رواية بتندمين يا بنت والسبب نظرتك هذى الفصل الثامن والثلاثون

يا غير الصبر مل و الله يعيني .. و الروح تبكي ضايقه من صبرها

هو صاحبي كفى و دمر سنيني .. كان الامل كان لـ حياتي عمرها

كان الوفى والشوق يموت فيني .. هو دنيتي ملهم عيوني نظرها

البــارت 36 بين ايديكــم ..

ومن عقــب طول انتظار ..

ظهر الدكتور من حجره العمليـات وهو منزل راسه ..

( وكان سيف اول شخص يوصل للدكتور ) ..

سيف : دخيلك يا دكتور طمنـي عليها .. بشر شو حالتها احين ..

الدكتور وبحزن : احنـا سوينا اللي علينـا والباجي بأيد الله سبحانه

البنت حالتها مول ماطمن .. ويمكن نفقدها فـ الساعات القادمه

لان الجرح اللي فـ راسها عميق جدا وحاولنا انسده بكل الطرق

لحد ما تحول لنزيف حاد فـ المخ ..

واللي تقدر عليه وانا اقدر عليه .. ان ندعي الله سبحانه وبس..

هي تحت رحمه ربك أحين .. وفـ غيبوبـه يمكن ماتنش منهـا ..

سيف ماكان قادر يستوعب اي كلمه.. يصارخ ويضارب..

وجالب المستشفى كله.. : يزوي مابتم هني دقيقه وحده .. بنسفرها برع البلاد

الدكتور : صدقني يا سيف مب فـ صالحها لأن حالتها ما تتحمل السفر..

ومب مستقره.. خل حالتها تستقر.. ولا تحاتي ..

هي فـ غيبوبه أحين بسبب الضربه الي يتها في راسها..

سيف انهار وتم يصيح وحاط راسه على اليدار..

حمدوه كانت منهاره من الخاطر.. تصيح بحرقه وحاطه راسها على جتف روضه..

وكل من يشوفهم في المستشفى ويشوف حالتهم قلبهم يعورهم..

ويعرف كيف ان يزوي كانت عزيزه وغاليه على الكل..

وروضـه كانت ما تقل عن حالـه حمدوه بس كانت تكتم اللي فـ قلبها

وتحاول تهدي حمدوه والبنات ..

كانت تحس ان الدموع المحبوسه فـ عيونها بتحرق عيونها ..

خاطرها تصيح وطلع كـل اللي فـ يوفهــا ، شرات البنات

بس كانت تصبر عمرها وتحاول تخفف ع حمدوه ..

حمد كان واقف على طرف طول الوقت يطالع حمدوه ويراقبها ..

ويشوف الحاله اللي هي فيها وكيف تصيح ..

كان وده يروح ويضمها لصدره ويهديها.. ويرمسها ..

بس مايقدر..

وهـ الشي كان قاهرنه.. يحس بمدى حاجه حمدوه له في هاللحظه..

طلب بوسالم من الحريم يردون البيت لان الوقت صار ليل

بس عارضوا وبعد اصرار من بو سالم وافقوا..

الشباب كل واحد منهم خذ امه وخواته ووداهن البيـت ..

الا سيف ما طاع يتحرك من مكانه مول ..

بو راشد وبحزن : سيف يا بويه لا تسوى فـ عمرك جيه .. نش سير البيت

وريح شوي ..

كان قاعد فـ الارض وماسك راسه بأيدينه ومن سمع صوت ابوه

رفع راسه .. و عيونه كانت غرقانه من الدموع : ابويه شقايل تباني ارجع البيت

ويزوي هنـي تصارع الموت بروحها .. تباني اودرها هنـي بروحها ...

والله ماسويها .. راحتي هي شوفت يزوي يا بويه ..

اشوفها وهي تسولف وتضحك .. اشوفها وهي راقده ع ريولي وتتدلع ..

وبدا يعلي من صوتـه وهو يصيح بكل عبره : أشــــــــــوفهـا وهي

بيـــــن ايديه معافايــه وســــالمه يــابووويه ..

بو راشد تأثر واايد من رمسه سيف .. ومسح دمعته اللي نزلت على خده

بشماغه .. وقال : سيف هاي ظناي ولا تتحرى اني مب مضايج ع الحاله

اللي وصلت لها .. بس ها المكتوب ونحن لازم ما نعترض ع اللي كتبه ربك ..

نحن لازم ندعي ربك يقومها بالسلامه .. وهـ الدموع صدقني مابتردها

ولا بتيـيب فايده .. نش ويايه خلنا نسير البيت ونريح احين .. وباجر من الصبح

بنيـها ان شاء الله ..

قعدتنا هنـي ما منها فايده .. نش يا بويـه ..

سيف وبأصرار : ابوويه تبون اتسيرون سيرو الله يحفظكم بس

انا سيره من هني مب ساير .. بتم هنـي وياها .. مابتركها ..

والله ماتركتها دقيقه وحده بروحها ..

بوراشد : بس الـ..

قاطعه سيف : دخيلـــك يا بويه افهمنـي .. دخيــلك.. مابا اودر يزوي بروحها

بو سالم وهو يحطي ايده ع جتف بو راشد : خلاص يا بو راشد لا تضغط ع الولد

سيف ريال ويعرف شو قاعد يسوي ..

بو راشد : خلاص سوى اللي يريحك ..

وسارو كل الشيـاب ، والشباب الا سيف كان قاعد ع الارض وهو يصيح

بصمت على الحاله اللي وصلت لها اخته ..

وكانت عيون تراقبه من بعيد .. شخص كان يطالع على سيف

والدمعه محبوسه في عينه..

استغرب من هالولد كيف ضعيف في هالمواقف..

استغرب من نفسه ليش مايقدر يودر هـ المكان من عقب اللي

استوى .. !!

يحس ان ريوله مشلوله عن الحركه مايقدر يودر هـ المكان

والسبب الانسانه اللي قاعده تعاني داخل ،،

كانت مثل النسمه ، دخلت بكل خفه وسكنت وتربعت فـ قلبه و غيرت له

كل مجرى حياته ..

كانت بأبتسامتها ورقتها وعفتها تنسيه كـل همومه ..

واحين من عقب ما بدا يحس بالامان هي ناويه تروح

وتتركـه ، تتركـه ايعاني بروحه ..

مسح محمد الدموع اللي كانت تنزل على خده من دون لا يحس

وقعد فـ مكان بعيد شوي عن سيف ..

وكان يراقب باب حجره الانعاش بأمل ان يزوي تظهر له ..

فـ حجـــره روضـه ..

روضه كانت تكبت الدموع والحزن اللي فـ داخلها طول ما هي فـ المستشفى،

ويا اهلهـا ، وكانت تصبر الكل وتحاول انها تخفي قد ماتقدر الحزن

اللي محتويها .. لانها ماتبا احد يطالع على دموعها وضعفها

واول ماحدرت جنـاحها على طول سكرته باللوك ،

كانت تبا تستفرد بـ نفسهـا ، وطلع كل اللي كانت تكبته وتخفيه

عن الكل ، وتوجهت على دولاب فـ ستور حجرتها ..

كانت محتفظه بمجموعه صور حقها هي وحمدوه ويزوي

وبسرعه راحت وطلعت صوره حق يزوي وهي تسوي حركات استهبال ،

وتمت تحضن الصوره بكل قوتها وتجربها على صدرها ..

وانفجرت مره وحده وكانت تصيح بكل عبره ،

ورمت بنفسها على الأرض وهي حاضنه الصوره

وتصيح بكل مافيها وشهقاتها كانت كل مالها وتزيد .. ليش يايزوي

ليش تبين تتركيني؟؟ ليييييييش ..!!

ليش كل اللي احبهم واتعلق فيهم يتركوني ..!!

اول عهود ماتت وتركتني .. وانتي احين بتموتين وبتتركيني ..

لااااااا يا يزوي مابسمحلج والله ما بسمحلج تتركينـي ..!

والله مابسامح اللي كان السبب فـ اللي انتي فيه ..

والله بحرمه النوم ومابخليه يشوف الراحه ..

والله يا يزوي لا انتقم لج شر انتقاااام والللللللللللللله ..

تمت روضه على حالتها وهي تصيح وحاضنه صوره يزوي

بين ايدينها لحد ما غفت وراحت فـ نوومه ..

أم راشد كانت يالسه بهدوء وتصيح..

وبين يديها القران ..

والمصحف يرتج في ايدها دليل انها ترتجف وهي تقرا..

وطبعا ماغفت لهـا عين موول .. تمت على هـ الحال لحد ما بدت

خيوط من ضوء الشمس بالظهور ..

نشت من قعدتها وسارت وصلت لها ركعتين ..

ومن عقب ما خلصت كانت تدعي من كل قلبها ودموعها على خدها :

اللهم اني استودعك ابنتـي فـ حفظها يارب من كل شر ..

والطف بحـالها .. وعافها من كل بليـه يارب العرش العظيم ..

اللهم إليك فوضت أمري وعليك توكلت يا أرحم الراحمين ..

وع الســاعه 8 الصبـح ..

الكل تقريبا كان ناش فـ بيت بو راشد .. لان محد منهم ياه النوم

ولا غفت عينـه ..

وتوجهو للمستشفى والكل كان ساكت ولا واحد منهم رمس مول ..

فـ بيت بو سالم ..

ام سالم وبو سالم وحمد وشما .. كانو يتريقون بهدوء ..

بو سالم : عيل وين رواضي ..؟

ام سالم : فـ حجرتها يمكن بعدها مانشت من الرقاد ..

بو سالم : شقايل مانشت ماتبا تسير المستشفى ويانا ..؟

شما بلعانه : اصلا هي متعمده تسوي عمرها راقده لحد احين عسب

نسير عنها واتيي بروحها فـ سيارتها ..

(وتغير من صوتها وتسوي عمرها خيفانه على روضه): والله اخاف فـ يوم

يجكوها الشرطه وهي ما عندها ليسن ، عقب عاد تستوي لنا فضيحه

بنت احمد الـ .. خريجه سجون ..

بو سالم وبنرفزه : خلي عنج هـ الرمسه روضه عاقل وماتسويها عندها دريوليه

اتيبها وتوديها .. وهي واعدتني ما تظهر بروحها من البيت بـ سيارتها الا

اذا كانت صج مظطره تظهر ..

شما وبتمثيل : ابويه انا ما قلت شي وربي انا خيفانه عليها

وهي يوم تظهر تقول كل مره كنت مظطره ومظطره .. وهو ماشي منه ..

بو سالم وهو ينش من الطاوله : لا خلصتو اتبعوني انا بتجدمكم ..

شما وبقهر وهي تهمس عسب محد يسمعها : انا مادري شو مسويتبه هـ الروضه جيه يحبها .. ماشوف شي فيها ينحب ..

فـ جنــاح روضـه ..

روضه كانت ناشه اول وحده وكانت متعمده انها ماتنزل تحت وياهم

كانت تخطط وتفكر لشـي ,,

مسكت فونها ودقت على حمدوه ..

(حمدوه كانت تتجهز تبا تسير المستشفى ويا امها وابوها ..

وتفاجأت بصوت فونها اللي يصيح)..

حمدوه وهي ترد ع روضه بضيجه : هلا روضه ..

روضه : صباح الخير حمدوه ..

حمده : صباح النور .. خير بلاج داقه احين ..

روضه : حمدوه اباج فـ سالفه ضروريه.. تعالي ويايه البيت وااحيــن

حمدوه : ماقدر رووضه بسير المستشفى احين ويا يزوي

روضه : وانا اقولج لا تسيرين تعالي ويايه .. وعقب بنسير المستشفى

انا وانتي ويا الدريوليه مالي ..

حمدوه : بس انـ ..

قالت روضـه وهي تقطـع على حمده: لا بس ولا غيره تعالي احين وبسرعه ..

حمدوه برضى : خلاص انزين..

( وبـ نبره ضعيفه ) : احين بخليهم يمرروني عليج ..

روضه : اترياج ..

حمدوه : اوك .. باي ..

روضه : بااي ..

وتوجهت حمدوه لبيت قوم بو سالم ويا روضه .. وامها وابوها سارو

المستشفى ..

فـ جنــــاح روضه ..

وبـعد مرور دقـائق معدوده ..!

حمدوه : خير روضه شو ويــاج ..؟

روضه : ويـايه خطه ..

حمدوه بأستغراب : خطــه ..!!!

(وبـ نبره ألم ) : خطه شوو .. وفـ هالوقت بالذات ؟؟

روضه : بقولج لا تستعيلين ..

حمدوه : يلا اسمعج ..!

روضه : اسمعي انا شاكه فـ موضوع يزوي .. واذا طلع اللي

فـ بالي صح ياويله منيه ..

حمدوه بعدم فهم : روضه لا ترمسين بالالغاز ارمسي شرات الخلق والله

مافهمت شئ ..؟؟؟

روضه : انتي مب فـ خاطرج تعرفين شو اللي وصل يزوي للحاله هاي؟

حمدوه : الا خاطري ونص .. بس شقايل ..!!

روضه : قلتيلــي شقايل ... ها اللي كنت ابا اوصله ..

( وكملت بـ ابتسامه أصرار وقوه ) : طـالعي نحن احين بنسير بيت قوم يزوي وبنفتش حجرتها

عسى ولعلى نكتشف سر تغير يزوي وسبب الحاله اللي هي

وصلت لها ..

حمدوه : يعني قصدج احين نسير بيتهم ونفتش حجرتها؟

جاوبتها روضه : هيـــــــه ..

حمدوه : اوكيك يلااا ..

( سارن البنات بيت قوم يزوي وبحكم انه مايفصل بين بيت بو راشد

وبو سالم الا يدار .. )

حمدوه : روضه بنحدر بيت الخلق بدون لا احم ولا دستور

روضه : ترا نحن مب حادرين بيت ييرانا هذولاء اهلنا ..

وبعدين اكيد احين محد فـ الفله .. الا البشاكير بس ..

حمدوه : يلا انزين ..

( حدرن البنات البيت وسارن حجره يزوي وقعدن يفتشن فيها

عسى ولعلى يكتشفن سر تغير يزوي المفاجئ .. )

وعقب دقايق ..

روضه : ها حمدوه لقيتي شي ..؟

حمدوه : لا ..

روضه وبتفكير وعقب صرخت : هييييييييه ..

حمدوه : شووو شووو ؟؟؟

روضه : حمدوه انا اتذكر ان يزوي كانت تكتب كل اللي يمر عليها

فـ مذكرتها .. خلينا اندورها بسررعه ..

قالت حمدوه بـ فرحه : اوكي تماام ..

قالت روضـه وهي تأمر حمده : انا بدور فـ الستور وانتي دوريها هنـي فـ الحجره ..

حمدوه : اوك ..

( سارن البنات كل وحده منهن اتدور فـ مكان لحد ما انتبهت حمدوه

للمذكره اللي كانت مرميه فـ الارض بأهمال ونص اوراقها مقطعه

حمدوه وهي تاخذ المذكره وبدت تقرا فيهـا ..

وعقب ثواني ..

: هئئئئئئئئئئئئئئئئئئئ روووووووواض تعاالي ..

روضه وبسرعه تجرب من حمدوه : هاا لقيتي شي ..؟

حمدوه : هيه لقيتها .. طالعي طالعي شو كاتبه ..

( مسـكت روضـه المذكره بـ فضول ..

وقعدت تقرا فيـها .. ) !!

وعقب فجت عيونها .. وبـ صدمه قويه : لييش يا يزوي ما قلتيلنا لييش ..؟

ليش كنتي تكبتين كل شي فـ داخلج .. لحد ما وصلتي لـ هالحال ..

الله يساامحج ياربيه ..

( وبـ نبره عتاب ) : ليتج قلتيلنا يا يزوي .. ولا صار اللي صار ..

حمدوه : والسوات احين ..؟

قالت وبـ بديهيه : بسسرعه دوري الفون .. ابا اطالع المكالمات والرسايل اللي كانت

اتيهـا ..

حمدوه : اوك ..

( البنات كانً محتشرات وهن يدورن على الفون لحد ما لقته

حمدوه تحت الشبريه وهو مبطل قطعه قطعه .. )

حمدوه وهي تركب اجزاء الفون وعقب فجته ..

( طبعا كان فون يزوي مغلق لكن بحكم ان يزوي وحمدوه ورواضي

وايد جريبات من بعض ..

كل وحده منهن كانت تعرف باسورد الثانيه ..)

حمدوه اول ما فجت الفون على طول توجهت للرسايل

وبسرعه صرخت : رووووووضه تعاالي ..

روضه وهي تتاخذ الفون من ايد حمدوه وتقرا : شــــــــــــــت الحقيررر

سواااهااا .. قسم بالله كنت شاكه .. وشكوكي يات فـ محلها ..

حمدوه : طالعي المسج اللي عقبه ..

روضه وهي الشر يظهر من عيونها : قســـم بالله واللي خلق هـ الكون

لا اخليك تندم على الساعه اللي فكرت اترمس يزوي فيهـا يالنذل الحقير

حسبـــــــــي الله عليك .. حسبــــــي الله عليك ..

( كانت بـ هاللحظات ماسكه الفون وهي الشر يظهر من عيونها وهي تقرا

المسجات وراء بعض ..

المسج الاول : ( زوزي حبيبـي شحالج .. وحشتينـي يالهنديه ..

لا يكون نسيتيـني .. اشتقت لصوتج يلا ردي احين بدق .. )

المسج الثاني : ( زوزي حبيبـي ردي عليـه .. ترا انا والله مانسيتج

وكنت طول هاك الفتره مشغول وماقدرت ارد عليج ..)

