رواية بنات للزمن الفصل الثامن 8 - بقلم سارة الشمري

الكاتبة : سارة الشمري🖤

تعال ولا تظني عليك زعلان
چا هو الگلـب من نبضه يزعل
صدگني أبد ما همني الصار
ولا زهرة محبتك عندي تذبل
مو انه دفنتك حدر العيون
أشوفن بيك ساعه وبيك آندل
عذبني هواك ومرمر الروح
وآگـولنّ ما يهم هو يتدلل

اندك الباب وراحت ريما فتحتة : ها بسمة شبيج ..

بسمة : الحكي .. خالتي نعمة گالبة البيت فوگ جوة ..
ابوي طلع بسرعة هوة وجبران ..

ريما التفتت علينة : تفضلو خالة يم حبوبتي بين ما نحضرلكم الاكل ..
ديلارا حجت بأستغراب : خو ما صاير شي ..

مريم كحت شكلهة تريد تغير الموضوع : ماكو شي .. احم ما عرفتوني عليكم ..
ابتسمت وديلارا تقدمت عليهة : اني ديلارا وهاي جيلان ..
ابتسمت بتوتر : اهلا وسهلاً .. اسمائكم حلوة .. يلة تفضلو ..

مشينة وراهة هي وريما ..
دخلنة للصالة الي جنة بيهة قبل لا نروح لجدو ..
شفنة حبوبتي كاعدة وتسبح بالسبحة البيدهة ..

حجت وية ريما : هاي المگموعة سكتت لو بعدة حسهة واصل لسابع جار ..
ريما : راحلهة عمي وجبران وبسمة ..

وجهت نضراتهة لمريم : كومي يمة اخذي خياتج وروحن للمطبخ حطن العشا بين ما نحجيلنة حجايتين انة وام مريم ..

مريم هزت راسهة واشرتلنة : اي تفضلو ..
گمنة وياهة اني وديلارا و اخذتنة للمطبخ ..
لگينة شذى مرت عمي محمد موجودة وتصب بالاكل للزلم ..

ابتسمت من شافتنة وكملت شغلهة ..
دخل رضا ابن مريم وراح لامة : ماما جوعان اريد بطاطا ..
مريم ابتسمت وشالتة وگعدتة عالميز وباستة بخدة : يخسى الجوع .. هسة اجيبلك بتيتة ..

فتحت الفرن وطلعت منة ماعون بتيتة وگعدت توكلة وهوة مستمتع ويسويلهة هممم وهي مندمجة وياه وعبالك طفلة وتحرك حلگهة مثلة ..
مو ليگول امة ..
ابتسمت على شكلهم الحلو ..

صبو الاكل واجو الولد اخذو ..
ووراهة حضرن اكل النة بالصالة ..
دخلت للصالة واشوف امي تفرك بيديهة بتوتر ومبينة مرتبكة وتفكر ..
اكيد حبوبتي شو شگالتلهة ..

تأففت بملل اذا هاي اولهة هيج ..
گعدنة ناكل وامي ما حطت شي بحلگهة وكلساع تباوع لمريم ..

مريم ما التفتت عليهة حتى .. ومشغولة وية ابنهة ..
اباوع لامي تجر حسرات ومتوترة ..

حطيت ابالي ان لازم اخلي امي ومريم علاقتهن تتحسن وتتصلح ..
بس بالاول لازم اني اقوي علاقتي بيهة .. لازم اتقرب منهة واختلط وياهة ..

خلصنة الاكل ..
طلبت من ريما ان نروح نشوف جدو بس گالت يمة خطار ..
رجعت گعدت وورة شوية امي گالت : نزلتن اغراضجن من السيارة لو لا ..

ديلارا : لا .. على اساس ينزلهن جبران بس گال بعدين ..
ريما : ولا يهمج هسة اني اخابرة واخلي يجيبهن ..

خابرتة ريما وگاللهة طلعت لبيتنة والسيارة مفتوحة والسويج بيهة وانتن روحن نزلن الجنط اني مااكدر اجي لان يمي خطار ..
ريما گالتلة خاف اكو خطار ..

