رواية بين العقل و الطريق الفصل الثاني 2 - بقلم غزوان علي

بين العقل والطريق
بقلم غزوان علي

البارت الثاني

لقد دبّ الهوى لك في فؤادي
دبيب دم الحياة إلى عروقي

اسمي موج قبل مااعرفكم على قصتي اتمنى منكم متحكمون عليه قبل متسمعوها كلها
ويوم متحكمون عليه ياريت تستخدمون گلبكم قبل عقلكم لان قصتي حكمها الگلب  وهي الي حدد نهايتها  مو العقل اقلها من جانبي اني

اني من اسره متوسطة الحال عائلتي متكونه من والدي حجي عبد الله وهو صاحب محل اقمشة بسوگ شلال بمنطقة الشعب وامي ربت بيت  والدي الله رزقه بثنين ولد الجبير أمير والثاني بشار
وبعدها إتسطرنا اربع بنات امي تريد تخلف بعد ولد ماكو وصرنا اربع بنات ابوية جان يحبنا بس عنده الولد
اهم منا

أمير متزوج وعنده ٣ اطفال والدي  بناله الحديقة مشتمل وكعد هو وعائلته زوجتة بنت عمي حبابه بحالها مالها علاقه بكولشي حايره بزوجها واطفالها  والثاني بشار متزوج وعنده طفل واحد وعايش ويانه بالبيت وزوجته فد وحده حقودة ومسمومه ودوم ادور مشاكل ومتخبله شلون زوجة أمير بمشتمل وحدها وهي ويانه لهذا دوم تسوي مشاكل بس تخاف من ابويه من يجي للبيت تسكت واحنا منحجي لخاطر بشار لان نحبه وهو حنين ويانا لهذا نتجنب المشاكل وياها

جان مبدأ ابويه البنات لازم يتسترن وهن صغار حتى تصير براس رجلها ومتجيب العار او تسوي شى يأذي سمعه اهلها .. كروب قصص غزوان علي
لهذا اي وحده منا تجي قسمتها يزوجها ميفكر يسعدها لا اهم شى يكدر يوكلها ويشربها وعبالك الحياة عباره عن اكل وشرب يدخلنا مدرسه شوكت متجي قسمت البنيه يبطلها ويزوجها لهذا زوج اختي الجبيره بتول بعمر 17 سنه وبعدها انوار بعمر ١٩ سنه  اخر العنقود مروه بعدها ثاني متوسط اني ترتيبي بين خواتي الثالثه

جنت طالبه سادس اعدادي مستواي الدراسي جيد طلعت معدل 85 وفرحانه وگلت واخيراً راح احقق حلمي وادخل كليه والحلو بالموضوع مااجتني قسمه بحكم اني مااطلع بأستمرار وحتى امي من تروح تأدي واجبات مااطلع وياها حتى لحد يشوفني ويخطبني جنت دوم ادعي رب العالمين مااتزوج شأسوي من وره اهلي وعقليتهم ادعي حتى ادخل كليه ومن نجحت رفضوا اهلي دخولي وبجيت وقطعت الاكل واكثر وحده اذتني بهذا الموضوع زوجة بشار حقير مسمومه مو بيديها جان اسمها دعاء
وتحجي براس بشار شلون تدخل كليه وماعدنا بنات يدخلون اووو اشكال الحجي

بس زوجة أمير ادخلت وقنعت امير بنت عمي وحبابه وهي صديقتي اسمها وسن

ومن اقتنع امير كدر يقنع بابا وبشار بحجه بس تجيها قسمه تتزوج
واكيد شروط لا مكياج لبس محتشم جداً اصدقاء وزملاء وهاي الشغلات ماكو حتى بحفافه الوجهه ادخلو بكلشي حطوا نفسهم  ورضيت المهم ادخل

وداومت علوم حاسبات جامعه بغداد جانت الفرحه مسايعتني وكأني مالكه الدنيا جنت حيل حريصه بالكليه مااريد احد يلزم شى عليه خاصه دعاء ويبطلوني حتى من ارجع اكل وابدل واشتغل شغل البيت حتى ليتعاركون ويايه
خلصت المرحله الاولى وبأمتياز وفرحتي الدنيا متحمله بس شلون افرح كالت الدنيا اصبري اله اطلعها من خشمج 

