رواية بين العقل و الطريق الفصل الخامس 5 - بقلم غزوان علي

بين العقل والطريق
بقلم غزوان علي

البارت الخامس
قصص غزوان علي

هُنَاك فَرْق بَيْن الْحُب وَبَيْن مَجْنُوْن يُحِبُّك ! فَالَحُب قَد يَتَكَرَّر آَمّا الْمَجْنُوْن ... فَلَن يَرَى فِي هَذَا الْكَوْن سِوَاك

موج .. واحنا كاعدين ونضحك على سوالف ود ومندمجين يمكن لأول مره اضحك من گلبي من اتزوجت لهاي اللحظه جان شعور جديد ومميز بس متكمل ضحكتي اكيد وجان يدخل اكرم وامه موقفي هنا لااحسد عليه بس الخوف والقلق  احس اريد اخرب ومااعرف شأصرف رغم موجوده امي ويانا وهم ود.. كاعده يعني موبس اني وغيث بس حسيت وكأني مع عشيقي ولزمني وكفت على حيلي

غيث .. طب اكرم وهذا الي جنت ممتوقعه بس مهتميت شيسوي خلي يسوي بس نظرات امه ابد محبيتها واباوع مقابيلي واشوف موج ترجف من الخوف عبالك مسويه مكسوره
ام اكرم .. شعندك هنا عيني
غيث .. وليش قابل هو بيتج انتي شعليج
أكرم .. تأدب لك لتشوف ذيج المره اخذتني غدر هلمره اكسر سنونك بحلكك

غيث .. يله انت رجال وسويها
ود.. فدوه غتوو خلي نروح منريد مشاكل
وذوله ناس ادور على المشاكل امشي
ام اكرم .. شنوو قصدج احنا ماعدنا اخلاق ونتبلى عليكم احجي شوو اخرسيتي
ود..موقصدي
غيث .. مالج علاقه بأختي واحجي ويايه

وتقرب اكرم عليه ولزمني من التيشيرت متحملت واني هم لزمته وردنا نتضارب وجان يعلى الصوت كولش ودخل ابوموج وابو اكرم جانوابره
ابو أكرم .. شكوو شبيكم شصار هاي منو غيث هنا هله ابني شونك هااي شنو اكرم عوف غيث تخبلت
أكرم .. هواني الي تخبلت لوهو الي تعدى حرمه بيتي وضربني واليوم جاي هنا لبيت اهل زوجتي شنوو نيتك غيث اني متحملك ومتعرف اذا طكيت عليك شسوي

غيث ..اتشوف هذا الحايط اضرب راسك بيه متهمني ولتخليني مثل ذاك اليوم اخلي دمك بطولك
ام اكرم .. انت الزم شعره منه اله احرگم حرك
موج .. اني من الخووف كعدت وارجف واحس الدنيا تفتر بيه ومدااسيطر وشفتي ترجف اجتني ود.. وكعدت بصفي شربتني مي لان بس هي انتبهت على وضعي الكل ملتهي يتعارك والصوت مالتهم يوصل للشارع
ابو أكرم .. بعياط كاافي عيب شجاكم نسيتو احنا جيران واهل وسحبت ايد اكرم بقوه وكعدته
ابني غيث اني اعتذرلك
ام اكرم .. شنوو تعتذر فوك متعده على ابنك وجاي هنا مااعرف شنو نيته الله اعلم تعتذرله
حجي عبدالله.. شنوو قصدج حجيه
ام اكرم .. على اي اساس ادخلون ولد غريب لبيتكم ومكعدبنتك يمه  وين الشرف وين الاخلاق هيج بيتك صاير ياهو الجاي يدخله

عبدالله .. لهنا وبس والزمي حدودج اني احتراماً لأخويه حجي ثابت ساكتلج صار ساعه تتجاوزين وساكت بس مال تحجين على شرفنا مااقبله
ابو أكرم .. لج نصاف اسكتي لا والله اهينج
ام اكرم .. تهيني علمود ذوله الي ماعدهم غيره مكعدين بنتهم بحضن غريب
ام امير .. عيب ام اكرم لوما دخلتي وشفتيني كاعده بنصهم واخته هم وجانت زوجه بشار هم موجوده والولد اجه جاب اخته حتى تشوف صحتها بعد ماابنج عدمها العافيه
غيث .. موج اشرف من الشرف وبنيه ينحلف بأخلاقها واذا تحجين على الشرف جان المفروض ابنج يصونه وميطلع مرته بملابس البيت للشارع سحل وفوكاها تتبلين على غيرج يعني انتي متخافين الله

موج .. العركه والتجاوزات زادت واني ارجف وخايفة وعلى العياط دخل امير وبشار ورادت ناس تضرب ناس اما غيث مثل البانزين يزيد النار
تالي كاام يعيط عمي وسكت الكل
وكعدوا واني هنا بعد متحملت من الهبطه اغمى عليه
غيث .. اني صاير نار ولو بيدي اكطعه لأكرم وحتى امه جنت ادعي من الله تزيد المشاكل حتى بلكت الله يطلكها واشتد الحجي والتعدي بس حجي ثابت عاط بالكل وسكتهم ومنشوف غير موج تخرب واني كمز گلبي بس مكدرت اتقدم عليها وهذا اصعب شى الكل يكدر يلمسها اله اني بينما ولا واحد منهم يحبها ربع الحب الي احبه الهه
واخذتها ود. وامها لغرفتها واني روحي تمشي وياها

