تحميل رواية «برواز من ورد» PDF

‎بروازمن_ورد

28

‎الحمد لله انه اتفقنا ورتبنا امورنا تكون الزفة على اول يوم بشهر حزيران وجان يصادف يوم سبت وصارت  الحنة يوم الجمعة ...

‎بس بصراحة اني ماسويت حنة اليه ...كل اللي صار اهل حيدر سوو صينية حنة بسيطة واجتمعوا خواته وكم وحده من كرايبهم واحتفلوا همه اني رحت كعدت شويه ورجعت علمود تعرفون امي حزينه وهمه قدروا  هذا الشي ...

‎ورتبت حالي على الزفة ثاني يوم جنت كلش تعبانه كعدت بالعشرة الصبح ثاني يوم شفت امي وصباح محضرين الريوك ركض اكلت لكمة ورحت للصالون اني جنت مترددة بكل هاي التحضيرات بس حيدر لح وحتى صباح هم كلتلي لاتخلين بنفسه شي لاتحسسيه انه انت مو مثل كل البنات ...

‎وهاي الحجاية ظلت ببالي وصرت امشي عليها

‎لازم اطلع تجربتي السابقة من حياتي نهائيا ...

‎وشكد حاولت بس هم مرات هوايه جنت افشل ...

‎صعبة مو بيدي هي الذكريات تكمز ابالي مثل الشيطان ...

‎المهم طلعت من الصالون تقريبا ساعة اربعة ونص وجانت الزفة بباب الصالون ياخذوني يفروني ومناك نبات ليله بفندقنا وثاني يوم نطلع لسليمانيه ....

‎ودعت امي وجان گلبي ناار عليها حزينة وعيونها انملت دموع

‎ها ووكتها هي جتي ويه سرمد اللي بقى هاليومين كالب خلقته وحتى من اتعرفوا هو وحيدر واحد ماحب اللاخ ....مااعرف هيجي بدون سبب ...

‎المهم جتي الزفة وجانت بس صباح ويايه حتى رياض عفناه يم امي ...

‎وصعدت بالسيارة وكل وحدة شويه خاله ابنها بحضني بلكت يصير عندج وليد حلو مثل هذا !!

‎واللي تحجي تركماني واللي تباركلي بالكردي واني صرت صدك هذاك الاطرش بالزفة ...

‎اخذنا فرة بالشارع وفرة يم بيت اهله همه انزلوا دبجوا كردي يم الباب وامه طشت جكليت واخته هم هم ظلت تهلهل وطلعنا للفندق استقبلونا بالضحكات والابتسامات ...

‎صدك من كال حيدر شغلة محرجة ومنرتاح حسيت نفسي كلهم عرفوا شراح يصير هالليله ...

‎والحمد لله مشت الامور حلو وبخير ...

‎وماحسيت نفسي الا ساعة تلاثه واني عيوني على السكف مكدرت انام مع انه حيدر بصفي جان يشوخر ...هو اخذ حقه وبزيادة بس اشو اني لزمتني البجية ...وظليت ابجي من التلاثة للخمسة الى ان حس علية وكلي شبيج كاعدة

‎ ركضت للحمام غسلت وطلعت ...سويت نفسي ماكو شي وعادي كلش طبيعية

‎وثاني يوم الصبح من التسعة طلعنا سيارة اجى علينا منصوري وبرزي اخذونا من الفندق اللي جنا بيه للفندق بسليمانية...

‎حيدر جان كلش فرحان وشقى وضحك طول الطريق ويه الشباب الا اني مااعرف جني جنت  بغيبوبة وفي عالم ثاني منو حيدر ومنو هشام ؟!

‎والله مداابالغ ...

‎مااستوعبت ...يعني اني تقريبا سنة وشويه متزوجه هشام  ...محسيت هذا الاحساس اللي حسيته ويه حيدر ...

‎وهذا الشي اتاكدلي بالايام اللي جاية ومرت عليه  ...

‎هشام كان كل همه يريد اصير حامل وطفل يشيل اسمه ...

‎بينما حيدر كان يفكر بيه اني ...وبشعوري وياه ...

‎حيل شكد جان اكو فرق صدمني ...

‎ومع ذلك حسيت نفسي مو كلش مرتاحة يعني صعبة جانت عليه المعاشرة اكثر من مرة باليوم وهذا الشي بين عليه مع انه حاولت امثل عليه انه  اني فرحانه ومتجاوبه بس هو حس عليه ....وظل يحجي ويايه عباله ضايجة منه او مستحية او مجنت اعرف هو شلون فسرها

‎اول اربعة ايام من جنا بسليمانية جنت شويه  زينة واتاقلمت واتعودت عليه ...بس اشو من رجعنا لبيتهم مااعرف حسيت بالتعب كلش ....معقولة فرق العمر اله تاثير بتلبية الاحتياجات ...من سالت امي كالت ابدا ماله علاقة هذه حالة نفسية فترة وتروح ...

‎بس حانت تزيد ماتروح ...

‎مجان عندي احد يضايقني ابدا بالعكس

‎ام حيدر جانت كلش حبابة ويايه ودللتني حيل

‎هي اللي جانت تسويلنا الريوك من وكت وتحضره وكت مانكعد حيدر يصعده فوك ...وماجنت انزل جوة الا كلش قليل اصلا مجان يخليني وحدي ..

‎هو جان ماخذ اجازة براتب بس اسبوعين هذا اللي قبلوا بيه بشغله و اخر تلاث ايام كمت انتظرهم تخلص بطلعان الروح ...

‎مع انه جنت والله كلش احبه بس مااعرف ليش ...جنت اريد ابقى وحدي مرات ...

‎جنت احن لوحدتي وسكوني جنت احس بذاك الوكت بوشه بدماغي اريدها بس تطلع مني مااعرف جنت مثل المسطورة ....

‎لذلك كلما جان  يطلع لاي مكان ....

‎راسا الم روحي وابجي

‎ومجنت اعرف شنو السبب و ليش

‎وحتى شكد احاول اراجع نفسي وادور شغلات منا ومناك اصلحها اكول احتمال هي السبب ماكو مجنت الكه اي مبرر لتصرفي هذا

‎ المشكلة المن اسال والمن احجي الكل مخبوص

‎حتى امي يوميه من شغلة لشغلة يوم بيبيتي يوم بت ابن خالتي طلع عدها لوكيميا يوم ابويه ...والقلب مالته ومشاكل سرمد اللي ماتخلص ضيع عليه السنة وماقبل يداوم بغير كليه...

‎ولا مسرة اصلا ماجنت احجيلها كلشي لانها ماتريدلها فرصة حتى تخرط العيوب والسوالف التعابنه على اساس هي مزوجة امير الامراء

‎بس جانت صباح والمسكينة لسانها وگلبها عسل جانت دائما تعذرني تكول هذه تاثير التجربه السابقة باقية بگلبي ولانه انتهت بماساة احتمال بداخلي اكو اثار سيئة منها

‎والله يمكن صحيح  مااعرف ...

‎ورة ماخلصت اجازته ...

‎بدت اجازتي اني ...اني اخذت شهر كامل اللاسبوعين الفوك اجازتي اخذتها بلا راتب واجباري من حيدر لانه بدى يوميه يذبلي حجايه شوفيلج غير شغله ...

‎مايعجبني تشتغلين بالفندق بعد ...اشو استصعبها على روحي

‎زين ياروحي ليش !

‎مااعرف هيجي بكيفي ...ممرتاح وخلص ...

‎المهم اني اول يوم داوم حيدر نزلت سويتله ريوك بعد عيب لهنا كافي هواية اتدللت ...

‎وخطية عمتي هم ويايه سوينا ريوك ...اتريك حيدر بوسني وطلع ...

‎ورشا جان دوامها بثمانية ونص هم جانت تتريك وتطلع نبقى بس اني وعمتي والصغيرة توته ...مجانت متعلمه عليه بالبداية فابد ماتجي يمي ...

‎ورة مااخلص ريوك اغسل المواعين واركض اصعد انام ...

‎حيييل اتذكر بذاك اليوم

‎اول يوم دوام حيدر

‎ مكعدت الا على صوت عمتي بالوحدة ونص جانت دكت الباب ...خطية مخروعة

‎ظل بالها عليه ماتدري صارلي اسبوعين منايمة ...

‎نمت نومة اهل الكهف ...على نفس الحطة ...

‎عاد غسلت وبدلت وبديت اساعدها ...

‎بس البيت اصلا جان كلش نظيف ومرتب

‎حقيقة همه  جانو كلش نظيفين. ..فمجان اكو شغل هوايه اسويه ...

‎رشا اخته جانت مرات تنظف البيت مرتين باليوم

‎ ومرات تبقى تلاث ايام ماتشيل خاشوكة ...وكالعادة محد يحجي وياها اصلا اللي يعاشرها يحسها خيال ماته مايطلع حسها ...وماتتحرك الا بمزاجها تنظف البيت طابقين وماتطلع نفس ...

‎ حتى توتة بت اخوهم المرحوم  مجانت تكعد يمها ولاتعلب وياها ...

‎فاني جنت اريكها واغديها واغسللها

‎وشويه شويه كامت تتعلق بيه وتحبني ...تعرفوني اني جنت كلش احب الجهال وسبحان الله من وين مانلتفت اكو كومة جهال يتامى

‎اما اهم هم شي جان يصير  كل يوم جمعة من ساعة ثمانية الصبح  تكعدنا ...

‎اذا جان حيدر عنده دوام او لا اوف ...تسالنا تريدون تنظفون الغرفة...انزلوا اريد انظفها ...

‎طبعا راسا ننزل نكعد على القنفة عين مفتحة وعين مغمضة ...

‎بس تخلص نرجع ركض نصعد نرجع نكمل نومتنا

‎لاحيدر ولاعمتي يكولولها عيب عوفيهم هههههه

‎بس والله خطية جانت غرفتي تلمع وتسفطها وترتبها على احسن مايكون ..

‎صباح جتيني مرتين خلال هالاسبوعين وجان ريوضي مكيف على توتة يشيلها ويلعب وياها

‎خطية مقصرت ويايه ومحسستني انه ماعندي اهل هنا ووحدي لا بالعكس جانت ويايه ويايه ...

‎بس احنى بدت خلافتنا شويه تبين اني وحيدر

‎كام يتملل مني ويتهمني بالبرود واكو شي ببالي ...وخصوصا اثناء المعاشرة مع انه جنت احاول ماابين واتفاعل واتجاوب وياه  بس معرفت اخفي ...

‎جنت انقهر وانمرد من يكلي وين بالج ...

‎والله مااعرف وين يروح بالي ساعتها ...

‎بس هو هم الله يسلمه جان يلح ويتعبني ...

‎واخر شي من كال

‎اني اتصورتج بفترة الخطوبه تتصرفين ببرود لانه تخجلين تستحين بس بعد اني زوجج وهاي راح يصرلنا شهر وانت على نفس الحطة معقولة سارة؟!

‎متكوليلي  شبيج ؟!

‎احد ماذيج ؟! مسمعج حجايه!

‎ممرتاحة بالبيت

‎اهلي مضوجيج

‎اني مقصر وياج بشي ...

‎مجنت اعرف شجاوب بس ابجي ...ومااجاوب اظل ساكته

‎كلهم زينين ويايه و

‎مجان اكو اي شي مضوجني غير نفسي

‎اني هاي طبيعتي يعني شلون شسوي حتى من امثل افشل بيها

‎وحتى من داومت شلت هم الدوام...اتعلمت على نومة الصبح وعلى الكسل

‎كمت كوة اشلع روحي من الفراش وميت مرة يخابرني حيدر وينج لانه هو يداوم قبلي بساعتين ...

‎وهو جان يروح ويه هيثم واني اروح بسيارتي ...

‎وحتى من نرجع هو جان يرجع وياه

‎ قليل كلش جنا نرجع سوى ...

‎اول مداومت جان عز الحر والصيف حارة وكسل وخمول جنت بس نايمة ...وحتى الشغل البسيط صار شكبره عليه ...طبعا جان ممنوع عليه بعد انزل للصيانه او اروح غير مكان منا ومناك ...

‎خنكني حيدر حيل ...

‎وصرت حتى من ارجع من الدوام راسا على الفراش واغط بالنوم

‎الى ان يرجع هو يله  نتغدى سوى

‎عمتي مجانت تحب احد غيرها يطبخ ...

‎تكول مانحب اكل غيري وحيدر هم جان ميكسرللها كلمة واني هم كلش مكيفة على الوضعية اريدها من الله . 

‎ماكو بشهر سبعة تقريبا بنهاية الشهر ...رجعت من الدوام دايخة ونفسي تلعب ...ومحترة والهدوم لاطشة عليه من العرك والحر لعبانه نفسي لاخر مرحلة واصلة ...

‎صعدت نزعت وكبل للحمام ...ومن طلعت يله ردت روحي

‎  وتوني كعدت على الجرباية داانشف شعري حيدر طب بوسني ودينزع ملابسه ريحته طبت بدماغي ورحت فرغت شكو ببطني مع انه خطية ريحته عادية وهو كلش نظيف وعلى طول يعطر ...

‎بس مااعرف شجاني كلش خجلت حتى هو هم حسيته انحرج ونمت ليلتها بالفراش مااعرف شبيه ...خابرت صباح ضحكت كالت مبروك حامل وبنية هههههه

‎كتلها شدتحجين كالت والله خابري امج وشوفي ...

‎اني هم خابرت امي كلتلي سوي تحليل منزلي واتاكدي احسن وحيدر ظل مصدوم ممصدك شبالعجل؟!

‎معقولة انت تكونين حامل !

‎ ركض للصيدلية جابلي التحليل وماصدكت طلع الصبح اتاكد حملي لانه الاختبار كان لازم يصير اول الصبح ...

‎واتاخر حيدر ظل كاعد بالمطبخ متوتر ممصدك نفسه ...

‎من كتله النتيجة ايجابية شالني وطار بيه يكلي لج مدااصدك صدك راح اصير اب ...لج صدك اشيل جاهل بيدي ؟!!

‎وخطية عمتي كامت تبجي ودموعها تنزل ممصدكة ...كتلها خلص عمه على كصة الجاهل لازم تنزعين الاسود بعد

‎خطية لحد ذاك اليوم جنت اشوفها ختله تلزم صورة ابنها المرحوم  تبوسه وتبجي لو من تنام توتة بحضنها تلعب بشعرها وتبجي على ابنها الله يرحمها بيومها حسيت شنو معنى ضنا وشلون فكدانه يكسر الظهر ويشيب الراس ويحرك الگلب حرك

‎رحت جيكت ويه الطبيبة وسويت تحليل وسونار جنت حامل باربع اسابيع ...الحمد لله يعني كل ٢٥ بالشهر ادخل بشهري بس

‎وحامي جان اسوأ وحام ...اول مابديت ...

‎مااتحمل اللحم والدجاج ولا ريحتهم بس اشوفهم اتخبل ...

‎اختنك ..وحتى معدتي تطلع من راسي من كثر مااتقيأ. الاتعس جنت اتخبل من ريحة حيدر او من يتقرب مني جانت عايزة يعني ...كلما نتعاشر لو اقاطعه اروح اتقيأ لو اصلا ادفعه اكله مااكدر مو بيدي جنت مااتحمل واظل ابجي وهو روحه طفرت مني وبدت بيناتنه العرك والمشاكل . .

‎عمتي تحجي وياه و امي تحجي وحتى صباح يفهموا انه هاي الحاله موبيدي ...وانه رغما عني يصير هيجي ...

‎وهو كام يكلب خلقته عليه وكل يوم يكلي روحي لامج خلي تشوفلج صرفة بس عمتي ماتقبل

‎تكلي لاتعلمي تعوفين البيت وتعوفيه الرجال تعويد ...

‎مااحجيلكم شكد تعبت

‎وشهر على شهر جنت اتعب اكثر وصرت عودتين لقلق بطنه منفوخ .. لانه اصلا رجليه ضعاف ...

‎ويوم اداوم وعشرة لا ...

‎حيدر بذيج الفترة كام يشتغل شغلتين الصبح مثل ماتعرفون بالفندق ولكى شغلة كاشير بمطعم ...

‎من العصر لليل شوكت مايعزل المحل هو يرجع

‎طبعا ماكمت اشوفه النهار غير وكت الغدا ...جنا نتغدى سوى

‎وبالليل من يرجع

‎لانه العصرية جان يجي يغسل وياكل لكمة وببدل ويطلع ...

‎جان هذا الشغل رحمة من الله شويه ارتاحيت ...

‎خطية هو ابد مجان يكجي على المصاريف الي جنت اصرفها بالعرس واني مااهتم اجي وادفع وهو ابد مايكولي لا

‎طلع تلاث ارباعها دين ...

‎وهو جان رافض مبدا ياخذ مني فلس ...فجان راتبي كله اليه ...ولا يسالني عليه ...ولا يكلي شكد تاخذين شكد عندج ...

‎معليه نهائياا

‎بس اني جنت شسوي اساعده بلا مايحس مثل ماعلموني ...

‎مثل كل يوم اهلي بجيبه عشر او خمسه وعشرين زايده من ينام ...

‎او من دايلم فلوسه يمي يكلي شكد صار عندج اذا مية اكله مية وخمسه وعشرين ...

‎وحتى عمتي هم جنت اساعده ...

‎جانت تحبني والله شاهد اني هم كلش حبيتها ...

‎الا ان خابرتني امي بشهر الدعش جنت توني طابه بالرابع يعني صارلي اسبوع وشويه ...

‎جانت حزينة وتبجي ...

‎بيبتي الله يرحمها توفت بالليل ...

‎ثاني يوم الصبح...حيدر اخذني لبغداد ...

‎واوف الطريق كله الوب وظليت انك واتعارك وياه كتله نروح طيارة كلي ماكو داعي نروح نفرات مااحجيلكم كم مرة وكفنا السيارة وطلعت اتقيأ

‎وكااحجيلكم العرك اللي تعاركناه والحلفان والمناكر...

‎علما وصلت لبيتنا ...متت واتشاهدت وتوبت ارجع وياه بالسيارة ...

‎بات يمنا ليله اخذ من هاطر امي ووكف بالفاتحة وثاني يوم رجع ...

‎الله شويه ارتاحيت ...كد ماجنت حزينة على بيبتي كد ماجنت مرتاحة انام واكعد براحتي هالاسبوع ...

‎ومن خلصت الفاتحة ماقبلت يجي عليه رحعت طيارة وحدي ...

‎واول يوم داومت بيه اجاني يركض كلي لكيتلج شغلة تخبل ...

‎جانت بنظمة مدنية عن حقوق المراءة والطفل

‎جانوا عاقدين مؤتمر يمنا وهو حاجي ويه مدير المنظمة وكايله خلي اشوفها ماعندي مانع ....

‎وجان باجر عندي المقابله

‎بروازمن_ورد

29

‎من رحت زيارة لبغداد ...علمود وفاة بيبتي الله يرحمها ...

‎جانت الاوضاع بدت تصير كلش موزينة هناك ...وجانت اسوء بالغربية وبدت تنتشراشاعات عن قتل  ...وتخويف وترهيب ...بس اني جنت بعالم ثاني ...الوحام دمرني دمار

‎و اي بيت اطبله امنع بيه ريحة اللحم او الدجاج ...

‎واثناء مجنت هناك حيدر لاكيلي شغلة جديدة بمنظمة انسانية ...بعين كاوة

‎اول مارجعت لاربيل مو ثاني يوم لا اللي وراه ...اتصلت بالمدير حتى ينطيني موعد مقابله ...

‎وصدك رحتله المكتب جان مو قريب علينا مثل ماكتلكم  بعين كاوه ...مسافة يعني بيناتنه ...

‎ومن رحت وعرف بمؤهلاتي و اسم عائلتي ووخصوصا من عرف امي دكتورة كوثر  راسا وافق لانه كانت مساعدتهم كلش هوايه بحالات انسانية جان يحولوها الها ...وكلي الاسبوع الجاي اداومين ...واول ماوقعت العقد ...قدمت استقالتي بالفندق وخطية محد عارض بالعكس بسرعة مشوها اليه همه عرفوا بحالتي ومقدريها و..اني هم شفتها كلش زحمة بعد ابقى هناك  ...

‎انوب بطني اللي دتكبر يوم ورة يوم وكام الشغل كلش  يصعب عليه وينكطع نفسي لما اسوي اي شغلة  بسيطة

‎ مع انه اربع شهور لغير نسوان شويه تنط البطن ...الا اني راسا صارت نص مترة ليكدام...

‎وماصدكت هالكم يوم بقيتهم بالبيت ...من حبلت لحد الان اني بس انام ...

‎ماكو بس  اكعد على اي  كرسي ورة شي ربع ساعة اشوخر .

‎شغل ...مكتب ...بيت ..وين مااروح

‎خو من اكعد  اباوع تلفزيون دقايق واني رايحة بسابع نوومة ...

‎بوكتها امي من اخذتلي سونار مابين جنس الطفل ...

‎كالت طابك رجليه هههه

‎بس اني حتى على  هاي مجنت كلش متحمسة ردت اجيب اي شي  جان ولد بنية مو مهم  بس اولد واخلص ...

‎وراها كم يوم الله سهلي وبديت اداوم بالمنظمة ...

‎جنت اول شي اروح واجي بسيارتي بس هاي تعبانه وخفت توكف بيه  بنص الطريق واحير بروحي ..

‎فجان عندي كم فلس ابويه انطانياها هدية مال زواحي بوكتها حيدر ماقبل ياخذ درهم منها كلي مالاتج معليه بيهم ...

‎فانطيتهم اله يبدلياها بوحدة شويه احدث وامتن ...

‎وبقت ورقتين شكد كتله اخذهم ماقبل شلت انطيت صباح ورقة وعمتي ورقة ...

‎بذيج الفترة سراب اطلكت وكعدت بعد يم اهلي ...

‎ابويه ماقبل تروح منا ومناك وقنع امي تبقى يمهم اني من يمي شلت هم ...بس هاي مجانت راحة ابد من صار الطلاك صدك رسمي هالمرة واتحولت الى مطلقة ...

‎طلعت لسانها ...كامت يومية تتعارك ويه عمتي تريد فلوسها وفلوس اخوانها وايجار البيت وابويه ادخل وصارت مشاكل للضالين ...وكل يومين كابه عركة ...بس هي الصدك حان حقها ومو من حق عمتي تاخذ فلس منها ...فلوس يتامى واخوانها على الاقل خطية صغار وضاعت حقوقهم

‎ومنا ومناك ...محد قبل على كعدتها ببيت اهلي ..مهمها كان احنى نعرفها وكحة وسرمد ولد وشاب وخفنا عليهم

‎فاقترحت خالتي نهال تروح تكعد يمهم هي واخوانها ...بس معليها بمصاريفهم ...

‎وكلنا فرحنا وكيفنا هي هم خطية بقت وحدها ورة وفاة بيبتي الله يرحمها وهم موزين تكعد بحالها ببيت جبير وهي اصلا سوتها مو حبا بسراب بس لخاطر ابويه لانه كلش يعزوه ويريدون خاطره انوبه

‎كمت من اخابر امي مااسمع غير مشاكل سراب ومشاكل سرمد ...

‎ومسرة جان رجلها بالعراق بعد مديكدر يدبرها يرجع لالمانيا وهي وحدها هناك حتى ماجله الدراسه لانه ماسيطرت على وضعها فصار هو يشتغل ويدزلها ...

‎تدفع ايجار ونفقات ومصاريف عيشتهم ...

‎اول اسبوع بالمنظمة جنت بس اتعلم على الشغل

‎جان بسيط وسهل داتا بيس يعني شكو فايلات اطبعهم وادخلهم ببرنامج مرتبيه بحيث من افتحه عن طريق الاسم او اي معلومه اخرى تطلع كل المعلومات البقية وهم جنت ادخلهم اول شي بالاكسل

‎الفايلات كانت لعوائل او النساء اللي يتم مساعدتهم من قبل المنظمة ...مثل ماكتلكم هي جانت خاصة بالمراءة ...

‎ويامكثر النساء المظلومات بالعراق ...

‎جانت مديرتي اسمها نور ...بس اول يوم من داومت  شفتها ..وورة اسبوع يله جتي مرة لخ

‎اصغر مني بسنة ....

‎سمرة وناعمة ..وسريعة بالحركة بس تركض  وتحجي انكليزي بلبل ...مرتين او تلاثة اجوي تلاث نسوان اجنبيات زارونا وجانو يجون بس من هي تكون موجودة وطبعا يجون يتعلمون منها ويساعدوها .......

