رواية بتندمين يا بنت والسبب نظرتك هذى الفصل السابع والثلاثون 37 - بقلم غير معروف

يا بحر أنا بسألك عن مبعد الدار..
يا اللي من الأشواق مبرد و خالي..

أنته طويت بلجتك علم و أسرار..
و أنا طرالي من الهوى ما طرا لي..

عودت لي من ماضي الوقت تذكار..
تذكار خلٍ أبعدته الليالي..

و لأسباب ظرفٍ حط في خافقي نـــــــــــــار
سوا لها بداخل الصدر صالي..

يا ليت يدري ناعس الطرف وش صار
ان كــان ما خلاني بجــوّ خالي..

لأنه يعرف أني من الناس ما أختار..
غيره و لا أبدل سواهم بدالي..

البارت 34 و 35 بين ايديكــم ..

محمد ومن وراء يزوي : اليــــــــازيــه وقفي ..

و مسرع ماحدرت بيتهم ..

لانها بـ الاصل موول ما كانت تسمع صرخات محمد لها

.

حدرت حجرتها وهـي تسكر الباب باللوك ..

وعقت عمرها على الشبريه ..

وبدت اتصيح بكل حرقــــــه وآلــــم وحسره :

ليــــــــــــــــــش ،، ليــــــــــش يااربي اناا بالذاات

ليــــــــــــــش ..

انا شو سويت فـ دنيــتي عسب يستويلي جيه

(وبدت شهقاتها كل مالها وتزيد )

كانت اتصيح بكل عبره ..

ولو احد سمع صياحهـا كان بيعرف من صياحها شكثر هي مهمومه

ومتـــألمه من قلب ..

ومـع ذلك الالـم والهم ..

بس ألم الحسره والذنب يطغـي كل مشـاعرها ...

حضنت ريولها بين صدرها وهي مقطعه عمرها من الصياح :

ليــــــ...ـــش ياااربي ليــــ ــ ــش ...؟

يااربي دخيلـــــــك مابا اكمل ابا امووت

يااربي ساامحني ..

.

.

.

كــل هـ الشئ ..

كـان تحت نظر أم راشــد ...

كانت بهاللحظات تعيش بـ صدمه .. ومب مصدقه شيء من اللي طالعته

شو مستوي فـ الدنيا عسب جيه اليازيه تربع وهي منهاره ..

وبدون وعـي منها .. تحركت وبـ سرعه ع ناحيه حجرت بنتها ..

وهي خوف الدنيا كله مجتمع وسط صدرهـا ..

وصـلت لـ حجره بنتها .. وهي ضرب البـاب وتصرخ : يزووي قلبي فجي الباب ..

.

يزوووي ردي عليه .. بلاااج ..

( وبـ نبره مؤلمــه ) :يزووي لا تعورين قلبي دخيلج فجي الباب ..

(ومسرع ما وضحـت نبره الصيـاح فـ صوتها ..

لانها كانت تسمع شهقات يزوي وصياحها ..

ومارامت تستحمـل أكثر عن جيه ..

: يزووي اماايه يررحم والديـــج فجــي الباب ..

.

(اما عن اليـازيـه فـ كانت مـا تحس بأمها ..

ولا كانت اتحس بروحها ،

وكل اللي تحس به

ألـــم يقطع كـل شراينهــا ، ألــم يحفر حفــر بيوفها )

.

.

×

.

.

" × فـ جناح روضــه × "

كـانت تصيـح بـ ألم ..

من الحـاله اللي ظهرت فـ أختها وبنت عمـها : رووضه يزوي بلااها ..؟

رفـعت روضـه عيونها وهي تركز عيونها ع حمده اللي مقطعه عمرها من الصيـاح ..

وكان شعور غريب يجول فـ خاطرها ..

ومع ذلك تحس ان رأسها بينفجر .. موول مب رايمه اتفكر : مادري حمده مادري ..!!

حمده : فـ عمري ما طالعت يزوي جيه .. الا يومـ .... (وسكتت ) ..

تنهدت روضـه .. وقـالت بـ تفكير : وانا هـ الشي اللي معور لي راسيه ..

فـ عمرها اليـازيه ما سوت هـالشئ الا يوم سالفه ,,... ( وأكتفت بـ السكوت ) ..

( بس مسرع ما قـالت وبـ نبره قويـه ) : بس هالمره كانت ردت فعلها اقووى بـ واايد عن ذيج اليووم ...

رفعت حمده أيدها وهي تمسح دموعها وتقول : بس هـ السالفه مر عليها سنيـــن ..

روضه : ادري .. بس يزوي مب من طبايعها جيه تنهار و بـ هالطريقه عسب شي تافه ..

قـالت بـ تفكير : يعني شو تتوقعــين ستوابـها عسب جيه فجـآه تتغير ..

قـالت .. و بـ نبره استنتاج : حمدوه .. ( سـكتت .. عسب تطالع ردت فعلهـا )

وكمــلت : يزوي ماتغيرت الا من عقب هاك الاتصال ...

وانا طالعتها يوم رد يدق عليها مره ثانيه نزلت منها دمعه ..

حمدوه : يعني تتوقعين هـ الشي بـسبب سيف ؟؟؟

طالعت روضـه حمده بـ نظره غريبـه : بيني وبينج انا موول مب مصدقه سالفه سيف هاي ،

يزوي لو تزعل ع الدنيا كلها ماتزعل ع سيف ..

( وبـ تنهيده .. كملت ) : يزوي عيـيــنه ايديه .. انا اعرفها يوم تخفي شئ ..

وأنـا اقول... ( وبـ نبره واضحه ) : هـ الاتصال هو ورا هالحال اللي وصلت له يزوي ...

.

.

( وفــجأه قـطع عليـهن صوت البـاب وهو يندق ..

حلقـه الاستتنتاج اللي كانً مسوياتنها .. )

نشـت روضـه بـ نفسيه زفـت .. وهي تفج البـاب ..

فجت البـاب .. وطالعت ع اللي جدامها بـ عدم تصديق ..

وقـالت بـ نبره واضحه فيها الصدمـه : محمـــــــد

( انتبه محمد لـ صدمه روضـه ..

بس كـ عادته سوى طـاف .. )

وقـال بـ ضيجه : تعالي شوي .. اباج فـ سالفه ..

عقدت حيانها وهي مب مرتاحه لشكل محمد : هلا حمودي شو فـ خاطرك ؟

سحب كميه من الهواء وقـال بـ نبره واضحه : روضه بسألج سؤال وتجاوبينيه بأمانه ..!

حاولت ترسم الابتسامه وهي حاسه الا متأكده بـ انه الموضوع يخص يزوي : افاا يا حمودي اسأل ومايردك الا لسانك ..

قال بـ نبره مجرده : اليـازيـه ..

فجــأه .. ومن وصل الاسم لـ مسمعها حست بـ انه قلبها دق بقو ..
وقـالت وهي تحاول تخفي التوتـر : هيه بلاها يزوي ؟

قـال محمد وبـ اندفاع واضح : ليش ظهرت من حجرتج وهي منهاره ..

( وهو يستذكـر ) : تخيلي حتى ماحست فيه ..

( وبـ ابتسامه ألم ) : كانت فحضني ولا حست ..!!

(كانت تحس بربكه قويـه ..

شقايل بتقوله انه ياها اتصال وهو اللي جلب حالها )

وفوق كل ها ماتعرف تجذب .. تنكشف بـ سرعه ..

قـالت وهي تحاول تغطى ع الموضوع : هـا هـا حمودي جنك ماتعرف يزوي .. يزوي وايد حساسه ..

( وفـ خاطرها تقول ) : ياربيييه شو أقوول ..

كملت وبدون وعــي .. : هي وحمدوه

واايد يتناقرن وحمدوه زودتها حبتين ويزوي زعلت وظهرت ..

وفـ خاطرها : استغفر اللـــــه يارب ساامحنيه .. مضطره اجذب عسب لا اورط البنت ..

طالعها محمد بعدم تصديق : شقايل تضاربت ويا حمده .. !!

وانا اقولج حالها كان منجلب180 درجه ..

(رفع عيونه وهو يركزهن عليـها ) : اليـازيه موول مب طبيعيه .. !!

أنا متأكد انه هاي مب من ضرابه بنات ..

حاولت تتصنع العصبيه : محمــد يعني انا بجذب عليك .. !!

اذا مب مصدقنيه أسال حمدوه ..

( وهي تأشر ع داخل الحجره ) : سير لها داخل ..

وترا حال حمدوه مب احسن من حال يزوي حتى حمدوه

مقطعه عمرها من الصياح ..

( فـ هاللحظات بدا محمـد يقتنع برمسه روضه .. )

( وحمدوه كانت تقريبا تسمع كل رمستهم لانهم كـآنو قاعدين فـ صاله جناح روضه ..)

فــجاه ..

ظهرت حمدوه وهي تحاول تتصنع العصبيـه ..

وهي بين دموعها وبـتمثيل .. عسب يغطن ع يزوي : ترا حتى هي سبتني ..

ولا انا ماحس ومافيه احساس شراتها ..

( وحاولت تشهق .. عسب يضبط الدور ) : خلها عقب بتعرف غلطــتها هااي الخقاقه ..

ماتستاهل حد يستهم عليـها ..

( ومسـرع ماحدرت حمده حجره روضـه .. )

(هني محمد قـطع الشك باليقيـن .. وتأكد من رمســه روضـه ..

وحس بالراحه.. من طالع حاله حمدوه وهي تصيح

تأكد ان حال يزوي كلـه من ضرابه بنات ..

وعقب بيتصالحن لرواحهن ... )

وكان يحس براحه أكبر وأكبــر .. ان يزوي ما كان فيها شي عود ..!

قـال وبـ لوم واضـح : اسف رواضي ..

بس والله انيه تضايجت من طالعت حال اليازيه

تحريت انه فيها شئ عود ..

أكتفت روضـه بالابتسامـه وهي تقول : ماحصـل الا الخير ..

(وهي تغمز له ) : منو قدها من احين يخافو عليها

حس بـ خجل من رمسـه أخته .. وضربها ع راسها بكل خفه : جب انتي

أبتسمت وهي تقول : مقبوله منك يا حميدان ..

محمد : حميدان فـ عينج شو هـ الدلع الخايس ..

روضـه وبـ ضحكه : احمد ربك روضه بنت احمد تدلعك ..

غيرك يدور نظره بس ..!

( وبـ نبره مجرده ) : واحين اجلب ويهك ..

ورايه شغل لازم اهدي الاخت ..

قـال .. وهو يضحك : هههههه والله انكن يالبنات خبلات ..

فجت عيونها ع وسعهن وقـالت .. وهي تتصنع العصبيه : اقوول اجلب ويهك احسن لك ..

محمد : انزين انزين بنظهر هاا ..

وظهر محمد .. ومسرع ما حدرت روضه حجرتها ..

واول ماحدرت الحجره ...

صرخت بـ عدم تصديق : خيبــــــــه يالممثله والله انا وصدقتج ..انج متضاربه ويا يزوي ..

حمدوه : ههههه جب انتي قلت انقذج لان محمد كان شكله بيطول السالفه ..

أبتسمت وهي تقول : فدييتج والله .. سهلتي عليه واايد ..

قـالت بـ سرعه وجنها تذكرت شيء : تعااالي نسيتينيه فونج موول ما سكت ..

فيه احد يدق عليج من سااعه ..حشرنا ..

أبتسمت وهي تقول : انزين ما طالعتي منو يدق ..

حمدوه : لا والله ...

وجان ايصيح فون روضه ..

" العمر لا رحت مايسوى والله مايسوى خذ روحي خذ قلبي

خذ عمري يا هلي يا اللي .. لك حياتي يالغلا فدوه .. كلي لك فدوه .."

حمدوه : هيه هيه هااي الأغنية من سااعه ..

قـالت روضـه وهي مستغربه : هاي الاغنية محطيتنها حق أميه ..

بلاها اتدق عليه ؟

( وبـ تفكير ) : هي مب تحت فـ الصاله ؟؟

حمدوه بـ خوف واضحه : ردي عليها بسرعه .. لا تكون درت بشئ عن يزوي ..

روضه : اوك ..

وردت ع امها: هلآ اميه ..

سمـعت أمها تقول وبعصبيه : لا هلابج ولا مرحباابج ..

.

( فـجت عيونها ع وسعهن ..

وهي منصدمه من رمسه امها ) : اميه بلااااج ؟

ام سالم وبـ عصبيه واضحه : لاتزقريني بامايه انا ماعندي بنات غير شما والمياسه

( وبـ نبره تالم لحد الصميم ) : ولا انتي مب بنتي .. انتي ام لروحج ..

حسـت روضـه بـ الالم ,, بس حاولت تخفيه : اميه انتي شو قاعده اتقولين ..؟!!

قالت أم سالم بعصبيه حاده : عيل يا قليله الراد تظهرين من البيت ولا جنج تعرفينيه

قالت وهي تحس بـ ضيجه الدنيا كلها وسط صدرهـا : اهاا احين فهمت عليج ..

السوسه هي اللي معبيه راسج عليه

صرخت أم سـالم : احتررمي عمرج يا قليله الراد ..

هاي اختج لا تغلطين عليها ..

( وبـ نبره تهديد ) : وردي البيت قبل لا اغضب عليج فووق غضبي

قالت روضـه بـ فطنه : ان شاء الله اميه ..

( بندت ام سالم فـ ويه روضه )

قـالت حمده بـ خوف : شو مسويه هـ السوسه بعد ..

قـالت روضـه بـ ألم مخفـي : قالت حق اميه بـ انيه برع البيت

شهقت حمده بـ عدم تصديق : عنبوووووها..

( وبـ نبره أستعجال ) : انزلي بسرعه .. وراويها انج مب برع البيت ..

( صرخت ) : بسسرعه ..

.

.

(بـ سرعه ظهرت روضـه من الجناح ..

ونزلت تحت فـ الصاله ويا امها وشما .. )

همست شما بـ خبث : امايه طالعي وراج وصلت الانسه روضه ..

ام سالم والغضب متملك عليها : يتـــي يا قليله الراد ..

( جربت أمها منـها .. وهي تعطيها طرااااااااق )

ومن قوته طاحت روضــه وجسمها المتهالك بالارض ..

( أما عن حمده فـ ماقدرت تمسك روحها ..

شقهت من طالعت المنظر وخبـث شمـا ) ..!

.

قالت شما والابتسامه منرسمه فـ محياها : ولا بعد سارت اتغير ملابسها وعقب يت ..

( وبـ نبره خبث ) : والله انج قويه عين ..

( وكملت بـ نبره كريه ) : من وين يايه انسه روضه ..

وفـ اي صوب كانت الهياته هاه ... اي صوب ؟

.

( غمضت روضـه عيونها بـ ألم وقهر الدنيا كله متملك على قلبها ) ..

و كانت مزهبه لـ شما رمسه تهدم لها عيشتها ولـ أخر يوم فـ عمرها ..

لو لا قاطعها صوت حمدوه وهو يعلى وبـ صريخ ومزاعج :وين كانــــــــــت ..

( وبـ نبره أقووى ) : لو كانً فيج عيون يا اخت شما ..

جان سرتي فوق

وكنتي بتطالعي وين كانت روضه هايته ع قولتج ..

بدت الربكه توضح ع ملامح شمـا وقـالت .. بـ لعثمه : انـ ـا سرت جناحها ..

بس ما لقيت حد ..

( وبـ نبره خوف ) : عن الجذب

حمدوه وبـ قهر واضح ع اختها : عيل شقايل محمد يوم يا لقاها روضه ..

( وبـ صرخه ) : ولا محمد فيه نظر وانتي لا .. !!

ماعرفت شما شو تقول ولا شو تسوى ..

