تحميل رواية «برواز من ورد» PDF

‎البارحة جوي اهل هشام ديخطبوني.....

‎واني مجنت مرتاحة ومرايدة ...بس مااعرف شلون طلعت الموافقة بعدين من حلگي ...

‎ثاني اليوم ماكعدت الاالظهرية

‎صباح كعدتني كالت الريوك جاهز جوة

‎طبعا هذه الانسانه درة مال الله ...

‎خلوقه بشكل وطيبة حيل

‎ومتواضعة مافد يوم جتي لبيتنا اذا ماهي قامت بكل الشغل ...

‎ضحكت كتلها شعندج كاعده من وكت فكلتلي وج گومي نتريك كتلني الجوع وهسه بالدعش ...

‎امج طلعت من وكت عدها حالة مستعجلة خابروها من الصبح...واني ريكت سرمد والجهال من وكت وطلعوا بالحديقة...

‎جان الجو بذاك الوكت شويه بدى يبرد ...

‎فخفت عليهم كتلها طببيبهم خلي يلعبون بالبلي ستيشن مال سرمد خطية يبردون نزلي انت

‎و اني جايه وراج ...

‎اني غسلت ونزلت دنتريك ودنسولف اني وياها هي جانت مكعدة سراب قبلي  مقابلة تنزل ...

‎بس حسيت صباح تريد تكلي شي عن سراب ومترددة ...

‎كتلها احجي لاتخافين والله مااكول...هي ليلتها

‎سراب وجهالها نامو بغرفة سرمد وصباح وعمي نامو بغرفة مسرة ...

‎وسرمد نام بالاستقبال جوة ...

‎اليوم جمعة فسهر يلعب گيمز على الحاسبة ....

‎تكول من داانزل اخذ رياض للحمام سمعت صوت عبالي سراب دتبجي تكول اقتربت من الغرفة سمعتها تضحك ودتحجي بالتلفون ...

‎عفتها ونزلت ...

‎فاني راسا كتلها اي متوقعه كلشي يطلع منها ....

‎نزلت العروسة متنكة عليه حتى صباح الخير مكالت ....

‎وراها قررنا نطلع نشتري هدوم شتوية للولد خطية

‎ بس صباح كالت خلي نلف الدولمة على السريع كيف انه ابويه موصيها من البارحة عليها سويناها وكمله  بس جانت بلا سلك مجان عدنا ...

‎هي دولمتها جانت تخبل ...فكلما تجي لبيتنا ابويه يريد منها تسويله جدرية

‎ورة مكملنا

‎طلعنا رحنا للربيعي ومناك لسوك العمارات صح صغير بس شغلات حلوة وارخص ...

‎ومن دنرجع انطيتها مبلغ الها تضمه اعرف بيه عمي مرات يبخل عليها ماينطيها ...

‎هو صح يصرف عليهم كلشي بس ماينطيها بيدها ...

‎من رجعنا جانو كلهم بالبيت اتغدينا ودنشرب الجاي دك الباب ..

‎طلعت ليلى مرة عمي الاولى جاية وجايبه مشاكلها ....

‎صباح اخذت ابنها وصعدت فوك حتى لاتصير مشكلة اكبر

‎وحجاية منا ومناك

‎طلعت السالفة  عمي جان عنده بيت ماجره وايجاره جان ل ليلى  وجهالها من وكع بالجلطة مدازلها فلوسه ...

‎وكبت عركة شكبرها ماطلعت الا ورة اذان  العشا ...

‎وماحلوها

‎وراها تعبت اني  وصعدت فوك ...

‎توني كعدت بغرفتي دك هشام عليه ...

‎او دكة مشلته ...

‎بالثانية رديت عليه ...

‎ظل يسلم ويسولف ...

‎ماكو يمكن اقل من نص ساعة كامت تعيط صباح.... عمي متخربط ...

‎الله لاينطيها ليلى سممته العافية

‎ماكو علما حضرناه وبدلنا دناخذه للمستشفى ...

‎اجى هشام بسيارة خالة لاكيناه بالباب وركض راسا عاونهم وصعدوا عمي وراحو للمستشفى ....

‎ بعد اني مرحت وياهم  راحو بس ابويه وصباح جانت امي عدها حالة ولادة   من المغرب طلعت...

‎بقيت رياض يمي ومارجعوا الا ثاني يوم العصر...

‎هالمرة جانت الجلطة اقوى على عمي وكعته مثل الشلل النصفي ...احنى جنا خايفين لايروح بيها ويموت .....

‎وبحجة يطمني هشام كل شويه يخابرنا ...

‎وهو هم كلش ذكي استغل الموقف وبرز عضلاته واتقرب من ابويه اكثر والحق يقال ركض ركض الكل اتعجب عليه ...

‎قام بالواجب وزايد ...

‎وحتى سفره هم  اجله ...وظل يروح ويجي لبيتنا يطمن على عمي ومنها يشوفني ونكعد مرات سوى نسولف

‎اشو اني  هم ماكو اسبوع شفتها واكفة بعد اخليهم معلقين يااقبل واكمل ياارفض وكل واحد  يروح لحاله

...

‎والله وجان اقبل  وليلة خميس على جمعة اشترينا الذهب وثاني يوم كعدة ببيتنا لبسني الذهب وجانت بيناتنا بس احنى وجتي خالتي نهال

‎سويناها على  السريع  حتى للصالون مارحت علمود عمي ...

‎وراها رادت ترجع صباح لبيتهم

‎بس امي ماقبلت بقيناهم يمنا حتى عينها عليه واحنى هم نعاونها انداريه...

‎وبين ليله وضحاها صرت خطيبة هشام ...

‎والاحد عقدنا بالمحكمة

‎ والاثنين يم الشيخ

‎والثلاثاء العصر ابويه عزمهم كلهم بمطعم  صمد واتعذر لانه مكدرنا بسبب ظروفنا نسوي حفلة بالبيت واكيد همه قدروا هذا الشي

‎همه جانو يتغيرون تماما من يكون هشام وياهم لانه اني نوهتله شلون تصرفهم جان ثگيل نوعا ما من جوي اخر مرة بالكعدة ....فكامو شوية يتصرفون بطريقة احسن خوفا منه يمكن ....

‎ثاني يوم كلهم رجعوا لسورية لانه اهله ضاجوا باقين ببغداد وعايفين عوائلهم هناك ...

‎صبحت الاربعاء مرة هشام بعد ...

‎والمندهش اكثر مني مسرة ...

‎جانت ممصدكة شلون شغلتي صارت بسرعة هيجي خطف ...بين يوم ليله انخطبت واتزوجت ...خلي هسه ترتاح اكلت راسي اكل ....

‎هي جانت تريد تقدم دراسة على حسابها هناك بالمانيا حتى تطول اقامتهم  بس الدراسة تكلف كلش فطلبت من امي تساعدها وخطية ماما راسا قبلت وبالعكس شجعتها ....

‎بذيج الايام صرت  سايق للولد الصغار

‎اوديهم  لمدارسهم الصبح خصوصا رياض جان بالحارثية اوديه والله واجيبه ...

‎ماعندي شي ملتهية بيهم بس سراب جانت تاخذ اخوتها واني الظهر ارجعهم كلهم والظاهر حلتلها الكعدة هنا ...

‎لاشغل ولاعمل وانوبة ماخذة راحتها على الاخر ..

‎وراها رجع هشام للنروج هو اصلا جان متاخر كلش برجعته...

‎وبدى على وقته هو يخابرني اني جنت كلش قليل اتصل بيه لحد الان عندي ردة فعل بداخلي من هذه المكالمات واتذكر رافد بكلشي

‎هيجي وكت جنا نحجي وهيجي نكول ...بس

‎وية رافد جنت ماخذته راحتي اكثر  حتى من يخابرني الصبح  مايقبل اروح اغسل يريدني بطبيعتي مثل مااني ...

‎عكس هشام جان يريدني على طول على سنكة عشرة ...

‎ولحد ذيج الفترة اني ممستوعبة صرت زوجة هذا الرجال مااعرف شلون هيجي صارت ركض بركض

‎وراها من صفت الامور وصارت تمشي مرتبة وشوية هدأنا

‎كلت لماما راح اروح لبيت رافد ارجعله المحبس الالماز والعطور اللي جابهم هدية اليه قبل مايروح ...

‎حتى على حطتهن مامديت ايدي عليهم....

‎خابرت مرة اخوه ورحت الصبح جانت بس هي وامه بالبيت ماصدكت من شافتني ظلت تبوس بيه

‎بس وكتها اني جنت كلش حزينة ومتاذية حيل ....وبين عليه من كعدت وسولفت وياهم....

‎جانت تكلي خالة ماترجعون لبعض وتفرحين ابني خطية مو يتيم هذا وگلبه مكسور......

‎ رجعتلها الغراض وكتلهاخالة مايفيد بعد ماترهم  اتزوجت اني ..

‎عيونها دمعت وكام تبجي وعلى بجيها اني هم مااتحملت بجيت واطلعت

‎رجعت للبيت مهمومة وماطلعت من غرفتي وحتى هشام  ماحجيت وياه بذاك اليوم ....

‎بس وية الايام اللي مرت حاولت انسي نفسي رافد واندمج اكثر ويه هشام هو هم بدى يخليني  اتعلق بيه وبديت احبه شوية شويه

‎وصارت مرات من كمت اطول وياه سراب كامت تضوج تكوم  تكتل اخوانها حتى تصير هوسه واسد التلفون لو الحاسبة خصوصا اذا جنت جوة اسولف وياه

‎هي هم طولت كعدتها  هاي صارلها شهرين وشويه هي هنا ...

‎ادري عمتي ماتفكر ترجعها لو رجلها اللي يمكن ماصدك خلص منها...

‎حجيت ويه ابويه كتله تعبت منها ومن صياحها وهسه تخابر ذو الفقار يجي ياخذها ....

‎بس ذاك جان معند الا تعتذر من عمتي وتبوس. ايدها يله يرجعها والله وصدك احنى اخذناها لبيتها وابويه جبرها تعتذر لعمتي ...

‎وبيومها انتبهت على رجلها شكد متغير ...وشلون يباوعلها نظرة كلها حقد ....

‎اني هم عرفت هسه تسويلها فد عركة منا مناك حتى تجي يمنا مرة لخ

‎بوكتها اتفقنا اني وهشام عرسنا بنهاية الثالث او اول الرابع ...

‎علما تصفى الامور ويتحسن عمي ويخلص محرم وصفر..

‎وكتها

‎احنى جنا مرتاحين على كعدة عمي وصباح يمنا تعرفون امي تحب الخطار وتحب الاطفال....

‎وهم انه عينها عليه خطية...

‎وصباح جانت قايمة باللي عليها وزيادة على الاقل جانت ونس ويه امي ...

‎وحاولت تقنعها يكعدون يمها وتاجر بيت الحارثية وتستفيد من فلوسه بس صباح رفضت  جانت خايفة لايعصى المؤجر بعد شيطلعه ...

‎ورة راس السنة الفين وعشرة باسبوع اجى هشام بقى ببغداد عشر ايام ...

‎بدى يشتغل بمعاملة الجنسية  وسواها كلها بفلوس وتحولت نفوسي يمهم بالكرخ

‎هو كلش جان متلهف عليه بس اني وكتها شويه جنت اعامله ببرود والله مااعرف ليش يمكن لانه حسيته يموت عليه كمت مااهتم ...او يمكن لانه جنت تعبانه او يمكن انقهرت وتالمت من مسرة من كالتلي رافد كام يبجي ببيتهم من عرف بيه انخطبت ....

‎مااعرف هذا اللي خلاني شويه اكون متضايقة مع انه قررت بعد مااجيك اخباره وحسابه على الفيس بس مكدرت امنع نفسي مع انه

‎حسيتها كنوع من الخيانه لهشام ...

‎اللي مجان مقصر ويايه

‎ جان كلش حنون عليه بس عصبي وعنده ذبة اهل اوربا العفوية الحلوة ...يعني هيجي شوية شغلات منا مثلا بوكتها باسني بالمطعم ورة ماتغدينا ...اني كلش انحرجت واستحيت حسيت العالم كلها تباوع علينا لو مثلا من دنعبر شالني شيله خفيفة  وعبرني الجزرة اللي تصير رصيف يفصل الشارعين بالربيعي وعلى طول من نكون سوى لازم ايدي ويبوسها  ويعني هيجي سوالف خفيفة بس   يمكن هذي اللي خلتني اتعلق بيه اكثر صح جانت بس عشر ايام بس اربعة وعشرين ساعة جنا سوى

‎اهلي وكتها قبل سفرة بيومين سوو عزيمة كلش جبيرة لكرايبنا حتى يتعرفون عليه  جتي عمتي وزوجها وسراب ورجلها وخالتي اقبال وجنتها الصغيرة وامي جابت جدي وبيبتي وخالتي نهال

‎و بعدكومة  كرايبنا بنات خاله امي وبنات خال ابويه وهكذا واني عزمت هالة وجوان اختها  يعني تقريبا جانو بالتلاثين واكثر بحيث وزعنا الاكل سويناه بوفيه مفتوح على طاولتين كبار بين الصالتين وجهزناه من اكثر من مطعم والحلويات والفواكه وهوسة الجهال هاي جانت احلى شي يم امي ....

‎بس جان ناقصنا مسرة فتحتلها سكايب وخليتها تباوع وتبجي ههههه من فرحتها ولانه جانت مشتاقة لهيجي لمات هي تحب هيجي عزايم مثل امي وجانت مثل الفراشة تفتر على معازيمنا

‎ظلوا يسلمون على هشام اللي  جانواومن اهله  خاله وزوجته وابن خاله الجبير جايين وياه

‎وكلهم اتفقوا على انه شخصيته فريدة وجذابه كدر باسلوبه يخلي الكل ينعجبون بيه وحتى اني واهلي فرحنا بيه هواية ....

‎بس ماتصدكون انه سراب كامت تتحارش بيه ووين مايكعد تكعد بصفه مااحجيلكم من جتي شلونها  مسويه نفسها هي العروس مو اني ههههه هي مسويه تسريحه شكبرها وخالة مكياج مال عروس

‎بينما اني  بس سويت شعري كيرلي ومكياج خفيف ولبست فستان جابلياه وياه من النروج لونه عاجي بيه لمعة مثل الثلج خفيفة ...كلش نازك وحلو اتخبلت عليه ...

‎هو من حس اني ضجت من سراب كيف وفرح انه اغار عليه فحضني كدامها حيل وهمسلي انه هي زعطوطة تغار وظل يبوسني من خدودي ههههه

‎مااحجيلكم بعد شصار بيها ...

‎ورة يومين من العزومة سافر هشام راح لسورية يسلم على اهله ويطلع مناك  ل اوسلو ...

‎ماكو شهر والله اقل هم جتي سراب زعلانه اني صدك ضجت ...بس مااهتميت ابد ...

‎هالمرة خليتها هي توصل اخوانها للمدرسة تكسيات لانه جنت مشغولة بتحضيرات العرس و

‎بشهر الثالث خلصت كلشي وحضرت غراضي وحضرت للعرس جان بيت عمي بعد رجعوا لبيتهم بس بقيت اطلع ويه صباح اتسوك لو مرات اني وهالة مجنت اطلع ويه سراب ابد ...وكعدنا مرة اني وهالة ناكل يم ليمونه بالربيعي هو محل يبيع ايس كريم وبنفس الوقت يسوي لفات شاورمة اني جنت كلش احبها حامضة وحيل طيبة  بس هسه عزل المحل حرامات وسدوه ....

‎ومن جنا كاعدين جتي بنية حامل شكلها مو غريب عليه بعدين اتذكرت هاي ضحى حبيبة ليث  هي من شافتني شبهت عليه بس مجانت متاكده  حسيتها ضاجت من شافتني ولانه  جانت ويه زوجها مردت احرجها عفتها براحتها بس  من دتطلع تروح جتي عليه كالت انت مو سارة ...

‎كتلها اي انت ضحى ....

‎فسلمنا على بعض وبوستني وباركتلي من شافتني لابسه الحلقة هي مبين جانت بشهرها الاخير...

‎بس شكلها جان حزين مااعرف بسبب الحمل لو اتذكرت ليث مااعرف ودعتها وراحت  .....

‎وفعلا صار العرس باول اسبوع بالرابع سويناه بقاعة العلوية عزمت كل الناس اللي اعرفهم.......

‎ هشام جان جدا كريم ويايه ومابخل عليه باي شي بس من اهله مااجوي بس امه وهبه اخته الصغيرة واخوه وزوجته وابوقاسم صديقه وزوجته ....

‎بكل هاي المرات ابوه مااجى ابد ولا اتصل

‎وجان هشام يضوج من الح عليه بالسؤال بس ابويه هو اللي اتضايق وكلش كلش انزعج ابويه واخذ على خاطره...

‎وحسيت هشام انحرج وخجل كدامه ...

‎بس اني وكتها انقهرت عليه فمشيت الامور مردت اي شي يكدرلي يومي

‎الحفلة جانت كلش حلوة واني سويت سحب شلت اللون الاسود وسويته بني ولبست بدلة نفتوحة من فوك بلا كتاف قماشها مجعد وخرط هشام هو اللي اشترالياها من اوسلو ... والحمد لله الكل جان راضي على الحفلة ...

‎بليلتها بتنا ببيت اهلي بس مصار شي بيناتنه خليناها لما نوصل لبيتنا لانه جنا كلش تعبانين وثاني يوم بوجهنا ودعت اهلي سافرنا ....

‎بس ماتحملت من كثر مابجيت على ابويه حان كلش مقهور وحزين مااعرف ليش ....

‎وكل شويه يلزم هشام يوصيه عليه

‎امي حبيبتي جانت مرتبكة وترجف وخايفه عليه بس فرحانه بنفس الوكت ومخلت شي موصتني عليه واني بس دموعي تكت ولازمه ايد بابا مااريد اعوفه ....وظليت الرخلة كلها ابجي الى ان وصلنا دمشق ....

‎بقينا بشقتنا  تقريبا عشر ايام علما يصير الجو اشويه ادفى حتى نروح  للاذقية واجرنا سيارة صغيرة ورحنا طولنا بالطريق يمكن اربع ساعت ونص ويه الغدا ....

‎وهناك حجزنا شاليه عشر ايام وجان بذاك الوكت مو موسم فاخذناه على المرام

‎موقعه حلو گبال البحر باىضبط ويخبل حتى حديقة صغيرة بيه ومرجوحة كمنا الصبح نتريك بالحديقة وگبالنا البحر والهوا يخبل  ومجان اكو هواية ناس فكلش ارتاحينا ولو جانت بيها كرصة برد جانت حلوة كلش الايام كضيناها هناك

‎و هشام دللني بيها حيل حتى هو يحضر الريوك وكله نتغدى ونتعشى برة ....

‎صدك جانت احلى ايام عشتها وياه

‎من رجعنا مرينا على اهله بطرطوس وبقينا يمهم يومين ...بس ..مااتحملتهم ابد

‎اول من طبينا لا احد هلهل لا احد فرح وهشام صار عصبي ومتوتر ورحت اني دااسلم على ابوه يجاوبني يكلي هله!!!

‎والبيت جان متكهرب الظاهر هشام جان متعارك وياهم لانه الخلق كلها مگلوبة عليه مو عليه اني  ...

‎فوهو هم ماارتاح بس مجان ينطي بيهم ابد  من اكوله ليش هيجي يتصرفون يكلي لاتصيرين حساسة ماكو شي انت ممتعلمه عليهم.......

‎رجعنا من طرطوس وبقى يمي يمكن تلاث ايام  ورجع للنروج يعني اني اكول يمكن كله شهر العسل ماطول اكثر من خمسة وعشرين يوم ....

‎وكلي مراح اجي الا ورة شهر...

‎بقيت اول اسبوعين من  ورة سفر هشام وحدي بالشقة اللي هم كانت طابق ثاني بس اللي جانت بحي  المزرعة مالت صديق ابوية .....

‎واجرتها اصلا لاربعة اشهر ليكدام .... مكان اعرفه ومتعودة عليه وجانت قريبة من كلشي ...

‎حسب مافهمني هشام انه راح يبلش بالمعاملة وعن قريب يسويلي سحب ...ولم شمل

‎وكلي كل  اربع شهور عود نجدد العقد اذا لزم الامر

‎بالبداية هشام كان يوميه يخابرني ونبقى على اتصال على طول واني حبيت شغلة سفره حسيت بيه يشتاقلي اكثر والبعد يلوعه عليه ..

‎بس بدى الملل يتسلل لحياتي

‎وشويه وشويه صارت عندي نوع من الكابة

‎مجان عندي شي اسويه ...

‎طول اليوم بالبيت وحدي لا گرايب ولا اصدقاء حتى من اطلع اتمشى لازم اخذ موافقة  سي السيد ...

‎ بديت اضوج وزهكت روحي ...

‎كلما اكله على شي مايقبل ...

‎لايقبل ادرس ولا اشتغل ولا اروح ازور اهلي بالعراق خو يتخبل من هاي السالفة كلما اكله ضايجة يكلي روحي للجم لعبي رياضة باعي تلفزيون ...

‎لو يكلي من يصير عندج طفل تلتهين بيه ...

‎زين وبعدين ؟!!

‎وخلصت هاي الفترة وحتى مكالماته

‎قلت مو مثل قبل يخابر ويتصل ...

‎حاولت واتوسلت بامي تجيني كالت بس سرمد يخلص امتحانات تجيبه وتجي ...

‎وعمي مبين بيه لساه تعبان مو مال سفر....

‎مسرة جانت مشغولة بجهالها ودراستها ...

‎بس اني صوجي اللي فتحت باب على نفسي من كتله ضايجة ومااعرف شسوي ....

‎انوبه  اخر مرة لح عليه بدال مكاعدة وضايجة وتشتكين روحي يم اهلي...ابقي ىيمهم اسبوع غيري جو وتعالي

‎يبووو واني شكد اضوج اروح هناك ...

‎المهم نهاية الخامس دبرت حالي  انه اروحلهم زيارة ...

‎ عبالي أاجر سيارة واسوقها واروح هم ماقبل ...

‎رحت باصات من كراج اللي بالقابون لكراج طرطوس   الطريق جان تقريبا شي ساعتين...وحارة ولعبان نفس صح جانت مكيفة بس هو الجو رطب

‎بله اني شعندي رايحتلهم وحدي؟!...

‎كلش مجان عاجبني بس كلت مااكسر كلامه هو كلها اسبوعين ويجي ...

‎فاول ماطبيت استقبلتني هبه ...اخته الصغيرة

‎ورحبت بيه بس تدرون ترحيب جامد ويفوتون من يمي ولايسلمون يباوعون عليه ويروحون

‎ واني من يمي جمدت من خجلي واكفة بنص الهول عبالي احد يجي يبوسني يستقبلني ...ماكو مجرد حمد لله على السلامة ويروحون ردت بس احد

‎يصعد ويايه الجنط على الاقل ماكو ....

‎جتي امه سلمت وباستني من خدي وكعدت ...

‎كالت ها بشري مو حامل ....

‎اني ابتسمت كتلها لا خالة...بعد وكت

‎اشو هاي ضاجت كالت بعد وكت ليش ...لاتكولين هيجي ...

‎احنى من اول شهر بناتنا يحبلن ....صيري سباعية وجبيلنا حفيد ...انريده وليد ....

‎ههههه ضحكت بگلبي كلت هاي صدك تحجي ؟!!

‎فكامت وصلت للباب وكلتلي

‎كومي سلمي على عمج بغرفته

‎طبعا كالتها بصيغة الامر ...

‎والله وكمت رحت لغرفته سلمت عليه وبوست راسه وهو بس كلي هلا ...

‎يالله شيخلص هالاسبوع من اوله مغثات هسه بس لو اعرف ليش وشمسويتلهم اني  ؟!

‎المهم اني هم طلعت من يمه صعدت جنطي

‎ انطوني غرفة صغيرة فوك مرتبيها ...

‎ومافتحت الجنط كلت اطلع وارجع ملابسي احسن

‎وجنت جايبة جنطة خاصة لمكياجي عفتها فوك الميز ...

‎وبقيت شي ساعة بحجة داابدل فوك ونزلت حتى اخذ حمام لانه صيف وحارة عركت واني متعلمة مرتين اسبح واهم شي قبل ماانام ...

‎نزلت وشفت هاي المرة الي تباوع عليه اول ماجيت ...شكلها مو غريب جني شايفته يمكن بالعرس معقولة اخته الجبيرة؟!

‎فاقتربت مني وسلمت عليه كالت اني مرة اخو رجلج رغد مااذكرتيني كتلها اي اي صح اتذكرتج مرة وحدة شفتج بالعرس مو صحيح ...

‎كالت اي شبالعجل نسيتي ...

‎ابتسمت محجيت ....

‎المهم ورة ماطلعت من الحمام صعدت فوك بقيت شي ساعة يله نزلت

‎جنت تعبانة وضايجة حييييل

‎جتي صعدت رغد مرة   ...هي جان شكلها ياباني عيونها مجرورة وبيضة على صفار وخدودها مرفوعات وسمان ......وهي بطبيعتها  تمشي وتذب حجي للكل وتدردم ووجها كله حركات عجبتني والله ...ساعة تعوج بحلكها ساعة تبسمر ساعة تهز بيدها لو ترفع حاجب ههههه ابد ماتكعد ...

‎صعدت عليه كالت عمي يكول يله نزلي عل الغدا ...

‎هو فعلا جان عمها اخو ابوها مو بس ابو رجلها....

‎اني هم نزلت جنت لابسة بنطلون قماش اسود وتي شرت نص ردن ليموني

‎ بعدني على الدرج شفت عمي طلع من المطبخ ديروح للصالة ووكف گبالي شويه باع عليه كلي يله يابه روحي كعدي ويه النسوان بالمطبخ اتغدوا !!!

‎اني هم ماحجيت رحت وكعدت جتي عمتي ام هشام جان تهمس باذني كلتلي عمج يكول خلي تلبس محتشم وتذب ربطة على راسها ولد عمنا جايين احنى ماعدنا بنات مفرعات ...

‎كتلها بس عمة اني مو محجبة ...

‎جانت تكلي روح لبسي شي طويل على الهدوم وهاج هذا شال لفي بيه شعرج ...اني هم صعدت لبست قميص طويل فوك التي شرت ونزلت

‎كعدت اتغدى ويه النسوان  لانه احنى كعدنا وحد والزلم وحد

‎طبعا اني جنت استحي ما امد ايدي ولا همه يكولولي يله تفضلي احنى من جان يجينا ضيف ويستحي نصبله ونحطه كدامه هذوله بس يكولون انت مو غريبة مدي ايدج !!!

‎همه جانوا ذابحين خروف على اساس علمودي ...

‎ضحكت رغد وددردمت اي مو من جيبهم من سمعت عمي يكول لهشام ذبحنالها خروف.....

‎افتهمت انه هشام موصيهم عليه ...

‎زين شسوي بيه اني؟!!

‎حتى اكل مااكلت طول فترة كعدتي يمهم ...مااعرف همه هيجي طبيعتهم   لو يتعمدوها بس ويايه

‎المهم اني  جنت مماخذة راحتي هناك ابد وابوه ضوجني يحجي ويايه بتنكة ومن ورة خشمه

‎وخلال عالايام اللي حنت هناك لجذب محد طلعني شوفني المحافظة

‎اشو ولد عمه جانوا النهار كله يفترون بالبيت واحنى معلكات فوك مايقبل ابوهم ننزل ...

‎و طلع هشام  جذب من كال كاطع علاقتي بيهم

‎فاني الوضع كله جان ثقيل عليه ومو مريح  ...

‎احنى بالبيت ماتعلمين هشكل

‎غير الخطار اله احترامه ووجودة بالبيت اشو ياهو  جان اللي يجينا نشيله بالصلاوات !! هذولة مااعرف شلون يتعاملون ويايه معجبوني ابد ولا حبيت طبعهم  ...

‎الصدك غير اخر يوم بقيت بيه صعدت فوك  ابجي من وره ابوهم مااعرف شبيه ويايه ....

‎خابرت هشام مرتين وتلاثة مشاله

‎بعدين ورة ساعة هو دك عليه من حجيتله واشتكيتله من تصرفهم وخصوصا ابوه

‎يكول ها بدينا ...!!!!!

‎صدمني برده ...

‎لاتخلين بالج يمه على ابوه يعني هو بطبيعته هيجي ويه الكل وهسه تشوفين مو بس وياج لاتصيرين حساسة ....وتتنحسين على كلشي ...

‎مااحجيلكم جانت ايام تعيسة جدا طلعت روحي

‎حسيت نفسي تورطت بهاي الزواجة همه وين واني وين

‎وعلى اساس ابقى اسبوع رابع يوم حجزت سيارة ورجعت وحلفت يمين بعد ماازورهم لو منو يجي كله اهانات وبسامير ومغثة على شنو !!!

‎طبعا هو من عرف اني رجعت كلش ضاج وطنكر عليه وتلاث ايام مدري اكثر مخابر ولا سال ولاكال هاي مرتي وحدها عفتها بمكان غريب  ...سواها مثل العقاب عليه

‎بعدنا مصارلنا تلاث شهور مزوجين بدى يكلب عليه ...

‎مر الوكت واني بس كاعدة بالبيت انتظر احد يدك عليه تلفون اسولف وياه ماكو

‎كمت  مرات اطلع اروح اكعد يم ابو نفيسة محل حلويات صاير براس شارعنا اكل مدلوئة واجي جنت كلش احبها ...

‎ومرات اروح لجرمانه افتر واجي

‎ بالبداية جنت مااطلع اذا مااكله

‎ هسه كمت مااهتم ولا حتى ادير بال يعرف او مايعرف ...

‎هو هم محس عليه ولا جان يحاسبني مثل الاول ...

‎اجى هو وراها بقى يمي  اسبوعين ورجع

‎وجان  كل همه يريدني اصير حامل ودوخني وخنكني بهاي الشغلة

‎عاد اني هم كلش ضجت ردت بس اخلص منه  لحيت عليه نسافرنروح لغير مكان  اخذني و طلعنا رحنا للبنان على اساس يونسني هناك هو طلع عنده شغله يريد يكضيها

‎صح هو جان بعده  يدللني بس اني حسيته مو مثل قبل ما اعرف شبيه جان عبالك دايخ بشغلة

‎ ومن اساله شبيك يكول شغل ماكو شي ...

‎بس اني مجنت مرتاحه مااعرف اني السبب لو اكو غير شي

‎ولانه جان مشغول الصبح بشغله

‎فاغلب طلعاتنا ببيروت جانت بالليل نفتر مطاعم ونوادي سهرات

‎وهناك عرفت هشام يشرب

‎ومن سالته  كلي مرات مو على طول بس بالمناسبات

‎وهذه شغلة لخ هم مجان كايلي عليها

‎ومن حنت ابقى وحدي جنت افتر هواية بشارع الحمرا ومرة الصبحية  اخذني ورحنا لمغارة جعيتا مكان حلو ورومانسي اخذ ناصور واتغدينا ورجعنا...

‎بس اني خلال سفرتنا هذه

‎اكتشفت بيه عصبيته الغريبة والمخيفة

‎لانه  فد مرة طلعنا دنتعشه وجان ديحجي بالتلفون ويه اهله واتاخر بصف السيارة اجى واحد وراه ركن مكانه ...

‎عزة شسوى اتعارك عركة مصايرة وملخهه للولد انوبه هو وياه صاحبته كامت تصيح وتعيط من الخوف واني هم على واهسه كمت اعيط اريده بس ينتبهلي يفك ياخة من الرجال  وصارت هوسة مفضت الا جتي الشرطة ورحنا مراكز واتكفلوه اصدقائه وطلع ...

‎وليلتها رجعنا للبيت معصب عليه يطلع قهره بيه

‎بله شنو  انت ليش تصيحين وتعيطين اني اتخبل من وحدة تصيح ويطلع صوتها

‎كتله انت دميته للولد وانجره من ايدك ماتهده كلت اكيد هذا اتخبل  ...

‎عاد هو فدنوب عصب وعصرني من زندي حيل كلي ديري بالج اتعيدها وتحجين هيجي ويايه اكسر راسج والله ...

‎بجاني ونمت والصبح عود يله صالحني بس اني شلت بگلبي حيل  عليه

.

‎خلصت الاسبوعين وخلصت جازته ورجع ورجعت مرة لخ وحدي

‎ظليت انتظر  عبالي تخلص الامتحانات وصدك امي تجيني انوب الحظ جدي حبيبي اتمرض بذيج الفترة صار عنده احتباس وصعدت عنده اليوريا ...

‎وظلت امي مخبوصة بيه هي وخالاتي اقبال ونهال واني هم ظل بالي عليه

‎صار اكثر من عشر ايام مرت ....

‎وحالته من سيئ  الى اسوء

‎خابرت هشام اتوسلت بيه كتله امي تعبانه وحدها

‎ منا فراكنا اني واختي ومنا مرض جدي خليني اروح اشوفها خطية هي محتاجتني

‎ماقبل كال انتظري على الشهر الجاي عندي نزله للعراق ...واخذج ويايه ...

‎اني هم بالبداية صدكت بيه وانتظرت وماكو

‎ اتوسل بيه وابجي ودموعي تجري ولا عبالك بس يكلي لاتلحين كتلج انتظري

‎اكله جدي حيموت ...الله يخليك خليني اروح

‎يكلي لادوخيني كافي عاد اذا يريد يموت روحتج ما تنطيه عمر جديد ؟!!

‎اني بوكتها زعلت منه وكلش انقهرت وعرفت بيه ديكذب عليه لانه اتذكر من جان هنا اخر مرة كلي بنص تموز يله انزل يعني مستحيل هسه يجي وياخذني

‎خابرتني امي ورة بشي اسبوع جانت نهاية السادس كالت جدج تعبان كلش ويمكن يروح من ايدنا وجانت حيل منهارة ...

‎مهما كان هذا الاب خيمة البيت والحضن الدافي مهما كبر بالعمر تبقى معزته وشوفته اللي ترد الروح وماتحملت لانه مفادت بيه كل توسلاتي ولا حتى قدر وضعي ووضع اهلي انه محتاجيني ....

‎وبحجة زعلانه مااحجي وياه ...

‎حضرت جنطة صغيرة وحجزت ورة يومين سافرت لبغداد ...

‎انوب بساحة عباس بن فرناس ادك على اهلي محد يرد انتظر احد يجيني ماكو

‎معقولة نسوا اني جايه؟!

‎زين اني كلت لامي بعد يومين اجي ...

‎ظل بالي واني هم تعبت خابرت على سرمد يجي ميت مرة يله شاله ...

‎واتفاجأ من كتله اني طلعت من المطار

‎وكتله احد يجيني انتظر  لو اخذ تكسي واجيكم كلي لا اني جاي

‎بوكتها من سافرت عفتله سيارتي هو بعد صار ١٨ سنة ويكدر يسوق ...

‎والله اول مشفته عيونه حمر ومغوركة ...

‎كتله لاتكول جدو مات كال اي والله وكام يمسح دموعة

‎كلي  اليوم الثاني اول بارحة ورة نص الليل  مات ...

‎متت من القهر عليه ...وظليت ابجي طول الطريق

‎وانتهيت اكثر من شفت الفاتحة بباب بيته ..

‎كمت مااكدر امشي اجر روحي جر ورجليه وحدة تطبك باللخ اني جنت امووت عليه سودة عليه راح وماشفته ولا حضنته ...

‎شكد انقهرت وشكد حقدت على هشام اللي خلاني اعوف امي بهيجي موقف وحرمني من شوفه جدي قبل لايموت ...

‎مرت ايام الفاتحة وراها بيومين دك عليه هشام على السكايب واتخبل من عرف اني بالعراق ومكايلتله گلب الدنيا عليه مااحجيلكم الفشار والمسبات وهنوبة حتى كفر كام يكفر

‎اني من خوفتي ومن حقدي عليه وضوجتي منه سديت التلفون بوجهه وشكد مادك عليه اليومين الوراها ماشلته ...جنت بس نايمه بحضن امي ...وماردت افكر باي احد

‎جنت حيل مشتاقتلها ومحتاجتلها

‎ومجنت اعرف اواسيها لو اواسي نفسي لو اشيل حزنها لو تشيل حزني ...

‎انمردنا على جدي مرد وهنا بدى عندي الم بالراس ...

‎صرت اعاني من الم قوي وماارتاح الا بكومة حبوب ومهدئات بوكتها محجيت لامي كلت لايظل بالها عليه وهي بياحال خطية هسه ...

‎بقيت تقريبا عشر ايام ومن شفت مسج من هشام انه نازل نهاية الاسبوع لدمشق كلت خلي ارجع

‎ليش يجيني للعراق واخاف يسويلي مشكلة ويه اهلي وهمه بيا حال هسه ....

‎والله عفتها لامي وگلبي نار عليها ...وفيزت و رجعت ووصلت قبله بيوم ....

‎الظهر خابرني هشام وكلي باجر الصبح اني يمكم

‎اني بليلتها حلمت حلم غريب وظل هذا الحلم يتكرر على طول وياية ......

‎ كانه داامشي ببستان وخايفة ادور على شي ضايع مني ومدالكاه ...

‎جنت كلش خايفة ومقهورة ...

‎على الي ضاع مني بس شنو هو مااعرف ....

‎كعدت الصبح على صوت الجرس ...

‎اني عرفت هذا مو هشام لانه هو عنده مفتاح ...

‎فطلعت جيراني مرة سورية ...كلش حبابه ام رقية

‎كوة فتحت عيني حتى افهم شتريد مااعرف شحجت عن المي ومااعرف شنو ...

‎من شافتني مطفية اعتذرت وكالت راح امرلك غير مرة...

‎الظاهر جانت اكو مشكلة بالمي مديصعد يمكن  فمدرت بال...

‎طبعا من رجعت من العراق ولحد الان صداع مميت يلزمني بين فترة وفترة حتى كمت اخذ المهدئات على الريك وهذا شي جدا سئ بس شسوي مو بيدي ...مدااتحمل المه

‎اتريكت وبديت اطبخ لهشام الغدا

‎البارحة رحت  اتسوكت حتى اسويلي فد طبخة زينة بلكت تهدي عليه ...

‎جنت كلش خايفة يأذيني ...

‎وبدلت ورتبت وحضرت نفسي ...

‎طلعت شمعة منورة ههههه...

‎والله وظهرية جانت اني طفيت جدر البرياني انفتح الباب عرفتةهشام عطره  سبقه ...

‎والله الصراحة اني جنت هم مشتاقتله ومحتاجته ...

‎الوحدة دمرتني وهم جنت احاول امتص غضبة

‎فركضت عليه وحضنته وبوست بيه حتى وكعت الجنط من ايده فهو مردني بالعكس بادلني ردة الفعل ومشاعره كانت حتى اقوى من حضني خيل وشالني ...ونسينا نفسنا ...

‎المهم وراها اني جنت مرتاحة حسيت انه نسيته غلطتي اللي اتحلفلياها ...

‎وكلت همزين برد ومو عصبي وصدك هو ابد بيومها ماحجى بالموضوع ولا كال شي  بس جان مخبوص بشغله باللابتوب ...

‎ماطلعنا بذاك اليوم هو جان تعبان واني هم حسيت بعده تعب السفر والفاتحة بيه ...

‎نمنا من ساعة سبعة العصر ماكعدنا الا بال١٢ الظهر على دكة الباب وهم جانت هي نفسها المرة ...ام رقية

‎همه هم مرات جان الصبح عدهم يجي المي قوي ويكون بااارد كلش ومرات ينكطع ماكو الي افتهمه مشكلة علمود المي مخليت بالي هي  اتفاهمت وية وهشام ...

‎كمت سويت ريوك واتريكنا واني ايدي على گلبي لايحجي بس ماحجى ولاكال ...

‎وكلي لاتسوين غدا اليوم ناكل برة ..

‎من رجعنا حضرت نفسي وسويت الي جاي واله كهوة

‎ظلينا نسولف وكعدني بحضنه ويگلب باللابتوب مالته ..

‎كلي حضري نفسج باجر رايحين لاهلي ...

‎كتله لا عفية صدك ؟!!!

‎دار راسه وباوع عليه

‎راسا غيرت الموضوع كتله لعد انزل اشتري ملابس طويله ابوك رزلني على لبسي اخر مرة من جنت يمهم

‎كلي اوكي لعد باجر ننزل نشتري سوى  وعكبة نروح مو مشكلة......

‎وثاني يوم طلعنا افترينا جهزت نفسي ملابس طويله للبيت والطلعة لانه كلي حنبقى عشر ايام يمكن ...

‎بوكتها صدك انعقجت كلت نص الاجازة حكضيها هناك؟!!

‎بس شسوي امر ل الله

‎وثاني يوم من الصبح طلعنا لانه جانت حارة حيل ورطوبه تخنك....فطلعنا من غبشة

‎الطريق كله هشام محجى ومسولف كعادته ...

‎واني بطبيعتي مااحجي هوايه فجان بس صوت المسجل يصدح بالسيارة الى ان وصلنا

‎ومن دخلنا لبيتهم جان ترحيب اهله شويه مختلف ...

‎اكثر حرار باستقبالنا ....

‎واخته الجبيرة انتصار جانت موجودة وطشت على اخوها جكليت بالباب ولانه ولد عمهم جانوا هناك فهي لابسة نقابها ...

‎واني جنت متاكدة راح يغثوني ويطلعوني من طوري لانه  اعرف بيهم يضوجون مني لسبب ما او لاخر

‎فجنت احجي ويه نفسي طول الطريق انه مااضوج ومااهتم قررت البسهم وشيتصرفون افضحهم كدام ابنهم ولو همه مايهتمون اصلا...

‎اول كم يوم زهكتني  انتصار اخته الجبيرة ..

‎اشتغلت عليه داعية اسلامية وبدت تقرالي اسطواناتها

‎انت حرام جسمج يبين وشلون حتواجهين ربج وحتحركين بنار جهنم ومنوهذا الحجي ومن هالسوالف ...

‎وساعة تحجي ويايه وساعة  تحجي ويه هشام اللي اصلا  اللي اصلا ميجاوبها منطيها الاذن الطرشة لعد لو تدري اخوها يشرب جان شسوت؟!

‎اني جنت حاسة من كلامها انه هي ببغاء حافظة كم كلمة من رجلها  وجايه تسمعهم يمنا وانه هي ابد مو ذكية

‎فمرة جنا كاعدين على كراسي همه خاليها على ارضية  مثل الصبة بصف البيت بحيث مرتبيها وحاطين ميز مال حديقة بالنص ومغطين نصه من فوك بتول خفيف علمود الشمس

‎جنا عصرية واني وياه دنسولف هو يعرف استحي اكوم اسوي كهوة ونسكافية واجيب واني جنت مااستغني عنهم لا زم يوميه اشربهن فمن كيفه جان يسويلي ونكعد نشرب نسوى و يمكن هذا الوقت الوحيد اللي جنت ارتاح بيه هناك

‎وتهدى اعصابي

‎و مثل مااني جنت اكيد حاسة واعرف هشام صدك يحبني ...

