رواية بين العقل و الطريق الفصل السابع والعشرون 27 - بقلم غزوان علي

بين العقل والطريق
للكاتب غزوان علي
البارت السادس والعشرون

موج .. دك التلفون ساعه ١١ بليل واني بسابع نومه اباوع مروه
اهوو هاي ماعدها شغل وعمل وتريد تسولف موتدري بيه نايمه مجاوبت رجعت دكت هاي شجاها شكد تلح
هاا يمعوده نايمه شكوو

تحجي وترجف وهوسه يمها مفهمت شى كمت من الفراش فهميني شكوو هسه غير تسكت وتحجي على كيف حتى افتهم بس ترجفين والحجي سريع يمعوده راح اموت على كيفج خلي افتهم شبيج احجي
مروه ..بشار رمى طلقات على دعاء وكتلها خلاص
موج .. شنووو
مروه .. والله ماتت ماتت
موج .. اششش على كيفج گلبي لترجفين وهسه بشار وين
مروه .. اجتي الشرطه اخذته
موج .. معرفتي شنو السبب
مروه .. لا بس ماما منهاره وادك وتلطم وابويه وامير ركضو على بشار وابن بشار يم وسن والمنطقه انگلبت وتعالي شوفي حالنا يصعب على الكافر ومشفت روحي غير اصعد فوك واخابرج

موج .. بس على كيفج مراوي گلبج راح يوكف اهدي گلبي
مروه .. شهده موج اكولها فضيحه ومصيبه بعد شون تردين اهدا .. كروب قصص غزوان علي
موج .. دروحي انزلي افتهمي شنو الي صار وارجعي خابريني وانتبهي على ماما وعلى ضغطها يمعوده ليصير بيها شى

وراحت وساعه بعد ساعه واي خبر ماكو وكل مااتصل بيها تكولي منعرف شى لحد مصار الصبح واني عيوني مماخذه النوم والوب بالغرفه وبالبيت اريد افتهم شكو وتالي ساعه ١٢ الظهر يله خابرت وافتهمت كولشي
احجي بسرعه
مروه .. شحجي مصايب وربج مصايب
موج .. غير تحجي فضيها مو متت
مروه .. اجوي هسه امير وبابا ولد عمج وكعدت اتصنط عليهم تتذكرين من كتلج قسمنا البيت
موج .. اي

مروه .. بوقتها مقبلت تسوي علينا باب مشترك وگلبت الدنيا اله وحدها واخوج الغبي وافق وهاي المده كلها مشايفيها
وبشار كام يشتغل ويه ابويه العصر والصبح ويه تاجر يجيب قماش وكل شهر تجي سفره لو لسوريا لو لتركيا اجيب قماش وبضاعه ويجي وهلمره راح وعلى اساس يبقى ٥ ايام واول يوم راح وقريب ميوصل اتصلو بيه ارجع لتجيب بضاعه لان اختلفو ويه التاجر الي هناك رجع اخوج ثاني يوم بليل بدون ميبلغ الست دعاء ومن طب لغرفته لكاها ويه واحد بوضع استغفر الله
موج .. يمه اسم الله من عزه الي عزاج دعاء
مروه .. واخوج هيج شافهم مصاليخ وبهذا الوضع وتعرفين بشار دوم سلاح وياه خاصه من يطلع اماكن بعيده ومباشره سحب السلاح وكتلها هي ويااه والدنيا انگلبت وراها

مروه .. وابن بشار وين جان انتم محسيتو اكو احد داخل عليها .. بيج قصص غزوان علي
مروه .. ابنها مشربته دواء مثل المنوم حتى ينام وميشوف شى واحنا شنحس اكولها من يوم مفصلنا البيت واحنا معودنا نخلص منها ومن مشاكلها ومنشوفها واكيد من يجيها خوما بوضح النهار وكدام الكل اكيد تختار وقت مناسب وهي مأمنه بشار ميجي لان ٥ ايام كل شهر يروح بس ربج رجعه حتى يشوف الزنا مال مرته بعينه
موج .. كعدت بالكاع واني ممستوعبه الي صار

