رواية بنات للزمن الفصل الثامن والأربعون 48 - بقلم سارة الشمري

الكاتبة : سارة الشمري🕊

(اتمنى منكم تتفاعلون وتعلقون شگد متگدرون عالفقرات )

جيلان : رحت مباشرةً لغرفة جبران وبسمة .. جبت الاغراض وطلعت .. ومن نزلت لاگتني نعمة .. مدري شحجت وياي ..
طبگت حواجبي : شحجت ؟ تذكري ..

فركت راسهة حيل : مادري دلو مادري ما جاي اتذكر .. ليش تسألين هالاسئلة .. وراسي ليش هيج احسة راح ينفجر ..

لزمت اكتافها : جيلان باوعيلي .. حاولي تركزين .. من رحتي هناك .. شربتي شي .. انطتج نعمة عصير .. حطيتي شي بحلگج ..

هزت راسهة بعدم اهتمام : لا ما انطتني نعمة .. بس من دخلت لغرفة جبران فتحت الثلاجة ولگيت بيها عصير تفاح مدري شنو وشربتة .. بس لا ما اتوقع عصير تفاح .. اكيد هذا عصير اناناس لو بطيخ لان طعمة حاد ويسوي حرگة بالبلعوم ..

فتحت عيوني على وسعهن : لگيتي الكحول بغرفة جبراان ..
طبگت حواجبهة : كحول ؟؟

هزيت راسي : اي جيلان كحول .. انتي شربتي كحول ولهالسبب ما تتذكرين شي .. وما شفتي امي شصار بيها من شافتج ..

فتحت عيونها بصدمة : لحضة لحضة .. قصدج اني جنت سكرانة .. اني شربت كحول .. شربت ممنوع ..
هزت راسهة وباوعتلي بعصبية : لا ديلارا هالشي مو صحيح .. اني ما سويت هيج شي .. الي شربتة جان عصير ..

دخلت امي على حجايتها وطبگت الباب : لا مو عصير يا حيوانة .. خمر ولج جيلان خمر .. بس هاي الجانت عايزتني بتي تسكر ..
اجت لزمتهة من شعرهة : منيييين جبتيي احجييي .. وين لگيني طيحان الحظ هذا ..

هزت راسهة بخوف : ماما وجعتيني .. والله ما جنت ادري .. لگيتة بثلاجة جبران وعبالي عصير وشربتة .. ما جنت ادري بي كحول ..
امي دفعتها حيل عالجرباية وباوعتلهة : جبران ؟؟ عندة كحول ..

جيلان لمت رجليها لصدرهة وكامت تبجي وهزت راسها ..
تنهدت امي بعصبية : اسمعن .. متجيبن طاري لأي احد بهذا الموضوع .. اني اعرف شلون اتصرف ..

هزينة روسنة بخوف وهي عافتنا وطلعت ..
التفتت لجيلان حضنتها وهي گامت تبجي بالزايد ..

ربع ساعة وجيلان تبجي لحد ما تعبت من البجي وغفت ..
غطيتهة وطلعت من الغرفة ورحت لغرفتي ..

گعدت اعزل بالهوسة الي بالغرفة من ورة تجهيزات اليوم والغرفة مگلوبة گلاب ..
تنهدت مو ليگول اليوم عقدي .. طلع من خشمي ..

لميت الهوسة ورحت للمراية اعدل بالمكياج واحطهن بالمجرات ..
فتحت كنتوري واضم بالاغراض واجت عيني العلبة الزجاجية الزغيرة الي بداخلها محلول طحيني ..

رفعتها بيدي واتذكر زينة من گالت اخذتها من سترة جبران ..
زاد عندي الشك وخاصاً الي صار وية جيلان ..
شلتها وحطيتها بالمجر الي يم راسي حتى باجر من يجي راسم انطيها الة ..

اليوم الثاني // راسم

فتحت عيوني بأبتسامة كلها نوم : شگد مزعجة ..
ضحكت بخفة : اني مزعجة .. انت گلت گعديني الساعة ب٨ علمود العيادة ..

