رواية بين العقل و الطريق الفصل العشرون 20 - بقلم غزوان علي

بين العقل والطريق
للكاتب غزوان علي
البارت العشرون

سأبقى تلك الانثى..التي أفقدتك عقلك..وسرقت قلبك..وعلمتك الهذيان حبااا..والجنون عشقاا..أنا من هزت كيانك..أنا من اشعلت نيران الشوق في قلبك..انا من سكنت روحك.. أنا حلمك..أنا أمنياتك...سأبقى أنا...أنا...أنا.....

غيث .. ماكو احد جوه واني اروح واجي قريب الحمام واسمع بجيها وكل دمعه تنزل جمر بگلبي فقدت السيطره على تصرفاتي
وجان تطلع ولافه الخاولي على راسها
وجان اصير كدامها شبه حصرتها بالباب

اسيل .. غيث

رفعت راسي شفت اسيل واكفه على الدرج
وعيونها ناار
موج .. ابتعدت عن غيث ودخلت اركض للغرفه وحتى منداريت ورايه
اسيل .. اني اراقب بغيث واعرف مراح يكعد راحه بس اخر شى اتوقعه يكون جرئ بهاي الطريقة اني اعرف بيه وحسب عشرتي ويااه كل هااي المده هادئ وعاقل وميجازف ابد وحتى بكلامه هدوء وعقل ليش من شافها احسه فقد تركيزه وشفته شون راد يحجي وياها صح مطخ بيها بس كولش قريب عليها مكدرت اتركه بدون مااحسسه اني شفته لان مدااتحمل الوضع وصحت بصوت وهو صعد ورايه

غيث .. بيج شى
اسيل .. اعتقدالمره غريبه وارمله وميصير تكون قريب منها لهاي الدرجه
غيث .. مدااحب كلامج اسيل شنو قصدج
اسيل .. اسمع غيث اني احبك وانت يمكن تحبني
غيث .. يمكن شوو يمكن
اسيل .. اي يمكن لان داحس الوضع مومريح من شفت هاي جيرانكم وانت وضعك موتمام ومااعرف شجاك انت انتبهت على نفسك قبل شويه شسويت
غيث .. شسويت جنت جوه بالصاله لتكبرين المواضيع وتتخيلين شغلات مصايره

اسيل .. وكفت كبالها شوي واطخ بيها موعيب هو هذا تصرف منك انت العاقل هيج تتصرف ويه جارتكم
غيث .. اسكتي ومااريد حجي زايد لاحظتي صوتج عالي وبديتي تتجاوزين بالكلام

اسيل .. كعدت على الجربايه ابجي
غيث .. شبيج ياعيني متكوليلي ليش هيج بس تبجين
اسيل .. شأكله بله هذا اكله اعرف بحبك الها واعرف علاقتكم القديمه اذا كتله يكوم ميهتم حتى يحجي ويااها كدامي خلي اسكت احسن .. كروب قصص غزوان علي
تعبانه من الحمل وضايجه واخاف من المشاكل شعلينه احنا بهاي الي اسمها موج عم ولد خال بنيه خلي تروح لأهلها يعني ميصير ادخلنا بهيج قضيه واحنا مالنا علاقه بيها

غيث .. خطيه اسيل ميصير مره مكسوره والتجأت النا
اسيل .. بهذا الوقت الناس تخوف شمعرفنا بيت اهل اكرم شراح يسون والجيران مفكرتوا بيهم اذا شافوها عدنا ميكولون اثنين ولد شباب وهي بنصهم مره ارمله
غيث .. ينكطع لسان الي يحجي هي اشرف من الشرف

اسيل .. انت بس تفكر بيها فكر بوضعنا منظرنا يم العالم شعلينا بيها الدنيا تخوف هسه ومامستعده اضحي بيك او بيت عمي من وراها
غيث .. لا ان شاءالله متوصل لهاي المرحله
بست راسها وطلعت والارتباك واضح عليه
مكدرت اتناقش ويه اسيل لان مااعرف شون اوضح الها الي شافته بس الي اعرفه انتبهت على شى كان المفروض متنتبه عليه 

موج .. بقيت اليوم كله بالغرفه واني احاول اتجنب الكل وصاحني ابو زيد..
نعم عموو
ابو زيد.. شوفي بنتي اني اخذت كم رجال من المنطقه ورايح الهم عسى ولعل نكدر نرجعج