كاللهة ماكو اي احد كلهم طلعو حتى ابوي وعمامي .. بس راسم بقى يم جدي وراح يجي حارث لان هوة دز عليهم ويريد يحاجيهم بموضوع ..

سدتة منة وگمنة اني وياهة وديلارا للسيارة ..
فتحنة السيارة الي جانت بنص الحوش الجبير يعني يم الباب الخارجي ..

فتحنة الباب الخلفي مال الخانة الورى مال السيارة ..
جنطتي جانت مشمورة وما الوحهة ..
نزلت جنطة امي وجنطة ديلارا ..

ديلارا اخذت جنطتهة ودخلت ..
سمعت صوت مريم من جوة : رييييمما تعالي جيبي فراشات من المخزن اني جاي اعزل بالمطبخ ..

ريما باوعتلي وحكت راسهة ..
واني عبالك قريت افكارهة : روحي ريما اني بس اصعد انزل جنطتي واقفل السيارة ..
ابتسمت ومشت دخلت جوة ..

باوعت لجنطتي وتأففت .. شأكول عليك رضوان .. هسة هاي من شمرة تشمر جنطتي هيج ..
رفعت رجلي وصعدت بالخانة ..

سحبت الجنطة ورجعت طفرت من السيارة ..
نزلت الجنطة ونزلت انفض بالبنطرون لان صار بي تراب ..

ما حسيت غير واني طايحة بالگاع والمي طاح على بنطروني ..
عطت بسرعة بألم لان طحت على مقعدي : عممممممممى ..

سمعت صوت رجولي : غير تنتبهين لدربج بالاول ..
فتحت عيوني بصدمة لان ذب الصوج بية واني اصلاً ما متحركة من مكاني .. : انت اعمى .. ادور تذب الصوج بية واني ما متحركة ..

رفعت راسي لان جنت انفض بالبنطرون من التراب .. بس شفتة وعبالك هالمشهد تكرر گدامي ..
فتحت عيوني بصدمة : اننننتتتتة ..

طبگ حواجبة مستغرب ردة فعلي : شبية ؟؟
صحت بي : انتة وين ماروح تطلعلي .. كل ماشوفك لازم تترسني مي .. ادري انتة اعمى لو ما تشوف گدامك ..

حك راسة بتفكير وگانة يتذكر ..
فجأة فتح عيونة وحجة : انتي مشمش .. وج شجابج هنا ..
طبگت حواجبي : مشمش شنو اشو متستحي ..

ضحك وهوة يباوع على قميصي المشمشي : انتي ما عندج غير هذا القميص شنو ..
انحرجت لان فعلاً جنت لابسة نفس القميص مال ذاك اليوم : وانتة شعليك .. وبعدين انتة شجابك هنا ابيت جدو ..

طبگ حواجبة : جدج ؟؟
فتح عيونة : اني شفتج بأربيل ؟.. معناتهة انتي وحدة من بنات عمي عاصم ..
جيلان : عمك ؟؟

ضحك بصوت عالي : ولللللك مثل هالصدفة هاي ما شايف ..
هزيت راسي واحس بالغباء : دوگف .. انتة منو ؟؟

مد ايدة يريد يصافحني ونضراتة تتفحصني بجرأة : حارث .. ابن عمج ضافر ..
فتحت عيوني واشرت علي : يعني انتة حارث النسونجي ..

رمش بعدم استيعاب : نسونجي ؟؟
هزيت راسي : اي نسونجي ..
راد يحجي بس طلع راسم من الديوانية : حاارث وين صرت .. جدي صارلة ساعة ما يرضى يحجي الا تجي ..

باوع علية ورجع باوع لراسم : بسيطة لقائاتنة الجاية اكثر ..
مشى ودخل للديوانية واني تأففت بعصبية ..
گبببر .. شكد مكروه .. شلون يباوع ..
الوحيد منهم الي كرهتة من دون ما اشوفة من بعد نعمة ..

اول شي من حجي جدو علي .. وادور الدگتة مالتة مال ذاك اليوم من اتصلت عالمعمل وفشلني بالكلية .. وادور هسة يحرجني على لبسي .. عااابت ..