كانت روضـه تقرا المسجات اللي كانت فـ فون يزوي مسج ورا مسج

وهي تتحلف وتتوعد لهـ الشخص اللي ما فيه احساس ..

حمده وهي تصيح :هـ الحقير وينه عنها طول 3 سنين ..

خلها تتعلق فيه وتحبه من كل قلبها ..

يزوي ماحبته كـ انسان يزوي حبته كـ ملاك

دمرت كل احلامها عشان خاطره .. وخانت ثقه اهلها علشانه

وكانت ماتنام الليل عشانه .. وعشان راحته ..

واخر شي ودرها ولا جنه شي مستوي

وسار يخونها ويا هـ الحقيره اللي ما تتسمى ..

هـ الحقيره اللي ما تسوى ظفر من ظفور يزوي ..

( كلمت وهي تشهق ) : لحد ماخلاها تعيش فـ عذاب والم وحسره ..

ومن بدت تنساه وتكمل حياتها يي وبكل سهوله يفج كل الدفاتر الجديمه

اللي تسكرت من زمان ..

تنهدت روضـه وهي تحس بـ انها بتموت من الضيجه : حسبـي الله على هـ الحقيره

اللي ماتتسمى لو ماهي جان احين كل شي شرات ماكان ..

( وهي تعيد ذكرياتها لوراء ) : وربي كنت شاكه فـ رمسته من يوم بدا يرمس هـ الحقيره ..

تغير فجـأه على يزوي .. لحد ماتركها ..

كملت حمده وهي تصيح : اتذكر كل شي جنه احين يستوي ..

اتذكره يوم كان يرمس يزوي ويقول لها ..

....: ام خليفه ..

يزوي : عيون ام خليفه ..

.... : فدييت عيونها انااا ..مم اول ولد لنا بنسميه خليفه ..

والثاني محمد وبنسمي بعد عبدالله وشيخه واحمد

وفطوم وريم وحمد ومنصور وسلطان و..

يزوي وبتقاطع : والخيبــــه بسك جم وااحد انت تبا درزنين .. بنفتحلهم مدرسه بروحهم عاد ..

.... : هههههههههههههه .. مايسدوني اباهم كلهم يشبهونج ..

يزوي : يكون احسن شيفتك تخوف خخخ

... : انا اخووف .. مقبوله منج يا بنت سلطان لكن ماروم اقولج شي

مشكلتج القلب ..

يزوي : ههههه يالعياار ..

... : والله العظيم يا يزوي اني ما اتعير عليج ولا اقص عليج

انا اشوفج شرات الالماسه النادره اللي محد شراتها .. اخلاق ،

وطيبه قلب ، وعفه وطهاره ، وبنت ناس ، وغير كل ها حبيتج قبل

لا اشوفج ولا اسمع صوتج ..

يزوي : احم .. انزين جب استحي جيه ..

...... : وان اشو اللي يذبحني غير هـ الدلع والمستحى .. يانااااااااااااس امووووووت

فيهــــــاااا احبها احبهـــــــــا ... والله والله يا يزوي من اوصل البلاد

ع طوول بيي اخطبج من ابوج ..

يزوي : ان شاء الله ياربي .. مم صح انت جم باجي لك ..؟

..... : باجي هـ الشهرين وبرجع البلاد خلاااص ومابرد هنـي موول

بسني كرهت بريطانيا والسبب انها مبعدتني عنج سنتين ..

ومن ارجع بتم اربعه وعشرين ساعه ارمسج ،

يوم اكل ويوم ارقد وحتى يوم امشى برمسج

مابا ولا دقيقه افقد صوتج ..

يزوي بخجل : الله يردك بالسلامه لهلك واللي يغليك ياربي ..

.... : يسدني ارد لج انتي وبس ..

قـالت روضه وهي ترد حمده للواقـع : ومتى عرف هـ النسره اللي ماتتسمى ..؟

حمدوه بـ ألم واضـح : عرفها عن طريق يزوي .. يزوي لانها طيبه وعلى نياتها

ما كانت تدري بمخططات ميثه الحقيره ..

كنت احذر يزوي واايد من ميثـه واقولها هـ البنت انا مب مرتاحه لها

بس يزوي ما كانت تشوف بعيونها كانت تشوف كل شي بقلبها

كانت تقول لميثووه كل شي ..

( وبـ ألم وحسره ) : تخيلي حتى صورته راوتها ..

( وبـ حقده كملت ) : وميثوه من طالعت " نهيـان " حست بالغيره من يزوي ليش عندها شخص

يحبها شرات نهيان ..

لانه كان وسيم وحلو ..

( وهي ترد للذاكرتها الرمـاديه ) : وفـ يوم من الايام يزوي كانت زعلانه على نهيان لانه يومين

كان فـ المستشفى ولا عطاها خبـر .. ولا قالها شي عن مرضه ..

لحد ما ميثوه لقتها فرصه ..

وقالت لـ يزوي عطيني ايميله وانا

بحل كل شي بطريقتي ..

ويزوي بطيبتها وبياض قلبها

عطتها ايميله بنيه صافيه ..

لحد مابدت ميثه تتقرب من نهيان شوي شوي وخلته غصب عنه

يسمع صوتها ..

وبدت اتفتن على يزوي وطلع رمسه عليها على ان يزوي جذابه ..

وهي بنت فقر .. وكل رمستها جذب فـ جذب ..

وهي كانت

تنصحها انها ماتجذب عليه بس يزوي كانت ما طاوع احد ..

( كملت ودموعها ع خدها تنرسم بـ حراره ) : كانت تقولـه ..

تبا تقص عليك وتحرق قلبك ويوم اتيا تتجدم لها وتخطبها بتخلي

ابوها واخوانها يطردونك شرات الجلاب ..

لحد ما بدا نهيان ايصدق رمسه ميثه ويتعلق فيها ..

وتطورت العلاقه بينهم لحد ما استوى يرمسها فـ الفون ، ..

ويوم اكتشفت يزوي

ان نهيان يرمس ميثه..

واجهته بس هو قالها بكل شي

وصارحها ، وقالها ان ميثه قالتله جيه وجيه ..

يزوي ما رامت تستحمل الرمسه

وانهارت علينا ..

وقعدت فـ المستشفى ما يقارب اسبوع ..

ومن ردت البيت كانت اتدق عليه بس هو مايرد عليها ..

كانت كل يوم اتدق وطرش مسجات بس هو ما كان يرد عليها ..

لحد ما يات ميثه .. وقالت لـ يزوي ان نهيان يقولج غسل ايده منج

وما يبا يشوف ويهج عقب اليوم ..

لانج جذابه ومب قد الحب والثقه

اللي عطاج اياهم ..

ومن عقب ما عقت هـ الرمسه على يزوي استوت جثه بليا روح ..

كانت ماترقد الليل الا ودمعتها على خدها ..

وابتعدت عن الكل .. وتركت دراستها ما يقارب 3 اشهر ..

لحد ماغصبوها اهلها اتكمل ..

وكانت اتسير المدرسه جنها واحد من الكراسي ولا الطاولات

لا ترمس احد ولا احد يرمسها ..

واذا احد رمسها بتنفجر فـ ويهه وبتبدا اتصيح ..

اهلها عيزو وهم يحاولون يخرجونها من الانعزال اللي هي عايشتنه

كانت اتصيح ليل ونهار ..

وما ترقد الا وهي ماسكه الفون فأيدينها عسى ولعلى يفكر يطرش شي ..

لكن للاسف ما فكر مول انه يطرش شي ..

وكانت يزوي تموت فـ اليوم الف مره .. ما كانت تتوقع انها راح يودرها

من عقب الحب اللي كانو يعيشونه ..

كان ما يرقد الا ع صوتها .. واذا مرضت هو يتم وياها ويرمسها عسب ينسيها مرضها

لحد ماتغفي عيونها وترقد ..

ما كانت تحبه وبس .. كانت اتمووت ع التراب اللي يمشي عليه ..

كانت تعشق الهوى اللي يتنفسه .. كانت مستعده تعطيه روحها لو طلبها ..

حبته بجنون ..

وياليتها ما حبتـه .. لان هـ الحب هو اللي دمر حياتها ..

خلاها اتعيش فـ عالم كله حزن فـ حزن ..

كنت احاول اخفف عليها بأي شي .. بس للاسف جنيه ما كنت اسوي

أي شي ..

مجرد ما تسمع اسمه تبدي تصيح بهستيريه ..

ما كان بـ ايدي اسويلها أي شي ..

كنت اصيح واخذها واحضنها

بكل قوه واحاول اخفف عليها الالم اللي تحسه ..

ما كنت اقدر اضمها من الرجفه اللي كانت ترتجفها ..

( وبدت تشهق وبـ نحيب مؤلم) : كنت اخاف عليها اتموت بين ايديه

كانت اتصيح بكل عبره وهي تزقره بأسمـه ..

كانت تزقره بأسمه وتقول وهي بين شهقاتها : نهيــــــــــــــــان ..

وووينـــك يا نهيــــــــــــــــــااااان ، انت ماتخليت عنــــيه مستحييل انت تحبنيه

شرات ما انا احبـــــــك ..

لييييييييييش يا نهياان

لييييييييييش طعنتي فـ ظهريه .. وخنتــني ويا وحده من بنات هلي ..

ليييش من بين الناس كلها سرت لاوسخ انســـــــانه فـ الدنيا ،

لييش سرت لـ ميثه ...

ورربي ميثه ما تستـــــــاهلك ورربي ميثــه لعاااابه ووسخـه ..

حرااااااام عليك ليتك سرت ويا وحده تستااهلك ..

ليتــك خنتــنيه ويــا وحده تستااهلك ،

اناا شو سويت لـك .. ورربي حبيتك من كل قلبيـه

( صرخت بكل ما فيها ودموعها مغطيه ويها) :ورررررربي حبيـــــــــتك

يا نهيــان اكثر من رووحيــــــه ..

ليييييييييييش تسوى فيه جيه ...

كمــلت حمده وصوتها أجهش من الصيـاح : وطبعا يزوي ما كانت ترمسه شرات ما البنات احين يسون

كانت ترمسه وهي على ثقه انه بيكون من نصيبها ..

وهو كان صج يحبها من كل قلبه وناوي انه يتجدم لها ويخطبها اول

ماييي البلاد .. لو ما هـ الحقيره اللي ماتتسمى خربت كل شي وحرقت

قلب يزوي ..

وعقب تقريبا سنه وشي بدت يزوي تتغير وتخرج من العالم اللي

كانت عايشه فيه ..وبدت ترد شرات قبل ،

وجسرت فونها وقطعت البطاقه تقطيع ..

وخذت لها رقم يديد غير عن رقمها الاولي ..

عسب تحاول تنسى كل شي جديم

وتبدا حياه يديده ..

كانت نظره الحزن لا زالت موجوده فـ عيونها الا انها كانت تحاول تتناسى

وكنت احاول اني ما افارجها ولا دقيقه عسب لا تحس بالشوق له ..

كنت احاول انسيها اياه بكل الطرق ، وكانت اتحاول اتمثل جداميه انها

نسته بس كنت ادري انها مانسته ولا بتنساه ، ..

لان الحب اللي كانت اتحبه

لـ نهيان مستحيل تنساه لو عقب 40 سنه ..

كانت من تسمع احد يزقر بأسم نهيان يتغير ويها 180 درجه ،

ولا اذا قرت اسمه فـ التلفزيون ولا فـ جريده على طول عيونها

تدمع ، بس تحاول تخفيهم عسب محد يلاحظ ..

كنت ادري انها لا زالت تحبه ، وتعاني فـ داخلها ،

لكنها تحاول تتظاهر جدامنا انها نسته ..

لحد ما قررت اني اتم وياها على طول ، حتى فـ الرقاد

كنت ارقد وياها ، وامايه ما كانت تمانع هـ الشي ..

وكانت من تحس اني انا رقدت تبدي اتصيح بكل حرقه

وهي حاظنه صورته والصور اللي كان يهديها اياهم ..

كان يهديها صوره ، وصور ورود هو يصورهم ويطرشهم لها ..

وكانت تسويلهم برنت وتجمعهم فـ البوم كامل ..

وما كانت تسمح لاحد يمد ايده على الالبوم كانت اتعامله

معامله خاصه ..

( بدت حمدوه تمسح دموعها ) :قلبي كان يتقطع وانا اسمع شهقاتها ..

اللي تحاول تخبيهم وهي

حاضنه الصور وتمسح عليهم وترمسهم ..

كانت ترمس الصور جنهم يسمعونها ،

وتسألهن عن نهيان واخباره لحد ما تغفي عيونها ..

وهي دموعها على خدها وحاضنه الصور ..

كانت تحاول تخفي المها بمرحها وخبالها ع الكل ..

وكل من يطالعها مابيقول ان هاي تحمل بداخلها مدينه من الالم ..

يزوي ما نسته ، مانسته ولا دقيقه كانت ذكراه ترافقها وين ما تسير

واكبر دليل على انها مازالت تحبه ولا نسته

يوم غلط انا ذيج اليوم وقلتلها هنديه ..

ما تحب احد يقولها هنديه والسبب انه كان معودنها يوم

يسوي عمره معصب ولا يبا يسولف وياها كان يقولها هنديه

وهي تضحك وتقوله لا تستانس تراك الا بتاني ..

بتاني يحب هنديه شو بيطلعون ..

ويتمون كل واحد منهم يتمصخر على الثاني ..

ما كانت تبا تسمع هـ الكلمه بالذات لانها كانت تذكرها فيه

وتتذكر الايام الحلوه اللي قضتهم وياه .. تتذكر كل دقيقه وكل لحظه

قضتها وياه ..

كنت اتمنى انتقم من ميثه شر انتقام ..

لانيه بطول الوقـت كنت أطالع تؤأم روحيه تتعذب جداميه وتعاني ..

وانا ما سوي شي ..

كنت ابا افضحها جدام اخوها واراويه كل مكالمات اخته للشباب

اللي تعرفهم ، ..

( رفعت عيونها لـ روضـه وهي تقول ) : ما كانت تعرف واحد ولا اثنين ..

كانت تعرف فووق 15 واحد ، ..

وتظهر وياهم وتسير من وين ماتبا ويا ربعها

ومرات تشرد من الكليه لانها مواعده وماترد الا فأخر الدوام ..

هذولاء اللي كانت تخبرنا عنهم من غير اللي ما نعرفهم ..

كنت ابا احرق قلبها شرات ما حرقت قلب يزوي ..

بس يزوي ما خلتنيه ..

طيبتها هي اللي وصلتها

لهـ المواصيل كلها ..

( بتستغربون ليش ان روضه تسأل حمدوه عن اللي استوى ، لان روضه

اصلا كانت مب موجوده فـ ذيج الفتره كانت بطول الاربع سنوات الفايته

مب متواجده فـ الدوله كانت فـ فرنسا تدرس ، والاخبار كانت توصلها من حمدوه

بس بالتنقيط يعني مب كلها ..)

تنهدت روضه من عقب ما سمعت السالفه كلهـا ..

وحضنت حمدوه وقعدت اتهدي فيها لان حمدوه كانت اتصيح بعبره..

ومن عقب ما هدت حمدوه شوي

خذت روضه فون يزوي وياها وحطته فـ جنطتها ..

وقـالت بـ أصرار وثقـه : خلاص عرفت اللي اباه واحين تعالي منسير المستشفى

( وتوجهن البنات المستشفى ، ..

وطبعا كانت دريوليه روضه هي اللي موديتنهن )

وكان بـ هاللحظات فيـه شخص يراقب كل تحركات روضه وحمدوه ، ..

و ويـن مايسيرن تبعهن ..

لحد ما وصلن المستشفى ..

الكل كان متيمع فـ المستشفى من شواب وشباب وحريم

وأم راشد كانت ساكته طول الوقت تقرا قرآن ومهديه نفسها ع الآخر..

وماتبين الحزن الي فيها..

وهـ الشي الي خوف خواتها وام سالم عليها..

لأنها ساكته وماتصيح.. يخافون يستويبها شي..

وحال حمده وروضـه مول ما كان يقل عن أم راشـد ..

كانت بـ هاللحظات تكتم العبره اللي خنقتها ..

من اول ما وصلت المستشفى

قالت وهي ترمس روضه وبهمس : الله يعينها خالتج والله خايفه عليها..

والله لو تصيح ابرك لها حابسه في عمرها ..

تنهدت رضـه وهي تقول : انا اكثر منج خيفانه عليها ..

( عقب دقايق معدوده أذن بـ الظهر ..

و سارو كل الشواب يصلون فـ مصـلى المستشفـى )

والوحيـد اللي تم هو سيــف ..

جرب من الدكتور وهو يقولـه : دكتور دخيلك خلني اشوفها لو ثواني ..

( الدكتور كان معورنه قلبه على حاله سيف ..

من يومين احين وهو

قاعد فـ مكانه وموول مايتحرك ) ..!

أبتسم بـ ألم ع حال سيف وهو يقول : خلاص بدخلك ويـاها

بس لا تطول لان حالتها ما تسمح ان احد يقعد وياها فتره ..

قـال سيف وبسرعه : والله مابطول والله ..

( فـ البدايه كان متردد يحدر ولا لا ..

وفجــآه ما يحس الا بأيد تنحط على

جتفه .. )

حمد : احدر يا سيف و تطمن عليها ..

سيف بحزن : ريوليه مب قادره تشيلنيه .. اخاف احدر واسمع خبر مايسرنيه ..

حمد : لا تقول جيه يا سيف .. وكل امرك لله ..

( حدر سيف وبخطوات ثجيله توجه لمكــان اليـازيـه ..)

كان يطالع شكلها وهي محوطه بالاجهزه المركبه عليها

فـ كل جزء من جسمها ،

وراسها اللي مب ظاهر منه الا عيونها وويها الطفولي ..

