رواية بين الفقر والطغيان الفصل السابع 7 - بقلم رونق

مساء الخير ع اجمل متابعين اتمنى لكم قراءه ممتعه

🌹🦋 البارت 7 🦋🌹

🌹🦋 بين الفقر والطغيان 🦋🌹

🌹🦋 للكاتبه رونق 🦋🌹

اتصل بيه ابويه وجان يكلي

عفنه نور يم زينب

اني اتخبلت كتلهم ليش عفتوها

كلي ابويه كامت تبجي واصرت اله تبقه

كتله مااقبل هسه ترجع وتجيبها

اكيد مايعرفولها وماندري شراح يسوون بيها

ومانعرف اذا راح يشبعوها لو يجوعوها

كلي يابه خليناها بايادي امينه

واكيد زينب راح تحافظ عليها وتخاف عليها اكثر من عدنه

ومن ارجع نتفاهم

كمت افور دم احسها كاعد تستغلنا بتصرفاتها

بقيت ع نار لمن

رجعوا ابويه وفاطمه

طبعا حيل عصبت وياهم

كتلهم شنو الدليل الي عدنه اذا اخذت بنتي وانهزمت

شنعرف عنها وعن اهلها

اشو اهلها انطونياها بدون لا مشيه ولاعقد امامهم

يعني كلشي منعرف عنهم لاعمامهم ولا عشيرتهم

كلي ابويه وشنو مصلحتها هيج تسوي

البنيه حبابه واهلها خوش ناس مبين عليهم

هههههه مبين من زواجها الي بالسر

منحكم ع البشر من موقف واحد ياحيدر

البنيه صارلها اكثر من 5 اشهر

ماشفنه المو زينه منها ابد

بس تضوج نور راح تتصل بيه وارح اجيبها

خطيه عدها عطله وتضوج هناد

خليها هناك تغير جو

سكتت بس كلبي ممرتاح ابد

واني متاكد راح تخابرنه باجر وتكول تعالو اخذوها

كوه كدرت انام

ثاني يوم طلبت من فاطمه تخابرها وتسال عن نور

كالتلي فرحانه حيل وتكول مااجي ابقه يم ماما

كلتلي امي خليها خطيه مدامها فرحانه

داومت ومن رجعت بقيت بقلق ابد ممرتاح اول مره تغيب عني بنتي

نمت وكعدت بالليل

دزيت رساله من رقمي اول مره اراسلها من رقمي

دزيت مرحبا

ابد ماكو جواب

كعدت وباوعت ابد ماكو جواب رغم ماقاريتها للرساله

تعشيت وخلصت

دكيت عليها

مرفعت خط

دكيت مره ثانيه

وجان يطلعلي صوت رجال اعتقد ابوها

يمكن لان رقم غريب ماادري تعرف رقمي وتريد تثبتلي هي متعرفع خط اذا رقم غريب

مااصدك متجاوب لان رقم غريب

ماكدرت احجي عيب من الرجال

طبكته للخط

بقيت منتظر فتره ودزيتلها

كتلها اني ابو نور حاب احجي وياها اذا ممكن

لحضات ودك جهازي

رفعت خط توقعت هي الي جاوبتني

بس اتفاجات بنور الي تحجي

هلو بابا شلونك مشتاقتلك

كتلها هلو حبيبتي شلونج انتي

مرتاحه لا

كالت حلوه هنا اتونست ولعبت وي البنات خاله رنا وخاله تبارك وخاله رقيه

وحيل فرحانه

وماما زينب ماتقبل تلعب ويايه لان مريضه

عوفيها بابا خليها ترتاح لتضغطين عليها

زين كاعد تاكلين زين لو لا

اي ماما زينب بيدها توكلني

وبيبي همين توكلني وتنيمني يمها تحبني

منيلج ملابس لعد

بيبي وجدوا اخذوني للسوك واشترولي ملابس

لج مامشتاقتلي

لا مشتاقتلك بس مااجيكم

ابقه يم ماما زينب

اريد منج تخابريني دائما حتى اسمع صوتج

تدلل بابا

باجر ياخذني جدوا اني ورقيه للالعاب

