رواية بنات للزمن الفصل الثامن والعشرون 28 - بقلم سارة الشمري

الكاتبة : سارة الشمري ..

شما اقرب عليك ..
اتزيد حسراتك ...
اذا خايف احرجك ..
گلي ليش اتخاف ...
؟ ماريد آنه اصبح ..
سبب مأساتك ..
احسب للطريق ، وشوف دربك زين
.. بس آنه اعتقد ..
حاسب حساباتك ..
مرات اني اشوفك ..
قمه بالاشواگ ..
ومرات احس گلبك ..
عكس نظراتك ..!

راسم //

: المتزوج اختي هو اخوك المرحوم ضياء حافظ .. والولد العندة ابن اختي مو ابن بت عمكم ..

فتحت عيوني وحسيتهة مثل القنبلة وفجرهة علينة ..
الكل يباوعلة مصدوم ..
حارث : شنوو ؟؟ شهالحجي هذا ؟؟ انت تعرف شجاي تحجي ؟؟

هز راسة الرجال : حقكم تحجون هيج ادري صعبة عليكم .. بس هاي الحقيقة ولازم تتقبلونهة ..

هادي وگف ونتر : وليش نصدگك ..
جبران كمل : نعرفك تعرفنة .. رجال غريب مدري منين جاي .. وتطلع حجي من جيبك ..

وگف وياهم : مو اني الاطلع حجي .. واذا تردون اسألو زوجة الدكتور راسم وهي تگللكم اذا جان ابنهة لو لا ..

گمت وگفت وصحت حارث طلعت للحوش ..
التفتت علي : حارث انت تتذكر شحجيت من خابرتني وگتلي ضياء صار عندة ولد ..

هز راسة ..
اني كملت : واني گتلك وليش ما گتلي من قبل ان مريم جانت حامل .. انت بوقتهة گتلي حتى احنة ما جنة ندري بيهة حامل .. وضمت السالفة حتى ما يمنعونهة من دراستهة .. صحيح ..

فتح عيونة بصدمة : شنوو يعني ؟؟ ممكن يكون كلام هذا الرجال صحيح ..
سكتت حاير ..
حارث : مستحيل هالشي .. مريم تموت على رضا وتخاف علي من كلشي .. هالتصرفات مو مال مو ابنهة ..

راسم : لك حارث لا تحجي وجنك ما تعرف مريم .. انت ما تتذكرهة من جانت زغيرة من جبنة بزونة وهي ربتهة شهرين وبعدين ماتت .. شگد ضلت تبجي عليهة .. شلون هسة اذا طفل وربتة سنين وتعلقت بي ..

حارث : وممكن تكون خافت لا يشوف الي شافتة هي من نعمة ..
راسم شراح تسوي .. الرجال جاي ايگول اريد ابن اختي ..

التفتت بسرعة من سمعت صوت شي طاح ..
شفت مريم واگفة اباب المطبخ وشكلهة سمعت شجنة نحجي ..

دخلت للمطبخ عالسريع ..
اثبتلي هالشي صحة تفكيري ..

دخلت للديوانية واسمعهم يصيحون هالرجال ..
حجيت بصوت شبه عالي : عندك دليل على كلامك ؟

عمي عاصم بعصبية : ولك يا دليل .. هاي الاشكال اعرفهة .. جاي علمود الفلوس .. رضا حفيدي وهالرجال يجذب .. طلعة برة وسد السالفة ..

راسم : لحضة عمي .. اذا طلع هسة صدگني السالفة ما تنحل ..
التفتتلة : ما جاوبتني .. عندك دليل ..

تقرب خطوتين مني وحجة : انت تعرف خط اخوك ؟؟
هزيت راسي حافضة بصم واعرف كل حرف شلون يخطة لان ياما درستة ولحد ما دخل الكلية واني ادرسة واعرف خطة : اعرفة كلش زين .. 

طلع من جيبة مجموعة اوراق ومدهن الي ..
اخذتهن من ايدة : شنو ذني ..

