رواية بواقي روح الفصل الثالث عشر 13 - بقلم نسمه عبدالله

رواية بواقي روح

الفصل الثالث عشر13

بقلم نسمه عبدالله

بعد رجعت نمت ل فترة م بعرف قدرها شنو بس لما صحيت كنت في المستشفى، قعدت في السرير ب تعب و قلت انا الجابني هنا شنو ، كنت في عنبر فيهو زي سبعة مرا غيري ، اخر شي بتذكرو اني نمت قعدت فترة نص ساعة حتن جات امي لمن لقتني صاحية سرعت و جات علي ، قلت ليها امي حصل شنو ، قالت لي و تسألي ي خايبة ، قلت ليها انا في المستشفى لشنو ، قالت لي امبارح جيتي من الشغل رقدتي زي الميتة و قدر م حاولت اصحيك زيك زي الميتين م اتحركتي ، ابوك جا لقى الغسيل في محلو و لقاك نايمة اتفشى فيك كدا بس برضو م قمتي و في ليلنا داك شلناك جبناك المستشفى و طبعا عارفة السبب شنو ، قلت ليها م عارفة نهائي اقسم بالله، قالت لي اوعك تكذبي في وشي لقو في دمك دا جرعة مخدرات كبيرة و سببت ليك تسمم و لو م جبناك كان اسي ميتة ، مخدرااات، قالت لي جبتيها من وين انا م كلمت ابوك بالكلام دا لانو لو عرف ح يكتلك م كفاك نحن عايزة تتمي الناقصة و تبقينا أسرة م نافعة كلو كلو ابوك بتاع قمار و امك وداعية و اخوك حرامي و انتي ..انتي الوحيدة النافعة فينا عايزة تبقي مدمنة ، قلت ليها امي لو بحلف ليك ب الله انو انا مستحيل اعمل كدا ، قاطعنا صوت ابوي و قال تعملي شنو ، انتي كيف تاكلي من برا و هدا اتسممتي و دفعنا فيك كتير ، قلت ليه معليش ي ابوي بعوضك ان شاءالله ، قال لي غصبا عنك اصلا ، كنت حاسة بصداع فظيع و وجع جسم مبالغة و رغبة شديدة بالاستفراغ ، امي مدت لي كباية موية و قالت ارتاحي شوية ، رقدت شوية رفعت راسي قلت ليها امي الساعة كم ، قالت لي داخلين على ١١ ، قلت ليها ضهر ، قال لي انتي عميانة من الضلام دا ، داخلين على حداشر بالليل ، قعدت و قلت ليها نعممم ، قالت لي م انتي نايمة نومة الموت تحسي ب وين قلت ليها انا عايزة اصلي ، قالت لي طيب ارح ، نزلت رجلي من السرير لقيت عزام و صابرين و بتين داخلين و جايين اتجاهي ، اتقدمت صابرين و قالت السلام عليكم خالة زينب ، امي قالت ليها و عليكم السلام ي بتي ، قالت ليها حمدلله على سلامة إسراء، قالت ليها الله يسلمك انتو منو زملائها ولا شنو ، هزت راسها و اتلفتت سلمت علي أشرت ل وحدة من البنات جات ساقتها ل امي بحجة تسألها من حالتي على انفراد ، أتقدم عزام و قال سلامتك ي إسراء، قلت ليه الله يسلمك بس انتو بتعملو هنا شنو ، قال لي الموضوع انو القضية الشغالين فيها اتعقدت زيادة و الموضوع بدا يأثر عليك انتي كمان ، قلت ليه م تقولها ، قال لي للأسف اكتشفنا متأخر انك في المستشفى و السبب يمكن تكوني عرفتي ، قلت ليه والله نص نص الحصل شنو و كيف و متين ، قال لي في عاملة نضافة جديدة اشتغلت في الفندق الانتي اشتغلتي فيه على م اعتقد اسمها صفية ، قلت ليه ايوا جديدة ، قال لي عرفنا انها تابعة ل شاهندا و هم عرفوا انك على تواصل معاي و نقلتي لي معلومات عنهم و طلع كلامك صح أنهم خاتين جاسوس يراقبنا ، قلت ليه م قلت ليك ، قال لي المهم هم خيارين م منهم تالت ي انهم عايزين يموتوك ب جرعة زيادة و دا خيار مستبعد نوعا ما يا اما انهم عايزين يخلوك مدمنة و تتعذبي قبل تموتي برضو ، قلت ليه و الحل ، قال لي حاليا نحن جينا بسرية تامة و اتاكدنا انو ماف زول ملاحقنا عايزين نلقى حل تكوني انتي ب أمان فيه، قلت ليه بس انا م بقدر اخلي الشغل ، قال لي بس انا م بقدر اخاطر ب حياتك و اكون انا السبب. قلت ليه طيب شوف اسي احتمال هم م بعرفوا انا في المستشفى لانو حسب كلام امي جابوني بالليل شديد ، قال لي بمعنى؟؟ ، قلت ليه عندي ليك خطة ، قال لي دا م مكانها احتمال يكون في زول مراقبنا وارد ، ح نغطي على نتيجة الفحص الظهر فيه مخدر و ح تطلع على اساس انها تسمم طعام ، قلت ليه طيب ...

