رواية بنات للزمن الفصل التاسع والثلاثون 39 - بقلم سارة الشمري

الكاتبة : سارة الشمري🖤

الحزن انا أراك صدفة،،، وان يجمعني بك الطريق ذات يوم،، فاراك بصحبة غيري،،، يدك في يده تنظرين الي فلا تعرفينني،، وعمري خلفك يناديك فلا تسمعينه

حارث //

عباس يحجي ومقهور ..
باوعتلة بتفكير ورفعة حاجب وهو ساكت ..

ثواني والتفت علية : شبيك ساكت ؟
حارث : وانت ليش ما تخطبهة وتفض الموضوع .. يعني ما يرادلهة .. انت ما جنت تدري بيهة ..

تنهد : المشكلة هي قبل فترة جايين عليهة خطابة وهي كايلة لاخوهة ما اتزوج الا اخلص دراستي .. واذا هسة خطبتهة ووافقت خاف اخوهة يشك ..

حارث : عامر يعرفك زين .. ويدري بيك ما تخونة .. جرب انتة ..
هز راسة : هي ما ترضى .. وتخاف ..

رفعت حاجبي بتفكير .. معناها يراد جذبة زغيرة تطلعك من وضعك هذا ..
باوعتلة : اكلك هي ما عدهة خالات بس مرت ابوي مو ..
هز راسة : اي هي هيج كالت ..

سويت نفسي مصدوم : لا يالله ..
طبگ حواجبة : شبيك ..
حارث : قبل يومين سمعت اختي تحجي اتكول جايين خطابة على بنت اخت مرت ابوي ويمكن يوافقون .. بس لا هي التحبهة ..

وگف على حيلة بعصبية : خطابة شنيي .. جايين على ليلو .. والله ماخليهة تعرس ..
وكفت وياه ورفعت اكتافي : مادري بعد .. الحك على روحك لا تروح منك .. سوي اي شي ..

فرك وجهة : شسوي شسوي .. انت ابو الافكار .. شور علية بشي ..
حارث : روح لعامر وحاجي .. سوي روحك ما تدري بخطوبتهة .. كلة جاي اخطب منك اختك .. هو اكيد ما يفضل الغريب على صاحبة ..

هز راسة ويطلع تليفونة : اي راح اخابر ابوي .. واخلي يخابر ابو عامر ..
حبست ابتسامتي على شكلة شلون خايف .. بس لازم اسوي هيج .. اذا عفتة معناها يضل حاط ايدة على خدة وساكت ..

خابر على ابوه وكالة هسة تخابر على ابو عامر ..
وابو اصلاً يعرف ابو عامر يعني بالمناسبات مالتنة يلتقون .. معرفة سطحية يعني مو ذيج العلاقة القوية .. بس هسة راح تقوى ان شاء الله ..

ابو يريد يفتهم منة بس هو لطش على : هسسة تخابرة بوية لا باجر ولا عگبة .. وكلة شتردون حاضرين .. وها اذا كالو تكمل دراسة كللهم تكمل يمي .. واذا ما قبلو كللهم حتلو بس عقد .. المهم ترهمهة ..

حطيت اذني عالتليفون واسمع ابوه : خايب شعندك هيج مستعجل .. بس لا مسويلك مكسورة وية البت ..

عباس عاط بصوت من يمي كمزت : افاااااااااااء افا عليك ابو عبيس .. شني ما تعرف ابنك زين .. بوية البت احبنهة .. وجايين عليهة خطاطيب .. اريدك تحاجيهم كبل لا يردون جواب ..

شوية وسد التليفون من ابوه ..
ضل يحوس .. ويفتر بالحديقة رايح جاي .. واني اباوعلة : كافي اكعد والله راسي كام يفتر ..

دك تليفونة وهو رفعة وتنهد : هاي امي .. اسمع راح تطيني محاضرة وتخبصني بنخلة بت خالتي ..

فتك خط وعلى الصوت ..
بعدة ما حاجي وامة حجت : ولللك عبيييس .. شني تريد تعرس وانة مادري ..
عباس : يمة بعدني ما معرس توني فكيت حلگي ..

ام عباس : والله لو ما سامعة ابوك يحاجي مدري ياهو بالتليفون ويگلة جا ما دريت .. ادري انة امك لو غريبة .. غير المفروض اتگلي وانة اروح اخطبلك ..