تنهد : اخوك من بعد ما ماتت اختي ما اجة وزارني ولا مرة للسجن لان يلوم نفسة ان ماكدر يحافض عالامانة .. لهالسبب كتبلي الرسائل هاي وكاتب بيهة كلشي صار بأختي وامي وذاكر بيهة ابنة الي سماه رضا .. وگال هو بأيدين امينة لا تخاف علي وزوجتي معتبرتة ابنهة والكل درى بي على اساس ابنهة ..

فتحت الاوراق اقراهن وجان خط ضياء نفسة ..
حرف الكاف والعين يسويهن بطريقة اكدر اميزهة ..
قريت كل حرف بالرسائل .. وفعلاً كلشي حجاه صحيح ..

عمي عاصم سحب الاوراق مني ..
اني باوعت للرجال وهو عيونة غورگت : مارايد منكم شي بس ابن اختي ..

جبران : شني تايهة وتاخذة .. احنة اهلة وما تگدر تاخذة من عدنة ..
هز راسة : اني ماجاي حتى اخذة .. اني بس اريد اشوفة .. اشوف وجه اختي بي .. واذا تسمحولي اجي بين فترة والثانية بس اشوفة حتلو ساعة ..

گمت : اول شي اسأل ام رضا .. وافتهم منهة الموضوع .. واشوف اذا اگدر اجيبلك رضا هسة حتى تشوفة ..
ابتسم بلهفة : اكون ممنون منك ..

هادي : راسم شجاي تحجي انت ؟؟ شنو تجيبلة رضا .. وصدگتة بسهولة ..
هزيت راسي : هسة نفتهم هادي .. من رخصتكم ..

طلعت من الديوانية ومباشرةً صعدت فوگ ..
حاولت افتح باب الغرفة بس مقفول ..
دگيت الباب بهدوء : مريومة افتحي الباب ..

ما اجاني رد .. رجعت دگيتة : رضا حبيبي اذا تسمعني افتح الباب ..
اجاني صوت رضا : ماما لازمتني .. متخليني ..

راسم : مريومة افتحي الباب خل احاجيج ..
اجاني صوتهة مبين تبجي : مالكم شي عندي .. روووح ماكو داعي تحجي وياي ..

راسم : لا تخافين محد ياخذة منج .. بس افتحي الباب خل اسولف وياج بس اريد افتهم السالفة ..
مريم : متنطي لهذا الرجال وتخلي ياخذة مني ..

تنهدت : ولج مريم شلون تفكرين .. هذا ابن اخوي .. احنة عمامة يعني اهلة .. محد يگدر ياخذة من عدنة .. والوكالة بأسمج انتي ..

ثواني وانفتح الباب واباوع عيونهة مورمة من البجي ..
رضا حاطتة وراهة ..
دخلت وطبگت الباب ..

هي لزمت رضا وبجي : هو ابني اني .. هي بس ولدتة .. بس اني امة وربيتة وتعبت علي وحبيتة وخفت علي .. وهو يحبني اني ويگلي ماما الي .. محد الة شي عندي ..

تنهدت : مريم احجيلي كلشي صار من البداية ..
بلعت ريگهة ومسحت دموعهة وگعدت تحجيلي ..

حجتلي ان جان متزوج الي اسمهة مرام قبلهة ..
وان جان يحبهة .. وجانت مريضة ..
ومن ماتت هو جاب الولد وربتة هي دارت بالهة علي ..

طبگت حواجبي : زين ليش جان يعامل رضا بطريقة مو زينة ..
هزت راسهة : لان جان يعتبرة هو السبب بوفاة امة .. ولو ما جان موجود جان هي ما ماتت ..

تقربت يمهة ولزمت ايدهة : مريومة اسمعيني زين وافتهمي حجيي ..
باوعتلي بخوف : شنو ؟

راسم : احنة اعمام رضا .. وبالقانون انتي امة ومسجل بأسمج .. احنة اهلة وماكو اي مخلوق يگدر ياخذة من عدنة ..

