رواية بين العقل و الطريق الفصل الثاني والعشرون 22 - بقلم غزوان علي

بين العقل والطريق
للكاتب غزوان علي
البارت الثاني والعشرون

بارت طويل لعيونكم

كيف لاا شتاق اليك
وفي غيابك لا أعرف أين يكون المصير
يختنق كل ما في الكون رغم أنه كبير
لم أعد أرى شمس الصباح ولا القمر أراه ينير
كيف لا اشتاق أليك
وفي غيابك أبحث عنك في كل مكان
كل شي ساكن لا يتحرك كانه توقف الزمان
في غيابك اخاف كل شيئ ولا أشعر بالأمان
كيف لا أشتاق أليك
وقلبي يصرخ شوقــــــا أليك
ينادي أين أنت أحتــــــــــاج اليــــــــك💔

موج .. عطت
وجع شبيج تعيطين انتي منو وشسوين بيت امي
موج .. نصيت صوتي استحيت العفو اخويه اني موج اقاربكم

منين اقاربنا
موج .. اني بنت خاله حجيه فاطمه بنت خالديه
هااااا حجيه خالديه سامع عنها من امي اهلاً وسهلاً اختي عذريني تفاجأت اني اعرف امي وحدها ودوم اجي هيج وكت لان مرات احتاج غراض فوك ضامهم
موج .. لا بالعكس اني الي اعتذر لان فززتك
اني اسمي مهدي ابن الحجيه الجبير ابو رقيه
موج .. اهلاً وسهلاً بيك ابورقيه اني موج ام علاوي
مهدي .. وبيج اكثر اختي بس صوج الوالده غير تكول عدها خطار حتى واحد ياخذ احتياط ويرحب بيكم
موج .. صار ٣ ايام هنا والتهت الحجيه ويايه واكيد ملحكت تبلغكم
مهدي .. هذا بيتج واني اخوج شتحتاجين موجود انتي اكو احد وياج
موج .. رحمه الله والديك متقصر بس اني وابني علي صغير عمره سنه ونص

مهدي .. الله يحفظه الج وزوجج وين امج الحجيه خالديه
موج .. زوجي مسافر وامي انطتك عمرها الله يرحمها قبل مده لهذا من سافر رجلي اضطريت اجي هنا يم خاله مده واروح
مهدي .. عذريني على كثره اسئلتي بس مجرد ردت افتهم وهذا بيتج وبالوقت الي تريديه
موج .. تسلم متقصر من رخصتك
مهدي.. اني طالع وارجع باجر لأمي تصبحين على خير
موج .. وانت من اهل الخير
رحت للغرفه ارجف صح مبينت كدامه بس جنت بداخلي مرعوبه شخص مااعرفه ولا اعرف نفسيته اووف يادنيا شسويتي بيه مكان مااكون هسه بحضن اهلي وامي ذبيتيني بحضن الغربه

حضنت علي وللصبح نمت كعدت على طكطكه مال حجيه فاطمه تكعد من وكت من صلاة الفجر اني كعدت ساعه ٦ الصبح شبعانه نوم لان نايمه من وكت
صباح الخير خاله
هله يمه صبااح النور تعالي تريكي ويايه اضوج اكل وحدي
موج .. ليش مكعدتيني اسوي اني الريوك
مكافي يابنتي صار ٣ ايام بس تشتغلين گلبتي البيت جنه وريحته جنها الورد صدوك صار بيت مال اوادم مو مثل قبل عبالك مزبله . بيج قصص غزوان علي
موج .. واجبي خاله تدللين المهم ترتاحين
والله يايمه صح صار ٤ ايام انتي يمي بس والله ارتاحيت لوجودج صار حس بالبيت وكمت مااخاف من انام والبيت نظيف وفوك كل هذا الفصعون الصغير عليوي العب وياه اتونس عليه
موج .. والله ياخاله اني الي ارتاحيت من وكعت بيد ناس طيبه مثلج الحمدلله الله ميكطع بعبده

صدوك خاله البارحه اجه ابنج
الحجيه .. ياهو منهم
كال اسمه مهدي
هااا ابو رقيه يجوز عنده غريضات ياخذهن من فوك
موج .. اي هو هم كال هيج
هو طيب وحنين بس مريته ااااخ منها شيطان ومتركب بمره تلعب لعب گلبت الدنيا واشكال مشاكل سوت وتالي اله يطلعها منا وحدها بيت وطلعها وهم مخلص يوميه طلبات وجيب ماجيب

موج .. هوشيشتغل
مدرس انكليزي مال ابتدائيه ومعاون مدرسه ومريته كاعده بالبيت تعلف بالرواتب مالته وترجع ليوره لعبت بحاله لعب
موج .. الله يهديها من رخصتج اروح لعلاوي ارضعه
اجه الظهر مهدي وكعد يسولف ويه امه وكلتله نفس الكلام الي اتفقنا عليه مبين فقير ومؤدب هو رجال ثلاثيني يطلع عمره ٣٧ سنه طويل اسمر شكله حلوو جذاب طابع ملابسه عاديه اصلاً لابس اكبر من عمره جسمه متروس بس حلوو شى على شى حلو جعلته اخويه ومبين مثقف وهادئ ارتاحيت اله بس الي مرتاحيت دخول اخوه الاصغر رسول