‎طبعا ماتكعد دقيقة ولا نحس بيها مديرة مثل المصرع تفتر وتركض على هذا وذاك ويوميه بمكان ...من البصرة لزاخو مثل مايكولون وحافظة الاشخاص وتعرفهم من يسالوها تنطيهم كل المعلومات...

‎بالبداية جنت اراقبها اكثر مما اشتغل وهي اللي جانت تعلمني تكمبص بالكاع وتكعد بصفي وتعلمني طبعا اذا ماكو كرسي ...

‎مع انه هي منصبها اكبر وحده بالمنظمة بس ابد ماتحسينا بهذا الشي الكل يحترمها وينحني لصدقها بالعمل ولاول مرة ...انتبه انه هناك فعلا ناس تشتغل مو علمود الراتب لا انسانيه ...لانه جانت فعلا انسانه بمعنى الكلمة...

‎ابوها واخوها وعمامها كلهم شهداء من الثمانينات ولحد الان وزوجها هم يشتغل بالصليب الاحمر ...

‎وبديت اشوف دنيا غير الدنيا اللي اني جنت عايشه بيها وعالم ثاني يختلىف عن عالمي ...

‎عمري مفكرت بغيري شلون عايشين جانت سارة واهلها محور حياتي ...

‎من كمت اسمع القصص اشعر بصدمة جبيرة واسال نفسي

‎اني وين جنت منهم ...؟!

‎مفكرت في يوم انه اكو نساء غيري ممكن عايشات حياة اسوء مني لا واضعاف اضعاف ماساتي   ...

‎حتى من جنت انطي صدقة ماافكر هذه حتساعد الشخص الضعيف ام  لا كل  تفكيري هذه تبعد عني شر......عني فقط

‎بوكتها اتغير مفهومي للحياة ونظرتي للامور ...شفت نفسي شكد جنت متبطرة ...ايام اللي جنت اتملل من الحر وكشنات السيارة الجلد تحركتي ...كانت اكو نساء تكطع مسافات بالكيلوات حتى تامن غذاء وماء لعائلتها اكو نساء جانت يومية تحرك نفسها بالتنور صيف وشتا تخبز للعالم حتى تعيش عائلتها زوجها او ابنها راحوا منها ...اكو نساء ماكو باب مدكته حتى تشتري  تلكى علاج لمرض طفلها العضال ...

‎وجانت من تجي ست نور تحجي عن اخر الحالات اللي عايشتهم ...اظل ايام وليلي افكر بيهم وكلبي يعصرني عليهم واختقر نفسي اكثر على التبذير والامبالاة اللي جنت عايشتهن ...ومن القصص الاخير اللي حجتهم كالت

‎ اكو وحدة بالديوانيه خطية عدها تسع اطفال خمسة من زوجها الاول واربعة من الثاني اللي جان يشتغل على خط بغداد و اتوفى بحادث سيارة ...انوب كامت تخبز للناس من الفجرية للمغرب يادوبك تلحك عليهم عدا من الناس تساعد منا ومناك ...وخطية فوك قهرها جايه وحدة من كرايبها بايكة هالجم فلس اللي عدها لامتهم لعلاج ابنها الصغير بيه تحسس بصدره ...شلون نفسيات !

‎طبعا هي جانت كاعدة على حافة الميز وتحجيلنا مرات عن اللي تشوفه وتعايشه

‎غرفتنا جانت مفتوحة على غرفة لخ وعلى الممر وجان بيها تلاث ميوزة ..

‎اني وميز فارغ واكو ميز ثاني لبنية ارمنيه جانت تشتغل غير برنامج وكلش قليل تحجي ...هم جانت لابسة اسود بس مجنت اعرف شبيها ...هي جانت كلش هادئة ...ومعليها باحد ...عادة اللي يشتغل هنا كلمن بحاله ماعدنه وكت حتى نسال عن فلان وعلان ...

‎نسم ع هالحجايتين من ست نور من تجينا فهي من جانت تحجي عن هيجي نسوان اني صفنت وكتلها واني جنت اتخيل ماعندي حظ

‎واني اللي جنت متصورة الدنيا عكس ويايه فهي ضحكت كالت انت ماعندج حظ !!

‎لا عزيزتي اللي ماعدهن حظ اني شفتهن وعشت وياهن

‎الي ماعدها حظ مرة جايبة اربع بنات ورجلها يوميه يكتلها يريد منها ولد وهو كوة معيشهم انوب من تجيبله ولد يجيها مريض بمتلازمة داون ...

‎يكوم يطردها بالشارع وحتى اهلها مايلفوها ...تظل تدك باب باب تريد احد يستر عليها

‎الي ماعدها حظ ..ارملة وبركبتها كومة جهال وكاعدة تجاوز يجون يكتلون ابنها الجبير اللي يعيلها ويطردوها ويهدون بيتها على راسها

‎الماعدها حظ فوك هم الدنيا وهم العيشة رجلها يتعوق بانفجار تكوم تشتغل وتعييشه وتعيش جهاله انوب يطردوها من الشغل لانه عقد مؤقت وماكو تعيين ...

‎اللي ماعدها حظ تربي يتامى اثنين ببيت من الجينكو لايسد برد ولافوكها يحرك حرك بالصيف واول مايكبرون ينذبحون  وتفقد عقلها

‎اني من يمي كمت ابجي ودموعي تهل ...

‎كالت سارة ماكو احد بهالدنيا مرتاح ...

‎كلنا نعيش ايام حلوة وسودة بس اكو ناس بس الله الهم مشافوا بحياتهم شي ...

‎سكتت ومحجيت وحسيت بالتبطر اللي نعيشه ونظل نلوم بالدنيا  على كل صغيرة وكبيرة شكد ضعاف احنى امام نساء جبارات ...شالن هم بكبر هم الجبال وتلكاهم مايشتكون ومايحجون ...

‎ومن رجعت للبيت ...بذاك اليوم راسي جان مفتر ودايخة مااعرف شلون سقت الطريق لما وصلت ...وانتوا تعرفون الحامل تصير سريعة التاثر والحجاية البسيطة تقهرها ...صح جنت مقهورة بس حسيت جانت اكو غشاوة على عيني وراحت ...

‎بوست عمتي وكعدت وياهم هي ورشا وتوتة اللي راحت جابت شكو ملاعيب عدها حبتهم بحظني

‎صفنت عليها شلون يجي من گلب امها تعوفها بهالعمر حتى تتزوج؟!

‎جانت كل تلاث شهور او اقل يله تزورهاومرات تجي تشوفها ساعة ساعتين ومرات نهار كامل وتروح هي جانت متزوجة وكاعده بغير محافظة...

‎فتكول الطريق صعب عليه ورجلي نحس ...بعد كلمن وظروفه والله اعلم بحالها

‎ظليت العبها شويه ...وراها اخذتها وطلعت اشتريلها من راس الشارع وجبت مسواك ويايه وبطريق رجعتي اجى حيدر...

‎اتغدينا ورجع طلع مرة لخ ...

‎كام يبين عليه التعب ...وحسيته مو مثل قبل مهموم وماله خلك كلشي ...

‎حتى من يرجع لايسولف ولايضحك بوجهه يغسل وينام ...

‎وبنهاية شهر كانون الاول قبل نهاية السنة باسبوع يمكن ...خابرتني خالتي نهال ...

‎جنا نتخابر بين فترة وفترة اني جنت بيومها بالشغل سلمت عليه وسالتها عن سراب كالت شايلتلها البيت ومرتاحين سوى بس هواية تتعارك ويه عمتي ...بعدين حسيت صوتها حزين ...

‎كتلها خيرج خالة شبيج ؟!

‎كالت ماتروحين لبغداد تشوفين اهلج ...كتلها اي والله ان شاء الله على عطلة السنة الجديدة   اخذ اسبوع اروح يمهم ...

‎بس شعجب تسالين كالت اي روحي هالايام امج محتاجتج ...

‎كتلها شكو خاله شبيج ...كالت خالة ماكو شي ابوج شويه تعبان ...لايظل بالج بس روحي شوفيه...

‎اني راسا عرفت صاير الشي ...سديت التلفون من خالتي وادك على امي ماكو ماترد وسرمد مايرد ... خابرت مسرة

‎صوتها مخنوك وتبجي

‎شبيج يمعودة ...

‎وكوة وبالملحة كالتلي ابويه صايرة بيه ذبحة من اول البارحة واليوم فد نوب منتهي ...وامي مقابله احد يكلي ...علمود حملي

‎اخذت اجازة بدموع عيوني ورجعت ركض للبيت كتله لحيدر هسه تاخذني جانت ساعة وحدة ...وهددته اذا مايوديني اروح وحدي والله واجاني معصب واتعاركنا مايقبل اروح الا باجر ...ماقبلت ...ودكيت رجل الا هسه

‎وصدك بتلاثة ونص الظهر طلعنا من البيت

‎وبثمانية بالليل وصلنا بس الطريق كله ماحجى ويايه كلمة ...

‎جان زعلان مني لانه لحيت وكمت اضرب نفسي وهو خاف يصير بالجاهل شي ...

‎والله ومن وصلت للبيت عمتي جانت هناك كالتلي ابوج  بالمستشفى بالعناية المركزة وامج يمه  من كالولي هيجي وكعت من طولي ...

‎ومحسيت الا ورة شويه فتحت عيني ...جنت نايمة على القنفة واسمع صوت صياح وعياط حيدر جان يفاكك عمتي وسرمد ديتعاركون وهي تركض وراه الا تكتله وحيدر يهديها ...

‎وهي تصيح راح يموتنا راح يروح الرجال من وراه ...

‎طبعا ظلت العركة والمشاكل انوب سرمد يغلط على الكل واجى ذو الفقار ومن سمعه يغلط على عمتي امه يعني  تلازموا وصارت عركة ذيج العركة ...

‎واني بس اباوع مابيه حتى احجي واصيح ...بس دموعي تجري وذو الفقار وحيدر اخر شي  لزموا سرمد كتلوه كتله خلوه يتخبل بالزايد وكاام يطرد بيهم ويشمر عليهم غراض البيت انوب حيدر كام يدفع سرمد يكله لك احترم نفسك بابا شنو هالحجي ...

‎ومن حسيت حيدر صعدت عنده كوة كمت دااريد افاككهم واريد اسكت سرمد اشو هذا فلت لسانه فد نوب ...

‎واني كبيت بيناتهم وسرمد دفعني حيل ... يكلي اخذي رجلج وطلعي منا ...

‎امشي طلعوا من البيت عاد من دفعني على حيدر...وردت اوكع واني اصيح اكله بابا شبيك اتخبلت شجرالج ...

‎دفعني دفعة حسيت كسرلي صدري وحيل وكعت على حيدر كوم الاخير شيل ايدك واضرب سرمد بوسك وكعه بالكاع وكملها ذو الفقار ضربه جلاق خلاه يكمز وصار العرك من حجي وملاسن الى بوكسات ...والله ستر

‎ومن اجى رجل عمتي يله هدئت الامور ... صعد سرمد فوك....واني كاعدة ادك والطم ...وجرني حيدر من شعري وكام يغلط عليه شلون اطبين بيناتنه بله لو ضاربج على بطنج اني شجان سويت !

‎ اهلج شيفيدوني والله جان حركت البيت عليهم ...

‎وهمزين جتي خالتي نهال طلعت حيدر وذو الفقار برة البيت ..كلتلهم روحوا لاتباتون هنا ها لليله هنا وصدك حيدر راح بات ليلته ببيت عمتي ومن الغبشة طلع لاربيل ولا ادري بيه واسبوع كامل ويمكن اكثر انيي ببيت اهلي مايشيل عليه تلفون ولا يسال عني عن وضعي ..

‎المهم ماكو ورة نص ساعة شويه هدات الامور اخذت رجل عمتي ورحنا للمستشفى ...

‎واركض اني وبطني بالردهات ...مااحجيلكم المستشفى جانت ثلج واني جنت لابسه ثوب مال حمل ولبست قمصلة  فوكاه انوبه  من كدام الثوب  واصل نص رجليه طالعة وطالعة بلا جواريب

‎شفتي ازركت من البرد ونفتر مو هذه الغرفة بذيج الا ان وصلت يم امي ...بعد جان نفسي مكطوع ومن شفتها خطية عيونها وارمات من البجي ومختفيات جوة النظارة وجانت ذابه شال على راسها وبيدها قران صغير

‎من شفت القران وكعت على ايظها كتلها ابويه راح يروح مو ...يمه احجيلي شبيه ...

‎طمنتي كالت استقرت حالته وكوة يله هديت وعرفت انه هي جانت خفارة ...وابويه عارف انه سرمد مفصول من الكلية بسبب الغيابات مع انه خطية دخله كليه اهليه وحسابها ذاك الحساب ...ومشتريله سيارة اخر موديل حتى يرضيه...مع ذلك مكضيها سخته الافندي ...وفاصليه ...

‎ومن عارف متعاركين يكله مااريد ابقى هنا ...رجعني لبيروت ...

‎ومنه حجايه ومن ابويه حجاية لازمه وضاربه كم راشدي ومعصب عليه وصايرة بيه ذبحة ...

‎وكوة امي متلاحكتله ...

‎وهسه صارله كم ساعة يله مستقرة حالته ...

‎ياربي دخيلك ...

‎وظليت ادعي واتوسل ياربي واني الوب والتقلصات موتتني ...ونذرت يكون بس ابويه يكوم بسلامة ...اتحجب وللموت ماانزعه ...

‎وبقيت تقريبا للدعش امي كالتي بعد رجعي عيب رجل عمتج هم رجال جبير يريد يرتاح ينام ...

‎اني هم اخذته ورجعت للبيت بس والله ليلتها للصبح منايمة ... مابقيت دعاء مدعيته مابقيت نذر مانذرته ...

‎عاد وجه الفجر غفيتلي كم ساعة وكعدت على صوت عمتي وزوجها ديسوون ريوك...

‎باوعت على التلفون شفت حيدر دازلي مسج بالسبعة الصبح طالع لاربيل لاسلام ولاكلام ولا حتى كلمة حلوة ...عرفت بيه زعلان بس اني هم زعلانه ...كيف انه البارحة جرني من ايدني وشعري طلعني من العركة ...

‎نزلت وصبحت عليهم شفت سيارة سرمد ماكو بالكراج ومن سالت عليه عمتي كال طلع من الصبح ...وبعدين عرفنا ويه امي بالمستشفى ...

‎على ساعة وحدة ونص راجع ومرجع امي وياه...

‎خالتي نهال دازتها وهي باقية يم ابويه ...

‎حتى شويه تغسل وترتاح وتناملها فد ساعة ساعتين ...

‎جتي جانت معصبة علينا ....

‎كالت وكتها رجلج يتعارك ويه سرمد ...ولا ابنج سعاد مملخ الولد جلاليق مو عيب ؟!!!

‎كالتله كوثر ياعيب هو ابنج يعرف العيب ...كام يغلط علينا ويطردنا من البيت اول تالي ....تقبليها انت ؟!!

‎واني هم كملت على كلام عمتي كتلها كام يدفرني على بطني ويطرد بيه

‎حيدر هم اتخبل لكمه بوجها حتى يوخرة ليغاد وعاادي ذو الفقار من شاف ابنج  يغلط على امه وعليه ضربه جلاقين ...

‎المهم امي معلقت على كلامنا صعدت لغرفتها حتى مطمنتنا على ابويه وذاك الافندي اصلا مطب للبيت يكول مدام همه هنا اني ماارجع لبيتنا ..عمتي زعلت اخذت رجلها ورجعوا لبيتهم ...

‎خابرت  خالتي نهال دااسلها على ابويه كالت الحمد لله حالته مستقرة من البارحة واليوم .....

‎وساعتها يله اطمنت وارتاحيت ...

‎ورجعت على عمتي ام حيدر داشوفه وصل كالت قبل شويه اجى بدل وطلع ... حتى مماكل شي  وسالتني على ابويه وطمنتها ...وخطية هواية سلمت على امي ...

‎وكتلها بس يتحسن ابويه ارجع

‎والف الحمد لله مديري الجبير كلي ابقي ببغداد لحد خمسة بشهر الواحد اشوف اذا اكدر ارجع او لا براحتي

‎وك كلش ريح گلبي كلامه ...من كلي هشكل ...

‎والله جبر بخاطرنا والحمد لله ماكو اقل من اسبوع طلع ابويه ونور بيته ...

‎ويومها يله ردت روحي ظليت نايمة بغرفته ليل نهار مايجي من گلبي اعوفه ...

‎وشوفوا هو اول ماصحى

‎صاح اسم امي كوثر وينها ...يكوم ويكعد كوثر على لسانها ...

‎صفنت وكلت شوف امي شكد اتحملته ...وشكد عرف غيرها

‎هياته اول ماصحى ماراد احد بس رادها حتى جهاله مسال عليهم...

‎وطبعا طول هالايام سرمد مجان يحجي ويايه يطب ويطلع ميباوع عليه

‎ومن سالت عمتي كتلها ماادري شبيه كاتل روحه يريد يرجع لبيروت !

‎كالتلي عيني عنده وحدة هناك ويكول لامج لو تجيبيها اتز وجها لو تعوفوني اروحلها

‎كتلها عزة وهاي منو

‎كالت شمدريني اكيد وحدة ظايحة مااعرف شبيهم هالشباب الله مطيح حظهم

‎ولا انوبه حيدر ابد مدز مسج ولا سال عليه واني هم عندت مخابرت ولاسالت عليه بس حنت اخابر عمتي امه يعني اطمن عليهم ...

‎ورة شي يومين او تلاثه امي ذبحت خروفين وسوت عزيمة طول بعرض وصالحت عمتي واجوي كل كرايبنه وطبعا اني جنت داهلة بالسابع والتقلصات موتتني ولحد هاللحظة اعاني من الوحام ...

‎وشكد حابت وحطت امي مكدرت امد ايدي على كلشي ومطب كلشي بحلكي بس صفنت ...على واحد من خطارنا طلع صديق ابويه ...والله اتفاجات ... طلع طول هاي الفترة هو يعرف ابويه ...

....

‎بروازمن_ورد

30

‎الحمد لله اللي رجعلنا ابويه بسلامة جانت فرحتنا ماتوصف كد ماجنا خايفين يروح من ايدنا ...

‎فعلى شرف سلامته امي سوت عزيمة كلش جبيرة عزمت بيها كل الكرايب والاصدقاء وحتى البعيدين منهم

‎واكوا من سمعوا الخبر عزموا نفسهم واجوي لانه عدهم فكرة عن شكل العزايم اللي تسويها امي  الله يحفظها ...

‎وكل الناس جانت مخبوصة باشكال وانواع الاكل والحلويات الا اني مكدرت اطيق ريحة اللحم فكعدت على الدرج مادة رجليه هم بعيد عن الهوسة وهم عن منظر وريحة الاكل وحامي جان كلش مزعج ولحد قبل مااولد اني اعاني منه ...

‎وجنت بين شويه وشويه اكوم امشي احرك رجليه ونفنوفي يهف ليورة ورايه ...

‎جنت لابسه فستان حمل لونه سمائي على تركواز وبيه شويه جوزي فاتح منا ومناك ...

‎وقررت قبل ماانزل لاربيل اروح اجيبلي بعد كم بنطلون مال حمل لانه اللي عندي جانوا مو مريحات ..

‎واني اتمشى يم الدرج حسيت اكو احد يراقبني او عينه عليه ...اني هم انداريت شفت منو ضياء الدين ...

‎تتذكروه المدير التحفة اللي اشتغلت وياه اول من كعدت باربيل وهو اللي صعدني سابع سما من جان رايدني ونزلني ال سابع كاع من محصل مني شي ...واللي بسببه انطردت وحتى اتشوهت سمعتي

‎وجان بكل صلافة يباوع عليه من جوه عينه وفوكاها يببتسم اقترب عليه و شايل ماعونه واجى سلم  عليه....

‎يالله من شفته شلون فور دمي اتذكرت كل حقارته ونذالته ...اتذكرت كل تصرفاته الواطية ويايه وشلون خدعني بكلامه واسلوبه وحسيت عود وكتها هو خوش انسان ...

‎بس للاسف هو اكثر واحد اذاني وشوه سمعتي ....

‎فاجى كلي ها سارة شلونج شخبارج شكد متغيرة ...وحامل ههههه

‎كتله اي الحمد لله ليش ماصير حامل ....

‎فضحك ماعرف شيحجي...كل شويه يكول ها شلونج اكله الحمد لله ...

‎والله مشتاقين

‎فجاوبته كتله لا والله ابد ...

‎بس اني جرني الفضول وسالته انت منين تعرف ابويه ؟! وشلون عرفت انه مريض واكو عزومة منو عزمك وشلون . ..اندليت بيتنا ؟!!

‎فضحك كلي اعرف ابوج من زمان قبل اكثر من ...بله يمكن خمس ست سنين

‎فسالته وكتله وانت تعرف اني جنت بنته ؟!

‎كلي اي طبعا حنت اعرف اصلا اول ماشفتج عرفت انت بت نعيم وكوثر ...

‎لعد شلون راسا عينتج ...

‎وتردين الصدك من وكتها جنتي عاجبتني ....

‎طبعا ماكدرت ارده وارزله. ...

‎عيب مهما كان ضيف امي ...

‎بس حسيت دمي فااار فد نوب

‎كتله من رخصتك اصعد لغرفتي

‎هو يضحك فرحان اي اخذي راحتح  ...يالله اتمنيت اضربه راشدي واكسر سنونة كله حتى ريحة الضحكة مايعرف شلونها ...

‎نغصلي يومي الله ينغصله عمره ...

‎هيجي. اشخاص يلعبون على اعراض العالم ...ميخافون من الله ويتخيلون بس نسواهم وبناتهم شريفات اما البقية فمباحات شيريد يسوي مو حرام ومسموح من عمه بعينك

‎وثاني يوم العزومة اخذتني امي للعيادة دتسويلي سونار وجيكي الحمل وتشوف وضعي وهمين   دتخلص كم شغلة عدها  ...

‎الحمد لله طلع وضع الطفل وصحته زينة وبشرتني انه بيه بنية كلش فرحت وشفتها دمعت عينها وبوستني خطية اتذكرت سدير شلون هم هيجي هي اول من سمعت نبضه وراقبته من جان جنين لما كبر وهسه هيجي صار بعيد عليها ...

‎حتى بعد مايذكرها زين ...يعرف هي بيبته بس بعد مايهف گلبه عليها ....مثل قبل ولاحتى يسال عنها

‎كتلها ليش تبجين حبيبتي ...

‎تدرين ماما شنو عاجبني

‎عاجبني اسميها ثريا على اسم بيبي الله يرحمها ...

‎خطية انتو تعرفون هي جانت توها متوفة مصارلها كم شهر ..

‎امي هم فرحت وحضنتني وهم انقهرت اتذكرت امها...

‎ال مشافت من حياتها شي ...حسب مايحجولي عاشت وماتت بالقهر

‎هي كيفت على الفكرة وكالت اذا صدك تسميها الا انطيج اغلى هدية عندي ...

‎وراها ثاني يوم طلعت من الصبح ويه خالتي نهال رحنا للكاظمية اشتري حجابات وبناطيل ...ومناك هم فد نوب ازور الي ولحيدر لانه كلما ينزل لبغداد يجي يزور وهالمرة مسواها من ورايه ...

‎وخطية خالتي

‎جانت كلش فرحانه انه حتحجب وظلت الطريق كله توصيني انه ماانزعه مايصير البس وانزع ...

‎وظلت تحجيلي عن الحلال والحرام واني اهز راسي واتعجب كانه مااعرف شي خطية مردت احرجها

‎وبوكتها جان شعري حلو صاير طويل وثخين بس هم مانقهرت عليه كلت لازم اوفي نذري ...

‎وجبت ويايه حلاوة دهينة وشعرية البيضة همين لانه عمتي ام حيدر خطية كلش تحبها وكلما انزل لبغداد توصيني عليها...

‎ومن رجعت حضرت نفسي واموري لباجر اطلع لاربيل بعد ...طولت هنا وخلصت اجازتي وفوكاها تلاث ايام هم ...

‎ورجعت نفرات ...ذو الفقار وصلني لكراج العلاوي ومناك ركبت لاربيل

‎تبين حيدر وذوالفقار صارين اصدقاء وهو مواعده  يلكيله شغل باربيل حتى يجي يمنا ...

‎فظل الطريق كلع يسالني عن اربيل واحوالا والعيشة بيها ...بس ابد ونهايا مجاب طاري ولاسيرة سراب

‎وال ما صعدت حطيت راسي على الجامة وجان اروح بسابع نومة ...

