تحميل رواية «برواز من ورد» PDF

‎هذه القصة للكاتبه ليان عيسى

‎صوت المولدة المزعج كوة شلعني من الفراش ...اول شهر ايلول ...والدنيا بعدها حارة ببغداد ...والشمس موتتني ...

‎غرفتي جانت بوجه الشمس من الفجر للمغرب ...فحتى من اكعد ساعة سبعة الصبح ضوء الشمس عاميني كم مرة كلت لماما تبدلي البردات اريدها لون طوخ تحجب الضوة حتى لو لونها اسود!!!!!

‎بس ماكو فايدة امي امراءة كلاسيكية من العصر الذهبي حجايتها وحدة ...

‎وبكل اختياراتها رقة وانوثة ...ماكو شي غليط ابدا حتى اسلوبها بالكلام ...

‎هي طبيبة نسائية معروفة...وعلى طول تجيها مكالمات طارئة بالليل ...ولانه المولدة مشتغلة معناها راجعة وجه الصبح ومشغلتها ...لانه ابو الخط الذهبي مرات يطفيها ساعة وحدة من الستة للسبعة ومرات لا ...

‎احنا جنا طالعين عليها البنات اني واختي  بس مسرة اكثر مني تشبهها

‎مسرة كانت شكرة وعيونها خضر  بس كانت قصيرة

‎وهي كملامح تشبه ماما

‎اني وسرمد اخوية كنا نشبه ابويه .... بالطول كلش طويلة وعلى الرغم من  الريجيم مو كلش  ضعيفة ...اصلا اذا مسرة تاكل بصفي اني اسمن ...

‎نزلت كوة بعد مااخذت شاور ...بدلت وعبالي اشرب جاي ...اشو مالي نفس ...

‎لبست ملابس عريضة واهم شي الميك اب كامل ...مااستغني عنه ابد ...

‎برغم انه اني بيضة وبشرتي نقية بس جنت الا احط مكياج كامل يله اطلع

‎شعري كان طويل لونه فاتح...بس مو سرح بيه كسرة فلميته طوبه حتى اخلص منه ...وجريت رجليه وطلعت ..

‎شغلت سيارتي وردت انام  على التبريد ..  بس بعد اتاخرت لازم افلت ...

‎انوبه شيخلص الازدحامات بشارع الربيعي ...اذا طلعت ورة السبعة معناها اوصل اني والتسعة ...

‎اول ماتخرجت من الكلية جنت قسم هندسة سيطرة ونظم  ...تعينت بشركة بابا

‎عنده شركة مقاولات كونه مهندس مدني قديم ...بس ابد ماارتاحيت ...كام يحاسبني على الصغيرة والجبيرة بطلت وكعدت فترة بالبيت بعدين اتعينت بوحدة من شركات اصدقاءه صارلي شهرين تقريبا شويه احسن واهون ...

‎وصلت للدوام بعد معركة الازدحامات ...وشمرت روحي على كرسي مكتبي ..

‎جانت غرفتي بالطابق الثاني وبيها تلاث مكاتب اني كنت بالنص وعلى يميني مكتب موظفة اتزوجت وبطلت من فترة وعلى يساري مكتب فاضل ...

‎فاضل كان زميلي بالشغل وبالغرفة

‎اول متعينت ...كنا واحد يكره الثاني

‎هو كان متخيل كونه شاب مرتب ومخلص هندسة ومتمكن راح اكتل روحي عليه ...

‎وكوني فتاة يحلم بيها الكل بشهادة الاخرين ...كنت احمل ثقة عالية .. طبعا شلت خشمي عليه وماعبرته ...

‎لا هو ستايلي ولامفكرة بهيجي واحد ابدا

‎اصلا هو نص الدوام كان يكضيه تلفونات ويه صديقاته يمكن كان عباله يغورني او مااعرف هو هيجي نسونجي بس مكان متزوج بذاك الوكت اللي هي قبل ثمن سنين ...

‎المهم ورة شهرين كمنا صرنا عاديين

‎هو فهم انه لا هو ببالي ولاافكر اني بمثله مو استصغارا بيه بس اني كنت نحسة باختياراتي ...

‎كنت قليل اتكلم مع الموظفين مو اجتماعية يعني ...

‎لذلك عرضة دائما لانتقاداتهم ولغيبتهم عليه كنت احس انه ميحبوني ويتخيلون اني شايفة روحي عليهم ...

‎مع انه مكنت هشكل كل مافي الامر اني مااحب احجي هواية ...اتعلمت نوعا ما على الوحدة والهدوء...

‎احنى كعائلة اصلا مو كلش اجتماعيين يمكن بسبب غياب امي المتكرر وبدون مواعيد محددة وسفر والدي الكثير ...كنت اقضي  معظم وقتي بغرفتي على النت لو ويه صديقاتي ميس وهالة ...

‎حتى قبل ماتتزوج مسرة اختي مكنا كلش صديقات طبعنا يختلف وحدة عن الثانية ...هي من الناس اللي اعتبرهم محظوظين بالحياة...واجتماعية وتضحك ويه الكل ...هي

‎دخلت الكلية اللي تحبها ...وحبت...

‎ اتزوجت اللي اتحبه وهسه تدرس ماجستير وعدها ولد حبيبي سدير روحي بالدنيا ...

‎يعني مكنا كلش صديقات على من علاقاتها وصديقاتها الكومة  بس مكانت تسمحلي اعرف عن حياتها شي ...

‎عكسي جنت مااعرف اجامل وماعندي صديقات ...

‎حتى بالكلية كنت كاتلة روحي على الدراسة ...وردت بس اطلع متوفقة وتالي كوة نجحت دور اول ...

‎يمكن اني عندي  حالة انه احب الفت الاهتمام اليه بكلشي بالدراسة وبالشكل كنت كلش اهتم بهاي الفقرة انه اكون مركز الحديث ...يمكن هو غرور او قلة ثقة بالنفس بذاك الوقت مااعرف بس جنت انقهر اذا فتت بمكان ومحد انتبهلي وهي نادرا ماتصير ...

‎بذاك اليوم بالذات ...

‎كالو حيجي الموظف جديد يتعين بمكان البنية اللي اتزوجت وراحت ...

‎طلبت من زينة نسكافيه زينة ...

‎اللي  كانت تشتغل عدنت بالشركة تهتم بطلباتنا يعني ...هي شابه وصغيرةصف ثاني كليه ...مسائي  تشتغل الصبح حتى تدفع اقساط الكلية ووالدها كان سابقا يشتغل سايق للشركة بس بطل قبل كم يوم ..

‎كنت اعشق كهوتي الصبح

‎وهي يمكن تسوي اطيب كهوة بالعالم

‎جتي بكوب النسكافيه واجى وراها شاب ...سلم على الكل ويسلمون عليه ...

‎كلتله استاذ ليث المدير كال هاي غرفتك ..وهاي ست سارة ...الموظفة الجديدة

‎ابتسمت ...وسلمت عليه ...بس اشو اني الموظفة الجديدة ؟!!

‎بعدين اندارت عليه ... ست سارة استاذ ليث كان بقسم التسويق يم استاذ حسن وبطل قبل كم شهر والمدير بنفسه رجعه ...

‎ابتسملي وطلب منها كوب جاي حار ومهيل على طريقتها ...وكانت بيناتهم ميانه حلوة

‎الولد اول ماكعد فتح حاسبته وبدى يكلب بتلفونه لحد مايجي الاي تي ..مهندس الحاسبات ويربطه بنظام النت ورك اللي كنا نشتغل عليه ...

‎كنت من جوة ليجوة اسرق نظرات اباوع عليه ...

‎هو كان طويل ورشيق رياضي بحت بس مو كلش حلو شكله يعني صح عيونه كبار بس خشمه هم كبير وحلكه هم مااعرف ماحبيته ...

‎بس ريحته تخبل ...كلش نظيف بس مو انيق يعني لابس كاجوال رياضي

‎اي اني كنت من النوع اللي يحكم على الشكل ...

‎كان عمري ٢٩سنة  بذيج الفترة  بس خبرتي بالحياة كل قليلة مكنت من النوع النبه اللي اشوف الناس ومن اول نظرةاعرفهم شنو ...لا كنت نوعا ما اخاف من التواصل الاجتماعي عندي رهبة من الناس الغرباء ...

‎وبديت الاحظ ليث كان مشغول بمسجات توصله ويجاوبها ويردها بعصبية ...كتابته سريعة وظل ينكر برجله على الارضية بطريقة متوترة وترتني حتى الي هم...

‎وبنهاية دوام ذاك اليوم يله رجع فاضل وبدوا  يتسالمون وظل واحد يسولف للاخ   عن الايام اللي فاتت وليث مكان موجود ...

‎اني قبلها بايام كنت طالعة  من علاقة فاشلة ...علاقة تلفون ...الشخص اللي كنت اعرفه  كان اخو وحدة من صديقات صديقاتي اخته رحجت ويايه انه اخوها معجب بنية شافني بصور عيد ميلاد سدير ابن سفانا وصار تلفونات بيناتنه .....

‎اني مكنت بنية ماخذه حريتها على الاخر كنت افكر فقط بالعلاقات الجدية التي تنتهي بالزواج ...

‎كنت اكره زواج الصالونات

‎وحلمت انه ارتبط بشخص عن علاقة حب مثل القصص والحكايات الحلوة ومثل معظم البنات في وقتنا الحالي مكان ناقصني شي بس مااعرف النحسس كان حليفي ...

‎من وكت الكلية وقبلها وبعدها كنت ادور على المثاليات كنت مفكرة انه اللي يريدني لازم يستقتل عليه ...

‎اكيد.هذا التفكير كان احمق نوعا ما

‎واكيد هو اللسب اللي كان بالي وصلته الان ....

‎مرت الايام اللي بعدها ومكان اكو شي بحياتي تغير غير وجود ليث وياية بالشغل ..ومكانت علاقتنا كلش ممتازة يادوبك بس سلام..

‎وكتها كنت في حالة من الاحباط بعد انتهاء علاقتي الاخيرة

‎ومكان اكو شي ياذيني غير الجملة التقلدية

‎انت شعجب ماتزوجتي مناقصك شي ؟!! اللي بعمرك اطفالهم بالمدرسة!!!!!

‎شسوي يعني كل اللي يجون غير مناسبين يعني شلون!!!

‎الفراغ يولد نوع من الكابة والعزلة الاكبر

‎واني مريت بهذه المرحلة  خصوصا بعد زواج مسرة المبكر اتزوجت وهي اخر سنة الها بالكلية...

‎المهم

‎ورة فترة  ليث بدا يثير اهتمامي وفضولي توترة المستمر من الاتصالات الهاتفية ...

‎النغمة الخاصة باليسا اغنيتها لو تعرفوا بس هذه تدك تنكلب احواله ...

‎اللي عرفته من زينة انه كان خاطب بنية اسمها ضحى وكانت ويانه بالشغل بس من خطبها بطلها

‎وهسة هي تشتغل بمكان ثاني  ...

‎والظاهر انه في علاقة جديدة

‎او مااعرف شنو ...

‎لانه من خلال مراقباتي اله هالاسبوعين كنت اعرف انه اكو وحدة في حياته ...بس مكنت اعرف هي ضحى خطيبته السابقة او بنية جديدة ...

‎الا ان مرة ورة فترة الغدا...

‎اني كنت بطبيعتي  اجيب بس سلطات وياية وقليل انزل الكافتيريا ...

‎معظم الاحيان اكلها على المكتب ...

‎وفاضل كان على طول ياكل برة لو جوة بالكافتيريا

‎اما ليث فكان على الاغلب يطلع ومايرجع الا ورة ساعة كنت اشوفه قليل ياكل ومايدخن بس يشرب جاي وحليب لو نسكافيه

‎فمعظم المرات بذك الوقت يعني فترة الغدا ابقى وحدي ...

‎بس بذاك اليوم سمعت صوته على الدرج وهو يصعد كان صوته عالي ونوع من التهديد يخاطب بنية يكللها ارجعي للشغل ماانزل ومااريد اشوفج ...

‎بعده مواصل للغرفة نزل ركض

‎صار عندي فضول باوعت من شباك اللي ورة ظهرة وجهته على الشارع مقابيل باب العمارة مالتنه ....

‎انتابني الفضول على شغلة ليث ...وحبيت اعرف وين راح من باوعت من الشباك....

‎شفت سيارةبيضة وبنية محجبة وانيقة   نزلت واكفة بصف باب السايق ...والتلفون بيدها بهالاثناء دخلت زينة وجايبة جاي ال ليث سالت عليه كالت اشو ماكو وينه مو كلي جيبيلي جاي ...

‎كتلها نزل ويمكن هو هياته راح على هاي البنية ...واني دااشر من الشباك جتي زينة باوعت وياية

‎اول ماوصل يمها ضربته ضربه خفيفة على كتفه بالموبايل بينما كان كل همه انه يصعدها للسيارة وتروح

‎حاول يدفعها بدون هوسة بس هي كانت معصبة حيل...

‎مشفت شي واضح من ملامحها بس كان مبين هي زينة يعني مرتبة ...

‎فجتي زينة يمي وكمنا نباوع كالت يا

‎هذه ضحى خطيبته السابقة ...

‎شجابها هنا ...

‎كتلها هي هاي ضحى!!!

‎كالت اي بس والله مصدكنا من كال فسخت لج عيني واحد روحه بالثاني ...بس شوف الله اللي يعلم شلون صارت هيجي بيناتهم

‎كتلها هو مكلج ابد ليش فسخوا يعني اني اشوفكم دائما تسولفون و بيناتكم ميانة   ...

‎والله سارة شكلج  اشو هو يكول هي عافتني ماتحملت عصبيتي وعركي وياها...

‎واشو من جهة يومية تجي عليه ...

‎ضحكت كتلها اكلج هو اكو عراقي مو عصبي اشو ماشاء الله كلها روحها بخشمها واذا همه صدك واحد يحب الثاني هذا مو سبب فراق ...

‎اكيد اكو انه...

‎فجانت تكلي اي يمكن بعد مااعرف بس شوفي هسه خلود تشيل روحها وتركعها بالكاع ههههه اءا تشوف ضحى جايه عليه

‎فاني صدك وكتها اندهشت كتلها يا؟! وخلود شعليها؟!!

‎كالت شنو ماتعرفين يمعودة الشغل كلهم يعرفون كاتله روحها على ليث ...

‎كتلها ياخلود وج هاي مو متزوجة ؟!!

‎كالت اي عيني متزوجة وابنها بالمتوسطة هم ...

‎ضحكت اني وكلتلها معقولة عزة لعزاها بكد امه هي ...

‎اي والله تبجي عليه تكول احبه مو بيدي من قبل مايبطل ...جانت تتحرش بيه بس هو لابسها ...

‎كتلها يا واني اشوفها يومية صاعدة تسلم وتسولف شوية وتروح ...

‎فزينة ضحكت كالت المصيبة هو ماخذهن على كد عقلهن ...

‎كتلها بشرفج ماخذهن ليش غيرها هم !!!

‎كالتي اي ولج بشرى هم بالسكرتارية ...

‎اني صدك اتفاجات زين معقولة على شنو همه كاتلين روحهم ترة هو مو ذاك الجمال ولاحتى واحد تووب  ولا كلش فرندلي يعني محبوب اصلا دمه جامد ...

‎فباوعت عليه زينة وابتسمت كالت وشبيج انت كارهته هيجي هههه ...

‎همه يحبوه لانه شخصية ومحترم وكلمته وحدة وجريئ كلش اكبر واحد يفلشه اذا سوى وياه ...

‎انت تعرفين ليش هو بطل ؟!!

‎كتلها لا والله محد كلي ..

‎بس ترة اني مكارهته بس يعني شفتها مبالغة يمكن ...

‎كالت لا مو بس خلود وبشرى اكو بنات حتى بالوزارة هم يتحارشون بيه لانه ماينطي مجال لاحد ...

‎بس شوفي جان اكو موظف اسمه عمار يشتغل وياهم بالقسم مرة ليث لزم عليه لزمة...

‎بوك يمكن لو رشوة ...

‎فاتعاركو ذاك عمار كد ماهو ضخم ويخوف ليث لزمة وسحله بالشارع ...وراها قدم استقالته ...

‎واثنينهم بطلوا ...

‎يعني الولد كلش مؤدب بس البنات مايخلن ...

‎كتلها بله بشرى او اذا اي بنية بيها باب وجواب يجوز عجبها واصلا اكثرنا بنات ورياجيل كبار  ...قلة شباب يعني يمكن بس اربعة اثنين بالصيانة ...

‎وجانت تكمل واثنين يمج بالغرفة هههه

‎كتلها ولج

‎بس مال متزوجة ترة هاي حيل واكفة ...يعني من كل عقلها خلود ...مخافت توصل حجاية لرجلها ؟!!!

‎فلزمتني من ايدي كالت هسه كلهن يريدن يعرفن انت حاطة عينج عليه لو لا ههههه

‎وراح يتقربون منج ويصادقوج ...

‎كتلها لاعيني لا ...

‎لاعيني منه ولاشي اني ماادور هيجي ههه...

‎بس بيني وبين نفسي زاد فضولي نحو هذا الشخص مو اعجابا ولا حبا لا والله بس مجرد فضول ...

‎حبيت اعرف عنه كلشي ليش مااعرف يمكن هدوئه او لانه مكان معبرني ماادري

‎من رجع ورة شي ربع ساعة جان جايب وياه كوب الجاي ...

‎سلم وكعد ...

‎سرقت كم نظرة شفت عيونه مدمعة مثل اللي يريد يبجي ومصفر ولازم روحه بالكوة...

‎فاندار عليه ...كلي ست سارة اتغديتي ؟!!

‎اني اتفاجات من السؤال اول مرة يسويها ويسالني اصلا احنى اكثر من السلام مانحجي ...

‎كتله هاا لا

‎اي

‎اكلت سلاطات ...

‎كلي اني رايح اجيب مقبلات من المطعم اللي يمنا وراح اجيب وياية الج هم اكو نوع تحبيه !!؟!!

‎اني من فشلتي ومن خجلي ماحجيت ولاجا وبت بس هزيت راسي يعني لا مااريد وعيني عليه هو كان يحب اغاني الراب واغاني اجنبية هوسة ميتاليكا  كانت كلش تزعجني ...

‎كتله بلا زحمة بس اذا اطفي الاغاني بحاسبتك صدعتني والله ...

‎فضحك كلي هاي انت هم متحبيها ...

‎فطفاها ونزل راح حتى ملحكت اجاوبه ...

‎شعرت بتعاطف وياه مااعرف انقهرت عليه ...

‎ورة شي نص ساعة جاب تلاث مواعين وسط مقبلات من ورق النعناع جان قريب علينا ...

‎اموت على مقبلاته ...

‎ظليت ساكتة هسه دكولي شكرا احجي صخمي ...

‎ابد خيال ماته وكاعدة

‎هوهم  حطهم على ميز فاضل اخذ واحد وكلي شوفي شتحبين اني جبت مشكل الج ولفاضل ...

‎طبعا استحيت مكمت بس ابتسمت ...

‎كتله موجوعانه ...اكلت قبل شويه...

‎بس شكرا فهو كام وجر الماعون بيه فتوش وبابا غنوج وسيزر ..

‎كلي اكيد تحبين الفتوش ...

‎كلت بنفسي  هاي شنو هذا شمدريه !!

‎بس هو منو مايحبها ... بالكوة كتله شكرا وكعدنا ناكل

‎جان عاجبني اساله شبيك احجي يمكن اكدر اساعدك حسيت بيه محتاج يحجي بس مااعرف استحيت كلش ابدا وياه الكلام...

‎كلت لو هاي مسرة جان هسه اكلته وشربته وعرفت تاريخه كله ...

‎ماكو وشويه

‎ورجع دك التلفون

‎اني هالمرة بعد كمت اعرف هاي النغمة لضحى....

‎عاف الماعون...ونزل على السريع كلي اذا احد سال اني طالع بشغلة وارجع فد شي ساعة ...

‎ومرت ساعتين وهو مرجع ...اجى فاضل اكل مقبلاته وبعده ممكمل  وطلبه مديرنا ابو محمد ...

‎ورجعت بقيت وحدي جنت مكملة شغلي ودالعب ورق ...

‎وشوية اجى ابو محمد يسال عن ليث كتله طلع بشغلة ...

‎كال ياشغلة اشو مجابلي  العروض اللي وصيته عليها ...

‎كتله والله ماادري استاذ!

‎كلي دخابريه شوفيه وينه ...

‎اني راسا جاوبت ماعندي تلفونه استاذ بس اذا تريد هسه احصل رقمه واخابره ...

‎كلش اشو ادك عليه ميجاوبني هذا الافندي ...

‎فاني من يمي كيفت كتله اوكي انطيني رقمه واني احاول احصله وصدك ...

‎دكيت عليه مشاله كتبتله مسج

‎ليث اني سارة ابومحمد يريد العروض ...

‎جان راسا يخابر

‎كلي فدوة لعينج سارة بلكت تفتحين الحاسبة وتطبعيها وتاخذيها الهم نسيت اصعدها اله ...

‎وانطاني حتى الباسوورد مال حاسبته ...

‎فتحتها لكيت صورة بنية ...مبتسمه الصورة كانت الخلفية مال الحاسبة

‎صح هي مبتسمه بس كانت حزينة نوعا ما...

‎شكلها حلو لطيف ومبينه متكبرة شويه ماادري هيجي حسيتها  

‎طبعت الاوراق واخذتها لابو محمد ورجعت خابرته بحجة اكله تمت المهمه ....وهذه المكالمة كانت بداية صداقتي بليث...

‎رجعت للبيت ساعة خمسة العصر تقريبا دوامنا كان يخلص اربعة ونص  ...

‎ماما كانت بللبيت وهي قليل ماتكون بالبيت بهذا الوقت لانه عيادتها كانت تفتح ساعة تلاثة ونص مرات اربعة  ...

‎شفتها محضرة غدا مقلوبة ...ودتسوي زلاطات ..ضحكت كتلها اليوم الكمر بالبيت ...

‎ابتسمتلي وابتسامتها كانت حزينة نوعا ما ...

‎فاكيد بابا هم مسويله مكسورة ومتعاركين ...ويمكن هي معصبه عليه وزعلان منها ودتصالحه

‎مشكلة ابويه الازلية هي الخيانة ...

‎من و احنى وصغارهو عنده علاقات ...

‎اتذكر من كان ياخذني لمكتبه جانت اكو شغلات بينه وبين السكرتيرة وشكد ميحاول يخفي كانت تبين ...

‎ ومن ذاك الوكت امي تعرف وساكتة طبعا هي مو بس السكرتيرة وغيرها كومة ...

...

‎من كنا اني ومسرة نسالها ليش تتحملين ليش متواجهي ...ليش ماتجوزيه ...

‎تكول مايفيد هذا طبعه ...

‎زين ليش متحملته؟!!  تكول علمودكم ...

‎المجتمع من يسمع بصوت الخيانة اول مايلوم ...الزوجة هي السبب هي  هاملته...

‎..طيب ...امي امراءة صدك امراءة انسانة جدا حنونة وطيبة وشايله جمال واخلاق وشهادة حتى عائلتها صاحبة لقب معروف ...مو لانه امي بس والله حتى احنى بناتها مو مثلها ...هي كانت تحب وتطمح للمثاليه اتربت واتعلمت هشكل ماتقبل بشي اقل من العادي لا دائما اعلى ...

‎وحتى همه متزوجين عن حب وعلاقة وشلعان گلب ...لانه ابن خالة امي كان رايدها وطالبها من جدي قبل ابويه ...

‎اهل ابوية كانو ناس متحررين ....يعني كان جدي الله يرحمه شيوعي بحت وحتى ابويه هم نوعا ما طالع عليه ...

