعت لرضا شفتة يباوع عالتلفزيون وما منتبه النة ..
سحبتهة من ايدهة وقربتهة مني ..
همست يم اذنهة : ابدل بس بشرط .. تنامين بحضني اليوم .. وابقى اتنفس من شعرج طول الليل ..

باوعتلي ووجهة گلب احمر ..
رمشت بعيونهة بتوتر ..
دنگت راسهة وگامت : بكيفك لا تبدل ..
رفعت اكتافي : حرامات ..

طلعت هي من الغرفة واني باوعت لرضا : اگول يا حلو ..
هو باوعلي ..
ابتسمت : تدري على شنو وصيت البارحة وراح يجيبون ..

باوعلي بفضول : شنو ؟؟
راسم : بلي ستيشن .. ووياه الاقراص الجديدة ..

گمز هو بفرحة واجة حضني : اييييي بلي .. من زمان ردتة .. بس بابا ما قبل اجيبة ..
طبگت حواجبي : ليش ما قبل ؟؟

رفع اكتافة : من گتلة اريد بلي عصب علية وطردني ..
وماما گالت اني اجيبلك واحد بس بابا سمعهة وگاللهة ممنوع ..

استغربت واني لهسة ما مفتهم ليش ضياء جان يتصرف وياه هيج ..
دخلت مريم واخذت رضا تبدلة ملابسة وتنزلة ..

ورة يومين ..

جنت واگف بالغرفة .. گدام المراية واضمد بالجرح ..
دخلت مريم من شافتني بدون قميص ارتبكت ..

ابتسمت : ها مريومة ..
تحاول ما تباوعلي : ااا .. اكو واحد جاي عليك .. حارث گال كليلة خل يجي لان يمكن واحد من اصدقائة يتحمدلة بالسلامة ..

هزيت راسي : يلة نازل .. بس تعاي لفي الشاش على ضهري ..
تقربت مني ببطئ وصارت وراي ..
مديتلهة الشاش وهي اخذتة ولفتة علية ورجعت لفتة من فوگ جتفي .. احس بملمس اصابعة كلهن رجفة ..

خلصت الشاش وبدلت ملابسي لبست دشداشة جوزية ..
حطيت عطر خفيف ونزلت ..

رحت للديوانية ودخلت ..
استغربت رجال غريب ما شايفة قبل ..
سلمت علي وهو سلم بأرتباك ..

كعدت عالقنفة مقابيلة : مية هلا بيك ..
هو باوعلي : بيك اكثر دكتور ما تقصر .. ادري انت ما تعرفني ..
هزيت راسي : لا والله بلا صغر بيك ..

الولد گاعدين حارث وجبران .. و عمي عاصم وعبالهم واحد اعرفة ..

جاوبني ومبين من لهجتة بغدادي .. : محسوبك عبدالرحيم الـ....
هزيت راسي : ونعم منك تشرفنة ..

هز راسة : متقصر اخوية ما عليك زود ..
عمي عاصم : مادام انت ما تعرف الدكتور ولا هو يعرفك .. شلون اجيت لهنا ..

باوع لعمي عاصم : هو ما يعرفني صحيح .. بس انة اعرفة .. صارلي اسبوعين ادورة وهسة لگيتة ..
طبگت حواجبي وكلي فضول : امرني خوية محتاج شي ؟؟

هز راسة : اني جنت مسجون صارلي سنين بسبب حادث سيارة ..
ما عندي لا اهل ولا اقارب ..
امي ماتت واختي ماتت وهمة ذولة الي جانو باقيلي ..

هزيت راسي متوقع ان محتاج فلوس ..: الله يرحمهم ويصبرك خوية ..
كمل كلامة وجر حسرة : ورة ما انسجنت خفت على اختي وزوجتهة لواحد اجة خطبهة وگال اتزوجهة بالسر بس حتى احميهة ويكون اكو رجال فوگ راسهم ..

ما جان عندي حل غير اوافق ..
وراهة بسنة وحدة توفت اختي وهي تولد طفلهة لان جان عدهة مرض بالقلب ..
امي من قهرهة عليهة ما طولت فترة وتوفت وراهة ..

صفى هذا الطفل عد ابوه ..
وابوه متزوج بت عمة كدام الكل .. وبت عمة هي الربت هذا الطفل .. وانة هسة جايك لا على فلوس ولا غيرهة .. رايدك تجيبلي ابن اختي .. الشي الوحيد البقالي منهة ..

استغربت : وشلون اكدر اساعدك بهالموضوع .. يعني وين الگاه لابن اختك .. وشمعنى اني اجيت علية ..

هز راسة والكل عيونهم علي يباوعولة بحيرة مستغربين واني اكثر منهم : ما يحتاج تدورة .. ولا تتعب روحك .. هو عدكم ..

راسم : عدنة ؟؟؟ شلون عدنة ؟
غمض عيونة وجر نفس : المتزوج اختي هو اخوك المرحوم ضياء حافظ .. والولد العندة ابن اختي مو ابن بت عمكم ..

حجاهة وعبالك ذب قنبلة علينة .. : شنوو ؟؟

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤
هلو شلونكم .. بارت اليوم عبارة عن مريم وراسم ..
تووووقعااااتكم .. ولا تنسون صوتو وعلقو وكلشي ينداس دوسو ..