مريم : يعني متاخذون ابني مني ؟؟ يبقى عندي ..
هزيت راسي : اكيد يبقى عندج .. وهو اصلاً ما يگدر بدونج .. بس ..

طبگت حواجبهة : بس شنو ؟؟
تنهدت : اني هم ماكدر بدونج .. ولازم تختارين واحد ..
ابتسمت : اسفة .. اني هم ماكدر بدون ابني ..

رفعت حاجبي : ها هيج صارت .. معناها عوضيني بشي ثاني ..
طبگت حواجبهة : شنو ؟؟

باوعت لرضا ورجعت باوعتلهة : خليني اخذ رضا وانزلة لخالة يشوفة ..
اختفت ابتسامتهة : لا مو گلت متاخذة ..

لزمت خدهة : لا تخافين گتلج محد ياخذة .. وهسة قصدي انزلة للديوانية بس يشوفة .. وهو گال ما اخذة بس اشوفة حتلو ساعة ..

باوعت لرضا ورجعت باوعتلي متوترة : گول والله ما اخلي ياخذة ورجعة انتة بيدك ..
هزيت راسي : والله شوية وارجعة بيدي .. اخذيهة وعد مني ..

هزت راسهة : ماشي ..
ابتسمت وتقربت بستهة بخدهة ..
گمت وصحت رضا ..

اخذتة ونزلت ..
رحت للديوانية .. بس دخلتة هو وگف من شافة ..
نزلت دمعة من عينة ومسحهة بسرعة ..

باوعت لرضا الي لازم ايدي ويباوع بهدوء : يلة رضا حبيبي روح سلم على خالو ..
رضا متعود على هالشي لان دائماً ادخلة عالخطار واخلي يسلم حتى يتعلم من هسة ..

راحلة رضا ومد ايدة يريد يسلم : السلام عليكم ..
ما مد ايدة الة وشالة وحضنة ونزلت دموعة ..

الولد يباوعون متأثرين .. من شافوني جبت رضا عرفو ان تأكدت من مريم كلامة صحيح ..

نزلة من حضنة ورضا يباوعلة مستغرب وخايف بنفس الوقت ..
اجة علية ركض ولزم ايدي حيل ..
باوعتلة ودنگت همست : لا تخاف رضا .. احنة مو نگول الرجال ما يخاف ..

هو باوعلي وهز راسة بس مبين بعدة خايف ..
اخذتة وگعدتة بصف خالة واني صرت من جهتة الثانية .. 
بقة شوية يمة وكلساع يحضنة ويسولف وياه ..

ورة ما مشة وكلهم طبو جوة على مريم يردون يفهمون السالفة ..
حجتبهم هي الصار من البداية ..
عصبو عليهة وخاصاً عمي عاصم لان ضمت هالموضوع عنهم من البداية ..

بس بعدين سكتوا وتقبلو الموضوع ..

جيلان //

اليوم خابرو بابا ورجعو حددو موعد للعقد مال ديلارا من بعد ما اجلو بسبب الي صار بالمعمل واصابة راسم ..

عقد الشيخ عگب باجر .. ووراهة بيوم عقد المحكمة ..
كولش فرحانه الهة رغم هي مفرحانة بس يلة تحبة بعدين .. وتتعود علي ..

طلعت للسوگ بدالهة ..
حجزت كوشة ووياهة اغراض العقد ..
وصيت على ملبس وهالسوالف ..

اشتريت فساتين واحد الي ناعم وحلو ..
والهة اشتريت فستان مال عقد .. طويل ومن جوة ذيل سمكة لونة ماروني ومن فوگ نازل عالاكتاف وبي فتحة من الضهر بسيطة والنقش مالتة حلو .. ومتأكدة يطلع حلو عليهة لان هي مو ضعيفة وجسمهة تارس شوية ..