‎يحبون الحرية والاستقلالية مثقفين جدا ومايهمهم رأي احد وانه الانسان حر بكلشي يسويه...بس همه فاهمين الحرية الصحيحة اللي ماتخدش الحياء ولا تاذي الغير ...فهمه

‎ هيجي طبيعتهم اهم شي نفسهم وراحتهم شاريين دماغهم مثل مايكولون

‎اني  عندي عمتين وعميين ...عمتي سعاد وعمتي نجاة والاثنين مرتين متزوجات وكل زواجاتهم عن حب وغراميات ..عمي الكبير فرات اتوفى الله يرحمه من كان شاب بالسبعينات بحادث سيارة  ...كان بعده خاطب ممتزوج ...كان مخلص قانون ..

‎وعمي سامي هم مخلص قانون و متزوج مرتين ومطلك وحدة وهسه هم يريد يتزوج ...عنده اربع ولد وبنية وهو اصغر من ابويه ...

‎امازوجته !!!

‎من النوع الي كله سحورة اسمها ليلى ام شهاب ....اللي اذت بيت جدي الله يرحمهم حيل بمشاكلها وعركها مع انه هي  خريجة وموظفة بالبنك المركزي بس سوالفها كلها دجل وشعوذة...

‎وهي اللي خلت عمي يطلك زوجته الثانية بعد ماخلف منها ولد...

‎اما اهل امي ...فكان جدي وبيبتي بذيج الفترة عايشين ...وكان عندي خالتين اقبال ونهال ...اقبال كانت ربة بيت اتزوجت ضابط واستشهد بحرب الثمانينات وهي كبيرة بالعمر  ...حجية عدها بس تلاث ولد

‎وعمتي نهال ممتزوجة... طبيبة عيون كانت بشبابها فائقة الجمال ... وامي كانت اصغر خواتها

‎وكان عندي خال وحيد كمال...ضابط طيار ...

‎خالي هذا الله يرحمه كان يدرس بالاتحاد السوفيتي ...طيران

‎وصارله حادث ووكعت بيه الطيارة المشكلة انه اصدقائه كالو لبيت جدي انه هو متزوج شيشانية وعنده ولد ...بس ابد ولحد هاي اللحظة ماعرفنا عنهم شي لازوجته ولا ابنه ولا حتى لكوا الجثة مع انه خوال امي وعمامها هوايه دوروا عليه بس ملكوا شي كانت بداية حرب الثمانينات وصعبت عليهم الامور كلش هواية ...المهم ارجع لابويه

‎صح هو ابوية وهو اروع واحن اب بالدنيا بس الحقيقة تقال مستحيل يلكى مثلها ...

‎صدكوني اني مو متحيزة لامي كوني انثى وانه البنت متعلقة بامها لكن هي فعلا انظلمت يكفي انه الكل يعرف بعلاقاته وهذا شي كان يجرحها ويحرجها ويقلل من قيمتها بالمجتمع ومثل مانكول كاسر ظهرها ....

‎يعني هو المفروض والي  لازم انه يصونها ويحافظ عليها ...بس هو لا على طول فاضحهاا...

‎وهذا الشي كان هو سبب كدر صفوة البيت ...

‎واللي كان  يالمني اكثر  انه ماما مكانت تشتكي ...تضم بگلبها.....

‎اني عرفت انه كدرها وحزنها ساعتها يمكن او  كان اكيد بسبب هذا الموضوع ...بس محجيت ولاعدت لانه حتى هو صار بعمر المفروض بعد يترك هكذا امور يعني هو كان بنهاية الخمسينات وماما تصغرة بخمس سنين ...

‎المفروض بعد ينتبه لبيته هو مو بعمر الشباب...

‎الله يهديه..

‎ساعدتها شويه بالمطبخ وصعدت داابدل

‎ بيتنا كان كلش كبير عدنا بالارضي صالتين استقبال وحدة بيهم مفتوحة على غرفة الطعام والمطبخ والثانية مغلق بباب كلش كبيرة ب خشب نقش مصري ...

‎كانت باب الاستقبال المنعزل مسدودة لانه سرمد وجماعته اليوم المدرس الخصوصي يدرسهم يمنا سرمد كان بصف رابع اعدادي ...وكلش شاطر ..بس حرص امي الزايد اصرت تجيبله خصوصي ...

‎صعدت غسلت ودابدل سمعت صوت ماما تصيح نعيم نعيم...سارة يله للغدا حاضر ...و

‎هو دينزل والتلفون بيده يهمس بصوت ناصي يله حياتي اروح اني  هسه باجر نكمل ...ونتفاهم ...

‎ونزل قبلي ...

‎اني كنت واكفة بباب غرفتي وسمعته من ديحجي 

‎ فانتظرت شوية وراها يله نزلت....

‎اتالمت كلش هواية واتمنيت انه  ابوية يتوب بعد ويعوف هاي السوالفحتى ماترهم والله  بهالعمر ...

‎اتغدينا وورة ماطلعت ماما غسلت الكراج وصعدت لغرفتي..على الرغم من التعب

‎ الليل كله كان عندي ارق...

‎ ماانام بسرعة اظل افكر بكلشي ...

‎وكنت متشوقة يجي ثاني يوم اعرف اكثر عن ليث ظليت احجي ويه روحي راح اكله هيجي وهيجي واساله فلان وفلان...

‎ورة ساعة تلاثة تقريبا يومية انام

‎ومثل كل مرة كعدت متاخرة وركض ركض يله وصلت والله معركة السياقة بالشارع ...

‎انوبه من  يشوفوني بنية يبووو يصفنون بوجهي بعد مايسوقون ...

‎ودك الهورنات حتى نغمات يسووها

‎اول ماوصلت اتلكتني خلود ...

‎سلمت عليه وجرتني للكافتيرا كالت ابو محمد مديرنا يعني

‎راح يتاخر تعالي نكعد فد ربع ساعة بالكافتريا نتريك ونصعد ..

‎اني راسا اتذكرت زينة من كلتلي هسه يتقربون منج علمود ليث يعرفون شكو ماكو من وراه....

‎والا هي خلود بحياتها ممسولفة ويايه اصلا تموت مني ...

‎كعدنا

‎واني رحت جبت كابتشينو ...

‎وهي جاي ..

‎فظلت تسالني وتجر شويه شويه بالحجي ...جنت بالبداية كلش ضايجة من الطريق مالي واهس احجي واسولف ...

‎ بس اشو هسه عجبتني السالفة كلت خلي احرك دمها شوية ...

‎فبديت بالحجي كتلها سكتي البارحة صار فد موقف هنا ماادري شفتيه لو لا؟!!

‎كالت شنو خير وسحبت كرسيها واقتربت مني ..

‎كتلها جتي خطيبة ليث عليه للدوام وهو نزللها ركض خطية ياعيني ...يرجف عليها...

‎كالت لاعيني يرجف عليها شنو هو عافها من شهرين تلاثة شدتحجين انت!!!!

‎هي لازكة بيه اصلا اني شفتهم هو يدفعها يكللها ولي منا وهي مجلبة بيه

‎ياولي ؟!! ههههه هاي شلون سمعتيها ؟!!!

‎كتلها اصلا هو كلها روحي واني اجي وراج وطلع وراها وخلص الدوام وما رجع...

‎سكتت ماحجت ...وظلت وعيونها تفتر اتاري تنتظرة يجي ...

‎فكلت خلي اكملها عليها

‎ كتلها تدرين النهار كله يتحاجون بالتلفون مايبطل يدك عليها ...

‎والله حتى شفته تدمع عيونه من تزعل منه ..

‎ظلت هي فاتحة حلكها وممصدكة ...

‎كتلها حبيبتي انت تكولين هو مايريدها فتحي الحاسبة تشوفين صورتها باك كراوند خلفية الشاشة ...

‎فرجعت بمكانها انتجت وخلقتها مكلوبة كلت بگلبي هاي من كل عقلها...تحب واحد يحب وحدة وهي متزوجة وولدها كبار واكبر منه هم ...والله اللي يعيش يشوف

‎فظلت ...تحوص شوية كامت سالتني زين هو هيجي يحبها ليش مايرجعها !! لا عيني هي مجلبة بيه مبين.....

‎كتلها هي مرايدة يمكن الله اعلم بظروفها ...

‎واحنى دنحجي هو دخل

‎ هو من يمشي مشيته سريعة جنه يركض فسلم وراح على زينة تسويله الجاي ...

‎عدنا المشروبات كانت الشركة هي  تدفعها مانشتريها ...

‎فعلى طول الموظفين جاي وكهوة...

‎فقبل مايصعد صاحته خلود كالتله ليث  تعال تعال ابو محمد راح يتاخر اليوم

‎شبيك تركض تعال اكعد نسولف

‎هو راد ينسحب بحجة الشغل بس شافني كاعدة...سحب كرسي واجى بصفنا ..

‎مراد يكعد وحده وياها

‎والكافتريا جانت مليانه مو فارغة يعني ....

‎فراسا اول مكعد

‎اتشكر مني على شغلة العروض مال البارحة...

‎شوية وشوية ماتحملت خلود اشو جرته من ايده هو بسرعه وخرها ...

‎سوت نفسها كانه ماكو شي

‎كلتله ليث شنو سالفة ضحى اشو جتي البارحة تصيح وتعيط ظل بالنا خوما اكو شي اسم الله ...

‎كلها لا ام عبد الله....(عبد الله ابنها الجبير) ...

‎ماكو شي شغلة خاصة وحليناها ...

‎وسولف شوية على الطريق والازدحامات جر روحه

‎وراسا صعد هو كلش انحرج من تصرفها واني هم ضجت ظليت اباوعلها ...عافتني وكامت ...

‎اني هم كمت صعدت وراه لغرفتي ..

‎وامي على بالي ردت اخابرها اكللها شسمعت البارحة بس مايجي من گلبي اقهرها خطية ...

‎فكلت خلي وكت الغدا اخابرابويه واحجي وياه بلكت يحس ...يجوز والله مااعرف ...

‎طبيت للغرفة ...

‎شفت ليث هم ينكر برجله على رجل الكرسي ومتوتر وحاط ايده جوة حنجة ومباوع عليه ...

‎اني راسا انعقجت ...

‎بسرعة اضوج كلبت خلقتي اني هم ...

‎شنو هذا شسويت اني ...

‎حرامات راح كل الحجي اللي حضرته ...وشوية اجى فاضل ...ظل يحجي ويسولف ...وليث مايجاوب غير اي ولا ...

‎اخر شي كله اني طالع ... وسلم عليه حتى مباوع عليه اني...

‎ضجت...و

‎ كلت خلص الا اكلب خلقتي من يرجع ...وحدةبوحدة

‎وكعادتي بالغدا اكون وحدي ...

‎كلت خلي انزل شوية من الصبح كاعدة بمكاني

‎نزلت واخذت حافظة اكلي ويايه ...كانت الكافتيريا متروسة وكوة لكيت كرسي وية البنات اللي يشتغلون على االبريد والاستنساخ هناء ومنى ....

‎سلمت وكعدت ...طبعا مكان اكو حجي بيناتنه يادوبك بس كد السلام ...

‎شوية وكاموا وعافوني همه كانو مخلصين قبلي

‎فبقيت وحدي دااكل ..

‎واگلب بالتلفون اباوع على الصور الهي نفسي ...

‎اجوي فاضل وليث سوى سلمو وسحبوا كراسيهم وكعدوا ...

‎اني شوية انحرجت صح احنى سوى بالغرفة بس هذاك شغل وهذه كافتريا ....

‎ مااعرف بوكتها حسيت بثقل والبنات اللطيفات كامت تگلب عيونهم ...وماكو وحدة مشتلي الموضوع كلها تباوع ...شبيكم يامعودين ...

‎بس اني طبعا جان عاجبني شوية اضوج البنات كلت خلي اضحك واسولف ...

‎بس شلون اني ضايجة حيل من ليث فسكتت ماحجيت  ...

‎همه كعدوا يسولفون عاادي وليث يحجي ويايه على الشغل  اجاوبه من ورة خشمي ومدنكه ...

‎فمااعرف شاشر لل فاضل

‎ كله عوفها بابا هاي نحسة وساعاتها مو ساعات تلكيها مضيعة ماشة ودتبجي عليها ...

‎كاموا يضحكون ليث وفاضل عليه ....

‎اني زعلت كتله ماشة شنو والله عيب ...

‎كلي لاتزعلين وهو خربان من الضحك...مضيعة مشط ...

‎كتله فاضل ترة دمك ثكيل كوة تنجرع اوكي لاتتشاقة ويايه

‎ عفته وصعدت حسيت بحرارة صعدت لخدودي واحمريت  وخجلت ...

‎اتمنيت لو اخذ اجازة وارجع للبيت ...

‎راسا ليث صعد وراية ديصالحني عود ويعتذر عن فاضل وانه موقصده وهو مجرد شقه ...

‎كتله خلاص مصار شي بس كل واحد يعرف حده ...

‎كلي شبيج سارة ترة انت حيل مزودتها كلش معقدة روحج اللي يشوفج مايكول انت هيجي طبعج ....

‎اني راسا طفرت دمعتي ...

‎من اتذكر ذاك الموقف شكد اكره نفسي شكد جنت زعطوطة على الرغم من عمري ودراستي بس من اتذكر تصرفاتي صدك احتقر نفسي ...

‎بوكتها ليث كلش تاثر وانقهر من شاف دموعي ...

‎وكام يلوب مايعرف شلون يرضيني لحظتها صدك غرت من ضحى وحسدتها عليه

‎الله اللي يعلم شلون مداريها!!؟؟

‎وظل بس يعتذر ويهديني بيومها انكسرت كل الحواجز بيناتنه ...وبديت اسمعله ...اسلوبه الغريب والفطن جذبني ...

‎مو احبه لا بس مااعرف يمكن كنت محتاجة شخص يوعيني مااعرف ...من الفراغ او يمكن كنت محتاجة اهتمام!!!

‎خلص الدوام ورجعت للبيت راسا لفيت راسي ونمت مكعدت الا بالسبعة ....

‎الوكت جان قبل الغروب اخذت جاي وطلعت بالحديقة خابرت هالة كالت مشغولة ...

‎هالة اكبر مني بسنتين واتعرفت عليها بالخط من ايام الكلية هي جانت هندسة كهرباء ...

‎وقوت علاقتنا واستمرت ...

‎اتزوجت استاذ بكلية اللغات شافها باحتفال الجامعة واستقتل عليها واخذها ...صار عدها زياد ودانية ...وجانت حامل بس بالجديد زوجها صاير بيه سكر وكلش ماذيه ...

‎وحالتهم المادية بدت تدهور ...لانه سكره من النوع المؤذي الظاهر...وهي كعدت بالبيت ورة ماولدت دانية ....

‎اني كنت كلش احبها و هي اقرب صديقاتي والوحيدة تفهمني بلا مااشرح واحجي ...كنت اتمنى احجيلها اللي صار ...بس شسوي مكدرت. بذاك اليوم ...فظليت شويه متضايقة ...المهم و

‎اني وكاعدة سمعت صوت سدير حبيبي دك الباب ...يرفسها برجله كان عمرة ست سنين ...

‎راسا ركضت وحضنته وبوسته شلته وطبيت جوة واجوي عقيل ومسرة ورايه ..

‎ اني مانتبهت بس صحت بابا سرمد...اجتي مسرة ...

‎طبوا كلهم...انداريت على مسرة شفت عيونها دموع ...

‎هاي دتبجين ولج شبيج ..خوما عقيل وياج ؟!!

‎كالت لا والله هو يايوم سوى ويايه ...لعد يمعودة شبيج ..بعدها محاجية

‎كامت تبجي كالت ماما وين وحضنتني كتلها لج كافي وكعتي گلبي شبيج ....

‎هي جانت حامل بشهرها الثالث ... كتلها مسرة الله عليج شكو خوما الجاهل بيه شي هي تاشرلي لالا  وجرتني للصالة اباوع على عقيل ااشرله شكو هو هم بين حزين وبين فرحان معرفت اقره تعابيره ...

‎كالت ماما شوكت تجي ؟!!

‎كتلها على جية بالسبعة ونص تسد العيادة ...بس خير شكو!!؟

‎مسرة يمعودة شبيج كالت هو شي زين بس مااعرف مقهورة على ماما ...

‎اني عبالي عرفت بشغلة صديقة بابا بس شلون يعني شي زين؟!!!!!

‎سدير ابن اختي مسرة  كان حفيدنا الاول وروحنا بيه ...

‎وخصوصا انه على ايدامي انولد وهي اللي ربته ...

‎ احنى اصلا قليلا ما جان يجينا احد ....

‎ففرحتنا كانت بجية مسرة وابنها ...

‎بذاك اليوم من جتي وعيونها تبجي ...

‎كانت كلش مقهورة ...

‎بس فرحانه شلون  رهمتيها يا عيني ...

‎ابتسمت والدموع بعينها ...

‎كالت عقيل زوجها طلعتله الموافقة على السفر و البعثة الى ال المانيا

‎الدائرة راح ادزه هناك يكمل دراسات ...ولازم اروح وياه ....مصاحبة زوجية ...

‎اقل شي تلاث سنوات ...

‎بس شلون يجي من گلبي اعوفكم واعوف ماما!!!

‎اني صدك سكتت ماحجيت ...مفكرت لابيها ولا بزوجها بس بسدير شلون راح تاخذه

‎وتروح ...اصلا روحي بيه ...كلش انعقجت...

‎على كولة ماما هذا ابنا وانت دتربيه ...

‎رحت بصفنتي جبتلها كلاص مي واجيت ...

‎كتلها شوكت سفرتكم ؟!!

‎كالت بنهاية رمضان ان شاء الله يعني هيجي شي بعد مكالو بالضبط ...

‎يعني ماباقي شي ؟!!

‎كالت تعرفين اخو عقيل هناك ...وراح نروح بنفس الجامعة اللي بمدينته ...

‎هو اللي حصله الموافقات ...الحمد لله خطية كلش فرح من كلناله راح نجي ...

‎باثناء ذلك...سمعنا صوت ماما دتلاعب سدير وجرته وجتي كالت ماماتي ليش كاعدين وحدكم هنا؟!! شافت دموع مسرة ...فراسا بهتت خيرج امي شبيج ...

‎طبعا اني راسا نطيتها بلا مقدمات ...

‎كتلها طالعتلهم بعثة ورايحين لالمانيا هالشهر الجاي ...

‎فمسرة كالت اصلا اتاخرنا ...و...

‎امي راسا قاطعتها ..صدك ماما...

‎راح تاخذين سدير ...يايمه ياروحي ...شلون بعد ماشوفه ...

‎شلون تاخذيه هذا ابني ...واني ربيته

‎ياربي شلون اتحمل فراكم ....

‎من شافت مسرة انقهرت ...

‎كالتها ماما هي كلها تلاث سنين وارجع ...

‎وكامت تبجي فامي حضنتها وراسا كالتله

‎يله ميخالف امي لاتضوجين هذا مستقبل زوجج ...

‎وفرصة ماتتعوض

‎روحي والله ويوفقكم ...

‎هي كلش انقهرت بس ضمت بگلبها ...

‎وفعلا هي اللي ربت سدير لانه من انولد كانت مسرة توها بدت تدرس دبلوم طموحها كان الدكتوراه درجات التخرج مالتها مااسعفتها تدخل ماجستير راسا بس انقبلت دبلوم...

‎فعلى طول جانت يمنا وخصوصا وكت الدراسة ...

‎زوجها عقيل كان انسان هادئ ومحترم وملتزم كلش وحتى مسرة اتحجبت اول ماتعرفت عليه واهله هم كانوا كلش بحالهم اصلا مافي يوم سمعنا مسرة تجيب طاريهم او تحجي عنهم بشي صح حالتهم المادية مو تمام ...

‎بس ممانعوا ابد بطلبات مسرة وراسا عزلوا الطابق الفوك بدرج خارجي حتى تاخذ راحتها والله وكيلكم هي طول الوكت يمنا خصوصا من صار عدها طفل ...

‎فمحسينا ببعدها عنا من اتزوجت بالعكس صارت يمنا اكثر من ما بيتها وزوجها كان مايمانع ابد لانه اختي تعرف شلون تمشي امورها فاامي اتعلقت بابنها حيل

‎وللاسف صحتها كلش تعبت ورة سفرها ...

‎وواجى رمضان وباول يوم منه عرفت انه ليث وكومة موظفين مصايمين مااعرف شنو اللي تغير بهالدنيا قبل حتى اللي يفطر يستحي يكول فاطر ...هسه صار كلشي علني ماكو مستحى ...لا من الله ولامن عباده

‎فمن داوم ليث وكلاص الجاي بيده واحنى صايمين

‎ فسالته كتله ليث اشو مصايم ؟!! يكول جنت اصلي واصوم ويضحك يكول بس خوالي ادبسزية طلعوا عيني وعلموني على الشرب والنسوان....

‎بس امي واختي يصومون اني واخوية وابويه منصوم

‎عاادي فرحان ويضحك !!!!

‎مكنت اعرف يحجي صدك لو كذب بس عرفت منه انه يشرب مرات على الرغم وكته كله بالقاعة يتمرن ....يعني المفروض رياضي ...

‎بس خلال هاي الفترةقوت علاقتي بليث اكثر وصار يحجيلي هواية عنه وعن ضحى ...من يكون فاضل مموجود ونكون وحدنا بالغرفة

‎وكلما يحجيلي اساله اكثر ...

‎كمت افكر بضحى هواية يمكن اكثر منه ههههه

‎وشلون هي  بتصرفاتها اللي عمري معرفت اسوي مثلها خالة ليث هيجي يدوخ بيها ...

‎مااعرف ليش كنت اغار منها لا وبعد كمت اقلدها  بالتصرفات مرات من  اللي يحجيلي عنها ليث مثلا اني طبيعتي دائما امشي ومااسلم على احد اتجنب الفشلة...

‎لانه اظل افكر هذا جاوبني لو لا وليش هيجي جاوبني شنو يقصد ...هاي مااسلم عليها عاقجة شكلها...وهكذا

‎فبس اللي يسلم عليه ارد عليه...

‎هسه و هالايام كمت اسوي مثلها تمشي مبتسمة وتسلم على الكل ...

‎وعلى الرغم من انه  هو يكول جان هواية يتعارك وياها على هاي الشغلة هو كلش يغار عليها ويتخبل اذا ضحكت وية احد

‎وحتى يحجيلي يكلي مرة ردت ابسطها لانه كانت تتشاقة  وية وابو محمد ...

‎فاني اتفاجات وضحكت كتله تبسطها شنو !!!

‎كلي عادي احنى واحد يبسط الثاني...

‎بوكتها مافتهمت عبالي صدك يبسطها طلع هو ينبسط منها

‎بس تعرفون شلون ياعيني ...

‎يعني لو تضربه بالجنطة مالتها لو هيجي بالموبايل لانه  هي فدوة كلش نازكة تموع بالحر حسب مايوصفلياها...

‎يكلي سارة اذا مااخابرها كل ساعتين اتخبل ...اظل الوب ...

‎بس اسمع صوتها يله ارتاح ....

‎حتى لو ماكو شي ...

‎وهم يحجيلي شلون معذبها بشكه وغيرته ...

‎وكل مرة اريد اساله ليش افترقوا استحي انتظره هو اللي يكول ...

‎بس اللي افتهمته من كلامه  انه هو شكاك ....

‎فكتله معقولة ماتثق بيها ؟!!

‎كلي لا والله اثق بيها مثل عيوني بس سارة هذا مرض بيه مو بيدي اذا شفت تلفونها مشغول اكلب الدنيا عليها حتى لو تحلفلي ميت يمين مااكدر اصدك ....وهذا الصراع بداخلي خبلني وخبلها ...

‎مو بيدي والله ...