جرب منها وهو يحس ان روحه بتظهر من مكانها وهو يطالع على حبيبته

وروحه ودلوعته فـ السرير الابيض ..

بكل هـ الضعف ..

عايشه على الله ثم على هالأجهزه والادويه الموصله لهـا ..

ما هانت عليه .. جرب ومسك ايدها الضعيفه اللي كانت موصله بجهاز نبضات القلب

وقعد على ركبه وجرب ايدها منه وباسها

وعقب حطها ع صدره وقعد يصيح من كل قلب : يزوي انتي

تسمعينيه مب جيه انا سيف حبيبج ، انا سيف اللي دوم

انقذج من عبدالله وشطانته ..

( كمل وهو يشهق بـ ألم ) : يزوي دخيلج ردي عليه ، ليييش يا يزوي ،

ليييش تسوين فيه جيه ..

مابا شي يصيبج يا يزوي .. والله بموت والللله بمووووت..

سمع صوت أخوه عبدالله من وراه ..

واللي كان بس حادر غرفه العنايه المشدده : بسم الله عليها..

لا تقول هالرمسه ياسيف ..

واليازيه مابيصيبها الا كل خير ان شاء الله..

( وبـ نبره قويـه ومؤلمه ) : طـالع امك وهلك يصلون ويقرون قرآن ..

وانت تصيح وتتفاول عليها ..

نش يا سيف خلى الباجي يحددرون يطمنون عليها ..

( نش سيف من عقب ماسمع رمسـت أخوه ..

وظهرو من حجره العنايه المشدده وهم تاركين اختهم وراهم ) !

وكان كل واحد يحدر شوي ويظهر ..

وهو يصيح ومتفأجى من منظر اليازيـه المؤلم ..

كان عبدالله فـ هالوقت يحاول يقنع سيف بـ انه يسير يأكل له شيء

بس سيف معند ومب راضـي : سيف نش كل لك شي انت من امس ما حطيت شي فـ حلجك

مب زين لك ..

محمد : هيه والله .. نش سير البيت .. وترا نحن احين كلنا وياها .. سير البيت

وريح وكل لك شي ..

عبدالباسط : يلا يا سيف نش انا بوديك ..

سيف بعناد : مابتحرك من هنـي الا وريلي على ريل اليازيه ..

عبدالله : بس الـ ..

قطعت حمدوه كلام عبدالله بصياحها وصريخها.. : سيـــــــــف .. هات الدكتور ..

إلحق على اليـازيه بتموووووووت.. ااااااااه يا يزووي..

ظهرت روضه ويودت حمدوه وتمت حاضنتها تهديها..

قربت منهم المياسه تفهم شو السالفه ..

اما سيف فـ بسرعه دخل غرفه يزوي والممرضات والدكتور المختص دخلوا وراه

على طول من سمعوا جرس الإنذار ..

همسـت المياسه وبـ خوف واضـح : شو مستوي..

قـالت حمده وهي مقطعه عمرها من الصيـاح : مادري فجأة صابتها تشنجات في التنفس وبدت تناقز على

الشبريه و ويها يزرق..

ماقدرت المياسه تكتم دموعها ..

وبسـرعه نزلن وهي تحط رأسـها ع اليدار وشهقاتها كل مالها وتعلى ..

( كانت الميـاسه تملك قلب أبيض محد يملكه ..

وتحب الكل وتتمنى الخير لهم .. عكس أختها شمــا ..

وكانت دايم تتمنى بـ انها تكون اليازيه لواحد من اخوانها ..

والحمدالله انكتب لها انها تكون لمحمد ..

بس يافرحه ماتمـت ..! )

بعد دقايق معدوده وصـلن الحريم وويـاهن الشيوبه ..

لانهم كانو سايرين يصلو ..

رفـعت حمده رأسـها بعد ما كانت منزلته وهي تصيـح وبـ ألم واضـح ..

والتقت عينها فـ عين عمتها أم راشــد ..

بدون تفكير وبسرعه ارتمت وسط حضنها وهي تقول : عمتيه قولي ان يزوي مافيها شي

الله يخليج.. الله يخلييييييج ..!

حسـت ام راشد بالخوف من طالعت حال حمدوه ،

وكانت فكره وحده تدور فـ بالها ..

" اليـازيه ماتت " .!

ظلت تتطالعها وتمسح على راسها.. وماسكه عمرها: لا يزوي بنتيه مافيها الا

العافيه..

قلبيه يقوليه ان اليازيه مافيها شي بس تتغلى عليكم..

بنتـيه وانا احس فيها اكثر عنكم..

" العنــايه المشدده " ..

من دخل سيف وطالع حاله يزوي ..

كأنها كانت حاله واحد يحتضر ويحس بإختناق

وبيموت ..

تجمد مكانه ..

وظل يدور على عبدالله في الحجره ويطالع حواليه ..

وأخيرا التقى نظره بـ عيون عبدالله ..

وكان بـ هاللحظات واقف على الزاويه اللي وراه يطالع اليازيه ويصيح بصمت وألم..

كأنه مشلول عن أي حركه..

جرب منه ..

والدكاتره في هـ الوقت وصلوا وبدوا يحطون لها اكسجين

ويحاولون معاها ..

عبدالله : قوي قلبك يا سيف مايستوي جيه

كانت عينه ع اليازيه وعيز بـ أنه يبعدها عنها :مب قادر اسوي شي..

مادري شقايل اساعد اختـيه وقلبـيه ..

( وبـ ألم واضح .. ودموعه تنحدر على خده ) : يزوي اللي فـ عمرها ما اذت احد ..

واللي الابتسامه على شفاتها دووم مرسومه بكل رقه ..

رغم صغر سنها .. ( وبـ حرقه واضحه ) : طالع حولك ...

وطالع ع الأجهزه المركبه عليها..

( وبشهقـات ) : شو تبانيه اسوي..

احس نفسيه شرات الميت..

متصنم وبس ..

واللي اقدر عليه اطالعها وبس..

حـس عبدالله بـ أنه نظرات سيف لـ لليازيه تزيد من ألمـه ,,

وبحركه سريعه سحبه من ذراعه وهو يظهره من هـ المكان الموحش ..

وطول ما يسحب سيف وياه ..

كانت عيون سيف مثبته ع يزوي

لحد اللحظه الي صكر فيها عبدالله الباب ومنع نظرات سيف بـ انها تتوجه لـ يزوي ..

بـ هاللحظات حس سيف بـ انه عاجز عن الوقوف ..

اتجه صوب الكراسي من غير لا ينتبه لأي شخص موجود حوله..

...

امـا فـ عن روضـه فـ كانت عيونها مثبته أتجاه سيف وبـ صدمه واضحه ..

وحسـت بـ انها بـ تذرف دموعها ..

وقلبها كان يتقطع على حالـته ..

سيف الريال الكبير يكون بهـ الضعف جدامها..

فــجأه ظهر الدكتور وقطـع عليـها تفكيرها ..

ومن أنتبه له عبدالله بسرعه أتجه ناحييته ..

وقـال بـ صوت ضعيف : ها دكتور بشر..

الدكتور: الحاله اللي اصابتها ...

( رفع رأسـه وهو يطـالع عبدالله ) : بسبب صعوبه وصول الأكسجين للرئه

فـ حست بإختناق..

لأن القفص الصدري عندها ضاغط على الشعيبات الهوائيه

بسبب بعض الرضوض الي يتها من الضربه ..

( وكمــل وبـ صعوبه .. وهو يترقب ردت فعل عبدالله ) : لان اكتشفنا ان الضربه ما اقتصرت

على الراس وبس .. كانت فـ الصدر بعد ..

( أنتبه الدكتور .. لـ ملامح عبدالله .. وبـ سرعه قال عسب يريحـه ) : بس استقرت حالتها احين ..

ومعدل التنفس صار تقريبا طبيعي ..

( وبـ صراحه واضحه ) : وما اخفي عنك انه التشنج هذا ممكن يرد لها ..

اللي تقدر عليه وانا اقدر عليه .. ان ندعي بـ انه الله يرحمهـا ويشفيها..

هي تحت رحمه ربك أحين ..

وبعدها مانشت من الغيبوبه اللي هي فيها ..

كان هالحوار كامل تحت مسمع سيف ..

كان يسمع رمسه الدكتور وهو مبهت يحس ان يزوي

فـ أي لحظه بـ بتترك ايده ..

جرب بو راشد صوب الدكتور .. وهو يقولـه : دكتور دخيلك خلنا نسفرها برع البلاد

الدكتور بـ أندفاع وخوف : مستحيل اتسفرونها وهي ع هـ الحال .. انتو بتضرونها

اكثر من انكم تنفعونها ..

( وبتنبيه ) : ويمكن تفقدونها بوقت اسرع ..

صرخ سيف ع الدكتور وزخه من البالطو ماله : لا تقول ان اليازيه بتموووت

والله لقطع لسان أي واحد فيكم اسمعه يقول هـ الكلمه ..

اليــــــــازيه ما بتمووت انت تسمع اليــــــازيه ما بتموووت ..

( الدكتور كان عاذر سيف وما قاله أي شي ..

وحب يتركه بـ حاله لحد مايتجاوز هالمرحلـه ) ..

تجدموا بسرعه عبدالله وحمد وهم يوخرون سيف عن الدكتور : سيف لا تسوى جيه

اذكر ربك ..

طاح سيف من طوله وهو ماسك راسه ويصيح من كل قلبـه ..

فـ اما عن روضـه حسـت بـ انها فهالمكان بتختنق ..

ومب متحمله تقعد ثانيه وحده زياده ..

تحس انها بتنفجر جدام الكل وبتذرف

دموعها المحبوسه فـ داخلها اللي فـ عمرها ما نزلتها جدام أحد ..

حبت بهاللحظات انها تبتعد عن عيون الكل ..

وبـ الفعل ..

انسحبت بكل هدوء بدون لا احد يحس فيها

وفـجأه .. وقفت فـ نص الطريج كانت تحس ان قلبها بيظهر من مكانه

وقفت وحطت ايدها على قلبها وتنهدت بكل قوتها ..

وكانت تحس بضيج فـ التنفس ..

بس الغريب انه ولا دمعه نزلت من عيونها ..

كان حاطه ايدها قلبها لعسى ولعلـى يخف الالم اللي فـ داخلها

كانت عيونــه تراقبها وبـ شغف ..

من لحظـه ما كانت ويـا هلها .. ولـحد هـ اللحظه ..

وحتى الحركه اللي سوتها وهي تحط ايدها على قلبها وتتنهد ما فاتته ..

مشت روضه بخطوات ثجيله لحد ما وصلت لثلاجه الماي الموجوده

فـ الممر ، خذت لها قلاس ماي وطلعت الحبوب من جنطتها وشربتهم ..

حـــس بـ الصدمه من حركتها .. ،

وكان تفكيـره بـ انه روضـه تأخذ هالحبـوب عسب تنسى همها ..

بس مسرع ما شال هـ الفكره من راسه

وهو يتذكر بـ انه روضـه تتعالج لانها مريضـه ..

وماتقدر تتحمـل فـ هالمواقف بالذات ..

كان الفيصل يحس بالحيـره ..

ولكن مسرع ما زادت حيرته وهو يطالعها تبتعد عن الكل وتأخذ الحبوب ..

يعني معناتها بـ انها ماتبا أحد يعرف بـ موضوع الحبـوب ولا المـرض ..!

لا أردايـاً كان يحس بـ انه ريولـه تأخذه ناحيتها ..

حـس بـ شوق وكره وحب تملك

سار وحظنها بقووه جنه يبا يحسسها ان الدنيا بخير ،

وروضه كانت متصنمه مكانها مب مستوعبه شي ..

جنه احد يا وجمدها فـ مكانها ، ماتحركت موول ..

الفيصل من حس بعمره بسررعه ابعد روضه من بين احضانه

وهمس فـ أذونها : أكــــــــــــــرهـج ..

واختفى عنها ..

روضه لا زالت فـ الصدمه اللي عايشه فيها ..

( الفيصل ما كان يدري ليش سوى جيه ، جنه فيه دافع يخليه

يسوي جيه بـ روضه .. مايدري ليش مرات يحس بـ الحنيه اتجاها بس مسرع

ما تتغير هـ الحنيه ويحل مكانها الكره والشعور بـ الانتقام .. )

روضه صحت من الصدمه اللي عايشتنها بصوت صريخ عالي ياي من الجناح اللي اهلها فيـه ..

وبدون احساس كانً ريولها هي اللي تدفعها اتسير بأتجاه مصدر الصوت ..

وبخطوات سريعه اتجهت لمصدر الصوت ..

كانت حاطه ايدها على قلبها وتدعي ان اللي فـ بالها ما يكون صج

واول ماحدرت الجناح تتطالع جدامها ..

انصدمت باللي تتطالـعه جدامها ..

سيف كان منهار للاخر .. وحمد كان يهديه..

ومحمد واقف يطالع ولا هو مستوعب شي ..

لحد ماشاف حمدوه وهي تقاوم تبا

تدخل الغرفه بس مب طايعين يخلونها السكيورتي اللي على الباب ..

حمدوه بأنهيار : خلووووووني.. أبا اشوفها.. ابوس ايدكم ..خلوني اشوفها اخر مره

في حياتي.. خلووووووني..

والمياسه ماسكه حمدوه ويا شما .. ويهدونها.. ودرتهم وسارت صوب عبدالباسط

ومسكته من كندورته وبدت اتهزه.. وهي تدمع مقطعه عمرها من الصياح :

عبدالباسط قول لهم يخلوني اشوفها .. دخيلك قول لهم.. قووووول لهم ..

مسكها عبدالباسط وحضنها وتم يصيح بصمت ..

وحمد يطالع من بعيد والدمعه محبوسه في عينه..

استغرب من هالبنت كيف ضعيفه في هالمواقف..

وام راشد اللي توقع انها تنهار أكثر وحده لأنها بنتها الوحيده ..

بس كانت متصبره وبدت تقرا قران بصوت مسموع وهي كلها ترتجف ..

فجأة حمدوه فجت عن أخوها وبدت اتصيح بأعلى صوتها : لاااااااااااااا..

يزوي ماراحت.. جذابييييين.. يزوي ماتروم تودرنا ..

يزوي تحبنا.. تحبنا.. (ومسكت عبدالباسط مره ثانيه بس هالمره تهز بقوة أكبر)..

ليش ماخليتني ابات عندها ذيج اليوم ..؟؟

ليش.. ؟؟ قلت لك ابا ابات عندها.. قلت لي لا..

لييييييييش ماخليتني اشوفها ؟؟ .. كنت بيلس وياها ..

يزوي ماماتت صح.. دخيلك قول لي انها ما ماتت..

وصرخت بكل ما فيها : يزوووووووووووي ..

( وربعت صوب باب الغرفه وتمت تدق عليها بقو .. والمياسه وشما يصيحون ويسحبونها ) ..

انتي جـــذابه.. جـــذابه.. ماتحبينا.. شوفي كيف ودرتيني

وتخليتي عني.. انا اكــررررررهج ومااحبج انتي جذااااااابه .. جذاابه يا يزووي ..

وعيونها غرقانه دموع ومحمره.. وخشمها أحمر من الصياح..

وبصوت مبحوح يملاه الترجي : .. دخيلكم دخلووني وياها ابا امووت وياها

ابا اموت ويا يزوي لا تخلونيه هنــي بروحي.. دخيلكم دخلووني ..

اما عن روضه فـ ما رامت تمسك عمرها زياده وبدت تصارخ ع الكل

وتبعدهم عن بعض ..

وبأنهيار : لا تصيحوووووون يزوي ما فيهــا شي ..

يزوووي بتنـــش احين ، يزووي ما بتموووت مستحييييييل ..

وسارت خذت حمدوه اللي كانت منهاره وقاعده فـ الارض

وقعدت تهز فيها بكل قوتها : حمدووه لا تصيحيـــــــن يزووي

تحبنــا مستحيل تودرنا ..

وكملت وهي جنها مب مصدقه اللي يستوي

( وضحكت ضحكه انسان متحطم ) :ههههه انتـي تذكرين يزوي

يوم كانت تغش ونحن نلعب وياها

هههههه يزووي بترد وبتلعب ويانا انا وانتي ..

وبنودرها تغش على راحتها .. مب جيه حمدووه ..

قولي هيه دخييلج حمدوووه .. قووولي ..!

كانت ام سالم تطالع على حال بنتها اللي مايسر ..

بسرعه جربت منها وحضنتها بقوه وقعدت تهدي فيها ..

قالت وهي تصيح : لا تسوين بعمرج جيه يا امايه

اذكري ربج وادعيلها بالرحمه ..

رفعت روضـه رأسـها وهي تتطالع امها بنظرات ما فهمتها وضحكت : ههههههه

اتتوا اتصيحون ، ليش اتصيحون اصلا يزوي احين بتنش

وقعدت اتهز فـ امها : اماااايه يزووي ما فيها شي

دخييييييييلج قولي ان يزووي مافيها شي

قوليلهم كلهم ان يزوي ما فيها شي ..

لهنــي وبس .. أنهارت ام سالم وهي تصيح بـ حرقه ع الحال اللي ووصلت له بنتها ..

بسرعه قصوى بعدت روضـه عن حضن امها

وتوجهت لـ ابوها وهي منهاره وتهز فيه : ابوويه قوللهم انت ..

قوللهم انهم كلهم جذااااابين ..

دخيلك ابوويه ارمـــــــــس ..

قوللهم انيه انا اقول الصدق وهم الجذااااااااابين

( وظلت لـ ثواني تضرب فـ صدر ابوها بكل قوتها وهي تهزه )

ماقدر يستحمل وسحبها بسرعه وهو يحضنها : يـا روح ابوج صيحي ..