رفعت راسي للساعة ورجعت باوعتلها : وهسة الساعة ب٧ ونص ..
مريم : ادري بيها .. بس هم ادري بيك تبقى تتگلب نص ساعة يلة تگوم ..

فتحت ايدية اتمغط ..
شمرت نفسها بحضني حيل .. تنهدت اني : لا اذا هيج اني بعد ما اگوم ..
حجت بضحكة : ليش تسويلي اغرائات ..

رفعت راسها من حضني وبست جبهتها وخدها : انتي كلج على بعضج اغراء .. شو تعاي خل اجرب اتذوق ..
اخذت شفتها بشفتي ببوسة دافية ..
تمسكت برگبتي وتبادلني بنفس اللهفة ..

قطع علينا الجو صوت التليفون مالتي ..
وخرت هي تتنفس بسرعة ..
تنهددت بعصبية : مو وگتة ابد ..
ضحكت مريم وسحبت التليفون : هذا هادي .. هاك رد بسرعة لا ينگطع ..

فتحت خط : نعععم شهالازعاج من وجه الصبح ..
استغربت نبرة هادي المعصبة : راسم اني ابابكم انزل افتحلي الباب ترة راح اتخبل ..
عدلت گعدتي وكمت من فراشي : شكو هادي شبيك ؟

هادي : انزل افتحلي واني احجيلك شكو ..
راسم : يلة جايك ..
سديت التليفون ومريم باوعتلي بقلق : راسم شكو وين رايح ..

رفعت اكتافي : مادري .. هادي بالباب .. راح اشوف شكو ..
مريم : ماشي .. اني راح اسويلكم ريوگ ..

نزلت فتحت الباب لهادي ..
هو دخل معصب ووجهة ما يگصة السيف : هادي شبيك ..

دخل كعد بالديوانية ويهز برجلة : راسم راح اتخبل والله .. على ساعة انتحر بهالمخلوق هذا ..
كعدت كدامة : منو هو ؟ فهمني شنو الموضوع ..

ضرب على رجلة بعصبية : جبرااان منو غيرة .. لك طلع يشرب خمر .. سكييير ..
فتحت عيوني : شنو .. وانت شمدريك ؟ شفتة شنو ..

هادي : ما شفتة بعيني بس اجت عمة زمن وگالتلي جبران عندة مشروب بغرفتة .. وجيلان شاربة منة بدون ما تدري وعبالهة عصير ومتخربطة البارحة بليل .. كالت شوفلة حل وتصرف وياه ولا تخلي ابوك يدري ..

فتحت عيوني : جيلااان شاربة من عندة .. وبعدين هذا تخبل شنو .. منين طلع سالفة الشرب .. هو حتى التدخين جان يكرهة ويكره ريحتة مو ادور شرب ..

فرك وجهة بعصبية : راسم اني گوة لازم اعصابي .. واكيد عندة واحد جرة على هذا الدرب .. وماكو غير هذا صاحبة الدوم يتحجج بي وايگول مريض واروح يمة .. وانة بنفسي راح الگى هذا صاحبة ..

لزمت كتفة : هدي اعصابك .. وراح نلگاه انشالله .. واني احجي وية جبران وافتهم منة السالفة ..
رفع راسة : شتحجي وياه .. هو هذا يفتهم بالحجي .. دمر حياتة وهاي المگرودة الضالة ابيتكم .. ما تدري بسوالف رجلهة ..

تنهدت : والله تكسر الخاطر .. مرات من ارجع بليل متأخر وااني اصعد اسمع صوت بجيها وهي تشكي لمريم ..
مو ادور هسة من تدري بي يشرب بهالسم ..

قاطعنا الباب الي اندك وبعدين انفتح ودخلت مريم بيدها صينية الريوگ : صباح الخير هادي حبيبي شلونك ..
كمت اني اخذت منها الصينية وهادي رد السلام بهدوء ..

مريم : مدو ايديكم .. راح اجيب الاستكاين واجي ..
طلعت مريم والتفتت على هادي ..
شفتة مغمض عيونة ويفرك راسة بعصبية ..
راسم : هادي .. شبيك هدي اعصابك ..