اخذت الجنطة وقفلت السيارة ودخلت ..
دخلت للمطبخ لگيت مريم تمسح بالكاونتر ..

التفتت علية .. شفت عيونهة نزلت لبنطروني ..
ابتسمت وحطت ايدهة على حلگهة : هاي شمسوية بروحج ؟؟
باوعت لبنطروني وفهمت قصدهة ..
حجيت بسرعة : ترة والله مي .. لا يروح بالج بعيد ..

ضحكت هي : ادري شدعوة .. بس منين اجاج المي ..
حكيت راسي : من ورى ابن عمج الغثيث گلب علية المي ..
استغربت وحجت : منو ؟؟ راسم گلب عليج المي ؟؟

هزيت راسي : لا مو هوة ..
مريم : لعد منو ؟ محد من ولد عمي هنا .. رضوان ابيتهم .. وحارث طالع من العصر ما يجي لليل .. بس راسم هنا ..

جيلان : لا هذا الي اسمة حارث هسة اجة .. گلب علية المي وضل يدردم ادور .. شكد ثگيل دم ..
مريم ابتسمت : اذا حارث ثگيل دم .. والله حباب وحلو ..

حجيت بگلبي هوة من ناحية حلو فهوة يخبل ..
رديت عليهة : لا والله شو ما استلطفتة النسونجي على گولة جدو ..
ضحكت مريم ورجعت حجت : بدلي ملابسج لا تتمرضين لان المكيفات مفتوحة ..

هزيت راسي وطلعت واستلمتني حبوبتي : يا يا يا .. برررد .. حتى رضا هالجاهل وبطل من زمان ما يسويهة على روحة ..
امي تباوعلي وفاتحة حلگهة ..

اجيت ابجي من الفشلة : عمي والله ميي .. انگلب علية مي .. اروح ابدل احسلي .. شيفهمكم انتو ..

حبوبتي عوجت حلگهة : دهههههر شوف اللسان هسة طلع ..
رمشت بعيوني اكثر من مرة واريد استفزهة لان مساع ضوجت امي مدري شگالتلهة وخلتهة تتوتر ..

حجيت واني اشر عليهة : لا تحاولين تحجين علية .. ترة جدو دوم ايگلي انتي حباية ومقسومة من شهلة بصباهة .. بالشكل نسخة شبابج .. واللسان والتصرفات ..
حركت حواجبي وركزت عالكلمة : والوگاحة ..

فتحت حلگهة : يا من دهر الصابج .. منيلي الوكاحة .. هذا حجيج انتي .. ابو حافظ ما يحجي علية ..
امي طگتني بخزرة خوفتني ..

كعدت بصفهة : حجة والله .. وتدرين شيگول بعد ..
باوعتلي صفح : شيگول ؟؟

ضربت كتفي بكتفهة : ايگلي انتي عزيزة علية لان كل ما اشوفج اتذكر شهلة من جانت بعدهة شباب .. وحلاتهة وشعرهة وطولهة .. ايگلي جا غير خذت عگلي وگلبي ..

حصرتني الضحكة على شكلهة من رفعت الشيلة حطتهة على وجهة عود مستحية : يا يا يا .. دسكتي ولج .. جا كون مسولفلجن هيج ؟؟ ولا يگعد خضر ..

فتحت عيوني بضحكة : ها ها مو هستوة جان ابو حافظ .. شو صار خضر .. هسة شوية ويصير خضوري ..
دفعتني من جتفي على كيف : دگومي گومي نضفي روحج لا تعفنين ..

اختفت ابتسامتي .. : مو گلنة ميي والله مي .. منين اعفن ..
امي خزرتني : جيلان لا تطولين السالفة ماما .. وبدلي لا تتمرضين ..

رفعت اكتافي : وين اروح .. ديلارا مدري وين راحت وية ريما .. غير اشوف الغرفة الي راح انام بيهة حتى اخذ راحتي ..
حبوبتي : شتاخذين راحتج بعد ؟؟.. شو لبسج محصرر ليگول جلف مال قماش .. وشعراتج يتطايرن وما مشيلة (ما متحجبة) ..