لاتكبتين اللي فـ داخلج .. صيحي وظهري كل الالـم اللي فـ داخلـج ..

( بـس روضـه كانت عنيــده ودموعها اعند ..

وعيت تنزل .. وحتى وهي فـ هالــموقف .. )

من طالع ابوها انه روضـه سكتت وهي فـ حضنه ..

بدا يمسح عليـها وهو يقرا من السور ..

عسب روح بنته تهدي بالقران ..!

(وكانت بـ هاللحظات عيون تراقب روضه من بعيد وتراقب الكل

كان خاطره يسير ويحضن روضه ويهديها بس خلافه

ويا اهله ما كان يسمحله يجرب صوبهم موول ، ..

كان قلبه يتقطع وهو يطالع قلبه وروحه تتعذب جيه ومنهاره وهو ما يجرب صوبها

ولا يواسيها ،..

كان بيخربها وبيسير وبيحضنها جدام الكل )

اما فـ عن سيف فـ كان بعالم بروحـه .. ما كان يطالع شي جدامه موول

حس ان الدنيا خلاص توقفت ..

اوجعه وذبحه وطعن فـ قلبه من الصميم منظر اليازيه ..

وهي ترتفع بجسدها الساكن من اثر الصدمه الكهربائية اللي بادرو الاطباء فيها ..

بعد توقف قلبها عن النبض ..

حاولوا الاطباء لكن لحظتها مافاد ..

وعرف من اللي يطالعه ان الطبيب امر بزيادة قوة الصدمه الكهربائية ..

انهار ع الارض وهو يطالع جسد اليازيه يرتفع مرة ثانيه ليرد بقوة على السرير

ابتعد وهو يضم ايدينه بقوةلصدره وتوجه لله سبحانه وتعالى بالدعاء ..

ودموعه تنزل بغزارة ...

يارب الطف بحالها .. يارب الطفيارب وقومها بالسلامه ...

يارب تحفظها وتحميها .. يارب تخليها وتبجيها لكل عين ترجيها ..

روضه كانت متصنمه مكانها لحد احين مب مستوعبه شي

مستحيييل يزوي راحت مستحيييل ..

كانت تتطالع عليهم وهي مول ما تتحرك ..

واللي هزها وهز كيانها منظر سيف وهو شبه منهار عليهم

وحمدوه اللي تصيح بهستيريه والكل يهدي فيهـا ..

ماقدرت تستحمل زياده وبدون احساس قعدت تربع برع الجناح

ماتدري وين ريولها كانت تاخذها ، كانت كل اللي تباه انها

تبا تبتعد عن الحقيقه المره اللي تنتظرها ماتبا تسمع الخبر

خلاص ما عادت تستحمل فراق اللي تحبهم ..

تكره هـ اللحظه ..

وفـجـــــــأه ظهر جدامها ..

وكالعــاده يتواجد متى ماحس بـ انها فـ امس الحاجه له ..

بدون تفكير ولا حتى خطر فـ بالها بـ انه ممكن أحد يطالعها ..

توجهت لـه .. وهي تحس عمرها جثه بليا روح ..

جثه نهشت فيها سهام الغدر ..

نايف كان الشخص الوحيد اللي ممكن ان روضه تشاركه بهمومها

طول عمرها ما شاركت احد بهمومها والامها.. الا ابوها وحياتها " نـايـف "

ارتمت فحضنه بكل قوتها جنها تبا ترمي كل همومها وتبا تتخلص منها ..

حضن روضه بكـل قوته وضمها لصدره وهو يدري ان روضه

لو مب مهمومه جان ما سوت هـ الحركه ..

تربايت ايده شقايل ما بيعرف كل اللي يدور فـ خاطرها ..

روضه كانت ماسكه فـ نايف شرات الياهل اللي خيفان من شي

وشال هم الدنيا على راسه ..

جنها تبا تتخبى عن الحقيقه اللي تعيش فيها ..

كان نـايف يحضن روضه ويمسح عليها ويحاول يخفف عنها : خلاص ياروضه

لا تسوين فعمرج جيه .. واليازيه مابترد بضيجتج هذي

اليازيه احين محتايه دعاء .. ادعيلها يا روضه اذا تحبينها صج ..

( اما عن روضه فـ كانت دمعه حاااااره محبوسه فـ عيونها ..

بس كانت تقاوم انها ما تنزل دموعها ..

ومن عقب رمسه نايف حست ان هي صج خسرت يزوي وللابد بعد )

ضربته صدره بالخفيف .. وهي تهمس بـ صوتها المبحوح : لاااا يا نايف يزوي بـ تنش

يزووي ما بتمووت .. دخيلك قول ان يزوي مابتمووت ..

جربها اكثر من صدره وهو يحس بـ الحزن والضيجه

اللي روضه تحس فيهم بس ماسك عمره جدام روضه : خلاص ياروضه

لا تسوين جيه فعمرج ..

ماقدرت تتحمل وضربته على صدره ولكن هـ المره بـ شكل أكبر : قوول انها بتنش دخييلك قول انها بتنش ..

همس نايف عسب يهدى روضـه وقال : اليازيه بتنش ان شاء الله

بتنش يا روضه ..

( حسـت بـ بعض من الراحـه ..

يكفي بـ انه من يكون حذالها تنسـى كل هالدنيـا ..

ويكفي انه يحس متى ماكانت محتــاجه لــه ) ..

بس وبالمقابل كان الفيصـل وبهالوقت يحس بالبراكيـن اللي بداخله بتنفجـر ...

الغيره بـ داخله وهو يطالع جدامه روضه وهي بين احضان نـايف تقطـعه ..

كان وده يقطع نـايف بأيدينه ويبعد روضه عنه ..

مايدري ليش يحس بـ هالاحساس ..

( ومن زود الغضب اللي كان يحس فيـه وهو يطالع روضه بين

احضان واحد ضرب بأيده بقووه على اللافته اللي معلقه فـ اليدار

وتكسرت لقطع صغيره ..

وبسرعه البرق ظهـر من المستشفى كلـها .. ) ..!

لانه كان كاره انه يقعد دقيقه وحده فـ المستشفى ..

وهو يطالع روضه بين احضان واحد ،

وجدام خلق الله كلهم بدون حيا ..

الكل كان قاعد على اعصابه يتريون خبـر يوصلهم من الدكاتره

لانه تقريبا كان بيكمل لهم 4 ساعات وهم داخل العنـايه المشدده ..

ومن عقب انتظار طال 6 ساعات ونص ..

ظهر الدكتور من العنـايه وكانت الضيجه واضحه عليه ..

الكل تجمع فـ لمحه بصر حول الدكتور المختص ..

وقال محمد وبلهفه واضحـه : بشــر يا دكتور ؟؟؟

قال الدكتور .. و بضيجه : املها فـ الحياه ضعيف جدا ، 4 مرات توقف قلبها

وبعد عده محاولات كانت صعبه جدا علينا نرد له نبضه ،,,

بس مب شرات المعدل الطبيعي ..

يعني لا زالت فـ حاله حرجه ..

الكل فـ ذيج الساعه كانو محطين ايديهم على قلوبهم

مايبون يسمعون الخبر اللي مايتمنونه ..

ومن عقب رمسه الدكتور ما اخفي ان الكل كان يحس بـ الوناسه

حتى لو ما نشت بس اهم شي انها لا زالت متمسكه بـ الحياه

حتى لو كان فيه امل ضئيل وضعيف جدا ..

اما فـ عن ام راشد من سمعت ان بنتها لا زالت حيه ومتمسكه بـ الحياه لحد احين ..

فقدت الوعــي ..

اول ماوصـل الخبر لمسمـع روضـه ..

وبـ انه اليازيه لا زالت حيـه ..

صرخت من الوناسه اللياللي كانت تحس فيهـا : يــــــــــــــــــــــزوووي حيــه يزوووووووووي حيه انا ما اجذب

انا ما اجذب .. قلتلكم يزووي مابتمووت وبتودرني ..

( ومسرع ما ارتمت فـ حضن محمد )

و ضم روضه فـ حضنه بكـــــل حب

وكانت عيونه تدمع من الوناسه اللي يحسها ..

كملت وبلهفه : محمد انت سمعت اللي انا سمعته ..

سمعت اللي انا سمعته مب جيه ، يزوي حيه يزوي مب ميته

محمد يزووي ما ماتت ..

نزلت دمعه محمد من الوناسه اللي يحس فيها : سمعت يا روضه سمعت ..

( وردت تدفن ويها بين احضان محمد وهو ضامنها بكل حب وحنان )

اما فـ عن سيف فكان يحس ب انه الدنيـا مب واسعته ..

واختفى بلمحه بصر من جدام عيون الكل

بس حمد كان يتبعه ..

( كان متوجه لمصلى المستشفى ..

كان يصيح بكل حرقه وهو يصلي ورافع ايدينه ويحمد ربه على

ان اليازيه لا زالت متمسكه فـ الحياه ) ..

كان يسوق بسرعه جنونيه و الغضب كان عامي عيونه ..

ومايدري شو سر هـ الغضب ..

كل اللي وده فيه انه يجتل نــايف ..

واللي كان يقهر الفيصـل اكثر ان روضه

كانت ترتمي فـ حضنه بكل قوتها .. جنه ريلهـا ..

همس بقهر : والله والله يا روضه لا ادفعج ثمنها غالي هـ الحركه

( وضرب بأيدينه ستيرينق سيارته بكل ما فيه من قوه ) ..

ودعس ع البترول لاخر شي ..

وما كان يدري شو سر هـ الغضب كله ..

فـ المستشفى ..

الكل من عقب ما سمع الخبر كان يحس بـ بعض الراحه ..

والوقت كان متأخر واايد ..

يعني كانت تقريبا الساعه 3 الفيــر ..

طلب بوسالم من الحريم والشباب يردون البيت لان الوقت ليل

و كـ العاده الكل عارض لكن بعد اصرار من بو سالم الكل وافق ..

الا حمدوه وروضـه سارن بروحهن فـ سياره روضه وكانت وياهن عواش..

فـ السياره ويـا روضه وحمدوه ..

حمدوه كانت بطول الدرب اتصيح ولا سكتت وكانت مسانده راسها

على السيت ..

قالت روضـه وبضيجه : حمدوه خلاااص عاد لا تسوين جيه فـ عمرج ..

همست عائشـه بـ قهر وحقد : يزوي مافيها شي.. ومايحتاي اتصيحينها

لان اصلا كل ها دلع ..يعني بالمختصر تتغلى بس ..

واكبر دليل انها لحد احين حيه ، تقول قطوه بـ سبع ارواح

وبتتطالعيـن بترد ع حالتها القبليه اطفربنا وتغلس علينـا ..

انفجرت حمده فجأة: بــــــــــــــس خلاص.. شو من الاوادم انتي..

( وبـ نبره اعلى ) : ماتحسين مافيج قلب ..

خلووووووونيه في حاليه ..

اختيه بين الحيا والموت

شو تبونيه اسوي استانس ..

( وبـ ألم واضـح ) : ومنو السبب؟؟..

الــــــــحب.. الحب اللي حبته..

وهو الحقير بكل سهوله سـار لـ غيرها.. لييييييييييش.؟؟

سكتت روضـه وهي تسمع رمسـه حمده ..

فعلا رمسـه حمدوه كانت هي الحقيقه ..

( الحب هو السبب فـ اللي وصلت له يزوي ) ..

وماحبت تناقش عواش ع الرمسه اللي قالتها لانها انسانه ما فيها ذره

انسانيه ، ورمستها اتدل على انها غيرانه من يزوي لانها تشوف الكل متضايج

على حالها يعني لو ضاربتها من اليوم لحد باجر ما بتحس ..

ولو فيها ذره احساس جان ما قالت جيه ..

بس كل اللي سوته بـ انها وجهت نظرات كانت صــج ترعب الشخص ..

كان الكل يخاف من نظرات روضـه ..

وبالفعل انعكس ع ويـه عائشـه الخوف ..

وقـالت روضــه وبـ عصبيه تخوف : قسم بالله العظيم ..

كلمه وحده زياده بنزلج فالشـارع ..

قولي اللهم لك الف حمد وشكر بـ انيه ضفيتج يالقذره !!

كان بـ هالوقـت شخص قاعد يتريـا حذال فله بو سـالم ..

والظاهر بـ انه من فتره قاعد يتريا ..!

وقف حمد سيارته داخل الفله عسب ابوه و أمـه وخالته ينزلـون ..

وبـ سرعه وبدون تفكير كان يربع وهو متوجـه لـ برع الفلـه ..!

توقف فـجأه وهو يطالع بـ عيونه ..

كان محتاج لـه .. والحمدالله بـ انه كان موجود ..!

بدون تفكير منه ارتمـى فـ حضنه وهو يقول : ااه يالغالـي ما طالعت اللي طالعته .!

( وبـ ألم واضـح ) : الكل كانو بيموتون من الحزن ..

بس حبيبتيه كانت بتفارج يا متـعب من الالـم والهم والصيـاح !!

( بعد متـعب حمد عن حضـنه وهو يقول ) : بلاك حمد ..

( وبـ خوف ) : الرب ماشر .. عيونك و ويهك مايبشرون بـ الخير .!!

( وجنه تذكر شيء ) : وبعدين بنت عمك بلاها .. شو سالفتها .؟!!

( حمد كان مايخفى شيء عن متعـب ..

حتى سالفه حبه لها قاله عنها .. )!!

همس حمد بـ ألم : بنت خالتيه بين الحيـا والموت فالمستشفـى ..

وهي .. ( يقصـد حمده ) .. تعتبرها كل حياتها ..

( حس دموعه بتنزل من يذكر اللي مر عليه فالمستشفى ..

حتى عمه بو راشـد القوي أنهار ....) : كـ .. ( قـطع عليـه صوت الفون وهو يعلى )

وبـ سرعه رفعه وهو يطـالع اللي داق عليـه محمد ..

( رد ع محمد وهو يحط ايده ع اليدار و ويه ع جهه اليدار ) ..!

بـ هاللحظات مرت سيـاره روضـه وهي تحدر من الباب الرئيسي للفله ..!

( وكانت راده رأسـها ع الكرسي .. وشكلها تفكـر ) ..

بس وبسرعه جدمت رأسـها وهي تطالع ع متـعب بـ صدمه وهو قاعد حذال الباب ..

( كانت هاللحظه بالنسبه لـ متعب جنها مليون سنه مب ثواني معدوده .. )

أنعكس الابتسامه بـ محياه ..

وهو يطالع لما روضـه جربت رأسـها من الدريشه وهي تتطالعه ..

حس بـ نار الشوق اللي حرقت له يوفه هالاسبوعيـن ..

أنطفـت من لحظه ما عينه يت فـ عينها ..!

قطـع عليـه تفكيره صوت حمد وهو يرده للواقـع ..!

وبعد مرور اسبوع علـى حاله اليازيه الغير مستقره

كانت تحت المراقبه 24 ساعه ..

والكل كان يطل عليها من فتره لفتره ويحاولون يرمسونها عسب يساعدها

انها تفيق من الغيبوبه ..

سيف كان مول مايفارج اليازيه اربعه وعشرين ساعه وياها ..

كان يفارجها وقت الرقاد بس ، ومن الصبح عاد هو وياها ..

بس كان يقعد حذالها وهو ماسك ايدها ويمسح على ويها ويطالعها

وما كان يرمسها مول ، ..

ماكان يدري ليش اول مايحدر حجرتها جنه ينخرس ،..

ما يروم يرمس مول كل اللي يباه انه يقعد حذالها ويشبع عيونه منها ..

ومن عقب ما الكل يفارج اليازيه كانت فيه عيون تراقبها

وتسهر وياها لحد الفير على امل انها تصحى من الغيبوبه اللي هي فيها

كان محمد يسهر ويا اليازيه ويقعد يرمسها ويعبر عن حبه الكبير لها

وشكثر هو يعاني من عقبها .. وانه مابيتخلى عنها وعن حبه لها حتى لو

هي قررت تترك الدنيا ..

ولما بينزل ضوء الفيـر .. ساعتها بـ يظهر من حجرتها ..

و طبـعاً حمدوه وروضه كانً دائما اول الواصلين من عقب سيف

وسيف من يطالع ان حمدوه وروضه يايات يختفي ..

همسـت روضـه وهي ماسكه ايدين يزوي بكل حنيه وتجربها من صدرها: يزووي متى بتنشين ..

بسج رقاد ، وربي تولهنا على يزوي الخبله ، استويت اكره ألعب

وانتي مب موجوده منو بيغلس علينا انا وحمدوه ، ومنو

بيغش ويطفربنا بتعليقاته ، وربي انتي اللي تحلين القعده من دونج القعده مول ماتسوى ..

وهيه وياييه سوالف واايد حقج ..بس انتي نشـي وبقولج كل شي ..

رقدت حمده على ريول يزوي وجنها حاضنتنهم والعبره خانقتنها : يزووي تدرين

اول كنت اقول ابا الفكاك منج يا الخبله ، لانج كنتي وايد تخبلين فينا

بس احين ورربيه اتمنى لو تردين ..

ولو تبين تخبلين فينا كل العمر وربيه ما بقول ابا الفكاك منج ..

( وبـ حزن ) : يزووي انا اسفه ورربيه ما كنت اقصد هـ الكلمه..

والله انيه احبج.. والله احبج يا يزوي ..

( وبدن دموعها مره ثانيه ينزلن ) : متى بتنشين تولهت عليج مووت

(نشت وحضنت ايد يزوي وشبكت اصابعها فـ اصابع اليازيه)

وكملت بحزن : منو بيعطينيه خطط شريره عسب اطفر بخلق الله

اذا انتي ما نشيتي ..

