رواية بين الفقر والطغيان الفصل الثامن 8 - بقلم رونق

مساء الخير ع اجمل متابعين اتمنى لكم قراءه ممتعه

🌹🦋 البارت 8 🦋🌹

🌹🦋 بين الفقر والطغيان 🦋🌹

🌹🦋 للكاتبه رونق 🦋🌹

اكيد جوابي راح يكون الرفض

كتلهم اسمعوني من الاخير وقبل لتحجون واطلبون مني شي

اني اكلكم مااتزوجها لهاي الساقطه لو ع كص ركبتي

حيدر احترم نفسك ولتتجاوز ع البنيه

يله يابه شريفه بنت شرفاء

بس اني ميعجبني اتزوج هيج وحده اكو اعتراض

غصبا ماعليك توافق

شنو هي بالكوه وغصبا عليه

هذا محمد يمكم وامير وزوجهم الهم

اني شكو جلبتوا بيه

شنو ماكو غيري

اتركوني لخاطر الله لاوالقران اعوف البيت واطلع

انت لان مطلك زوجتك وهاي بنتك محتاجه لام تصونها وتحافظ عليها

اني هنا فقدت اعصابي

اي صحيح محتاجه ام اتعلمها تتزوج بالسر وتشجعها

محتاجه ام تربيها تربيه غلط

ام ادربها من هسه شلون تجلب بالولد وخاصه الي عدهم ورث زين

حيدر لهنا وكافي

احنه مكاتلنه انت ومصلحتك

كل الي همنه ابن مروان

خطيه يبقى بدون جنسيه

لو اهلها البنيه يقتلوها حتى يبقى الطفل لا اب ولا ام

اي احجوها من البدايه ليش بعد تكولون بنتك ومااعرف شنو

اعقد عليها بس اهم شي الطفل يحصل ع الجنسيه

وبعدها باي وقت يعجبك طلكها

والله هاي حيه من البدايه التافت ع مروان وكربسته

وبعدها التفتت عليه وتريد توكعني

هي مو كالت بس اجيب اخذ ابني و اروح لاهلي

بس استروا عليه

اشو لزكت

الظاهرحلت الها الكعده

لك ابني خاف الله

البنيه شلون تروح لاهلها

والطفل ماعنده جنسيه

خطيه شنو ذنبه لهذا الطفل

يبقى مذموم بين الناس

مو مشكلتي خلي يعقد عليها محمد بس ورقه وبعدها يطلكها

عفتهم وطلعت

صاحت امي ورايه

وروحه لمروان ماراضيه عليك ليوم الدين اذا موافقت

ومن هاي اللحضه مراح يدور لساني ع لسانك

رجعت عليها كتلها يوم اروحلج فدوه لتعاقبوني هيج

مااريد اتزوج ابد

ومنو كلك زواج حقيقي

انت تبقى ابيتك والبنيه تبقى ابيتنه

اهم شي الطفل يتسجل باسمك واسمها

انطوني مهله خل افكر

الله يرضه عليك ابني فدوه لخاطري ولخاطر اخوك الي جوه التراب وافق

عفتهم وطلعت روحي طالعه من الدنيه

شلون اربط اسمي باسمها لهاي الساقطه

وحتى اذا طلكتها يبقى الرابط قوي بيني وبينها

الي هو الطفل يبقى حامل اسمي ك والد واسمها ك والده

خابرت ولد صديقي كتله

رتبلي  سهره مالت واحد روحه طافره من الدنيه

عنده شقه دائما نسهر بيها وعنده شكم وحده من ذني بنات الليل

فعلا رتبنه السهره

ورحت نسيت همي

شربت لحد ماسكرت

ونمت وي وحده

بقينه للصبح

كعدت ع صوت المنبه

رجعت للبيت سبحت وبدلت ملابسي ورحت للدوام

بقيت بيومها ابد ممركز بالشغل

بالي يم مسالة العقد