وصدوك الفرحه متمت وتقدملي اكرم
ابو اكرم صديق ابويه دوم وياه بالسوك يزوره ويحبه صارلهم ٧ سنوات اصدقاء تعرفوا بالشورجه جان والدي يتسوك اقمشه لمحله واتعرف على ابو اكرم وجان ابو اكرم تاجر جبير بالشورجه والكل يحبه ويحترمه ويحسب اله الف حساب وصادق والدي لان شاف اخلاقه وانسان يخاف الله
رغم صداقه لأبويه مجان يعرف عنده بنات للزواج كل اعتقاده البنات  متزوجات وماعنده بعد بس مروه وصغيره

وبالصدفه سمع بشار يحاجي والدي عني بأن راح يجيبني من الكليه  لان الخط مأجاني ومباشره سأل عن عمري وعرف طالبه واخر ايام امتحاناتي وخطبني حتى بدون ميشوفني حلوه محلوه كل الي همه يزوج ابنه اكرم عسى ولعل يعقل لان جان مخبله سهرات وبنات وشرب كل اعتقاده من يزوج ابنه راح يصير آدمي
ونسى شى بأن الاعوج يبقى طول عمره اعوج وميتغير

صارت القسمه بدون حتى مياخذون رأي عدنا البنيه مالها رأي مصيرنا ومستقبلنا بيد اخوتي وابويه
وطبعاً اهلي طاروا من الفرح لان خوش قسمه وابن حجي ثابت (ابو اكرم) الي الكل تتمنى تناسبه وراح يعيشني بمنطقه راقيه وبمستوى زين وميعرفون بأن السعاده مو بالفلوس السعاده بالرضا والحب الي عمري معرفتهم ويه اكرم

اني مواصفاتي بشرتي حنطيه طولي ١٧٠ طويله وجسمي مربرب مو ضعيف لكن ويه طولي مناسب كوولش شعري طوله متوسط الطول لنصف ظهري سرح لونه جوزي اصبغه بين فتره وفتره  معاني جميله شكلي جميل مثل هواي بنات

اتزوجت اكرم وطلعت احلى عروس بوقتها وفرحانه رغم مشايفته ولا كعدت وياه كلها شهر هي خطوبه وعقد وزواج سريع سريع
وبيوم الزواج توترت مااعرف ولا احد علمني حتى خواتي المتزوجات سكتوا بس عندي معلومات بسيطه من صديقاتي بالدوام
تقرب مني اكرم بطريقة همجيه مرحم عمري ولا قلة خبرتي جان سكران وميدري بروحه حتى وصلت مرحله دخلت مستشفى بسبب ممارسته الهمجيه
وهاي اول دخولي للمستشفى واكيد الي تعيش ويه واحد مثله مستحيل تكون اخر مره تدخل..

عشت بيت بيه زوجي وابوه وامه

هو الولد الوحيد الهم وعدهم اثنين بنات متزوجات دنيا وصابرين
دنيا وماادراك مادنيا كله المشاكل والمصايب منها دوم تحرك امها عليه رغم عمتي ميحتاج احد يحركها عليه ماشاء الله عليها لو بيدها تحرگني من الكراهيه والحقد الي شايلتهم  شكد حاولت اكسبها شكد حاولت احسسها اني احبها ومستعده اسوي الي تريده بس ترضى عني وهي ابد قافله تموت مني ودوم تحرك اكرم عليه وتختار اوقات اتخبل حتى خووش تاخذ حقها مني
مثل لو عصبي وتشكيله لو سكران لو ضايج ارقى اوقات حتى من يلزمني خوش يضربني وتحس روحها اخذت حقها مني

