رواية بين الفقر والطغيان الفصل الحادي عشر 11 - بقلم رونق

مساء الخير ع اجمل متابعين اتمنى لكم قراءه ممتعه

🌹🦋 البارت 11 🦋🌹

🌹🦋 بين الفقر والطغيان 🦋🌹

🌹🦋 للكاتبه رونق 🦋🌹

رحنه للمطبخ نركض

وجان نلكيها ترجف

شكو شبيج

هاي فاره تفتر بالمطبخ وصعدت ع رجل نظوري

اني عيوني صارن بكصتي

يعني هاي من كل عقلها هيج تسوي

لج كلبه حقيره عبالي الطباخ انفجر عليج حتى نخلص منج

زينب : هواي كاعد يحسسني بالاهانه حيدر

ابد محبيت شخصيته

مغرور بشكل واناني

وشايف نفسه شوفه

عبالك فد شي هو كله ظابط 😏😏

بس الظاهر همه نفس الطبع هو ومروان

عكس محمد وامير حيل مثقفين

رغم دكاتره بس بسيطين

من طلب مني اجيبله جاي حار

صعدت جبت ترمز نضوري

وفورت مي وخليته بالترمز وخليت فوكا الجاي والهيل

من نروح للزياره هيج اخدره للجاي يصير طيب حيل

دزيته اله وجان يفور

الحمد لله معترض علي

بس بده يسمعني حجي يسمم البدن

طلب مني اسده الباب

اني خفت الصراحه اخاف يسويلي شي

واخجل من الولد خاف عبالهم اني الي اذب نفسي كوه علي

اصعب موقف خلاني بي

من طلب مني اذب الاسود وبنفس الوقت ملازم البس ذني الجابنهن البنات

حرت شاسوي

اخر شي رحت لخاله

طلبت منها دشداشه كالت ليش معجبنج

لاوالله خاله كلش حلوات

بس اللوانهن صارخه واني استحي

مااكدر البسهن كدام الولد وبعدني ممتعوده عليهم

راحت للغرفه وره شويه جايبتلي 3 گلتلي ذني جدد مملبوسات ابد

البسيهن لمن اجيبلج غيرهن

حيل فرحت

اتشكرت منها

رحت ولبستهن شفتهن عريضات عليه ومستورات

واللوانهن عاقلات

فعلا سبحت ونزعته للاسود

خبرت ماما وكتلها حيل فرحت

لان جانت دائما تحجي عليه

البنات مقبلن عليه

كللي لج لتصيرين عوبه

طالعه جنج بيبي

البسي وعيشي حياتج

والله اذا ميكوم حيدر يتوسل بيج شوفي

والله اني مااريد حيدر يتوسل بيه

مااريده وحيل اخاف منه

اريده بس فتره ويطلكني

شوف الثوله لعد انت متعرفين حيدر زين

مستحيل يطلكج ويخليج تاخذين ابنج

اذا طلكج معناها ياخذ نظوري منج

لو اموت مااتخلى عن ابني

لعد اكسبي لزوجج احسن

لان اذا بقيتي هيج تبتعدين عنه

راح يشد وياج اكثر

مو مهم اتحمل اهم شي ابقى يم ابني

بقينه سهرانين هواي افرح من يجن

نمت وكعدت الصبح

وجان يوم جمعه

لازم اجهز الغده

لكيت عمو جايب سمك

جهزته وخليته بالفرن

وسويت ويا تمن  وطرشي وخبز حار 

الكول كعد يتغده سوه اله الغثه همزين

اني لحد الان استحي منهم

مااكل وياهم اطلع حجتي بابني

اني مااحب السمك ابد

كلتلي خاله جيبيلي مواعين اعزل الج ولحيدر

كتلها خاله اني مااحب السمك ابد

لتخليلي من اجوع اني اسوي غده

بقه عمو يحجي عليه

لج بابا هاي شبيج لتنسين انت مرضع

ميصير هذا لا وهذا مااحبه

عليمن عايشه متكليلي

والله عمو لحد الان مماكله السمك

ابد مااحبه

ع راحتج بابا

عزلت خاله لحيدر

كلتلي ديري بالج تنطين الاكل بارد لحيدر يتخبل

همزين كلتلي

صعدت لغرفتي ارتاح نام ابني ونمت ويا

بعدين اجتي نور خطيه عدها واجبات اله اني ارتب الدفاتر يله تكتب

بعدني هستوني بديت ارتبهن