وكال راح يصعدني بالسيارات اليداعمن واصعد بالسفينه

انتبهي زين مو تتاذين

لا بابا لتخاف عليه

ويله روح اريد اكمل لعبتي

طبكته بوجهي ايا حقيره

الظاهر حيل فرحانه هناك

ماشفتها هيج فرحانه ابد

دزيت رساله ياريت تنتبهولها زين خاف توكع بالالعاب

دزتلي لتخاف عليها بايادي امينه ان شاء الله

كامت تتصل بيه 3 مرات لو 4 مرات باليوم

وحسيتها بغير عالم

تكول كمت العب رياضه وي البنات

خلصت العطله

وطلبت من ابويه يروح يجيبهن

وفعلا خابرهم ابويه وراح جابهم

طبعا حسيت بنتي نور وحده ثانيه

فرحانه حيل وبنفس الوقت ضعفانه

نور جانت سمينه بسبب اكلها الي ممنتظم

تاكل نوتيلا هواي وعصائر وببسي وجبس

يعني اكلها مو صحي ابد

اني متاكد من الرياضه والاكل الصحي هيج صايره

بس مراح احجي كدام اهلي حتى مره ثانيه متروح وتبقه وياها

كمت احجي من شفتها

كتلهم اكيد كاتلها الجوع

ذوله ناس فكر حسره عليهم الربع

بعد مستحيل اخليها تروح

كامت تبجي تكول والله بابا اكل هواي

بس نلعب رياضه واكل فواكه

اهلي كامو يحجون عليه

كالو عيب من البنيه هاي فوك ما مشتريلها ملابس

ومعتنين بيها ميجوز هيج تحجي

ممنوع تروح مره ثانيه لو شيصير

سكتوا محجوا شي

اجه محمد وبقه صافن ع نور

هاي اللعابه اليوم منين

وهي تضحك وتشاقه

هاي اني نور شبيك عمو معرفتني

لالج لتجذبين انت مو نور

انت لعابه ونور جانت دبدوب

كامت تبجي 😭😭😭😭😭

والله اني نور

جرها لحضنه وبوسها

لج صايره تخبلين

من صدك صارت نور وحده جديده

معبالك نفسها ابد حتى الشكل تغير

بالنسبه لزوجة مروان الله يرحمه دخلت بشهر الثامن

ومنعتها ماما تنزل ابد

لان تعبانه حيل تكول ماما

حسيت بامي اتعلقت بيها

اتجمعوا العائله كلها واخويه محمد

طلبو مني بس تولد لازم اعقد عليها

هم تعتني بنور وهم ابن مروان ميبتعد عنهم

طبعا رفضت رفض نهائي اخر شي افكر اتزوجها

كلت لمحمد تريد انت تزوجها مو مشكله

كلي لك والله لو يطيح بيدي من زمان اتزوجت

بس الحكومه تذبحني

اشو انت خالي مختلي

لا حكومه ولا حساب ولا كتاب

اني مستحيل افكر باي زواج

مو ادور هاي الساقطه الي متزوجه بدون علم اهلها

عفتهم وطلعت

زينب : حالتي كلما اتقدم بحملي اعاني هواي

دوخه قويه كلش عندي

من رجعت من اهلي رجعت مثل قبل مااشتهي اكل

مااعرف ماالي واهس لو اني اخجل

بس نور الوحيده الحلوه بهذا البيت

حيل حبيتها واتعلقت بيها

وكمت الهي نفسي وياها

حيل تعبتني لان تصرفاتها غلط بغلط

اكلها مو نضامي ولعبها كذلك

بديت وياها من الصفر

علمتها الصح من الغلط

اتجاوبت ويايه بس حيل تعبتني

بديت اعاني من الطبخ

بس يوم الجمعه والسبت مرتاحه

حيل ثكل جسمي

دخلت بالسابع

اخذتني خاله للدكتوره

هم طلع فقر دم بس هالمره لازم يديرولي دم

طلع بيه ولد حيل فرحت

جان شعوري مينوصف

قررت اسمي منتظر مثل مراده مروان