ومنو بيساعدني يوم انسوي حمله تجتيل السماسيم ..

منو غيرج انتي يا زعيمه السماسيم ..

(وسكتت ثواني ونزلت راسها بحزن وعقب قالت ) :

تتذكرين هـ اللقب يوم تضاربنا انا وياج عليه ..

وفلعتج بحصاه لاني كنت ابا اللقب حقيه

وقعدتي اتصيحي وعقب انتي من خلصتي صياح ييـتي

وكفختيني وترافسنا فـ الارض جنا شرايج

وعقب انتي فزتي عليه

واستويتي زعيمه السماسيم ..

ضحكت روضـه ولـ أول مره وبدون احساس لانها أول مره تسمع هـ الموقف

(التفتت حمده على روضه ووهي تتطالعها )

روضه : بلاج تتطالعينيه جيه .. وربيه اول مره اسمعه هـ الموقف

أستغربت حمده ومسرع ما قالت : والله ... انتي ماتعرفين هـ السالفه ..

روضه : لا والله ما عرفها اول مره اسمعها منج واحين بعد ..

حمدوه : غريبه يزوي ما قالتلج احيدها محد ما خبرته ،

ونشرت فـ كل مكان ..

وغصبت الكل يزقرها " زعيمه السماسيم " هـ الخبله ..

تقريبا كنا ثاني اعدادي ..

( ما رامت تستحمل وضحكت ع هبالهن )

كملت حمدوه وبحزن واضـح : ع كثر ما كنا نتضارب انا وياها الا ان كل وحده

منا كانت تخاف على الثانيه اكثر من روحها ، كنا نتضارب احين

وما يمر علينا خمس ثواني الا ونحن مرمسين بعضنا ..

( وهي ترد ذاكرتها لوراء ) :وكانت فيه بنت دومها غاثتني فـ المدرسه ما يمر عليها يوم

الا وهي متضاربه ويايه ، وفـ يوم من الايام حلفت يزوي انها

بتسنعها لي وبتخليها اتوب اتجرب صوبيه ..

وياتنيه هـ البنت وكان اسمها "عامره" كنت اكرها من كل قلبيه

وكنا فالبريك انسير ناكل ونسولف تحت شير حديقه المدرسه انا ويزوي

ويات هـ البنت تبا تخوزني من مكاني وهي ترفسني ..

يزوي سكتت وما فجت حلجها بس قالتلي عاندي لا تخوزي

وسارت عنيه فوق فـ الكلاس ..

انا سويت شرات ما قالتلي .. وقعدت البنت تضاربني تقريبا

نص ساعه وانا معانده اني اخوز لحد ما خلص وقت البريك ..

وطلعنا فوق ..

ويوم حدرت الصف ويا البنات كانت فيه ريحه خاايسه فـ كلاسنا

مارمنا نحدر الكلاس موول وبسرعه ظهرنا منه

لحد ما يات الابله وقالتلنا تعالن بننزل تحت فـ كلاس ثاني

لحد ما خلصن كل الحصص..

وخلاص كل واحد يسير لـ بيتههم !!

وفجــآه ما نطالع الا عامره تصرخ بكل مافيها ..

ومحتشره وتصيج وجالبه الكلاس على راسها ..

ويوم سرنا نطالع بلاها كانت فيه جـيسه محاطيه فـ جنطتها

وفيها كل انواع البهارات وامعاء بقره و سحليه مجتوله

وصراصير وحشرات واايد وفواكه معفنه وكل هالشي مبلول بماي

ومحطاي فجنطه عامره ..

ومخيس كل الدفاتر والكتب واغراضها ، وجنطتها كانت كلها تقطر من هـ الخياس

وكانت ريحه الصف تجتل ..

والبنت الله يسلمج ما عرفت شو تسوي ..

وقعدت اتصيح وهي تسب وتلعن

وتتوعد للبنت اللي سوت هـ الحركه ..

ويزوي كانت متفطسه ضحك وانا ما اخفي اني كنت بموت من الوناسه

وظهرنا انا ويزوي من الكلاس ونحن نضحك على شكل عامره ..

ويوم نحن فـ الطريج رادين البيت قالتلي يزوي : تعرفين منو سوى هـ الحركه

فـ عامره ..؟

قلتلها انا : لا ما عرف بس كفو عليها اللي سوتها ..

يزوي فـ ذيج الساعه قعدت تضحك من كل قلبها

وقالتلي : ها يعتبر قليل فـ حقها لانها فكرت اتضايج حمدوه

انا فجيت حلجي وقلتلها : لا يكوون انتي اللي سويتيها ..؟؟؟

قالتلي وهي تضرب على صدرها : هيــــــه نعم انــا يزووي

زعيمه السماسيم اللي سويتها..

عيل تبينيه اطالعها تضايج فيج وتضاربج كل يوم واسكت عنها

خســـــــى والله ماستوت ، قلتلج اصبري عليه وبسنعها لج ..

ومن وناستي اللي كنت احس فيها حضنت يزوي وقعدت اصيح

لانها كانت دوم ويايه فـ السراء والضراء ..

كانت مستعده اتورط عمرها فدوه لعيونيه ..

ومن عقب ذيج اليوم موول ما فكرت عامره اتجرب صوبيه ..

والفضل لله من ثم كان لـ يزوي ...

اللي لـ يومج وانا مادري شقايل برد لها الجمايل اللي كانت اتسويها لي ايام الدراسه ياما دافعت عنيه

وواجهت المشرفه بس لعيونيه ..

حست روضـه بـ انها قلبها عورها وهي تسمع ذكريات يزوي ويا حمدوه

كانت تتطالع على يزوي اللي احين وهي جنه ميته

لا حس ولا خبر ولا داريه عن الدنيا ،

ويزوي القبليه اللي كلها مرح وخبال وشكثر ماليه عليهم بعفويتها ..

قالت وبضيجه : اشتقتلها وربيه .. يزوووي اشتقتلج موووت

وقعدت اتهز فـ يزوي : يزوووي متى بتنشين متى ..؟؟؟؟؟؟

حمدوه وهي تحاول تهدي وتبعد روضه عن يزوي ، لانها كانت تهز يزوي

بقوه ، واي حركه كانت ممكن انها تأثر فـ يزوي يعني مب من صالحها ..

حمدوه : روضه رووووضه ، هدي لا تسوي جيه ..

روووضه انتي تبين تجتلينها ..

( ومن قالت حمدوه هـ الكلمه بسرعه ابتعدت روضه عن يزوي )

حمدوه سارت وحضنت روضه كانت تدري ان روضه متضايجه

على حاله يزوي ..

حمدوه وهي تذرف دموعها : ورربي حتى انا اشتقتلها ..

حتى انا يا رووضه .. اشتقتلها وودي اطالعها شرات قبل

اليوم قبل باجر ..

مرت الايام وكانت يزوي على حالتها ما تغيرت موول

ولا اصدرت أي حركه تبث الامل فـ قلوب كل اللي يحبونها

الحركه الوحيده اللي كانت تحرك جسد اليازيه هي

الصدمه الكهربائيه اللي كانت تصدم جسدها الضعيف

بين كل فتره وفتره بسبب التشنجات المتواصله ..

وكل دكتور كان يطالع حالتها كان يقول ان املها بالحياه صار

ضعيف جدا وايامها صارت معدوده ومحسوبه

لانها كانت تقريبا ميته سريريا ..

والتشنجات اللي تصيبها بين كل فتره وفتره هي عوارض

بدايه فقدانها للابد ..

امها كانت كل يوم اتيي وتقعد وياها وتقرا قران على راسها

وتحاول قد ماتقدر ان دموعها ما تنزل ..

ما تبا تضعف وتسلم امرها للامر الواقع .. كانت تقول ان لـ يزوي

رب وما بينساها ..

وكانت تحاول اتصبر عمرها قد ماتقدر ..

فـ بيت بو سالم ..

نزلت شمـا و وقفت بـ نص الدري وكانت بأخر كشختها ..

رفعت ام سالم رأسـها وهي تقول: شما غلايه على وين ؟

قالت شما وبـ لعثمه : ئئئئ .. هيه ..انا مواعده ربيعتيه ،

( وهي تفكر فـ جذبه ) : هي عيبتها عبايتيه وقالت تعالي

بـ نسير انا وانتي عسب افصل شراتج ..

وانا ما اروم اردها استحي منها .. بتقول مب هاينه عليها عبايتها ..

وانتي تعرفين الباجي عاد ..

قالت ام سالم بـ طيب نيه : خلاص قلبي الرب لج حافظ .. وتحملي على

روحج ..

شما : خلاص امايه لا توصين .. مع السلامه ..

ام سالم : فمان الله .. والله وياج ..

رفعت روضه راسـها من على الـ tv وطالعت امها بنظرات ما فهمتها ..

وقالت بأستهزاء : أقوول اميه ..!

ام سالم : ها امايه ..؟

بـ سخريه واضـحه : شما قالت ويا منو سايره ؟

ام سالم : سايره ويا ربيعتها ..

روضه : وما قالتلج منو ها ربيعتها ..

ام سالم : لا والله ما قالتلي ..

كمـلت روضـه فـ خاطرها وهي تقول : هههه قال ربيعتها اي ربيعتها

الا قولي ربيعها ..

يحليلج ياميه نايمه فـ العسل ولا داريه عن بنتج ..

مابقول الا الله يستر علينا بس ..

( وجنها تذكرت شيء ) : وهالوقـت المنـاسب يا روضـه !!

بدون تخطيط مسبق ولاتفكير ..

رفعت الفون اللي حذالها وهي تدق على منصـور ..

وبـ ثواني معدوده رد عليـها منصـور : ألوو

أبتسمت روضـه وهي تقول : هلا والله .. هلا بـ صرصوريه ..!

ومسرع ما كمـلت : الا اقولـك ..

( رفعت رأسـها عسب تطالع اذا أحد موجود ويـاها فالصـاله )

بس طبعا محد كان .. كملت بـ سرعه : شمـا ظاهره من الفله ..

والظاهر بـ انها سايره تلاقي واحد من ربعها ..

شو بنسوي ..

( وبـ نبره خافته ) : نحن امتى بنبتدي بتأديبها ..!

أبتسم منصور وهو يقول بـ وناسه : والله هي احين ظاهره يعني ..!

جاوبته روضـه : هيه احيـن ..

منصور : أنا كنت ياي وياكم .. بس احين بوقف بـ نص الطريح وبترياها ..

وبعرف وين أحين بـ تسير ..

عسب أتاكد من سالفه معرفتها للشباب وجيه ..

( وبـ حزن واضـح ) : مابا اظلمها شرات ما ظلمت خالها .. !!

همست روضـه بـ قهر : يعني انا جذابـه يا منصور ..

أقولك جدام عيونيه أطالعها تفعل فعايلها !!

منصور : ولو يا روضــه .. بتأكد قبـل !!

( سكرت عنه ومسرع ما سارت لـ جنـاحها ..

وصـلت لـ صالتها وهي تفج لابها وتقعد على النت .. )

( وظلت لـ فتره اتجلب فـ النت وتحوس من منتدى لـ منتدى )

فــجأه قطـع عليـها صوت غريب :

طآوعك قلبــك تغيـب وتهجــر احبـابك

وتنسى غـلاهم وتتــركهم وتنـساهم

حرام تتــرك خفوقي يشــكي غيــابـك

وانت فـ قلبي اعز النــاس واغــلاهم

ناديــت والصـــوت لا شـــدك ولا يابــك

أستغربت وبـ قوه : شو ها .. لا يكون فونيه ؟!!

منو حطها انا ما احيدني محطيتنها حق احـد ..

لا يكون هـ الخايس بو لسان وسخ محطنها ..

( وجنها تذكرت شي ) : بس تعال من وين بيـيبها ..

هالاغنية مول مب موجوده فـ فونيه !!

بسم الله فونيه فيـه ينانوه يلعبون فيه على راحتهم ..

مسـرع ما انقـطع الصـوت وبند الفون من عقب ما احترق وهو يدق ..

ضحكت روضـه بـ خفه وهي تقول : الفون بند وانا قاعده اسولف ..

( بس وفـجأأأه .. جنه احد صب عليها ماي بارد وهي تتذكر شي ) ..

وبـصدمه عارمــه : تعاال لا يكــون فـون يـزووي !!!!!

( وهي تتذكر وترد ذاكرتها لوراء ) : هيــــــه فوون يزوي اكيد .. انا حطيته بجنطيتيه

( نشـت بسرعه من على الشبريه وتوجهت صوب التسـريحه

من وين محطيه فونهـا وفون يزوي )

قالت بـ حيــره : وينه وينه اففف وقتك احين اففففف

( وفجــأه .. سمعت شرات الاغنيـة اللي قبل شوي ) !! ..

طآوعك قلبــك تغيـب وتهجــر احبـابك

وتنسى غـلاهم وتتــركهم وتنـساهم

حرام تتــرك خفوقي يشــكي غيــابـك

وانت فـ قلبي اعز النــاس واغــلاهم

ناديــت والصـــوت لا شـــدك ولا يابــك

لقـت الفون وبسرعه رفــعته وهي تتطالع ع الشـاشه مكتوب

" الحقيــر الخـآيـن "

أنرسمت ابتسـامه الخبث ع محيـاها .. وهي تقول : يتنـي بريولك يا نهيانووه

كنت متوقعه اتصالك ..

( سحبــت نفس عميق وهي ترد عليــه ) !

روضـه : ......

سمعــته فالجهه الثانيـه يقول : زوزي حبيــبي وينج ليش ماتردين ..؟

(كانت تحس ان النار تغلي فـ داخلها .. ولكن حاولت تكبتها )

نهيـان : زوزي انتي لحد احين زعلانه عليه بسج دلع ..

من متى ادق على فونج وهو مغلق ..

قـالت وبـ أشمئزاز : ولـك عيــن يا الحقيـر اتدق بعـد ..

(حس نهيـان بـ انه الصوت غريب عليه )

وبـ سرعه قال : منو ويايه .. انتي مب يزوي ؟؟

قالت وبـ قهر واضـح : ههه وانت خليت فيها يزوي ..

نهيــان : انتي منوو ارمسي بسرعه ..

روضه وبعصبيه : اسمــع انت .. ولا تقعد اتهدد لان لا انت ولا طوايفك كلهم

ايرومون لــي ..

نهيـان : وخير يا طير منو انتي يعني ..؟

روضه : انا روضــه يا نهيان روضه اذا تتذكرني ..

(كانت تحس بـ تقزز وهي تقول اسمها حق واحد شرات نهيان

بس كانت مغصوبه اتقوله هي منو عسب تأدبه )

((عرف نيـهان احين منو قاعد يرمسـه .. ،

كانت يزوي اتسولف له كل شي

عن روضه وحمده واخوانها وشكثر هي متعلقه فـ روضه وحمده

بـ الذات ، وكيف كان هو يعصب عليها يوم اتيب طاريهن لانه

كان يغار واايد منهن )) ..

نهيــان : انتـي روضه ..

روضه وبـ شموخ وثقـه : هيه نعـــــم انا روضه ..

نهيــان : عيل وين يزوي عن فونها ليش انتي راده ..

روضه : اسمع .. اولا لا تنجس هـ الاسم وتيبه على لسانك الوسخ

لانه واحد شراتك مايستاهل اليازيه ..

سير حق ام الشباب ميثه اللي فضلتها على يزوي

ولا ... (وهي تضحك ضحكه اتنرفز) : راغتك من عقب ما شبعت منك ،

شرات ما راغت غيرك هه ..

عصب نيهان من رمسـتها .. وقال : انا ترا واايد عطيتج ويه ، عطيني يزوي يلااا

و أنجلـــعي ..

مسكت روضـه أعصـابها , وقـالت : يوم قلتلك من البدايه انك واحد

هيلق والتربايه ما يات صوبك .. ماصدقتني ..

بس معذوور ..

قال نهيـان وبـ عصبيه : اقووول يا الهايته ياللي تحوطين من دوله لـ دوله

مادري شو تدورين ، ترا انا مب متفيج حق سخافاتج وتهديداتج ..

لانج بـ بساطه ما تخوفيني ..

ولا تحركين شعره مني . انتي فااهمه يــ الهااايته ..

اقصد روووووضه ( وتعمد يمدها ) ..

ضحكت روضـه ضحكه نرفزت نهيـان ..

وبـ برود اعصاب يجتل : هههه مقيووله اللي ما يطول العنب حامضاً عنه يقول ..

ويوم ما رمت ترد عليه قلت هايته ..

بس انا ما برد عليك لان اللي شراتك مايستاهلون احد يعطيهم ويه

ولا يرمسهم .. (وكملت بكل غرور وثقه ) : ولانك بـ بسااطه مب من مستواايه ..

قال نيهـان وهو واصله حده : اقوول تر....

قاطعته روضـه وبكل غرور وثقه : انااا اللــــــي أقووول هنــي ..

واسمع يا استاذ نهيـان اللي بيسرك من صوبيه ..

اولا شغلك اعتبر عمرك من احين مفصول منه وبدون رده ..

وثانياً : الاخت سلوى بنت عمتك اللي حاط عينك عليها وناوي تخطبها

اعتبرها بعد رافضتك ورفض نهائي ..

( وبـ نبره تقهر ) : ولا تعتقد انيه بـ جبرها ولا بييها بـ القوه والتهديد ،..

لاااا .. بـ ترفضك وبكل قناعه منها صدقنيه ..

وثـالثاً : سفراتك اللي برع البلاد اعتبرهم بعد من قائمه المستحيلات

لانك بـ بساطه راح تنحرم من أي سفره برع البلاد ..

يعني فالبلاك لســت !!

وهالرمسـه تعني بـ أنك بـ تخيس هنــي مكانك ..