رغم الله شاهد عليه حاولت بكل الطرق وميفيد تموت مني ودنيا وياها

بس الله ميكطع حشه لله عمي خوش انسان عكس عمتي تماماً يخاف الله وصايم مصلي والكل تحلف براسه بس الله بلاه بولد عاق وميخاف ولايعرف الله والمصيبه صار زوجي
وهو دوم عمي ويايه ويدافعلي ويوكف بوجه ابنه وبنته وزوجته كولش احبه مرات احس روحي احبه اكثر من ابويه من كثر ماحنين
وبنتهم صابرين هم حبابه ومالها علاقه ومتدخل بأي مشكله اصلاً مرات اسمعها تحجي على امها واختها لخاطري صابرين اكبر من دنيا الثانيه هي بعد اكرم

من كثر مضايقات عمتي اكعد الصبح احظر ريوك لخاطرها رغم اعرف هي متتريك بس هيج حرشه متكدر حركت اكرم عليه بحجه نايمه للظهر ومتسوي اكل واني اصلاً انام لل٩ او١٠ الصبح اقصى حد وخاصه ماكو شغل بالبيت ولا هوسه والبيت راقي وحلوو واني معتنيه بنظافته حتى بليل انظفه قبل ماانام في سبيل يبقى نظيف ومتلكه عمتي حجه تشكيني لأبنها ويضربني وشكد تخبث بهذا الموضوع بس عمي يسكتها ملكت حجه غير الريوك
عمي امري لله بس كون تكفيني شرها وكمت اكعد من ٨ الصبح اسويلها ريوك
بيج قصص غزوان علي
اني اعرف عمي الصبح يطلع ميبقى وماكو احد بالبيت الصبح بس اني وعمتي ومرات استاذ اكرم يتكرم عليه ويبات يمي لان اكثر الاوقات يبات بره

وبيوم كعدت ميته نعس وتعبانه ومشبعانه نوم بس مااكدر اطول اكثر لازم انزل اسوي ريوك ولان اعرف ماكو احد نزلت بدشداشه النوم وكوه امشي وممركزه ومااشوف غير ولد شاب كدامي وهو صافن عليه عطت مباشره كمز عليه سد حلكي اني من الخوف قطره دم مابيه كلت هذا هو راح يذبحني ومن عرفت جيراني بيت ابو زيد ابنهم غيث شطت وصرت نار وبديت اتعصب ومنتبهت شلابسه لحد ماعمتي نبهتني بس الي جذب انتباهي نظره الشاب ابد مو بريئه جريئه جداً محبيتها

وبعد هذا الموقف هم عمتي رادت تسوي مشكله بس همزين عمي ادخل وسكتها وعرفت هذا الولد راح يشتغل بيتنا نقوش وكذا اني مهتميت للموضوع بس حاولت اتجنبه لان محبيت نظرته

واول يوم مطلعت اصلاً من غرفتي لحد مكملو الشغل وشفتهم من الشباك راحوا يله نزلت
وثاني يوم نفس الشى بس حظي جبرني اطلع اكرم اتصل على ابوه ومحصله لهذا اتصل عليه وكال انزلي عليه ليش اخابره وميجاوب واني دااطلع وصار هذا الي اسمه غيث بوجهي انصدمت لابيه ادخل ولا اطلع والمسافه بينا قريبه مااعرف شلون صفنت بعيونه حسيت عيونه تحاجيني ليش دااحس بيهم ينادوني تعوذت من الشيطان بداخلي وحجيت ويااه

من رخصتك اخويه اريد اطلع
غيث .. هاااااا
موج .. شنوو هااا اريد اطلع ساد الطريق عليه
غيث .. العفو موو قصدي محتاجه شى
موج .. باوعت صفح عليه نعم شگلت
غيث .. اذا محتاجه شى من جوه كوليلي اني اجيبه الج لتنزلين
موج .. وليش شنوو ممنوع وشبيه مااجيب الي اريده احد كلك ايدي مكسوره

غيث .. على كيفج اعصابج افهميني
جوه عمال وطابين وطالعين واكيد راح يباوعون عليج ومااحب احد يباوعلج