مااعرف اعقد عليها لو لا

هو اني حتى شكلها مشايفه ولا يهمني شكلها

رجعت من الدوام حتى غده متغديت

مارحت يم اهلي

اجتي امي جايبتلي اكل

كتلها مااشتهي اريد بس انام

نمت ولليل يله كعدت

حيل جوعان

بدلت ورحت للمطعم اكلت

خابرتني امي

كتلها بره واتعشيت

بعدها رجعت

ومشكله مراح اكدر انام لان هواي نمت

بقيت اكلب بالفيس

شويه واجاني اشعار من الفايبر

فتحته وجانت زينب

كاتبه بيها مرحبا

مرديت عليها

دزت مره لخ

اتمنى تسمعني بس هالمره

اني حابه اترجاك واتوسل بيك تعقد عليه بس ع الورق

ع مود ابني وراح اكون ممنونه الك طول عمري

وراح اعيش خدامه الك لمن اطلكني

ومااريد اي شي منك

وراح اكولك وداعت ابني راح اعتني ابنتك كانها بنتي وراح احافظ عليها

مجرد عقد مياثر عليك ولو شهر وطلكني

ومن هسه اكلك اكتب تعهد بالمحكمه كلشي منريد منك لا اني ولا ابني

اهم شي ابني يحصل ع جنسيه وبس

دزيتلها هاي انت متعوده تتوسلين حتى تتزوجين

هيج تموتين بدون زواج

لج اثكلي عيب عليج تتوسلين

وع شنو ع شهوتج تف عليج وع تربيتج

حيل ضوجتني من دزتلي هي

حيل كرهتها

دزتلي مع الاسف تفكيرك وسخ بس مااعتب عليك العتب ع الزمن الي خلاني اذل نفسي الك

انسه الموضوع نهائي حتى جنسيه لابني مااريد

ههههه قصدج رصيد لابنج مو جنسيه

بس اسمعيني زين

والله وروحه لمروان لو تبقين اخر وحده بالدنيه مااتزوجج ولا اعترف بيج

دزتلي هاي هي ع راحتك

بس احب اكولك رحم الله والديك ع كول كلمه ضدي

ووالديج بالرحمه

بعد مجاوبتها

بقيت افكر شلون اوافق لو لا

بعدين كلت خل اشرط شروط بلكي متوافق هي

ثاني يوم هم داومت ورجعت اتغديت بالبيت

طبخها مميز ويفتح النفس

بالليل دزيتلها

هلووو

مجاوبت

جاوبي وبطلي هاي السوالف التعبانه عود ممهتمه

هم ماكو جواب

احتمال لخاطر الطفل اوافق اعقد عليج بس بشروط

اذا وافقتي احتمال اعقد عليج

واذا موافتي مراح نعقد

قرتهن بس ماكو جواب

مناويه تسمعين الشروط بطلتي متردين تتزوجين

دزتلي موافقه ع اي شرط قبل لتكولهن

لخاطر ابني والله مستعده اي شي اسوي

حلو لعد اسمعيني

الشرط الاول البوشيه والعبايه متنزعيهن ابد تبقين بيهن

الشرط الثاني من الباب مطلعين ابد لو الامه تنگلب گلاب

الشرط الثالث ممنوع تنزعين الحجاب كدام اي اي شخص من عدنه

حتى كدامي

ولازم تلبسين مستور وردن طويله ومكياج ماكو ابد

الشرط الرابع ممنوع تخطين خطوه وحده بدون علمي

الشرط الخامس شغلج الوحيد الخدمه وبس يعني اذا دخلت ولكيت امي بالغلط واكفه ع الطباخ ولو تشتغل احركج عدله لازم تشتغلين حالج حال الخدامه

ومن اني مموجود الصبح ادخلين لبيتي تنظفينه وترتبينه وتغسلين ملابسي وتكويهن واي غلط تتعاقبين