عباس : يمة السالفة صارت بسرعة .. اعذريني وحگج علية ..
جرت ونة ما عاجبهة صدك ضحكتني : وشني منين هاي الرايدهة .. شبيهة نهلة بت خالتك ..

جر نفس : يمة لخاطر الحسين .. ماحبهة ولا اريدهة .. انة احب هاي الخطبتهة .. ورايدهة هي وما اريدن غيرهة ..
ام عباس : ديلة على كيفك شگلت هسة انة وگبيت علية .. روح تاخذمن اخذ .. بس منين هي هاي الكاتل روحك عليهة ..

عباس : اخت صاحبي .. وعلوية تصير ابت اخت مرت الحجي ضافر ..
ام عباس : هااا جنة الحجي خضر .. اي خوش بيهة الخير .. جا مادام علوية دخيل بخت جدهة .. شحجي بعد لا تشور بية ..

ضحكت على فطارتهة ..
وعباس نوعاً ما ارتاح وابو كالة خابرتهم وكالو نفكر ونرجعلكم خبر ..
سد التليفون وباوعلي بأبتسامة : يوم الالك ابو عباد ..

جريت تنهيدة : الله كريم ..

بسمة //

رجعنة للبيت .. من دخلت سألت هادي على جبران كال بعدة برة ما رجع ..
بقيت اني يم الحجية ومريم .. وديلارا صعدت لغرفتهة ..

شوية واجة راسم كعد يسولف وية حبوبتي ..
راسم : حبوبة صدگ ما كتلج .. رضوان بطل ما يتزوج بت خالي ..
حبوبتي تهلل وجهة : يمممة شني شصار .. رحمة على ابيك على هذا الخبر ..

راسم ضحك : والله حبوبة يبدو متعاركات وية امي .. وامي بطلت ما تريد بتهم .. وكلش كاطعة ..
حبوبتي رفعت ايديهة : يااا رحمتك يا ربي .. خلصتنة منهم .. همة خوال لو جنهم عاگول .. وبناتهم ما ينحطن بالبيت عيونهن تفرفر ..

راسم بشقة : افااا جدة .. ترة ذني بنات خالي لا تنسين .. شبيهن ما ينحطن ابيت .. حبابات وما عليهن كلام ..

عوجت حلگهة حبوبتي : وانت شني ولك ما رضيت عليهن .. انة احجي شوف عيني .. البنيات وحدتهن جنهة مسودنة فاكات حلوگهن عالبشر .. ليگول ما شايفات .. حتى لبس ما يعرفن يلبسن ..

راسم رجع ضهرة ليورة ..
اباوع مريم طابگة حواجبهة وتباوعلة بعصبية وتهز برجلهة ..
كمل هو كلامة وما منتبه لمريم اصلاً وما حاط ابالة .. مبين بس يريد يتشاقة وية حبوبتي وينصب عليهة وناسي مريم ..

راسم : شبيهن ما يعرفن يلبسن .. مو شفناهن بعرس جبران .. حالهن من حال بناتنة ..
حبوبتي فكت عيونهة : ياااا دهههر .. وين شفتهن ولك ..

راسم : هنة اجن سلمن ولابسات صايات .. يعني ماكو فرق بينهن وبين بناتنة .. هو لبس ..
حبوبتي : ياااا شني عود تقارن لبسهن بلبس بناتنة .. بنياتنة غير جنهن لعابات طلعن يخبلن ..

راسم ضحك : جا حبوبة بنياتنة تعويد .. مريم تقريباً جارة من اهل بغداد لان عاشت ٨ سنين هناك .. وجيلان وديلارا جارات من اربيل ومتطبعات بيهم ..
اما بنات خالي من اهل كربلا .. وعلى كد ما متعودين هنا ومتشددين باللبس .. هنة يلبسن محتشم .. بعد شني الما عاجبج بيهن ..

مريم كامت وكفت ورافعة حاجب لراسم : تصبحون على خير .. دكتور راسم عود من تجي جيب ابن البغدادية وياك من برة حتى انومة ..
دارت وجهة وطلعت مبينة معصبة ..

راسم فاتح عيونة : اااه .. زعلت ؟؟؟
حبوبتي : حيييييييل .. هاي تالي الشطارة وشالتك الغيرة على بنات خالك .. روح حيل وياك اكلهة .. عساها ما ترضى عليك منا لاسبوع ..