موج .. عموو دخيلك اعتمد على الله وعليك واي شروط تحطتها عمتي ام اكرم قابله بس ترجعلي ابني
ام زيد.. على كيفج بنتي شوفي شون ترجفين راح تموتين
موج .. خاله شيصير بيه خلي يصير المهم ابني يرجع بحضني
وراحو الولد كلهم حتى زيد وغيث وحدود الساعه ورجعوا

هااا عمو بشر فدووه
ابو زيد.. شكد شايف نسوان حقيرات وماعدهن اخلاق مثل هاي المره مشايف لا احترمت رجال ولا قدرت جار لسانها شطوله ولا تكول مره وعيب يطلع صوتها
موج .. شصار فدوه
ابو زيد.. بنص الزلم والعالم تحجي طبت صاحت الولد ولدنا ويتربى بيت ابوه وامه ماتت بالنسبه النا واذا رجعت طالبت بالولد اذب تهمه عليها
موج .. كمت ادك على راسي شفتوا مو كتلكم متخاف الله

ام زيد.. وسكتولها
ابو زيد.. اكولج ام زيد هاي مره يعني شنسويلها حتى عيب بحقنا انمد ايدنا عليها ولو هي تستاهل الذبح حتى احترام مخلت للرجال ابو اكرم حتى انقهرت عليه هذا الرجال الهيبه الي الناس تحلف براسه صار حجايه بحلك الناس على ميكدر على مرته وهي الرجال وهو انتهى رغم هو خطيه مريض وحالته تقهر بس الناس مترحم

موج .. عمي لو صاحي ومو مريض مجان كدرت تسوي هيج شى بس هي انتهزت فرصه تعبان ومابيه حيل حتى يحجي واستغلت الفرصه
شون بيه كولولي شون
غيث .. اباوع عليها وادك على راسها من القهر صرت نار وطلع للحديقة مااتحمل اشوفها هيج تتعذب اني من جانت تبجي اتخبل موعاد اشوفها هيج مثل الطير المذبوح
بعدك تحبها مووو
انداريت وشفت شهد ورايه
غيث .. عفيه مو وكتج تره روحي بخشمي
شهد .. بعدك تحبه مبين من تصرفاتك انتبه غيث تره قبل جنت رجال ممتزوج والك الحريه بكولشي هسه انت برگبتك مره وطفل بالطريق واي تصرف غلط ينعكس عليك

غيث .. شمسوي اني شبيج
شهد .. شوف حالك ورجفك شوف ايدك شبيها
غيث .. شبيها
شهد .. بيها جكاير وانت مدخن اله نادراً وبلحظه الخنكه لعد شكد تعبان من وراها
ليش رجعت مشاعرك الها شتريد منها مكافي الي صار

غيث .. والله مااريد شى ومااعرف شبيه مره احس روحي احبها مثل قبل مره احس شفقه بسبب وضعها مداعرف شبيه
شهد .. ماطول من تشوفها متركز على تصرفاتك معناها بعدك تحبها موبس تحبها بعدك مجنون بيها لان فتره من الفترات سميتك مجنون موج من كثر حبك وتعلقكك بيها

غيث .. اااااه ياشهد نار بگلبي من اشوفها هيج انجن حتى انسى وضعي وضعها اهلي كوولشي انسى وابقى ارجف عليها
شهد .. ميصير الي كاعد تسوي غتوو تره اسيل تحبك لتكسر گلبها

غيث .. والله اني هم احبها
شهد .. هااي شون تحب اثنين
غيث .. شوفي شهد اني احب اسيل لطيبة گلبها وحنانها وروحها وهي جبرتني احبها لان تحبني وكدرت اتأقلم وياها واتعلم عليها حب عشره وزوجه وراح يربطنا طفل

شهد .. ومووج
غيث .. مووج ااااااه لو اصرخ للسما توصل لله صرختي هااي نبض الگلب هاي اول كولشي اول احساس اول نبضه اول حب اول ضحكه من الگلب اول شقاوه اول جنون  اول غزل اول رجفه وقلق حتى اول دمعه
وياها بكولشي اول شى ودوم من تسوي شى لأول مره مستحيل تنسى طعمه مستحيل طول حياتك
لهذا تأكدت بعد مشفتها وبعد كل هاي المده متباعدين ورغم عشت حياتي وتعودت على اسيل وتقربت منها ومشت حياتي هادئه بعده هذا واشر على گلبي ينبض نبضه خاصه الها نبضه لو اموت مااكدر اتحكم بيها نبضه بس الها وبس ومالي سلطان ولا حكم عليها نفس النبضه من شفتها اول مره بعيونها الناعسه وملابسها مال النوم وتشيل بشعرها رجفتي اول مشفتها وعرفتها البارحه وبعد مرور كل هاي المده رجعت نفس الرجفه