وايالج وابالج اشوفج كبالي لو تحاولين تغريني باسلوبج لو بلبسج

والشرط الاخير قرار الطلاك بيدي شوكت ميعجبني اطلكج

واذا عجبتني خدمتج يجوز مااطلكج

ها ونسيت اكلج شي اكتب بوصيتي ابنج مااله حق بميراثي ابد

وماالي علاقه بيكم هسه لا بمصرفكم ولا بكلشي يخصكم

وهسه حاب اسمع جوابج

زينب : احقر واسوء شعور عندي لمن اتنازل لشخص واني مجبوره والمشكله انرفض

كرهت نفسي والله وكرهت الساعه الي نولدت بيها

وكرهت الساعه الي فقدنه املاكنه

وكرهت الساعه الي شفت بيها مروان

ومو بس هيج كرهت الفقر الي دمر حياتي

لو ما جنه فقره جان كدرنه نسوي لاخويه عمليه

من طلبت منه لابو نور يوافق يعقد عليه

مجان ابالي نفسي ابد

اهم شي عندي ابني

سمعني كلام يسمم بس مااكدر اجاوبه مو ضعف مني لاابد

بس مو حلوه بحقي اوكف بوجها واني جان موقفي ضعيف

واني موقفي كولش صعب ومااعرف يجوز يروح لاهلي ويحجيلهم الحقيقه

بس ضجت

بعدها اتفاجات من راسلني وكلي اوافق وبشروط

اكيد اوافق ع كولشي اهم شي يسجل ابني

دزيتله موافقه ع كولشي

واذا خلفتي بيوم

لاوالله اي شي تريده انفذه

ومااطلع من الباب بس لاهلي اروح

حتى اذا رحتي لاهلج ثقي بربج اذا لمحتج بيوم طالعه وي اهلج اذبحج ع القبله

اوك موافقه

متاكده

اي متاكده

حيل فرحت

حلم اخلص من هذا الكابوس

اتمنى اغمض عيني وافتحها الكي ابني عنده جنسيه

وراجعه لاهلي اعيش وياهم

بس حلم مستحيل يتحقق

بس اتقرر العقد بعد مااطلع الاربعين

بقيت هاي الفتره ابد مانزلت واجتي العطله الجبيره

طبعا حبيبي نظوري طلع نسخة ابو مروان الله يرحمه بس عيونه ملونه عليه

هم مقسومين قسم عيونهم ملونه وقسم لا

نور اتعلقت بيه

انيمهم اثنينهم يمي

نسيت همي كوله من اجه ابني للدنيا

طبعا اهلي خبرتهم وكتلهم ولدت من وقت

بس حالته زينه وعبر مرحلة الخطر

ماكدروا يجون همزين مااريدهم يجوني لهنا

مااعرف من راح يشوفني ابو نور شراح يسوي

اكيد راح يتذكرني

ابد ماانزل من موجودين الولد

لحد الان محد شافني

الصبح انزل انظف واطبخ

واصعد ابقه بغرفتي

طلعت الاربعين وقررنا ثاني يوم نروح للمحكمه

وفعلا رحت وخليت ابني يم خالتي

وجنت لابسه البوشيه

وجان عنده عرف كال اكمل بسرعه ونرجع

كلي احذرج اسمع نفس منج

فعلا التزمت الصمت

عقدنه القاضي ووافقت وجان  الحاضر والغايب عشره بعشره

اتفاجأت كتله ماكو داعي لهذا المبلغ

اني مو كتلج مااريد اسمع صوتج

اسكتي وانجبي ولتخافين لو تموتين ماانطيج فلس منهن

بعدها رجعنه للبيت

لليل دزوا ع السيد وعقدنه وانتهى كولشي

صعدت بغرفتي

امنيتي مااتواجه وياه

مااعرف لويش حيل خايفه منه

دزلي رساله ديري بالج تنسين الشروط

والله اذا خلفتي بشرط ماتلومين اله نفسج

وديري بالج المحج واني موجود

خاله كلتلي لاتتقربين علي ابد

حاولي لا تتواجهين ويا لمن يهدئ

فعلا ماانزل بس الصبح واصعد ب2 قبل ليجون

ويوميه اروح لبيته لابو نور

اتفاجأت بي جان كلش حلو مرتب ونظيف

غرفته تركي كولش نازكه

بديت اغير بالفرشات والبردات

اغسل الملابس وانظفه للبيت وارجع

وبعد ماانزل ابد

بقيت ع هذا المنوال شهرين وره العقد

صار عمره لنضوري 3 اشهر ونص

دائما تاخذه فاطمه وادزه لعمامه

كل مااسال خاله ع الجنسيه تكولي خلي يكبر شويه نضوري وره الذكرى السنويه مالت مروان يله