‎همه هم جانوا يعرفون هذا الشي لذلك جانوا كلش يضايقون ...من يشوفونا سوى او هيجي جنت احس

‎فجتي انتصار وكعدت ويانه ...

‎كعدت اسولف ويايه بالبداية عن احوال بغداد صارلها ست سنين مرايحة لهناك ...وشنو متغير بيها وهيجي يعني سوالف عادية بالبداية ...

‎وكامت تجيب وتودي حجي الا ان هشام كام يخابر اصدقائه ويدخن ...

‎شوية ابتعد عنه

‎رجعت تحجيلي بالاسلاميات

‎ تكلي المفروض انت تعلمين رجلج يصلي ويلتزم المرة هي تلزم الرجال ...والمفروض كذا وكذا

‎اني صفنت وضوجني حجيها ...

‎فكلت خلي احرجها شويه حتى تجوز مني

‎اني مجنت استعمل هذا الاسلوب ويه احد الا ورة ماازهك منه حيل

‎حتى  من جنت بالكلية اغلب الناس من تشوفني بسيطة وماادخل بسوالف غيري  ومااخجل احد يحجي ويايه مااعرف ليش يتخيلوني اني غبيه!!!

‎فصفنت على الكوب مالتي كتلها تدرين كلامج كلش عحبني وحسيتج تفهمين بالدين احسن مني ...

‎ياريت تعلميني

‎كالت اي ليش لا اعلمج بالعكس اني ادعيلج الله يهديج ويهدي اخوية على طريق الحق والمستقيم ...

‎فااني هم بديت اسألها اسئلة مثل الثولة يعني مثلا انت تعرقين كلشي بالقران ؟

‎كالت اي تقريبا كلشي اتعلمت

‎رجلي ماشاء الله كلشي يعرف وهو كلشي علمني

‎فسالتها عن معنى اية بالقران ...

‎ظلت صافنة بوجهي وكامت تسفط تفسير من كيفها

‎اللي محجيتلكم عنه انه صح اني وامي ممحجبات بس خالاتي نهال واقبال ومسرة اختي محجبات ...

‎اني جنت ناوية اتحجب جان يعجبني ...

‎بس بوكتها مااعرف مجانت عندي ذيج العزيمة مجنت مقررة

‎مع ذلك اني جنت اقره هواية واحب اتعلم من جنت صغيرة ...

‎واصلا دائما امي جانت تكول جنت اذكى اخواني بالمدرسة

‎و الوحيدة اللي مخليت مدرس خصوصي وجبت معدل يدخلني صيدلة بس اني جنت حابة كليتي وبوكتها جانت جديدة ...

‎من اني دخلتها جانت وجبة وحدة متخرجة ...

‎فظليت اسالها وهي تصفن وتكول مااعرف ...

‎يمكن هيجي معناها اكللها لاغلط مو هيجي معناها ...

‎بس مثل ماجنت متوقعة انه هي مجرد حافظة كم كلمة وجاية اطبقهم عليه ...

‎وراها بعد جازت مني ....

‎كمت اني اعلمها اكللها الانسان سلاحه بالحياة القراية ...اقري قبل ماتقررين تفكرين واصفني شويه قبل ماتحجين ...

‎هنا بدت تبتعد عني وتشد ويايه كامت تحرك البنات عليه هبه اختها الصغيرة ورغد مرة اخوهم

‎بس الي صار وراها غير تفكيري بهشام واهله تماما

‎اتذكر جان رابع  يوم هشام دز اخوه على شغلة للاذقية يسويها اله وهو طلع من الغبشة عليها

‎وراها العصرية بذاك اليوم طلعنا برة اني وياه وامه رحنا نفتر بالمنطقة ورحنا على البحر بس رجعنا شويه من وكت

‎جانت عندي دوخة قوية وصداع موتني ...

‎مااتحملت رجعتهم للبيت

‎هو جان فرحان عباله اعراض الحمل جان مستقتل على طفل...

‎من طبينا جانت مغربية بعدصارت

‎ احنى دخلنا جتي رغد ورانا ...

‎ظل هشام يحجي وياها اني بعد صعدت مااتحملت ابقى ردت بس اتمدد واخذ براستول بندول اي شي. ..يخفف الم صداعي

‎وتوني داابدل  مااسمع الا صوت هشام وصياحه وعياطه وصوت نسوان يصيحون وياه  اني من يمي ماعت روحي ...

‎كوة جريت رجليه وداريد انزل اشوف شكو

‎جنت بعدني على الدرج واشوفلكم هشام يجر بشعر رغد جر ويسحلها

‎طببها للصاله وبوكسات بوجهها وجلاليق بس شنو

‎والله هي سبعه جانت صح قصيرة بس قوية كامت هي هم تضرب جلاليق وتجر شعره وخرمشت وجهه واحد يكتل بالثاني بس وكتها طبعا جانت الغلبة لهشام الموقف جان مرعب بالنسبة اليه بشكل

‎كلش انصدمت باللي شفته انوبة عمي واكف يدخن بباب البيت مايحجي بس النسوان يجرون هشام يريدون يطلعون رغد من جوة ايده ...

‎مااحجيلكم اول مرة بحياني اشوف هيجي شي شلون رجال يضرب مرة وبهالقسوة!!!

‎اني من يمي انرعب واتخيلت نفسي مكانها انوب متت من الخوف

‎واللي صدمني بيها  صلابتها وقوتها عزة

‎حانت تعض وتخرمش وهي يدفر بيها ...

‎يعني هو نسى هاي مرت اخو مظري هي نست هذا مهما كان رجال محرم عليها ....

‎المهم

‎اني هم كوة نزلت دااجره اوخره منها لا اردايا طلعت مني  ردة الفعل هذه

‎وجان اكلي دفرة من هشام بلا مايدري ادعبلت  بالكاع ووكعت من طولي يله حس هشام ساعتها على روحه ...

‎هو من جان يعصب جان يفقد من صدك

‎ويغدي  احمر طماطة وعيونه تقترب من بعضها مثل الحول يصير بيه

‎وينزل بيها دم ووجه ماادري اصفر مدري احمر ...وشعره جان مكفوش شالني وصعدني ...

‎اني من خوفتي دفعته وكعدت على الجرباية ابجي هو كام يباوع بالمرايه االي على الميز على خراميش وجهه ويعدل شعره ويفشر على مرة اخوه ...بعدين اندار عليه

‎كلي غير افهم انت شبيج من يمج تبجين؟!! وانت اصلا شنزلج جوة

‎كتله ماتخيلتك بهالقسوة شلون تضرب مره هيجي بس الجبان يسويها افتهمت ...

‎كلي دنجبي ولاتلغين زايد ...

‎انت ماتعرفيها هاي اذا ماينفرك حلكها ماتكعد راحة كتله شبيها انت ليش هيجي ضربتها ؟!!

‎كالي طالعه بلا محد يدري وامه متفاجئه من شاييفتها راجعه سائلها وين جنتي كلتله وانت شعليك عندي رجال هو يحكمني كايللها احجي عدل ..

‎متجاوزة عليه بالحجي هي صح لسانها طويل وحجاية منه وحجايه منها

‎ كابه عركة دافعهه يطببه للبيت

‎هي  ضاربته بجنطتها ومفشرة عليه على انه اني دايحة بالشوارع وهو لامني !!!

‎ولو بيه خير يستر شرفه وعرضه؟!!

‎عزة كتله زين واني شعليه

‎كلي هي هيجي لسانها طويل ومتعلمة على الكتل ...

‎وفعلا انتبهت هي متعلمه على البسط لانه تتكافش وتتعارك يعني مو مال اول بسطة الها ...

‎وفوكاها اجى اخوها يعتذر من هشام وخلاها تعتذر منه فوك الكتل اللي اكلته بس هو نوعا ما ماله حق هشام يساله وين جنت ووين رحتي ؟!!

‎هي مزوجة وعدها رجال

‎وهي هم عيب جانت مجاوب هيجي مايجوز

‎على كل ليلتها كضيتها بس اتقيأ تكرمون

‎وشكو شي طاب ببطني ذبيته من راسي

‎دكولون اني اللي حنت مكتوله مو رغد !!!

‎ودكيت رجل الا الصبح ارجع للشام بعد مابيه ابقى هنا ومانمت للصبح كاعدة

‎و باول خيط الفجرية شلنا جنطنا وطلعنا حتى بلا ريوك ...

‎اتريكنا بالطريق

‎ياربي ماصدكت ساعتها من طلعت من يمهم ...

‎هشام جان يتصرف ولا كانه مسوي شي يروح ويجي واني اظل صافنه عليه

‎سارة بشنو ورطتي نفسج بله

‎ ردتي تخلصين من دحدوحة وكعتي بحفرة شكبرها ...

‎بله لو راضية بقسمتي ويه  رافد مو احسن؟!!!

‎بس اووف صدك لو كالو القسمة من تجي تسد الحلوك ...

‎رجعت وكل همي اتصل بامي تعلمني طريقة امنع بيها الحمل لانه جديات بيومها فكرت بالطلاك ...

‎خلص بعد مااستمر وياه

‎وخلصت اجازته لهشام ورجع لاوسلو

‎الايام اللي بقينا بيها سوية بقينا بالشام مسافرنا بس وعدني على المرة الجاية من ينزل نروح لتايلاند عنده شغله هناك يكملها ونبقالنه كم  يوم نتونس ونرجع

‎ورة سفرته بشي اسبوع خابرتني صباح كالت حنجي هالايام  بلكت تلكين النا شقة طابق ارضي يمج

‎حتى اجيب عمج واجي...

‎اني هم ظليت ادور وماكو شي يومين تلاثه

‎  والله ولكيتلهم  شقة قريبة عليه  كالي ابو البيت المؤجرين يفرغوها عشرين بالشهر

‎فاني هم  دااجرها الهم باسمي وادفع عربون حتى لاينطيها ابو الشقة لغير احد شفت جوازي ماكو

‎الفلوس هم  ماكو عزة

‎گلبت عليهن  وماكو

‎ خفت بس لا انباكيت

‎خابرت هشام مذعورة كتله يمكن باكوني لاجوازي ولافلوسي اكو بس ذهباتي موجودات لانه خالتهم بغير مكان

‎كلي لا لاتخافين

‎اني اخذتهم ويايه وبعد كل شهر  اني ادزلج مصرف

‎كتله شنو؟!! شتدكول انت؟!

‎كلي لعد عبالج راح افوتلج روحتج للعراق من ورايه وكسرتي كلامي بدون عقاب؟!!

‎بعدج ماتعرفيني

‎واتعاركنا ذيج العركة اللي انتهت انه كام يسبني ويغلط عليه ...وسد الحاسبة بوجهي

‎عود اني الثولة فرخانه انه قشمرته ومشيتها عليه..

‎ثاني

‎خابرت امي ادزلي فلوس ونسخة من جواز صباح ااجرلهم بيه علما يجون ...

‎طبعا هي مسالتني ليش  بس حسيت بيها اتعجبت انه ماعندي فلوس وهي ماتدري  الافندي ما عايفلي بس ورقتين ...

‎ومجدد اجار الشقة ودافع مال اربع شهور لخ ليكدام ورايح  ...

‎ظلينا اني ويله منتحاجى هم هو هم اني اتعلمنا على البعد والزعل

‎المهم صدك واجوي بيت عمي ...

‎وكلش فرحت واخيرا شفت احد يمي

‎وكضيت وياهم كل وكتي ....

‎جنت حتى ابات يمهم بالليل

‎ وكمت مااسال لا على هشام ولا على اهله لانه جان يجبرني اخابرهم كل اسبوع ...

‎بس همه مافي مرة شالوا تلفون وخابرو عليه يسالون عني !!!......

‎ نهاية الشهر يله عود فكر يتصل واتخيلوا اكثر من اسبوعين مدري تلاثة مايدك عليه وهو عادي عنده مايعرف عني شي ...

‎بس جان يعرف بيت عمي يمي ...

‎اني هم كمت اعامله ببرود فوك ماتتخيلون وهذا الشي زعجه كلش. ..

‎بس اني اعرف هشام مايمشيليها بسهولة ..مااجى لا بالتاسع ولا العاشر....

‎اني كلت خلاص براحته عساه منه مااجى...

‎بس اهلي كلهم حسوا اكو شي غلط بعلاقتنا وظل ابويه وامي يخابروني يطمنون عليه وبس  يريدون يعرفون شنو الموضوع مااحجيلهم

‎شريد احجي ...وشريد اكول !!!!

‎مر علينا رمضان وبيت عمي بعدهم هنا

‎وفد يوم  طلعنا قبل الفطور اني وصباح ورياض وعفنا عمي جان نايم وهو اصلا مايكدر يصوم ....

‎ وكعدنا بمطعم  قصر الأمويين .. ( نروح عليه من عند قصر العظم ( جهة البزورية ) وطبعا هو خان شامي قديم بديكورات شرقية والاكل بيه  بوفيه مفتوح فقط اكل شامي اني جتت اشوفه اطيب مطعم واكل عنده ...

‎واحنى دنسولف شفت ولد شاب ظل يباوع عليه ويبتسم

‎يالله هذا شكله ابد مو غريب عليه ...

‎اني شبهت عليه بس كلت ممعقوله هيجي اتغير

‎من شافني اني هم اباوع عليه شويه شويه اتقرب من عدنا من جنا يم بوفيه الحلويات  وسلم عليه كلي شلونج ست سارة اتذكرتيني ...

‎كتله والله مااعرف شكلك يمكن انت غيث مو؟!!

‎كلي اي اي هو ...

‎بس هو جان كلش متغير سمنان جان عودة من جان ويايه بالكلية

‎احنى جنا زملاء  بنفس الجامعة ونفس القسم بس هو جان بمرحلتين متقدم عليه  من جنت اني اول هو ثالث اتذكر ورة نص السنة اجى صارحني  باعجابه

‎صح اني وكتها رفضت علاقة وياه بس جنا نتبادل نظرات جنا طلاب المرحلتين  اول وثالث بطابق والثاني والرابع بطابق فحتى من نجحت للثاني نزلنا سوى للطابق الارضي  الا ان اتخرج واحنى نتبادل النظرات لانه هو جان يلحكني وين مااروح  بس كلشي ماسوينا ولاحتى حجينا مع بعض وراها

‎ بوكتها جنت معجبة بغير واحد ونوعا ما جان اكو بيناتنه شي  بس محد يعرف ...

‎المهم تسالمنا وظلينا شي ربع ساعة نسولف واحد يعرف اخبار الثاني

‎الصدك اني جنت فرحانه انه شفت احد قديم اعرفه هنا من ايام الكليه و الحق يقال الولد حيل مؤدب وماشفت عليه شغلة موزينة ابد بذيج الايام

‎فعرفته على صباح

‎وظل يحجي ويانه وعرفت انه هو ماجر  على بعد كم شارع من عدنا ...

‎هم امورة صايرة زينة احسن بهواية من قبل ...

‎وجان بعده مماتزوج ...

‎بس عرف انه اني متزوجة وزوحي بالنروج....

‎وراها مرة لخ شفناه جنا بس اني وصباح بسوق  التنابل اللي بحي الشعلانن نتسوك ونجي كلشي جاهز ويخبل صح شويه اغلى بس مسواكه مرتب ونظيف جنا مستعجلين  فسلمنا وطلعنا على السريع مجان عدنا وكت  ...

‎ومرة لخ  هم شفناه بجرمانه

‎اني جنت هواية احب اروح هناك ...

‎المنطقة كلها عراقيين ومسواك عراقي وخبز عراقي  بس جانت ذيج المرة من شافنا ليلية  ورةالفطور عزمنا على كهوة بس اني ماقبلت مجنت احب الكهاوي هناك اكو بعض منها عليها سمعة يعني فمجنت احب اكعد بيها

‎رحنا لمحل ايس كريم ...

‎صح الحو باارد شويه بس كعدنا واكلنا

‎وهاي جانت غلطة مني لانه غيث شويه اتجرأ وكام يدزلي مسجات اني وكتها من انطيته التلفون مجان قصدي شي ولا جنت مفكرة راح يفهمها بغير شي المهم مجنت اجاوبه بالبداية جانت بس سلام ...

‎ورة العيد بكم يوم رجعوا بيت عمي لبغداد ورجعت وحدي جان مكانهم خالي ..

‎بس كمت بين طلعة وطلعة اشوف غيث گبالي بالبداية مااهتميت بعدين كمت اضوج

‎بالدعش بنهايته اجى هشام مرة لخ بس هالمرة اول مانزل مابقى يمي كم يوم وراح لبيت اهله ورجع

‎ اني بوكتها جنت طالعة دااتسوك فمن رجعت شفت سيارته جوه ...

‎صعدت وفتحت الباب لكيته بالحمام ...صحته مجاوب ماسمعني يمكن

‎وجان يدك تلفونه من ديدك عليه صورة بنية شكرة اجنبيه مبينه عيون زرك وشعر اصفر بس شويه جبيرة بالعمر لابسه كليته وشعرها طاير بالهواووراها ثلج

‎مااهتميت اول مرة بعدين كامت توصل مسجات

‎ماافتهمت شنو جانت كاتبتله جان بالنرويجي ...

‎سكتت ماحجيت

‎طلع هو اتفاجا من شافني يم التلفون

‎راسا اخذه وغلقه

‎ثبت عيد

‎سارة اكو شي شغلته مو خاليه بس لاتصيرين ثوله وتواجهي بدون دليل

‎سويت نفسي كلشي عادي ومااهتميت بالليل رخت دورت باوراقه وجوازه وشغلاته

‎حظي كله بالنرويجي

‎المهم طكيتلهم صور

‎تدرون اني لحد ذيج الساعة حتى عنوانه مااعرفه

‎خزنت الاوراق وكلشي لكيته طكيتله صورة وثاني يوم على السكايب دزيتهم لمسرة كتلها خلي يترجموها اليه لانه النرويجيه قريبة شويه الالمانية واكيد اكو احد يمهم يعرف نرويجي ...

‎يومين او تلاثة رجعتهم مترجمه هو جان بعده هنا مجان اكو اي شي بالاوراق بس على الاقل حصلت  الادرس

‎العنوان ...

‎ردت بس الرساله توكع بيدي ماكو

‎تلفونه بجيبه على طول

‎المهم قشمرته بالليل ...

‎وهو جان جايب شرب وياه ذيج الليله اني كل مرة مااقبل وامانع واتعارك اصلا تلعب نفسي من ريحته بس هالمرة خليته براحته ومن شافني محجيت داس بالزايد ...

‎ونام ذيج النومه الا ان  كام يشوخر اخذت التلفون وختلت بالحمام

‎رة شويه دزت مسج ..

‎هو بوكتها صح جان خال باسورد بس اني جنت لاكفته ومايعصى عليه اطلعه همين ...

‎وفتحت  المسجات والمكالمات كلها ممسوحة

‎بس اني اتذكر الاسم دورت عليه ماكو حتى الاسم ماسحة ...

‎شسويت طكيت صور لقائمة الاشخاص ولسجل المكالمات

‎ثاني يوم من طلع الظهرية عزلت الارقام النرويجة على وحد والارقام العراقية على حدة الا مااشوف رقم العوبة سراب؟!!!

‎اني صدك اتفاجات اول شي من قريت اسمها مصدمت رحت طلعت تلفونها جان الكاها هي هنوبة قبل مايجي هنا مخابرته

‎عزة شتريد منه هاي العايقة !!!!!

‎اتذكر ذاك اليوم جانت باردة شويه كعدت الفجرية سويت كهوة وطلعت للبلكونة ...

‎الهوا جان منعش والدنيا بعدها توها تفتح عينها ...

‎باوعت على السما ونزلت دمعتي ...

‎جنت محتارة شلون اتصرف ويه هشام زوجي وويه سراب بت عمتي ...اللي شفت مكالمتهم البارحة بتلفونه

‎اني  من قريت الاسم كان بالنرويجي فمااعتقدت هي الا ان جيكته ويه تلفوني ...طلعت هاي سراب

‎عدا انه عرفت زوجي عنده شي ويه هاي النرويجية ...

‎بعدها من دخلت جوة للصالة  اخذت مهدئ قوي لالم راسي جان لازم احجي ويه امي واسالها بعد مااتحمل

‎اتمددت على القنفة وفتحت التلفزيون اگلب بالقنوات ...

‎وراها بشويه كمت  اسمعه لزوجي ديحجي بالتلفون بالنرويجي ...

‎يجوز وياها يجوز لا

‎هو جان كاعد مسطور ودايخ غسل وبدل شرب جايه وطلع

‎جانت ساعة عشرة تقريبا ...محجينا ولاكلنا ...

‎خابرت امي تلفونه يرن وماتشيله ...

‎رجعت خابرت مسرة جانت ويه جهالها برة ...

‎فخابرت صباح مرة عمي ومن عدها عرفت سراب جانت ببيت اهلي بايته الجمعة اللي فاتت قبل مايجي رجلي بيوم....

‎كعدت افكر...

‎شلون افضحج ياسراب كلت اذا خابرت ابويه وكتله راح تنكر وتكول اتهمتها باطل وهي سبق ومسويتها ...هذه اسال هشام نفسه عليها

‎بس خلي بالاول اعرف  شلون اطلع رقم البنية

‎كمت شكو رقم دنماركي ادك عليه واسده

‎مااحجيلكم شلون الرصيد طار...

‎الى ان جمعتلي اربع ارقام نسوان ...طلعن من اللسته ...

‎خليتهم على صفحة وحضرت هالمرة كيبل تلفون راح انقل كل الصور والالبومات ...

‎لانه البارحة ملحكت صور هواية واغلبها صورنا وصور اهله ماكدرت اشوف كلهن حتى اشوف هو خازن صورتها لو لا

‎كعدت

‎حضرت الاكل اللي جان هو غدا وهو عشا ...

‎اتذكر جانت ساعة ستة اكلنا وكلي امشي نطلع نفتر

‎وطلعنا رحنا لجبل قاسيون هو حاول يكون رومانسي مثل قبل بس جان مبين عليه متغير ...

‎جابلي ورد وظل يحظن بيه ومن هالسوالف بس مكدر يحرك بيه شعره

‎منظر المدينة واحنى كاعدين على الجبل جان كلش حلو ووكت مغربيه خلاني بالزايد اصفن واروح لغير عالم واتمنى اشياء ياريتها مصارت....

‎وبنص كل هذا مايكدر يخفي مشاعره انه متضايق مني  مااعرف ليش

‎كمت احسب انه سراب حاجيتله كلشي عن رافد ...

‎ماتجوز هذه مني الا تخرب عليه بيتي

‎وبليلتها  هم جاب شرب وياه شافني مااحجي كال خلي استغلها ...

‎واني اصلا كيفت ردتها حجة عليه واتمنيت ساعتها صدك عنده علاقة او متزوج هاي الاجنبية حتى اطلب الطلاك راسا ...واخلص ...تعبت منه ومن هالعيشة

‎عود هم اني مثل البنات فرحت جنت عروسه واتونست بعرسي ؟!!

‎بيومها قفلت خلاص بعد مااريده....

‎من دنرجغ خابرتني امي اعتذرت جانت مشغولة كتلها لا ماكو شي باجر نتخابر بس هي حست اكو شي .....

‎وهم

‎بالليل ثكل بالشرب ونام

‎شكو بيانات بتلفونه سحبتها على اللابتوب مالتي وخزتنها بفايل هدن مخفي ..

‎ورحت للحمام كتبت رساله من سطر حبيات جنت ماخذتها من كوكل ترانزليت ودزيته للنسوان الاربعة هههه شسوي شلون اعرف منو هي  صاحبته

‎ومارجعت غير رسالتين وحدة علامة استفهام سطر هههه

‎والثاني طكيتلها صورة ونقلت كلماته على المترجم كوكل وطلعت حبيات من الافندية عبالها هو جاي يزور اهله ماتدري يمكن متزوج ...

‎دزيتلها كلمتين دزيلي صورتك مشتاقلج ...

‎هي جاوبت كالت منو انت ؟!

‎هههه جفصتها اني الظاهر

‎وكامت تدك على التلفون

‎كتبتلها اني زوجته

‎ومسحت كل الرسايل لانه هي مدزت شي وراها

‎وخطرت في بالي ورة شويه ادزلها صورة عرسنا

‎وصدك سويتها بس ماوصلت طلع التلفون مايدز ميديا

‎رجعت التلفون مكانه وظليت للصبح ابحوش بفايل تلفونه على الحاسبة الا ان لكيت صورته مخزونه بوحدة من الفايلات الخاصة بقائمة الاسماء ...

‎حولتها لتلفوني ونمت جانت تقريب ساعة اربعة الفجر  ...

‎هو اول مكعد كام يتحرش بيه بس مقبلت

‎ضاج وعصب

‎كتله ريحة الشرب بيك  تكتل وكمت غسلت

‎اتنرفز وكام عصبي وكعد يدردم عليه ...

‎جان بالي مو يمه

‎جنت ارجف لانه حضرت نفسي وردت افتح الموضوع دك عليه ابو قاسم  كله اني جوة بدل وطلع على السريع ختى بلا ريوك

‎هو طلع دكت ماما

‎حست بيه البارحة مو مرتاحة

‎من سمعت صوتها خنكتني العبرة بس مابينت الها

‎كمت اسالها عليهم وعلى احوالهم وعلى الافندية سراب

‎كالت جتي ليله ورجعت...

‎كتلها ماما تعرفين سراب تخابر هشام ومخابرته قبل مايجي لسوريا ؟!

‎كالت صدك وشعدها هاي وياها ومنينلها رقمه؟!

‎والله ماما مااعرف بس هاي متجوز من سوالفها فكلتلي لج هاي تريد خرب عليج ماتكعد راحة ...

‎ماتجوز اذا متنكسر رگبتها

‎كتلها مااريد هي تعرف اني عرفت ولاتخابريها ولاتحجين وياها خليني اني اتصرف لانه اكيد حتنكر  ردت بس تعرفين شنو من بشر هاي الحقيرة وشنو من اخلاق ...

‎كالت امي مايحتاج تعرفيني اذا هو رجلها يوميه باسطها ودازها هنا لانه يشك بيها عدها واحد

‎الله اللي يعلم شكد ...عاد واحد لو اثنين

‎كتلها اصلا اني شاكة بهشام عنده وحده بالنروج هم ...

‎خطية هي كلش انقهرت من كلعت هاي الحجاية من حلكي

‎اني مجنت اريد اكللها حتى لاتنقهر بس مكدرت الزم نفسي مااعرف...

‎انمردت عليه  وكالت هاي انت طالعة على امج ...ماعندج حظ ويه الزلم

‎بس يايوم لاتحلين المشكلة بمشكلة اكبر ...

‎بگلبتي كتلها لو تدرين لعد اني شناويتله

‎سلمت عليهم ورحت ...

‎حضرت الغدا وجان يجي ...

‎جايبلي ورد مثل  اللي جابه من جنا على جبل قاسيون وحاول يتوادد ويايه ماقبلت هو حس وعرف اكو شي

‎وشكد رفضت وحاولت امنعه من الفراش مكدرت ...اخذ اللي يريده

‎كمت معصبة وضربته بالمخدة حيل

‎بدلت وطلعت من الغرفة هو دخل للحمام مبين جان يريد يطلع فكلت هاي احسن فرصة احجي واكوله على صاحبته اتاري حظي فوكاها هو اللي بداها

‎كلي شبيج اشو صاعدة الخبالات عندج !!!!...

‎شبيج هم اتنحستي؟!!

‎فاني صدك صعدت عندي رحت جبت التلفون وعيطت كتله منو آن..anne

‎ههههه ضحك ...

‎كالي صديقتي وحبيبتي

‎والله هيجي كالها بكل برود وهو يضحك

‎ كتله ياحقير تضحك وتكولها صديقتي ياكذاب ياخاين تخوني ويه وحدة قذرة ...مثلك ...

‎فكمز عليه ولزمني من فكي كلي لا ماخنتج ..

‎هذه عشيقتي صارلها اكثر من اثنعش سنة وهي حبيبتي وروحي

‎وجان يفرك وجهي حيل وديري بالج تصيحين وتعلين صوتج ...

‎اط ي ح ح ظ ج

‎هيجي كالها متقطعة ...

‎لحد الان اتذكر رجفة جسمي وعصبيتي كتله يعني تعترف ولا هامك

‎عاد راح لغرفة النوم ...

‎ديبدل

‎كلي اي مو هامني ومضام هذا الشي اني ...

‎وكل الناس تعرف بينا ...

‎كتله على هيجي شكو مااتزوجتها ليش

‎حفيت ورايه وكتلت روحك عليه ...ليش ...

‎كلي هي ماتريد زواج واطفال .......

‎واني حبيتج وردتج زوجة وام بيتي

‎كتله لا والله شفتني فقيرة كلت هاي على كد اي

‎جان يضحك يكلي اي عفية بالضبط

‎واندار عليه كلي باعي داكولج لاتسوين  عليه منية قبلتي بيه...

‎انت مصدكت اتقدمتلج

‎ جنت مضروبة بوري...وكبرت وكلتي اذا هسه ماقبلت بيه بعد كم سنة مايجيني غير الارمل والمطلق مو !!

‎كتله شنو هالحجي السخيف هشام

‎مدام عندك وحدة وبكل صلافة تكول مااعوفها

‎طلكني شكو نعلكني هنا ترة اني هم مااريدك

‎استهزأ كلي شنو بله

‎لا عيني شيليها هاي من بالج

‎طلاك مااطلك

‎الله لايشوف احد الصداع اللي جان عندي بذيج الساعة واللي جتفني ومخلاني اعرف اتصرف ...

‎ودخت بسالفة المطلق والارمل هذه حجاية مسرة كالتها اليه ...وماكو غير سراب الغراب اللي نقلته اله ...واتخبلت اكثر

‎كمت اصيح واعيط اكرهك مااريدك وهو بكل برود

‎يكلي ضربي راسج بالحايط

‎وطلاك مااطلك

‎ولا اعوف anne

‎كتله انت كذاب ومنافق قشمرتني وفوكاها تكول مااعوفها ...

‎شكد حقير انت

‎كلي من كل عقلج اعوفها بابا هاي هي  اللي وكفت ويايه والتزمتني من اول ماوصلت للنروج ومااتخلت عني ابد فلا تلحين وتطلبين مني شي مااسوي لا علمودج ولا علمود غيرج ...

‎وعلى شنو انت گالبه الدنيا على اساس انت قبلي ماتعرفين احد؟!!

‎كتله احد منو انت شدتحجي انت وشتجفص؟!

‎هاا ورافد نسيتيه مو !

‎كتله لا محتاجة سراب تخابرني واتذكرني بيه حتى بت عمتي ماسلمت منك ودنت نفسك عليها الله اللي يعلم كم وحدة غيرها تعرف

‎...ضحك كلي لج بابا انتو كلكم عائلة  كلك

‎واني اللي ماسلمت منكم ...

‎يومية تخابرني وذابحة روحها عليه

‎هاي الخايسة اني اركض وراها عائلة زبالة

‎فلاتضوجيني وانجبي وسكتي

‎سدي الموضوع وكافي واحمدي ربج على النعمة اللي انت بيها نص بنات العالم يتمنون مكانج بله  من شنو انت  محرومة

‎اشو كاعدة معززة ومكرمة باحسن منطقة وايجار مدفوع الج ومصرف جوة ايدج ومشايله هم اي شي بالدنيا بيج خير على هذا الدلال جان هسه انت حامل اقل شي ...

‎والا بس لاطلعين مابيج خيير

‎كتله لا والله صدك تحجي ....

‎ليش اخاف لميتني من الشارع وماادري انت مو صاحي لو الظاهر تغشم نفسك ونسيت انه هاي الشقة احنى ناجرها لسنين ومن اتزوجتني اخذتني من بيت طول وعرض ومن عائلة انت تعرف منو امي وابويه

‎سيارة اخر موديل جانت جوة رجلي ومالحكت اكمل

‎دفرني حيل وكال دولي وانلصمي كافي عاد

‎هو جان معصب وصوته هم بدى يعلا فصيحت وعيطت عليه كتله الا اكول لاهلي همه يتصرفون وياك الا اخليك تتندم على تصرفاتك هذه !!

‎اشو هذا كام يقشمر عليهم بكل وقاحة وصلافة طلع وجهه الثاني والحقيقي اهلج منو بله ؟!

‎ابوج !! الحاير ويه النسوان لو عمج الشلل لو سرمودي الخيخة اوي عيني

‎امشي بابا ولي ..وظل يسب ويغلط عليهم

‎اني اتخبلت جنت اقاطعه من جان يحجي على اهلي بس من جاب طاري سرمد كلش انقهرت وبعد خنكتني الدموع وكمت اشهك

‎كتله ياواطي هو انت توصل لاهلي انت واي واحد بعشيرتك . .

‎تحجي على ابويه لو اخويه ...بعدني ممكله ضربني راشدي فرني فر ماحسيت على روحي وكعت على القنفة

‎ولزمني من شعري اطيح حظج وادفنج هنا مثل الكلب اذا حبتي طاري اهلي على لسانج لو اتجاوزتي بعد

‎افتهمتي؟!!

‎اني صدك دخت من الضربة وردت بس يعوف شعري خفت بس لايبسطني مثل مرة اخوه...

‎كمت ابجي وماحجيت شي...

‎عافني وطلع

‎خفت اخابر اهلي وتكبر الشغلة وامي جانت خايفة ومقهورة هي بلا كلشي قهر جدي الله يرحمه  لساه بگلبها

‎واخابر ابويه شكله

‎خابرت مسرة واني منهارة تماما ...

‎هي بدال ماتساعدني ظلت تلوم بيه انه اني استعجلت على هاي الزواجه وضيعت رافد مني انوب زيدت همي هم وقهري قهر كالت قبل يومين خطب عراقية بالمانيا بنية عمرها عشرين سنة قبل كم شهراهلها  جايين لالمانيا

‎معرفت ساغتها شلون انجرح گلبي وانشك بالنص رغم كل القهر والضيم الي اني بيه جانت ذكرياتي ويه رافد هي الامل الوحيد والمنفذ اللي جنت الجا اله ارتاح بيه من واقعي السئ والمرير...

‎وحسيت ساعتها بالالم اللي عفته بيه من عرف اني اتزوجت !!!

‎ومن شافتني خلص انهاريت ...

‎كلتلي اهدي وارتبي امورج على الانفصال ...

‎وانصح روحي قدمي على الامم وفتحي فايل ولاتكولين متزوجة بلكت تطلعلج قبل مايطلع لم الشمل ...

‎كتلها اصلا حتى جوازي مو يمي بس راح اسوي هيجي ...

‎وساعتها بديت اخطط للطلاك

‎وثاني يوم رحت لام قاسم واتعارك وياها لانه من سالتها عن  أن كامت تتبلعم يعني جانت تعرف وضمت عليه دعيت عليهم وطلعت صدك كسروا ظهري بسالفتهم هاي ....

‎ورة يومين رجع للبيت من الصبح اخذ جنطه ورجع لاوسلوا اني جنت مصخنة وحرارتي مرتفعة نايمة بالفراش وبديت حالتي تسوء...

‎حتى مكلي شبيج ولا تحتاجين شي

‎كل هالحب طلع كذب او شنو والله مااعرف......اوووف سارة هذا حظج ....

‎قبل المغربية بعد مااتحملت كوة نزلت رحت على هذه جارتي ام رقية مجنت اعرف احد غيرها هنا

‎هي جانت شويه اكبر مني بس شابه ومرحة ...

‎من شافتني خطية انذعرت وراسا صعدت ويايه لانه رجلها جان بالبيت فمقبلت  ادخل جوة اني

‎ وخطية هي الله يرضى عليها راحت للصيدلية جابتلي خافض حرارة وباندول وبقت يمي لشي نص الليل يله راحت

‎ اني جنت ابرد واحتر وكمت اهلوس واشوف كوابيس واصرخ ويه روحي حسيت باختناق مو طبيعي بس لوجه الفجر الحمد لله يله غفيت صعدت عليه عي مرة لخ شي ساعة عشرة الصبح جانت جايبتلي زهورات ...

‎والله سبحانه وتعالى دزها اليه اتداريني بذاك اليوم ...

‎من شويه صحصحت خابرت امي وكتلها تعالي تعبانة ومريضة وحدي وهشام مسافر محتاجتج تعالي والله ورة شي عشر ايام او يمكن اكثر يله كدرت تجيني ...

‎وحجيتلها كلشي خطية اتاثرت حيييل

‎وظلت بالبداية تكلي اهدي وهدي  الموضوع ومو وكتها طلاك انتو  حتى مصايرلكم هواية متزوجين  الناس شتكول علينا. .

‎وهو من يصير عنده طفل حيعوف صاحبته ويرجعلج

‎ومن هالحجي انه اسحبه اليه ومرده اليه ومرجعه اليه ومن هالحجي

‎ اللي اصلا مدرتله بال وهي هم عرفت هذا الشي

‎وعرفت  هذا حل خطأ كامت تحضني وتبجي ...

‎عرفت اني حظي اعوج ومايكعدلي رجال ....

‎من شافتني ابجي بحركة وتعبانه وكارهته خيل كالت خلص اخلي ابوج يحجي وياه ونتفاصل عليه

‎ يا انت يا هاي صاحبته ماترهم بعد خلص

‎والا اطلكي مو انت تريديها خلاص خلي يولي لاتقهرين نفسج ....

‎بلاها وجع الگلب والقهر هذا

‎انووبه من ابويه يخابرة مايشيل التلفون ولا السكايب ولا حتى عبرهم ....

‎ابويه كلش عصب واكله الندم على هاي القسمة الكشرة وكلي وين يروح بس يجي لسوريا خابريني اني جاي

‎ودزله رزاله طويله عريضة على السكايب اصلا بابا يكول ولافاتحه ...ولاقاريها

‎فعلا طلع اصله شنو 

‎بقت امي يمي اسبوعين ارتاحيت بيها شويه وراحت

‎وعلى اساس هو يجيني بشهر الواحد عنده شغلة كلش مهمه بالعراق ....

‎كام بس يدزلي مسجات اذا محتاجة شي

‎بس اني اردله برسايل جرايد وصفحات واحجيله عن الالم اللي تركه بداخلي وشلون اجى من گلبه يمد ايده عليه وانه مستحيل ابقى وياه وهو على علاقته بصاحبته وكتله اتخيل لو اني خاينتك جان شسويت بس هاي رد عليها گلي ادفنج انت وياه بمكانكم اكطعج وصل ةبقية الحجي جان لايصد ولايرد عليهن

‎وخلال هاي الفترة واللي قبلها وبين فترة وفترة جنت استلم مسجات من غيث   زميلي اللي جان ويايه بالكلية ...

‎بس جنت البسه وراسا امسحها خصوصا من جان هشام  هنا وهي اصلا مسجات بس سلام وشلونج

‎جنت اكتبله عفية زوجي هنا ارجوك لتحرجني

‎يتوقف يومين تلاثه ويرجع يدز ..

‎بس هاي صارله تقريبا اسبوعين اوكثر ماستلمت منه شي واني جنت متحلفه بس يكتبلي ارزله واتعارك وياه ...

‎بس اشو هو من يمه اتوقف

‎اني بديت اشتغل على معاملة الامم واقدم لجوء المشملة جانت بجوازي صح اني عندي نسخة بس احتاجيتته

‎وخلال هالايام اني اتصال من تلفون غريب

‎اتفاجات انه طليقة عمي جايبة بتها وجايه ماتعرف احد هنا غيري ومهما كان اني هم بت عمهم كعدت يمي اسبوعين وراحت ماشفت منها شي موزين بالعكس  بس  جانت مخبوصة يمكن دجهز بتها مسواك عرس لو ابنها لا هي حجت ولا اني سالت بس فريتهم كل الاسواق الحميدية وغيرها اللي ممكن تشتري منها ملابس ...

‎وظلت فترة وبعدين رجعت هي جانت جاية بس تتونس وترجع يعني مو على شغلة معينة بس فعلا مثل مكال عمي من اول يوم جتي سالتني على ابو خيرة ...ههههه

‎كتلها الله وايدج بلكت تشوفيلنا واحد  وياج خلي اشوف حظي شبيه ....

‎ورة ماراحوااني جنت كلش تعبانه من الفر جنا يوميه نطلع الصبح ووالعصر الصبح مسواك ومولات والعصرية نروح مطاعم وبين مرة ومرة نروح لتاون سنتر ولارض الخير اني هم جنت احبه كلش

‎كافيهات مفتوح ة صح شويه باردة بس كعدة ترد الروح و رحنا شفنا مواقع التصوير مال باب الحارة كتلت روحها عليه ...

‎اني حنت كلش افرح اي احد يجيني وحتى لو اتعب جنت مااكول لا ن جنت احب اطلع وافتر خصوصا اذا اكو احد ويايه

‎ورة مراحوا وبقيت وحدي وراها

‎ بكم يوم تعبت حييل وداانزل اروح للدكتور اتخربطت بلاب العمارة صارت عندي دوخة وتقيأ والدنيا تفتر بيه ...

‎خابرت على ام رقية ...جانت .بعيدة عليه  كلش وكالت هسه ادز ابنها عليه ...

‎وياروحي شيصبرك

‎ولحظتها  شفت غيث دزلي مسج حتى ماقريت شنو مكتوب بيها راسا خابرته كتله تعال عفية عليه

‎تعال الحكلي اتخربطت ومابيه اوصل باب العمارة كاعدة على الدرج وخطية راسا اجاني واخذني للمستشفى

‎وليش هناك ما الدكتورة تكلي  حامل!!!!

‎اصفريت وبهتت وحتى غيث يكلي شبيج خوما شغله موزينه اكله لا لا ماكو شي اتشكىرت منه ورجعني للبيت بس اني شنو  ارجف ...من القهر والخوف

‎خابرت امي دااحجيلها  ...جان بيتهم هوسة ...عمتي جايبة سراب وجايه مايريدوها بعد ورجلها مطلكها

‎وامي طابكة ويه عمتي ومتعاركين وياها وكايلتلهم شلون مخابرة هشام رجلي وحاجيتله عن رافد وعن حياتي وكومة حجي موزين علينا

‎ومثل ماتوقعت من اول مرة ناكرة ومرجعة التهمة عليه انه اني اتهمها باطل و اريد اخرب بيتها ...

‎المهم كعدت اسولفلها  واني بكل عفوية كتلها اتخربطت يمكن نزل ضغطي  واجى غيث ولد عراقي اخذني للمستشفى هي وكتها مدققت بالحجي ويايه

‎اطمنت عليه ووصفتلي ادوية وشغلات طبيعية آكلها حتى ترجع صحتي ووصتني اسوي فحص لعيني علمود صداع راسي واسوي تحليل دم ....