ام اكرم .. شفت شكد لوكيه مرتك سوت نفسها خربت وتعبت اوف من عياره النسوان 😏
أكرم .. يمه شوفي حالها مبينه تعبانه
ام اكرم .. هااا يل أغم حنيت الها
أكرم .. لاحنيت ولا شى بس مبينه تعبانه
واني هسه موبحاله بحال هذا الحقير غيث اريد اكوم اكطعه بس ابويه لومو ويانه جان خوش فرصه اردله الي سواه بيه
ام اكرم .. صوج مرتك شوف شعدها ويااه واجاها للبيت
أكرم .. شتحجين يمه شنوو قصدج الولد جايب اخته وعادي تره .. كروب قصص غزوان علي
ام اكرم .. اشش مو وكته هسه من نرجع للبيت نسولف

موج .. صحيت واخذوني للغرفه وارجف من الخوف وماما طلعت وبقت بس ود ويايه
ود.. على كيفج ياعيني راح تموتين من الخوف قلبج احس راح يوكف شجاج
موج .. ود شون مااخاف وكاعد تشوفين الوضع بره اني مردت اكرم وامه يشوفون غيث يمنه
ود.. والله ولا اني بس غيث اكل راسي امشي نزورها وامشي نشوفها ويريد يطك عليج
موج .. انتي تدرين
ود.. بحبه الج قصدج
موج .. اني والله ماعندي شى ويااه
ود.. ميحتاج تحلفين اعرف گلي بس هذا اخويه تخبل وماانكر كولش خايفة عليه من هذا الشى اصلاً ميسمع ولا يفهم وضعج وقافل بشكل شجاه هذا غتو الي ميفكر بالحب ويستهزأ بيه هيج يحب

موج .. احجي ويااه فهمي وضعي لازم يتركني
ود.. ميفيد ميمي وربك لساني عجز من الكلام لو احجي لهذا الحايط جان سمع وافتهم وطبق بس هو ابد ولا يمه ولا كأني احجي
موج .. شون لعد اذا احد حس بيه تصير مصيبه انتي شفتي كاعدين وكعدتنا بريئه شسوت ام اكرم  لو تحس شون يمكن تخلي اهلي يذبحوني على ذنب ممسويته

ود.. والله محتاره مثلج بالعكس اني اكثر لان اخاف على اخويه وفكرت اكول لبابا وماما بس تراجعت لان اكيدراح تكبر الشغله اضافه بعد ميحجي ويايه يمكن طول عمره
وكاعدين نسولف وجان اطب امي وصاحتني تعاالي اخوج يريدج

ابو أكرم .. ابني غيث اني كدام الكل اعتذر منك ورحمه والديك الي سويته لواشكرك العمر كله مااوفيك
غيث .. على شنوو عمي
ابو أكرم .. لان اسعفت بتنا موج وكفت وياها وهي هم مثل اختك ومقصرت
ام اكرم .. خلي يروح شنو كعدته بينا
ام اكرم .. الله مطولج ياروح اسكتي يامره
وبما ان الشغله كلها صارت كدامك يعني انت هسه طرف بيها لازم تشوف اكرم شون يعتذر لمرته كدامك
أكرم .. وعلى اي اساس يبقى وهو غريب
امير .. هذا الغريب نفسه الي ستر مرتك وانت شمرتها بالشارع
أكرم .. جانت لحظه عصبيه وتصير
امير .. صح تصير بس موبهاي الطريقة ومثل مهنت موج كدام الغريب تعتذر هم كدامه

غيث .. ادعي بگلبي تعلك ومتهدأ اريده يطلك شأسوي واخلي يطلك وصار حجي وبحدود النص ساعه واخر شى كاال امير اخوها
اسمع اكرم من الاخير تعتذر لموج كدام الكل ونسألها كدام الموجودين تقبل ترجعلك اذا قبلت تاخذها هسه والله وياك وايااك تتعدى حدودك مره ثانيه وياها بهاي الطريقة
واذا مقبلت من باجر تمشي بأجرائات الطلاك كافي يوميه ضاربها منريد نخسر اختي
بشار .. شتحجي امير شنو تطلك
امير .. انت اسكت معليك شتكول حجي كلامي عندك اعتراض عليه
حجي عبدالله .. لاابني ماعندي اعتراض اصلاً هو هذا الي جنت ناوي اسوي
ولتزعل مني ابواكرم هذا حق ابنك اذاها لموج ولازم اخلي حد لهذا الشى
ابو أكرم .. والله يااخويه مااعرف شأكول بس اكول الله يهدي النفوس
غيث .. من الفرحه اريد اكمز واكيد موج مترجع بعد گل الي سواه وانتظرها لحظه لحظه صاحوها واني الثانيه الوحده عندي صارت ساعه

موج .. صاحوني ودخلت وعيوني تباوع على امير بس عقلي كله يم غيث
وبقى يحجي امير وخيرني لو اطلك لو ابقى وارجع ويااه
بلحظتها احس روحي بدوامه ومااكدر اتخذ قرار الحياه الي عايشتها ويه اكرم لاتطاق وبنفس الوقت گلبي خايف من فّگًـره  الطلاك وخاصه بمجتمعنا محد راح يرحمني اذا اني بنيه ودمروني اهلي من مطلقه شراح يصير  الحيره سيطرت عليه وانداريت على اكرم

طلكني اكرم مااريد ارجع وياك كافي تعبت من الاهانات والضرب
غيث .. باوعت عليها ولوبيدي اكوم احضنها يعني هيج واتصير اليه وتجي بحضني مدااصدك والمستحيل يتحقق