( وبـ نبره مجرده ) : لا شغل ، ولاحرمه ، ولا سفرات برع البلاد ..

( وبـ سخريـه ) : سمعت يا أستاذ نهيــان ولا اعيد ..

(وكملت وهي حاسه بكل قهر وكره انولد ، للانسان اللي قاعده اترمسه )

: والله والله يا نهيان لا ادفعك الثمن غالي ..

بـ ادفعك كل دمعه نزلت من يزوي ..

بـ ذوقك كل ألم ذاقته يزوي بأضعاافه ..

واعتبرها هاي البدايه بس ..

ما بـ خليها فعلتك تعبر عبور الكرام ..

وحطها هـ الكلمه حلقه فـ اذونك ..

وكل اللي قاعده يزوي اتعانيه احين راح اخليك اتعانه بأضعااف

نهيـان وهو بصدمه : انتي شو قاعده اخربطين .. ومنو انتي اصلا

عسب تسوين كل هاا .. تخسين والله .. ويخسن اياامج

واعلى ما فخيلج اركبيه .. محسستني الرب ..

(كانت تغلي فـ داخلها هـ الحقير قاعد يتحداها )

وكمل نهيـان وبـ وقاحه :

وترا مب منيه اذا بنت خالتج حساسه وتبا كل شي يمشى

على هواها ..

ومافيه بنت ما تصيح وتتألم من هـ السوالف وعقب تنسى

من اييها الريل ..

ولا تقولين لي انها عايشه لحد احين على ذكراي وما رمست من عقبي

ستين واحد .. وحركات المراهقات والتمثيل ماتمشي عليه ..

قوليلها تسير تدور حركه يديده غير هاي لانها ماعادت اتأثر فيني حركات

المراهقين ..

(حست انها بتنفجر خلاص ..

صرخت لا ارادي فـ ويهه ومن قوه الصرخه اللي صرختها عليه ، ارتعب منها ..)

: جــــــــــــــــــب يالحقييييييير يزووي اشرف عنك وعن طووايفك

كللللللهم .. وغصب علييك انت فاااااهم ..

( كملت بـ قهر واضح ) : يزووي بين الحياه والموت محد يدري بحالها الا الله

وكل هاا بسبب منو .. بسبب حبها لك يالحقييييييييييير ..

يزووي قاعده تصارع الموت وانت ولا داري عنها ..

يزووي تمنت الموت من عقبك لانها ما كانت تبا تعيش

الا لـجلك انت يالنــــــــــــــذل ..

يزووي ما حبتك كـ بشر يزوي حبتك كـ ملاك

يزووي ما كانت تحبك وبس يزوي كانت تموت على التراب اللي تمشي

عليه ..

يزوووي ويزووي ويزووي لو اقولك من اليوم لـ باجر ما بوفي

لو ذره من الحب اللي كانت اتحبك ايااه ..

( نهيان كان يسمعها وبصدمه هزت كيانه ، صدمه وعته من الحلم اللي كان يعيش فيه ..

وكانت كل كلمه تقولها يحس انها سجين تنغرس فـ يوفه

حس انه فقد شي عوود ، وعوود واايد .. فقد الانسانه اللي حبها من كل قلبه

وكان مستعد يسوي أي شي عشانها ، فقد الانسانه اللي غيرت له حياته

كلها وجلبتها فوق حدر لحد ما خلته يوقف على ريوله ..

ويستوي شرات الريايل ..

فقد الانسانه اللي وقفت وياه فـ كل محنه وشده كان يمر فيها ،

فقد الطيب والحنان والامان اللي كان يحسهم ويا الانسانه الرقيقه

بـ طبعها وطيبه قلبها وشفافيتها ..

واللي كانت اخلاقها تغطي على كل شي ..

فقــدت اليـازيه اللي حبتني من كل قلبها .......

(حس ان الدموع بدت تحرق خده وبند بسرعه ) ..

كان يبا يسألها عن يزوي ..

وشو تقصد برمستها انها قاعده اتعاني

وبين الحياه والموت ..

بس مسرع ما شال الفكره من راسه ..

وقال بـ انها قاعده تبالغ عسب تلين قلبه ..

(كانت كلها ترتجف ، كانت تحس بـ قهر الدنيا كلـــــــــــــه ..

كانت تبا تجتل هـ الانساان وتجتل ميثه وياه ..

تبا تنتقم منهم بأي طريقه وتحرق قلبهم شرات ما حرقو

قلب يزوي ) ..

كانت بهاللحظات تحس بـ انها متردده انها تـسوي هـ الحركه فـ نهيان كان قلبها

يقولها حرام تقطعين رزق ادمي ..

بس من عقب رمسته اللي سمعتها ،..

كان فيه دافع يدفعها وبقوه على انها تسوي اللي خططت له

وبدون أي تردد ، عسب تنتقم لـ يزوي ..

وفـعلا بدت بأول خطوه من خطتها ..

وبسرعه دقت على منسقه شركه ابوها ..

لوسي : مرحبا انسه روضه ..

روضه : مرحبابج لوسي شحالج ..!

لوسي : منيحه انتي كيفك ؟

روضه : بخير وسهاله ..

لوسي : ايه انسه روضه اكيد بدك البابا ولا ماراح ادئي علي مو هيك ..؟

روضه : لا هـ المره اباج انتي ..

لوسي بـ صدمه : بدك اياني انااا ؟؟

روضه : هيه لوسي بدي انتي ..

يعني بالله عليج مين عم بحاكي انا غيرك ..

لوسي : هههههههه ولك يابرني اللي خلئك .. شو محلا الحكي اللبناني من تمك ..

امريني تأبري ألبـي .. انتي بتامري امر .. شو بديك ..؟

روضه : هههه ما يامر عليج عدو بس اسمعينيه ابا اشوفج ضروري مايستوي

ارمسج هني ع الفون .. السالفه طويله ويبالها قعده ..

لوسي : ولك مو على هـ العين .. بس وين بدك اياني أئـابلـك ..؟؟

روضه وبتفكير : ممم تعالي فـ الستار بوكس فـ * * موول تحيدينه ؟

لوسي : ايه بعرفوه .. خلاص تكرمي .. هلا بس بيوخلص الدوام

راح اجي لعندك طيران ..

روضه : فدييتج اناا .. والله انج نشميه ..

لوسي : شو هيدا منشيه .. كلمه منيحه ؟؟

أنفجرت روضـه من الضحك .. وهي تقول : هيه منشيه كلمه منيحه ..

لوسي : خلاص تأبري البي بشوفك بعدين ..

روضه : الله وياج .. بااي ..

تنهدت وهي تحس ببعض الراحه ان اللي فـ بالها بـ يتنفذ على اتم وجه ..

اذا الله اراد ..

قالت وهي ترمس عمرها : اووه روضه ودري عنج هـ الطيبه ..

انتي ماتبين تنتقمين لـ يزوي ..

ماتبين تحرقي قلوبهم شرات ما حرقو قلب تؤأمج وروحج ..

لازم تقوين قلبج لحد ما يتعلمون درس ..

وهـ الخايس تحداج يعني لازم اتراوينه منو روضه بنت احمد ..

وانتي يا ميثووه دورج بيي بس خلينيه اول اخلص من هـ الحقير وبييج الدور ..

ان ماسنعتج وخليتج تتربين يا ام الشباب

ما كون روضه بنت احمد ..

بخليج تلعنين الساعه اللي فكرتي فيها تتعرفين على الشباب

واصبري لي ..

حـدرت حمده فله بو سالم..

كانت تحس انها بتموت من العطش سارت المطبخ

وزقرت على البشاكير ..

: حووو any bade heeeer

الشيخه حمدوه وصلت ..

بس محد رد على حمدوه وانقهرت .. وقعدت تتحرطم

وسارت وخذت لها قلاس وسارت صوب الثلاجه وطلعت عصير

فراوله ..

صبت فـ القلاس عصير .. وقالت : مالت والله حتى ما يستقبلوني

مب جنيه ضيفه طيوبه وحبوبه وحلوه وفديتني ولازم يفرشون لي

زوليه سوده اقصد حمره وجيه يعني ..

(الشخص اللي كان يراقب حمدوه انفجر مرره وحده من الضحك

ما رام يمسك عمره اكثر من جيه )..

........ : هههه ، اييييييييه انتي يالحرااميه شو تسوين فـ بيتنا ؟

طاح القلاس من ايد حمدوه وهي تحس بالخووف ..

وبسرعه التفتت من وين ما الصوت يا ..

حمد : قال زوليه سوده .. ما عندنا زوالي سودات اذا تبين

شي صفر بس ..

من طبع حمدوه انها تكره هـ اللون ..

وقالت بدون احساس : وعععععع هـ اللون عااد برجع فيها ..

كان حمد يحس بالوناسه ان حمدوه فيسته وسولفت وياه : والخيـــــبه

قال بترجع فيها .. حسستيني دينصوره خخخخ

حمدوه وبقهر : والله محد غير حرمتك الدينصوره ..

قال حمد وهو يبا يقهر حمدوه : فديييتها حرمتيه غزاااال .. طيح الطير من

السماء .. وغير جيه تدش بيوت النااس وتشرب عصايرهم الفراوله ..

حمدووه حست بـ الاحرااااااج وحمرت من الخاطر .. حست ان قلبها بيظهر من مكانه

فهمت هو شو يقصد

وبسرعه طيرااااان على جناح روضه ...

ضحك حمد بـ خبث .. وهو يقول : فديت اللي يستحون وربيه ..

آآآآآآآآآآه يا حمدووه ,,

الله ينطبج شو سويتي فيه خليتينيه اتخبل ..

حدرت حمدوه جناح روضـه .. وبـكل قووه .. و سكرت الباب بـ قوو .!

وهي مستويه حمرررره من الخااطر ...

صرخت روضه : اييييه جسرتي الباب ..

حمدوه وبقهر : هذا اخووج فااصخ الحياا ما يستحي موول

وبيتكم هذاا موول ما بطبه ولابيي صوبه لحد ما يتأدب اخوووووج ..

( جنها فهمت السالفه وعرفت بـ انه فيها حمد ومسوي شي فـ حمدوه )

عسب جيه هي محرجه منه : ههههه اكيد مسوي شي فيج

ولا ما بتحرجين جيه ..

قالت حمدوه وبـ قهر واضــح : مسووود ويه ورربيه تخيلي يايه بمووت من العطش

وسرت المطبخ اخذ لي قلاس عصير الا وهو ورايه

(وتقلد صوت حمد بخشونه : ايييييه يالحراميه شو تسوين فـ بيتنا )

( هني روضه انفجرت مره وحده من الضحك على شكل حمدوه

وهي تقلد صوت حمد ) ..!

صرخت حمدوه وبقهر : هيه اضحكي مالت عليج وعلى اخوج الشيفه ..

روضه وتغمز لحمدوه : علينـــــا علينــــا ...

أنصبغ ويه حمده من الخجل .. وقالت : ههههه شو اسويبه هو زيغني ..

روضه : هههههه قولي جيه من سااعه ..

حمدوه : انزين انتي شو تسوين ..؟

روضه : انا اخطط لـ شي عوود ..

حمدوه : والله اني اخاف من خططج انتي ويزوي ..

لعانه الدنيا كلها فـ خططكن ..

كل وحده العن من الثانيه هي وخططها ..

( وبـ خوف واضـح ) : على شو ناويه ، ومنو تعيس الحظ اللي بتنفذين عليه الخطه ..؟

( وعقب انتبهت لـ رمستها انها ذكرت يزوي وبحزن قالت : الله يقومها بـ السلامه

ياربي )

روضه : وهـ الخطه لـ عيونها هي ..

فهمت حمده شو روضـه تقصـد .. وبسرعه قالت : لا تقولين لي انج ...

قاطعتها روضه : هيه .. ناويه انتقم منهم شرر انتقام ..

جربت حمدوه من روضـه وحضنتها بقووو : فدييييييييت رواضتي انااا وربي قلت محد بـ يبرد

قلبيه غيرج انتي ..

ضحكت روضـه .. وقالت وهي تبعد حمدوه : انزين خوزي خنقتينيه ..

( وبـ نبره تضحك ) : خيبه كل ها عناق اخوي

( وعقب كملت): خيبه كلي هيبه خخ

ضحكت حمدوه ع خبال روضـه : عااشو ماروم ع الفصحى ..

غمزت لها روضـه .. وقالت : اعيبج انا بكل اللغات ارمس ..

حمدوه : انزين خلينا من الخقه .. وقولي شو خطتج ..

روضه : ممم قلتي شو خطتج .. عيل اسمعي السالفه من الاول ..

( وبدت روضه تقول حق حمدوه السالفه من بدايه ما دق عليها نهيـان

لحد ما بند وهو متصنم ..)

قالت حمده بحماس واضـح : واااا فديتج انا والله ..!

( وبـ نبره مختلفه ) : روضه والله انيه امووت فيج ..

(وبـ أعجاب ) : لكن خيبه انتي من وين اتيبيهن هـ الخطط ؟

أبتسمت روضـه وهي تأشر على عقلها روضه : من هني يالتيس ..

حمدوه : انزين روضه بس مب جنه حرام تقطعين رزقه ..

تنهدت روضـه .. وهي تقول : حتى انا فكرت جيه ..

( وبـ أصرار ) : بس هو يا حمدوه لازم يتأدب على اللي سواه ..

وانا ما بيهدي لي بال لحد ما انتقم منه هو وميثه شر انتقام ..

( وبـ أبتسامه أنتقام ) : لحد ما اخليهم يصيحون بدال الدمع دم ..

وعقب لكل حادث حديث ..

( وهي تركز عيونها فـ عيون حمدوه ) : ولا انتي عايبنج اللي يزوي فيه ..؟

قالت حمدوه بحزن : لا والله ما عايبنيه ..

ولو الود وديه .. انا اكون بدالها ..

ما تهون يزوي اتعاني كل ها .. وربيه انها ماتستاهل ..

همسـت روضـه بقوه وأصرار : عيل حطي ايدج بأيديه وخلينا انسوي هـ الشي ويا بعض

وننتقم لـ توأمنا ..

حمدوه : تم وانــــا بنت ابووويه ..

كانت النار تحرق يوفه ..

كان كل تفكيره فـ اللي استوى فـ المستشفـى ..

يبا يــأدبها ويخليها تندم على الحركه اللي سوتها

كان يحس ان الغيره بـ داخله تنهش فيه نهش ..

قال بـ حرقه : آآخ يالصايعه يا ام الشباب .. من واحد لـ واحد ومن حضن لحضن ..

ويوم انا اجرب منها اتسوي عمرها شريفه مكه ..

بس ما عليه يا روضه ان ما جسرت راسج وخليتج تنسين كل الشباب

ما اكون انا الفيصـل يالصااااايعه ..

( كان بهـ الوقت يفكـر بشئ يديد ما خطر على باله من قبل ،

شي يديد يأدب ويسنع فيــه روضه عدل ، ..

ويخليها تووب انها ترمس شباب ..

بس شو من الافكـار اللي بتخليها اتووب ..

صــرخت بـ صووت عـالي : مـــــامي ..

أم راكــان : هلا أموون .. أنا هني تحت ..!

( نزلت بـ سرعه قصوى وبسرعه اتجهت ناحيه امها )

قالت بـ خووف : ويـن راكــان .!!

أبتسمت ام راكان وهي تقول : مم مـانع مر عليـه و ظهـرو ويـا بعض ,,!

ارتمـت بـ عصبيه واضحه فـ الغنفـه وهي تقول : أووف وقته هذا ..!

( عقدت أم راكان حيانها وهي تقول ) : خير أموون .. شو مستوي .!؟

( رفعت أمنه نظرها لـ أمها .. وطالعتها بـ نظرات كادت تكون غريبه ..

وبـ سرعه قـالت ) : مـاشي سلامتج .!

( حركت أم راكان جتوفـها بـ حيره وقالت ) : براحـتج .!

( عضـت أمنه شفايفها بـ غضب .. وتنهدت وهي تحاول تهدا ) !!

راكــات بـ تعب واضـح : مانع دخيل والديك بس تعبـت !!

ابتسم مانع بـ خبث .. وقـال : لااا .. والله مابقعد لحد ما تحط الرقم بـ ايديه .!!

( حرك راكان رأسـه بـ تعب وقال ) : والله بسير اقعد ..

( وبـ سخريه ) : وانت اتريـا اللحظه الحـاسمه !!

( التفت مـانع بـ غضب وهو يطالع راكان وقال ) : سير .. والله مارمستـك !!

( حرك راكان رأسـه بـ اسى .. وهو يقول ) : ابا افهم شو بتستفيد يوم بتحط الرقم بـ ايدك ..

ترا فالحلقه الاخيـره بتعطها جمن نظرت سخريه .. وعقب بتفر الرقم ..

( التفت مانع .. وطالعه بـ نظرات عدم تصديق ممزوجه بـ السخريه ) ..

فهم راكان نظراته وضحك من خاطره .. وقال : بلااك .. أنا تبت خلاص توبه نصحوى ..!

همس مانع بـ ضيج : جب احيـن جب .. خلني اذوبها بنظراتي وجمالي خخ

( حرك راكان رأسـه .. والتفت وهو يدور له وحده يطيحها بـ شباكه )

عسب تيي وترقمـه .. ويهزئها ..

( هاي حيـاه الشبـاب الخمســه ..

كانت مجرد تفاخر بجمالهم الجذاب .. وتعذيب البنات وبــس ..) !!

نشـت بسرعه وهي تطالع ع الســاعه ..

بعد ما قالت لـ حمده عن اللي ناويه عليـه !!

و لبست لها سكيني اسود .. وبلوزه عيناويه

مشجر باللون الابيض ..