ردت احجي بس سمعنة صوت صياح من الديوانية .. ورگعة الباب رجت البيت رج لان اكو باب خشبي بين الصالة والديوانية ..

طلعت كلهة تركض واحنة وياهم ..
شفنة راسم طلع ووجهة احمر دم ومبين عصبي وشكلة هوة الي رگع الباب ..

حارث طلع يركض وراه ولزمة من زندة : راااسم لا تستعجل وتروح .. ما تشوف حالة جدي شلونهة ..

راسم بدون ما يلتفلة عت ايدة منة حيل وعاط بي بصوت عالي وزمجرة : وخرررر حااارث ..
طلع من البيت وحارث طلع وراه يريد يلحگ بي ..

ريما حجت بخوف : شكو شبيهم ؟؟
مريم حجت بخوف وهي تركض للديوانية : خاف جدو بي شي ؟؟
طك عندي واير من سمعتهة وطفحت وراهة من الخوف ..

دخلنة لگينة جدو يفرك بصدرة وايدة اليسرة ..
لزمتة مريم بخوف : جدوو شبيك .. يوجعك شي .. فدوة حاجيني ..
هز راسة وهوة يحضن راسهة لصدرة ويبوس بشعرهة : مابية شي يا بعد كلهم .. لا تخافين ..

حارث //

ورة ما دخلت على جدي .. سلمت علي ..
باوعلي صفح : همزين من رديت .. من العصر لهسة متخم (طالع) .. اكعد اكعد ..

كعدت مقابيلة وقريب علي .. اشرت لراسم براسي بمعنى شكو ؟؟
رفع اكتافة بمادري ..

حجة وهوة يباوع لراسم : راسم اريدك تسمعني للاخير ..
راسم : تفضل يابة .. امرني .. 

جدي تنهد : انة جنت شايل هم شغلتين .. الاولى زمن وبناتهة .. بس هسة الحمدالله ارتاح گلبي من حطيتهن كدام ابوهن وادري بي راح يحطهن بروحة ..

سكت شوية وسألت اني بفضول : والشغلة الثانية ؟؟
هز راسة وباوع لراسم : انتة يراسم انتة ..
راسم استغرب : ليش يابة .. تأمرني بشي ..

حجة جدي ونزلت دمعة من عينة : ضلمتك وياي .. ما فكرت بيك .. مافكرت غير بمريم .. نسيت كلشي ..

غمض عيونة راسم وحجة بتنهيدة : انسى يابة .. الصار صار .. الحجي ما يفيد .. وهذا كلة بالماضي ..

حط ايدة على جتف راسم وذب القنبلة علية اني مو بس راسم : اذا رديت واطيتك مريم هسة ترضى ؟؟

فتحت عيوني وباوعت لراسم الي يباوعلة وهو مصدوم ..
وگف على حيلة وحجة وگانة يريد يجذب الي سمعة : يابة انتة ما متقصد الحجيتة مو .. هيج يعني بس حجي ..

جدي هز راسة : لا ابد .. وهذا رجاي منك .. مريم بأمانتك ..
ضغط على راسة : يابة مريم فوگ راسي .. وهي وابنهة اعيشهم معززين مكرمين .. هذا حقهة علينة لان مرت اخونة ..

جدي : لا تتهرب راسم .. انتة تعرف قصدي شني .. مرت اخوك بعدهة زغيرة بت عشرين وانة طالبهة منك .. غطيهة بعباتك ..

ضرب رجلة بالكاع بعصبية مكبوتة : يابة اروحلك فدوة لا تحجيهة ..
جدي حجة بأصرار : مو انتة جنت رايدهة ؟؟ مو اجيت تتوسل تگلي انة اخذهة لا تطيهة لاخوي .. وحارث وهاي الغرفة تشهد على حجيك ..

انفجر راسم بعصبيتة المكبوتة وصاح بعلو صوتة وهوة يضرب عالطاولة : بعدددديييييييش ؟؟ بعد ما زوجتهة لاخوي ودست على گلبي .. بعد ما خليتني اتغرب .. انتة تدري حجاياتك لهسة ترن براسي ذاك اليوم ..