كل اللي رامت عليـه بانها تقول : حمده احترمي عمرج انا اكبر منج ..

اطالع لسانج طول ...

( وبدت تعيد أسطوانتها المعتاده ) : ولا علمتج هاي اللي ماتستحي ..

حمده بـ غيض : انا محترمه عمري من زماان ..

( وبـ نبره قويه .. وتهديد واضــح لـ شما ) : بس يوم اطالع الغلط مابسكت ..

( والتفت وهي توجه رمستها لـ أم سالم ) : وانتي خالوه المفروض ماتسرعتي .. لو طرشتي وحده من البشكارات فوق

جان بتقينا بـ ثلاثنا ..

( وهي تطالع ع شمـا ) : ماله داعي اتصدقين رمسه العذال ... >>ونعم والله يـاحمدووه نشميه نشميـه خخخ

صرخت شما وبـ قهر : انا عذاااال يا قليله الادب ...

( وهي ترتجف .. التفتت بسرعه ع أمها .. ) :امايه لا تصدقيها ترا هي اتساعد روضه ..

حمده بـ مزاعج : انزين ازقري اخوج محمد ..

( وبـ نبره سخريـه ) : وسأليه ..!

( ومسرع ما وجهت رمستها لـ أم سالم ) : وبعدين خالوه انتي نسيتي ..

ان باب الحديقه اللي ورا عميه أحمد مسكرنه هـ الجمن يوم ..

عسب العمال اللي هناك ..

يعني من وين بنحدر البيت الا من البوابه الرئيسيه

.. يعني بالمختصر المفيد لازم انمر من هني من حذالج عسب نطلع فوق ..

أما فـ عن أم سالم ..

جنه حد صب عليها ماي بارد ..

رمسه حمده صحتها من وهم عيشتها فيـه شما ..

شقايل انا صدقت شما

وشكيت فـ روضه ..

وكيف نست منظر يزوي وهي نـازله تصـيح ..

يعني يزوي بتكون بروحها فوق .. اكيد وياها البـنات ..

( ومن عقب رمسه حمدوه ..

أكتفت روضـه بـ انها تطالع ع حمده نظره كلها فـخر بـ الاخت اللي الله وهبها بدال أختها الحقوده ,,

( رقت روضه الدري ..

ومسرع ماتبعتها حمده ..

وبدون لاتقول أي كلمـه ..

وبدون لاتلوم امها اللي تركتها مصدومه فـ مكانها ..
×

.

.

" فـ فله بو راشـــد "

.

فـ هاللحظات كانت اليازيــه مقطعه عمرها من الصياح ولا سكتت موول ..

وكانت اتسب عمرها بشكل فظيـــع ..

( فـ اما عن أم راشــد ..

فـ كان توقعها بـ انه هي متضاربه ويا وحده من البنات فـ حبت اتخلي يزوي براحتها

وسارت حجرتها .. )

( وطبــعاً يزوي دلوعه امها من يوم كانت ياهل اتمووت عليها ..

واخوها عبدالله أيـام ما كانو يهـال يكره يزوي ..

بسبب ان امها تدلعها واايد وهو يغاار من يزوي ..

وكان يتمنى يكون اخر العنقود بدال يزوي ..

بس طبـعاً عبدالله كبر .. والحقد امتسح من قلبه ..

واحين العكس تماماً يخاف عليها ويحبها واايد ..)

.

×

.

" فـ حجـــره يزووي " ..

كـانت من كثر ماتصيح تحس ان عيونها بيظهرن برع ..

وقلبها بيوقف لانها مب مستحمله الصدمه اللي يتها ..

وهي من النوع اللي يتحسس وااايد ..

( نشت من الحاله اللي هي فيها ..

وسارت تتوضى عسب اتصلي لها ركعتين

وتقرا قرآن عسب ترتاح .. و يخف الالم اللي فـ قلبها ... )

ومن عقب ماصلت قعدت تدعي لربها ان يثبت قلبها ع الايمان ويصبرها ...

وكانت دموعها وشهقاتها تعلى كل مادعت لربها ..

قـالت وهي بين دموعها اللي تنزل جنها انهار من عيونها ورافعه ايدينها وتدعي بـ خشوع :

اللــهم انـ ـي أستودعـ ـك قلبـ ـي فـ ـلا تجعـ ـل فيـه احـد غيـرك

واستودعـ ــك نفـسـ ـي فـ ـلا تجعلني اخطـ ـو خطوه الا فـ ـي مرضاك

( ويوم قالت جيه زاد صياحها وشهقاتها بدت تعلى اكثر)

اللهم إليك فوضت أمري وعليك توكلت يا أرحم الراحمين

واغفر لي يامن لا تضيع عنده الودائع ..

.

وطاحت ع السياده وحاطه ايدينها على ويها ..

وهي تصيح من كل قلبها

وكان كل جسمها يرتجف ..

.

ومن عقبها قعدت ع الشبريه ومسكت القران وقعدت تقرا بصوت مسموع شوي

وكان صوتها وهي تقرا يقطع القلب لانها كانت تصيح وتقرا ..

.

.

×

.

.

حدرت ميــره مكتـب أخوهـا ..

وهي تدخل نص رأسـها وجسمها بـرع ..

وأكتفت بـ الابتسامه وهي تطـالعه مندمـج فـ الشغل ..

بس وفجــأه طالعته وهو يرفع رأسـه من عقب ما كان منزل ..

وقـال بـ صوت عالـي : خيــر ميرووه ..!

( طـاحت ميره فـ الارض من الصدمـه والخووف ..

لانه فـجاه رفع رأسـه وصرخ ) ..

فـ أما عنـه فـ طاح فـ الارض من الضحك ع شكلها وهي فالارض ..

.

نشت من طيحتها وهي تجرب من طاولته وتقعد ع حافتها وتقول : مالت مستانس هاه ,,!

( وبـ نبره ونظرات تفحصيـه ) : أطالعك مستانس .. خير ان شاء الله ..!

( أبحر فـكره للبعيـد وهو يستذكر الاحداث اللي مر فيـها ..

ومر عليـه لما غنى لـ روضـه ولما سبته ..

وشكلها اللي عذبـه ولا رايم لحظـه وحده بس يبعده عن بـاله ) !!

صرخت ميره وهي تحرك أيدها جدام ويـه : نحن هنـــأ ..!

طالعها بـ نظره كره .. ليش تقطع عنـه تفكيره ..

وقـال بـ نبره كره وحقد : ندري انج هني يالملقوفـه ..!

( انفجرت من الضحك وقـالت ) : أدري .. أدري ..

ماسبب هذا الكره ..

لاني قطعت تفكيرك بـ فتاتك الغرشوبـه .!

( فـج عيونه للاخر من رمسـتها القويــه .. )

وحتى هي بذاتها خافت من نظراته ..

بس وبحركه سريعه منها قـالت عسب لاتنضرب وبـ خبث : ما قلتلك ..

( وهي تتربع قـالت ) : سرت جناح روضــه لـ حد فووق ..!

( أنعكس الاهتمام بـ عيونه من رمستها اللي شدته ) ..

وقـال : وانتي شو وصلج لـ هناك ..!

قالت بـ أنفعال : أسمع الله يسلمك ..

اأنا والبنات كنا بـ الصـاله .. وفـجأه ما نطالع لك غير وحده طويله أسود بـ اسود

يايه من بيعد تربع ورقت الدري..

نحن بسرعه عرفنا بـ انها روضـه ..

وتبعنها أنا وبنات عمها الثنتين لـ فوق ..

وتمينا مزروعيـن سااعتين جدام جناحها .. ولحد ماتفتح لنـا ..

ولما فتحت لـنا ..

( سكتت .. مما ثأر فضول الفيصل عسب يعرف باجي السالفه .. )

وقـالت وهي تكمل السـالفه .. وبـ نبره حقد : النذله فجت الباب تضحك ..

ونحن ميتن من الخوف عليـها ..!

( بلع ريجه .. ومول مااتوقع بـ انها كانت تضحك ...

كان يتمنى يسمع منها بـ انها كانت تصيـح ..

ومايدري ليش يتمنى ..

يمكن لانه فـ عمره ما طالع ضعفها شقايل يكون )

( كملت ميره وبـ نبره مختلفه ) : بس الغريب يا خوويـه ..

( ركز عيونه عليـها .. وبـ اهتمام وفضول جداً واضـح ) ..

قـالت : واللي صج شدنـي ..

أنه خدها اليميــن كان أحمر بـ شكل مب طبيعــي ..

ولام سألتها غيرت الموضوع ..

( أول ماكملت جملتها .. حس بدقات قلبـه علت .. )

وقـال فـ خاطره : معقول سوت هـ الشيء كله عسب بس بوســه ..

لـ هالدرجه روضــه تكره بـ انه أحد يجرب صوبـها ولا يلمسـها ..

( وجنه تذكر شيء ) : ها مجرد تمثيـل بس ..

وتمثيل جدامي بس ..

عيـل شو سـالفه هاك اللي مايتسمى نايف لما نزل من بلكونتها ..!

( حس بقهر يحرق لـه يوفـه ..

وقـال وهو يحاول يبعد هـ الافكار ) : أذاً يا الفيصل واخيراً أكتشفت نقطه ضعف للاسطوره روضـه..!

( فاق من سرحانه ع صووت أخــته وهي تقول ) : ويــن وصلت ..!

أبتسم بـ خبث وهو يقول : ميــره ..

( سكت .. عسب يطالع ردت فعلها .. ) : وقـال بـ خبث واضح : اطالع بـ انه علاقتج أنتي و روضـه وايد قووت ..!

فهمت شو يقصد .. وبسرعه قـالت : لااا فصول دخيلك لاااا ..

والله ماصدقت انه البنت ردت تثق فيـه .. تي أحين وتدمرها بـ خططك ..!

.

.

×

.

.

فـ بيـــــت بوســـــــالم ..

روضه وهي ناشه من الرقاد وتطالع ع الساعه : آووووف الساعه 2 وانا لحد احين راقده

(نشت روضه من الشبريه بسرعه تأخذ لها شور سريع ، ومن عقب ماخلصت سارت تصلي الظهر)

.. قرت لها صفحتين من القران وبدت تتلبس عسب تنزل تحت ..

روضه وهي طالع عمرها فـ المرايه وترمس روحها : تجهزي يا روضه حق الهزاب

اكيد احين الاخت شما معبيه راس امايه عليه .. بنتج راقده لساعه جم

ومادري شو ..

( وعقب كملت رمستها ) اووه انا واايد معطيه شما ويــه زياده عن اللزوم ..

اعلى ما فخيلها تركبه .. ليش اعور راسيه عسب وحده ماتسوى ...

ابتسمت روضه ابتسامه رضى عن شكلها .. ونزلت تحت ..

( روضه كانت لابسه كندوره مخوره بنيه .. عليها اوراق خضره عوده .. ومخصره عليها

وكانت قمــه فـ الرووعه .. واللون كان شالنها ..

وشعرها مرفوع بـكليب ونازله جمن شعره وهي تحتضن ويها وملامحها الطفوليـه .. )

نزلت من الدري وهي تحدر على الصاله المقابله للدري .. بس ما لقت حد فـ الصاله

وبهمس قالـت : بسم الله .. وين قوم بني عبس سارو .. << تقصد اهلها خخ

وجان اتيي البشكاره من ورا روضه : miss rawth ( انسه روضه )

روضه وهي بزيغه : بســــــــم الله الرحمن الرحيم ..

ويوم طالعت على البشكاره قالت : خس الله بليسج خوفتيني بلاج ..؟

البشكاره : انتي يريد ماما ؟

روضه : هيه وينها ..؟

البشكاره وتأشر على صوب صاله الطعام وقالت : كلو هناك ياكل غدا ..

روضه : اهااااا .. عسب جيه كلهم منقرضين .. اوك ثانكس

.

واتجهت لصاله الطعام ..

واول ماحدرت الصاله جان تزقرها امها : روضـــــه ..

روضه وفـ خاطرها : والله اني توقعت .. احين بنبدا فـ المحاظره ..

ام سالم : رواااضي بلاج غلايه انا ازقرج ..؟

روضه وهي مب مستوعبه .. " غلايه " ..

وبسـرعه ردت على امها : لبيــه امايه ؟
ام سالم : لبيتي حـايه .. تعالي غلايه هني حذالي ..

اليوم أمرت البشاكير يسونلج الغدا اللي تحبينه ..

روضه وهي شاقه الحلج وتقول بـ حالميه : " منـــــــــدي " (ورفعت أيدينها وهي تكتلهن وتحطهن حذال خدها وتطالع عليـه بـ حالميه ) ..

الكل يوم قالت روضه جيه ضحك عليهـا ..

.

روضه وهي مستانسه : فديييييييييتج يا احلــــــى ام فـ الدنيا وهااج احلى بوسه

( وباست امها على خدها )

شما كانت تتطالع على روضه وهي كل حقد الدنيا فـ قلبها ..

ام سالم : بالعافيه يا قلبي .. جم روضه عندنا ترا هي اللي وحده ..

روضه وهي بتمووت من الوناسه : اماايه دخيلج خليني اتغدا لا احين انش واقعد ابوس فيج بووس ..

ام سالم وهي مستانسه لوناسه بنتها : ههههههه لا دخيلج خلاص تغدي ..

.

.

\

/

\

/

\

/

\

.

فـ بيـــت بو راشد ...

(كانو كلهم متيمعين على طاوله الطعام .. بو راشد وام راشد وعبدالله وسيف ..

الا يزوي ما كانت وياهم ..)

البشاكير وهن يحطن الغدا حقهم ..

بو راشد : الا وين يزوي ما طالعها هني ..؟

ام راشد : مادري والله طرشت لها جم مره البشاكير وماترد عليهن ..

وعقب طلعتلها انا بروحي وقالت انها ماتبا .. حتى ما فجت الباب رمستني من ورا الباب

سيف وبخوف : ليــــش بلاااها هي مريضه ؟؟؟؟

ام راشد : مادري والله بلاها هـ البنت من امس وهي مب على طبيعتها

من يات من بيت قوم بو سالم وهي منجلب حالها ..
سيف وهو ينش من مكانه : كيــف يعني من يات من بيتهم وهي منجلب حالها ..

اكييد حد ضايجها ولا قالها شي ..؟

ام راشد : مادري والله يا امايه ..

سيف : وينها هي احين ؟

ام راشد : فـ حجرتها .. خلها يمكن راقده احين ..

(سيف على طوول نش من مكانه وتوجه على حجره يزوي )

.

(سيف وهو يدق باب حجره يزوي وبكل خفه )

يزوي كانت ماسكه القران ومحطيتنه على صدرها وهي حاضنه ريولها ومتسدحه على الارض

وكانت دموعها تنزل منها بس موول ما تطلع صوت ..

يزوي من سمعت دقه الباب على طول عرفت منو صاحب هـ الدقه

محد يدق الباب بـ هالخفه الا سيف .. سيف ماغيره ..

يزوي وهي تحاول اتغير من صوتها : منـو ؟

سيف : انا يا قلبي ..

يزوي من سمعت حس سيف غمضت عيونها .. وبدن دموعها ينزلن اربع اربع

وفـ خاطرها : انا مااااستاهل حبك يا سيف .. انا ماستاهل حبك لي ..

سيف وبصوته الحنون : يزوي قلبي دخيلج لا تخوفيني عليج فجي الباب

يزوي وهي بسرعه تمسح دموعها عسب لا يطالعهن سيف ..

وسارت وفجت الباب ..

سيف وهو يحدر حجرت يزوي ويقعد على شبريتها (سريرها) حذال يزوي..

