رواية بنات للزمن الفصل التاسع والعشرون 29 - بقلم سارة الشمري

الكاتبة : سارة الشمري🖤

اصبر الروح بيش و انت بيه الروح
و اذا تطلع اظلن بس جسد خالي
لكيتك من جنت ما لاكي كل الناس
انت اول محب و انت صرت تالي
يلكلك محبه و انت احن مخلوق
معقوله الحمامه اتصير كتالي
صح ماكو بجمالك اني ادري بهاي
وروجه رقتك ما كظها اي جالي
حرام اعليك تزعل ونته الصوج
اجيك انه اعتذر و بلا ذنب خالي

راسم //

كلام رضا بقى يدور براسي من البارحة ..
معقولة يطلع الي ابالي صحيح ..
لعد ليش تتهرب مني طول هالفترة ..
ومن اقترب منهة تگوم ترجف وتخاف وترتبك ..

جنت گاعد بالغرفة .. الساعة ١٠ بليل .. رضا گاعد بالصالة يلعب بلي ..
طلعت مريم من الحمام تنشف بشعرهة بالخاولي ..

باوعتلهة لابسة دشداشة جوة الركبة وربع ردن لونهة ماروني ..
وگفت من انتبهتلي گاعد عالقنفة : راسم .. شوكت اجيت ..

راسم : قبل شوية ..
راحت هي للمراية ..
اباوعلهة والتفكير ماخذ عقلي ..

گمت اريد احاول افتح وياهة الموضوع ..
صرت وراهة وهي تباوعلي بالمراية ..
حطيت وجهي بشعرهة الرطب ..

ارتجف جسمهة وارتبكت وهالشي زاد شكوكي ..
درت وجهة علية شفت وجهة احمر ومتوترة ..

بستهة بخدهة واشتميت عطرهة كلهة عطور مال شامبو ..
ردت اتقرب من شفتهة وهي رجعت ليورة مرتبكة : اا اروح اشوف رضا وين ..

جريتهة من ايدهة ورجعت قربتهة مني : ليش تتهربين مني ؟؟
رمشت بعيونهة وما تباوعلي : ما اتهرب ..

راسم : كل ما حاولت اقترب منج تصديني وتتحججين برضا لو بفلان وعلان وتمشين .. ليش؟؟
رفعت عيونهة الي متوترة : هيج صدفة ..

راسم : صدفة ؟؟
قربت راسي منهة وحطيت عيوني بعيونهة : مريم .. رضا گالي ماما وبابا ما جانو ينامون بنفس الغرفة ابد .. وانتي گلتي ضياء جان يحب مرام حيل ويگعد يبجي عليهة دوم ..

وانتي تتهربين مني هسة ..
ومن اقترب منج ترجفين وتخافين ..
باوعت بعينهة بتركيز وحجيت بصوت قريب للحذر : انتي وضياء ما صارت بينكم علاقة ؟؟ ضياء ما اقترب منج ؟

باوعتلي ووجهة گلب احمر ونزلت راسهة ..
رجعت رفعت راسهة بأصبعي ..
هي هزت راسهة ب أي بدون ما تحجي شي ..

سحبت نفس قوي لداخلي وابتسمت وفرحت بداخلي ..
هي حجت : ضياء علاقتي بي ما تجاوزت علاقة صداقة واخوة ..

راسم : وليش ما حجيتيلي ..
مريم : اذا حجيتلك معناها راح تعرف رضا مو ابني ..
ابتسمت : وهسة شنو اليمنعج ..

باوعتلي وطبگت حواجبهة : رااسم .. اكيد ما راح اجي واگلك اني مو شسمة .. اشايفني ..
ضحكت : مو شسمة ؟؟؟

عضت شفتهة بخجل ورفعت ايدهة تريد تضربني على صدري : راااسم ..
وگفت ايدهة من باوعت لصدري .. نزلت ايدهة ودارت وجهة ..

رجعت سحبتهة وحضنتهة وحطيت وجهي برگبتهة : تعاي اني اسويج شسمة ..
هي حجت برجفة : راسم لا تخوفني وخر ..
رفعت راسي وباوعتلهة : لا يابوي انة اخوفج ..