فعلا صارت الذكرى السنويه مالت مروان الله يرحمه

طبعا سوو قرايه وعشه وراحوا للنجف

اني  رحت لاهلي دزوني بقيت اسبوع

اخذت ويايه نور لان كامت تبجي ورايه

اهلي بقوا يحجون عليه لويش مخبرتينه من صارت عندج ولاده

كتلهم ماكو داعي لان خاله وكفتلي وكفه مثلج ياماما

ومخلوني حاسه بشي

وعتبوا عليه لان مااجيت بالذكرى السنويه لحبيبي سيوفي

كتلهم مو مااكدر اجيب ابني صغيروني

كالوا هم صدك

طبعا الكول فرحان بنظوري 

اخواتي وبابا خطيه

كول شويه وماخذه لابني هو ونور يطلعهم بره ويشتري لنور

وخطيه حيل فرحان بي

غيرت جو يم اهلي وفرحت

هواي حاولوا يطلعوني وياهم بس رفضت

كتلهم هناك مليت من الطلعه يوميه مطلعيني

سالوني ع زوجي لويش مايجي وياج

طبعا مااعرف شاجاوبهم

كتلهم عنده شغل وابد ميفرغ

نور يوميه يتصل بيها ابوها ويحجي وياها

لمن خلصت الهوسه يله رجعت

وره يومين اجتي فاطمه كالت جهزي نفسج باجر

لازم تروحين وي حيدر تسوون البطاقه الذكيه

الج ولنضوري

كلبي نغزني

كلتلي لازم ترتبين شالج ووجهج لان الصوره ياخذوها الج مباشره

يعني باجر راح يشوفني

ياالله اتمنى الكاع تنشك وتبلعني ولا امر بهيج موقف

بالليل دزلي مسج

ب 9 الصبح انت جاهزه دقيقه وحده اذا اتاخرتي اعوفكم واروح

الليل كله اني قلقه ماكدرت انام من القلق

شراح يصير باجر ومن يشوفني شراح يكون رددة فعله

صارت ب7 ونص كعد نظوري

غيرتله الحفوضه وبدلتله طبعا صاير يخبش وابيض حيل ودنفوش

كمت اشيله هيج اسيطر علي صار عمره لحبيبي تقريبا 5 اشهر

مااعرف ياترى راح اسيطر اشيله واني بالعبايه والبوشيه لو لا

محتاره شالبس اخاف البس بنطلون ويتضايق ابو زينب

دزيت مسج لفاطمه بلكي تطلع كاعده منايمه

خطيه اجتي بسرعه

كتلها فدوه كليلي شالبس اخاف اخوج يعصب

مااعرف شنو الي يرضي

ملابسي كليتهن بناطيل

لج هاي شبيج انت حلوه بدون اي شي

صدكي بس راح يشوفج اكيد راح ينجن

البسي اي شي يعجبج

هاي وين رايح بالج لبعيد

لج والله مو قصدي اريده ينعجب بيه

والله انرعب منه حيل مااعرف لويش

وهسه عندي مشكله وحايره بيها

مااعرف اشيل ابني واني لابسه عبايه وبوشيه

ومنو كلج البسيهن انت خلصتي العده مالتج

مو هي هاي المشكله اخوج شرط شرط عليه

ابد ماانزعهن

هاي شنو لج هذا اكيد مخبل

هذا اذا قبل ليشوف الجمال مقبل تنزعين البوشيه

لعد اذا شافج شراح يسويلج

اكيد راح يحبسج بالغرفه ميخلي حتى الهوى يمر عليج

مو مهم هذا الحجي

حبابه روحي ويانه حتى تشيلين نظوري

خل اشوف الحكومه توافق لو لا

ابيناتنه الحجي اكثر شخص معقد بهذا البيت هو زوجج

اني مااصيحله غير الحكومه لان من صدك يخوف

حبابه لخاطري روحي