‎وقبل متسافر مسرة بشي عشر ايام احنى كنا مفجوعين من الخبر...كلنا متضايقيين منها مانكدر نكللها لاتروحين لانه هذه فرصة ماتجي بالاحلام ولا نكدر على فراكها

‎مرت ايام رمضان حيل كئيبة ...جنت من ارجع من الشغل اجيب اكل ويايه من برة...مالنه واهس نطبخ على كد الشوربة واذا امي بالبيت اسويلنا اكل بسيط حتى ابويه مصار اله واهس يسولف ويحجي ويتشاقه ...

‎وبذيج الفترة جانت ليله خميس على جمعة ...

‎امي رجعت من وكت بذاك اليوم وسوتلنا الفطور فطرنا ...على الرغم من الاوضاع جانت  موزينة بغداد  بسنة ٢٠٠٨ بس برمضان جانت لساها بعض المناطق مثل قبل تكعد للسحور خصوصا الاسبوعين الاخيرة منه  ...

‎ومن هاي المناطق  المنصور

‎رحنا افترينا شوية ورجعنا على ساعة ١٢ من رجعنا ابويه واخوية سرمد صعدوا فوك واني وامي  كعدنا نباوع تلفزيون على المسلسلات  تعرفون نسهر تقريبا للسحور نتسحر وننام ...

‎اتذكر جانت ساعة وحدة ونص بالليل دك تلفون امي اكثر من مرة ...

‎واخر شي راحت شالته كالت اكيد هاي المستشفى

‎ والله و اسمع صوت ماما دترجف  بس تكول لاحول ولاقوة الا بالله ياربي شلون ....

‎سدته وجتي يمي ودموعها تكت نشف دمي بجسمي...

‎ سارة هاي عمتج سعاد تكول  كاتلين عمتج نجاة ورجلها بسيارتهم  ...

‎يايمة الخبر نزل عليه مثل الصاعقة ...كتلها شتحجين ماما؟!!

‎كالت شلون هسه  اكول لنعيم  ...لج اذا هسه كعدت ابوج وكتله اخاف يفز ،يخترع ،يصعد ضغطه ؟!يصير شي بالرجال؟

‎ظلينا نبجي وممصدكين الخبر نلوب على جهالها الصغار

‎والله واخر شي  صعدنا اني وامي دنكول لابوية حتى يروح يشوف الموضوع ....

‎ووظلينا محتارين شلون نكله ...

‎وخطية اول ماعرف راسا اتخربط اغمى عليه ...لانه جان يموت على عمتي الله يرحمها جانت مثل صديقته وعلى طول تتفقدناو هي الوحيدة من بيت جدي الي نحبها هواية ونمون عليها ..

‎خطية  روحه فرفحت وظلينا ساعة نحاول انهديه... حتى يلحك يروح ويفتهم شنو اللي صار گلبنا صار نار عليهم

‎بذيج السنة واللي قبلها صارالقتل والذبح بشوارع بغداد علني ...ومحد يخاف من العقوبة ...انصبغت الشوارع بدم الناس الابرياء

‎المصيبة انه لحد هسه مانعرف ليش كاتليهم ...

‎عمتي نجاة اصغر وحدة بعائلة ابويه.... مواليد ٦٨

‎من جانت صغيرة حبت واحد جيرانهم متزوج ...

‎مااعرف شلون خلاها تحبه هم متزوج و عنده اربع جهال وهم محلو وهم كاعد ويه اهله يعني مو متمكن ويدللها....مع ذلك

‎ اتزوجته رغما عن  جدي وبيبتي بعد مشاكل كومة

‎وحتى ورة الزواج ماارتاحت ماكو تلاث سنين كضتها عرك وطلايب تالي زوجته الاولى واهله طلكوها ...وحتى مؤخر ماانطاها

‎واخذت بتها الوحيدة سراب جانت سنة ممكملة ورجعت لبيت جدي ... بقت هناك حتى نفقة مايدزلها رادت بس تخلص من شرهم

‎وقبل شي ثمن سنين اتعينت موظفة بالاتصالات واتعرفت على زوجهاالثاني المرحوم ...

‎جان ممتزوج يعني عمتي اول زواجه ...وجان كلش فقير وعلى نياته  بحيث يمشي ورة حجاية عمتي ...وصار عدها من عنده اثنين ولد منه سنة ورة سنة جابتهم

‎هي كانت حبيبتي  

‎انسانة طيبة وبشوشه ...ماعدها اذية على احد وهمه الاثنين  كلش بحالهم لا سياسة ولادين ...همه جانواوحدهم بذاك اليوم  راجعين ساعة تسعة من بيت اخو زوجها طالع من المستشفى وديزوروه ومااعرف شلون موكفيهم و

‎كاتليهم على السريع مال الدورة ...وجانو الله يرحمهم عايفين الجهال الصغار  يم سراب اللي بوكتها جانت صف اول كلية

‎ومن متاخرين  مراجعين للبيت ظاله دك عليهم تلفوناتهم مغلقة اخر شي مخابرة عمامها وكوم  عمها الثاني روح وراهم على نفس الطريق و شايف الحادث والشرطة ملتمين....من نازل يشوف هذا اخوه وعمتي خارطيهم بنص الشارع والسيارة ظاله ماشية مدعومة بالرصيفوصاعده عليه ...الله يرحمهم

‎صارت الفاتحة واني بقيت بالبيت مارحت وياهم لموا جهال الكرايب وبقوهم يمي حتى لاتصير هوسة ...فاتحة النسوان صارت بييت  جدي الله يرحمه ونفسه كاعد بيه عمي والبيت صغير فكالو نعوف الجهال يم سارة ...و لانه مااحب هاي الاجواء والهوسة والقهر والبجي اني بلا كلشي دموعي ماسكتت ...بقيت   يمي شكو جاهل ومن ضمنهم جهال عمتي ست وسبع سنين جانو بذاك الوكت سودة علي

‎جان الموقف مؤلم كلش ..يعني شلون هسه هذولة المساكين  يبقون بلا اب وام بله سراب كم سنة وتتزوج بس هذولة شيكبرهم ....

‎من هسه يبجون يريدوهم...شلون الواحد يفهمهم ماكو ام واب ...والله حاضنتهم وابجي وهمه كلش فقرة عينا ابوهم ...

‎يبجون بخنكة ويكسرون الخاطر جنت ادعي الله يحمي برائتهم ...والله خطية وصعبة...

‎ورة ماخلصت الدفنة والفاتحة ...

‎ابويه من يومها قرر انه سراب والولد يبقون يمنا احنى نربيهم وماحد كسرله حجاية اهل زوج عمتي هم معارضوا. بس عمتي سعاد رادتهم  هم مكدرت تحجي كون ابويه اكبرهم ومحد يكسرله كلمه...

‎وبالفعل بقوا يمنا وامي نقلت مدارسهم...

‎وحتى العيادة سدتها ورة الحادثة تقريبا شهر لانه خطية الجهال اتمرضوا ...كاموا مياكلون ابد خصوصا الصغير ليل نهار يبجي يريدهم...

‎يكعد على الصبة مال الباب بالحديقة ويبجي يكول هسه تجي ماما شكد اشترينالهم لعب وشغلات مفاد ...

‎جان يريد امه الا ان وكع بالفراش ...

‎فظلت امي وسراب يداروهم ...

‎وقبل العيد بكم يوم صار سفر مسرة ...وانكلب العزة عدنا ...

‎يعني عيد ذيج السنة جان اتعس عيد ...الله يساعد كل واحد فقد اهله لو بعيد عليهم ويجيه العيد..يصير الجرح جرحين والحزن حزنين ...

‎جنا نحضر الكليجة والعيديات والهدايا للجهال هسه المن ننطي والمن نعايد ...لا رحنا نزور احد ولا احد زارنا ابويه ماقبل ...بس رحنا للمكبرة ورجعنا ...

‎بس جنا نحمد الله ونشكره على سلامة مسرة وابنها على وصولهم المانيا بسلامة ...

‎رجعت سراب للكلية ورة شي شهر او اقل مااتذكر بس اتفقنا اانه كل يوم واحد يوصلها على فراغه الا ان ادبرلها خط فاني على الاكثر جنت اوصلها وامي تروح تجيبها توصلها وتروح للعيادة ...

‎بس اشو هاي تصرفاتها شوية جانت مو عاحبتني يعني يومية مطلعة امي تروح تشتري هدوم اسود جديدةوتدور موديلات امي مجانت تحجي بالعكس تكيف تطلعها حتى تنسيها وتلهيها بس اني جنت اكول هي بيا حال اللي امه وابوه يروحون جوة التراب هم اله واهس بالدنيا يدور لبس ومكياج وجنط ؟!!!

‎احنى بوكتها حضرلناهم غرفة مسرة وجبنا جرابيهم وغراضهم من بيتهم ماقبلت نشتريلهم جديد ...بس ماخلينا بنفسهم شي ...كلشي جانوا يريدوه بالساعة نركض عليه حتى سرمد حبيبي جان يومية يطلع الولد يفرهم بسيارة امي لو سيارتي ...ويلعبهم بالحديقة يعني حاولنا مانقصر وياهم

‎بس

‎بصراحة جنت اشك بتصرفات سراب عزلتها بالغرفة فوك على طول حابسة نفسها ومن افوت من يم غرفتهم اسمعها تحجي بالتلفون ومن تسمع صوت رجليه تنصي صوتها ...

‎ ورصيد ورة رصيد مرة مني مرة امي مرات ابويه ...زين المن تخابر؟!!

‎فكمت اراقبها بالليل واكثر من مرة افتح عليها الباب اشوفها تسولف بالمسنجر على الحاسبة جان عدها لابتوب بذاك الحساب مع انه حالة عمتي مو كلش  يعني ...فد يوم ابويه وصلها اني اخذبت حاسبتها  كلبت بيها...و فتحت الهستري وشفت البلاوي ....

‎تعرفون اني بديت اشك بسراب بت عمتي الله يرحمها وبتصرفاتها ورة ماجتي كعدت ببيتنا  ابد مجنت مرتاحة لموضوعها

‎وخفت لاتسويلنه مشكلة وتورط امي وابويه وياها بشغلة موزينة عاد   شيخلصنا بعد من عمامها لو من لسان عمتي سعاد!!

‎ فكلت خلي ادور وراها..واشوف شعدها ماعدها

‎اخذت حاسبتها ورة مراحت للكلية وبلشت ابحوش بيها 

‎ومن فتحتها ماتفاجات لانه كل اللي متوقعته شفته وبعد اكثر بس الصدك غير  انقهرت من شفت الاشياء اللي جانت تشوفها والصور اللي خازنتها لانه هي جانت بعدها بعينا طفلة وبريئة

‎والمفروض  متربيه احسن تربيه

‎ عمتي مجانت مقصره وياها باي شي

‎ انوبه تعالوا شوفوا  المحادثات مال ماسنجر جانت وية اكثر من واحد تحجي يوميه...ليش سراب هيجي ليش ؟!!

‎  المهم اخذت صور الهن وطلعت خابرت امي وحجيتلها كلشي

‎ الصراحة اني ماانقهرت الا على عمتي الله يرحمهامتستاهل احد يعايرها بهاي سراب....

‎ سبحان الله ابد محبيتها ولا ارتاحيتلها  من جتي لحد الان صح من جانت تجينا زيارة كلش قليل مانكعد سوى

‎ واكثر شي اسولف ويه عمتي وشقانا وضحكنا بس وياها ....

‎ وحتى من نروحلهم تسلم علينا وتصعد لغرفتها جنت اكول مراهقة ماعليها عتب وكلنا مرينا بهيجي مرحلة مانحب الخطار ..

‎بس...مااعرف ليش من جتي كعدت يمنا راسا شدت ويايه حتى جانت تضوج من اداري الجهال ...

‎ماعون ماتغسل ...غرفتهم اني اسويها وهم جنت اكول ميخالف ...

‎حتى من جنت اوصلها الصبح للجامعة تظل دايرة وجهها على الجامة مال السيارة وماتحجي كلمة

‎جنت عايفتها براحتها شعليه بيها ...

‎المهم احنى نسوي الواجب وياهم يعني ابد مجنت خاله عقلي وياها

‎بس ظليت اشك بيها

‎وصدك والله طلع شكي بمحله،  المهم قررنا اني وامي نضم الموضوع عن ابويه اخاف يعصب وياذيها وامي كالت هم خطية يجوز عدها فراغ نفسي ورة وفاة اهلها ...

‎ويمكن رجلها زلت وغلطت ...خلينا يواش يواش وياها ....

‎المهم امي التزمت مررقبتها وظلت تنصحها وتدللها وكلش تريد تجيبلها اللي يخطر على بالها واللي مجانت تفكر بيه ...

‎ الا ان في يوم امي لكفتها دتحجي ويه واحد بالليل

‎اني معرفت منو ولاسالت  بس سمعت صوتها تحجي وية امي وتبجي وتتعذر  وتكول هاي اول مرة بس امي ماسكتت عاتبتها وشوفتها واجهتها بالصور

‎ الغريبة انه هي راسا نكرت و  حورت الموضوع كله عليه !!!

‎انه اني اغار منها وظالمتها ومرايدتها بالبيت

‎وتبجي بحركة وتلطم وتدعي على نفسها ...

‎ ماما تكلي خبلتني تريد تخدعني تكلي سارة هي خالة هاي الاشياء بحاسبتي حتى تطردني من البيت...

‎تكول ظليت فاتحة حلكي ومصدومة بيها ...

‎انوب ماتسكت

‎تصيح اريد اروح لخالتي سعاد ماريدكم انتوا ماتحبوني ...

‎تكول ماما مااعرف اراضيها لو اركعها راشدي اوعيها عيلمن دتمثل وتجذب ...هاي افة مو طفلة ابد ...صدك حيرتني عفتها وطلعت ...

‎خطية جتيني ماما للغرفة بالليل وكلبها يوجعها من ورة تصرفات سراب ...

‎ ...وكالتلي سارة هاي راح تسويلنا مصيبة ولا اللخ الله يستر منها هاي مو هينة ابد  ...هاي تهجم بيوت ...

‎هديتها وانطيته ادويتها ونمنا ماحجينا هواية بالموضوع بعد

‎ثاني يوم الصبح طلعوا كلهم اني كعادتي اتاخرت دااتراكض سويت نفسي معرفت شصار ...صحت سارة سارة يله اوصلج ...

‎طبعا اني جوة وهي فوك ...

‎طلعتي على الدرج

‎جانت تكلي الله ينتقم منج تريدين تبليني ...

‎شتريدين مني ؟!!

‎اني شمسويتلج ؟؟!؟

‎متريدوني ودوني يم خالتي سعاد

‎اني هم ممرتاحة هنا حرام عليج فوك ما اهلي كلهم راحوا وانت هيجي تسوين ...جوزي مني

‎كامت تبجي بكل وجه البراءة وطبت جوة ...

‎طبعت اتذكرت امي من كالت هاي مو هينة ومايفيد الواحد يحجي وياها ...تاكلنا وتشربنا ...

‎عفتها مجاوبتها وطلعت.....

‎مااحجيلكم شهر وشويه ماتحجي ويانه وماتنزل ومن ابويه يسالها تكله اريد اروح يم خالتي بس هو مايقبل مهما كان عدها ولد ورجلها غريب

‎بهاي الايام قوت علاقتي بليث كلش ولاهو عافني بمحنتنا بس كمت اشوف شلونها علاقته ويه ضحى ...جان يدللها بشكل غريب هو اني اللي مجرد زميلتها حسسني اني مدللة يومية يجيبلي غدا ... ياخذ سيارتي يفولها ...

‎وحتى يبدللها دهن اي شي اريد جان راسا هو يسويه بلا مااطلب مرتين ...

‎فكيفما هي ...صدك جنت احسدها عليه بس بنفس الوقت عصبيته جانت مخيفة وشكه قاتل

‎بس جانت هي تدلل عليه دلال مصاير ...

‎اتذكر مرة جان بابو غريب وهي بالكرادة خابرته كلتله هسه تجي تعبانة مااكدر اسوق ارجع للبيت وصدك يرجع تكسي من ابو غريب يوصلها بسيارتها  للبيت ويرجع مرة ثانية للشغل ...ها وكانو متزاعلين وهي من يوصلها ابد ماتكعد يالصدر ليكدام يعني تعكد ليورة ....ماتقبل ...

‎واللي افتهمته من ليث انه هي عدها اخ واخت متزوحين وطالعين برة بس هي باقية لاهلها ...فهو جان مثل ابنهم اللي يمشي كل شغلاتهم

‎فد يوم رجع من برة ورة الغدا كلش مقهور وضايج لحيت عليه اعرف وكلي ضحى  ناهية كلشي بيناتهم لانه البارحة متعاركين وهو خايف كلش هالمرة صدك تعوفه ..

‎كمل كم شغلة وطلع مرة لخ

‎والله وشوية دك صوت السكايب بالحاسبة ...

‎جان برنامج السكايب قريب من عرفناه احنى مسرة علمتنا عليه حلو والصورة واضحة احسن من الماسنجر كان يكطع والصوت مو واضح وكل شويه يفصل وهو اصلا النت جان بالبيت شلعان گلب...

‎المهم ظل يدك ويدك ...طبعا عاادي اني جنت افتح حاسبة ليث صرنا كلش اصدقاء ويحجيلي عن كلشي اني هم جنت احجيله بس بصراحة ماعندي شي اكوله غير الخيبات ...هو دائما كان ينصحني ويعلمني وحتى والله جنت احس يخاف عليه يجوز مثل اخته مااعرف بس هو كان صديقي....بدون مشاعر اخرى ...

‎لانه مستحيل اي وحدة بالدنيا تكدر تاخذه من ضحى...

‎فتحت السكايب ...

‎وجان صوت بنية وصورة حايط ...وصوتها ناصي كانه تحجي من ختله ...

‎تصيح ليث ليث تسمعني ...

‎كتله ليث مو هنا على مكتبه طالع فد شي ربع ساعة يرجع ...انت منو؟!

‎ انوب اني هم نصيت صوتي لا اراديا هههه

‎كالت اني زميلته بالشغل انت منو ؟!! ضحكت كلت اني هم زميلته بالشغل ...طبعا راسا كعادتي نطيت كتلها انت ضحى !!؟

‎فرحت وكامت تضحك ...اي اي اني ضحى انت سارة ؟!

‎كتلهااي  اني سارة ...عدلي الكامرة بس السكف طالع ...كالت والله مااعرف هسه نصبت البرنامج ...ومدااعرف اشغله علميني عليه

..

‎كثر مجان حاجيلي عنهاجنت اعرفها اكثر من نفسي ومن سمعت صوتها ...مااعرف حسيت بشي غريب يمكن نوع الغبطة او الغيرة بس هو مو كره ولا حقد بالعكس البنية كلش ودودة ولطيفية الى درجة راسا كامت تضحك ويايه فمثل مجان يكول عنها هي ماتغار من احد ولا تكره احد والا غير وحده جان زعلت لانه اني فتحت السكايب ...

‎ظلينا نسولف وعدلت الكامرة وشفتها وشافتني ...هي بس مبتسمة خجلانه ومحمرة وهم خايفة احد يشوفهافاتحة سكايب بالدوام ...

‎لانه تكول غرفتها مفتوحة وكبال الممر اللي يروح ويجي يشوفهم ...

‎جان شكلها نازك عيونها لوزية وحنطية وجها كلش عريض ...ومحاطة مكياج ابد غير الكحل ...عكسي ...

‎يعني شي على شي البنية محبوبة ...

‎وشوية جان يجي ليث ...من كتله هاي ضحى مصدك ...طبعا من يحجي وياه كانه يحجي ويه طفلة يكلها ها ولج هاي منو علمج هالسوالف ...لا هاهي طلعت عينج انت وتخابرين من ورايه اني اعلمج ...وهي بس تضحك تكله لك كافي هسه يكولون هاي شبيها تضحك ويه نفسها ...

‎جانت تكله ياكذاب سارة هواية احلى من وصفك....

‎ لج سارة هذا يغار منج كال عليج دمج بارد ...ههههه يكلها لج فضحتيني اني غير هيجي اكول حتى لاتغارين ....

‎وظلينا نسولف الى ان شوية وسحبت نفسي وظليت صافنة على حاسبتي بحجة دااشتغل ...

‎هو كان خايف تعوفة البارحة ضاربها على ايدها لانه رايحة للمقابلة وحاطة صبغ اظافر ...وحتى اصبعها مفصوخ ...ومع ذلك يتصرفون كانه ماكو شي !!!

‎رجعت للبيت كلش مقهورة على نفسي ...وظليت اصبر روحي يالله سارة الله كريم الحمد لله على كل حال...يجي يوم وهم تنفتح قسمتج حضرت الغدا ...

‎وورة ماغديتهم طلعنا اني والجهال ولد عمتي غسلنا الطرمة برة  جان الجو شوية كاسر وصارت الكعدة برة حلوة واني تارستلهم الحديقة ملاعيب ...

‎اكول الحمد لله الله دزهم ونس النا ولو خطية مالهم ذنب بحرمان اهلهم

‎كعدت اشرب جاي واباوع عليهم يلعبون ..

‎ابويه بوكتها كان ماجل سفره من وكت الحادثة وهاي خلصت الاربعينة قبل كم يوم وراح يسافر باجر...فصعد يحضر جنطته وامي بعيادتها وسرمد جوة ديقرا شويه

‎صاحني كلي مسرة تريدج اتصلت على الحاسبة ...طببت الجهال  غسلتلهم على السريع وجبت الحاسبة بالمطبخ

‎احجي وياها واسويلهم عشى جنت افرح من تخابرنا اشوف سدير يلعب بالثلج .. حبيبي كلش فرحان اول مرة يشوفه ...

‎بس وكتها جان عدهم ليل ونايم هو روح خالته فكتلها  راسا ليش مخابره هيجي وكت حتى ماما ماكو انت مو تخابرينا بالاربعة ؟!

‎ضحكت كالت اريد احجي وياج بشغلة الج تفيدج...

‎يالله خير شعندج مسرة !!

‎كالتلي قبل كم يوم اخو عقيل مسوي كعدة عشى وعازم العراقيين بمنطقتهم ...يعني عزومة ترحيب وتعارف واكو واحد بيهم عراقي صارله قبل السقوط هو بالمانيا ويريد يتزوج كايله بلكت عدها اخت ...بت خالة ...تحجيلي وياها ..فانت راسا جيتي بباله فحجالي وكلت اخذ رايج شتكولين ...

‎طبعا بوكتها راسا رفضت ..

‎كتلها انت بعدج جديدة والناس ماتعرفيهم هناك ...وهذا شعرف عنه ...وعمتي توها ميتة يازواج ؟!!

‎كالت هو اني كتلج باجر عرسي..اتعرفي عليه اذا اتفقتوا بيها الخير لا ...كل واحد لحاله  شخسرانه انت ...تظلين هيجي نحسة وكلشي لا ...

‎لاتصيرين مثل خاله نهال ظلت تكول لا لا شوفيها بقت وحدها  ...

‎كتلها شبيها خاله نهال انتوا ليش بكلشي تجيبون طاريها ..ع فوها بحالها...

‎كالت هسه انت عفتي الموضوع وجلبتي بنهال ...

‎بابا شوفي طريقج ...

‎منا ومناك كتلها عوفيني هسه بعدين ...

‎جتي امي وظلت تحجي عليه يمها وتكللها ماتعرف مصلحتها ...

‎وماخلصت من حجي مسرة ...

‎المهم اني عفتهم عشيت الجهال وسرمد وصعدت لغرفتي ...

‎ضايقني الموضوع كله مااعرف ليش

‎هسه انتو شعليكم شايلين همي؟!!

‎المهم ...

‎وراها بشهر تقريبا يعني قبل نهاية السنة...جانت سراب بعد تروح وتجي للكلية بالخط ..سايق يوديها ويجيبها بس هي واثنين بنات ...اهلي ماقصروا وياها ابد واني هم ابتعدت عنها ...