اجاني مسج منه

ع مود غدا

حميت التمت والسمك خليته اله بالمايكرو

حميت الخبزه اله وجهزت كلشي

خليته كدامه

كلي عفيه بالشطوره

طبعا مااعرف لويش حيل انرعب منه

ماارتاحله ابد

كملت كلشي وصعدت قريت نور وكتبتها

طبعا نور مطيعه بشكل وهادئه

بس جانت يمكن ماكو احد الي يوجها صحيح

مفتقده جانت لحنان الام

لحد الان معرفت لويش مطلكين امها وابوها

بس اكيد خطيه هجت من ظلمه وقسوته

للعصر نزلت وي البنات

اجه هو مبدل ومخلي عطر يمكن المنطقه كليتها تشتمه

شدعوه هيج يمكن شيشة العطر كلها مخليها

كال لتنتظروني

بس قبل ليطلع حجت خاله ويا

والله مااعرف بيهم يردون يطلعون

اني من جنت عند اهلي مااحب الطلعه ابد ولا احب الاماكن المزدحمه

احب الهدوء والاماكن الهادئه

هسه مو بس مااحب الطلعه

لا مستحيل افكر اطلع

مو لان هو ميقبل

بس مااكدر اطلع مبوشه واصلا مااعرف اشيله لابني واني مبوشه

وثانيه وبعد نفسيتي زفت

ماالي واهس لكلشي

اشو هذا تخبل مقبل وعباله اني الي اريد اطلع

البنات ضاجن عليه وكالن منروح

كتلهن والله اني مااريد اطلع

روحن اطلعن ماعليجن بيه

مقبلن بس اني اتوسلت بيهن وراحوا

بقيت بوحدي صعدت بغرفتي

نمت من وقت

محسيت بيهم من اجوي

وثاني يوم كعدت جهزت الغده

الكل يمدح باكلي وهذا الشي فرحني حيل

روحي وعقلي بالمطبخ

يعني شغل المطبخ غسل المواعين وترتيبه للمطبخ وتجهيز الاكل

فميهمني الطبخ ابد

جهزتلهم الغده

هالمره امير ماهو بعده نايم

كعدت اتغديت وياهم

بعدها كالن البنات خل نروح لمركز التجميل

يصبغن شعرهن وينظفن وجهن

خاله تروح وياهن

لان متجمعات سويه يوميه يطلعن

كالن اليوم لازم نجبره لحيدر ونخلي يخليج تروحين ويانه

مااروح وعفيه اذا تحبني لتكلله

اول شي شعري ميحتاج لون وثاني شي وجهي ماالمسه ابد

عاجبني هيج ابقى

عافني وراحن

خاله كلتلي اليوم يجون ازواجهن بالليل يتعشون وياخذونهن

جابو دجاج

تبلتهن وجهزتهن

بعدها اجني البنات بس عصبيات

ويحجن ع اخوهن ويكولن ميصير هيج يسوي

عرفتهن محاجياته اكيد ورافض

والله شايف نفسه شوفه

راحن كليتهن

بعدها دزلي مسج ع مود غدا

نزلت جهزته اله وصعدت ردت اشوف ابني اخاف يكعد ويوكع من الكريكوت

دزلي مره لخ ع مود الجاي

قررت بعد مااصعد لمن يشرب الجاي يله

يمكن ممصدك عنده شخص يتامر علي

وطلباته كليتهن مجابه

متعجب بنفسه

بديت اجهز العشه

سويت الهم مقبلات واشكال واللوان

البنات حيل حبابات اتشكرن مني وبوسني

المغرور طلب مني ابد ماادخل يمهم

بقيت اني وابني بالمطبخ

ابني بالمشايه مالته

واني ارتب بالصينيه مالت الجاي

فجأه وجان اشوفه فاره

طبعا نقطة ضعفي الحيوانات كلهن

خو الزواحف والحشرات اتخبل يمكن اصيح وصوتي يوصل لسابع جار بس اشوفهن

اشوف الفاره كدامي وصعدت ع رجل ابني اني اتخبلت

كلبي كام يدك سريع لان حيل اخاف

اني حتى البلبل الاليف اتخبل منه والله اخاف عبالك راح يعضني وياكلني

حرت شاسوي ومااكدر اصيح

هاي لو ابيت اهلي جان كلبت الدنيا بالصايح

بس هنا مترهم عيب

والمصيبه عيب من نسابتهم هنا