مروه .. وهسه اهل المكتول دزوا عليهم وكوامه وهاي السوالف مال العشاير ومنعرف شون تصفى
موج .. ماطول لزمهم بوضع الزنا ميتحاكم واكيد اهل الولد يتنازلون فوك فضيحتهم واهل دعاء تعزوا وتصخموا بس ابنها شون مفكرت بيه قبل متسوي هيج وبشار شون راح يباوع بعيون الناس بعد
مروه .. والله انتي طيبه اني اخويه يأذيني ويظلمني وانقهر عليه لو منج اكوله حييل تستاهل وطبها مرض مرتك خرابه البيوت هاي حوبتي

موج .. لا لج حرام الشماته راحت لربج هو يحاسبها وبشار يبقى اخويه ابن امي وابويه وكل واحد يتحاسب على اعماله
مروه .. ظلي فاهيه يله اروح باي
موج .. بقيت اليوم كله دايخه بموضوعها وحتى دروس مأخذت حسيت بأهلي ومصيبتهم وشون حال امي وحتى ابويه واخوتي الشغله مو هينه

ود.. حياتي صارت تخبل بعد رجوعي لهشام وعمتي علاقتي بيها صارت ممتازه ومتدخل مثل قبل والبنات وياهن ضحك وشقه وراها بمده رجع اخوهم مروان وزوجته ساره اهوو هم رجعنا ولا احبها من دخلت سلمت تفاجأت بوجودي وكأنها مجانت متوقعه راجعه ومااعرف شنو الي واصل الها والكل اجتمع على الاكل ونضحك ونسولف وهي احسها تباوع من جوه ليجوه وخاصه تشوف عمتي شون تعاملني مو مثل ذيج المره وره العشا كاعدين الولد بالصاله رحت وديت چاي الهم ورجعت قريب مدااوصل لمطبخ سمعتها تحجي ويه عمتي

ساره .. عمه شون تقبلين ترجع لهشام انتي مو كلتي طلكها شوكت رجعها معودنا خلصنا منها
ام هشام ... بنتي ابن عمج يحبها وتعذب وراها ومن رجعها معترضت اهم شى عندي سعادته
ساره .. انتي موو كتلتي نفسج علمود طفل اله وهي لحد الان متحبل شغيرج بس لو افهم
ام هشام ... امي متغيرت ولا شى كله قسمه من الله
ود.. عرفت عمتي محاجيه شى لساره دخلت غيرو الموضوع مباشره واجوي البنات وضحك وشقى وطلعنا يم الولد وكلنا مجموعين وجان تحجي الحيه متكدر اله تسممنا
ساره .. اكولج ود مراجعتي بعد علمود الجهال
ود.. وليش اراجع اباوع على هشام نزل راسه وخالتي تفرك بأيدها والبنات صافنات
ساره ..

غير علمود الجهال ياعيني الى متى يبقى هشام هيج لازم تشوفين حل يجوز متحبلين اقلها واحد يعرف

ود.. ديحجي هشام قاطعته
ام دارين عيني اولاً اني مابيه شى وتحاليلي كولش نظيفه وضعي تمام وهشام كذلك تحاليله نظيفه وضعه تمام
ساره .. لعد ليش محبلتي
ود.. بس اسألج سؤال انتي تصلين
ساره .. اي الْحٍمَدٍلله
ود.. يعني عندج ايمان برب العالمين
ساره .. بله هذا سؤال اكيد عندي
ود.. اذا عندج ايمان بيه شون متأمنين بأن الله هو موزع الارزاق وكلشي يصير بينا بأذنه
والله سبحانه وتعالى لحد الان مرازقنا الطفل وهاي حكمته ولا اعتراض عليها ونحمدالله عليها كافي معطينا الصحه والعافيه والستر وهذا اهم شى والباقي بيده فياأختي هذا سبب ماعدنا اطفال لحد الان ربج مأذن بهذا الشى وبعد اذنكم ويسمحلي عمي وهشام مااريد ينفتح هذا الموضوع ابد ومااريد احد يسأل هذا السؤال ابد اني وزوجي والحمدلله راضين بقضاءه وحامديه وشاكريه وحياتنا حلوه مااحب تتعكر بشغلات ماله حق اي احد يدخل بيها هاي حياتي اني وهشام ومااحب احد يدخل بيها كان من يكون