گاعدة بغرفتي واحاجي بحارث وهو منزعج من اهتمامي الزايد بعقد ديلارا : هسة انت من شنو ضايج .. غير اختي وافرحلهة .. اذا ما اهتميتلهة اني منو يهتم يعني ..

حارث : انتي تفرحين لاختج وابن عمي گلبة محترك .. والله مال واحد يلزم هالسمير هذا ويسويه وصل ..

جيلان : ياااا .. سمير شعلي المگرود .. شبيكم عالولد خطية ..
حارث : مشمش لا تلعبين بأعصابي؟؟ خطية ادور ..

رفعت حاجبي : ليش هم تنزعج شنو ؟؟ انت ابو طيبة لو غيرك ؟؟
جر نفس : وج الف مرة كتلج والله من زمان وهي رجعت خابرتني .. اني شنو ذنبي ..

جيلان : الله يكرفهة هي وابن عمهة .. مو عائلة همج .. اكو واحد يتهجم بسلاحة عالعالم ..

حارث : اگووول عوفي سالفة طيبة مدري منو .. وشوفيني الفستان الي اشتريتي للعقد ..
جيلان : لا عوفة لباجر وشوفة .. مفاجأة ..

حارث : لا حبيبتي اني ما تمشي عندي هالسوالف .. شوفينياه هسة خل اشوف شيفضح وشيستر ..
جيلان : حارث ادري بيك اذا صورت الفستان راح تگلي ما تلبسينة .. واني البسة يعني البسة ..

حارث نتر : معناهة يفضح اكثر من الي قبلة .. وج مشمش ذولة ناس غريبة شلون تلبسين گدامهم فاضح ..

جيلان : هي بس نسوان واذا لبست هيج .. وبعدين هذا عقد اختي التوأم .. معناها محد يگلي لا والبس بكيفي ..

حارث : جيلان لا تعاندين .. هذا سمير هم يدخل .. ادور انتي لابسة هيج ..
ردت العب بأعصابة : اي عادي يصير رجل اختي ..

حارث : جيلللاااان ..
عضيت لساني گال جيلان مو مشمش معناها معصب : اهووو .. يلة خوش عود من يدخل البس عباية .. ارتاحيت ..

حارث : والله ما ارتاح الا تبدلين النفنوف وتلبسين واحد مستور ..
جيلان : والله عاد بكيفك .. اني عن نفسي مقتنعة بالنفنوف وما البس غيرة ..

شوية ودخلت ديلارا واني اضطريد اسد الخط ..
باوعتلهة : شبيج مطنگرة ..
ديلارا : هذا سمير هنا .. جاي علية ..
طبگت حواجبي : عليج ؟ شيريد ..

تخوصرت : والله شنو الافندي جاي ايگول يريد ياخذني اني وواحد من الولد ويانة نسوي التحاليل مال العقد ..
رفعت حاجبي : هي مو يسوونهة بنفس يوم العقد ..

ديلارا : اندري .. بس لا حضرتة ايگول حتى يطلعن من وقت .. بابا شكلة ممقتنع وعصب بس گال هادي يروح وياكم وهو بسيارتة وحدة واحنة وحدنة ..

جيلان : اي روحي شكو بيهة .. هم بلكي تشوفينة ويعجبج ..
باوعتلي بعصبية ودارت وجهة وطلعت ..

گمت اني وطلعت من الغرفة رحت يم حبوبتي ..
گعدت يمهة شوية ..
رحت لماما لگيتهة بالمطبخ تسوي بالغدا ..

ورة ساعتين تقريباً اجت ديلارا لازمة ايدهة وعيونهة حمر ..
مبينة باجية من ساحبين منهة دم ..
ابتسمتلهة : سلامات باع العيون ..

هي گعدت : جيلان اسكتي ترة والله مالي خلگج ..
ماما جابتلهة عصير برتقال طلعت مسويتة الهة قبل لا تجي ..
حطتة گدامهة ودنگت باستهة بخدهة : اشربي هذا العصير لا تدوخين .. شو اشوف ايدج .. خل احطلهة ثلجاية ..