اجيت من بعيد اطرد بيها ولا كانو

يمعوده والله مو وكتج حبابه عوفي ابني وروحي

ردتها بس اتوخر عن ابني

متحملت صحت خاله عمو تعالو الحكوني لان سمعت ابني صرخ

يمكن عضته

اجوي خطيه يركضون عبالهم شو شبيه

مااتوقعت الكول راح يجي

الغثه وصل اول واحد وبعدها الكل اجه حتى نسابتهم

سالوني

كتلهم فاره بالمطبخ

اشو هذا فشلني كدام الكل

لج ثوله وتبقين ثوله

عبالي احتركتي ونخلص منج

ثول اله يريد يخلص مني ع اساس نايمه ع كلبه

رزلني رزاله تسوه عمري وحياتي

والله حيل خجلت

عيب من الولد

هسه اني شوهدني وصحت

بدوا يدورون بس مدري وين شردت

ابني مات من البواجي خطيه يمكن اخترع لو عضته

كللهم روحوا عمي كملو اكلكم هاي وحده الله مشور بيها

مخبله مو بيدها

والله متت من الخجل

رجعوا كلهم

اشو هذا اجه عليه ضربني راجدي

وهاي اول مره يمد ايده عليه

حسابج وياي راح يكون عسير

سويتي هاي الهوسه بس حتى تشوفين الولد

هيج متتحملين اله تشوفيهم

لو هاي متعوده عند اهلج ع هاي الاخلاق السز

حيل ضوجني ونرفزني من حجه هيج

كتله بس ماالك حق هيج تحجي عليه

بعدني ممكمله اشو هم ضربني راجدي مره لخ

ديري بالج مره ثانيه تجاوبيني لو تحاولين ترفعين صوتج عليه

وهسه اخذي ابنج واختفي من وجهنا مااحب اشوفج بعد

لا ادفنج عدله

صدك اخذت ابني وصعدت

بس ابني بس يبجي

اخذت ملابس الي وملابس لابني ودخلنه للحمام

سبحته خطيه بس يبجي

انتبهت ع رجله اثر سنون

يمكن عاضته الفاره

طلعت من الحمام

اجني البنات ويضحكن

كالن ولج عيشتينه برعب مو طبيعي

وكل هذا ع مود فاره

اني بجيت كتلهن والله رادت اتاذي ابني

شوفي رجله ياساره

خطيه هو بس يبجي

شافتها تخبلت

كالت ولج هاي عاضته صدك

واخوجن البطران عباله اريد اثير الانتباه ع مود ازواجن

اخذته فاطمه ونزلت بسرعه

وره شويه جابته معقمه اله محمد وشادها

خطيه رضعته ونام

بوسني البنات وراحن

ثاني يوم ولا كانو حتى مفكر يعتذر

ويكول صدك فاره ماقصدها شي

بقه خشمه يابس ويايه

اني ولا اهتميت

خاله جابتلي ملابس بس اللوانهن عاقله

ابد مختلطت بيهم بس فاطمه وخاله

هذا الغثه ملابسه عليه وانظف بيته

واجهزله الاكل ومخلي شي ينقص

حتى ميحجي عليه

حيدر : اتوقعتها جذابه وحابه بس تثير الانتباه

حتى نسابتنه يجون للمطبخ ويشوفوها

لان متوقعت اكو صدك فاره

وحتى لو صدك ممعقوله هيج تخاف منها

كمت احجي عليها وهنتها وضربتها

هاي اول مره اضربها

وكتلها اصعدي فوك

دورت المطبخ ومجان اكو شي

كلت اكيد جذابه

بس من نزلت فاطمه نضوري وعاضته صدك الفاره

اذن شكي مو بمحله ابد

يبجي خطيه والعضه واضحه علي

اخذه محمد وعقم المكان وشده اله

رجعته فاطمه وكالت نام خطيه

لعد اني شكد تفكيري وسخ 🤣🤣

بس رغم كلشي مستحيل اتنازل واعتذر منها

الكل كام يحجي عليه لان بقيت اصيح عليها

كتلهم زوجتي وحر بيها محد يدخل

عجبني وضعي الحالي

ملابسي الكيهن مغسولات ومكويات ومرتبات

بيتي النظافه واضحه علي

بنتي حيل معتنيه بيها

واكلي وشربي نفس مااريد واكثر

واهم من كلشي ابن اخويه كبال عينه