ابو أكرم .. بنتي موج استهدي بالرحمن ان ابغض الحلال عن الله الطلاك
موج .. عموو والله تعبت مدااكدر والله وجنت كولشي تشوف بعينك
امير.. هذا هو حجي وانت اكرم من باجر تروح تكمل اجرائات الطلاك وكل واحد يروح لحال سبيله
أكرم .. ومنو كلك اطلك
غيث .. لاياربي بس لا ميطلك
موج .. وليش مطلك انت موتكرهني ومتريدني
أكرم .. لا اريدج واحبج وهاي كدام الكل ابوس راسج
موج .. انصدمت من كلام اكرم
وانتي حبيبتي وام بيتي ومراح اقصر وياج وراح اهتم بيج بس ارجعي ويايه اني احبج موج ومااريد اخسرج
غيث .. نزلت راسي وعيوني دم والنار الي بصدري مدااكدر اتحكم بيها والقلق من رجعه موج اله خفت لتضعف وترجعله

موج .. وين جان هذا كلامك وانت تهيني ولعبت بحالي جنت اتوسل بيك على كلمه حلوه اطيب خاطري بيها ومااحصل منك بس الاهانات اعذرني اكرم جاي تعتذر بعد فوات الاوان گلبي خلص من المشاكل والله

أكرم .. اني الي عندي كلته طلاك مااطلك وابقي كم يوم هنا لحد مترتاح نفسيتج وراها اجي اخذج اني مااستغنى عنج ولتخافين بعد ماامد ايدي عليج المهم متعوفيني وترتاحين ويايه
بشار ..شتريدين بعد شفتي راضاج وكاال  ميأذيج ويحبج ارجعي بابا لبيتج
امير .. عوفها على راحتها لتضغط عليها الي تريده موج هو يصير
غيث .. مكدرت كولشي احجي وكفت بعد مااكدر ابقى خايف ابقى واشوف رجعتها اله ومااتحكم بأعصابي

من رخصتكم اني رايح والله يهدي الامور
ابو أكرم .. بعد وكت ابني ابقى اقلها صير طباب خير ويانه
غيث .. متسكت انت لوبيدي احرگ ابنك ومرتك واخذ موج وانهزم ااااااه يانار قلبي
لا حجي مااكدر تأخرت بس اذا مصارت زحمه ممكن تصيحين ود
موج .. مااشي
ود حبيبتي اخوج يريدج
واخذت ود وطلعنا وحتى من دااسوق مدااشوف من اعصابي
ود.. اوكف غتو لتروح تدعمنا ارتاح شويه واشرب مي صاير نار
غيث .. ولج بس لاترجع مااريدها ترجع مااريد شوون كوليلي
ود.. هي اصلاًمطيق اكرم ومأذيها مااعتقد ترجعله
غيث .. خايف ومااعرف شصرف
ود.. عوفها على الله وهي تنحل يله خلي نرجع للبيت تأخرنا

موج .. بقوا اهلي واهل اكرم يحجون واكيد امه متسكت لعبت لعب بس تريدني اطلك اني امنيتي يعوفني كافي مليت بس اكرم ليش تمسك بيه اخر شى اتوقعه يسوي هيج وانطوني مهله اسبوع بس امير مقبل كاال خلوها اسبوعين احسن اقلها اطيب ايدها

بقت الحيره مسيطره عليه بس الي متوقعته يدخل بعقلي هو غيث بديت افكر بكلامه بالمستشفى وسوالفه وشكله مرات ابتسم ومرات العن الشيطان من اتذكر وضعي وصار يومين على الموضوع واني بس حابسه روحي بالغرفه على كد الاكل والحمام بس اكيد دعاء مترحمني لان هي اول وحده تريدني ارجع ومااطلك حتى يصفى البيت الها اني حتى مالي علاقه بيها بس هي كارثه مدمرتني

دعاء.. شقررتي عيني
موج .. بخصوص
دعاء..رجعتج لزوجج
موج .. هذا شى خاص بيه مالج علاقه
دعاء.. شون مالي علاقه واني زوجة اخوج اني اكول ارجعيله احسن المطلكه بوقتنا محد يريدها احسن متصيرين علج بحلك الكل
موج .. قابل اني اول وحده اطلكت وليش علج اذا ممسويه شى غلط
دعاء .. المطلقه سوت وان ماسوت تصير علج الكل يسولف بيها استري على نفسج وارجعي
موج .. رجاءاً لتدخلين ماشي
دعاء .. براحتج عيني بس خوما تبقين بس اكل ونوم قابل انتي خطار بالبيت وتريدين اخدمج

موج .. هيج كولي تريديني اشتغل ادللي بس جوزي مني فدووه مالي حيل سوالفج ومشاكلك
دعاء .. شمسويه اني وتتبلين عليه
موج .. دعااء رجاءاً كافي واطلعي من الغرفه خلي ارتاح وبس اطيب ايدي ابدي اشتغل
دعاء.. طالعه اووف شوكت الله يخلصنا

موج .. بعدني صار كم يوم واستلمتني لو اطلك هاي مترحمني بس مهما كان ارحم من اكرم وامه وبليل مغمضه بس منايمه الوقت بطئ يمشي واني مااريد اطلع بره بالصاله يمهم لان بس اكعد يمهم ينفتح موضوعي وجان يدك التلفون باوعت ود