هله يمه شونج
بعد وكت ولك صار ١٠ ايام ماكو وين جنت
رسول .. والله يايمه ملتهي بالشغل اركض على العيشه
دخلت بيدي الجاي داقدمه شو هذا فتح حلكه
رسول .. هاي الحلوه منين يمه
مهدي .. رسول استحي شويه
موج .. من رخصتكم
مهدي .. تعالي ام علي هذا موغريب هذا اخويه الصغير رسول ابو احمد
اهلاً وسهلاً اخويه
رسول .. مكتولي منو هاي
الحجيه .. هاي موج بنت خالديه بنت خالتي اجت يمي تعيش هلكم شهر بين ميرجع رجلها من السفر لان خالديه انطتك عمرها ماتت وماعدها احد كتلها تعاي يمه يمي اقلها تونسيني بوحدتي احسن من ولدي الي ربيت وتعبت وسويت زلم وانطيت على الحاظر للنسوان

رسول .. اهوو يمه رجعنا لنفس الموضوع
يعني مااجيج اله تلعبيها لروحي واطلع اركض اقلها هلمره اسكتي كدام خطارنا

موج .. من رخصتكم ابني يبجي
ودخلت للغرفه وسديت الباب وكعدت ويه علاووي
رسول .. اكول حجيه هاي شكد راح تبقى يمج
شلك دخل كاعده بيتك لو تاكل من جدرك
رسول .. لا بس بنيه شابه وحدها وتعرفين منطقتنا الغريبه ومالها زلمه تنوكل
مهدي .. بس انت اكعد راحه ومالك علاقه البنيه عرضنا والي يحجي عليها نكص راسه
رسول .. قابل اني شمسوي اكلتني وشربتني

مهدي .. شوف رسول هاي كدام امي احجي اني اعرف بيك عيونك زايغه على الرايحه والجايه بس هاي مواي وحده هاي كرابتنا وعرضنا واي شى محسوب علينا ديربالك تتقرب منها
الحجيه .. حتى اكص راسه وروح ابوي
رسول .. هاي شبيكم هو اني وصلت يمها
خلي اكوم احسن تلوميني ليش مااجي رايح

مهدي .. يمه هاي منو
الحجيه .. شبيك ابورقيه موكتلك يمه صاير تنسى
مهدي .. يمه اني موصغير وتقشمرين عليه ولتنسين اني شايف حجيه خالديه صح جان  عـمري بوقتها ١٢ سنه بس اتذكر وحتى اتذكر بناتها ومجان اكو وحده بيهم اسمها موج اصلاً اول مره اسمع اسمها

الحجيه .. اووف منك شون تتذكر
مهدي .. احجي يمه هاي منو مشيت الي حجته البارحه وسويت نفسي مصدكها حتى افتهم منج
الحجيه .. راح اكولك بس تحلف ماتكول لأحد
مهدي .. شايفتني طفل كدامج واحجي والمن احجي لمرتي حتى تنشرها بالمنطقه كلها شتدرين بيها
الحجيه .. شوكت الله يخلصك منها الحيه

مهدي .. احجي يمه شكيتي جبدي
وبدت تحجيلي كولشي وخالتي شون تجيبها من الشارع ومتعرفها مخافت عليج مكالت هاي وحدها تأذي اختي شمدرينا شمسويه

الحجيه .. والله ياوليدي اني البنيه شفتها فقيره والي عرفته هي ارمله وعيالها رادوا ياخذون الطفل منها اخذته وانهزمت بيه
مهدي .. شون ورطه هاي ومنو يكول كلامها صدوك يجوز بايكته
الحجيه .. لا مو شوفتنا كل المستمسكات مالتها ومال الطفل تعرف خالتك تقرا وتكتب وقرتهم

مهدي .. يوم الي اريده منج تصيحيها واتلهيها بشى اريد اشوف الاوراق بدون متدري واسأل عنها الدنيا متتأمن يوم اخاف ارهابيه حراميه كولشي يصير هي هاي طلعه من خالتي والله انتي وخالتي تلعبن لعب
الحجيه .. ولك البنيه مبينه مكسوره
مهدي .. قابل الارهابيه والحراميه تكولج اني هيج سويت اكيد تمثل مكسوره وفقيره ذني شياطين الف وجهه الهن يمه استرينا علينا مابينا حيل نتورط

الحجيه .. وهسه المطلوب
مهدي .. طلعيها من الغرفه وصعديها بحجه غراض شى بس اصور المستمسكات والعنوان بالموبايل واني اعرف شون اسأل عليها

الحجيه .. ولك خوفتني
مهدي .. يمه غير العالم متتأمن وانتن الله يسلمجن انتي وخالتي بكيفجن جيبن هذا وذاك
يله يمه استعجلي وراحت امي صعدتها فوك حتى ادور بالغراض طبيت دورت بغراضها لكيت المستمسكات صورتهن ورجعتهن ولكيت علبه فتحتها بيها ذهب گلبي لعب بالزايد لا هاي هيه بانت البشاير خلي اطلع قبل متجي
الحجيه .. هااا بشر صورتهن
مهدي .. اي وباجر طالع لبغداد الصبح
الحجيه .. جا شينومني للصبح
مهدي .. شكوو عليج يمه احنا قريبين يمج
الحجيه .. فلك طركم كله من وره نسوانكم المسودنات جان انتم هسه يمي
مهدي .. رايح يمه

موج .. كملت شغلي وصار الليل والحجيه نامت بس هلمره قفلت الباب ليش بيها شى يله براحتها خلف الله عليها لفتني اجي اكولها ليش تقفلين بابج
تمددت انااام اااااه ياليل شكد طويل شيخلصك واني مفاركه اعز الناس بقيت افكر بيه كلت يجوز هسه حاضنها ونايم ونسى موج بس لا غيث ميسويها اعرف بيه
اتذكرت التلفون مالتي خفت اشغله كلت اخاف يوصلولي عن طريقة بس محتاجه رقم مروه يـِارب مخزون بالجهاز مو بالشريحه يارب وفتحته وادور بالارقام اااي ياالله لكيته واخيراً بس شنو الفايده واني ماعندي سيم كارت اخابرها ومااكدر افتح الخط القديم لان اكيد هسه حركوا حرك عليه
اريد اطمن على امي گلبي نار عليها
رجعت التلفون بمكانه ونمت