في حتة تانية

نعم كيف يعني البت م جات الليلة ، قالت ليها م جات والله و م عرفنا السبب ، قالت ليها و زولنا الليلة م شغال عشان يراقبها ، قالت ليها ولا تكون الجرعة أثرت معاها ب زيادة ، قالت ليها انتي شربتيها قدر شنو كدا ،قالت ليها قدر البشربو، اتلفت عليها بخلعة و قالت قدر شنوو؟؟؟، قالت ليها قدر البشربوو، مسكتها من كتفها و قالت ليها انتي جنيتي الكمية الانتي بتاخديها قايلاها هينة دي بتكتل عشرة نفر ي غبية ، قالت ليها و يعني لو ماتت نكون ارتحنا فت مرة ، قالت ليها ارتحنا؟؟ اكيد ح يعرفو انها ماتت بسبب جرعة زيادة و يبدو يفتشو من وين جابتها خصوصا الاسمو عزام والله لو حصل شي زي دا ح تموتي فيها ي صفيه ي فقرية ، قال قدر البشربو قال انتي شدة م ادمنتي الكميات البتاخديها دي بقت م بتأثر عليك تقومي تدي ل وحدة اول مرة تجربه عشان تموت و ظا نوعو خطير و تأثيرو قوي .. اسي انا اعرف كيف هي حية ولا ميتة ، قالت ليها نستى بكرة بس لو جات تبقى حية و لو م جات يبقى الحي ابقى من الميت ، قالت ليها ب نهرة امشي من وشي ي قبيحة ، صفية لوت خشمها و مشت ..

رجعنا عزام البيت و الساعة كانت ١٢ و حاجة رقدت شوية و الواطة أصبحت كنت لسه حاسة بتعب شديد بس عافرت صليت و م كان لي نفس اشرب اي حاجة ف لبست و طلعت و كنت ماشة بخطوات تقيلة الله يسألك من العملتي فيني دا ي صفية ، وصلت الفندق و دخلت ب باب العمال المكان فاضي بدلت و طلعت على الرسبشن ولازم اقابل فيصل تاني عشان أوضح اسباب غيابي ، و اول من زملائي شافوني جو يطمنو عن سبب غيابي خاصة اني م بغيب ساي ، و جات صفية كمان معاهم ، بعد السلامات اول من سأل عن سبب غيابي كان صفية ، قلت ليها امبارح وانا راجعة اشتريت طعمية و الظاهر م نفعت معاي عملت لي تسمم حاد دخلتني المستشفى ، قالت ب مسكنة حييي الف سلامه عليك، قلت ليها الله يسلمك عن اذنكم ماشة اقابل المدير ، قالت لي م حا الليلة ، قلت ليها يا ربي مالو م من عوايده ، ابتسمت و قالت م معروف ، عاينت ليها و رجعت الرسبشن و كان في بت قاعدة و تقريبا دي البديل بتاعي ، اسي اعمل شنو اتصل عليه يتصرف ، مشيت و قررت اتعرف عليها كنت واقفة قدام طاولة الرسبشن وهي من ورا و انا مدية بوابة الفندق ضهري ، لقيتها فجاءة عاينت اتجاه الباب ب انبهار ، عدلت طرحتها و قالت لي بنبرة غريبة وقت الشغل لو سمحتي ، اتلفت اشوف بتعاين لشنو و لقيتو عادل ، وااااو كملت بالله بتعاين ليه زي دا تقول من وجاهته ، وقف قدامي و ربع يدو بدون سلام، و ديك بهناك رددت تحية الفندق و هو بهنا قاعد يحمر لي ، قال لي شكلك عايزاني أحقق كلامي و اخليك تنطردي من هنا ، قلت ليه شفت غير نيتك السوداء دي شي ضراني ماف ، قال لي قصدك شنو ، قلت ليه يعني لو كنت مهتم شوووية كان عرفت اني اتسممت و دخلت مستشفى يوم و ليلة ، رخت ملامح وشه و قال متين الكلام دا ، قلت ليه أمس مش جيت لقيتني مافي ليه م سألت و قلت البت دي مالها يمكن ماتت بس شكلك عندك أمور اهم ، قال لي اقسم بالله م عندي خبر ، قلت ليه م قلت ليك انت لو مهتم كان عرفت ، سكت و قال طيب مالك نزلتي الشغل اقلاه ارتاحي يومين ، قلت لي عادل كانك م بتعرف اهلي ..عايزة ادفع حق المستشفى ، قال لي و طبعا ح تسمعيني وسخ اضاني لو قلت ليك بدفع ليك ، طيب شيلي اليوم اجازة ، قلت ليه كدا كدا المدير م جا و البت مستلمة مكاني ، قال لي ارح طيب ، قلت ليه ثانية اكلم مسعد يبلغ المدير اني ح ارجع بكرة ، عاينت للبت اللي لسه م اتعرفت عليها بتحمر لي قلت مع نفسي والله لو النظرات دي عشان عادل خسارة ، بدلت و طلعت و كنت مصممة اني اخت حدود ل عادل دا

الفصل الرابع عشر من هنا