رواية بواقي روح الفصل الحادي والعشرون 21 - بقلم نسمه عبدالله

رواية بواقي روح

الفصل الحادي والعشرون21

بقلم نسمه عبدالله

تاني يوم م مشيت الشغل لانو لسه حاسة نفسي تعبانة و التنفس من اقل مجهود يضيق و طبعا غيابي كتر و فيصل م ح يخلي الموضوع دا يعدي كدا ساي ان شاءالله م بتذكرني، الساعة تمنية شوكة اتصل علي فيصل ، عاينت للمكالمة ب ضيق اسي يقعد يتظارف و يصرف عربي كتير رديت و انا بتوكل و ح احاول اختصرو بس اتفاجاءت بنبرة صوتو لما قال لي والله ي إسراء كدا م بينفع معاي نهائي تغيبي على كيفك و تجي على كيفك ، قلت لي بعتذر والله ظروف مرضية ، قال لي لا لحد هنا و كفاية متى م قدرتي تعالي عشان خلاص نحن مستغنين عن خدماتك ، نعممم بس نحن بيناتنا عقد و قروش تتدفع ، قال لي القروش تتدفع في حال انتي طلبتي تستقيلي م في حال انا طردتك ، فصل الخط و مستغربة من تغير نبرة صوتو معاي بالطريقة دي ياربي حصل شنو و غير كدا كلامو مختصر شديد اميد حاصلة حاجة ولا يكون عقلو رجع ل راسو يلا الحمدلله، دقيت ل رميساء استفسر من الحاصل بس م ردت ، فتحت الشبكة و ماف رسايل جديدة فتحت الفيس ولاقيت بوست منزلو معتمر و معاه صورة اول م شفت الصورة قلت لا مستحيل يكون دا معتمر لابس لبس مهندم كدا و التصوير في حتة تانية ، كاتب على البوست " البدايات " و بالانجليزي كمان ، معتمر من متين بعرف انجليزي طوالي رسلت ليه م كان في الشبكة ف قررت انتظر ، امي جات داخلة قلت ليها امي تعالي شوفي ولدك ، قالت لي و مالو معتمر كمان ، وريتها الصورة ، قالت لي الولد دا ي الله هداه و شاف ليه شغلة محترمة و حسن حالته ي اما كمان مشى سرق ليه حتة كدا و عامل نفسه سيد المال ، قلت ليها ان شاءالله يكون الله هداه ، قالت لي اتصلي عليه نشوف مالو ، قلت ليها حاولت قبل شوية بس الرقم م بخش رسلت ليه في الشبكة، قالت ليه لو اتصل ليك اديني ليه ، قلت ليها طيب ، قالت لي مالك زعلانة كدا ، قلت ليها طردوني من الشغل ، قالت لي بركة الجات من عندهم كدا كدا كنت عايزاك تخلي قلت ليها امي انا م مرتاحة بالوضع دا ، قالت لي ولا انا الصراحة من يوم رجلي عتبت البيت دا م ارتحت ، قت ليها المشكلة م هنا المشكلة انو ابوي ل اسي لا جا لا جا و انا متأكدة رزاز م ح تخلي الموضوع يعدي كدا ، قالت لي كان م اسي بعدين بجي ابوك و انا بعرفو ، قلت ليها الله يستر بس ي امي ابوي لو قدر يطلعنا من هنا نمشي انا لازم افتش شغل للضمان ، قالت لي نبيع الدهب بس و كدا كدا الفواتير معانا ، قلت ليها فكرة والله ، قالت لي كدي انتي خلينا من الكلام دا رايك في عادل شنو ، قلت ليها امي انتي بتساليني انا من رأيي، قالت لي اسأل منو مش انتي العروس ، قلت ليها كنت قايلاك ح تختيني قدام الأمر الواقع لانو البعرفو منااك تعرسيني ل واحد من اولاد اخواتك ، قالت ليها ايوا قبل م اعرف اخواتي يشوفو العمى ولا يشوفوني ، قلت ليها أرفض يعني ، قالت لي والله دا قرار يرجع ليك بس بيني و بينك عادل زول كويس ، ضحكت و قلت ليها اصلك م بتتغيري ، قالت لي مهما حصل م لازم نلخبط الكيمان عادل كوم و خالتك كوم تاني ، قلت ليها الصراحة انا محتارة و محتاجة