مريم : راسم وخر لا يدخل رضا مثل البارحة فشلة ..
وخرت عنهة : خوش نزلي ينام يم امج ..
فتحت عيونهة : يااا ابني متعود الا ينام يمي ..

راسم : سنين هو ينام يمج ما شبع ..
هزت راسهة : لا واني هم ماكدر انام بدون ابني ..
دارت وجهة وطلعت من الغرفة ..
بسيطة مريم ..

بسمة //

واگفة گدام مراية غرفتي واعدل بروحي ..
لابسة فستان طويل من فوگ ضيك ومن جوة عريض ..
عدلت شعري الطويل الي شايلتة من جهة بماشة سودة ..
اخر شي بخيت من عطري المفضل (دانيا) ..

سمعت صوت ماما تصيح علية : تعاي بسمة .. اجة خطيبج ..
نزلت عالسريع ..
دخلت للديوانية من بعد ما طلعت امي ..

من شافني وگف ..
حجيت بأبتسامة : شلونك جبران ..
اجة علية بأبتسامة طبگ الباب واخذني بحضنة : هلا بهالوجه .. هلا بهالطول .. هلا بهالحلا هذا كلة ..

باسني بخدي وگعدني يمة عالقنفة .. : مشتاقلج والله ..
ابتسمت وحطيت راسي على كتفة : اني اكثر .. ليش متجي لهنا الا قليل ..
جبران : فشلة من خالتي .. وابوي يگلي لا كلساع رايحلهم عيب من اخوها .. اذا مستعجل تزوج وفضهة ..

ابتسمت بخجل ..
هو باسني بگصتي : بسومتي اجيت حتى اگلج ابوي حاجاني على موعد العرس ..
رفعت راسي وباوعتلة : شگال ؟؟

ابتسم ولزم ايدي : گال حددة بعد شهرين .. الخطوبة ما يصير تطول .. انتي شتگولين ؟؟
رفعت اكتافي : بكيفك ؟ ما عندي مشكلة بعد شهرين .. بس لازم اخوي يدري بالاول ..

رفع ايدي وباس باطنها : اني احاجي .. ولا يهمج ..
ابتسمت وهزيت راسي ..
قرب راسة من رگبتي وسحب نفس : وج شهالعطر هذا .. لا تحطينة اذا تطلعين لمكان لً تگعدين يم احد ..

استغربت : شبي ؟ شنو مو طيب ..
تنهد : ولج يخبل .. يجذب هسة بدي اكلج على هالعطر هذا وهالحلا هاي ..

ضحكت : صووتك جبران لا تسمعك امي ..
جبران : خل تسمع .. خل تدري شگد احب بتهة ومسودن بيهة ..

ريم //

فرحانة حيل ومخبوصة بخالة ما اخليهة تسوي شي بس كاعدة يمي ..
متحمسة لان يصير عندي اخ ..

اليوم الجمعة مال اهلهة واخذتني وياهة مثل كل مرة امهة تگللهة جيبي بتج وتعاي ..

هناك مخبوصين بيهة لان سنين انتضرو هالطفل ..
اني رحت يم البنات ..

حنين تنفش بشعرهة بأصابعهة حتى تصير بي حركة اكثر .. : اني اقنعة معليجن ..
استغربت : تقنعين منو ؟.

حنين : اووووو اجت ريمي .. تعاي تعاي .. نريد نقنع خالو رياض ياخذنة يطلعنة لكوفي مال عصير ومثلجات وهالسوالف .. ويفررنة شوية .. روحي ويانة ..

گعدت عالقنفة واخذت قطعة بسكت من الماعون : روحن انتن .. اني ما اروح ..
براء باوعتلي : ليش ما ترحين ؟؟

رفعت اكتافي : الطلعة مادام بيهة حنين وخالو رياض معناها تخلص عرايك وصياح .. وهم هوة عصبي واحنة اذا نطلع سوة نخلصهة ضحك وسوالف ..