‎وراها

‎راسا راحت لانه جان ابويه يتعارك وسراب تصيح كتلها ارجع اخابرج بعدين ...

‎وظليت على نار شلون اوكع الجاهل قبل مايكبر

‎طبعا ماكلت لامي لانه هي ضد هاي الفكرة من زمان وجانت ترفض تسوي اي عمليات اجهاض تماما

‎فركضت على ام رقية وحجيتلها كلشي واصلا اني من جنت مريضة صرنا وحدة تشكي  للخ ونوعا ما صارت صديقتي يعني جانت علاقتنا صح بالبداية بس كل وحده همها شكل

...........

‎ عي حانت مشكلتها زوجها تنبل مايشتغل ومايصرف عليهم وهي على طول حايرة بمصروفهم

‎وحتى ابو البيت اللي جانو ماعدين بيه قبل

‎ طاردهم منه يتاخرون بدفع الايجار

‎وهسه   كاعدين بشقه رجل اختها زنكين قطري ويصرف حتى عليهم مرات ...

‎المهم انطتني مااعرف شراب وزهورات اللي هي تعرف تسوي اسقاط  وسحلب وكوومة شربت بس مغص يصير عندي واتلوى من الالم وكلشي ماكو

‎و كمت يومية اروح للجم

‎وهنااركض والعب واكمز  اريد بس انزله منزل ...

‎ورة  اسبوعين  نزل هشام لسوريا ....

‎نزلت طيارته الفجرية

‎اني جنت نايمة بالفراش ومصخنة حيل ...

‎اجى وجان مو على عوايده من يجي

‎صاير  نار وشرار بعينه ذب جنطه وطار لطرطوس حتى مكلي شلونج ....جانت تقريبا الظهرية من طلع 

‎من راح ردت اخابر ام رقية تجيني تلفوني ماكو ...

‎ادور عليه منا مناك ماكو ...

‎عزة وين صار جان كل ظني مضيعته ...

‎وظليت يومها ابد مو على بعضي حسيت نفسي راح يصير بيه شي ...

‎من اجى هو  بالليل اني جنت بالحمام دااتقيا دفر الباب وصاح عليه

‎لج سارة اليوم ادفنج هنا

‎انت تلعبين عليه

‎انت تضحكين عليه

‎ويفشر ويغلط  ...

‎لج تخونيني يا مااعرف شنو ياكذا وكذا ومن شافني من الحمام جرني من شعري وسحلني سحل ...

‎اني خوفتني بس اصيح حامل والله حامل

‎لج منوووووووووو  غيييييث يا كذا وكذا

‎ ودفرات ببطني ويركع راسي بالحايط طبعا اني

‎وراها ماكلت غير بس كلمتين والله ماعندي شي وياه

‎ اتاري هو اللي جان ماخذ التلفون وشايف المسجات الاخيرة ومكالمتي من داكة على غيث اني ناسية هالمرة امسحهم

‎ويصيح اليوم امسح ايدي بدمكم انت وياه

‎الا اجيبه من حوة الماع هذا ...ال كذا والكذا

‎مااتذكر كلش زين اللي صار وراها  بس جر الشعر والضرب اللي ببطني وخشمي طك دم وراها فقدت الوعي

‎ وماوعيت ولاحسيت على نفسي الا بالمستشفى عيوني مااكدر افتحها مزركة ومورمة من الضرب ...جانت ام رقية واكفة بصفي وتبجي عليه.....

‎بروازمن_ورد

16

‎بقيت شي تلاث ايام او اربعة بالمستشفى وحدي ...وجنت ميتة من القهر لانه محد من اهلي ويايه

‎بس جانت ام رقية الصبح تجيني ساعة وتروح

‎هي هم عدها بيت وجهال  وخلف الله عليها من تجيني ...

‎اني معظم الوكت كنت نايمة

‎بس اصحى اصرخ من الالم...فينطوني مهدئات يله ارتاح وارجع اغفى مرة لخ

‎ والممرضات يسألوني اهلك وين ؟

‎اكللهم بالعراق طيب جوزك وينو  او اي حدا تعرفيه مشان نتصل بيه بيجوا يطمنوا عليكي!؟؟

‎واني مااعرف اي احد فبس انطيهم اسم ام رقية

‎ومن جتيني اخر يوم انطيتها رقم تلفون امي تخابرها تنطيها خبر على اللي صارلي حتى بلكت تكدر تجيني

‎وكلما اسائلها عنهم تكولي ماعم بيردوا

‎وخطية اخذتني ورجعتني للبيت ...

‎جانت جاية هي وبتها الصغيرة اماني يمكن ثمن سنين عمرها وقبل ماتطلع حطيت مية دولار بيد البنية الصغيرة كتلها عفية الله يخليج لاتعوفيني ماعندي احد هنا ومااعرف اي احد...بس انت مريلي واطمني عليه اخاف اموت ومحد يعرف بيه ...

‎وبالنسبة لام قاسم ابد ماذكرتها ولاردت اصلا اشوف شكلها ...كثر ماحقدت عليها

‎فام رقية كيفت و طارت بالفلوس

‎بوكتها  المية دولار جانت كلش هواية هناك ...

‎وماكو بس هي  طلعت

‎كوة  طبيت غسلت وطلعت

‎ بس شنو جنت بس  ابجي ...

‎خفت اباوع على روحي بالمراية لا اتاذى اكثر لفيت روحي بالبطانية ارجف وابجي ...

‎وانوبه حتى مازوت ماعندي افتح تدفئة

‎فتحت الحاسبة مابيها نت ...يبو هذا هم حظ

‎فغفيت ورحت بسابع نومة جنت احس بعدني خدرانه وامشي مقوسة جان عندي الم ببطني ...

‎عرفت بعدين مسويلي كورتاج

‎  جنت كلش تعبانة مصحيت الا على دك الباب ..

‎جانت ام رقية جايبتلي جدرية دجاج مسلوك خطية على اساس اتغدى بيها

‎اني شفت الجدرية  لعبت نفسي ماحبيته ولا اكلته مع انه دجاجهم طيب بس مجان الي نفس اكل

‎واتذكرت من كالتي انت خسرت دم هواية لازم تعوضيه ...

‎لانه الطبيبة بلغتني طرحت طفل...

‎وبوكتها طلبوا مني يعرفون سبب هاي الحالة بيه

‎كتلهم فتحت باب السيارة وهي دتمشي سريع وكعت وهيجي صار بيه

‎خفت اشتكي على هشام لا ياذيني اكثر

‎صح همه ماصدكوا بس مالحوا عليه هوايه

‎فخطية من شافتني مااكلت ومحبيته صعدت جابتلي مناقيش بالزعتر  وسوتلي جاي حار

‎ كتلها الله يخليج جيبلي مازوت وشكد مايكلف انطيج ضعفه

‎علما اكدر اكوم اني اشتري

‎المازوت هو نفسه نفط نشعل بيه المدفايات

‎وصدك اكلت وشربت جاي وراهانمت  وجانت عصرية ماكعدت الا ثاني يوم الصبح ...

‎على صوت الباب يدك حييل ...

‎كمت ارجف بطولي واني خايفة افتح عبالي رجع هشام

‎الا اني صاحت ام رقية

‎افتحي مشان الله ظل بالي عليكي

‎هي مرات جانت هم تستعمل كلمات عراقية لانه هواية معاشرة عراقيات ...

‎من سمعت صوتها اطمنت فتحتلها

‎فكالت والله لو مافاتحه كان صعدت على جوزي يجي يكسر عليكي الباب

‎خطية من  البارحة بالها يمي

‎ هم جاية ومفاتحتلها اني جنت نايمة

‎جانت جايبتلي المازوت ...

‎مااحجيلكم الشقة جانت ثلج لانه جنا بشهر الواحد بسنة الفين ودعش ....

‎وسوتلي ريوك وجاي ...وظلت تحجي بس اني جنت مذهولة ممصدكة فجنت صافنة طول الوكت  ...

‎هي عرفت اريد ابقى وحدي ...

‎بس سالتها منو اخذي للمستشفى

‎كالتلي جوزك طبعا وكان عم يبكي عليك

‎شنو هالتناقض  بگلبي كلت ...او ربما جان يمثل

‎الله اعلم بس هي تكول هو داك الباب عليها وماخذها وياهم

‎وباقي ليله يمي والصبح طالع موصيها عليه وكاللها رايح للعراق عندي شغلة مستعجلة ...

‎كالت ياحرام شو كان مقهور ومتندم عاللي سواه فيكي ...

‎مجاوبتها بس عيوني جانت خدرانه ومابيه حيل حتى بعد ابجي ....

‎ كتلها اريد اتصل بامي ولانه هي رقمها الوحيد جنت حافظته وبقية الارقام مخزونة عندي بالتلفون والتلفون هم  يم هشام اخذه وياه ...

‎عايفني بلا جواز ولاتلفون ولافلوس

‎همزين امي عافتلي كم ورقة من اجتيني اخر مرة والا صدك جان اتبهذلت

‎خابرت امي وكوة حصلتها

‎هي بالبداية مشالته الا ان لحيت يله بعدين ....

‎من رفعته وسمعت صوتها  اني انتهيت ومكدرت احجي اصلا .....

‎شويه حلكي جان وارم بس اسمعها تصيح وتعيط سارة سارة وكعتي گلبي شبيج

‎واني اختنكت بعبرتي ودموعي

‎عاد ام رقية حجت وياها وفهمتها

‎وبعدين اتذكر كتلها ماما اريدج تعالي يمي راح امووت ...

‎انكطع الخط ...

‎ووصيتها لام رقية اي احد يخابر من اهلي تفهمه الموضوع وانه اني تعبانه ...ومحتاجتهم يمي بس لاتصعدين عليه الا بالليل اريد ابقى شويه وحدي وماابيه احجي ويه احد

‎بقت شويه يمي ونزلت

‎ظليت وراها افكر باللي صاروشلون ...شلون هشام عرف بواحد اسمه غيث

‎بعدين عرفت القصة

‎ انه  امي بذاك اليوم من اتخربطت وحجيتلها مسولفة  لصباح شلون اني متخربطة وموديني غيث

‎فصباح كايله اي اعرفه شفناه بالمطعم مرة وبجرمانه وهيجي يعني مسولفين عنه عاادي كاي موضوع

‎والحقيرة  السافلة سراب مخابرة هشام كايلته كلشي ..

‎وحجايتين زايدة فوكاها .. 

‎اخ يالله شكد تمنيت ساعتها توكع بايدي والله جنت ملختها...

‎ودمرتها دمار على اللي سوته بيه ...

‎دمرت حياتي كلها

‎بالليل هم مرت  عليه ام رقية وكالت اهلك مابطلوا عم يرنوا عليي يسالوا عنك ....

‎فانا ألتلون انك تعبانه ومافيكي تحكي

‎بس حكيتلن على اللي صار وامك الت ابوكي جاي اول طيارة من بعد مايفيز الباسبورت ..

‎لانه مانها سهلي متل ابل حكومة سوريا  مصعبتها شوي ...

‎وشلت انطيتها عشرين دولار بس خطية والله ماقبلت تاخذهم ...

‎فكلت لعد انطيهم بيد اماني من تجي

‎وهم ظليت اتوسل بيها ماتعوفني والمرة ابد ماقصرت. ويايه  ..

‎ماكوةشي يومين ماادري تلاثة او اكثر والله مااتذكر بس بعدني تعبانه مو  بوعيي

‎دك الباب ...دك الباب دك حيل وكل ظني هشام لانه الدكة مال واحد عصبي ...

‎واني افتح گلبي يدك وخايفة

‎ومن فتحت اتفاجات طلعت الشرطة

‎وجان يكولولي عليكي امر اعتقال متهمه بجريمة قتل جوزك ..

‎اني من شفتهم بالباب رجليه راحت وماعت روحي عاد كلبجوني حتى ماافتهمت شنو الموضوع

‎انوبة واحد حقير ظل يكفخ بيه ويسبني عباله سكرانه لو شاربة حشيشة مدااكدر اسيطر على روحي وامشي

‎انداريت عليه وكوة احجي ودموعي تكت

‎كتله توني مسقطة طفل وطالعة من عمليه ...

‎يله جاز مني ...

‎عزة وصعدت بالسيارة شلون رهبة وهبطة ووحدي واهلي ماكو انوب  حتى ام رقية مشفتها

‎ياربي دخيلك

‎جنت ابجي واندعي

‎صدك بس هو رب العالمين وكفلي

‎علما وصلنا اني نص عمري راح

‎جانو بالمستشفى خالين لزكة على راسي مكان الضربة اللي ضربها هشام ..من ضرب راسي بالحايط

‎وعيني اليمنى زركة ووارمة

‎وكوة امشي

‎كعدت فترة باللانتظار  واني ارجف من البرد والخوف ممصدكة نفسي اني وين

‎واني لساني ماواعيه من صدمة هشام انوبه جريمة ومركز شرطة!!!!

‎ودخلوني على ضابط التحقيقات جان ملازم شاب وصغير

‎بدى يسالني الاسم والعنوان وهاي الاوليات

‎روحه طافرة

‎وعباله اني وحدة موزينة اشتغل بالدعارة

‎جان متنك عليه بعدين من حجيتله عني وعن اهلي رجع على الكرسي كعد عدل

‎كلي وينو جوزك ؟!

‎كتله مااعرف

‎اتعاركنا وكتلني وفقدت الوعي مثل مداتشوف الضربات وعندي تقرير المستشفى بس هو كايل لجارتي انه رايح للعراق

‎كالي اه ومااتصل فيكي؟!

‎كتله ختى تلفون ماعندي ماهو يمكن هو  اخذه

‎كلي وهو ليش ضاربك هيك اصلا؟!

‎كتله خلاف عائلي واني مدنكة وخايفة وصوتي يرجف

‎والله جنت مثل السعفة بنص الريح

‎طب ايده  بقوة على الميز فززني ومن صوت الطبة  اخترعت

‎كلي خلاف عائلي ولا زبطك مع عشيقك ؟!

‎كتله شنو؟!

‎عاد هو عصب وكام يصيح اتنرفز عليه اكثر

‎اني كمت ابجي كتله والله مدااعرف عن شنو تحجي بحياتي مكان الي عشيق

‎فعرفت انه اهل هشام مسوين بلاغ عليه بعد اختفاء ابنهم لمدة اسبوع ومايعرفون عنه اي شي

‎وانه اني وعشيقي دبرنا قتله لانه كشفنا وعرف بينا

‎ ؟!!!!

‎تعرفون شعور الواحد يوكع من السطح طابق ثالث

‎لا ماتعرفون ولا اتمنى تعرفوه

‎بس اني حسيت هذا الشي ساعتها

‎معرفت شحجي

‎بس اجى على  بالي وسالته طيب شنو دليلهم ؟!

‎اننا اصلا عمري ماعرفت احد غير زوجي ولا كان الي عشيق وزوجي سافر العراق في شغل على اي اساس يتهموني بقتله !!

‎اني كنت بالمستشفى ومن طلعت لحد الان مطالعة من البيت وحتى اسالوا جارتي هي كانت تجي تداريني

‎وشمدريهم ابنهم مقتول لو ميت اذا همه مايعرفون وينه؟!!

‎كلي خلاص روحي للحجز لما بنشوف دليل

‎وااشر للحرس يجون ياخذوني

‎عزة لعزاج سارة ...هاي تاليتج !!!

‎فالحارس وخو يجرني انقهر عليه من كثر ماجنت ابجي وارجف بين ايديه

‎ كلي يامدام  لايكون في بالك

‎مافي اي  دليل على تهمتهم بيقدر اي احد يتكفلك ويطلعوك  بس تكوني  تحت المراقبة . .

‎والله ويومين اجى ابويه. ..

‎يايمة من اجى شفت الجنة بجيته . .

‎هو عيونه مغوركة سودة عليه

‎اول تالي اني اكون بهيجي موقف

‎الله لاينطيهم اهل هشام

‎لايوفقهم وين ما كانو

‎اليومين اللي راحوا بالحجز شفت العجب ...

‎جنت مريضة والدنيا باردة اني من طلعت وياهم مثل الثولة حتى جاكيته ملبست ...

‎وهناك جان  عادي اكو  عراقيات وعربيات كانوا ويايه جنه سته يمكن ومرة جبيرة عربية وياها بنية عراقية ولخ عربية واكو عراقية جانت كاعدة على كتر الظاهر مملخيها من البسط متعاركات وياها وجانت اكو وحدة كاعدة وفرحانه بزهوها ها وطبعا كلهن تهمتهن اداب

‎ايباه بس اني جريمة قتل ؟!!

‎بس اللي عرفته منهن من يحجن جانت هاي البنية المتربعة وكاعدة كالو عليها كاسرة ركاب هواية شباب عراقيين تقشمرهم وتجيبهم الطريق وتورطهم بعدين ..

‎اني جنت مااقترب منهم ولاحتى اريد اسمع حجيهم

‎اللي بيه مكفيني لا اكل ولانوم وفوكاها مريضة وصحتي مو شي

‎ساعتها مجنت اتمنى غير الموت ....

‎من طلعت افراج ...وشفت ابويه

‎حضنته حيل وكام يبجي على حالي بوست ايديه ونمت بخضنه مجنت اريد بس ارجع لبيتنا ...

‎ومن طلعنا بالطريق مرجعت لشقتي رحنا لفندق هو حاجزه كتله لا بابا ماريد ....

‎خلينا نرجع للبيت عفية ...

‎كلي بابا بعد ماتروحين للشقة اصعدي ارتاحي وافهمج

‎كتله لا لا احجيلي خلي افهم ...

‎كلي باباتي

‎ابو الشقة بلغني انه اهل هشام جايين للشقة مكسرين الباب لانه هو مقابل يفتحها الهم وماخذين شكو غراض ومكسرين البيت وطالعين

‎كتله زين ليش ؟!!!

‎شنو معناها

‎بوكتها دار وجهه ومحجى شي بس حسيت جانت اكو مصيبة اكبر

‎كتله بابا زين فلوسي وذهبي اني ضامتهم خلي اروح اجيبهم

‎كلي بابا كلشي ماخذين بس اني لحيت

‎والله ورحنا ولكيت البيت مخربط وشامرين الغراض وطبعا بايكين كل ذهبي وفلوسي ...

‎زين ليش مااعرف

‎زين هذا ذهبي الشخصي حتى مو هشام جاباياه ...

‎مااحجيلكم شصار بيه

‎الله لايشوفها لاحد

‎وبابا يكول يله فدوة الج خلي يولي اهم شي انت بسلامة

‎واني هم قبل ماينطوني موعد افراج عنج سويت بلاغ بيهم واشتكيت عليهم

‎كتله لابابا هذوله اهل شر كلشي مااريد خلي يولون

‎بس كلي همه ليش متهميني بقتل هشام

‎ليش هو وينه صاير عليه شي

‎طبعا ابويه دار وجهه ونزل واني انزل وراه بابا حاجيني صاير شي ...

‎وكفنا بباب العمارة

‎كلي والله بنتي مااعرف شصايرلج

‎اشو مصيبة ورة اللخ

‎حتى دوختيني ودوخت امج عليج

‎كتله بابا هشام وين انت خابرته سالت عليه

‎جان يحضني  كلي سارة باباتي...

.

‎هشام لكوه مذبح على الطريق من ديرجع من العراق...

‎واهله البارحة يله عرفوا وراح يستلمون الجثة ...

‎كتله شنو بابا شدتحجي

‎هذوله كذابين رادوا يورطوني باي شكل لانه يكرهوني اصلا هشام يروح ويجي طيران مو سيارات

‎كلي اعرف بابا صعبة عليج تصدكين بس هذا اللي صار

‎وبعدين افتهمت القصةشنو من رخت بعدين  على زوجة ابوقاسم

‎بس و

‎على الرغم من كل الي عشته ويه هشام وحاولت مااظلمه من انقل صورته بس بجيت عليه دم

‎مجنت اريدله هذا المصير ابدا

‎وكمت ابجي اكثر لانه سقط الطفل وهو جان امنيته يخلي ابنه بحضنه

‎كعدت على الرصيف گبال العمارة ادك والطم ...

‎مااعرف ابجي عليه لو على روحي وقسمتي ؟!!!

‎مااعرف ابجي انه مات زعلان عليه لو بعد مااشوفه ؟!!

‎مااعرف جنت ابجي على ايامي النحس الي مرت بيه !

‎وياريتها خلصت لهنا

‎بروازمن_ورد

17

‎جنت اتمنى امي تكون يمي بهالايام بس مااعرف ليش اتاخرت فيزتها ...

‎اتمنين اووف شكد اتمنيت انام بحضنها ومااكعد بعد ...

‎و بيومها

‎رجعت اني وابويه للفندق الي كان حاجز بيه ...

‎منهكة وتعبانة...

‎وكلما اتذكر هشام ...وانه من صدك انقتل اتخبل وابجي دم عليه

‎مهمها كان ماتهون العشرة

‎ومجنت اتمناله هيجي نهاية...

‎جنت اتذكر شلون جان بالبداية فرحان وطاير بيه ...

‎وشلون جان يسالني في كل مكالمة الله عليج مو حامل ...

‎اريد طفل ...اريد ولد اشيله بحضني !!

‎صح اخر شي ردت منه الطلاك وجنت حيل ضايجة منه بس ابد ماكرهته لحد اللي اتمناله الموت ...

‎الله يرحمه ويحسن اليه

‎والله لاينطي ال اهله حتى ماخلوني اخذت عزاه....

‎جنت اصفن

‎اكول  شلون كل هذا صار بيه وخلال هالكم يوم ...

‎بقيت بغرفتي وماطلعت منها يمكن اسبوع كامل بس ابويه يمي ويجبلي العلاج والادوية الي وصته امي عليها انت تعرفون هي طبيبة ....

‎بس اللي جان متعبني اكثر انه جنت احس نفسي عايشة بداومة ومفاهمه شي ولا ااعرف شنو اللي صار ...

‎وراها بكم يوم جوي بيت عمي وصباح وجانت عايفة رياض يم امي ...لانه هي دزتها وهو مظرسة حبيبي مو مال يعوف مدرسته

‎ولانه همه فيزتهم جانت مخلصانة ...

‎فكدروا يجون ولانه عمي مقعد فبسهوله اجووي بحجة العلاج بس الحقيقة همه اجوي علمودنا ولانكون وحدنا ...اني وابويه

‎والحمد لله خطية صباح ظلت تداريني

‎انتوا تعرفون جنت كارحة ومحتاجة وحدة يمي ....

‎وعلى اساس تجيني مسرة مارهمتلها ...الجهال وين تعوفهم وبتها صغيرة راح تصير عبء عليها اكثر هنا

‎والله وخكية ماقصرت ويايه مرت عمي

‎الا ان كمت على حيلي

‎وكمت احجيلها  شلون اجاني هشام معصب ورة مااخذ تلفوني وبدى يضربني بحيث فقدت وعيي ...

‎وجنت بوكتها مااعرف هو شلون اجى على باله ياخذ التلفون مني ولا مرة مسويها

‎و لانه هو اصلا اجاني متخبل وعيونه تجدح نار

‎معناها احد موصله ...وحاجيله شي

‎والا ممعقولة من نفسه يسويها

‎واني اشك بسراب بس شلون عرفت؟!

‎صفنت صباح كالت بس لاهاي جانت تتسنط علينا !! اكيد هي مخابرته وكايلتله ؟!!

‎كتلها وهي شلون عرفت

‎كالت يمكن جانت تتسنط علينا من سولفنا اني وامج بالمطبخ ورة محجينا عن غيث بس والله ياسارة بروح ابويه من  حجيتلها لامج ماكان قصدي شي هيجي على نيتي حجيتها ولا اعرف هاي الادبسز راح تنقلها ..

‎خلي ارجع لبغداد لا اسحلها بالشارع سحل ...

‎هاي سرطان ووكعت علينا

‎احنا هم بساعتها خابرنا امي وردناها تتاكد من هالحجاية هيجي شغلة جبيرة مايصير نعبره الها ...

‎والله وظني طلع صدك طلعت هي مخابرة على هشام

‎امي مجيكه التلفون وشايفه الاتصال ...

‎فراسا امي مخابرة على زوجها ذو الفقار جاي ماخذها ورايح تكول طردتها بعد مااريدها ببيتي وزوجها متخبل من عارف

‎وبعد هو وميحب يبسطها

‎بس والله انغثيت مغثة من عرفت شلت روحي وركعتها بالكاع

‎والله مااعرف شتريد مني هذه بله اني يمج حواليج !!!

‎وراها بعد حضرنا روحنا اني وابوبه نطلع من سورية جان خايف من اهل هشام ياذوني ...

‎ولو اني لذيج الساعة مجنت اعرف ليش اهل هشام يتهموني بكتل ابنهم ...

‎ومحد اخرني واخر طلعتي غير جوازي...

‎جنت انتظر يسوولي جواز جديد ويدزولياه ...

‎فقررنا اني وصباح نروح لام قاسم ...

‎تعرفوها زوجة صديق وشريك رجلي المرحوم  وهي اللي خطبتني اله ...

‎وهي جانت كاعدة بنفس المنطقة الي جانت كل مرة تاجر بيها بس بغير شقة واني جنت متيهة بالشقة لانه ممريت عليها من فترة طويله

‎المهم اول ماشافتني كامت تبجي وتولول  ...

‎اني مااتحملت راسا نزلت ...

‎من صدك هزني الموقف

‎و صدك انقهرت ...

‎ونزلت كعدت جوة على الدرج وصعدت صباح يمها تهديها

‎ورة شي ربع ساعة جتي هي عليه واعتذرت وصعدتني ...كالت الموقف صعب ومكادرت تتحمل

‎كالت حياتي والله هم انطيني الحق واعذريني اهل هشام فهموني انه انت من سلمت رجلج للارهابيين يكتلوه ؟!!

‎بس والله مااصدك تسويها انت مو بله انت بت اصول ماتسوين هيجي

‎تحجي وتبجي

‎كتله شنو ...صدك انت تحجين ؟!!

‎جرتني وصعدنا فوك وهناك يله افتهمت كلشي ...

‎حجتلي ام قاسم كالت زوجها وهشام مثل ماتعرفون عدهم عقود تجهيز للجيش بالعراق ...

‎وجان اكو عقود جديدة ديوقعوها هناك ببغداد بشهر الواحد ..

‎ومن احعى لبيتنا

‎بيت صديقه يعني

‎جان عصبي وفاير دمه ويسب ويغلط على ولد اسمه غيث يكول  هو مملخه بسط ومتعارك وياه ...

‎كتلها عزة صدك تحجين ....

‎وهو شنو ذنبه المسكين ؟!

‎كالت والله هذا اللي عرفته وابوقاسم الله يرحمه جان يهدي بيه

‎ويكله انه هذا مجرد حجي وماكو شي

‎الله شاهد ياسارة ابو قاسم جان ممصدك اكو شي بينج وبين هذا الولد غيث بس هاي اختها جانت كل شويه تخابره وتحرك دمه بالزايد ....

‎حتى اني جيت عليج للشقة دااحذرج انه همه جايين عليج ناويلج شر بس جان محد ماكو ....دكيت الباب كومة محد فتحلي

‎وهمه بعد اتاخروا على الطيارة

‎ويحاولون يرتبون امورهم فقرروا يروحون جي ام سي لبغداد وطلعوا الفجرية

‎ووصاني زوجي اروحلج للمستشفى بس من اني رحت ماعرفت انت وين ومن سالت عنج معرفوج ...

‎وراهامو  ثاني يوم لا الثالث انقطع اتصالي برجلي اخر شي كلي احنا بالمعكسر وراح نروح لسامرا ومناك نرجع للشام ...

‎خابرت عليه ماكو على اهله وكرابته محد يعرف عنه شي خابرت على هشام واهله هم محد يعرف عنهم شي ...

‎وانت انت تعرفين وضع العراق خية ...

‎متت من خوفي على الرجال  راسا بلغت اهله يدورون عليه ورايحين منا ومناك ورة يومين لاكيه بالطب العدلي

‎وكامت تشهك وتبجي سودة عليه الارهابيين ذابحيه بالطريق هو وجماعته اللي جانو وياهم المشكلة انه همه مبلغين اهله انه جثته موجودة وتم التعرف عليها بس وين محد يعرف ومنو قاتلهم محد يعرف كل ما نروح مستشفى يكوولون لا مو عدنا حولناهم لفلان مكان

‎واكو جثتين مامتعرفين عليهم بلا هويات

‎واللي بعدين تبين رحلج الله يرحمه وواحد ثاني بايكين جوازاتهم لانه اجنبية ....

‎الارهابيين  كاتلين كل اللي بالسيارة ...

‎والشرطة جانت شاكة بصاحب السيارة بايعهم لانه لاجثته ولاسيارته موجودة

‎وهمه سودة عليه على الشارع العام دورية مال شرطة لاكيتهم ...

‎بس قبلها مجنا نعرف التفاصيل

‎ اتخبلوا اهل هشام وكالو هاي انت وعلى اساس ذاك الولد غيث استغفر الله صاحبج مدبرين كتلتلها ومبلغين عليه تايكتلوه بالطريق...

‎ورجعت كامت تبجي ..

‎.وتمسح دموعها تسكت شويه وترجع تبجي

‎كالت همه اجوي جانوا ناويلج مو خوش نية ياخيتي ....

‎بس هم من رحمة الله اللي كنت بالمستشفى وفاقدة الوعي والولد هم طفر لتركيا هم لابيها ولاعليها ...تقصد على غيث

‎بس ذوله نااس شرانيين ونيتهن كشرة اعووذ بالله ...

‎وكامت تبجي على رجلها وعلى جهالها الصغار التوم وشلون رجلها جان فرحان بيهم وماتمت فرحته  وكطعت گلبي عليهم ...

‎والله وعلى كلامها ظليت ابجي لحد مابعد ماعت روحي ...

‎واللي افتهمته انه انتصار ماخذه فلوسي وذهبي بحجة هاي فلوس اخوها واني وحدة موزينه مااستاهل اي فلس ...

‎بس اني فهمتها لام قاسم تكللهم

‎اذا في يوم شافتهم

‎حرام عليهم ليوم القيامة كل فلس اخذوه وكل قطعة ذهب نار بكبورهم

‎ لانه هاي فلوس اهلي وذهبهم

‎من جد اهلي اشتريته مو من ابنهم ...الله يرحمه

‎وفلوس الحلال ترجع ماتروح وبكل الاحوال اني خسرت رجلي ...

‎وكل الدنيا جانت فدوة اله ...

‎كلشي مااريد منهم ...

‎وودعتها وسلمت عليها ...وطلعنا

‎وماكو كم يوم استلمت جوازي ...

‎وطلعت للبنان ...بس اني وابويه

‎ وعمي ومرته رجعوا لبغداد ...

‎ابويه هم كل يوم والثاني كان يسمع حجاية عن حادث المرحوم  من اصدقائه اللي يعرفون ناس واصله بالامن ...

‎والا لاعبالكم اني هيجي طلعت بسهولة ...

‎لا بواسطات كوومة وكدهافلوس بعد اكثر يله بوكتها هيجي طلعوني من الحجز والا همه جانو عصوا بيه ...

‎المشكله انه همه ملاكين اسم هشام بالبداية خاتم خروج من سورية لانه اهله مقدمين معلومات جوازه العراقي بس هو اصلا طالع بجوازه النرويجي لذلك اتصوروا انه مكتول بسورية يمكن ...

‎الله يرحمه ...راح هيجي بغمضة عين وجان ماادري راضي عليه انه عرف الحقيقة لو زعلانه مني ماادري

‎طلعت لبيروت رحت هناك ...

‎ورة ماخلصت ملشي وكملت كل الاجراءات ومجان اكو اي شي ضدي ....

‎هم اجرنا شقة صغيرة هناك وامي راسا جتيني بس ابويه هو اللي رجع للعراق من ذاك اليوم ولحد كم سنة بعد ماطبيت لالسورية علمود الاحداث اللي صارت بعدين ولا رجعت لبغداد خوفا من اهل هشام ...

‎مااعرف ليش كانو مصرين اني الي ايد بالموضوع

‎بقيت بلبنان تقريب ست شهور بس هالمرة مابقيت وحدي كاموا اهلي يتراوسون بالجية

‎امي وابويه وخالتي نهال وسرمد ...

‎اخذت هذه الفترة كفترة نقاهه حاولت انسى بيها كل اللي صار ومر بيه ...

‎وجنت احمد ربي اللي كدر ابويه يخلصني من بطش هيجي ناس والا الله يساعد اللبنات اللي ماعدهن احد من يوكعون بحلك هيجي وحوش ....

‎اول ايام هم جانت صعبة عليه ...

‎جنت اتذكر المكانات اللي رحناها والاوقات اللي كضيناها سوى ...اني ورجلي هشام الله يرحمه

‎اما سراب ...فمااعرف شحجي اني وكلتها لرب العالمين ...

‎ولو اهلي هم خوش عاقبوها ...بس شنو الفايدة ...رجلها جان يطلكها وابويه يرجعها  لانه محديريدها ببيتنا وصارت منبوذة...

‎بس لاتخافون عليها ....

‎مجانت تهتم لاحد وربت عله هالكبرة لعمتي

‎وجنا بس ننقهر على الجهال الصغار اللي ضاعوا بين الرجلين جنت اتمنى اجيبهم يمي اني اربيهن هنا ماعندي شي ...

‎بس ماترهم ماعندي وصايه عليهن

‎اما بالنسبة لالم راسي فكان مستمر وبدى يزيد كمت انجن من يصير بيه واظل الوب واون

‎ورحت سويت تحاليل وفحوصات بوكتها تبين انه عندي شقيقة وبديت اخذ ادويتها الخاصة اللي هي مجرد مهدئات  ومجنت اتمنى لاي احد لحظة الم من اللي جنت اعيش بيه ....

‎ ورة شي اربع شهور ووحدة من مخابرات مسرة اليه ...اشو هذه

‎اخذت الحاسبة وكعدت بالمطبخ وكامت تحجي ويايه بصوت ناصي كلتلي رافد من عرف باللي صار بيج يريد يعزيج  وياخذ من خاطرج...

‎اني مجرد ماسمعت اسمه ...راسا انقهرت  وحسيت بشي جنت منتظرته يصير ويرجعلي ...

‎وبديت احس بالذنب وانه اللي صار عقاب الليه لانه جرحت انسان كان صادق ويايه ...

‎وكلتلي حيخابرني اذا قبلت ورة شي ساعتين

‎فوافقت طبعا ...

‎وعدلت روحي ورتبتها بس شعدل ..

‎وجهي كلش تعب ورة الاحداث اللي صارت

‎ ولو هسه شويه احسن من قبل بس اشو احس كانما كبرت عشر سنين ...

‎كعدت كبال اللابتوب انتظر ...الله لاينطيهم حتى حاسبتي باكوها

‎وهاي وحدة جديدة اشتريتها وحتى سويت حسابات جديدة ...لكل شي الفيس بوك والسكايب والماسنجر

‎وظليت انتظر قبل نص ساعة من الموعد واني مكابله اللابتوب ...

‎والعبرة خانكتني ...قبل حتى مايتصل

‎واول مدك ...

‎سرت هيجي قشعريرة بجسمي كله وجلدي كزبر

‎ وگلبي كام يدك وايدي ترجف

‎خليته شويه يدك يله فتحت

‎وشويه وطلعت الصورة وشفته ...

‎ماكدرت امنع دمعتي راسا نزلت ...

‎جان لابس تي شرت ابيض ومطول لحيته هو هم مبين بيه كبران وظليت اتلمس الشاشة لا اراديا والله معقولة ارجع اشوف رافد واحجي وياه

‎هو ظل ينتظر مني صوت ...ويكول الو ...وينك سارة ؟!!

‎انت معي

‎مكدرت احجي مردته يعرف صوتي حزين فتحت بس  كامرة بالبداية  واول مشافني حنى ركبته على اليمين وابتسم ابتسامة كبيرة وبعدين ضم ايديه وشبكهم وظل يباوع يمنى ويسرى حسيته يتهرب من الكلام مثلي وحتى من الكامرا حتى لا اشوف شكد هو هم متاثر...

‎فكلي شلونج ستي !!

‎شنو اخبارج

‎البقية في حياتج ...

‎والله يصبرج على مااصابج ...

‎اني ردت بس

‎وسكت ...

‎وطبعا اني محجيت ولا كلمة ...

‎ولاهو سالني ليش ماتحجين لانه شاف دموعي

‎كلي الله يخليج لاتبجي

‎ابوس ايدج كلشي ولادموعج والله مااتحمل

‎دتكطعين گلبي

‎كوة سكتت وكتله رافد.....

‎سامحني

‎معرفت والله شحجي ...

‎كومة حجي جان ببالي كلشي ماطلع منه

‎كلي لا ياعيني لاتكولين هيجي ابد

‎على شنو اسامحج؟!

‎كتله اذيتك وجرحتك ...

‎هو مجاوب بس هز راسه بالنفي

‎كتله مزعلان عليه مكارهني انت ! ...

‎ابتسم وكلي معقوله !!!

‎تتخيلين انه اكدر ازعل منج او اكرهج ؟!!

‎من كل عقلج !!! انت صدك تحجين ؟!

‎لا ابدا اني اللي اعتذر منج اني اللي غلطت ومكنت صريح وياج من البداية

‎اني اللي خسرتج سارة وضيعتج من ايدي

‎ولا اكلج خلينا مانحجي بشي صار

‎بس كوليلي شغلة

‎اشو انت صايرة بعد احلى .. شدتاكلين يولي ههههه

‎وشوفي راجع شعرج لونه فاتح هواية احلى

‎وعلى ضحكته ضحكت كان يحاول يطلعنا من المود السئ بس عاادي اني بوومة

‎كتله نسيت ابارلكك على زواجك ...

‎كلي اهاا

‎ ودنك راسه وظل يلعب باظافره

‎كلشي قسمة والحمد لله على قسمته ...

‎ورجع يباوع على عيوني...

‎ودقق النظر بيهم

‎حسيته ميريد يحجي عن زوجته فسكتت ...

‎وراها سالني عن اهلي وحجيتله على اللي سوتهةسراب بالبداية مصدك وظل يضحك كال معقولة ؟!

‎ليش !!!

‎وبنص كلامنا سمعت صوت وصارت هوسة اترخص وحسيته انحرج وسلمنا وسديته

‎على كد مافرحت وارتاحيت من شفته على كد مااكلني القهر والندم انه ضيعته ...

‎وقررت من ساعتها انه مستحيل اتصل بيه مرة ثانية ...

‎اللي صار صار ومو اني اللي ابني سعادتي على خراب بيت غيري ...

‎الموضوع كان قراري ولازم اتحمل نتيجته ...

‎وفعلا رفضت مكالمات ثانية منه ...

‎ماتتخيلون شكد اتالمت وشكد جنت اتعذب من قررت ابتعد

‎بس بعد خلاص هو مو اليه ليش اركض وره خيال وحلم عمره مايتحقق!!!

‎وتقريبا ورة ماخلص الصيف قررت انه ارجع للعراق فاستقريت  باربيل لو سليمانية ...

‎اهلي هم اتبهذلوا رايحين جايين ولبنان مكلفة مو مثل سورية يعني سفرها وعيشتها ...

‎واني ردت ارجع للعراق اشوف شغل وابدي اكون حياتي من جديد ...

‎جانت توها خلصانة امتحانات  السادس مال سرمد وجان ويايه ...

‎وواجرت بيت بمجمع سكني ...

‎وخطية صديقتي هالة كلش ساعدتني كون امها كرديه وجوان اختها مزوحة ابن خالتها وعايشن هنا ...

‎استقريت بسليمانيةاول شي  وبديت ادور شغل ..

‎جانت توها احداث  بالدول العربيه بدت وثورات الربيع العربي والكل يترقب والدنيا ناار وين مانروح نشوف هوسه ومشاكل

‎وحتى بسليمانية هنا جانت اكو مظاهرات يوميه يطلعون الصبح شي كم ساعة ويرجعون

‎بس القسمة صارت انه لكيت شغل بشركة اتصالات باربيل عن طريق معارف واصدقاء ...

‎ورحت هناك هم اجرت بس بيت صغير ...بالبداية جان اكو ناس ماجرين الطابق الفوك ...فموكولش ارتاحيت بيه ...

‎جان عدهم جهال والنهار كله يدبجون عليه ....

‎فشلت رحت لشقة  طابق ثاني صح  شويه اغلى بس جانت بمنطقة ارقى ...

‎وبديت ااثث بيتي ....

‎بروازمن_ورد

18

‎بديت استقر شوية شويه باربيل ...وجنت كلش فرحانه من اشتري اثاث شقتي وارتبه ...

‎حسيت اول مرة باستقلالية حلوة ...

‎بوكتها جانو اهلي ينتظرون قبول سرمد اذا مطلعته وحدة من كليات المجموعة الطبية ...

‎حيدزوه يقرا لو بلبنان لو عمان وعلى الاكثر لبنان لانه جانت فيزتها اسهل ...

‎وهم اهلي جانوا يداورون على جيتهم يمي بس هالمرة حسيتهم بعد ملوا ...بس مايحجون

‎كل اسبوعين واحد بيهم يترك حياته ويجي وهم منها ماترهم ابقى وحدي

‎حسيت نفسي ثگلت على اهلي هواية فكمت مااريد احد يجيني

‎ومنها امي انشغلت بيبتي بدت تتعب اكثر ولما تجي خالتي نهال يمي

‎ امي تظل رايحة جاية لبيت جدي منها ماتكدر تعوف بيتنا ومنها ماتكدر تعوف بيبتي فرجعت خالتي بسرعة وبقيت تقريبا شهرين وحدي هذه جانت اتذكر شهر التاسع والعاشر ...

‎بوكتها امي حصلت قبول لسرمد بالجامعة الامريكية  ببيروت ...

‎وهذه جان لازم الها تفرغ تام لانه بيها هواية شروط واكثر من امتحان يمتحن الكالب يله يحصل موافقة بس امي رتبتله الوضعية هناك السكن والمصرف وهيجي شغلات فصارت كلش مشغولة ويه اخويه ...

‎طبعا اقساطها غاليه فصارت هواية على اهلي منها انه همه اصلا يدزون فلوس دراسة مسرة ...

‎فتوقفت تماما انه استلم منهم او اطلب منهم اي مساعدة وفلوس سيارتي اللي بعتها ورة مسافر سرمد وعافها حولياه ابويه واشتريت سيارة اصغر وموديل اقل

‎وطلع قبول سرمد بصيدلة بس بغير محافظة...

‎وهو جان عاجبه يدرس ببيروت وبعد بلش بالاحراءات  .....فابويه هم راح وراهم للبنان  يكملون القبول مالته

‎وهنا همه مجانوا مبقين احد باللبيت ...