والترجي وطحت كدامك وانتة ما اهتميتلي ..

اذكرك بيهن شني هنة .. اذكرك من گتلي راسم انتة لا تضل هنا .. روح سافر ادرس شتسوي سوي بس لا تضل هنا ومرت اخوك كدامك خاف تنضرلهة بغير نضرة وتضل الك نفس بيهة وهي مرت اخوك حرام ..

بوية اشايفني ما عندي غيرة .. لو طمعان بشكلهة ..

حارث .. اسمع كلامة واني كل تفاصيل ذاك اليوم قبل ٩ سنوات تحفر بذاكرتي ..

جان عمر راسم ٢٤ سنة واني ٢٢ ..
بوكتهة جنت ادري براسم يموت على مريم مو بس يحبهة .. ما جان يضم علية شي وكلشي يسولفلي ..
كل مرة ايگول الا اخلصهة من ضيم نعمة ..
ما اخليهة ابيتهة .. بس خل تكبر وتخلص الاعدادية واني احاجي جدي عليهة ..

ضياء جان عمرة ٢٢ سنة وهستوة متخرج من الكلية ودرس ابغداد ..
گال لجدي ان هوة يريد يدرس ماجستير ابغداد ..
جدي وافق وراسم شجعة على هالشي ..

جان كل همة ان يشوف اخوانة فد شي جبير ويعتمدون على نفسهم لان جان يعتبر نفسة ابوهم لان اخوهم الجبير من بعد وفاة ابوهم ..

ورة ما وافق جدي على تقديم ضياء ..
وراهة بيومين صارت مشكلة بالبيت ..
مريم مدري شمسوية ونعمة لازمة ايديهة حارگتهن بالصوبة ..

مريم الليل كلة ما نامت والبين انگلب گلاب ..
حبوبتي لعبت لعب بنعمة ..
جدي شب نار من العصبية وخايف على مريم لان جانت بعدهة زغيرة عمرهة ١٦ سنة ..

عمي عاصم لزم نعمة وراد يضربهة بس ابوي وعمي كوة لزموه ..

وهذا كلة وراسم ما يدري لان ماجان موجود بكربلا .. رايح بشغل لبغداد ..

جدي من شاف هيج صار وية مريم ويومية لو تكتلهة لو تحرگهة على اقل شي ..

راد يبعدهة عن نعمة بأي طريقة ..
طلب من ضياء يتزوجهة حتى ياخذهة وياه لبغداد .. عمي ما عارض لان شاف ان مريم راح تخلص بهالطريقة ..

وبيوم الي راد يعقد ضياء .. العقد متفقين ان يكون العصر ..
راسم اجة الصبح واني شايل هم شكبرة شلون راح يتصرف من يسمع ..

بس اجة اني كتلة اول واحد حتى من يسمع منهم ما ينصدم ويتصرف تصرف مو صحيح ..
بس ما جنت ادري بتصرفي ما راح افيد بشي ..

دخل على جدي بدون سلام ومباشرةً طلب منة يلغي الخطوبة ..
جدي تخبل من سمع حجية وصار عصبي : ولك راسم انتة تعرف شتحجي .. اروح لضياء اكلة الغي الخطبة لان اخوك يريدهة ..

راسم وهوة يلهث من العصبية : اي گلة .. هوة ما يحبهة .. بس اني احبهة والله .. يابة اموت اذا شفتهم گدام عيني متزوجين ..

جدي : ولك راسم انتة ما عندك غيرة .. هاي هسة تعتبر مرت اخوك .. شلون تگول احبهة .. المفروض انتة من سمعت بيهة انخطبت لاخوك تسكت وما تحجي .. ما تدري عيب وفشل ..

راسم لزم ايد جدي وحجة بترجي : يابة دخيلك لا تزوجهة الة .. اني اتزوجهة .. اني احاجي ضياء لا تخاف ..
جدي : ووين جنت هسة يلة حجيت حضرة جنابك ..