كعدت ثاني يوم والحجيه وضعها كله متخربط احسها خاتله مني شبيها ياربي اخاف بعد متريدني بيتها اذا بقت هليومين على نفس الوضع اعوف البيت يجوز المره تنحرج تكولي طلعي بس وين اروح وين انطي وجهي بقيت طول اليوم اشتغل وملتهيه بعلاوي وبس افكر شون احصل شريحه اذا اطلع مااندل ولازم مستمسكاتي انطيهم نسخه واني مااريد انطيهم كولشي يصير اخاف احد يوصل لهاي المنطقه ويسأل ومر اليوم هدوء ونفس الشغله تكررت بالحجيه هم قفلت الباب يله نامت . كروب قصص غزوان علي
وبقيت ويه الليل اشكي همومي اله فتحت التلفون اكو كم رساله لغيث ضامتهم بالمسودات بديت اقراهم واقرا الغزل مالتها ااااه ياغيث لوتعرف شكد مشتاقه الك وشكد محتاجتك تمنيتك ويايه وتعيني على زماني الي لعب بيه بقيت اقرا اكثر من ١٠ مرات لكل رساله وصلت مرحله حفظتهم احس من اقراهم عبالك كاعد يمي ويسولف نمت وهو بالي وطيفه بالحلم يزورني ويجيني دوم تعبان ومهموم وساكت احجي ويااه ميحجي هاي اكثر من مره يتكرر الحلم عليه

كعدت مثل كل اليوم والروتين العادي مستمر واجه ابن الحجيه
مهدي .. السلام عليكم ام علي شونج
موج .. وعليكم السلام الحمدلله من رخصتكم عفتهم وطبيت
الحجيه .. هااا يامصخم وين عفتني ورحت
مهدي .. يمه شبيج تغلطين هو يوم واحد عفتج

الحجيه .. ولك لا ليلي ليل ولا نهاري نهار حتى الباب اقفله عليه اخاف منها احجيلي شسويت
مهدي .. رحت لمنطقتهم مكدرت اسأل عليها كلت اخاف مسويه مصيبه وتوكع براسي سالت عن رجلها وكتلهم صاحبي واختفى وحجولي قصته فد واحد سرسري وابو مشاكل ولو هو ميت بس سمعته ماشاء الله سابقته وبقيت استفسر بس حظي الحلو واني افتر وكعني بولد جان صاحبي بأيام الاعداديه ابن ام جاسم الخبازه تذكري
الحجيه .. منوو منهم الجبير الصغير
مهدي .. صلاح الصغير الي بعمري وسلمت عليه طلع جان يشتغل بمحلات الحجي ابو اكرم وحيل مدح بيه وكال خوش رجال لوما مرته وابنه الي دمروه وبديت اسحبه بالحجي لحد موصلنا لمرته تعرفين العمال تتصنط واكثر الحجي الي يصير يسمعوه وخاصه جان الحجي هواي يحجي ويه ابنه بالمحل علمود مرته وينصحه بس هو واحد شكو شغله طايح حظها مسويها شرب نسوان قمار
الحجيه .. عوذه منه خلي يقابل ربه شراح يكوله لااله الا الله كمل يمه

مهدي .. ومدحلي بأخلاقها وشون متحمله عيالها وكولشي حجالي حتى عن بوگتها لأبنها بس هو ميعرف ليش اهلها مدخلو بيها وعايفيها  وعمتها مشتكيه عليها بس الدعوه اعتقد راح تسقط لان هي امه وعادي اذا تاخذه بس عمتها ادور عليها مثل المخبله

الحجيه .. يعني البنت ماجذبت
مهدي .. لايمه مجذبت بالعكس شافت ضيم ويه رجلها محد تشوفه واتحملته
الحجيه .. الله يبشرك بالخير يمه جنت خايفه وانت وكعت گلبي وحتى جنت اقفل الغرفه عليه من الخوف
مهدي .. هههههههههه هو شكوو يمه كتلج اسأل واجي
الحجيه .. ولك انه مااخاف على البيت قابل هو قصر شعشوع لو الذهب والفلوس مطشره بس اخاف على نفسي اخاف تدري رحت تسأل وتجي وتكتلني بيدها
مهدي .. حجيه لتباوعين مسلسلات تركيه بعد
الحجيه .. كووم روح لبيتك هسه مريتك تگلب خلقتها الحلوه
مهدي .. ههههههههه والله ياامي عليج سوالف يله رايح

موج .. طبت الحجيه تضحك وجهه بشوش مثل اول يوم شفتها
هاا خاله رايده شى
الحجيه .. لا يمه رايدتج سالمه جيبي الولد العب ويااه اشتاقيتله
موج .. حجيه شبيج من البارحه وانتي وضعج موو تمام ويايه ضوجتج بشئ اذا متضايقه مني اروح
وين تروحين بنيتي بس جنت ضايجه لان ولدي يتأخرون علي يله يجون
موج .. مشاغل الحياه خاله تصير لتزعلين

الحجيه .. يابنيتي صعب تشوفين تعبج يروح
موج .. ليش تحجين هيج خاله
الحجيه .. شايفه هاي ايدي كل خط بيها صار من تعب وضيم ابوهم عافهم الي لحمه حمره اكبرهم مهدي عمره ١٠ سنين وعاف اربع جهال برگبتي وحملي ثگيل وعظم بني ادم ثگيل شكد يتحمل يوم دوم تالي جمعت العندي وذهباتي وبذاك الوكت الذهبات يجيبون خوش فلوس وانطاني عمي الله يرحمه فلوس منه واشتريت هذا البيت وجمعت جهالي واني شاطره بالخياط وگبل ماكو جاهز مثل هسه واخيط وابيع للعالم وسنه تجر سنه واني اكبر واعلم ومااخلي واحد منهم محتاج حتى من صاروا شباب