‎ماحسيت بعد طسة، سيطرة، انفجار

‎ولايمي حتى ماعرفت منو جان كاعد يمي لحد ماوصلت ...شلون نومة ثكيلة جانت بله لو بايكيني هم مجان حسيت ولا عرفت.

‎الا من وصلنا داقوق نزلنا بالاستراحة بعد مابيها مجال كعدت لازم اروح للحمام ...

‎ولو ما الحمام جان كملتها النومة لاربيل ههههه

‎ومع انه ماشربت شي حتى اجنب هاي الحالة بس هم ركضت ركض من وراها

‎ووصلت تقريبا ساعة ثنتين لاربيل  ...اخذت تكسي من الكراج  للبيت ...جان ماكو احد ..عمتي طالعة يمكن هي وتوتة للسوك ...ورشا بالدوام

‎فغسلت وبدلت ولفيت روحي جوة البطانية ولبست زوجين جواريب بعد رجليه  اكلهن  البرد اكل ....

‎وماصحيت الا

‎من سمعت صوت حيدر جوة ديحجي ويه عمتي ...عطرت نفسي ونزلت على كيف بلا مايسمع حسي

‎جان واكف بباب المطبخ وظهرة عليه ...جنت كلش مشتاقتله عبالك صارلي سنة مشايفته مو كم يوم ...

‎حضنته حيل من ورة ...

‎كتله حبيبي شلون اجى من گلبك ماتسال عليه وعلى بتك !!!ها شلون كلي

‎هو راسا اندار عليه وحضني  ...طبعا نساني بس سال بته كال كولي والله بنيه ...صدك تحجين

‎كتله اي والله الحمد لله ...

‎بيه بنوته

‎امي شافتها بنية هههه وخطية وكامت تبجي ...ولخاطرها كتلها حسميها ثريا على اسم بيبيتي الله يرحمها شتكول ...

‎كال ولو اسم ثرية قديم بس هم حلو كتلها لا ثريا بالالف ليفوك  احلى وانزك

‎كال لا والله تغيير ههههه بوكتها

‎ماحسيت عمتي كلش فرحت لانه بيه بنية كيف انه احفادهم كلهم بنات ...جهال هدى تلاثه وبت محمد الله يرحمه توته فجان خطية عاجبها ولد ...

‎بس الحمد لله والشكر البنية نعمة ...

‎كون بس اجيب واخلص كمت مااحسب بالاشهر والاسابيع لا احسب بالايام

‎كلما اخلص اسبوع بطني تثكل اكثر ...

‎ومن فرحة حيدر سوى عزيمة كلش جبيرة يوم الجمعة. ..

‎عزم بيها بيت اخته هدى والعصابة التلاثة ...

‎من نزلت خليت شال على راسي ...فحيدر مايدري اني اتحجبت مكتله كلت اخليها مفاجاءة ...

‎لانه من يومين لبستها وهو يطلع قبلي ويجي ورايه ...

‎فكلي ترة  مو ذاك البرد جوة تلفين شال على راسج لو لانه شعرج مخربط !

‎كتله لا اشو احسها باردة وابتسمتله  وياها

‎كلي ايباه خوفة البرد تخليج تلبسين شال وتغطين شعرج بس خوفة الله لا ...

‎اني ضحكت ...كتله يمه يمه وين اكدر اعليك اني ...حضنته حيل وكمت ادلع عليه كتله لا خلص اتحجبت ...

‎وهي حجايته على طول من يتفاجاءة

‎كلي كولي والله ...هههه

‎كتله والله شبيك ...

‎كلي هاي احسن خبر فرحتيني بيه ...

‎فاني اني هم حاوبته كتله زين يعني انت اذا كلش عاجبك اتحجب ليش ماطلبت مني ...

‎فهو دنك وديبدل حتى يروح يجيب خبز حاار

‎كلي سارة اني عفتج براحتج انت تختاريه حتى لاتحسين انجبرت عليه وتضوجين منه وماتتحمليه ...

‎ردتج انت تقررين والحمد لله الله هداج ...

‎اني بالنسبة اليه اريدلج كل الخير وطبيعي كل رجال يغار على مرته يحب يشوفها مستورة

‎ضحكت بوسته ونزل...

‎وبيومها جانت الكعدة كلش حلو وتخبل بس تعرفون اني انعزلت على صفحة مااكدر ولا اتحمل منظر الاكل وريحته بس جبت ماعون بقلاوة وخليته بحضني هذا جان عاجبني مااعرف ليش

‎ومن كاعدين دياكلون ويسولفون   انتبهت على هدى اخت حيدرالجبيرة

‎ بطنها شويه كبرانه وثكيلة بحركتها

‎بس هي من النوع اللي تلبس كله جبب ومن هاي الجبه اللي كلها كسرات وعريضة ...فيبين كلش واضح

‎طبعا هي جانت دتوكل بتها الصغير ...

‎بناتها الله يسلمهم كلش وكحات وحتى يتصرفون مو باعمارهم يعني بتها الجبيرة جانت صف ثالث متوسط يمكن وعاادي تركض ورة اختها الصغيرة اللي جانت بصف سادس ابتدائي

‎ مايكولون عيب وخطار ومحد يحجي وياهم

‎واللي يشوف سردار وعصبيته وحزمه مايكول هيجي بناته ...

‎على ابو شنو والله خليهن  فطيرات وبريئات ...لاحد يطلع عينهن

‎هي صدك فطارة بهبل

‎ترة عادي احنى هم  بزمنا كلنا جنا بريئات اني جنت لصف ثالث متوسط اطلع اسوق بالبايسكل ...بس جنت عودة وضعيفة كصبة مال عصير ...وجني ولد ....

‎ومع ذلك من نروح لبيت احد مانتحرك من مكانا حتى كلمة مانحجي ...لا اني ولا مسرة

‎كلها جانت تحجي بينا  بنات نعيم وبنات كوثر كد مامؤدبات  ...لانه سرمد جان صغير وفرق العمر بيناته هوايه فبس احنى جنا كدام العين ...يعني هيجي اتذكر وجنت حتى مااكل الا بالخاشوكة ومستحيل اوكع بحضني ...

‎هنا كل وحدة شسمنها ...هاي شياكلون والله وحدتهن وزنها ثمانين يمكن لا وفوكاها تكمز هههههه

‎الله يستر عليهن ...بس يدوخون ...

‎لزمت امهن  كتلها هدى ...اشو كوة تتحركين خيرج ...

‎ضحكت وكعدت تغمزلي على اساس استحت يعني ...

‎وجتي يمي جانت تكول ليش مبين عليه !

‎عزة سردار مايقبل احد يعرف ...

‎كتلها ليش هو شنو انت حامل ؟!

‎هزت راسها اي حخلص الرابع ...

‎كتلها بالرابع وماتحجين ...عود ليش !

‎جانت تكول مو انت ماتعرفين رجلي نحس ويخاف من العين ...

‎ضخكت ويه روحي وبعدين كتلها عين منو الله يخليج ...ماشاء الله اشو كرايبكم جهالهم اكثر منهم ...كل العزايم بس زعاطيط ...

‎ضحكت كالت كولي ماشا الله شبيج

‎كتله ماشا الله عيني قابل احسد الحمد لله بطني واصله لخشمي بعد شويه وتطك

..

‎كالت اي اي تكومين بالسلامة امي تكول بيج بنية ...

‎كتلها اي الحمد لله حسميها ثريا ...

‎كالت ياا ثريا قديم وبصراحة لاتزعلين موحلو

‎كتلها والله اني وحيدر مقتنعين بيه ...

‎وكل جاهل يجي للدنيا اسمه وياه الله اعلم شيتغير وشيصير وانت ماسويتي سونار معرفت شبيج

‎فكالت لاعيني سردار مايقبل يكول خليها على الله شي يجي الحمد لله ...

‎بس اني متاكدة ولد وحامي هالمرة غير شكل احس نفسي خفيفة ومو نحسة مثل البطون ال اولانية  ...

‎ولو الله يساعدج انت بهالعمر واتحبلين انوب بجر اني كوة اتنفس واتحرك ...

‎كتلها شنو قصدج ياعمر ...ليش قابل بالاربعين اني !

‎اصلا نسوان يجون لامي بنهاية الاربعينات حوامل ...

‎كالت اي وشنو الفايدة يولدوهم معلولين ...

‎اني من شفتها هيجي تحجي. ..غيرت الموضوع كلت تروح تجفص وتضوجني مالي خلك احد

‎ كتلهااكلج هدى لزمي  تبارك خلي تكعد عيب تركض ورة خواتها وهي جبيرة موصغيرة...

‎والولد كاعدين عيب وشويه واكفه حتى حركاتها مو حلوة  اذا واحد من انتبه عليها وشافها شيكول ...

‎هي ضحكت خجلت كالت هاي بريئة تحس نفسها عمرها عشر سنين خطية ...ابوهم مايطلعهم ابد والله يخاف عليهم ...

‎المهم اني من هيجي كامت تحجي بعد كمت اساعد عمتي بالمكطبخ الم الاكل الزايد

‎وصفنت كلت فوك الاربع شهور تروح وتجي تخاف تكول حامل شلون تفكير...

‎ذكرتني بوحدة جانت وياية بمكتب ابويه  جانت سبع شهور ومن احد يسالها على الخير حامل تكلهم لا قالوني منتفخ ....

‎هههههه والله عجيبة النسوان

‎وبليلتها ورة مراحوا لمينا ورتبنا الجوة صعدنا بعد  فوك  دنام ...كلي سارة اكو شغلة لاتضوجين يعني ...

‎كتله خير

‎كلي  معليج بجهال سردار وهدى...بس شنو كالها خجلان ومستحي

‎كتله صدك تحجي شبالعجل وصلوها الك !

‎كلي والله ماتعرفين سردار نحس وماينجرع عباله بس هو وبس يعرف الله ويربي جهال ...ومرته هم مثله

‎فضحكت ...ليش هو اشتكالك !! لو مرته كامت تبجي يمك ؟!

‎كلي لا اجاني هو يعاتبني ليش زوجتك تعيب على تبارك ...وخواته

‎معليج بيهم هاي تربيتهم وهمه احرار بيهم ...دببه زعاطيط شعلينه هو ابوهم وهو عاجبه هيجي لعبان نفس ...شعلينه بيهم ...

‎كتله وهو شكو هيجي يهتم بحجي النسوان وشدعوه عليه ضاج ...

‎عابت ...

‎سكت وماحجى شي ...

‎لفينا راسنا ونكنا

**.       ***.    ****

‎واتذكر تقريبا بشهر الثاني ومن  جنت بالدوام الظهرية دااجيك الايميلات ...شفت واصلني ايميل من الامم مال الهجرة ...كاتبيلي حولنا ملفج من سوريا لعمان...

‎تابعيها مناك اني هم راسا جاوبتهم كتلهم ياسوريا ياعمان اني مااكدر اروح لعمان حامل وحجيب ...اني اتزوجت وحاليا مستقرة باربيل لانه بغداد خطرة عليه ....مااريد لاهنا ولاهناك

‎ودزيته ...وراها خابرت حيدر كتله هيجي وهيجي ...اتخبل كام يكمز ويصيح  يكلي ولج  ليش ليش

‎هيجي كلتي وشلون تجاوبين بلا متاخذين رايي انت مخبله ؟!!

‎..بابا الناس تشتريها بالموت وحضرتج تجي يمج ترفضيها انت مخبله والله

‎كتله واني شمدريني انت تريد تطلع ...كلي اي اريداطلع اليوم قبل باجر هسه دزيلهم ايميل كولي اي جاية لعمان وراح اقابل

‎اني ماقبلت

‎واتعاركنا

‎اني مجنت اريد اروح لعمان ولا مفكرة اطلع اصلا حتى القضية ناسيتها وهي صارلها تلاث سنوات نايمة ...

‎كتله همه حتى ولا مرة مخابريني واني ناسية الموضوع ...

‎المهم حجاية منا ومناك قنعني اكتبلهم ايميل ثاني ...

‎تدرون اني كلش جنت حابة العيشة باربيل ...امان وشغلي حابته وزوجي يمي وشغله زين ...واهله هم حبابين وشوكت مااريد هم اروح و اشوف اهلي اتغرب ليش؟!

‎المهم مشيت حجايته وكتبتلهم ايميل حجيتلهم كلشي عن معانتي وشصار بيه وشلون كتلوا رجلي...بس كتلهن اريد المقابلت ببغداد ماعندي امكانية مالت عمان

‎وبعدين هابرت خيدر كتله هيجي وهيجي كتبتلهم

‎ولاول مرة حجيتله لحيدر عن اهل هشام الله يرحمه وشلون هددوني طبعا ظل صافن شويه وماحجى بعدين  كلي لاتكتبين اهله مهدديج كتبي الارهابيين ...لاتحددين منو وكتبي شلون باكوا بيتكم ورموا طلقات....

‎مااحجيلكم اكتب الايميل وابجي...اتهيجت عليه كل المواجع والذكريات والالم اللي عشته ...

‎ومثل مرادوا خليت رقمي وعنواني الجديد

‎وحتى رجعت للبيت متضايقة ومالي خلك ..

‎اعصابي تعبت

‎جنت اضوج من نتعارك او احسها يزعل مني وحتى هو هم نفس الشي

‎وماشفت حيدر الا ورة نص الليل اجى من سمعت صوت رجليه على الدرج شيحط بروحه شحط

‎لفيت راسي وسويت نفسي نايمة ...

‎بس هو جان يتنحنح راد يكعدني واني مغلسه الا ان لعب بشعري وظل يبوس بيه كلت خلي اكعد مابيها مجال بعد وامري ال الله...

‎عاد اخذ حقه من المعاشرة وجنت كلش اتضايق منها بس كمت ابد بعد مااحجي ...مايفيد هو ماخذها ماخذها ليش اكره بروحي ...

‎وبدى يسولف ويايه كلي ...مجنت اعرف اهل هشام مهدديج ...

‎اني جنت اعرف هو حيسالني وراح ينفتح الموضوع مرة لخ ومجان عندي مانع اكله كلشي  بس ياريت لو سالني قبل ...

‎المهم بديت احجيله المشاكل اللي صارت من الاول للاخير واني احجي وهو صافن مايكول ولاكلمة بس يباوع عليه ويدنك ...

‎ومن وصلت لما دخلت الحجز بقيت مترددة شويه قبل مااكمل ...شلون احجيله واوصفله

‎ومن شفته يباوعلي ينتظر التكملة كتله كلشي وبجيت هو وعيوني انترست دموع

‎عاد  جرني وحضني وهنا طلعت البجية كلها من گلبي على جتفه وبحضنه وفهمته بسبب الضرب والخوف اللي جت عايشه بيه بالبداية جنت اشوف كوابس واحلام  هشام يلحكتي يريد يكتلني انه ليش  اتزوجت غيره وهذا الشي جان مضايقني نفسيا ...

‎كلي حيل هذا كله شايلته بگلبج وماتحجين ...من حسيته حس بالمي طلعت شكو بگلبي ...يله بيومها ارتاحيت و...

‎وكلش ارتاحيت همين ...حسيت ذبيت حمل مثل الجبل جان على ظهري ...

‎صح هو محجى وبالعكس شال همي بس هو هم اتضايق نزل جوة يدخن ...كلي مااعرف مو بيدي احس شبت نار بيه ...

‎ولحد مانمت يله هو صعد حضني ونام ...

‎المهم صبحنا ثاني يوم كانه ماكو شي وكانه انكسر الحاجز اللي بداخلي خوف او مااعرف شنو يمكن اوصفه ...

‎وبديت اطلع اني وياه انجهز للنونو الجديدة ...

‎البيت مثل تعرفون  جان بيه طابقين الفوك عدا غرفتنا جان اكو وياه غرفتين بس صغار ...وحدة على اساس للخطار مابيها غير دوشكين وبردة وعلى جهة ميز خشب ومسفطة عليه دواشك ولحفان من هاي الثكال القديمات وعمتي مغطيتهم بشرشف نظيف وحلو بين فترة وفترة انزله ونغسله من التراب وجواه اكو صندوكين كارتون مليانه مواعين ...جديدة ممستعمله وساعة هم يمكن هدايا جانت ...

‎والغرفة اللي بصفها جات فارغة مابيها بس زولية وصوبة قديمة وجانو مسفطين السجج مال قبل مال بردات هاي الي تصير خشب وعريضة وبنكات وثريتين كالو هاي مال اهل البيت محد يلعب بيهن ...

‎وعلى اساس حيدر يسويها اليه مطبخ بس من شفت عمتي انقهرت وضاجت كتله لا مااريد هو علمود لكمتين ناكلهم سوى عود خطية فرحت بهذا الشي ...فقررنا نفرغها ونسويها غرفة للنونو...

‎عمتي جانت تفتهم وعدها خبرة احسن مني كالت خلي بس غراضها الزايدة بكل الاحوال هي حتنام يمكم ....وكله بغرفتكم ...

‎بس اني عندت ردت الا  اسويلها غرفة خاصة وجهزتها احلى جهاز حتى اشتريت ورق حايط ملون وحطيه ورة جربايتها ...وخليت حيدر يصبغلي ضلع سمائي ووردي طلعته من النت جان كلش حلو ...

‎وصدك الغرفة طلعت تجنن وحرام ماستعملتها غير بس حطيت بيها الهدايا ...بعدين

‎واذا حيدر جان ميكدر يطلع ويايه اروح  اخذ صباح ونطلع هي هم عدها خبرة بهالسوالف وعلمتني اشتري كل الحاجيات الجنطة مال المستشفى وجنطة البيت والحضاين ومن هالسوالف وشكد حلوات شغلات النونو...وامي هم جانت طالعة مشتريتلي كم شغلة ومسرة كالت حدزلي مجموعة غراض جيكو الاصلية من المانيا

‎فهذني هم خففت عليه المصرف لانه مثل ماتعرفون حيدر جان لحد هسه يسدد بديونه واني قررت ويه نفسي انطيه فلوس الفضل واچمل مني حتى يفك دينه لانه حسيته تعبان وشايل هما كلش 

‎المهم بوكتها امي حددتلي الولادة بنهاية شهر الثالث ولازم قبلها باسبوع  اني انزل لبغداد حتى اولد...

‎واول يوم من شهر الثالث خابرتني المنظمة كالولي عندج مقابله تعالي انت وزوجج يوم عشرة بالشهر واحنى هم قبلها نتصل بيج ننطيج المعلومات ...

‎اني هم حضرت نفسي طلعت من اربيل يوم سبعة ...خفت لااجيب هالفترة الجاية لانه الطفلة جانت نازله حيل وكمت للصبح ماانام ...

‎ومن وصلت لبيت اهلي  اتفقت ويه حيدر يتصالح ويه سرمد علمود لايتوتر الجو وحجيت ويه امي وابويه علمود هذا الشي  ...

‎وصدك اول ماوصلنا تسالموا وتصافحوا وكلشي جان تمام بقى حيدر يروح ويجي ويه ابويه وجنا نطلع نتغدى برة  ... بس الوضوع جان ببغداد كلش يخوف ...ذيج السنة جانت سنة الانتخابات ...والله وحده العالم شراح يصير بينه وراها ...

‎المقابله جانت ساعة ثمانية الصبح واحنى طلعنا من البيت ساعة ستة وشويه مثل ماهمهو كالونا ورحنا لبوابة الها رقم معين انطونااياه وحتى دزولي خريطة وعليها مشينا وبالباب شفنا الحرس وكوفنا كالوا امم ؟ كلناهم اي و شوفناهم الايميل دخلونا ودلونا الباب ...طبعا جانت بس شوارع عريضة ونقاط سيطرة وتفتيش وعلى زاوية اكو ممر ضيق طويل نوكف بيه سرة يوصلنا لباب المنظمة ....

‎والله واحنى واكفين ننتظر اني جنت كل شويه اكوم واكعد واصيح هسه راح اجيب خلص مابقى بيه ...

‎وجان تصير طكة قوية ضربوا البوابة هاونات ...ووحدة ورة اللخ وصار مدافع وملاطم واللي عنده جهال حار بس شلون ينقذ جهاله والحرس بالباب مال المنظمة دفعوا الناس برة ودخلوا الموظفين وختلوا معليهم بعد بهالناس الكومة واكفه شنو مصيرها وصار ركض ومنا ومنا عاد اني حيدر جر بايديه ومااشوف الا اعيط عيطة ...

‎بروازمن_ورد

31

‎من البداية اني جنت ممرتاحة لشغلة السفر ودائما احساسي يكون صح

‎ ودائما مااتبعه مااعرف ليش...

‎واحنى جنا واكفين بالانتظار بالممر الي ياخذنا لباب المنظمة ...

‎صار ضرب هاونات على البوابة  اللي طبينا منها ...

‎الحرس سدو باب الدخول للمنظمة  ورة ماطببو الموظفين ...واحنى بقينا برة المشكلة صارت هوسة والكل تركض تريد تطلع بس وين ماادري صارت ملاطم وكاموا يدافعون و يدفعوني اني كلت خلاص حوكع على بطني لو ماحيدر يلزم ايدي

‎ وماكو مجان اكو بعد  كدامي غير بس عربانة طفل عافوها وركضوا وجتني دفعة كلش قوية وكعتني على العربانة ربك ستر جانت فارغة والا اني والطفل جان انمردنا وكعت وادعبلت اني والعربانة وهمزين حيدر راسا سحبني صفح ...قبل مايدوسون عليه ...جان منظر مخيف ومرعب حبسلي نفسي وسوى بيه هبطة تمام ...

‎كمت اعيط واصيح من الالم عبالك هاهي حجيب

‎بس الله سترها ويايه

‎انوبه الحرس اللي واكفين بالسيطرة يم  البوابة الجبيرة سدو ها مايخلون لا احد يطب ولايطلع برة

‎  ومنا طلعونا من الممر ظلينابنص الشارع عاد اتجمعت الناس و..ختلنا كلنا بصف حايط البناية اللي بيها المنظمة وصياح الجهال وعياطهم من الخوف ...انقطع صوت الضرب ورة شي ربع ساعة ودكت صافرة الانذار شوية جانت بعيدة ...على انه ماكو شي بعد راح الخطر مع ذلك بقينا محصورين بمكانه للدعش ونص يله فتحوا البوابات هم الرئيسية ما المنطقة

‎و هم مال المنظمة وبدت ترجع السيارت تدخل جوة ونشوف الناس ماسمعنا اكو احد اتاذى الحمد لله

‎وكعتي على العربانة اذت صفحتي حيل وظليت اون من وراها ...انوب قبل الضربة  من جنا واكفين بالسرة اخذ وا جناسينا والجوازات وظلينا حايرين شنسوي

‎لازم نبقى ونكمل بعد مابيها مجال رجعة ...طول الوكت جنت كاعدة ومتجية راسي على الحايط ومربعة رجلي لانه الرصيف جان بعيد عن الحايط مو مال امدهن واكعد وحيدر يفرك بايديه اصفريت وكلبي خدر ...

‎واني اصلا مااعرف حطول هشكل الشغلة جاية بطرك بطل المي ...كتلني الجوع هناك

‎والله بلا شقى كمت ابجي من الجوع اكوله لحيدر مااكدر

‎...... مااتحمل بعد بطني تزرفني من الجوع

‎ كلهم يعرفون الا اني كل عائلة جايبة علاكة اكل وياها جبس وبسكت ولفات

‎وحيدر متردد خجلان يروح يجبلي بسكتاية ...واني اتوسل بيه يكلي استحي شكللهم مرتي جوعانة !!

‎بعدين استتسلم للامر الواقع وهو ديروح على مرة جبيرة فرشت علاكتها وكعدت توكل الجهال هاي قبل مايفتحولنا ونطب جوة ...

‎صاحته مرة جانت كاعدة شويه قريب علينا يمكن سمعتنا من داابجي واتوسل  كلتله تعال اشرتله وانطته باكيت بسكت ترد وباكيت بسكت مينو الترد شويه جان متكسر من الجوانب من الدعس يمكن ...ونطتني بطل ببسي صغير ...كالت هاي انت حامل وين تتحملين جوع انوبه كلشي مجايبة وياج

‎كتلها اني عبالي شغلة ساعة ساعتين نرجع شمدريني هيجي طول

‎فكالتل لا حبيبة محد يخلص ويطلع الا كلنا نكمل نطلع سوى ...

‎يعني منا للستة اذا طلعونا زين ...

‎كتلها صدك تحجين ...

‎حلفت يمين اخر مرة مبقيهم للسبعة ...

‎هي هيجي كالت بعد متت من يمي ...

‎اكلت البسكت بلكمتين وشربت الببسي علية وضميت المينو كل شويه اخذ قطعة .. هيجي احسن ...