هادي : راسي راح ينفجر راسم .. الحاج خضر الي كل الناس تحترمة لان ولا مرة طلعت منة العيب وولا طلعت منة حجاية مو زينة .. سمعتة العالم تحلف بيها .. وهسة حفيدة تطلع علي حجاية سكيير .. سككيير راسم سكيير تعرف شنو يعني .. يعني بالحرام .. والله اليعلم شمسوي غير الشرب .. هو اليشرب كلشي يسوي بعد ..

گمت اريد اطبگ الباب حتى لا مريم تسمع وهي حامل واذا عرفت راح تنفعل وتصيح وبالتالي بسمة راح تعرف وهي هم حالتها الصحية مو كلش .. الي بيها كافيها ..

رحت للباب .. قبل لا اسدة شفت بسمة واگفة وبيدهة صينية الاستكاين لازمتهة وعيونهة مغورگة ..
حجيت متفاجئ : بسمة ؟؟

هادي رفع راسة علية بسرعة ..
ارتجفت ايدها الي بينت بوضوع بصوت الاستكاين ..
مد الصينية وحجت بصوت مبحوح كوة يطلع : هاي الاستكاين ..
مديت ايدي اخذتهن منها ..

نزلت دمعة من عينها .. دارت وجهة ورجعت بسرعة ..
طبگت الباب وباوعت لهادي بتنهيدة ..
ضرب على رجلة بعصبية ..

ما تريگنة ثنينة .. اني صعدت سبحت وبدلت ونزلت ..
رحنة لبيت عمي عاصم حتى نشوف جبران ..
سأل نعمة كالت طلع قبل شوية ..
رحنة لبيت جدي بلكي نلگاه موجود ..

دخلنة عادي وما بينة شي كام حبوبتي او اي احد ..
عرفنة جبران مو هنا ..
كمنا حتى نروح ندور علي .. لان هادي يتصل علي وما يجاوبة ..

طلعنة من باب المطبخ .. اجت ورانة زمن ..
باوعتلهة : عمة جيلان وين .. شلون صارت .. خو ما تحتاج فحص ..
هزت راسهة بنفي : لا ما تحتاج ما بيهة شي .. بس استفرغت وگامت تهذي شوية وبعدين هدأت .. لا تخاف ..

هادي تنهد وطلع كدامي للسيارة بعصبية ..
راحت زمن .. ردت اطلع واستوقفني صوت ديلارا : راسم دقيقة ..
باوعتلهة بأبتسامة : ديلارا .. بالعافية وعالخير .. ما شفتج مساع ما گدرت اباركلج اعذريني ..

هزت راسهة : لا عادي الله يبارك بيك ..
اجت تقربت وهي تتلفت خاف احد يجي ..
استغربت وضعهة : شبيج ديلارا صاير شي ..

مدت كلنسة مصفطة بشكل فوضوي عبالك صرة زغيرة : هاك ..
مديت ايدي اخذتهة : شنو هاي ؟؟

حجت بصوت ناصي : لگيتها بجيب جبران .. يعني زينة لگتها بجيبة .. واني استغربت وجودها وما اعرفها شنو ..وبما انك دكتور اكيد تعرف بالادوية .. انسب حل انطيها الك وانت تشوف شنو الي بيها ..

فتحتها واگلب بالعلبة ماكو عليها اي شريط او علامة او اسم يدل على نوع المسحوق الي بداخلها ..
رفعت راسي عليها : زين سويتي .. همزين ضميتيها .. اني اخذها للمختبر واشوف شنو هذا البيها ..

هزت راسها .. طلعت اني وضميت العلبة بجيبي ..
ما حجيت لهادي شي لان ماريد اتسرع واني بعدني ماعرف شنو موجود بداخلها ..

رحنة للمعمل هم ما لگيناه ..
هنا هادي راد يتخبل .. رجعتة للبيت اخذ سيارتة وراح وحدة يدور علي .. اني تحججت بالعيادة وعفتة ورحت ..