كالولي بطليهم خليهم يساعدوج ويشتغلون كتلهم ابد اذا مو كل واحد شهادته بيده رغم اني اميه لااقره ولا اكتب وكلهم كملو حتى البنيات مازوجتهن اله اخذن شهادتهن
وتالي يتزوجون ومن وره النسوان يعوفون امهم وحدهم هذا حك الربه والتعب ومسحت ايدي بهذا الحايط شوفي هذا المفطر

موج .. بس اني اشوف ابورقيه زين ويحبج ودوم يجيج
الحجيه .. ابورقيه كاسر ظهري طيب وحنين بس مرته ااااخ منها الحيه سعيدانه
موج .. اسمها سعيدانه
لا اسمها سعاد بس اني هيج اصيحها تنكط سم ولسان
موج .. لعد شون تزوجها
حظه الاسود غير عبالنا خوش بت طلعت نار وشرار خلفت اله ٣ بنيات وذيج الحيه الثانيه مرة رسول نوريه لانور الله وجهه خلفت ولد وبنت ودكت رجل اله تطلع بيت وحدها كام واشترالها ورانا بفرع تالي هاي مرة مهدي شافتها لو تخبلت ويوميه مشكله لحد ماخذته وطلعت وهم اشترالها بيت بنفس فرع بيت رسول وعافوني وحدي بس مهدي مغلوب على امره لان زوجته اذته وراد حتى يطلكها بس لخاطر البنات رجعها بس اضوج لان مايجيني يوميه
موج .. والبنات
الحجيه .. كل وحده ملتهيه برجلها وعيالها ام بغداد ماتجي غير كل ٦ اشهر كم يوم وتروح اما ذيج عايشه بأيران يمكن كل سنين ليش اكلج مسحت ايدي بالحايط

موج .. الله يساعدج خاله بس لتضوجين المهم همه سالمين وبخير
الحجيه .. الله جابج الي ونس
موج .. لا والله خاله اني الي رب العالمين رحمني ودزج بطريقي واله الله اعلم جان شصار بحالي
الحجيه .. ربج مايكطع بنتي البشر كاطع يله كومي سوينا لكمه من ايدج حبوبتج جاعت ورايه علاج
موج .. من عيووني

وره كم يوم كاعدين وجان يطبن اثنين نسوان وياهن جهال بوسن الحجيه بس هي استلمتهن رزايل
هاا ولجن المن اجيتن
سعاد.. ياعمه غير مشتاقيلج اجينه نشوفج
نوريه ..والله الج وحشه لوتعرفين شكد مشتاقين. الج
الحجيه .. جذابات
سعاد.. عمه شبيج ويانه هذا فوك متكولين هلا بيكم ومشتاقه الكم
الحجيه .. وليش اجذب قابل مثلجن تعرفن كلش زين اني مااشتاقيت وانتن هم بس اجيتن لان الفضول كتلجن
موج .. السلام عليكم
سعاد.. وعليكم السلام هله حبيبتي انتي موج مو
الحجيه .. ماشاء الله حتى الاسم عرفتنه والله والنعم خوش ربيت زلم الكلمه بحلك النسوان
نوريه .. عمه على كيفج ويانا استلمتينا حاصل فاصل غير كالو الولد حتى نجي نأدي الواجب وتعرف بضيفتنا
شونج خيه
موج .. الحمدلله تسلمين انتي ام احمد وانتي ام رقيه صح
سعاد.. ماشاء الله مباشره عرفتنا
الحجيه .. من وجوهجن المصخمه غير
سعاد.. خلف الله عليج عمه هيج تفشلينا كدام الخطار
موج .. اهلاً وسهلاً فرصه سعيده تعرفت بيكم من رخصتكم
نوريه .. تعالي خيه اكعدي ويانه خلي نشوفج نتعرف عليج
سعاد.. اي انصير صديقات خيات انتي زوجج وين
الحجيه .. روحي موج دخلي لأبنج
موج .. حاظر خاله من رخصتك
سعاد.. شنهي عمه شجاج هيج تلعبين بحالنه كدام الغريبه حتى ماسويتي كدر كدامها
الحجيه .. سمعن لجن اني اعرف اجيتن حتى تشوفنها البنيه متزوجه وعدها وليد وحيد اسمه علي ويصيحولها ام علي وزوجها مسافر وفتره ويدز عليها عندجن شى بعد تسألن عنه
نوريه .. والله ياعمه افتهمتينا غلط احنا كلنا نرحب بالخطار وبنفس الوقت نجي نشوفج
ونشوف صحتج شون صارت
الحجيه .. وهاي شفتوني وشفتو الخطار يله بيتك بيتك اخذن فروخجن وروحن
سعاد.. اطردينا
الحجيه .. شتفهميها فهميها يله كومن روحن لرجولتجن على جيه من الدوام يله مشكورات ماقصرتن

موج .. اسمعها شون تحجي وياهن متت ضحك والله ياخاله موهينه طلعتي موتتهن
وطلعت اضحك ليش هيج
الحجيه .. حيل بيهن ذني حيايه برابيج  ديربالج منهن لدغتهن والگبر اخاف عليج يمه منهن ذنه اجني يفحصنج يخافن على رجولتهن منج
موج .. مني اني ليش شمسويه
الحجيه .. مامسويه بنيتي بالعكس تاج راسهن انتي بس هاي عقليتهن بعد ابتعدي يمه منهن
موج .. صحيح لازم ابتعد