دخلت للمستشفى وخلولي بطل الدم

بس ماوالمني مااعرف ليش

صارت عندي حساسيه قويه

باللحضه قطعوا مني

طلبوا مني اكل

اني نفسي مطيق الكبده مااحبها اموت منها

جابولي زبيب

كمت اكل منه

بعدين كالت خاله روحي لاهلج

بلكي تاكلين ع واهس اهلج

فعلا اخذنه عمو اني ونور وفاطمه

قبل لنطلع من البيت انطاني عمو مبلغ من المال

رفضت اخذه بس اصر عليه اله اخذه

وصلنه وجانت فاطمه فرحانه وي البنات

من رادا يطلعون كامت تبجي نور ورايه

حيل اتاذت

كلت لفاطمه خلوها اشو عطله عدها

خلوها

وجانت فرحانه حيل

لعبت هي ورقاوي حيل حبتها

اخذوها اهلي جابولها ملابس انطيتهم من الفلوس الي عندي

خطيه بابا مقبل كال عندي فلوس

كتله ذني مو فلوسي فلوسهم لاهلها لنور

كوه قبل ياخذ مني

كول شويه وجايبلي لفه بيده

ساعه لفة كباب وساعه لفة كص وساعه همبركر وساعه كبده

اني مااقبل اكول خطيه ماعنده بس هو ولا يهتم

اتحسنت حالتي لان بديت اكل وي اخواتي وماما وبابا

طبعا محد شك بحملي قبل هذا الوقت لان ماكبرت بطني هواي

لان اول طفل واكلي مو شي

نور حيل فرحانه وي البنات

وقرر بابا ياخذهن لمدينة الالعاب هي والبنات

جانن فرحانات

اجتني رساله من رقم غريب

مجاوبت لان مااعرفه الرقم

بعدين دك عليه

اول مره مجاوبت

مره ثانيه دك انطيته لبابا

بس ماكو جواب

بعدين راسلني طلع ابوها لنور

مااكدر اجاوبه ابد لان عرفت من خاله ميجوز احد يشوفني ولا يسمع صوتي

لان زوجي متوفي

خليت نور تحجي ويا

بعدين دزلي رساله يوصيني عليها

وجاوبته ع كد السؤال

حاولو يطلعوني وياهم ابد مقبلت

مااكدر اكلهم ميجوز

كتلهم مااكدر ظهري يوجعني

عافوني

يم اهلي هواي ارتاح واحس بامان

هناك اني عايشه بغربه

واخجل منهم

واشوف علامة الاستغراب منهم

بعدها اجه عمو ورجعني

رجعت ولكيت الكول موجود

اني كبل بدون صوت صعدت لفوك

دخلت للحمام سبحت وبعدها نمت

لان سفر وطريق بعيد واني حامل

سمعته لابو نور يصيح ويهين بيه

عباله ضعفانه لان منوكلها

ماالي حق احجي ولا ادافع فالافضل اسكت

هسه تقريبا بعدلي اسبوع وادخل بالثامن

من هسه شايله هم اذا جبت شلون بيه

راح يجي ابني للدنيه يلكي ابوه ميت

زين شلون راح نسويله جنسيه

اذا باسم مروان شاحجي وشاكول كدام اهلي

واذا بغير اسم مترهم

مااكدر احجي وي اي شخص بهذا الموضوع

بس اني قلقي مينوصف ابد

كل يوم يمر عليه عبالك سنه تمر عليه

اني عبالي حليت المشكله من اجيت لهنا وعشت وياهم

طلعت متوهمه وعقدتها اكثر

لو مصارحه اهلي بكلشي احسن الي بهواي

يجوز يفهموني ويسامحوني

ويجوز يقتلوني

مو مهم اهم شي اريح ضميري

اني جنت اكبر غبيه من فكرت احل المشكله بمشكله اكبر

ثكلت حيل مو مثل قبل

ماارتاح بنومتي ابد احس بنفسي مختنكه

الدرج كمت اعاني منه مااكدر اصعد وانزل

حتى الطبخ بديت اعاني منه

بس خاله اكثر المرات الكيها طابخه