وبكـل حنيـه وخوف صادق يمسح على عيونها : يزوي قلبي بلاج ليش عيونج جيه ..؟

يزوي وتحاول اتخلي صوتها طبيعي وتبتسم حق سيف

لانها من طالع على سيف لا ارادي تقعد تبتسم : مم مااشي

سيف وبعدم تصديق : يزووي انتي تجذبين على الناس كلها بس ماترومين تجذبين عليه ..

(وهو يمسح على ويها بأيده) بلاهن هـ العيون .. ليش متنفخات جيه وهـ الحزن اللي شالاتنه ليـش .. ؟؟؟

يزوي مارامت تستحمل لمسه سيف لها .. وصوته اللي يظهر فيه صدق حبه لـ يزوي

ونزلت منها دمعه حااره على خدها .. وبسرعه نزلت راسها

سيف وبخوف الدنيا : يزووووووي .. الا دمووعج مابا اشووفهن .. ليش هـ الدمووع

وبسرعه مسح دمعه يزوي بأيده ..

يزوي لو احد مضايجج بشئ خبريني .. والله ..ورب الكون لا اعدمه من هـ الدنيا..

بلاج .. دخيلج ارمسي ..

يزوي وهي بدت شهقاتها تعلى : سـ ـيف أ أ أنـ ـا مضايجه شـ ـوي ..

وبدت ملامحه ترتخي عسب يحاول يخفف على يزوي : شو مضايج فيج يا عيون سيف ..

وهي منزله راسها وتصيح بهدوء : لا تحاتاني .. عقب بستوي احسن ..

.

(خذ يزوي وحطها فـ حضنه ): اباج تتـــأكدين ان سيف دووم وراج يا يزوي .. وفـ عمره مابيتخلى عنج

وشو ما ستوالج لا تشلين هم دامني انا اخوج ...

لانه فـ عمره محد يروم يمس شعره من اليازيه وسيف بن سلطان راسه يشم الهواء ..

( من سمعت رمسه سيف مسكت فيه بقووه وكأنها ادور على مكان

تشرد فيه من الهم اللي محوط عليها ) ...

وهي بين دموعها : سيف دخيلك لا تودرني .. دخيلـــك ..

لمها بزياده على حضنه وبقوه اكبر : والله مابودرج يا يزوي والله ..

غفت عيونها على حضن سيف من دوون لا تحس ..

(لانها اصلا موول مارقدت طول الليل وهي تصيح وتقرا قران )

من حس ان قبضه يزوي بدت ترتخي .. عرف ان يزوي رقدت

وخذها بين ايدينه وحطها على شبريتها وغطاها عدل .. وقعد يمسح على

شعرها اللي كانت مبطلتنه وكان ماخذ جزء من الشبريه لان يزوي بطبيعه

شعرها طوويل يوصل لجريب ركبها ..

وفـ خاطره : ليش يا يزوي كل هـ الحزن والتعب اللي واضح عليج

منو اللي مزعلنج هـ الكثر .. والله والله لو اعرف منو مزعلنج لا انفيه من الوجود ..

باسها سيف على خدها وسار عنها ..

\

/

\

/

\

/

كانت الافكـار توديه وتيبه يحس انه من اخر مره شافها وهو موول مب على بعضه ..

خاطره يشبع عيونه منها ومن شوفتها .. بدال الاربع السنين اللي طافو

من دون لا يطالع عليها ..

كان يفكـر بشي مقنع يخليه يسير بيتهم عسب يشوفها ..

وفجـأه جنه يته فكـره ومقنعه بقووه عسب يشوف روضه اللي ملكت تفكيـره ..

متعب وبأبتسامه جانبيه : فديييييتج والله .. وربي تولهت على هاك العيون الذبوحيه ..

وبسرعه سار يتكشخ اخر كشخه عسب يسير بيت بو سالم ..

\

/

\

.

.

حمدوه وهي تصـارخ ..: امــــــــــــــــــايه .. أمــــــــــــايه

ام عبدالباسط : خيـــر بلاج اتباغميــن جيه ..؟

حمدوه وهي مسويه عمرها معصبه : انا بسير بيت قوم رواضي ..

ام عبدالباسط : شو ماتستحين انتي اربعه وعشرين ساعه فوقهم ..

وهي تترجى امها : اماايه دخييلج والله اني ملانه هني بروحيه ..

ام عبدالباسط : خلي عنج قري هني .. ماشي طلعه ..

وهي ماده البوز : هااا قرينا .. شو الفايده احين ..

ام عبدالباسط وهي تحرك راسها وفـ خاطرها تضحك ع شكل بنتها .. وسارت تتطالع البشاكير ..

طرشت مسج حق روضه :

( روضه بموووووووت من الملل دخيلج شرديني امايه ماخلتني ايي عندج)

روضه قرت المسج وضحكت ع حمدوه اللي شكلها صج ملانه .. وردت ع حمدوه :

( خخخ ليش ما خلتج شو مسويه انتي )

حمدوه من قرت المسج انقهرت ع برود روضه :

( يالخااايسه انا احين اطلب منج المساعده وانتي تتمصخرين

ما سويت شي بس اونه فضيحه ايي عندكم كل ساعه)

روضه قرت المسج وعرفت ان حمدوه مقهوره وحبت تقهرها زياده وطرشت :

( ههههه صدقها اربعه وعشرين ساعه رازه بويهج هني ... ثقلي شوي )

حمدوه من قرت المسج كانت بتجتل روضه :

( ماااااااالت علييج يا المعفنه محد يبا ايي عندج انجلعي )

روضه من قرت مسج حمدوه انفجرت ضحك ..

وردت ادق على ام حمدوه ..

ام عبدالباسط : هلا والله بروضه ..

روضه : هلا بج زوود .. شحالج خالوه ..؟

ام عبدالباسط : بخير وسهاله .. ومن صوبج غلايه ..

روضه : مديمه بخير وسهاله ..

ام عبدالباسط : الا انا شاكه فأتصالج شو تبين بسرعه قولي ..؟

روضه : ههههههه والله انه محد فاهمنيه غيرج ..

ام عبدالباسط : هيه قلت انا هـ الاتصال وراه شي .. قولي شو عندج ..؟

روضه : طلبتج خالوه قولي تم ..

ام عبدالباسط : والله جني عرفت شو تبين .. عطينج امريني ..

روضه : تراج قلتي تم ..

ام عبدالباسط : وانا عند كلمتي ..

روضه : عيل طلبتج حمدوه اباها اتيي ويايه بموت من الملل بروحي ..

ام عبدالباسط : ههههه توها مطفرتبي وحاشره الدنيا تبا اتيي عندج .. بس ما خليتها

روضه ومسويه عمرها ماتدري : افااا ..

ام عبدالباسط : خلاص احين بخليها اتيي عندج ..

روضه : تسلمييييين والله خالوه ..

ام عبدالباسط : يلا حبيبتي تامرينيه بشي ..

روضه : سلامتج ..

( وبندت عنها وع طوول طرش حق حمدوه مسج .. يلا يالخايسه سوينالج واسطه )

حمدوه من قرت المسج مافهمت ..

وطالع امها يايه صوبها .. ام عبدالباسط : سيري اذا تبين ويا روضه ..

حمدوه وبـ وناسه : واللللللله....!!!!!!!

ام عبدالباسط : هيه والله سيري ..

حمدوه ماصدقت وع طول سارت ويا روضه ..

.

\

/

\

/

\

/

\

/

فـ حجره روضــــــه ..

روضه كانت تلعب ع لابها ..

وفجــأه ..

تحدر حمدوه على روضه وتفج الباب بقووه : يالخاااااااااااااااايسه ..

روضه وبزيغه : بسم الله .. الناس يوم تحرد اتسلم .. مب اتسب الخلق ..

حمدوه : هههههه كيفي معصبه عليج ..

ردت ع لابها وقالـت : وليش ان شاء الله معصبه عليه شو مسويتبج احيدني مشردتنج مسويه خير فيج ..

حمدوه : هههههه لانج ماقلتيلي انج بدقين على امايه قعدتي تحرقين اعصابي ..

روضه : ايلسي ايلسي بسج هذربه ..

حمدوه : يزوي ما يات ؟

روضه :لا والله ..

حمدوه : انزين انتي شو تسوين ؟

روضه : مم العب .. تعالي بنسير نلعب بليستيشن

حمدوه : يلااا ..

روضه وهي تسوي عمرها معصبه : سمعي من احين اقولج اذا فكرتي بس تفكير تسوين شرات يزوي والله

( وترفع ايدها بتهديد) : لردج بيتكم ..

حمدوه وبسرعه : لا .. لا .. لا.. لا.. كله ولا بيتنا والله مابغش والله ..

روضه وهي تضحك : ههههه الادب ولا غيره ..

سارن البنات يلعبن سيارات ويتحدن بعضهن ..

حمدوه : والله ماارضى انتي اصلا متعوده تلعبين عسب جيه اتفوزين كل مره ..

روضه وتضحك ضحكه شر : ها ها هاهااا .. انقلعي وتعلمي كيف تسوقين السياره .. << دخيلج يا يالشر

حمدوه : بسني لعب ..

روضه : قولي بسج تهزيئ خخخخخخ

حمدوه عصبت على روضه وطلعت فوق كرشه روضه وتزخ ايدينها عسب لا تحاول تخوزها : عيل بنشووف اليوم منو بيفكج منيه ..

روضه وهي متفطسه ضحك : هههههه حمدوه ههههههه خوزي من فوقيه

وهي تقرقط روضه اللي متفطسه ضحك : اندووج عيل ..

روضه وهي محمره من الضحك : ههههههه حـمـ ـ ـدوه خـ ـوز ي بتخـ ـنقيني

حمدوه وهي تزيد على روضه : والله مابخووز ..

(روضه وبدت تستوي زرقه لان حمدوه قاعده فوقها وقاطعه عليها التنفس)

ويوم طالعت ان حمدوه مب ناويه اتنش من فوقها خلت عمرها ميته ..

حمدوه واللي توها انتبهت حق روضه وبخوف : ايييييه يالخاايسه اسولف وياج ( ونشت بسرعه من فوقها)

و بخوف وشوي وبتصيح : روووضه والله كنت اسولف وياج .. دخيلج نشي .. رووضه

روضه مارامت تمسك عمرها زياده وبدت تضحك ع شكل حمدوه وهي متزيغه ..

روضه : هههههههههه كح كح ههههههههههههههه كح كح

حمدوه عرفت ان روضه اتقص عليها جان ادح روضه : يالخااااااايسه والله خوفتينيه عليج يالنذلـــــــه ..

روضه وهي بعدها تضحك : هههههههههه شو اسويبج ماطعتي اتخوزي ..

كنتي بتجتلينيه بدا التنفس ينقطع عنيه .. قلت ها اسرع حل عسب اتخوزين..

حمدوه وهي معصبه : مااااالت والله ..

(وعقب ساد الصمت بين حمدوه وروضه )

روضه وهي تتطالع على حمدوه ..

وقالـت : حمدووه ..

حمده : ها ..

روضه : احسني واايد مفتقده يزوي ..

حمدوه : وانا والله .. اشتقتلها .. واشتقت لـهبالها وسوالفها ..

روضه : حمدوه ليش انا وانتي قاعدين جيه .. لازم نعرف يزوي بلاها متغيره جيه

حمدوه : دقيت عليها اليوم جمن مره وماردت عليه موول ..

روضه : شفتي قلتلج يزوي مب طبيعيه .. حتى انا جربت وماردت عليه ..

حمدوه : روضه يمكن يزوي محتايه اتكون بروحها ..

روضه : وانا قلت جيه .. بس هي احين بتكمل يومين قاعده بروحها ..؟

حمدوه : يعني شو رايج نسوي ؟؟؟

روضه : اول شي خلينا انسير بيتهم .. ونحاول نفهم منها ليش تغيرت جيه فجـأه ..!

حمدوه : شورج وهدايه الله .. بنسير لها فليل شو رايج ..

روضه : وليش مب احين ؟؟

حمدوه : عسب اتكون اكثر رايقه .. لان احين يمكن بعدها متضايجه ويمكن ماترد علينا

واكبر دليل يوم دقينا عليها وماردت .. يعني احين سيرتنا مالها داعي ..

روضه وهي جنها اقتنعت برمسه حمدوه : تصدقين ..!

حمدوه : شوو ؟

روضه : اول مره اتقولين شي صح ..

حمدوه من القهر فرت على روضه بـ الرموت اللي حذالها ..

روضه : ههههههه بلاج ماقلت شي ,, ترا هـ الزمن مايحبون الصدق

حمدوه : اسكتي لا احين اجتلج .. مب متفيجه حق رمستج اللي ما تخلص ..

روضه : احمدي ربج ان روضه بنـ ..

حمدوه وتكمل : بنت احمد اترد عليج وترمسج ...

روضه : هههههههههه شااطره عيل يوم حافظه ليش ماقلتيلي من البدايه عسب ماتعب حلجي ..

حمدوه وهي واصله حدها : بقووووووووولج المره اليــــــايه انزييين ..

روضه وهي تقهر حمدوه بضحكاتها : ههههههه انزين يا بنت صربوخ هههههههههه

حمده وهي تتطالع على روضه : فديتها والله اللي كانت تزقرني بـ بنت صربوخ ..

تنهدت روضه .. ومن عقبها سكتت ...

\

/

\

/

\

فــ بيت بو راشــد ..

ام راشد : يزووي قلبـي نشي كليلج لقمه بتموتي من اليوع احين بيكمل لج يومين وانتي ما حطيتي شئ فـ حلجج .. نشــي غلايه .. يلاااا ..

يزوي وهي كارهه عمرها : امايه قلبي والله ماليه خاطر ( وزختها العبره وبدا صوتها يتغير على انها بتصيح)

والله مالــــيه خااطر حق الاكل .. ( وتكورت على عمرها وبدت اتصيح )

ام راشد ماستحملت تتطالع بنتها جيه منهاره وهي قاعده تتطالع عليها وماتسوي لها شي ..

وجربت من بنتها وقعدت حذالها : يزوي واللي يرحم والديج قوليلي انتي شو مضايجنج .. وريحيني

لا تخليني احاتيج جيه ..

يزوي وهي بين شهقاتها : مـ ـاشي امـ ـايه بس ابـ ـا اكون بروحـ ـي ..

ام راشد وهي تصيح ع حاله بنتها : بس انا ما يطاوعنيه قلبي اطالعج جيه اتصيحين

انتي قطعه منيه .. انتي قطعه من يوفـي يا يزوي .. قوليلي دخيلج بلاج ...؟

يزوي وهي ترتمـي فـ حضن امها : امايه انا ابا امووت والله تعبت من اللي انا فيــه والله .. والله تعبــت ..

ام راشد : بسم الله عليج ياربي .. يعل يومي قبل يومج ..

يزوي وهي دموعها اربع اربع : لا تقولين امايه جيه .. وين تبيني اسير اناا .. انا منو لي فـ هالدنيا غيرج .. تبيـن اتركيني شرات غيرج .. لااااا ...

لااااااااا .. الا انتي يا امايه الا انتــــي .. دخييلج لا تركيــــني .. تبيني امووت ...

دخيلج لاتسوينها دخيييييييلج... ( وبدت اتصيح بصوت عاالي وهي ماسكه فـ امها )

ام راشد وهي تحضن بنتها بقووه : يزوي قلبـي انا ويااج .. انا وياج يا روح امج

والله مابتركج والله ...

وهي تكمل : يزوي قلبـي منو مزعلنج جيه ..؟ ريحينيه يا يزوي قوليلي

بس لا تخليني احاتيج ..

وهي دافنه راسها فـ حضن امها وتصيح : محد امايه بس انا مليت من كل شي فـ هالدنيا .. واتمنـى امووت اليوم قبل باجر ..