والله راح اشوفه اذا قبل ابدل واروح

ماعندي مانع

صدك اكولج شوكت تنزعينه الاسود انت عروسه جديده ميصير

يمعوده ياعروسه

خليها سكته يمعوده

مااكدر انزعه للاسود هسه

ليش عود

مااكدر انزعه ولتنسين مروان الله يرحمه هستوه طلعت السنه مالته

لبست قميص وبنطلون اسود

وحضرت حذاء سبورت

لبست شالي وعدلته بس اكيد من البس البوشيه راح يتخرب

شلون بيه بالبوشيه والله مااعرف امشي بيها

وفوكاها حاره الدنيه نص شهر التاسع

صارت ب 8 ونص نزلت

كلت ماالي خلك المغرور

ريكته لنظوري ع السريع

وجان يجي ابو نور

بسرعه لبست عبايتي والبوشيه

احس كلبي راح يوكف

صوته يخوف

والنبي انرعب منه وجسمي يرجف من اسمع صوته

الله يساعد المجرم اليوكع بيده

كال فطومه سويلي ريوك

سوتله ع السريع

كالتله راح اروح وياكم

كام يصيح عليها

وشكو رايحه انت

مو ع مود اشيله لنظوري

ليش وامها شبيها ثوله متعرف تشيله

لا بس بالبوشيه ماتعرف تشيله

لتخافين عليها تعرفله

هي الدبرتها واتزوجت بالسر مدبر تشيل طفل

ابقي واسكتي

ويله انت الثانيه كومي واسكتي

حيل انهضمت بس محجيت شي

لبست الشوز مالتي وطلعت ويا

سيارته عاليه

بعدني مواصله للسياره كلي

مو تصعدين بالصدر

اصعدي وره لان ميشرفني تصعدين بصفي

حيل ضجت وانهضمت بس متنفست ولا حجيت

صعدت وره الطريق كله يخابر

كلي انتبهي واسمعي زين

والله اذا سمعت نفس منج لو حركه مو حلوه العب بيج جوله

كليتهم الضباط عرف والله اذا حاولتي تفشليني

لان هسه انت مع الاسف زوجتي مو ساقطه مثل قبل

لو يطيح بيدي اخليلي طلقه براسه

مغرور وشايف نفسه شوفه

وصلنه وشايله هم اكيد راح اوكع لان مااعرف امشي وابني بيدي

اتفاجأت من نزلت اخذه لابني مني

مشه واني امشي ويا

لابس ملابسه العسكريه ولابس نظارات شمسيه

كول شويه واسمع السلام وسيدي سيدي

حسيت نفسي امشي وي رئيس الجمهوريه

كعدني ع كرسي بره كلي انتظري هنا انطاني نظوري

دخل وره شويه كلي يله

تعالي وياي

دخلت للغرفه

اول شي سوه بطاقة نظوري وخلاه بحضنه

واخذوله صوره وكملت معاملته

رجع عليه كلي يله

كمت اوتوت كتله والبوشيه شلون

كلي بس من يطلب الصوره انزعيها وعباتج خليها ع متنج

مجرد يخلص ترجعيهن

وعدلي حجابج زين

هزيت براسي

ديري بالج تزلين زله

بده القلق الحقيقي

كمت اقره بداخلي سورة الفاتحه

واردد وجعلنا بين ايديهم سدا ومن خلفهم سدا فاغشيناهم فهم لا يبصرون

بس كون ميشوفني

بس الظاهر كلشي ميفيد ويا

طلبوا مني ارفع البوشيه

حيدر : بعد مضغطوا عليه اهلي وافقت اتزوجها

بس بشروط

هم الها وهم الهم لاهلي

هي وافقت ع الشروط

مقبلت تنزعها للبوشيه حتى متحاول ترجع مثل قبل الزواج