منعتني خاله انزل لجوه ابد

بعدلي ايام وادخل بشهر التاسع

حجيت وي خاله كتلها خاله اطلب منكم بس طلب

اريد اجيب طفلي يمكم لان مااكدر يم اهلي اخاف يعرفوني مكمله الاشهر

بس اذا جبت هنا اكلهم جبت بالسابع

اي عادي ماكو مشكله احنه هم نريدج يمنه

زين خاله والطفل شلون راح نسويله

اني ومروان الله يرحمه ماجنه عاقدين محكمه

وحتى اذا عاقدين مااكدر اسجله باسمه

شلون بيه بهاي الحاله

كلتلي ماعليج بهاي الشغله

من تجيبين بسلامه راح نسجله باسمج واسم حيدر عمه

شلون يصير خاله

راح نرهمها بلكي بواسطه وزوجة محمد راح تساعدنه

بس البيان نطلعه

وبعدين نشوف شلون نرهمها

نور صارت شخص ثاني

مو مثل الاول

هادئه وتسمع الكلمه واتعلقت بيها وهي كذلك

دخلت بشهري وقررت خاله تاخذني للدكتوره تجيك وضعي

رحنه هالمره اخذنه شخص اول مره اسمع صوته

سمعت خاله تكوله اموري

اعتقد اخو مروان الصغير

دخلنه للدكتوره وجيكتني

كلتلي امورج توب والطفل صحته زينه وماعندج اي مشكله

وراح تجيبين طبيعي باذن الله

بس لازم تتمشين يوميه

طلعنه من الدكتوره

رجعنه للبيت

طبعا خاله جهزتني بكولشي

وحضرت الجنطه خاف تصير عندي ولاده مبكره

جنت كاعده بالغرفه وروحي طالعه من الدنيه

اجتي خاله يمي

كالت خاله لازم احجي وياج بموضوع

كولي خاله

بس تجيبين بسلامه وره الاربعين

لازم نعقدلكم انت وحيدر

لمصلحة الطفل خطيه

ع مود تسجيله وع مود نسكت الناس

كتله خاله اسمعيني

وداعت ابني الي ابطني وداعت شدتي

هذا الطفل الي ابطني هو ابني وابن مروان

خاف شاكين بيه وعبالكم مو ابنه

الله شاهد ماواحد لامسني بس هو الله يرحمه

ادري والله ومصدكتج

قبل فتره اجاني بالحلم وزعلان عليه

كتله شبيك مروان

كلي ليش تاذوني

كتله شمسويلك

كال ليش تاذون ابني وامه

منو ماذيهم  ياماما

انتو كلكم متحبوني لان لو تحبوني جان حبيتوا ابني

ابني وزوجتي امانه بركبتكم

الي ياذيهم ياذيني الي اكيد

وكعدت تحجي وتبجي

اني هم ابجي اكول خطيه مروان حتى بعد موته يفكر بينه

خاله الله شاهد عليه اني ماادور وياكم فلوس ولا اريد ورث

كل الي اريده منكم الستر بس

واريد ابني يحصل ع جنسيه

مستعده اصير خدامه الكم مااحجي والله

الله كريم خاله بس خلي الله يسهلج وكلشي يهون

خلصت 15 يوم بشهر التاسع واني بعدني

مااكدر امشي لان وين امشي

بعد مرور 22 يوم بشهري

اليوم صادف خميس

وخاله وعمو راحو لكربلاء يزورون

سويت غده بس احس بالام تجي وتروح

طبعا مااعرف شنو يعني علامات الولاده

كملت الغده ورحت بغرفتي

بس الالم زاد وخاله ماهيه جان كتلها

مااكدر اكعد بعد ولااكدر اكوم حيل اتاذيت

ومااعرف شاسوي

بده يوكع عليه مي

خابرت فاطمه كتلها يمكن عندي ولاده

مااعرف شاسوي

كالت خل اخابر ماما بسرعه

وره شويه اجتني زوجة محمد الي عرفته اسمها رسل

جانت حبابه حيل