ام راشد وهي تمسح على راس يزوي : افاا يا يزوي .. وين ايمانج بالله .. انا ماربيتج على جيه

وين يزوي القويه .. انتي وياج الكل .. انا وابوج و روضه وحمده واخوانج.. وسيف اللي لو يدري عن الرمسه اللي قاعده اتقولينها احين ... جان زعل عليج ولا رمسج موول ..

يزوي : ............ " لاتعليق "

ام راشد : يلا يا روح امج .. نشي وصلي لج ركعتين واقريلج جمن صفحه من القران

وبترتاحين .. صدقيني بتحسين بـ الراحه .. وعقبها تعالي كليلج لقمه ..

بتموتين من اليوع جيه ..

يزوي : ........ لا زالت ع حالتها " لاتعليق"

وهي تكمل : يلا انا بخليج احين وانتي راجعي نفسج .. وماباج اتفكرين بـ شي ماله وجود ..

وابا اشوف يزوي القبليه لاني اشتقتلها واايد ..

( وظهرت ام راشد من حجره يزوي ...

اللي من ظهرت امها ع طول نشت وصلت وقرت قران شرات ما امها قالت لها ..)

وفجــأه ماتسمع الا فونها يدق .. كانت بتموت من الخوف .. تخاف

تتطالع على الشاشه وتتطالع شرات الرقم اللي كان يدق عليها .. بس

خذت نفس عميق وجربت صوب الفون ومسكته بأيدينها الضعيفه وهي كلها ترتجف ....

اول ما طالعت الرقـــم كانت تحس عمرها بيغمي عليها من الخوف ..

بس كانت اتشجع عمرها وتقول : (يزوي انتي اقوى من هـ الشي كـله ... لا تستوين ضعيفه ردي .. )

كانت محطيه صبوعها على الرد بس كانت متردده وفـ خاطرها تتمنى انه

يبند وتفتك من هـ الصراع النفسي اللي عايشتنه ..
وفجــأه ساد الصمت فـ الحجره ... ووقف الفون من الصياح .. من عقب ما طول وهو يدق ...

بس مسرع ما رد يدق مره ثانيه ...

زاد ارتباكها وخوفها .. وكانت اترمس عمرها : يزوي لازم اتردين

وتحطين نهايه لـ هالشئ .. لمتى بتعيشين فـ هالصراع .. انتي لازم تردين

وتشوفين شو السالفه ...!

ومن عقب تردد ضغطت على الرد وهي كلها ترتجف ..

يزوي : .......

........ : يــــزووووي ... !!!!!!!!

(يزوي من عقب ماسمعت الصوت حست جنه احد غرس خنجر مسموم بيوفهــا ..

تعرفه هـ الصوت وربي تعرفــه ...)

...... : يزوي دخيلــج قوليلي انج انتـي اللي راده علـــيه .. لا تسكتيـن ..!

دخييييييلج يا يزوي...

..

(يزوي من سمعت الحس اللي ياما سمعته بدن دموعها ينزلن لا ارادي جنهن انهااار .. وحطت ايدها على حلجها عسب تحاول تكتم شهقاتها )

........ : يزوي دخيــل والديج لا تعذبينــي والله ان سكوتج يذبحنـي

ويعذبنـي زياده.. والله انـي تـ ...

( خلاااااص ما ستحملت زياده .. سمعت بما فيـه الكفايه ..

بندت بسرعه المكالمه .. واول ما بندت طااااحت ع الارض من طولها

وهي منهااااااره كليـــاً .. كانت تصيح صياح جنها طفله ميتمه من امها وابوها ..

طفله انحرمت من الحضن اللي يلمها فـ وقت خوفها وحاجتها له ..

وكان كل جسمها يرتجف رجفه مب طبيعيـه .. كانت تصيح وهي تحس انها

جثه بليا روح .. )

وصرخت صرخه كانت كافيه انها اتزلزل كيان انسان : لاااااااااااااااااااااااااااااااااااااااا

وبدت تكسر كل شي جدامها : لااااااااااااااااااااااا

لااااااااااااااا ليـــــــــــــش احيـــــن من عقب كل هـ السنيــــــــن

ليـــــــــــش احيــــن ...

حقيييييييييير .. خااااااااين .. خاااااااااااين ..

وطاحت فـ الارض وهي منهاااره ع الاخر ... وحضنت ريولها بصدرها

وبدت بنوبه الصياح اللي صارت رفيقتها هـ الايام ...

.

.

.

\

/

\

/

\

فـ حجــره الفيصـــل او حمدان ..

.

.

كان يخطط لـشي يقدر بـ هالشـي يطالع ضعـف روضه اللي تخفيـه عن الكـل

وكـان يدور على شـي روضـه اتحبـه ومستعده اتضحي بكل شي عشانه ...

وفجــأه خطرت على باله خطـه مجرد التفكيـر فيها تحسسه بـالانتصار ...

.

وهو يضحك بخبـث : ههههه بنشوف يا روضه بنت احمد لحد وين

بتوصلـين ... يا انا يا انتـي .. واكيـد " انــا " لانج خسرانه من البدايه لانج بس فكرتي تتحدين الفيصـل الـ ... ههههههه ...<< خيبه يالثقه ..

.

.

\

/

\

/

\
فـ حجره روضــه ...

حمدوه وهي ملاااانه : روااضي مليــــــــت ابا اسير مكان ثاني تعبت من حجرتج ..!

روضه وهي عيونها على اللاب : احين بنسير ويا يزوي صبري ..

حمدوه وهي بتأفف : افففففف شو هـ الملل .. وينج يا يزوي الخاينه ليش

ابتعدتي جيه .. هانت عليج العشره اللي بينـا ..

لفت عيونها على حمدوه وقالـت : لا تقولين جيه ..

محد يدري بظروف يزوي يمكن شئ اقوى منها خلاها اتسوي جيه ..

حمدوه وهي تنزل عيونها للارض : وانا هالشي اللي معور قلبي ..

ان يزوي قاعده تعاني بروحها ونحن قاعدين نطالع عليها ..

.

فجــأه يدق فـون روضه .. وتفز حمدوه بسرعه وهي تصرخ : هيييييييييه يزوي اكيد هي اللي داقه ..؟

تغيرت ملامح ويها وهي تتطالع على اللي داق : اففففففففف ...

حمدوه وبلهفه : منـــــــووو ؟؟؟؟

روضه بدون نفس : بو لسان وسخ ..

خاب ظن حمدوه و تتنهد وسارت فـ البلكونه ..

(و فـ خاطرها : خير شو عندك بعد على شو ناوي احين يا فصيلان ..؟)

وهي ترد ع المكالمه: .......... " لاتعليق"

الفيصـل وبخبث واضح على محياه : لو انا مكانج مابقعد جيه بـ هالبرود ..!

روضه وهي مب فاهمه شي من رمسته : .....

وهو يكمل : ادري يا بنت احمد انج مابتردين عليه ..

بس اعتقد ان نايف الـ ... يخصج

يا الـ .. ( كان يبا يسبها بس رد كلمته ) يا ينت ابوج ..

.

.

هنـــي وخلاص الا نايف حست ان الدنيا بدت تستوي سوده وبدت ملامح

ويها تتغير وهي تتلعثم فـ الرمسه : نـ ــايــ ـف بـ ـلاه ؟؟؟؟

الفيصـل بضحكه استهزاء : ههههههه تسألين بلاه .. تعالي وطالعي بروحج بلاه ..

بس تصدقين عورنيه قلبي يوم طالعت حالته جيه وقلت لازم ادق عليج

اتيين تودينه المستشفى وتشفقين عليـه شرات ما هو شفق عليــج وعقج فـ المستشفـى ..

هههههههههههه

حست ان الدنيا توقفت خلاااص .. وبدا التنفس عندها ايضيج ... وتتنفس بصوت مسموع .. وبرجفه ( ولاول مره روضه تصرخ فـ ويه الفيصل بـ هالطريقه ) :

الا نـــــــــــــــــايف يالحقيــــــــر .. انـــــــــت شوو سويت به ....؟

الفيصل وهو مستانس ع صوت روضه وهي شكلها صج متزيغه على نايف :

ههههههه قلتلج تعالي بروحج طالعي بلاه ... ولو سمحتي بسرعه قبل لا يموت هني

لاني ماحب اطالع جيه مواقف ... ههههههههه

وهي واصله حدها : نـــــــــايف ويــــــــــــن ؟؟؟؟؟؟؟

وكمل بضحكـه الانتصار : تعـالي فالمكان الـ ..... ، ( وهو يضحك ) ..!

من دون حتى لا تقول كلمه ع طول بندت فـ ويه الفيصل وطيراان تلبس شيلتها وعباتها وخذت سويج موترها وهي تربع ربــــــع ع موترها...

حمدوه وهي تركض وراها : روااضي ..روااضي على وين ..؟

روضه موول ماحست بـ حمدوه و ركبت موترها وظهرت بسرعه جنونيه على المكان اللي قاله لها الفيصـل ..

.

.

وهي وسط الشارع كانت تسوق بسرعه جنونيه كانت كافيه انها تجتلها

.. بس روضه كانت ماتحس بشي حوليها موول ..

كانت دموعها تنزل بدون توقف .. وهي تردد فـ خاطرها :

( الا نــايف ياربي دخيلك خذني ولا تاخذ نــايف .. الا نايف ياربي دخيلك )

ومسحت دموعها بسرعه لانها تقريبا وصلت للمكان اللي وصفها اياه الفيصـل ..

.

وهي تنزل بسرعه من موترها وما طالع جدامها الا الفيصل

وهو محطي ايدينه فـ كندورته وقاعد يطالع على البحر ومعطي روضه ظهره ..

(قعدت تدور بـ عيونها على نـايف )

الفيصل حس بـ روضه يوم يت .. ولف عليها وقعد يطالع عليها وهي تدور بعيونها على نايف ..

وهمس لـ روضه : تدورين على احد ؟؟

وهي فاجه عيونها وتصرخ : انـــــــت وين وديت نـايف ؟؟

الفيصل : هههههه لـهدرجه خيفانه عليه ..

وهي واصله حدها : اخوويه الفيصل ها مب وقت سوالفك قولي وين وديت نــايف ؟

كانت يطالع عليها بكل برود وقـال : نـايف فـ بيتـه ...!

.

روضه وعلامت التعجب واضحه على ويها ..!!!!!

.

الفيصل بسخريه : ههههههه ادري ان استيعابج بطيئ وماتفتهمين بسرعه شرات خلق الله ..

(سوت طاف حق رمسته وجنها ماسمعته )

وهو يكمل : يعني بالمختصر المفيد نايف مافيه شي بس حبيت اضايج فيج

ههههههههههههه

روضه وهي كل كره الدنيا فـ قلبها على اللي واقف جدامها وقالت بقهر واضح : صج مافيك ذره انسانيه ..

وسارت عنه ...

( بس كان اسرع منها ومسكها من ايدها وجربها صوبه وهمس فـ أذونها :

هـ المره بس تحذير يا بنت احمد .. والمره اليايه بيكون التنفيذ .. )

حاولت اتبطل ايدينها منه وتبعد عنه .. بس كان زاخنها من ايدينها

بقو .. وهو يطالع على عيونها وشبه سرحان ..

(لا زالت اتحاول اتبطل ايدينها من الفيصل .. )

رفعت عيونها وقالت بخـوف من قربه لها : اخويه الفيصـل لو سمحت وخـر ..

ركز عيونه عليـها وهو يقول : هـ المره ما بتركج شرات كـل مره تشردين من بين ايديه يا دلوعه ابوج ..

(فجت عيونها بخوف ها شو يقصد برمسته ) ..

حاولت قدر المستطاع أنها ماتوضح له خوفها منه : انت شو تبـــا منيه ..!

جرب صوبها اكثر : ابــا اجسر هـ الغرور اللي فـ عيونج ...

حاولت تبعده من ويها وتدفع بقوه ايدينها وبخوف الدنيا : احتــرم حالك .. انا لحد احين محترمتنك ..

وما سويت شي .. وانا احذرك لا تحاول تجرب صوبيه .. ولا بـ ...

(قطع عليـها وهو ويهمس على اذونها ) : ولا شو بتسوين فيـه مثلا يا دلوعه ابوج .. بتضربيني على ايديه .. هههههههه ...

ويكمل بخبث : طالعي انتي وين يا حلوه .. ولا ما وحتـي اطالعي المكان اللي انتـي فيه ..

ما لومج من خوفج على حبيـب القلب .. اكيد ما بتنـتبهين على المكان اللي انتي فيه ..

طالعـي عدل يا حلــوه انتـي ويـن ...

وجنـه احد صب عليها ماي بارد .. وانتبهت للمكان اللي هي فيه

وقالت فـ خاطرها : لااااا مستحيل .. انا شقايل مانتبهت للمكان ..

حسبـي الله عليك يا فصيلان .. قصيت عليه ومن الزيغه مانتبهت على عمريه ..

.

( من لحظه ما وصف لها للمكان توقع ان روضه ما راح تنتبه للمكان اللي هو وصفها اياه ) ..

المكان كان عباره عن شاليهات خاصه .. وهالمكان اكثر اللي يزورونه

العرسان .. لانه ممكن تحجزه لك بروحك ومافي بني ادم يتجرأ يجرب صوب هـ المكان

لانه يستوي ملكك الخاص من عقب الحجز .. )

.

الفيصل وهو يطالع روضه بنظره خبث : طالعتي يا بنت احمد انتـي وين ..

انتـي يتـيني بريولج لحد مكانـي ..

وماراح اودرج شرات كل مره ..

حاولت تخفـي الخوف اللي متملكهـا بغرورها وثقتها بنفسها : هههه لو فكـرت بس مجرد تفكير

اتمس منيه شعره والله يالفيصـل ما تلوم الا نفسك ..

ضحك بضحكه استهزاء : هههههههههه اتهددين وانتـي بين ايديه يـا الوسخه

.. طالعي على ساعتج ولا بعد مانتبهـتي للوقت يا حلـوه .. فيـه بنت عرب تظهر من البيت احيـن ..

ولا وين فـ مكان " خــــاص للعـرسان " ههههههههههههه

.

روضـه وهي حاسه عمرهـا بتموت خلاص نهايتها جربت .. وصوت الفيصل اللي مايطمن موول ..

ولا حركاته اللي تخلي الواحد غصب عن عيـنه يخاف ..

(الفيصل لاحظ شرود وسرحان روضه .. )

جرب منها فوق ماهي جريبه حتى حس انه ضرب فـ صدرها

وهمس بـ همس مخيف فـ اذونها وأنفاسه تحرق ويها حرق : وين يا حلوه سرحانه لا تستعيليـن كل شئ فـ وقته حلو ..

وانا هنـي مابشرد هههههههههه ..

(روضه وصلت حدها هنـي وبس .. الا الطعن فـ عفتها وشرفها )

وقالت بقهـر الدنيا وبغرورها اللي يشع من عيونها .. بس بما انكر ان الخوف كان ممتلكها :

ما بقـى الا انت يا الفـ .. ( سكتت وبـ قهر كملت ) : ولا اقولك حتى هـ الاسم ماتستاهله ..

لان اللي شراتك(وهي طالعه بعيونها بأشمئزاز من فوق لـ تحت ) : مايستاهلون احد يزقرهم شرات الاوادم ..

وكملت بكل ثقه وغرور .. والحقد واضح فـ عيونها :

ولو سمحت اقولها لك بـالطيب ودر ايديه .. لاتنجسها بوساختك " يالوســـــخ ".. (تعمدت تمدها)

(كان يغلي من داخله والنار اللي يحسها بيوفه كانت تكفي انها تحرق بلاد ..شقايل تتجرأ وتسبه جيه .. وهي بين ايدينه .. المفروض تركع وتترجاه

انه يودرها ولا يسوي فيها شئ .. بس هو يطالع فـ عيونها العكس .. يطالع الغرور والتحدي )

وبقهر الدنيــا كلـه .. سحب روضه بكـل قوته على غرف الشاليـه .. وكان يرمس بكل قهر ويقول :

احيـن بطلعه من عيونج هـ الغرور كله .. وان ما طلعته ما كون الفيصـل الـ ... ، يالوسخه الحقيــره ما بقى الا انتـي تتحديني ...