راسم : والله ردتهة تكبر .. ما تشوفهة زغيرة وبعدهة بالثالث متوسط .. ماجان عبالي تزوجهة وهي بهالعمر .. لا تضلمني يابة فدوة ..

جدي دار وجهة : الخطوبة تحددت .. والبنية قنعناهة ووافقت .. والشيخ يجي اليوم ويعقدلهم .. وانتة تنسى السالفة وبعد ما تجيب طاريهة ..

راسم نزلت دمعة من عينة ولزم ايد جدي وحجة بضعف : ابوس ايدك لا تزوجهة الة .. لا تضلمني وتدخل بخطيتي ..

جدي غمض عيونة بعصبية وسحب ايدة من راسم  : رااااسسسم .. گتلك سد السالفة .. اني اريد ازوجهة لضياء علمود ياخذهة وياه لبغداد ويخلصهة من ضيم نعمة ..

راسم حجة بسرعة : اني اخذهة لغير محافضة وما اخليهة تشوف وجه نعمة بعد .. بس لا تزوجهة الة .. اذا زوجتهة لضياء معناتهة حتى علاقتي بأخوي راح تخربهة ..

جدي حجة ومبين العناد ركب راسة : كلشي يتصلح بينك وبين اخوك وانتة هم تنسة مريم .. المهم عندي هسة مريم اريد ابعدهة عن نعمة .. والسالفة انحجت والخطبة راح تتم اليوم .. وهسة گوم من گدامي ..

راسم يحجي ومصدوم من قسوة جدي : لهالدرجة وصلت تدوس على گلبي وعندك عادي .. ودومك تگلي انتة عزيز عندي .. طلع كلة جذب ..

جدي التفتلة بسرعة : لا مو جذب .. انتة اعزهم كلهم .. انت اول حفيد من اول فرحتي ابني الجبير حافظ الله يرحمة ..
دنگ راسم للكاع وضغط على راسة ودموعة تنزل ..

جدي راد يطلع بس رجع التفت على راسم ..
حجة بصوت حزم : راسم .. كوم لا تضل هنا .. سافر شو وين .. ادرس قدم على ماجستير .. شتسوي سوي المهم ما تضل هنا ..
مرت اخوك ماريدهة تضل گدامك مادام انتة تگول احبهة .. معناتهة الك نفس بيهة تضل .. وحرام هالشي ..

وين ما تريد تروح روح .. بس لا تضل هنا .. ابقى فترة لمن تهدئ وبعدين تعال ..

راسم رفع راسة وهوة عيونة فاتحهة بصدمة ..
يمكن لو جدي طالع وما حاجي اخر حجاياتة جا احسن ..

فزيت من صفنتي ورجعت للواقع على صيحة راسم : يابة ما اتزوجهة هسة لو شيصير .. انتة الغرزت السجينة بگلبي ومرمرت حالي طول هال ٩ سنوات مو احد غيرك ..
اخوي بعمري ما حقدت علي ولا كرهتة لو شوية ..

بس انتة السويتة بية ما انساه ..
اني تگلي ما عندك غيرة .. اني تگلي ما اعرف العيب والفشل ..
ليش شگتلك اني ؟؟ كتلك زوجنياهة اني احبهة واريدهة .. بس انتة عندت دستني بالرجلين ..

هنتني وذليتني وطلعتني اسفل السافلين ..
واخر شي تگلي وين ما تروح روح بس لا تضل هنا ..
ااااخ لو مسوي كلشي ولا حجايتك هاي ..
طردتني من بيتي وتخليت عني .. بعدتني عن امي واخوتي واهلي ..

جدي يسمع ووجهة احمر واني لازم راسم من جتفة اريدة يهدئ لان مو زين على جدي بس بنفس الوقت ماكدر الومة ..

جدي : انتة گتلي لا تدخل بخطيتي بس انة اخطيت وهالخطأ لهسة لازم رگبتي .. خليني اصلح خطاي گبل لا اموت ..