راسم طفر يريد يطلع : حجية كولي يا الله .. كلشي ولا دعواتج ..
طلع من الصالة وصعد فوك وراهة ..
حبوبتي تضحك وتصيح وراه : رويسم نسيت ابن البغدادية ما اخذتة وياك ..

كمت اضحك وية حبوبتي وهي باوعتلي واختفت ضحكتهة : وانتي شمكعدج هنا .. زلمتج وين ؟
وكفت واضحك : وصلت الفكرة حبوبة .. رايحة .. تصبحين على خير ..

طلعت من الصالة بس قبل كلشي صعدت فوك ..
فتحت باب غرفة ديلارا لگيتهة هستوهة طالعة من الحمام ولافة الخاولي على شعرهة ..

مديت ايدي كدامهة واشرلهة بمعنى انطيني ..
طبگت حواجبهة : شنو شتردين ..
رفعت حواجبي : الـ٢٥ الف مالتي .. يلة عالسريع ..

فتحت عيونهة : مالتيش ؟؟ تطلبيني واني مادري ..
حركت حواجبي بأبتسامة : لا حبيبتي .. بشارة بشارة ..
ديلارا طبگت حواجبهة : بشارة شنو ؟؟

ابتسمت : رضوان بطل ميتزوجهة لبت خالة وامة متريدهة وقافلة هالمرة ..
كامت وكفت بسرعة وتباوعلي بلهفة : منو گلج ؟؟
بسمة : هسة راسم كال لحبوبتي .. الواضح امة متعاركة وياهن ..

كعدت بأبتسامة وتنهدت ..
دك تليفوني رفعتة شفتة رقم جبران ..
معناها اكيد بالبيت هوة ..

طلعت عالسريع ورحت لبيتنة ..
وصعدت فوك ..
بس دخلت شفتة كاعد عالقنفة ومتعصب ..

ابتسمت : الله يساعدك حبيبي ..
كام اجة علية وجرني من زندي : همزين تذكرتي اكو حيوان هنا .. لو ضالة بعد هناك شعندج ..

طبگت حواجبي : ايي جبران ايدي شبيك ؟؟ والله سألت هادي وكال انت مو هنا ..
غرز اصابعة اكثر بزندي : ولج احجي على روحتج لبيت عمي .. شلون تطلعين بدون ما تگليلي ؟؟؟

عضيت شفتي وباوعتلة بتوتر : والله حبوبتي كالت روحي ويانة ..
عاط بوجهي : وانة شنييي خراع خضرة هنا ؟؟ ما حاسبتني رجال شني ..

هزيت راسي : لا والله حبيبي مو هيج .. ردت اكلك بس ما لكيتك بالبيت .. واتصلت عليك اكثر من مرة وانت متجاوب ..
جبران : من شفتيني ما رديت عليج معناها تنجبين وتكعدين بالبيت وماكو طلعة ..

غورگت عيوني واباوعلة : والله البنات لحن علية وحبوبتي كالت روحي .. كالت ميعصب لان ذولة بيت عمة مو مكان غريب .. ورحنة علمود ريم ..

جبران : حجايتي ما تنعاد مالي شغل بفلانة وعلانة ..  ماكو طلعة بدون اذني سمعتييي لوو لااا ..
هزيت راسي بدون ما احجي شي ..

دفع ايدي وراح تمدد عالجرباية واني اباوع مصدومة ..
شبي هيج متغير .. شسويت هسة اني .. ممتعودة هيج يعاملني ..

رحت دخلت للحمام سبحت وكمت ابجي جوة الدوش .. هاي اني على اقل شي وتنزل دموعي ..
خلصت حمام وطلعت ما لگيتة بالغرفة ..
رحت مشطت ونشفت شعري بالشسوار وبدلت وطفيت الاضوية وتمددت على فراشي وتغطيت اريد انام ..

شوية وسمعت صوت الباب انفتح ..
غمضت عيوني تصنعت النوم ..
احس بحركتة بالفراش من اجة تمدد واني منطيتة ضهري ..

شوية وحسيت بأيدة على خصري ..
سحبني وقربني منة وحطني على صدرة .. وايدة تلعب بشعري ..

راسم //

واگف اباب غرفة رضا ومنتضرهة تنومة حتى تطلع واحجي وياهة ..
ما ترضى تحاجيني ومطنگرة علية .. بس والله بقصدي احجي وادافع على بنات خالي هو اني شمعرفني بيهن .. اصلاً ما منتبه لمريم وناسيهة .. ردت اتشاقة وية حبوبتي ..