‎وماكو ورة كم يوم من سفر ابويه

‎باكو بيتنا اللي ببغداد وامي اتخبلت خطية ...

‎الحرامية مكسرين الجامات والغراض اللي بالبيت والجيران يكولون احنى سمعنا هوسة وضرب عبالهم اهلي راجعين الصبح يله

‎  مبلغين الشرطة من شايفين الباب مفتوحة وحتى الباب الرئيسية كاسريها  ...

‎وخطية ابن جيرانه قافل الباب بيده وكاعد بصف البيت لما جايه الشرطة

‎بوكتها امي جانت خاله الذهب والفلوس يم خالتي نهال ...

‎فهمه بايكين الكهربائيات والكرستلات والتحفيات

‎وطبعا مخربين البقية

‎اهلي شكوا باهل هشام لانه مبين جانت الشغلة مو مساله بوك الحرامي مايكسر بقية الغراض اللي مايريدها

‎وكونهم مطمأنين  انه ماكو احد

‎معناها مراقبين البيت ويعرفون انه اهلي طالعين وحتى يمكن يعرفون وين رايحين

‎وهذا الشي اللي خلاني  اقطع ترددي بالرجعة لبغداد محيت هاي الفكرة تماما من بالي

‎بس للاسف مجان اكو اي دليل نكدر نلزمه عليهم ونتهمهم بيه على الرغم من انه احنى حاطين كامييرات بس ماعرفنا ولا واحد بيهم وهمه جانوا لافيين وحوهم لاشماغ ملشي مايبين منهم

‎ابويه  راسا رجع للعراق حتى يتابع ويشوف اللي صار وبقت امي سرمد وحدهم هناك

‎لحد هاي اللحظة محد بيهم انلزم ولا عرفنا منو باكنا ...

‎اني جنت جديدة بشغلي وبصراحة بصعوبة كلش لكيت شغل هناك ومردت اعوفه ابدا  وجنت اخاف حتى اخذ اجازة ردت استققل تماما بنفسي واخفف من العبأ على اهلي لانه كلش تعبتهم الفترة الفاتتت

‎لاتنسون فلوس الطيران رايحين جايين من جنت بلبنان وفلوس ومصاريفي هناك

‎ارهقتهم ماديا وجنت خاله في بالي كلما الم فلوس ادزها الهم او اساعدهم بمصاريف دراسه  اخوية سرمد ...

‎وياريت لو خلوني ..

‎اللي صار انه بشهر التاسع دزتني هاله صديقتي  اقدم على شغلة بشركة اهليه ...شغلها حلو ومرتب

‎واتمنيت اتعين بيها...

‎فرحت وقدمت وعرفت اكو وظيفتين شاغرة والاثنين ضمن اختصاصي فكلش فرحت وكلت بلكت وحده بيهم تصير نصيبي ...

‎وصدك وراها باسبوع اتصلوا بيه مقابله

‎اللي قابلني تلاثة استاذ ضياء الدين وست گلاله واستاذ كاوه ...

‎اول وظيفة شاغرة انرفضت بيها  جانت  يم استاذ كاوه مقبلني

‎والثانية اللي جانت يم استاذ ضياء الدين انقبلت بيها وهو اللي قبلني وكلي باجر داومي

‎اني هم مصدكت طلعت من المقابله طايرة من الفرح ...

‎وحجزت يم صالون بنات كرديات جانوا بالمانيا وراحعين لاربيل ووياهم وحدة ايرانية شغلها يجنن سويت شعري هايلات خفيف وكصيته تقريب جوة كتفي

‎واتذكر وكتها جانت ورة المغربية من طلعت لانه كتل عليهم

‎كلعت منهم والفرخة ماليه گلبي واخيرا

‎ وقبلها جنت رايحة  مشترية  كم قطعة ملابس للدوام

‎تعرفون من اني اكون وحدي ...كلش قليل اطلع من البيت بس للمسواك والشغلات الضرورية ...

‎الحمد لله جيراني هم كانو خوش ناس

‎اتعينت بمكتب ست گلاله ...

‎اللي هي جانت نائبة استاذ ضياء ....

‎المدير الكبير مالتي وهو هم جان عربي من بغداد والبقية كراد

‎احنى جنا بس تلاثة من بغداد اني وبنية اسمها  رضا وولد اسمه جميل ..

‎مديري جان  يصير رجل خالة رضا...

‎وهو اللي معينها

‎الحقيقة هو شخصية مبهرة ...

‎طويل وجنتل

‎بنهاية الاربعينات بس مامبين عليه

‎مرتب ونظيف ...وانيق كلش

‎واسلوبه لطيف وشقجي وبشوش

‎ كان مخلص ماجستير من بريطانيا مثقف وفاهم شغله حيل ...

‎و يعرف اربع لغات ...

‎وحالته الماديه ممتازة بحيث رفض عرض الشركة انه يستعمل وحده من سيارتهم الخاصة

‎وفضل يداوم بسيارته الشخصية .

...

‎هو جان عربي بس زوجته  كرديه وتصير كرايبه كلش من الام يمكن بت خالته هيجي اتذكر

‎  وجانوا عايشين ببغداد  بسبب الاوضاع هناك  جاب عائلته واجى استقر هنا باربيل

‎اول مااتعينت حسيت نظراته اليه شويه مو طبيعية

‎اهتمامه بيه صار اكثر

‎الصراحة اني جنت احب سوالفه بس مافكرت بغير شي وهو هم ساعدني بشغلي لانه جنت اعاني من مشكلة اللغة ...

‎حاولت اتعلم كردي وكمت احجي كلمات

‎والموظفين جانوا كلش متفهمين ويفرحون من يشوفوني احاول احجي لغتهم واسالهم يشرحولي ويعلموني ...

‎بالبداية كلش جنت احب اكون صديقة رضا على الاقل تحجي عربي ويايه بس هي مااعرف ليش محبتني...ابد ...

‎هي حانت ويايه بالغرفة

‎وجنا ناكل ونشرب سوى ونسولف ونضخك

‎بس من تشوفني برة الشغل بس تسلم وتعوفني

‎اي والله هيجي يعني

‎والاصح هي جانت ماتحب ولاتكره احد جنت احسها عديمة المشاعر...

‎اهلها مايصير عدهم اطفال وهي صايرة بالشافعات وبالمعجزات  ويمكن مرة كالت انابيب مااتذكر وامها جانت ناذرتها بس تجيب ولد او بنيه تسميه رضا ..

‎وطلعت بنية هي جانت كلش طويله وضعيفة تلبس نظارات ...وشعرها هم طويل

‎بس خطية جانت كلش موحلوة لانه نحيفة بشكل.... جلد وعظم هي طبيعتها هشكل مع انه تاكل كوومة بس مايبين بيها ...

‎اني عبالي بس ويايه هشكل طلعت ويه الكل ...

‎وهذا الشي عرفته بعد كم شهر من ابو ست گلاله اتوفى ...

‎اجى جميل عليه كلي تروحين للفاتحة كتله اي طبعا ...

‎ورحنا كلنا وجبه موظفين دنعزي

‎يمكن اني اكثر وحدة بجيت بالفاتحة ...

‎مااعرف ليش يمكن لانه جنت وحدي وخفت اذا ابويه يموت شلون اعيش من دونه

‎وجان الغربى من يجون يبوسوني حيل ويحضنوني دونا عن الكل غبالهم كرايبه اني لو وحدة من عائلته ههههه

‎الله يرحنه كان رجال كبير وعمري مشايفته

‎واحنى كموظفين الكل جان حزين س على الاقل حاولوا  ينزلون  دمعتهم ...

‎الا رضا ...

‎كتلها شبيج هيجي ساكته

‎سوي روحج تبجين ...

‎اتباجي على الاقل...نزلي دمعتين

‎اندارت عليه

‎كالت ليش ابجي قابل ابويه ميت  !!!

‎وثم مااعرف انزل دمعة ...هي ماتنزل من كيفها شسوي يعني...

‎ماكودموع حتى لو اعصرها اعيوني

‎اي فعلا هي جانت هيجي تحجي ...

‎جنت احسها روبوت

‎بس هي تعرف تذب نكات وابد ماتضحك

‎اني جنت اخرب على روحي من تصجم احد وهي حتى ماتبتسم !!!

‎جانت رهيبة بهذه السالفة بس ...

‎اماجميل جان ويه السواق ...

‎هو كان عربي بس من الموصل

‎اشكر كلشي بيه اشكر شعره رموشه وشواربه وبشرته هم مو بيضه مااعرف شلون لونها شكره على برونزي ...

‎كان متزوج وعنده اربع ولد وبنيه مع انه هو اصغر مني بشي سنتين يمكن

‎بس بشكل عام  مجنت هواية التقي بيه ...

‎اني بالشغل محد جان يعرف بيه ارملة

‎بس يعرفون ممتزوجة ...ممرتبطة

‎وعايشه ويه اهلي مااكول وحدي ...

‎ومجنت انطي هواية معلومات عني

‎بس استاذ ضياء لا

‎جان يبحوش ويسال ورايه هواية ...

‎وجان يسوي كلشي حتى يلفت انتباهي

‎هو جانت علاقته سيئة كلش بزوجته ...

‎مرتين مطلكها ومرجعها

‎وبصراحة من شفت صورتها انصدمت ...

‎معقولة هيجي واحد كل هاي المقومات هاي زوجتها !!!

‎شكلكم ...ترتيبها وشكلها ابد متناسبه ...

‎وجان عنده منها تلاث بنات الاثنين الصغار جانوا توم

‎ووحده بيهم گلبها تعبان ...

‎يعني على طول مريضة مااتذكر يمكن فتحة بالقلب جان عدها ...

‎بس سمنية دبدوبه

‎بالبداية فسرت اهتمام استاذ ضياء بيه كلت لانه شافني وحدي ومااعرف احجي كردي فساعدني يعني كلت يجوز يحن عليه لانه احنى سوى من بغداد

‎جان اي شي يسوي لازم ياخذ رأيي بيه

‎وعلى طول يمدح بيه

‎ويعزم الستاف اللي ويانه على حسابه احنى جنا وياه ثمانية كل تلاثه مديرهم واحد اني جنت تابعه اله عن طريق ست گلاله

‎فعلى طول يوصيها عليه

‎وهي جانت تضحك ..وتغمزلي

‎وهي هم جانت تعرف عربي كلش زين لانه بالثمانينات جانت عايشة ببغداد ...

‎ودارسة عربي بالمدرسة

‎الا الباقين كلشي مايعرفون اني اكول بس الكبار بالعمر لا زينين يفهمون عليه

‎بس بس اني جنت الح على نفسي حتى اتعلم

‎وبين كل هاي الهوسة

‎ منو جان يراقبني وخال كورة من كوري رضا خانم ...

‎في مرة ورة شهرين يمكن اتذكر  هيجي يعني ...

‎ست گلاله دزتني على وحدة من مكاتبنا ...بعين كاوة

‎لانه عندي سيارة كالت روحي سوي هاي الشغلات لمكتبهم وتعالي

‎من دااطلع شفت استاذ ضياء واكف يم سيارته وياشرلي بيه

‎هو جان يطبك سيارته  بالبارك مال المدراء

‎اني هم رحت دااشوفه شيريد

‎كال اني رايح لعين كاوة تعالي ويايه اوصلج ...

‎هنا طخت عندي بعد ...

‎هذا عنده شي  ...شغلته مو خاليه ولج سارة ديري بالج

‎صعدت وياه بس جنت كلش حذرة لا ضحكت ولا انطيت وحه

‎وعلى كد السؤال اجاوب

‎ ومن خلالها هاي الروحه عرفت عنه وعن حياته

‎وحسيت بيه يريد يمهدلي لموضوع

‎وقبل مانوصل كلي شعجب انت ممتزوجة لحد الان ؟!

‎ابتسمت كتله لا اني مخطوبه وخطيبي برة وانتظره ...

‎ضحك ضحكة قوية ...

‎وصفينا السيارة ونزلنا

‎اكيد ماتعبر عليه

‎عرفني كذبت ...بس معلق ورة كلامي

‎خلصت شغلتي بالمكتب ...وهو راح يسلم على مديرهم وكعد يمهم

‎ انتظرني نرجع

‎وقبل مانوصل  كلي اعزمج على غدا ...

‎طبعا رفضت وكلش رفضت بس هو اصر كال نكعد بمكان عام لابايكين ولاناهبين

‎ثم اني مديرج معليج انت هذه غداء عمل وكام يضحك

‎انزعجت كلش ...بس ماكسرت كلمته

‎وهذه كانت بداية المشاكل على راسي....

‎مجاز مني استاذ ضياء

‎وكام يلح هواية ويافرحة ماتمت

‎جنت اصده وابتعد عنه ...

‎بس مكدرت هو خلى الكل ينتبه

‎هدايا وعزايم

‎وتلميحات ومن هاي الشغلات

‎ودللني بالشغل وحس الجميع بيها ...

‎الا ان فد مرة دنطلع صاحني كلي ابقي

‎عزة كلش صعدت عندي

‎صح هو انسان راقي وابد ميتجاوز حدوده واخلاقه

‎ بس مهما كان اني بنية واهم شي سمعتي

‎فهو جان كاعد على ميزه اللي بنص الغرفة واني كعدت على اخر ميز على  اليمين ...

‎كلي شبيج خايفة ومهزومة تعالي هنا

‎كتله استاذ الله يخليك اعتقني وطلعني من بالك

‎اني صريحة واحجبها عدله وبالوجه

‎اني مو مال علاقات وونسه

‎وحضرتك متزوج ...

‎كتله الكل حسوا وعرفوا

‎حتى رضا كامت تشد ويايه

‎كلي ادري هي حاجيه لزوجتي

‎بس ترة الحب مو عيب واني احبج واريدج بالحلال ...

‎كتله استاذ الله يخليك انت متزوج وعندك تلاث بنات وبتك هالسنة اول كليه بعمر اخوية ....

‎فهو ضحك

‎جان يكلي ياول شنو قصدج بكد ابوج اني ؟!!

‎ليش انت هم مو صغيرة

‎كتله بس ممفكرة ارتبط برجال متزوج...

‎كلي لاتتوترين ...

‎وفكري بالموضوع

‎بروازمن_ورد

19

‎بداخلي مجنت مرتاحة لموضوع استاذ ضياء الدين ابد

‎ومجنتاعرف شلون اتخلص منه

‎بطريقة بحيث ماتسويلي مشاكل ومتاثر على شغلي

‎ جنت كلما ابتعد ...يصر هو على  ملاحقتي

‎واني جنت جدا رافضته حتى نفسيا مجان عندي استعداد لاي ارتباط ومن اي نوع .....

‎بس مكان بيه اصده الا باسلوب لطيفة مهما كان مديري وكان يكول انه يريدني من الباب ...

‎بس الحقيقة انه

‎ اني ورة فترة كمت اشك بكلامه خصوصا من كام يتصل بيه يوميا على التلفون ويظل  يسولف ...حسيت كمت افهم شيريد بس جنت اكول لاتتسرعين بالحكم يجوز هو

‎يريد يعرفني اكثر...

‎فمرات جنت اكول لنفسي ليش لا مدام هو هيجي متمكن وبمركز مرموق خلي اقبل بيه ....

‎يجوز صدك يحبني

‎ومرات  جنت اخاف من هيجي خطوة مهما كان عنده عائلته ومردت اهدم بيته

‎وهم جنت اتذكر ابويه وعلاقاته ويه البنات ...

‎وشلون جانت امي تتالم وتتاذى...

‎واخر شي كتله وحجيتله على الليى صار بيه وشلون اني بعد ماعندي ثقة باحد

‎وفعلا حسيت بيه اتغير من عرف بيه  اني ارملة

‎صار جرئ بالكلام ويايه اكثر

‎وصار يتقربلي اكثر والحجي الناعم صار مساره غير شكل

‎وصارت تصرفاته علني ...

‎وزادت رضا الموظفة اللي ويايه ولي زوجه ضياء تصير خالتها ...مضايقتها اليه

‎وكامت تذبلي حجي كدام الموظفين

‎بالعربي والكردي

‎من احد جان يريد  شغلة منه مثلا جانت تكوله روح على سارة هي تكله

‎هسه ينطيكياها وهو الممنون ...

‎وعاادي كدامي

‎ويوم ورة يوم صار حجيها كلش قوي وبالعظم

‎الا ان فد يوم صبحنا طاردها من الشغل

‎هيجي بهدوء صاحها

‎كللها رضا باجر بعد لاتجين

‎انت فائض ....

‎كملي شغلح وروحج على الحسابات ينطوج راتبج

‎ومستحقاتج

‎عزة ...

‎هي هم عصبت وكامت تدمع عينها وظلت تدردم وتدعي عليه

‎صح هي اللي انطردت

‎بس اني اللي اكلتها ...

‎انصدمت وكلهم الموظفين يباوعون عليه

‎عبالهم اني حركته عليها

‎مع انه الله شاهد مكان الي اي علاقة بطردها

‎وبسببها حاربوني الكل وحولوا دوامي جحيم ...

‎رحت كتله ليش طردتها

‎كلي مو كامت يوميه تنقل الحجي

‎لزوجتي وهاي هم خبلتني ...

‎كالت رضا وحجت رضا وانت هيجي سويت وسارة هيجي سوت

‎وهذا عقاب الها حتى بعد لاتتدخل بامور غيرها حياتي انت

‎كتله بس هذا شغل وانت كطعت رزقها مالك حق تربطه بحياتك الشخصية

‎جان يكلي بس هي  هم مو  حقها تنقل شيصير بالشغل للحياتي الشخصية

‎وبدت تصيرله هو هم مشاكل يوميا ويه زوجته ...

‎كام يجينا معصب وضايج ...

‎ويفش غله بينا

‎الى ان صارت عدنا دورة تدريب ...

‎وهنا هو خلاني المساعد مالته اللي احضر كلشي ...

‎اختار المتدربين وارتب جدول التدريب

‎يعني اخاف احد عنده شك

‎قطع الشك باليقين هو عنده شي ويايه

‎وقررت اترك الشغل خلص بعد

‎صارت الشغلة سخيفة حيل وماكمت اتحمل

‎هو زعل وصار عصبي

‎ويكلي  انت شعليج بيهم هاي يغارون منج ومااعرف شنو

‎كتله استاذ انت صارلك شهرين واكثر تكلي اريد اتقدملج وخلي نتعارف

‎اني حبطل واكعد بالبيت ووكت ماتريد باب بيتنا مفتوح ....

‎جان يكول اي اي الله كريم

‎اني جنت احس انه مايكدر يسويها والا جان سواها من زمان سواء ويايه لو ويه غيري

‎زوجته جان مبين هي  مسيطرة عليه ومدمرته من كل النواحي ..

‎وهو بالبيت مايكدر عليها ولايكدر يمشي حجايته

‎واثناء الدورة جان جميل السايق تعرفوه هو اللي  ياخذنا ويرجعنا ...

‎لانه جانت المحاضرات بمكتب ثاني

‎فمرة جنا بس اني وبنية لخ كردية ديرجعنا للشركة وهي مجانت تعرف عربي

‎فكلي ست سارة اريد اكلج شي وانت مثل اختي وعزيزة عليه

‎واني لانه اعرفج واعرف اخلاقج

‎ومن هالحجي

‎كلي ترة استاء ضياء الدين يكذب ويخدع

‎اني اعرفه واعرف عائلته ...

‎لو تبتعدين عنه احسنلج صدكي هذا مامن وراه بس الاذيه ...

‎وهو اله سوابق ويه هوايه بنات ...

‎صح هو صاحب فضل عليه بس والله مااعرف احس انت متستاهلين الحجي عليج ....

‎بوكتها اتمنيت كرسي السيارة يغوص بيه ومااطلع منه

‎صدك ينطبق عليه المثل ياكاع انشكي وبلعيني

‎بله 

‎شكله وشجاوبه

‎اكله اي اعرف واني متاكدة من كلامك

‎بس انتظر الوقت المناسب حتى ابطل لو اقشمر نفسي اكله انتظر الوقت المناسب انه يجوز مني ويكعد راحة

‎والله مجنت اعرف شجاوب شحجي

‎ولا جنت اعرف شحتصرف!!!

‎ومااحجيلكم مر الشهر اللي وراه واني يوميه الصبح اكول بعد مااداوم حقدم استقاله ...خلص كافي

‎جنت اروح وگالبه خلقتي عليه وماانطيه مجال حتى يحجي ويايه ...جنت كلش كارهته وفكرت فعلا انه استقيب

‎مع انه جنت حابه شغلي وباختصاصي وبديت اتعلم منه

‎واهلي هم جانوا مرتاحين نوعا ما ومطمانين عليه ...

‎خففت عنهم شويه ...

‎من القلق ومن الطلبات

‎الا ان وراها بفترة بدى يشد ويايه ...وكام يرزلني بصوت عالي وكدام الكل

‎لانه حصرته وطلعت كذبته

‎كلما جان يكول نطلع اكول زوجتك وشلون والعالم واهلي ومن هالحجي وعيب وانت رجال جبير

‎الا ان خلص بذيج  الصبحيه رحت عادي للدوام

‎وست گلاله جتي لغرفتي حتى بلا صباح الخير

‎و خلت ورقة الاقالة مالتي على الميز وكالت انت فائض مانريدج بعد لاتجين

‎باوعت عليه مستغربه

‎هو دنك راسه وماحجى ...

‎ههههه

‎عادي ماضجت ولا انقهرت

‎اخذت جنطتي وطلعت

‎جنت اعرف بيه كذاب وحقير

‎ومتعلم يلعب على البنات

‎ومن عرف ارملة عباله بس يكلي زواج حركض عليه

‎انتهازي  ووضيع

‎ويامكثر هالنماذج بالمجتمع

‎اللي يستغل منصبه حتى يخدع بنات الناس وبحجة الزواج والغرض الشريف يحصلون اللي يريدوه

‎بس والله حمدت الله وشكرته انه بطلت

‎اول شي حتى ضميري لايانبني انه تركت شغل حلو وراتبه زين ومرتاحة بيه

‎همه طلعوني

‎ومنها خلصت منه ومن مشاكله هو وزوجته

‎هم جنت اخاف لافد يوم تجيني للبيت وللشغل تخزيني وتفضحني وهي عدها هيجي سوابق...

‎جان معروف عنها عراكة وعايقة

‎وبطريق رجعتي  للبيت جبت سطله ايس كريم وجيت

‎نقطة ضعفي هو الايس كريم وعلمود الريجيم جنت محرومة منه

‎فمااكل بس بالطوارئ وبالازمات  النفسية هههه

‎صديقتي العزيزة الي ماتخذلني ...جانت مساعد رهيب

‎وكعدت اكل واتفرج مسلسلات وافلام

‎واحاول انسى واكول يله سارة عسى عن تكرهوا شيئا وهو خير لكم

‎ربج خلصج من هذا القذر

‎بس اجى الليل وخليت راسي على المخدة بجيت مع انه شكد حاولت ...وقاومت مكدرت

‎ اكيد طلعت قهري اللي حاولت ماابينه واقشمر نفسي من اكول مااهتميت

‎خابرت مسرة ثاني يوم تماما ووافقت على فكرة هي جانت عارضتها عليه من جنت ببيروت

‎انه اطلع لاوربا تهريب

‎وعقيل زوجها يرتبها اليه

‎مسرة هم كانت ضايجة وتعبانه وحدها هناك

‎مسؤولية  زوج واطفال و دراسه وغربه ...

‎كلش صعبة عليها هم جانت وتتمنى اروح يمها ...

‎وبالفعل اتفقت ويه زوجها ...

‎وخابرت اهلي كتلهم

‎ابويه رفض تماما الفكرة وكلي كعدي بمكانج وجوزي

‎بس اني تعبت حيل مااريد بعدابقى بالعراق

‎اللي شفته مو قليل محد خلاني بحالي وكلش كرهت الوضع برمته ...

‎جانت نهاية السنة بشهر ال١٢ ...

‎واني عندت وكلت راح اروح خلص

‎الفكرة انه ابقى بتركيا واكو امراة هو يعرفها شغلتها تهريب  انطاني اسمها ورقم تلفونها من اوصل تركيا

‎تدبرلي جواز اوربي لبنية تشبهني واطلع على اساس هاي اني ...

‎ومع انه الكل عارض بس اني عندت ورحت ...

‎وخابرت صباح كتلها تعالي جيبي عمي وتعالو كعدوا هنابالشقة مالتي  ابقوا كم يوم ...

‎اني دافعة فلوس الايجار دافعته ...

‎وليش حرامات الاثاث يروح

‎وتروح  فلوسه ابقوا بيه اذا وصلت بسلامة لاوربا وصارت شغلتي اخذوه كله الكم بالعافية

‎واذا فشلت ارجع بيها ...حاضرة اكعد وابدي من جديد

‎وانطيت سيارتي لجميل بنص سعرها ردت بس احصل كاش فلوس يعني والله صدك اخذها ...خليت فلوسها بجيبي وطلعت

‎وحتى هو وصلني للمطار ...

‎من وصلت 

‎جانت بارده حيل باسطنبول اجرت غرفة  بموتيل ٥٠ دولار باليوم لمدة يومين  ولانه مو موسم كلي اذا تبقين اسبوع احسبه بتلثمية كتله لا عشر ايام بتلثمية واني جنت اعرف اطول اكثر من هاي المدة  كتله كل عشرة اجدد ...

‎قبل وكيف عليها اصلا ...

‎وراها بكم يوم اجاني سرمد اخوية بقى  تقريبااسبوع  ويايه وراح افترينا بيها كل المزارات ...

‎صح باردة بس كلش اتونسنا...

‎سرمد.من النوع الهادئ وكلش حباب وحتى من يضوج من شي يضم بكلبه

‎رحنا لجامع سلطان احمد ولمتحف  ايه صوفيا .....وقصر طوبي قابي

‎وجنا نتغدى ونتعشى على البحر باردة تكصب كصب ههههه

‎وتقسيم ...مااكلكم مخلينا مكان مرحنا ..بس عيبهم ورة السبعة الكل يعزل ...بس البارات تبقى مفتوحة ...نظل كاعدين نتفرج تلفزيون لو نطلع نتمشى ...

‎وهناك والتقيت بالمراءة الي راح تهربني وفهمتني على كلشي بقى بس اتحضرلي الجواز وهاي اني وحظي شوف شكد تطول يله تلكى واحد ...

‎ورة مراح سرمد بكم يوم...

‎طلعت اروح اجيب مسواك مي وكهوة وجاي وفواكه المطر جان كلش قوي الصبح فاجلت طلعتي للعصرية  شويه خفت

‎رحت جبت كم شغلة ودارجع ...

‎واخذتني صفنه بالمترو واسرح ومااشوف نفسي الا عبرت مكاني

‎انوب من نزلت مااندل تيهت

‎صعدت باص ارجع اشو هذا  وصلني  فوك من توب قابي ...

‎وماكو هسه رجعه ومااندل...

‎وركبت باص ثاني  كالي ينزلج بنفس المنطقة اللي صعدت بيها  ..ومن نزلت طلعت هم موهي

‎وصارت دنيا ليل واني كلشي ولا اطلع بالليل اموت من الخوف والمحطة القريبة عليه كلش موزينه بالليل سكر وعربده وانتوا تعرفون بعد ...

‎كمت ابجي والله

‎انوب رجعت لاول مكان نزلت بيه و صعدت الباص من توب قابي لانه مجان يمر عليه المترو  ذبني بغير مكان مثل الكراج بيه كل الباصات

‎و المشكلة بتركيا مايعرفون لاعربي ولا انكليزي ولااني اعرف تركي شسوي ياربي

‎امشي واكول خرب بحظج سارة ...

‎وجه الفكر وكتها تطلعين

‎الا تتزقنبين

‎وحتى تكمل رجعت تمطر وتزخ زخ شنو تكولون  فيضان نزل من السما

‎الحمد لله والشكر ياربي

‎من صدك كعدت بمحطة الباص وابجي ودموعي ضايعة ويه المطر طبعا مجنت وحدي كوومة ناس بس اكثر هم رياجيل

‎ومحد بحال احد وظليت اكثر من نص ساعة يله اجى باص قريب على منطقتنا يكتبون اسامي الباصات ليفوك كتابه كهربائية ...

‎وجلبت بيه وصعدت ...بس من ننزل لازم ندك جرس  مشكل بالعمود واتذكرت مرة جنت صاعدة بالباص وواحد عراقي جان صاعد ...ويايه بس هو ليكدام واني واكفة ليورة لانه على طول الباصات  مقبطة واسمع هذا العراقي يصيح نازل يمعود ستوب

‎هنا انزل وين رايح

‎ويصيح ويعيط ياناس ياعالم كولوله خلي يوكف

‎والناس تباوع عليه ماتفهم شيريد

‎واني دااحجي وياه بس اكو هوايه ناس بيناتنه مايسمع

‎كتله اخوية دوس الدكمة مثل  الجرس بالعمود هو يوكف

‎كلي يله هساع تحجين صارلي ساعة اهتف وين جنتي؟!!!

‎راحت عليه المحطة ...

‎عوود حتى اني رزلني ههههههه

‎بس والله موقف كلما اتذكره اضحك

‎هسه ولا اني انوب صعدت هذا الباص وهم مانزل بالمنطقة اللي اريدها وظليت اسال واحجي اريد احد يفهمني شركب ...

‎اخر شي واني داردم على حظي وشايله العلاليك ويايه اكول خرب بحظج سارة

‎جان واحد من ورة كلي شبيج اخت سارة تحتاجين شي...

‎طبعا اني ماانداريت اشو خفت لزكت بكومة ناس واكفين بمكان انتظار الباصات ...ومن اباوع زين وركزت  شفت اثنين شباب اجوي قريب عليه

‎كلي اختي انتي عراقيه ...شبيج متيهه!

‎احنى هم عراقيين واحسبينا اخوتج

‎جنا نمشي وسمعناج تحجين ...كلنا نساعدج

‎احنى اخوتج ونندل المنطقة ...

‎عاد من شفتهم زين شويه ارتاحيت جانوا طوال وعراض ومبينين ولد ناس ومرتبين 

‎واحد بيهم شقجي شويه ...

‎كلي اعذريني اخاف ازعجتج بس احنى من سمعناج تحجين عربي صحناج ماسمعتي فكلت خلي اكول اسمج حتى عبالج اعرفج ...

‎والله يمكن جفصت مااعرف ليش هيجي حجيت وظل يضحك

‎طبعا اني اباوع عليهم وماكو اي ردة فعل ولا كلمه من عندي غير بس مرتبكة وخايفه...

‎والله وطلعوا ولد اوادم وصلوني لباب الموتيل يله عافوني وحتى همه دفعوا التكتات

‎كالوا احنى موبعيد كاعدين

‎واي شي تحتاجين بخدمتج

‎وابد طول الطريق كلمة ماحجوا ويايه من حسوا بيه خايفة شويه...

‎كلش احترمتهم

‎ومن وصلت اتذكرت اني بس اتشكرت منهم ولاحتى عرفت اساميهم شنو ولاهمه منين ...

‎المهم طبيت للغرفة وتوبت بعد اذا اطلع بالليل على كص رگبتي ...

‎وبقيت تقريبا اسبوعين وخابرتني المهربه ...

‎واتفقنا على مكان نتشاوف وتسلمني الجواز

‎وجابتلياه جانت صورة البنيه شكلها سبحان الله كلش يشبهني

‎هم شعرها اشكر لونه خفيف وعيونها فاتحة وكبار وكلكها مثلي بالكوة عدها شفايف ووجها مثلث ..بس شنو شويه ابيض مني ووجها اضعف ..

‎وانطيتها الفلوس ...مثل مااتفقنا

‎وحجزت التكت والسفر لفرنسا ومناك اطلع على هولندا ...

‎البنية عربية او عراقية مااعرف كان اسمها مايا مرزوق

‎ورحت للمطار اخذت جنطة صغيرة وعفت هوايه هدوم وغراض بالفندق...

‎ووصلت للمطار وگلبي يرجف وخايفه حيل

‎اني اعرف حظي

‎الله شكد حلو

‎والله عبرت وختملي الجواز ودااصعد الجنطة يوزونها ..واحد حجى ويايه هولندي ...يمكن

‎جان واكف ورة الموظف الي يختملي التكت ويسويلي التاك مال الجنط

‎وطلب جوازي هو اخذه ...وظل يگلب بيه

‎طبعا هو تابع للخطوط او الامن مااعرف

‎يحجي ومااعرف اسوي نفسي مااسمع وماافهم

‎اشرلي وطلعني من السرة ...

‎وظل يحجي هولندي وفرنسي مااعرف مجاوبت بس انكليزي هو ضحك

‎كلي تعالي صعدني بالطابق الثاني على امن المطار ...

‎وسوو وياية تحقيق هو يحجي تركي واني اجاوبه بالانكليزي لاهو يفهم انكليزي ولا اني افهم تركي..

‎وراها كعدوني بغرفة شي ساعتين تقريبا

‎يله اجى مترجم ...

‎وسالني انت مايا مرزوق

‎كتله اي

‎كلي انطيني عنوانك بهولندا ...

‎انطيته عنوان مسرة بالمانيا ...

‎كلي انت مو مايا ولازم ناخذك على الحجز ...

‎الحجز اسمه يابانجي بالتركي..بس قبلها بتت ليله بحجز المطار

‎واخذوني صعدوني بسيارة لاندكروز ...اني واثنين هنديات ووحدة مبينة روسية ووحدة شكلها صيني  اسيوي ...

‎صعدنا ورحنة مركز ثاني قريب على المطار وبيتونا من العصر لثاني يوم الظهر

‎طبعا بلا اكل ولاشرب بس من جنا بمركز المطار جانت اكو بنية عربية محجبة عدها طفلة صغيرة خطية جانت تتوسل على اكل وكاموا الناس اللي شايلين وياهم ينطوها

‎و الا الصبح يله جابولها ماعونين شوربة ...

‎اني مردت لانه منظرها استغفر الاه حشى نعمة الله وكل ماعون بكد كوب الجاي

‎جنت بس اريد مي علمود اخذ ادوية الشقيقة مالتي ....

‎هالمرة مخفت ولا انهاريت اصلا كلش عادي و اتعلمت ههههه صرت رد سجون على كوله اخوانه المصريين كمت مااهتم مثل ذيج المرة حتى مخابرت ولا فكرت اخابر اهلي

‎جنت حاطة ببالي كمية الرزالة والاهانات اللي راح اكلها منهم

‎اصلا ابويه جان زعلان من ي لانه عندته و طلعت

‎وهمه هم الله يسلمهم جان 

‎لازم يعني  يخلون عرضة بالموضوع ..

‎وهياتني رجعت خلي هسه  يرتاحون ...

‎وكتها هيجي جنت افكر ...

‎وحتى مدة كعدتي بتركيا قبل مايجي سرمد وورة مراح ماجانوا يخابروني مثل قبل  ...

‎المهم طلعوني من مركز المطار ورة مسووا تحقيق

‎سالوني  اسمج وليش جاية ووين رايحه

‎اني جنت مصرة اسمي مايا مرزوق ...كلي تبقين بالحبس لو تطلعين من تركيا ترجعين لبلدج ...

‎كتله لا مااريد ارجع لبلدي

‎كلت بلكت ينقهرون عليه ويسوولي جارة

‎وكلشي ماسيو فير انه رحولونني بسيارة لخ ويه اللي جانوا ويايه بحجز المطار

‎الا ان وصلنا باليابنجي ...

‎جان طابقين الارضي للرجال والثاني للنساء ...

‎ومن وصلت جنت بعد ميتة جوع

‎كوة حصلت ماعون مركة لهانة ...يبوووو

‎كوة جرعتها

‎همة جانوا يقدمون وجبه وحدة الظهرية وخلص واللي يريد هو يشتري

‎المهم بقيت ليلتها هناك

‎اباوع كوومة نسوان اشكال والوان وجان اكو بنية هم عراقية ...

‎ماارتاحيتلها شكلها مو راحة فمااقتربت منها ولا هي جتي عليه ..

‎واكو صوماليات وافغانيات كوومة حالهم يبجي الصخر

‎ثاني اليوم بالتحقيق ..

‎سالني تريدين تبقين لو ترجعين  كتله لا مااريدابقى  ارجع للعراق  ..

‎ماتحملت وضع اليابانجي والشقيقة هاجت عليه موتتني

‎كلي انطينا ميتين وخمسين دولار فلوس. النقل  بالباصات ...

‎حتى ينقلوني ويوصلوني للحدود ...

‎انطيتهم الفلوس وثاني يوم

‎بعد رحلوني اني ومجموعة عوائل جانوا ويايه ...

‎وسلمونا للاسايش والبيشمركة اللي بالحدود ..

‎ورة يوم كامل بالطريق سياقة

‎استلمونا الاسايش الكراد وكانت جوازتنا يمهم ....لانه الاتراك مارجعوها النا انطوها الهم وهمه وزعوها علينه

‎انطوني جوازي وسالني الضابط عن اسمي وتعرفون بعد

‎انطيته اسمي الحقيقي وعنواني باربيل وكل معلوماتي الصحيحة وكلي روحي ...

‎هاهي ...

‎زين وين اروح وين امشي

‎ كلشي مااندل كمت امشي ورة عائلة من كركوك ...

‎وين مايروحون وراهم كلولي حنوصل للكراج انت روحي لاربيل واحنى نروح لكركوك...

‎ وصلت كراج اربيل ...ومناك ركبت تكسي لبيتنا ...

‎المشكلة والتعب جان اكثر شي  باللغة اتعذبت

‎صح اني افهم عليهم بس مااعرف اوصللهم اني شريد ...

‎خابرت صباح وعمي جانوا بعدهم بشقتي كلش فرحت وارتاحيت

‎كلت لصباح حضريلنا جدر دولمة ميته من الجوع اريدها حامضة وحمرة ودولكه لبن اربيل مدخن ...

‎اول مطبيت سبحت ووكعت على الجدر دك طلعت جوع الايام اللي فاتت

‎بروازمن_ورد

20

‎كعدت ساعة ستة ونص الفجر... شبعانه نووم ...ومدفايه ...وراييبيييقة كلش

‎كمت سويت حليب دافي ونسكافيه ...

‎وفتحت الشباك وظليت اتصفن على الشوارع ...

‎جانت الدنيا بعدها مو ضوية ...

‎احلى الاوقات جانت عندي من اشرب كهوتي واصفن على الشباك فجرية  مغربية او ليليه ...

‎الجو بارد والدنيا تمطر والضوة يتشتت على الشوارع ...

‎جنت احب هاي الاجواء باسطنبول ...

‎وحتى هنا ...

‎شقتي جانت غرفتين وصالة

‎ غرفة نوم شوية كبيرة وغرفة اصغر منها ...

‎عمي وصباح بقيتهم بالغرفة الجبيرة واني ورياض بالصغيرة ...

‎وجنا كلنا نلتم بالصالة نشعل صوبه والفلف رجليه ببطانية صغيرة واكعد اشرب جاي وكعك لو كهوة هاي لازم كل عصرية ...

‎جنا كلش مرتاحين بذيج الايام ....

‎جانت باردة حيل فختلنا بالبيت مجنا نطلع

‎ونظل نكضيها اني وصباح دك سوالف للصبح

‎جنا بس ضايجين علمود مدرسة رياض خطية اخاف يفصلوه لانه ايام غيابته صارت هواية  ولو هو الدوام مو مثل قبل ...

‎الانفجارت كثرت ...

‎ويوميه اعتصامات وسادين الشوارع وانوبة القمة العربية  راح تصير ببغداد وخبصونا بيها ...

‎وحتى اهلي هم كالو نجي يمكم قبل مايسدون الطرق ويصير حظر تجوال ...

‎وهاي بعد فد شهر ونص ...

‎اني بذيج الايام مثل ماكتلكم مجنت اطلع

‎سيارة ماعندي ...

‎وماكو الي واهس كلشي اسوي جنت بس مكضيتها اكل ونوم ...

‎حتى عمي خطية جان هو يدفع الايجار وصارت مصاريفنا محدودة كلش

‎والاصح اني فلست فد نوب وكعدت على الحديدة

‎وحتى مالي وجه اطلب فلوس من اهلي بعد

‎وابويه لحد الان زعلان عليه ومايقبل يصالحني

‎فحتى انترنت هم كطعناه مانريد

‎بذاك الشهر مادفعت الاشتراك ...

‎فظلينا بس على التلفون للطوارئ و التلفزيون...مبقت مسلسله تعتب عليه ولا فلم ماشفته ...

‎بس عاادي هم ضوجة ...

‎صباح جانت اجتماعية وخلال هاي الكم شهر هي هنا عرفت هواية جوارين وخصوصا العرب ...

‎وصاروا وحدة تزور اللخ ..هي تروح وهمه يجوها

‎هي كلش محبوبه ...وخدومة بشكل

‎فوحدة منهن كلتلها على شغلة بالحضانه وهي كلش كيفت بيها بس عمي مجان يقبل ...وظلت منا ومناك اداورها

‎اخر شي قشمرته  كلتله اشتغل معلمة بروضة ...

‎وخطية بدت تداوم ...وعمتي سعاد من يمها وصت ابنها ذو الفقار يسوي نقل ريوضي لاربيل ...

‎لانه ارتاحوا هنا وبعد مايفكرون يرجعون  لبغداد

‎ همه على اساس  خطية يبقون بسورية ...ومن صارت الاحداث غييرو رايهم ...بعد ماينكعد بيها

‎فكاموا يدفعون  ايجار بيته الثاني  سد بسد للايجار هنا..

‎وفلوس سيارتين شغلهم خطوط  توصله مصرف للبيت ...

‎يعني يادوبك يكيفهم ...

‎فسمعت صوت صباح كعدت تحضر نفسها تطلع سويتلها ريوك ...اتريكنا وراحت بقيت اني بالبيت ...ومن يومها كمت اتعلم طبخ ...وترتيب...

‎يعني صدك صرت ام بيت

‎ومن وصل نقل رياض كمت اني اوديه للمدرسة ...وورة شهر اجوي اهلي ...

‎كعدوا ويانه ...

‎همه اخذوا الغرفة الصغيرة واني ورياض بالصالة ....

‎اني انام على القنفة ورياض فرشناله على الكاع ...

‎وكوة يله صالحت ابويه مجنت متخيله هو صدك هيجي ماخذ على خاطرة مني هاي اول مرة يزعل عليه ...

‎بس حقه مايدري باللي مريت بيه ...

‎وابويه جان اجتماعي ومعرفه هواية كضيناها معازيم وطلعات ويوميه نتعرف على واحد من اصدقائه

‎ويكيفون ويتفاجئون هاي شنو نعيم هاي بنتك ماشاء الله

‎وين ضامها عناانريدها لفلان وعلان والله وكيلكم يروحون بعد مايرجعون

‎بس جانت اللمة حلوة والايام الحلوة بسرعة تخلص ...مع ذلك  حسيت ماما جانت تعبانه ...مهمومة ..