راسم ضرب على رجلة بقهر وهوة راص على
سنونة : ااااخ ربببي .. شأحجي اني .. اجيت لهنا اشوفك من سمعت مريض .. ماردت اسوي مثل كل مرة واتجاهلك .. بس انتة التجيب بالسالفة وتذكرني .. بس هايهية لا تخاف .. رايح اني وما اضل هنا ..

كام بكل عصبية ووجهة احمممر .. طلع ورگع الباب وراه هز البيت هز ..
جدي صاح بية : روح وراه لا تخلي يروح ..

طلعت وراه اريد احاجيه وهوة يدفع بية وما يطيني مجال ..
صعد بسيارتة واني بسرعة افتريت اريد اصعد بالسيارة بصفة ..

وية ما حطيت رجلي وهوة شخط السيارة بكل سرعة .. عطت عيطة بخوف صدك ردت اطيح وصعدت بسرعة وجلبت باليدة : ياااااا يمممة يا رجاء ..

وهوة ضرب بريك وباوعلي : شبييييييييك .؟؟؟
كمت الهث من الهبطة : هسة لو ميت وساحگني سحگ بالسيارة .. وين تروح مني .. اكو مسودن يسوق هيج ..

فرك وجهة بعصبية وضرب عالستيرن : انزل حارث ..
هزيت راسي : والله ولا انزل ..

هز راسة بتوعد : انتة الردتهة .. استلم ..
شغل السيارة وداس بانزين ومشى بكل سرعتة وعبالك السيارة طايرة بينة مو تمشي ..

لزمت الأيد الفوك الباب وايدي الثانية لزمت جتف راسم وگمت اصيح : دخييييييلج يممممة رجااااء الحگيييييلي !!!...

گمت اضرب براسم على جتفة واني بلعت العافية من الخوف : خاب اوگف .. ولك خفف .. احترگوا عشيرتك راح نموت .. رااااسسسم .. وعلي اذا متت لا احاللك ولا اوهبك ..

احجي وياه واضربة وهوة لا حياة لمن تنادي وحتى بالة مو يمي ..
اخر شي وگف السيارة ..
التفتت اشوف نفسة السياج اليمة كراسي جنة نگعد عليهن قبل من جنة نسهر هنا وندرس ..

نزل من السيارة وطبك الباب حيل ..
نزلت وراه وهوة بس نزل رفع رجلة ورفس الكرسي شمرة بالكاع ..

اباوعلة بعصبية : انتة متخبل شبيك .. شلون تمشي بهالسرعة هاي .. هاي وانت الدكتور الفاهم والعاقل .. ادور تمشي هيج تريد تموت العالم .. عبالك بس حياتك بخطر .. لك بابا من تمشي هيج تعرض ناس كومة للخطر مو بس انتة .. شذنبهة العالم ..

شلت الكرسي وگعدت علي وحطيت ايدي على گلبي واني الهث من الخوف والحجي بسرعة : اااخ .. الله يرحمج يايمة .. ذكرتج مرتين هسة بدون ما اترحملج من ورة هالمخبل هذا ..

التفتلي وهوة راص على سنونة : حااارث .. اني من هاي ماريدك تجي وياي .. تسطر راسي بالسوالف .. اسكت رحمة لامك .. ترة واصلة لخشمي ..

حارث : ايباااه واذا واصلة لخشمك .. شني تموتني ..
عاط بية : طبك طوووب .. مو گتلك لا تجي .. انتة الردتهة ..

دك تليفوني رفعتة شفت المتصل ريم اختي ..
رديت عليهة : ها ريما ..
ردت بصوت كوة يطلع من المناشغ : حارث فدوة الحك لجدو مدري شبي ما يتنفس ..

الكاتبة : سارة الشمري🖤

حبايبي اسفة عالتأخير بس والله اوضاعي هالايام ابد ممرتبة وخيل متخربطة وضروف ..
وحالياً هسة اني مو ابيتنة .. واني اذا ما جنت ابيتنة ابد ما اعرف اركز بشي ولا اكتب شي اتمنى تتفهموني ..

احبكم كووومة .. ولا تنسون صوتو وعلقو وكلشي ينداس دوسو