هي وفاطمه

كالن جيبي الجنطه وتعالي

مااعرف منو الاخذنه

جان المي قوي مااكدر اوصفه

بس التزمت الصمت مااكدر اطلع صوتي

سمعت فاطمه تكول

لك حيدر فدوه استعجل

لان ايدي راح موتتني  من كثر الجر بيها والظغط عليها

انتبهت ع نفسي ظاغطه ع ايدها قوي خطيه

سمعته هو يصيح ويكول يعني وكتها الزياره

مايدرون بيها قرب موعد الولاده

وصلنه للمستشفى وجنت حيل خايفه ودموعي تجري

مااعرف من الالم لو الخوف

بهذيج اللحضه مااجه ع بالي بس ماما

اتمنيتها يمي

دخلوني للصاله وجانت زوجة محمد ويايه وحيل اعتنو بيه

كالن عدها ولاده

سووا التحاليل اللازمه وشدولي كانولا

هواي طولت ولحد الان بعدني اطلك

مااعرف شنو السبب

من ال3 ولهسه صار الليل واني بعدني

انتهيت بعد حتى طاقه ماعندي

اجتي خاله ودخلوها اليه

كتلها فدوه خاله خاف اموت ابني امانه يمكم

اسكتي خاله لتحجين هيج

هسه تجيبين بسلامه وتربي بعزج ان شاء الله

خاله احس بنفسي راح اموت بعد مااتحمل

ابني سموا منتظر لان مروان الله يرحمه وصاني باسمه قبل ليموت

خاله كولي ياالله صيري قويه

زين خلي يسوولي عمليه

كالو منا لساعه اذا مجبتي يحولونج عمليه

مو عبالج العمليه هينه

يشكون بطنج وتبقين تتاذين

بس الطبيعي بس الم الطلوك وادور ينتهي كلشي

كامت تقره ع راسي ايات

اجت بنيه ممرضه حطتلي يمكن دعاء مااعرف شنو شدته برجلي

وضربني ابر

صدك ذاك الوقت حسيت بالموت الحقيقي

اجوي اهلي كبالي

سامحوني لان خنت ثقتكم بيه

بس والله مجنت اعرف هيج راح يصير بيه

وره لحضات وجان اسمع صوت الطفل

واخيرا ....... دموعي تجري كامت

اتمنيت ماما ويايه بهاي اللحضه

مكدرت اروح يمهم لان اكيد راح يعرفوني ولدت بشهري

واني مااكدر اكول

راح اكول ولاده مبكره صارت عندي

كملنه اجراءات المستشفى

وطلعنه وجانت الساعه ب3 منتصف الليل

صعدوني لغرفتي

كتلها خاله والاسم

كالت خاله سمينا منتظر

بس الابو سمينا حيدر

يعني باسم عمه

وصيري زينه ونتفاهم

طبعا الكول فرحان بالطفل

اجه عمو اليه باسني براسي

وباس الطفل

كبر واذن باذانه

عمو خله جوه راسه ورقه

وخاله ثاني يوم سوتله تمايم ذهب اثنين يخبلن

حسيت بخاله وعمو يردون يطيرون من الفرح

وره 3 ايام كالت عمامه يردون يسلمون عليج ويبوسون الطفل

كتلها خاله شلون البس بوشيه لا

كالت والله مااعرف خلي نسالج

بس هسه البسي افضل

لبست عبايه وبوشيه ودخلو يمكن 2

سلموا عليه واتحمدولي ع السلامه وبوسوا الطفل

اني يادوب ينسمع صوتي

خلوله جوه المخده مااعرف شكد

الي عرفته واحد الدكتور الي اسمه محمد والثاني الصغير الي اسمه امير

والمغرور مااجه

همزين لان انرعب منه مااعرف لويش

بعدها طلعو

خاله سالت ع العده خابرت مكتب السيد

كلولها هاي هي خلصت العده

واخيرا اتحررت

طبعا الاسود ابد مقبلت انزعه

خاله كالت ميصير تبقين بي

