رواية بنات للزمن الفصل السابع والأربعون 47 - بقلم سارة الشمري

الكاتبة : سارة الشمري🕊

جنة نكتب على الليل بقلم اسود
وما نبرد الماي وحده الماي يبرد
نلزم الحسرة ونجتفها بحبل
خاف يم الغبرة تنهد

بنات للزمن ..
البارت الخامس والاربعون ..

سحبت الورقة بعدني اريد اكتب ومدنگة عالورقة وشفت ايد انحطت على الورقة بكبرهة ..
فتحت عيوني وبلعت ريگي ورفعت راسي لدكتور ضيغم ..

مدنگ علينة وساند ايدة على الخشبة الكدامي لان اني كاعدة بالطرف ..
التفتت ل افنان شفتهة تباوعلة بخوف ..

اخذ الورقة ورجع ضهرة عالحايط ورفع رجلة وكفهة للحايط وصار واكف على تك رجل ومستند عالحايط ..
لازم الورقة ويقرة بيهة واني وافنان وحدة تباوع بوجه الثانية ..

كمل قراية الورقة ..
مدهة الي ويأشر على كلمة : شنو هاي الكلمة ؟؟ الخط ما واضح ..
باوعت للورقة بتوتر وبلعت ريگي وحجيت بصوت خفيف كوة طلع مدري وصلة مدري لا : اكشخي ..

هز راسة : ها اوكي ..
رجع قرة الباقي ..
اني العبرة خانگتني من الفشلة ومن الخوف لا ينقصني .. والطلاب كلهة تباوع علينة ..

خلص من الورقة وعدل وگفتة ..
باوعلنة اني وافنان بنضرات هدوء .. المفروض يرزلنة ..
عزا العزاني بس لا هذا من النوع الي يعاقب بالدرجات مو رزايل ..

مد ايدة سحب السجل الي كدام افنان ..
فتحة قرة الاسم بهدوء : افنان احمد الـ...
هز راسة بهدوء وسحب نفس الورقة الي كتبنة بيهة ..
گلبهة على الجهة الثانية الفارغة وكتب اسم افنان الكامل عليهة ..

رجع سحب السجل الاحمر مالتي .. اني هنا الا شوية جان نزلت دموعي ..
قرة اسمي بنفس الطريقة وبصوت ناصي يحاجي روحة : براء فضل الـ... (اسم العشيرة)
هز راسة وكتبة بالورقة ..

باوعلي وحجة : اخذو راحتكم علوية .. كملو نقاشكم ..
طبگ الورقة وحطهة بجيب بنطرونة الخلفي ..
رجع للمكتب مالتة .. افنان الا شوية جا گامت تلطم ..

كمل هو الشرح عادي ولا كأن شي صار ..
اني بعد يا شرح من الفشلة الاكلتهة ..
باوعت للساعة باقي ١٠ دقايق وينتهي وقت المحاضرة ..

هو خلص شرح وبقى ساكت شوية ..
باوع علينة اني وافنان بتفكير ..
فجأة حجة : باجر اريد منكم بحث ..

الطلاب كلهم : شنووو ..
واحد حجة : دكتور شنو بحث بيوم واحد ما نگدر ..
حجة واحد ثاني : اي استاذ خلي على يوم السبت عالاقل عدنة يومين عطلة قبلهة ..

ضرب القلم بخفة عالمكتب وحجة بأصرار وعيونة كلساع تمر علينة : لا اليوووم ..
كتب اسم الموضوع عالسبورة : وهذا الي اريد بحث علي .. واريدة بخط الايد حتى تكونون حافضينة وفاهمينة .. وامتحنكم بي والدرجة التاخذونهة تنضاف على الامتحان النهائي .. وين بعد اكو هيج دلال ..

الطلاب فرحو من كال هيج ..
اني باوعت لافنان الي تباوعلة بحقد ..
باوعتلة مكتف ايديناتة ورافع تك حاجب ومبتسم ويباوعلي ..
حجيت بهمس : هذا شبي هيج يباوع ..