اباوعلهة حاطة راس رضا على ايدهة وهو حاضنهة ويغفي ..
هو نايمة وياه على جربايتة وناثرة شعرهة عالمخدة وحتى ما تباوعلي ..

تقربت منهم وحجيت بصوت ناصي : نام رضا يلة كومي ..
رضا رفع راسة علية : اهوو عمو روح نام وحدك .. ماما كالت انام يمك اليوم ..

اباوع لمريم تباوع ببرود بس مو علية ..
تلعب بشعر رضا صارت عندة عادة من ينام ..
تنهدت : لعد سوولي مكان يمكم ..

رجع رفع راسة : تنكسر جربايتي عمو .. انت ثگيل حيل .. بس اني وماما خفيفين .. روح روح نام وحيدك ولا تخاف ما يجيك الواوي .. ماما اتگول اذا كلت بسم الله الرحمن الرحيم ما يجيك شي ..

: وللك ناااام اليوم على حضي مصحصح ولسانك شطولة .. يلة نام وصير شاطر حتى باجر اجيبلك علاگة حلويات وكلهة علوج ..

هو فتح عيونة بفرحة : صدددك .. راح انام يلة .. روحي ماما روحي اني اعرف انام وحدي صرت جبير .. خطية عمو راسم زغيرون ويخاف وحدة .. روحي نومي هو ..

ضحكت وهي هم ضحكت .. شكد فطير ..
غمض عيونة هو بحماس ..
كمت اني دنگت حطيت ايدي جوة رجليهة وايدي الثانية جوة ضهرهة وشلتهة بسرعة وهي شهكت وتمسكت برگبتي : يممممة نزلني راسم لا اطيح .. نزلللننني مااروح وياك ..

طبگت حواجبي وباوعتلهة واني اطلع من غرفة رضا : اوووف رضا ايگول عليج خفيفة منيلج ؟؟  كسرتي ضهري ..
تتحرك وتريدني افكهة : نزلللننني .. محد گلك شيلني ..

نزلتهة عالجرباية وهي راحت لجهتهة رفعت اللحاف وتمددت : طفي الضوة وياك ..
رفعت حاجبي : بعد خو ما تردين شي ؟ كوومي جبتج احاجيج ..

ما تحركت من مكانهة اصلاً ..
رحت لجهتهة وخرت اللحاف عنهة ومديت ايدي على بطنهة وكمت ادغدغ بيهة وهي عاطت : لااا راسم وخر ..

كمت ادغدغهة بالزايد وهي تضحك ولازمة بطنهة تريد تحجي ما تكدر : راسم .. لا وخر .. بطني ..
تهز براسهة واني اضحك عليهة وهي متكدر تحجي من الضحك ..

اخر شي حجت گوة : راسم بطني فدوة اني حامل ..
وگفت فجأة واباوعلهة مصدوم : شنو شگلتي .. عيدي ما سمعت زين ..

هي تلهث من الضحك عدلت كعدتهة وعدلت البدي مالتهة ..
سكتت وباوعتلي : اي يمكن حامل .. جنت شاكة وجبت هذا التحليل المنزلي وسويتة وطلعت ايجابية .. ردت اتأكد يم الدكتورة قبل لا اگلك ..

اباوعلهة مصدوم ومتفاجئ : حامل .. يعني طفل ..
باوعتلي صفح : لا جيس حب .. هاي عود انت الدكتور وتسأل ..
رجعت تمددت ودارت وجهة وتغطت ..

جريت اللحاف بفرحة وسحبتهة من ايدهة : ايييي على كيفك ايدي شلعتهة ..
حضنتهة وصحت بصوت عالي من الفرحة : اووووووووووف ربيييي .. راح يجي حافظ .. لج راح يجي حافظ ..

مريم بضحك : راسم على كيفك مو اكيد ..
راسم : هو شنو المو اكيد جا بكيفج .. باجر نروح للدكتور ونتأكد ..

اختفت ابتسامتهة ورجعت برطمت : ماروح وياك .. اروح وية جبران لو هادي .. انت روح شوف بنات خالك خاف محتاجات شي خطية ..

ضحكت : يمة الغيورة ادور هرمونات الحمل هم اجت ..
دارت وجهة بزعل ..
حضنتهة من ورة : يروحي انتي صدگتي بكلامي .. هو اني شأعرف منهن .. ردت اتشاقة وية حبوبتي واحجيهة .. مو بقصدي ازعلج ..