‎بس بذاك اليوم امي خابرتني امي ساعة وحدة دتروح للمستشفى عدها ولادة طارئة و كالتلي  الخط مبلغ سراب مايجي عليها وطلبت مني اروح  اجيبها ....

‎تخاف تاخذ تكسي !!

‎المهم اني هم جنت تعبانة وضايجة اترخصت وطلعت رحتلها للكلية بوكتها وبسبب كثر الحوادث الاستعلامات منعت اي واحد يفوت بدون هوية طالب وظليت احجي وياه واني بت خالها والخط عايفها ودااوصلها ...والله خطية دخلني ودلاني قسم سراب وين ...

‎ظليت افتر وادور الكلية تقريبا بدت تفرغ وكلهم طلعوا كم واحدظل  منا ومناك وادور بالقاعات ماكو ها واني هاي الفترة كلها ادك عليها متجاوب الافندية والله وجان الكفها بالبارك اللي ورة القاعات كاعدة على على هيجي مثل دجة صبة مال ممر ....ورة الاشجار كوة شفتها ..هي وواحد بصفها وواحد ايده بحضن اللاخ ...

‎راسا فتت عليها كتلها ولج هذا منو وهاي الكعدة شنو ؟!! اتفاجات وعصبت عليه هي انوبه

‎تكلي هذا خطيبي انت شعندج جاية هنا  ؟!!

‎دتورين وراية مولو  يعني شنو معناها؟!!

‎انت ما متستحين كتلها؟!!امشي ويايه يله خلي انروح ...اني اعلمج بالبيت

‎هي عادي ولايمها ...

‎كتلج هذا خطيبي ...وجان خاطبني من امي الله يرحمها وهذا شي مايخصج افتهمتي لو لا؟!...طبعا تحجي وياية بنتره وهي اللي معصبة عليه

‎طبعا الولد مهتلف ومبين على شكله شنو

‎فطبيعي مااصدك هذا خطيبها

‎كتله فرحانة هو هذا خطيبج؟!!

‎اشو هذا من يمه كام ينفر ويعصب عود ضاج يعني ...

‎وجان يكوم ويريد يدفعني

‎شنو مو بعينج ولج !!!! يكلي

‎فكتله

‎ولج شنو اعرفك تعرفني ...

‎امشي سراب منا خلي انروح دااكلج ...

‎جان يكلي امشي روحي ولي منا يله اني اوصلها ...

‎اتخيلوا بعد شلون من بشر هو !!!

‎محجيت لانه صدك خفت يسويلي شي واحد مايستحي بايع ومخلص...

‎ والله حرامات هيجي بنية من عائلة يقشمرها هيجي واحد!!! عفتهم وطلعت طبعا هي مجتي ويايه ...

‎راسا طلعت ركض وادك على امي ماتشيله اتذكرت هي عدها عمليه هسه ...

‎طبعا جنت افور واسوق واريد بس اوصل اخابر ابويه لانه هيجي شغلة ماينسكت عنها  ومااشوفلكم الا ابو كيا ضربني صفح دمرلي البجم اليسرى كله علمود نفر جان واكف على الرصيف من اليمنى مالتي كسر عليه وفلشني ... من هبطتي ماعرف شسوي راسا ماعت روحي ونمت على الستيرن

‎والسايق نزل  يصيح ويعيط ويغلط عليه ياثولة ومااعرف شنو والناس التمو وصارت هوسة اني راسا دمعتي بعيني مااعرف شسوي انوب عمتي سعاد تخابر ودك وارفضه مااعرف شسوي ولا اعرف شلون اتصرف ابوية مسافر ...امي مشغولة بعمليتها  خابرت سرمد مايشيله مغلق تلفونه عنده محاضرة هسه مااجى على بالي غير ليث راسا خابرته ...

‎كلي دقايق واجيج...

‎كتله عفية هذولة والله راح ياكلوني والناس التمت والسايق يكلي الا تدفعيلي فلوس التصليح طبعا جنا على الجسر ...

‎اني هم نزلت مخروعة وخايفة ممارة بهيجي موقف قبل واكو واحدحقير  كل شويه لازمني من ايدي ويجرني الا ان دففعته كتله انت صدك  ماتستحي ..

‎يكلي هسه صرتي شريفة!!!

‎زين بله اني شمسوية اصلا حتى لبس ضيك مالبس هاي بس لانه اسوق !!!!

‎والاخ اللي يكلي اختي دفعيله جم فلس خلي يروح وتفض السالفة...وذاك يكول ينطوهم سيارات ويديحن بيها بس والله هم كان اكو كم واحد الله يستر عليهم وكفولي ويهدأوون ابو الكيا كلب الدنيا ويضرب سيارتي وينام عليها على اساس اتخربط من القهر مااعرف والله شلون هيجي يمثلون ...

‎المهم ليث كلي كعدي بالسيارة وقفلي الباب ...

‎الى ان اجي والله صدك ماكو كم دقيقة اجى هو وولد لاخ ذاك الولد ضخم وطويل ياكل عشرة ههههه

‎المهم اول ماوصل كلي لاتطلعين ابد ...اني احلها...

‎ابو الكيا شافني بنية وسيارة حديثة كال اقشمرها اخذ منها كم فلس ...لا والله ...

‎منا ومنا جماعة الكيا رادوا يلزمون  ليث على اساس يخوفوه اني كمت اصيح بالسيارة متت من الخوف لا تصير عركة بسببي ويصير شي من وراية كتله ليث عوفوهم ماريد شي خلي نروح وليث يلح يكله الا انت تدفعلها تعويض  ....

‎وذاك يصيح ويعيط اني كمت ارجف واحمريت كلش فاجى صديقة طلعني من السيارة كلي انطينا السويج وروحي للبيت اخذي تكسي وروحي احنى نحلها 

‎نفسهم االي بالبداية جانوا يكولولي انطيه خطيه فلسين خلي يروح يعني لابو الكيا هسه كاموا يحجون عليه يكولوله صوجك انت السبب بين مااخذت التكسي شفت سيارة مرور جتي ...اطمانيت ورجعت للبيت

‎مااعرف منين وشلون اجاني حادث السيارة غفل...

‎دخت والله ...

‎بس الحمد لله اللي عدت على خير ...

‎والمخطط يكول انه ابو الكيا هو اللي غلطان مو اني ...

‎لانه هو اللي عكس عليه ...

‎المهم ليث خلصها اليه بسلامات ...واني ماطلبت اي تعويض ولافلوس تصليح مردت اي شي بس تكون تفض واخلص بلا مشاكل...ولا وجع راس اكثر...

‎من داارجع للبيت بيومها عمتي سعاد ظلت تلح تدك التلفون ...بس مشلته اني عرفت هاي سراب رايحة لبيتهم واتصورت هي دتوسل حتى مااكول لابويه بس اني جنت حالفة ميت يمين الا اكله بعد اللي صار بيه وهذا الموقف السخيف لا والله ...صدك نويتلها نية موزينة...

‎اول ماوصلت طلعت قهري بسرمد ليش تلفونه مغلق جانت اعصابي محروكة وخطية طلعتها بيه ...

‎المهم هم دكت عمتي   مرة لخ ...هنا وشلته اشو هاي اكلتني وشربتني...

‎ تعاتبني وتصيح عليه وتغلط والله انت شكو تروحين لكليه سراب وانت شعليج تتدخلين وتحرجيها كدام زميلها ؟!! وفوكاها مصيحة عليها وجارتها من ايدها !!!

‎هاي اني وهسه صار زميلها؟!!

‎مااحجيلكم الحجي اللي سمعته من عمتي طلعت اني هسه الموخوش اللي اغار من سراب ...

‎واريد اكسر سمعتها بالكلية لانه هي ماعدها اب وام ...يوكفون بعيني

‎والموقف جان طبيعي واني فضحتها ...معقولة ؟!!

‎طبعا ماكدرت احجي ولا ارد اصلا

‎لانه عمتي بوكتها ماخلتلي مجال ولا سكة افتح حلكي بالعكس هي هددتني تشتكيني يم ابويه ...

‎صدك حيل تاذيت ....وغصيت بعبرتي ....ومكدرت اجاوبها. ...

‎سديت التلفون وظليت الوم  بنفسي اني شعليه يطبها الف مرض ..تصادق تكبل اني شنو ؟!!! هم زايده مني هذا الموقف ...

‎وياريتني خلصت ...

‎صعدت بدلت على السريع ودااغدي الجهال سرمد عايفهم لحد الان بس نساتل وجبس ممغديهم ،حميت الاكل امي محضرته من الصبح ودااوكلهم ...دخلت امي ...تصيحني ...

‎اني  عبالي هم مخابريها ...

‎بس من شافتني امي خطية كالت الحمد لله انت بالبيت اشو سيارتج ماكو لعد ظل بالي عبالي بعدج مراجعة ...

‎اني طبعا جنت دااغلي كتلها حتروحين للعيادة اليوم كالت لا اليوم اخذتها اوف

‎ماعدها مواعيد لغتها من الصبح ...

‎كعدت وحجيتلها كلشي ...

‎واحنى دنسولف ابويه خابر واستلمني رزايل ...

‎اتخيلوا شكد لعد عمتي حاجية عليه يمه بحيث مايقبل يسمعلي طلعت سراب المظلومة واني الحقودة المجرمة ....ماكدرت افهم بابا دمعت عيني انطيت التلفون لامي هي تفهمه عفتهم وصعدت فوك ...

‎فهو بعدين ورة مفتهم الموضوع متفق وياها انه تخلي سراب هاليومين يم عمتي ومحد يحجي بالشغلة لحد ما يرجع...

‎وخلال هاليومين عمتي وسراب مجازوا منا يومية يخابرون يتعاركون يريدون الجهال علاء وابراهيم اخوان سراب الصغاروامي ماتقبل ادزهم ...لانه جانت تعرف غعمتي ماتكدر على مصاريف وخافت يتبهذلون يمها ...هي خطية كلش اتعلقت بيه وحست كانه جهال اختها مو جهال حماتها ...

‎عمتي سعاد دائماجانت  تشكي من زوجها بخيل ومايصرف  على الرغم من انه  عنده محل كهربائيات وتحفيات ...

‎بس   جان شالع گلبها نحس ويتعارك .. هي جانت قبله متزوجة واحد وياها بالكلية عن حب وعدها من ولد وبنية ...بتها اتزوجت العام والولد خلص كلية هالسنة ...هي قبل من جانوا جهالها صغار اطلكت من رجلها لانه يشرب وكام ياذيهم ويضربهم ...ومشاكلهم وصلت للمحاكم وكوة يله خلصت منه...

‎وهم اتعرفت على زوجهاالثاني وعلاقة واخذها على زوجته ...بعدين من عرفت الاولى اطلكت منه ....

‎حسب ماهي تكول جانوا منفصلين قبل مايتعرف عليها بس مو بشكل رسمي  ...

‎ احنى بشكل عام علاقتنا مو كلش يعني احنى وياهم ...

‎المصيبة انه سراب مكامت تداوم وذبتها براسي والنهار كله تبجي تريد اخوانها

‎والله حرام هي ولا يمها الموضوع اشو  اني جنت اغديهم واعشيهم وحتى اسبحهم واداريهم مثل سدير حبيبي ...

‎بس على كولة ماما هي مثل عماتها تماما ...

‎صاحبات  مشاكل وراسهن گوي

‎وراها بشي يومين تلاثة رجع ابويه وصارت مشكلة سراب مشكلة جبيرة طبعا ابويه صار مثل بلاع الموس لا بيه يفضح بت اخته ويلومها ولايكدر يدافع عني لانه هو يعرف الحقيقة شنو

‎فجان يسكت بينما عمتي وسراب مخلوا حجاية محجوها وسووها طلابه شكبرها على ابو اني تهمتها وشوهت سمعتها بالكلية  لانه اغار منها ...على شنو اغار مااعرف اشو الحمد  ما ناقصني لا جمال ولا مال!!!

‎وتالي هي طلعت منها مثل الشعرة من العجين ...

‎وطلعت اني الصوج ...ومشت كلامها على الكل وبقت ببيت عمتي مرجعت يمنا   رغم معارضة ابويه لهذا الموضوع واخذت اخوانها يمها ...مقبلت تبقيهم يمنا

‎وفضت الشغلة وطلعت اني بوجه المصخم هيجي والله فروها عليه واني جنت استحي واخاف احجي لاتوصل الحجاية لعمامها وتكبر السالفة وتصير غير شكل...

‎ورجع بيتنا فارغ ورجع الملل لحياتي والروتين القاتل ...

‎مجان اكون اي شي جديد ابويه بين شغله وسفره وامي بعيادتها وسرمد ملتهي ويه اصدقائة ودراسته واني ماعندي غير شغلي اللي صار يوم ورة يوم كلش متعب ومزعج ...

‎ميخلون احد بحاله استحقرواا البنات ويايه حيل وصاروا يذبون حجي عليه ويومية تاهميني  وية موظف....

‎ يوم بفاضل ويوم بليث ... وحتى بالسواق من جانت سيارتي بالتصليح وواحد يوصلني ...خلص هاهي صادقته وخليته بجيبي ههههههه ....

‎والله و مصار شي اسبوعين وجابلي ليث سويج السيارة مصلحها ومكملها ...

‎اني راسا انطيتها لابوية واخذت وحدة اقدم واصغر لانه جانت ذيج جايبتلي العين والمشاكل

‎مجتمعنا للاسف اتغير كلش هواية ...حتى فلوس السيارة عبالهم مااعرف منين جايبتها ...دتعالوا وشوفو وعرفوا وضعيتي وبعدين احجوا ....مخافة الله ماتت بگلوب الناس ..

‎وصرنا واحد ينهش بالثاني ...

‎وقبل كم يوم من راس السنة ...جانت ظهرية اتذكر دك السكايب بحاسبة ليث اكثر من مرة بس لانه فاضل جان كاعد مجاوبت  ...

‎خفت لا افتحها وانوبه  ...اني مناقصة حجاية زايدة عليه ..كيف انه افتح حاسبة ليث ... و انه شلون اعرف كلمة السر مال الحاسبة وانوبه اجاوب السكايب الخاص مالته !!

‎والله وانتظرت الا ان طلع شلته وعاادي جانت ضحى تسال على ليث كالت من الصبح تدك على تلفونه مغلق

‎بس شفتها جانت تبجي كلش بالها عليه ...

‎كتلها والله ماعندي علم وفعلا هو من الصبح راح يتابع شغلنا بالجامعة المستنصرية ومراجع ...

‎طمنتها لايظل بالها ماكو شي وكلها شي ساعة يتصل بيها ...

‎هو مو من عوايده يختفي يعني ...

‎وصدك ماكو نص ساعة صعدت زينة البنية العاملة يمنا  تلهث كالت ست سارة ...السايق ويه ليث توه اجى وانطانا خبر

‎يكول ليث اتصوب بانفجار سيارة ...

‎وكعدت تحجيلنا ...من طالع من الجامعة وديريد يعبر الشارع على الصوب الثاني السايق منتظره  ويقريب منه مسافة واحد مفجر نفسه بسيارته بنص الازدحام مال الشارع بطلعة الطلاب وخطية كومة طلاب راحوا بيها بس ليث داخله جسم كم شظية ...بجهته اليسرى بس الحمد لله ماكو شي خطر عليه ...

‎بس متاثر من صوت عصف الانفجار شويه متاذي ...

‎اللي مجنت اعرفه انه ليث كان متعارك ويه اهله وبالاخص ابوه وصارله سنه ببيت خاله الصغير كاعد بالكرادة ....مجان عندي تفاصيل اكثر بس اتصلوا باهله وبخاله بلغوهم ...

‎انمرد گلبي عليه وظليت محتارة مااعرف شلون اوصل الخبر لضحى خطية ...

‎وهي ماكو ورة ربع ساعة  هم خابرت بس شنو كانت نهاية الدوام وفاضل هنا ...استحيت اشيله

‎فظل يدك ومشلته ...

‎اني هم راسا شلت جنطتي وعلى اساس طلعت سلمت ورحت للحمام انتظرت شي خمس او عشر دقايق وارجعت شفت فاضل مقفل وطالع ...

‎وصدك راسا فتحت الحاسبة ودكيت عليها كلت بس لا طلعت هي هم والله شويه وشالته ...جانت خطية كلش ملهوفة تىيد تعرف اخباره ...

‎المسكينة من بلغتها راسا انهارت حاولت اهديها وافهمها انه بخير وسلامة كل مافي الامر انه وسط الهوسة والازدحام بايكين تلفونه تخيلوا ...من واصل المستشفى شايف تلفونه ماكو؟!!

‎لذلك مغلق وهم هو دز السايق حتى يطمن الكل ...

‎الحمد لله مابيه شي ...

..........           ..........

‎ومن بعد الحادثة ليث اخذ اجازة اسبوعين براتب واسبوع بلا راتب هيجي جان نظامنا ...مشفته الا ورة السنة الجديدة

‎ باسبوع

‎وخلال عطلة راس السنة جنا بس اني وماما بالبيت ...ابويه كالعادة سافر واحنى نعرف هيجي اوقات سفراته ونسه مو شغل مثل مايكول فامي تعيش ايام صعبة خطية ...وسرمد اخذته خالتي نهال وراحت لسليمانية  هي جانت تاخذه وياها من تروح سفرات او تطلع مكانات بعيد ه حتى مرات لعمان او لبنان هم يروح وياها ...يعني ماتروح وحدها وهو هم يحب طلعاتها ...فقفلنا البيت ورحنا لبيت جدي حتى لايبقون وحدهم ...وحتى امي هم شويه تفك عن نفسها جانت كلش متضايقة ...بس والله عفية عليها شلون تتحمل هيجي وضعية وتسكت ؟!!

‎جدي جان بذلك الوكت كلش تعبان بالسبعينات من عمره

‎بس بالله  شكد جنت احبه هو  شكله ابيضاني و كلش نظيف وعلى طول لابس دشداشة بيضة ...

‎ولحيته هم بيضه ووجهه نوراني وشكدجان  حنين صحيح هو قليل كلش يحجي بس جنت اموت على سوالف من يكعد يسولفلي على ايامهم گبل ياخذني لغير عالم ...

‎وحتى بيبتي هم جانت هادئة وكلش فقيرة .. بس جنت اني جنت احب جدي الله يرحمه اكثر مااعرف ليش ...

‎جنت اكعد بحضنه لو بصفه وكلش افرح من يطلب مني واكعد اداريه  ...

‎ وقبل من جنا نجي نجيب  سدير ويانا جانوا يموتون عليه ...

‎بس هسه خطيه حتى جياتنا عليهم قلت ويبقون وحدهم فترة طويلة لا ونس ولا ونيس ....

‎بله هسه لو سراب عايفة الجهال جنت جبتهم ويايه اطلعهم شويه ...هم شوية يتونسون وهم احنى نلتهي وياهم ...

‎ولو هي عمتي اخذتها حجة بحضانتهم  صارت بين يوم ويوم تخابر ابويه على مصروف للجهال بحجة زوجها ماينطي وتستحي تلح عليه وهذا المصروف الله شاهد جان اضعاف اضعاف اللي ينصرف عليهم فصار عدها معيل يدزلها وارد  براس نعيم ...ابويه ...اما عمي اللاخ ...فجان مايقبل يدز ولا فلس لانه يمووت من زوجها وتكول كلما جنت  اكله عليهم يكلي جيبيهم اني اربيهم ولا انطي فلس اخاف يروح بجيب رجلج ...

‎وبالنسبة لعمامهم تكول ماعدهم يدزون ...الله اعلم بس هي جانت مستقتله على حضانتهم علمود هاي الشغلة وابوية هم مجان يقصر ولايفتح حلكه بكلمة ...

‎ بذاك اليوم يعني ليله راس السنة ظلينا لوقت متاخر نسولف كلنا وية مسرة جانو طالعين يفترون برة الناس بمدينتهم مسوين احتفاليه كلش حلوة وجبيرة وهي فاتحة سكايب وتشوفنا سدير شلون يلعب وفرحان ...

‎ومن تاخر الوقت ظلينا بوكتها نسولف بس  اني وياها وظلت هي تلح وتحجي عن موضوع صديق اخو عقيل زوجها ...

‎واحنى دنسولف دزتلي صورته ...اشو من شفته حسيت شكله مالوف وشايفته من قبل ...بس مااتذكر وين ...هو كان نحيف شويه وشعره  طويل وكيرلي يعني مو كلش طويل والوانه عسليه عيونه وشعره وحتى شواربه هم  وهو  مو كلش ابيض  شكله ينطي على شكل تونسي او هيجي شي ...يعني شفته اهاا  زين ومبين بشوش ...

‎كنظرة اولى مابيه مشكل

‎كلتلي اسمه رافد وخريج جيولوجيا بغداد ...واكبر مني بست سنوات يعني عمره خمسة وتلاثين سنة ويشتغل بشركة مااتذكر بالضبط اتصالات لو الكترونيات لانه محجينا بيها هواية ..بس شغله مو بنفس المدينة بغير مكان

‎واني توني  كتلها ميخالف خلي افكر ...اشوف ماكو خمس دقايق دك السكايب وطلع هو رافد ...

‎راسا

‎سلم وسلام حار خجول بنفس الوقت يعني مندفع ويلزم نفسه شويه ويسكت...بس جان مبين كلش فرحان ومتلهف حسب مايكول ...

‎انه هو  راد على الاقل مواف قتي بس يحجي ويايه لانه  من يوم مشاف صورتي وهو يوميه ياسال صديقة عليه ....

‎بليلتها ظلينا نسولف بس كله رسميات اني جنت مثكله عليه وقررت ويه نفسي بطريقة لا اراديه اتبع ردات فعل ضحى بالمواقف لربما  كان اسلوبي خطأ ومااعرف اتصرف ولربما هي بتصرفاتها تعرف شلون تتعامل مع الطرف الاخر ...

‎وثاني يوم هم دك عليه مشلته ...صح جنت احوص بس مشلته ...

‎من اول مكالمه وطولنا بيها واللي مجان يقاطعنا غير الكهرباء اللي صارت ترفك كل شويه مولدة ووطنية وشبكة النت التعبانة ...

‎المهم ظليت ثاني يوم افكر بكل كلامه حجاية حجاية ..وارجع واعيد كل الحجي ...

‎من رجعنا لبيتنا هم نفس الشي دك وظل يدك جنت اروح واجي اباوع على الحاسبة ومااشيلة قررت مااحجي وياه الا المغربية ومااطول هالمرة ...

‎بليلة راس السنة اتعرفت على الشاب رافد عن طريق اخو عقيل زوج اختي...

‎كان القصد من التعارف هو جمع راسين بالحلال ...

‎رافد كان عايش بالمانيا من سنين بس اهله بعدهم بالعراق ...وكان يدور عن بنية عراقية تكون زوجته وشريكة حياته...

‎اول مابدينا نحجي جان الخجل هو السمة الي غلبت الموضوع وشوية شوية ظلينا نسولف ومانحس بنفسنا الا ومرت ساعات والله محسينا بالوكت حسيت نفسي اعرفه من زمان ...

‎وعرفت عنه انه انسان هادئ ورزن والاهم من ذلك مثقف وواعي وشخصية محترمة ...

‎ولانه كنت مارة بخيبات امل هواية ...قررت انه اتصرف ويه رافد غير شكل ...

‎يعني مو بطبيعتي كلش ...واهمها الصراحة الزايدة ماكو داعي يعرف عن حياتي السابقة هواية اشياء ...

‎انتهت اول مكالمة بيناتنا ساعة تلاثة الفجر ...

‎وثاني يوم من رجعنا لبيتنا ظل هو يتصل بيه  ومااشيله ... جنت متوترة حيل  وخايفة هو عحبني بصراحةبس اني جنت مترددة  مااعرف ليش يمكن لانه جنت  اخاف من الفشل مثل كل نرة وهم ارجع اخسره ...

‎وال مشكلة اللخ كانت امي حالتها النفسية تعبانة بذيج الفترة.....