شهد .. والله ياغتو انت اتجيب المصايب كوه لروحك يمعود اذا زوجتك شافت شى راح تخسرها
اني مااكدر اكوله زوجتك تعرف لان هي حلفتني مااكوول احجي بگلبي

شهد .. نسيت الي سوته بيك وتركها الك لتنسى الي سوته شى جبير بحقك
غيث .. هي هنا المشكله الي سوته غير المفروض هسه كارهه تلعب نفسي منها مااطيق اشوف وجهه ليش بس شفتها نسيت كولشي

شهد .. يجوز عطف وشفقه
غيث .. ياريت اتمنى لان اذا بقت هاي مشاعري وتأكدت مو عطف كارثه وربج لان هلمره محد ياخذها مني

شهد .. الله يستر منك
غيث .. خليها على الله
شهد .. زين انت شتريد منها
غيث .. ماادري
شهد .. الله خوش جواب
غيث .. امشي ندخل دوختيني بس تسولفين
شهد .. هااا اني الي صار ساعه اتغزل بالعينتين
غيث .. امشي خلي ندخل نشوفها
شهد .. الله يستر منك رجعت مجنون
غيث .. ولا على المجنون حرج

موج .. اليوم الرابع عدهم واني بديت انهار اكثر لان رجعوا كبار المنطقه لأهل اكرم وهلمره اصلاً ام اكرم  مفتحت الباب الهم وطردتهم والكل ضاج واعتبرها اهانه خاصه من مره وحلفوا ميدخلون بعد وحتى مالهم علاقه بيهم بس اني شنو الي استفاديته صار الوضع اتعس بقيت دايخه وحالتي حاله وردت اوكع بس ام زيد.. الله ينطيها العافيه متركتني جانت دوم فوك راسي وتجبرني اكل بس شون اكل واني مااعرف ابني جوعان شبعان ربي ساعدني ماعندي غيرك ضاقت السبل بيه وماعندي معين ولا سند غيرك يـارب
صار الليل اختنكت اريد اتنفس ماكو باوعت الساعه ٣ الصبح ياربي شبيه كمت من فراشي رحت للحمام غسلت وجهي ورجعت شربت مي احس روحي تلوب ومحتصره وگلبي نار على علاوي باوعت الكل نايم والبيت اظلم خلي اطلع بالحديقة ماطول ماكو احد الجو طيب وهوا بلكت ارتاح 

غيث .. نامت اسيل من وكت وضعها هلكم يوم معاجبني وحاسها تعرف شى وضامته حاولت بهدوء افهم منها بس تبجي حاولت احتويها واهديها بس احسها ممرتاحه بقيت اتگلب بالفراش كلت خلي انزل ادخن بالحديقة مجايني نوم

موج .. تمشيت بالحديقة عد بيت ابو زيد ترك وره البيت بصف الحديقة يطل هذا الترك على بيت عيالي رحت للترك اتمشى من لهفتي على ابني ردت اشم ريحته ولو من بعيد وصلت للسياج واسمع صوت علاوي يصرخ ويبجي يم سوده بوجهج موج وكمت الطم وابجي الحايط عالي من حلات روحي ردت اصعد على الحايط واكمز تخبلت واني اسمع بجي وصريخ ابني اكيد جوعان عرفت سبب خنكتي وصدري يدر حليب كمت الطم على وجهي فقدت بذيج اللحظه كولشي مااتذكر بس اتذكر دفعت غيث