موج .. تفاجأت على جرئته وانت منوو حتى تحب او متحب
غيث .. تحجي بخشم ويايه وعصبيه ولو بيدي احضنها واكولها ولج موبيدي تخبلت يمكن اغار عليج مااريد احد يشوفج
والله اني مو عاقل وحده مرتين شايفها اكوم اغار عليها
واني صافن جان تصدمني بكلامها

موج .. والله اني مااخاف من العمال اقلها العمال ناس غربه واتوقع كلشي منهم بس مال واحد جيران والمفروض حق الجار على الجاار وخاصه عمي مربي ويحبه ومأمنه على بيته يباووع وبعين وكحه هذا الي المفروض اخاف منه

غيث .. صرت عصبي شنوو قصدج
موج .. قصدي اتوقع فهمته وممكن توخر اخرتني
غيث .. وخرت منها ونزلت واني شبيت نار من كلامها ولو يمكن كلامها صح بس موبيدي احس روحي مثل الجاهل يرجف رجف على لعبه يريدها وغاليه وميكدر ياخذها

بعد كلام موج الي فكرت بيه وكلت حقها وكلامها صح عيب عليه مهما كان هذا بيت جاري وهم مثل الاهل ميصير اتعدى على عرضهم وخاصه اذا كالت لعمها عليه شنوو موقفي صعب بحقي وبحق اهلي وحاولت اتجنب النظر الها او ادور عليها اني اكدر مااطلع ويه العمال عادي بس اوجهم واعوفهم يشتغلون وكل مااقرر اليوم مااطلع تاخذني رجلي كوه لبيتها عبالك واحد منوم مغناطيسي
وادور عليها وارجع اصد عيني واكول اكعد راحه عيب وبس المح خيالها جسمي يرجف واباوع عبالك مثل المسحور بيها

افكر بيها ليل ونهار ومن اشوفهه بيتهم نظراتي تريد تفترسها وانسى نفسي وحتى الي يراقبني يعرف اني متواجد علمودها .
شفت موج طلعت من باب الغرفة وضليت صافن عليها ومااحس غير ام اكرم  اكول خاله انته جاي تشتغل لو تباوع على البيبان باوعتلهه وكلت بداخلي الله ياخذج هذا وكتج هسة . وكتلهه اي غير اباوع عليهن واخذ قياسهن حتى اشتغلهن كالت وهسة اخذت القياس كتلهه يعني موكولش يحتاج ادقق بعد
قبل مااختم بيت ابو اكرم بيوم سمعت بطريق الصدفة ام اكرم تكول لابو اكرم

ثابت تره هذا غيث ابن ابو زيد عوينجي يضل بس يباوع

ابو أكرم ..  يباوعلج معقوله ياانصاف  شنو يشوف منج اشو طولج نفس عرضج دعوفي الولد بحاله لو لازم تسوين مشكله وي ابن الناس انتي من زمان تكرهيهم وهو مالازك يمج بعد يوم يومين يخلص

أم اكرم ..  ميباوعلي يباوع لموج من اول يوم دخل للبيت وهو عينه صلفة ولايستحي حتى كتله اشو تباوع للبيبان يكول اي غير اخذ قياسهن

اي لعد شيكولج الولد حجه الصحيح ياخذ قياس حتى يشتغلهن . ضل ضل متنطي بي حتى لو صدوگ يباوع وتشوفه يباوع بعينك هم متهتم .
ابو اكرم .. انصاف اسمج صح انصاف بي ابد متنصفين الناس وحقهم ضايع عندج و اني اعرفج حاقدة على هاي الطفلة وتخلقين المشاكل وميمر يوم اذا متعيشيها برعب ولو مو جودي الله اليعلم جان هسة هي بياحال ..