اني رفضت

لان من جها اخويه ومن جها ثانيه مروان

بس بقت مشكلة الطفل

شلون راح يسجلونه

كالت خاله نعقدلكم انت وحيدر وبعدها نسجله للطفل

كتلها خاله اني موافقه ع اي شي تكولونه اهم شي ابني تصيرله جنسيه

بعدين اجتي نور

كالت جدو وبيبي اتعاركو وي بابا

وجدو كام يصيح علي وحتى عمو محمد

لان ميقبل يتزوج

يكول هاي الساقطه مااتزوجها لو اموت

حيل ضجت واستحقرت نفسي

لان من صدك هاي ثالث مره اذل نفسي كدام رجال

اول مره كدام مروان من احتاجيت الفلوس

والثانيه لابوها لنور من طلبت منه يستروني ويخلوني اعيش وياهم

وهاي الثالثه

هسه لو يصير جنسيه هيج جان اخذته لابني واختفيت

حيدر : اهلي بقوا يلحون عليه حتى اعقد عليها

بس اني مصمم ابد مااوافق

لان اني اعتقد  المرأه الي متصون اهلها

مستحيل اتصون زوجها بيوم

واني مااكدر اجازف واوافق عليها

لان ضايك الخيانه شنو

هالمره مااتحمل لان اكيد اقتل وانقتل

واني شلي بهالدوخه

اشو مرتاح هسه بدون زواج

زوجته لمروان لحد هاي اللحضه لا شفناها ولا سمعنه صوتها

لمن دخلت بشهرها اخذوها للدكتور

طلبت من ماما نوديها لاهلها

كالت ماما اذا وديناها اكيد اهلها يشكون بيها واحتمال يقتلوها

خطيه حرام علينا

ولتنسه هذا الي ابطنها ابنه لاخوك الله يرحمه

وشنو الي يثبت الطفل ابنه لمروان

والله ياماما اجاني بالحلم ووصاني

شكم مره كتلك وانت متصدك

فعلا هواي كلتلي بس اني ابد مااصدك

لان اني متاكد اكثر من النص النساء خونه ومااصدك بيهن ابد

صحيح زوجته ولكيت العقد

بس الطفل ماكو دليل ابنه

لان اساسا ميصير عنده اطفال والسبب منه

رجعت ماما تطبخ مثل قبل

لان تكول خطيه مااتكدر

بس اشو هاي مطوله مناويه تجيب وتفضها

طبعا دايخ بمسالة الجنسيه مالت الطفل

نكدر نودي العقد مالت السيد للمحكمه ويتصدق

والطفل يتسجل باسم مروان

بس المشكله اهلها شلون بيهم

احتمال صحيح بس يعرفون بيها راح يقتلوها

دايخ حيل بس تركتها لوقتها

راحوا اهلي لكربلاء يزورون

وجنت بالدوام قريب مايريد ينتهي الدوام

خابرتني فاطمه كالت زينب احتمال عدها ولاده

ومحمد ابغداد

وامير وي اهلي صادف

رجعت ع السريع

لكيتهن متهيأات

وحتى رسل زوجة محمد وياهن

اخذتهن بسرعه وطبعا تتالم مبين عليها بس مسمعت نفسها

اباوع عليها بالمرايه ضاغطه ع ايد فاطمه

كمت اصيح واحجي ع ماما لان ميجوز تروح

وتعرفها بفتره حرجه باي وقت يصير عدها ولاده

وصلنه وسويت الطبله الها

خليتهن بصالة الولاده ورحت اتغديت يم المستشفى مطعم قريب

لان جنت حيل جوعان

بقيت اتصل وي فاطمه

طولت حيل وماكو

صار المغرب وهاي ماكو

اجوي اهلي

ماما اتخبلت من كتلها لهسه بعدهي

كالت خطيه من زمان تطلك

راحت لرسل وسالتها

كالتلها كاعد تطلك

مانريد نسويلها عمليه

كالتها خاف تتعب

مو مهم اهم شي صحة الطفل

مو زينه العمليه