ابو هشام ... والله حقج بنتي وفعلاً مااقبل هذا الموضوع ينفتح ابد واي واحد يسألكم بيد الله وهذا رزقه فتهمتوا
ود.. الكل سكت هشام دمعت عينه ومدنج وعمتي ساكته ومقهوره كمت عبالهم زعلت وكالو هاا وين
ثواني هسه جايه ورحت جبت الدومنه والكل صفن يله عمي اني وياك ضد هشام وابو دارين
ام هشام ... ههههههههه والله عليج سوالف
بلسم .. واحنا
ود.. انتم المشجعات والفريق الي يخسر يعزم الفريق الثاني على عشا

اباوع على ساره تريد تشرب من دمي ورجلها ترجف بقينا نضحك ونلعب واني وعمي فزنا جان هشام ومروان اعصاب واحد يذبها على الثاني انت خسرتني وذاك يصيح انت متعرف تلعب صارت ليله تجنن والبنات كل شويه مسويات شى مره عصير مره شاميه وكرزات ويعيطن ويشجعن وعمتي تضحك ودارين تكمز يم ابوها وعمي يخرب ضحك كل منفوز عليهم اضرب كف ويااه ونحرك اعصاب الولد ونكولهم متعرفون تلعبون وضحكنا واصل للشارع اله ساره البومه ساكته وصايره نار واني هم ولا اهتميت الها وره مفزنا كاام هشام يركض ورايه ويصيح غشاشه واني اركض واضحك تالي شالني كدامهم شكد استحيت كاال رايح اربيها فوك ومروان يصيح الله ربك عمي روح ربيها واني الطم عيب هشام نزلني والكل يضحك

صعدنا فوك واني خجلانه من اهله وبنفس الوقت ميته ضحك على سوالفه وهو نزلني على الجربايه كعدني وجان ينزل بالكاع وحط راسه بحضني شبيك هشام بله ارفع راسك وجان اشوفه يبجي تخبلت شبيك گلبي شو ارفع راسك لتخبلني اكو شى يوجعك احجي

هشام ... ابوس بأيدها وابجي واحجي لتعوفيني ود لتعوفيني
ود.. اسم الله گلبي وين اعوفك مو يمك هاي كله وره الغراب ساره ضربتنا عين
هشومي ارفع راسك گلبي
هشام ... اموت بدونج ود والله
ود.. رفعت راسه ومسحت ادموعه شون اعوفك واني روحي بيك مكافي اني الي خطبتك وكاام يضحك اووف من فدوه لضحكتك شجاك حبيبي
هشام ... كلامج مال قبل شويه مال طفل فرحني وبنفس الوقت خفت لابيوم تتندمين وتعوفيني

ود.. الحجي مجان بس لأهلك تره الحجي موجه للكل واولهم انت مااريد بعد هذا الموضوع ينفتح واي واحد يسأل مابينا شى ورزق رب العالمين وانتهى مااقبل احد يخرب سعادتي وياك ليش همه الي عدهم جهال سعداء لا وعيونك شوو كلها مالخ وعركات وناس تتعارك ويه ناس كافي النوم محرومين ينامون براحه شاف من انام بحضنك وعلى صدرك يسوه الف طفل
هشام ... بست ايدها وراسها الله لايحرمني منج
ود.. ولا منك گلبي يله امشي ننزل عيب منهم هسه عبالهم نسوي شى
هشام ... ليش انتي عبالج مراح نسوي
ود.. ههههه هشومي بداعتي كووم ننزل عيب
هشام ... شوو تعالي ونومتها على الجربايه وابوس بيها بشوق ولهفه هي بالبدايه تضحك وتدفع بيه بعدها هدأت وانفاسها ارتفعت ونست اهلي وكولشي وشاورتها هااا ننزل
ود.. اذبحك اذا تكووم