ولبست عبايتها المسكره اللي كانت وااايد هاديه ..

كانت تقريبا ساده ، لكن من وين ايدها اليمين كانت

مسويه حركه خفيفه ع الرسغ ، بـ قماش فوشي بحركه دائريه

ومربوطه على شكل فيونكه نازله ..

وتعمدت تلبس هـ العبايه لانها فـ هالاماكن ماتحب اتسير وهي لابسه عبايا جنها سايره عزيمه ولا عرس

كانت تبا تظهر بكل نعومه ..

ومن عقب ما لبست عبايتها ، سارت وعبت عيونها من الجحله

اللي كانت تظهر لون عيونها .. وحطت قلوس وبلشر خفيف ..

وتحجبت عدل ومن عقب ما تأكدت انه ولا شعره ظاهره منها

أبتسمت وهي تطالع شكلها .. وقالت : حمدووه طالعي شي ظاهر من شعريه ..؟

حمدوه وماده بوزها : هيه كله ظاهر ..

روضه : والخيبه شو هـ الجذب والله ما مظهره شي من شعريه ..

حمدوه : كيــــفي ياخي كيفي ..

قالت بـ جديه : حمدوه عن الجذب وقولي ظاهر شعريه من ورا ؟

حمدوه وماده البوز : لااااااا ..

أبتسمت برضـى من الاجابه .. مع انها كانت متأكده: هيه توج حرمه يوم تقولين الصدق ..

( طالعتها بـ نظرات حقد .. ولا ردت عليـها ) !!

وجربت روضـه من حمده : بلاه الحلو زعلان وماد بوزه شبرين ..؟

حمدوه بـ زعل : خوزي عنيه انتي قلتي ان انا وانتي بنفذ الخطط ويا بعض

ليش احين اتسيري بروحج .. هااا ..

روضه : لانه مايستوي اتسيرين ويايه احين ، انا مخليتنج للمهمه العوده ..

(حمدوه الخبله صدقت .. و استانست وعيبتـها الفكره )

كملت روضــه : وهاي مجرد اتفاق بيني وبين لوسي

والتنفيذ بيتم تحت اشرافج انتي

شو تبين بعد يا حرم حمــد ..

ضربت حمده روضـه بـ خفه .. وقالت بـ حيا : مسوده الويه جب ..

روضه : هيه لازم بيستحون يبنـا طاري القلب ..

حمدوه : الا رواضي ذكرينيه عقب ابا اتخبرج فـ سالفه ..

روضه وبلقافه : قوليها احين ..؟

حمدوه : أنجلعي احيـن .. الحرمه تترياج يلااا

مدت روضـه بوزها .. وقالت : ماااالت يوم ايي قوليليه بثرعه ..

حمدوه : هههههه والله اني انا الوحيده فيكن ما طلعت ملقوفه

فديتني والله ..

روضه : اقول احسن اسير اناا ..

حمدوه وهي تغني بصوت يخوف : فمــان الله يا مساااااافوور << يعني مسافر خخ ..

حركت روضه رأسـها بـ اسى : بدينا سكره ..

انفجرت حمدووه ضحك : هههههههههههه

ومن طالعت روضه ردت فعل حمده باست ايدها بطن وظهر وقالت : الحمد لله والشكر خبلان اخر زمن ..

حمدوه : اقوول جلبي ويهج وفكينــي يلاااا ..

(نزلت روضـه .. وهي مودره حمدوه فـ الجناح )

وأول مافجت باب الفله وهي عيونها تتجول بـ خوف لاحد ينتبه لها ..

لقت الدريوليه تترياها برع ..

توجهت ع السيـاره .. وفجت لها الدريوليـه البـاب الخلفي الايمـن !!

واول ماركبت قالت .. : بسم الله الرحمن الرحيم .. يلااا go hed

( ظهرت من الفله ..

و وصل الخبـر لـلفيصـل اللي قاعد يتريا اي شيء من صوبها ..

وعلى احــر من الجمـر ) ..

وفـ دقايق معدوده وصـلت للمول اللي بيلتقن فيه ..

ومسرع مانزلت وتوجهت للمـكان اللي متفقات عليـه ..!

راكـان بـ ملل : مانع وصمخ ان شاء الله ..

( بـ تعب ) : خلاص تعبنا .. يكفي اللي سويناه فيهن ..!

أبتسم راكـان بـ خبث .. وقال : ياا اقولـك خلاص غيرت رأي .!

( التفت مانع يطالعه بـ صدمه .. وقال بتساؤل ) : ليش ان شاء الله !!

حرك راكان رأسـه ع جدام ..

على انك طالع جدامك ..

( أنعكست الابتسـامه فـ محيا مانع وقــال ) : دخيلك ودرها عليــه !!

راكان : لا والله .. انا اللي اصيد وانت تأكلها جاهزه ..!!

مانع بـ ترجي : دخيلك بس هـ المره ..

( وهو يكمل ويتفحص البنت اللي جدامه ) :خاطريه من زمان ..

فوحده شرات هااي ..

تكفيك مشيتها .. وطولـها !!

( حرك راكان حيانه بـ حركه تقهر .. وقال ) : تحلــم !!

وبسرعه سار وراء البنت اللي جدامه ..

وقال وهو يحاول يوضـح قدر المستطاع نبره صوته الدافئه : الشيـخه ممكن أخذ من وقـتج شوي!!

( فـج مانع عيونه للاخــر ) : شقايل هذا سار ورمسـها ..

نحن متعودين بس نظرات .. وهن اللي يتبعنـا ..

معقوله كل هذا بس عسب انا مااخذها ..

( وبـ قهر ) : مالت ع شكلك الخايس يا راكانووه !!

( وبـ سرعه تبعه وهو يسير حذاله ويمشون ورا البنت ) !!

( عض راكان ع شفايفه بـ غضب ..

البنت حتى ما التفتت تطالعه .. مع انه صوته بالقوووو يجذب ) !!

انصدموا وهم يطالعون البنت تتوجه ع جهه اليميـن وتحدر السـتار بوكس ..

و بدون حتى لا تفيسهم ولا هم يحزنوون .!

( طالعوا ع بعض بـ صدمه ..

راكان متعود بس يعطيهن نظره وهن اللي يموتن عليـه

وهاااي احيـن رمسها ولا حتى فيسته ) !!

ضحك مانع وقال : الظاهر قدرتك ع التذويب اختفت ..!!

طالعه بـ حقد واضح وقـال : جب انت !!

ااخ يالقهر حتى مافيستني ولا التفتت ..

( ماسمع رد من مانع .. والتفت بسرعه عسب يطالع بلاه )

بس ينصدم وهو يطالع علامات الدهشــه مرسومه وسط ملامح مانع

وبخووف وسرعه قال : اييه بلااك .!

( ماحرك مانع عيونه .. وبسرعه وجه راكان عيونه وين ما مانع يطالع )

بس حس بالصدمه تنهش له عيونه ..

ومسرع ما التقن عيون مانع براكان .. وهم مب مصدقيـن ..!!

همس مانع : رحنــا فيها ..

ماقدر راكان يمسك عمره .. وضحك ع خبالهم : ياربيه عسى ماتعرفني

( وبـ نبره ندم ) : لا والقهر أمون الخايسه

سارت تقول لها أنا وأخويه مب مصدقين اللي ينقال عنج ..!

( حرك رأسـه بـ اسى ) : بتقول ظهر فالحلقه الاخيره جذاااب ..

ضحك مانع وقـال : تتستااهل .. قلتلك ودرها حقي مارضيـتت !!

فـجاه همس راكان بـ عدم تصديق : أوووووووف طالع هنأأك !!

رفع مانع عيونه بس ما لقى شيء ..!

وطالع وين ما قاله راكان ..!

وطالع بـ انه ريال قاعد يقرا جريده بس ملامح ويه تخفيها الجريده ..

قال بـ حقد : النذل زيغتني .. وفالاخير أكتشف بـ انك تجذب عليه !!

قال راكان و بـ عدم تصديق : الفيصـــل !!

( عقد مانع حيانه بعدم تصديق وفـهم ..) : راكــان مافهمت عليـك ..!!

كان قاعد على واحد من الكراسي الموجوده ويتريـاها بـ حراره ..

وماسك جريده ومخلي عمره يقرا عسب تخفي ملامحه ..

حدرت روضـه وتوجهت على واحد من الكراسي وقعدت عليه وهي عيونها

تتجول عسى تلقى لوســي ..!

رفع الفيصل عيونهبـ قهر .. وقال : وتترينه بعد ، لـ هالدرجه متلهفه على

شوفته يايه قبل الموعد ..

( مــرت دقايق و روضـه قاعده مكانها تتريـا لوسي توصل بس محد ) ..

رفعت فونها وهي مقرره بـ انها تدق عليها ..

ردت لوسي بسرعه .. وقالت : هلا انسه روضه ..

روضه : هلا غلايه .. يلا انا قاعده اتريا من ساعه ..؟

لوسي : هلا انا بالطريئ سواني وبكون عندك ..

روضه : اوكيك قلبوو ..

( كانت هـ المكالمه تحت سمـع الفيصـل ..

كان خاطره ينش يجتل روضه .. بس مسك عمره

وتمتم بـ قهر : وعاقه عمرها عليه بعد ، اتريااك من ساعه بروحي هاا

معليه يا روضه ..

(حرك عيونـه على المكان وقـال ) : ما اروم اقعد اكثر احسني بجتلها اذا

طالعتها ويـاه .!

( وهو يفكر ) : وبعدين انا ليش مهتم لـ هالدرجه ، بالطقاق ..

هي اختي ولا شو ، الله يعز ميروه عن هـ الحثاله ..

( نش وهو يفر الجريـده ع الطـاوله وهو فـ قمه غضبه )

( ظهر من المول وكانت الصدفـه بـ انه لوسـي تحدر وقت ماهو ظهر ) ..

واتجهت من وين ما روضه تترياها ..

وصلت لوسي ويا روضه وسلمن على بعضهن ..

لوسي : أيـه روضه بـ شو بدك اياني ؟ ..

أبتسمت روضـه وقالت : اسمعي انا اباج فـ مهمه وادري انه محد بيساعدنيه

غيرج انتي ، لان انتي الشخص الوحيد اللي اثق فيه ..

لوسي : أيـه احكي .. شغلتي بالي ..

( ركزت عيونها على لوسـي وبـ اهتمام واضـح ) : بس اباج توعدينيه الرمسه اللي بقولها لج

اتم بينيه وبينج ومحد يدري عنها مووووول ...

لوسي : أيـه مو على راسي .. سرك فـ بير تأبريني ..

احكي ولا تاكلي هم .. ما راح احكـي لاي مخلوئ ..

روضه : فدييتج والله .. هذا العشم فيج ..

لوسي : ههههه هدا الحكي تبعكون انا مابفهموه

احكي بشي انا بفهموه ..

أبتسمت روضـه وقالت: من عيونيــه ..

( وبـ أصرار قوي ) : اسمعي ، ..

الفيصل كان مستعد يجتل أي احد يطالعه جدامه من القهر

اللي كان يحس فيه ، وكان يسوق وهو مايدري على وين ساير ..

بس تفاجئ انه هو قاعد يسير وايي على نفس المكان

قال وهو يرمس عمره : الفيصــل بلاك .. شو استوى فـ عقلك

ليش تخلى وحده حثاله شرات روضه اتأثر فيك هـ الكثر ..

وليش مستهم .. خلها بالطقاق انت مب من هلها ..

(و كمل بقهر ) : بس هي ملـــــكي احين ولازم ما تتعدى حدودها ..

وانـا لازم اوقف هـ المسخره اللي قاعده تستوي داخل ..

( ومسرع ما بركن سيارته بواحد من المواقف ..

ونزل وهو متوجه لها .. وكان يمشي بكل قهر ومن عيونه يطاير شرار الغيره

ومشيته تدل ع انه نــاوي على نيه شينه) ..

ويــا روضه ولوسي ..

همسـت روضـه وبـ حذر : بس عقب ما اعطيج الاشاره وقفي كل شي

لوسي : بس هيك شغلانه بدها وئت شوي .. تعرفي لحد ما ارتب اموري

روضه : خذي وقتج ..

( وبـ حزم ) : بس لا تطولين .. يعني حدج اسبوع

لوسي : خلاص لا تاكلي هم انا بعمول كل شي ..

روضه : عيل اتريا منج خبر ..

لوسي : ولا يهمك من هـ العنيات ..

روضه : فدييتج اناا .. يلا عيل سرنا لاني تأخرت واايد

احين امايه اذا درت بتحشرني ..

لوسي : يلا تأبريني ..

نشن من مكانهن وتوجهن للبوابه ، وكانً بطول الدرب وهن يسولفن

ويا بعض ..

الفيصـل كان بصدمـــــــــــــــــــــه ....

معقووووووووله ما كانت وياا واحد ؟؟

معقووله روضه ما كانت مواعده واحــــــــد ..؟؟

لييش انا سمعتها بأذوني وهي ترمسه ...

معقوله شكيت فـ اخلاقها وطعنت فـ شرفهـا ؟؟

( بس مسرع ماتذكر الموقف وهي ويا منصور وحاضننها ،

ولا نايف اللي كانت فـ حضنه اكثر من مره ، وطرشله بوسات

فـ الهواء ..)

وبسسرعه استبعد فكـر انها عفيفه ..

الفيصل وبقهر : اذا مب اليوم مواعده اكيـد باجر ..

لان هـ الاشكال ما تستحمل بدون ربع ..

ظهر الفيصل من السيتـي بكبره وتوجه للبيت ..

روضه كانت توها تحدر البيت بسيارتها ..

وما طالع جدامها الا حمدوه وهي تأشر وتسوي حركات على

انج انزززلي بسسرعه ..

روضه قالت للدريوليه توقف .. ونزلت ..

روضه بخوف : بلاج حمدووه ..؟

حمدوه وبسرعه ترمس : الحقــــي بسرعه على عمرج

امج من ساعه تسأل عنج وشما وياها ..

يعني تعبي راسهااا ..

روضه حطت ايدها على حلجها : لايكوون درت ؟

حمدوه : لا انا غطيت عليج ، وخذيت الاحتياطات اللازمه

بس انتي اتبعيني الملحق بسسرعه ..

روضه كانت تتبع حمدوه بس ما تدري ليش

واول ما حدرن الملحق ..

روضه : حمدووه ليش يبتيـنا الملحق ..؟

حمدوه : اندوج غيري ملابسج .. البسي هـ الكندوره

وفري هـ العباه ..

وعقب خلي وحده من البشاكير اتيبها لج ..

روضه بتسأؤل : بس منو ياب كندورتيه هني ماحيدني

اتلبس هني ..؟

حمدوه بنفاذ صبر : يالخبــــــــــله .. انا ما قلتلج اني خذيت

الاحتياطات اللازمه ..

يبت لج هـ الكندوره والشيله عسب لا يشوفنج وانتي بالعباه

وقلتلهن ان انتي فـ الحديقه وراء .. قاعده تأكلين البط ..

واحين بسسرعه غيري ملابسج لا اذبحج ..

روضه بسرعه فرت عباتها ولبست الكندوره فوق السكيني مالها

روضه : خخخ ماروم امشي ..

حمدوه : بلاج ؟

روضه : سكيني وكندوره شو هـ الزطط خخخ ..

حمدوه : هههههههه ما عليه تحملي .. احين بنطلع جناحج

وغيري ..

روضه : حمدوه ..

حمدوه : هلا ؟

روضه حضنت حمدوه بقووه : والللله احبــج .. الله لا يحرمني منج ..

حمدوه : هههه ماسويت شي ، وبعدين نحن مابينا شكر

ولا نسيتي ان نحن روح وحده ...!

روضه : لا مانسيت وانا اقدر انسى .. والله يعود علينا

روحنا وتوئمنا الثالثه ..

حمدوه من قلب : امييييييين يارب الله يسمع منج ..

حدرن حمدوه وروضه البيت وكانت شما وام سالم

يطالعن الـ tv ..

روضه : السلام عليكم ..

ام سالم : وعليكم السلام .. هلا امايه ..

شما : الا وين حظرتج مختفيه ..

روضه : كنت وراء فـ الحديقه ويا البط ..

ام سالم : برايج غلايه .. بس لاتسيرين بروحج

اخاف يستويبج شي ونحن ماندري ..

روضه من وناستها اللي كانت تحس فيها ان امها ما هزبتها

سارت وحضنت امها ..

روضه : فدييييييييييت امااايه والله . ..

وباستها على راسها ..

ام سالم : تبوسين الكعبه غلايه ..

شما بقهر : اماااايه ترا الدلع الزايد يخرب.. وانا نصحتج

وانتي كيفج عاااد ..

ام سالم : روضه مربايه وماتسويها ، ولا مب جيه امايه

روضه : والله يا امايه فـ عمريه ما بخون الثقه اللي عطيتيني اياها ..

ام سالم : فدييت رووحج .. والله يكبر بـ عقلج يا اميه ..

طلعت شما حجرتها وهي بتمووت قهــر ..

وصفعت باب حجرتها بالقووو ...

حمدوه كانت بتمووت ضحك بس ماسكه عمرها ..

ام سالم : حمدوه غلايه بلاج قاعده بروحج تعالي هني حذالي

سارت حمدوه وقعدت حذال ام سالم بخجل ..

وقعدن يطالعن الـ tv شوي .. وعقب نشت ام سالم

عسب اتسير تصلي العصـر ..

ام سالم : روضه حمدوه يلا فديتكن نشن صلن

روضه : ان شاء الله امايه ..

وطلعن حمدوه وروضه جناح روضه ..

أول ما حدرن الجناح تزخ روضه حمدوه من ايدينها وتقعدها غصب

على الغنفه ..