لمن نأيس منها يله نحولها

صار الليل وماكو

دخلو ماما الها

طلعت تبجي

عبالنه بيها شي

كالت لا مبيها شي

بس حيل حيل تعبت خطيه

ووصتني ع ابنها خاف يصير بيها شي

واسمعني حيدر

الطفل تسمي منتظر

شنو هالاسم مو حلو وهي ماالها حق تسمي للطفل

اني اريد اسمي كيان

لك ماما هاي وصية اخوك مروان الله يرحمه

هو كللها سمي اسم منتظر لان جان منتظر هذا الخبر ع نار

مكدرت احجي بعد

مدام وصيته لاخويه هاي هي

كالت هاي اخر محاوله اذا مجابت طبيعي نسويلها عمليه

بقينه فوك الوحده وهاي بعدهي

ع فجاه اجتي رسل تضحك

كالت خطيه جابت بس حيل تعبت

الحمد لله مااعرف ليش بداخلي جنت حيل فرحان

بعدين كملنه الاجراءات وطلعنه

صعدت لفوك

كالت ماما خليها ترتاح خطيه

سوتلي فاطمه عشه

كملت ورحت لبيتي نمت

ثالث يوم طلبوا من عدنه نصعد نسلم عليها ونبوسه للطفل

اني رفضت ومااعرف ليش

صعدوا محمد وامير

اجوي فرحانين كالو بي ريحة مروان

اني بداخلي ممقتنع هذا ابن مروان

كتلهم هاي شبيكم

ضحكت عليكم نسيتوا مروان ميصير عنده اطفال

كالو بس الله اذا راد يخلي يصير عنده

وهسه هذا اكبر دليل

كتلهم هسه تشوفون الايام راح تثبتلكم اني ع حق

بس هاي كاتلها الفلوس وشافتنه حالتنه زينه والحمد لله

كالت اطلعلي بشكم فلس منهم وابني يحصل ورث

كام يحجي عليه محمد

كال ولك هاي البنيه لو منا منا متزوجها مروان

وانت اكثر واحد تعرفه لاخوك

ميعجبه العجب وميامن باي وحده

وثانيه وبعد صارلها شكم شهر محد لمح طولها ولا سمعنه صوتها

اسال امير دخلنه هسه وشكد حجيته غير السلام مسمعنه صوتها ابد

وكوه سمعته السلام والله

بعدين غير الموضوع

كال ولكم اني متلهف اشوفها اكيد هسه كملت العده

وراح نشوفها

من هسه اكلكم اذا صاكه اني اتزوجها

بس هم بالسر لان رسل تذبحني بليله ضلمه

ويضحك

امير كال لا بالنسبه الي اني ممتزوج ولا مره

اكيد اريدها زوجتي المستقبليه صر مهر

محد شايف طولها

يعني مستحيل اوافق عليها حتلو مهما يكون

كال محمد

بس اذا طلعت جنها جبار الفيترجي ماكو غير حيدر يتزوجها

كمت اضحك واكلهم والله لو ملكة جمال العالم هم ماافكر اتزوجها

لو تموت لو تبقه بس هي بالدنيه

ممكن اعرف السبب

لك محمد هي الي تخون اهلها وتتزوج بالسر

شلون راح تصون زوجها

لك والله البنيه حبابه ومؤدبه

بس الصراحه مانعرف شكلها جنها جبار لوجنها حمديه

بهاي الاثناء دخل ابويه

سكتنه

جان يكول

حيدر ابني اسمعني زين

راح احجي بس اعتبر الحجي مالتي امر لازم يتنفذ مهما يصير

واذا رفضت اكيد لا انت ابني ولا اني ابوك

ولااعرفك ولا تعرفني للموت

بهاي الاثناء دخلت امي

هم كالت اني همين تعتبرني غاضبه عليك ليوم الدين اذا رفضت

الحقيقه اتوقعت الي يردون يحجوا

واكيد راح يكون جوابي .......

توقعاتم حبايب راح يوافق لو يرفض

لتنسون التصويت حبايبي كلبي 😘😘