صار شهرين اني هنا حياتي هادئه مابيها مشاكل الحجيه صارت بمقام امي وردة تنحط على الجرح اطيب ونسوان ولدها كل ميجن تطردهن حتى مكامن ميجن يخافن منها
مهدي حباب خوش رجال ومؤدب وكلامه حلو وموزون بس اتعامل برسميه مهما كان رجال غريب عليه بس اخوه رسول ابد مااحب نظراته صح مابدر كلام منه بس ابد ماارتاحله

اسيل .. بقينا كم يوم اني وغيث واحد ميحجي ويه الثاني على كد سؤال جواب  بعد العركه الي صارت بسبب موج بديت اتعب وانقهر مره احس روحي اتجاوزت ويااه ومره احس اني حقي وضعت بين الاحساسين وهو يطب ويطلع ميباوع بوجهي وميطيق كلمه مني واذا متنازلت وحجيت معناه راح نبقى على هذا الوضع احتمال لأشهر لان اني تعلمت على طبع غيث عنده قابليه يبقى اشهر ميحجي ويايه وخاصه اذا اني الي غلطانه

اجه بليل وشرب الجاي وتمدد وانطاني ظهره تجرأت احجي غيث نايم لو كاعد

غيث .. خير محتاجه شى
اسيل .. اريد احجي وياك
غيث .. تعبان مابيه حيل احجي بسرعه
اسيل .. كمت ابجي والله اسفه موقصدي اتجاوز هاي مو اخلاقي
غيث .. داير ظهري واحجي وياها بس تجاوزتي
اسيل .. من حبي والله حس بيه غيث انت زوجي واحبك واغار عليك والغيره قاتله متخلي الوحده تسيطر على افعالها شتترجى مني واني اشوف زوجي والانسان الوحيد الي احبه طول عمري يحب غيري ويرجف عليها تريد اصفكلك لو اطبطب على ظهرك اكيد افقد اعصابي لازم تحسس بيه وتعذرني والله من هلكد مااحبك

غيث .. انداريت عليها كافي بجي موزين على صحتج
اسيل .. شون ماابجي وانت زعلان مني ومطيق كلمه مني اعتذر مااعيدها
غيث .. كعدت عدل تعالي تقربي واسمعي هذا الكلام زين وحطي بعقلج لان راح اكوله مره وحده ومااعيده

اسيل .. تفضل
غيث .. شوفي اول شى لازم تفهمي اني مخنتج
اسيل .. وموج وحبك الها
غيث .. خليني اكمل ولتقاطعيني
اسيل .. كمل . بيج قصص غزوان علي
غيث .. اني مخنتج انتي حقج لو جنت متزوجج وحبيتها اني حبيت موج قبلج وعرفتها قبلج وعشت وياها لحظات فرح وحزن قبلج شتتوقعين من اتزوجتيني گلبي فارغ مابيه احد تجين تتزوجين واحد متربطج بيه علاقه حب  ولا معرفه سابقه وتتوقعين گلبه فارغ ولازم ينملي بيج
يااسيل لكل انسان مشاعر وعلاقات بحياته ماممكن انسى كولشي ولا كأن اعرفها بيوم واكو شغله لازم تفهميها لوما رجوع موج لزوجها الي مااعرف سببه لهسه جان هسه هي زوجتي مو انتي

يعني هي مأخذتني منج ولا حتى حاولت تاخذني بالعكس هي انطتني الج وبسبب موقفي منها ومن رجوعها طلبت اتزوجج

الحق وياج لو متزوجين وعلاقه طيبه بينا وممقصره ويايه واجي احبها واسوي علاقه وياها بهاي اللحظه اكون خاين بس اني مخنتج اني جنت احبها گبلج ومستحيل اكدر بسهوله انساها اني مو جذاب اكدر اكولج نسيتها وانتهى كولشي واعيشج بوهم انتي عرفتي من اول يوم زواجنا واعتقد شفتي حالتي تتوقعين واحد يحب بهاي الطريقة ينسى بسهوله
اسيل .. واني
غيث .. اني مقصرت وياج بشى اكدر اصير مثل اي رجال واكو بالالاف يتعامل ويه مرته عبالك قطعه اثاث بالبيت لو خدامه توفر متطلباته وتربيله جهاله وغصب عنج اخذ حقوقي الزوجيه كامله وترضين وانتي الممنونه بس مكدرت اظلمج مشاعري تجاه موج مشكلتي اني مردت اعيشج حياه كلها اهمال وقله حب لان احب غيرج اكدر اعتبرج انسانه لاتقدم ولا تأخر بحياتي اسمها مره بالبيت تخدمني مكدرت اظلمج وكتمت مشاعري تجاه الانسانه الي احبها وتقربت منج وفرتلج الحياه الكريمه وهذا واجبي تجاهج انتي انسانه طيبه وخلوقه وهم حبيتج والله

اسيل .. شون تحبني وتحبها
غيث .. حبيت طيبة گلبج واخلاقج وحبج اليه واهتمامج واني هذا كله اكدر اتعامل ويااه بعدم مبالاه بس مكدرت كلت ليش اظلمها والي تريديه ديجرالج حتى بأول فترات زواجنا من صارت عركت شهد رغم مجنت اعرفج زين وشهد صار سنين ويانا واعرفها حتى اكثر منج من تجاوزت وتهمتج بالبوگه مسكتت الها ولو متجاوزه بعد جان ضربتها وربج المهم محد يمس كرامتج اني مو حقير ولا مااخاف الله

اسيل .. اعرف والله ممقصر 😔
غيث .. اني مابيوم ضربتج ولا تجاوزت عليج وعاملتج بما يرضي الله ومن ضربتج لان تجاوزتي وحتى من منعتج من اهلج السبب تعرفي كلش زين