‎والله فرجها وطبينا نزعونا كلشي حديد نحاس هيجي شي ...واني جنت لابسة حجل ...شينزعه بله شلون ادنك واني بغرفة التفتيش ...خطية ام التفتيش كالت ييله فوتي ودخلتني حتى بلا ماتنزعني شي ...والحجية كدامي تصيح رحمة الله والديج خطية حامل هاي شيدنكها!

‎طببونا بغرفة همه مسويها خالين من هاي الوصل الخضرة منا ومناك ياخذون اسامينا ويصيحون واحد واحد نطب لغرف جينكوات هي مثل الغرف المتحركة بيها تايرات...وتبيرد وتدفئة وبنكة سودة جبيرة صفح وهم نننتظر شوية ويصيحون اسامينا ...

‎الى ان طبينا بقاعة جبيرة كلش جبيرة مابيها بس كراسي وباب وغرفتين صغار ...كاعدين بيها اجانب وعلى صفحة مسوين سور من لعب وخشب للجهال يلعبون هناك ...طبعا هاي كلها احنى كل نص ساعة ننتقل لغرفة ...

‎وبعدين اللي يريد خلوا صناديق مي وعصير مطيب جان بس هو مال امريكان يشربوه ووبسكت لونه برتقالي اجاني انقاذ ...وبتلاثة اجى سرانا ...وهاي احنى بس كاعدين صافنين انام وافز ...

‎والله ودخلنا طكولنا صور طلعوا اذاناتنا للمحجبات مااعرف بوكتها ليش واني شلون جنت بس عايزني صدك اذانات ...

‎جوة عيوني صايرة سودة مدري زركة ...ونعسانة وخدوودي مايعة ...هههههه طالعة من الحبس بكفالة ....

‎المهم اخذوا معلومات اول شي سوى اني وحيدر بعدين وحدي كوني صاحبة القضية حجيتلهم القصة كلها وهمه يكتبون واني ابجي وعلمني حيدر اضيف خوف وارهاب حتى يسرعوها ...

‎وربنا رحمنا بالستة صدك طلعونا همزين مو بالسبعة ...انوب وكفت بالباب شيطلعني برة للبوابة وهي مسافة نمشي واني بعد انهد حيلي من الصبح طالعة واتذكرت امي شكد لحت عليه مااروح خافت لايصير بيه وجهي وجه ولادة

‎ فحيدر جان لازمني ويجرني كوة امشي ...

‎ والله اكو سيارة فاتت وبذاك الوكت سيارات جانت قليل تطلع شالنا احنى وعائلة لخ ام وبتها صغيرة بحضنها وابنها شويه جبير...هم خطية كاتلين رجلها ...وجاية وحدها تكمل ...

‎والله يرضى عليه وصلنا لاول تقاطع ...اخذنا تكسي ويم اول واحد مطعم ابو فلافل نزلنا وطول هالوكت اني نسيت بعد ارجع افتح تلفوني التهيت بالجوع وبالاكل الا ان خلصنا ودنرجع تكسي للبيت بعد

‎و  بالسيارة فتحته لكيت فوك العشرين مكالمة من امي وابوية وسرمد واهل حيدر ...الدنيا مكلوبة علينا لانه سامعين ضاربين الخضراء هاونات ...

‎خطية. من خابرت امي جانت منتهية بعد واعصابه رايحة من الخوف ..

‎طبينا للبيت ساعة تسعة وشويه كعدنا سولفنا شصار بينا بدلت وغسلت فحصتني امي منا ومناك الحمد مجان اكو شي ...عاد وصعدنا نمنا بغرفتي ماكعدنا الا بالسبعة ...حيدر كعد مخروع ...اتاخر لانه لازم  عليه يداوم اليوم بس هو البارحة مكلي ...

‎وركض بدل وطلع ...خطية حتى بلا ريوك

‎اني هم نزلت يم  امي جوة ظلينا نسولف  اول ماخلصنا ريوك اخذتني وطلعنا تسويلي سونار وتشوف وضعي ...

‎وهي من قللها شافت  انه اني مراح اكدر  اجيب طبيعي الطفلة جانت كلش كبيرة ماشاء الله ... ماتطلع الا قيصيرية...وصدك حددت ولادتي ورة يومين ...كالت بعد مابيها اتاخرتي ...والله ستر عليج مجبتي البارحة بالشارع ...كتلج وضعج خطر ومو مال تروحين وانت بس عناد ...واني كتلج من البداية انت قيصيرية ...مايصير عندج توسع...

‎وصدك ورة هاليومين ...اتحددت عمليتي ساعة بالتسعة ....واجاني حيدر ثمانية ونص يركض للمستشفى جايب صباح وجاي خطية لاحة عليه تجي وياه...

‎ورايح عمي ورياض لبيتنا ...جان زعلان لانه محد كله على وكعة ابويه

‎ خطية خفنا ينقهر وياتاثر ويرجع ينتكس احنى مصدكنا هو كام يمشي شويه ...

‎وقبلها اني امي غسلتني وحضرتني للعملية بالبيت وجبت جنتطي واجيت جانت بحياة الراهبات بالجناح الجديد ..نظيف وبارد وهدوء ...بس اني جنت خايفة وارجف ماااعرف ليش ...جابولي عربانه وكعدت ودوني للغرفة مال التبديل وهنا بعد حيدر وصباح مايجون حيدر لزم ايدي بوسها وبوس راسي وكلي احبج واموت عليج و الله يكوم بسلامة  ..وعيونه غوركت وظل يمسح بيهم واختنك بعبرته من شفته كمت ابجي. . بس ماحجيت اي شي...

‎نزعوني ملابسي والقراصة مال شعري واني جنت مسوية ظفيرة طويله ...

‎ولبسوني ثوب العمليات ابيض وبيه ورد وردي ناعم مفتوح من ورة وتكرمون نعالات طبية هاي المنفوخة من كدام وبوستني امي كالتلي لا تخافين اني يمج مااعرف الظاهر الدفعة مال العربانة اثرت عليه...لازه امي جانت خايفة واستعجلت بسرعة

‎اول مطبيت ومددوني على السدية جتي طبيبة التخدير تضحك وسالتني عن اسمي وعمري واذا جانت هاي اول  ولاداتي اني احجي ودموعي تنزل صفح وعيوني على الضوة فوك راسي اتشاهدت و ظليت ادعي بگلبي ربي يستر عليه وينجيني ودعيت لبنتي تكوم بسلامة ومايتمها بيه جنت خايفة مااكوم من التخدير وضربتني ابرة حسيت بمرارتها بحلكي وصلت وبعدين قناع الاوكسجين على وجهي ورحت لغير عالم ...اول مارحت شفت نفسي بمطار عمان ادور على الجنط مالاتي..وشفت واحد اسمه محمد ...اركض وراه اكله انت اخو حيدر بس كولي عفية لاتروح ...وجان احس واحد يدغني من ورة يصيح بصوت ناصي سارة سارة حبيبتي..سارة وجان صوت امي سارة تهز بخدودي وتطبطب عليها على كيفها ماماتي كعدي حبيبتي اول ماحسيت بالم قوي ببطني الم فظيع ...

‎حريق بس جان لساني ثكيل واشوف الصور مواضحة ...الى ان وضحت الصورة شويه شفت وجه امي وحيدر يضحكون  ...ومن شافوني كعدت حيدركا يمسح دموعه...حبيبتي حمد لله على سلامتج وماما لازمة ايدي ماماتي جبتي بنوتة اتخبل مدنفشة تجنن

‎وحيدر يبوس بايدي حمد لله على السلامة ...كررها مرتين تلاثه

‎وطبعا عيوني تتكلب بس مااكدر احجي لحد الان مفاصله اني مابين مطار عمان ومابين غرفة المستشفى ...

‎الا ان شويه صحت امي كتلها بطني توجعني كالت اي ماما ومو توج ولدتي وهسة توجعج اكثر ...من يخف التخدير...

‎ووكلما يفوت الوكت اني ابدي اصيح بطني حرييييييق عفية انطوني مهدئ والسستر واكفه تبتسم هسه تجي دكتور كوثر تنطيج

‎...ماما بعد مااتحمل وينج ...جنت وحدي وتقريبا جانت ظهرية يعني اني رجعت نمت وهسه كعدت ...

‎حيدر ماما ....الحكولي

‎السستر تهديني تكولي موزين تصيحين على كيفج ...

‎واني اتوسل بيها اكللها بعد مدااتحمل الم الم قوي ...صدك جان مثل الحريق بداخلي ...

‎المهم والله ويه المهدئات وشويه انام وشويه اكعد الى ان صارت دنيا ليل بعد ...جتي صباح وامي جانت شايلة البنية بيدها ...مغسليها ومبدليها ولافين راسها بعصابة وملفلفيها...واخيرا حطيتها بحضني وصباح خربانه من الضحك كالت هاي صلعة ودبدوبة ماشا الله جتي اربع كيلوات الا شويه جانت رجليه وايديها مطويات ورموش طوال وجهها بس رموش وريحتها تجنن جان احساس غريب هذا الكائن الملائكي طلع من جسمي وصارت بنتي ...رحماك ربي فعلا اجمل احساس بالدنيا هي الامومة ...

‎الله لايحرم اي انسانة من هذا الشعور...

‎ضميتها لصدري ...ولانه جانت نايمة مرضعتها بس امي وصباح جانوا يضحكون عليها ...لانه صلعة وتمص اصبعها ههههه وصباح تكول يمكن عيونها ملونة واول مجاية للدنيا حمرة حييل هسه شويه خفان ...

‎وشويه واخذوها مني راحت امي وبقت صباح يمي وكالتي حيدر جايبلهم عشى وجاي هو وابويه

‎وكعدتني شويه كالت لازم وضروري  اني اشرب ولو شوية عصير ...بس منو اله نفس يطبب شي بحلكه ... كوة كوة شربت شويه وعفته جنت احس بشحطة بزردومي مااكدر ايلع شي

‎ وشفت بابا اجاني بضحكة جبيرة بوسني وحضني كلي ولج هاي شنو هالحلوة جايبتها النه حمد لله على السلامة باباتي ....

‎بقوا شويه هو وحيدر اللي خطية جان فرحان وممصدك صار هو اب وهو اني لحد هسه ممصدكة صرت ام ...

‎معرفت  شلون افترت الدنيا وشلون هيجي بسرعة اتزوجت وبسرعة صار حمل وهسه ثريا بنتي بحضني ...

‎رضعتها شويه واخذوها مني وراحوا كلهم بقت بس صباح يمي وامي تروح وتجي عليه واتعس شي فقرة ورة نص الليل من كوموني لازم امشي واتحرك وتتحرك امعائي ...

‎يالله جهنم مشتعلة واني كاعدة بنصها ...من شدة الالم اصيح واعيط وبين تلاث الى اربع ساعات يضربوني مهدئ بالكانولة اللي بايدي ...

‎وساعة ثنتين يله نمت ورة ماصباح هم نامت همه خالين فد مصطبة مثل الجرباية على شي اسفنج مثل الدوشك واكو غطى ومخدات وتلفزيون گبالي بقى مشعول على قناة روتانا ...

‎والصبح بالسبعة كعدت جتي ماما جابت ثريا وبديت ارضعها مرة لخ اتنعوص جوعانة حبيبتي ...ولو مايطلع شي مني بس هي تحبه هههه

‎وماكو تقريبا بالعشرة حيدر تجى وكلي امج طلعت بيان للبنية وسالتني شتسميها كتلها ثريا مثل ماردتي ...

‎ابتسمت وكتله فدوة لعينك عمري عمري ضحك وحضن ايدي لگلبه

‎وشويه وكعدوني على كرسي للباب وصعدت بالسيارة ...

‎ومااحجيلكم الطسة الخفيفة صارت جبل حيدر جان يسوق سيارة ابويه

‎وهو كعد بصفه واني وصباح ليورة والبنية بحضنها وامي كالت تجي ورانا بشويه ...مع انه جان يسوق كلش على كيف بس اتدمرت بالشوارع المكسرة وخصوصا شوارع زيونة يم بيت اهلي شارع مابيها صاحي ...

‎وطبيت كعدوني بالصالة الصغيرة خطية امي جانت محضرتلي فراش وكاروك صغير مال سدير ابن مسرة  جانت ضامته يمها منظفته وفارشته فراش نظيف وجديد ومحضرتلي طبلة صغيرة على شكل عربانه شكلها ذهبي كلها جام ... مطلعتها من الصاله الجبيرة طابقين جانت  الفوك  سيت غراض لثريا وجوة غراض اليه ومعقمات وووايبس وكلشي ممكن احتاجه  ...

‎والقنفة فاتحة الظهر مالتها ومادتها ولازكتها بالحايط وفارشة عليها دوشك ثخين صايرة صدك جرباية كلش ارتاحيت بيهم بس طبيت وكعدت هي راسا جتي ورانه ...مااحجيلكم الفرحة والضحكة بوجوهمم

‎ومحضريلي شوربه دجاج خفيفة اكلتها ورجعت نمت بس جنت بعدني اتوجع من العملية ولو الحمد لله ماكو خمس ايام كمت اكوم واكعد لوحدي بعد مجنت الا استند على ايد احد يله ...

‎طبعا همه كله جانو يسووه مجنت احس بثريا ابد حتى من تبجي همه يسكتوها لذلك كلش ارتاحيت ...وبالاسبوع جتي عمتي ورشا وتوتة من اربيل وباركولي وجانو جايبيلي زوج تراجي اليه والثريا وهاي عمتي اول مرة تشوف بيتنا ...

‎شكد جانت فقيرة كعدت محجت بس باركتلي وبوست ثريا جانت كلش خجولة ...

‎ولحت توتة وبجت الا تخلي البنية بحضنها وتشيلها وتبوسها وحيدر يعند مايقبل ...يخاف توكعها هههه ...

‎طبعا خالتي نهال جتيني للمستشفى وهم بقت يومين يمنا هي وسراب همين واخوانها ...ماشاء الله اخوانها كبرانين وصايرين يحجون عليها ويحاسبوها مو مثل قبل خاليها براحتها جانت خالتي تعلمهم عليها  ...هيجي حسيت

‎ومرة جنت متمددة وجتي خالتي تغني لثريا من فديتها وفدواتي ومااعرف من هالحجي ظلت تشمسم بيها وطايرة من الفرح عليها ...

‎فظلت تناغيلها واني اجى على بالي اسالها كتلها خالة صدك مفكرتي في يوم اتغيرين رأيج وتتزوجين ...حتى الله يرزقج بطفل ...وتفرحين بيه ويصير سند الج بالدنيا

‎عاد هي سكت وصارت حزينة كالت مو الله رزقني واخذه مني اوف شگلبتي عليه المواجع ...

‎تقصد على ابن خالتي الشهيد الله يرحمه ...

‎كتله لا خاله مو قصدي على المرحوم انت مافكرتي تتزوجين ...

‎كالت سارة شكلج هاي قصة قديمة ...يمكن او اكيد امج محاجيته الج لانه جنت مااقبل احد يحجيها ...

‎فاني صار عندي فضول شنو قصة قديمة!

‎كتلها شنو خالة عفية احجيلي ...

‎كالت من جنت بعدني بكلية الطب ويمكن يصيرلي سنتين اتخرج هواية جانوا يجون يخطبوني هم جسم وهم جمال لاتشوفيني هسه عجزت و اتربعت ههههه

‎كتلها لا والله خالة بعدج حلوة ومتاكدة لو تكولين زواج كومة يخطبوج ...ضحكت كالت ماسويتها بشباب اسويها هسه !!!

‎اي نرجع لسالفتنا وجدج الله يرحمه مجان يقبلباي احد لا بالحلو ولا بابو الشهادة ولا الزنكين  كال الا تكمل كليتها وتصير دكتورة هذا الحجي ببداية الثمانينات ...جانت الدنيا حلوة وزاهية صح حرب بس حلوة....واني جنت مغرورة حيل بروحي ...مايعجبني لا فلان ولاعلان ...

‎الا ان في يوم اتعرفت على شاب حليوة بالنادي جنا كل خميس نروح مااتذكر والله شسمه نادي الضباط لو مال اعلاميين المهم ...هو جان طالب بكلية الطيران العسكرية ...اتخبلت عليه هيبة وجمال وشخصية ...

‎حبيته وحبني وكم مرة يريد يجي يخطبني وجدج مايقبل ...

‎واني هم ظليت وياه ماعفته ولاعافني ...الا في سنة سبعة وثمانين يعني تقريبا حب سبع سنين اتخيلي

‎كلت لاهلي مااخذ غيره لو تموتوني

‎ووافقوا وخطية جان كلش فرحان وكلي الاجازة الجاية اجي واخطبج وخلاص لو مااعرف شيسوي ابوج بعد معليه ...

‎وصدك جان يروج  راح ومايرجع ...

‎استشهد الله يرحمه وحتى اني مااعرف الا ورة شهر يمكن ظليت ادك ومحد يشيل التلفون الا ان  اخته يله هي خابرتني وكلتلي ...

‎مااعرف شلون وشوكت استشهد محد حجى بس اهله ورة فاتحته بكم يوم راسا شالوا من بيتهم لغير منطقة ..

‎بالسبعة وتسعين مرة عرفت وحدة من جوارينهم جتي مراجعة طلعت جوارينهم ...وظلت تحجيلي عنه وعن اهله وشثار بيهم وراه ..

‎اوف ياسارة شذكرتيني

‎وعمري بعد مافكرت بغيره ولا حبيت غيرة وكل امنيتي الله يرضى عليه وعليه ويجمعنه بالجنة ...

‎وحتى لو مجان مكتول بالحرب جان هسه كتلوه ...

‎بس اكول الله يرحمه ويجمعني بيه ...

‎گلبتي عليه المواجع يولي ...يله ارتاحي نامي اني حصد انام

‎وثاني يوم جتي خالتي سعاد وجنتها مرة المرحوم جانت جايبة ولد ومسميه سالم على جده مثل مجان رايد  ابوه الله يرحمه بس خالتي جانت مقهورة بت ابنها الثاني اللي بيها اسم الله لوكيميا مريضة حيل منتهية ...

‎طبعا اني بوكتها دزيت هدية لجنتها من جابت فهي هم جابتلي شباحية كلش حلوة لبستها لثريا ...وبابمقابل شلت مية دولار حطيت بجيب حفيدها ابن المرحوم ...

‎وجوي كرايبنه كومة زارونا...وجانوا يتخبلون على بتي مدنفشة ودومها نايمة محد شاف عيونها بحيث بس تكعد وتفتح عيونها اطكلها صور ....هههه

‎سبحان الله جانت تذب شبه على امي ومسرة حتى خالاتي هم كالو عينا صغر مسرة

‎وبس فتحت الخيط ورة عشر ايام مو ثاني يوم اللي وراها  رجعت لاربيل ورجعنا كلنا سوى بعد مانكدر نبقى جانت الشوارع مسدودة وحتى السيارت تروح لاربيل ماكو كلها مقبطة والدنيا جانت كلها  خايفة كالو باجر ينتخبون الشرطة والجيش ...

‎فكلنا خلي نرجع لايصير شي  وننحصر ببغداد وحتى اهلي هم اجوي ويانه كالو نطلع من بغداد هم نرتاح كم يوم باربيل ...فجانت لمة وحدة اخذنا سيارتين مال امي ساقها حيدروسرمد كعد بالصدر واني وعمتي ام حيدر وتوتة ليورة

‎وسيارة ابويه ساقها هو وبصفه عمي وليورة امي وصباح ورياض ...

‎ووصلنا لاربيل بعد عناء وبعد ماقريت نص القران بس لايصير بالطريق شي لو عارض  ونتاخر لو توكفنا سيطرة وتتاخرنا والحمد لله مصار شي

‎بس احنى هم اتاخرنا لانه جنت بكل استراحة انزل ابدل للبنية وارتاح ونرجع نسوق وحتى اتغدينا بوحدة من المطاعم الا عدهم كباب يجنن حتى وصيت حيدر ياخذلي سفري كد.ماعجبني وطعمه يذوب بالحلك ...

‎بقوا اهلي يمي عشر ايام جانوا يباتون بيها بيت عمي ...بس من الصبح امي تمرلي وتروح ورة العشى وبقى بيتنا هوسة وخطار.....

‎يباركون ويطلعون ...حيدر وكتها اول ماوصلنا ذبح خروف ...ونسينا شويه هم بغداد والانتخابات والهوسة بس همه توصل اخبار عن ناس اسمهم داعش يقتلون ويهجرون ويريدون يطبون بغداد ومن هالسوالف وكثرة هالامور ورة الانتخابات بعشر ايام ...

‎ومن اجى هيثم جايب اهله وجاي ...جان شكله حزين ويكسر الخاطر من سالته كىي رايد وحدة من الموظفات ويه اخته الصغيرة كردية واهلها مقابلين وخطية جان عينه عليها ومقهور لانه مرتين طالبها ورافضيه ...

‎اهلي بوكتها  بعد رجعوا هم خافوا همه انوب ينحصرون باربيل وماكو طريق رجعة لبغداد

‎وجانوا خايفين من الطريق همين ....ظلت امي تسوق ورة ابويه بخطوتين ...والحمد لله من وصلوا بسلامات ...

‎اني للاربعين مال طفلتي نومي قلق ومتبهذله كلش نحسة صارت ومكمت اكدر عليها وحدي ...

‎بوكتها بعد صعدت فوك بغرفتي وحيدر كام نزل جوة لانه تظل تنعوص ومتخليه  ينام للصبح ومرات تصعد عمتي تاخذها مني حتى اناملي كم ساعة ..

‎الوضع كل اسبوع اسوء من اللي قبله

‎والخوف جان بداخل كل بيت والانفجارات اللي حصدت كومة ارواح ناس برئية ...

‎ريحة الدم والدخان انترس بكل العراق وبدوا يجون النازحين من كل مكان ...

‎حتى المنظمة ...طلبت من عدنا منداوم اتحول الطاقم اللي يطلعون فيلد يسموهم لغير منظمة واحنى بقينا بالبيت بس مكمنا نستلم راتب كامل اني امومتي جانت بس اربع شهور...ونهاية السابع خلصت بس مداومت الى على السنة الجديدة ...

‎وكانت فعلا الفين واربطعش من اكثر الاعوام دموية ...عام الموت نكدر نسميه كل يوم نسمع بشهيد وفاتحة ...انوب اول الناس راح بيها اخو هيثم الله يرحمه المتزوج ببغداد ...واتيتموا تلاث اطفال

‎وهم نزل حيدر بقى اسبوع هناك وايدي على گلبي بس لايصير بيه شي

‎وراها راح من عدنا الف رحمة ونور على روحه ذو الفقار سودة عليه راح اطوع هو وابوه وكانوا من اوائل الناس الي استشهدت بسامرا ...

‎وطبعا هم بس حيدر نزل جان كلش يحبه ويريد خاطره بس ماقبل اني انزل

‎عمتي بوكتها اتخبلت عليه كيف ابنها الجبير وياعيني عليه راح مظلوم وان شاء الله شهيد ...

‎انووب المتستحي سراب كامت تعايرها تكللها اكلي نار بگلبج مثل مااكلتي فلوس اليتامى شلون گلب ...بوكتها خالتي نهال واخوانها داكيها كتل

‎وكمنا نسمع الاخبار ونتكرضم على الناس بكل مكان من الموصل والغربية وبغداد والشرقية والجنوب ماكو مكان مصار بيه عزا ولطام ...وانوبه مجزرة سبايكر اللي دمت الگلوب ...واتذكر جانت بشهر تشرين الثاني سودة عليه الالف الشباب راحت بيها عزل مايعرفون منو باعهم الله ينتقم من كل ظالم  ...

‎بعدها ...زادت الحرب والتو تر والناس كلها صاحت داعش حتفوت لاربيل وجنا كلش خايفين ...والشوارع اترست  نازحين

‎وحيدر حضر اىغرفة الثانية فوك للعوائل بس للنساء يجيبهم ابوهم كم يوم يمنا لما يدبرلهم مكان ويروحون

‎احسن مايكعدون بالشارع بهالبرد ...

‎وانوب حتى سوريين كاموا يجون وصارت هوسة وعجة دماغ من هاي الزينة وجنت للصبح ماانام اتخيل نفسي انام ومااكعد ومتت بعد من اابجي واكثر شي ابجي بس على بنتي اللي حتى كسروا فرحتي بيها ....

‎وبشهر الواحد طلبوا من عدنا نرجع دوام شويه هداءات الامور وصارت حرب رسمية بين الجيش العراقي وداعش يعني قوة تقاتل قوة ويومية ذولاك يههدون يدخلون بغداد يصلون لابو غريب ويطردوهم ...