أم اكرم .. اهوووو حصره حجيت شويه على ست الحسن اكلتني اكل
ابو أكرم .. ولج ياتحجين شوي كاعد اتهمين الولد بجنتج وتعيبين بأخلاقهم
وتكولين احجي انتي من گل عقلج اسكتي هذا الموضوع مااريد اسمعه افتهمتي وتعالي كوليلي احسن محايره بهاي المسكينه وتفكرين شتشوفين مصيبه جديده الها فكري بأبنج بوضعه

أم اكرم .. شبيه ابني اسم الله جنه العيد وهلاله بس انت جوز منه بس تفتر وراه عوفه يعيش حياته
ابو أكرم .. يعيش بالمحرمات شرب وقمار ونسوان صدوك انتي موعاقله مكان متحجين وياه وتكوليله خلي يترك هذا الطريق هذا مو ثوبنه ومحرمات شيكول لرب العالمين بعدين

أم اكرم .. غير من وره جنتك
ابو أكرم .. اتقي الله يامره موزين متحملته على سكاطه فوك سوالفه المكسره ميخلف وكاعده وساكته وحامده ربها

أم اكرم .. غصباً عليها هي وين تلكه مثل ابني وفوكاها عايشه بيت تحلم تعيش بيه وتاكل وتشرب وتلعب لعب ومرتاحه شتريد بعد بنت الفگر گـل هذا وهم الها عين وتحجي

ابو أكرم .. هسه المسكينه حاجيه انتي بس ابتعدي عنها وراعي الله وراج موت وحساب
أم اكرم .. هسه اني وين جنت احجي وانت وين فريتها
هسه شتكول ليش مطرده لغيث
ابو أكرم .. ولا كلمه زياده هذا الولد اشرف من ابنج العرگجي اقلها بار بأهله مومثل ابنج العاار والعاق
أم اكرم .. خلي اروح اكمل شغلي احسن
ابو أكرم .. هسه الي يسمعج يكول هي تشتغل لوما مسويتها خدامه .. كروب قصص غزوان علي
أم اكرم .. خلي اروح احسن

غيث .. ابتعدت بعد مسمعت كلامهم كله غير وحده حقيره متعرف شسوي حتى تأذي موج
كملت الشغل اخر يومين مشفتها وبقيت الوب شكد حاولت اشوفها ماكو
وكمل الشغل بقى شويه تصليح بسيط مياخذ مني ربع ساعه طلبت من العمال يعوفه حتى بعدين يصيرلي هذا الشغل حجه ادخل واشوفها
ومر اربع ايام ومحد اجه گلت يجوز ماشااف الحايط
خامس يوم المغرب اندك الباب اني بطبيعتي مااتواجد بالبيت بس هااي الكم يوم تواجدت بسبب موج تمنيت تطلع واشوفها وهي متطلع لباب البيت

بديت ايأس ان اشوفها لحد ماخامس يوم اندك الباب طلع حجي ثابت تكول عبالك شفت الفرج طرت من الفرح وكلي على الحايط ورحت ويااه للبيت بس لوبيدي اركض لبيتهم بس ادعي يـاارب اشوفها
وخاصه هاي الحجه الاخيره ماعندي بعد حجه ادخل لبيتهم

وخلت وادور عليها بكل زاويه وهي ماكو حسيت بضيق وضوجه حتى مابيه اشتغل رغم الشغل جداً بسيط
واني بأخر لحظه دااصيح للحجي حتى اطلع
وجان تصير مقابيلي بس شنوو اتفاجأت والصدمه سيطرت عليه واني اشوف التفاحه الي اتمنى نظره منها عيونها زركه وشفتها مشكوكه والوجهه تعبان مضروبه ضربه الرجال ميتحملها

موج .. طلعت المغرب دااشوف شأسوي عشا واني تعبانه جسمي يون عليه لان قبلها بيوم كتلني اكرم اجه سكران وخسران مبلغ جبير وبس كتله الى متى شوكت اتوب اتقي الله شو هذا سحب الحزام ودك عليه ويغلط ويفشر وعمي ياعيني عليه كسر الباب لحد مفتحه بس شنوو الفايده وجهي صار خريطه من الضرب
واني دااطلع وصار هذا غيث بوجهي الصدفه دووم تجمعني بيه بس هو فتح عيونه نزلت عيني ومشيت استحيت من نظراته مبين تفاجأ بوجهي ومشيت ومااحس غير سحب ايدي بقوه وجرني عليه