حنين : هوة يتحارش بية اني شعلية ؟؟
ليلى : لا حبيبتي ترحين ويانة يعني ترحين .. لان اذا انتي ويانة معناها ما يرزلنة .. يستحي منج ..

تنهدت : بنات والله فشلة من عندة .. اذا اروح وياكم معناهة اضايقة ..
براء ابتسمت : بالعكس لا تضايقينة ولا شي ..

حنين حطت اصبعهة على حلگهة : اششششش .. اسكتن ..
حطت تليفونهة وفتحت مكبر الصوت واجة صوت خالو رياض : خيير حنين ؟؟

حنين نعمت صوتهة وحجت بدلع : عمووو حبيبي ..
انسد التليفون بوجهة .. هي فتحت عيونهة على وسعهن ..
اني والبنات طگيناهة ضحكة قوية من الفشلة الاكلتهة ...

رجعت اتصلت : كاااافي اسكتن ..
رد عليهة : خيييييير ؟؟
حنين بقهر : ليش سديتة بوجهي ..

رياض : لعبت روحي ..
حنين تأشر عالتليفون جنهة تريد تفترسة بس حجت بصوت هادئ : مقبولة منك يالغالي ..

رياض : الغالي ؟ معناهة اكو مصلحة .. احجي شتردين ؟
حنين : بس گلي اني شكم عم عندي ..
رياض بصبر : واحد والي هو اني .. وتاليهة شنو فضيهة ..

حنين : وشكم حنين عندك ؟؟
تنهد رياض : ياا صبر ايوب .. وحدة وانشالله تتزوج وتخلصني منهة ..
حنين : يوء يوء استحيت اشبيك ..

رياض : فضيهة وعلي راح اسدة بوجهج ..
حنين : لا لا .. فدوة عمو عليك الله طلعنة لمحل توت اني والبنات .. والله ضايجين .. ونگعد عاقلين ما نطلع صوت ..

رياض : لا ..
حنين : ليش لا .. حباااب عمو .. والله ضايجين يعني انت ما تنقهر علينة ..
رياض سكت شوية ورجع حجة : منو ومنو تروح ..

حنين : كلنا نروح .. البنات يعني ..
رياض : عددي ..
حنين : هو شأعدد جا ما تعرفنة بنات اخوك وخواتك ..
رياض : ها خواتي .. اي يلة خوش .. دقايق وانتن بالسيارة ..

سدت التليفون وگامن البنات يتطافرن ..
لفن حجاباتهن ولبسن عباياتهن ..
اني اصلاً كاشخة بس لبست عبايتي ورحت استأذنت من خالتي وطلعنة ..

صعدت السيارة وية البنات ..
براء ليگدام واحنة محصورين ليورة ..
هو التفت علينة وابتسم : يا هلا ومرحبا ..
حنين : يا هلا بيك عمو .. بس استعجل فدوة ..

باوعلهة هو : حنين گلتي ما اطلع صوت ..
حنين : هايهية سكتت ..
حرك السيارة ..
هيهات حنين تسكت الطريق كلة تسولف ..

وصلنة للمحل ودخلنة گعدنة على طاولة ..
اجة هو علينة : شتشربون شتاكلون ..
حنين خطية خانهة التعبير ونست اسم الحلو التريدة ..
گامت تأشر بيدهة بحركات غريبة : عمو هي اكو هيج اتصير مدورة .. جنهة طوبة ككو ..

ضربهة على ايدهة حيل : اييييدج نزليهة منا العالم ..
حنين : ايييي شبيك .. غير اوصفلك .. هاي اليذبون عليهة مدري شنو سائل وهي تذوب ..

رياض : اجيبلج ازبري واشربي وانجبي ..
حطيت ايدي على حلگي امنع ضحكتي ..
هو باوعلنة : شتاكلن انتن ..