هاي الامور كلها خلتني ماافكر اطلكها

مرتاح من ناحيتها

بس اني اكرها كره مستحيل احد يتوقعه

مااعرف السبب بالضبط

هل خيانتها لاهلها وزواجها الي بالسر

او غير شي مااعرف بالضبط

احسها مو راحه بس تخاف مني

اني مااحتاجها ك زوجه الي وقت شهوتي

لان شوكت ميعجبني اروح اسهر وي الشباب

يعني ماخذ كفايتي

بس هاي البنيه مااعرف ليش ادور ع زله عليها

بس احب اهينها وارزلها

اجيت مره بوقت متاخر

لكيت ضوه مطبخ اهلي مفتوح

كلت يجوز ناسينه

جانت الساعه تقريبا ب1 بالليل

دخلت وجان اشوفها هي وامير بالمطبخ

عقلي طار اتخبلت

شعدها بهيج وقت نازله

وفوكاها بس هي ويا بوحدهم

اني واثق من امير ماعنده شي ولا يحاول ولو بالجذب يفكر بيها

بس اكيد هي الي تفكيرها وسخ

محسوا بيه

جانت تحجي بالموبايل

امير يلقنها وهي تحجي

جان تكول ماكو داعي تتاسف اخويه

مصار شي

حتى اخويه اتصرف مثلك

اي انطينياها

هلو زهوره

لج اني همين حصلتلي كتله من اخويه

عباله احجي وي ولد

يله حبي باجر نتخابر وطبكته

اني صحت هاي ويامن تحجين

طفروا اثنينهم

كاموا يمتمتون اثنينهم

احجي امير هاي ويامن تحجي

تعال اكعد واني افهمك

مااكعد احجي لاوالقران ابتلي بيكم اثنينكم

والله كاعد احجي وي بنيه قبل شويه

ولكفها اخوها خطيه

وكالتله وي صديقتي

وحب يتاكد صدك لو

كفرت كفره هزيت بيها العرش

ضربته بوكس خليت حلكه يجري دم

وانت شلون كدرت تخليها تحجي وي ولد غريب

لك سكط متستحي ع نفسك

سكت محجه شي ويايه

شعندك تالي الليل تخابر وتخلي بنات العالم بهيج موقف

ولو العتب مو عليك

العتب عليهن هن الي ساقطات

لو ما ساقطات مسوون هيج ويخونن اهلهن

التفتت ع زينب

وجان الخوف واضح عليها

كتله لامير روح اختفي من وجهي لا ابتلي بيك

بس قبل لا اروح عليك الله

لتاذيها لزينب

والله اني الي لحيت عليها

روح من يمي ولتدخل ابد

عينك ع نظوري لمن تجيك

افور دم بهاي اللحضه

لا مااروح ولا اصعد اله تخليها تروح قبلي

امير لتختبر صبري

روح لا والقران ارتكب جريمه بحقك

مااسوي شي بس احجي وياها

جريتها من ايدها ورحت للبيت مالتي

مااضمن نفسي شراح اسوي بيها

دخلتها وقفلت الباب

اني شكايلج قبل

مو كايلج متتقربين لا ع امير ولا ع محمد

والله ممتقربه ع احد

بعدهي ممكمله ضربتها راجدي

لعد شتفسريها هاي

الساعه ب1 بالليل وحدكم بالمطبخ

لا وفوكاها تحجين وي ولد غريب

دفرتها دفره وكعتها بالكاع

خل بس اشرحلك الي صار

هيج من ربج بنت الكلب شتشرحين

فكر بنت الفكر

لج من اكول عليج كح...... محد يقبل عليه

انطيني فرصه بس احجي

مااريدج تحجين بنت الكلب

الظاهر متعوده ع اتصالات نص الليل

لج بياصفه تحجين وي الولد الغريب هيج

وكفت كبالي

بس انت ميصير هيج تحكم عليه بدون متسمع مني

ضربتها راجدي قوي راسها اجه بالحايط

مااحب اسمع منج نفس واحد

وهسه تسمعيني زين

والخلقج وحق كل نبي مرسل

اذا مجريتي عدل وسمعتي الحجي

اطلكج واخذ ابنج منج

وعود ذاك الوقت روحي خابري الشباب نص الليل

واكعدي وي اي شخص يعجبج ب1 بالليل بوحدكم

سكتت