غيث .. دامشي بالحديقة واسمع لطم وبجي ركضت شفت موج شبه متهستره وفاقده حتى بشعرها تكطع واتصيح ابني راح يموت من الجوع اريد ابني اريد الزمها ماكو رادت تصعد على السياج تملخت رجلها جريتها بقوه ولج اصحي شجاج
موج .. غيث ابني ديأذوه ابني جوعان اسمع صوته ديبجي
غيث .. اشششش على كيفج طفل ويبجي شى طبيعي
موج .. طبيعي بالنسبه الك بس هذا قطعه من روحي وداشوفه مو بحضني واسمع عياطه من الجوع ومااكدر اسويله شى .. بيج قصص غزوان علي
غيث .. على كيفج شوفي روحج راح تموتين كافي بجي
موج .. اي اريد اموت تعبت من هاي الحياه كافي بس قبل مااموت اريد ابني ودنجت ابوس ايد غيث انسانه يائسه من الحياه ماعندي لا اهل يلفوني ولا زوج بيه خير وفوكاها من مات اخذو ابني مني مبقالي شى من الدنيا غيره واخذوه
دنجت ابوس ايدك اريد ابني
غيث .. من شفت وضعها وانهيارها انجنيت وخاصه مداتكدر اهديها فقدت بجي ولطم ومحسيت بروح غير ساحبها بقوه وحاضنها

بذيج اللحظه من حضنت موج مكان بداخلي غايه ولا شهوه ولا اي شى بين المره والرجال جان شى واحد بس احساس اول مره احسه ويااها احساس بأن انسان تعشقة بجنون وتشوفه منهار ومابيدك شى تسوي حتى تهدي غير تحضنه واطبطب عليه احساس بأب يخاف على بنته ويريدها تسكت لان ميتحمل دموعها واذيتها حضنتها بعمق وگلبي يبجي دم عليها ردت بس تهدأ وهي تبجي بحضني وفاقده لكولشي وفوكاها صوت ابنها والبجي مالته عالي واضح وهي تشيل نفسها وتركعها حسيت بلحظه راح يوكف گلبها بقيت حاضنها وهي تبجي بقوه وتصيح بأسم ابنها واحجي ويااها
فدووه موج على كيفج
موج .. اريد ابني غيث اريده سنين محرومه من الخلفه ومن الامومه ومن صار عندي اخذوه مني
غيث .. اششش اسكتي موگطعتي گلبي اجيبه الج وعيونج لو اعرف ابوكه واجيبه الج بس اسكتي بداعت علاوي اهدي

موج .. هنا حسيت بروحي وسكتت ولكيت نفسي بحضن الانسان الوحيد الي حبني وفضلني على نفسه بس الحيااه ظالمه وظلمتنا ومجمعتنا بس بعد ميفيد كبرت المسافه بينه شفت روحي بحضنه وحاضني بقوه عبالك اب حاضن بنته ويخاف عليها

دفعته على كيف وخرت من حضنه
اني اسفه ضوجتك مكدرت اسيطر على نفسي
وفجأه سكت صوت علي وهدأ توتري
غيث .. باوعت بعيونها وبيني وبينها اقل الشبر وانفاسنا وحده
اااااه ياامواجي ليش هيج تذبلين هاي العيون الي اعشقهم ليش تأذين نفسج متعرفين من اشوف وضعج هيج شيصير بيه
موج .. رجاءاً غيث بله هذا الكلام من رخصتك

غيث .. سحبتها من ايدها وگلبي ينبض بالدقيقه الف ارجعه الج لو اعرف ابوگه المهم متبجين
موج .. عوفني غيث ليجي احد وترك ايدي ورحت للغرفه اني ماانكر بعدني احبه بس اني حالياً انسانه محطمه ماافكر بشى غير ابني ولازم ارجعه وابتعد من هنا بقائي بهذا البيت راح يسبب مشاكل هوايه اني في غنى عنها

بعدها بيوم صاحني الحجي وگلي على محامي شاطر بهاي القضيه وكال هو يتكفل بالمصاريف يعني هذا الانسان كولش حباب وصدوك اكو بعد ناس طيبه وخوش اوادم اتشكرت منه وهو خطيه يعاملني عبالك بنته دمعت عيوني وانقهرت واتذكرت اهلي الي عافوني بأصعب الظروف وحتى مفكروا يسألون عليه كل هاي المده ميته عايشه خاصه يعرفون ام اكرم متحبني واكيد راح تأذيني بس مهتموا ولا كأني بنتهم بس الله ميكطع دزلي هذا الرجال الطيب حتى يوكف ويايه اصعب شى من تشوف الناس الغربه تقدرك وتصدكك وتوكف وياك والي من لحمك ودمك ينكروك