البنات كل وحدة طلبت شي تاكلة وشي تشربة ..
التفت علية : وانتي ريم ..
باوعتلة بهدوء : قهوة مثلجة ووياهة كراميل ..
ابتسم : تحبين الگهوة ؟؟

هزيت راسي : اي ..
راح طلب النة وهو گعد وحدة على طاولة طلع تليفونة وملتهي وكلساع يباوعلنة ويرجع ينزل عينة ..

جابو الطلب واحنة كعدنة نسولف ونشرب ..
حنين كاعدة بصفي ضربتني بعكسهة : شوفي شوفي .. وتأشر بعيونهة على رياض ..

التفتت .. شفت ثنين بنات واگفات على جهة يباوعن علي ووحدة تندس بالثانية ..
حنين : عمي الحلو معذب قلوب البنات ..
ضحكت بصوت ناصي على تعبيرهة ..

البنات كلهن انتبهن على ذني البنتين ..
هو ما منتبه الهن لان صايرات على جهة ..
گام اجة علينة ..
شوية عن طاولتنة وجان وحدة من ذني البنات تضرب روحهة بي على اساس ما متعمدة ..

هو رفع ايدي ليفوك ورجع ليورة خطوتين ..
بس طاح شوية من العصير البيدهة على ايدة ..
حجت بصوت ماصخ من الدلع : اسفة عيني ما انتبهتلك ..

هو باوعلهة بأنزعاج وينفض بيدة من العصير ..
هي مدتلة كلينس : اسفة عيوني هاك هذا كلينس امسح ايدك ..
هو ما باوعلهة حتى : ما اخذ كلنس من غيري .. تلعب روحي منة ..

حنين طگتهة ضحكة بصوت ..
هو التفت علينة متعصب وفاتح عيونة ..
اجة يمنة وباوع علينة : حجاية ما اريد .. يلة گدامي للسيارة ..

حنين : يااا شنو للسيارة غير بعدنة ممخلصين عصيرنة ..
رص على سنونة : راح ارگع الكلاص براسج .. گومن يلة ..

طبگت حواجبي وحجيت بصوت ناصي بس شكلة سمعني : البنية گلبت العصير علي واجة يصيح علينة .. شنو هاي ..

هو باوعلي بعصبية : گلت حرف ماريد .. گومن يلة ..
تأففت وگمنة كلنة .. البنات خافن بس اني والله عصبت شنو يصيح علينة .. شسوينة هسة احنة ..

رحنة للسيارة گدامة وهو راح يدفع الحساب ..
شوية وصعد ويصيح ويدردم : گاعدة بمحل الخلفج تتمضحكين گدام العالم ..

حنين : عمو كلهن ضحكن .. بس اني ضحكتي عالية شسوي مو بيدي ..
عاط بيهة : وعمى اليعميج لا تگولين عمو وانتي ما تحترمين ..
حنين : لعد شأكول .. ابتسمت وكملت .. حضرة الملازم رياض ..

رياض : حنييين اسكتي كافي .. وعلي حضج اطيحة ..
تأففت عصبي وادور احنة محشوكين ليورى .. حريت ..
گمت ادردم : هسة مو گلت ما اريد اجي .. طلعة وياه ما تنراد ..

هو حجة بصوت عالي : ما جبرت احد يجي وياي انتن خابرتن ..
اني ما تحملت بعد ادور يصيح علية حجيت بصوت بشبه نتر : اني ما خابرت .. البنات لحن علية اجي وياهن .. واصلاً گتلهن راح تخلص عرايك .. وطلعت من خشمنة الطلعة ..

رياض : من وراجن غير .. مفضوحات ..
ريم : لا تعمم .. احنة شعلينة .. انت عصبت من ورى البنية هاي .. شنو تجي تذب حرگتك بينة ..
تشوفهة عدلة يا عـمـ ... حضرة الملازم رياض ..

هو التفت علية ومبين عصبي وكاتمهة وباوعلي برفعة حاجب : ما نحجي شي هسة بعدج جديدة وما تعرفيني يبت ضافر ..
رصيت على سنوني : ضافر تاج راسك ..