غيث .. صار يومين واني كلشي مااعرف رجعت او لا وحتى من التعب والتفكير للشغل مرحت

ومتحملت لازم اتصل بيها لازم اشوف راح ترجعله لو لا وبقيت افتر بكل البيت ومااعرف شون اتصرف واتذكرت وركض لود
ود دوده وينج
ود.. يعني متبطل من دلع دوده بربك هو هذا دلع اموت منه
غيث .. مو وكتج هسه وين تلفونج
ود.. ليش
اتصلي بموج اريد احجي وياها
ود.. احد كلك اني مرسال الغرام يمعود اعقل غتوو لتسوينا مشاكل نسيت ذاك اليوم شصار ولوما  عموو ابو أكرم جاي وياهم الله اعلم شصار

غيث .. اتصلي وفضيني
ود.. لتعيط على كيفك هسه راح اتصل
هلو حبيبتي ميمي شونج
موج .. والله تفاجأت بتصالج  الْحٍمدلله انتي شونج مشتاقتلج
أشر لود شوفي منوو يمها
اكولج حياتي اكوو احد يمج
موج .. لا ماكو اني وحدي بالغرفه ليش
وبهلحظه وجان اسمع الووو مالته سكتت

غيث .. ليش تسكتين جاوبيني بس اريد اسمع صوتج
موج .. سكتت مدااكدر احجي وگلبي يدك سريع سريع
غيث .. لهاي الدرجه كارهتني وحتى متريدين تجاوبيني
موج .. لا اني مااكرهك بس مااكدر احجي وياك
غيث .. اووف من فدوه لصوتج
موج .. شفت لهذا مااريد احجي وياك تتجرأ بالكلام ويايه واني اخجل اضافه ظرفي وضعي مامسموح احجي ويه واحد غريب
غيث .. حقج وماالومج بس انتي هم حسي بوضعي وفكري بيه صدگيني راح تعذريني
موج .. شتريد غيث
غيث .. لترجعين موج اترجاج
موج .. وين ارجع
غيث .. لترجعين لأكرم
موج .. مااعرف انت شفت الي صار كدامك وطلبت الطلاك بس مااعتقد يقبل يطلك واذا ظل الوضع هيج اكيد ارجع
غيث .. ايااااااااج اترجعين افتهمتي

موج .. ليش تعيط تره مااسمحلك ترفع صوتك وشنو هذا امر ميصير هيج تره انت هوايه كاعد تتدخل بحياتي
غيث .. انتي تسويني عصبي افهميني عوفي كولشي عوفج مني ومن سوالفي انتي مفكرتي بحياتج بوضعج الى متى تبقين مكفخه بيد اكرم وامه الى متى تبقين ذليله للضرب والاهانه

موج .. شنوو كاعد تعيرني لو شنوو مداافهمك
غيث .. انتي ليش هيج تفسرين كلامي على مزاجج شنو اعيرج بابا اني ادور مصلحتج وخايف عليج احتمال بيوم هذا السخيف يضربج ضربه تجيب اجلج او يسويلج اعاقه ويسكطج العمر كله فكري موج الرجوع لأكرم معناها نهايه حياتج انتي بعدج صغيره والعمر كدامج حرامات تضيعيه ويه هيج واحد

موج .. والله مفكره بس مرات الشخص ينجبر على الاذيه والقهر والي داامر بيه اختبار صعب واخاف اقرر شى واتندم عليه
غيث .. اي قرار بيه بعاد عن زوجج بيه ربح مو خساره
موج .. والله ياغيث مااعرف شأكول بس اكول الله كريم البي خير الله يقدمه .. بيج قصص غزوان علي
بس انت هم اكعد راحه لاكل شويه مسويلك ملعوبه وتتقرب مني
غيث .. امواجي
موج .. نعم
غيث .. اشتاقيتلج
موج .. ابتسمت بداخلي بس مبينت اله
عفيه غيث كاافي
زين عندي حل يرضيج ويرضيني
شنوو الحل كوول اسمعه
غيث .. اصير صديق الج ومااتعدى حدودي ابد والي تريديه يجرالج
موج .. ماكو صداقه بين مره ورجال واثنينا نعرف هذا الشى

غيث .. جربي مخسرانه شى معجبج الوضع تكدرين تكوليلي وعد مااراسلج ولا اتعرضلج بس انطي لنفسج فرصه تعرفيني اقلها كصديق واتركي الباقي للايام مووج مره وحده انطيني وانطي لنفسج فرصه وخليني صديق اخ الي تريديه المهم اطمن عليج بين فتره وفتره وحتى انتي من تتعرضين لضغوط للي داير مدايرج تكدرين تفضفضين الي احسن ميضل بگلبج وتتأذين ومن نغلق الخط وداعت امي مااتكلم بكلمه من الي گلتيه واعتبر نفسي مسمعت شى منج هاا شگلتي

موج .. مااعرف خايفة من جهه وحايره من الجهه الثانيه
غيث .. مراح نسوي شى غلط والايام تثبتلج
موج .. الله كريم اروح هسه اخاف احد يحس مع السلامه
غيث .. مع السلامه ياغاليه
ود.. هااا بشرني خلصت المكالمه مو من المراقبه رجلي راحت
غيث .. وشكوو تراقبين احد طلب منج هذا الشى
ود.. غيث شوف نفسك وين انت بالحديقة واي واحد يطلع راح يشوفك ويسمعك وتصير مشكله انتبه على تصرفاتك ونفسك من تحجي وياها ليروح احد ينتبه
غيث .. تدرين والله محسيت بروحي بالحديقة هههههههه
ود.. فوكاها يضحك واني دمي ناشف انتبه فدووه منين اجتنا هاي المصيبه ياربي
غيث .. احلى مصيبه فدوه لعيونها
الله يشافيك اخويه غتوو انجن على الاخر