افنان : شگددد خبيييث .. والله قرة الورقة وانتي كاتبة بس ارجع منا اروح للعقد .. وطلع سالفة البحث علمود ما ترحين عود يعاقب ابو خشم مكسور .. عابتلة ..

باوعتلة واني هستوني استوعب السالفة ..
صدك هاي شلون .. اكعد اكتب بحث لو اروح للعقد ..
تنهدت بقهر ماكو مجال للسؤال اكيد اكتب البحث ..
باوعتلة بقهر وهو يطلع من القاعة .. شگول عليك ادور يريدة بخط الايد ..

تأففت بملل وگمت طلعت من القاعة واني اعدل بعبايتي ..
افنان اجت وراي : اگللج .. اخلي اختي تكتب البحث ابدالج .. اني اعرف شلون اقنعهة ..

باوعتلهة بأبتسامة على مبادرتهة : لا حبيبتي .. ما سمعتي شگال .. راح يمتحنة بيهن .. معناها ماكو مجال للشردة ..
تنهدت بقهر : هالغثيث .. بعدة حتى اسبوع ما صارلة من داوم وبدت الخباثة ..

ضحكت ورفعت ساعتي : يوووه اخرتيني .. اني اروح اليوم بابا يمر علية وماريدة ينتضرني هواي ..
سلمت عليهة ومشيت ..

طلعت لگيت بابا ينتضرني ..
وصلني للبيت .. نزلت لگيت حنين تفتر وحتى شعرهة مخلصتة تسريح ومنزلتة ..
اول ما شافتني : يللللة برااء هم يلة تلحگين تخلصين حتى نروح .. بسرعة ..

رفعت اكتافي : انتو روحو اني ماروح .. عندي بحث وامتحان بالبحث باجر ..
باوعتلي بأحباط : لااا .. شنو هاي .. هسة وقتة الامتحان ..

براء : شسوي بعد ..
صعدت لغرفتي بدلت ملابسي ونزلت اتغدة ..
حنين تفتر وراي تريدني اروح وياهة واني قافلة : حنونة من عقلج تردين اروح واني عندي امتحان ..

حنين بتوسل : ديلة قابل راح تعيدين السنة على هذا الامتحان .. حبابة برووش .. تعاي ويانة ..
هزيت راسي بلا واني احطلي اكل بالماعون حتى اتغدى : حنووون حبيبتي روحي .. يفيدني العقد لو تفيديني انتي .. امتحاني اهم .. وعود بعدين اشوف التصوير عند ريم .. لا تخافين ..

تأففت وگامت تخابر بليلى تأكد عليهة تجي ..
هي هاي حنين لازم كلهة ترافقهة .. عبالهة اذا بقيت بالبيت راح انقهر واضوج لان همة راحو .. كلبهة مينطيهة ..

خلصت غدا وكمت طلعت اريد اروح ابدي بالبحث ..
لاگاني عمو رياض نازل مبدل ملابسة العسكرية بدشداشة لونها سكري وعطرة يفوح هاي الكشخة لان رايح للعقد لو رايح يشوف ريمي ..

حنين اجت يمة : اوو عمو شهالكشخة ..
ابتسم ابتسامة جانبية وكأنهة غرور : من زمان اني كشخة .. شنو الشي الجديد .. جا مثلج بس بالمناسبات نشوف شعرج نازل هيج ..

فتحت عيونهة : ياااا على اساس شعر ست ريم اليخبل .. منو گلك هي متسرحة بالماسبات وكدامك .. ايجوز شعرهة مثلي ..

رفع حاجبة مثلي : حلوة بكل حالاتهة بالكفشة وبالسرح .. تصفطج جوة ايدهة من جمالهة ..
حنين : عشتووووو ...

رياض : اييي .. وعلى فكرة اني شفتهة مرة على كامل طبيعتهة .. لا مكياج ولا تسريح ولا كشخة .. وجانت تخبل ..
فتحت عيونهة حنين : عمووووو .. شفتهة قبل لا تعقدون بدون حجاب ؟؟

باوعتلة اني بأستغراب : صدك عمو ؟؟
ابتسم : ما جانت مقصودة .. يعني جنت كاعد بالصالة مالتهم منتضر ابوهة .. وهي جانت هسة كاعدة من النوم ومطفية ودخلت للصالة عبالهة اخوهة .. وشفتهة ..