‎اني بتي بعد كامت تزحف ومرات تلزم القنفات وتمشي نشنشت حيل وصارت بيضة وحلوة ودبدوبة وعلى شكار شعرها جان كلش خفيف ....

‎وعيونها عسليه بيه حلقة زيتوني على خضار ...تذب شبه كلش هواية على امي ...

‎وقبلها بفترة هدى اخت حيدر هم  ولدت بنية وكامت تبجي ورجلها وحيدر يحجون عليها انه حرام نعمة الله بس هي جان بنفسها ولد

‎المهم من بديت اداوم عفت ثريا يم عمتي ...

‎اول يومين جان كلشي تمام بس بعدين حسيت كامت شويه تضوج حصرتها وكعدتها بالبيت ومخلتها تطلع الصبح براحتها تروح للسوك او تخلص كم شغلة

‎وحيدر بدى يلح بطلي وكعدي بالبيت بس اني مجنت اقبل ...

‎وبدت شويه تكب بيناتنه مشكل منا ومناك مرات علمود امه ومرات اتاخر بالشغل

‎وحسيت بيه بدى يتغير عليه مو مثل قبل جان

‎بروازمن_ورد

32

‎ببداية سنة ٢٠١٥ رجعت للشغل بالمنظمة مرة لخ ...بس جان شغلي متقطع مو يومي وهاي بس خلال اول شهر ...بعدين لا  كمت اداوم بشكل يومي وحتى اتاخر مرات ساعتين تلتثة فوك الوكت وارجع متاخرة للبيت  ...

‎اني وحيدر صارلنا فترة مشاكل صغيرة منا ومناك على شغلات كلها بسيطة ...ويمكن حتى تافهه بس مااعرف ليش جنا مشحونين وتعب الحياة اليومي كام ياثر بينا ...اغلب مشاكلنا كانت علمود بنتي هو يريدني لازمتها وكاعدة مااغفل عنها ثانية بينما اني احب اربيها على انه تاخذ راحتها تروح تزحف وتكتشف لعد شلون الطفل يتعلم ...بس بنفس الوقت عيني عليها ...وبس توكع لو شويه تبجي يكلب الدنيا انت هاملتها وانت ماتعرفين تربين !

‎ومثل ماكتلكم عمتي كامت تاجل طلعاتها ومسواكها لحد ماترجع رشا وتعوف البنات عليها وتطلع ...في مرة اتاخرت صار عندي شغل كلش هواية ورجعت تقريبه خمسة ونص ستة يعني جانت بعد ظلمة مان المغرب  ....سمعت صوت صياح البنات يبجون بشكل فظيع ...

‎صارت بيه هبطة حتى عفت باب الكراج مفتوح ركضت جوة شفت رشا اخته بنص الهول متممدة و جايتها الحالة العصبية ومتيبسة وترجف طبعا نفس حالة الصرع بس مايطلع من حلكها شي منظرها جان مخيف جدا ...خوف توته بت اخوحيدر المرحوم  اللي كامت تصيح وتعيط وتبجي خلا بنتي هم تبجي بهستيريا اخذت البنات وركضت بيهم على الصبة وحضنت واهدئ بيهم بس ظالي بالي

‎ مااعرف حتى شسوي لرشا...

‎اللي يمكن ماذاكرته الكم قبل اهل زوجي عدهم فد حالة انه همه عازليني تماما عن حياتهم الشخصية والعائلية كلشي مااعرف عنهم ابدا

‎ ولانه اني اصلا طبعي موفضولي فمجنت اهتم ولا ادير بال ...كدامي مايحجون عن اي موضوع نهائيا الا اعرفه من حيدر وهو هم كلش قليل يحجيلي

‎يعني هدى مرات تجينا للبيت تبجي تدك وتلطم من تشوفني تسكت ولا كانه شي وراها يطبون بغرفة عمتي ومايطلعون لاساعة ولاثنين

‎ولاهسه رشا ...كلش مااعرف عنها ولا اعرف شلون حتى اعالجها اواسويلها اذا صار بيها هيجي شي

‎طبعا هذه مو اول مرة تصير بيها الحالة واني يمهم لا ثالث مرة وباتلاث مرات اصلا مايخلوني اشوفها يصعدوني فوك ومايقبلون يحجون وحتى عمتي تنكر عيني عينك انه بيها شي لوماحيدر حاجيلي ...

‎بصراحة قبل مجنت اهتم بس هالمرة ضجت حيل ....

‎على الاقل لو احد مفهمني بهيجي مواقف شسوي او شنو الاجراء بدل مايصيحون عليه انه مااباوع جان ساعدتها ولو بشي بسيط ...

‎المهم ظليت اني كاعدة على الصبة مال البيت اهدي البنات واسكتهم بس توته جانت كلش خايفة ...وظلت ترجف واني ظليت اراقب رشا من الشباك ...

‎جتي عمتي شافت الباب مفتوحة ... كالت خير شكو طالعين بهالبرد كتلها رشا مااعرف شبيها

‎فالمرة ذبت علاليكها بالباب وركضت عليها ماكو دقايق اجى حيدر وراها

‎طيعا حيدر ابد ابد مجان يستعمل سيارتي الا اذا اطلع وياه ...فعلى طول يوصلوه واحد من جماعته ...

‎فسالني كلي شبيج هنا وشبيها توتة! لانه شافها صايرة زركة من البجي والخوف ...

‎حجيتله راح وره عمتي طببوا رشا للغرفة عاد شوية هدات توتة وبالكوة حجتلي واللي افتهمته منها انه معاندة رشا ومسامعه كلامها وراكضه وراها تريد تضربه توته كاسرة تلفونها شلون مافتهمت...

‎ولاحتى بعدين احد حجالي بس صدك خفت وفكرت بحجي حيدر من يتعارك ويايه انه مايصير اعوف البنية وحدها مهما كان امه جبيرة وصدك اذا اتخربطت وصار بيها شي شلون ؟!

‎وهي اصلا عدها قلب ...

‎وهذه توتة وكحة ماتكعد راحة  احتمال تفتح الباب وتنهزم اخاف تخنك ثريا وهي سبق ومسويتها ...ظليت افر حسبات وافكار ببالي ...

‎لميت العلاليك وطبيت جوة ..كتلها خالة شبيها رشا

‎ابتسمت خجلانه كلشي ماكو يمه شويه عصبت على توته....

‎كتلها خالة هي شبيها صدك؟!

‎شلون كلشي ماكو شفتها جمدت وترجف مثل اللي بيه صرع

‎دارت وجهها عليه وضاجت كالتلي منين جبتيلنا الصرع انوبه مابيها شي امي

‎اني هم صدك ضجت فضحكت كتلها عمة عمية اني لو ثولة البنية جانت موطبيعية وانوبه جهال اثنين يمها باقيات لو صاير شي ...

‎فهي اتكدرت ومجاوبتني واخذت العلاليك وكامت تشمر بالمسواك حيل بالثلاجة فحيدر اجى جاوبني

‎كلي هلكد خايفة على بتج لاتعوفيها يم احد كعدي وربيها ومعليج بغيرج ...

‎جان اسلوب غريب بالجواب فاجاني كتله شلون يعني شعليه يمكن اني عايشة وياكم بالبيت ورشا هم اشو مااعرف حتى شبيها ...

‎ظلت امه تخزر لحيدر

‎كتله شبيها غير تفهموني يجوز احجي لامي وتكدر تساعدها ترة عاادي هواية اكو ناس عدهم  مرضى انتوا ليش هيجي تتحسون على الاقل فهموني شبيها بلكت جنت اساعدها بوكتها ...

‎اشو حيدر جرني من ايدي طلعني من المطبخ كلي اخذي بتج وصعدي لاتحجين زايد...

‎هذا شبيه !

‎يعني مجان اكو بعد غير مؤشر اقوى من هذا حتى افهم حيدر متغير كلش وياية وصاير مايطيقني

‎ ولا فوكاها يومين وراها ينام جوة ومايحجي ويايه مو بس هو

‎ كلهم حتى رشا ماتحجي واصلا كامت ماتطلع ...

‎وانوب عمتي مقبلت بعد تعوف ثريا يمها ...

‎رحت اخذتها وقدمت اجازة اسبوعين...ومااحجيلكم بالشغل كلش ضاجوا ماقبلوا غير خمسة ايام كوة حصلت منهم علما اشوفلي صرفة ...

‎حسيت البيت سجن مو بيت كمت حتى اكل  مااكل جوة لاهمه يصيحوني ولا اني انزل ...مااعرف ليش كل هاي لانه سالت

‎وجتي هدى اخته زادت الطين بله ...كامت تمشي وتذب حجي اني فوك واسمعها ...

‎تكلي ياما عرفنا وسكتنا وطمطمنا وماطلع من حلكنا شي ...تقصد عليه وانه كرايبه مايعرفون اني ارمله

‎المهم ظلت تحجي وتبسمر هواية مو مال اكولها كلها ...بس من اجى حيدر نزلتله بسرعة جان توه راجع ...

‎كتله مدام محد رايدني بالبيت وديني لاهلي اني هم مااريد ابقى هنا اروح  احسن من هالعيشة الكشرة

‎طبعا لبسني ولاعبالك احجي وياه ...

‎وظليت كومة احجي عن اهله وعن هدى وبساميرها وطبعا عمتي دتسمع ورشا راسا طبت للغرفة ابتعدت عنه ...

‎مجاوب بس اشرلي بايده وكلي لادوخيني وين ماتروحين روحي

‎عزة اول تالي حيدر هيجي يحجي ويايه ...

‎اني هم ركض لميت بتي وغراضها ولميت جنطتي شغلت سيارتي ورحت لبيت عمي ...ومن دااطلع سمعت عمتي تكومه تكله روح شوف مرتك لاتخليها تطلع زعلانه عيب مصاير شي

‎يكللها يطبها مرض شتسوي خلي تسوي لادوخوني وكامش التلفون يكلب بيه صدك هنا اتخبلت وشلت روحي وركعتها بس محجيت ولاكلمة ...

‎وطلعت ودموعي تجري وهو ولايمه وانوبه ثريا تبجي اتنحست ...

‎من دااصعد الغراض للسيارة حسيت بدوخة لزمتني ...عفتهن وكعدت على الرصيف شويه وكمت ...كملت

‎وحسيت عمتي تباوعلي من شباك الهول

‎حركت واطلعت ...

‎ومن وصلت ظليت ليلتها ابجي وعفت البنية يم صباح انوب هاي الصغير شكد تصير نحسه وحقيرة من ماالي خلك ماتقبل تروح بحضن احد وصارت  تستغرب من صباح وظلت تبجي زهكتني اخر شي عطت عليها ونومتها كوة وهاي جانت اول مرة اعصب بيها عليها بحيث كلما تباوعلي  براطمها تنزل جوة وتتختل مني ...

‎وحجيت لصباح كلشي

‎هي هم الحمد لله عقلها جبير وفاهمه هدتني وكالت الشغلة موخاليه تماما مثل ماجنت احس انه اكو وحدة خاشة بيناتنه ... كتله لانه هو ابد مايحجي ويايه هشكل...اتخبلت وانجنيت ....

‎و بوكتها قنعتني تاخذ ثريا وياها للروضة وهي اداريها والمبلغ اللي ادفعه هواية احسن من المنية ومن قلقي وخوفي انه تبقيهم يم رشا ...

‎والله وصدك قررت ادز البنية ويه صباح

‎وثاني يوم رجعت للدوام وكطعت اجازتي كلت ليش تروح باقي منها يومين خلي استفيد منهم ...

‎بس شنو اني بالدوام وبالي كله يم حيدر ليش هيجي اتصرف ويايه صح هو جان مرات يشتكي مني مقصرة وياه ومرات هامله نفسي واكثر شي جان يشتكي انه اني دائما مشغوله عنه بس شسوي وقت ماكو اشو كله ركض بركض يادوبك الحك ولا الي خلك لنفسي ولا لغير شي حتى مرات والله مشط مجنت الحك امشط خلف الله على الحجاب جان ساتر على كفشتي ...

‎فكلت ويه نفسي اذا اجى وصالحني حتغير حعتني بنفسي شويه زين لو مسويه هيجي من البداية ...

‎بس هو المفروض هم يقدر شويه

‎ والله كله تعب ومال ابطل لا والله مااسويها مصاريفي هواية وهو شغلين يادوبك يلحك مصرفنا ومصرف بيت اهله وجم فلس يذب للديانه ...

‎المهم وراها بكم يوم رحت سويت تحليل علمود الدوخة مالتي وطلعت حامل كلش فرحت ...

‎وقررت مااكول لاحد بس لصباح خابرتها وخطية فرحتلي ...وكالتلي اخذيها حجة وصالحيه لاتكبرين الموضوع ..جان تقريبا صارلي اربعة ايام ببيت عمي وخلال هاي الايام اللي فاتت لاهو اتصل ولادز مسج

‎مجانت عوايده ابد صح جنتا نتزاعل ونتكافش بس ابد منام زعلانين لازم لو هو لو اني نتصالح بس ولا هاي المرة جنت كل شوية اجيك التلفون عسى ولعل دازلي مسج حب اشتياق ماكو جفاف وخشم يابس ...

‎المهم قررت اروحله للشغل جانت تقريبا ساعة اربعة ونص طلعت من الشغل وكبل للفندق هو جان يطلع خمسة وشويه كلت بطريقي نرجع سوى ... قبل مااطلع خليت شويه مكياج ورحتله ...

‎ كل ش زين اتذكر جان يوم خمسطعش بشهر الثاني ...

‎طبيت للفندق جان نوعا ما فارغ مابيه حركة وخصوصا هيجي وكت تتبدل الشفتات فتصير سنطة والا لما اشوف الافندي منتجي على الدكة مال  الريسبشن وحلكة يم البنية اللي لازكه بيه بس هي من جهتها وهو من الجهة الثاني يعني ظهره عليه مااحجيلكم من شفته خطواتي صارن اربع اربع ولو موعيب جان شبختهن ركض حتى اوصله واني هم فتحت عيني حيل لما وصلت ردت اتاكد هذا حيدر لو لا شديسوي ووشديبسبس  ...هي من شافتني فزت ...

‎اني راسا طخت ابالي  واتذكرتها هذه اتعينت ورة زواجنا بشهر  ...

‎جانت مااعرف شكول ذبت روحها على الكل ...بس ماتخيلت تذب روحها عليه وهو حضرته يمكن ممصدك وهسه شفته  بهيجي موقف هو من شافها فزت وراحت ليغاد ... راسا اندار بس اني جانت عيني عليه باوعت حيل  عليها هي  وجنت اتمنى انقض عليها واملخها بسنوني مو بايديه بس فلتت راسا طبت بالغرفة اللي صايرة بظهر الريسبشن خالين بيهاطابعات وشغلات ...

‎هو من شافني فز واخترع وظل يباوع يمنى يسرى حتى يتاكد محد شافنا بهذا الموقف ...

‎اني ظليت اباوع عليه وجمدت لحظة بمكاني حتى مرمشت بس دموعي نزلت لا اراديا

‎كتله هاي شدتسوون ...

‎كلي عيب لاتعلين صوتج روحي للبيت وبعدين نتفاهم ...

‎كتله ياتفاهم بس هو هذا مستواك لناس هيجي زباله

‎وصيحت يتداعفنة ...يحثالة .. ياساقطة ...

‎فهو خلى ايده غلى خلكي يسكتني اني هم دفعته وظليت امشي سريع

‎من شفته بدى يمشي ورايه  ركضت ركض وطلعت ...ودست حيل من طلعت من الباب حركت السيارة وطفرت ولاباوعت عليه ولاعرفت اذا اجى  ورايه لو لا ...

‎الطريق كله لبيت عمي دكيته بجي ...مكمت اشوف دربي  ليش دائما انحط بهيجي مواقف اللي تعمي عيوني عمي ...

‎صا يدك عليه على التلفون مرتين وتلاثة رفضته واخر شي غلقته

‎وظليت الوم نفسي ليش مافضحتها ليش محجيت ليش مخزيتها الساقطة ...

‎ليش مفضحته اله خلي يشوفون خيدر الرجل المثالي شديسوي الي حان كل همه انه ما يلفت الانتباه علينا. ....فكرت ارجع واتعارك وياه بس شيفيد بعد اوووف ...اوووف ليش سكتت

‎روحي طلعت علما وصلت  للبيت وذبيت روحي على نفس مخدتي اللي ياما بجيت عليها من ظلم هالدنيا وبس اصيح ليش !

‎ياربي ليش ...جتي صباح وحجيتلها كلش و فكرت هواية اخابر هيثم اساله عليهم بس هي  مقبلت كالت تفضحين نفسج على خالي بلاش لانه همه مراح ينطون بيه  ..بس راسا رجع عندي الصداع خابرت امي ...جان هي صوتها تعبان ...

‎متعبها سرمد ومشاكله وهي بدت تتندم لانه ضمت على ابويه كل سوالف وهاي صاحبته لازكه بيه ودتقشمره يرجعلها لبيروت وبعز صخامي ملتلي اكو ناس جايين يخطبون سراب وكعدتها الاسبوع الجاي

‎سكتت ومحجيت ولافتحت حلكي

‎هي هشكل تصفى للي امثال سراب ....

‎بجيت و لفيت راسي و نمت بعد مااخذت حبايتين

‎ومااحس الا وصباح  تكعدني جانت ساعة ثمانية تقريبا  ...بوكتها الجو جان بارد حيل برة فجنت ملفلفة نفسي وغركانه بنومتي ... كالتلي كومي حيدر وامه هنا يريدون يرجعوج

‎فبالكوة صحيت ووعيت على نفسي وحتى بتي ماادري شبيها مابيها بقت خطية بحضن صباح

‎ كمت من الفراش وجان اشوف عيوني مورمة  ووجهي مصفر  ركضت للحمام دااغسل بلكت ترد بيه الروح فشفت توتة جاية ورايه ...

‎لزمت رجليه وظلت تحضني انقهرت عليها خطية والله طفلة تعيش بلا ام واب

‎كتلها ها ولج شوكت جيتي شلتها وكعدتها على الجرباية كالتلي عمو حيدر هو جابنا يريدج ترجعين للبيت والله هو كال لبيبي اريد البنية اشتاقيتلها...

‎ضحكت كتلها ام لسان هو كال اريد ثريا لو سارة ...

‎كالت لا والله هو كال ثريا هههه

‎واني ابدل واسولف وياها فتحت التلفون شفته  دازلي كومة مسجات وكومة مخابرات ...مقريتهم ...بعدين جتي وحدة جديدة كاتبلي بيها

‎وهل يحلو طعم الشاي في بيت عمك دون وجهك الباسم ...

‎كلت بگلبي كلها طلعت كلاوات لا باسم ولاشي ...

‎طبعا شويه اتاخرت عليهم خليت مكياج كامل وسرحت شعري على السريع ...وطلعت ...

‎جان جاي هو وعمتي بوستها وسلمت وكعدت وهو عينه عليه يشوف احجي وياه ماهتميت ولا حجيت شويه كعدنا ...

‎صباح كالت روحي لخاطر جية عمتج مرة جبيرة وعيب ترديها ولاتتعلمين تزعلين من البيت ...من هالحجي بس اني جنت مدبرلته خوش خطة العب بيها باعصابه لعب ...

‎هو اتشكر من عني وبوس راسه واتعذر واتشكر من صباح وطلعنا

‎من رجعنا بالسيارة  عمتي كعدت بالصدر وخلت ثريا بحضنها   وهو ديسوق واني وتوتة  ليورة وجنت لازكة راسي على الجامة وصافنة على الشوارع

‎ظل يحجي ويايه مااجاوب بس هو يحجي بشكل عام ...

‎فكلي تدرين خطوبة برزي على بت خاله  هالخميس ...حضري نفسج حتى نروح همه مسوين حفلة نسوان

‎معلقت بس عمتي تحجي وتجاوب ...وهو عينه عليه بالمراية ...

‎اني الطريق كله افكر بس ليش!

‎ليش الناس تخون سواء رجال او مرة يعني حتى لو الطرف الثاني مقصر بشكله او مظهرها اذا هو فعلا يحبه ليش يخون ...يعني اني احبه معقولة اذا شفت واحد احلى منه يهف گلبي ! طبعا لا

‎زين ليش الرجال يخون حتى لو مرته هملت نفسها لفترة معينة بسبب ظروفها ليش هو متزوجها شكل بس؟!

‎ليش مايقدر وبالعكس بدال ماينهزم لحضن وحدة ثانية ينطيها  حنان اكثر واحتواء اكثر بس الظاهر مشاعر هالوكت كلها مزيفة

‎والله ياخالتي ضيعتي عمرج يمكن لو خطيبج باقي الله يرحمه هم جان اتزوج عليج لو خانج مثل مجان ابويه طول عمره يخون امي ...

‎شكد انقهرت عليها ونزلت دموعي ...اتذكرتها لامي من جانت تكعد تبجي جوة بالصالة واحنى صغار ...ولحد ماكبرنا تكعد وحدها وتبجي ...ومع ذلك سامحته ...هي تبجي وهيو  يتونس ويا صاحباته ...

‎اووووف حاله هضيمة والله مااسويها لو شيصير الا ابجيك واطلع حركتي..

‎وصلنا ومن دننزل وداانزل الجنط جر ايدي ديبوسها وخرتها على كيفي ومباوعت عليه فهمته بنظراتي اني رجعت بس مصالحته ...

‎كلي اكو تلاث نسوان وجهال من النازحين  بالغرفة الثانية جايين قبل كم يوم جايبيهم صديق اله  لاربيل باجر  يطلعون دبرولهم مكان ياجروه ...

‎مجاوبت ومحجيت وطول هالوكت ثريا مجلبه بيه وثبرته ثبر...

‎كلي اشو هاي ضعفانة ولج محد يوكلج !

‎المهم ظل يذب حجي واني مااجاوب ...صعدنا واني راسا شلت غراضي ورحت لغرفة البنية ...وفرشت وحضرت روحي انام هو هم رتاسا شال الصغيرة ونزل جوة جانت تقريبا ساعة عشرة وشوية ...

‎لبست ثوب نوم مال عرس  ونمت ...ومكعدت الا على المنبه ساعة سنة بدلت على السريع حضرت البنية وديتها لصباح ورحت للدوام.

‎خابرني واني بالطريق للشغل متفاجأ انه مداومة والبنية ماكو جاوبته بكلمتين البنية يم صباح اخذتها للروضة صار عصبي اشو من كيفج تقررين وراد يحجي سديت التلفون...وقفلته ...

‎اني جنت ناوية صدك احرك دمه ....

‎رجعت للبيت ورة ماجبت البنية وجانت عمتي تكول ليش ماخذتها وياج ...

‎كتلها احسن حتى لاحد يحاسبني على الشغل وتعالي بطلي ...

‎فهي سكتت بعد ماحجت ...

‎اجى للبيت جانوا العائلة النازحة بعد طالعين سمعته صعد على السريع ناوي عركة ..

‎اني هم جنت لابسة لبس نوم واحد لاخ من مالات العرس ومااعرف شلون بس بالكوة لبسته جنت سمانة وهاي الهدوم كلها ضيكانه عليه وخليت  مكياج ولفيت شعري وتوني منومة الصغيرة ...

‎وجنت بغرفتها منتجية على الحايط ودااكلب بالتلفون ...فتح الباب بقوة ...فزت ثريا شويه نعوصت ورجعت نامت ظل هو يباوع عليه ...

‎برد شويه...كلي تعالي اريد احجي وياج ...بغرفتنا

‎زوجي واعرفه يخرب على هالسوالف ...

‎مشيت وراه ...وطبيت للغرفة وكعدت وعيني بالكاع مباوعت عليه ...

‎كلي من شوكت تقررين كلشي بكيفج ...

‎مجاوبت ..

‎هو ظل يحجي عن الشغل وممحتاجين وراتبه يكفي ويريدني اكعد بالبيت

‎وبدى يجر ناعم كتله احجي عن نفسك شغلي مااعوفه وراتبي اليه ومصارفي هواية انت متكدر عليه لا احاسبك ولاتحاسبني ...

‎عااد سكت كتله ثم هالوكت وين يكفي الرجال وحدة يركض ...كتله اصلا الناس تكيف تلكى شغل وبهيجي راتب غيرك يتمناهامن الله ا بس حضرتك  متبطر

‎و انت واحد  اناني  كل تفكيرك حول نفسك شلون ترتب امورك

‎كلي اني اناني من الستة الصبح اطلع ارجع بالوحدة بالليل علمودكم لو علمودي !