باوعلي بالمراية بأبتسامة تجلط : ضافر وبنتة تاج راسي .. ولا يهمج ست ريم ..
درت وجهي عالجامة واهز برجلي بعصبية والبنات ساكتات خايفات منة ..

من وصلنة اول وحدة نزلت اني ..
بقيت طول اليوم ساكتة ومعصبة لحد ما رجعنة للبيت گلت حتى لبيتهم بعد ما اروح ..

خالتي تباوعلي مستغربة : ريما شبيج ماما مو على بعضج ..
ريم : ماكو شي خالة بس تعبانة شوية ..
گمت بهدوء من يمهة ورحت لغرفتي ..

مريم //

جنت گاعدة بالغرفة اعزل بالملابس مال راسم بالكنتور ..
طلعت الاغراض كلهة ..
هو دخل گعد عالقنفة وبيدة التليفون ..

اعزل بالاغراض وشفت صندوگ زغير ..
استغربت .. فتحتة بفضول ..
شفت المحبس مال ضياء الجان دائماً لابسهة وجنسيتة وسبحتة وتليفونة ..

التفتت لراسم : هاي اغراض ضياء ؟؟
باوعلهن وهز راسة : اي .. من توفى جابوهن الي واني جمعتهن بهذا الصندوگ ..

گام واخذة من عندي ..
طلع المحبس وگلبة : هذا هدية منج الة ؟؟
طبگت حواجبي : لا .. ليش ؟

تربع يمي وبحضنة الصندوگ : من اجاني للسعودية مرة .. شفت هذا المحبس الشذرة مالتة حجري ومنقوش عليهة حرف ( م ) .. گتلة لابس حرف الميم گال هدية من مريم ..

رفعت اكتافي ببساطة : هذا المحبس مو مني .. من مرام .. جابتة الة من سمعت بي تزوجني وگالتلة ابقى لابسة حتى كل ما تشوفة تتذكرني وما تنساني وانت وياهة .. هو حجالي هالموضوع ..

گلبة بيدة ورجعة للصندوگ مبتسم ..: انتي تدرين شصار بية من گالي هذا هدية من مريم .. گوة لزمت روحي لا اتعصب وخليت وعفتة ومشيت ..
طبگت حواجبي مستغربة : ليش ؟ يعني ليش تعصبت بذاك الوقت ..

گام على طولة وابتسم بألم : مريومة اذا انتي جنتي ضامة بگلبج سر طول هالتسع سنوات .. انة هم جنت ضام بگلبي الم ووجع طول هالتسع سنوات ..

باوعتلة مصدومة : شنو قصدك ؟؟ الم شنو ؟
راسم : يعني مريم انتي تشوفين بعيني حب هالجم شهر بس ؟؟
تقرب مني خطوتين وحجة بتنهيدة طالعة من گلبة : لو تشوفين عشگ سنين تربع وكبر بگلبي ..

فتحت عيوني : راسم ما جاي افهم منك شي ..
گعد عالقنفة : هسة افهمج كلشي وانتي شوفي الالم الاحجي علي شنو ..

بدة يحجي واني صدمتي شوية شوية تزيد ..
شلون جان يحبني لهالدرجة .. واني جنت اشوفهة شفقة ..
شلون جدو سوة بي هيج وكسر گلبة وخلاه يتغرب ..
شلون عاش الم اليحبهة تكون مرت اخوه ..

يحجي واباوع بعيونة الالم واضح ..
دموعي گامت تنزل واني اشوف الكسرة بعيونة ..
للحضة تمنيت يرجع الزمن وارفض اتزوج ضياء ..
تمنيت لو جدو سمع كلام راسم ووافق يزوجني الة ..

رحت گعدت گدامة بالكاع ..
لزمت ايدة وهو باوعلي ..
حجيت بأبتسامة من بين دموعي : تسع سنوات واني ولا مرة حسيت بأي شي اتجاه ضياء غير الاحترام والصداقة..

بس بمجرد ٣ اشهر خلصتهن وياك ..
اخذت گلبي وعقلي وروحي ..
حفضت كلشي عنك وكل اطباعك ..
بس الخوف جان مسيطر علية ..