أبوزيد .. باباتي موج راح يروح وياج اخوج غيث لان على اساس اني اخذج بس جايني خطار وزيد ماكو
موج .. عادي عمو خليها غير يوم
ابو زيد.. لابنتي اخذت موعد بعد وعيب من الرجال من اول موعد نخلف ويااه بس هلمره غيث وياج والباقي اني اخذج
موج .. اني رجفت مااريد غيث ولا اريد مكان يجمعني بيه وحدنا بس الحجي قافل واستحيت الح اخاف يحس بس شنوو اسيل لوبيدها تذبحني وتمشي وتتأفأف حتى اهل غيث انتبهوا عليها موطبيعيه

انطتني ام زيد عبايه اسلاميه من شهد جديده لبستها وطلعت
غيث .. اوويلي الله حتى وانتي لابسه اسود وحزينه تخبلين طالعه عبالك خليجيه وشكلها راقي وهادئ اما جسمها يموت بيها طالع  اوف ياگلبي ورجفاتك عليها اني حسيت اسيل راح اطك واعتقد غيرانه عليه منها بس مااكدر احجي او اسوي اي شى الها لان اي جدال بينا راح يكبر الموضوع لهذا انطيت الاذن الطرشه ولا كأني منتبه

رحنا للمحامي وطول الطريق هدوء لا اني احجي ولا هي بس نسمع انفاس بعض جان امنيتي بيوم انجمع وياها وحدنا بدون خوف او قلق وانجمعت بيها بس هلمره الف خوف وقلق ولا اكدر احجي شى ولا هي وهذا اصعب شى بداخلي حجي ومشاعر واعرف بداخلها هم بس السكوت سيد الموقف

وصلنا للمحامي وفهمنا على كولشي وكال القضيه موو سهله وخاصه اني مااملك لا سكن ولا معيل وهمه موفرين كولشي وبقى يفهمنا على هواي نقاط رجعنا واحنا شبه اليأس سيطر عليها اباوع عيونها تريد تبجي
وراها كامت تنزل بهدوء واني اسوق متحملت وكفت السياره
غيث .. مكافي ولج راح تموتين
موج .. رجعني للبيت فدوه غيث
غيث .. اسكتي يله ارجعج

موج .. مالك علاقه ابجي اعيط احرك روحي لتدخل انت
غيث .. شون ماادخل نسيتي منو اني
موج .. لا يمكن انت الي نسيت احنا انتهى كولشي بينا
غيث .. انتهى صح بس مداتحمل الي كاعد تمرين بيه

موج .. ممحتاجه شفقه منك 
غيث .. ياشفقه
موج .. غيث رجعنا  رجاءاً تأخرنا  لتنسى نفسك ولا وضعك ولا حتى وضعي
غيث .. ليش قبل لعد نسيتي وضعج وحبيتيني
موج .. نسيت بعد وماكو انسان مينسى وياريت اطبق كلامك لان اني طبقته
غيث .. اي كلام
موج .. من خابرتك اخر ليله وجانت ليله زواجك تتذكر شكلت اريد اعيش مثل البشر وجودج بحياتي مراح يخليني استقر تعبت منج
لهذا ابتعدت حتى لتتعب واني هم ارتاح واعتقد انت عشت حياتك والي داشوفه مستقر وضعك تمام وتحب زوجتك شتريد مني
غيث .. اريدج موج
موج .. مستحيل اذا قبل صار حب بينا والظروف فرقتنا  هسه الالاف المرات مستحيل علاقتنا من الاول اساسها غلط بغلط وكولشي ينبني على غلط ينهدم

غيث .. تعالي نبني من جديد وهلمره بطريقة صح
موج .. لتستغل وضعي صح اني مكسوره هسه والي بيه جبال متحمله بس مااكدر ابني حياتي على دمار حياة انسانه ثانيه
غيث .. قصدج اسيل
موج .. اكيد هي تحبك وجايكم طفل بالطريق وحياتك بدوني فعلاً مستقره وهادئه لتخربطها وترجعها لنقطه الصفر

غيث .. اتزوجيني
موج .. شنوو اتزوجك
غيث .. اي اتزوجيني وناقص من الرجال ومااتسمى ابن ابويه اذا مااجيبلج ابنج