رحت للمختبر مال المستشفى الي تعينت بي جديد ..
رحت لقسم التحليلات ..
صحت لواحد اعرفة وطلبت منة يسويلياهن بأقصى سرعة ويعجل بيهن .. هو كال اقل شي ساعتين يلة تطلع النتيجة ..

عفتهن يمة وكتلة بس تخلص اتصل علية ادزلك واحد ياخذهن منك ..
رحت للمعمل لحارث وگعدت يمة ..

باوعلي برفعة حاجب : شبيك بشنو صافن ؟؟
تنهدت واني احجيلة على جبران وهو ذب اوراقة ويباوع بأهتمام وتحولت لعصبية : هذا شبي هيج فجأة تغير .. شنو سكير .. ما فكر بسمعة جدي .. ما حجيت وياه وادبتة من لگفتة ..

كملت واني ناسي اني جاي احجي وية حارث الي جيلان حبيبة گلبة ..
ناسي روحي وطلعت گبل : ما لگفتة اني .. زمن اجت وگالت لهادي اخوك يشرب كحول .. روح احجي وياه وفهمة .. هم لو ما جيلان شاربة من الكحول ومتخربطة البارحة جا محد عرف بــ...

قاطعني ضربة ايدة عالميز بكل قوة وهو يوگف ويصيح : شنوووووه .. شبيها جيلان ..
فتحت عيوني وهستوني استوعب : شبيها ؟
غمض عيونة وجر نفس بعصبية : راااسم شبيها جيلان .. شني شاربة ؟؟

تنهدت لا مفر ..
گمت وگفت : دگعد هذا الولد من المختبر جاي يتصل علية شو بسرعة طلعت التحاليل ..
عاط بية : هسة وكت تحاليل .. رااااسم ..

طلعت وصحت واحد من الي يشتغلون بالمعمل انطيتة عنوان المستشفى واسم الولد ابو المختبر وانطيتة الكروة حتى يروح يجيبلي التحاليل ..

فتحت خط علي : بشرني شو بسرعة طلعت التحاليل .. شنو شبي هذا العلاج ..
حجة بتنهيدة : اي دكتور طلعت بسرعة لان هاي مادة وحدة ما مخلوطة بشي ثاني .. وانت شوف التحليل بنفسك ..

طبگت حواجبي : ليش شنو الموضوع ..
: افضل تشوف التحليل بنفسك .. المادة بينت بوضوح ومكتوب بالتحليل كلشي ..

طول ما اني احجي وية الولد وحارث يدفع بية يريد يطلع واني ساد الباب ومرجع ضهري علي ..
سديت الخط من الولد وهو عاط بية : دوووخر هسة لا انتة الحاجي ولا مخليني اطلع اعرف شبيها ..

دفعتة : شوو اكعدد وين تروووح .. ابوها ما يدري بالسالفة ..
ضرب رجلة بالگاع : هي شنهية السااالفة ..

راسم : جيلان شاربة من الكحول الي عند جبران ..
فتح عيونة : شاربتهن ؟ وتدري شنو ؟
طبگت حواجبي : غبي انتة ؟ اكيد لا .. عبالهة عصير وشربتة ..

جر نفس بعصبية : وشنو گلت تخربطت ؟ شبيها ؟
هزيت راسي بنفي : ما بيها شي .. اليوم الصبح رحتلهم خاف تحتاج فحص وامها گالت لا ما يحتاج بس استفرغت وكامت تهذي وبعدين نامت .. كلشي ما بيهة ..

گام يتنفس بسرعة : هذا الزفت حسابة وياي .. والله بس الزمة ..
راسم : هو خل نلزمة بالاول ..
هز راسة : انة اعرف وين الگاه ..
طبگت حواجبي : وين ؟؟

نتر : يم هذا صاحبة الزفت .. من البداية عرفت وما ارتاحيتلها من گام كل ما يروحلة يرجع جبران راسة يوجعة وحتى ما يگدر يسوق ..

بقيت احاول اهدئ بي .. ورة ربع ساعة اجة الولد جايب التحاليل ..
فتحتهن بفضول وقريتهن ..