حنين صغرت عيونهة وباوعتلة بشك : همممم .. متأكد ؟؟
دفعهة من كتفهة : دروووحي .. جاية تحاسبني ام كفشة ..

مشى لباب الديوانية يريد يدخل : يللة فضوها ترة ربع ساعة وامشي لا تأخروني ..
دخل للديوانية ..
حنين تفرك بكتفهة وتدردم : حشى مو ايد .. تدريباتة يطلعهن بية ..

ضحكت وصعدت لغرفتي وبلشت بالبحث الغضب ..
رغم جنت ضايجة من البحث ومن الدكتور بس مع ذلك جنت مركزة ومهتمة بأدق التفاصيل الي تخص البحث وماردت انسى شي ..

لان جنت خايفة لا ينقص درجتي .. وهم اني مهتمة بدراستي كلش .. وعندي قناعة ماكو شي اهم منها وكلشي يتعوض الا دراستي .. لهالسبب جنت اركز بكلشي ..

ديلارا //

واگفة كدام المراية من بعد ما اجيت من الصالون ..
لبست فستاني لونة اخضر عشبي طوخ .. بارز بياض جسمي .. مابي اكمام وفتحتة من الصدر على شكل ٧ ..

تسريحتي جانت مرفوعة كلهة بس بشكل راخي ومرتبة ..
خلصت لبس الفستان ودخلن البنات ..
كلهن عجبهتهن النتيجة النهائية ..

شوية واجت ماما .. من شافتني غورگت عيونهة وحضنتني ..
گامت تقرة علية ايات قرءانية ..

لزمتني من ايدي ونزلتني جوة ..
ما جان اكو هواي ناس بي هم مو شوية ..
كعدت بالكوشة واجتني بسمة باركتلي وباستني ورجعت گعدت ..

جيلان وريم ما وگفن رگص ..
وخاصاً جيلان انطلقت ما شالله ..

ورة نص ساعة اجن ام رضوان ووياهة اختها الوحيدة .. وعهد بنت عمي اخت رضوان ..
الي استغربتة ليش ما اجت مرت اخوها او من بناتهم ..

دخلن سلمن على الكاعدات ..
اجت علية عمتي كمت وگفت سلمت عليهة : بالعافية وبالخير ..
حجت هاي الحجايتين بهدوء بدون تعبير بوجهة وباستني بخدي ومشت ..

اجتني اختها على عكسهة : مبروك حبيبتي شايفين كل الخير .. الله يسعدكم ..
بوستني بخدي وابتسامتها مالية وجهة ..
رديت عليهة بنفس ابتسامتها : الله يبارك بيج ..

اجتني عهد حضنتني وفرحانة ..
گامت حبوبتي وگفت بالنص ..
اجتها جيلان وگفت مقابيلها ..
حبوبتي : يلة ولج جويلة وينهن الهوسات العلمتج عليهن ..

جيلان رفعت طرف شالهة الي حاطتة على رگبتهة هستوهة لبستة وگامت هوس بي : و على عناد العاندونة كلاص شربت شربونة ..
حبوبتي گامت تصفگ وجيلان تهوس ..

اباوع لحبوبتي تسحب بعيونهة على عمتي ام رضوان وعبالك تگللها بعنادج ..
عضيت شفتي .. خاف هي جانت كارهتني هسة كرهتني بالزايد .. ميدرن بهذا تصرفهن ينفخنها علية ..

اجت خالتة لرضوان وگعدت بصفي وگامت تسولف وياي : يمة لا تشيلين بخاطرج من مرت عمج .. والله هي طيبة گلب .. بس توهس من مات وليدها لهسة ..
انتي صيري شاطرة واكسبيها بندارتج وبالهلا ولا تخلينها تگض عليج الزلة .. تعاليها من كل صفحة .. اختي واعرفها ..

ابتسمت على كلامهة : انشالله خالة ..
ابتسمتلي : عين الله عليج .. والله حگة لو تسودن رضوان عليج .. ويشرد من هذيج هويمة الجنهة سلبوح ابو السيام ..