موج .. شوف اني اعرفك رجال وكد حجايتك بس هذا مومعناه اوافق على طلبك
الي بينا انكسر وانتهى وراح مرحله بحياتي وبحياتك وعديناها بحلوها وبمرها
غيث .. تقربت منها هي رجعت ليوره
موج .. رجاءاً غيث لتتقرب
غيث .. حطيت ايدي على گلبها دفعت ايدي
موج .. لتلمسني شبيك
غيث .. شايفه گلبج شون ينبض بقوه لان انتي يمي بعدج تحبيني موج ومتأكده
موج .. خلي نرجع للبيت تأخرنا
غيث .. شو باوعيلي
موج .. اهووو والله تره انزل هسه وارجع مشي
غيث .. اذا متباوعين مااتحرك وقفلت ابواب السياره
موج .. باوعت خير
غيث .. احبج موبس احبج روحي متعلگه بيج
موج .. دنجت وگلبي ينبض بقوه والعن الساعه الي رجعه بطريقي مكافي الي عشته ذيج الايام بقينا طول الطريق ساكتين واني ادعي مااضعف كدامه اني بياحال وهو بياحال

واول منزلنا كلت للحجي والحجيه على كلام المحامي وبقوا خطيه يتناقشون ويايه واني محتاره بضيمي ومنا هذا غيث الي مكعد يجوز مني
شفت الوجوه مگلوبه اسيل وشهد اعرف بيهم مسويات حزب عليه وميتات مني بس شبيدي اني بس احصل ابني ثاني يوم اطلع وبعد مااخليهم يشوفون وجهي

بليل سمعت صوت عالي يمكن غيث واسيل يتعاركون

اسيل .. يعني هذا وضع على اي اساس تطلع ويه مره غريبه ارمله
غيث .. الي يسمعج يكول طالع اتونس وياها لوما كدامج الحچي صار وابويه طلب اروح وياها يعني حتى مواني الي تبرعت

اسيل .. كافي غيث هذا الوضع موترني ومتعبني حرام عليك حس بيه
غيث .. ولج شمسوي شو مداريج مثل المي بالصينيه قصرت بشى وياج اذيتج
اسيل .. لا
غيث .. لعد شبيج تخبلتي من اجتي موج وانت كألبه الخلقه واعصاب وكل شويه تبجين بابا عيب هاي تصرفاتج لا البنيه تحس زحمه
اسيل .. ياريت تحس وتروح منا مطايقتها اموت منها
غيث .. حجي زايد ازعل منج تره مكبره الموضوع حيل
اسيل .. يعني تطلع وياك وحدكم وتكولي مكبره الموضوع يعني لهاي الدرجه ماعندك احترام لمشاعري لهاي الدرجه طلع حبك كذب
غيث .. الله مطولج ياروح يعني بس طلعت وياها وللمحامي وكدامج صرت مااحبج وكذاب وماعندي احترام شو انتي لسانج طولان اسكتي ولتخليني اگلب الغرفه عليج صوتج مااسمعه واله تشوفين مني وجهه عمرج مشايفته خليني محترمج ومقدر وضعج لان حامل كلمه ثانيه والله ماارحمج

اسيل .. كعدت وكمت ابجي وهو عافني وطلع

موج .. شفت غيث طلع زهكان كمت صعدت على كيفي وصلت لغرفتهم قبل لا ادك الباب ابتسمت اتذكرت من جان يوصفلي الغرفه ويكولي تنوريها تنهدت ودكيت الباب
اسيل .. مسحت دموعي عبالي عمتي سمعت العياط وصعدت تفضل
موج .. ممكن ادخل
اسيل .. شجابج هنا انزلي مااريد اشوفج
موج .. دخلت وسديت الباب ورايه وتقربت منها وهي تبجي وتمسح بدموعها وكعدت يمها

شوفي اسيل الحركات الي كاعد تسويها متفيدج هيج بس تخلقين المشاكل
اسيل .. مبين تريدين اسكت واني اشوفج طابه وطالعه ويه رجلي اله تخبلت يله اسكت

موج .. باعي اسيل اني بيوم كتلج انسيني واحتوي غيث وخلي يحبج واعتقد نجحتي وحياتكم هادئه لتخربيها بتصرفاتج
اسيل .. اذا خربت حياتي بسببج معودت يحبني ونكون سوه ويحس بحبي جيتج هسه خربت كولشي