عيوني ارتكزت على كلمة وحدة بالنتيجة ..
وگفت على حيلي وغمضت عيوني وارجع افتح بيهن بلكي ما تطلع الي قريتهة ..

حارث : شبيك .. راسم ..
فركت گصتي واني اباوع للورطة الي بيدي ..
ما انشالت عيوني عن الورقة ..
ويمكن ٢٠ مرة قريت الكلمة واثرهة يتردد ابالي ..

مادة ( الـكــوكــائــيــن ) 

رفعت راسي لحارث الي سحب مني الورقة ويقراهة طابگ حواجبة : شني هاي .. شبيك اختبصت .. مالتيش ؟

كعدت عالكرسي وحطيت ايدي بشعري واني عقلي احسة راح يوگف : هاي نتيجة مسحوق ابرة جانت بجيب جبران .. وديتهة للمختبر وهاي نتيجتهة ..
طبگ حواجبة : شنو يعني ؟ شبيها ..

جريت الورقة من ايدة بعصبية : شنو شنو يعني ؟؟ اقرى حارث اقرى .. هذا كوكائين .. تعرف شنو يعني كوكائين .. يعني مخدرات .. جبرااان يتعاطى ممنوعات ..
والمصيبة كوكائييين ..

ضربت عالطاولة بحرگة : كوكائيييين ..
باوعلي وحجة برجفة : وشنو يعني كوكائين .. يگدر يتعالج مو ..

دنگت راسي ما رديت علي ..
سحبني من ياختي رفع راسي وعاط : يتعااااالج لو لاااا جاوبني .. جبران يتعالج لو لا ..
يحجي بهستريا وايديناتة يرجفن ..

دفعت ايدي عني : حارث هاي ابرررر .. انت تعرف شنو الكوكائين .. تعرف شنو مضارة وشلون ينعطى ..

الكوكائين من اخطر انواع المخدرات ..
البعض يسميها الفخ .. تنعطى للشخص بأبسط شي عن طريق حبة او مسحوك ينشم ..
بي مواد منبهة قوية .. تنبه الجهاز العصبي وتنطي طاقة قوية وبهجة للجسم ..

بس كل هالشي يستمر ل ٣٠ دقيقة بس ..
من بعدهة تحولة لانسان ثاني .. تسلب هاي الطاقة واي شي حلو بالشخص .. تنطي طاقة لمدة نص ساعة بس بالمقابل تاخذ سعادتة وراحتة ..
يوگع بالفخ .. يكتئب ينهك .. وتصير عندة رغبة ان يتعاطى اكثر واكثر ..

وهذا الكوكائين .. اذا انعطى بجرعة مفرطة للجسم .. من قوتهة وقوة نشاطهة .. راح تسبب توقف القلب المفاجئ ..

رفعت بيدي الورقة كدامة : واقوى جرعة للكوكائين الي تنعطى عن طريق الابر .. اذا المدمن اخذ الابر بعد ماكو مجال للعلاج ..
جريت تنهيدة : والي عند جبران ما جانت غير ابرة .. ابرة ..

گام يتنفس بسرعة .. : هو الخلاه يصير هيج .. ماكو غيرة هذا صاحبة .. والله اليوم موتة على ايدية ...
كام بسرعة فتح الباب وطلع يركض مثل المخبل ..
طلعت اركض وراه واصيح للعمال الگدامي : الزمو لا تخلونة يطلع ..

دفع الاثنين الي حاولو يعترضون طريقة ..
شفت عامر هستوة يدخل صحت بعلو صوتي : عااامر الزمة لا تخلي يطلع ..
عامر مباشرةً لزمة من اثنين ايدي وكتفهن ليورة لان عامر تقريباً جان نفس البنية الي عند حارث ..

طبگة عالحايط وحارث يدافع مثل المخبل : وخرررررر عااامرررر .. هددددننني ...
وصلتلة وجريتة اني وعامر ودخلناه لمكتب عامر الي جان اقرب شي ..

قفل الباب عامر : شكووو شني السالفة ؟ شبيك متسودن ..
حارث صاح : افتح الباب عامر .. والله اموتة اليوم .. بس خل الزمة .. وخررر عااامر ..