هشام ... هههههههه لويجي جدي من الگبور مااكوم وبقينا بين دلع وضحك وممارسه احس شكد مااتقرب منها ارغب بيها اكثر مدااشبع منها لج وين ادخلج افتح ضلوعي وادخلج بنصهم وهم اكول بعيد
ود.. نايمه على صدره والعب برگبته وابوس بيها بهدوء اني روحي بيك وبعد مطلعنا لثاني يوم ومن نزلت الصبح اشوف ساره وجهه ميكصه السيف ولا درتلها بال اني عايشه احلى ليله ويه حبيبي ليش اعكره بيها وصاحتني عمتي
هاا عمه .. كروب قصص غزوان علي
ام هشام ... تعااي بنتي هاج
ود.. شنوو هاي
ام هشام ... هاي كلاده الج اني مسويه لكل بنيه وحده منها نفسها وحده الي هاي مالتي مني الج
ود.. لا عمه مااخذها هاي مالتج مستحيل ولزمت ايدي واباوع بوجهه نظرتها كلها حنان وطيبه اول مره اشوفها هيج
ام هشام ... سمعي بنتي البنيه الي متكسر رجلها لو مهما كان عيبه وتسترته هاي تنحط على الراس والبارحه اثبتي انتي بنت اصول وتستاهلين تكونين جنتي وبنتي
ود.. شسويت عمه

ام هشام ...
من مأنطيتي بهشام كدام مرت اخوه رغم هي موغريبه بنت عمه واخوه يعني ماكو احد غريب ومكلتي منه السبب
ود.. رجاءاً عمه حتى انتي انسي هذا الشى ومااريده يتذكر ابد حتى كدام هشام خلينا مرتاحين وهذا رزق اجانه نعمه مأجانه هم نعمه
ام هشام ... الله يكملج بعقلج بنتي حقه هشام من ذبح روحه عليج هاج بداعتي لترديني حتى اني ارتاح مكافي شكد اذيتج وسمعتج حجي الله انتقملج مني
ود.. لا خاله عفيه لتكولين هيج حشه لله هذا امر الله واني مثل امي ومتمونين وهاي لخاطرج راح اخذها والبسها هم وبست راسها وباستني وطلعت فرحانه ودعيت الله يديم هاي الفرحه عليه

بقت ساره ومروان ١٥ يوم ويوميه مطلعه سالفه شكل وتلوب تريد تسوي مشاكل بس عمتي وكفتها عند حدها متحملت علاقتنا وشون عيالي يحبوني طلبت من مروان ترجع بحجه دوامها ومتكدر تتأخر ورجعوا سافروا واخيراً خلصت من النك مالتها
صفا انخطبت لزميل وياها بالكليه خوش ولد وحباب ومن عائله معروفه وهي هم معجبه بيه وبيومها سوينا المهر بقاعه وجانت حفله تجنن بس استاذ هشام خبلني شون هيج لابسه الفستان ضيق طالعه تخبلين ومااريد احد يشوفج هيج اني اضحك على غيرته وبنفس الوقت احب من اشوفه صاير نار وغيران ابقى احرك بأعصابه وره شهرين اجاني هشام وكاال
هشام ... حضري نفسج حبيبي
ود.. خير گلبي
هشام ... نروح نسوي عمليه اطفال انابيب
ود.. شنوو ليش
هشام ... لازم نحاول
ود.. اني خفت بداخلي نفشل وتنهدم السعاده الي اني بيها حاولت اقنعه موهسه منريد هو قافل اكو دكتور صديقة قانعه يكوله مخسران شى هّْـواي مثل حالتك وصار عدهم وهو دك رجل اله يسويها الخوف والقلق اخاف ميصير رجعلي وعدم الاستقرار الي بداخلي هم رجع خايفه حيل على هشام ليتعب ويرجع يفكر يعوفني