‎ تعبت من الاحداث اللي مرينا بيها من سفر اختي ووفاة عمتي الله يرحمها

‎وانوبة سفرة ابويه الاخيرة ازعجتها حيل وحسيتها مراح تسكت هالمرة عليه وصدك احساسي كان بمحله ...

‎ورة المغرب بشوية سويت لماما جاي وهي ظلت جوة بالصالة الصغيرة مددت رجليها واني كعدت بالمطبخ ...

‎مثل ماتعرفون المطبخ مفتوح على الصالة الصغيرة وجنا حاطين تلفزيون كلش جبير بالصالة يعني اللي يكعد بالمطبخ يكدر يشوف كلشي ...

‎جنت محرجةمن امي افتح سكايب واحجي  وياه كدامها وهو ظل يدك وهي تكلي هاي منو هيجي يدك عليج

‎ اول مرة كتلها ميس صديقتي  تسال عليه

‎ وثاني مرة رفضته

‎وثالث مرة بعد مابيها مجال...

‎لازم اكللها حتى اخذ راحتي بالحجي ......

‎ولا اصلا اني مدااسوي شي غلط ...والموضوع جاي من طرف مسرة وزوجها...

‎فرحت وحجيتلها كلشي وانه هذا الشخص نيته ارتباط رسمي بس بالاول نتعرف ...ويتقبل واحدنا الثاني

‎هي من عرفت رافد جاي  من طرف بيت عقيل زوج اختي اطمانت لانه همه كلش عائلة محترمة وماتطلع منهم العيبة فاستاذنتها وصعدت فوك حتى احجي وياه بس نزلتلها نظارتها حتى تشوف التلفزيون زين ....

‎ جنت كلش مقهورة عليها ومجان عاجبني اعوفها بس هم كلش متحمسة اتعرف على رافد اكثر ....

‎بدى يحجيلي عن نفسه بتفاصيل ادق

‎وكلي انه هو شاب عصامي كون نفسه بنفسه ...

‎طلع قبل احداث ٢٠٠٣ بكم سنة قجق عن طريق الشمال ووصل المانيا وقدم لجوء وهسه هو عنده اقامة ويشتغل بشركة محترمة وراتبه زين ويريد يكمل دينة بدى يكلي هو كان شاب طايش بالبداية بعدين من وصل لالمانيا وشاف الحياة وصعوبتها وشلون غبر وخلص بالموت يله وصل لالمانيا وهنا اتعرف على شباب ملتزمين اتعلم  منهم  وهسه صار يصلي ويصوم بعد مكان يشرب ويعربد بالملاهي ....

‎وحجالي عن طموحه بتكوين اسرة واهم احلامه انه يصير عنده زوجه وبيت واطفال....هو اكيد كان مار بعدة علاقات كلها  بعضها كان لهو وبعضها الاخر كان جدي بس خلاص انتهت كلها ...

‎حسب مكال ووكتها ملحيت بموضوع العلاقات لانه طبيعي كل شاب مار بعلاقات هواية الى ان يقرر يرتبط بشريكة حياته اللي يحسها تكمل نصفه الثاني ...

‎  هو وكتها جان يحس ومتحمس انه احنى نكمل بعضنا

‎فمن كان يحجيلي عن نفسه صوته كان يخليني اعيش وياه احداث حياته بتفاصيلها الدقيقة حسيت نفسي اعرف كلشي عنه طبعا هذالاحساس صار يطبع بيه  بمرور الايام ...

‎هو كان شخص رجولي  بمعنى الكلمة حتى بشقاه وضحكه ...

‎مااعرف شلون حسيت نفسي اتعلقت بيه مثل ماهو اتعلق بيه ...

‎وصرنا نقضي وقت اطول بالمحادثات صار وقتي اما احجي وياه او انتظره يخابرني ...

‎من  رجع ابويه من السفر صارت العلاقة بينه وبين امي متوترة

‎ وجانت اكو بعض المناوشات منا ومناك الاان  كبت العيطة بالبيت ...

‎امي ماسكتت واول الشرارة كانت زجاجة عطر هدية ابويه جابلهيا من عمان اللي شافته امي انه شعورة بالذنب لانه اكيد مشتري اغاتها لصاحبته ...

‎احنى كنا كلش قليل من نشوف امي وابوية يتعاركون كدامنا وبصوت عالي يعني نادرا ماتصير

‎بس هالمرة امي مو مثل كل مرة تغلق علة نفسها وتسكت بنهاية اول عركة عافت البيت وراحت لبيت جدي ...

‎وشكد ظليت اتوسل واحجي وياها  وشكد حاول بابا يراضيها   ماكو فايدة عافتناوطلعت هي جانت مصممة على هذا الشي ...من اول مارجع ابويه من السفر حسيتها تريد هذا الشي

‎وصدك سوتها و راحت ...واني هم ماسكتت خابرت مسرة حتى تحجي وياها وترضيهاعسى ولعل نلحك نسد الموضوع گبل مايكبر لانه كلنا توقعنا شغلة شي يومين وترجع ...

‎وعلى الرغم من انه   مسرة اختي لسان وعدها قابلية اقناع رهيبة فشلت حتى تقنع امي تسمعلها ....

‎كمت  اتصلت بخالتي اقبال الجبيرة وحجيت ويه خالتي نهال بلكت تقنعها ترجع ماكو فايدة ابد

‎ امي هالمرة كانت صدك غير شكل اول مرة من اتزوجت لحد الان تطلب الطلاك فجانت صدمة النا بشكل عام وابويه بشكل خاص ...

‎وبهاي الايام اني جنت رايحة جاية من بيت جدي لانه هم مااكدر اعوف البيت وسرمد ...وياها انشغالي وضغط الشغل عليع بالدوام لانه مقل ماتعرفون ليث خطية مجاز فصار شغله على فاضل وعليه ...

‎فكمت كلش قليل احجي ويه رافد ومااكدر اطول وياه مثل قبل هو يسالني ليش متغيرة ماااعرف شجاوبه ممعقولة باول تعارفنا اكله   امي زعلانه وبيت جدي   تريد تتطلك من ابويه !!!

‎وطولت  السالفة وكلنا نحاول نقنع امي ترجع للبيت وتترك هاي الفكرة الغريبة بس امي ولا كانه دنحجي وياها حتى ماتسمع النه جانت مصممة وقافلة ماتريد

‎حتى توسلات سرمد مافادت ...

‎ولو هذا فطير بس جان يضحك يكللها ماما اشو ماصدك انت زعلانه كولي ضايجة من البيت بيها مجال بس مال تريدين طلاك  اشو احسج دتشاقين ....

‎فجان ترزله وتكلنا كلنا خلص بعد ماتتحمل نعيم

‎ وشكد حاول ابويه من يروحلها لبيت جدي يراضيها ويرجعها  لو تطرده لو تتعارك لو تصعد ماتنزل ...وطولة زعلة امي شي شهر تقريبا

‎اتخبلت اني بذيج الفترة وصار عندي ارهاق وضغط عليه مو طبيعي ...

‎صدك جانت ايام صعبة ماعرفت شلون اتصرف وانوبة دوختني  مسرة بتلفوناتها هم كل شويه تخابر تريد تعرف شديصير ...بحيث اخر يومين مكمت احجي ويه رافد انشغلت كلش ...فهو كل ظنه انه ماعجبته او كمت احس بيه مو صادق مااعرف هوهيجي  فكر ...

‎بحيث مرة  الصبح بالدوام  من فتحت السكايب شفتله كاتبلي رسالة ...

‎انه اذا تتخيلني اني مو جاد وداالعب عليج انطيني العنوان والعصر اهلي يمكم ...

‎يبووو هذا شكله هسه؟!!

‎وكتها ياامي تزعلين صارلت بالتلاثين سنة متزوجة مزعلت الا هاللايام ...هو هم حظي

‎مكتبتله هواية بيومها  غير انه اعتذرت وكتله ظروف عندي ولايروح بالك بعيد ....

‎المهم مسرة خابرت خالتي اقبال وحركتها على امي ...لانه ابوية صدك اتاذى وانقهر شكد ماسوت امي بيه ولا زعل بالعكس جان يعذرها لانه يعرف بنفسه مقصر كلش وياها وغلطته ماينسكت عليها ...

‎والله ولزمتها خالتي وكامت تحجي عليها كالتلها كوثر انت بشبابج ماسويتها وطلبتي الطلاك وعفتيله الحبل على الغارب جاية هسه اتعلمي يجوز ...كعدي راحة ورجعي لبيتج يله كافي تدللتي وعرفتي الرجال غلطته

‎كافي زعل ...رجعي لبيتج دوختينا

‎ ثم تعالي هو شباقي بيه !! بابا هذا ماكو جم يوم ويبنجر ويكابلج ويكعد انت من كل عقلج تريدين طلاك لتتكونين مفكرة نفسج حترتاحين ...انت بس حتبهذلين نفسج و الجهال ...وحجاية مني ومن بيبتي اللي خطية جانت منهضمة على حالنا...شوية بدت امي تلين...

‎الا خالتي نهال جانت كلما نطفي النار هي تزيد تعلكها وتكوم تحجي على  امي منه جهة  ...و على ابويه من جهة لخ

‎ تكول لامي تستاهلين انت انطيتي عين شكد حذرناج ونبهناج ماكو فايدة ...

‎ظليت ساكتة ساكتة داكليها هسه ...

‎عفية عليه ماتزوج عليج ...

‎خطية نزلت على امي نزلة قوية ...

‎واحنى نسكت بيها وهي ترجع تحجي المهم بالليل اجى ابوية اعتذر منها  وباسها من راسها ورجعناها....

‎اخيرا...

‎ويله اني رجعت اخذ نفس ....

‎ورجعت احجي ويه رافد مثل الاول ...لا بعد كمنا نطول اكثر جان كلش خايف انه اعوفه او مااريده وهو مايدري ظروفي شلون جانت ....بس هذا البعد خلاني احسه شكد هو متمسك بيه بحيث حسيته انهار تقريبا وحتى لحيته مكام يزينها مااعرف بس راح يصيرلنا تقريبا تلاث شهور حسيته جزء مني واني جزء منه...

‎وبدى يلح على موضوع جية اهله حتى يثبتلي حسن نيته...اني مجنت اعرف اكذب وابالغ او اضغط عليه يلا تعال اخطبني ...

‎جنت كلش استحي وماردت يكول ذابه روحها عليه بس هو افتهم من كيفه ظروفي الاخيرة بهذه الصورة المهم حصل عنوانا من زوج اختي واتصلت اخته ورة شي اسبوع وكالو نجي نتعرف عليكم ...يعني كعدة تعارف ...

‎بهذه الفترة اللي فاتت رجع ليث للدوام بس جان كلش متغير وعصبي ومصار ملتزم بالدوام مثل قبل اصلا حتى قبل كم يوم اتصايح هو وابو محمد من ورة هالشغلة وكله خلص حقدم استقالتي ...

‎حاولت احجي وياه كصديقة مثل قبل بس هو مجان طايق احد واكثر واحد ماكلها جانت ضحى يومية يبجيها ...

‎وبذيج الفترة كلي سارة اني مقدم على الاي او ام وراح اسافر امريكا على الاكثر ببداية السابع لانه اني خلصت كلشي من مقابلات ومحلفين وحتى الفحص الطبي  ... هذا الحجي احنى جنا بشهر الثالث

‎وطلب مني مااكول  لاحد لانه هو جان يريد يمشي الدوام شلون مجان وحتى ضحى ماتدري ...

‎هنا جانت المفاجاءة اليه  ...كتله ماتدري شنو ...

‎يعني شلون ...طول هالفترة وانت ضام عليها ؟!!

‎وجنت تكذب ؟!!

‎كلي اني اعرف ماافيدها وراح ااذيها اكثر اذا ارتبطنا فالافضل انه اسافر حتى تكدر تنساني وتشوف شخص يستاهلها ...

‎وماكتلها لانه  مااتحمل اشوفها منهارة لو متاذية واضعف واغير رأيي ...ماريدها تعرف ...لا ماريدها

‎اني جنت اشوف انه همه الاثنين حانوا تعبانين من بعض من كثر المشاكل اللي بيناتهم ومن كثر الزعل والعرك وهي البنية جانت حلوة يخطبوها هواية وترفضهم علموده ...

‎وبنفس الوقت ماكو اي امل يرجعون لبعضهم شغلتهم جانت محيرة جدا وغريبة ...

‎فعلا اتعاطفت ويه ضحى وانقهرت عليها بس اني جنت بذيج الفترة اعيش في عالمي الخاص عالمي الوردي الجميل  ومجنت اريد احد يكدرلي صفوة الايام ...لانه جنت اعرفها ايام تنسرق من الزمن واذا راحت ماترجع...

‎وبديت احس نفسي احب رافد ...اي ...

‎حبيت رافد حب طفولي وحب مراهقين وحب ناضج ...حب شامل مكتمل ...عودني على طبايعة وصرنا نكمل يومنا سوى لحظة بلحظة صار فعلا تؤام روحي

‎غمرني بعطفه واهتمامه اللي ابد مجنت حاسه بيهم من قبل ..

‎واتعلمت منه انه اول مااكعد من النوم اكتبله مسج بصباح الخير واكله شنو البس ومن اوصل للدوام اكتبله وصلت ومن يكعد هو لانه فرق الوقت  بيناتنه فاني اكعد قبله ..

‎يرجع هويكتبلي تفاصيله الى ان يصير الليل عدنا وهو يكون مخلص شغله وراجع للبيت

‎ اول مايرجع وهو ياكل نظل نسولف لحد اربع او خمس ساعات ...

‎بكلشي جنا نحجي ونسولف اشياء مهمه وغيرمهمه عني وعنه اهلي واهله معظمها مجنت اخلي بالي يمها كد مااخلي بالي يمه هو بتصرفاته ...والاحلى كانت علاقتنا نظيفة وبريئة وصادقة جدا ...

‎وبدى يحجيلي عنه انه يحب البنية الضعيفة واللي شعرها اسود وطويل وكلي احب الهادئة الحالمة ..

‎بس اللي تعرف تدير شؤون البيت ..

‎وبدينا نتفق شوية شويه على امورنا الاولية وانتقلنا الى فرة الخطوبة وحتى شلون ورة الزواج

‎هو كل شي جان يحجيه كان يكوله باسلوب الطلب والترجي والتمني مجان ابد يحسسني يفرض عليه شي

‎وحتى غيرته جانت حلوة ومعقولة ...

‎جنا كانه نمشي سوى ونطلع سوى وناكل ونشتري اشياءنا سوى كله بالتفصيل...حتى كمنا ناكل كل واحد شيحب من اكله ....هههه

‎وكتها  عشت احلى احلى ايام حياتي انعزلت بيها عن الدنيا كلها

‎وصرت اعيش بعالم ثاني ربما جان مو وقعي او فعلا مقطوع من الزمن ....

‎وبعدها صارت زيارة ثانية من اهله النا والثالثة هم اللي حجوا بيا عن الارتباط الرسمي

‎اميي كلش حبت اهل رافد من اتعرفنا عليهم اكثر حسيناهم عائلة محترمة وهادئين

‎وكانوا على كد حالهم يعني

‎همه اثنين اخوان رافد واخوه وتلاث بنات البنات كلهم متزوجات اثنين ببغداد ووحدة منهن بالخالص كاعدة اللي هي كانت اصغر وحدة بالعائلة وقبلها جان رافد ....

‎اما اخوه فكان  متزوج وكاعد ويه اهله اللي هو بنفس الوقت معيل الهم كون ابوهم متوفي بحرب الكويت ...

‎وانفتح الموضوع بشكل رسمي ...

‎بس طبعا كان لازم نلتقي اول شي وجهها لوجه هذا كان شرطي الاساسي والاهم ...والاصح هو ايضا كان مستقتل حتى يجي يشوفني ورهمت الظروف انه بتلك  الاثناء جانت مسرة مسوية فيزا زيارة لامي تروحلها من تولد وتبقى يمها شهرين ...ووحان عدهامقابله  بالسفارة الالمانية بعمان  وحددوها بنص شهر الرابع .....فامي  قررت تروح اني هم طلبت اروح وياه وحتى ابويه هم كلش اتحمس لهاي السفرة حتى شويه يحسن العلاقة ويه امي بس سرمد راح يبقى ببيت جدي هاي الفترة ...ومن ضمنها طلب ابويه نشتري جهاز كامل لسراب بت عمتي كله مناك حتى لا في يوم تعيرها عمتي بشي .....

‎اللي صار

‎انه في تلك الفترة عمتي سعاد استلمت مبلغ تعويض عن مقتل عمتي نجاة وزوجها الله يرحمهم وقررت اتزوج ابنها لسراب...يعني عمتي فضحت نفسها علني وبينت انه احتضانها للاطفال مو علمود همه من ريحة عمتي  وانما كان لاجل المادة فقط ...تحصل التعويضات واللي اكو والماكو

‎احنى كلنا انصدمنا لانه نعرف انه ابنها جان يحب وحدة وياه بالكلية ومتفقين على الزواج وهي بطريقتها جبرته ياخذ سراب...ومكدر يكللها لا...

‎وحتى المبلغ لحد الان محد يعرفه شكد مع انه همه قاصرين بس هي وزوجها اشتغلوا بالمعاملة وحصلوا الفلوس شلون مااعرف ولا احد سال ولا حتى عرفنا شلون قنعت ابنها ياخذ سىراب اللي جانت ممصدكة راح تتزوج ...

‎رحنا لحفلة الخطوبة ...وجانت حفلة حلوة وشفت هواية من  كرايبنا....والكل جان فرحان الا خطية ابن عمتي حسيت الدمعة بعينه ....

‎ وبذاك اليوم خالتي اقبال فتحت موضوع انه تريدني لابنها اصغر واحد جان عسكري وحان اصغر مني بسنتين ......بس حسيت انه كالتها مجاملة يعني حتى لايظل بخاطر امي انه اختها ماخذت بتها لابنها ...وحتى امي حست بهذا الشي فراسا نشرتهاانه سارة جويها خطابة وراح  انخطب لواحد بالمانيا ...واجوي اهله تلاث مرات يريدوني ...

‎وكتعا صدك ماحبيت انه احد يعرف بس بعد صارت وطشت ....ومن وكت ماكلت لرافد

‎مااحجيلكم فرحته من عرف راح اروح لعمان لانه جان كلش عاجبة انه نتشاوف باقرب وقت بس اللي مانعة انه مايكدر يجي للعراق واني هم ابد مسالته عن السبب جنت مااهتم غير بس انه اريد اه...

‎وفعلا اتفقنا انه نلتقي هناك ...

‎سفرتنا لعمان....

‎ترتبت الظروف بعد احلى مما جنت احلم واتخيل كلشي جان ميسر وحلو ويمشي ركض ركض ...كانه الدنيا مهدتلنا الامور....

‎فجتي مقابلة امي بالسفارة الالمانية اللي بعمان حتى نحصل فيزا تروحيم مسرة اختي بايام ولادتها ....وبوكتها رافد حان طالب مني نلتقي باي مكان خارج العراق عمان او سوريا او حتى تركيا طبعا جانت صعبة انه اطلع وحدي واسافر والاصعب انه اني اروحله...بس الحمد لله صار هذا الظرف واني استغليته 

‎واخذنا طيارة ورحنا اني وامي وابويه ...وسرمد بقى  ببيت جدي ويه خالتي نهال ...

‎وصلنا المغربية ...واني قبل مانطلع للمطارة استلمت رسالة منه انه وصل وحجز بفندق ...وكلي حدزلج رقمي ...

‎المشكلة اشوبة اتاخرنا بمطارعالية عزلو العراقيين على جهة على الرغم من انه احنى صلنا الفيزعن طريق موظف صديق ابويه يشتغل بالسفارة الاردنية اللي بالخضراء ...يعني اصولية ومضبوطة...ولذلك ماطولوا هواية ويانا مثل البقية ...

‎علما دخلت الفندق وفتحت نت جانت الساعة ١١ ماترهم بعد نلتقي مثل ما جنا مفكرين نتشاوف ولو على الاقل هيجي على السريع باللوبي مال الفندق...فاجلناها على ثاني يوم مابيها مجال...

‎و ثاني اليوم من  الصبح كتبتله مسج انه بس انخلص روحة امي نلتقي باي كوفي شوب  نكعد هناك

‎ و هو اصلا جان مقرر انه يعزم اهلي على عشى او غدا حتى يتعرف عليهم ويتعرفون عليه بس بعد مانتشاوف ياله

‎بذاك النهارالوقت ابد مجان يمشي وطول اليوم جنت احس بنفسي مصخنة ومثل الغثيان عندي من القلق والللهفة ...

‎وجنت محضرة نفسي خلاص على ساعة خمسة نلتقي بس امي خربطتلي الموضوع كله

‎...اصرت على انه تشوفه هي وابويه اول شي واذا التقينا مانطلع برة الفندق نبقى باللووبي لو بحديقة الفندق او بقاعة المطعم...

‎وطبعا هو راسا وافق مجان عنده اي مشكله ..

‎وفعلا انتظرناه واحنى كاعدبن على العشى ...بس اني طبعا جنت كاعدة على نار ...

‎القاعة جانت متروسة بس هادئة والموسيقى سوت جو يخبل والعشى كان بوفيه مفتوح فكل شويه اكوم اباوع منا ومناك وارجع ماعوني فارغ ههههه

‎بليلتها لبست بنطلون ابيض وقميص فيروزي وسرحت شعري حتى يبين طوله بس لفيت لفة خفيفة الخصل اللي ليكدام وكمفاجاءة اله صبغته اسودقبل مااجي  لانه هو جان كايلي يحب الشعر الاسود الطويل  ...ولانه هو مايحب مكياج خليت شي خفيف    ...

‎وماكو شي نص ساعة شفته اجى وابتسامه كبيرة على وجهه شفته بالحقيقة اضعف هواية من الكاميرا ...وجان مخفف شعره ومزين لحيته ...

‎طبعا حسيت گلبي وكف من اجى وسلم علينا حسيت بشعور غريب كانه راح يغمى عليه...واخيرا شفت حبيبي!

‎هو سلم وكعد وابويه رحب بيه والمضحك امي راسا طلعت مناظرها حتى تشوفه زين هههه

‎هو جان محرج اكثر من عدنا وحسيت بصوته بيها رجفه خفيفة ...

‎يالله شكد جنت احبه...وهو ويحجي الابتسامة مفاركته مااعرف صدك فرحان لو خجلان ...وبدى يحجي عن نفسه وشلون وصل لالمانيا ووضيعته حاليا هناك

‎ ونيته بالارتباط وكيف انه يحاول يسرع معاملة لم الشمل........

‎ وحجى عن اهله وعمامه طبعا بعد ماابويه سال كنوع من العرف والتقاليد ...وانت من ياعمام ومن ياعشيرة والمن تعرف وهكذا

‎ وخلال هاي الفترة اني بعد كمت مااحس بخدودي احتركت من الحرارة مع انه الجو حلو مو حارة زين

‎ومن طلعنا بعدين للحديقة جانت بيها هوية خفيفة ...

‎اول شي ظلينا نمشي بالممر اني مدنجة وهو يباوع عليه ويضحك واني على ضحكته ابتسم ...واول شي كلي فاجاتيني بلون شعرج بس شكد حلوة انت ...

‎حتى ماصدكت روحي ...اريد الزمج واتاكد انه مداااحلم ...

‎جانت لحظات ودقايق عمري مراح انساها يمكن اسعد لحظان مرت بحياتي مفرحت بتخرجي مثل مافرحت بشوفه رافد ...

‎ظلينا نسولف شويه ونسكت كوومى بس يكلي مرتاحة ان شاء الله ...شلونج هههه....اني ممصدك انه اخيرا شفتج ....

‎بس بعدين بدينا نحجي على الخطوة اللي جايه كلي لازم اشوفج باجر ...واتفقنا على نفس الاتفاق الاول نتشاوف بكوفي شوب ...ساعة ستة العصر حتى ابقى على الاقل شي ساعتين ويرجعني ...