‎طعم النوم مااشوفه حتى بس لاحضرتج تحسين بتقصير لا عليج ولا على الطفلة يعني هواية اذا ارجع للبيت اشوفج تستقبليني بدل مااسمع صوت شاخورتج للدرج لو كلما اتقرب منج تعبانة ومالي خلك لو كانما تنطيني كانما  واجب تخلصيه وتركضين ركض

‎الله عليج تتذكرين كم مرة لابسه هذا الثوب انت ؟!

‎اني اكلج مرة وحدة تعرفين لو لا !

‎بس اول شهر زواجنا

‎شوية سكتت

‎وباوعت وخليت عيني بعينه كتله اي حقك مدام مالبس ثوب نوم لازم تروح تعرف وحدة ثانية ...

‎يعني لازم تخوني ...

‎كلي هاا ...هسه هيجي لوفتي السالفة

‎اي صدك تعالي كوليلي و انت اصلا  شجابج البارحة للفندق ؟!

‎كتله شلون عين عليك يعني فوكاها انت  اتحاسبني اجيت للفندق !

‎كون احرجتك يعني!

‎وحصرتك متحاسب نفسك على منظرك السخيف انت وهاي الساقطة

‎اتوترت وعصبت   فدااكوم اكمل عركتي  من على الجرباية لزمتني دوخة ...رجعت كعدت راسا

‎هالمرة كان وحامي غير شكل تماما مكان تقيأ ولعبان نفس بالعكس جان جوع ...

‎حسيت افترت الدنيا بيه ومكمت اركز ...

‎كام يحلف وبتكفر انه ماكو شي هي صح تتحرش بيه بس هو ممفكر شي موزين ...

‎وانه اني موحلوة مني اتجاوزت عليها

‎وظليت احرك بدمي كتله اي صحيح كل كلامك صحيح وصدكت بيك

‎كلي شنو يعني قابل شفتيني نايم وياها

‎كتله لا والله هاي العايزة روح وشوف شراح اسوي بيك

‎ظل يحجي الصدك غير كمت مااسمع زين

‎ومن ديحجي وشافني ساكتة عرف بيه مدااصدكه واني مردت اطوخ بالحجي حتى لاتصير عركة ...فدااريد اطلع جر ايدي ولزمها حيل داادفعه عني وكعت وانضربت راسي حيل بالحايط بصف الباب ماادري هو دفعني ماادري اني انضربت بس هو ماتوقع هيجي رطمه تصير بيه ...

‎راسا وكعت من طولي...

‎محسيت الا والدنيا كلها فوك راسي عمتي ورشا وصباح وحتى عمي وحيدر جان ملفلني حيل بالبطانية بحيث حتى مااكدر احرك ايدي ...حتى لايبين اني جنت  شلابسة انوب اريد اتحرك ماكو ...الكل صاحت حمد لله على السلامة شبيج !

‎عاد حررت نفسي كوة ويه مساعدة صباح هي توخر البطانية هو يرجع يغطيني كلتله ادري شبيك كلنه نسوان عمها نزل ...كال ها مو خلي اجيبلها شي تلبسيها ...

‎راح جابلي شال جبير لفيت نفسي وكعدت

‎مااحجيلكم الخضة اللي جان بيها جانت كلش كافية ظل كاعد بصفي يباوع عليه ومايحجي بس جان متضايق حيل  وكام يحجي ويايه بتنكة كلي ماكو داعي هيجي تتصرفين وهيجي تكبرين الشغلة وتسوين بروحج

‎كتله شسوي بروحي انت دفعتني على الحايط يكلي لا انت ضربتي الحايط والله مااعرف جان يحجي صدك لو يتشاقة شلون اضرب روحي بالحايط يعني!

‎المهم صباح هم ماكلة گلبه هلكد حاجيه وبعدين كايلتله حامل بولد ...

‎كتلها صباح ميتة من الجوع اريد اي شي اكله جيبيلي لفة عفية ضحكت كالت اي عيني يمه شيحمله الجوع ههههه...ونزلت على السريع جابتلي اكل وجتي  ...وهو كاعد بصفي بس حزين وميباوع عليه بس يذبلي حجايتين تلاثة ويسكت    كال عود ماتتخربطين الا وانت لابسة هذا الثوب !

‎واني ماتجاوب ..مالي خلكه  ...

‎كام يتافااف كتله روح انزل جوة لخاطر الله روح اكعد يم عمي ...

‎خليني ارتاح ...

‎طبعا نزلوا همه كلهم بعد جنا بس اني وياه

‎مااعرف ليش من سفته ديطلع وباوعت عليه راسا بجيت ...

‎اتنهد ورجع عليه حضني وبوسني كلي والله انت فهمت غلط ماكو

‎كتله حيدر شفتكم بعيني ...

‎كلي بابا هي جانت دتحجيلي شغلة وجنت داسمعلها ليش تكبرين الموضوع وظليت الح عليه يحلف اخر شي جاب القران وطب عليه

‎وزعل ونزل

‎كلي ماكو شي وبعد ماينطيها مجال خلي نشوف ...

‎ماشفته الما ورة شي ساعة  تقريبا جنت متمددة  ...هو وكتها مراح لشغله للمطعم اجاني هو وصباح مرة لخ

‎كعد بصفي عرفت صباح مصعدته حتى نتصالح ...

‎يكللها والله صالحتها شبيج ...فاقترب مني وشفته يبتسم اجى بوس راسي وكلي

‎صدك انت حامل بولد ؟

‎كتله وخر عني جوعانه مابيه  احجي هواية ...كمت مرة لخ اكل لانه قبل شويه من ظلينا نحجي عفت كلشي وحتى الاكل برد

‎كتلها  صباح عود شلون عرفتي بله بيه  ولد وهو شهر ونص كالت معليج هسه تشوفين اني هيجي جنت برياض ...بس اجوع واكل مااشبع ههههه

‎المهم اتصالحنا بذيج الليلة وهو حلفلي ميت يمين ماكو شي صح كلي فرحان انه حامل بولد بس مجان يحجي  ويايه...ظل ساكت ويصفن مرة على الموبايل ومرة على ثريا وراها عمتي صعدت جابتلي عصير فكللها تعالي يوم اخذه منها وانطانياه كللها ابشرج طلعت العوبة تتدلل علينه لانه حامل بولد   وعمتي تكله يمه هسه مايبين ...يكلها لا صباح تعرف هي كالت ههههه

‎المهم اني هم كمت اتعيقل عليه واتدلل ...بس هالمرة غير شكل كمت ابدل واسوي واعدل كلبت حالي كلاب ...بس فعلا مااعرف ليش جنت احس نفسي خفيفة وفرحانه وعقلي كام يشتغل زين ...وحتى هو  محجى بعد لابطلي ولا شي ولاحتى عن ثريا تروح للروضة ...

‎بالعكس كمنا حتى توتة اندزها للروضة خطية

‎ورة كم يوم صارت خطوبة برزي رحت سويت شعري ومكياجي بالصالون ولبست بنطلون لونه عاجي وسترة قصيرة لونها فيروزي على سمائي واشتريت شال الها كله شغل طلع اللبس كلش حلو والكل اتخبلوا عليه حتى بقى هو صافن بس هو طبعه  مكدر بعد يحجي  لانه قبل جان يكلي شدعوه هالمكياج شنو رايحة حفلة

‎ها اها صدك رايحة حفلة ...ورجعت عمتي تحجيله شكالو عني وشكد مدحوا بيه ...

‎مااحجيلكم شلون انفش ريشي هههه وشويه هاا رجعنا مثل قبل بس شنو خليته هو اللي يتمنى ارضى عليه واسامحه

‎بنهاية شهر الثاني خابرتني المنظمة عندي مقابله ورة عشر ايام

‎ظليت الوب شلون اقابل وبتي صارلها سنة وحيدر ممطلعلها جواز...حضرنا نفسنا ننزل ثاني يوم لبغداد نشتغل بمعاملة الجواز وحتى هم اضيف اهله ويايه بالقضية مجنت اعرف شلون جريت رجلي لشغلة مابيها رجعة

‎بروازمن_ورد

33

‎بنهاية الثاني اتصلت بينا منظمة الهجرة انه عدنا مقابلة ثانية يسموها مقابلة محلفين طبعا بعد مرور سنة كاملة من المقابله الاولى ....

‎احنا وبسبب الاوضاع اللي صارت كمنا نستقتل حتى نطلع....

‎ اتغيرت فكرتنا عن الاستقرار باربيل خصوصا اني

‎ بعد ماكنت متثاقلة من موضوع السفر بس هسه لا اريدة وبشدة

‎على الرغم من انه هنا امان والحمد لله مرتاحين و اتعودنا على كلشي  حتى لغتي بالكردي صارت احسن افهم كلشي بس احجي قليل وحتى اللهجات كمت افرق بين السوراني والبهديناني وغيرها ...بس مدام وضع البلد كله ممستقر حتى هنا وخصوصا من صارت فقرة الرواتب اللي بدت يوم عن يوم نسمع اشاعات انه ماكو الشهر الجاي رواتب ويرجعون يدفعوها ولو متاخرين ...فحسينا مو بس احنا الكل انه الوضع يغلي اصافة الى وجود تهديد داعش اللي يوميه كمنا نسمع ها اتقدموا وردوهم البيشرمكة وهكذا ...

‎فبالبداية حضرت نفسي اروح وية حيدر رجلي لبغداد هم بحجة انطلع جواز لثريا هم اشوف اهلي صارلي بالشهرين وتلاثة منازلة ...كلش اشتاقيتلهم وحضرت جنطنا وهاهي نازلين رجع حيدر بالليل كلي انزل وحدي انت ماتجين يكولون الوضع موزين صايرة انفجارات ببغداد  وحتى الطريق موزين  ومو مال اوديج طيران ...

‎ماكو هيجي خيبة امل بس ماحجيت ولافتحت حلكي جان كلش تعبان وزهكان حتى من حجاها جان متمدد ودينام ...

‎فما لحيت ولا سالته ولاشي

‎بس مداومت ثاني يوم اخذتها اجازة لنفسي كعدت من الصبح اخذت ثريا ورحت لبيت عمي وبقيت هناك تقريبا للستة ونص خابرني حيدرعلى الرغم خطية هو طالع من وجه الصبح وواصل الظهرية بس محد امشيله المعاملة كال  اجراءاتها متغيرة كلها  اول شي لازم صك من مصرف واحد يتعامل ويه الجوازات وطبعا المصرف مايستلم بعد ساعة ١٢ يكول ازدحامات كتل والصك يطلع ورة شي ساعة بعدين يروح يقدم المعاملة لدائرة الجوازات كون قبل العشرة الصبح ويرجع عليها فد بالثنتين ...كلي كلشي ماسويت راجع لبيت اهلج ...ومن دنسولف كلي اشو صوت صباح انت وين ؟

‎كتله جيت لبيت عمي من الصبح

‎اشو هذا ضاج كال هو يوم واحد مااتحملتي تكعدين بالبيت يم امي ...وسد التلفون ...حسيت بيه ضاج من تصرفي لميت روحي والبنية ورجعت للبيت...

‎وبقيت كم ساعة جوة وية عمتي وصعدت نومت ثريا ونمت دكيت عليه مجاوبني ...خابرت امي كالت صعد نايم حتى مقابل يتعشى ...

‎مااعرف شبيه جان كلش متنرفز وروحه بخشمه

‎وثاني يوم العصرية يله خابرني كلي خلصت المعاملة مال الجواز ومن نروح للمقابله قبلها بيوم استلمه وهسه  راجع لاربيل ...ماعرف ليش جان گلبي عليه صوته حزين ...

‎بالليل يله وصل واني ظليت بالصالة انتظره اروح واجي على الشباك ...قلقت حيل عليه

‎اول مااجى ركضت عليه حضنته وبوسته ...يله گلبي هدأ جنت كلش خايفة صدك الرجال الحنين عمود البيت وضواه ...جنت احس اكو شي ضايع ومفقود وننتظرة يجي ...هو راسا سال عن ثريا كتله نامت قبل شويه فكلي شكد اشتاقيتلها الحقيرة امج اكلت راسي ليش مجبتهم اشوفهم كتلها اسبوع وجاييكم ...

‎اتعشى وصعد بدل ونام ..

‎ظليت صافنة معقولة هذا حيدر اشو مو عوايده ...

‎وبدى الفار يلعب بعبي مرة لخ بس لا هاي العوبة رجعتله مرة لخ وتتحرش بيه اشو گلبي ممرتاح وظليت اضرب اخماس باسداس ...

‎بس شنو بيدي هو الوضع كوة مستور ...

‎وراها بيومين حيدر خابر ام توتة مرة اخوه المرحوم ..

‎وراد منها تجي لبغداد تطلع جواز لبتها

‎اشو هاي اتخبلت ليش اطلع جواز لبنتي ومنو كلك اني اقبل تسافر وياكم كطنة وشيلها من اذنك

‎كلها خوش لعد براحتج لاتطلعيلها جواز تعالي اخذيها ربيها طبعا هو يعرف رجلها مايقبل وعيالها ياكلوها اكل ...

‎فحصرها بهالحجاية ...

‎كلتله مااكدر اجي اخذها تعيش يمي

‎انت تعرف رجلي مايقبل ...

‎ثم اني نفسة شيجبني بغداد توني والدة واصلا رجلي مايقبل يجيبني لاربيل يكول الطريق خطر

‎كللها لعد شلون اريد اسافر وين اخليها

‎كالت مااعرف وين اتخليها شسوي هسه اذا انتو كاعدين بتلفات الدنيا ...

‎كالها لا والله ليش ماتكعدينا بمعرفتج بله!

‎وحجاية منها وحجاية من حيدر وودي وجيب وهو يكللها تعالي على الاقل طلعيلها جواز...

‎ماتقبل تكول اخاف تاخذوها وتروحون مااكدر اعيش بلا بتي وهي صارلها تسع شهور مشايفة بتها بحجة الاوضاع وبحجة رجلها مايقبل يجيبها ظلوا يتصايحون ف

‎حيدر ضاج كام يعيط عليها ولج لو تطلعلها جواز وناخذها لو تجي تاخذبها فهنا واذا لا هاي ولاهاي والله اتحلمين بعد تشوفين توتة احرمج منها ليوم مماتج ....فهي

‎سكتت محجت جان تكله اسال رجلي واجيك ...اشو هاي سدت التلفون بوجهه ...

‎عصب حيدر وكام يغلط ويفشر عليها

‎اشو شويه سمعنا صوته توتة تبجي على بجي عمتي تخاف حيدر صدك يرجعها لامها وجنا نشوف عمتي كاعدة تبجي و

‎ظلت تتوسل بيه يمه البنية تروح بالرجلين وهاي بت العزيز نور عيني ...وحيدر يطمنها لو تنكلب الدنيا مايعوفها لامها ليش مايعرف شلون عايشه هي هناك انوبه هاي الطفلة ياذوها ...

‎كللها مااسافر اذا مو انتو ويايه لايظل في بالج...

‎بس هي ظلت قلقلة ماكو شي ساعتين اتخربطت علينا وركضنا بيها للمستشفى وشكد انطمنها انه ماكو سفرالا هي ويانه بس خطية بعد گلب ام والله يساعدها ...

‎وحتى هي امها هم حقها يعني صعبة الواحد يتخلى عن ضناه هم على الاقل اذا تشوفها بالسنة مرة يبرد گلبها اذا سافرت لامريكا بعد صدك للموت ماتشوف بتها !

@@@@@@

‎حيدر بذيج الايام جان كلش عصبي ومتنرفز على طول حتى بته مايشيلها مع انه روحه بيها فمجنت احجي وياه ولا اتجرأ اكله خلي نلغي فكرة السفر ...

‎ورة شي خمسة ايام نزلنا كلنا لبغداد وخلال هاي المدة جان حيدر يخابرة ام توتة وهي ماتجاوب لو تغلق التلفون

‎من وصلنا لبيت اهلي جانت عصرية مطلعنا كلش من وكت لاربيل

‎فاول مادخلت امي راسا اخذت مني ثريا وتوتة تصيلحها جيبيها هاي ريمي مالتنا ...هي اول من دلع ثريا ريمي لانه جان ثكيل عليها الاسم ...

‎وامي تعندها تكلها لاعيني هاي مالتنا وذيج تبجي وتصيح هههه

‎صح جانت امي تضحك وتتشاقى

‎بس حسيت وجها شاحب ومتوترة كتلها خيرج يوم ابتسمت وماحجت وبعدني بالباب اجى ابويه ورانه خطية وجهه تعبان وعيونه حمر

‎كل ظني متعاركين هم ويه سرمد لانه مشاكله مدتخلص بس هالمرة طلعت الشغلة غير شكل ركضت عليه حضنته وبوسته بس هو جان كلش منهك خفت عليه لايصير بيه شي ركض هو اخذ حبايته واتمدد بفراشه ورة ماترخص من حيدر ...اني هم صعدت حضرت غرفتي القديمة حتى عمتي ورشا يرتاحون وحضرت غرفة مسرة الي ولحيدر وشفت بيها هواية غراض وجنط وهدوم ...

‎نزلت كتلها لماما شكو اشو البيت جنه ملغم لا انت ولا ابويه على بعضكم ...وشنو هاي الجنط مالمن

‎كالت اي هسه جنت دااريد احجيلج قبل فترة يمكن شهر واكثر خالتج كامت تشتكي من الولد مايسمعون كلامها ويوميه يتاخرون برة البيت ويكتلون سراب ويحاسبوها على الكلمة

‎كتلها مو كلتوا سراب حتنخطب

‎كالت شبيج دااحجيلج هسه ...

‎هو ابراهيم لاكفها تحجي ويه واحد ...كوم دكها و اكتلها وملخها من البسط

‎كتلها ابراهيم هو هالكده وهيجي يسوي ....

‎فكالت دباعي ...خالتج مدخلة تتفاككهم انوبه  ابراهيم اغلط على خالتج ومتجاسر عليها ...وخالتج مخابرة ابوج هم على السريع رايح عليهم هالحجي جانت مغربية توني راجعة من العيادة ...

‎ويتعاركلج ويه ابوج ذيج العركة ...

‎وبالكوة ابوج ساحلة وجابه هنا خالتج كالت بعد مااريده بالبيت هذا ادبسز ويبات بره البيت لو يرجع متاخر

‎المهم هذا صاحب سراب اجى خطبه  ثاني يوم واحنى كيفنا راسا قبلنا كلنا نخلص منها ومن مشاكله وهي العوبة كايله اني مطلكة عود ذو الفقار مايخلف الله يرحمه وابوج سكت ماحجى كال هم ميخالف بس خلي تتزوج ومن ذاك اليوم لحد هسه بعد مارجعوا وهذا كلما يروح للمدرسة

‎اني ماكتلج احنى مانقلناهم بقيناهم بمدرستهم تعرفين هي نفسها قريبة جانت على  بيت عمتج وعلى خالتج فبقوا  بيها نفسها

‎فهذا الافندي من يطلع  مناك يمر على اخته يبسطها ويجي بعد لج وياها فد لجة

‎ اخر شي ابوج هم لزمه ودكة بالعودة ...ابوج اللي ماكاتل جاهل بحياته ...

‎كتلها عزة عود ليش هيجي سوى بابا !

‎كالت عيني ماينجرع وعينه قويه ماتنكسر و اخر عركة فاشخ ولد وياهم بالمدرسة هو وصديقه مااعرف شحاجين عليه ...

‎اني صدك اتفاجات كتلها هذا شبيه اتخبل عود الفقير بيهم !

‎شفتي ! وهاي صارله تلاث ايام مهزوم من البيت ...

‎اني هنا صدك انصدمت وظليت فاتحة حلكي كتلها شتحجين كالت اي والله حتى مانعرف وينه وهاي ابوج مخلى مكان مدور مخلى اصدقاء مالزمهم وسالهم انوبه خوفنا من اهل الولد لايسووها عشاير؟!

‎عزة ولطام صدك تحجين؟!

‎فامي كالت لعد شعبالج ماتشوفين ابوج شصاير بيه ...اذا همه فاتحين راسه لذاك الولد حتى هسه مانعرف هو ضاربه لو صديقه الولد مشتكي على اثنينهم ...

‎هاي تاليتها مراهقين وبلا اهل شلون الواحد يسيطر عليهم!

‎طبعا ظليت افر براسي هاي شديصير وشلون ؟!

‎والله خطية جهال عمتي الله لايوفقه وينتقه من كان هيجي السبب بضياع عائلة كاملة

‎بهالاثناء خلصنا الغدا وحضرناه صعدت اصيحهم فوك لكيت حيدر نايم فمكعدته ...حسيته تعبان ...اتغدينا وكملنا دنلم المواعين خطية هذه  رشا كلهن بدقايق لمة السفرة وغسلت المواعين وحتى سوت جاي

‎امي كلش انقهرت عليها وحبتها لانه كلما تجي لبيت اهلي تنظف البيت يله تطلع ...

‎فكالت شكد حبابة وفقيرة هاي البنية حتى حسها ماسمعتها شفايتلي لو اخذها لسرمد ...

‎سكتت ماحجيت لانه اصلا امي ماتدري واني هم محاحيتلها عن حالة رشا ...

‎بس هي عقبت على كلامها كالت يمكن اكبر منه هواية مو

‎كتلها اي اكبر من سرمد ...

‎شويه ودكت الحاسبة بالصالة جانت مسرة ...امي اشرتلي لاتشيليه ...

‎كتلها شعجب ليش ...

‎كالت شنو ليش !

‎هسه هم تاكل راسي واني بعد مالي خلك الكم والله العظيم

‎منا سرمد مدااكدر اسيطر عليه يوميه لازم يحرك دمي وجايبلي مشكلة حتى كمت اخاف اروح اسال عليه بالكليه مندري يداوم لا واخاف ابوج يعرف  يصير بيه شي ويروح الرجال مني ...

‎كتلها لعد شلون ماما غير تعرفين اخباره هاي مو خوش ...

‎هي عصبت كالت الادبسز هو صاير يهددني اذا ماتسويلي وماتنطيني اكول لابويه انت هيي وهيجي ضميتي عليه !!

‎كتلها لعد وشنو هالسيارة اخر موديل اشتريتله ؟!

‎كالت ابوج اخذها اله كال بلكت الله يهديه ويبطل من سالفة هالسفر والركض وره هاي الساقطة اللي يعرفها مخبلته ومدوخته بس لامتزوجها ومتورط وياها

‎صدك سارة مدام انتو هنا بلكت توصين حيدر يروح وراه للكلية والله مابيه اروح واصلا اخاف ابوج يعرف مني ويكلب الدنيا عليه ...خلي يعرف اخباره

‎كتلها مايخالف اكله شكو بيها

‎كالت هي شغلة ساعة ساعتين ويرجع

‎شوفيه من الصبح طالع لحد هسه مراجع للبيت واحنى ساعة سبعة ...

‎بالحجي جانت عمتي ورشا كاعدات يشربن جاي بالاستقبال الصغير ويباوعون على التلفززيون وابويه يلعب ويه ريمي وتوتة ...كلش حب توته وهي هم تحب تلعب وياه

‎ واحنى نسولف ونسوي الفواكه ...دك السكايب مرة لخ

‎كتلها ماتكوليلي شبيها مسرة

‎كالت لاتجاوبين هاي صارلها يومين تدك عليه دزيلي فلوس اريد فلوس  اذا قبل جانت تستحي تطلب هسه عيني عينك وهم متريد الف والفين لا دفتر دفترين والبارحة اتعاركت وياها ادري منين اجيب يعني اشتغل كله لعقيل افندي ...

‎سلام بالكوة يسلم علينه تكولين  ماخذ مسرة ببلاش ...

‎هي ماتروح تكول لاهله اريد لانه اصلا ماينطوهم يكولون ماعدنا !...

‎ادري ماعندك شكو ورطت نفسك  بهيجي شغلة منين اجيب اربع دفاتر؟!

‎عزة اربع دفاتر ؟!

‎كالت اي والله حتى لو اريد ادزلها ابوج مايقبل ...محد يفكر باحد ...وانوبه ماتستحي تكول اعتبروها حصتي بالبيت ! موتتنا واحنى عايشين عاد سديت التلفون بوجهها كتلها وكت مانموت تعالي اخذي حصتج ...

‎ماتكوليلي شصير كل واحد بيكم يجر بصفحة ومااعرف المن ارضي والمن  انريد واحد بيكم يريحنا ماكو...

‎بگلبي كلت الف الحمد لله ياربي سترت عليه برحال حافظ عليه ...والا والله خطية اهلي شنو هالمصايب هاي عود بس احنى لو العالم كلها هشكل؟!!!