موج .. غلقت الخط وبقيت افكر بكلام غيث اني فعلاً محتاجه الي اشكيله همي وخاصه وضعي خواتي ٢ ولا وحده بيهن فكرت تكعد يمي تسألني بيج شى محتاجه شى اجوني مره وحده تحمدولي بالسلامه وداروا وجهم وراحوا وبقيت وحدي وزوجه بشار كارثه بس افوت من يمها اتذبلي حجي وزوجة امير بحالها حتى للبيت متجينا من وره مشاكل دعاء وابنها  واختي مروه صغيره بعدها مراهقه مااكدر اسولف وياها على مصايبي وصديقات الكليه ولا اتواصل وياهم لان جان اكرم ميقبل واني بوضعي هسه مخنوكه ومااعرف شأسوي وعفت الموضوع ومفكرت بيه وثاني يوم اجتني رساله على التلفون وقريتها وابتسمت عرفته غيث بالرغم رقمه محافظته بس من رسالته عرفته هو

أرِيْد أَن أَكُوْن بِجَانِبِك عِنَدَمّا يَهْمِس قَلْبُكِ
ب..إِحْتِيَاجِي
وان تكوني بِجَانِبِي عِنْدَمَآ اهْرُب
مِن (نَفْسِي) اليكِ

اتصل وجاوبته الوووو هلو غيث شونك
غيث .. الحمدلله ياغاليه طمنيني انتي شونج
موج .. تمام
وبقينا نسولف مااعرف شكد من الوقت مر واستغربت على نفسي شون الوقت وياه محسيته وهو كلامه هادئ وراقي وللامانه ابد متجاوز بالكلام بالعكس جان يضحكني وسولفنا بحدود ٥ ساعات لحد ماسمعنا اذان الفجر
اكولك غيث كعد تسمع الي اسمعه
غيث .. قصدج الاذان
موج .. اي تعرف شكد صارلنا نحجي ٥ ساعات وانت ليش رصيدك مخلص
غيث .. حاسب حسابي وحاط رصيد هوايه حتى احجي براحتي
موج .. على هيج شى منا لشهر ولا فلس يبقى عندك
غيث .. فدوه الج اشتري صوتج بعمري مو بكم فلس
موج .. غيث شكلنا مو ماكو حجي جرئ
غيث .. هسه شحجيت سكتت المهم متضوجين
موج .. شكرا
غيث .. على شنوو
موج .. على كلشي من التزامك بكلمتك واسعافي للمستشفى لحد هاي اللحظه
غيث .. لتعيديها ماكو شكر بين الاحباب قصدي الاصدقاء مابيه حيل هسه لسانج يطلع متر عليه
موج .. هههههههه لا مااحجي بس لازم اروح اصلي وانام
غيث .. تقبل الله ونوم العافيه
موج .. منا ومنكم تصبح على خير
غيث .. وانتي من اهل الخير ياكل الخير

موج .. مرت الاياام ويوم بعد يوم نتقرب اني وغيث من بعض الكلام ويااه ممتع بشكل ودوم احاول اخلي ينام من وكت لان وراه شغل بس هو لا متمسك بالحجي ويايه يهتم بأدق التفاصيل اكلتي شربتي نمتي محتاجه شى يعني احتواني بشكل فوق الخيال لاارادياً مني كمت اقارن بينه وبين اكرم فرق السما عن الكاع غيث انسان عجيب كولشي حلوو بيه هدوئه ضحكته دمه خفيف حتى الاغاني الي يسمعهم ذوقهم روعه ونادراً شاب بعمره يحب هيج اغاني ودوم يسمعني الاغاني الي يسمعهم واول اغنيه سمعها اليه
جانت شكول عليك لقحطان العطار بيومها رجفت والكلام. ضاع مني كولشي معلقت غير بالصمت وخاصه اني اسمع صوته يغني ويه الاغنيه

شگول عليك أگول أنساك روحي وياك
شگول عليك أظل زعلان مر فرگاك
مثل فزة بطفل روحي تفز لو سمعت بطرواك
ومثل وردة وشحيحة ماي نزلت مطر تتنخاك
واگلك هاك شوف جفاك شوف سوة بية جفاك

عجبتج الوو موج تسمعيني
موج .. اي اسمعك
غيث .. اخاف الاغنيه معجبتج
موج .. لا بالعكس اني اصلاً سامعتها سابقاً واحبها بس مااعرف حسيتها غير هلمره

غيث .. شون يعني غير
موج .. حسيت بكلماتها لامست روحي وانتبهت على كل كلمه وشكد كنت احبها هسه اكثر
غيث .. بعد مده راح تحسين بكلمات كل اغنيه ارسلها الج وتعيشيها
موج .. شمعنه
غيث .. لان اني هيج صرت جنت احب الاغاني واسمعهم وحتى احفظهم هسه كمت احسهم وكل كلمه تلامس وتين گلبي واعيش الاغنيه

موج .. مااعرف يجوز
غيث .. امواجي
موج .. هاا عيني
غيث .. شنوو شگلتي
موج .. مكلت شى
غيث .. عيديها
موج .. شنوو هي غيث شبيك
غيث .. تسلملي عيونج يااغلى من عيوني
موج .. شكد خجلت مااعرف شون طلعت مني اني متعلمه اكولها بكثره بس وياه ولا مره كلتها لان اعرف راح تنفهم غير شى
غيث .. تدرين حتى من تسكتين انفاسج تلامس روحي يعني حتى سكوتج احبه