كتلها قسما بالله اذا لمحتج وي امير

اله اذبحج ع القبله

لان اعرف نواياج كلش زين

لان انت كح ..... وميهمج هذا حماج لو لا

ولا يهمج شي حرام لو لا

اذا صارت ب10 بالليل والمحج ولو بالغلط جوه

متلومين اله نفسج

وهسه اطلعي بره بنت الفكر

لا ابتلي بيج

حيل ضوجني منظرها

ميهمني السبب الي خلاها هيج تسوي

ماكو داعي تتواجد جوه بهيج وقت

حيل اكرها لهاي المخلوقه وحاقد عليها بشكل

حتلو مااحب اتقرب عليها

بس تبقى زوجتي ومسجله باسمي

سمعتها من سمعتي

مااحب يصدر منها اي شي مشبوه وموزين

كوه كدرت انام بذيج الليله

تفكيري راح لبعيد

اكيد شافتني مابيه امل وصادها بشكل

حولت ع امير تحاول تتقرب علي

اكيد هاي مريضه نفسيآ

بالنسبه الي لو تجيني بهيأت حوريه

ماالي نفس بيها ولا راح اضعف امامها

ثاني يوم حجيت وي امير وحذرته يحجي وياها

وكتله واذا اذا لمحتك ولو سلام تسلم عليها

راح انهي علاقتك بيه

طبعا زعل مني وكلي ميجوز هيج تشك بينه

وعيب هاي مثل اختي وعرضي

مستحيل بالي يروح لبعيد

وهي البنيه همين حبابه ومؤدبه

ومصدر منها اي شي سوء

مهتميت اله ابد

كمت مااشوفها بس وقت الاكل تجهزه وتختفي

اجتي عطلة نصف السنه

وكلي ابويه خطيه دزها لاهلها هي ونور

اعترضت كتله مااخذها اني لو اموت

كلي عيب ميصير من اهلها

وانت لحد الان ممتعرف عليهم

ميجوز هسه شيكولون

شيكولون خل يكولون مو مهم عندي

بعدين كام يلح عليه وزعل وافقت

اكيد هي الي كايلتله

احتمال ناويتلي غير نيه

بس اني مستحل تضحك عليه

دزيتلها مسج

ها ترديني اني اوديج لاهلج بيدي

ليكون مصدكه اني زوجج من صدك

والظاهر اهلج ممصدكين بنتهم متزوجه من واحد ظابط وغني

وحابين يتباهون براسي

بس خل يكون بعلمج

لو تموتين مااعترف بيج ك زوجه ولا اعاملج ك زوجه

ولا اسمحلج اطلعين من الباب

دزتلي

منو كلك اني حابه تاخذني بايدك

والله لو تبقى بس انت بالدنيه مااحب اطلع وياك

حلو العصفوره طالعلها ريش وصايره تجاوب

لعد اريد اشوف منو يخليج بعد ترحين لاهلج

بس ميجوز هيج تسوي ماالك حق تمنعني من اهلي

اخلي عمو ياخذني مثل كل مره

بس اني مموافق اطلعين واريد اشوف شلون ترحين بدون موافقتي

انت متخاف من الله من هيج تسوي

ممسويه شي غلط حتى تمنعني

هو اني مااطلع من الباب محبوسه بين اربع حيطان

وممعترضه وماعندي مانع

بس تمنعي من اهلي ممقبوله منك

هذا الموجود العجبج والما عجبج يطبج مرض

ها وديري بالج اطلبين مني ترحين لاهلج

زينب : بقيت بعيده عن الكل

اسوي شغلي واصعد يم ابني

اما الغثه اسويلي اي شي يخصه ومااحجي ويا

فد يوم جنت كاعده بوحدي لان فاطمه ماهي بايته ابيت اختها

اكلب بالفيس

طبعا ابد مااعلق ولا انشر بس اتابع

ومرات اتابع قصص

اتفاجأت اجتي رساله ع الفايبر

جان رقم غريب

كلي ها زنوبه نايمه كاعده

استغربت منو هذا الشخص وشيريد مني

دزلي اني امير عندي شغله وياج ضروريه اخيج انزلي اذا كاعده

نزلت والصراحه خفت منه شيريد مني بهالوقت

لكيته بالمطبخ

گلي اخيج تعاي الحكيني

شكو شبيك

كاعد اخابر ببنيه وياي بالكليه