‎مو مثل قبل ...

‎هم خطية فرغ البيت عليها ...

‎تلاثة احنى ولا واحد يمها وهمه اصلا مايقبلون اني ارجع لبغداد لحد الان متخوفين من اهل المرحوم زوجي...

‎فاني هم سالنها كتلها ماما شخبار سراب ..اني وكتها جنت اضوج انه هي تعرف اللي صار بيهةوتتشمت ..فكلت خلي اشوف هي عرفت ...

‎فامي كالت طبعا عرفت وهلكد  انت تعرفين شغلة تفشل شكو سويتها

‎فكلت خلي انجب واسكت احسن من ماينفتح الموضوع مرة لخ وتمطر عليه الرزايل 

‎سراب جانت باقية يم زوجها ومرات تجيب الولد تبقى فترة يم اهلي

‎ابويه كلش حنين ونقهر عليها ويريد خاكرها من خاطر عمتي الله يرحمها

‎وهاي راح تصيرلحا اربع سنين ماصار عدها طفل ماما تكول فحصتها كلشي مابيها وحتى تقارير زوجها مابي شي

‎فعلى الاكثر هو اصلا مايرغبلها

‎انقهرت عليه ...علمود الفلوس عمتي كسرت گلبه وگلب اللي يحبه ..وهياتهم كلهم تعيسين ومحد راضي عن احد 

‎بقوا اهلي  ويانه لحد ماخلصت اعمال القمة العربية بشي اربعة ايام ...

‎والله مهزلة خبصوا الدنيا وسدوا الشوارع وطوارئ وكوومة صرف علمود ربع ساعة !!!

‎ومن رجعوا اهلي ...بديت ادور شغل مرة لخ ...

‎يعني على عرف ابويه يوميه جنت اروح مكان اقدم وكلشي ماكو

‎صح جان اكو شغلات بسيطة بس اشو استصبعتها على روحي ...

‎الا ان والله لكيت عن طريق وحدة من المعلمات ويه صباح ...

‎مركز تجميلي محتاجين محاسب ...وشخص يرتبلهم الماليه مالتهم....

‎كلت ليش لا ...صح الراتب كلش قليل بس الحمد لله اهم شي اخلص من كعدة البيت ...

‎والشغلة نظيفة ومستورة

‎وبدى دوامي من التسعة الصبح للستة العصر ...بس اخذت ساعة وحدة بدال الغده  اروح ارجع بيها رياض ابن عمي للبيت ....لانه صباح جانت ترجع بالاربعة ونص ...

‎وتنتظرني لحد ماارجع ناكل سوى ...

‎المكان جان مالوف عليه كزبونه ...بس ابد ممشتغلة بيه ...

‎وبديت اشوف عالم ثانية وناس اشكال والوان ...

‎بلشت اشتغللهم على نظام يدخلون بيه الوارد وعدد العمال والمصاريف وهكذا

‎يعني هو مو من ضمن اختصاصي بس كشغل معليه بيهم اشتغل على الحاسبة ...

‎واشتغلتلهم مال سنة كاملة فاتت ...جانت سجلاتهم  هوسة وخربطة ...فبس بالبداية تعبتني

‎وبظيت احب المكان وكلش  عجبني  ...كله نسوان ويسولفون شغلات ابد مسامعتها ...

‎مشاكل ويه عيال

‎ويه صديقات...وسخور من فلان وعلان وهاي اللي عافها خطيبها واخذ صاحبتها ...ياهي اللي تجي اسمع قصتها لو منها لو من العاملات ههههه

‎وهنه كل وحده يعرفوها زين

‎ هاي الزبونه يداروها صديقتهم تنطي بخشيش

‎هاي ماتنطي وابد مايعجبها الشغل ...

‎وهكذا

‎اللي جانو يملكون المكان خوات اثنين وكبار بالعمر جانن عايشات برة ببريطانيا  فهمه مايعرفون عربي لذلك  جنا نتفاهم بالانكليزي ...وحتى البرنامج نزلته انكليزي

‎واللي يشتغلن وياهم  كلهن كرايب ونسايب ...ماكو وحدة غريبة ....

‎بالبداية جنت كلش مشغولة فمجنت اعرف هواية بيهن تقريب ورة شهر ونص بعد رتبت الامور كلها الهم ...بديت اسوي تحديث يومي للي يجون ..

‎فصار عندي فراغ من ماكو احد

‎وعجبني اساعدهم مرات ...مثلا احضر جهاز الليزر واخذ المعلومات بنفسي

‎احضر الكريمات اللي يطلبوها الزبونات ومن هالسوالف ...

‎وقوت علاقتي بيهم وكمت اتريك واتغدى وياهم ....

‎حبيتهم لانه همه مجان عدهم اذيه عليه وسوالفهم كله شقه وضحك ومن ماكو احد يكعظون وحدة تترتب اللخ ...

‎وبقيت يمهم تقريا اربع شهور ...

‎الا ان جتي صديقة كلش لوحدة من المديرات الاخوات ...وظليت اسولف وياها من عرفت اختصاصي  كلتلي اكو فندق كلش مشهور بنص اربيل خمس نجوم يريدون مهندس حاسبات...

‎محتاجين ضروري ويفضل يعرف عربي وانكليزي وكردي  ...لانه الفندق يستقبل وفود واغلبهم من بغداد...

‎فسوتلي واسطة وكالت روحي قدمي

‎والله ورحت قدمت وبوكتها عرفت انه  الراتب جان تلاث اضعاف راتبي حاليا واكثر...

‎طرت من الفرح ...وكلت يالله بلكت تصير قسمتي هاي الشغلة  لانه فعلا جنت اللي اطلعه  يادوبك مكفيني مواصلات والباقي اشتري بيه مسواك للبيت ...

‎الحمد لله جانت عطلة فمجنت احير بريوضي...

‎ورحت سويت مقابله واللي قابلني مدير كردي بس عربيته ممتازة وواحد ثاني هم من بغداد ...

‎وظلوا تقريبا ساعة ونص يسالوني ...

‎شوفوا هنا كمت بعد ماارتبك ولا اخاف من شي

‎من كثر اللي شفته عاادي جان عندي اذا يرفضوني اضحك واغم نفسي واطلع هههه والله بلاشقة

‎كلش اتعلمت على خيبات الامل...

‎بس والله وربج فرجها و انقبلت مع انه المقدمين جانو غيري اربع ولد انقبلنا بس اني وواحد ثاني ....

‎واثنين من اللي انرفضوا جانوا اصدقاء رئيس قسم الصيانه هو جايبهم يعني واسطتهم قوية بس رحمة ربي ريحتني  ...فلذلك هو

‎من اول يوم شد ويايه كلي والله  لو مو بنية مايقبلوج ...

‎يعني مابيه خير بس كونا اني بنيه هههه

‎ضحكت بوجهه كتله الحمد لله لعد ..

‎كرهني حيل ...بس شعليه بيه شغلي جان بالمكتب  يم المدير ...وبغير قسم وبغير طابق

‎الانترنت جان ببلاش للمقيمين وجان مهندس لاخ يتابعه ومرات جنت اساعدهم يعني وين مايصيحوني اركض ..

‎ولاول مرة كمت صدك اشتغل شغلة احبها من كل گلبي وانسى روحي مرات اني بنيه اطب جوة المكاتب واربط النت ورك ومرات بالمؤتمرات لو. الندوات تصير اشكالات ازحف جوة الميوزة اسويها ...يعني مااكلكم كلشي اشتغلت حتى كهربائيات همينه

‎وهذا اللي خله المدير والستاف يحبوني مجنت اكول لا ابد وجنت احل كل المشاكل

‎بذاك الوكت يله حسيت بنفسي افتهم هههههههه

‎واني هم بديت اتعلم هوايه هوايه اشياء من هذا الشغل لانه اللي درسناه شي واللي دنطبقه شي اخر ...

‎وبديت اندمج اكثر ويه الستاف والعمال يعني مو مثل قبل مجنت نحسه لانه نادرة ا مجان عندي وقت التقي بيهم

‎ من صدك حتى شغل غيري كمت اخذه حتى اتعلم

‎شفتها فرصة حلوة ومميزة وكلش تفيدني ...

‎والفندق اله اسمه يعني مو هينه اللي يشتغل بيه .. خبرة واسم

‎ومن خلال شغلي بديت احتك ويه قسم الصيانه ...

‎القسم كله شباب ...وكلهم حلوين جانوا اربعة ورئيسهم  اسمه سردار هذالي يضوج مني  ...

‎تقريبا حانوا نفس الكصة بالعمر اكبرهم يمكن بكدي اذا مواصغر اسمه منصور

‎وهمه بالبداية من يشوفوني ....يفيكون وينصبون

‎ وتعرفون بعد يطلعون عضلاتهم ...

‎بعدين اتعلموا عليه كاموا يصيحولي حمودي هههههه...لانه همه على الكل دك ونصب ماحد يفلت منهم

‎واني هم جنت اكيف عليهم ابد ماازعل ...بالعكس ...

‎فكلش دللوني لانه جنت البنية الوحيدة بقسمين الحاسبة والصيانة ...

‎وكلهم جانوا مؤدبين ومحترمين الحمد لله ...حتى شقاهم جان حلو موزايد ولاسخيف

‎بس حرصت على انه مايعرفون عني شي من يسالوني اكللهم لا ماامرتبطة ومامفكرة ارتبط نهائيا

‎واني فعلا  ماخليت هذه الفكرة في بالي ابدامجنت اريد اخسر شغلي ومجنت اريد انكفخ على راسي مرةةلخ

‎بس تعرفون لازم اكو سوسه بالموضوع

‎ام الاج ار يعني الاداريه مطلعة هويتي انه متزوجة اني جنت لحد ذيج اللحظة ممغيرتها

‎لانه معاملتها صعبة وطويله اصلا ماعندي نسخة من شهادة الوفاة مالت هشام الله يرحمه ولازم اطلع وحدة وودي وجيب ودوخة راس وماردت ادوخ بيها  ابويه  لانه اكيد هو اللي راح  يمشيلي بيها...واصلا مجنت محتاجتها نتاثر عليه اذا نتزوجة ولا ارملة

‎فبالبداية كاموا يذبولي حجي بالشقة ....

‎بس اني غلست ...ولا يمي الموضوع

‎جنت بس اضحك ...

‎الا ان مرة صباح وعمي نزلوا لبغداد بشهر التاسع صارت عدهم شغلة ضرورية وبقوا يمي رياض اخذته للشغل كلهم عبالهم ابني

‎اني هم كلت يله خلي مشيها

‎بوكتها جان سردار الوحيد مايطقني كتلكم عليه

‎فهو لازم رياض من ورايه  وسائله كله ابوك وين؟! وشنو يشتغل

‎ كله ابويه مريض بالبيت على كرسي متحرك مايشتغل ...

‎فهو كايل للستاف كله عليه ...

‎وثاني غير معاملته ويايه وصار لطيف وبعد مو مثل قبل بالعكس انكلب مية وثمانين درجة ههههه

‎عبالهم رجلي مقعد واني استحي اكول واني اشتغل حتى اصرف على العائلة ههههه

‎طبعا هاي الشغلة معرفتها الاورة كم شهر مو بوكتها يعني بس هم فادتني شويه هداءت الامور بيني وبينه بس اتغير غير شي هم  ...حيدر الموظف وياهم

‎سردار جان جايب اخو مرته حيدر وابن عم  حيدر هيثم يشتغلون وياه ...من زمان يعني قبلي بشي سنتين

‎همه اصلا من اهل بغداد وبسبب الاوضاع اتحولوا لاربيل

‎حيدر جان مخلص هندسة ميكانيك ...

‎وجنت احسه  يباوع عليه بس من جوة ليجوة  مايحجي

‎ومرات الكاه صافن عليه من انتبه راسا يدير وجهه ...

‎هوية شويه ثكيل مو مثل البقية

‎وجان ممتزوج لا هو ولا ابن عمه

‎حتى شقى قوي ميتشاقه بالعكس جان يضوج من يشوف هيثم يلح ويايه ويظل يدغه ويرزله بيناتهم ...

‎بس هي هاي طبيعة هيثم يدوس ميانه ويه الكل ...

‎الرابع جان اسمه برزي ...برزي مايعرف عربي كلش ومن نحجي سوى بس يضحك جان كلش حباب وهمه الشله على بعضهم كلش اصدقاء واحد سره بحللك الثاني

‎اني جنت منتبهه واعرف ...انه حيدر  عينه مني وجنت احس انه جماعته يعرفون لانه بس يحجي ويايه يبدون ينصبون عليه وكل ش يه واحد مخابرة يكله فلان يريدك تعرفون بعد واحد ينغز الثاني ويسويه بيه دكه ...

‎الجو شي على شي جان عاجبني الصدك غير!!  بس حقيقة  مجنت اهتم بحيدر بالذات

‎ جنت اكول حاله حال فلان وفلان وعلان ...ياما ركضوا ورايه وسووا المستحيل وكلشي ماكو

‎بس كبنية جنت احب  انه اكون محط اهتمام بعض او احد الاشخاص على الاقل يملي غروري الانثوي اللي عندي ...

‎وماكو بنية ماتفرح من تحس نفسها نراقبه وانه اكو من يفكر بيها ويهتم الها ختى لو مخاله بالها يمه

‎لكن التغيير صار

‎بعد انه نشر سردار انه زوجي معوق كاموا الكل يتعاملون ويايه بلطف زايد ...واحترام اكثر هههه كاموا مايتشاقون وشويه ثگلوا

‎وصوروني كامراة مناضله في سبيل عائلتها ابنها وزوحها المعوق هههه استغفر الله

‎ هذا الشي كان اله ايجابياته ... حتى راتبي زاد من وراه وبعض السلبيات انه حيدر كام نهائيا ميتواصل ويايه ...

‎حسيته صار حزين ومنعكف على روحه

‎بذاك الوكت اني مجنت اعرف السبب كتلكم مجنت اعرف سردار سائل رياض عن ابوه

‎بس كلت يمكن هذا صدك انه رياض ابني ...

‎ووراها بكم  يوم واحد من النزلاء عطلت حاسبته مادتكنك انترنت وطلبوا مني اروح اشوفها ...

‎من نزلت شفت حيدر واكف بالممر ديصلح نقطة كهرباء يمكن مسويه فيوز ....

‎فكلي خلي اكمل وشوفيها شبيها  لو اخذي الحاسبة ونزلي جوة جيكيها...

‎كتله خلي اشوف واعرف  شنو مشكلتها بالاول

‎فجنت كاعدة بالغرفة وهو بالممر...

‎وظليت احوص اريد اكله رياض مو ابني ...مااعرف شلون ...زين ليش الا اكله

‎سارة دكعدي وسكتي شتريدين قابل ؟!!

‎اني جنت مترددة بموضوعه حيل ولهوايه اسباب

‎ومنها  لانه هو هواية اصغر مني باربع سنوات تقريبا  ...

‎يعني شريد مثلا حبيات وعلاقة وبعدين ..

‎.هو شاب ممتزوج واني اكبر منه وارملة ...

‎اكيد ماتصير قسمة...حتى لو تصير يظل يعيروني ويعيروه طول عمرنا

‎واني جنت افكر واضرب دالغات هو قاطع افكاري وكلي بس ابنج ابد مايشبهج طالع على ابوه يمكن ...

‎كيفت من حجاها ..

‎جاوبته هيجي يعني كانه مااعرف شنو الموضوع

‎كتله قصدك على ريوضي  لا والله كلهم يكولون يشبه امه ....مايشبه عمي ؟!!

‎هو راسا مد بس راسه على كيف من الغرفة ورفع حاجبه !!

‎كلي هو مبتسم عمج منو !!

‎اني بوكتها ضعفت عيني حيل فكمت من اشتغل على الحاسبات البس نظارات ...

‎فنزلت نظارتي وكمت اباوع عليه من فوكاها ...

‎كتله رياض ابن عمي ليش ماتعرف !!! مسويه علامة تعجب جبيرة على وجهي

‎فدخل للغرفة وسند ايده على نفس الميز اللي جنت اشتغل عليه ..

‎كلي يعني مو ابنج

‎ضحكت كتله  لا ماعندي اطفال بس هو مثل ابني ...اني ربيته ...

‎فسالني

‎وابوه مو مقعد ...؟؟!

‎كتله شبيك حيدر اشو لحيت

‎اي عيني ابوه مقعد وهو زوجته هنا ويايه كاعدين باربيل

‎...جان يكلي كولي والله ...

‎كتله اوي حيدر شكد فطير صاير ...

‎اخذت الحاسبة ونزلت ...

‎وعفته مندهش وفرحان واني هم طول اليوم اتذكر الموقف وشلون اتفاجأ واضحك ويه روحي ...

‎بوكتها اموري الماليه شويه اتحسنت ورجعت الانترنت للبيت ...

‎لانه ضجت من فترة طويله محاجية ويه مسرة ....

‎وبس بالشغل جنت افتح واتصل باىعالم

‎وامي بذيج الايام  جانت توها راجعة من بيروت حتى بالعطلة مخلت سرمد ينزل لبغداد جانت كلش تخاف عليه

‎فهي ظلت كل شهر شهرين تروح يمه تبقى فترة وترجع ...

‎فخابرتها من رجعت كالت قنعت ابوج يدزلج فلوس سيارة صغيرة على كدج صباح كالتلي متبهذله بالباصات ...

‎كتلها لا ماريد راح اشتري وحده بالاقساط ...

‎اني جنت احب اداهرها واسولف وياها واحسسها انه خلص اعتمدت على نفسي وصرت اكدر افتح بيت ..

‎بس هي جانت تعبانه وضايجة مااعرف شنو اللي مضايقها ...

‎جنت احاول قدر الامكان انه مااخليهم يشيلون همي ...بس الظاهراني جنت همهم الكبير

‎من رجعت للبيت ...

‎صباح فاتحتني بموضوع اخر ...

‎بروازمن_ورد

21

‎هالايام بدى الجو شويه يكسر ونخلص من الحر ...حتى باربيل حارة مثل بغداد يمكن اقل  فرق بكم درجة ...

‎وصارت صباح بين يوم ويوم اطلع عمي شويه تفرة بالمنطقة لو تاخذه للسوك ...

‎هو الحمد لله صار يكوم ويكعد وحده ويمشي كم خطوة بس بعده على الكرسي ...اخذت رياض وطلعوا بقيت وحدي ابحوش بالنت وسويت عشى علما يرجعون

‎ وهي تدخل عمي للبيت كالت سارة امج هسه خابرت تكول دتخابرج تلفونج مغلق

‎كتله مااعرف يمكن شبكة ماعندي بس خير شتريد

‎تكول دزيت الفلوس حواله باسمج باجر روحي اخذيهم

‎ابوج منطيها  ستين ورقة دزتهم الج حتى تشترين سيارة ...

‎كتلها شنو ستين !!!  هاي شنو اشتري بيها ...

‎عربانه مسكربة بسبعين وفوك

‎فكالت هسه دكولي الحمد لله ..انت ملامه جم فلس منا مناك من شغلج ؟!!

‎ضحكت كتلها لا والله منين يادوبك مصروفي وعلى البيت ...شيبقى من الراتب ...

‎بس اروح اخذها واشوفلي سيارة على كدها شسوي ...هاهي ...

‎اتذكرت من جنت بالشركة ويه ليث جانت عندي سيارة بخمسة وعشرين الف دولار ...صدك مدايمه لاحد

‎يله الحمد لله ...

‎من المبلغ عرفت ابويه بعده زعلان عليه ويمكن كوة امي مطلعه منه  هذا المبلغ ...لو يجوز ماعنده !!

‎كعدنا اتعشينا رحت دااسوي  شعري الفه  لثاني يوم

‎فجتي بصفي كعدت ...

‎سارة اريد اكلج  على شغله

‎لا شغلتين

‎كتلها اي الاولى ؟!

‎كالت امج اليوم كالتلي شي والله مااعرف يضحك يبجي ...

‎كتلها شنو احجي ..

‎كالت تكول عمتج سعاد حاجيه وياها تريدج لذو الفقار على سراب !!

‎كتلها شنوووووو

‎طفيت الجهاز ..اوكفي خلي اسمع عدل

‎صدك تحجين ...

‎حلفت يمين امي حاجيتلها هذا الشي

‎والله صدك عمتي مااعرف شلونها من كل عقلها يعني هيجي تكولها بوجهنا

‎ليش يمه  عود اخذ ذو الفقار ...

‎حتى تنتقم من سراب وتكسر خشمها !!

‎زين واني شعليه ؟!! واني شنو

‎هاي شبيها صدك انغثيت فجانت صباح تضحك كالت بس شلون فكرة جهنمية حتى يصير انتقام مشترك منج ومنها هههههه

‎كتلها والله ضجت مو عيب

‎ذو الفقار اصغر مني وكلنا نعرف جان يحب وحده وهي جبرته يعوفها وياخذ سراب علمود البيت والفلوس ...

‎انوبه افترت عليه ...!!!!

‎شعبالها الناس لعبة وتلعب بيهم مثل ماتريد ...

‎وسالتها امي شمجاوبتها

‎كالت والله جانت كلش مقهورة وضايحة من الحجاية حيل وحتى مكايله لابوج

‎طبعا ماتكول يخزيها لعمتي غير

‎والله ماتستحي ...

‎كالت ارملة ومااتزوجت خلي هم استفيد منها وهم اكسر خشم سراب هيي والله

‎هم حظي هذا ...

‎بعدين...

‎سكتنا شويه ودااكمل شعري

‎ شفت صباح لزمت ايدي كالت اريد اكلج شي بس لاتصيحين عمج مايدري ومااريده يعرف حتى لاينقهر

‎اني هم نصيت صوتي كتلها شكو اني عبالي دتتشاقه ...

‎سارة امج من خابرتني ..بس الله عليج لاتنقهرين هي وصتني انه لاتضوجين ...

‎كتلها صباح شبيج احجي الشغله شكلها جديات شكو وكعتي گلبي

‎كالت ابوج قبل كم يوم متخربط ...ومسويله تخطيط مال قلب ...

‎اني من يمي صحت وضربت على صدري يمه عزة ...

‎شبيه ابويه ولج صباح احجي ...

‎انوب كمت اجر الفرشة حيل من شعري اريد اطلعها كانما مانعتني انه اسمع زين

‎كتلها شوكت هالحجي وليش مكالتلي ...

‎فكلتلي اهدأي الله عليج امج ماتريد احد يعرف ويسوي هوسه ابوج مايقبل كايللها لاتكولين للجهال بس هي هم خايفة جانت ...

‎ادري يعني هو شبيه

‎والله سارة امج حجتلي ومافتهمت بس اللي عرفت صاير بيه قلب ...ضعف مااعرف شنو

‎يمه بابا سودة عليه هاي كله من ورايه اني السبب شلعت گلبه وظليت ابجي ...

‎والوب اريد اخابر امي وصباح ماتقبل ...

‎لانه هي موصيتها محد يتصل وابويه بالبيت مشدد عليها محد يعرف

‎كعدت ادك وابجي

‎هاي تاليتها سارة هيجي يصير بابوج من وراج اني احجي واسب بروحي وصباح تحاول تهديني حتى عمي لايسمع

‎بس اني بليلتها متت من القهر وبس ابجي

‎ حسيت بذنب وعبئ كلش ثقيل عليه ...

‎اتذكر من شفت شكله من طلعني من الحجز بسوريا حسيته من القهر كبر عشرين سنة ...

‎هم مو هينه ولاسهله بعد هالعمر والسمعه الذهب يروح يطلع بته من الحجز وبالغربه!!

‎ومن اجى اخر مرة لاربيل جان بس يضحك والله عرفت ضام شي ومايريد احد يعرف اني عبالي مصادق وحدة

‎يمه سودة عليه بابا كله من ورايه ...

‎بقيت للفجرية دموعي تنزل عليه

‎وماكو صورة ماساويه  ماتخيلتها

‎ اذا ابويه يموت شيصير بيه اني وبامي وبسرمد وبمسرة خطية هاي اللي  صرالها اربع سنين مشايفته وشلون راح يلوموني على وفاته

‎وشلون راح ابجي عليه

‎واتخيلت الفاتحة واتخيل امي منهارة...

‎ومن هاي الماسي اللي عقلي يعشق تصويرها ويعيش بيها

‎ ومحسيت الا دكت الساعة ساعة سته ونص الصبح جنت توني غافية طفيته ورجعت نمت ماكعدت الا على صوت التلفون يدك  ...

‎مديري خابرني يريد يعرف اجي للدوام  لو لا ...

‎كتله اي جايه جايه

‎ واعتذرتله على التاخير

‎انوبه بيومها كان عندي كوومة شغل مو مال يتاجل...

‎لبست على السريع وهمزين شفت صباح مسويه ريوك لعمي ورياض ...جان بعده مو دوام مدارس ....

‎هالمرة اخذت تكسي مركبت باصات ...

‎واول ماوصلت طبيت دااسوي الشغل شفت منصور وهيثم جايين ديتشاقون ويايه ...

‎منصور يكله حمودي اليوم معصب ...مجاوبتهم ....

‎ردت اخلص حتى اخابر امي اسالها عن ابويه ...

‎ورة شويه اجى حيدر يمي عرفت همه موصليله باص انه اني ضايجة وعبالهم اكو شي ...

‎فاجاني يركض ...

‎كلي خير شبيج ..خوما اكو شي ...

‎كتله لا ماكو  شي شويه  ضايجة وتعبانه  ...

‎بس جنت ممهتمتله حتى مااباوع عليه من يحجي ...

‎بس هو ظل يلح

‎الله عليج شبيج

‎كتله وصوتي شويه عله عليه

‎حيدر انت شبيك ...كتلك ماكو شي  عليش دتلح ...

‎هو هم انعقج عافني وراح بس ظل يباوعلي من بعيد ...

‎اني مجان الي مزاج حتى اروح اعتذر منه ولافكرت بيه اوباللي سويته ...

‎اول ماخلصت ...

‎خابرت امي ودموعي تجري طبعا هو شافني وظل يلوب يريد يعرف شبيه

‎جنت واكفه بالممر بين الغرف شايله التلفون و اروح واجي ...

‎ومن يصير بوجهي راسا اندار هو سووه نفسه ديجيك النقاط مال الكهرباء الا ان لطش گبالي انطيته ظهري وكمت اخابر

‎شكد ضجت مخلاني احجي ويه امي براحتي ...

‎هسه مال الزمه واغسله بقاط رزاله ...

‎اني بالكوه افهم من امي ابويه شبيه واجر منها الحجاية جر

‎وهي يمه هوسه جانت بالمستشفى

‎هم ماتسمعني وهم ساعة ترد عليه

‎المهم الحمد لله طمنتي على باباتي  انه هو مو بخطر وظليت اتوسل بيها انه مااكون اني السبب وهي تهديني تكولي لا ماما ليش هيجي تحجين ...

‎وذكرتني على الحوالة...

‎اصلا نسيتها ...

‎وحذرتني اذا اخابره ابينله انه اعرف عنه مريض كالت تعرفين ابوج مايحب احد يحسيه انه ضعيف لو بيه شي طبيعته هذه ...ويتخبل من احد يستخطيه او حتى احنى ...

‎سديته من امي وجنت ناويه اتعارك ويه حيدر انداريت شفته ماكو ...

‎رجعت خابرت جميل هالمرة

‎ السايق اللي بعتله سيارتي تتذكروه ...

‎مجنت اعرف هوايه ناس وهو من الناس القليلة اللي  اثق بيهم واعرف بيه شخص نظيف وشريف وهوايهة جان يساعدني فاتصلت بيه يدبرلي سيارة بكد الفلوس اللي دزها ابويه ...

‎فكلي ادللي يدورلي وخلال هالكم يوم ينطيني خبر...

‎اني هم صعدت لمكتبنا ...

‎جان مكتبنا فوك عكس غرفة الصيانة جانت بالسرداب جوة ...همه جان عدهم غرفتين المكتب بالطابق الارضي والورشة بالسرداب ...

‎من دااصعد شفت هيثم وولد ويانه نزلو للقاعة اللي جوة ...

‎ماكو شويه صعدلي حيدر ...

‎جايب كوبين واحد جاي وواحد كهوة ...

‎كلي سمعت تبجين لانه ممتريكه ههههه

‎شكد ماجنت ضايجة ابتسمت ...

‎كلي اي اضحكي شبيج مثل البومة من الصبح ...

‎كتله حيدر!!!

‎يعني مثل الكافي لاتلح

‎كال ها عيوني...

‎واخذت منه الجاي

‎كتله ماعندك بسكت ...

‎فهو ضحك وطلع قطعتين بتي فور صايرات طحين بجيبه

‎كتله شكو تضحك

‎كال والله الولد عرفوج كالو حمودي يبجي اليوم ممتريك جوعان  هههههه

‎هنا صدك ضحكت

‎كتله وانت شنو خالهم مراقبين عليه ...

‎كلي لا والله بلا مااكللهم همه هيجي ...كلما يشوفوج يخابروني هههههه

‎انطاني القطعة الي شويه زينه بيها روح اخذتها من ايده  وشفته مبتسم ويباوع عليه ...

‎ساعتها حسيت بشي غريب  اتحرك بداخلي من عيني وكعت بعينه ...

‎حسيت بدفو غريب خوفني وخلاني راسا اهرب من الموقف وخليته مذهول واكف بنص الممر

‎جنت اخاف من اي مشاعر تتحرك بداخلي خفت لاينفتح جرح قظيم صارلي سنة واكثر  اعالج بيه  ...

‎بس  بله هسه شيكول عليه هيجي عفته  خبله!!

‎يله همه اصلا يسموني حمودي الخبل ....ههههه

‎بس كولوا همزين مزعلان عليه من صيحت عليه اول مرة انتو تعرفون انه

‎شله حيدر همه الاربعة واحد مطلع اسم للثاني وحتى اسماء لبقية الستاف ..

‎منصور..منصوري قوري ...هوايه يشرب حاي ويكرز خب لو ومنصوري تندروي يب الدجاج هوايه حسب وضيعته بذاك اليوم و

‎هيثم الجحش ههههه ياكل اللفه بعضتين وهو حسب مايكولون اغباهم ودائما يصلح الاشياء بالمكلوبي هههه واغلب الاحيان يروحون يصلحون وراه بس هو ابو المهمات الصعبة ويضحكون عليه اما حيدر فجان يصيحوله

‎حيدر السطل....ومجنت اعرف بوكتها ليش هيجي يسموه

‎وبرزي نازانم ...

‎برزي افقرهم ولو هو موقليل شر بس لانه كلهم يعرفون عربي هو مايعرف كلش قليل فاي واحد يساله يكللهم نازانم يعني بالكردي مااعرف

‎ومرات يصيحوله برزي بشه ...

‎عدا غير اسماء كومة

‎ها وسردار حاامي الدار هههههه

‎لانه كل مشكله هو يوكفلهم ويدافع عنهم

‎واني فوك ما مسميني حمودي يصيحولي حمودي الخبل

‎لانه يوميه بشكل من كيفي مرات اگلب خلقتي عليهم ههههه

‎خبل بعد ههههه

‎جنت احب سوالفهم وشقاهم وضحكهم وعمرهم مااتجاوزوا عليه بكلمه لانه همه محترمين ومعتبريني مثل اختهم من صدك

‎بالاضافة الى انه يعرفون حيدر عينه مني وهذا الشي خلاهم يداروني ويراعوني بالزايد لانه همه صداقتهم حانت  بشكل قوية

‎ومن المواقف اللي هسه جتي ببالي ولحد الان اتذكرها واضحك عليها مرة جانوا ديحششون على سردار ....

‎وظليت اضحك واني من احس طوخت بالضحك ودست زايد  اعوفهم واروح اكمل ضحكتي بالمصعد مجنت احب ياخذون عني فكرة انه اني وحدة خفيفة بالاضافة الى انه اصلا مجنت اعرف اذب تعليقات وحجي لانه هذه يرادلها قابليه اني جنت زيرو بيها ....

‎فظليت اضحك وخفت لايطلع صوتي طلعت من القاعة جنا بيها  ركض صعدت بالمصعد لمكتبنا فوك وبالطابق الاول انفتح المصعد وصعد منصوري واثنين نزلاء رياجيل

‎اني شفته بعد مااتحملت  اتذكرت وظليت اضحك

‎لا  وكمت ابجي من الضحك اتذكرت الحجي والموقف

‎ وهو هم يضحك وخانك ضحكته حتى النزلاء كاموا يضحكون على واهسنا ...

‎ومن وصلت للمكتب  كلي الليوم اله اكول لسرادار ...

‎هيجي تحجين على حامي الدار ...بسيطة افضحج ...

‎اكله سارة سوتك مزق هههههه

‎ماتحملت وخربت من الضحك نمت على الميز واريد اسكت ماكو...

‎سردار جان عصبي عكسهم مو صاحب مزاج وشقه ...

‎فمرات يجبرهم يصلون وراه جماعه لانه همه كلهم عرف وتعرفون هو نسيب حيدر رجل اخته يعني ...

‎فيوكفون وراه على اساس ديصلون وهمه ولا واحد بيهم اصلا يصلي ...بس برزي خطيه

‎جانت غرفة المصلى كبال قاعة الندوات فاني اعدل بيها واباوع عليهم

‎ودك شقه وضحك ونصب حتى اللي يريد يصلي هم تبطل صلاته بس شنو باالكاتم ها...

‎وبس يخلص الكل تكول السلام عليكم ورحمة الله وبركاته هههههههه

‎ولايتصافحون بعد وتقبل الله

‎جانوا حشاشين درجة اولى

‎وهمه جانوا على طول حتى عليه  ينصبون و  يكولولي حسسينا عدنا بنيه بالقسم

‎فجدر دولمة صينية دجاج.....

‎ويضحكون ويقلدون عليه انه اني مااعرف بس اگلي بتيتة واسوي معكرونه بالباشميلوووههههه

‎واني كل مايكولولي اوصي صباح تسولي جدرية دولمة واجيبها الله وكيللكم حتى المحروك ياكلوه الجدر يكوم يلمع معاوزه غسل بعد ههههه

‎طبعا جان حيدر يفضحني

‎يعرف هذا موطبخي ويظل يقشمر عليه ....بس شلون يعرف والله ماادري

‎صدك جنت كلش اتونس على سوالفهم لو شكد مضايجة لازم يضحكوني بذاك اليوم ...

‎المهم بذاك اليوم اخذت اجازة ساعة لباجر اروحح اجيب الحواله لانه حتاخر اليوم وماالحك اروح اجيب الفلوس وحدي ...

‎وخطية هم صباح طلبت مني اروح ثاني يوم عدها شغله هناك

‎ومن رجعت للبيت....

‎ورة ماتعشينا ونام عمي ورياض جتي عليه  للغرفة كالت عفية باجر اذا رحت تجيبين الفلوس هاي ورقتين كوة لميتهم......

‎شوفي  صارلي كم شهر اشتغل يله لميت هلكد

‎ اذا تكدرين بلازحمة دزيهن لاخوية خطية خابرني كلي محتاج ...

‎وانت تعرفين هو على باب الله صاحب عائلة واربع جهال انوبه بعده صغير ومشكل وياه الضغط والسكر...

‎كتلها صدك جذب بعيني خلي ورقة منج وورقة مني ...

‎شكد لحيت ماقبلت ...

‎ثاني يوم مجان عندي هواية شغل ومطلعت من غرفتي اجى حيدر هو عليه ...

‎كال ها اشو ماكو اليوم ...

‎كتله ماكو شي دااخلص الداتا بيس مالتي ...يعني شغل مكتبي ...

‎اني بصراحة بذاك الوكت ابد مجنت ماخذه حيدر جديات جنت اشوف اكو هواية امور عارضة وتمنع اي تقارب بيناته

‎ولانه جان اصغر مني جنت احسسه بهذا الشي على طول وجنت اعرف بيه يتضاييق من هالسالفه كلش..

‎وبنفس الوقت جنت اغلس  اسوي نفسي مااعرف انه هو منجذب اليه ...وعينه مني

‎يجوز اني غلطانه ...

‎عود من يفاتحني احجيله كلشي عن حياتي ساعتها اكيد راح ينسحب ويعتذر همين منو يدري  ههههه...

‎والله شمدريني اني بالنسبة اليه جنت مااصدك ولا اثق باحد بنفس الوقت مااروح بخيالي زايد ولا امني نفسي ...

‎حضرت نفسي وطفيت الحاسبة ودااطلع...

‎اترخصت من استاذ محمد جنه نصيحله كاكه حمه

‎وجان اشوف حيدر واكف يم المصعد كلي ها وين رايحة اشو عزلتي وماخذه الجنطة رايحة للبيت ؟!!

‎ابتسمت كتله لا مو للبيت ...

‎جان يكلي لعد وين

‎كتله حيدر شبيك صدك جذب شغلة تخصني ...

‎انفتح المصعد وصعدنا

‎فهو رد عليه  الله عليييج وين رايحه

‎كتله رايحه للسوك الجبير اجيب حوالة ...

‎فاندار عليه وعقج شكله .... وشنو تريدين تروحين وحدج !!!كتله اي عاادي وشنو يعني ؟!!!!

‎ والله ماتروحين وحدج لو شيصير هسه

‎كتله انت صدك اتخبلت انت شعليك .....

‎كام يضحك كلي بابا والله اخاف عليج خلي اجي وياج اني اوديج ...

‎كتله لا عيني هذا الناقصني

‎اني بلا كلشي صوفتي حمرة انوبه نطلع سوى الله باجر يزفوني بالدوام

‎جان يكلي بابا شبيج انت ؟!!

‎انت شايفة الازدحام والهوسة ثم ذيج المنطقة كلها زلم انت من كل عقلج اخليج تروحين وحدج

‎طبعا نزلنا وهو كام يمشي قبلي باللوبي ويسلم غلى جماعته بالريسبشن واني امشي وراه  وطلعنا دننزل من الدرج برة الفندق جان يكلي والله وصاير تنكتين ...ودمج خفيف يزفوج شنو!!منو يكدر يجيب طاريج بكلمه!!

‎ ...كتله حيدر مااروح وياك انوبه يشوفونا نصعد سيارة سوى لا عفية لاتسويلي مشاكل لاعيني مااريد

‎كلي خووش لعد ...

‎روحي انت تكسي وانتظريني بباب السوك من تنزلين لاطبين انتظريني افتهمتي !!

‎اجرلي تكسي وفتحلي الباب واني اباوع عليه واضحك

‎عود شنو هالاحترامات  جان يبتسم ابتسامه جبيرة و يكلي يالله عيني سندس انتظريني هناك مو تروحين ...سد الباب

‎وورايه اخذ تكسي وماشفته بعد الا ان وصلت للسوك

‎ وصدك شفته هناك بالباب جانت بيها كرصة برد  فوهو لابس قمصلة شوية خفيفة...ظليت امشي وراها ههههه

‎ومشى كدامي وكل شويه يندار عليه ..الا ان وصلنا استلمت الفلوس هو حسبها وضبطها ودزيت الورقتين مال صباح لاخوها وخليت فوكاها هم من عندي ...

‎ورجعنا...واخذلي تكسي وصعدنا سوى ماقبل كل واحد بسيارة واني هم معندت استحيت بنص الشارع

‎هو كعد بالصدر واني وراه

‎ساعتها حسيت بهم كبير على گلبي

‎ياترى هذا صدك يحبني ويخاف عليه لو هم ماخذني قشمريات ...

‎زين بهالحالتين اني شسوي ...

‎اني جنت احجي ويه روحي وصافنه على الجامه مال السيارة اباوع على الشوارع

‎بس هو جان كل شويه يباوع عليه بالمرايه الجانبية ...

‎حسيت بفد شي اتحرك بداخلي بس جان الخوف غالب عليه اكثر من الفرحة او غير شي

‎جنت اخاف من الفشل وهم مرة لخ انجرح وينكسر گلبي مابيه بعد

‎ونزلت اني طبيت من الباب الرئيسية وهو راح من باب الصيانة ...

‎بعدين انتظرته اني يم مكتبهم وشكرته ...

‎واجى على بالي كتله تخلي الفلوس يمك اخاف اخليهم بالجنطة واني مموجودة بالغرفة وهي بابها على طول مفتوح والمبلغ موقليل ...

‎فهو ضحك كلي وتثقين بيه ...كتله اي اثق بيك ...خليهم بمجراتكم انتو تقفلوها

‎جان يضحك كلي واذا بكتهم...؟!

‎كتله اخنكك غيير؟!!

‎فجان يكلي بشنو بايدج اللي  جنها مهفة هههههه

‎واني صدك دنكت اباوع على ايديه عاد هو خرب عليه من الضحك ...كتله شكد مكروه انت

‎صدك اني جانت اصابعي طوال ورفاع كلش انوبه على طول مطوله اظافيري ...

‎كلي يله روحي هسه حمه يسال عليج ...

‎حسسني انه هو مسؤول عني ويخاف عليه وهاي المشاعر انحرمت منها فترة طويله كلش ...

‎صدك جنت محتاجتها

‎وحجالي هو  بيومها هو ميرجع للبيت انطاني الفلوس من دااطلع كلي عندي خفارة الليله

‎همه جانوا يوميه واحد من قسم الصيانه يبات خفارة وثاني يوم مايجي للدوان  ...

‎هيجي ويداوروها بيناتهم همه الاربعة ...

‎رجعت للبيت واني احس نفسي بغير عالم ...

‎جنت اصفن اتذكر الاحداث وابتسم ويه روحي جتي صباح جانت جايبة حب وجاي كعدنا نكرز ونشرب حب جانت تكول خيرج اليوم صافنه وتضحكين ...

‎وهاي النظرات والصفنة لا وفوكاها الابتسامة مو غريبة عليه

‎نكول مبروك ؟!!!

‎بروازمن_ورد

22

‎لا اشعر بخير

‎صارت قوانة تتردد كلما رفضت واحد اجاني زين او موزين ...انت متبطرة على نعمتج وكبرتي بعد لازم تتزوجين ...

‎ماحد يفكرللاسف بكلماته من يطلقها شنو يكون نتائجها وشراح تترك اثر بداخل اللي يسمعها وممكن يبني عليها ردة فعله!!

‎زين معقولة نهاية حياة البنية الزواج ؟!!

‎الهدف والطموح الاخير!

‎كل حجاية وانت خصلت على كلشي تريديه شتريدين بعد ؟!!!!

‎شهادة ووظيفة وبعد ؟!!

‎خلص هذا اقصى طموحاتي ؟!!

‎اني هم بعد ماادري ...من كثر ماكمت اسمعها

‎كمت ارددها ويه نفسي

‎شانتظر؟!

‎بس صار عندي قرار الارتباط صعب وصعب كلش وخصوصا

‎اللي مريت بيه بتجربتي الاخيرة خلت الامور الممكن اتقبلها سابقا نوعا ما مستحيله ...