موج .. غيث صارلنا اكثر من ١٠ ايام واحنا يومياً نتصل ونسولف بالساعات وهذا غلط
غيث .. اني اتجاوزت بشى وياج
موج .. لا والله متجاوزت بس هو الوضع كله غلط واني مااحب اسوي شى غلط

غيث .. والمطلوب
موج .. منتصل بعد وخاصه هاي الفتره لان المهله راح تخلص ولحد الان اني مقرره شأسوي ارجع لا واتصالي وياك كاعد يأثر على قراري
غيث .. يأثر شون يأثر
موج .. مومهم تعرف شون المهم منتصل هلمده لحد مااقرر شراح يصير بحياتي
غيث .. ماشي تدللين بس حاب اكولج شى ياريت تحطي بعقلج
اكو شخص مستعد يفديج بروحه ودوم بجانبك بس اشري دقايق واني يمج
موج .. تسلم الله يحفظك متقصر
غيث .. انتبهي لنفسج امواجي
موج .. وانت هم انتبه لنفسك
مع السلامه
غلقت الخط منها محبيت اضغط عليها بس اتضايقت واختنكت اريدها تحس بيه بس هي قافله واني بهاي الايام تعلقت بيها اكثر

موج .. صار يومين وغيث ممتصل حسيت روحي مضيعه شى شبيه وكأني اشتاقيتله اليوم رحنا للطبيب وفتح ايدي الحمدلله صارت احسن لحد اليوم محد حجه بموضوع رجعتي بس عيونهم تحجي والحيره مسيطره على الكل عفتهم ودخلت وصار الليل واني بديت افكر بيه احس روحي اشتاقيت اسولف ويااه اني شنو الي دااحسه وليش احسه وساعه بعد ساعه وصارت ساعه وحده والنوم مهاجرني وبس صافنه والكآبه رجعتلي بعد مانسيتها طول ايام اتصالي بغيث
وجان يجيني الي خله بسمتي ترجع من جديد رساله منه يمكن هو اكثر مني يلوب اعرف بيه وفتحت الرساله

تبـا لحنيني إليك
لا يعرف وقت
ولا يتقن أبجدية
ولا يملك إستئذآن
يأتيني في كل حين
ليسرقني من كل شيئ  ..

مااعرف عجبني اجاوبه برساله

سأهمس لك سراا
حضورك يربكني كثيراا
وتزداد نبضاات قلبي.
كلماا حاادثتك
ف رفقاا بقلبي
يا ااا انت

مكدرت اله ادزلها اشتاقيت لضحكتها لصوتها ودزيت رساله وهي جاوبتني طفرت من مكاني متحملت اتصلت

موج .. هلو غيث
غيث .. من فدوه لگلبج ونبضاته افديه بروحي
موج .. ههههههه بعدك تتغزل متوب
غيث .. اااااااه ياامواجي طمنيني عليج شونج ولج عبالك صار عمر مسامع صوتج
موج .. الحمدلله وانت
غيث .. ضايع بدونج والله بدون مبالغه
موج .. غيث
غيث .. عيونه
موج .. محتاجتك
غيث .. يمج والله بس كولي شبيج ياغاليه
وبديت احجيله عن المضايقات مال دعاء وضعي بالبيت وهو حاول يخفف عني بالضحك والنكات حسيت روحي طفله ويااه شعور حلو من تشوف شخص يدفع عمره حتى يسمع ضحكه منج موو شخص كل همه الشهوه والخدمه والضرب والاهانه وقررت هذا هو لازم اطلك من اكرم واعيش حياتي مااستاهل ادفن روحي بحضن واحد مريض مثل اكرم وبلغت اهلي بقراري والكل سكت رغم حسيت بيهم رافضين فّگًـــــٌرًهُٓ طلاكي بس ميهمني وساعه ١٠ بليل اجه بشار وبلغوه بقراري واكيد شاحنته مرته شحنه زينه عليه واشتغل العياط والصياح واني كولشي محجيت سكتت وهو وامير كاموا يتعاركون بس ابويه عاط بيهم وسكتهم بس بشار اخذ ابويه وكام يحجيلي شون المطلكه تتأذه من حجي العالم والناس مترحمها واشكال الحچي حسيت بابا اقتنع بكلامه بس سكت وخفت ليقنع امير هم وتخرب الشغله كلها وارجع تحت رحمه اكرم بس اني  كلشي معلقت  حتى لا ازيد الوضع توتر اكثر وبعد مفضت الهوسه ساعه ١١ ونص صحت بشار لغرفتي مااريد احجي كدام مرته مسمومه
تعاال اكعد عندي حجي وياك
بشار.. خير احجي ام المصايب