باوعتلهة اني فاتحة عيوني : بالجذب ما سويتيلي گلاص ..
باوعتلي امي وابتسمت : عود من تتزوجين اسويلج هيج ..

رحت للصالة لگيت بابا وهادي موجودين يم حبوبتي ..
بابا صاح على ديلارا يسولف وياهة وخاف سمير حجة وياج بهدة معصب شكلة ..

طلع تليفونة : اخابر راسم واخلي يروح للمستشفى يستعجل بالتحاليل .. مادام هو بالمستشفى ..

خابر على راسم .. ورى ساعة تقريباً رجع راسم من المستشفى ..

راسم : عمي التحاليل طلعت ..
بابا : اي جيبهن حتى ناخذهن بالعقد مال المحكمة ..

راسم : عمي تحاليل ديلارا وسمير ما متطابقة ..
بابا طبگ حواجبة واخذهن منة : شني ما متطابقة .. ليش ؟

راسم : ماكو تطابق بيناتهم بسبب الامراض الوراثية الي ممكن تصير لان سمير عندة مرض السكري ومرضة وراثي ولهالسبب دم ديلارا وجيناتهة ضعيفة ما تطابق سمير .. يعني اطفالهة بالمستقبل ممكن يكون بيهم السكري ..

بابا : يعني شلون ما يصير يتزوجون ..
راسم : هي اكو ابر تگدر تاخذهن ديلارا بأنتضام وممكن تخفف احتمال المشكلة .. بس بكيفكم بعد ..
بابا : ابر شني لا يابة .. لا مجبورة عالابر ولا عالزواج هذا .. جفينة شر السكري .. هسة اخابرة اگلة ماكو نصيب ..

اباوع لديلارا عيونهة فرحت ..
بابا باوعلهة : مو صحيح دلو لو انتي شتگولين ..
ديلارا : بكيفك بابا ..
بابا : هايهة اخابرة هسة ..

طلعت ديلارا من الصالة واني باوعتلهم ..
عوجت حلگي : امداني لا بية ولا بتجهيزاتي .. خسرت فلوس ..

هادي يضحك علية : يلة يتعوضن خير ولا يهمج .. اني اعوضهن الج ..
كرصني من خدي وطلع ..

رحت لغرفتي وطلعت تليفوني لگيت حارث دازلي رسالة : تعيشين وتاكلين غيرهة ..
خابرتة وهو رد علية يضحك : ها شلونة النفنوف ؟؟

جيلان : منو وصلك الخبر ؟؟
حارث : مشمشة مو تدرين بحارث ما يضم علية شي ..
جيلان : والله انقهرت تجهيزاتي والبارحة الفرة بالسوك كلهة راحت عالخالي بلاش ..

ضحك حارث : ولا يهمج اخابر عمي هسة واگلة اخطب منك جيلان ونعقد باجر بتجهيزاتج ..
جيلان : والله انت مخبل وتسويهة .. اني ما اتزوج هيج اذا مو قبل اسبوع لو اكثر اني احضر للعقد ..

راسم //

دخلت لغرفتي من بعد ما سلمت النتائج لعمي ..
طلعت تليفوني مباشرةً وخابرت رضوان ..

رد علية : ها رضوان ويين انت ؟
رضوان : والله بالمعمل .. ليش ؟
راسم : عندي خبر الك ..

رضوان : اخبارك ما تخلص .. البارحة جايبلي خبر رضا .. واليوم هم خبر .. شنو هو ..
حجيتهة بدون مقدمات : ديلارا ما تتزوج سمير ..

هو رد بسرعة : شنووو ؟؟
ضحكت : اي والله شبيك .. تحاليلهم ما متطابقة ..
هو رد وحجة مسطر : يعني شلون .. هسة شنو .. منو كالك ..