تذب نفسها كوه

ومحبيت تطلع من الباب

اتفاجأت من وافقت

اما اهلي شرطت عليهم

راح يكون زواجنه ع ورق بس

والي يحاول لو يكلي اتقربلها احركها هي وابنها

ومااريد اشوفها ابد ابد

تسوي العليها وتختفي

ولحد يكلي هذا ابنك لو ابن اخوك

ماالي علاقه بي

حتى اكتب بوصيتي مااله حق باملاكي ابد

وكتلهم كلشي ماانطيها مني لا الها ولا لابنها

ماعليه بيها ولا بمصروفهم

سكتو هم محد كدر يعارض عليه

امي وابويه كالو يابه مصروفهم علينه انت ماالك دخل

طبعا مااعرف شنو السبب الي يخليني ارفض شوفتها

كلبي حاس بس اشوفها راح يصير شي مااعرف بالظبط شنو

عقدت محكمه وخليت الحاضر والغايب عشره بعشره

اني ماردت اخلي شي بس ابويه كلي ميجوز وحرام

وعود من اطلكها اني انطيهيا من عندي

سكتت بعد مااكدر اعارضه

اخذتها عقدنه محكمه طبعا هواي واسطه عندي وخلصته بنفس اليوم

ردت مااعقد سيد

بس اهلي رفضوا كالو تبقى غريبه ابينكم وميجوز

هم تريد تاخذ راحته بالبيت ميجوز تبقى تتهرب منكم

بالليل دزينه ع سيد وعقدنه جان عمرها يادوب 19

كلت بكلبي هاي شلاعبه بروحها جوله

اذا طفله وهيج مسويه لعد اذا كبرت شراح تسوي

اكدت ع امي مااريد اشوفها ابد

كمت اخلي ملابسي الوسخات ع الجربايه

وكمت اتعمد اخلي فلوس بكول مكان

حبيت اشوف اكو نقص لو لا

كمت اداوم ومن ارجع الكي البيت يخبل

منظف كله

وملابسي مغسوله ومكويه ومعلكه

البيت مرشوش عطر جو يخبل

الفرشه تتبدل بين يوم ويوم والكيها مخليه البرده نفس اللون

طبعا طبعي احب التغير واحب النظافه واحب الهدوء

اتمنى اشوف شكلها

عجبتني نظافتها

بس اكو دافع قوي بداخلي يمنعني بنفس الوقت

اتعودت ع هذا الوضع وجنت مرتاح

الاكل هي تسوي بس العشه لا

طبعا مسويت الجنسيه لان الجو حار وهذا طفل ميتحمل

كالت امي وره السنويه مالت مروان الله يرحمه سويها

طبعا اخوتي وامي وابويه اتعلقوا بالطفل حيل وحبوا

يكولون نسخه من ابو هواي يشبها

بس اني ابد محبيته ولا شلته ولا شايفه

من يجيبوا يمنه اني بسرعه اطفر

الحقيقه ابد ممركز بشكله

قرب موعد الذكرى السنويه لمروان

طلبت من ابويه يدزها لاهلها

ويخليها لمن تخلص الهوسه

نور كلبت الدنيه اله تروح سمحتلها وراحت وياها

التهينه بالعشه ورحنه للنجف زرنه ورحنه للمقبره

بقينه للعصر ورجعنه

بعد ايام معدوده وتبدي المدرسه

نور سجلتها بالاول السنه

كلت همزين متعلقه بزينب

اني اعترف من يوم الي دخلت بي لبيتنا

تغيرت هواي شغلات

ماما ارتاحت هواي

ونور اتغيرت 180 درجه

معتنيه بيها حيل

ودائما نضيفه ومرتبه

سلوكها اتغير وي الكول

حسيتها تصلح تكون ام لبنتي

ولو اعترف اكو خوف بداخلي

بقيت اتصل بنور يوميه