انا واايد صبرت عليـج ..

( روضه كـانت تلعن الساعه اللي فكرت انها تسب الفيصل ..وكانت حاسه ان الموت ارحم لهـا ولا تكون فـ هالموقف .. )

وهي تحاول تبطل ايدينها من الفيصل بكل قوتها .. بس رجفتها اللي كانت

مسيطره على كل ذره من جسمها كانت تعيقها .. وكانت تتنفس بقوه من الخوف ..

.

.

.

(كانت عيونه منعميـه من الغضب اللي سيطر عليـه .. ولما حس ان روضه

قاعده تقاوم وتحاول تبطل ايدينها منه زاد من قوه قبضتـه .. وزادت خطواته اكثر ..)

روضه كانت تتصارع ويا نفسها وهي حاسه ان نهايتها جربت خلاااااااص

وكانت تقاوم الفيصل بكل قوتها وتحاول انها تجمد ريولها ولا تتحرك ..

لان الفيصل كان يشد روضه ويمشيها بالغصـب ...

لكن كل محاولات روضه كانت فاشله لان الفيصـل كان اقوى من روضـه بـ وااااايد ..

وكان يجرها وراه جــر .. وهو ولا حاس بـ عمره لان الغضب كان متملك الفيصـل ..

وهي بين رجفتها وخوفها اللي كان مسيطر على كل ذره من روضه : اخوويه الفيـصل انت شو قاعد تسوى .. بطل ايديـه ..

.

(الفيصـل ولا جنه يسمع روضه وكانت خطواته كل مالها وتزيد )

.

ومن حست ان الفيصـل مب فـ وعيه وقبضـته اللي كانت بتجسر رسغ

روضه من قوته ..

( جربت راسها من ايده وعضتـه بكل مافيها من قوه .. )

و من قوه العضـه بطـل ايد روضه وهو يحس بألم فـ ايده ..

و من حست انه بطل ايدها

بسرعه البرق تركض على موترها .. بس كانت خطوات الفيـصل اقوى منها بـ وايد

ولحق عليها وزخـها ..

روضـه من حست بأيدين الفيصل اللي مسكت خاصرتها صـرخت بكـل مافيها من الزيغه ..

وحاولت مره ثانيه انها تعضه .. بس من حس بمحاولات روضه مره ثانيه على طول رفعها من الارض وحطها على جتفه جنها واحد من اليهال ..

واتجه بخطواته لمكان الغرف ...

كان كل اللي تقدر عليه انها تضرب الفيصـل بكـل قوتها فـ ظهره وترفسه بريولها ..

( لكن الفيصـل ما ظهرت على ملامحه أي من علامات التألم من ضرب روضه له ..

وبخطواته السريعه اللي كان يخطوها ... كان موجه نظره لمكان الغرف .. )

وبكل قهر الدنيا والغضب عامي عيونه فـج باب غرفه الشاليه بريولـه ..

لانه كان ماسك روضه بأيدينه الثنتين ..

وهي تحاول تبطل من بين ايدين الفيصـل بكل ما فيها ..

ومن حست روضه ان هي داخل الحجره والفيصـل بند الباب بريوله بكل قوته..

صرخــت بكـل مافيها من قوه : وخــــــــــر عنيــه يالحقيــــــر ..(وكانت تضربه بكل ما فيها من قوه )
(كان موول مايسمع صرخات روضه له .. الغضب كان عامي الفيصل كليـــاً

ولا يحس بأي شي .. الا بالقهر والشعور بالانتقام من الانسانه اللي بين ايدينـه

اللي هانتـه .. وتحدتـه .. وخلته مايسوى شئ جدام ربعه

اللي الكل يعرف ان الفيصـل الـ .. فـ عمره ما نحنى ولا انهان من قبل بنت ..

وهـ الانسانه اللي بين ايدينه هي اللي هانته ..

ويـا اليوم اللي ينتقم منها شر انتقـام .. ويخليها تنسى

فـ يوم من الايام انها تتحدى الفيصـل الـ ... )

رمى روضه على الشبريـه بكـل قوته ..

واما عن روضـه فـ من قوه الضـربه اللي يتها صرخت ..

لانها طاحت على ظهرها ..

وشيلتها تبطلت من قوه الشوته اللي شاتها اياها الفيصـل

وبدون اي رحمه منه ..

قال وكل علامات الغضب واضحه على ويهه : بنشـــوف احين منو بيي يحميـج منيه يا الحقيـــره ..

وهو يجرب على روضه وما بين ويهه و ويها سنيمترات بس

وكان يأشر على ويـهه ويقول : طالعي عليه عدل عسب تتذكرين هـ الويه اللي جسر غرورج ..

(ويزيد من صوته ) طـــــــــــــــالعــي يالحقيــره الوسخـه ...

( روضه كانت مغطيه ويها بـ أيدينها الثنتين .. وهي كلهـا ترتجف .. لان الفيصل كان محوط عليها بأيدينه ويهزهـا )

جرب اكثــر من روضـه والشيطان كان يلعب فـ مخه لعــب ...

صرخ فـ ويها بكل عصبيه : قلتــــــلج طالعي علــيه ..

( كـانت على حركتها ولا تحركت موول.. لانه ما كان يفصل بينها وبين الفيصل الا شعره ... )

زاد قهره من روضه اللي مول ماتسمع الرمسه وقال لها بكـــل قهر

ومسك جتفها وقعد يهز فيـه ..

وهو يجربها من ويهه وكان وياها على الشبريه : بطالعيـن عليه ولا شووو ..؟

ومن كثر مايهزها تبطلت ايدين روضه من على ويها وكانت مغمضه عيونها

بكل قوتها ...

وكانت انفاس الفيصل تلسع ويه روضه لسع ...

ومن كثر ما يهز روضه وهو يجربها على ويهه لامس خشم الفيصل

بخشم روضه ..

ومن حست بـ الفيصل انه لامس خشمها .. ماستحملت زياده

حست عمرها رخيصـــه واااااااااايد ... وبدا التنفس ينقطع عن روضه نهائيا

واستوت زرقاء ..

( لان الجهد اللي بذلته وهي تحاول اتدافع عن نفسها

والخوف اللي كان ممتلك كل ذره من روضه .. خلاها تفقد كل قواها ..

وبدا ضيق التنفس يزيد عليها لحد مــا ..

اغمي عليهـا ...........

..

..

..

من حس انه لامس خشم روضه تجمد مكانه ... جنـه فـ صدمه

ولاوله مره فـ حياته يحس انـه عاجز ..

وحس بـ روضه اللي ارتخت من بين ايدينه .. وجنها ماتت ..

وقعد يطالع على الملاك اللي قاعد بين حضنه ..

وهو كله يرتجف من الخوف ...

وهو عايش بصدمه قويه هزت كل ذره من كيانه .. وتوه يحس بـ عمره : معقوووله

معقووووووله انت السبب يا الفيصل بكل هـ الخوف اللي ممتلك هـ الملاك

اللي بين ايدينك ...

ليــــش ...!!!

هي شو سوت لك غير انها حاولت تدافع عن نفسها ..

وعن كرامتها وشرفها اللي انت اهنتهم يالفيصــــل ....!!!!!

كيف سمحت لك كرامتك يا الفيصل توصل لـ هالدرجه من الوقاحه ...

كيــــــــف ...؟؟؟

مسك راسه بأيدينه الثنين .. وقاعد يلوم عمره ليش سوى جيه

ليش خلى الشيطان يلعب عليه ويسيطر على تفكيره ..

ويعميه عن اللي قاعد يسويه ...

ولو سويت فيهـا شئ فـ عمريه ما بسامحك يا الفيصـــل فـ عمريه ما بسامحك ...

(كانت مول ماتحس بشئ .. ولا فـ الدنيـا خير شر..)

الفيصل وهو يرد نظره لـ روضه اللي بين ايدينـه وهي مول ماتتنفس ..

ولا تصدر اي حركه تدل على انها حيـه ..

وويها اللي مايطمن مول لانها كانت شبه ميته ..

وبخوف الدنيا بسرعه يمسك فونه ويدق على محمد ..

محمد : مرحبـا الساع طويل العمر ..

وبضيجه الدنيا وممزوج بخوف واضح : محمد طرش لي 3 ممرضات احين وبسرعه فـ ....

محمد خاف من سمع صوت الفيصل لانه مول مايطمن وبسرعه قال : ان شاء الله طويل العمر ..

(ما دقايق الا ومحمد والممرضات فـ المكان اللي وصفهم اياه الفيصـل )

ومن سمع دقات الباب .. على طول غطى روضه ورفع الشيله على راسها

وغطاها عدل ..

ظهر لـ برع الحجره .. ومنع محمد من انه يحدر الحجره ..

او انه يطالع منو اللي كان داخل الحجره ..

كان خيفان عليها ..

حدرن الممرضات على روضه اللي كانت متسدحه على الشبريه وهي مب فـ الدنيا ..

ومن طالعن حاله روضه كلهن احتشرن وبسرعه يحطن لها الاكسجين

عسب ترد تتنفس شرات قبل ..

(الفيصل كان قاعد على اعصابه وكل شوي يتأفف .. )

لحد ماحدر على الممرضات وصرخ عليهن :

انتــــــــــن شو قاعدات تسون من ساعه ...

هي ليــــــــــش لحد احين ما نشــت ..؟

الممرضات وبخوف كانً يطالعن على الفيصل وهو كان فـ قمه العصبيه ..

وما رامن يرمسن موول من الخوف ...

وبسـرعه خذ الاكسجين من ايديهن وبدا يحطه لـ روضه بروحه ...

بدت تستجيب للأكسجين وبدت تكح بقوه ..

وبدا التنفس يرجع لها بالتدرج ..

بس بعدها ما فتحت عيونها ..

وجن الروح ردت له من طالعها تكح .. وبأبتسامه ظاهره على شفايفه ..

وبكل حنيه صادقه يمسح على ويها وهمس لهـا : الحمد لله ع سلامتج يا روضــه ..

.

كانت تحس بـ الفيصل بس ماكانت تروم تفج عيونها .. حاسه جنها مشلوله كليـاً عن الحركه ..

من حس بحـركه روضه الخفيفه على طول نش من على الشبريه

وحاول يغير من ملامحه .. للجديه .. لان روضه بدت تفج عيونها ..

.

حاولت تفج عيونها .. وبصوت خافت قالت : انـا وين ..

بس مسرع ما تذكرت اللي استوى لها .. وطالعت اللي جدامها

وبكل كره الدنيا قالت : انــــــــت لحد احين هنــي شو تبا بعــد منيـه ..

.

.

( كان متوقع رده فعـلها .. واي وحده فـ مكانها بتسوي شراتها )

بس الفيصـل حط ايدينه على حلج روضه عسب يسكتها ..

بس مسرع ما شالت ايده من على حلجها وفرتها ..

.

قال لهـا بصوت كلـه حنيــه بعيد كل البعد عن الغرور والتكبر : واللـه يا روضه ما سويت فيـج شي

ولا لمست منج شعـره ..

(( روضه وهي بـ صدمه كبيـره وهي تسمع نبره صوت الفيصـل وهو يرمسها بكل حنيه ،

وفاجه عيونها للاخر .. معقوله اللي جدامي الفيصـل

الفيصـل ما غيره .. مستحيل هذا واحد ثاني .. مستحيل يكون الفيـصل .. ))

.

.

توه يحس بـ عمره انه قاعد يرمسها بكـل حنيه .. وحاول انه يغير من صوته ..

وبخشونه .. وبنبره كلها تهديد : شكـلها الشبـريه واايد عيبتـج .. اشوفج لحد احين متسدحه..

ماتبين تسيري بيتكـم يا بنت احمد ..

من لاحظت نبره الفيصل تغيرت .. على طول قالت فـ خاطرها : هيــه هذا هو الفيصـل ..

وبسرعه نشت من على الشبريه ..

وتوجهت لباب الحجره .. بس قبل لا تظهر لفت على الفيصـل تتطالعه ..

وهو كان شبه سرحان فـ اللي مرت من حذاله ...

.

وجنها تذكرت شي ولفت بسرعه تتطالع على الفيصـل

وقالت بصوت خافت : شكـراً ..

وبسرعه البرق ظهرت من الحجره وهي تركض على موترها ..

ومن حدرت الموتر

مسكت راسها وقعدت تضرب فيــه ..

ليــش.. ليـــــــش ... يالغبيه تشكرينه ليـــــــش ..

شو هـ الغباء اللي فيـج .. شخص يابج لـ هالمكان وتشكرينه بعد ..
بس يا روضه شو هـ القساوه الريال قال ماسوى فيـج شي ..

ولو شخص فـ مكانه والله يا روضه ماتركج لـ حالج من دون لا يسوي فيج شي ..

بس الفيصـل تركج وما سوى فيـج شي ..

وغير جيه ياب لج الممرضات لما اغمي عليـج ..

ومستكثره عليه كلـمه شكر ..

مب من عوايدج يا روضه تنسين اللي يسوي فيج خير ..

ولا من عوايدج تقسين او تحقدين على حد ..

روضه واللي توها بس تحس على عمرها انها بعدها ما تحركت قاعده فـ نفس المكان

وبسرعه تشغل موترها وطيران على بيتهم ...

.

.

.

.

من طالعت عليه روضه وشكرتـه .. تجمد مكانه ..كان قاعد شرات الصنم فـ مكانه

ولا يتحرك مول ... رغم كل اللي سويته فيـج يا روضه .. تشكـرينـي .. !!!!

ليش .. اي شخص فـ مكانج كان بيحاول يجتلنـي مب يشكرنـي ..

شو من البشـر انتـي يا روضه ...

.

.

( ابتعدت من المكان اللي تركت فيـه شخص كان عايش فـ دوامه من الافكار اللي توديه وتيـبه ..)

وهي ترفع فونها اللي كانت ناسيتنه فـ موترها .. وتشهق ..

خيبــــــه منو اللي داق عليه جيــه ...

كان فـ فون روضه 33 مسد كول و6 مسجات من حمده ..

وبسرعه تدق على حمدوه ...

حمدوه وهي غرقانه من الدموع : روضــــــــــــــه انتـي وينج انتـي بخير دخيلج طمنيني عليج ..؟؟؟

و بنبره ماتخلو من الحنيه للانسانه اللي قاعده ترمسها : حمدوه قلبي انا بخير لا تحاتين ..

حمدوه وهي بين شهقاتها : ليش تسوين فيه جيه..

.. اول يزوي تركتني واحين انتـي .. وينج ليش ماتردين على فونج ..

طالعي كم مسد كول فـ فونج كنتـي بتجتلينـي

من الخوف عليج ... والله حرام عليج ..

روضه اللي عورها قلبها على حمدوه اللي تصيح وقالت :

حمدوه قلبي انا احين بوصل البيت وبفهمج كل شي .. انتي بس لا تحاتين ..

حمدوه وهي جنها بدت ترتاح من سمعت صوت روضه : اوك اترياج وديري بالج فـ الدرب ..

روضه : اوك قلبي لا توصين ..

.

\

/

\

/

\

/

\

فـ بيت بو راشـــد ..

( يزوي من عقب الاتصال اللي ياها وهـي حالها مول ما يطمن .. اعتفس

حالها فوق حدر .. والدموع صارت ماتفارقها ثواني .. كل ذكرياتها ..