موج .. اتصلت مروه
مروه .. عندي بشاره الج
موج .. والله يامراوي بس المصايب وراج اصلاً كمت اخاف من اتصالج خاصه بليل كلت دكت وجابت مصيبه جديده وياها
مروه .. ههههههه لا والله هلمره موو مصيبه
موج .. يله اطربيني
مروه .. موصار التحقيق علمود سالفه القتل اخذوا كولشي يخص دعاء وعشيقها
موج .. اي
مروه .. ومن ضمن الشغلات تلفونها حتى يعرفون شكوو بيه ورجعوا المحادثات والرسائل لان الشغله كلش كبرت واهل الولد اتهموا اهلي بقتل ابنهم باطل واحتمال هي مقشمرته
موج .. بله ذوله من كل عقلهم قابل هو طفل وتقشمره والوضع الي همه جانوا بيه مبين متفقين
مروه .. الحااصل تعرفين بعد بشغله العشاير ومصايبها رجعوا المحادثات ومن الشغلات الي رجعت محادثه بين دعاء واكرم
موج .. جذب اييي كملي
مروه .. وقروا اهلي كل المصايب الي جانت مسويتها وطلعت هي متفقه ويااه مقابل تخم ذهب ب٧ ونص مليون وشايله التخم ومنطيته لصاحبها الي انكتل ويااها
موج .. كعدت بالكااع ابجي واخيراً ظهرت برائتي
مروه .. وابويه وامير كامو يبجون لان ضلموج وامي من حلات روحها كامت تهلهل سوده عليه فرحانه لان طلعتي بريئه وكله من وره الساقطه دعاء الله لا يرحمها واكرم
موج .. الف الحمدلله والشكر ربي مثل محفرتلي وطعنتني بشرفي الله وكعها بنفس مسوت بيه وموتها زانيه
مروه .. ارجعي اهلي كلهم يتمنون ترجعين ويعتذرولج
موج .. عوفيني هسه اريد اروح اصلي صلاة الشكر واخيراً بعد كل هاي السنين الله طلع الحق وكمت توضيت وصليت وطول مااصلي دموعي موكفت
وراها دك تلفوني جاوبت ادري هاي ام المصايب مراوي هااا ولج شنو المصيبه الي عندج هلمره ههههههه

شونج بنتي
اني جمدت اريد اجر نفس ماكو هذا صوت ابويه اي يصيح الوو واني ساكته وبس ادموعي تنزل
بنتي موج جاوبيني
نعم بابا
شونج زينه ابنج شونه
يم الله الحمدلله على كل حال
ابو امير .. موج ارجعي لبيت ابوج تعالي بنتي والله مااسويلج شى تعالي معززه مكرمه ومااخلي بشر يوصلج لاانتي ولا ابنج
موج .. ضليت بحدود دقايق اسمع كلامه واني دموعي تنزل واتذكر الضرب والسحل والاهانات وشون شمروني على اكرم ومغمضه وكأن شريط افعالهم كله رجعلي واتذكر من نزلت ليم رجله ابوس بيها واتوسل ياخذني خدامه ليمه بس ميعوفني حسيت گلبي تحجر منهم الي سوه بيه موقليل
اسألك سؤال بابا واذا جاوبتني باجر اني وابني يمك
كولي بنتي
شون كدرت تنام
شنوو قصدج

شون كدرت تنام وانت تعرف عندك بنيه مشموره بيت ناس ظلمه شون كدرت تنام وانت تعرف اكرم مراح يرحمني وراح يوميه يأذيني ضرب واهانات وتكسير شون كدرت تنام وعندك بنيه شمروها بالشارع واخذوا ابنها شون كدرت تنام وتدري صار سنتين ٢ ونص متعرف هي ميته عايشه سوت شى حرام ولد الحرام قشمروها شون غمضت عينك

بنتي والله افكر بيج ونار بگلبي عليج بس الله لايرحمها دعاء سوت هذا الشى ويه اكرم ومن شفت هانت عليج نفسج وسمعه اهلج اعتبرتج ميته

موج ..
بالضبط ميته والميت ميرجع ابو امير الميت ميرجع واني متت بنظرك وبنظر الكل لهذا انسوني مثل منسيتوني هاي السنين كله مفكرت شون انام اكل اعتدوا عليه اشتغلت بالحرام مفكرت شونه حالي ياابو امير طلبك مرفوض وبقي بنتك ميته لان الميت ميرجع الله وياك وسديت التلفون وكعدت بالكاااع ابجي بهستريا وعيااط اجتي خاله فاطمه تركض عليه
الحجيه .. بنيتي اسم الله كولي ياالله يمه الحمدلله ظهرت برائتج واهلج حسو بغلطهم المفروض تفرحين موو تبجين