حمدوه : ايييه بلاج ..؟

روضه : من عقب ما صلي ابا اعرف السالفه اللي قلتيلي عنها قبل

لا اظهر من البيت ..

حمدوه : والخيبـه انتي ما تنسين شي ..

روضه وبضحكه انتصار : هاهاها فديتني .. تف تف عن الحسد ..

حمدوه : وعععع .. خيستينــا من التفاال ..

روضه : ههههههههه .. اسبحج ..

حمدوه نشت وهي تتحرطم على روضه اللي خيستها من التفال

وسارت تتوضى حق الصلاه ..

فـ بوظبــي ..

ام هزاع : مــــــــي .. مـــي ..!

مي وهي يايه تربع من فوق : يايـــه اماااايه ..

ام هزاع : وينكن انتن من ساعه ازقركن ..

مـي : كنت قاعده اصلي والله .. وبناتج ع اللاب ..

ام هزاع وبعصبيه : خليهن يجهزن بسرعه بنسيـر العين ..

مي وبأندهاش : ليـــش امايه ؟؟؟

ام هزاع : اليازيه حالتها ما تسر ويقولون انها على فراش الموت

ونحن توه وصلنا الخبر بس ..

مي حطت ايدها على حلجها من الصدمه وبدن عيونها يدمعن : يزوووي

ليييش ، يزووي شو فيها اماايه ؟؟

ام هزاع : مادري والله يا اميه قالولي انها طاحت وتعورت

مي : ولييش محد قالنا ..

ام هزاع : ماحبو يضايجون فينا ..

مي : بس هاااي وحده منا وفينا شو يضايجون ما يضايجوون

(وطلعت مي تربع فوق وهي تصيح ، وحدرت حجره امل وشوق )

امل وشوق من طالعن مي اتصيح بسرعه سارن صوبها

امل : مي بلاج امايه قالتج شي ..؟

شوق : مي بلاج ارمسي ..!!!

مي : يزوي ..

امل وبخووف : بلاهااااا ارمسي ..!!؟

مي : تعبانه واايد وفـ المستشفى بين الحيا والموت ..

امل : شووو .. ومن متى .. وليش محد قالنا ..

مي : مادري مادري لا تسأليني ..

وتقولكن امايه تجهزن عسب انسير العين ..

روضه وهي توها مخلصه صلاه وتبوس القران ..

وتتطالع على حمدوه اللي قاعده تلبس دلاغاتها ..

روضه وهي تصرخ : حميده ..

حمدوه وهي تتطالع على روضه بقهر : حميده فـ عينج قولي امين

روضه : هههههههه .. مابقول ..

حمده : بالطقاق ..

روضه : اييييييه يلا قولي السالفه خلصنا صلاه ..

حمده : عيل توني حميده ..!

روضه : يلا حمدوه لا تقعدين اتذليني ..

حمدوه : انزين ترا السالفه ما تخصج ليش محتشره ..!

روضه : افففف .. مالت عليج .. قوولي انزين وفكيني ..

حمدوه وهي تجرب من روضه : محمد ..!

روضه : محمد اخوويه ..!!!؟

حمدوه : هيه اخوج .. شحاله من عقب السالفه ..!

روضه : تقصدين سالفه يزوي ..!

حمدوه : هيه ..

روضه : تصدقين انا بروحي فاقدتنه واايد .. من عقب السالفه

استوينا موول ما نشوفه .. حتى ما ايي البيت ..

حمدوه بحزن : ليته ما تعلق فيها .. احين كل واحد يتعذب من صوب

(وكملت حمدوه وبنبره كلها حزن ) : ولـو يـ ـزوي مـ ـا نشت شو بيسوي فـ محمد

روضه بعصبيه : حمدووه .. لا تقوولين هـ الرمسه .. موول مابا اسمعها منج

يزووي بتنش وبترد شرات قبل واحسن ..

(وبدت تعلي من صوتها )

حتى انتي فقدتي الامل شراتهم .. حتى انتي ياحمدووه

حمدوه وهي تعلي صوتها شرات روضه وتصيح : بس يزوي لحد احين مانشت ..

احين بيكمل لها 3 اسابيع وهي ع حالتها موول ماتتحرك ولا تصدر أي حركه

اتدل على انها حيـــــه ..

وكل يوم نقول بتستوي احسن وهي تزيد للاسواء ..

شو تبينــــي اقول من عقب كل اللي اطالعه جدامي ..

( روضه ما رامت تستحمل زياده حست ان دموعها بتخونها وظهرت بسرعه

برع الجناح وصفعت باب الجناح بكل قوتها )

حمدوه ارتمت ع الغنفه اللي حذالها وقعدت اتصيح من قلب ..

فـ بوظبــي ..

ام ناصر وهي تدق باب الحجره : ميثـه .. ميثـوووه تسمعيني ...!!

( ميثه متسدحه على الشبريه وترمس فالفون )

ميثه : ههههه قوول والله ..!

.... : والله ماجذب عليج انتي شو تبين من الالوان ؟

ميثه : فديتك سعوودي والله ... مايحتاي اتكلف على عمرك بس ابا لونه ابيض ..

سعود : خلاص تم .. باجر بمر عليج فالكولج وبنسير المول نتمشى ..

ميثه : خلنا نسير مطعم احسن عسب محد يكون هناك ..

(ولا زالت ام ناصر ادق الباب ) ..

سعود : بنسير المكانين شو رايج ..!

ميثه : اللله ونااسه وبتاخذلي الفون اللي اباه ..

سعود : هههه وباخذلج الفون اللي تبينه ..

ميثه : هههه حبيبي سعوودي والله .. وذكرني باجر بعطيك شي بعد ..

سعود : شو هو ..؟

ميثه : لالا يوم اشوف الفون فأيدي بعطيك اياه ..

سعود : انزين قوليلي الحرف الاول !! ..

ميثه : هههه بعطيك اياه على خدك ..

سعود : ياااااويلي انااا ..

ميثه : هههه سعودي حبيبي بشكارتنا اتدق عليه بشوفها وبرد ارمسك اوكيك ..

سعود : اوكي حبيبتي ..

(بندت الفون وسارت اتفج الباب )

ميثه : ها امايه ..!

ام ناصر : عنبو دارج وينج من ساعه ادق الباب ..!

ميثه بدون نفس : امايه كنت اسبح عسب جيه مانتبهت لج يوم ادقين ..

شو كنتي تبين ..لاني ابا اسير اكمل ..!

ام ناصر : باجر بنسير العين اذا تبين اتسيرين ويانا ..

ميثه : وليش عاد ان شاء الله بتسيرون العين ، منو معرس ..!

ام ناصر : محد معرس ، اليازيه طاحت وتعورت والحين فـ غيبوبه من 3 اسابيع

فـ المستشفى ..!

ميثه : وخير يا طير شو يخصني فيها .. اتزول هاي كل مره تتعب ..

ام ناصر : ميثه احترمي عمرج .. هاي وحده من بنات هلج وزياره المريض واجب

ميثه : افففففف .. امايه انا باجر ورايه شغل وايد ويمكن ما ايي من الكليه

الا عقب الساعه 5 ..

ام ناصر : وكل يوم هـ التأخير فـ الكليه مالج ..!

ميثه : امايه لا تنسين ان انا اخر سنه ولازم هالتأخير ..

ام ناصر : انزين برايج غلايه تأخري .. بس نحن مابنسير عنج بنترياج

لحد ماتيين ومن اتيي بنسير ..

ميثه : لا لابرايكم امايه انا اخاف اتأخر عليكم سيرو برايكم حتى اذا تبون اتباتو

هناك ماعندي مانع انا بقول حق وحده من ربيعاتي اتيي اتبات عندي ..

ام ناصر : لا والله انا ما يطاوعني قلبي اخليج هني بروحج

وقلتلج من اتيي من الكليه بنسير وهذي اخر رمسه ..

ميثه : اففففف يعلها ماتقوم ان شاء الله ..

(سكرت الباب وردت على شبريتها ترمس على الفون )

ميثه : هلا والله بالقلب هلا بـ حمودي حبيبي ..

محمد : هلا بج زوود وينج يالقاطعه ..

ميثه بتمثيل : شو اسوي قلبي الدراسه ماخذه كل وقتي ..

محمد : انزين انا تولهت عليج وابا اشوفج عادي امرج باجر ..

ميثه : لالالا .. باجر مايصير لان عندي امتحان وما اروم اظهر خلها ورا باجر شو رايك

محمد : شورج وهدايه الله ..

ميثه : وشو بتيبلي من الهدايا ؟

محمد : هههه امري تدللي شو تبين انتي ..

ميثه بتمثيل : كل شي منك حلو يا حلو ..

محمد : هههه خلاص ولا يهمج بنيبلج احلى هديه ..

ميثه : فددددديتك حمودي حبيبي والله احبك ..

محمد : وانا بعد ..

ميثه : حمودي حبيبي عندي خط ثاني ربيعتي تدق عليه ..

محمد : خذي راحتج حبيبتي ..

ميثه : فديتك والله .. يلا حبيبي بااي ..

محمد : بااي ..

(بندت عن محمد وردت ع الخط الثاني ..)

ميثه : سوري حبيبي تأخرت عليك ..

سعود : لا حبيبي عادي ..

ميثه : هاي ربيعتي هلكتني من كثر مادق عسب الامتحان ..

سعود : هههه وانا اقول البنت بلاها مادقت ..

روضه اول ماظهرت من الجناح كانت اتحس بضيجه مب طبيعيه

كانت اتفكر فـ رمسه حمدوه واايد ..

وطبع روضه من تكون مضايجه ماتحب تتطالع على أي شخص

تبا تنفرد بنفسها ..

وظهرت برع الفله فـ الحديقه فـ مكان منعزل بعيد كل البعد عن

الانظار ..

كانت تتطالع على الفراغ اللي جدامها وهي سرحانه بعالمها

وتفكر فـ رمسه حمدوه ..

حمدوه : بس يزوي لحد احين مانشت ..

احين بيكمل لها 3 اسابيع وهي ع حالتها موول ماتتحرك ولا تصدر أي حركه

اتدل على انها حيـــــه ..

وكل يوم نقول بتستوي احسن وهي تزيد للاسواء ..

روضه مسكت راسها بأيدينها الثنتين وهي تحاول تطرد الافكار اللي توديها

وتيبها ..

روضه وهي مغمضه عيونها وماسكه راسها بأيدينها الثنتين

ودموعها كانت تذرف منها : لاااااااا

لااااااااااا يااربي دخيلك ...

هم كلهم جذابين كلهم جذابين دخيلك ياربي قووم يزوي

يااربي مايستوي شي لـ يزوي ..

(وكانت شهقاتها تعلى وهي تصيح من قلب ) ..

يزوووووووي دخيلج نشي لا تتركيني دخيللج .. ورربي احبج يا يزوي

لا تتركيني وتتخلين عني دخييلج ..

أم هزاع وبو هزاع والبنات كانو كلهم فـ المستشفى

واول ما طالعت ام هزاع ام راشد وهي ماسكه القران وقاعده تقرا

ودموعها اللي كانت تذرف على خدها ، هزها هـ المنظر بقووه

كانت حاسه فـ معاناة ام راشد لانها بنتها الوحيده ..

واول ما انتبهت ام راشد لـ ام هزاع نشت اتسلم عليها وعلى البنات ..

ام هزاع كانً الدموع على خدها وهي تتطالع ام راشد بـ هالقوه

اللي تحاول تظهرها جدام الكل .. وتخفي حزنها عن الكل ..

وسارت حضنتها بكل قوتها جنها تبا اتواسيها وتخفف عنها ..

ام هزاع : بشريني يالغاليه .. شحالها الحين ..؟

ام راشد وبحزن الدنيا : على حالتها مول ماتغيرت ..

ام هزاع وبأسف : الله يصبرج يا وخيتي ويقومها بالسلامه ..

ام راشد والعبره خانقتنها : امين يارب ..

روضه كانت حاضنه ريولها على صدرها وهي تصيح بصمت ..

وفـجـآه اييها صوت من وراهـا ...

.... : روضـ ـ ـه ..!

( روضه بسرعه مسحت دموعها ورفعت راسها من وين الصوت )

روضه : ......

حمدوه وهي تصيـح : روضه والله اسفه ما كنت اقصـ ـد ..

(وقعدت اتصيح من الخااطر )

روضه ابتسمت لـ حمدوه وسوتلها حركه على انج تعالي وفتحت لها

ايدينها ..

حمدوه بسرعه ركضت من وين روضه وقعدت على الارض وارتمت فـ حضن روضه ..

حمدوه وهي مقطعه عمرها من الصياح : رووضه وربي اشتقتلها واايد ..

ماعدت اتحمل بعدها اكثر من جيه .. وربي ماعدت اتحمل ...

متى بترجع لنا .. متى بشوفها هني .. متى متى دخيلج قووووليلي ..

( روضه ماكانت اتروم اترد على حمدوه لان الدموع كانت مغرقتنها

كانت اتحس بنفس شوق حمدوه بس ماتروم اطلع وتبوح شرات حمدوه ،

كانت تحاول تكتم وتخفف على حمدوه ..)

وفـ جهه ثانيه ...

محمد كان يتمشى فـ الحديقه لانه يحس بخنقه وضيجه فـ صدره

مايبا يطالع على أي مخلوق .. كره الكل من عقب سالفه يزوي

كان يمشى والدنيا مول مب شايلتنه من الضيجه اللي حاس فيها ..

بس فجـــــآه توقف وهو يطالع منظر كان جدامه ..

صعــــقه هـ المنظر حس بنغزه فـ قلبه ..

كانً حمدوه وروضه متحاضنات وحمدوه اتصيح من كل قلبها

وشهقاتها كانت تقطع القلب ، وروضه اتخفف عنها وهي ميته من الضيجه

حس انه مب بروحه اللي قاعد يعاني ..

فيه اللي اكثر منه قاعدين ايعانو ويحسون بالهم اكثر منه ..

ماقدر يطالع اكثر لان دموعه خانته فـ ذيج الساعه ..

حس انه بينهار جدامهن .. وبسرعه ركب موتره وظهر ..

الفيصــل كان بيموت من القهر يبا يقابل روضه بأي طريقه كانت

عسب يأدبها ( ع قولته) ..

بس كان يدري ان روضه مستحيل توافق او تصدقه عقب اللي سواه

كان يفكـر بطول الليل بطريقه عسب يقابل فيها روضه

بس عيز وهو يفكـر ..

وفـجآه حس بألم فضـيع فـ راسه خلاه يفقد كل توازنه ،

حاول يتماسك لحد ماسند عمره على الشبريه

الفيـصل من عقب ماحس ان توازنه بدى يرد له بالتدرج

سار وخذ له حبتين بندول وشربهم وتسدح على الشبريه

والافكـار كانت اتوديه وتيبه ..

لحد ما خطرت على باله خطـه خلته اينش من مكانه

والوناسه كانت واضحه على ملامح ويهه ..

وبسرعه البرق كان ناوي يدق على روضه ، بس توقف فـ اخر لحظه

كان مايبا روضه تسمع صوته وهو تعبان .. وقرر انه يطرش لها مسج

كتب المسج حق روضه وطرشه على طول بدون تردد والابتسامه

كانت مرسومه على شفاته لانه متأكد ان روضه مستحيل اترده او انها

تعارض مقابلته لها ..

من عقب ماحست روضه ان حمدوه بدت تهدى شوي ..

حبت تغير من نفسيتها..

روضه : حمدوه تعالي نتمشى شوي ..

حمدوه : وين ؟

روضه : هني فـ الحديقه وين بعد ..

حمدوه : اوكي ..

( نشن البنات يتمشن على الحديقه بس كان الصمت هو سيد الحضور

محد يرمس منهن ) ..

ماثواني الا وصوت فون روضه يكسر الصمت اللي كان عام

على المكان .. وينبه بقدوم مسج ..

روضه وحمدوه تزيغن من صوت المسج لان كل وحده منهن كانت

سرحانه فـ عالمها ..

روضه وهي بزيغه : بسم الله الرحمن الرحيم ..

حمدوه وبسرعه : طالعي بسسرعه منو يمكن اليازيه نشت ..!!

روضه انرسمت على شفاتها الابتسامه اول ماخطرت على بالها فكره

ان يزوي نشت وبكل لهفه تفج المسج ..

( روضه اول مافجت المسج وقرت اللي مكتوب فيه تصنمت مكانها

كانت الدهشه والصدمه واضحه على ملامح ويها ، قرتها مره وثنتين وثلاث

وهي بعدها مب مصدقه اللي تقراه ..)

حمدوه مارامت تستحمل زياده كانت تحس ان الفضول ينهش فيها نهش

حمدوه بخوف : رووضه منووو طمنيني دخيلج .. يزوي فيها شي ..!!؟؟

روضه بصدمه : هـ ـذا فـ ـ ـ فـ ..

حمدوه بنفاذ صبر خذت الفون من ايدين روضه وقرت المسج ..

(اول ماقرت حمدوه المسج فجت عيونها للاخر وحطت ايدها على حلجها .....

أنتظروني فـ البارت القادم بـأذن الله ..

مع احداث مشوقه وجديده لابطال روايتنـا ..

فمـان الله ..

وقراءه ممتعـه ..

رواية بتندمين يا بنت والسبب نظرتك هذى الفصل الثامن والثلاثون 38 - بقلم غير معروف

تابعنا وما يفوتك جديد

التعليقات (0)

لا توجد تعليقات بعد

روايات مشابهة

شظايا شيطانية~للكاتبة صرخة المُشتاقه

خطيئة خيال

رحيل الهواري

دموع السيف

حكاية عشبة خضراء

مملكة سفيد

الإبلاغ عن مشكلة

تم إرسال البلاغ بنجاح!