‎وبصراحة فقدت الثقة بكل الناس بحولي حتى اختي كمت اخاف استشيرها واحجيلها انه فلان رادني وفلان اتقدملي لانه بنظرها صرت وحدة متبطرة ومعقدة ماتقبل بالفرص الزينة والممتازة ...

‎يمكن الوحيدة اللي صرت ارتاح احجيلها واسولفها هي صباح شوفوا كم سنة صرنا نعرف بعض عن قرب وهاي راح نكمل سنة هنا واكثر 

‎ والحمد لله ماسمعت منها الا كل الخير

‎ جانت تخجلني كثر ماداريني وتريد خاطري مع انه ماكو اي مصلحة او منفعة من عندي

‎ففتحتلها گلبي ...

‎بالبدايه واني دااحجيلها خنكتني العبرة...

‎حجيتلها عن خوفي من الفشل وعن مشاعري المكبوته من تجاربي السابقة والكم الكبير من الاذى والجروح اللي تركه كل شخص بيهم ...

‎الى ان اخذنا الحجي لحيدر الي ديشغل تفكيري حاليا ...

‎صح اني مجنت اعرف عنه وعن حياته اي شي سوى انه شخص طيب وحنون ومعجب بيه ...وعن فرق العمر بيناتنه وعن كونه اعزب واني ارمله

‎وحجيتلها عن بعض المواقف اللي صارت

‎ وعن مخاوفي الي تقيدني ...

‎والحقيقة انه هي شجعتني على انه اشوف فرصتي وياه وان انطيه فرصة وكالت امها الله يرحمها جانت تكللها البنية مثل الجسر كلمن يمر عليه ...

‎مافتهمت المثل بس نقلته الكم..

‎او حاولت افتهم منه انه اي بنيه تكون معرضه للكثير والعديد من الخطبة من اشخاص مختلفين وامكانيات مختلفه بقى علينا نشوف ايهم اصلح وانفع ...

‎ومنها سالتني كالت الله عليج هو حلو ...هههه ضحكت ...

‎كتلها والله مااعرف اني اشوفه حلو زين ...هو طويل وعريض المنكبين ههههه

‎كد مااني طويله واعتبر اطول من هوايه بنات مااوصل لجتفه اصلاهمه الاربعة طوال وضخام يمكن انعمهم برزي

‎وشعره اسود فاحم وثخين وعيونه سود وحواجبه سود وثخان

‎انوبه من يربي لحيته وشواربه يختفي وجهه من الشعر مايبين الا الخشم

‎ضحكنا شويه عليها ...

‎بس هو فعلا من يزين لحيته يطلع احلى مع انه اني احب اللحيه بس جنت اشوفه احلى بالسكسوكة...كون وجهه مو كلش عريض

‎هو من النوع السبع يذب روحه بالشغل ...روحه مرحه ومثقف ...يعني مو حي الله خريج هندسة ...وطول الوكت لابس هدوم الشغل مافي يوم شفته مبدل هههه

‎واتصور ماعنده زايده ناقصة ...جان بين عليه ولو هيجي شغلات ماتنحزر ...

‎بصراحة ممكن اي بنيه تحلم بيه ...بس بوكتها  مجنت اعرف اي شي عن عائلته...

‎نمت ليلتها واني اعيد شريط المواقف والسسوالف والحجي اللي صار ....

‎سواء بالشغل او كلامي ويه صباح كلش شجعتني عليه ...

‎مرعلينا بعض الوقت وكلشي ماتغير كل اللي صار انه اشتريت سيارة جانت سيارة شويه تعبانه ...

‎بس زين مشتلي حالي وحيدر شويه ضاج من عرف اشتريتها بلا مااخذ رايه حاول يحسسني انه لازم انطيه الحيز اللي يستحقه وباكثر من مناسبه بس الحقيقة اني جنت اصده لا اردايا

‎ مرات اتندم اكول لي عيجي اهزمه ومرات اكول لا احسن ...

‎وبوكتها جيراننا وحده منهم سالت عني وحجت ويه صباح عن ابن اختها ببغداد يريد يتزوج وهو مطلق واتصور كالت انه هي ملمحتلها ماتصير عنده خلفه ويدور عن مطلقه او ارمله ...

‎بصراحة رفضت راسا ...ليش احرم نفسي من حظ الامومة يعني بعدني مخاشة بالعمرين ولا الحمد لله بيه اي شي يمنعني من اكون ام ...

‎فرفضته طبعا ...وهالمرة كمت بعد مااحجي ولا اخذ رأي احد خلص اللي ماريده ماريده

‎الا ان قربت ايام راس السنة واني كلش احب هذه الايام احس بحنين ودفوا واصير غير شكل ...

‎اميل للحزن اكثر بس مو معناها ضايجة لا بالعكس احس بالهدوء والسكينه ...

‎واسمع الاغاني الحزينه والرومانسيه والموسيقى الهادية ...

‎واتذكر بالضبط بيوم اللي دننصب شجرة عيد الميلاد بنص البهو مال الفندق جانت شجرة عملاقة وكلش حلوة وظليت اشتغل ويه الستاف بالكهربائيات مالتها وعيون حيدر تلاحقني ...

‎اتعودت عليه ...ومصارت ملاحقته تزعجني او تحرجني ..بالعكس يوم اللي ياخذ خفارة وميداوم جنت احس بفراغ وشي ناقصني واكون ضايجة طول اليوم ...

‎وطبعا هو جانت توصله باصات ...

‎وين مااروح وويامن اوكف واحجي وبديناها قبل فترة بمسجات ...

‎بس مسجات وقصيرة هو اللي بداها ...

‎وكان يكتبلي بهذه الطريقه ...

‎لا اشعر بخير وانت ليست هنا ...

‎او ...

‎الغروب يكون احلى عندما تمرين بخاطري

‎هيجي شي

‎من بديت اعرفه اكثر جنت اشوفه شخص اخر مليان حياة وحنيه ...

‎وحسيت بيه رغم الهوسه والشقى والضحك  اللي عايشهم هو انسان وحيد بداخله ...

‎حسيته شايل هم اكبر منه

‎فجنت احب من يكتبلي المسجات احس بيها كانما خواطر

‎ومع ذلك جنت  كلش  قليل اجاوبه...

‎واكثرها بس لما يسالني عن حالي...هيجي مباشرة

‎يعني

‎طمنيني ان كنت بغيابي على مايرام لانك مادمت معي فلا اخشى عليك ...

‎وتصدكون لحد الان اني محتفظة بيهن ...

‎جنت مرات ادقه من اجاوب بكلمتين اني زينه دااشرب جاي

‎ثاني يوم يكلي والله جنت ناوي اكتبلج وسم هو هذا جواب ههههههههه

‎بس ساعتها هو جان يجاوبني  بالعافية ههههه

‎نرجع لذاك اليوم اللي دننصب بيه الشجرة جنت لابسه فستان حني وبوت اسود وشاده وشاح خفيف على ركبتي كاروهات اسود وحني اطوخ من الفستان ...

‎وهاي اول مرة البس فستان لانه كالو حناخذ صورة جماعية للستاف 

‎ردت اظهر جانبي الانثوي عود

‎لانه طول السنه اني بنطلون جينز وحذاء سبورت وتي شرت ...

‎فدنكت شويه ها ...دااوصل النقطة ...اجاني ركض

‎اوكفي عدل هاي شنو هاي خزيتنينا فضحتينا

‎كتله شكو شبيج

‎طبعا كلي وهو معصب شنو شبيك رجليج كلها طلعت

‎كتله منينله ليش تجذب اصلا حتى بوتي فوك الركبه وجوة الفستان يعني شريط مايبين من رجليه ...

‎جرني من زندي ووخرني وهو شكل النقطة

‎وعافني وراح محجى شي

‎بس حسيت بحرارة وصلت لخدودي وانحرجت كلش ...

‎فمشيت سريع وهواية جانو يباوعولي بذاك اليوم جنت لافه شعري وحاطه مايكب طوخ ...وهواية بناتةبالريسبشن كالولي طالعه حلوة الا هو ..عقج شكله من شافني ....

‎وكفت كبال المصعد بالممر اللي مقابيله نفسه يصير اللوبي وراه اجاني موظف سلم وظلينا نحجي واخرني شويه وظل ويايه وصعد من دنصعد شفت حيدر مر خطف ومن شاف ويايه وكف ظل يباوع عليه من انسدت باب المصعد ...

‎شيخلص اليوم ...صدك اتافافت

‎ورة مطبيت لغرفتي ..بشويه ...شفت مر رايح جاي ...

‎من شاف ماكو احد اجى وكف بالباب ...جان يكلي شراد منج هذا الافندي ؟!

‎كتله شتريد حيدر...راسي يوجعني فك  ياخه مني كافي مغثات اليوم

‎سالتج سؤال جاوبي عليه شراد منج؟!!

‎مجاوبت دنكت راسي ولفيت ايديه ونمت عليهم ...

‎مو دااحجي وياج !!!

‎لو تدري شكد  احتقر هذا التصرف منج من احجي وياج وماتردين واذا جنت تشوفيني بعين الصغيرة كوليها وفضينا

‎كتله حيدر اذا جانت عندك نية تتعارك خليها على باجر

‎كافي روحي واصله لخشمي

‎فسالني ليش شبيج

‎كتله هيجي ماكو شي

‎بس اني جنت ضايجة انه ماكلي كلام حلو ولا علق...

‎يعني جنت متحمسة ورتبت واتاقنت ...

‎من شفته لبسني

‎شعرت بخيبة شويه يمكن ؟!!

‎ والتصرف اللي سواه يم الشجرة هم  احرجني وضايقني...يعني

‎ مااعرف يمكن الم راسي هم كان اله تاثير ...

‎بس المهم حسسته انه اني ضايجة

‎ورحع يسالني شيريد منج هذا الموظف

‎كتله والله مايريد شي شبيك انت !؟

‎شكو هلكد لحيت

‎كلي لا حجى وياج شي

‎لانه هو قبل كم يوم سائل عليج الموظفين  ...وخطية مبين عليه  غركان بالحب...

‎كتله لاتخاف اطمأن كلشي مكال ولا احجى ولا جاب سيرة عن اي موضوع ...

‎هنا سكت طلع من الغرفة ورجع ..

‎جان يصيحني بصوت ناصي ... سارة

‎طبعا اني رجعت مدنكه ...

‎مو دااحجي وياج

‎كتله نعم ورفعت  راسي ..

‎جان يكلي ...باعي

‎ترة والله اني احبج ...واحبج من زمان ...

‎هنا لحظتها صحصحت وراح الوجع مال راسي وكمت اركز كلش زين ...

‎كتله شنو

‎كلي سمعتيني

‎احبج واريدج ...

‎تقبلين بيه ...

‎بس بالاول الله عليج انت اتحبيني لو لا؟!

‎حسيتي بيه كل هاي المدة  انه اني معجب بيج واحبج

‎يعني  الصدك هم  تبادليني الشعور؟!

‎كتله واني مبتسمه تريد الصدك الصدم ؟!!

‎هو ظل يباوع عليه رافع تك حاجبه ...

‎فكتله الصدك لا . ..

‎طول هالكلام هو جان واكف يم الباب يحجي ويايه حتى اخاف احد يجي حتى راسا يروح ...

‎واني دااريد اكمل حجي...

‎اجى استاذ حمه ...

‎سلم عليه وسحب شغلات من الجرار اللي ورة الباب وكلي يله سارة نزلي اذا ماعندج شي هنا

‎ هوايه عدنا شغل بالصالة

‎وانظار على حيدر

‎كله وانت عيوني  حيدر روح ويه هيثم

‎شوفوا المولد الثانوي مااعرف شبيه الولد سووا بيه اوردر ..

‎كله صار كاكه ...وعافني ونزل

‎كلش ضجت وكمت ادردم ويه روحي مخلاني اشرحله شنو اقصد ب لا ياربي ليش ؟؟!!!

‎ظليت طول اليوم اريد احجي وياه ملكيته ادور عليه مشغول الا ان صاحونا نتجمع علمود الصورة ...

‎اقتربت منه مبتسمه حتى افهمه اشو هذا لبسني وراح ولا باوع عليه ...

‎وراح وكف العد ي عني جان گالب خلقته وروحه طافرة ...

‎واللي زاد الطين بله ...

‎الموظف اللي سالني عليه اجى وكف بصفي !!!

‎بهاي اللحظة اندار عليه و باوعلي بنظرة استحقار

‎من يمي اشتعلت وشبيت ..

‎و وحتى بالصورة بس احنى الاثنين شكلنا معقوج ...

‎وظليت وراها  الوب

‎اروح واجي  ادور عليه احجي وياه ماكو ماشفته فدزيتله مسج ...

‎كتله وينك ؟!

‎مرد عليه ...

‎خابرته انطاني رفض وغلق التلفون واختفى

‎اخر شي قبل نهاية الدوام سالت هيثم عليه كلي طلع قبل ساعة واكثر يمكن

‎كلش انقهرت...يعني شدعوة وشبسرعة زعل عبالك مصدك اكولها ....

‎بروازمن_ورد

23

‎انتوا تعرفون صارت زعلة بيناتنه قبل يومين ...

‎وبسبب موضوع يمكن تافهه بس شوفوا سوء التفاهم شكد يغير اشياء ...

‎ومرات من اتذكر ماادري اضحك ماادري ازعل ...

‎بس سبحان الله على الرغم من كبراعمارنا وتعدينا حتى مرحلة الشباب المتقدم بس من توصل للمشاعر نكوم نتصرف بعفوية وطفوليه غير متعمدة مو بس احنى كل البشر يمكن ..

‎زعل مني حيدر بيومها وطلع للبيت وعاف الفندق ...

‎مع انه جنت اتعالى عليه واسوي نفسي ممهتمة بس بيومها انفضحت كل مشاعري و كلش انقهرت على زعله ...

‎وظليت الوب اريد احجي وياه مخلاني حتى محسيت ساعتها الموضوع كلش جدي  الا ثاني يوم من شفته مسلم عليه وفات من يمي كانه مايعرفني ...

‎فظلوا منصوري وبرزي يباعون عليه وعليه ...عرفوا اكو شي ...

‎بس اني شنو كابرت وتعاليت...

‎حتى حجيت على نفسي ماكو داعي هيجي اتنازل مهمها كان اني امراءة كرامتي وكبريائي ماكو داعي اتنازل  ...

‎حتى لو جان داخلي يحجي ويقرا غير شي....

‎صعدت لغرفني وجانت باردة حيل ...

‎هالايام الاخيرة ماعدنا مؤتمرات ولا ندوات ولا حتى دورات تدريب ..بس الفندق ازدحام علمود عطلة راس السنة يجون يقضون العطلة كم يوم وخصوصا من اهل بغداد....

‎فجانت حركة قوية ونزلاء هواية ..

‎بس كشغل اليه كان كلش قليل على كد عطل شبكة النت مرات

‎ او طلب منا ومناك لاحدهم اشوفله حاسبته ...

‎فكنت اقضي معظم وقتي بغرفتي ...الزك بالهيتر ابو الشمعتين خالت بصف رجليه ....

‎صح الغرفة دافية  ...بس تبقى رجليه ثلج ليش مااعرف ...

‎وكنت اراقب واتابع حركة الناس طابة طالع للفندق ....

‎او اخابر اهلي وخصوصا امي

‎جنت  كلش مشتاقتلها وجنت اتمنى تكلي رجعي ....

‎بس حتى الوضع ببغداد ديسوء بعد اكثر....

‎وحتى لو رجعت شسوي هناك ...هم اكعد ابني خياة جديدة مرة لخ وادور شغل ثاني واظل في قلق مستمر من اهل المرحوم ؟!!

‎المهم

‎بدت تقل روحات وجيات حيدر على غرفتي اصلا حتى بدت تختفي ...وصاروا من يريدون شغلة من مكتبنا لو يخابروني لو يدزون  هيثم عليه...

‎ومجان يحجي باي شي وحتى شقاه هو والولد ويايه ابد مو مثل قبل ...

‎بالبداية جنت اتصور حيدر يتعيقل عليه ويبيع ثگل ...ويعزز نفسه ...

‎بس بعدين  كمت اشوفه شكله شوية بدى يتغير ...مايتشاقه ومايضحك وتعبان ...

‎زمن حسيت  معاملتهم اليه تغيرت  ...كمت حتى ماانزل يمهم ...

‎واتخيلوا شلون ضوجة محبوسه فوك

‎كمت حتى  ماطلع من غرفتي ...

‎وقبل راس السنة بيوم ...

‎من داانزل للمكتب جوة

‎ شفت عصابة الصيانة متجمعين ويضحكون كبال الريسبشن ...

‎...حسيت اكو شي ..

‎بقيت كاعده ..بحجة اكمل شغل بالقاعة حتى ارصدهم الا ان صارت سنطة طلعت شفتهم يباعون وصافنين على الموظفة جديدة ...

‎اني من شفتها صفنت عليها ...جانت لعابة ...طويله كلش اطول مني بشبرين  يمكن وشعرها اشكر شكار فاتح كلش طويل للخصر وعيونها زرك وبيضه ثلج ...مااحجيلكم والله شكل لعابة ولابسة تنورة فوك الركبة وجواريب شفافة وهي متروسة من جوة...

‎مااحجيلكم صارت حادث وحديث الفندق حتى النزلاء يبقون باللوبي صافنين عليها ...وانكليزيتها بطلاقة عود اني فرحانه جنت من جميلات الموظفات بالفندق

‎ خلي اختل احسنلي ...

‎بالبداية اتوقعتها روسية بس لا والله طلعت عراقية اب وام شلون مااعرف

‎ويكولون جانت تدرس بعمان ومحصله شهادتها مناك  وصاحب الفندق بنفسه متعاقد وياها طبعا مديرة بس ياقسم مجنت اعرف لانه المدراء كلهم رياجيل ومن النوع القدماء وكبار بالعمر....

‎صدت للطابق الثاني حتى اراقب حيدر اشوف هم يباوع عليها لو لا!

‎والطابق الثاني جان.مثل قاعة مفتوحة وانيقة كلش  مرتبطة بالبهو جوة بدرج كلش حلو عريض ومفروش واللبلاب مغطي الحواف كلها للنهاية اضافة الى الورد والنباتات بكل مكان داير مدايرة جنت دااشرب كهوة و صافنة عليه ...

‎ولمحت حيدر وجماعته وكلش ضجت من شفته ديباوع عليها صح جان مو مثلهم يعني ضايج بس هم مشارك ...

‎فظليت عيني عليه ...الى ان هو انتبهلي باوع ودنك وراح لا حجى ولا كال ...بس نظرته جانت حزينة كلش... وبيها حقد وانزعاج مني ..

‎اكلني گلبي عليه و

‎ساعتها فكرت سارة ماتكونين ظلمتيه او جرحتيه ؟!!

‎ بدون ماتحسين ...؟ظليت احجي ويه روحي وانتظر بلكت اشوفه  بس

‎وراها بعد مابين يمكن طلع للبيت...

‎وظليت وحدي...ووسط زحمة الناس وضحكاتهم ...

‎وهوستهم وخبصتهم بالاحتفالية ...اني غركت بقهري وهمي ...

‎كلش كرهت نفسي

‎مااعرف حظي اللي يقودني الى هيجي انفاق لو تصرفاتي لو عقلي الاحمق المتهور !!

‎رجعت للبيت وحتى غدا ماتغديت ...

‎شربت حبايتين لالم راسي  وطمرت وجهي بالمخدة ونمت وماكعدت الا على صوت الصعاديات والهوسة برة ...لفيت روحي بالبطانية وطلعت شفت صباح كاعدة وحدها على التلفزيون وبصفها الصوبة دحست رجلي ...بصفها وكعدت ...فهي خطية عايدتني على سنة جديدة ....

‎ضحكت كتلها مبينة من اولها ...

‎مااحجيلكم ظليت مخنوكة ومتضايقة ...يمكن صارت بيه عقدة نفسية...صرت اكره الاعياد والمناسبات وحتى الاحتفالات وخصوصا من يكولولي يوم زواجج ان شاء الله لا والاحلى شكلج ماراح تتزوجين يوم نشوفج على جبل عرفات ...

‎بعينكم ان شاء الله ...

‎كمت اتجنب المناسبات ومااخابر اي احد فالكل زعلان عليه ومن هنا تطلع كلمة متعقدة عليه

‎ اي انتوا عقدوتني بحجيكم وتصرفاتكم والا  اني عايشة طبيعي مابيه شي ...

‎اوف صرت عصبية وحقدت على حيدر حيل ...كلت كل الناس تحتفل الا اني محروك دمي ...

‎كمت دزيتله مسج ساعة وحدة بالليل جانت يمكن...

‎خاطبته بنفس اسلوبه ...

‎كتبتله ...وهل هذا العام يكون احلى بدوني !!

‎كنت انتظر كلماتك تهنيني...

‎مااحجيلكم ساعة اكتب وامسح ...

‎ليش عقلي مايشتغل بهيجي مواقف...مااعرف صدك انثول

‎ووراها ظليت انتظر جوابه كل شويه افتح التلفون اخاف واصل شي ومسامعته ماكو ....

‎مجاوبني ...

‎جنت اتمنى يخابرني .....ردت بس اسمع صوته...

‎شويه يبرد گلبي مو علمودة علمودي اني ...

‎ظليت انتظر وصباح تكلي خابريه انتي شوفيه لحي عليه فهميه اللي صار ... لاتتعيقلين ...

‎بس مكدرت مااعرف ليش جنت كلش جبانه ...

‎ثاني يوم رحت للدوام بالكوة ...اتفقنا احنى البنات نلبس اي شي احمر قبل راس السنة وبعدها بيوم فلبست تنورة وحيدة عندي سودة قصيرة وقميص اسود وجاكيته قصير حمرة ولبست فوكاهم كوت اسود لانه الجاكيته مو ثخينة حتى لا ابرد ...وحطيت العطر الوحيد الباقي عندي ...شانيل الور ...مجنت استغني عنه

‎وطبعا شجعتني صباح احط مكياج قوي مثل ايام  قبل ايام مجنت فرحانه بروحي ...وكعدت ارسم نفسي بس المشكله جانت عيوني مورمة...وشكلي كلش مرهق مانمت زين ..المهم كلت اكمل مكياجي هناك

‎ومن وصلت  بقينا نتعايد اني والبنات ...على السمة الجديدة

‎فمن شفت حيدر اجى كمت اسلم على الموظفين همين  واضحك واتشاقه وياهم

‎ بالبداية جان على اساس ممهتم بعدين ظل صافن عليه لانه مجانت من عوايدي اضحك واتشاقه واطوخ بالضحك ويه الشباب  ...

‎باوع عليه شزرا وراح...

‎وراها صعدت بغرفتي انقهرت عليه لانه مجان امبدل ولا مرتب روحه على عكس البقية ...

‎كلت خلي انزل جوة اشوفه بلكت يجي يحجي ويايه

‎وفعلاالتقينا  بالمصعدوراسا وكف كبالي وانطاني ظهره ...جنا بس وحدنا ...ردت احجي وياه مكدرت ولا هو عبرني بكلمه ...

‎فظليت افر بدماغي اسويلي فد حركة  ...حتى هو يندك بيه بس ماكو لبسني لبسة تمام...

‎وظلينا على عالحال يمكن اسبوع واكثر ....

‎بصراحة مجنت اعرف نفسي متعلقة بيه لهالدرجة حسيت بفراغ عدم وجوده مع انه مجانت علاقتنا قوية كلش قبلها يمكن بس نظرات وكم كلمة منا ومناك

‎ بس يمكن لانه اصلا ماعندي شي ثاني انشغل بيه ....ومن صار الموقف لحد هذاك اليوم اني جنت ماانزل الا على الشغل واصعد وحتى شغلي قليل......

‎والوحدةاكيد لعبت دور

‎وكمت افكر يوميه واسرح بخطط وسوالف الافلام المصرية شلون اسوي موقف اخليه يركض عليه

‎خطر على بالي اعثر كدامه على الدرج وهو يلزمني ونتصالح او بالمصعد اتخربط وهو يصحيني ههههههه خيال جامح جان عندي

‎ وكاعده اخطط ساعة وارزل نفسي ساعة شدعوا هيجي كتلت روحي خواصبري اذا صدك يحبج  هو يجي يصالحج وهكذا جنت في صراع نفسي حقير

‎واللي صار بعد كم يوم جنت دااصلح بوحدة من كيسات الحاسبة جوة بالقاعة وجانت اكو ريحة كلش قوية ريحة وخمة ففتحت الشباك شويه يتغير الهوا ومااعرف شلون دنكت ومن كمت ضربت راسي بحافة الشباك ...

‎دخت وماعت روحي ومن دااكوم جريت البردة وكعت بس همزين موكعت عليه واذتني بس بوكتها حافة الشباك زرفت راسي وحتى شويه طلع دم ...

‎بي البردة من وكعت طلعت صوت قوي  اجاني على اثرها  واحد من العمال يشوف شنو بس اني حاولت ابين انه ماكو شي ...والموضوع هين ...

‎فصاح على بنية اسمها رسل...لزمت راسي ووطلعنا للغرفة كلهم ركضوا عليه ديشوفون  شكو الا هو ...بقى واكف ماتحرك ...

‎متت من قهري هذا شبيه شدعوة شسويتله ...هو هذا هم حب؟!!

‎عاعظي راسا ركبت سيارتي للبيت ومداومت ثاني يوم مع انه جان ماكو شي واصلا الورم راح ...بس خليت لزكة صغيرة ماتبين جوة شعري وحتى مكلت لصباح عليها ..

‎اني ردت امثل اوكع اشو هاي صارت صدك والخيبة الاقوى هو مدارلي بال

‎جنت ضايجة من نفسي وكتها

‎وكلت كله صوجج سارة  انطيتي لحيدر حجم اكبر منه ...

‎فقررت خلص امحيه من حياتي وبعد ماافكر بيه نهائيا

‎وراها داومت وقررت بعد البسه ولو يموت مااحجي ويله ...

‎والله وهيجي يومين ...اتذكر صعدت فوك ورة الغدا وكعدت دااشرب جاي جانت الدنيا باردة ودتمطر من البارحة حتى السما صار لونها رمادي ولايبين اكو شمس ...وظهرية  الجو كله جان  كئيب هيج مشاعري  خلاني ابجي  ...وسديت الباب وظليت اشهك طلعت قهري كله.. ..

‎وشويه جان يجي هيثم ...اخذ كيبل من الحاسبات الي بالغرفة.....فمن رديت سلامه حس بصوتي اكو شي

‎ماكو وراها بشي عشر دقايق ...

‎جنت حاطة ايديه بجيوب الكوت ودايرة الكرسي على الشباك ..ومادة راسي ليورة وادطك اطك بكعب حذائي برجل الكرسي ...سمعة دكة خفيفة على الباب ماانداريت كلت هم واحد من الولد جاي ياخذ شي ومردت احد يشوفني ابجي

‎فدك مرة لخ ...انداريت جان حيدر واكف ...ومبتسم ورافع تك حاجبه اليسرة ....

‎ابتسم كلي ....يكلون محد مغديج اليوم ...

‎وظل واكف على الباب ومنتجي ايده على اليده مالتها ...

‎شوفوا شكد جنت متلهفة عليه ومابقت وسيله مردت اسويها حتى يجي يحجي ويايه ...

‎بس من اجى گلبت خلقتي ليش مااعرف

‎كتله خير استاذ حيدر اكدر اساعدك بشي ...

‎فجاوبني وهو يتقدم خطوتين ...عيونج حمرة

‎ ليش جنتي تبجين اخاف الضربه مال اول بارحة لساها  توجعج ...

‎بكلبي ردت اكله ياريت على هاي الضربه هينه الا على الوكت والدنيا اللي داكه بيه ضرب

‎كتله لا بس تعبانه ومشتاقة لاهلي

‎فهوا استغرب كلي اهلج ؟!

‎ليش وينهم ؟!!

‎رديت عليه همه ببغداد  رايد شي ؟!!

‎كلي لا واللهةتدرين عبالي ماعندج احد بس عمج ؟!

‎فاني ضحكت ....كتله ليش يعني شلون خمنت ههههه

‎مو مسامعج تحجين عنهم ابد ...

‎لا والله احجي عنهم بس انت ممنتبه ....

‎فجان يكعد على اول كرسي قريب من الباب

‎ماتصدكون شنو حسيت ساعتها ..صدك جنت مشتاقتله واني كوة جنت  اكابر

‎فكلي ليش لعد عايفتهم وجايه هنا ....

‎جاوبته هاي قصة طويله بس الظاهر انت كلشي ماتعرف عني حيدر

‎عاد هو اقترب من الشباك اللي بظهري ...فاني شويه سحبت روحي بالكرسي ورحت ليغاد هو ظل صافن على الجو جان يكول شلون جو كئيب اليوم ...

‎تعرفين اني من اول يوم انت دخلت للفندق وداومتي ...جنت دااصلح بالدكنة مال الثريا بصف الباب ...لساني اتذكر دهلتي مبتسمه وتمشين ورة كاكه حمه

‎اول ماشفتج كلت يارب تكون هاي من نصيبي والله مااعرف ليس وشلون هيجي راسا مع انه اني مفكر بمواصفات البنية الي ارتبط بيها غير شكل عنج تماما ...

‎فضحكت كتله شلون يعني

‎كلي الصراحة غير انت هوايه احلى مما جنت راسمه بخيالي لذلك هوايه ترددت يله قررت افاتحج بالموضوع اني ظروفي صعبة شويه ...

‎بس اللي اريدج تعرفيه الله بسماه وبهاي الساعة اني احبج واريدج تكونين رفيقة دربي بالحياة ...اذا قبلت بيه وبظروفي واندار وباوع عليه

‎ولحد الان مااعرف وخايف لا اكون مو ابالج بس اللي شجعني شويه وخلاني ارجع واحجي وياج بالموضوع مرة لخ من شفتج حزينة الايام الي فاتت مثلي .. كلت يمكن اني فهمتها غلط ...

‎اني صفنت بعد معرفت شجاوبه  ...

‎ردت اساله عن ظروفه .وردت احجيله عن ظروفي مطلع من حلكي شي

‎فاجى على بالي اكله عن المسج اللي دزيتها اله براس السنة ومجاوبني عليها...

‎هنا ضحك كلي والله جنت نايم والصبح يله قريتها ...ومعرفت شكتب خفت لاجاوبج  واتندم على كلامي فسكتت...

‎لانه جنت كلش مقهور ..

‎لاتزعلين مني ها...

‎وهنا رجعت سالته  كتله وشتعرف عني ...

‎حيدر مااعتقد تعرف عني سي ...

‎على الاقل تعرف شكد فرق العمر بيناتنه

‎الصراحة جان هذا السؤال  اكبر همي وردت اتاكد انه يعرف بيه

‎كلي سارة مايهمني فرق العمر ولا مفكر بيه ولا اريدج انت هم تفكرين بيه نهائيا طلعيها من بالج هاي الحجاية

‎اللي اريد اعرفه انت بالجنسية متزوجة ...

‎ومممتزوجة شلون هاي ؟؟؟

‎اتبلعمت وكوة طلعت مني الحجاية

‎كتله لانه ارملة ...ومن كتلوا زوجي الله يرحمه اهله مانطوني شهادة وفاة ...فعفت الموضوع كله ومغيرت الجنسية ...

‎سكت وماحجى ظل يباوع على الشباك واخذ صفنة طويله ...

‎خفت لا ياثر هذا الموضوع عليه ...

‎بعدين اندار عليه كال الله يرحمه ...

‎هم مايهمني هذا الشي....

‎بس ساعتها حسيت صفنته طولت سنة مودقايق...

‎وحتى اكسر الصمت بديت احجيله عن اهلي

‎كتله والدي مهندس ...وعنده شركة مقاولات...وووالدتي طبيبة نسائية ...

‎فهو ابتسم كلي لا تتشاقين !!!!

‎فاني ضحكت لانه شفت اندهش ...

‎كتله وليش يعني ؟!!

‎فهو علق بس لا خالج يطلع وزير هههههههه

‎كتله لا والله ماعدنا احد بالدولة بس ولد خالتي الصغار  الاثنين بالجيش حتى مااعرف شنو رتبهم ...

‎واختي مسرة بالمانيا دتدرس هي وزوجها وسرمد اخويه الوحيد بلبنان يدرس ...واني هنا باربيل اشتغل وعايشة ويه عمي ...

‎اشو هذا  استغرب جان يكول ماشاء الله لعد ايست اني ...ضحك ورجع كعد على الكرسي اللي جان كاعد عايه ...

‎كلي سارة شغلتنا تعبت من هسه هههههه

‎اني هم على ضحكه ضحكت ...

‎فدنك ولعب باظافيره وورجع سالني انت كمبدا تقبلين بيه ؟!!

‎قصدي تميلين اليه تريديني هيجي يعني ...

‎واذا عرفت ظروفي ورفضتيني اعذرج لانه حقيقة كنت متصورج مطلقة وماعدها احد وعايشة ويه اهلها اللي هو بس عمها ...

‎كتله شبيك حيدر ...ليش هيجي تحجي شبيها ظروفك ....

‎كلي اخابرج اليوم بالليل واحجيلج ...

‎فاني راسا صحت ...عفية لا احجي هسه ماردته يطلع من الغرفة مكسور الخاطر..

‎كتله حيدر ترة اخر مرة من كتلك الصدك لا ترة اني قصدي ..

‎قاطعني كلي اعرف قصدج...

‎ولاتفحين الموضوع عيونج ونظراتج صلحت كلشي

‎بس شوفي اني ...

‎شلون احجيها...

‎احنى عائلة اثنين ولد واثنين بنات ..

‎ابويه استشهد بال٨٨ جان عمري خمس سنين واختي الصغيرة عمرها تلاث شهور يعني حتى اب مشافت

‎بروازمن_ورد

24

‎حيدر صعدلي بيومها واجى يحجي ويايه مرة لخ وبين ما كان يحجن عن ظروفه واهله ...

‎اجى كاكه حمه...وقطع كلامنا ...

‎طبعا ماارتاح لكعدتنا سوى فراسا كلي انت كاعده هنا وكومة شغل جوة وانت حيدر كاكه سردار ديدور عليك يريدك بشغل ...

‎كلش انحرجنا ...وركض طلعنا من الغرفة ... حيدر باوعلي وابتسم دزلي مسج كلي اول ماتوصلين البيت خابريني ..

‎واني هم مكذبت خبر اول ماخلص الدوام ركضت للبيت ركض ...

‎غسلت وبدلت صبيت غدا وكعدت بغرفتي عمي جان كاعد بالصالة وصباح طالعة هي ورياض مااعرف وين ...

‎جبت الماعون وخليته بحضني ...وراسا خابرته ...ردت اعرف شيكمل عن اهله وظروفه ..فاول مرد كلي ها عيوني شبالعجل وصلتي ...غير فشله ...هههه

‎كتله من زمان اني هنا ...

‎بس هو جان بعده مواصل ...وكلي بس يوصل يغسل ويخابرني ...

‎وصدك ماكو ربع ساعة وخابر سمعته يصيح على اخته تجيبله الاكل ليفوك ...فسالني خوما اتضايق من تلفونه او انحرج منه كتله لا عادي ورجع

‎ديسولف واني انتظر على نار اريده يحجي ...كلي ها يروحي  وين وصلنا ...

‎كتله شبالعجل صرت روحك؟!!

‎ضحك كلي وحبيبتي هم

‎فجاوبته امممم بسرعه هيجي صرت روحك وحبيبتك من اول تلفون

‎كلي لا والله من اول ماسلمت عليه تتذكرين يم المصعد

‎صدتيني بهال الحجايتين ...

‎واني متاكد انت هم تحبيني

‎كتله لا لاتكون متاكد كلش من روحك كلي ها هيجي 

‎ خوش لعد خلي نتراهن خلال عشرة ايام لا اسبوع اذا ماخابرتيني وكتيلي حبيبي اني مو حيدر

‎ضحكت كتله مستحيل

‎رجع وكلي يله تقبلين   نتراهن ؟!

‎كتله الرهن حرام

‎هو غلس فكال اذا فزت تخليني ابوس ايدج واذا خصرت ...ابسط هيثم الجحش كدامج ههههههه

‎ضحكت وكتله خوش رهان  قابله اني ....

‎ظلينا شويه ساكتين جان يكلي وين وصلنا وكاكه حمه قاطعنا

‎صدك بعد مااصعد فوك اخاف هذا يشد وياج من ورايه معجبني  اسلوبه من حجى وياج ...

‎كتله اي والله اني هم ردت اكلك هيجي ...

‎كلي اي وين وصلنا !! بعد بالحجي

‎مجاوبت انتظرته هو يحجي فكمل كال

‎  ها خلي احجيلج عن ظروفي بالاول وكلشي يكون واضح ...

‎ليش تكولين كذب عليه لو ضم عليه شي ....

‎فبدى يحجي عن اهله مرة لخ اضافة الى انه ابو استشهد بال٨٨ وهمه اربعه ...من استشهد ابوهم اخته الجبيرة هدى جان عمرها دعش سنه وذكر اخوه محمد الله يرحمه جان تسع سنين وكلي سارة اني من راح ابويه جان عمري خمس سنين حتى مااتذكر شكله زين واختي رشا جانت بس تلاث شهور ...

‎واتخيلي شلون تعيش عائلة بلا اب ...الحكومة انطتنا بيت بحي الجامعة وحصلنا  ورث من اهل امي فاشتر ينا  الكاع اللي بصفها وكبرنا  البيت ....

‎وهسه هو نفسه اجرناه وكعدنا هنا هم ايجار بس تبقى ورقتين تلاثه تروح لامي مصرفها فرق الايجار بين البيتين ...

‎بايام الحصار حالتنا تعبت بعد راتب ابويه مايكفي فمحمد بطل من المدرسة وكام يشتغل ويه عمامي مرة ويه خوالي مرات  وجانوا يساعدونا هوايه ...

‎بال٩٣ اتزوجت اختي الجبيرة هدى من سردار...فاني اتفاجات كتله بعدها صغيرة وسردار مبين هوايه جبير كلي اي فرق بيناتهم ١٧ سنة اهله جانو جيرانه وبعد امي انطتها وهي هم جانت قابله والحمد لله سرادار خوش سردار..

‎وبقى اخوية محمد يتكفل بينا وبمصاريفنا بشغله تعرفين طفل مايجيب هواية وجنت اني هم اروح اساعده بالعطلة

‎بس  امي ماقبلت ابطل لانه جنت كلش شاطر ...

‎الا ان كونا نفسنا ومحمد كدر يتزوج بالفين وثمانية بنية هم كرايبنا بس من بعيد...

‎وصارت عنده بنية تمارة توته جان عمرها سنة وابوها استشهد بانفجارسيارة بالسوك .. الله يرحمه  وزوجته امها يعني اتزوجت العام وعافت البنية يمنا ...رجلها مرادها وياها وطبعا احنى هم مقبلنا لحمنا يصير يم غريب ...وهسه هي عمرها توها تلاث سنوات ..

‎كتله معقولة حيدر امها عافتها تلاث سنين ...كلي اي معقولة اهلها جبروها واحنى خوما نعوفها لاهلهالا والله ...مستحيل هاي بت الغالي ...اني جبتها يمي واتكفل اربيها لاخر يوم بعمري

‎وعندي رشا اخر العنقود ...كتلج هي انحرمت من حنان الاب حالها حالي ...اصلا ماتعرف شنو ابو ...

‎من جانت صغيرة بحرب الواحد وتسعين عمرها تقريبا تلاث سنوات ونص بكد توتة يعني هسه هيجي شي

‎جانت تلعب يم شباك الصالة مال بيتنا ووكع صاروخ قريب علينا فلش الجامات كلها بس ربج ستر جانت امي مخليه بردات ثخان مال شتا فيعني مااتذت حيل بس كم شظيه جرحتها وللاسف فقدت سمعها باذنها اليمنى ...

‎وهنا نصى صوته شويه ...وكال هسه هي بيها حاله نفسيه عصبية من تتعصب يصير بيها مثل الصرع تجمد نفسها وتتخربط ...خطية مو بيدها حاولنا نعالجها سنين بس مفاد ...صارت بيها مثل الفزة خرعة مااعرف وتجيها

‎بس من تصير عصبيه والا هي ممبين عليها شي . .

‎وكلش فقيرة وبحالها ...

‎و صارلها سنتين من اتخرجت من كلية التربية ...وهسه تشتغل معلمة عربي بمدرسة اهليه

‎القصد اريد اوصلج فكرة امي الله يطول بعمرها واختي رشا والصغيرة توته هذوله بركبتي مستحيل اتخلى عنهم ...وويايه وين مااروح...

‎لانه مثل ماعرفتي مااكدر اعوفهم ...ولاهمه يكدرون يعيشون بدوني ...

‎وحتى لو نزوج ان شاء الله اذا وافقت طبعا حنكعد فوك عندي الطابق الثاني كله اليه ...مجهز وكامل ناقصه بس العروسه

‎واهلي كلش فقرة وانت راح تحكمين من تعرفيهم ...

‎واني عايش على راتب الفندق ومرات العصرية اروح يم صديقي دلشاد اصلح كم حاجة اله واطلع كم فلس منا مناك والحمد لله مستورة ...

‎ها وكلما اتذكر شي اكوله الج خوش!!

‎اني وكتها دخت وماعرفت شحجي وشجاوب ...شغلة اهله بركبته صفنتي شويه وهو جان كلش ذكي راسا اترخص وكلي صار عندي شغلة هسه اروح اعوفج اتفكرين وباجر نلتقي ...

‎مع السلامة ...

‎سديت التلفون

‎لميت رجليه على بطني وظليت أفكر عود ليش لازم كل واحد يجيني الا  بيه فد شغله ؟!!

‎يعني ليش الا بيها انه ...

‎شويه وجتي صباح ظليت الوب اريد احجيلها بس هي جانت ملتهيه بعمي وجانت دتسوي عشى ...

‎صفنت عليها

‎كلت سبحان الله كل واحد حياته شكل شوف هاي البنية اكبر مني بسنة وحلوة مناقصها شي  بس  مع ذلك اتزوجت عمي واللي هو حتى اكبر من ابويه ورضت بيه وفوكاها متزوج وعنده كومة جهال انوب مرته لعبت بيها طوبه ومن طلكها وراد يرجعها راساهم  قبلت  خطية ...وفوكها صارلها سنتين تداري عمي بالكرسي اشافت من حياتها هذه!!!

‎فاجى على بالي اسالها انت سعيدة صباح بحياتج هذه ...

‎ابتسمت كالت الحمد لله ليش مو سعيدة اهم شي خلصت من ليلى ومشاكلها ... ههههه...

‎كتلها يعني مجنت تتمنين تاخذين واحد احسن ...