‎بالليل خابرت خالتي اقبال الجبيرة واخذت منها عنوان ابنها اللي سافر قبل فترة لامريكا كتلها يحتاجون مني كفيل واذا يقبل حتى اخلي عنوانه هو جان كاعد بكاليفورنيا الكاهون ومصارله كم شهر من طالع هو نفسه مصطفى اللي بنته توفت باللوكيميا ...فكالت اي عادي ليش مايقبل ..

‎المهم اخذت العنوان ورتبنا حالنا عكب  باجر نروح للمقابلة

‎ثاني يوم حيدر راح جاب جاوز ثريا واجى وهم مارجع الا بالثنتين الظهر

‎طلعنا العصرية كلنا رحنا افترينا ورجعنا حان الجو بارد وناشف ...

‎ومن رجعنا شفت سرمد واكف ويه اصدقاءه بالباب ...حسيت بوكتها ولا اعرفه ولا اخويه حتى مايهتم لا الي لا لبتي مع انه شكد جان يحب الجهال قبل !

‎وثاني يوم من الصبح طلعنا للمقابله كلنا

‎..طبعا اني مجنت اعرف بالاجراءات ولا الي خبرة ...فكل ظنا انه نكدر نضيف بيت اهل حيدرويانه فجبناهم ويانه يعني امه ورشا وتوتة ...

‎من وصلنا بالبوابة ميسالون الاشخاص المسموح الهم باىمقابله خصوصا اذا عائلة بس شافوا الايميل كالونا فوتو واحنى واكفين هذا الحجي ورة ساعة الا شوية كتلنا البرد والبنات الصغار كاموا يبجون ... اجى ياخذ جوازاتنا كال اسم اهل حيدر مموجود لازم يرجعون ...عزة شلون يرجعون وحدهم كال اي مايحقلهم اصلا يدخلون للمنطقة بدون استدعاء بس  جانت بس ثريا عدها اضافة حيدر عصب وشاط عليه وكام يرزلني كدام العالم ...كلي غير ادزين بيها ايميل ...اني كتله والله مااعرف شمدريني ولا ختى سائلة احد ظل يدردم عليه بس كلشي ماحجيت وبين وبين نفسي ظليت اتكرضم

‎بله  هسه شلون يطلعهم لو تعرفون شكد صعبة الشغلة  ومال يبقون برة ينتظرونه بهالبرد مستحيل

‎مااحجيلكم بالف يا الله و ساعة يحجي ويه اهل السيطرة يله اقتنعوا  وهاي اني والبنية واكفة برة مادخلت لازم كلنا سوى عادطلعهم برة واجرلهم تكسي لبيت اهلي انوب بيت اهلي فارغ منو حيفتحلهم الباب؟! ومنو حيبقى يمهم بالبيت صدك بهذلة!

‎ماتدرون الموقف اللي صرت بيه شكد كان مزعج...

‎رجع حيدر ودخلنا نفس الاجراءات وهو كلمة مايحجي ويايه ...معصب بس ردت اعرف وين يروحون واهلي مو بالبيت المهم عرفت منه بعدين مخابر على ابويه وكايله لاتشيل هم هو يدبرها ...مخابر على امي وخطية عايفة شغلها وراجعتلهم...

‎هالمرة جنت ماخذه احتياطاتي من اكل وشرب وهدوم لريمي ...

‎واجى المحلف جان امريكي اشكر اول مرة قابلنا سوى اني وحيدر وبعدين كل واحد وحدة وهم رجعت حجيتله قصتي من البداية للاخير بس اتفقنا انه مانكول عايشين باربيل لا ببغداد حتى يسرعون المعاملة لانه مكان خطر و كل هذا وعقلي وبالي يم توته شلون راح تجي ويانه انوب المترجم من سالناه كال لازم عدكم وصاية عليها يله اتضيفوها يعني امها تسويلنا تنازل عنها  هاي هم شغلة صعبة ويمكن مستحيله شلون راح اندبرها

‎راسا حيدر قرر يعزل نفسه عني ويروح بقضية هو اهله واني وجهالي بقضية لخ ورقم...

‎يعني اذا طلع سفري يجوز بس اني!

‎بروازمن_ورد

34

‎من خلصنا المقابله ورجعنا للبيت الطريق كله حيدر جان ساكت وشايل هم ...اني هم جنت اعذره صار بين نارين نار يسافرويعوف اهله  ونار يبقى ويه اهله ويعوفنا والقرار صعب بالحالتين  ...فقدرت هذا الشي وملحيت عليه ...وهو هم جان ضايج لانه اني اهملت الموضوع مال الاضافة ومجنت حريصة وانتبهت ..وخليت اهله يتبهذلون يعني خطية جيتهم على خالي بلاش صارت ...

‎من رجعنا لبيت اهلي اخذ مني ريمي وهو بدللها ونومها اني كمت ويه رشا سويت غدا لانه جانو ممتغدين ولو امي جانت محضرة صينية برياني وكباب من محل قريب علينا اسمه تودي ...

‎بس حميت ورتبت ...فصعدت دااصيحها ...حضني وكلي لاتزعلين عليه

‎سارة اريدج تتحمليني وتقدرين ظروفي وحتى لو اقسى عليج ترة مو بيدي والله ...تعرفين معزتج يمي ...

‎كتله حاسه بيك وادري انت تعبان فلايكون بخاطرك شي ....

‎بوسته ونزلنا

‎ومن رجع ابويه جان ابراهيم وعلاء وياه كلش فرحنا الحمد لله اللي رجعلنا بسلامة ظل بالنا عليه

‎طلع الافندي مهزوم هو وصديقه يم كرايب الولد ببعكوبة خايفين من مصيبتهم اللي مسويها وابويه مخابرهم مطمنهم يرجعون وهو يحل الموضوع وخطية دافع ذاك المبلغ لاهل الولد المضروب مع انه طلع صديق ابراهيم هو اللي ضارب الولد المهم فدوة الفلوس بس عدت على خير وسلامه ...

‎وهم بالليل اخذه وراح يعتذرون من اهل المصاب ويتصالحون حتى لاتصير عرك ومشاكل ...بعدين من يلتقون بالمدرسة

‎وثاني يوم كعدت الصبح ساعة ستة ونص يمكن على صوت المولدة المزعج ....

‎كعدت ومر بخيالي السبع سنوان شلون ركضت ركض ...وهم كوة شلعت روحي من الفراش وعرفت امي طالعة عدها حالة مستعجلة ونزلت جوة وجان الكل نايم

‎واني على على الدرج  شميت ريحة جاي دارسين الله شكد اشتاقيت لهاي الايام ...اشتاقيت لكعدة الصبح ولروحي من اركض ركض للدوام ومجنت شايلة هم بس نفسي

‎اشتاقيت لزيارة عمتي الله يرحمها وضحكتها

‎وجية مسرة النا اللي ننتظرها اذا مويومية فبين يوم ويوم هي وسدير حبيبي جان يدخل على طول مزاعلني هههه ليش مانطيتيني وليش ماجبتيلي

‎ياربي شلون هيجي يفوت الوكت بسرعة ومانحس بيه ...

‎للاسف نعيش نفسنا بتعاسة بينما بعدين نكتشف انه هي اسعد اوقاتنا ...

‎كعد ابويه وركضت حضنته ودموعي بعيني ...

‎كلي ها باباتي شبيج

‎كتله مااعرف اشتاقيت اضمك واحضنك مايصير

‎كلي لا ولج شفتج تبجين وكعتي گلبي ...

‎روحي كعدي اخوج خلي ينزل يتريك يلحك يروح للدوام ...

‎وبگلبي كلت شيكعده واني لقبل شويه اسمعه يبسبس بالتلفون ...

‎مااعرف ليش حسيت سفرتي قريبة وحشتاق حيل لاهلي مع انه الناس الي جانوا ويانه بالمقابله كالو تتاخرين سنة وسنتين وكلمن وحظه وتعتمد على المحلف اللي قابلج

‎والله هو بوكتها المحلف كلش انقهر عليه واتفاعل ويايه بعد مااعرف خلي نشوف الله شقاسملنا ...

‎طول الايام اللي جنا بيها ببغداد ام توتة مشالت التلفون تجاوب حيدر حتى يطلب منها الجواز

‎والمشكلة اصلا احنى مانعرف عنوانها ....

‎ظلينا بحيرة شلون حنقنعها بسفر بتها هم خطية صعبة عليها بس بكل الاحوال هي ماتكدر تاخذها وتربيها

‎واجبنا احنا صار على نتبناها

‎ وحيدر هم نبه عليه كال البنية امانه عليه وعليج لانه امي الله يطول بعمرها مباقية ورشا مايعتمد عليها ...هم صدك بكل الاحوال مردودها النا ...

‎واني ابد مجنت امانع بالعكس هاي صارلي تلاث سنوات هالتها بعيني وشنو اشتري لريمي لازم نفسه الها عدا انه جتت اني اعتني بيها من عمتي مموجودة او مريضة ماتكدرلانه هي مجانت تحب رشا ماتروح يمها

‎المهم رجعنا لاربيل والطريق كله كل واحد بينا فكره يودي ويجيب عمتي اللي ماتريد وتخاف حيدر يسافر ويعوفها ووهي عدها الصغيرة ورشا ...

‎مااعرف هم خطية رشا هذه تبقى بركبة حيدر منو عدها غيره ...اوف واني وجهالي شلون ...

‎الله يساعده ويسهل امرنا كلنا ...والله وجان بنص رمضان يخابروني كالو انت مستعدة للسفر طبعا اني جنت ست شهور بطني واصوم يوم وافطر كم يوم ...مرات اتخربط بعد مااكدر ...

‎المشكلة انه احنى سوونا قضيتين اني وثريا برقم قضية وحيدر وامه ورشا بقضية ...بس من طلع سفرنا طلع اني وحيدر ...فجان اكو خطأ بكل الاحوال اني راسا من يمي طلبت تاجيل ...

‎وانتبهوا عدهم خطأ بالملف واعتذرواكالو  هواية تصير خربطة بسبب الاعداد الهائلة. اللي تسافر...

‎المهم بالعيد والله وجانت تجي ام توته وطول هالفترة هي وحيدر يتعاركون ...

‎ماتقبل لاتتنازل عن البنية ولاتجي تاخذها وبكل صلافة رجلها يكللها وهمه شعدهم مسافرين ...

‎واتذكر هم بذيج الفترة انفتح اللجوء لاوربا والناس كامت تطلع افواج وافواج عن طريق البحر ويوميه سامعين عائلة غركانه وحتى هم واحد من اصدقاء حيدر ببغداد متزوج وعنده ولد غركوا كلهم كلش انقهرنا عليه لانه الطفل كان بعده صغير يعني سبحان الله العراقيين من مصيبة الى اخرى ...

‎اني كلش تعبت نفسيتي والحيرة كتلتني وكمنا يومية تقريبا اني وحيدر نحجي بالموضوع وشلون نرتبها واسافروحدي لو لا لانه هالمرة اذا طلعوا موعد سفر واجلت يسقط حقنا بعد ..

‎المهم بيومها جتي ووكعت دخيل على رجل حيدر لايطردها ويخليها تشوف بتها صارلها يمكن سنة مجاية وكوة رجلها موصلها ...وطبعا احنى حسينا انه رجلها جان يعلمها الحجي  بالتلفون حتى نطردها وتصيرله حجة نكطع جيتها من الزيارة وظلت تتوسل بيه وبعمتي كالت انت ام واتعرفين شلون اعوف بتي ياناس ياعالم والله ضناي وهاي عزيزة بس الله وحده العالم شلونها ظروفي اني راسا كمت ابجي ماتحملت ومعرفت شسوي وين انطي وجهي اني هم ...يعني الغي السفر واكعد لو اسافر وحدي واثنين جهال شلون!؟

‎جانت حيرة مابعدها حيرة والله لا يحيراحد من عباده ...

‎البنية هم كبرت وهالسنة تدخل مدرسة بعد فجانت جايبة بس جنسيتها وماقبلت اطلعلها جواز ...

‎وهي تبجي وتتوسل وحيدر يصيح ويعيط يكللها لا انت هيجي راضية ولاهيجي شنو يعني علمودج اضيع مستقبلي ...

‎المهم من دتطلع اجى زوجها عليها وبوستها ...

‎كتلها الله كريم ...ربج يسهل

‎وزوجها  جان مبين عليه يريد يتعارك وكوة طببنا حيدر جوة لايطلع ويواحد يلزم الثاني ...

‎وانسدت الحجاية فترة ورجع خيدر يحير بالموضوع وعمتي هم كلش تعبت صحتها خوفها تعوف البنية وتسافر ويه ابنها واتخاف تبقى يم الصغيرة وتعوف ابنها ...هم خطية تعب بالها ...

‎المهم اني بوكتها اتاخرت بالسونار مرحت كلت الا  ورة العيد لانه جنت كلش خايفة لاتطلع بنية وهمه عدهم ست حفيدات وولاحفيد ولد

‎فكلت بلكت ولد وشويه افرح حيدر وافرح عمتي .. ها يعني نطلع من هالجو ...ولو هو جان على طول يكولي  بنية ولا ولد الحمد لله على كل نعمة اهم شي سلامتكم

‎ فرحنا اني وصباح للسونار ورة العيد بيوم جانت عصرية والف الحمد لله طلع عندي ولد ورجعت الدنيا طايرة بيه وخطية دمعت عيونه لحيدر وظل ييبوس بايدي ويتعذر مني لانه جان تعبان واخاف ماذيني بس اني جنت اعرف لا متاكدة انه حيدر يحبني ويموت عليه هم ...

‎ولو اعيش العمر عمرين مراح الكى واحد مثله يداريني حتى البنية جان مرات من يكعد قبلي ينظفها ويوكلها ويداريها ويكلي نامي ارتاحي اني كاعد ومن يكون بالبيت ماتوكع من حظنه هي صارت كلش محبوبه شكرة ومدبدبه وعيونها كباروملونه ياهو اللي يشوفها يحبها دمها عسل ...وماشا الله كامت  تمشي وهم تركض وره ابوها هي بعيد ميلادها بدت اول خطوات فدوة لعينها ...

‎وبقينا فترة نختار اسم للولد ...

‎اني على كولة حيدر سقط حقي بالتسمية لانه سميت البنية ثريا ...

‎فبعد هو يسمي الولد

‎ عمتي رادت نسميه عدنان على جده الشهيد الله يرحمه بس حيدر كال لا اسميه محمد وفوكاها يريدله اخوان فد اثنين تلاثه هههه منين اجيبهم ومنو بيه يربيهم ! كتله خليك احلم قابل بفلوس هههه

‎وبشهر الثامن بطني ثكلت حيل وصار مابيه بعد اداوم وحاارة ...اخذت اجازة بلا راتب صار شغلنا كله غير شكل ويومية محولينا من مكتب لمكتب  وكل تلاث شهور يكولون  ماكو ميزانية واحتمال المكتب يسدوه حتى مرت هواية جنت اكمل الشغل من البيت ومااداوم ...

‎واخر شي كالوا حيسوون تقليص وطبعا اسمي كان موجود بقائمة التقليص ..فاخذت الاجازة لما يبطلوني ...

‎وجنت كلش اتعب بعد ماالحك مو مثل قبل البنية كامت تتحرك والنهار كله اركض وراها لجت ويه البراد مال المي كمنا مانعرف وين نخليه تفتحه وتحط راسها جواه

‎بس اني علمت توته تراقبها من اكون مشغوله اخاف تروح منا ومناك لو تلعبلها بشي لو تسويلها مصيبة ...

‎فبهءا عمرها جانت كلش متعبة وعلى طول اركض وراها

‎حيدر هالفترة جان يوم زين وعشرة لا بس الحمد لله خلص فتح دينه

‎وجان موضوع السفر وجواز الصغيرة وسفرها كلش متعبه ...الله لاينطيهم خلونا مشلوعين الگلب لاتحنا بالكاع ولا احنى بالسما !

‎وقبل ماادخل بشهري بشي كم يوم نزلت لبغداد يم اهلي ...

‎عبالي ارتاح بس لا والله ابد يوميه شغلة ورة شغلة واخرها ورة شي يومين خطية ابن عمي سامي ابو رياض الوسطاني صاير انفجار وجسمه متروس شضايا بس الله نجاه

‎هم متزوج وعنده تلاث اطفال

‎واني هم كوة حركت بطني ورحت ويه امي للمستشفى وهناك طبعا ليلى ام شهاب زوجة عمي الاولى عدت واتوعدت لعمي يكون يجي يزور ابنه

‎وكامت تدعي عليه كدامنا  ...وشويه وتطردنا بس محجينا سوينا الواجب ورجعنا

‎ادري هو شيكدر  يسويلهم يعني

‎منا هو رجال جبير وكوة يكدر يمشي وولده  اصغرهم متزوج وعنده اطفال اللي مافي يوم سمعت واحد رايح زايره وسائل عليه خطية ...

‎المهم ظلت معمعة سراب واخوانها واهلي واكعين بيها ...

‎وجانت امنيتهم يزوجوها ويخلصون بس ياهو اللي يخطبها يروح مايرجع ...هاي هم  مااعرف شبيها ...هم حظ امي خطية

‎والحمد اتحددت موعد ولادتي بنهاية شهر تسعة

‎هالمرة جنت بس ست ايام داخلة بشهري ومثل العملية الاولى امي قمت بعملية الولادة

‎بس  هالمرة خوفي من الموت جان اكبر جنت ادعي ليل ونهار الله يكومني بسلامة علمود ثريا لاتتربى يتيمة وتصير مثل توته ...لو تكبر مثل سراب جنت كلش خايفة ...

‎بس الله سهلها وكمت بسلامة وحلتلي الكعدة ابيت اهلي طولت هالمرة اربعين يوم عدله يله رجعت ...لبيتي باربيل

‎وصدك لو كالو شكثر مالواحد يرتاح ابيت اهله يبقى بيته عزيز ويحنله

‎ورجع حمودي ويانه هالمرة فدوة لعمره جان  نسخة من ابوه وعمه الله يرحمه من صدك...اسم على مسمى

‎شكله جان ابيض بس شعرة اسود وثخين وعيونه سود حبيب امه ...

‎وعمتي خطية جانت طايرة بيه من الفرح وليل ونهار بحضنها مااعرف يمكن على كولتها ارجع اربي محمد مرة لخ على ابنها الله يرحمه لانه مثل ماكلتكم حباية ومفشوكة بالنص

‎وفعلا محد يحس بوجع حرمان الابن الا الام ....هسه يله عرفت شنو تحس وشلون تخاف على ابنها ...

‎جنت مرات اكعد للصبح ابجي واني نفسة اخاف من يكبر ابني هم يكتلوه لو اتخيل فلانه ابنها مات وفلانه راح وباكوه يووو جانت حالتي حالة بكأبة مابعد الولادة صدكت ادمرت  نفسيتي ...

‎ومصدكت شويه نسيت وبديت الهي نفسي وابعد هالتفكير السئ من بالي

‎واحنى هم راسا بوكتها طلعناله جواز وضفناه للقضية ..وماكو شهرين خابرونا تعالو فحص طبي جانت بداية شهر الثنعش ...

‎وركض نزلنا لبغداد مرة لخ

‎ وهالمرة عمي وصباح نزلوا ويانه علمود يشوف ابنه لانه بذاك الوكت يله كلناله خفنا عليه من جلطة ثانية تجيب اجله اسم الله عليه ..

‎احنى هم رحنا للفحص جانت عبارة عن  اشعة النا كلنا كعائلة وحتى حيدر ويانه وجنت خايفة ومرعوبة يكولون ورة الفحص بكم شهر الواحد يسافر واكو بيهم لايطول سنين المشكلة مو بالفحص المشكلة اخاف يطلع سفرنا احنى الاثنين وانوب شلون لازم اناجل وينغلق الملف لو يسفروني وحدي! وشلون ادبرها! لانه اكيد اذا خيدر طلع سفره واهله لا مستحيل يعوفهم ويسافر

‎فرجعنا للبيت جنا ضايجين ومهمومين اتذكر ظهرية  جانت ساعة ثنتين حيدر جاب غدا وياه واجى ...

‎وباردة وحمودي يتنحس ...

‎المهم من وصلنا وصعدنا فوك حيدر لزمني وحضني كلي اريدج توعديني اذا يطلع سفر تروحين وتاخذين الجهال وتصيرين قوية وتحافظين عليهم واني ان شاء الله لازم اشوفلي حل واجي وراج لانه اذا اجلت تروح علينا سارة واني املي كله بهده السفرة

‎كتله حيدر جهالي صغار شلون اكدر عليهم وحدي!

‎سكتنا واني كمت ابجي كتله والله مااكدر شلون انت فكر شلون ...محمد حتى بعده تلاث شهور انت تعرف شلون حتبهذل هناك وكله عليه!

‎مكلي شي غير انه  كلها تهون وتصير سوالف ...

‎وواتغدينا وثاني يوم رجعنا لاربيل وبقى عمي وصباح ببغداد

‎ورجعوا ورنا باسبوعين

‎اغلب الوقت جنت اروح لبيت عمي من اتضايق لانه بطلت من الشغل ماكو وصرت اتضايق واتنرفز من كلشي

‎ فكلت من محمد يصير سنة ادزه وية اخته ريمي بنفس الحضانة اللي تشتغل بيها صباح ...

‎وابدي ادور شغل

‎والله والشتا كله مانزلت لبغداد ولا رحت شفت اهلي فهمه اجونا بقوا يمنا اسبوع مال اعياد نوروز لانه اهلي اتعلقوا هواية بالجهال والحمد لله شفت سرمد علاقته شويه احسن ويه اهلي تكول امي متعرف على طالبه وياه  حبابة وبت اصول ...وحتى معرفها على امي ...كلنا يالله خير بوكتهاةحان سنة ثانية

‎و تكول امي كمت  اخابرها واشجعها انه تحجي وياه علمود دراسته ليش تضيع منه

‎تكول عليها عينا نانسي عجرم هيجي ناعمة وضعيفة وعيونها صفر ...

‎احنى شنريد الحمد لله بطل من شغلة السفر للبنان ...

‎وكالتلي دزت نص المبلغ لمسرة واهله دزوا النص الثاني حتى يرجعلهم قبل ماتسقط اقامته وهو حالف يمين يشتغل ويرجعهم ولو خطية تكول مااريدهم بس خلي يجوزون مني بعد بالطلبات الله اللي يعلم شكد مزهكتها لامي بحيث دافعتلها هذا المبلغ

‎واللي جنت اخاف منه صار

‎بوكتها جنت احضر نفسي لعرس  برزي وهذا جان

‎بشهر الثالث عشرين بالشهر وهناك جانت تخابرتني المنظمة كالو حضري نفسج للسفر انت والجهال بس وحدنا بس هالمرة  بدون حيدر

‎ظليت صافنة مااعرف شجاوب

‎ومرة لخ سالني الموظف حتسافرين!

جنت كاعدة بغرفتي فوك وريمي وحمودي جوة يم عمتي ...اتذكر جانت ساعة اربعة ونص ...شويه ويجي حيدر حتى انروح لعرس برزي ...

الدنيا كلها معطلة واعياد نوروز ...

دك التلفون وخابرتني المنظمة انه موعد سفري ثاني يوم بشهر اربعة ...

وظليت الح واسال عن حيدر كلي اسمه ماكو بس انت وثريا ومحمد ...

والله ماتدرون الخبر نزل عليه صاعقة سواني ثولة وخرسه ...حتى معرفت بعد شحجي ...

اللي افتهمته انه لازم نكون بساحة  بعباس ابن فرناس ساعة خمسة ونص الصبح  ويحقلي جنطتين ام العشرين وحدة اليه ووحدة لريمي و جنطة صغيرة لحمودي لانه اقل من سنتين ...

وحننزل بمطار لوس انجلوس ...

وترانزيت عمان والمانيا

نزلت على عمتي مصدومة مااعرف شحجي

فهي كالت ها حضرتي هدوم الجهال نزليها خلي ابدللهم وجيبي سبع عيون اللي اشتريتها لحمودي حتى احطها على صدره لايحسدونه هذا الحليوة ...وظلت تبوس بيه وتشمسم بيه نزلت دموعي لا اردايا

خطية ظلت صافنة عليه ...كالت شبيج يمه خير خوما اهلج بيهم شي

اشرلتها براسي

لا ماكو شي ...

طبعا همه جانوا باربيل زيارة صارلهم كم يوم وبروحون ورة نوروز ...على اساس بس اتغير كلشي

شكللهم !! صعدت مرة لخ وظليت ابجي وابجي مااعرف شبيه لج سارة صارت الشغلة صدك حتعوفين كلشي وتروحين

شلون اعوف اهلي وحيدر عزة شلون اتحمل يوم مااشوفه ...