رفعت حاجبهة : هسة انت تريد تراضيني لخاطري لو لان عرفت بية حامل ..
فتحت عيوني : ليش منو الصارلة ساعة واكف ينتضرج بغرفة رضا وشالج وتكسر ضهرة ..

ابتسمت : انت ..
قربت وعضيتهة من خدهة وهي كمزت : اييي شبيك لا تعض غير حامل ..
طبگت حواجبي : جا حامل بخدوج ..

ضحكت وحضنتني : اتشاقة شسوي .. متوترة وخايفة .. لان اول مرة ..

بعد مرور اسبوع // ريم ..

مر اسبوع ورجلية تحسنت وگمت امشي عليهن مثل قبل بس الم بسيط ..
حارث طول الاسبوع ما يگعد بالبيت واذا اجة بليل يكعد بالحديقة يدخن خاف ابوي يشم ريحة الدخان وبس معصب ..

مريم حللت وطلعت حامل حيل فرحتلهة .. ودارو بالبيت الثاني هي وراسم ..
جيلان ما حاجية وياهة بس من تليفون ديلارا على كد السؤال وتقفلة اتكول اخاف من بابا .. حيل تقهرني ..

اليوم تجي مشية خطابة على ليلى بنت اخت خالة هويدة .. وهو عباس صديق حارث ..
خالتي راح تروح لبيتهم لان هم يجن نسوان يشوفنهة وكالت انتي هم تعاي لان البنات كلهن راح يرحن لبيتهم ..

اني طبعاً وافقت ما افوت هيج مناسبة ..
لبست تنورة طويلة ضيگة رصاص وقميص ابيض مقلم بأسود ولفيت شال لونة رصاصي وبي ورد نيلي ..

رحنة اني وخالتي لبيت اختهة وصلنة حارث وراح لصديقة لان راح يجي وياه بالمشية ..

من رحت البنات كلهن موجودات ..
فرحن من شافني ..
ليلى مبدلة كوستم تنورة قصيرة ووياه السترة مالتة لونة احمر .. وهي بيضة وطالعة تخبل ..

هي اصلاً حلوة لان النسخة الثانية من رياض .. هم عيونهة زرگ و بيضة وطويلة وجسمهة متناسق ..

على طاري رياض تنهدت من يوم المستشفى بعد ما شفتة .. مشتاقتلة بس هم شايلة بخاطري من صيح علية كدام البنات ذاك اليوم واني لهسة ما اعرف شنو السبب ..

جنت كاعدة وية البنات بغرفة ليلى ونسولف وهي متوترة ..
وحنين طبعاً هي الي تلطف الجو ..

شهد : اي ريمي البارحة اتصل عليج بليل وانتي متردين ..
ابتسمت : والله حقج اعذريني جنت ناسية تليفوني فوگ وكاعدة بالصالة لان الولد جانو يمنة .. راسم وهادي وو

كملت كلمتي وحنين شمرت روحهة من القنفة للكاع وتربعت وحطت ايدهة على گلبهة وجرت تنهيدة بصوت عالي : اااااااااااه يا قلبييي .. البارحة شفتي الكراميل .. نياااالج ..

ضحكت عليهة : اي شفتة لعد واذا ..
حنين : شلووون كدرتي تنامين .. اني بيوم الي شفتة الليل كلة كل ما غمضت يخطف كبالي القبوط الاسود والساعة الذهبية .. والشععععر اليلللمع ..

تنهدت وكملت : وطبگة الحواجب وابتسامتة من شافني اباوعلة .. يبووووو ..
براء : هوووب هوب .. منو هذا كراميل .. حنين شو مستخفة ..

حنين : دطيري من يمي .. لج هذا ابن عم ريمي .. اجاهة للمستشفى .. اسمة هادي ولجن بس شنو .. دخييل الهادي بسم الله ما شاء الله هيييبة وطوول ووسامة وعضلات وجماال ..

حطت راسهة على فخذي بذوبان وغمضت : وحنااااااان ..
شهد بحماس : صدددك لهالدرجة .. ريمي شوفيني صورتة عليج الله تحمست .. 

كمزت حنين : لااااااء ماكو ممنوع .. ادري بيج تطيح عيونج عالحلوين .. هذا ما تباوعيلة اني حجزتة قبلج .. وشفتة قبلج وهو شافني قبلج .. يلة كومي ..