موج .. خاله والله شفت المر كله الي صار بحياتي بسببهم كله زوجوني لواحد سكير ويعرفون بيه واحد ساقط ميخاف الله شون تنطون بتكم اله والله بحجه من يتزوج يتغير هو ذيل الچلب ينعدل وراها من ازوجت محطولي قدر ولا قيمه انضرب وانهان ويوميه مستشفى ويرجعوني ويااه ومن اشكيلهم هذا زوجج تحملي ولكم ليش اني موو بشر مخفتو عليه اخاف ضربه من الضربات يموتني لويسويلي عاها وابقى طول عمري بيها وحتى من اطلكت شفت المر خدمه واهانه وعركات وراها من تهموني وياها احط ايدي على القران ميصدكون يصدكون بواحد ميخاف الله ومصدكو بتهم ومن مات اتوسل بيهم اخذوني والله ياخاله بست رجلهم قبل ايدهم حتى ياخذوني وماانسى من دفعني ابويه برجليه وكال ماعندي بنيه يجي هسه يصيح بنتي رجعي

الحجيه .. يمه يبقون اهلج وعزوتج ميصير لازم يصير گلبج ابيض وانتي يرادلج ظهر وابنج من يكبر يرادله اهل ميصير يابنتي
موج .. وين جانوا عني واني متلطمه بالشوارع وابني بحضني بله كوليلي لوو الي ماخذتني حشه خاله ام منتظر اخذتني وحده متخاف الله موزينه وكعتني بمصيبه وشغلتني بشغلات تعبانه راح يكولون تعاي رجعي راح يكولون الي وصلت اله موج احنا سببه مستحيل اصلاً ولا راح يعبروني الشارع مصايب بيه وناس متحرم ومتخاف الله بس ربج ارحم من البشر دزلي ام منتظر ونقذني ومعافني لهذا ربي هوسندي وانتم اهلي وكفتولي بوقت انتم متعرفون اني منو وصدكتو بكل كلمه كلتها الي اهلي بالمقابل مصدكو ولا گٌلمه مني

الحجيه .. تعااي يمه واخذتها بحضني وهي تبجي وتشهك يعني متفكرين ترجعين
موج .. ابد مثل ماهمه اعتبروني متت بوقت محتاجيتهم اني هم اعتبرهم ماتو بس امي ومروه ابقى على تواصل وياهم
الحجيه .. براحتج بنيتي المهم كافي لتبجين
موج .. وبقوا ايام يتصلون وحتى امي حاولت تحجي بهذا الموضوع واني قافله
وبيوم اجتني الحجيه كالت ساعه وتعالي لبيتي رايدتج

مهدي .. هاا يمه دزيتي عليه
الحجيه .. تعال يمه وانت رسول هم اكعد
رسول .. خير حجيه احجي
الحجيه .. اني دزيت عليكم علمود ام علي
رسول .. بيها شى
الحجيه .. اسمعوا وصيتكم موج هاي مثل بنتي حبيتها وصارت لگلبي والله يشهد علي اعز من بناتي ماشفت منها غير كل طيب وصيتكم هاي المسكينه اخاف الله ياخذ امانته تبقى برگبتكم
مهدي .. يمه هو هذا حجي طولت العمر ان شاء الله

رسول .. اسم الله عليج يمه شعدنا غيرج
الحجيه .. ان طال العمر او گصر مصيرنا الموت وهذا امر ربكم بس اني خوفي على هلبنيه ولدها من الزمن ومن الناس
انت يمهيدي البت ردتها وماقبلت من اليوم تعاملها كأخت الك ولا تنظر ليها بغير الخوه
رسول .. هاااا ولك يلجبير العاقل ردت تتزوج على مرتك ههههه
مهدي .. ردتها بالحلال وحقي

الحجيه .. انلصم واسگت على اساس انت شونك
رسول .. يمه موتبت ماتنسين
الحجيه .. ولك يلأغم شنسى وحده اثنين ماعلينا هاي البنت اثنينكم اريدكم سند الها وعزوه وليدها عينكم عليه ونسوانكم الحيايه خلي يجوزن منها
رسول .. اني نوريه بعد ماتحجي
مهدي .. واني هم حجيت ويه سعاد وكتلها اطلكج اذا ادخلتي بيها