المره ، والحلوه رجعت لها بمجرد سمعت الصوت اللي ياما عزته .. وغلته

وكانت اتشوفه ملاك مب من البشر .. كانت تشوف الدنيا كلها بكفه ..

وهـ الانسان بكفـه بروحه ..

وانعزلت عن الكل نهائيا ..

حتى امها ماصارت تشوفها .. كانت حابسه عمرها

فـ حجرتها وكل اللي يسمعونه هو شهقاتها وبس .. )

.

اول مابندت عن روضه دقت عليها امها وبسرعه ردت ..

حمدوه : هلا امايه ..

ام عبدالباسط : انزلي تحت يلا بنسير ..

حمدوه وهي مبوزه : بس امايه انا ابا ابات هني ..

ام عبدالباسط وبجديه : شو كل يوم العيد امس بايته عندها ..

يلا انزلي انا اترياج فالسياره ولا تتأخرين ..

حمدوه : بس امايـه ..

ام عبدالباسط وهي تقطع عليها : بلا تبسبيس وانزلي قلتلج يلا باي ..

حمدوه بخيبه امل : انزين باي ..

( طرشت حمدوه مسج لـ روضه انها بتسير بيتهم

لان الحكومه غصبتها اتسير (تقصد امها الحكومه ) ، وباجر بتيـيها من الصبح عسب تعرف السالفه ..)

وصلت المسج حق روضه وابتسمت روضه غصب عنها وردت على حمدوه :

( خلاص غلايه اترياج )..

حمدوه طرشت مسج اخير حق روضه :

( ترا انا مابرقد لحد ماتوصلين البيت واول ماتوصلين بيتكم طمنيني

على طول لا تنسين )

وصلت المسج حق روضه وتنهدت بأرتياح وحمدت ربها على ان عندها

خوات شرات حمدوه ويزوي يخافن عليها اكثر من رواحهن ..

.

واول ماوصلت طرشت حق حمدوه مسج وطمنتها ..

قرت حمدوه المسج وحست بأرتياح من عقب المسج لانها كانت تحاتي روضه وايد

ورقدت على طول ..

.

\

/

وبعــد يوم عصيب مر على ابطال روايتنا اشرق يوم جديد

بأمل قدوم ساعات هادئه على الكل ..

.

.

.

حمدوه كانت من الصبح ويا روضه

واول مافتحت عيونها ما تتطالع الا حمدوه فوقها ..

حمدوه بأبتسامه : يلا نشي ابا اعرف السالفه بسسرعه ..

وبكل كسل الدنيا ردت تغمض عيونها ..

بس مسرع مالقت ان حمدوه تهزها بكل قوتها :

نششششي ابااا اعرف السالفه ..

مارامت تستحمل وضحكت على حمدوه الفضوليه ..

وقررت تذلها شوي : اول بغسل ضروسي وبصلي وبتسهل وعقبها بقولج السالفه ..

حمدوه وبصدمه : يا اؤؤؤؤؤؤله ياليهوديه لحد احين ما مصليه ..!!!

ضحكت على حمدوه اللي كشفتها لانها كانت مصليه من الفير بس

تبا تطفر بـ حمدوه : ههههه مافيها شي اصلي مرتين طواعه ..

حمدوه وهي واصله حدها : نششششي لا اجتلج يلااا ..

( نشت روضه بكل برود وسارت الحمام ( وانتو بكرامه ) عسب تغسل ضروسها ) ..

واول ماظهرت مسكتها حمدوه عسب تقولها السالفه ..

.

و قالت لـ حمدوه كـل شي من اول ما ظهرت من البيت لحـد ماهي

دقت عليها وطمنتها ..

وكانت حمدوه فـاجه عيونها للاخر مب مصدقه اللي تسمعه ..

معقوله فيـه ادمي جيه يسوي ..!!

.

روضــه : وتوته توته خلصت الحتوته .. حلوه ولا فتفوته ..!!!

حمدوه : الا اؤؤؤم الاكشن .. عيديها مره ثانيه .. اقين اقين .. بليييز ..

روضه : هههههه سيري فـ لعبج والله ما عدتها حلجي عورني ..

ولسانتي بعد ع قولت الايرانيه يزوي .. هههه

حمدوه : هههههههه .. اشوفها علمتج الرمسه المخبقه ..

روضه : من عاشر قوماً سبعه عشر سنه صار منهم ..

حمدوه : عاااااشو واستوينا بعد نقول احكام وامثال

بس ماادري ليش ولا مره فـحياتج اصبتي مثل كلهم غلط ..

روضه : الا ع طاري يزوي .. نحن ما سرنا لها ..

حمدوه : ترا حضرتج امس سرتي ويا الاخ بو لسان وسـخ ..

روضـه : وععععع .. انتي لازم اتغثينيه كل ساعه واتيبين طاريه ..

حمدوه : ترا قدرج جيه .. خخخ

وجنها لايعه جبدها من هـ الطاري : انجبي دخيلج ...

الله لا يعودها ذيج الساعه

انا امس من وصلت البيت صليت ركعتين شكر لربيه ..

نشي نشي .. خلينا نسير ويا يزوي ..

حمدوه : يلاااا .. والله لتوطى فـ كرشتها الخاينه جيه تنسانا عيل ..

روضه : نشي نشي وعقب بنكفخها ..

.

.

\

/

\

/

\

فـ بيت بو راشد ..

.

أم راشد : يزووي انتي تسمعيني امايه .. فجـي الباب دخيلــج ..

(يزوي كانت غرقانه فـ دوامه ذكرياتها وجنها شريط تنعاد عليها كلها )

أم راشد : اليــازيه .. دخيلج فجـي الباب تبين تموتين ..

بيكمل لج اربعه ايام وانتي ع هـ الحال لا تاكلين ولا تشربين ..

يزوي كانت حاضنه ريولها ع صدرها وقاعده تتطالع على الفراغ اللي جدامها

ولا تتحرك مووول .. حتى ما كان يرمش لها جفن ..

ولا حاسه بـ كل اللي حواليها ..

ام راشد من طالعت ان يزوي ماترد عليها قالت اكيد انها راقده .. وسارت عنها ..

.

وهي تنزل من على الدري .. وتجابل سيف فـ ويها ..

سيف بأبتسامته المعتاده : صبحج الله بالخير امايه .. ( وباسها على راسها )

ام راشد وتبادله الابتسامه : الله بالخير قلبي ..

سيف وبتساؤل : امايه وين يزوي .. استويت مول ما شوفها ؟

ام راشد وبدت تتغير ملامح ويها وبضيجه قالـت : مادري والله بلاها هـ البنت .. واايد تغيرت ..

حتى الاكل ستوت ما تجرب صوبه .. احين بيكمل لها اربع ايام وهي ع لحم بطنها

مول ما تاكل شي ولا ترمس احد ..

سيف وبخوف : هي مريضـه ...؟؟؟

ام راشد : مادري والله .. حتى ما طاعت تفج الباب لي ولا ترمسني ..!

سيف و بضيجه ممزوجه بخوف على اخته : انا بسير لها احين ..

ام راشد : زين يا اميه ما تسوى هي تسمع الرمسه منك وطاوعك ..

وحاول تعرف هي بلاها متغيره جيه ..!!!

سيف : ان شاء الله امايه ..

.

سار سيف صوب حجره يزوي ودق الباب بكل خفه بدون لا يرمس ..

((اول مادق الباب سيف فزت من مكانها .. جنه احد صب عليها ماي بارد ..

تعرف منو ياي تعرفه اللي داق عليها .. محد غيره يدق جيه ..

بس كانت اتحس عمرها انسانه وسخه .. ونجسه ..

ماتبا سيف يطالع على وحده شراتها ..

ماتباه حتـى يسمع صوتها .. لان سيف مايستاهل انه يسمع صوت

وحده شراتهــا .. ))

وتكورت على عمرها وبدت اتصيح بكل حرقه والم ...

سيف وهو مستغرب من يزوي .. ليش ما ترد عليه ..

سيف وهو يرد ويدق الباب مره ثانيه : يزوويتـي ..

يزوي من سمعت سيف وهو يزقرها بـ يزويتـي .. كانت تحس ان

الموت ارحم لها بواااايد ولا سيف يزقرها بـ هالدلع وما ترد عليه ..

وبخوف واضح : يزووي قلـبي ردي عليه انـا سيف ...

ما ستحملت زياده تسمع سيف يزقرها وماترد عليـه

ونشـت تبـا تفج الباب له .. بس حست بدوخه مارامت توازن عمرها

ولا رامت تمشى من شده الدوخه .. وبسرعـه مسكت فـ الشبريه عسب

توازن عمرها وقعدت فـ الارض ..

وقعدت تصيـح بصمت و قلبـها ينزف نزف من الالم اللي محتويها ..

سيف وهو مستغرب من يزوي .. : اكيد راقده .. ولا يزوي مستحيل ماترد عليه..

سار وهو نازل من الدري صادف حمدوه وروضـه وهن توهن يحدرن بيتـهم ..

سار صوب روضه وحمدوه : حي الله ..

( حمدوه كانت تستحي من سيف وماردت عليـه ..)

روضـه وبأبتسامه : اللـه يحيـك وينك يالقاطع محد يشوفك موول ..

سيف : موجوود بس كل ما ايي بيتكم واسال عنج يقولولي فـ جناحج ..

تريكه مستويه اربعه وعشرين ساعه فـ جناحج ..

روضـه : هههههههه تريكـه فـ عينك بسم الله عليـه ..

سيف : مب انا اللي اقول جيه .. ها الواقع ..

حمدوه مارامت تمسك عمرها وضحكـت : هههههههههه

روضه وهي تتطالع على حمدوه بكـره : عيبـج يعني يوم يسبني ..

حمدوه وبخجل : هو ماسبج قال الحق واللي يشوفه بس..

سيف : شفتـي قلتلج اني انا اطلع درر من حلجيـه .. فديتنـي والله ..

روضه وبقهر : سير من جبالت ويهي سيـــر .. قال درر الشاعر ..

سيف : هههههه عصبت فلـه .. عصبت ..

روضـه وبعصبيـه : فلــــه فـ عينك قول امين .. ما لقيتلي غير هاك السوده ..

سيف : ترا شفتها اقرب وحده لج .. يعني تشبهج ..

روضه وهي متنرفز للاخر : ترا انا مب يايه عسب سواد ويهك .. يايه عسب يزوي

ولا لو مب يزوي جان ماييت موول هـ البيت ولا حدرته ..

وهو يضحك على شكل روضه وهي مترفز للاخر : ههههههه وليش ماتحدرينه ان شاء الله ..

روضـه وبقهـر صرخت : لانـــــــــــــك انت موجود فيـــه يا سيفــــــان ...

سيف عاد احين صج انفجر من الضحك : هههههههههههههه

روضه وبقهر : ضحكه بليا ضروس ..

وهو يكمل عسب يقهر روضه : اقول فلـه .. ترا يزويتي راقده لا تسيري تغثيها ..

تعالي لها فـ وقت ثاني .. يلا على بيتكم ..

روضـه وبأصرار : عيل عناد فيك أنــا ابـا اغثها ..( وتظهر لسانها بقهر ) ..

سيف وخاطره يضحك : سيري يا ام لسان .. بنشوف ان ردت عليج ..

يوم " انــــــــــا " وماردت عليه .. احين بترد عليج انتي ..! ( كان متعمد يرمسها بـ هالطريقه عسب يقهرها خخخ ) ..

روضه وهي مقهوره : ومنو انت يعني ..؟

سيف : انا .. انااا .. انتي ماتعرفين منو انــا ..

روضه وهي حرك عيونها وتخشن من صوتها وتقلد صوت سيف : وخير يا طير .. لا ما عرف منو انت ..

سيف وبكل برائه : انا سيف ..

هني روضه وحمده ما رامن يمسكن عمارهن وضحكن من قلب على حركه سيف ..

سيف وهو يسوي عمره معصب : اففف انا شو مقعدنيه هني ارمس البنيات

يلااا بااي .. ولاتسيرن حق يزوي خلنها راقده ..

روضه : مابنسير يابوك .. حشى .. لو حرمتك ما بتدافع عنها جيه

سيف وهو يأشر على قلبه ويرمس روضه : هاي القلب .. مسكنها هنــي ..

واغلى حتى من روحيه ..

روضه وهي تصفق : مااااااارووم ع الحب ... صوبنـا ..

سيف : لا تحاولين ماشي حقج كله حق يزويتي وبس يلااا .. ويمكن شوي بوسع حق حرمتيه خخخخ

روضه : بنشوف عقب شو بتسوي حرمتك وبذكرك .. ان ما عقوها يزوي

ماكون اسمي روضه بنت احمد ..

سيف وبتحدي وبكل جديه : تخســــــــي الا هي .. محد ينسيني يزوي ..

والله والله لو حريم الدنيا كلهن مابينسني يزوي ..

ما نولدت بعدها اللي تفكر تنسينـي يزوي .. وبذكرج ..

روضه وهي تشوف الجد فـ عيون سيف : هههههه منو قدج يا يزوووي ..

سيف وهو يظهر من الباب : محد قدهــــــا ..

روضه وهي تسوي خمسه حق سيف : ماااالت ..

( من ظهر سيف واختفاء على طول صرخت حمدوه )
حمدوه : لا واللـــــــــــه .. يعني نحن ضاربين هـ الخط كله

واخر شي تتطلع الانسه يزوي رااااقده ..

روضه وهي تتطالع على حمده بنظرات تفحصيه : هههههه اطالع ظهر لسانج احين ..

حمدوه : جب انتي .. والسوات احين ..؟

روضه : تعالي طلعنا لها ... مالنا خص ..

( طلعن البنات صوب حجره يزوي وبدون لا يدقن الباب حاولن يحدرن

الحجره ، بس كانت الحجره مسكره باللوك )

حمدوه وبأستغراب : والخيبـــه من متى يزوي تسكر حجرتها ...

روضه وهي تحرك جتوفها : مادري ..؟

.

( حمدوه و روضه قعدن يدقن الباب على يزوي جنهن يايات حرب )

حاولت تفج عيونها من الالم والدوخه اللي تحس فيهم ..

وتحاول تنش عسب تفج الباب حق حمدوه وروضه ..

وهي تحاول تتساند على الشبريه

عسب تسير تفج الباب حست بالدوخه كل مالها وتزيد ، والدنيا

بدت اتدور وفجــــآه ......
طآآآآآآآآآآآآآآآآآآآآآآآآآآآآآآآآآخ ...

يزوي فقدت كل توازنها واغمي عليـــها ....

.

حمدوه وهي تضرب الباب بقووه : ايــــــــه يزوي الايرانيه فجـي الباب

مب علينا سوالفج البطاليه .... قال راقده قال ..

روضه وبصوت عالي : يزوي لج لحد الثلاثه وان ما فجيتي الباب بطالعي هاك اللعب الغاوي ..

روضه وهي تعد ... 1 ... 2 .... 2ونص ... 2وشوي ...

حمدوه : هههههههههه عااااشوو .. يابس ..

روضه : هههههه كله من حمدوه نسيت وين واصله بعيد

1 ... 2.....2 ونص ... ثـ ..ـل ا ثـ ... ـه .. قلت ثلاثه ..

( البنات كانً متعودات على يزوي اول ماتبدا تعد روضه يزوي على

طول تسمع الرمسه وتسوي اللي يبنه لانها تخاف ..

بس احين يطالع العكس

يزوي مول ماتحركت .. )

حمدوه وهي مستغربه : اول مره يزوي ماتخاف ...

روضه : شكلها صج راقده ..

حمدوه وهي تظهر عيونها : والخيبــه كل ها رقاد .. والله لو دينصور جان احين ناش من

الحشره والدق اللي سويناه انا وانتي ..

روضه : ممم تعالي تعالي خليها راقده بنيها وقت ثاني ..