‎وسلمنا على بعض مد ايده وتصافحنا

‎حسيت جمرة لزمت ايدي مو رافد هههههه

‎وصلني لقاعة المطعم سلم على اهلي ووراح...

‎اني لحد الان من تمر عليه ريحة اووعطر يشبه عطر ذيج الايام ترجعلي كل الذكريات ....لحظة بلحظة وخطوة بخطوة

‎وشوية صعدت لغرفتي وبقوا اهلي جوة جنت بس اريد اصعد فوك حتى اكمل سوالف وياه على النت وبالفعل ظلينا نحجي وراها ساعات

‎ اني جنت مبهورة بيه وباسلوبه وبكلامه وهو كلش عحب اهلي وعجبني الي اكثر...

‎يعني اهلوا حان ملش راصشين عليه مبدئيا وكالوله انه راح يسالون عليه ويردوله خبر ورة مايجون اهله تصير كعدة زلم

‎اما هو فمابقى وسيله ماعبر بيها عن حبه واعجابه.....

‎جان طاير بيه من الفرح ....

‎ ومكدرت انام ليلتها الا وجه الصبح ...

‎كل الاحداث تنعاد وتتكرر كدام عيني كل شوبه ...وحتى واني اريد انام مايجي من گلبي اعوفه ...

‎رحنا ثامي يوم كملنا شغلة المقابلات وفي حالة الموافقة امي حتسافر ثاني اسبوع من الشهر الخامس بلكت تلحك مسرة قبل ولادتها ...

‎ومن خلصنا اتغدينا  ورجعنا للفندق حضرت نفسي ... وبلغت امي انه راح يجي عليه ونطلع ...

‎ورحنا اتمشينا بصويفية شارع الحمرا وبعدين رحنا وسط البلد افترينا شويه  وكعدنا اكلنا كنافة يم حبيبة...وهناك سوالي مفاجاءة كلش حلوة ....

‎قدملي خاتم الخطوبة بس مكعد على رجليه ههه

‎بس ايديه جانت ترجف

‎كلي تقبلين تكونين  شريمة حياتي وعمري ...

‎اني ضحكت كتله اي اكييد ...بس الفرحة والله خلتلي جناحات طايرة بيها ..ولا حسيت انه الناس تباوع عليه وتضحك ...ردت بس احضنه ساعتها بلكت گلبي يبرد...

‎الخاتم جان كلش حلو وثمين ...جنت اتمنى اخليه بگلبي مو بايدي هههههه...

‎بس طبعا ملبسته ضميته وكتله ان شاء الله الجية الجاية اني هم اجيبلك خاتم ونعقد هنا يعني بعمان مثل مااتفقنا

‎اليوم اللي وراه ماتشاوفنا...التهينا اني وامي نتسوك وهو هم اشترى كم حاجة لاهله اخذهم وياية ...

‎بوكتها عمتي رادت تسوي العرس على السريع فاشترينا جهاز عروسه كامل لسراب واشتريت اليه كم قطعة لانه وكتها رافد ماقبل وحدي اشتريهم كلي نطلع سوى نختار اللي تريديه ...وطبعا اني كيفت ...

‎ثاني يوم عزم اهلي على الغدا قبل ميسافر لانه هو جان راجع قبلنا بيوم...

‎حانت كعدة حلوة ومرتبة وابويه صار سيد الكعدة ظل يحجي عن خياته وانجازاته واني ورافد نسترق النظرات لبعضنا واني متاكدة مثل مجنت خالة بالي يم ابويه رافد عم حان اصلا مايعرف ابويه عن شنو يحجي بس يكله اي عمو والله صحيح ههههه

‎وبالليل كعدنا بكوفي الشوب الفندق مالتنا نفسه ....

‎وظلينا نسولف ونحجي بس ساعتها تلفونه مبطل رن ...وهو يرفضه ...ويظل يدك وهو يرفضه ...كلي هاي خواتي وبناتهن  يريدون يوصوني على شغلات ادزها الهم ...

‎بس حان كلش منحرج وعركه كام يكت ....

‎واخر شي ديكتب مسج اجى الويتر جاب الحساب ...

‎فهو عاف التلفون على الميز والتهى ديدفع الحساب

‎لكفت بطرف عيني بس حجايتين الاولى حبيبتي رفولة  اخابر.....ومشفت الباقي ....

‎طبعا مشيت الموضوع ومااهتميت ساعتها ...

‎ومن دنودع بعضنا غلط باسمي وكلي حياتي رفوله ...

‎بعدين ضحك كال ثبرتني هاي الزعطوطة هلكد مخابرت دوختني والله ...

‎هنا خليت الاسم في بالي الا اتاكد هاي منو ...

‎رجعنا لبغداد وراسا التهيت بتحضيرات عرس سراب وجانت التحضيرات مثل العسل على گلبي لانه جنت احسب هاي الخطوات اللي راح اني امر بيها وشلون راح اجهز واحضر نفسي واسرح بخيالي على كلشي اسويه وارسم خطط وانسق حتى الالوان ....

‎فساعدتها بكلشي ومااهتميت انه هي جانت ضايجة من هذا الشي بالعكس اصلا من فرحتي نسيت كلشي هي سوته بيه ...

‎وماكو اسبوعين صارت الزفة والله وكتها تكولون عبالك اني جنت متزوجة والزفة زفتي  هلكد مجنت فرحانه  ....

‎الحفلة جانت كلش حلوة ورغم هي كل كلمة حلوة ماتطلع منها بس اتخبلت على جهازها اصلا اشتريتلها شغلات مجانت مفكره بيها ...ابويه وصانا ولح انه يكون جهازها شي يبين حتى لاحد يكول خطية ماعدها اهل

‎وبيومها

‎وانطش خبر خطوبتي لرافد وانه الكعدة حتصير ورة ماترجع امي من زيارة مسرة بالمانيا....

‎ولانه جنت كلش مشغولة مصارلي مجال اروح لاهل رافد انطيهم الغراض اللي دزها بيدي وهو هم كلي على راحتج ...

‎والشي الوحيد اللي جنت مقهورة عليه شغلة ليث وضحى...

‎لانه ليث صار انسان كلش غير شكل من صدك اتوحش بمعنى الكلمة صار يومية يتعارك ...ومايطيق احد ولا يتحمل كلمة من احد

‎ومكامت الحاسبة تدك ابد

‎ولا صرت اسمع صوت ضحى وضحكاتها ...

‎ولا اتجرأ اساله عنها اصلا جنت اخاف اكله انه راح انخطب لرافد بعد شهرين لانه جنت حاجيتله عنه ....لايروح يكب بوجهي ويسمعني حجايتين من حجايته الحلوة اللي بالعظم ....

‎حتى شكله اتغير وصار لونه شاحب ومصفر ...

‎هو جان عزيز عليه مااذاني في يوم بكلمة بالعكس عمري ماانساله وكفتته ويايه ...ياما وياما جان يدافع عني من يحجون عليه ....وياما وياما وكفلي وكفة اخ مايوكفها لاخته جنت نوعا ما اعتمد عليه بهوايه شغلات حتى من يسويها مايحسيني انه هو زحمة عليه لو محملني منيتها بالعكس ابد والله...

‎بس اللي صار وخلاهم يبطلوه من الشغل جان قبل سفر امي بشي يومين على مااتذكر

‎اتخيلوا اتعارك ويه خلود وبشرى عركة جبيرة بحيث الا شويه يريد يضربها لخلود وفاضحها فضيحة بالشركة مااحجيلكم الغلط والصياح والعياط بحيث فاضل يكلي كعدت بنص غرفتها تلطم ....

‎شنو اللي صار محد يعرف بالضبط كل واحد يحجي شكل واني جنت ممداومة ملتهية ويه امي وتحضيراتها للسفر...

‎المهم همه فصلوا بذاك اليوم وشكد خابرت عليه عبالي احصله مشاله بس اخر شي دزلي مسج مااريد احجي ويه احد هسه

‎ليث من ساعتها بعد ابد ماشفته ...

‎بس قبل مايسافر بيوم خابرني وجان تقريبا ورة شهرين من حادثته كلي باجر حسافر لامريكا خلص طلع لجوئي...ابريني الذمة ...سلمت عليه وظلينا نسولف ووكتها اتذكر سالته على عركته ويه خلود مقبل يجاوب كلي اخلاق ماعدها وساقطة وجان لازم واحد يوكفها عد حدها ...فقط هذا الكلام كاله شنو وليش مزاد عليه ولا كلمة

‎اترددت اساله عن ضحى بالبداية ..

‎بس ماتحملت قبل مايسد التلفون كتله عرفت ضحى انه  انت مسافر؟!!....

‎خطية راسا خنكته العبرة وبالكوة كام يحجي ...

‎كلي سارة ضحى انخطبت وسد التلفون ....

‎اصعب شي بالدنيا هو الفراق ....والله اني اشوفه يمكن اصعب حتى من الموت بعينه ...

‎سافرت امي وودعناها وجانت اول مرة هي اللي تعوف ابويه وتروح ...

‎خطية حسيته مثل اليتيم بالبيت ...جان حزين طول الوقت وكاعد  مايطلع بس يروح للشغل ويرجع يكعد بالصالة  ينتظر تلفون من المانيا ...الفترة الاخيرة اتغير هو هواية  ...والحمد لله صارت الامور احسن بيناتهم...

‎بس مكان امي حان كلش خالي بالبيت ....

‎وبديت احضر لروحتي لبيت اهل رافد ...بس كلت خلي اخابرهم بالاول اشوف منو عدهم اسمها رفل...

‎اني جنت خالة مرة اخو كدام عيني هي اللي تحجيلي لانه بالتلاث مرات اللي اجتينا بيها جانت كلشي تكول وتسولف ...

‎وهي جانت حامل على وشك ولادة كلت خلي اخابرها الها بالذات  بحجة اطمن عليها واسالها فد مرة .....

‎ وخابرتها وحجيت وياها وكالتلي هذا اسبوعها وهالايام حتولد ان شاء الله ...

‎المهم كتلها رافد دزلي غراض واني هم اشتريت للبنات كم حاجة بس مااعرف اساميهم ولا اعمارهم ...

‎بعدني ممكملة راسا عددتهم اليه وانطتني الاعمار وحدة وحدة

‎ومجان اكو من ضمنهم اي وحدة اسمها  رفل ...

‎صدك ساعتها شبت النار بگلبي كتلها باجر جايتكم اني  انطيني العنوان ....

‎والله وبالليل حضرت الهدايا وقسمتهم ...وثاني اليوم اول مارجعت من الدوام غسلت وبدلت جريت سرمد اخوية ويايه ورحنا ...

‎خطية همه كلش رحبوا بيه...

‎ومرة اخوه جانت حالتها تعبانه حييل ... ومارهمت اخذها واسالها على صفحة وطول مااني كاعدة افر السالفة منا ومناك ...بحيث اسالهم دون مايحسون ...او يشكون بشي

‎كتلهم لعد رفوله منو اني وصلتني رسالة من عدها تكول اني رفل عبالي وحدة من بناتكم اني هيجي كلت ....

‎فظليت مااعرف ياهي غراضها !!!!

‎انصدموا كلهم جانت امه ومرة اخوه وبت اخته الجبيرة يمهم دتدرس علمود الامتحانات ...كاعدين ويايه ...وهذوله كاموا يتبلعمون ...

‎يارفل ...مانعرف رفل...

‎بس مرة اخوه ....جطتها كالت يمعودة سالفه وراحت خلي يولون لاتخلين بالج يمها ....

‎ضحكت وسكتت...بس معبىرتها الشغلة

‎يكولون قلب العاشق دليله واني الحمد لله گلبي دليلي بس بالماسي احس بيها قبل ماتصير

‎جنت بداخلي ابدممرتاحة لموضوع رفل   ..وجنت شاكة بشي واتاكدت  من عرفت  انه رفل مجانت وحدة من بنات اخته ولا كرايبه  ...

‎و اتاكدت اكثر من حجاية مرة اخوه من كلتليي هاي شغلة قديمة خلي يولون ...لايظل في بالج شنو يعني ...معناها الموضوع مهم ويخصني

‎بيومها رجعت للبيت مسطورة ...

‎وراسي يقره الف فكرة معقولة يحب وحدة ثانية زين واني شنو؟!

‎هو اللي ركض ورايه هو اللي لح انه يتعرف عليه وهو اللي راد يرتبط بيه ...زين  ليش؟!!

‎معقولة يحب وحده وكلامه ومشاعره هذه كلها زيف وخداع!!!

‎وانوبة امي ماكو المن احجي المن اشكي والمن اكول واذا كلت لمسرة هاي تاكلني وتشربني ...

‎واستحي  احجي لميس وهالة صديقاتي

‎بله شكلهم وشحجيلهم والله فشلة  ...

‎وظليت افتر داير مدايرنفسي مثل الثولة واخير شي قررت  اخابر هالة واستشيرها هي عقلها جبير بلكت تساعدني

‎خابرتها كلتلي واجهي  واحجيله كلشي وكوليله عن مخاوفج وكونوا صريحين مع بعض ...وخلص هذا الكلام ماريحني لانه جنت اعرف بيه راح يتهرب ومايحجي الصدك

‎وبيومها

‎صعدت فوك لغرفتي مهمومة ومقهورة واول مافتحت اللابتوب شفت رسالة شطولها من رافد على السكايب رزالة مبطنه لانه سالت اهله عن رفل ....

‎كاعد يكتبلي عن الثقة والوفاء والصراحة ومااعرف شنو ...عيوني تقرا وگلبي يرجف ...شلون تتصور رافد مااعرفك

‎ اعرفك كلش زين  واعرف بيك دتكذب عليه ...

‎مجاوبته على رسالته بذاك اليوم ولاهو خابر ولا اني فكرت اصلا  اتصل بيه ...

‎نمت على عما عيني من القهر ...

‎حنت محسبة وكل ظني رفل صديقته او عشيقته او حتى يمكن زوجته الاولى

‎ وظليت اسبوع كامل مدري عشر ايام افكربالشغلة والوفها بدماغي شلون اطلع الحجاية من مرة اخوه ...اكيد هي تعرف ومحد يسعفني غيرها

‎صح هو ورة يومين رجعنا واحد يتصل بالثاني ونسولف بس شنو من ورة خشمنا هم هو هم اني

‎هو جان ينتظر مني اعتذار وامشيله الموضوع وجان يريد مني وعد ماافتحه وياه مرة لخ ....يعني اتنازل عن الفكرة تماما ...

‎بينما اني  جنت اريد شرح وجواب يريح گلبي ويطمني

‎اني جنت اريد اصدك كلامه بس مدااكدر ...

‎وصار انه اتصل بيه وكلي اخويه الله رزقه ببنية وجان كلش فرحان هنا ركصت فكرة ببالي لا مو ركصت كامت تدبج دبج 

‎ركضت للسوك واشتريت محبس ذهب ثگيل ...

‎وماكو كم يوم رحت لبيت اهله بس هالمرة وحدي بحجة اباركلهم على المولود الجديد وظليت هناك شي ساعة تقريبا الا ان بقينا وحدنا اني ومرة اخوه ..وهديتها المحبس من شافتهه كلش فرحت واتفاجاءت خطية...

‎وطبعاهي  ماقبلت تاخذه بالبداية كالت كلش هواية بس اني لحيت عليها وخليته جوة فراش الصغيرة ...

‎وبديت اتمسكن واجر الحجي منها كوة كوة  كتلها شوفي هسه بنتج عزيزة وماتريديلها الاذى ...

‎اعتبريني مثل بنتج اختج اي شي تشوفيه...بس ساعديني الموضوع حيل تعبني ...واني مااعرف غيرج اساله

‎كالت وداعت بتي ماكو شي بس انت لا تخلين في بالج ترة والاه رافد رايدج وشاريج واصلا مستقتل غليج واي شي تسمعين خليه وره ظهرج اهم شي تظفرين بيه ...ومن هالحجي  ومااعرف شنو الا ان لحيت حيل عليها

‎ هي وكتها جانت كلش خايفة ...وتتهرب ...

‎جانت تكول والله سارة لو يعرف رجلي اني حجيتلج الا  يطلگني  ماتعرفين شكد هو نحس ويتخبل من هالسوالف وهمه نبهين علينا ماحد يحجي بالموضوع كدامج ....

‎كتلها والله لاتخافين وروح خالي محد يعرف انت حاجيتلي وانت ماتعرفين شكداحنى  نعز خالي الله يرحمه ..

‎ ومانحلف بروحه جذب وامانة الله ورسوله محد يعرف انت حاجيتلي شي الا شوية وابوس ايدها كثر مااتوسلت بيها حتى تكلي ولانه من كامت تحجي وعرفت بيها تهديد بالطلاك كلت اكيد الموضوع مو هين والشغلة جبيرة....

‎فسالتها كتلها منو رفل صاحبته حبيبته زوجته ...

‎راسا كالت لا لا استغفر الله هاي بت....

‎وسكتت رايا لانه  امه جتي جانت جايبة عصير وحلويات ...وكطعت السالفة اني هم ضجت حيل ومن عرفت الام راح تكعد وماتكوم ...

‎سلمت عليهم دااطلع ومن داابوسها كتلها خابريني وكت ماتكدرين ...انتظرج

‎عفتهم وطلعت محروك ابو ابويه بذيج الساعة صدك انهاريت ...بت منو هاي ؟!! وليش يكللها حبيبتي؟!!!

‎ رجعت للبيت وشكد دك عليه رافدمشلته ومحجيت وياه...

‎المشكلة اني جنت مخلصة كل اجايزي وماعندي رصيد ...بس بذاك اليوم مكدرت ادوام جنت مصخنة ومثل اعراض الانلفونزا بيه ...

‎فاعتذرتلهم كتلهم مااكدر اجي على الرغم من كومة الشغل اللي عدنا لانه جنا معوزين موظف يخلص شغل ليث ويانه ...

‎وظليت الوب على التلفون الا ان صارت نص الليل انتظرتها تخابرني ومخابرت ...ماتحملت ثاني يوم الصبح  صارت بالتسعة ...دكيت عليها ...من شالت التلفون مبين جانت نايمه واني كعدتها...فاعتذرت منها وكتلها الموضوع ارقني وتعبني اريد اعرف شنو ...

‎كالت البارحة زوجها جان يمها بالليل ومكدرت تحجي والخطار رايحين جايين عليهم

‎المهم جنت بوكتهامخابرة خوش وكت البيت فارغ وعمتها طالعة للسوك ...

‎وبدت تحجي بالبداية جان الموضوع مخربط والاصح اني انصدمت فمااستوعبت الكلام اللي جانت تحجيه فكتلها الله يخليج احجيلي من البداية وانوب كل شويه قاطعة الحجي  و تحلفني محد يعرف انه كايلتلي وارجع احلفلها وانطيها ضمانات محد يعرف الاان  خرطتلي القصة من البداية ...

‎كالت رافد  اول ماتخرج من الكلية اتعين بمكان زين بواسطة  ابو واحد اصدقائه والشغل جان يجيبله ذهب وكام يلعب بالفلوس لعب وهو اصلا  جان محروم لانه جانت حالتهم بوكتها مو كلش ...

‎فمصادق بنية اسمها نغم  ابوها وامها منفصلين ...وهي جانت تموت عليه المهم غلطان وياها وصايرة حامل من عارف بيها امها  مهددته لو  يتزوجها لو اهلها يكتلوه ...وصايرة مشكلة وعركة جبيرة هو مقابل يتزوجها فمن خوفه وحتى يخلص من مشاكلها عايف كلشي وطلع بىة العراق وعن كريق قجقجي واصل لاوربا ومناك طالع ل المانيا ومقدم لجوء

‎وهي همالبنية يعني مهزومة مسافرة  لامها وماتدري امها بعمان لو الامارات تكول مجنت متزوجه اخوهم بعدني بس جنا مخطوبين ومحد جان يعرف بالموضوع

‎ورفل تصير بت رافد من امها نغم ...هو قبل كم سنة يله معترف بيها علمود تسجلها بالمدرسة ولحد الان يدزلها مصروف ويتصل بيها ....ظليت فاكه حلكي مااعرف شجاوب من طلعتلي هاي السالفة !!!!!

‎تدرون  اني بحياتي ممفشوخة ولا مضروبة على راسي بس والله من حجتلي حسيت انفشخت ببلوكه فتحت راسي بالنص...وخلتني اغيب عن الوعي ....

‎انهاريت مااعرف شصار بيه ...

‎خابرت امي منهارة وابجي ...جانت ملتهية بمسرة ولادتها بعد يومين وحتولد مثل سدير قيصيرية

‎بس مكدرت احجي بس ابجي واسب بمسرة الي دزت رافد عليه وحتى محد افتهم مني كلشي ...اني نفسي مجنت فاهمه شي ...

‎والوقت جان بعدة ورة نص الليل يمهم خطية امي صاعد ضغطها ومتاذية كلش واني ماادري هي  عبالها من دابجي واغلط على مسىرة صاير شي بينا هنا

‎بس اني شنو ورة مسديته من امي

‎خابرته راسا وعيوني تنزل دم مو دموع جان بعده نايم وفز على التلفون لانه ظليت ادك وادك يله شاله...

‎واول ماحجى انهديت عليه كتله رفل منو رافد ؟!

‎كلي هاي شبيج من الصبح هم رجعتي لهذا الموضوع مو كلنا خلص خلي يولي كتله انت كلت اني ماحجبت شي

‎و ارجع اكله رفل منو رافد؟!

‎ ولا تكلي خلص سدي الموضوع لانه اني عرفت

‎تفتهم شنو يعني عرفت

‎ رافد رفل منو طبعا كمت اصيح واعيط مجنت بوعيي ....

‎كتله رافد رفل هاي  بتك اني عرفت ياكذاب .يا كذا وكذا ...

‎هو ساكت ماحجى ولا كلمه شويه وسد السكايب

‎ورجعت ادك واتصل مايشيله اتخبلت بالزايد

‎كتبلي بس كلمتين من تهدين اني افهمج اني رايح للشغل ...

‎بس اني شنو كمت املخ بروحي على هذا الحظ...

‎ليش ...ليش هيجي خدعني وكذب عليه ....

‎كتبتله رساله طويلة عريضة حجيت وكتبت اسوء كلمات ممكن تقال وياريتني ماكتبتها ياريت النت انكطع ولو ربع ساعة قبل ماادزها بس اللي صار صار انه من قراها ...

‎كتبلي انتي حطمتي كلشي ...وعافني ومجاوب ....

‎وراها بشوية خابرتني مسرة معصبة وترجف لج شكو هبطتينا شصاير انت مخبلة هيجي تسوين بامي ...

‎اني ساعتها من اتذكرت امي انقهرت عليها وهدات شويه كمت احجي لمسرة ...وهي بس تكلي عزة ...هاي منين طلعت ...

‎وحجيت ويه ماما وطمنتها ماكو شي بس اني تعبت وماعرفت المن اخابر وظليت ابجي واعتذر وخطية حسيتها انمردت عليه مرد...

‎وكلتلي عوفيه اني هوايه اعرف هيجي نماذج ياما وياما مارين عليه بنات مثل الورد مقشمريهم شباب طايش .....مايخافون الله

‎حبيبتي لاتنقهرين خلي يولي ...

‎احمدي ربج الله فضحه هسه وخلصتي منه...

‎ووصيت مسرة ماتحجي لزوجها اي شي هسه ...

‎خلي افتهم بالتفصيل وبعدين نقرر شنسوي ...

‎اخذت حبايتين فاليوم ونمت ماكعدت الا على صوت سرمد رجع للبيت..

‎نزلت دااسوي غدا بس جسمي نحلان ومتكسر مااعرف كوة جنت امشي انطيته فلوس ومفتاح سيارتي كتله جيب كباب من هذا اللي بالسوك ...لانه مابيه حيل اطبخ ...هو هم كيف اخذ السويج وطار ...