ضحكت على كلامهة ورجعت سألت : اممم خالة همة ليش فسخو الخطوبة ؟ يعني شنو السبب ؟؟
هزت راسهة بتهرب : الله ما كتبلهم يكونون سوة .. ما يتناسبون .. يلة حبيبتي اخذي راحتج ..

گامت وعافتني واني ابالي لازم اعرف شنو السبب الي خلى امة فجأة تسحب قرارهة وتبطل متريد بنت اخوها ..

اجت ماما گالت راح يعقدلكم السيد ..
كمت وياهة وگفوني يم الباب وفتحتة شوية ..
بدة الشيخ يحجي .. انطيت موافقتي والهلاهل اعتلت ..

حسيت بفرحة .. ماما اجت باستني وگومتني ..
رجعت گعدت عالكوشة ..
البنات بقن يرگصن .. ورة ربع ساعة دخل رضوان ..

مدنگة راسي واسمع صوت الهوسات ..
حبوبتي ترحب بي بكلمات حلوة ..
گعد بصفي رفع البيرغ الابيض عن راسي الي حطتة حبوبتي ..

لاول مرة رفعت عيوني الة ..
تلاگت عيونة ولمحت اللهفة بيهن بكل معنى الكلمة ..
الفرحة تشع منهن ويلمعن ..
اقترب وباسني بگصتي وهو يجر نفس خلا جسمي يقشعر ..

بقة لازم ايدي .. اجت خالتة باركتلة وامة وهو دنگ على ايدهة باسهة ..
جابت علبة الذهب وگامت تنطي وهو يلبسني وما خفت عني حركاتة الي كلها توتر وارتباك ..

الذهب جان ثگيل .. واني اصلاً جنت لابسة السلاح الي جابتلياه حبوبتي بعقد جبران .. ولابسة الاساور الي جابهن الي جدو الله يرحمة من زمان ..

اقترب همس بأذني : الفرحة الساكنة گلبي هسة بس الله اليعلم بيها .. من اول مرة شفتج والله شاهد ما تمنيت غير هاليوم ..
رفعت عيوني الة وابتسمت بحب .. هو رفع ايدي وباسها ..

شوية وطلع .. اجني البنات ريم وجيلان ومريم ويردن يعرفن شگالي ..
باوعت لريم : گلي مثل الي گالجياه حضرة الملازم بيوم عقدكم ..

فتحت عيونهة على وسعهن .. اني جذبت لان اصلاً ريم ما قبلت تگول شنو گاللها رياض من همسلها .. حجت بصدمة : شگالج ؟؟

حجيت الي گالة الي بالحرف الواحد ..
ريم ضحكت : يمعوودة وين اني ووين انتي .. خطيبج بريئ وحباب ورومنسي .. الا اني ما بي برائة كلامة ..

مريم ضحكت : عادي عادي تكبرين وتنسينهة .. لان هسة بس كلام .. بعدين من تصير افعال يصير الكلام فد شي عادي ..

جيلان برطمت : واني ؟؟ شنو موقعي بيناتجن .. اريد اجرب شعور الخطوبة ..

ريم ابتسمت : اي حبيبتي .. الله يهدي عمو عاصم بس .. جان تلگين حويرث بهاللحضة شامر دلو برة ومگعدج بمكانهة .. ويهمسلج بهمسات وداعتج حتى اضرب من حضرة الملازم ..

جيلان ابتسمت بهدوء : الله يهدي عمج ..
اجن بنات خوال ريم باركولي ..
ورة ساعتين تقريباً الكل مشو ..

اجت نعمة دخلت للبيت باوعتلي حتى ما باركتلي ..
بس عادي اصلاً ما جنت منتضرة منها مباركة ..

گمت اني سبحت وبدلت ملابسي ..
نزلت اريد اسوي العشا وية ماما بس حبوبتي منعتني كلشي لا تسوين بعد ما يصير ..