موج .. لزمت ايدها وهي متوتره وتبجي
ادري بيج تكرهيني وتعتبريني عدوه اذا مواكثر انسانه تكرهيها بالدنيا وحاسه راح ادمر حياتج واخذ غيث منج
احب اكولج غلطانه الي ديصير مجرد ظرف طارئ انتي هسه حامل وبعدج محاسه بالامومه الله لايراويج يوم مثل يومي تعرفين شنو احساس ام ياخذون طفلها الرضيع منها
تعرفين شنو احساس يطردوني واني بالملابس الي عليه اني كولشي مااريد منهم اريد ابني وبس مراح تحسين بقيمه الي احجي اله من تولدين وتكومين بالسلامه الحياه جبرتني وجابتني الكم اعتبريني دخيل عدكم اني لا على بالي غيث ولا غيره اني اريد ابني وبس واخذه وبعد متشوفون وجهي لوعندي غيركم وحق الي خلق السموات مااجيكم لوعلى گص رگبتي بس القدر دوم يعوج ويايه واهلي مثل معرفتي متبرين مني وماعندي معيل وسند يوكف بجانبي ومن اجيت قصدت ابوه واخوه عمري مفكرت التجأ لغيث لان اعرف مدى حساسيه الموضوع بالنسبه النا ثلاثتنا

اسيل .. بس اني خايفه ليرجع يحبج ويتودد الج وخاصه ماكو اي سبب هسه يمنعه منج وكعد تشوفين تصرفاته ابد موطبيعيه

موج .. لا اكو سبب وسبب قوي كولش
اسيل .. شنو هو
موج .. اني السبب اني بعد مااريده لغيث كافي الي صار وهو هسه برگبته عائله وطفل بالطريق ومستحيل ابني سعادتي على تعاسه غيري اعرف بدايه علاقتنا اني ويااه جانت غلط لكن الحب موبيدينا بيد ربج هو يوزع المحبه ويمكن اجه بطريقي لسبب الي صار بيني وبينه موبيدينا هذا قدر ولازم نعيشه ونفس القدر بعد بينا وخلاج بطريقة واتزوجتي وعايشه مرتاحه ويااه لتخربين حياتج لأجل شى انتهى وراح  ومستحيل نرجع والي صار يمكن عبره النا حتى نفهم الدنيا صح لهذا اترجاج اتحمليني بس هلكم يوم اخذ ابني وبعد متشوفين وجهي

اسيل .. احاول اهدأ واسيطر على اعصابي واصدكج
موج .. بس اطلب منج لتشوفيني كموج الحبيه السابقه لغيث شوفيني امرأه حالها من حالج مغلوبه على امرها ماعدها حد بس الله وانتم حتى ترجع حقها المسلوب ابنها الي هو قطعه من روحها اترجاج تفهميني

اسيل .. انقهرت عليها وهي كامت تبجي وعدت نفسي احاول مااذيها هي شعليها اني انتبهت على تصرفاتها هادئه وحتى متباوع بوجهه بس هوو اااااااخ منه يلوب عليها اعرفه كولش زين واقره تحركاته حتى من عيونه اعرفه حتى بس يريد يتقرب منها يارب عدي هاي الايام على خير

مر اسبوع على وجودي ويوم بعد يوم تصعب القضيه والمحامي بلغ الحجي اذا كدرت ام اكرم تجيب شهود زور يطعنون بشرفي اكيد تكسب القضيه وخاصه اني ماعندي لامعيل ولا وظيفه ولا سكن راح يحكمولها بالحضانه من سمعت الكلام انهاريت بقيت ابجي واندب حظي
واتذكرت حجايه غيث كلت مابيها مجال هو هذا احسن حل صارالليل والبيت هدوء شفت شهد تغسل مواعين صحتها بالغرفه .. كروب قصص غزوان علي
شهد .. خير محتاجه شى
موج .. جريتها وكعدتها شوفي ام حسن يوم من الايام جنا صديقات ومقربات حيل وسرنا واحد وعمرنا مأذينا بعض ولا صداقتنا لمصلحه ويوم مبتعدتي عني ولحد الان مااعرف السبب عذرتج وكلت تبقى صديقتي وبحكم اختي

شهد .. شنو مناسبته هلكلام
موج .. اتخيلي بيوم تكعدين متلكين جهالج شسوين
شهد .. عفيه اسكتي اسم الله
موج .. اتخيلي اكيد اسم الله عليهم بس اتخيلي متلكيهم وتدرين بعد مينامون بحضنج شيصير بيج
شهد .. لا اتخيل ولا شى الرحمن عليهم شنو هذا الحجي
موج .. شفتي مجرد خيال مكدرتي تعيشي شون واني عايشته واقع ماخذين ابني وبغير وجهه حق وهو صغير وحيدي شتتوقعين شعوري يعني هو الي طلعت بيه من هاي الدنيا التعبانه هو الي عايشه بسببه واخذوه مني شنو شعوري تتوقعيه