اسيل .. لا مااعرف ومتجرأت اسأل
غيث .. بسبب اخوج الي سواه امين موهين تدرين جان انسجنت وانحكم بسببه اقل شى ١٥ سنه ورطني ويه ناس گبار وضيع عليه صفقات بالملايين واشهر يبوگ مني جان ضيع مستقبلي ورغم هذا من گلي عليج رحت سألت والكل حمدلي بأخلاقج بس الي محبيته اضافه لأمين زوجته الكل تحجي عليها وعلى اخلاقها التعبانه والسانها السليط محبيت تصير مشاكل بحياتنا وخاصه هيج وحده مستحيل تشوفج مرتاحه وتكعد راحه عنج اكيد راح تحاول بألف طريقة تهجم بيتج اني بعدتج وبعدت نفسي عن المصايب وعن ناس حراميه
لتنقهرين من احجي هيج ولا دااعيرج هذا واقع اسيل
اسيل .. خجلت كولش وابجي بهدوء ومدنجه
اني من داحجي واكولج ليش هيج اتصرف تره لمصلحتج ولمصلحت حياتنا
اسيل .. وموج
غيث .. موج حالتها غير حاله موج انسانه حبيتها وتبقى بگلبي بس بنفس الوقت انتي زوجتي وام طفلي واحبج واحترمج وعمري مااذيج اله بحاله تتجاوزين عليه

اسيل .. بس اني مااتحمل اشوفك تحبها واتعامل كأن الوضع طبيعي
غيث .. اني ماالومج انتي تحبيني وتغارين عليه وهذا الشى يفرحني ميزعلني بس مااحب تجاوزج انتي عاقله واريد دوم تبقين عاقله

اسيل .. بس انت طلبتها للزواج ولوما هي راحت جان اتزوجتها

غيث .. اي فعلاً طلبتها للزواج وهذا من حقي ممسوي شى غلط ولا حرام
اسيل .. مفكرت بيه مكلت شنو موقفها

غيث .. مفكرت ولا راح افكر تعرفين ليش لان اعرف راح توافقين يجوز تضوجين تنهارين بالبدايه بس راح ارضيج اني وبعز ازمتي وجرحي من موج مأذيتج ولا ظلمتج ولا حسستج اني مجروح وتعبان وجنت اتعامل وياج بمنتهى الهدوء والاهتمام اجي وقت مااتزوجها اعاملج بتقصير واذيه انتي افهمي شغله موج موجوده بحياتي قبلج يابنت الناس بس افهميني لتخليني اعيد كل شويه نفس الحچي  لتعيشين نفسج دور المخدوعه الي رجلها خانها وراد يتزوج عليها هاي الانسانه قبلج وجان المفروض هسه هي زوجتي بس القسمه والحظ لعب دوره وصرتي انتي زوجتي حاولي تهدأين وتفكرين بكلامي

اسيل .. احاول وانت هم حاول تنساها
غيث .. ولو هذا الحجي يضوجج بس كتلج راح احجي مره ومااعيده ولازم تفهمين كله نقطه اكولها
اني احبج وتبقين زوجتي واحترمج واعاملج بحب ومااحسسج بقصور وهذا وعد بس حبي لموج خط احمر الي والج تعرفين ليش الي هم
اسيل .. ليش
غيث .. لان حاولت وفشلت هاي الانسانه اول حب بحياتي والها مشاعر خاصه وحبيتها بطريقة هم غريبه وخاصه اله من اموت يله تروح
اسيل .. اسم الله كافي فدوه داموت قهر واني اسمعك هيج تحبها

غيث .. هذا الموضوع مينفتح ابد خلينا عايشين بهدوء والي اكدر اسوي بأن مااظهر كدامج اي شى يخصها ولا احسسج بمشاعري تجاهه انتي انسيها گلبي انسيها ولا تفكرين بيها تعاالي بحضني
اسيل .. شمرت نفسي بحضنه والله احبك
غيث .. اني هم احبج ارجعي اسوله الهادئه ام گلب الطيب محتاجج حيل مااريد يزيد همي فوك ماهو جبير
اسيل .. بقيت بحضنه وهو نام وبقيت صافنه عليه حسدت موج على حبه الها هو صحيح ممقصر ويايه ولا أذاني بيوم بس مدااتحمل فكرة گلبه تشاركني بيه وحده صح هي اختفت بس شنو الفايده وهو هيج يحبها 

اسيل .. رجع الهدوء لحياتي اني بداخلي افكر واتعب بس اتعامل طبيعي وهو كذلك اعرف بداخله نار عليها وكاعد يدور عليها بس ميحسسني يتعامل طبيعي او بالاحرى يمثل هو طبيعي رجع الهدوء بحياتنا وخاصه بعد ماانتهت قضيه ام اكرم وبلاغها لان الشرطه حققت وملكت شى ضدنا وخاصه هي امه واخذته مو وحده غريبه وام اكرم مماخذه الوصايه منها على الطفل حتى تملك حق حضانته لهذا بمرور الوقت سقطت الدعوه بس هي مسكتت جانت يومياً تجينا هداده حتى كم مره رزلها عمي ومره راد يضربها غيث من اعصابه كامت تخاف ومتجي البيت عم الهدوء بيه بس تحس الكل يفكر ناكل نشرب سوه بس عقولنا مو براسنا
اجه عاصم زوج اختهم وانطاهم الجهال راد يسافر كم يوم ويخاف عليهم لهذا بقاهم يم ام زيد هي أمن وحده عليهم وخاصه يومياً تخابر عليهم وتكول ذوله من ريحه المرحومه بس عاصم ميدخل للبيت ولا اي واحد يستقبله يوصل الجهال للباب ويروح