بالعشا بابا صاحني ورحتلة سلمت علي وهو باركلي ..
كعدنة عالعشا .. وبسمة ومريم بقن يمنا يتعشن ..
حبوبتي حجت : اگلك عاصم .. شمالة ابنك جبير بعد ما اجة علية ولا مر .. شعندة ؟؟

بسمة رفعت راسهة بهدوء ..
ابوي تنهد : يمة هو انة ما شايفة .. يجي للمعمل ساعة لو ساعتين ومخلصهة برة .. ايگول صاحبة مريض ..

بقو يسولفون وانتبهت لبسمة ضاجت ..
خلصنة اكل وبابا طلع .. وبسمة طلبت من جيلان تروح لبيتهم وتجيبلها كم غرض من ملابسهة محتاجتهم ..

جيلان گامت وامي لزمتهة : جيللااان .. ممنوع تسوين مشاكل وية نعمة .. لو شما تحجي انتي تصمين حلگج وترجعين لهنا ..
تخوصرت جيلان : ياااا لا بلة .. شنو اسكتلها اذا هي بدت .. لا والله ما اسكت ..

جرت جيلان العباية من الباب وراحت لبيت ابوي ..
ورة ربع ساعة اجت جيلان وانطت العلاگة لبسمة وهنة مباشرةً طلعن لبيت راسم ..

كمت اني اريد اروح لغرفتي ..
شفت جيلان واگفة وفرك براسهة ومغمضة عيونهة ..
طبگت حواجبي : شبيج ؟
رفعت راسهة علية وهي تسد وتفتح بعيونهة : ها ؟

رحتلهة : جيلان جاي اگول شبيج ؟ ليش تفركين براسج ..
هزت راسهة بلا وصعدت عالدرج ..
وصلت لنص الدرج ورادت توگع ..
رحتلهة ركض لزمتهة : هييي شبيج يمعودة شجاج ..

باوعتلي وهي تعدل نفسهة وحجت بفهاوة : يووو وخري يعني شبية .. مابية شي ..
كملت طريقهة وصعدت فوگ لغرفتها ..

نزلت اني جوة رحت للمطبخ ..
شفت ماما واگفة : ماما ماريد اخوفج بس جيلان راسهة يوجعهة ودايخة مدري شبيهة ؟
هزت راسهة : هذا كلة من ورة الديجي مالتجن .. هو اني لهسة راسي يفتر .. دروحي كدامي انتي واني راح اجيبلها علاج واجي وراج ..

طلعت من المطبخ وصعدت فوگ ..
رحت لغرفة جيلان فتحت الباب ودخلت ..
شفتهة كاعدة عالطبلة مال المراية وساندة راسهة على ايدة وشبه مغمضة ومفتحة ..

رحتلهة لزمت ايدهة : شجاج متگليلي هسة جنتي ما بيج شي ..
ما ردت علية بس بياض عيونهة حومر واطراف عينها هم ..

طبگت حواجبي وبلشت اخاف .. لزمت فكها وركزت وجهة علية : جيللللااان شبيج جنج وحدة سكرانة .. شووو باوعيلي ..
دفعت ايدي وحجايتها كوة تطلع : وخرررييي وجعتيني ..

دخلت ماما وباوعتلها وطبگت حواجبها من منضرها : شبيها ؟ ليش هيج وجهة ..
اجت عليهة لزمتها من اكتافها وگفتها على طولها وذبت العلاج عالمراية : جيلان ماما شبيج شو حاجيني شتحسين ..

جيلان ضحكت بخفة وحجت بفهاوة : احس جاي اطير ..
فتحت عيوني على وسعها : شنوو ؟ شبيج جيلان ..

امي جرتها من فكها وفتحت حلگها وقربت خشمها من حلگ جيلان وشمتة ..
توسعت عيون امي حيل ..
انرفعت ايدها من فك جيلان لراشدي سطرتة بخد جيلان ..

شهگت اني متفاجأة : مااااماااا ..
جيلان بلحضتها جانت مثل الريشة .. من ضربتها ماما وگعت بالكاع وبقت على نومتها ما تحركت ومغمضة ..

دنگت لجيلان ورفعتها بحضني : ليش هيج ماما ؟؟
امي گامت تلطم على خدودها وتحجي بصوت ناصي : عزا العزاني .. عزا العزاج زمن .. بنتي اني شاربة ..