شهد .. دنجت حقج والله شعور مؤذي
موج .. لا مو مؤذي قاتل يعني لو ذابحيني ولا ماخذين ابني مني
شهد .. المطلوب شنو موج
موج .. اريدج تساعديني لان بس انتي راح تحسين بالنار الي بگلبي
شهد .. بشنو
موج .. اريد ابوگ علاوي
شهد .. عزه شون
موج .. بيت عيالي بيهم طبيعه يعوفون باب السطح (البيتونه) مفتوح وهو قريب على غرفتي اعبر من سطحكم على سطحهم وادخل لغرفتي
شهد .. ليش هو قابل علاوي عايفي بغرفتج اكيد يم السعلوه ام اكرم
موج .. اطب بالاول لغرفتي اخذ كم قطعه ملابس منها الي واله وعندي كم قطعه ذهب من اهلي امي واخوتي هدوها الي بزواجي اخذهم حتى ابيعهم واستفاد من فلوسهم الي ولعلاوي

شهد .. وبعدين
موج .. انزل بهدوءلغرفه عمتي اخذ علاوي واصعد للسطح وارجع اطفر عليكم واطلع من بابكم واروح لدربي وبعد متشوفوني

شهد .. اكيد تخبلتي شون نسوي هيج هاي جريمه شون اساعدج بيها
موج .. لعد مو جريمه ماخذين طفل من حضن امه وحارميها منه مو جريمه ابوس الايد والرجل واكولهم اصير خدامه الكم بس بقوني يم ابني ويكتلوني ويطلعوني سحل
مو جريمه خلصت شبابي ويه رجال كل همه الشرب والساقطات وعاملني احقر معامله اذا ذني مو جريمه شنوو الجريمه بنظرج لان داارجع ابني لحضني اعرف اذا بقى عدهم راح يضيع واني هم اضيع بدونه اترجاج ساعديني

شهد .. انقهرت عليها حسيت بألمها رغم المجازفه بس افكر وانطيج خبر
موج .. باجر انفذ شهد
شهد .. بعدني مموافقه
موج .. ماطول تفكرين يعني وافقتي
شهد .. ونفرض وافقت شون اساعدج
موج .. اول شى اريد تراك مني بجامه حتى اكدر اعبر الحايط احط طابوك واعبر تعرفين بيه طويله اكدر اعبر
شهد .. وبعد
موج .. من اخذ الغراض استلميهم مني وبس اروح اجيب ابني هم استلمي مني لان مااكدر اعبر وهو بحضني وراها بس اعبر على سطحكم من اكمل كولشي اخذ الغراض وابني وبنفس اللحظه اطلع من بيتكم

شهد .. بس تدرين انت تحجيها عبالك شغله سهله بس هي ماكو اصعب منها
موج .. ربج ميرضى بالظلم وراح يوكف ويانا وتعدي على خير
شهد .. مااعرف خايفه كولش
موج .. فدووه ساعديني والله ضاقت بيه الدنيه ماعندي غيرج اترجاج

شهد .. الله كريم نشووف باجر

واليوم كله اكلنا القلق لحد مصار الليل وعبرت واول مطبيت الغرفه اااه ياغرفه التعاسه مشفت بيج يوم حًلوو بس الگتل والاهانات فتحت الكنتور اخذت ملابس الي ولعلاوي موو هوايه شويه لان مااكدر اشيلهم وفتحت الخانه مال الذهب عندي ذهب هوايه بس اكرم جايبه مجان يجيبه محبه بيه يكول اشتري اخزن فلوس بيه حتى من اداين واتضايق ابيعه عفته كله مااريد يكولون باكتنه اخذت كم قطعه مالاتي اهلي هدوهم الي وانطيتهم لشهد من الحايط امشي بهدوء بالبيت بحيث اسمع انفاسي ودكات گلبي ومن الخوف والقلق رمش ماارمش وبس اقرأ ايات بگلبي  فتحت الباب وشفت علاوي اووي من فدوه اروح لنومتك حبيبي اخذته بهدوء حتى ليبجي ويكعدهم بالبيت بس عمتي وعمي متوقعتها جايه واني دااريد ادخل للسطح جان تلزمني
وووين رايحه

يتبع ..