( يزوي كانت فـ حال ما يعلمه الا الله سبحانه بروحه ..

والمعاناه اللي تعانيها لمتـى بتم هل بتنكشف .. ولا بتم فـ دفتر ذكريات يزوي .!! )

.

نزلن البنات وكانت حمدوه تتحرطم على يزوي ليش ما فجت الباب..

: مالت والله .. ياين لها واخر شي راقده ..

روضه : ترا الريال قالنا ان اخته راقده بس كله من لقافتج .. يا الملقوفه

حمدوه وتحطي ايدينها على خصرها : نعم .. نعم .. نعم .. احين انا استويت ملقوفه .. يا اؤؤم اللقافه

روضه : ههههه انا ماسويت شئ ..

حمدوه : اقول احسن نسير البيت قبل لا ارتكب جريمه هنـي ..

روضه وهي تسوي عمرها متزيغه : وه .. وه .. احين بنجلب ع ورايه من الخوف .. خخخ

(حمدوه سوت طاف حق روضه الملسونه اللي ماتخلص رمسه

وسارت بيتهـم )

روضه وهي ترفع ايدها وتأشر على حمده : ايــــــه تعاالي بيتنا من هنــي ..

حمدوه : انا سايره بيتنــا ..

روضه وتصرخ : وليــش عااده ..

حمدوه : مادري ..

روضه : انزين اتريني بيي وياج ..

حمدوه : يلااا حركي ريولــج ..

روضه : مذله هي ..

حمدوه وبنفاذ صبر : اللهم صبرج يا روح .. الله يعين اللي بياخذج .. شقايل بيرقد مادري

موول ماتتعب من الرمسه ..

روضه : تف .. تف ... تف .. بسم الله عليه

( وسارن البنات وهن بطول الدرب يتضاربن ويتناقرن لحد ماوصلن بيت

قوم حمدوه )

.

\

/

\

/

\

/

\

كان مخطط انه يسير من امس بيت قوم بو سالم بس لاخر لحظه

ياه اتصال مهم وضطر انه يأجل الموعد ..

لبس كندورته وعقاله اللي لفه بأهمال مما زاد من جاذبيته

وحط من عطر Dior الرجالي ..

وعلى طوول بدون اي تردد توجه لـ بيت قوم بو سالم ..

اول ما وصل جدام باب بيتهم قعد فـ موتره يطالع لـ ثواني على حجره روضه

وسرح وهو يتذكر شكلها لما كانت بين ايدينه من 5 ايام تقريبا ..

ابتسم لا ارادي مجرد ما طرت على باله ..

وحس ان دقات قلـبه كانت تتزايد كل ما ييب طاريها ..

كان توه ناوي ينزل من موتره الا ويطالع حمد جدامه مباشرتاً ..

متعب : بسم الله انت من وين ظهرت ..؟

حمد وبأبتسامه : ههههه كنت ظاهر من البيت وشفتك ..

حياك اقرب ..

متعب : ماعليك زوود ..

حمد وهو يطالع على متعب بنظرات : الا شو سـر هـ الزياره يعني انت ماتيا مني والدرب

اعترف اعترف شو ياي تسوى هاا ..

ضحك متعب من سمع رمسه حمد وقال : ياي اسلم على خالوه ام سالم

تولهت عليها من زماان ماشفتها ولا سلمت عليها فيها شي ..!!

حمد : هييييه صدقتك .. تعال حيااك ..

( متعب كان مسونها عاذره انه يشوف خالته ام سالم عسب يقدر

يشوف روضه ما كان يدري ان روضه مب موجوده ) ..

.

حدرو البيت وتوجه متعب على الصاله المفتوحه ..

وحمد سار يزقر امه عسب يسلم عليها متعب ..

متعب كانت عيونه تدور على روضه يتمنى انها احين تظهر ويشوفها

كان يحس بشوق كبير لهـا ..

بس قطع تفكيره صوت ام سالم وهي ترحب فيـه : يااامرحب السااع ..

زارتنا البركـه .. نورت يا متعب ..

متعب ويبادل ام سالم الابتسامه : منور بوجودج خالوه ..

ام سالم : شحالك اميه وشو مسوي .. ؟

متعب : بخير يسرج حاليه خالوه ..

ام سالم : وينك من زمان لا حس ولا خبر تولهنا على شوفتك ..؟

متعب : اشتاقتلج العافيه .. مشاغل الدنيا خالوه ..

ام سالم : هيييه الله يوفقك ياربيه ..

حمد وهو يقاطعهم : انزيييييين احين سلمت عليها خلنا نسير يلا

ترا تأخرت على الشباب ..

ام سالم : ويديه وين بتوداه ما مداني اشبع منه .. ولا ضيفناه بشي ..

حمد : ماعليه اميه هو مب غريب وبيي المره اليايه يلا متعب نش ..

( متعب كان وده يقعد عسب يشوف روضه بس لما سمع رمسه حمد

اضطر يسير وياه ويستأذن ) :

يلا عيل خالوه اشوفج فـ وقت ثاني ان شاء الله ..

ام سالم : الرب لك حافظ غلايه .. ولا تقطعنا ..

متعب : ان شاء الله خالوه من عيوني ..

يلا فمان الله ..

ام سالم : الله ويااك ..

( سار متعب ويا حمد اللي كان مرتب انه يظهر ويا ربعه

يعني قعدت شباب وحشره وغيرها ) ..

.

.

.

.

.

.

بيت بو راشــد ..

.

( كانت تحاول تفج عيونها وتتذكر اخر شي استوالها ..

وتتذكر روضه وحمدوه وايام سوالفهن ويا بعض ..

وابتعادها عنهن .. وعن .. امها ..وابوها ...واخوانها والكل..)

.

كانت تحس ان راسها بينفـجر ماعادت تتحمل الالم اللي هي تعيش فيـه ..

محد يشاركها ألمها ..ولا يخفف عنها .. او يحس باللي هي تحس فيه ..

وهي متوجه بخطوات ثجيله لثلاجتها اللي فـ حجرتها ..

وشربت لها ماي لانها حاسه بجفاف فـ كل جسمها ..

((احين بيكمل لهـا اليوم الخامس وهي تقريبا عايشه ع الماي بس..

ولو حاولت تأكل شي على طول ترجعه ..))

وويها كان شاااحب بشكل فظيع ومايل للون الاصفر ..

والهالات السوده الواضحه اللي تحت عيونها من السهر والصياح ..

وجسمها اللي واضح عليه الضعف والتعب ..

..

(( راح تقولون جذابه .. مستحيل انها تعيش من دون اكل خمس ايام ..

بس كان حالها اخس بـ واااااايد من الوصف اللي انا قاعده اوصفه لكم ..

كانت عايفه الاكل نهائيــــــاً ولا متقبله الاكل موول ..

وكانت تتصبر بالماي عسب لا تموت ..))

.

و من عقب ما بلت شفايفها بالماي ..خذت مذكرتها اللي كانت دوم

تكتب فيها كل شي يصير لها ..

لانها تحس ان مذكرتها هي الوحيده اللي تسمع لها ..

وتشكي لها بكل همومها والامها .. وتحتضنهم بين سطورها و أوراقها بكل رحابه صدر ..

وبدون اي تذمر ..

وبدت تسطر وتكتب كل اللي قاعده تصارعه .. وتمر فيـه بطوول هـ الفتره ..

وكانت تكتب وهي دموعها مغرقه المذكره ..

.

.

×

.

.
فـ صالـه قوم حمــدوه ..

كانً حمدوه وروضه يطالعن فلم .. وحمدوه كانت سرحانه

بس عقب ثواني قالت : روضـووه ..

روضه وهي عيونها ع الفلم : هـا ..؟

حمدوه : يعني يزوي متى بترد لنا شرات قبل .. ؟؟

روضه : مم بنسير لها باجر وبنخليها ترد شرات قبل غصب عنها ..

حمدوه بوناسه : واللـــــــه ..

روضه : هيه..

حمدوه : ممم عيل باجر بنسير لها العصر عسب لا تكون راقده بعد

روضه : حتى لو تبينا نسير نوعيها من الفير ما عندي مانع ..

حمدوه : هههههه لا شوو .. تبين سيف يروغنـا بخيزران ..

روضه : هههههه .. جان زين عسب اتسابق وياج خخ ..

تصدقي من زمان ما تسابقت ويا حد

اخر مره كانت فـ المزرعه يوم تسابقت ويا يزوي ..

حمدوه بضيجـه : هيه اتذكر يوم تمصخرتيبها وقعدت نص ساعه متسدحه ع الارض

اونها تعبانه .. بس يزوي احين ستوت وحده غير .. مب يزوي القبليه ..

مب يزوي الخبله اللي كلنا نموت ضحك ع خبالها وسوالفها البطاليه ..

روضه بتنهيد : الله كريم .. وان شاء الله فتره وبتعدي وبترجع يزوي لنا

شرات قبل .. واحسن من قبل .. اقصد اخبل من قبل ..

حمدوه وهي تنرسم البسمه ع شفايفها وبصدق : اميـــــــن يااارب ..

.

.

\

/

\

/

\

/

\

.

ويـــا يزوي ..

.

من عقب ما خلصت كاتبه فـ مذكرتها حست بـ شويه راحه ..

لانها فضفضت اللي فـ داخلها لحد ..

وقعدت تجلب فـ صفحات مذكرتها بأناملها الضعيفه والصغيره

وهي تتطالع المواقف اللي كانت تمر عليها

(( يوم الاثنين : الساعه 2:50 الفيـر ..

بتـاريخ 23/11/20... بعنوان ( فــديت هـ اليووم ياربي) ))

(( ممم السلام عليج يا احلى مذكره .. تصدقين اشتقتلج وااايد .. ويايبتـلج

علووم تونس .. تصدقين لارا انا مستااانسه وااااايد ورربي لو تعرفين اليوم

شو ستوى .. بقولج لا تستعيلين .. اليوم الله يسلمج كنت مضايجه واايد

عسب السالفه اللي خبرتج عنها امس .. وكنت متردده واايد احدر المسن

ولا لا .. بس عقب قلت بحدر ويوم حدرت جان احصل 20 رساله من

احم .. كله يتأسف ويتعذر ويحلف بـ راس امه وابوه اني انا اغلى

انسانه فـ هالوجود واذا ما رديت عليه احين بيتهور وبيدق على امايه

ويقولها خلي بنتج ترد عليه لانها خبلت فينـي .. وستويت مينون فـ حبها ..

انا طبعا ضحكت .. ومسرع ما اطالع انه حدر و...))

( وبسرعه يزوي تجلب الصفحـه وتحاول تكتم عسب لا يظهر

صوتها وهي تصيح .. ومسحت دموعها اللي نزلت على خدها ..)

(( للعلم يزوي مسميه مذكرتها " لارا " ))

.

يزوي ولا زالت تجلب فـ صفحات مذكرتها ،، وكانت تقرا العناوين

والتاريخ ومسرع ما تغير الصفحه ، لان الذكرى كانت تتعبها ..

(( 20/5/2... ، الساعه 3:15 الفيــر .. بعنوان ( احلى يوم فـ حياتي) ))

.

(( 31/8/2... ، الساعه 5 العصر .. بعنوان ( يوم جديد في حياتي) ))

.

وهي تجلب صفحـات مذكرتها طالعت عنوان شدها ..

(( 2/4/ 20.. ، الساعه 12 (اكـــــــرهج يــا يزووي ليتـــــــــج تموتــــــــين) .. ))

قعدت تقرا .. الا وشوي وبدت كلهـا ترتجف وعيونها تغرقن من الدموع

ماستحملت تكمل باجي الصفحه ..

وفــــرت المذكره بكـل قوتها على اليـــدار

وطاحت ع الارض وقعدت تصيـح من كل قلبهـا ..

..

\

/

\

/

\

/

.

فـ حجــــره حمدوه ..

غمضت عيونها من ضوء الشمس اللي حدر الحجره وترفس روضه

بريولها : ايــه نشـي طالعي الساعه جم احيــن ..

روضه و بكل كسل الدنيـا : وخيـر يا طير .. نجبي لا اشوتج برع الحجره

احيــن ..

حمدوه : نعم .. نعم .. المال مال ابونا يو الغرب وحاربونا ..

ايـــــه يالاخت يقولون هاي حجرتي ..

روضه : حمــــــده وصمخ .. اذوني راحن .. خيبه مب صوت عليج

ولا صفارات انذار ..

حمدوه وهي تشوت روضه وترفسها بريولها ..

لحد ما طاحت روضه من الشبريه ..

طآآآآآآآآآآآآآآآآآآخ

نشت بكل عصبيه .. والشر ظاهر من عيونها لان الطيحه كانت قويه وصرخت :

شكلج ماتبين تشوفين امج وابوج عقب اليوم ..

حمدوه بخوف : اســفه والله مب متعمده ..

روضـه وهي كشتها طايره وبعصبيـه : وين اوديها اسفه فـ بنك الاخوه والمحبه ...!!

ظهريه انجسر .. منو بيـيـبلي غيره احين .. هااا ...!

حمدوه وهي خاطرها تضحك بس ماسكه عمرها : حقج عليــه .. والله اسفه

وهاج بوسه ع راسج الحلو اقصد كشتج الغاويه ..

روضه وهي ما صدقت عمرها : اندوج بوسي .. (وجربت راسها صوب حمدوه)

حمدوه وهي تضحك : ههههههههه ماصدقت .. هااا (وباستها على راسها)

روضه وبتقزز : اخييييييييييج انتي مب مغسله شقايل بستيني ..

حمدوه بلعانه : هههههههه عيل تتحريني بايستنج من حبي لج ههههههههه

روضه سدحت حمدوه ع الشبريه وقعدت تضربها ضرب ..

ع قولتها تلاعبها هاك اللعب الغاوي ..

.

\

/

\

/

\

/

من عقب ما تركته واطلقت عليه هاك الكلمه وهو موول مب فـ وعيه

بس فجأه ييه احساس انها بنت وسخه وماتستاهل انه احد يستهم عليها

ومسرع ماتتبدل الشفقه فـ عيونه للكره والحقد ..

والشعور بالانتقام اكثر واكثر ..

.

.

×

.

فـ حجــــره يزووي ..

.

غمضت عيونها من ضوء الشمس اللي كان فـ ويها ..

لانها كانت ع الارض راقده .. يعني ع حالتها من امس فليل ..

وقعدت تتطالع على مذكرتها وهي مرمايه على الارض بأهمال

وتذكرت امس شو ستوى ،

وما هانت عليها وهي تتطالع مذكرتها مرمايه على الارض بأهمال

وماتسوي شي كانت تحس ان مذكرتها جزء منها ومن حياتها

تبوح لها بكل شي وكانت تبا تنش اتيمع اوراقها المتناثره ..

بس حست بصداع كان كافي انه يفجر راسها من الالم ..

مسكت راسها بأيدينها الثنين وكانت تضغط بقووه على راسها

عسى ولعل يخف شوي ..

حاولت تنش وكانت خطواتها ثجيــله مرره ..

وتخلو كليـا من التوازن

اللي يطالعها بيقول جنها سكرانه ..

قررت انها تسير اتفج الباب اول و بتاخذ لها شور

ومن عقبها بترد اتيمع اوراق مذكرتها

سارت صوب باب حجرتها وفجته من اللوك

عسب لحد يحاتيها ..

لانها مب من عوايدها تسكر الباب باللوك

وسارت تاخذ لها شور ...

واول ماحدرت الحمام ( وانتو بكرامه ) كانت تحس بدوخه فضيعه

مسكت راسها وحاولت انها تتماسك وحدرت الحمام ..

بس الدوخه زادت عليها ..

وتحس ان الدنيا كلها تدور .. وكل اللي جدامها ضباب ..