‎كالت سارة الاحسن هم يريد وحده مثله ...

‎اني شعندي لاشهادة ولا مال وهاي شويه عيوني حلوات اجذب على روحي !!

‎اشو حتى اهل ماكو اخوية مصدك عمج دك الباب كله كبعها بعبايتها واخذها

‎خو من اطلكت

‎الله لايشوفج الويل اللي شفته اني وريوضي ويه مرة صلاح اخويه ...والله شعوطتني وكلوطتني ...

‎بعدين اندارت عليه كالت اكلج سويتي علمود شغلة حيدروي ...

‎كتلها والله اريد احجي وياج بهذا الموضوع طلعت مستجدات طيرت دماغي...بس كملي شغلج ونسولف جوة بغرفتي

‎اني هم مثل كل يوم درست رياض وقريته وكملت واجباته واتعشوا ونام ....جريتها لغرفتي وعفنا عمي وحده

‎حجيتلها على ظروفه ووضعيته وسالتها عن رايها..

‎كالتلي انت شنو رايج ...

‎والله ساعتها مجنت اعرف شكول اوافق اخاف اتورط ارفض اخاف اتندم

‎كالت سارة راح احجي شي مو تزعلين مني وتاخذين على خاطرج

‎كتلها احجي يامعودة بلكت كلامج يريحني...

‎كالت خيه انت من زمان واسمع بيج فلان خطبج وعلان رادج وانت ماتقبلين بكل واحد طلعتي بيه لوله ...

‎واخاف نسيتي اذكرج من رفضتي فلان جانت علمود شهادته واخذت المرحوم بلا شهادة

‎ورفضت علان علمود موحلو وبخيل وانوب ولحد ذاك اليوم بجيتي على رافد اتندمتي مااخذتي ...وهم جانت علمود شغلة قديمة والمرحوم لو جان عايش جان الله يعلم شلعب بيج جولة. ..

‎فياحبيبة ماكو واحد كامل كل واحد واله ظروفه وطبعه عاد تبقى انت اذا اتحبيه اقبلي ولاترفضين ترة ماكو واحد بلايه اهل وانت وحظج اذا زينين لو تعيشين بنصهم ماتهتمين واذا موزينين لو تروحين ال اخر الدنيا اذاهم ماتخلصين منه والا نسيتي ليش ليهسا ماتكدرين تعيشين ببغداد؟!!

‎خية فكري زين هذا زواج ويمكن اخر قسمة الج اذا قبلت

‎وارجع اكول اذا تحبيه وقررت ترفضيه خليها في بالج تكدرين تعيشين بلاياه لو لا؟! مو ظلين اتنوحين عليه  واذا ماتحبيه لاتشلعين گلبه كل واحد يروح لحاله احسن

‎واني هماتين اشوف لو تاخذين رأي كوثر ومسرة هم يكون افضل حتى لابوج كوليله شوفي شيكول ...

‎بس مدام هو رايدج وراضي بيج وبظروفج ليش لا !

‎يجوز ربج دزه رحمه منو يعرف؟!! ولاتنسين معظم النسوان عدهن مشاكل ويه العيال ...لا انت اول ولا اخر وحدة ليش تخسرين الرجال منج وهو هياته واضح وصريح وياج؟!

‎هو شوكت اكلج انطيني رد ؟!!

‎كتلها والله كال فكري براحتج وشوكت متردين اني منتظرج وحتى لو رفضتي تبقين صديقة عزيزة ....

‎اني هم صفنت على كلامها وظليت افر بيه براسي

‎هم بيه وجهة نظر وفكرت اخابر امي ومسرة باجر لانه هم اتاخر الوقت وهم يله لازم احضرنفسي للدوام ...

‎ثاني يم الصبح اول مافتت شفت حيدر واكف ويه هاي البنية الشكرة الحلوة  نادين ...

‎ صدك ضجت من شفته وياها شبت بيه نار واحتركت ...

‎صعدت ركض وكمت اضرب دكمة المصعد حيل...هو انتبه عليه خابرني راسا

‎كلي صباح الخير حبيبي

‎كتله صباح النور من ورة خشمي

‎فكلي شبيج معصبة من الصبح 

‎كتله ماكو بس شفتك ويه هاي العوبه نادين دتتمضحكون طبعا اضوج شعندك وياها؟!!

‎كلي والله ماعندي شي شبيج انت ...

‎كتله اني شفتها شلون تباوعك عليك !

‎كلي من كل عقلج بابا شتباوع عليه ...

‎بابا هاي تدور ثگيل بحالي هي هههه والله انت بطرانه

‎كتله دتور ثگيل شنو مافهمت

‎لاتفهمين احسن ...

‎شلونج انت اليوم طالعة تخبلين ...

‎كتله معرفتك والله شعجب طلعت منك حجايه حلوة ...

‎فضحك كلي حروح اني وهسه نشوف منو اللي ماتطلع منه الحجايات الحلوة ...

‎فدوة اروح لطولك اني اليوم حبي يغار عليه !!!

‎كتله لاعيني لا مو اغار ولاشي لايروح بالك بعيد بس حبيت اضوجك مثل ماتضوجني كل مرة ...

‎عافني وراح ظليت افكر بهاي الكلمة ادور ثگيل شن و معناها يعني هشكل هيجي يصنفون البنات ؟!!

‎واني شدور بله ؟!!!

‎صدك دخت بيها وغثتني حيل المهم

‎وراها صارت بالدعش تقريبا خابرت امي دااحجيلها واخذ رأيها شفتها ضايجة ومهمومة ...

‎بعدين عرفت هي تريد تروح لبيروت ورة سرمد ابويه كم مرة صاير يتعارك وياه

‎كلما يخابر ه يلكاه طالع يفتر

‎فهو مغصب عليه وكايله اني دازك وصارف عليك كومة فلوس مو حتى تتونس وتسخت حتى تدرس وتجيب شهادة اذا انت مو كدها ارجع وفضها ....

‎وهم جانت شايله هم بيبتي مريضة خطية حسيتها تعبانه ومحتارة فمحجيتلها ولا تعبتها بالزايد كلت اخذ رأيي مسرة احسن بالليل من ارجع اخابرها 

‎وصدك خابرتها ...

‎فتحلي سدير حبيبي وسلم عليه وانتبهت عليه ياروحي كبران ومتغير سبحان الله هاي يصيرلهم خمس سنين من عافونا ...

‎صاير شاب وبطول امه صدقة لطوله ...

‎بس شنو مسرة من حجيتلها گلبت الدنيا عليه ...ماقبلت بيه ورزلتني وانت شكو تقبلين بهيجي واحد ظروفه مخربطة وراح تنربطين طول عمرج بيهم باهله يعني  وعمرج مايكون الج بيت ومستقبل  انت ماقبلت باللي احسن منه هذا ليش دتقبلين بيه؟!!!!

‎انقهرت من حجي مسرة وضوجتني لحت هواية سديته وعفته ...

‎رجعت افكر اذا صدك اني اريده لو لا؟!!

‎وبكل الاحوال صباح كالت اتوصي وحدة من صديقاتها كاعدة بنفس منطقة اهل حيدر تسال عنهم شوف شيكول

‎بس الغريبة انه ورة كم يوم حسيت بسردار متنك عليه ومعصب ويحجي وسايه بعصبية ...

‎اتفاجاءت من تصرفه واستحيت احجي لحيدر عنه الى ان افتهمت انه هو رافض حيدريتقدملي ومحرك زوجته اخته على امه ويمكن حتى حاجين عليه مو زين!!!!!

‎بروازمن_ورد

25

‎صارلنا عشرة ايام من اجى حيدر حجى ويايه وطلب ايدي....

‎واني لحد الان مكنت منطيته جواب اولا لانه فعلا جنت قلقة من الموافقة  والسبب الثاني اصلا هو كلش اتغير ...

‎صاير عصبي وروحه بخشمه ...وحتى مايخابرني مثل قبل ...

‎ومثل ماتعرفون ماكو حجاية تنضم طشت ووصلتني انه اهله مقابلين ..

‎واني هم اعذرهم ...يعني لو اخويه شاب ومامتزوج يجي يكلنا اريد اخذ ارملة واكبر منه اربع سنوات هم بيها صفنة واعتراض ...

‎فكلش اتقبلت انسحابه ...

‎بذاك اليوم بالذات جانت الدنيا باردة بشكل مو طبيعي صقيع يبس عظامي وصبحت الم براسي خفت لا الشقيقة تهيج عليه حتى واني اشغل السيارة اترددت اداوم ردت ابقى دفيانه بفراشي ...

‎ومن وصلت للفندق ركضت نمت على الصوبة اللي بغرفتي ...حطيت راسي على الميز ولفيت رجليه بالشال ...جنت لابسة بوت عالي ..ومن صدك غفيت ...جانت سنطة وماكو احد الكل خاتل بغرفته ...

‎ومحسيت الا كاكه حمه ديدور بالغراض ففزيت على صوت الخشخشة ...

‎هو من شايفني نايمة محاجي ...

‎اعتذرت منه كتله الم براسي واني عندي شقيقة ... ويمكن بداية فلو ..

‎كلي طلعي للبيت ولاتسجلين اي شي مبين عليج تعبانه مصفرة حيل ...

‎كتله على ساعة ١٢ اطلع من دااحجي وياه دك عليه حيدر رفضته وسويته صامت

‎وراها اجوي الموظفين اللي ويايه بالغرفة كعدوا على الدفو مجان اكوذاك  الشغل

‎يعني مو موسم

‎فكعدنا بالغرفة ..ومشغلين تدفئة ...ودنشرب جاي

‎دزيت مسج لحيدر ورة ملح بالتلفون كتله كاعدين يمي مااكدر احجي وياك وبصراحة مردت احرك روحي ...واطلع برة الغرفة حتى اخابره

‎شويه وجتي رسل ...تذكروها البنية اللي ضمدتلي جرح الضربة مال الشباك من يومها قوت علاقتي بيها هي جانت تشتغل تجيك الغرف ورة ماتتنظف من العاملان  وزوجها هم يشتغل بالمطبخ الكل يحبوها وعدهم ميانه ...

‎الفندق بشكل عام دافي بس مشكلتنا الطابق الفوك لا والله بارد كلش كم مرة يصلحون الهيترات والبواري مايفيد ...مااعرف ليش

‎جتي للغرفة كالت الله شكد دافية ...اكعد يمكم اكو جاي ؟!!

‎الولد كاللوها يمعودة على بختج مية هلا وخطية واحد بيهم سوالها جاي وجابه

‎وجتي كعدت يمي من شافتني مادة راسي على الميز ....

‎ظلت تسولف اني عرفت هي عدها حجايه لانه مرات جانت تنقلي الحجي الي يصير بغرفة الصيانه ...

‎جانت تكلي عبالي مريضة علمود الحجاية ...الاخيرة

‎اني سكتت سويت نفسي اعرف

‎ كتلها اي والله كلش غثتني ...

‎كالت والقران  متستاهلين ...بس حيدر خوش اتصرف ولطه على حلكه

‎هنا كعدت   زين ...كتلها يا بهاي مااعرف

‎فهي اقتربت مني ولزكت حيل يم رجليه حتى الولد مايسمعون ...

‎جانت تكلي ماعرفتي لعد تلازم هو وسردار وظلوا الشباب يفاككون العركة وواحد يغلط على اللاخ شكد عيب ...

‎فعرفت الحجاية كبيرة وتخصني وسردار حاجي عليه ...

‎بس ردت اجرجرها الحجاية من عدها كانه اعرف ...

‎فكتلها شفتي اني يمه حواليه ...شكد حقير على هاي الحجاية

‎عاد هي كالت عود اللي يشوف سردار بصلاته خابصنه وبصيامه مايكول هذا هيجي يفكر ببنات العالم

‎كلش حصت من حجتها وكالت بنات العالم

‎كتلها ليش هم حجى غير شي

‎كالت لا بس هاي الحجاية من كايل لحيدر هاي مال تصادقها تتونس وياها فترة وتعوفها مو تروح تتزوجها ...هاي مال لعب

‎هي من كتلي ... هيجي اخاف جنت كوة فاتحة عيني انسدت حيل ...والله طلقة بنص گلبي صارت...

‎حسبي الله ونعم الوكيل بيك ياسردار ..

‎وظليت ادعي عليه وهي تهديني كتله ليش هو اشاف مني؟!!

‎اشو رايحة جاية بحالي !!

‎انووب  اريد اتنفس ماكو جسمي كام يرجف ...

‎كتلها احجيلي من البداية اني جنت سامعة غير شي

‎كالت لا والله مو قصدي انقل حجي لو اعرف ابد مااحجيلج ...

‎عزة شجاني وفتحت حلكي هسه حيدر يمسح بيه الكاع لو يعرف اني كلتلج

‎فتوسلت بيها يله حجت ..واللي فهمته انه سردار معير حيدر بمكتب الصيانة وكايله هاي الحجايتين

‎هو هم كامز عليه كله ماتحجي كلمة عليها وحتى الولد زعلانين من سردار ومعنفيه

‎وكوم حيدر قدم استقالتك ...بس الولد مقابلين على الموضوع وهسه الجو كله مشحون وطشت بالشغل كله اهل حيدر مقابلين بيه ...

‎سكتت ماحجيت ...ولا كدرت ابجي ...

‎مااعرف شسوي ظليت صافنة ...شبيها الناس والعالم هيجي مخافة الله راحت من نفوسهم !!!

‎ورجعت

‎فكرت بيه المسكين شنو ذنبه ينكطع رزقه ...ويقدم استقالته ببسببي وهو عائله شكبرها بركبته ...خلاص

‎اني هم ممقتنعة اصلا بالموضوع كتبتله مسج كتله ...

‎اني فاهمة وضعك ومقدرته واعرف سردار شكال وحجايته مو بس اذتني لا والله مو تتني ...

‎ماكول غير حسبي الله ونعم الوكيل بيه ...

‎انسى الموضوع وابقى بشغلك اني اللي حبطل ...

‎وكتلها لرسل تعالي وصليني للبارك  الشقيقة اتهيجت عندي ...

‎خفت لااتخربط بالطريق...وصلتني للكراج ورجعت وكوة بميت يالله وصلت للبيت وعيوني بعد من الدموع مكمت اشوف الشارع  ...

‎من طبيت ... خطية عمي جان توة يتريك ..بعد هو يتحرك ويسوي اكله وجايه وكهوته  بس حركته بطيئة تعرفون شلون يعني

‎كلي باباتي تتريكين ويايه تعالي جاي حار

‎شكلج مالج هلك راجعة من وكت ...

‎بوسته ...واعتذرت منه حتى مساعدته احميله الخبز لو اسويله شي

‎ بس نزعت تكرمون الحذاء وبهدومي نمت ورة مااخذت جرعة زايدة من علاجي...

‎ماكعدت الا على صوت صباح جايبة الصوبة النفطية للغرفة جانت الكهرباء مكطوعة والهيتر الكهربائي مدايشتغل على المولدة ....

‎موة فتحت عيني عليها بس لساني ثكيل ...صارلي تقريبا اربع ساعات على نومة وحده

‎هي حست انه اني مالي خلك كالت سويتلج سوب مال دجاج ترم عظمك على كولة المصريين ...

‎امج يوميه توصيني اسويلكم تشريب دجاج بالشتى تكول تفيد علمود الانفلونزا ..تعالي كوليلي

‎شبيج راسج هم يوجعج ؟!!

‎اشو تعاي اخاف دتصخنين !!

‎وصدك جانت حرارتي عاليه  فهي ضحكت كالت لج وخري البطانيات هسه تنشمرين هههه.....

‎كتلها اريد اشرب شي حلكي يابي

‎عاد جابتلي عصير برتقال وكعدت يم رجلي تسالني شبيج ظل بالي عليج كومة دكيت على تلفونج ماتردين؟!!

‎كتلها بجيب الكوت وناسيته صامت ...فكوة كمت غسلت وبدلت ...واتغديت شويه ارتاحيت ...

‎طلعت التلفون شي عشرين مكالمة ومسج من حيدر...

‎كعدت اقراه كم وحدة بالبداية يسال عني وبعدين عتب وراها عارف من رسل اني راجعة للبيت ...وتركتهم مكملت شمرت التلفون ....

‎ورجعت  جنت صفنت على الشباك والجو الكئيب البارد ...

‎اجى بخاطري الناس اللي ماعدها تدفى لو اليتامى منو يداريهم ...والله خطية هالناس شكد اكو مظلومين !!

‎وطبعا اني على كعدتي ماكمت حتى الجاي خطية جابته اليه صباح شربته بفراشي ...

‎ماكو على ساعة ستة اندك جرس الباب ...اتوقعت وحدة من صديقاتها دائما يجون علينا يكعدون شويه يسولفون ويروحون ...

‎بس اشو دااسمع صوت صباح تكول هله بيكم هلا عيني ...اتفضلوا

‎وراها جتيني ركض لج كومي هذا واحد يكول اني حيدر جايب امه واثنين ولد وياه ...

‎نصت صوته ...لج ماتعرفين جاي !!!

‎طبعا اني ظليت مخروعة

‎هااا لا والله مااعرف هذا منين اندل بيتنا وظليت صافنة بوجه صباح ...اخر شي كزت عليه لج هسه وكت صفنات كومي كعدي عمج وتعاي لما اسويلهم چاي ...

‎شعنده جاي هذا؟!!

‎اني هم افتر بالغرفة مثل الثولة مااعرف شسوي اخر شي بدلت على السريع وشلت شعري وخليت شويه كحل وحمرة ورحت على غرفة عمي جان متمدد و ديقرا كتاب ...

‎كتله عمي جونا خطار وصباح كالتي اخذك للصالة ...

‎كلي منو ؟!!

‎كتله والله عمو بعدني مشايفتهم بس يمكن جماعة ويايه بالدوام ...فدااكومه واعدله والبسه شحاطته جان يكول اي عمو  شكو بيها هله بيهم هله ...

‎واخذت عمي مستند عليه وهو اني اريد استند على واحد يمشيني  رجليه اطابقت مكمت اكدر امشي

‎دخلت كلهم ابتسمو بوجهي جان منصور وبصفه هيثم وحيدر وام حيدر كاعدين ...

‎الا حيدر ظل صافن عليه جان مبين عليه  قلقان ...وعيونه تقرا الف سؤال

‎حسيت گلبي وكع بطني والله من عيني صارت بعينه ...

‎وهذوله الفطر بس يتمضحكون ...وكالوا برزي كاعد جوة بالسيارة يستحي يصعد عربيته موكلش

‎عاد منصوري وحيدر جوي اخذوا عمي مني وكعدوا على القنفة واني كعدت بصفه وريوضي كاعد بنص الاستقبال ديكتب واجبه ...وصباح تكله كوم طب جوى اكتب يكللها هسه اخلص واكوم ...وهمه يضحكون عليه وهو لايمه

‎خطية ممتعلم على الخطار وسوالفهم...

‎فبلش منصور يحجي كال عمي ابو رياض احنى كذا وكذا وسولف عنه وعن حيدروعلاقتهم وشلون عرفوني ...

‎عمي كطع الحجي وعاف الموضوع كله انه ابو شهاب مو ابو رياض

‎هذا الصغير رياض اخر العنكود شهاب ابني الحبير متزوج وكاعد ببغداد ...

‎فهمه ضحكو ...

‎والله يسلمه عمي اخذ الموضوع كله عليه وعلى زواجه الاول من ام شهاب وانوبه صباح ...

‎وهمه يباعون عليه ..مبتسمين ...

‎ام حيدر مانزلت عينها من عليه ...

‎الظاهر حتى بالنظارات ماتشوف ...

‎حسب مافهمت من حيدر هي جانت بعمر امي بس خطية التعب موكعها

‎جانت  بيضة ووجها نوراني و لابسة دشداشة قطيفة سودة وعبايتها واكعة على جتفها وفوطة بيضة وتبتسم ...جانت اتاشرلي انه تعالي كعدي بصفي بين مااعمي ديحجي مغامراته ...كعدت بصفها ...ظلت تضيك بعينها وتباوع جانت تكول لحيدر  لا ملشاء الله حلوة حيودوري حلوة...ممبين عليها ....هههه لا زم هاي الاضافة ...

‎هي جانت نسةان امهات قبل كلش على نياتها وطيبة حيل ...خطية ماحجت غير بس كلمتين ومن امه كالت ممبين عليها

‎هنا حيدر يله ابتسم ...جان الافندي جاي بهدوم الشغل نفس الجينز ونفس القمصلة السودة ولحيته طويله وخشمه من البرد صاير احمر ...مع ذلك جان عركه يكت ...

‎خطية عمي قليل مايشوف ناس يسولف وياهم فانطلق واللي شجعه منصور يساله عن التفاصيل ويريد بعد حيدر ياشرله ولايمه ...

‎مستمر يكله عمي سوالفك حلوة والله عمي حياتكم جانت احلى من عدنه وهذا نفخ بعمي ماكو هيجي اخر شي حيدر قطع الكلام كله عمي اني جاي وجايب هذوله اصدقائي واهم مني اهلي ورايد ايد بتكم الكريمة ...واني هم وياها بالشغل وبصراحة اريد بتكم على سنة الله ورسوله وانت عمها الجبير متى ماشفت موافقة منكم انزل لبغداد اجيب عمامي وخوالي ونتقدم لامها وابوهاا ...

‎عمي هم ضحك كله والله اني احجي ويه ابوها وكذا ويصير خير واتشرفت بيكم ويصير خير ان شاء الله

‎ ورجع يسولف ويه منصور ...

‎كلش عجبته السالفة ههههه

‎بقوا شي ساعتين تقريبا وحسينا انكسر الجليد همين بيناتنا ...صارت ميانه واني ظليت كاعده بصف امه ...فهو مندار على جهة عمي ويكلي ليش ماتردين على التلفون وكعتي گلبي اني اعلمج ...

‎واني مجنت اعرف اضحك لو ابجي من الفرحة ممصدكة ماتتخيلون شنو من شعور حلو حسيت بيه بذيج اللحظة واتمنى لكل بنية بالعالم انه ترتبط بحبيبها ...وانه تعيش هاي اللحظات السعيدة

‎صارت سوالف حلوة وضحك وصباح هم اتحاول تحجي بلسان عمي تسال عن حيدر وشغله وامو حياته وتحجي عني وتمدحني ههههه

‎عمي يقاطعها يكلها  ابوها موجود وهو يسال احسن مني ومنج ....

‎اني عن نفسي ماعندي اعتراض ...وتندار عليه صباح تكلي شبيه عمج اليوم !!!هههههه

‎جانت كعدة على بسطاتها. عفويتها كلش حلوة بس حيدر جان متوتر شويه

‎اترخصوا ديطلعون عمي مجلب بيهم الاتبقون على العشى

‎عاد حيدر  اعتذر كال عنده شغلة ضرورية هو ومنصوري حتى حيخلي امه ترجع ويه برزي وهيثم  للبيت

‎من طلعوا عمي جان يكول والله منصور خووش ولد مبين عليه ....خش گلبي بساع

‎صباح كلتله ابو شهاب حيدر العريس مو منصور ضحك واندار عليه كلي لو تاخذين منصور مو احسنلج!!!

‎هههههه

‎اول ماطلعوا وصلتني مسج على التلفون

‎احبج ...وعمري مااتخلى عنج لو مااعرف منو يحجي ويكول ....

‎يقصد على سردار

‎كتله اني هم ...

‎فكلي شنو انت هم خابريني دااسوق ...فخابرته كتله اني هم احبك ...

‎كلي حرامات فلت هيثم الجحش من الكتله ...

‎فعاد اتذكرت الرهان ...

‎اوف منك حيدر شكد كلاوجي ...

‎واتفقنا من يرجع من الشغل بالليل يخابرني ...

‎جتي صباح عليه فرحانه وضحكتها ماليه حلكها وتبوسني ...لج عيني هذا يخبل جكد حلو ...

‎كتلها منيله

‎لج والله حليو حتى اصدقائه حلو ين

‎كتلها يكون  خليتي عينج عليهم!!!!! ...وينك ابو شهاب من مرتك ...تعال وشوف ....هههه

‎راسا وراها  خابرت امي ...جانت بالعيادة فبعدني محاجية كالتلي اختصري ...بس اني احجيلها والفرحة بگلبي والابتسامة على وجهي

‎فحجيتلها وكتلها على السريع زبدة الموضوع  كالت خووش خلي نشوف هذا  منوانوبه  ...

‎خلي يجينا هاليومين لانه اني مسافرة لبيروت علمود اخوج ابوج متخبل منه ....وحجيتلها بعض الشغلات وراحت كالت من ارجع اخابرج ...

‎المهم بالليل اتخابرنا وعرفت انه هي وابويه مبدئيا موافقين ...

‎بس جانت شغلة اكعد ويه اهله مضوجة ابويه كال خلي يجون يكعدون يمنا....بس طبعا ماترهم ...شلون نعوف شغلنا وحياتنا ...

‎المهم خابرني حيدر وفهمته اهلي ينتظروه هاليومين كال لعد خووش عكب باجر اخذ هيثم واروح اطلبج من ابوج ...وهم هيثم يشوف خواته كم شهر منازل لبغداد ...

‎اني كلش كيفت اكثر ....

‎حسيته متحمس ومهتم انه يفض الموضوع باقرب وقت ...

‎وبوكتها مجبنا طاري سردار...بس هو سالني شكال عمج علينا ...ضحكت كتله كال خووووش ولد ...وشكد سالني ليش ضحكتي استحيت اكوله يكول لو تاخذين منصوري احسنلج هههههه

‎اما امه فجانت حسب مكلي كلش فرحانه بيه وكايلتله لك هاي شلون حلوة ومرتبه وبت عوائل شلون قشمرتها وقبلت بيك ...

‎طبعا هالحجي جان الخميس وباجر جمعة عطلة عندي  ..فمشفته ثاني يوم ظلينا تلفونات وهم جان مشغول يتسوك لبيت عمه

‎والله وصدك حيدر وراه يوم اخذ اجازة لانه جان سبت عنده  دوام  هو وهيثم

‎زمن الفجرية ركبوا وراحوا لبغداد ووصاني اداوم والبس احلى لبس عندي وافرح وابد ماانقهر دوم هو ويايه ...

‎اني جنت فاهمه شيقصد عليمن

‎وطبعا مااحجيلكم سردادر كام يكمز من شافني وانعقج حيل ...والكل عرف انه حيدر خاطبني الخميس

‎ واجوي يباركولي الصدك غير اني مردت احد يعرف ...

‎مردتها تطش وانضرب عين وماتصير بس هو اصر انه الكل يعرف ...

‎وظليت على ناار ..لما وصل وقابل اهلي ...وكل شويه اباوع على التلفون متفق وياهم على ساعة ثمانية خطية كل شويه يخابرني شاخذ بايدي واروح لج علميني مااعرف ششتري ... كتله والله ماكو داعي ...كلي خوش اخذلهم دبه طرشي من واحد اعرفه شلون طرشي عمرهم مضايكين منه

‎خربت من الضحك عليه كتله لا ولك عااد مو هيجي ...ههههه

‎المهم حجالي انه اخذ وياه واحد من اعمامه واخو هيثم ورجل اختهم ومن يوافقون اهلي يجيب خواله وولد عمه البقية ...

‎كلي ابوج جان كاعد ورجل عمتج وابنه ذو الفقار هم ...

‎هو من كلي ذو الفقار اني صدك اتكهربت وضجت حيل...

‎مدام عرفت سراب الله يستر ...

‎حتى بعدين حجيت على امي كتلها شكو دكوليلهم

‎كالت والله ابوج خابرهم حتى بلا علمي ...المهم

‎يكول حجالي كلشي وكلي نسال عليكم وننطيكم خبر وهو ديحجي ويايه بطريق رجعته من بيتنه

‎ امي راسا خابرت كالت ياولي هذا منين جبتيلنياه ...

‎ضحكت كتله ماما شبيج والله يشتغل ويانه ...

‎ففهمت انه عاجب امي بس ابويه متخوف كايللها مبين حالتهم الماديه من كلامه مو ذاك الشي ...

‎كتلها ميخالف اني قابله واريده ماما ...ان اتحمل هذا الشي

‎كالت اي مو شفناج شلون اتحملتي ...لاتخليني احجي ...

‎خلي نشوف ابوج من يسال عنهم شيكولون ...

‎بس اني حسيت انه هي ضايجة لانه اصغر مني كالت اخاف يكوموج ويكعدوج يعيروج  قشمرتيه واخذتيه اصغر منج ...

‎كتلها الله كريم اني اشوف اهله حبابين ...

‎فهي ضاجت كالت لاتبدين من هسه تعمين عيونج ...فكري زين ولاتذبين روحج عليه اثكلي شويه وعززي روحح...

‎جانت رزالة بالعظم

‎وراها بشي ساعتين هم رجعت خابرتني كللتلي ترة اختج مسرة متضايقة ومقابله عليه تكول شنو هذا تنطوه سارة منين تعرفوه ؟! وشنو هيجي واحد حالته عدم تقبلون بيه ومو اي واح تجيبه راسا اي قبلتوا!!

‎اني من يمي كبيت عليها صدك ماتحملت كتلها مسرة اخر من يتكلم هي من دكت رجل واخذت عقبل حتى ابويه جبرته يقبل وهم جانت حالته عدم بس لانه جانت تحبه مشافت هذا الشي وهي من تختار حلال عليها بس اني مااعرف اختار لانه ماقبلت باللي جابتهم اليه  واذا جانت ناسية خلي اذكرها انه انتو لحد للان اتصرفون عليهم والا منين حابت تدرس وهي مو جانت كاعده طابق ثاني

‎امي قاطعتني رزلتني كالت ياويل عيب عليج شنو نصرف عليهم قابل لذا ساعدناكم انعيركم بيها لو نسوي منيه ميصير هالحجي ماماتي

‎كتلها لعد خلي تطلع منها وتعوف الموضوع لاتكعد تقرا براس ابويه ليش مااعرفها !!

‎بروازمن_ورد

26

‎كل نكد العالم مكان يكدر يطفي فرحة ذاك اليوم ...

‎الحلم الي من واني وجنت بالكلية اتمناه واحسد غيري عليه انه ارتبط بواحد يحبني ويتسقتل عليه واحبه واتمناه ...

‎يمكن حيدر مايكون فارس الاحلام للكثير منكم ...بس جان هو فارس احلامي  وهو اللي حلمت بيه  ...

‎رحت بيومهاللدوام مثل موصاني حيدر لابسه احلى لبس وخليت احلى مكياج ...

‎وجنت طايرة بالدنيا وحتى مااحس اكو احد غيري بيها ...

‎بيومها الكل انبهروا بطلتي حتى هو جان كلش فرحان بيه ...

‎وفرحان باهلي ومتفاجئ ببيتنا يكول كلش حلو وكبير انت من كل عقلج عايفة هذا القصر وكاعدة بهاي الشقة ...بس صدكوني ايامي بهذه الشقة احلى بهواي من ايام القصر ...صح محرومة من اهلي بس على الاقل خلصانة من حجي الناس وقرف التعليقات الي تسم البدن

‎ مهمها كان هنا هواية اهون ..

‎وجان منبهر كلش بشخصية ابويه ...وظل هواية يمدح بيه حبيبي اروحله فدوة لشيباته

‎ولحد ذيج اللحظة مجان حيدر  يريد احجيله اي شي عن زواجي السابق اصلا نبهني اكثر من مرة مااجيبله طاري ولا يريد يعرف ليش اني مااحب اروح لبغداد ...

‎بيومها سردار ذب الشغل كله عليه فمكدرنا نتشاوف بس كل شويه يدزلي رسايل حب واني اردها ...

‎اردها بطريقتي يعني ...وجنت متخيله نفسي كلش رومانسيه ...

‎الى ان خلص الدوام فطلعنا سوى حتى يوصلني للسيارة ..كلي شفت شكد حلوة جنت طالعة اليوم ...شفت اليوم شلون كلهم مبهورين بيج وبجمالج وكلها تباوع عليج ...

‎اني هم جنت لازمه يده الجنطة بايديه الاثنين وحاطتها على رجلي و هزيت راسي فرحانه ومتباهية ...

‎جان يكلي بس اني هذا الشي ابدا ميعجبني. ..

‎واتخبل منه ...

‎مايعجبني  انه اشوف احد يباوعلج موبيدي مااتحمل ..حتى لو نظرته كانت عفوية ...او لا مااعرف مااكدر اتقبلها على نفسي...وغيرتي ماتسمحلي

‎اذا يعجبج تلبسين لبسي بالبيت لرجلج اولى بيج والا شتستفيدين اذا الناس كالو حلوة لو لا !

‎وانت بعيني لو شنو تلبسين تخبلين ...

‎بعد انت بكيفج مااجبرج على شي ...

‎بس اتمنى انت تغيرين هذا اللبس يعني اني ماعندي مانع بنطلونات جينز بس تي شرتات طويله عليها

‎طبعا من الفشلة بس اتبلعم مااكدر جاوب شي ..واهز براسي موافقة

‎اشو جان يطلع سفطة خمس وعشرينات كال هاج هاي فلوس روحي اليوم اشتري مجموعة طوال ...اني الصدك استغربت شنو ينطيني فلوس!!

‎كتله لا عفية هاي شنو مااريد ليش تنطيني ليش ماعندي ....

‎كلي معليه اذا عندج ماعندج انت بعد صرتي مسؤوليتي وخلص ...

‎اي شي تحتاجين تكوليلي واني اتكفل بيه ...

‎سكتت ماحجيت خلى الفوس على جنطتي

‎ كلي يله اخذيهم لاتحرجيني كدام العالم

‎فاخذتهم وجنت كلش مستحيه

‎وكام هوفتحلي باب سيارتي  وصعدت ...

‎طبعا بلاا مااحجي شي ...

‎كعدت وهو واكف يم باب السيارة مفتوح ...ومن خليت ايدي على الستيرن جان يجرها على السريع باسها من اطرافها ورجعها راسا رجعت ليورة مثل اللي اتفاجاءت وفزيت ...

‎فهو راسا عافني وكلي من توصلين خابريني ديري بالج على نفسج خلى ايدى بجيوبه وراح ...

‎ظليت دقايق صافنة شصار ههههه

‎رجعت للبيت وجنت كلش فرحانه ومن فرحتي حتى غدا ماتغديت ...

‎صافنة واعيد الفلم مال اليوم كل شويه ببالي الحركات والاحداث ...اللي صارت ...وابتسم واضحك ويه روحي ...وثاني يوم اخذت صباح ورحت للسوك اخذت كم بلوزة طويله ...وهي تضحك عليه ...والله زمن انسترتي ههههه

‎تكلي من اولها مشاج على رايه واني اضحك فرحانه هههههه يمشيني على رايه لا بعد اني صرت زوجته المن اتكشخ والبس غير اله حتى المكياج كمت اطلع بطرك العيون ومرات من اشوف شفايفي اختف لانه هنه اصلا رفيعات ارحمهن بشويه حمرة خفيفة

‎وخلال هالاسبوعين اللي مضت امي جانت ببيروت يم سرمد ...واللي عرفته جانت مشاكل وياها يوميه مااعرف شبيه هذا الولد اتخبل من راح يدرس هناك

‎ونهائيا مااتصلت بمسرة رغم هي اتصلت مرتين يمكن ومرديت بعدين عرفت من بابا انه رجلها لازم يرجع للعراق خلصت مدة البعثة مالته  والتمديد همين وهو متكفليه موظفين وياه ...اضافة الى انه لازم يخدم بالدولة مااعرف كم سنة يله يوفي حق دراسته فهذه جانت طامة كبرى عليهم ...

‎شلون حتبقى ويه اثنين اطفال وحدها ...وعدها دراسه ومصاريف كوومة

‎وجانت دايخة وحايصة همه يريدون يبقون بالمانيا ومرتبين وضعهم على هذا الشي ...

‎ورجلها هسه حيرجع فجانت الشغلة كلش ماءيتهم ويصيحون طلب استغاثة

‎بس بصراحة مغثات مسرة كانت كفاية بحيث صرت مااهتم ولا اعيرلها او مشاكلها اي بال ...

‎مرت هالاسبوعين حلوة وخفيفة بس سردار شويه ضوجنا لح ويه حيدر شويه بالشغل بحيث مخلانه نتشاوف غير نص ساعة الغدا ...نتغدى سوى ونسولف شاحب اشياء وهو شيحب ...

‎وجنت انتظر هاي النص ساعة على نار

‎وجنت كلش احب هذا الوكت من تصير عيني بعينه ويصفن عليه ويبتسم ...حسيت بمشاعر حقيقة ...ودفو وحنية

‎والحقيقه هم بابا اتصل بامي وكايللها انه سال على اهله والحمد لله الجيران والمنطقة كلهم مدحوا بيهم وكلهم يتذكرون اخوه المرحوم شكد جان يساعد المنطقة ...ومن هالحجي وجان ابويه كلش مرتاح للحجي اللي سمعه ...

‎شويه هذا الشي طمني وطبعا هو هم فرح انه اتفقوا اهلي وبلغوه  يستقبلون اهله بعد يومين ...

‎فنزل حيدر وجماعته كلهم واخذ كرايبه واحنى وبيت عمي هم نزلنا لبغدادقبلنا

‎و كلنا فرصة احنى هم ننزل صارلنا فترة مراجعين خصوصا اني يجي بالسنة ونص مزايرة بغداد ...ولاشايفة بيتنا

‎وطبعا عمي وصباح كعدوا يمنا بالبيت ونبهت على امي وتوسلت بابويه محد يعرف شغلتي خصوصا عمتي وسراب وجنت كلش مخبوصة بالتحضيرات وصباح ويايه ويايه ...الا امي جان معاجبها مااعرف ليش حسيتها ضايجة مع انه بالبداية جانت موافقة !!

‎بس هم مشلت لهذا الموضوع بال ...

‎وصدك صارت الكعدة ...وحضرت نفسي ...

‎حيدر مجاب من النسوان غير خالته واخت هيثم الصغيرة  ليش مااعرف يكول هذتي افقر اثنين هههه

‎وخطية كلمة محجن غير بس يبتسمن ...

‎وطبعا امي جانت متنكة عليهم ليش مااعرف ...وحتى همه حسوا بهذا الشي وشويه خجلت بس مافتحت موضوع وياها ...بالبداية اهله اقترحوا المقدم عشرة والمؤخر عشرين ...ابويه سكت ماحجى وصارت سنطة دقايق

‎فحيدر كال عمي مو عشرة المقدم عشرين

‎والمؤخر مو اربعين خمسين اني جاي اناسبكم والي الشرف والفخر ...ابويه انحرج وماحجى شي وكال بيها الخير وطشت الهلاهل ...

‎صح  جانوا عمامه مقالبين كلوله هوايه ...وظلوا يدردمون عليه

‎بس هو سكتهم وفرض حجايته على الكل وفعلا هي مو مسالة فلوس حتى مااعرف ابويه ليش طلب هيجي مبلغ !

‎يمكن مراد ه اقل من مهر هشام الله يرحمه ...

‎او على كولته حاجة بنفس يعقوب

‎المهم اتفقنا اني وياه نلبس بس حلقات وعلى عيد نوروز نكطع مهر ونسوي حفلة وحدة خطوبة ومهر

‎اللي صار حيدر طلب مني لا مو طلب اصر نسوي الحفلة باربيل حتى مانعزم كرايب هواية وكلي بس اهله يعرفون بشغلة العمر وبكوني ارمله يعني لاعمامه ولاخواله ولا احد حتى موصي هيثم مايحجي ....

‎اني صح بالبداية انقهرت واخذتها على نفسي كتله ليش تخجل مني ...

‎حلفلي كلي لو اخجل مجان جيت واتقدمت  بس ماتعرفين حجي الناس اني اعرفهم راح يحجون ويغثونا وكل واحد يرجع لبيته فرحان واحنى نبات بقهرنا وعلى شنو نطيهم مجال ماكو داعي ...

‎بس هم بقت بقلبي واتذكرت حجاية امي من كالت يكوموج ويكعدوج يعيرون بيج ...

‎وشويه خفت ...

‎بس الاحداث جانت تمشي سريعة

‎المهم مشت الامور الحمد لله وعدت على خير ورجعنا لاربيل وياهم بس همه رجعوا سيارات اني رجعت طيارة علمود عمي تعرفون صحته ماتتحمل طريق وكومة سيطرات

‎ بس شنو كطعنا مهر يم سيد قبل مانرجع حيدر اصر على هذا الشي  ...

‎واشتريت حلقة ومحبس من المنصور واشترى محبس ذهب لامي ...كلش عجبها لانه ذوق جانت وشكلها  غريب ...

‎ومااعرف ورة اسبوع يمكن امي وابويه جوي ...جان ابويه شويه تعبان ...ماعرف ليش امي مجانت تحجي بس حسيت بالضيق ...عدهم ومجانو مرتاحين لشغلة بس مايحجون

‎فعزمهم حيدر ببيتهم وكال راح اقدم حفلة الخطوبة مدام همه موجودين شتكولين ونكطع مهر بالمحكمة فد مرة ...هالحجي جان اخر اسبوع من شهر الثاني ...

‎وصدك سوى عزيمة ببيت اهله عزم اصدقائه واجى سردار وزوجته هم اتصالحوا ويه حيدر واعتذرله واعتذرلي كلي سوء فهم بس والله مالسامحه ليوم الدين ...

‎اوجانت اخته الجبيرة هدى هم جاية اول مرة اشوفها وتشوفني وعزم اهلي وبيت عمي ..

‎فرش سفرة طويله وعريضة بس  على الكاع ...همه جانوا متعلمين ياكلون على الكاع والسفرة جانت مليانه شحجيلكم من السمج والكباب وحتى قوزي صينيتين كبار  وكبب وبورم يعني صدك جانت سفرة تملي العين حتى بابا تعجب عليها وكله لحيدر هوايه مكلف نفسك ...

‎كعدنا النسوان كلنا على طرف اليمين والرياجيل على اليسار وابويه توسطهم وبصفه عمي ...خطية جان اكثر واحد متونس بالكعدة وسوالفهم وضحكهم وحيدر جان يكمز يوزع الخبز والمي واللبن ...كله جابه من بره لانه امه خطية جبيرة متكدر تطبخ مالت عزايم ...واني شفت الكباب ...بعد نسيت منو بصفي هههه

‎جان منظره مغري الشيش طويل وثخين وعليه سماك ومن ترافته متفطر وحار دخانه صاعد يمي يمي ...

‎بس خليت اول لكمه امي كامت تتافف ...مكدرت تكعد جانت الوحيدة لابسه تنوره ...