الحجيه .. جاااخوش وتكدرون تضبون لنسوانكم البرابيج
رسول .. يمه رحمه لأبويه ابوس ايدج على كيفج ويانه حاس روحي مو رجال من اكعد يمج تستلمينا غلط وفشار
الحجيه .. جااا انت لو زلمه حوك ماطلعتك مريتك ساحلتك مثل الطلي وعفت امك وحيدها
مهدي .. يمه عوفي هذا الحجي نرجع لموج
الحجيه .. اي نرجع اسمعوا عينكم عليها وتحاموها وماتقصرون وياها
رسول .. من عيونا بس ارضي علينا
الحجيه .. اذا طبقوا وصيتي احاللكم واواهبكم
مهدي .. تدللين حجيه
الحجيه .. مهيدي ابعد عيونك عن البت لاتجيب الحجي لروحك
مهدي .. اووف يايمه بس لوراضيه جان حطيتها على راسي
الحجيه .. البنيه وماتقبل صيروا اخوتها واهلها حاولو يرجعوها وماقبلت انتم راح تصيرون اهلها
رسول .. اني انصدمت من عرفت بشغلتها ليش ماكتولي من الاول .. بيج قصص غزوان علي
الحجيه .. جاخوش حتى تلعب لعب ليش مااعرفك عيونك فارغه عرفت بيها كرابتي وماكعدت راحه لو ماستر ربك لو تعرف غريبه شسوي
رسول .. يمه ابوس ايدج كافي والله تبت وحق موسى ابن جعفر تبت
الحجيه .. سلام الله عليه كون زين وتوب وتعقل هذا الكلام مااثني البت صارت برگبتكم وشرفكم
موج .. دكيت الباب اكدر ادخل خاله
الحجيه .. تعالي يمه ادخلي
السلام عليكم
وعليكم السلام
اكو شى وجوهكم متتفسر

اسمعي بنيتي انتي مارضيتي ترجعين لهلج رغم شكد حاولو وهذا حقج ومااجبرج عليه وتعرفين بعد هاي المده كلها صرتي بنتي
موج .. وانتي والله مثل امي
الحجيه .. شوفي حبوبه ذوله وليداتي راح يصيرون اخوتج وعزوتج وصيتهم عليج
موج .. ليش خاله وين رايحه
الحجيه .. مارايحه بنيتي بس هاي دنيه اليوم عدلين باجر يم وجهه ربج الكريم
موج .. اسم الله عليج فدوه لتحجين هيج اموت قهر
مثل ماكتلج ذوله اخوتج والمنطقه كلها تدري بيج انتي بنت خالتهم يمه انتي هسه شايله سمعة وليداتي واني اعرفج شريفة وعفيفه وماتطلع العيبه منج مثل ماهمه ظهرج وسندج اني هم اريدج دوم ترفعين راس اخوتج رسول ومهدي
موج .. والنعم منهم تاج على راسي ولتخافين خاله بعمري مااسوي شى يكسرهم
الحجيه .. اعرفج يمه ويمكن حتى اكثر من بناتي
موج .. رحت بستها وكتلها ينطيج طوله العمر
هاي المره لوانطيها مي عيني قليل بحقها ولدها فعلاً صارو الي نعم الاخوه

شهد .. صار ايام اريد اتصل على زيد ماكو گلبي نار وحتى عمي وغيث اثنينهم دخلوو انذار ويخابرون على اصدقاء زيد بالمقر وماعدهم اي خبر عنه
بدت الدنيا تظلم بعيني وحسيت بقيمه زيد وبديت افكر اذا صار بيه شى شون وضعي وجهالي منو الهم
هااا غيث فدووه طمني گلبي نار وخايفه
غيث .. كولي ياالله ان شاء الله ماكو شى
شهد .. حسيت روحي بعد ايام من المقاومه انهاريت وكمت ابجي وكل الموجودين عمي وعمتي واسيل ود وزوجها الكل يحاول يهديني عدا عمتي طبعاً تبجي وتعيط ويايه

ومنحس غير الباب اندكت ونسمع ولد يحجي ويه غيث متحملت وكعت من طولي

يتبع
هذا البارت تعويض عن التأخير وانتظروا البارت القادم ساعه ١١ مساءاً
تحيااتي اخوكم غزوان علي