عامر نتر بي بعصبية : شووو اكعدددد .. ترة هم اعرف اصيح .. واگلب الدنيا مثلك .. بس لا تحط ابالك اخليك تطلع بدون ما اعرف شبيك ..

التفتت علي وحجيتلة السالفة وهو يباوع مصدوم ..
طبگ حواجبة بعصبية : هاي هيج شكولات ما تفيد وياهم الكتل .. لازم القانون يتدخل حتى يحققون وياه وهو يجر باقي امثالة اليعرفهم ..

حارث بهجوم : شنيييي وانشالله تريدني انتضر القانون يكعد يتشرط علينة .. لحد ما يموت ابن عمي ..
عامر : ابن عمك انشالله ما علي شي .. واذا رحت هسة شراح تستفاد يعني تنقذ ابن عمك .. بس اذا القانون تدخل راح تنقذ هواي شباب مو بس ابن عمك ..

تنهد بعصبية حارث ويهز برجلة ..
طلع تليفون عامر واتصل على رياض : الو ها خالي .. رايدك بشغلة مهمة .. وخطيرة ..
طلب من عندة يجي لهنا وحدة ويفهمة السالفة ..

حارث يفتر مثل السمجة المزوهرة .. ما گعد ولا دقيقة ..
ورة ربع ساعة اجة رياض ..
گعد يمنة وفهمناه السالفة ..

رياض : انتو متأكدين هو نفسة هذا الي ينطي الممنوعات .. يعني خاف من مصدر ثاني ..
حارث : لا هو ماكو غيرة .. متأكد من هالشي .. وحتى عباس جان موجود وياي من رحنة جبناه من عندة جان متخربط ويصيح من راسة .. وحتى راسم فحصة وكال ضغطة ما بي شي ..

التفت علية : واذا منتبه راسم من يومها وبدت حالة جبران تتغير .. واطباعة تختلف .. تغييير جذرييياً ..
گام رياض : هايهية مادام متأكدين .. اريد منكم شغلة بسيطة هسة ..

اتصل على المركز مالتة وطلب منهم مجموعة ..
التفت علينة : راسم وعامر انتو الي راح ترحون لبيت هذا الشخص وهسة اگلكم شتسوون ..
حارث گمز : انةة ارووح ومحد غيري ..

رياض رفع ايدة : ابدددداً .. انت تبقى وياي تراقب من بعيد .. لانك مثل ما گلت رحتلة لبيتة وجبت جبران من عدهم .. معناها ممكن يكون شايفك او يعرف بيك ابن عم جبران ..

حارث : وطبببة طوووب .. اروح يعني اروح .. محد يمنعني ..
رياض ومثل ما سمعت عنة ان يعصب بسرعة .. رص على سنونة : حارث مو وكت عنادك .. ما تروح انت .. لا تجبرني استخدم القوة .. هاي عنلية خطيرة تعتبر لعلمك ..

اذا ما تريد تخربهة علينة وعناها نفذ الي اگولة ..
وبعد معاناة وعصبية رياض وعناد حارث ..
كدر رياض يقنع حارث يبطل من الروحة ..

كعد يفهمنة اني وعامر شنو الي راح نسوي ..
اجو المساعدة الي دز عليهم ..
كال راح يراقبونكم من بعيد ..
حسينا نفسنا بعملية خطيرة ..

توجهنا لبيت هذا الشخص وطول الطريق حارث ويانة عالخط يدلينة بالطريق وهمة بالسيارة الورانة ..

وصلنة لبيتهم ..
دگينة الباب مرتين ..
وبالمرة الثالث انفتح الباب ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🕊

مرحبا للكل شلونكم انشالله تكونون بخير ..
اسفة عالتأخير .. بس والله ما عندي واهس ابد بهاي الضروف ..
منطقتنا سجلت اول حالة اصابة بالفيروس .. والخوف بدة يزيد ..
اتمنى تتفهمون ..

احبكم .. ولا تنسون صوتو وعلقو وكلشي ينداس دوسو ❤️🕊