شوف بشار انت اخويه واكبر مني واكيد تعرف مصلحتي واني الي تريده يجرالك ارجع لأكرم ومااكسر كلمتك بس انت ترضى اختك تنهان
بشار .. محد يهينج هذا رجلج لتنسين وماكو كرامه بين الرجال وزوجته
موج .. صح ماكو اذا هو قايم بواجبها كزوجه
ماكو اذا هو مشاركها حياتها
ماكو اذا مراعي الله بيها وممقصر بحقوقها الزوجيه
بشار .. شنوو قصدج
موج .. انت اخويه ومااستحي منك راح اراويك شويه من احترام زوجي الي
ونزعت ايد التيشيرت مالتي وطلع شويه من ظهري وانداريت عليه هااك شوف هذا احترام اكرم اليه
بشار.. شنوو هذا ظهرج
موج .. هذا جزء بسيط لو اراويك الباقي شون شفت درت وجهك متحملت منظره هيج يظربني كل ميسكر لو كل ميخسر بالقمار .. كروب قصص غزوان علي
يااخويه ياابن امي وابويه اني ممتزوجه انسان عاقل ومحترم ماخذه واحد حتى مااعرف بيش اوصفه شراح اوصفه يكون قليل بحق وحشيته وهمجيته والي يمارسه بحقي
انت اذا تقبل اختك تعيش ويه هيج واحد من باجر مستعده اخذ جنطتي واروح وتره موبس هو حتى امه تحير شسوي بحقي اهانات وقلة قيمه وتجوعني وترزلني كدام الرايح والجاي وخدامه والله خدامه مسويتني
اذا تقبل بكل هذا مااكسر كلمتك
بشار .. دنجت ومااعرف شأكول واني اشوف وضع اختي هيج ذليله ومتأذيه حتى حرام عليه
موج .. لتسكت بشار كولي شتريد واذا مضايقتك علمود لكمتي ومصرفي شغلني بأي مكان ومستعده اتحمل مصرفي والله مااطلب ولا فلس منكم
بشار .. شتحجين موج فلوسي وفلوس الكل جوه رجلج شنو متعاجز من لكمتج غير اختي انتي واشيلج على راسي اني لان ماعدنا وحده مطلگه وانتي تعرفين المطلگه متسلم من حجي الناس
موج .. حجي الناس لو اختك بشار اذا حجي الناس اهم هذا هو كتلك مااكسر كلمتك

بشار.. هذا هو من باجر نمشي بأجرائات الطلاك وطز بالناس
موج .. من الفرح كمت ابجي وحضني وباس راسي كافي يله اسكتي اهم شى سعادتج

وثاني يوم بلغوا اكرم بقراري وهو رفض وگلبها للدنيا
ام اكرم .. انت متفهمني ليش متمسك بيها تخبلت معودت اخلص منها تجي انت تتمسك بيها
أكرم .. اسمعي امي لازم ارجع موج بكل الطرق
ام اكرم .. لتخبلني شسوتلك بنت سهير اكيد ساحرتلك
أكرم .. ياسحر يمه افهميني الكل يعرف خلل بموج متخلف واذا اتزوجت غيرها ومخلفت راح يعرفون الخلل مني وبذاك الوكت انفضح ومتأكد وراها بمده تتزوج واحتمال تحبل شنوو ردت فعلي بين الناس ولاصدقاء
ام اكرم .. شعلينه بيهم المهم نخلص منها وازوجك اغاتها
أكرم .. انتي مكعد تفهميني يوم فدوه فكري بيها زين طول هاي السنين اي مكان. ادخلين اله تصيحين ابني كولشي مابيه العيب بزوجته بس هو راضي وساكت واذا اتزوجت غيرها ومخلفت الناس تاكل وجهج وجهي اني شعندي شو هي كاعده مثل المطي تخدم وتكرب من الصبح لليل واني متونس ويه الحلوات وعايش حياتي اقلها كدام العالم اني رجال ومضحي متحمل مره عاقر وساكت وممتزوج عليها وفوك كل هذا ابويه يحبها وهذا اهم شى اني اعتبر موج واجهه اجتماعيه لااكثر ولااقل افهميني
ام اكرم .. بس هم مااحبها واريد اخلص منها
أكرم .. لواحجي للصبح ميفيد اعرف
اني مااطلك اذا طلكتها اخسر
ام اكرم .. شوكت الله يخلصني منها

موج .. صار شهر ونص والوضع كما هو واكرم لاهو مطلك ومخلصني ولاهو جاي ونتفاهم بس الي صار داخلي تغير بديت احس بمشاعر اتجاه غيث مرات الوم روحي واكول حرام عليه ومرات اكول هو اني شفت من حياتي حتى احسب روحي متزوجه بس رغم كل تقربي من غيث لاهو تجاوز بالكلام ولا اني بس بديت اشتاق لصوته لضحكه اكو شى بداخليي اتغير اتجاهه

وكالمعتاد يتصل بليل ويضحك ومرات تفلت كلام غزل منه واني اضحك. كمت مااسكته من يحجي صرت استمتع بسوالفه مرات احسه طفل مدلل ومرات رجال مثقف شعور يجنن وياه انسى حتى نفسي

غيث .. امواجي
موج .. نعم
غيث .. احبج
موج .. شنووو
غيث .. والله احبج موبس احبج اتنفسج
موج .. غيث شتفقنا
غيث .. اسكتي وغمضي
موج .. هههههههه ليش
غيث .. غير تسكت الفطيره كافي ضحك الله عليج اسكتي وغمضي
موج .. غمضت
غيث .. تخيلي اجيتج للباب الصبح اخذتج من ايدج وصعدتج للسياره وشغلت فيروز
انا لحبيبي وحبيبي الي
موج .. يا عصفورة بيضا لا بقى تسألي
غيث ..لا يعتب حدا ولا يزعل حدا
موج ...أنا لحبيبي وحبيبي إلي
الله غيث والله دااتخيل الموقف