بقيت التهي بالجهال حلوين وهادئين ولو من يصير وياهم جهال شهد تصير هوسه بس يونسون اني هسه بشهري مبقت ايام ويجي الي راح ينورلي حياتي اتمنى من يجي يكدر يرجع الضحكه والراحه لغيث الي راحت منه من يوم مراحت موج

بليل وحسيت بألم غيث كوم عفيه غيث اكعد
غيث .. اسم الله بيج شى گلبي احجي
اسيل .. دااتألم يمكن دااجيب كووم فدوه
غيث .. طفرت من مكاني وصحت امي وشهد واني ارجف عليها واركض منا ومنا
اسيل .. مدااتحمل الحكولي دااموت
غيث .. يله گلبي على كيفج
اسيل .. مااكدر امشي مااكدر
خلي اشيلجً على كيفي وشلتها وقلت عليها دخلنا لصاله العمليات وگلبي نار عليها
الدكتوره وضعها خطر صار عدها نزيف نريد دم بسرعه

غيث .. على لحظه حسيت راح اخسرها انهاريت واني مااعرف شون اصرف
ابو زيد.. ابني على كيفك هسه تكوم بالسلامه ادعيلها
غيث .. بابا خايف عليها وضعها ميطمن
ابو زيد.. لا ان شاء الله ترجع بالسلامه

موجنها طولت
ام زيد.. شبيك أبني قابل تريده بنفس الدقيقة اصبر وجان تطلع الممرضه الحمدلله اجاك ولد بالخير يتربى بعزك والام اسيل بشريني صحتها شونها

الحمدلله اثنينهم بخير

فرحت وشكرت رب العالمين على كرمه دمعت عيوني وطلعت بره بحديقة المستشفى واباوع الفجر راح يطلع وريحه الاشجار طيبه والهوا بارد وهدوء  شفتي صرت اب جنت اتمنى اول طفل يكون منج بس  الْحٍمدلله على كل حال وينج تعالي محتاجج كولش وين رحتي وعفتيني وين

ودخلت على اسيل وتحمدت الها بالسلامه
اسيل .. فرحان غيث
غيث .. اكيد گلبي غير ابني واول فرحتي بست راسها الله يخليج اليه انت ويااه

صار ٥ اشهر اني هنا وبدت الفلوس تخلص عندي اني من اجيت ويه ام منتظر بعت بت واحد من بتوت صابرين وجاب ٥٠٠ الف وطول هاي الاشهر اصرف بيهم اقتصد شكد مااكدر مجنت اشتري شى اهم شى عندي حليب وحفاظات ابني وجنت اساهم بشى بسيط بالاكل رغم كم مره الحجيه متقبل وتگلب الدنيا خطيه تريد هي تصرف علينا بس اني مااقبل فوك ما المره فاتحه بيتها النه باوعت لازم ابيع الذهب مالتي بس الى متى هم يجي وقت وينصرف وبعدين بله صار شى علينا تمرض ابني لاسامح الله منين اجيب فلوس ابيع الذهب واصرفه اكل وشرب لازم الكالي حل بحيث مااتقرب من الذهب واعوفه ذخر للزمن الي مااعرف شضام الي

خاله اريد تعلميني الخياطه
ليش يمه محتاجه اخيطلج شى صح مااشوف زين بس انتي بس الضمي الابره ومالج علاقه بالباقي
موج .. لا اريد اتعلم حتى اشتغل واصرف على نفسي وابني
يابنتي شنو العناد الي انتي بيه موكتلج اني تقاعد المرحوم موجود وكافي وزايد ليش اتشلعين گلبي
موج .. فدوه خاله اذا تريدين راحتي علميني اقلها باب رزق الي لازم اكون نفسي الى متى ابقى هيج
السلام عليكم
هله يمه تعال
موج .. وعليكم السلام شونك ابورقيه يارب بخير
مهدي .. الحمدلله انتي شونج علاوي البطل شونه
موج .. الحمدلله يبوس ايدك يله من رخصتكم
مهدي .. شنو اذا حضرت الشياطين ذهبت الملائكه
موج .. لا العفو ابورقيه بس حتى تاخذون راحتكم
تعالي يمه قابل انتي غريبه لو تستحين من اخوج همزين الله جابك
مهدي .. خير يوم أمريني محتاجه شى انتي ام علاوي محتاجه شى عيوني الكم
موج .. سالمه عيونك
الحجيه .. ام علي تريد تشتغل ومتقبل اصرف عليها
مهدي .. تره ماكو فرق هي غير خالتج
موج .. لا تسلم خلف الله عليها مقصرت
الحجيه .. وتريد اعلمها خياطه وانت تعرف المنطقه كلها تخيط متفيدج
موج .. لعد شون لازم الكه باب رزق
مهدي .. انتي شمخلصه دراسه
موج .. علوم حاسبات جامعه بغداد

مهدي .. ماشاء الله ممتاز اذا هيج بلكت الكالج تعيين عدنا بالمدرسه
موج .. طرت من الفرحه يااريت تسوي فضل عمري ماانسااه الك
مهدي .. واذا مرهم تعيين عقد ميخالف
موج .. اي شى المهم اشتغل و ارتب وضعي
مهدي .. ان شاء الله اسعى بيها تدللين
موج .. تسلم ابورقيه كاعد اتعبك ويايه وخاصه هاي الاشهر كلها انت كاعد تتسوك طلباتي
مهدي .. لتحجين هيج شكم ام علاوي عدنا تأمريني
موج .. استحيت من كلامه حسيت بيه نوع من الاعجاب مبطن لهذا ترخصت وكمت اني مشفت شى سئ منه بالعكس انسان جداً محترم بس صار فتره كثرت جياته ودوم اله يسأل عني واني استحي مااكدر اتواجد ويااه بنفس المكان مده طويله لان طول مااني كاعده احس عيونه متنزل عن عيوني