وقت افكر، قالت لي م تطولي تفكير انتي لو اتخارجتي انا بعرف اتخارج من ابوك ، عايزة ارد تلفوني رنة و كان عزام ، امي قالت لي عزام دا منو ، قلت ليها المحقق ، قالت لي محقق شنو ، قلت ليها لحظة ي امي، رديت بهدوء، قال لي اسف على الازعاج في الزمن دا بس عندي ليك خبرين ، قلت ليه حلو وشين ولا شينين ، قال لي حلو و شين ، قلت ليه نبدأ بالشين طبعا ، قال لي صفية اتكتلت، سكت ل ثواني بستوعب كلامه و قلت ليه نعممم كيف و وين و متين ، قال لي قدام الفندق ، قلت ليه نعممم ، قال لي امبارح كانت شغالة وردية ليلية ، قلت ليه بس العمال النسوان عندنا حدهم سبعة بالليل ، قال لي والله انا اعتقد انها م قدرت تمرق البضاعة حقتها ف قررت تاخد الليل ساتر ، قلت ليه ااي الموظفين بتفتشو و هم طالعين ، قال لي ايوا بالضبط و بسبب الحصل اتقفل الفندق الليلة ، قلت ليه و دا بفسر ليه المدير اتعامل معاي بالطريقة دي ، قال لي حصل شنو ، قلت ليه طردني قبل شوية، قال لي هو شافك معاي من قبل ، قلت لي م اعتقد ، قال لي عموما الموضوع عمل ضجة و هو خايف على سمعة الفندق ، قلت ليه طيب اتكتلت كيف ، قال لي دا جايبنا للخبر الحلو، اللي هو ، قال لي صفية اتكتلت ب نفس الطريقة اللي مات بيها ابوي ، قلت ليه و دا يعني شنو ، قال لي يعني نفس الكاتل لو قبضنا عليه نقدر نبري امي ، قلت ليه بجد ، قال لي والله و مستنين تقرير الطب الشرعي يظهر عشان يثيت انو طريقة الضبح نفسها ، قلت ليه يلا مبروك مقدما و الجلسة الجاية متين ، قال لي الخميس الجاي ، قلت ليه هانت ، قال لي فعلا ،قلت ليه طيب و ناس شاهندا و شهيرة عملتو في موضوعهم شنو ، قال لي موضوعهم لسه معقد بس امي تطلع الباقي بهون ، قلت ليه ربنا يفك اسرها ، قال لي دعواتك بس ، قلت ليه م بنساك ان شاءالله، قال لي سؤال اخير ، قلت ليه اتفضل ، قال لي انتي و صابرين كنتو بتتكلمو في شنو و سكتو لما شفتوني، قلت ليه م ح اقدر اجاوب دا موضوع خاص شديد ، قال لي حتى صابرين قالت لي كدا ، ضحكت و قلت ليه طيب اصبر في مثل مصري بقول ي خبر النهار دا ب فلوس بكرة ببقى ببلاش ، قال لي ماف خيارات ح اصبر بس ..يلا م اعطلك ، قلت ليه طيب تسلم ، قفلت الخط و رجعت امي قاعدة راجياني شايلة مكة في يدها ، قلت ليها م تعايني لي بالنظرات دي ، قالت لي اوعك تكوني رافضة عادل عشان عزام ولا منو دا، هزيت راسي بلا و قلت ليها تفكيرك م يمشي بعيد دا زول عرفتني عليه الظروف ، قال لي ظروف زي شنو ، قلت ليها حاليا م بقدر احكي بس لمن يبقى مسموح بكلمك ، قالت لي عجب ، قلت ليها ايوا اصبري ، تلفوني رنة و كان رقم دولي ، قالت لي دا منو كمان ، عاينت ليها و قلت ليها و انا بعرف م هدا شوف عينك م فيهو اسم ، قالت لي ردي م يفصل ، قلت ليها بري مالي ارد ل زول غريب ولا كمان م من السودان ، شالت التلفون مني و قالت لي انتي اصلك فقرية يمكن ديل الناس اليقولو ليك فزتي معانا ، ثلت ليها و يمكن نصابين يهكرو التلفون ، قالت لي هو تلفونك دا فيهو شي نافع و ردت قبل م الخط يفصل و قالت الو ي مرحب ، سكتت شوية و انا شايفة ملامح الصدمة اترسمت على وشها و قالت معتمر

الفصل الثاني والعشرون من هنا