وفجأه طلع اخوها وسمعني كلت الووو

وهسه الله اليعلم شراح يسوي بيها

لو فاطمه هنا ماكتلج ع شي

بس حضي اليوم ماهي

شتريد اسوي

بس دكي ع رقمها وخلي يسمع صوتج ويتاكد منج

كليله هذا اخويه هم شك احجي وي ولد وحب يسمع الصوت

انطاني معلومات عنها اسمها وكليتها وغيرها

بالبدايه رفضت كتله والله اذا عرف اخوك راح يذبحني

وانت تعرفه كلش زين

والله ادري بس خطيه ومحمد الله اليعلم شراح يسوي بيها خطيه

اخيج هنه احجايتين وبس

قنعني وكلت خطيه

وفعلا طلع الولد وقنعته

واعتذر مني

وحجيت وي البنيه واتفاجأت من حجيت وياها هيج

اتوقعت فاتح حاكيه اخوها

لهذا السبب كتله اني همين

بس طبكته وجان انصدم بالمغرور كبالي

اني انتهيت الصراحه

جسمي كام يرجف من فوك لجوه

رجليه بعد مااحس بيهن

اول مره اشوفه هيج عصبي

ضرب امير وخله الدم يجري من حلكه

لعد اني شراح يسوي بيه

اخذني لبيته وضربني واذاني حيل

بس مو بالضرب اذاني

لا بالحجي الي يسمم البدن

ردت ادافع عن نفسي واشرحله موقفي بس منطاني مجال ابد

هم مغرور وهم اناني وهم غثه

يكوم ويكعد ويكلي ضابط وغني

عباله فد شي همزين احقر خلق الله هم الضباط

اموت منه

يمكن مروان جان ارحم منه

اصعب موقف يمر عليه من يسب بابا

وميكلي غير كح.......

بقيت بعيده عنه واتجنبه

حتى امير خطيه ابتعد عني

دزلي مسج اعتذر مني

وكلي هذا رجلج مخبل منعني حتى اسلم عليج

كتله حتى اني ياريت انت الي تعذرني

لان بعد حتى سلام مراح اسلم

والله عيب من الولد ع اعصابي هيج حجيت

قصتلي فاطمه قصته هو وام نور

وكالت هسه ميثق باي وحده وهيج يتصرف

اكول شبي معقد اثاري من الخيانه

اني هذا الوضع مريحني من مايتقرب عليه

بس حكمه الي ماذيني

اجتي عطلة نصف السنه وطلبت من عمو ياخذني لاهلي

وكلي راح اخلي حيدر ياخذج

محجيت شي

بالليل دزلي مسج وعباله اني الي طالبه من عمو هذا الشي

مايدري مثل ماهو ميطيقني اني همين مااطيقه اضعاف

بس منعني من اهلي 😢😢😢

لو ادري محاجيه شي

سكتت مجاوبته بعد

سالني عمو وكتله مااروح

سالني عن السبب كتله هيج بدون سبب

يمكن عرف بي هو السبب

خلصت من العطله اسبوع

واني باقيه ع اعصابي

بس متنازلت ابد ولا طلبت منه يوديني

بالليل دزلي انزلي سويلي عشه

نزلت جهزتله الاكل وحميت الجاي

كلي ليش ترحين تشتكين لابويه وتكوليله ماياخذني

ابد والله لا شاكيه ولا كايلتله

لعد منو كله غيرج

مااعرف والله

اسمعيني ولج

جهزي نفسج باجر من الصبح اوديكم

الج مهله بس يومين وترجعين

ماكو داعي مااروح

لتبقين تتعيقيلين فوك راسي

جهزي نفسج وانجبي واسكتي

جهزت نفسي اني ونظوري ونور

فعلا ثاني يوم ودانه

صعدت بالوره

وهو  بالصدر

ابد محجينه بالطريق

بس واجهتنه مشكله لمن وصلنه للمحافظه

مااندل اهلي بالضبط وين

لان كل مره عمو هو الي يندل

واني لان مبوشه مااكدر اركز

بس كتله مااندل وين اهلي

وجان يشخط السياره حيل وجان .......

توقعاتكم شراح يسوي

لتنسون التصويت اذا عجبتكم القصه

واطلب منكم المتابعه لحسابي حبايبي فضلا وليس امرا

تحياتي للجميع 😘😘😘