موج .. شبيك تخبلت
غيث .. شنوو هذا وجهج منو سوه هيج بيج احجي
موج .. وانت شعليك انت منو حتى تسألني او تنطي لنفسك حق تدخل بحياتي رجاءاً وخر مني ولتتعرضلي ابد

غيث .. لزمتها بقوه بأيدها عااطت
موج .. مكان مضروبه بيه بالحزام ومورم وهو لازمه بقوه متحملت لزمته عطت
ااااااخ اذيتني فدووه ايدي ايدي
غيث .. لتخبليني منو سوه بيج هيج شى والله ادفنه بأيدي
موج .. عوف ايدي اترجاك
غيث .. تركتها احجي
موج .. ويه زوجي
غيث .. انكسرت ايده هذا شحاسب نفسه لازم اوكفه عند حده
ومشيت عنها وصاير نار لو الزم اكرم ادفنه وهو عايش جان تلزمني بقوه
موج .. رجاءاًلتدخل وهاي حياتي ومالك علاقه بيه وانت عندك شغل هنا ياريت تكمله وتروح

غيث .. تقربت منها كولش وهي ترجع واني اتقرب لحد مصار جسمي وجسمها شبه متلاصقين وقربت وجهي من وجها
اسمعيني موج الي يلمس شعره منج وربج احركه واحرك عشيرته
موج .. على اي اساس بابا انت منو حتى تدخل بحياتي مااسمحلك كاافي تره صارت ماصخه
غيث .. همست قريت من اذنها
والي خلقج ياموج اله اخليج تحبيني
موج .. اكيد انت موو صاحي
غيث .. انتظري الموو صاحي شراح يسوي اله اخليج تبجين من حبي وكولي كالها غيث

موج .. صفنت عليه ودفعته بهدوء وكتله تحلم نسيت اني متزوجه
غيث .. لا منسيت والي متزوجته حيوان ومكانج مو يمه
موج .. مالك علاقه يااخي اتركني بحالي تره والله اكول لعمي عليك
غيث.. شسوين سوي بس بعد الي شفته هسه وحالتج ويه هذا الحقير مستحيل اتركج
موج .. اخويه رحمه لأهلك جوز مني اني مره متزوجه وعيب عليه اصلاً هسه واكفه يمك وانت هم اهلك خوش ناس واخلاق لتجيب الهم الكلام
غيث.. لو شتحجين مااتركج وبعد هاي هيه انسي غيث يطلع من حياتج وانتي موتكولين تحلم واني راح احلم واحقق الحلم وراح تشوفين
موج .. انت موطبيعي
غيث .. ليش مكتلج اني صدوك موو طبيعي وراح اخليج مثلي مجنونه
موج .. باوعت عليه مااعرف احساس غريب حسيته بكلامه الدافي بس استغفرت ربي وكتله
اتمنى تراعي الله بيه وتتذكر اني متزوجه
غيث .. لزمت شفايفها وكتلها اتحملي مده واخلصج منه وتكونين بين حضني

موج .. دفعت ايده وجسمي كله يرجف من لمسته وجرئته واخاف اصيح لتروح عمتي تسويها سالفه عدها حتى قابليه تذب تهمه عليه اخااف منها وحجيت بهدوء عسى هذا المخبل يعوفني بحالي

والله انت موطبيعي ومخبل ولازم يحبسوك
غيث .. اذا بحضنك راضي العمر كله انسجن موج .. تدري بروحك شكد جرئ عيب كاافي
ودفعته
غيث .. موووج
موج .. انداريت نعم
غيث .. اتنفسج
موج .. شنوووووووو
غيث .. راح تحسيها بس موهسه
موج .. رجفت من كلامه ونفسي صار سريع واحس ماكو هواا هذا شبيه من كل عقله
الله يشافيك
غيث .. اذا منج مااريد اشفى
موج .. مشيت عنه ودخلت المطبخ واشوف صابرين واكفه وسمعت كل الكلام اني هنا قطره دم مبقت بيه

يتبع ....