غيث .. اشش واسمعيني وابقي مغمضه
والسياره تمشي سريع والهوا بارد وعلى طريق سريع نوصل اني وياج لمزرعتنا
موج .. عدكم مزرعه
غيث .. اي عدنا خارج بغداد مزرعه صغيره وتجنن الخضار الي بيها والطيور وكأنها جنه بس اكيد من راح ادخلين الها راح تصير احلى من الجنه لتفتحين عيونج

موج .. ههههههههه شمدريك فتحت عيوني
غيث .. غمضي لج تره اجيج
موج .. هههههه ماكدر بس اضحك
غيث .. من فدووه لضحكتج الي تلعب بگلبي لعب انتي متتأمنين خلي اني اغمضلج عيونج وحطيت ايدي على عيونج الحلوات
موج .. حسيت صدوك حطهم وجسمي رجف وغمضت وتخليت من كل گلبي اني ويااه ودخلنا للمزرعه وكعدنا بمكان يخبل كله اشجار وخضار بكل مكان والورد ريحته تموت وهو كاعد مقابيلي
غيث .. تدرين شراح اسوي
موج .. شسوي
غيث .. تقربت تقربت
موج .. وين 😳
غيث .. شبيج خفتي اسكتي وحسيني تقربت وحطيت راسي بحضنج وغمضت اااااه ياحضنج ادفع عمري كله وانام بيه
موج .. سكتت ويگلبي ينبض سريع وانفاسي تسرع شعور عجيب وكأني فعلاً يمه واحسه
غيث .. تدرين شكد طيبه انفاسج
موج .. شمدريك
غيث .. شميتهم ومتت عليهم
موج .. شوكت
غيث .. من جنتي بالمستشفى
موج .. شون تسوي هيج غيث
غيث .. مكدرت اسيطر اصلاً المفروض اتشكريني لان مبستج
موج .. عزه غير اگلب الدنيا عليك
غيث .. هههههههههه شكد احب من تكولين عزه اتخيل شكلج لا امواجي لتخافين مااسويها اله بطلب منج
موج .. همزين واني مااطلبها
غيث .. لا. راح اطلبيها وعيونج واذكرج
موج .. يله استاذ كوم من حضني لان اذن كاعد تسمع كافي
غيث .. يعني حسيتيني صح
موج .. شكد خجلت منتبهت على كلامي وسكتت
غيث .. اموت حتى على خجلج احبج واموت عليج كمت من حضنج وتقربت منج وشميت انفاسج ااااااه من فدوه لأنفاسج الطيبه
موج .. ابتسمت تصبح على خير
غيث .. وانتي بين احضاني وروحي تصبحين بالهنا امواجي
موج .. اوووف سديت الخط منه وكل كلمه تهز كياني كدر سيطر عليه بطريقة عجيبه واشتاقله وافكر بيه

ومر شهر ثاني وصارلي عند اهلي اكثر من شهرين ونص والحال كما هو لحد مراح بابا واتفق ويه عمو ثابت على كولشي واتفقوا ويه محامي يكمل اجرائات الطلاق وكل هاي الفتره اني عايشه بين مضايقات دعاء وحقارتها وبرود اهلي وتجاهلهم لوجودي وبين حب غيث ودلاله الي بليل يتصل ونتكلم ً ويعوضني عن تعب اليوم كله وينسيني الي اشوفه طول النهار من تعب ومشاكل

غير كولشي بحياتي وبديت اتعلق بيه اني لحد الان متحفظه بحبي اله حتى معترفت اله احبه بس هو مجنون اشكال الغزل والحب بس ميتجاوز حدوده ودوم يدعي اطلك حتى اكون اله وصلت لمرحله اثق بان اني بيوم راح اكون اله

غيث .. صارت حياتي تجنن واني احس موج بدت تتعلق بيه وتسأل عني واذا تأخرت بالاتصال احسها تتوتر ومن اتكلم بالحب تضحك بعد مكانت تتضايق احس روحي نجحت بزراعه اول بذره حب الي بگلبها واتمنى تكبر هاي البذره وتحبني
اهلي ديحسون بالتغير الي ديصير
وشهد من مده وجهه ثكيل عليه حاولت اصالحها بس هي مااعرف شبيها ضايجه واعرف تخاف عليه من موضوع موج بس لازم اثبت للكل اني احبها  واحارب حتى تكون اليه
اتصلت بيها بنفس الموعد مغلق تلفونها هاي وينها ظل بالي وگلبي لعب .. كروب قصص غزوان علي
صار يومين كولشي مااعرف عنها وصرت نار لوبيدي احرك الكل من الاعصاب والتوتر وبنفس الوقت خايف عليها ومااعرف شون اوصل الها حتى ود اتصلت مغلق قررت لازم اخذ ود ونروح الها مابيها مجال والي يصير يصير مااتحمل اني اذا مااسمع انفاسها يوم واحد اتخبل وصار يومين وهي ماكو يارب مابيها شى اتخبل اذا مسها الهوا واذاها
واني بالحديقة انتظر ود حتى نروح لبيت اهلها وطلعت بالسياره وجان تصير كدامي سياره اكرم وتنزل منها موج
فتحت عيوني واني اشوفها تدخل ويه اكرم للبيت مكدرت استوعب الي صار وكفت السياره بنص الشارع ونزلت عليها احس فقدت عقلي بهاي اللحظه لازم افهم الصار
ود.. وين غتو عفيه تعاال ياربي دخيلك راح تصير كارثه
موج .. شفت غيث اجي بأتجاهنا ومبين نار  واني قطره دم مابيه

يتبع ....