طبگت حواجبي : شنو شاربة ماما متشوفينها مريضة ..
نترت بية : وج يا مريضة .. هاي سكرانة .. متشمين ريحتها انتي ..
فتحت عيوني بصدمة وباوعت لجيلان الي شبه غفت ..

امي كامت تبجي وتضرب على وجهة : منين جابتة ووين لگتة هالزفت هذا .. يربي شلون بية .. شسوي بيها هسة ..

جيلان فتحت عيونها وايدها على بطنها ..
حطت ايدها على حلگهة وحجت بصعوبة : الحمام ..
كومتهة عالسريع اخذتها للحمام ..
هي استفرغت الي ابطنها كلة ..

اجت ماما سحلتها من شعرهة وحطتهة جوة الدوش وشغلتة عليها ..
حجيت بخوف : ماما على كيفج وياها فدوة ..
ما ردت علية وشغلت المي البارد خلا جيلان تفز مثل الملسوعة وتشهك ..

گعدت ماما مقابيلها وحتى ملابسهة تبللت وياهة ..
گامت تضرب بيها راشديات : اصصححي جيلللااان ..
ماما جانت بحالة هستريا وعصبية ولازمة جيلان وتكفخ بيهة ..

اخر شي لزمتها اني : ماما فدوة كافي .. عوفيها علية .. روحي بدلي انتي ومن تصحصح اني اصيحج .. شوفي ملابسج تبللت ..

لطمت على وجهة : وج يا ملابس .. هاي سكرانة .. تعرفين شنو يعني سكرانة .. يعني شربت الحرام .. حطت بحلگهة شي ممنوع وحرام .. شسوي اني هسة بهالمصيبة ..

حضنت جيلان لصدري حتى لا امي تضربها اكثر : ماما والله اكيد ما تدري .. بس هدي اعصابج وعوفيهة علية ..
ضربت على رجلها وگامت طلعت من الحمام ..
طفيت اني المي .. وطلعت جيلان نشفت شعرهة وذبيت ملابسهة بالحمام ولبستهة البرنص ..

مددتهة عالجرباية وهي سحبت الغطا وتغطت ..
وجهة صار اصفر يمكن لان استفرغت ..
نزلت عالسريع سويت كهوة بكوب وصعدتها لغرفتهة ..

كعدتها عدل وخليتها تشرب الگهوة ..
ورة ربع ساعة بدت تصحى شوي شوي ..
ولازمة راسهة بألم .. ماما من نزلت بعد ما صعدت ..
لان من نزلت سويت الگهوة سمعت صوت بابا جوة وهي بقت يمة حتى لا يحس عالسالفة .. لان اذا عرف يذبحهة لجيلان ..

رحت اني لغرفتي بدلت ملابسي لان تبللت ..
رجعت لجيلان .. كعدت مقابيلها وهي فتحت عيونها وعدلت كعدتها ورجعت ضهرها عالمخدة ولزمت راسها : اااااه .. راسسسييي ...

فتحت عيونها وباوعتلي : دلو اني شبيهة .. ووين ملابسي .. ليش بالبرنص ..
هزيت راسي : جيلان حبيبتي شنو اخر شي تتذكرينة .. وين جنتي ؟ فدوة جاوبيني ..

باوعتلي بتفكير : اخر شي اتذكرة من رحت منا لبيت ابوي ..
هزيت راسي : اي وبعدين كملي ؟؟

كملت وهي تفكر : رحت مباشرةً لغرفة جبران وبسمة .. جبت الاغراض وطلعت .. ومن نزلت لاگتني نعمة .. مدري شحجت وياي ..
طبگت حواجبي : شحجت ؟ تذكري ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🕊

مرحبا للكل شلونكم انشالله بخير ..
اريد اطلب منكم طلب .. ادخلو على القناة الي مصممة هالفيديو واشتركو بقناتي اصمم وانزل .. اكون ممنونة منكم ..

احبببككم .. ولا تنسون صوتو وعلقو وكلشي ينداس دوسو ..