‎هي لبست مثل الكوستم جابته من بيروت

‎لونه رصاصي على سمائي وجابتلي بدله هم يعني فستان هم تقريبا نفس اللون مثل اللي بيه سمائي على خضار على رصاصي هي لون كلش حلو جان ...لبستها بالمهر

‎اي نرجع لامي وجانت لابسه جاكيته نفس اللون بس ياقته تبدي طوخ وتفتح تنتهي بياض وقميص نفس الالوان بس اطوخ جانت طالعة حتى اكشخ مني بس هي هذا لبسها...دومها كلاس وراقية  ...

‎خطية مكدرت تكعد بالكاع ...مكدرت تطوي رجلها ...فوصت صباح تسويلها ماعون صغير وكعدت على ميز الطعام اللي بالمطبخ ...جانت ضايجة وتباوع على البيت واثاث البيت ...وحيدر عيونه عليها ...

‎من شافها ضاجت ورافعة حاجبها سودة عليه لكمه مخلى بحلكه ...

‎وشكد ابويه يتشاقى ويايها متجاوبه ...يكلها كوثر ضكتي القوزي شوفي شلون لحم ترف يموع بالحلك ...وهي ولايمها ...

‎بس حبيبي جان متونس على لمه الشباب

‎ابويه الحلو بيه من يكعد ويه الناس تلكاه وزير بنص الوزراء وامير ويه الامراء وعامل ويه العمال وشاب ويه الشباب ...لذلك جانت الكل تحبه والكل يريدون خاطره لسانه عسل ...

‎وهو كان سيد الكعدة ...الا حيدر كلمة مانطق ...اخر شي اخذ جكارته وطلع بالكليدور يدخن ...طبعا جانت هوسة ...وبنات سردار وهدى جان عدهم تلاث بنات ..جانو خابصين الدنيا كلش هوسه وهي عاادي ممهتمه على انه بيت جدهم وهمه احرار بس ضايقتنا كمزاتهم ...

‎فاني استغليت الهوسة ورحت على كيف ورة حيدر بالممر اللي بين الباب الرئيسية والصاله يعني صايرة مثل مربع صغير بيه تلاث اضلاع محد يشوفوني بس اللي بصالة الخطار الصغيرة وجانت فارغة وبعيدة عن الهول اللي سوينا بيهاالغدا ... ومن شافني اجيت ابتسملي وشبك ايديه الاثنين كلش حيل وقربني منه اني كلت هاهي حيبوسني اخيرابس هو ضحك وكام يباوعلي نظرات اغوائية عود خجلت فابتسمت ودنكت ....

‎كتله شبيك ضايج وواكف وحدك هنا ...كلي مدام انت يمي واليه عمري محضوج ...

‎لايظل في بالج اهم شي انت راضية

‎كتله طبعا راضية

‎كلي اي تقصير تحسيه ...كوليلي ابد لاتضمين عليه عيوني الثنتين الج ...

‎اني ضحكت وبديت ادلع فهو لزم اصابيعي وباس اطرافها كال شوفي ايديج شكد حلوة وباعي ايديه جنها مال وحش صدك لو كالو الحسناء والوحش ضحكت كتله لاولك شبيها تخبل والله جيب ابوسها جره مني وماقبل كلي ابد والله ...مو حرامات هالحلك الحلو يبوس هيجي ايد !!

‎كتله هاي ليش هيجي تكول ...

‎فابتسم وباسني من راسي وكلي روحي شوفي امج اخاف محتاجة شي ...

‎ومن دااروح كلي ها بالمناسبة ...

‎صعدي شوفي الغرفة بس انت ومرة عمج ام رياض اذا عجبتج ابقيها اذا لا حتى ابدلها قبل ماتشوفها امج ....

‎ضحكت وكتله خوش ...

‎اني هم رحت شفت امي ماكو سالت عليها كلولي بغرفة عمتي تعدل مكياجها ...

‎اني رحت عليها دااشوف شبيها ...اشو هي اول مشافتني كامت تنتر بيه ...بس اريد اعرف شبيكم انتو الله مطيح حظكم

‎شقصرنا وياكم اشو ولدتوا باحسن عائلة وربيناكم احسن تربية ومقصرنا وياكم باي شي

‎تعليم احسن وارقى تعليم اخذتوا ياحظي ليش هيجي طلعتوا ماادري اني  شمسويه بحياتي

‎ والا ابوج شقصر وياكم مرباكك لو معلمكم اذا ذيج طيخت حظ نفسها ركضت وره واحد خشمه والسما محد يكدر يحجي وياه ماتقبل احد يكله على عينك خاجب ومسوي روحه سي السيد

‎ وادوس على نفسها بس اترضيه والنهار كله تبجي وتلطم من وراه ومن ورة اهله واجيب واضمم وادز بهالفلوس من سم عليكم خلفة اللي تعر ماتشرف واذا انت فحدث ولا حرج كل مصيبة ومصيبة حتى الطايحات حظ مايوكعن بيها انوب مجلبتلي بهذا !! اشفتي منه هيجي ترجفين عليه وكاتله روحج عليه ...تطلعين من حفرة توكعين باكبر منها مالكيتي غيرة تجيبيليا بس اريد اعرف ولد العوائل الراقية المن دياخذون لو هو حظ الزركات ...وحظكم المصخم اما اخوج العار اللي صرفنا عليه دم گلبنه محد من اصدقائه يحلم باللي سوينا اله واروح اشوف عايف دراسته داير وره الكحاب ...

‎متكولونا شمسويلكم احنا وشنو انسويلكم بعد ...

‎امشي روحي صيحي ابوج اريد اروح ...طلعت روحي

‎طبعا اول اول مرة بحياتي اشوف امي هشكل معصبة وهيجي تحجي حتى مجاوبت بس احاول اهدي بيها الله يخليج ماما نصي صوتج موكتها عيب يسمعونا...

‎وهي تكلي انجبي وصيحيي ابوج انعل ذاك اليوم اللي خلفتكم بيه ...

‎واني اتوسل بيها ماما صحتج فدوة لعمرج ...

‎عااد راحت تفتح الباب واني ايدي ترحف لزمتها كتلها اني اصيحة بس لاتعصبين ....

‎طلعت مذهولة واتكعبل برجليه كتله بابا ماما معصبة تكول هسه نروح كلي شبيها كتله مااعرف بس من دخلت عليها جانت ترزل مسرة وسدت التلفون بوجهها...

‎كلي اي هسه لعد حضروا روحكم خلي نطلع ...هاي بعد صعدت عدها ...

‎ظليت محتارة مااعرف شكول ...

‎فصحت حيدر كتله امي صعد ضغطها ومجايبه دواها وتريد تروح لاتلح عليها من تطلع ...

‎فهو دنك محجى بس صار كلش حزين طبعا اني فهمت انه هو قرا امي وقره انزعاجها لذلك مكدر يحط لكمه بحلكه والظاهر هو من الاول فهم كلشي ...

‎فجرني وحط بيدي سفطة فلوس كدام امي كلي هاي خمسه وسبعين ورقة باجر عطله انت عندج

‎ روحي ويه هدى ام تبارك  لسوك الذهب  اشتروا  اللي يعجبج ...وان شاء الله خلال هاليومين اسلمج البقية لاخر ورقة ...

‎طبعا امي دارت وجهها كانه مايخصها هذا اىشي ...

‎فهو كلها خالة ام سرمد سارة بعيوني من جوة ومستحيل اقصر عليه بحباية ...

‎واعذرينا على التقصير مهمها كان هم يعتبرمو بيتنا  احنى كعدتنا مؤقتة بيه واحتمال نرجع لبغداد باي وقت فياريت لو جنت شفتي بيتنا بحي الجامعة ...ومرة ثانية سارة خوش سارة وعلى عيني وعلى راسي هي واهلها واعذرونا على التقصير مرة لخ

‎كالت تسلم عيني والنعم منك شويه انحرجت ...لانه من جان يكولها وصللها فكرة انه قره هي شنو في بالها

‎طلعنا وابويه ساق سيارتي وجان الجو مشحون حيل ..

‎كعد عمي ليكدام واحنى النسوان ليورة ورياض معد بحضن امه فابويه حاول يلطف الجو كلي سراوي اشتريلج سيارة احسن من هاي ...هاي حيل تعبانه وتروح تسويلج قدر..جان امي من يمها ...والله لاتشتري ولاشي بحظ منو وبخت منو نتعب وبحلك غيرنا ...

‎عزة عيرت الولد وهي بعدها ممعاشرته محجيت ولا كلمة بس وضحت الصورة امي جانت ضايجة من مسرة وسرمد ...شكلهم مسوين سوالف مصخمة وامي ضايجة منها

‎فصاحت على ابويه كلتله نعيم من نرجع لبغداد تروح تجيب سرمد انعل ابو الدراسة يابو يومها هذا الفكر مشايف داير ورة المزينات وعايف دراسته يروح يسولنا مصيبة ولا اللخ خو احنى اتعلمنا عليهم ماوراهم غير المصايب ...هاي الاخيرة اكيد جانت عليه شويه انقهرت

‎ ومع ذلك تجيت راسي على الجامه مال السيارة واتذكرت حيدر اول مرة اقترب منه واشم ريحته هالقرب على الرغم من انه كطعنا مهر بس ابد مصارت فرصة لانطلع ولا نقترب من بعض مااعرف الايام شو كامت تركض ركض ...

‎كلشي مافتهمت منه

‎وماكو يومين ورحنا للمحكمة وعقدنا والولد صاروا شهود على زواجنا ...

‎واتفقنا الزفة بنهاية الثالث ولانه جانت

‎العصرية وجانت باردة فاجلنا الذهب لثاني يوم

‎ورحنا اني وصباح وامي وهدى اخته ...

‎شلعت گلبنه اخته هدى الجبيرة كلما امد ايدي على شي تكلي غالي ...اخذي اخف خطية اخويه ...خوما كل الفلوس تصرفيها تشترين بيها ذهب !

‎امي من سمعت زعلت ودكت رجل الا نرجع ...وظليت اني حايرة مااعرف شسوي كعدنابمحل يبيع عصير ورمان فرط  وكلنا خلقنا مكلوبه ...

‎واني بس ردت اهدئ الجو وابرد الوضعية .

‎فدزيت مسج الحيدر كتله اختك مصختها وضوجتنا حيل ...فهو خابرها رزلها رزاله صوت جان يطلع برة التلفون  اشو هاي زعلي اخذي تكسي ورجعي للبيت الحقيرة عافتنا وراحت و طلعت الطلعة من خشمي ...راسا خابرته كتله هيجي وهيجي سوت واحنى راجعين ..

‎كلي لا ابقي هسه جاي اني خطية اجانا ركض وبهدوم الشغل ...ورجعنا نفتر وكوة رضاها لامي واشتريت محبس ثاني وسوار وكلاده وتراجي ..كله سوه خمسين ورقة لانه الاشياء اخذتها ثكيله حيل ...وهو لح الااشتري بالباقي ذهب بس ماقبلت وامي من شافته يختار ومن كل كلبه يصرف كامت هي تكول لا كافي ماكو داعي بس هو الا اشترالي تخم مامل ببقية الفلوس كلش انقهرت عليه جان يحاول بس يرضينا  ...مع انه صارت كلش هوايه عليه ادغه اكله مااريد  يكلي معليج انت ...

‎امي هم كالت لاتكسرين بخاطره خليه براحته ...بس صباح جان دغني انه مااقبل اخذ وخزرتلي رجعيهن ...

‎عااد من طلعنا بالباب  رجعته كتله لبو المحل ارجع عليك باجر ورجعته ...المهم بين نيته هو كدام امي وبين نعدنه فدوة اروح لطوله ...شلون هيبه من يدخل اي مكان

‎ الحمد لله رجعنا للبيت وجانت امي كلش راضية عليه وكل شويه يشتري شغلة لامي وماتقبل تكله المحبس اللي جبته اليه كلش  كافي بس حبيبي والله ذوقه تحفه باعتراف النساوين اللي ويايه هههه

‎المهم رجعناو امي ظلت تحجي على اخته وتمدح بحيدر كدام ابويه وعمي ...

‎بليلتها نمت مو مرتاحة لا جنت ملكة زماني...وكبر حيدر بعيني اكثر ...وصرت كل يوم احبه اكثر

‎وقبل مايرجعون اهلي قررنا نسوي الحفلة ببيتهم

‎واني ماعزمت احد غير بس خالتي نهال وبيبيتي جتي سودة عليه جانت كلش تعبانه وكوة تمشي ...

‎وجوي كم شخص نعرفهم من الفندق وكم واحد من كرايبه واغلبهم من اهل سردار...

‎وبليلتها عرفت ليش حيدر نبهني انه محد يعرف او تطلع اي حجاية عني ...

‎لانه واني كاعدة اسمعهم يسالون خالة ام حيدر هاي وين لكيتوها ...ليش قلة بنات عدنا تاخذون غريبة ؟!!

‎طبعا وهو جان منبه سردار واخته محد يطلع حجاية والا يقاطعهم ليوم الدين ...

‎وكل شويه يسالون هاي يامواليد خالتي ماتعرف تكول بكد حيدر نفس العمر

‎فيكولولها اي مبينه جبيرة ياحظي كومة اكو اصغر منها وحليوات ....شجلب بهاي واشاف منها!!!!

‎الغيرة والحسد جانت تقرا الف

‎وكومة كومة حجي

‎وبالحفلة انتبهت على اخته رشا جانت كلش فقيرة ...همه اهل حيدر وكرابتهم كلهم محجبات بس الصالة جانت فقط  للبنات فكل المحجبات نزعوا ربطاتهم الا هي وجانت محاطة مكياج وممبدلة من سالت حيدر كتله شبيها كال عندت ماابدل خلص بعد محديكدر  يحجي وياها

‎اما امي تكول جانت كاعدة بفاتحة مو مهر بتها كالبه خلقتها ومجتفة ايديها وكاعده  على ابو هذوله مو مستوانا هسه اني شعليه قابل حعييش ويه العشيرة ...اني اللي يهمني حيدر وبس ...انوبه اتوسل بيها اكللها ماما احجي ويه عمتي ام حيدر تكلي انجبي معليج بيه ههههه فشلتني بيوم عرسي ههههه

‎صح جانت حفلة بسيطة بس اشو اني حبيتها شويه و

‎ اجى حيدر لبسني الذهب بوسط الهلاهل وكلها صاحت لبسوا البيريات جان مصطلح اول مرة اسمعه ...يعني خلو ربطاتكم على شعركم

‎هههه

‎واتعجبوا على ذهبي كد ماحلو وثكيل وراقي ...وامي هم فاجاتني هدتلي تخم جديد وسوار من سوارتها القديمو  خلت العيون كلها تزغلل ...

‎وجتي تلبسني قطعة قطعة ...

‎صدك حسيت بنشوة وهيجي كبرت بعيون اهل حيدر اكثر

‎ووراها كصينه الكيكة خطية جابلياها من اغلى محل باربيل وطابقين جانت تجنن لونها بنفسجي واخضر بلون بدلتي ...

‎ووزعنا عشا جاهز مواعين جاهزة ومسلفنه

‎طبعاامي معجبها رادت بوفيه مفتوح بس جانوا عدد الجهال بالبيت تلاث اضعاف المعازيم شيفيد البوفيه ماما الله يخليج ...

‎واني بوكتها ظليت عين على امي وعين على حيدر بس لاتكب بيناتهم شغلة

‎ لانه حسيته اتحملها زايد باللزوم واني اخاف احجي وياها لاتعيط بيه كدام الناس ...

‎واخته كوة جتي سلمت وبوست وحيدر معصب عليه وكل شويه يعيط بيها طبعا جانت ترجف منه المهم

‎الحمد لله اللي عدت على خير

‎يومين وامي رجعت ومن وصلت لبغداد دزتلي بيد السايق نعرفه  الغراض اللي جانت مشتريتها اليه من بيروت جنطة كاملة و كلها اشياء تخبل ...

‎وورة مرجعوا اهلي لبغداد رحنا احنى لبيت اهله عصرية اني وصباح شفت الغرفة اللي جان مشتريها كلش عجبتني  تركية حيل حلوة هو مشتريها مستعمله من ناس مهاجرين بالجديد وماخذها بربع سعرها ...جانت اسود لونها  والظهر مالتها مال الجرباية جان رصاصي فضي  وجامه مرايه بنص الباب اللي جان ينفتح سلايد والمرايا مال ميز تواليت جانت على شكل معين اعوج شي كلش حلو وجان فارش زوليه صغيرة فضي وماروني وحوافه بيه فيروزي شي كلش عجبتني وحتى ماخذ برداتهم هم جانت رصاصية  بيها نقش فيروزي خفيف كلش راقية ...

‎حبيتها وكتله لااتغيرها ...راضيه عليها وابصم بالعشرة

‎شويه اتوكحنا بيومها بس قليل ملحكنا حتى لحد يحس ورحعت للبيت رجليه طايرة من الفرح ...وجنا يومية نبقى نسولف للصبح

‎وماكو اتذكر يمكن جانت قبل نوروز بيومين احنى عطلنا اخذت اجازة اني ...واخر يوم داادوم بيه خابرتني امي ركضت مخروعة

‎اصيح حيدر الحكلي

‎بروازمن_ورد

27

‎بيومها جنت اخر يوم اداوم بالفندق

‎ اخذت اجازة حتى احضر نفسي للعرس ولانه جانت اعياد نوروز وهنا باربيل كلش حلوة تصير الاحتفالات كلنا فرصة نطلع احنى هم شويه نتونس ...هاي احنا بعد بسنة ٢٠١٣

‎بس صارت الاحداث غير شكل وكلبت الوضعية والخطط كلها

‎جانت الاوضاع ببغداد والمناطق الغربية دتصير اكثر سخونة ودتزاد سوء ...

‎الانفجارات والاغتيالات وحتى تحركات الجيش جانت نحو الغربية بدت  ...

‎فخابرتني بيومها امي منهارة تماما ...كوة افتهمت منها سودة عليه ...تشهك وتحجي ...

‎ابن خالتي  اقبال الصغير تتذكروه العسكري اللي رحت بعرسه وجان ماخذ وحده علاقة سنين وياها ...خطية قبلها بيوم استشهد  ...مفجرين دبابته ومحتركه حتى جثته متفحمه ...

‎مع انه ابوه وعشيرته من الغربيه بس حرب العراق حرب عمياء حصدت الكل بظلم ومافرقت بين طائفة وطائفة ولا ديانه وديانه ...

‎اني جنت  اعرف انه ابويه جان رايح قبلها لبيروت على  سرمد ومن شفت  امي منهارة وواكعه من حيلها ركضت على حيدر يلحكني ...حتى الحك على امي لايصير بيها شي ...لانه خطية حتى خالتي امه الشهيد متخربطة وناقليها مستشفى ...

‎لحيت بيومها على حيدر اروح بساعتها لبغداد بس جان الوقت متاخر وابدا ماقبل ياخذني ...كلي علما نوصل فد بال١١ بالليل لبغداد ومستحيل يطلعني بالليل ...الطريق خطر ومو امان

‎مااعرف شصار بيه ظليت افتر بمكاني ...وروحي تصعد وتنزل جنت كلش خايفة على امي شلون نعوفها وحدها انوبه حتى مكامت تشيل تلفون وظلينا للصبح سهرانين نريد نسمع خبر منا ومناك ...والحمد لله ابويه طمنا  انه عمتي رايحتلها هي وسراب باقين يمها ...ببيت خالتي

‎خطية امي تكول قبلها بكم يوم ابن خالتي هو الشهيد نفسه رايحلها للعيادة هو وزوجته صاير عدها حمل قبل كم شهر ...بعد مااتاخروا شي سنة واكثر وجان طاير بيها من الفرح مثل ماتعرفون جان ماخذها عن حب ...

‎سودة عليه ماتهنى بشوفه ابنه

‎وبوكتها خالتي هم الله يساعدها اتخبلت على ابنها شهيد ابن شهيد تربى يتيم وهسه يتم ابنه هو هم ...

‎ثاني يوم من الصبح طلعنا اني وحيدر ...وفاجاني من كلي بايع السيارة ...مناقشته وكته بس استغربت شلون مكلي ...

‎واليىعرفته منه بعدين الفلوس اللي انطانياها كلها اشتريه بيها ذهب فلوس السيارة جانت

‎فرحنا باصات من كراج اربيل لكراج بغداد ...ووصلنا تقريبا بخمس ساعات ونص من ورة السيطرات ...

‎من جنت اشوفهم يدخلون السيارت  يباعون على الوجه ويكله فوت طبعا تدخل لبغداد اشكال والوان مفخخات !!

‎من وصلت للبيت بعد مجان بيه حيل الطريق كله ابجي وحيدر يهديني ...

‎سراب فتحتلي الباب وكالت امي من البارحة بيت خالتي وجانت عمتي محضرة ريوك يكملون تاخذ سراب وتروح ...

‎كالت تعالي ويانه بس حيدر ماقبل اروح وياهم

‎كلي شكلج تعبانه من الطريق ووجهج مصفرواخاف يصير بيج شي لانه مبين مجنت ابد بخير

‎وفوكها  الشقيقة دمرتني بس الحمد لله اللي شويه برد كلبي وانه  اطمانيت على امي مابيها شي ...

‎لانه بصراحة جنت شايله همها وابجي عليها اكثر من ما بجيت على  ابن خالتي الله يرحمه

‎ خفت لايصعد ضغطها ويصير بيها شي وهي جانت تبجي ومنهارة لوحدها ومحد يمها ...

‎اني هم اكلت لكمة بعد ملحة  حيدر ...وصعدت فوك ردت انام لانه حسيت حتى بعد مابيه اوكف بس مكدرت اعوف سراب ويه حيدر واصعد جانت عيونها تاكله اكل ...

‎حتى هو انحرج وعافنه بالمطبخ وكعد بالصالة يكلب بالتلفون ...

‎فكلت لعمتي اخذي سراب وياج لاتروحين وحدج ...فكالت لا اني جنت مفكرة اخذ ابراهيم ويايه ...فجاوبتها كتلها واخذي ابراهيم واتداريت على سراب كتلها عود روحي ويه عمتج ...

‎هي كلمة مانطقت بس تباوع ...والشرار يتطاير بعينها مااعرف شبيها من شافتني كزت سنونها عليه ...بحالج اني!

‎كل هالحجي جانت الساعة بال١١ عمتي هم اخذت سراب وابرهيم اخوها ماشاء الله جان كبران وطولان حبيبي شكد متغير ! وراحوا واني هم

‎مصدكت شمرت روحي على الفراش وغطيت بالنوم من البارحة العصرية  لحد الان اني ساعة منايمة ...

‎جنت منهكة بمعني الكلمة صعدني حيدر وخلاني بفراشي وبوسني ونزل ...

‎جان علاء اخو سراب الثاني نايم بالغرفة اللي بصفي صغير يمكن صار تسع او عشر سنين

‎ومكعدت الا على ساعة خمسة يمكن جانت ... حسيت روحي راجعة من غير عالم ....صحيت وجان جسمي مكسر واسحل بروحي سحل ....

‎البيت سنطة جان علاء كاعد على التلفزيون بالمطبخ يباوع كارتون ...وحيدر نايم على القنفة بالصالة الصغيرة وغاط بيها

‎اني هم مكعدته بوست علاوي ...وسويت جاي واكل طلعت من الفريز كبب جان اكو وحميت صينية كباب ...

‎وعلى صوت المطبخ والطكطكة كعد حيدر واول مكالي شلون صرتي كتله الحمد لله بس شويه جوعانة ...

‎فكال شعندج واكفه بالمطبخ  خلي اروح اني وعلاء  اجيب اكل  على السريع شكو تعبين روحج

‎...مجان بيه حيل حتى اجاوب واجادل بس سالت اكو خبر من اهلي امي عمتي ...؟

‎كلي لا محد لاخابر ولاكال ...

‎كتله لعد اخذني ...هسه اريد اروح ...

‎ورة الغدا

‎هو شويه ضاج بس اني لحيت ودكيت رجل گلبي جان نار على امي وخالاتي سودة عليه ...

‎وصدك رحنا وصلنا شي ساعة سبعة ...جانت الناس دتطلع واني داافوت هوسة كلش والجهال بالشارع ...

‎فاتحة الرياجيل سووها بالجامع والنسوان ببيت خالتي ...

‎رحت لابسة اسود وذبيت شال على راسي ...طويل وثخين حتى اغطي بيه شعري جنت صابغته اشقر هايلات حيل فاتح ...

‎حاولت مايبين مهما كان عيب ...هم جايه فاتحه وهم شعري هيجي !

‎اول مافتت شفتت نسوان ولد خالتي الكبار يوزعون مي وكهوة لللي كاعدات جديد وشفت خالتي نهال بطرف الصالة ....كاعدة وداير مدايرها ملتمات النسوان

‎اني اول ما شفتها نزلت دموعي وكمت اشهك راسا منظرها زرف گلبي حيل

‎من شفتها منهارة والنسوان يواسوها وكاعدين بصفها وهي تهز راسها يمنى ويسرى اول مرة اشوفها هيجي حتى بوفاة جدي الله يرحمه ماسوت هشكل

‎ جانت مدمرة دمار وتصيح وتعيط ساعة وتسكت ساعة من شافتني كبت وعيطت لج سارة راح ابن خالتج رااااح ...راح شاب وصغير ويتم مرته وابنه جان منظرها مؤلم هزني وكمت ارجف ووكعت عليها اتوسلت بيها خالة لاتسوين هيجي بروحج

‎وظلت تندب وتنوح وتلزم النسوان وحدة وحدة تحجيلهم شلون جانعايش وياها من هو وصغير 

‎تكلهم يمه انه اللي ربيته جان يتيم مشاف ابوه

‎ربيته بحضني صغير مثل ابني ليش اخذوه ...

‎ليش حرموني من شوفته يمه سودة عليه من عمري على عمرك من جان اخذوا روحي بدل روحك ...

‎اندارت على وحده كاعده تبجي على يسراها لزمت ايدها كالتلها ...

‎اجاني قبل يومين هو ومرته هذيج اللي كاعدة ويه امه سودة بوجهي اقبال هيجي احترك گلبج ...هم اخذو منج رجلج هم ابنج

‎كلي خالة حبيبتي  حلتحق خلي بالج على مرتي ...مو اني اللي مربيته يحسبني مثل امه

‎كتله يومه شلك بهاشغلة ليش ماتعوفها ...يمه اوف يومه كتله بطل اخاف عليك ...

‎كلي خالة وششتغل لعد من يومي اني عسكري ضحك وباسني راح يايمه توه هذاك ديفوت كبال عيني ...مصارله يومين ...وشكد حاولت الزمها واهديها

‎تكتل بروحها مكدرت عليها نمت بحضنها وخليت راسي على صدرها اتوسل بيها انوب جرت شالي وشعرب تكلي وخري عني واني اتوسل بيها لاتسوين هيجي بروحج خاله ...

‎وهي من دتصيح باسمي جتي امي عليه ...

‎كالت ها سارة جيتي ....

‎فزيت على حيلي من شفت امي حضنته وبوسته وبقيت ابجي بحضنها وهي تبجي وتشهك تكول شفتي بله وين جانتلنا هاي ...والله گلبي حس اخر مرة من اجاني للعيادة هو ومرته كتله عوف هالسالفة الوضع موزين استقيل بطل واخلي عمك يلكيلك شغل مارد ولاصد كلنا حسينا حيروح من ايدينا...

‎جان شكل امي حيل تعبان وظليت ابوس بايدها وحضن بيها كثر ماجنت خايفة عليها اتوسلت بيها ادير بالها على نفسها وكلتلها ابويه هم ظل باله عليها يدك عليج وانت ماتردين

‎كالت ناسية التلفون بالجنطة وبالكنتور ...مخاله بالها يمه ...وبقيت لازكة بامي مااريد اتحرك ...

‎وعرفت منها خالتي اقبال بالغرفة امي شادتلها مغذي لانه لاتقبل تاكل ولاتشرب ..

‎وهي مرة كبيرة ومرة المرحوم هم يمها ...حتى مانعة النسوان يدخلون عليها اتكول كلما تشوف احد تتهيج جروحها ...

‎وتظل تنحب على ابنها وهي صحتها تعبانه حيل

‎واندارت امي عليه كالت روحي كعدي يم بيبتج وعمتج شويه ورجعي قبل ماتصير ليل وطريقكم بعيد صدك منو جابج ؟!

‎كتلها حيدر والله جابني

‎كالتلي لعد وينه؟!

‎ ...كتلها هاا ..

‎مااعرف اني من نزلت من التكسي راسا طبيت للبيت هو جان يدفع الكروة لبو التكسي بعد نسيته شكد عيب

‎كالت دروحي وديله مي جاي لاتعوفيه هيجي عيب امي

‎ركضت طلعت ادور عليه شفته واكف بباب البيت ديحجي بالتلفون ...

‎كلي ها شبيج خطية شاف كفشتي اخترع ...

‎كتله ماكو شي جنت نايمة بحضن خالتي خطية اتهسترت على المرحوم ووهسه شويه هدأت الحمد لله ...

‎تريد شي اجيبلك مي جاي ؟!!

‎كلي لا لا ماريد شي اخذي راحتج اني انتظر هنا واكف ...كتله ماطب تكعد بالحديقة...مقبل وبقى واكف برة كتله فد نص ونرجع ناخذ عمتي وسراب خوش

‎كلي براحتج ابويه ...

‎انتظرج هنا

‎وصدك رحت كعدت يم بيبي خطية جانت كاعده على كرسي متحرك وعيونها مختفية من البجي وهنا اصلا صغار ...وهي بيضة خدودها حمر ووجها مايع وذبلانه حيل

‎ شكد انقهرت عليها تكول ياهو اللي راح منهم سارة هي جانت مرات  تعرفني ...

‎ومرات تكلي انت منو سارة لو مسرة ...

‎مع انه هي مو كلش كبيرة بس تعبت بساع....

‎بوستها وكعدت على القنفة اللي كاعدة عليا بصف عمتي وجانوا كرايبنا ملتمين هناك ومرة عمي الاولى جتي كعدت بصفي ...ليلي ام شهاب ..

‎كالت ها شوكت جيتي من اربيل كتلها والله الفجرية نزلنا ...

‎فهي باعت على حلقتي...كالت سراب تكول خطيبج جابج وبقيتوا وحدكم بالبيت ...

‎بس زين حيتي تشوفين خالتج ...

‎اليوم عرفت من عمتج انت انخطبت

‎كتلها لا مو وحدنا علاء جان ويانا ثم هو رجلي مو خطيبي ...

‎فكالت اي صح شكو بيها انت هم مو بنيه قابل شكو بيها اذا بقيتوا وحدك  ...

‎عزة شكد صلفة هذه كلت بگلبي بله انت شعليج !!

‎درت وجهي عليها

‎جانت تندار عليه مرة لخ  كالت صدك اكلج امج وكتها كالت ممغيرة الجنسية ماعندج شهادة وفاة لرجلج الي راح  شلون اتزوجتي لعد ؟! لو قصدج كطعتي مهر شيخ؟!

‎كتلها لا خالة كطعت مهر سيد ومحكمة هم

‎ عمي فدوة اروح لطوله وشديت على كلمة عمي حتى شويه تحترك ...كتله وصى واحد من جماعته المحامين سواها اليه خليت معقب ودفعت جم فلس طلعلولي جنسية ارمله و باقل من اسبوع وحتى القاضي من كطعلنا مهر كلي سلمونا على ابو شهاب ...ماعنده الا العافية تعرفين كلهم صدقانه ...بالمحكمة

‎وان شاء الاه رجلي يغيرها بعدين انحولها متزوجة مرة لخ ...

‎فزمت شفايفها ودارت وجهها انكلبت خلقتها وكامت تدردم هو من يومه خيره لغيرة

‎بس اني لبستها اني بيا حال!!

‎بعدين ظلوا كرابتنا مرة يعتذرون مني مباركولي على خطوبتي ومرة يعاتبوني ماعزمتهم واني انطيهم العذر انه صارت باربيل وسريع سريع ...

‎بس ماحجيت هواية عن حيدر ...غير انه هو اللي نزلني لبغداد وهو ويانه

‎ماكو شويه ورجعنا للبيت ورجعت سراب وعمتي ...

‎اللي افتهمته من عمتي رجل سراب مطلكها صارله كم يوم وهي بعد حتكعد ويه اهلي لفترة ...لحد مايشوفولها حل ...

‎طبعا هي ماحجت ويايه ولا كلمة من ساعة ما شافت حيدر ...

‎بس عمتي مقابله على تصرف ذو الفقار وصايرة عركة بيناتهم ...عايف البيت ورايح لبيت ابوه كاعد ...تعرفون ابوه رجل عمتي الاول ومطلكها من زمان ...

‎وهاي صارله بالاسبوعين مراجع للبيت متعار يلوم انه جبرته ياخذ وحده اصلا مايطيقها ...اخر شي مطلكها

‎بس مشكلة والله هاي اذا طلكت ووكعت براس اهلي شراح تلعب بيهم والله تموت ابويه بعلته ...

‎بليلتها خابرت ابويه وسرمد وطمنتهم على امي كتلهم تعبانين ومخبوصين وامي ماتكدر تشيل تلفون ...

‎بس جان ابويه كلش ضايج من سرمد وحالف عليه يمين الا يرجعه لبغداد ابد ماعجبته وضعيته وذاك معند مايقبل يرجع ...وجانت عالكة بيناتهم واني ارزل سرمد واكله لتعاند بابا ترة صحته مو شي

‎بس هذا متغير تكولون ولا هو سرمد صاير متنمر ويحجي من ورة خشمه ...كتله والله حالف يمين اذا ماترجع وياه فلس مايدزلك ويخليك تتوسل انت ترجع ...سد التلفون بوجهي وين جان ذاك الفقير الشاطر اللي جان كل همه الدراسة وجان يموت على الجهال وعقله طفولي؟!!

‎شلون هيجي اتغير !

‎وهمين خابرت مسرة اطمنها لانه لكيت فد شي عشرين اتصال منها عليه والصدك غير كوة حجيت وياها ...هي هم جان ظاله بالها على امي وخالاتي وبدت تشكيلي عن حالها بصراحة قاطعتها اعتذرت منها وسديته

‎جنت تعبانة ومالي خلك اسمع لاحد وخصوصا هي ...هواية حركت اهلي عليه بشغلة حيدر وهم رادت تخربهالي و

‎ثاني يوم هم رحت لبيت خالتي بس هالمرة حيدر وذو الفقار وصلونا وراحوا سوا لفاتحة الزلم ...

‎وبقيت وراها بشي يومين او تلاثة ببيت

‎وقبل مانرجع اجى ذو الفقار اخذ عمتي رجعت لبيتها والولد هم  علمود مدرستهم وبقت سراب ويانه ...وكال حيرجع يبقى ويانه ...

‎هيجي رتبوها

‎المهم طلع حيدر ديجيب عشى من المحلات اللي بالشارع اللي وره بيت اهلي جانوا مفتحين تكة وكباب

‎واني حضرت جاي ودااسوي زلاطة

‎جتي سراب جانت تكلي بس لو اعرف هاي منين تحصليهم ...

‎فاني واكفة على الكاونتر رفعت سجينة جانت كبالي كتلها شوفي ياعديمة الشرف ... لا عبالج نسيت تصرفج لما جنت تخابرين رجلي الله يرحمه وخربتيلي بيتي. ..الله بسماه اذا فتحت حلكج مرة لخ لا اكطعج بايدي واطلع قهر اللي مضى كله بيج ...

‎لانه لحد الان اني شايلتهه بكلبي بس داانتظر اشوف الله شراح يسوي بيج ولو وحدة ساقطة مثلج ماينخاف عليها امشي طلعي من شكلي ...

‎هي ظلت ترجف ...ورظات تردني صيحت وعيطت عليها

‎امشي من شكل

‎كلت معقولة هالصلافة ليش نست هي شسوت وعادي تخلي عينها بعيني؟!!

‎عااد هي اخترعت ركضت صعدت فوك ...شويه واجوي ذو الفقار وحيدر سوى ديسولفون ..

‎ونشرت الصينية مال الكباب على ميز الطعام  ...

‎فجان ذو الفقار يكول البومة وينها ...

‎فحيدر رفع راسه وباوع عليه

‎اني جاوبته كتله كالت ماريد عشى ...

‎فضحك كال بالجير احسن مما تسد نفسي ...

‎عاشت ايدك ابو علي خوش كباب ..كتله هني ومري ...

‎مااعرف ليش انكسر گلبي عليه من دياكل ويسولف ويه ...

‎وين جان ...ذاك الشاب الانيق المرتب والضحكة متفارك حلكه عبالك شيب وكبر وحتى جتفه نزل شبالعجل !

‎وهاي صارلها فوك الاربع سنوات حتى خلفه مخلف ...تكول هي الافندية على اساس هو  مايتقرب منها ...

‎اكيد نفسه تلعب من هيجي شكول ...

‎ثاني يوم الصبح خابرت امي كتلها حنرجع لبغداد تعالي خلي انشوفج وبصراحة مااطمن اذا تطلع  وتبقى سراب بالبيت وحدها اذا طلع رجلها وعافها لانه مجان ناوي يرجعها  وصدك اجتي ...

‎بس ظليت نايمة بحضنها وابوس بيها ... حسيت ماشبعت منها ...فاني هم دااحضر روحي وحضرت جنطتي اتريكنا وجانت تقريبا تسعة تسعة ونص

‎دك التلفون ....

‎جان ابويه و كال اني راجع وحيرجع سرمد ويجي ...

‎فتوسلت بحيدر يعوفني كم يوم هنا حتى اشوف ابويه وسرمد كلش مشتاقتلهم

‎وعود يجي عليه بعد كم يوم     لانه هو مايكدر يبقى اكثر فقبل بس مو من كل گلبه ..

‎وبالباب رضيته وخليته يطلع فرحان ...

‎وجانت هاي اول مرة انطول شويه ههههه

‎ومحجيتلكم هاليومين اللي فاتو شسويت بسراب ...جانت كلما تكعد بصفنا اذب روحي على حيدر هذا يخجل من يمه يشاورني يكلي هاي شبيج اتخبلتي هسه جتيج الحالة مو عيب ...واني اضحك اكله ليش عيب مورجلي واحبه فدوة لطوله وهو يبقى صافن عليه هاي شبيها ههههه...

‎ومرات انام على جتفه واتحرش بيه كدامها هو صح مايقبل ويدفعني بس ذيج تحوص من يمها وهي ابد ماتموت على هالسوالف ظلت تتكرضم ...وتحرك بدمها وتاكل شفايفها عاد اخر شي كامت ماتكعد يمنا ...

‎الله ياسراب لو شما عملت بيج ماطلع حيف الايام السودة اللي شفتها من وراج ...الضرب اللي اكلته ولا الحبس ولا منظر ابويه من اجاني وطلعني من سوريا ...بس انتظر انتقام رب العالمين بيج ...

‎المهم رجعوا ابويه وسرمد ومثل ماكتلكم اخوية جان كلش متغير ولا عبالك هو ...طبعا رجع زعلان وحبس نفسه بغرفته واني من شفت الجو متكهرب وامي تعبانه جانت مابين بيت خالتي وبيتها ماردت اثقل عليهم اكثر بساعتها جان كل واحد عايش بعالمه وكل واحد مشغول وراكن نفسه على صفحة

‎حسيت مدااكدر انتمي لهذا البيت مثل قبل

‎اشو اطبخ واسوي غدا واصب محد ماكو اكل وحدي وارجع الباقي ...ابويه يكلي متغدي بره ...

‎وامي تطلع من المستشفى لو ترجع للبيت تبقى شويه لو مناك راسا تروح لبيت خالتي ...

‎سرمد مايحجي ويانه ينزل يروح ياكل لفة برة ويجي يصعد محد يشوفه ..فلذلك كضيت هالكم يوم وحدي بالبيت ويه حيدر على التلفون ...

‎الا ان كتله تعال رجعني ...

‎رحت قبل ماارجع بيوم سلمت على خالتي اقبال جانت مثل المصدومة ...خطية بوستني ...ومحجت شي ...شويه احسن من قبل وسلمت على بيبي وخالتي وكرايبنا ورجعت ويه حيدر لاربيل

‎والطريق كله صافنة شلون تغيرت الدنيا وتغيرت احوالنا كلها مصار كم سنة ...وحيدر كلي والله بقيه الشال كلش حلو عليج بس اول ماوصلت اربيل نزعته ...هو ابتسم وماحجى

‎وحمدت الله وشكرته انه رزقني برجال عوضني عن كلشي شفته بحياتي وصرت اقدره اكثر انه ماقصر ويايه ابد ...

‎ورة مطلع الاربعين مال ابن خالتي الله يرحمه يمكن بشهر ونص او شهرين مااتذكر بس حيدر كام يلح عليه علمود الزواج واترخصت من امي كتلها نريد نسوي زفة ...

‎كالت مايخالف بس حجي يومين وارجع مااكدر اعوف البيت ...

‎ورتبنا امورنا انه نتزوج اول يوم بشهر ستة ...

‎صاحب الفندق انطانا هدية تلاث ايام بس حيدر ماقبل كال مناخذ راحتنا...حجزنا بفندق ثاني بسليمانيه بالاس هم صديق اله سوالنا تخفيض ...

‎وجنت محضرة نفسي وترتيباتي وصرنا نطلع يوميه العصر اني وياه نشتري كم شغلة منا ومناك واصر انه اشتري بدله طبعا مااخذتها كبيرة ومنفوشه اخذتها اوف وايت وبسيطة كلش ...

‎وامي جانت كلشي مشتريتلي غراض شخصية  من بيروت فاكثر شي اشترينا شغلات للبيت اشتريت بردات لهولهم واشترينا طبلة طعام جبيرة ... واخذنا زوليه هم جديدة للاستقبال

‎وصبغ الباب الخارجية والداخليات حتى مغسلة جديدة اشترينا ...لانه خطية الغراض على حطتهم هاي صار كم سنة ...

‎امه هم كبيرة بالعمر مابيه حيل تسوي هالسوالف

‎واشتريت فرشات ومفارش ...وهاي الشغلات تعرفون بعد تجهيزات مال عرس .......

‎ وجانت عندي احلى الاوقات لانه مستحيل تفوت طلعة. وحيدر مجان ماخذ حصته بزياده من الوكاحه هههه ...

‎تدرون مجنت اتخيله هشكل ...اتوقعته فقير بس لا والله صفني على الرغم انه اني جنت متزوجه بس مجنت اعرف كل سوالفه..وفرق بين السما والكاع بين رجلي الاول وهذا نور عيني اسميه الثاني ...هههههه

‎المهم جتي امي قبل الزفة بيومين ...وعجبتها التغيرات اللي صارت بالبيت حتى غرفة النوم هم حبتها وفكرت تبدل غرفتها تاخذ تركية كالت انزك واكشخ بس خطية جانت بعدها لابسه اسود وعبالك بين الكبر والتعب بيها

‎و اني هم حجزت يم صالون تركي هناك ....وباجر ان شاء  الله الزفة واجتمع اخير ويه روحي