واني دابدل اجى وهو مبتسم كلي ها حضرتي نفسج خلي اغسل وابدل على السريع حتى نلحك نروح من وكت

اني ركضت عليه وبجيت ...

طبعا هو راسا عرف مااعرف شلون كلي خابروا المنظمة مو!

كتله اي

سبحان الله كل اللي عرفتهم واعرفهم كانوا مثلي ينتظرون السفر بفارغ الصبر بس من تصير صدك نكوم ندك ونلطم لانه نعرف سفرنا حيكون بلارجعة ولاحنكدر نشوف اهلنا وحبايبنا ...

حضني وهو هم دموعه كامت تجري وخنكته العبرة حتى ماكدر يحجي ...

بالكوة كلي شوكت ...

كتله اثنين بالشهر الجاي

يعني كلها اسبوعين ...

وبس اني والجهال ...

كعد على حافة الجرباية وباوع عليه

كتله حيدر مااريد اروح وحدي والله اخاف ماادبرها

كلي لاتكدرين انت قوية روحي وانتظريني هناك اني خلص لازم اشوفلي صرفة ويه هاي ال.....

على ام توتة...

وبعدين نبه عليه مااكول لاحد الا ان يخلص العرس ...

بدلنا واثنينا وجوهنا تبجي وعمتي تسالني وتسال حيدر نكول ماكو شي ...

بس هي حست ضامين عليها شي ...

رحنا لبيت عمي اخذناهم واهلي هم ...

و الحفلة جانت بقاعة عرس كلش جبيرة وحلوة والالوان اللماعة تبرق ...والدبكة الكوردية ...جانت بنص القاعة ...

الحفلة كلش حلوة بس جنا اني  وحيدر واحد لازم ايد اللاخ وعيونه مغوركة ...

امي سالتني شبيج ماما خوما متعاركين كتلها لا ماكو شي شويه ورحت للحمام حتى ابجي هناك واطلعها الدمعة حصرت گلبي وحسيتها طابوكة على صدري ...

وشوية حلكتني صباح جنت دااغسل فهي عابت عليه وكالت شبيج وجهج بس يبجي واربعة وعشرين ساعة تلطمين ماتكوليلي شكو هم صاير شي بينج وبين حيدر...

عاد من شفتها اني كمت اشهك وابجي هي عرفت الشغلة غير شكل كالت عزة سارة وج شبيج...

كوة اجر وابلع ريكي كتلها صباح طلعت سفرتي بعد اسبوعين

كالت لا والله ...

صدك عزة ...شوكت خابروج ...

اليوم العصر خابروني قبل مانجي وبس اني وحيدر نعرف ...

هي هم دمعت عينها كالت. وشبيج هيجي تبجين يمعودة فرحي حختلصين وكلها كم شهر ويجي رجلج ...

ولو كسرت گلبي والله ...وجان اكو كرسي بصف المرايا جرته وكعدت عليه كالت عود منو حيبقالي عود مكيفة   انتو صرتو كل اهلي و عائلتي ..محد يسال علينا غيركم ..ياربي شلون تروحين وتاخذين ثريا وياج اني كلش اتعلقت بيها ...

اتنهدت وكالت الله يسهلج وتوصلين بسلامة بهالاثناء طبوا اثنين بنات بعد احنى هم طلعنا ...

وبالطريق بلغت امي وابويه وحتى عمتي عرفت ...

الوحيد اللي فرحلي سرمد وكام يحجي عليهم لانه انقهروا ...

همه اكيد ينقهرون منوا بقى يمهم والمن ينتظرون يزورهم على كولة امي ربيت للخارج اني

اماعمتي خطية فتاذت حيل على فركة حمودي وظلت تبجي شلون اخذه منها مرة لخ ....

خطية في كل بالها دتربي محمد ابنها يمكن ...

وصار الجو كله متكهرب ومشحون بالحزن

وبديت احضر نفسي ...وماكو كم يوم صار عيد ميلاد ريمي ...واجتمعنا كلنا والحزن بعيونا امي جانت تعرف بعد الله العالم كم سنة يله اكدر اشوفها مرة لخ ...

وحالي حيكون مثل مسرة ...ولذلك عيونها جانت مدمعات بس ماتحجي تكول احسن اطلعوا وبلكت رجلج يجي وراج وترتاحون ...

ابويه مبتسم ومايحجي بس حسيته مقهور حيل خصوصا على فركة الجهال وحتى عمي وصباح ...

اما عمتي هم ظلت بالزايد متمسكة بحمودي مايوكع من حظنها ...وتبوس بيه تكله حياخذوك مني مرة لخ

وبقينا اني وحيدر الايام الجاية واحنى نعرف حيصير فراكنا طويل وصعب  ...اخذ اجازة من شغلة حتى يشبع من عدنا  يكول اصلا بالي يمكم ولا اكدر اشتغل ولا الي واهس اسوي شي ...

وجنت في كل لحظة اتمنى يكلي كعدي لاتروحين ...ابقي يمنا لو المنظمة تخابر ياجلون سفرنا من يمهم ...بس كل هذا مصارولا راح يصير

نزلت لبغداد قبل تلاث ايام من السفر ...

ودعت عمتي ورشا وبيت عمي ...وحتى هدى هم جتي ...

جان موقف مؤلم كلش...

حبيتها اني العمتي واتعلقت باهل حيدر كلهم صح جانت اخته الجبيرة تضوجني وخصوصا ورة ماجبت الولد

بس هاي صارلي تلاث سنوات وياهم ابد مافي يوم اتعاركو ويايه لو سمعوني حجاية خصوصا هي عمتي بالعكس جنت معززة مدلله يمها ...وكلش ارتاحيت وياها ...بس اكول الله يسهل ويجون وراية ...

وصارت ليله الوداع اصعب ليله مرت بحياتي مانمت للصبح جان المفروض نكون بالمطار ساعة خمسة ونص الصبح ...

فكعدنا اني وامي وحيدر والبقية ناموا ...

جنت احس بامي وحركة گلبها عليه ...

نفس اللي صار بيها قبل سبع سنين ...

ظليت اواسيها انه بس اخذ الكرين كارد ارجع ازورهم ... مستحيل اعوفهم ...

وحيدر جان ساكت ومذهول ممصدك حنعوفه اني والجهال ومايشوف ريمي تركضله من يطب للبيت ولا حمدوي يناغيلنا بالستة الصبح !

واني اللي جنت محتاجة منه يساندني ويقويني طلع هو اللي يحتاج واحد يصبره ويقويه اخر شي بعد مااتحمل حضن الجهال وهمه نايمين وكام يبجي ...

كلي لاتروحين سارة ....اخاف عليكم يصير شي

بس جنت اعرف هذا مجرد كلام ...

والمساله بعد مابيها رجعة بس هو من حالته وانهياره كام هيجي يحجي ...

مكدر يضم هذا الشي  وحتى اصدقائه شكد حجوا وياه ومن ضمنهم منصوري من شاف حالته هيج قرر هو يدخل ويحلنا شغلة توتة وامها والجواز والوصايه

شكد كرهتها اللي فرقتني عن عائلتي ... وشعلت بگلبي نار....وحدة  انانية ماعدها لا شعور بالامومة ولا حنية

وودعت اهلي بالبيت ووصلنا ابويه للساحة عباس بن فرناس وحيدر لازم ايدي حيل

شلون اعوفه واعوف روحي وگلبي وياه شلون بعد مااشوفه

الله يساعد كلمن بعيده عن زوجها وكلمن راح منها شلون تتحمل فراكه ...

وبقينا نتتظر الى ان اجتي الباصات واخذتنا وهنا ريمي كعدت وكامت تبجي على ابوها يمكن حست بعد ماتشوفه...

ومن بجيها وبجي حيدر الناس كلها كامت تباوع علينا وغوركت عيونهم حتى ابويه كام يشهك ...

الله لاينطي اللي كان السبب وفرق العوائل هيجي لو الدنيا زينة احنى شعدنا طالعين ومتغربين ...

لو الوضع امان واستقرار شعدنا نهج من بلدنا ..

مانعرف باي لحظة يمكن نكون ضحية حرب جديدة ...

وكوة سكتتها بقاعة المطار انوبه عندت تنام بعربانه محمد وطول اجراءات السفر اني متبهذله ويه الجنط ومحمد والافندية نايمة بالعربانة ...الله ينطيهم للشباب وين مايكونون هسه ابد ماخلوني احتار كل واحد بيهم جان يجرلي جنطة ويتكفل بيها على التفتيش لانه كل خمس مترات نتفتش نرة لخ و الحمد لله الغيرة وحب المساعدة لساها موجودة وحتى من اتشكرهم فدوة لعينهم يكولون صدك جذب على شنو ...

والله وطارت طيارتنا من بغداد لعمان بثمانية ونص ....وقبل مااصعد الطيارة شربت ريمي دوا ماما كتبته الها حتى تهدا وتنعس وتنام وحتى لاتخاف من الطيارة ...والحمد وصلنا عمان وهنا جانت المصيبة  بقينا ١٢ ساعة بالمطار والله ...لافندق لاغرفة لامبيت ...

واللي يريد ينام يروح للمصلى او المسجد مال المطار ...

من صدك اتبهذلت وطلعت عيني بس اللي عدها اطفال صغار تعرف وتحس باللي اكوله حتى الاكل اللي جنت جايبته خلص ...واللي يبجي واللي تريد تروح حمام وين اعوف محمد وكل شويه نحوسبه ونعوصه ويريدون يلعبون وياكلون مااحجيلكم ردت املخ روحي كثر ماصرت اعصاب وهم خطية مرة جبيرة من شافت ريمي اتنحست حيل اخذت محمد مني وكالت طلعيها برة المصلى خلي تعلب شويه وظلي يمها ...

وهاي هيجي ...الى ان صعدنا من عمان ال المانيا ..

تقريبا جانت اربع ساعات ناموا هنا وشويه اني هم يله نمت يمكن نص ساعة ...

ونزلنا بمطار المانيا ..

وحسيتني قريبة عن مسرة خطية جانت فرحانه برجعة رجلها وشجعتني هواية على السفر حياة افضل لاطفالنا بس وهي هم تكول مو كل واحد يتحمل الغربة ...

بلدنا مهما كان بيه الجار والصديق والحنيه بيه اذان الفجر والسحور ...بيه ريحة المطر وبيه البخور ...

بيه ريحة الصمون العراقي والجاي الاصيل ...

اني بالمانيا صار عندي حنين فظيع لبغداد ولاربيل ولبيتي ولزمت روحي بالكوة ...

وظليت احجي ويه نفسي لازم اكون قوية خلص بعد ...حياة جديدة ولازم نجربها ...

بقينا تلاث ساعات محسينا بيها كلش ظليت اباوع على العالم الرايحة والجاية اشكال والوان وجنسيات كومة ومختلفة ...

بعدها طارت الطيارة من المانيا وصلنا لوس انجلوس بعد ١٤ ساعة طيران ...

محمد مثل اللي انشل وكام يتنحس اني همزين جنت جايبه خافض حرارة وانطيتهه انوبة الرضاعة المحرجة ...الا يرضع طبيعي عدا الميميات وكل شويه اغسل وحدة وتعالي بدلي حفاظة ...

وريمي ونحاستها وغيرتها من اخوها ...

ومن وكاحتها سوت ممر الطيارة ملعب ومحد جان يحجي وياها تاشرللهم وهمه يضحكولها ويلعبون وياها بس من بعيد لبعيد لانه اني جنت مخوفتها ماتروح يم احد غريب

وطبعا بمطار المانيا نسيت وحدة من الجنط الصغار بيها ملاعيبها وهاي جانت طامة كبرى عليه

انطوها اقلام واوراق ترسم وتلعب وشاشه جان بيها كارتون مع ذلك شلعت گلبي شلع

  بمطار لوس انجلوس سووا الاجراءات وسجلونا ...

واخذونا على البوابات

والحمد اخر شي من لكيت مصطفى ابن خالتي ومريم زوجته ينتظرونه ...

يايمة شكد فرحت ...

انوبه تعالي سياقة مااعرف كم ساعة من المطار لبيتهم ...

هنا الجهال بعد نامو ...

مريم اتخبلت على ريمي ..

بنتي صارت طويله ومتىروسه وعيونها ملونه خفيف ومو كلش بيضه وشعرها فاتح كيرلي ...كالت هاي طالعة على اهل امي كونهم شكر ومحمد على ابوه ههه

هي هم راحتلها بنية اسم الله الرحمن  مصارلها سنة...

اول مكعدنا كالو احنى دورنالج شقة ايجار لانه هنا بالكاهون بصعوبة كلش تلكين واقرب وحدة بعد خمسة وعشرين يوم يله تكعدين فمحضريلي غرفة حتى اكعد وياهم الي وللجهال همه جانوا كاعدين ببيت بس هم صغير تلاث غرف صغار مقسميها بيناتهم ..وحتى حديقة مابيه

اول اسبوع جنت عطشانة لحيدر وللعراق ماارتاح اذا مانحجي بالساعات يوميه ويسالني عن المكان وعن الجهال وعن الولاية

الولاية طبعا كلش حلوة والمدينة بيها اسواق عربية وكلشي مثل بغداد ...والجو يخبل

بس ريمي كلش اتنحست وحست بالغربة فجانت تبجي من تشوف ابوها بالتلفون تكله بابا تعال ...لسانها هم جان ثكيل موكلشي تعرف تحجي بس همزين كامت شويه شويه تلتهي  ويه جهال مصطفى خلصت من لزكتها بيه ...

وبالكوة يله اتعودت على فرق الوقت وبديت اتعود اكثر على الوضعية الجديدة وصارت مريم اطلعني وياها اتعرفني على العراقيين الموجودين وبديت اشتغل بالمعاملات مال الرقم الاجتماعي وبطاقة التغذية الحكومية وتلاقيح الجهال وغيرها ...

ورة اسبوعين بديت اطلع شويه من حالة الكابة اللي بيه والتعب النفسي وبديت اروح سفرات وياهم كل نهاية اسبوع كانوا يتفقون يطلعون سفرة لبارك حديقة او بيت صديق ...الجو حلو ويساعد على اللمات ...

بس بالفترة الاخيرة كمت احس مريم صارت تتحسس مني على زوجها وصدك اني انقهرت بس ما بينت كمت اتصرف كلش طبيعي بس اتحاشى وجودي ويه مصطفى

اما هي فكامت تحاسبه من يسويلي شغلة تكله اني اسويها او شعندك تصيحها اني اصيحها ومن نطلع مكان تلزك بيه ويعوفوني وحدي ويه الجهال

تصرفاتها يوم عن يوم زادت عن حدها الى ان ورة الاسبوع الثالث

وخلال اخر سفرة ...راحت هي وصديقاتها وعافتني وحدي كاعدة حتى اني استغربت كلت هاي شبيها

قابل شطالع مني

وانوبه جان اكو شاب حلو ومرتب ..ومااعرف والله خريج طبية لو صيدلة هاي صار مرتين يلح ويايه ويوكف وحدة لا اخت ولا ام مااعرف ويامن جاي بس همه يعرفوه ويسلمون عليه

جان يشيل ريمي ويلعب وياها لو ياخذ محمد مني يكعده بالعربانة او هيجي شي يساعدني ...ومرة كلي ليش ماتنزعين الربطة ترة كلهم ينزعوها هنا مجاوبته بكلام طويل لانه جنت احس مريم وصديقتها جانوا يراقبوني والله العالم شجانوا يحجون ...بس اكتفيت كتله لا ماكو داعي اني لبستها باقتناع وحبقى عليها ...

المهم صارت عطلة مااتذكر جانت ايستر دي يمكن هيجي شي ..

هم سووا كعدة كلش جبيرة واني مردت اروح و مصطفى هم كال مشغول بشغلة

وكبت عركة بينه وبين  مريم

كلت خلي اكسر الشر واروح ليش تكول متفقين هي ورجلي...

هاي واني بديت كلش اضوج من وضعي ويومية الوم حيدر انه خلاني بهيجي موقف حتى مكمت احجي وياه صار يخابر يباوع على الجهال شويه ويروح

كل كلمات الاشتياق والتشجيع ماتصرفلي بعد

صعدت عندي من ورة مريم وجماعتها ونفاقهم وسيرة العالم كلها على لسانهم

والحظ اتعثر ويايه مدري جان من صالحي من رحت ااجر الشقة كالت بيها تصليحات وصرار...

حالة الصرار الغريبة بهاي المنطقة تكون بكثرة مااعرف ليش المهم اخرتنا اسبوعين لخ وجانت مثل الطامة على راسي ياصبر منين اجيبك والله عبالي كالت سنتين مو اسبوعين ...

فبذيج السفرة هم هذا اجى انوبه هو اتلاكني اخذ ريمي مني جان يكول طولتي الغيبة

عزة هذا شبيه هيجي يحجي ويايه اشاف من عندي!

اباوع مريم عافتني وراحت هي وصديقاتها يصفطون الاكل على الميزة ويجهزون السفرة  ويباعون عليه من جوة ليجوة

فاني هم على كيف اخذت ريمي كتله عفية ترة ماكو داعي لهالحجي ...ممكن تخليني بحالي

كلي واني شكتلج

اشو على صوته

صدك انتو العراقيات متخلفات ...ماتصدكون واحد يساعدكم راسا تكولون هذا كتل روحه عليه

لاعيني انتبهي لنفسج ..

عوزة لو قلة بنات والله يالله ...

وظل طبعا يحجى بس مااتذكر كل الحجي من الصدمة والاحراج حسيت الحرارة طلعت من اذاني وريمي لحت تجر بهدومي وتبجي مااعرف شتريد ...

والبومه مريم واكفه بعيد عاوجه حلكها على اساس لاتعرفني ولا اعرفها ...هاي شبيهم

كتله عفية انت شبيك شدتحجي

اني كتلك خليني اني انزل الجهال

وظليت امتمت بالحجي ماتطلع الكلمةمن حلكي

وهو ياشرلي بيده والعالم تباوع

الا ان خطية مرة كبيرة يعني مو كلش تطلع شويه اصغر من خالتي نهال

كالتله عيني على كيفك ضب لسانك شنو هالاخلاق البنية جديدة وماتعرف طبعنا وعاداتنا هنا  وانت شكو من دون الناس ركضت وجلبت بالجهال ...

والله ورزلته ذيج الرزاله

خربت السفرة ورجعنا

المشكلة هنا مااكدر ازعل اخذ تكسي واروح تعالي خابري الشركة يدزولج سيارة  وانطي رقم الحساب بالبنك ومااعرف شلون يع ني  مدبرتها فصعدت ويه مريم وهي اللي معصبة عليه

ورحعت للبيت اني صايرة نار وشرار وخابرت حيدر اتعاركت وياه يكولي اني شعليه ابن خالتي لو خالتج هو ..

علما اجى رجلها بعد انفجرت عليها كتلها موعيب هيجي تعوفيني انت وصديقاتج وتتمضحكون عليه بدال ماتوكفين ويايه !

بكل برود تكول لرجلها والله العيب عليج تباعين على واحد كد ابنج

عزة

كتله تتهميني عيني عينك

سوتلي هيجي بايدها دروحي وعافتني وطبت

طبعا والله اتخبلت شنو هالناس هالاخلاق

شنو التغير والانقلاب

بس على كولة صباح هاي خافت على رجلها مني كالت خلي اطردها لا تروح تاخذه على اساس اني شامرة روحي عليه وكطعت نفسي اتكطع

ظليت يومين بالغرفة ماطلعت والله بس ابجي وحيدر يهديني واتعارك وياه كتله كله منك انت السبب شمرتني هاي الشمرة وماابقى ويه هاي الحقيرة لو شيصير

واني كتلها لو اعرف بيج هيجي اخلاق مجان بقيت عندج يوم انام بالشارع ولا ابيتج

ابن خالتي صح رزلها ووكف لجانبي وظل يمكن ايام مايحجي وياها على هاي الحجاية وصارت مشادات قوية بيناتهم

بس اني خلص مو مال ابقى

والله فرجها حيدر من حاجي لجماعته انه اني ممرتاحة هيثم كله ليش ماتروح يم بت عمنا بغير ولاية واحجيلهم وافهمهم ...وخليها تروح تستقر هناك...

بت عمهم جاية قبل خمس سنين هي ورجلها وعدها اربع اطفال ...وصدك ققرت انهزم يمهم مهمها كان ارحم من هنا

وبنفس الوقت بذيج الايام الحمد لله والشكر حيدر حصل وصايه من ام توتة طبعا بعد ما منصور مخابر زوجها ومتفق وياه يدفعله تلاثين ورقة يعني تلاثة الاف دولار ويخلي مرته تتنازل وتسوي جواز للبنية ...يعني الحقير عديم الاصل كل همه جانت الفلوس لو كايل من البداية جان دفعناله وخلصنا

حيدر يكول خابرتني تدعلي علينا الله لايوفقنا لانه حرمنا بتها منها ...وهي كل سنة مرة تجي تشوف بتها ...

واول ماستلمنا الوصاية ضفتها للقضية بعد ننتظر رحمة الله ويخلصون اهله المقابلات ويطلع موعد السفر ويجون ورايه ...

واللي تعرفوه مسالة السفر كلش تطول علما تجي الموافقات الامنية ويخلصون مقابلات يعني الله العالم منا لسنة واكثر عود يمطن يله يجون ...بعد هي حظ وقسمة ونصبب لا اني ولاغير احد نعرف شوكت يرجع ينلم شملنا ....

وهنا بعد

ماطولها عليكم و شلعان گلب وشهر من البهذلة والاجراءات نقلت كلشي لغير ولاية ...

والحمد لله طلعوا كلش خوش ناس ...والعائلة جانوا نعم العائلات  وابو حمزة الله يرضى عليه خلصلي كومة معاملات وزوجته هم جانت كلش خدومة خطية ساعدتني ولحد الان كلش هواية وماقصرت ويايه ابد الا ان وكفت على رجليه وحصلت اجازة سياقة واشتريت سيارة من الفلوس مال شغلي جنت لامتهم جبتهم ويايهة...

واجرت شقة بمجمع طابق ثاني ...

بس مااحجيلكم عن المسؤولية والحمل الثكيل اللي صار على جتفي اطفالي صغار ويرادلي اركض اربعة وعشرين ساعة حتى مااخليهم محتاجين شي...صح اني لحد الان مااكدر اشتغل لانه الحضانة سعرها كلش غالي ...بس حاليا دااقوي لغتي واحاول ادخل ريمي هيد ستارت ونشوف شلون ندبرها ...فلذلك حيدركام  يدزلنا كلما نحتاج زايدة ناقصة او فلوس ايجار  ...صح المساعدات هنا زينة بس  اقل من كاليفورنيا مع ذلك  اني كلش مرتاحة ...

ولو لحد الان من انام اخلي قنفة ورة الباب وظابة الشبابيك مااعرف ليش من اسمع صوت بالممر يتراوالي انه حيجيتون علينا ...طبعا هي مصايرة بس احنا عاش بينا الرعب والخوف ومانفكر بالاشياء الزينة لا ابدا بس بالكوابيس

وبديت اتعرف على عراقيات وعوائل هواية وسبحان الله لكل عالة قصة ...من اسمعها احمد الله واشكره واصير اقوى

اللي رايح منها ولدها الاثنين بانفجار ولا اللي القناص كاتل رجلها  وهو لازم ايد بته يمشون كدامها  ...

ولا اللي عائلة ابنها كلهم غركانين بالبحر من رايحين لجوء لالمانيا وغيرها وغيرها احمد الله الف مرة على كلشي مريت بيه ...انه مهما كان مراح لي عزيز او غالي احمد الله انه انطاني العمر والصحة والعافية انه شفت اولادي كدامي بصحة وعافية وبامان وانه اسمع صوت امي وابويه واخواني انه اسمع صوت زوجي واطمن عليه يوميه

الحمد لله اللي فضلني بعطفة ورحمته انه خلاني اعيش كل هالتجارب حتى اكون ام قويه تكدر تربي اطفالها وتحمل مسؤوليتهم ....

ولو لحد الان

اتذكر اول ايام  من داومت بالكلية رحت بسيارتي والله لحد الان اتذكر ذيج اللحظة من جنا كاعدين ملتمين فالبنات كالوا انت اول وحدة تتزوجين وتعيشين اميرة ببيتج ورجلج وين اكو مثلج جمال وشهادة وعائلة وسيارة ومال والام دكتورة والاب مهندس وغيرها ...

مايعرفون انه هواية ناس حياتهم من برة فقط

برواز من ورد ...

ليان عيسى