شهد : ياااا شنو حاجزتة هو قطعة قماش .. واذا شفتي انتي مو معناها صار الج .. وبعدين شنو راح اكلة اني هو بس اشوفة ..

حنين بأمر قطعي : لاء انتهى الموضوع ..
شهد كرصتهة من زندهة حيل وهي عاطت : يبووووو ..
اسماء : ووجععع جم مرة توبتج حبوبتي من اليبو ..
حنين : اي شسوي هي لازكة بحلگي ..

سمعنة صوت سيارات كمزنة للشباك : اجوووو ..
نباوع عليهم من فوگ .. ماشاء الله هوا جايين ..
حارث گال عباس من اهالي البصرة واهلة كلهم شيوخ وعدهم بالمشية كلهة تجي ..

واكفين ابو عامر واخوانة ٢ يعني عمامهة وواكف ابو عجاج اخو هويدة الجبير ووياه رياض وعامر .. واگفين يستقبلونهم ..

عيوني تثبتت على رياض .. الوگفة مالتة كلهة شموخ وهيبة .. يمكن لان ضابط هي شخصية ووكفتة تجبر الواحد يحترمة ..
بقيت اتأملة شلون يصافحهم ويسلم عليهم واحد ورة الثاني ..

دخلن للبيت نسوان لابسات عبي جم وحدة ..
باوعنة لعباس لابس دشداشة لونهة حليبي ولابس وياهة جراوية لونهة نيلي لافهة خليجي ..

باوعت ل ليلى تباوعلة وترجف وغورگت عيونهة ونزلت دمعة من عينهة ..
استغربت ردة فعلهة .. البنات ما انتبهن عليهة حتى وملتهيات يباوعن عليهم ..

بس شهد شافتهة هيج .. جرتهة بسرعة مبينة تريد تضيع الموضوع قبل لا ينتبهن الهة البنات : يلة امشي انزلي حتى تقدمين العصير لاهل الولد عيب ينتضرون ..

اخذتهة وطلعت ..
حنين تباوع للباب : هاي شمالهة ملگوفة ..
طبعنة احنة وراهن بس بقينة عالدرج واگفين ونباوع من فوگ لان عيب ندخل اكيد ..

دخلت ليلى عليهن للصالة وبيدهة صينية العصير ..
احنة ما نسمع صوتهن هواي ..
بس خليناهة دخلت وتسحبنة وحدة ورة الثانية للمطبخ حتى نحضر ضيافة الرجال ..

حارث //

كاعدين بالديوانية مال ابو عامر ..
عباس فرحان وعندة اليوم عيد ..
من مساع يعدل بروحة ويرد ليورة .. 
وهم فرحان لان على گولتة صديقي ما فضل الغريب علية ..

كاعد اني بصفة وهمة يحجون هاي الرسميات ..
عامر كاعد بهدوءة المعتاد وبصفة رياض هم بهيبتة المعتادة .. ابو عامر يحجي وية ابو عباس ويرحبون بينة ..

اباوع لعباس شارگ الحلگ ..
ابتسمت : اگول عبيس .. اكلك شي بس لا تنصدم ..
حجة بدون ما يباوعلي : احجي لا تخاف ..

حبست ابتسامتي : ترة سالفة الخطاطيب الجايين عالبنية .. هاي تأليف من يمي وكلهة جذب .. ماكو احد جاي عليهة ..

فتح عيونة على وسعهن واختفت ضحكتة وباوعلي مصدوم .. لا ارادياً حجة بصوت عالي : هااااه ..

المكان صار هدوء والكل عيونة على عباس ..

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

الكاتبة : سارة الشمري🖤

مرحبا للكل .. اسفة ادري لازم التنزيل يكون يومي ..
بس ماكدر اكتب ..
لان اني نضري ضعيف والبس نضارات طبية .. وقبل اسبوع تقريباً ابن اختي الزغير كسر نضاراتي .. ولهسة راسي يوجعني وعيوني تغوش وبيهن الم ..
وطبعاً ميعرفون هالشي غير الي يلبسون نضارات ومتعودين يبقون لابسينهة .. ويعفون شنو الالم والدوخة الي تصير من يذبونهة ..
ولهالسبب اني ماكدر اركز بالكتابة هواي لان عيوني تغوش ..

وتحياتي للجميع ..
احبكم .. ولا تنسون صوتو وعلقو وكلشي ينداس دوسو ..