حاولت تتساند على أي شي جريب بس ما كانت تتطالع شي

جدامها مول لان الرؤيا عندها انعدمت نهائيا ..

.

وحاولت انها تتماسك بس الدوخه والصداع اللي تحس فيهم

اقوى منها بـ وااااايد ..

وسلمت عمرهـا للامر الواقع لان ما كان بأيدها تسوي أي شي

وما تحس بعمرها الا وهي..

.

طآآآآآآآآآآآآآآآآآآآآآآآآآآآآآآخ ..

.

طاحت من طولها ..

وضرب راسهـا بـ حافه حـــاده جدا . من رخام البانيو

(والبانيو كان محوط بالرخام على شكل خماسي ، يعني تخيلو

الحواف الحاده الموجوده فيـه .. ومن الرخـام ..! )

.

كانت حالتها يرثى لهـا ..

وكان راسها ينزف بشكل يخوف ..

لحد ماتغطت تقريبـا بالدم ..

.

.

بدءالالم يزداد سوء ..وتحس ان انفاسها تضيق ..

وبدء جبينها يعرق ... وهي ساكنه بدون حركه ...

وبدء يختفي النور من عينيها ...لتسبح في ظلام ساكن...

ام راشد وسيف وعبدالله كانو قاعدين فـ الحديقه لان الجو

فـ ذيج اليوم كان مغيم .. والجو ولا اروع وكلهم متيمعين فـ الحديقه..

.

وكانت وحده من البشاكير متعوده فـ هالوقت دوم تطلع على كل

حجر البيت وتأخذ الملابس اللي يبون غسيل ..

وهي سايره ستور حجره يزوي عسب تأخذ ملابس الغسيل

طالعت ان الحمام مفتوح نصه وفيه شي فـ الحمام مب طبيعي

كان لون الحمام تقريبا احمر ..

وبفضول فجت الباب وطالعت يزوي وهي غريقه بين الدم

اللي كانت تنزفه ..

وصرخت بكل مافيها ..

لان شكل يزوي كان يخوووف بشكل كبيــر ..

وهي تحاول تظهر بسرعه بسرعه من الحجره وطيران على

الحديقه وهي تصيح من الخوف وكلها رجفه ..

اول ما طالعت ام راشد حاله البشكاره .. دق قلبها بقوو

حست انه فيه شي مستوي ..

.

البشكاره وهي بين دموعها وبلعثمـه قالت : مـ ـامـ ـا يـزوي فيـه موووت ..

.

اول ما قالت البشكاره جيه ام راشد انشلن ريولها

ومارامت تتحرك موول تحس انها تشللت كلياً ..

وكانت تتطالع على البشكاره بعدم تصديق ..

.

اما عن سيف وعبدالله اول ماسمعو رمسه البشكاره جنه احد

صب عليهم ماي بارد ..

وكانو يركضون ركض على حجره يزوي جنه ملك الموت يركض وراهم ..

.

واول مافجو باب حجره يزوي انصدمو انه محد فـ الحجره ..

سيف وبسرعه يتجه لصوب الحمام ..

.

واول ما طالع شكل يزوي وهي مغطايه فـ بركه من الدم .. وما تتحرك

موول ..

حس ان روحه بتظهر من مكانها ..
وريوله انعدمت فيهن الحركـه .. كان يطالع عليها بصدمـه

مب مصدق اللي جدامه يزووي دلوعته وحبيبته .. ولا وحده ثــانيه ..؟؟

اكيد هاي مب يزوي .. يزوي ما تخوني وتموت ..

لااااا مستحيــــل ..

.

عبدالله و بسـرعه يرفع يزوي من الارض وشالها بين ايدينه ..

ويصرخ على سيف : سيــــــــــف نـــش يزوي بتموت وانت تتطالع عليهـا ..

.

سيف وهو توه يصحـى من الصدمــــه اللي عايش فيهـا ..

وبسرعه ياخذ يزوي من بين ايدين عبدالله وحطهـا فـ حضنه

وحضنها بقووه .. وكانت دموعه تنزل على ويـه يزوي

غصب عنه كان يصيح على حاله اخته ودلوعتـه ..

سيف واللي اول مره يصيـح .. وكان شال يزوي فـ حضنه وهو بركض

فيها ركض على موتر عبدالله وماسك راسها من وين الضربه بأيدينه

عسب يوقف النزيف ..

وكان ضامنها لصدره جنه يبـا يعطيها من روحـه

وبصوت يقطع القلب : يزووي دخيــــــــلج لا تموتين .. دخيـــلج

تبين اتيـتميـني من عقبج .. لااااااااا انتي ما بتموتين

دخيلج يا يزوووي نشــي .. عشاان خاطر سيف حبيبج

نشــــي ..

( وكان يهزها ودموعه تنزل على ويهـا .. بس يزوي ما كانت تحس

بشـي موول )

.

ام راشد كانت حالتها مب احسن من حال سيف ..

اللي اول ما طالعت يزوي فـ حضن سيف وهو يركض فيها

طاحت عليهم ..

دق عبدالله على خالته ام سالم وقالها تسير بسرعه لامه ..

لانه هو بيسير المستشفى يودي يزوي ..

واول ما وصلو المستشفى على طول تلقوهم الطاقم الطبي

اللي كانو بأنتظارهم لان عبدالله دق عليهم وعطاهم خبر ..

.

سيف واللي كان مول مب راضـي يبطل لـ يزوي لحد ما

غصبوه الطاقم الطبـي انه يبطل لها عسب يلحقون عليها ..

.

وسيف وعبدالله من الصدمه ما انتبهو ان اختهم ما كانت متغطيه بشي

( كانت لابسه بيجامه ورديه ونص ريولها وايدينها ظاهره .. ومن دون شيله

وكانت مبطله شعرها عسب الصداع اللي كانت تحس به ،

وشعرها كان واصل لحد ركبهـا ..

وجسمها الصغير والضعيف اللي على السرير الابيض اللي تغطى من الدم

اللي كانت تنزفه ..

وهم ينقلونها من السياره لحد غرفه العمليات كان كل من يطالعها

يسمي بـ الرحمن عليـها .. ويدعون لهـا انها تقوم بـ السلامه

حتى لو كانو مايعرفونهـا ..

.

ومسرع ما انتشر الخبر فـ كل بيت من العيـله ..

.

ام سالم وهي تصارخ : رووووووووضه رووووووضه

روضه وهي تنزل من الدري بسرعه : لبيـــه امايه ..؟

ام سالم وهي ويها معتفس : امايه بسرعه قولي للدريول يجهز السياره

روضه وهي مستغربه : ليش امايه ..؟

ام سالم : اليازيـه طاحت عليهم ومودينها المستشفى يقولون حالتها خطيره

بين الحياه والموت ..

روضه وهــــــي بصدمــه مب مصدقه اللي تسمعه : شوووووووو ..!!!!!

ام سالم : بسسسرعه خالتج تترياني ..

روضه وهي تحاول تستوعب اللي تقوله امها وتركبه على بعضه : اليازيـ ـه

بيـ ـن الحيـ ـاه والمـ ـوت ..!

ام سالم وبنفاذ صبر : هيـــــــه بسسرعه ترا خالتج تترياني ..

روضه وهي ترد للواقع وبدون أي تفكير طلعت ركض على حجرتها

ولبست عباتها وشيلتها وخذت سويج موترها ونزلت ركض

ويا امها : يلاااا امايه ..

ام سالم ما اعترضت لانها تثق بقدرات روضه وسارت وياها ..

.

\

/

\

/

\
فـ بيـت بو عبد البــاسط ..

.

حمدوه وهي منهاره من الصياح : لااااااااااااا انتو جذابيــن

يزوي ما فيها شي .. يزوي ما فيها شي ...

كلكــــــم جذابيــــــــن ...

ودوووني ويـــــــا يزوي احيــــــن ..

ام عبدالباسط وهي تحاول تهدي بنتها : حمدوه فديتج ان شاء الله اليازيـه

مافيها الا كل خير ..

حمدوه وهي تصارخ : قلتلـــــــــــــــكم ودووني لها احيـــن ..

ام عبدالباسط : انزين سيري لبسي عباتج وانا بترياج فـ السياره

.

( وبسرعه البرق طلعت حمدوه حجرتها ولبست عباتها وشيلتها

ونزلت ويا امها وسارن المستشفـى )

.

.

\

/

\

/

\

( روضه مرت على خالتها ام راشد وخذتها وياهن للمستشفـى )

.

وفـ غمضه عين الكل تقريبا كان متواجد فـ المستشفى ..

الا محمد اللي كان فـ الدوام لحد احين مايدري عن شـي ..

.

.

( الدكاتره اول ما طالعو حاله يزوي كلهم احتشرو ..

وكانو يتراكضون ركض على غرفه العمليات ..)

وام راشد وهي مقطعه عمرها من الصياح وام سالم وام عبدالباسط

يهدون فيها ..

.

وسيف اللي كانت حالته ما تقل عن حاله يزوي كان شرات الجتيـل..

يصيح بكـل عبره ويحس ان دموعه بتحرق عيونه ..

وكان بين كل حين وحين الدكاتره والسكيورتي يزخونه

زخ عن حجره العمليات ..

كان يصارخ ويقول لهم : ودروووني خلووني ادش ..دخيـــلكم لا تحرمووني من شوفتها

هـــاي قلبــي ورووحي دخيلــكم ودروني ..

وكان كل اللي يطالع عليه وهو يصيح شرات الياهل الميتم من امه ..

ما كان يصدق ان اللي تصارع الموت داخل حجره العمليات هي اخته

كانو يتحرون ان اللي داخل حجره العمليات حرمته او بنته ..

مستحيـل تكون اختـه .. وهو يصيحها كل هـ الصيـاح ..

.

(محد رام يهدي من سيف لان الكل يعرف منو يزوي بالنسبه لـ سيف ،

وشكثر يحبها ويموت فيها .. ومستعد يضحي بكل شي فـ هالدنيا عشان خاطرها

.. عسب جيه الكل كان عاذره ..)

.

.

حمدوه اول ماحدرت المستشفى كانت تركض ركض صوب حجره

العمليات ودموعها اربع اربع ..

حمدوه وهي بين شهقاتها : وينــــــــــــــــها .. وينها دخيلكم خلوني اشوفها

ام عبدالباسط بسرعه تسير حق بنتها وتحاول تهدي فيها

لان اكيد حاله اهلها مب احس : حمدوه غلايه لا تسوين جيه ..

حمدوه وهي تصيح من قلب ودموعها تذرف منها : يزووووي يالخاااااااااينه ...

اول ابتعدتي عني واحيــن بتتركيني ...

وانفجرت صياح: خااااااااااااااااينه يا يزوي خاااااينه.. رحتي وودرتيني..

(وهي تشهق بصياحها)..

وحمد كان يطالعها وهي تدور في الممر و تصرخ.. ماحبج.. ماحبج.. أكرهج..

تسمعيني صح.. ادري تسمعيني.. ماااااااااااااااا احبج..

\

/

\

/

\

/

فـ بيت بو سالـــم ..

محمد وهو يزقر امـه : امـــــــــــايه .. امـــايه ..!

البشكاره ( ميشيل ) وهي تظهر حق محمد : سير محمد ، مـاما و مس روضه مافي موجود ..

محمد وبأستغراب : ليش وين سارن ؟؟

ميشيل وهي مستانسه ان محمد يرمسها : هدا بنت ماما اخت

انتا فيه موت بعدين مستشفى ..

محمد وهو طااح قلبه من سمع انه فيـه احد مات : شوووو منو اللي ماات

انتي شو قاعده تخربطين ..

ميشيل : انا مافيه يقول .. هدا بشكاره تاني مال بيت هوا فيه يخبر انا

فيه يسوي مسج ويخبر انا ..

محمد وهو مول مب فاهم شي : دورتي براسي الله ينطبج أي بشكاره

واي خرابيط اللي مخبرتنج ان فيه احد موت ..؟؟؟

ميشيل : " جينـا "بشكاره مال اخت ماما انتا ..

محمد وبصدمه : خالـــــــوه بلاهااا ؟؟؟ ارمسي بسرعه ؟؟؟

البشكاره بخوف من شكل محمد : بنت مال هيا موت ..

.

محمد وهو يحس ان الدنيا استوت سوده .. وريوله ماتشيله

لاااااااااا ...

مستحيــــــــــل .. مستحيـــــل .. اليـازيه مااتت ..!!!!

.

(وبسررعه ياخذ فونه ويدق على روضه..)

.

روضه وبضيجه الدنيا : هلا محمد ..

محمد بخوف : روضه دخيلج طمنيني شو مستوي ، وانتو وين

ليش محد فـ البيت ..؟؟؟!!!

روضه وبضيجه واضحه : اليازيه فـ حاله ما يعلمها الا الله .. واحنا كلنا فـ المستشفى وياها ..

محمد بصدمه : شوووووووووووو.. كيف ؟؟ وينها ؟؟ شو مستوي فيها ؟؟ واي مستشفى؟

روضه : عقب بقولك كل شي احين مب وقتـه ..

محمد : انزين انتو فـ أي مستشفى ..؟؟

روضه : فـ مستشفى الـ ...

(وبند محمد حتى من دون لا يقول أي شي ..

وطيران على موتره ..)

.

محمد وهو مب مصدق مستحيــل يا اليازيه تموتين

والله لـ موت من عقبج .. وبسرعه يمسح دموعه اللي نزلت على خده ..

.

واول ما وصل المستشفى دخل قسم الحوادث..

وشاف المنظر الي في حياته ماتمنى انه يشوفه..

كان قسم الحوادث مزدحم.. والصريخ فـ كل مكان ..

طالع جدامه كل اهله موجودين ..

امه وخواته وام راشد وام عبدالباسط وام الريم وعمامه كلهم

والشباب والبنات ..

.

بس طالع شخص كان قاعد فـ الارض حذال باب حجره العمليات

وماسك راسه بأيدينه الثنين وكان يصيح بشكل يقطع القلــب ..

(محمد نزل راسه متألم .. حاس بمعاناة سيف..)

.

و جرب صوب اهلـه : السلام عليكم ..

بو سالم + بو راشد : وعليكم السلام والرحمه ..

محمد : ما من شر شو مستوى فهموني ..!!

بو سالم : اليازيه طاحت عليهم وضربت راسها بحافه حاده وشكل الضربه

يتها فـ الراس واحين هي فـ غرفه العمليات لساعتك ..

.

فج عيوونه كل هاا يستوي وانا اخر من يعلم ..

ما رام يستحمل الجو اللي كانو قاعدين فيه

الحريم كانن مقطعات عمارهن من الصياح والشباب كلهم منزلين روسهم

ومحد يرمس منهم مول ..

ولا سيف اللي حالته تخلي الواحد

غصب عنه من يطالعه يصيــح ..

حس انه بينفجــر وبيصيـح جدام الكل لو قعد زياده ..

وبسرعه توجه لمكان بعيد عن عيون الكل ..

كان يبا يستفرد بنفسه ويطلع اللي بداخله ..

.

.

ومن عقب ساعات انتظار كانت تمر على اهل اليازيه جنهن سنين

ظهر الدكتور من حجره العمليـات وهو منزل راسه وعلامات الحزن واضحه عليه ..

( وكان سيف اول شخص يوصل للدكتور ) ..

سيف وبكل ترجي الدنيا : دخيلك يا دكتور طمنـي عليها .. بشر شو حالتها احين ..

الدكتور وبحزن : ....

أتريوني فـ البارت القادم بأذن الله ..

مع تطورات جديد راح تكشف العديد من الحقائق الغامضه

ومع القليل من الحزن اللي بيغزو قلوب ابطال روايتنا ..

.

اشوفكم على خير بأذن الله فـ البارت 36

وقرائه ممتعه ..