واسالها وين طلعتو ووين مشيتو

اني قصدي بس اعرف راح تطلع بدون اذني لو لا

تكول بس اني وجدوا ونظوري

حيل افرح من ادري بيها متعاندني لان اضوج واتخبل من العناد

طبعا اني ارفض اخذها لاهلها ومااعرف شنو السبب

دائما ابويه ياخذها ويرجعها

طبعا مااعرف ليش اني اناني وياها

ابد ماانطيها مصرف ولا اعرف منين تجيب ملابس الها ولابنها

والحقيقه اتفاجأت بيها لحد الان ماطلبت مني شي

راح ابويه واتفقت ويا ينقل نفوسها النه

وانطيته ورقه من مدير الجنسيه حتى يسهلوله

فعلا كملها ورجعوا

وجنت حيل مشتاق لبنتي

انطتني التفاصيل بالظبط

هيج رحنه وهيج اجينه وهيج اكلنه

طبعا مبين عليهم عائله بسيطه

اخواتها عرفتهن كلهن من خلال نور

كلت لامي خل تجهز نفسها حتى اسويلهم البطاقه الوطنيه

كملت كل الاجراءات

بالليل دزيتلها رساله وخبرتها بس تتاخر ابطل

فعلا قبل الموعد جانت جاهزه

وجان ابنها بحضنها

ولابسه العبايه والبوشيه

طلبت مني فاطمه تروح ويانه واني رفضت

اعرف بيها ممتعوده ع البوشيه وهذا واضح عليها

كلت اني اشيله لابنها

طلعنه وطلبت منها تصعد وره

لان بوقتها استحي مصعدها مبوشه بصفي

واخاف منها تزل زله كدام احد يمكن ادفنها عدله

لان كل الظباط عرف

وصيتها بس الحلو بيها مسمعت صوتها ابد

شلته لمنتظر بيدي وجانت هاي اول مره اشوفه واركز بي

من صدك نسخه من مروان الله يرحمه فرق العيون وكلت احنه عدنه وراثه بلون العيون

اني وساره وامير عيونه ملونه

حسيت بشعور غريب من شلته

كلبي كام يدك وحسيت بمروان حي مميت

الطفل يجذب النظر جان

ابيض حيل وشعره اشگر وعيونه ملونات

يشبه ابو هواي بس الفرق لون العيون

دخلنه جوه كعدتها هي وابنها

دخلت رتبت كلشي وطلبت منهم بس احنه ندخل

طلعت لبره وصحتها اخذت منها نظوري

حيل حبيته وهو بس يضحك

خليته بحضني واخذوله صوره واخذوا بصمتي

خلصنه منه وبقت الام

حجت وياي بس بصوت ناعم وهمس يادوب ينسمع الصوت

كلتلي والبوشيه شلون

كتلها انزعيها وخلي العبايه ع متنج

لان ميجوز بالصوره مبوشه لو عبايه

وهاي راح تبقى وياها مدى العمر

وهم كلت فرصه حتى اشوفه لوجها

حيل متلهف اشوف وجها

اريد اشوف هاي الي اخذت عقله لمروان الله يرحمه شنو شكلها

اخذوا المعلومات منها

وطلب اطلع وجها

وخرت البوشيه وخلت العبايه ع متنها

وجان انصدم صدمة عمري من شفتها.......

توقعاتكم حبايبي شراح تكون ردة فعله

راح يفرح من يشوفها لو راح تتعقد الامور اكثر

لتنسون التصويت حبايبي اذا عجبتكم القصه

الصراحه متسوون واهس للواحد يعني المشاهده تعبر ال 2000 والتصويت ميعبر 400 مااعتقد اتعبكم ضغطة النجمه

اتمنى تقدرون تعبي وياكم

تحياتي للجميع 😘😘