‎رجعت فتحت الحاسبة ولكيت امي ومسرة كومة داكين عليه ورافد هم كومة كاتبلي وبديت اقره مسجاته ...

‎اول بداية جان يحجيلي انه كلش حبني واتعلق بيه وفعلا جان يتمنى انه نكون لبعض وانه اني حبه الصادق والحقيقي وانه مستحيل يتخلى عني بس كلماتي الاخيرة جرحته وبينتله نظرتي اله

‎ والمسج الثاني بدى يحجيلي شلون هو  كان طايش ومتهور  وغلط ومثل كل الناس تغلط وانه هوحاول يصلح غلطته بانه اعترف ببنته وبدى يتصل بيها ويصرف عليها وانه هو ندمان

‎ومجان بوعيه  ومن هذا الحجي

‎وكتبلي انه  فعلا بدى صفحة جديدة بحياته وتاب ومااعرف شنو ..وانه يعتب عليه انه رحت دورت الموضوع ولحيت بيه ...وبس جان يريد يعرف اني منين عرفت ...

‎كتبتله عرفت عن طريق جماعة اصدقاءنا سالتهم عنك وطلعوا يعرفوك ابد مجبت طاري مرة اخوه خطية ...

‎بعد مااعرف هو صدك لو لا بس من خابرت مرة اخو مجان اكو شي يعني ممعاتبهن ومتعارك وياهم...

‎بالليل دك عليه مرتين وتلاثه مشلته مردت اسمع صوته واعصب وابوية يعرف ...

‎المهم كمنا نكتب مسجات ...

‎كتله انت خدعتني وكذبت عليه وهو مصر على العكس انه اني استعجلت وعرفت من غير ناس ومانطيته فرصة هو يحجيلي ...

‎كتله شوكت يعني ناوي تحجيلي مثلا من توكع الفراس بالراس؟!

‎يكول هو جانت عنده نية كلشي يكلي ورة مانعقد حتى افهمه ومااحكم عليه باخطائه الماضية وانه اكون عارفة ومتاكدة هو فعلا اتغير ومتندم وفعلا يريد يبدي حياة جديدة

‎كتله قصدك تريد تكلي ورة ماتخليني امام الامر الواقع وبعد مابيها مجال انه تصيرلي حرية الاختيار انه اقبل بشخص عنده ماضي ملوث ام لا

‎المهم هو مقتنع انه مغلطان من ضم الموضوع عليه وعنده مبرراته واني جنت متمسكة بفكرتي انه خدعني وكذب عليه وراد يصلح اخطائه بتعاستي

‎لانه شمدريني مافي يوم يفكر يرجع لام بنته واصلا اني كم مرة سالته ليش مااتزوجتها وسترت عليها يكلي مجانت ترهم بدون ميقدم اسباب واضحة ومعقولة تخليني اطمن او ارتاح

.....

‎ هروبة من الاجوبة الشفافة جان سبب انه خلاني ابدي اجرحه بالكلام اكثر وصارت مناقشاتناحاده...حيل

‎ورة يومين ولدت مسرة بنوتة حلوة اتمنيت تسميها على اسمي وشكد قدمت رشاوي مفاد ... حبيت يكون سدير وسارة

‎بس هي كالت كلمة جرحتني واتذكرها لحد هسه من كالت لا مااريد اسميها سارة لايطلع حظها مثل حظج ...طبعا هي كالتها بالضحك بس اني انقهرت حيل بلعتها وسكتت ...

‎على كل هو  ابوها سماها نور جان عاجبه من قبل مردتولانه  افسد فرحة اختي بطفلها جنت اسوي نفسي ممهتمة ولا ماذيني الموضوع بينما جان العكس هو الصحيح ....

‎بالبداية جان رافد متمسك برأيه انه مغلطان وانه اله مبرراته من ضم عليه الموضوع بس من شافني كلش متالمة بدى يلين ويحاول يهديني خاف فعلا انه يخسرني ...

‎صار يعتذر ويتاسف وبكل مسج يردد كبمات الحب والاشتياق اللي صارت ماتعينيلي شي بالعكس صرت كلما اقراها اتذكر لحظاتنا الحلوة وابجي ....

‎وكتها اني جنت في حالة صراع عقيمة ...عقلي مصر انه ارفضه بشكل تام لانه مااعرف اذا قبلت بالموضوع شنو راح يجر وراه من مشاكل واشكالات

‎وگلبي يحاربني و يكول انطيه فرصة ثانية وانطي مجال يصحح اخطائه وانه اني مستحيل اكدر احب شخص ثاني مثل ماحبيه ولا راح الكي احد يحبني بهذه الدرجة ...

‎وهذا الصراع والانقسام مااقتصر عليه بس اني لا .....

‎حتى الناس اللي حولي انقسموا نصفين امي جانت  مصرة انه اعوفه لانه ماتجي من وره هيجي قسمه غيرالتعاسة

‎وجانت متمسكه برايها بالرفض

‎ومسرة تكلي جربيه وسامحيه ومشي الامور يمكن ماتلكين واحد احسن منه بعد

‎صديقتي ميس رفضت تماما فكرة ارتبط بشخص اله متعلقات من ماضيه الي قد تاثر علينا بعدين .....

‎بينما هالة رزلتني انه اني مكبرة الموضوع كلش وهو اصلا مايستحق هاي الهوسه مني  وهواية اكو قصص اسوء من هذه وصار بيها زواج وزواج ناجح هم   وانه ماكو عائلة بدون مشاكل ....وهكذا فصرت يوميه اكعد الصبح اكرهه واكو بعم مااحجي وياه وباليل من احن واشتاق انسى كلشي واكول خلص باجر حرجعله .....

‎واللي زاد حيرتي وغرقي بعد امي عني

‎ سندي الوحيد الي جنت اذب حمولي عليه

‎صح هي جانت تخابرتتصل بيه على طول  بس اني  جنت محتاجتها يمي...داير مداريي جنت اتمنى تكطع سفرتها وترجعلي ابجي بحضنها وتضمني لصدرها حتى ارتاح ....

‎كل هاي الامور زادت من حدية كلامي ويه رافد

‎زجان كلما يلين اني اقسوا اكثر واجرح اكثر وصرت ارتاح من اشوفه متعذب بسببي من كثر الالم اللي صاربداخلي وللاسف صرت استعمل وياه اسلوب خشن وقاسي واحمق ...

‎واللي زاد الطين بله ...الموظفين ويايه بالشغل ...من جنت اداوم جنت مرهقة وتعبانه كلش

‎ كانما طالعة لعزة وفاتحة مو للدوام ...

‎جنت حتى كحل مااخلي اني سارة اللي جانت ماتطلع من البيت الا  على سنكة عشرة هسه صرت حي شايل روح ميته ...

‎وكمت مااكدر اركز بشغلي واخطائي صارت هواية حتى بوفاة عمتي مصار بيهه هشكل ..

‎وهم ياريت عافوني بحالي استغلوها فرصة ياذوني اكثر مااعرف ليش وشمسويتلهم اني ...

‎فمرة صعدت زينة مثل كل يوم جابتلي فنجان كهوتي وجانت مرات تكعد يمي تسولف اني وكتها جنت مفهمتها انه مريضة وسفر امي ماذيني ...هي البنية حبابة وجنت احب اسولف وياها ونكعد مرات حتى بالغدة سوا ...

‎فبيومها كالتلي انه راح تترك الشغل انخطبت لولد كرايبهم بامريكا وهو مايقبل تشتغل بعد ...

‎كد مافرحتلها كد ماضجت انه راح تروح ...وكلتلي انه اكو واحد من السواق يريد يتقدملي ...من سالته عنها كالت ابو سلام ...اني ضحكت والاه ماادري اضحك مدري  ابجي على حظي ...كتلها هذا مو متزوج وعنده اربعة مدري تلاث جهال كالت اي هو كتلها وليش يريد يتزوج؟!

‎هي انقهرت ومجاوبت كالت والله مردت اكلج بس هو لح هواية عليه

‎اني حسيت وافتهمت انه اكو لعبة عليه لانه كلما افوت يتمسخرون ويتمضحكون فيمكن همه عرفوا اني انفصلت عن  شخص او على كولتهم انضربت بوري فكالو خلي نكسر خشمها هذا اني اللي حسيته والله اعلم شنو جانت نيتهم بس من سواها غير سايق ...كلت خلص مابيها لعد ... قدمت استقالتي وكعدت بالبيت ...مردت انجرح اكثر جنت بمرحلة عايشة على حافة الهاوية وگلبي حمل هواية  واوف من هالبشر اللي ماتخلي احد بحاله من احد اكثر وحسبي الله ونعم الوكيل بيهم وبكل واحد يتونس باذية غيره

‎صلرت علاقتي وراها برافد كلش متوترة ومتنرفزة ومصرنا نتخابر مثل قبل وكل كلامنا بالمسجات عرك ولوم ...

‎وحتى من اهله يتصلون بيه مرة اجاوب ومرة لا ومن ارد كان ردي ببرود جنت انقهر بس على امه لانه جانت حبابة ومن اهل الله وبس رادت شغلتنا تصير جانت تتنمى انه ابنها يتزوج وتطمن عليه ....بس سبحان الله صار اللي صار

‎والى ان رجعت امي احنى تقريبا انفصلنا  بس هو مرات جان يحاول ويايه

‎حاول انه يغير الفكرة اللي اقتنعت بيها

‎انه هذا الشخص خلتص بعد مايفيدني

‎ واتذكرانه ااخاتمة بدت من وحدة من اخر مسجاتي اله  كتبتله شلون اطمن على نفسي او حتى على بنتي اذا اتزوجتك والله رزقني ببنية مثلا  انه الله مايطلعها بينا اللي سويته انت ببنات العالم ...

‎وانت من غلطت وهتكت عرض الناس مافكرت في يوم يجي احد يهتك عرضك

‎اني اخاف على نفسي منك ...

‎اكيد اني زودتها كلش هواية واتسرعت بقراري ولحد الان مااعرف اذا جنت اتصرفت صح ام خطأ ولحد الان اسال نفسي لو جنت مسامحته وعدت السالفه واتزوجنا هي ياترى راح اكون سعيدة وياه

‎على اللي شفته بعدين من حياتي اتمنيت انه مااتصرفت كل هاي التصرفات والاخطاء وياه......

‎  بس هذا اللي صار وهذا اللي قررته وكتها واللي شجعتني امي عليه ...

‎جانت رافضه تماما فكرة ارتباطي بيه وانه اكيد الله كاتبلي قسمة احسن منه وهو مو نهاية العالم ...

‎والمشكلة  الي جان يعجبني ويجرحني اكثر من جانوا يكولولي عوفيه الله يعوضج بغيره واحد احسن منه ويسوى اغاته ...

‎زين ليش هي سهله لو هي دكمة ادوسها واقرر الانفصال ...

‎هذا الشخص ارتبطت روحي بيه وبنيت وياه احلام لسنوات جايه جان ياكل ويشرب ويايه والعجيبة اكثر  انه كل وحده بيهم حجت هاي الكلام هي جانت مارة بتجربة حب  وتعرف شنو يعني من تحب البنية وتفكر ترتبط  بحبيبها ليل ونهار  بس يامسهل الكلام من ينكال ويامصعب التطبيق ....

‎وياريت لهنا وانتهت القصة وينتهي كلشي وياها...

‎من رجعت امي جانت كلش حازمة بهذا الموضوع انه ينتهي وكلتلي سديه وماينفتح بعد ابد مسحت السكايب مالتي وسويت حساب جديد.وغيرت ارقام تلفوناتي ...

‎ردت انسلخ من الموضوع كله بس منو اللي يكدر ينسى ؟!!

‎ورة مابطلت ضوجتني كعدة البيت كلش فصديقتي ميس لكتلي شغلة حتى تساعدني بيها وجان ويه زوجها بمكتب حاسبات اني كيفت على الاقل اشتغل شي باختصاصي ...صح الراتب كلش قليل واصلا مايسوة بس راسا قبلت ...هو جان موظف حكومي وعنده هذا المكتب الصبح يشتغل صديقه يشتغل بيه العصرية واني اداوم وياهم من العشرة الصبح للستة العصر ....

‎كلش فرحت بالبداية انه دوام وقته ممتاز مراح اكعد من الصبح وارجع العصرية

‎ الوقت جان صيف فمياثر عليه ...

‎وحتى رفضت اروح ويه ابويه للشغل لانه عحبني الموضوع حيل

‎اول اسبوعين كلشي جان تمام وحتى شويه اتغيرت نفسيتي وحاولت الهي نفسي انسى رافد اللي مجان يموتني قهر غير مسرة من تكلي الولد مدمر عليج وراح يتخبل

‎وانه زوجها واخوه انصدموا بموضوع ع بنته لانه محد يعرف وممصدكين تطلع منه هيجي سالفه

‎ وجانت تنصحني  ارجعله بس اني جنت قافلة خلاص ....

‎وحتى هو هم قبل مااقفل حساباتي كام بعد ختى مسجات مايدز يعني هو هم من يمه نهى الموضوع ...

‎والتهيت شويه بالدوام الجديد كمت ماارتاح لتصرفات زوج ميس ويايه صار يلزك زايد ويذب حجي وتصرفاته مريبة هنوبة اني خفت احجي الها لاتروح تبليني وتتهمني اتحارش بيه ولو  هي جانت ذكية راسا خست وكامت تخابرني يومية تسالني عليه وعلى تصرفاته

‎الىى ان مرة خابرتني العصرية وجان اسلوبها غير شكل كامت تكلي سارة انت صديقتي واني احبج ولوما احبج وعندي ثقة بيج مااشغلج ويه رجلي!!!!!!

‎بس اني حسيت زوجي اتغير عليه الفترة الاخيرة وكام يكتل روحه على المكتب وصاير مايطيقني ابد ويعيرني انت هيجي وانت هيجي ومن حجيت لامي كلتلي صوجج انت خليتي البنزين بصف النار ...صدكي اني موقصدي عليج او انت اللي غلطانه بس همه الرياجيل كلهم هيجي تعرفين بعدواني صديقتج ومايرضالج ينخرب بيتي موبله  وقبل ماتكمل كلامها اني قاطعتها كتلها ميس لاتخلين ببالج اصلا اني بطلت من البارحة

‎كالت ليش صار شي كتلها لا بس خفت على النار لاتجي يمي وانفجر عليه واطيح حظه وكوليله لرجلج حتى راتب هالشهر هم مااريدع خليه اله ...هي صارت نار وشبت

‎الله عليج صاير شي كوليلي هو سوالج شي ...مجاوبته وسديت التلفون ....

‎اني اصلا مطولت وياهم غير تلاث شهور واسبوع يمكن ...

‎وقطعت علاقتي بيها نهائيا ...

‎كمت مااتحمل اي احد يجرحني لو ياذيني بقيت بالبيت وكمت لا اطب ولا اطلع بس لبيت جدي لو ويه خالتي نهال...

‎ومقبلت اروح وية ابويه للشغل مع انه شكد حاول يشوفلي منا ومناك اي شغلة بسيطة الهي نفسي بيها بس جنت تعبانه واريد ارتاح

‎وصرت يوميه اسهر على النت  وماسنجر جات وهسه طلع الفيس بووك اخلص وكتي عليهم وما انام الا الفجرية واكعد بالوحدة الظهر مرات اطلع افتر بالسيارة ومرات اكضيها انظف واطبخ ...

‎وعزلت نفسي عن الكل وخصوصا كرايبنا اللي مجان يفكرون يتصلون بينا في يوم صارت كل وحدة يوميه تخابر تسال امي ها شوكت الخطوبة كلهه تريد تعرف سارة المن حتاخذ وامي تكللهم مصارت قسمه وهي خطية محرجة ومهمومة ومو وحدة منهم ولا اثنين ماشاء الله حتى عمتي سعاد ماقصرت ....صارت الشماته تقرأ الف

‎انوبة سراب من كامت تجي تذبلي حجي هاي الناقصني ...وتسوي تفسها هي والسعادة اخوان وهي اصلا رجلها مايريدها ....

‎الى ان في نرة حتي وكامت تبسرمني بكل صلافة هم ببيتنا وهم تصجم ....

‎ترةانت مو صغيرة بعد ولازم تقبلين باي واحد يجيج يمعودة لحكي القطار لايفوتج ....

‎اني فعلا مجنت ناقصة مغثة ...فكتلها احمدي ربج واشكريه اللي عمتي سترج عليج ....والا جنت بعدح بالكلية تختلين ورة القاعات بعد لاتحجين زايد ....

‎صارت عصبية وراسا ركض اشتكتني لابويه ...يعني شكدصعبة من تجيج حجاية وشمات من القريب تصير تذبح وتجرح اكثر من الغريب بالف مرة بس شكول لحظي خلاني اوكع بحلوكهم ...اوووف

‎بس ابويه محجى ويايه ولاشي لانه هو   هم جان مقهور عليه ودائما جان يكلي كلشي قسمة ولاتنقهرين تلكين الاحسن منه ومن هالسوالف ..

‎اما الحقيرة فماسكتت من دتروح جانت تكلي يله هم اعذرج اللي بيج مو قليل ايبااه شكد قهرتني وشكد تحسبت الله عليها اللي لابيه ولاعليه تجي تذبلي حجي وتروح مااعرف شبيهم الناس قابل اول لو  اخر وحدة ماتصير لو تتاخر قسمتها !!!

‎جنا مرات نتخابر لو نطلع سوة اني وهاله ...واخر شي بديت اجيب علاء وابراهيم يمي ولد عمتي الله يرحمها اتسلى وياهم اطلعهم وافرهم ووديهم حدايق والعاب جانو كلش فقرة وحبابين ...ويكسرون الخاطر

‎وبداية السنة الدراسية بطلت سىاب من الكلية تكول رجلي ذو الفقار زوجها 

‎يغار عليها من الطلاب مايتحمل يشوفها تحجي ويه احد غريب

‎ بينما عمتي كالت لامي هي بطلتها من الكلية لانه محتاجتها تعاونها بالبيت وماكو داعي بعد تكمل كليتها زواج واتزوجت!!!!

‎يمكن عبالهم الكلية مكان يروحوه البنات حتى يدورون زواج ويتزوجن؟!!!

‎وشوية وشويه كبت العيطة بيناتهم  وكامت سراب تجينا زعلانه من العرك والمشاكل وكام ابن عمتي حتى بسط يبسطها ....

‎واتذكربذيج السنة  فد يوم بشهر التاسع يمكن قبل رمضان مااعرف شوكت بالضبط...جتي مرة عمي تدك الباب تصيح وتعيط فضحتنا بالمنطقة  فتحناه وجانت ملخة روحها مدري مبسوطة من عمي ....مرة عمي اذا تذكروها الموظفة اللي بالبنك المركزي نفسها جتي تشتكي من عمي لابويه انه متعاركين وباسطها وطاردها من البيت  بقت يمنا اسبوع تقريبا...تقريبا وراحت لبيت اهلها ...

‎ابويه دز على عمي يريد يفتهم منه شنو الموضوع كله نعيم موتتني بالسحورة والله صحتي راحت يومية بيه مرض شكل خبلتني اني خلص راح اطلكها مابيها مجال بعد واني اصلا رجعت صباح اللي هي حانت زوجته الثانية وعنده طفل منه المهم صارت مناوشات وعركات وحتى وصلت محاكم  شكد حاول ابويه يحل الموضوع بالتفاهم ماكدر ماكو اول يوم رمضان خابرونا كالوا عمي بالمستسفى ضاربته جلطة....

‎انشغلنا بعمي ومرضه اول اسبوعين من رمضان ...

‎هو وكتها بعد طلك زوجته الاولى ورجع الثانية صباح اللي جان عدها ولد من عنده رياض...

‎احنى بوكتها جنا حاجزين على سفرة لسورية

‎الفترة الاخيرة  امي عيونها اذتها حيل

‎وعدها صديقتها هم طبيبة نصحتها تسويلهن عملية بسورية يم طبيب عراقي هناك

‎وهواية مدحتلها بيه فحجزنا على اساس نروح نسوي العملية ونبقى هناك رمضان كله ونرجع ورة العيد  ...

‎واضطرينا ناجلها للسفرة علما يتحسن عمي شويه

‎ومن صارت صحته  احسن من قبل رحنا كلنا اني وامي وابويه وعمي وزوجته وابنها ريوضي ...

‎وعادي سرمد بقى ببيت جدي يم خالتي نهال  علمود دراسته  ...

‎احنى هواية جنا نسافر لسورية من ورة الفين واربعة

‎مرات اذا ابوية ببغداد جانت خالتي نهال تجيبه وتجي ورانه وابوية وخالتي اقبال يدارون بيبتي وجدي ...بس هالمرة خالتي جانت مشغولة تريد تزوج ابنها الصغير العسكري ورة العيد ...

‎عمي من وكع على الفراش.... بوكتها خاف يموت وتروح زوجته وابنها بالرجلين وخاف لايروح حقها وحق ابنها فشهدنا على تحويل البيت مالته اللي بالحارثية باسم زوجته صباح وابنها اللي هو نفسه جانو كاعدين بيه...

‎خطية حس انه هواية ظلمها....بسبب زوجته الاولى ...

‎اني مجنت اعرفها كلش زين بس من عاشرتها بسورية حبيتها كلش وصرنا مثل الصديقات

‎هي شوية انظلمت بحياتها

‎امها وابوها اتوفوا وهي صغيرة وبقت يم اخوها وزوجته ومن اتقدملها عمي راسا قبلت رغم فارق السن الكبير بيناتهم بس رادت تخلص من مشاكل مرة اخوها

‎وياريت لو هم ارتاحت ...زوجة عمي الاولى لعبت بيها طوبه ومجازت منها الا طلكتها من عمي ورة ماكو يمكن سنتين او تلاثة على الرغم من انه عمي جان يحبها ويموت عليها .......

‎جانت كلش فرحانه انه راح تجي ويانه وتكسر الخاطر شكد فقيرة ماتحجي ابد وجانت تقبل بكلشي وباقل شي وهذا اللي خلى عمي يشعر بتانيب الضمير نحوها ...

‎اني جنت كلش احب سورية واحب ازورها مااحس ابد بالغربة واخذ راحتي بيها ختى اكثر من بغداد ...مرات ااجر سيارة هناك ومرات احب اركب سرفيس...

‎كل مرة نكعد بحي المزرعة منطقة حلوة ومرتبه والشقة اللي ناجرها ناخذها من صديق ابويه كلش يعزه  ويريد خاطره بس هالسنة اتاخرنا ملحكنا عليها كال ورة العيد يله تفرغ

‎هواية عراقيين هالسنة راحوا وحتى خلايجة يجوون بموسم العيد هنا ...فتصعد الايجارات وتقل الشقق المفروشه ...

‎فبذيج السفرة  اجرنا بشارع بغداد هم حلوة المنطقة وسبق وجنا كاعدين بيها واللي يميزها الفوانيس المعلكة بالشارع فوك وبيها محلات من  كلشي واهم شي حلويات السلطان ...وقريبة على سوق  الحميدية وقلعة دمشق جنت احب اروح هناك هواية

‎اجرنا شقة طابق ثاني

‎ مع انه ردنا ارضي علمود عمي الصعدة والنزلة مالكينا غيرها

‎ العمارة جانت تلاث طوابق والشقة مفروشة وبيها بلكونه مفتوحة على الشارع منظهرها بالليل جان يجنن جنا نسهر للاربعة الصبح نظل اني وصباح نفتر لو اني وامي ومانرجع الاقبل الاذان نتسحر وننام ومنكعد الا قبل الفطور بشي ساعتين واكثر الاوقات نفطر برة ...

‎السفرة كلش ريحتني نفسيا وطلعت من مود الكابه اللي جنت بيه

‎هناك كلشي رخيص ومتوافر وكلشي اروحله مشي فجنت بين يوم ويوم اروح للصالون ارتب حالي واطلع ...