الحجيه .. مهيدي ابوو رقيه ولك مهدي
مهدي .. هاايوم شبيج تعيطين دااسمعج
الحجيه .. جاا اذا تسمع ليش متجاوب لو تضل عيونك هيج طايره وراها . كروب قصص غزوان علي
مهدي .. هااا طايره وره منو
الحجيه .. وره الحمامه اكوو غيرها موج
مهدي .. هاايوم بدينا راح تشتغل بساميرج
الحجيه .. شوف ياتربات ايدي مال تقنعني انت محاط عينك عليها افكسها هسه لعيونك لان تجذب
كولي شنو نيتك وياها انت عاقل ومثقف ودوم عينك مليانه اصلاً تستحي تباوع على وحده شمعنه هاي صار فتره تاكلها بالسلام والنظرات
مهدي .. والله ياحجيه انتي ماتفوتج فوته
كوولي شنو الي بالك ياابن بطني
مهدي .. ماادري يمه من اشوفها گلبي يفرفح عليها عبالك اعرفها صار سنين وحيل يعجبني ثگلها وهدوئها شفتي طول هاي المده شكد ادخل ماشفتها لابسه ضيك ولا نازعه ربطه رغم وحدكم وعدها عزة نفس شفتي فلس متقبل تصرفين عليها كولش تعجبني وحلوه وام بيت شون ماانعجب بيها ودوم ملابسها مستوره

الحجيه .. لان اخوك الشفيه يدخل صاير غفل بدون حتى مايدك الباب والبنت استحت وكامت متنزع الربطه تخاف يجي وماماخذه احتياطها تعرف عيونه بعد ماتمليها بس التراب اصلاً من هو هنا ولا اتحرك من يمه واخاف عليها
مهدي .. خلي يوصل يمها غير احط طلقه براسه
الحجيه .. خوش خوش هاي تالي عمري وليداتي يتعاركون على مره غريبه ويذابحون
انتي تعرفين ابنج دوم يسوي مشاكل
الحجيه .. اوف طالعه على عمه عينه فارغه يموت على النسوان بس البنيه ثكيله وابد ماتنطي مجال الشاهد الله
لهذا عجبتني يمه
ولك وشتريد منها
مهدي .. اتزوجها
الحجيه .. ومريتك سعيدانه
مهدي .. شعليها هي بيت وموج بيت
الحجيه .. تكدر الها لهاي الحيه غير تحطلك سم بالاكل وتگتلك خلاص
مهدي .. اني احلها يمه بس كون هي تقبل
الحجيه .. يوم عيد وهنا وتصير موج جنتي اقلها تبقى يمي احسن من مرتك العوبه

مهدي .. مراح افتح الموضوع هسه حتى لتكول يسوي شى مقابيل شى خلي احاول الكالها عقد بالمدرسه يمنا واداوم وتستقر واحجي وياها بس انتي كولشي لتحجين
الحجيه .. بس لازم تكولها كولشي تعرف عنها لان هي عبالها انت تعرف بيها متزوجه
مهدي ..احجي كولشي من اتقدم الها

الحجيه .. يمه موج وينج
هااا خاله
اني رايحه لأم سعد بنتها جابت ورايحه اوجب وياها وراها اروح لخالتج صبريه اشوف شون صارت صحتها واجيج خوش مااتأخر يمه تعالي سدي الباب وراي
موج .. الله وياج خاله
بديت الملم العاب الي مطشره مال علاوي حجيه فاطمه من تلعب وياه اله اطشر الالعاب وتلعب هههههه منظرهم حلو

دالم بالغراض ومااحس غير واحد ورايه فزيت
رسول .. على كيفج شفتي بعبع
موج .. هلا ابو احمد خالتي مو هنا
رسول .. اي ادري مو هنا شفتها من طلعت
موج .. خير محتاج شى واذا تريد تنتظرها براحتك دامشي واعوفه جان يجرني من ايدي
تعالي وين رايحه
عوف ايدي رجاءاً شون تمدها هيج تخبلت لان لزمني

رسول .. انتي بدون رجال صار مده طويله متريدين اريحج
موج .. استحي على نفسك رجال شكبرك تتحارش اطلع بره ومن تجي الحجيه اله اكلها عليك
جان يجرني حيل
وتقرب يريد يبوسني
رسول .. تدرين انتي شنو عسل وحرام واحد ميضوكج وشكد احاول اتقرب منج وتتهزمين اليوم خوش فرصه وين ترحين مني

موج .. جان ادفعه واضربه راشدي استحي على نفسك حقير
رسول .. ولج انتي تضربيني تعالي اليوم اله املخج
وداركض جان يجرني واعيط سد حلكي اتذكرت همجيه اكرم والي جان يسوي بيه بقيت ابجي واعيط وعلاوي كعد من النوم ويعيط تهسترت مااريده يلزمني ادفع بيه بكل قوتي نومني بالكاع ونام فوگي بقوه واني ابجي واتوسل بس ميسمع لان ايد ساد حلكي وايد لازم ايدي وادفر بيه جان يهد الي لازم ايدي وشك الدشداشه وديطلع صدري وجان حيل اضربه بالمنطقة الحساسة برجلي شاغت روحه وطفرت من جوواه لحظات مرعبه وخوف من الاغتصاب من واحد حقير ونذل حسيت بخوف وعلى لحظه گلبي يوكف هي كلها دقايق بس احسها كابوس مرعب ربي دخيلك كله ولا شرفي لزم رجلي وكعني على راسي وسحلني جان اكو ماعون مال فاكهه بالكاع جانت خالتي تاكل هي وعلي بعدني مشايله من حلات روحي شلته ورگعته براسه بكل قوتي وهو ثگيل جان يوكع رسول والدم ترس الگاع

يتبع ....