راسم : محد گالي .. اني جبيت التحاليل بيدي وسلمتهن لعمي عاصم وهو گال بلا هالزواج .. وراح يخابرة يگلة ماكو نصيب ..

سكت شوية : راسم گول وداعة ضياء احجي صدك ..
راسم : يابة وداعة ضياء بعد شتريد .. قابل ليش اجذب عليك ..

رضوان : ياابة شتريد اطلب على هالبشارة هاي ..
راسم : سلامتك ماريد شي .. كافي فرحتك هاي  ..

سديت التليفون منة ..
شوية ودخلت مريم .. مبينة ضايجة ..
ما باوعتلي حتى .. اكيد سمعت بموضوع سمير ..

هي واگفة گدام المراية وتطلع بأغراض موجودة من المجر ..
رحت وگفت وراهة ..
مديت ايدي شلت شالهة عن راسهة وباوعتلهة بالمراية : شبيهة مريومتي ضايجة ..

باوعتلي بالمراية : على اساس ما تدري .. خطية سمير خوش ولد ..
رفعت حاجبي : خوش ولد .. بس شنسوي كلشي قسمة ونصيب ..

دارت علية : قسمة ونصيب مو .. والله انت فرحت مبين بوجهك ..
ضحكت : قابل تردين افرح للغريب اكثر من اخوي ..

مريم : واخوك مو خاطب .. لعد وحد عن اختي .. بس انتو مدري شلون تفكرون ..
باوعتلهة برفعة حاجب : وشمدريج مو اني الغيرت .. نتيجة التحليل علمود اخوي ..

رفعت ايدهة وضربتني على صدري : جذااااب ..
طبگت حواجبي ولزمت مكان الجرح : ااااااخ ..
شهكت هي ولزمتني بخوف : رااسم .. اسفة والله ما انتبهت .. نسيت .. تأذيت مو ..

شفتهة خايفة .. سويت روحي اتألم اكثر : اااه اذيتيني كلش ..
مريم : اي شسوي غير انت تصرفاتك مدري شلونهة ..
لزمت صدري وگعدت واسوي نفسي متألم : وانتي تدرين بية اسوي هيج شي .. ترة ادري ضايج على اخوي بس ما اسوي لهالدرجة ..

باوعتلي بتوتر : هسة شسوي خاف الجرح يأذيك ..
هزيت راسي : اي والله يأذيني .. بس مو هذا ..
شلت ايدهة وحطيتهة على گلبي : گلبي اذيتة اكبر ..

باوعتلي بنضرات غريبة ..
رمشت بعيونهة مبينة متوترة : سلامة گلبك ..

تقربت منهة اريد ابوسهة بس انفتح الباب ودخل رضا .. : عمو راسم ..
مريم گمزت ووخرت ..
هو من شافنة هيج وگف ..

رجعت ليورة خطوة : احم .. ها رضا ..
رضا : عمو حارث جاب البلي .. تعال نشدة بالصالة ..
هزيت راسي وطلعت وياه ..

گعدنة بالصالة مالتنة نشد بالبلاي عالتلفزيون ..
هو باوعلي ببرائة : عمو شجنت تسووي انت وماما ..

ابتسمت : ماكو شي حبيبي ..
رضا : ليش جنت حاضنهة .. مو ما يصير ؟
راسم : لا حبيبي ليش ما يصير .. احنة متزوجين يعني عادي احضنهة ..

رضا : بس بابا ضياء هم جان متزوجهة قبل لا يروح .. بس ولا مرة حضنهة .. وانت تنام ويانة بالغرفة بس هو جان ينام بالغرفة الزغيرة واحنة بالغرفة الجبيرة يومية ..

الكاتبة : سارة الشمري 🖤

هلو شلونكم .. ادري تأخرت اليوم بالتنزيل اتمنى تعذروني ..
اتمنى عجبكم البارت ..
لا تنسون صوتو وعلقو وكلشي ينداس دوسو ..