‎ردت ارجع لون شعري الفاتح بس مااجى من گلبي ظليت مترددة ...بقيتها على سواده

‎اتونست حيل والحمد لله نجحت عملية امي بس تعرفون بسبب كبر العمر يعتبر نجاح العمليه شي نسبي صح بقت تلبس نظرات بس بدرجة اقل بهواية من قبل ...

‎عمي مجان يطلع هواية فدائما لازم احد يبقى وياه ...وعلى الاكثر جانت زوجته ومرات امي

‎ وحتى لو مجان اكو احد يطلع ويايه جنت اجر ابويه ونطلع بس بابا بسرعة يتعب ويرجعنا من وكت ......

‎فكمت اخذ رياض ونطلع نكعد بساحة عرنوص ورة الفطور هواية عوائل ومرات ازرك لل انترنيت كوفي شوب اكعد اجتت شويه وارجع للبيت ..

‎وورة العيد بيومين ابويه وبيت عمي كلهم رجعهم وبقالنا اسبوعين ونرجع لانه احنى دفعنا ايجار شهر   فابوية من وصل للعراق كال راح ادز سرمد لسورية وانتو روحو جيبوهةمن المطار اخاف مايندل  ...

‎فمن دنودعهم ونوصلهم وجنت انزل الجنط وياهم جان اكو واحد يصعد وينزل بالعمارة ويظل يباوع عليه ...

‎مبين حان عراقي سلم على ابويه واستاذن اخذ الجنط مني هو نزلهم  اتشركته وصعدت ...

‎ماكو بالليل ورة مارجعت من فرتي شفت عدنا خطار ...مرة محجبة ومرتبة يعني بالاربعينات ...عراقية ...ام قاسم

‎سلمت وكعدت هي راسا بوستني كالت انت سارة ماشاء الله انت هواية احلى من الوصف ...

‎هي جيرانه بنفس العمارة اللي احنى ماجرين بيها بس الجناح الثاني يعني مو بالطابق اللي فوكانا لا فوك الشقة اللي بصفنا عراقيين هم بس بغير محافظة كاعدين ونازلين للشام زوجهاوشريكه  صارتلهم شغلة هنا وماجرين الشقة لمدة شهر. ...مثلنا يعني

‎ وظلت بالبداية  تحجي عن نفسها وزوجها وشغله هي مجان يصير عدها اطفال وسوت عملية هنا بسوريا والله رزقها بتوم ولد وبنية وجانت كلش فرحان بيهم خطية ...المرة لطيفة وعشريه ولسان...

‎بدت تحجيلنا عن صديق زوجها نفسه اللي جنت اصادفه على الدرج ويسلم عليه وهو نفس اللي اخذ مني الجنط واكثر من مرة شايفني بالبلكون اني وامي نشرب جاي لو كهوة....

‎وعاجبته ويريد يتعرف علينا يشوف اذا جنت مرتبطة لا ...او اقبل بالارتباط ...

‎اني من حجتلي زواج بلعت ريگي

‎ صح اني ورافد نهينا كلشي بس  لحد ذاك اليوم اني  جنت افكر بيه وجنت ادخل يوميه افتح فيس بووك اباوع على بروفايله واطلع ...

‎لحد ذاك اليوم جان عندي امل تصير معجزة ونرجع لبعضنا ...

‎امي وكتها ابتسمت لانه اتفاجنا بالموضوع ...فمرادت تحرج المرة باي جواب او رد

‎وكالت خلي نتشاور ونفكر..ونردلج خبر

‎بوكتها اني محجيت شي  لانه راسا امي غمزلتي سكتتني والا جنت اريد اكوللها مااريد اتزوج ومامفكرة  بالزواج حاليا...

‎بعدين بدت تحجيلنا عن هشام ...هو تسعة وتلاثين سنة عمرة  طالع برة من التسعينات وعايش بالنروج وبعد احداث الفين وتلاثه بشي سنتين جاب اهله واستقروا بسورية ...

‎وحاليا كاعدين بطرطوس لانه شغله بالبواخر والموانئ هناك وحسب مافتهمت بعدين انه عنده مقاولات وعقود  تجهيز للجيش الامريكي بالعراق...وجانت الشغلة تجيبله ذهب

‎ورة يومين تلاثة هم جتي ام قاسم   ...وعادت فتحت الموضوع وكالت الولد مستعجل ويريد يجي يحجي وياكم ويفتح الموضوع شتكولون ...

‎خطية امي ظلت تباوع عليه واني اباوع عليها ...

‎اني رافضة وامي مترددة ...اخر شي هي جاوبت كالت خلي يجي وشوفوه انتوا شخسرانين ان عجبكم خير على خير وان ماعجبكم كلشي قسمة ونصيب ولو اني شكد ماامدح بيه مااوفيه حقه صاحب فضل علينا وصديق رجلي من خمس سنين واكثر ماشفنا منه العيبة ....

‎ومن هالحجي قبلنا على انه يجي ثاني يوم الصبحية من سرمد يكون موجود ويصير خير على انه هي هم لازم تجي وياه ...

‎وثاني يوم اجوي وجان كاشخ ومعطر كعد يحجيلي عن نفسه وحياته بس اكثر الكلام بالبداية جان موجه لامي مو اليه وهذا الشي انطاني فسحة من المجال ارجع لعادتي بالسرحان صاير عندي طبع من اشخاص يحجون وياية بمواضيع ماتهمني اسرح واروح لغير عالم وافكربغير بامور ...

‎الا ان كلي هشام ها ست سارة شنو رأيج ...

‎كتله هااا ...مااعرف والله ...

‎ضحك وبدى يخاول يشدني اكثر ال كلامه ...

‎هشام كان شخص جرئ جدا وعنده ثقة بنفسه حيل

‎ كان قصير مو طويل

‎وشعره لونه اسو د ممزوج برمادي منطيه جماليه اكثر

‎عيونه صغار ولونها خفيف

‎وشويه متروس بس بطبيعته حرك ويمشي سريع والشغلة اللي في باله يسويها يسويها...

‎حسيت من كلامه بالمرتين الي اجى بيها وطبعا يوم وره يوم هو شخص كريم ولماح

‎ وهو كلي انه من يصمم على شغلة لو يريدها لازم يكملها او يحصلها وهو خلص قفل عليه ولازم باي طريقة يقنعني اقبل بيه لانه جان حاس بالرفض ...

‎احنى مانطينا جواب لا بالموافقة ولا الرفض خليناه الموضوع لحد مانرجع للعراق

‎وراها بيومين رحت اجيب ادوية لامي من صيدلية قريبه اتذكر اسمها الصفدي يمكن ...وشفته هناك حسيته اجى ورايه وظل يحجي ويسولف الى ان وصلنا للبيت ...

‎جان يحاول يحببني اله بس اني جنت خاله مانع بيني وبين اي شخص يحاول يتقرب مني

‎المهم اليومين الي وراها ظلت خالتي اقبال تخابر تسال على وقت رجعتنا علمود زواج ابنها واتفقنا اني وامي على  انه هي ترجع وحدها ونبقى اني وسرمد كم يوم لما يخلص العرس ونرجع سوى

‎ماردت اشوف احد ولا احضر عرس احد ومردت اصلا اي واحد من كرايبنا يعرف اخبارنا ووصيت امي كتلها عود هم فضحيني بالعرس وكولي اكو واحد رايدها ....

‎كالت لا لا بعد لا ااحجي ولا ااكول ...

‎خلي تصير والله كريم وعلى هذا الاساس راحت دتحجز بس ابويه خربط كلشي مقبل نبقى وحدنا ورادنا كلنا نرجع سوى فد مرة ...

‎مااحجيلكم صدك رجعت لبغداد على عمىى عيني ...

‎وقبل منسافر اجى هشام وصلنا للمطار وودعنا وكال لامي انتظر ردكم عليه ....وانطاها رقم التلفون بحيث خابرها عليه بتلفونه حتى يطمن انه خزنته...

‎اول ماصعدنا الطيارة كتلها لامي اول منوصل خابريه كوليله مااريد ...اعتذريله وكوليله ماافكر بالزواج اشو لح هواية واحس گلبي ممرتاحله ...

‎كالت خلص براحتج قابل نجبرج احنى هم مانعرفه ولانعرف عنه شي ....

‎رجعنا لبغداد وصارت الحفلة ورة يمكن تلاث ايام ...

‎اني مردت اروح بس ماما گوة قنعتني  حتى لا وحدة تفتح حلكها عليه مو اني اعرف بسوالفهم

‎ اللي راح  تكول جانت خاله عينها على ابن جالتها وماجتي لو خطية  عنست بعد صارت معقدة ..ماتحب تختلط باحد لو راح يحجون عن علاقتي برافد ومن هالسوالف

‎المهم لبست وحدة من بدلاتي الي جبتهم من عمان علمود خطوبتي اللي مصارت ...

‎هي جان لونها اصفر على بيجي ...

‎ولفيت شعري بس بالبيت ...ولبست احلى ذهباتي ورحت للعرس

‎الحفلة جانت بقاعة جبيرة وحلوة هناك

‎ظليت بس جاكة حلكي واضحك واصفك وحتى ركص كمت اركص وامي تباوع عليه وتعرف انه الدمعة بعيني وانه كلهم بيهم نظرة شمات عليه ...

‎بس مااهتميت ردت الحفلة تخلص شلون مجان حتى اجع للبيت

‎وجنا من اول المغادرين ...

‎مرة ابن خالتي جانت حيل صغيرة توها اول كليه منقبله تربية ..وفوكاها صارلها سنين علاقة وياه شوكت لحكت ماادري؟!!

‎جانت حليوة وحيل ناعمه دمها ينحب

‎ومن كثر المغثات والحجي المكروه  الي سمعته ومن الحجايتين الحلوات اللي حجتهم مسرة انه في حالة رفضت هشام اليوم يجيني  واحد مثله السنة الجاية محد يريدني غير المطلق والارمل !!! لواللي يريدني زوجة ثانية فلا تتبطرين سارة

‎فمن مرجعنا من الزفة بدلت وسويت جاي النا بس سرمد جان فوك وظلينا نسولف وانفتح موضوع هشام ابويه جان عنده بالبداية اعتراض لانه ماعنده شهادة جامعية ...لكن كونه انسان ناجح بشغله وشاطر يمكن شوية غطى على هاي الشغلة ...

‎بس حذروني من انه موافقتي في حلة وافقت لاتكون مجرد ردة للي مريت والي صاربالفترة الي فاتت 

‎بس بشكل عام جان الموضوع كله مرفوض نوعا ما بس مااعرف شلون بدت تمشي الشغلة....

‎ظليت افكر يومين وتلاثة بهشام وشخصيته واسلوبه ...وحتى نظراته ووضيعته

‎وحسيته رايدني وهيعيشني بمستوى جيد 

‎شفت انه اقبل بيه احسن من كعدتي بهالشكل .......ويومية مغثة شكل

‎والله ماكو شي كم يوم من رجعتنا

‎رجع هواتصل بامي يريد يعرف الجواب

‎امي جانت مترددة بس بلغته بموافقتنا موافقة مبدئية

‎وهو مصدك طار من الفرح ...ماكو يومين جايب خاله وصديقة ابو قاسم واجانا

‎اعتذرعن جية اهله وكال كلهم بسورية وابوية  رجال جبير مايتحمل سفر ...

‎وحجى بتفاصيل حياته لابويه عن اهله وعشيرته وشغله وخططه بعد الزواج وترتيباته ...وراها راسا كاله عمي اللي تريدوه امر عليه مراح اكول لا اني متمسك بالبنية واللي تريده يصيرواني الممنون...

‎بس مقابلها عندي طلب واحد انه علما اسوي معاملة الشمل اريدها تبقى بسورية مو العراق وااجرلها احسن فيلا وحتى خدامه اجيبلها ....بس تكون هي تكول اي ....

‎ابويه هم اخذ معلومات عنه وكله مو مشكله نسال عليكم وننطيك الرد باقرب وقت....

‎ماكو كم يوم ابويه جان توه راجع من الشغل وصاحني حتى قبل مايتغدى كلي سارة تعالي عندي حجاية وياج

‎بنتي اني سالت عن الولد يكولون كلش خوش ولد وسبع ومؤدب  بس المشكلة اهله اصحاب مشاكل ابوه وعمامه هوايه جانو ا يتعاركون ويه الجيران بس همه مايعرفون عنه الا كل خير....

‎شتكولين

‎كتله بابا بكيفك انت الي تكول عليه اني موافقه ...

‎كلي باباتي اني اشوف

‎لو تعوفيه احسن ..

‎كتله خلص مدامك مراضي عنه هاهي انتهى الموضوع ....

‎ثاني يوم ابويه خابره وانطيناه الرفض طبعا بدون اسباب صريحة مردنا نجرحه

‎ماكو شي ساعة اجى ودك الباب هو وصديقه ابو قاسم ....

‎احنى ظلينا منحرجين ...شلون يعني شراح نكله ...

‎المهم ابويه اخذهم وكعدوا بالصالة المغلقة ماسمعنا شي....

‎بس ظليت الوب اني وامي نريد نعرف شديحجون

‎ ماكو شي ساعة وشوية ابوية طلع يباركله ويكله اني ماعندي مانع خلي نشوف رأيها

‎اتخيلوا ابويه اللي مايغلبه احد كدر هشام يقنعنه ....

‎وجنت حاسه اني بهذا الشي ...لانه اعرف بيه صاحب لسان وقدرة اقناع  ...

‎اني هم انحرجت وشفت ابويه موافق ظليت ساكته ...فهو هشام يعني راسا كعد على كرسي المطبخ ديضحك جان يكلي

‎ها اها سارة اني هنا كاعد ومااتحرك من بيتكم اذا ماسمع ردالموافقة منج

‎عاد امي جتفت ايدها على صدرها ورفعت تك حاجبها وباوعت على ابويه يعني مجانت عاجبتها الشغلة وبيها ملامه مبطنه لابويه اللي حاول يتفادى انحراجه بابتسامه وضحك وطلب من ابو قاسم هم يكعد وياهم وقاط لاخ جاي ...

‎ساعتها فضا للاشكال

‎ومااعرف اصلا شلون وافقت راساوطلعت من حلكي النعم....

‎هو رادها راسا خطوبة ونعقد قبل مايرجع يسافر وعلى جيته الجاية نقعد محكمة ونتزوج يكون بعد محضر البيت بسورية ..

‎بس امي ماقبلت كالت لا لازم نمشي حسب الاصول لازم امك وخواتك يجون اشوفهم ويشوفونا ولازم هم ابوك واخوك يجون ...

‎هو جان عنده اربع خوات متزوجات بسوريا واثنين اخوان بس الجبيرعايش بالسويد  ..

‎هو مااعترض بلعكس راسا وافق وكلها لامي من عين باجر يجون واللي تريدوه يصير

‎بس اني جنت مستغربة ليش هيجي جان مستعجل ومستقتل عليه  مااعرف

‎وقبل مايطلع كال لماما اخلي امي تتصل بيج بس توصل لبغداد...وتاخذ موعد منكم نجي نتقدم بشكل رسمي ...

‎سلم وطلع

‎امي راسا جرت ابويه وكلتله نعيم هذا شحجى وشكال انت هيجي راسا غيرت وبدلت رأيك

‎كلها كوثر الولد مايتعيب وسبع والكل تمدح بيه

‎العيب باهله وهو اعترف بهذا الشي انه عمامه اهل شر وهو كاطع علاقته بيهم وكلي اني شنو ذنبي اذا همه هيجي ترة هم صدك يحجي خطية هو شنو ذنبه

‎وبالنسبة لبتج اني من يمي شرطت اذا وافقت عليه ماتكعد ويه اهله بطرطوس تبقى بالشام وحتى تكعد بالشقة مال صديقنا اللي بالمزرعة على الاقل نعرفه وضمان

‎وشوكت مانريد نروح نزورها

‎ وهو ممانع وكال اللي تريد وه براحتكم

‎بعد انت وسارة  اذا ماتقبلون بكيفكم ارفضوه...

‎عفتهم يتناقشون وصعدت

‎جنت دايخة ومسطورة

‎بعدني ممتخيله اكون لغير رافد محتاجة شي يخضني يهزني حتى اوعى واعرف اني وين وشدااسوي

‎وبنفس الوقت اتخيل هشام واصفن

‎شلون يعني هذا راح يكون زوجي شلون ورافد ؟

‎بجيت ليلتهاونمت ...

‎وصبحت متضايقة وممرتاحة ...

‎المهم بيومها اجوي بيت عمي ...وجان مقرر انه يطلع يبقى بسورية هناك كم شهر كفترة نقاهه

‎ومنها يخلص من مشاكل ليلى وسحورتها حسب مايكول ...

‎وانطرح موضوعي اني وهشام

‎هوكلش كيف وفرح كال خوش حتى لو تبقى هناك ماتكون وحدها عينا عليها ...

‎وهذاكان سبب اخر طمن ابويه ...

‎وحجي منا ومناك طلع عمي يعرفه لهشام ملتقي بيه اكثر من مرة .....

‎ورة شي يومين جتي سراب زعلانه من بيت عمتي وجهها ازرك من الضرب امي من شافتها كرصتني حتى مااحجي جانت جايبة اخوانها وجايه ...

‎متعاركين هي وعمتي ...

‎وهي مصيحة عليها تكول عمتي كاسرة ظهري بالشغل وماترحم واول مجاي  ذو الفقارزوجها من الشغل بعده ماعرف شنو الموضوع لزمني دك كتل انت ليش تصيحين على امي تكول والله ردت اموت جوة ايده وعمتي كوة خلصتني منه ومايجوز مني ....

‎تبجي وتتمسكن يم ابويه وعمي ...

‎بكلبي كلت وبعد وبعد وجان بوكتها بودي احجي اكثر بس سكتت ماتسوه

‎عمي من يمه عصب وكام يغلط على زوج عمتي مع انه السالفه مو يمه ابد بس كلمن يشوف عدوه گبال عينه و كام يقرر من كيفه قرارات جديد ة

‎كللها لسراب عوفي عمتج وتعالي ويانا لسوريا جيبي اخوانج وتعالي

‎بس طبع ابويه ماقبل على هاي الحجاية

‎وكال هي لازم ترجع لبيتها ورجلها

‎وطمنها انه حيحجي ويه عمتي ويتفاهم وية رجلها

‎ جية سراب بهيجي وكت ضوجتني حيل كلت بلكت ترجع لبيت عمتي ويصالحوها قبل جية النسوان...

‎والله وشكلها باقية ....حتى عمتي وصت امي تشوفها ليش مو حامل

×××                                                           ××××

‎هشام خابر امي كللها احنى ببغداد وباجر يجون النسوان والزلم للخطوبه فد نوب لانه يريد يستعجل بالعرس قبل محرم وصفر يعني هو ماباقي غيرشهرين

‎ اني من سمعت ضجت من هذا الاستعجال شلون اتزوج واحد غريب مااعرفه وخلال شهرين ..

‎اخذت التلفون وحجيت وياه

‎كتله لا مااريد خليها ورة صفرفد مرة ...عليش هالاستعجال ماكو ورانا شي

‎كلي ميخالف ولايهمج  خلي هسه تمشي الاموروالي تريديه يصير

‎ وبقى يجر بالسوالف وياية ويحجيلي عن نفسه وطبعه انه عصبي وغيور كلش....وحجايته وحدة..

‎فسالته كتله ليش اني وليش هيجي متمسك بيه ...يعني ماتعرفني زين

‎كلي سارة اني اعرف بيج مترددة وخايفه وحتى حاس بيج مو كلش فرحانة....

‎بس صدكيني سارة اذا قبلت بيه راح اخليج اسعد انسانه

‎ولحظة وحدة ماخليح تندمين انه وافقتي

‎راح اعوضج عن كل شي مر مر بحياتج ...

‎كلامه هذا عرفني بيه عن ذكائه فمكان اكو داعي اسال اكثر الظاهر هو كلشي جان يعرف ...وسائل زين

‎وكمل كال اني اول مشفتج من  اول مرة عجبتيني وخشيتي قلبي

‎وظليت اراقبج وامشي وراج ووين ماتروحين ويه عمج ومرته ويه امج ويه ابوج حتى لحكتج من جنت تطلعين ويه رياض لساحة عرنوص وللسوك عرفت عنج كلشي وعرفت انت اللي اريدها ....

‎عرفت محد بحياتج وانت بنية محترمة ومحافظة على نفسج ومؤدبة بت عائلة وجمالج وحده كافي شريد بعد ؟!! ليش ماستقتل عليج ....

‎وظل يحجي عن خططه ورة الزواج ....هو يحجي واني طبعا في غيرعالم

‎المهم ثاني يوم جوي هوواخوه وخاله  وابو قاسم ...

‎كعدوا وياه ابويه وعمي بالصالة الجبيرة

‎وكعدنا اني وامي وصباح  وامه وخواتها الاثنين الاصغرمنه

‎احنى بوكتها حتى لخالاتي  مكلنا ...

‎وبقت سراب بالمطبخ تحضر

‎والجهال فوك يم سرمد ...

‎طبعا سراب حاصت ولابت رادت تكعد ويانه بس امي ماقبلت خافت تنبصىلها بحجاية تخرب الاول والتالي ....

‎من اجوي خواته ماحبيتهم ابد ولاهمه حبوني كلمتين على بعضها ماحجوا الام جانت ضايجة والجبيرة بس تريد تكوم تروح...اني اكول بس اخته الصغيرة هبه ها شويه يعني ...طبعا ساكتين واحنى هم ساكتين صباح تباوع على امي وامي تباوع عليه ...هاي شبيهم

‎بعدين صباح مرة عمي بدت تحجي وتسولف ...

‎وهمه عن كلشي حجواالا الخطوبه ...حجوا عن نفسهم وزواجات البنات الاربعة الجبيرة انتصار منقبة وعايشة بحلب والثانية ماخذه سوري  وميعاد وهبه الي هسه جايات ويه هشام متزوجات ولد عمهم وكاعدين بطرطوس وهبه هسه كاعده يم اهلها زوجها مسافر...

‎وبدوا يلمحون على انه اني مو ذبتهم وهمه جانوا رايدين بت خالتهم اله بس بعد هو محد يكدر يمشي حجايته عليه وبناتهن صغار ويزوجن فجانت ميعاد تسال كالت شعجب هالجمال وهالمال  والشهادة لحد الان مامتزوحة  ..

‎فراسا انتفضت صباح من يمها ضاجت من الحجي وفهمتهم انه احنى جنا رافضينوهشام لانه همه اتصوروا احنى جنا علاقة فكالت هو اللي رايد ومصر والا احنى مانعرفه غير كم يوم وذبتلهم حجاية بالعظم كلتلهم اذا مضوجكم شي احجولنا بلكت نساعدكم بشي اشو نحسكم ممرتاحات؟!!خطية هي تحجي وتباوع  على امي تخاف ماتقبل على حجيها بس امي انطتها الضوء الاخضر فانطلقت وماقصرت فدوة لعينها

‎ف نطقت الام واخيرا كالت لا لا ماكو شي احنى تعبانات من السفرماكو اي ضوجة

‎كل مافي الامر الحجاية حجاية هشام مانكدرلانقدم ولا اناخر عليها  هو اللي يقرر اي شي تامرون احنى بالخدمة ...

‎وياها سمعنا صوت الزلم يترخصون فهنه كامن ...

‎يالله شكد ضجت ومارتاحيتلهم

‎ومن طلعوا كعدنا احنى وبدينا بالتحليلات والا نتقادات وهاي ليش فلانه هيجي حجت وشلون الام تباوعلي وماعرف شنو

‎سراب تكمز بحجاية منا ومناك

‎تريد تفهم الموضوع واني ان منا طافرة روحي  ردت بكلي احد يكلي مايفيدوج ....