بس هسة كسرت كل حواجز الخوف ..
ماكو شي يمنعني من حبك ..

يباوعلي وعيونة كلهة لهفة ..
تقربت منة وحطيت گصتي فوك گصتة وحجيت بهمس :: احـــبـــك .. اي احبك واموت بيك .. ومن اليوم ماراح اتهرب منك مثل ما تگول .. گلبي وروحي وكلي الك ..

نزلت دمعة من عينة ..
مديت ايدي مسحتهة بأصابعي ..
هو سحبني لحضنة حيل وعبالك يريد يدخلني بضلوعة ..
بقى حاضني ويشم بشعري ويتنهد بصوت ..

دگ تليفونة قطع علينة الجو هو رفعة الرقم سعودي ..
گمت اني اكمل تعزيل الملابس ..

هو يحجي وتحولت السوالف لضحك ..
لحضة لحضة شو يحجي بصيغة انثى ..

راسم : ما تقصرين والله .. اني مشتاقلكم اكثر .. سلامة گلبج .. صار تدللي ..
منتضرتة يكمل المكالمة وحضرتة داگهة سوالف ..

باوعت لرضا هسة دخل ونعسان يفرك بعيونة ..
ابتسمت وباوعت لراسم .. لازم اعوضة ..

اخذت بجامة لرضا واخذت بطانيتة ..
اخذتة ونزلت بي وهو مطفي ما يدري بالدنيا ..
نزلتة يم جيلان ..

مريم : جلاتينة ممكن طلب ..
جيلان : امري ..
ابتسمت : عادي رضا ينام يمج اليوم ؟؟

هي ابتسمت اول بداية وبعدين طگتهة ضحكة ..
مريم : وسم شبيج ..
جيلان : هاهية حبيبتي ولا يهمج .. روحي تونسي روحي .. رضاوي يمي لا تخافين علي .. مو ايگولون خالاتنة مثل امهاتنة ..

شمرت عليهة بطانية رضا ادري بيهة تصنف : حيواااانة ..
هي ضحكت .. واخذت رضا ..

اني رجعت صعدت فوگ ..
ما لگيتة موجود .. همزين ..
دخلت للحمام سبحت عالسريع ..

طلعت لابسة البرنص لگيتة واگف بالغرفة ..
يبوو ما عبالي اجة ..
ابتسم وشمر التليفون عالمراية ..
تقدم مني واني درت وجهي بأرتباك ..

سحبني من خصري وضربت بصدرة : ايي نكمل وين ما وگفنة .. التليفون گطع علينة الجو بس هسة سويتة صامت ..

تذكرت اني وطبگت حواجبي : اي طلعك من جوي بس دخلك بجو ثاني .. ضحكتك وصلت لسابع جار .. ويامن جنت تحجي .. منو هاي المشتاقلهة ..

ابتسم تك خد : انتي تغارين شنو ؟؟
قلدتة : وانت تتهرب شنو ؟؟

شدني لحضنة اكثر : منو اليتهرب اني لو انتي ؟؟ هاي وحدة جبيرة بالعمر وتشتغل عاملة بالمستشفى الجنت اداوم بيهة .. وتعتبرني مثل ابنهة واني متعود احجي وياهة هيج .. هاهية هسة .. اذا خلصتي تحقيق خليني ابدي استكشافاتي ..

ارتبكت اكثر وگمت ارجف ..
حسيت بشفافة فوگ شفتي ويبوسني بكل لهفة وحب ..
جسمي صار يرتجف بين ايدي ..
قبلاتة نزلت لرگبتي وايدة نزلت للحزام مال البرنص ..

.. وووو معليكم بالباقي ...

الكاتبة : سارة الشمري🖤

يابة اعذروني والله الواتباد مالتي مدري شجاه اليوم ميشتغل ..
مسحتة ورجعت نزلتة ..
ومن هسة اگللكم لا تنسون ترة باجر وعگبة ماكو بارت ..

ولا تنسون صوتو وعلقو وكلشي ينداس دوسو 😘
احبككم ..