رواية بين الفقر والطغيان الفصل السادس 6 - بقلم رونق

مساء الخير ع اجمل متابعين اتمنى لكم قراءه ممتعه

🌹🦋 البارت 6 🦋🌹

🌹🦋 بين الفقر والطغيان 🦋🌹

🌹🦋 للكاتبه رونق 🦋🌹

جان يكول اسمعي لج

اي صوت مانسمع منج

مو حبا بيج جبناج ولا راح نعترف بابنج

بس ابويه كال نسويها لوجه الله

والا لو تبقى علينا

لو تموتين مانستر عليج

لان المثلج عار حرام علي الواحد يستر عليج

كام يحجي علي ابو

لك بابا هاي شبيكم هم انت وهم امك

بعدنه باسم الله

اتركوها للبنيه

جان تكول امه

والله اذا طلع هذا الولد مو ابنه لمروان نفضحج فضيحه

وخل يكون بعلمج

مراح نسجله باسمنه

بيوم التجيبين ندزج لاهلج

لان نعرفج ع مود الفلوس اتزوجتي لمروان

ورحتي مدري وي منو نمتي وصار الحمل وذبيتها براسه لمروان

الصراحه مااستغربت موقفهم

لان هذا الحجي نفسه حجاه اخو لمروان

اني مؤمنه بالقضاء والقدر

اني متاكده الله كاتب عليه شلاع الكلب

بس راح اتحمل لو شيسوون بيه

اكيد كلشي يسوي رب العالمين مكتوب علينه منغيره للقدر

اهم شي اهلي ميحسون بيه

وبس الله يسهلي واجيبه للطفل

ارجع لاهلي وراح اربي بوحدي

ابد متنفست ولا حجيت

بس دموعي تجري

وهو اصلا اختنكت من البوشيه

كالت امه انطيني الذهب لا عبالج ميتين عليج وننطيج الذهب

حسيت بنفسي راح اختنك حيل

انطيتها الذهب وسكتت

هواي مشت السياره بس كل شويه واتخربط

هواي ذبيت من راسي

وصلت الموت بالطريق

مصدكت نوصل

حسيت بنفسي دخت حيل ونعست

نمت ومااعرف شكد نمت

لمن وصلنه كعدت ع صوته

يله هانم وصلنه انزلي وشرفينه

طبعا مااعرف الايام شضامتلي

دخلوني جوه

كلشي مااشوف شي قليل كلش

دخلنه لجوه

سمعت صوتها للمريه كالت لبنيه

ماما فطومه اخذيها لغرفتها

وصيها عود لتراوينه وجها ابد

اخذتني لفوك

وصلت للغرفه نزعت البوشيه حيل ضايقتني

سلمت عليه البنيه

رديت السلام

كالت اني فاطمه اخت مروان الصغيره

كتلها واني زينب

اهلا وسهلا بيج

كلتلي هاي الغرفه متزوده بكولشي

بيها حمام وبيها ثلاجه

ممنوع اطلعين منها لان يكولون ميصير

لازم تبقين لازمه عده لمن الله يسهلج وتجيبين

يعني شلون عده

يعني اي رجال غريب ميصير يشوفج ولا يسمع صوتج

البنيه حيل ارتاحيتلها حبابه

عافتني وطلعت

دموعي تجري رحت اتصلت باهلي وطمنتهم عليه

بعدها دخلت للحمام سبحت وارتاحيت

بعدها طلعت قفلت الباب عليه وكبل نمت

كعدت ع صوت دك الباب

فتحت الباب جانت البنيه فاطمه نفسها

جايبتلي صينيه بيها اشكال واللوان

كتلها ماكو داعي مااشتهي والله

كالت مو زين ع الطفل الي ابطنج

كالت خلي ناكل اني وياج ع الواهس

فعلا اكلت وخلصت

كتلها فدوه اني ممتعوده اكعد و واحد يخدمني

شلون انطيني حل

كالت ممنوع منعا باتا تنزلين

كالت بس احتمال اخويه امير يروح ابيت حيدر

اذا راح راح تاخذين راحتج

سولفنه شويه ونزلت

ضليت اكل بنفسي لو ماخذه الرمز مالتهم حتى اراسل اهلي

بقيت تقريبا اسبوع ع هذا الحجي

مااشوف بس فاطمه

دخلتلي الرمز

طبعا حملي جان صعب بس اذب من راسي ومااشتهي اكل ابد

24ساعه متخربطه

بعد 10 ايام من وجودي  كالت فاطمه من باجر الصبح تكدرين تنزلين جوه

محد راح يجي لبيتنه

ومن احد يريد يجي اصعدي كبل

لعد وين راح يرحون

بيتنا جبير ومقسمينه

اخوي الجبير باني بيت بوحده

واخويه حيدر الظابط هم بيته وحده

واحنه وحد

راح يروح امير يكعد وي حيدر

فعلا ثاني يوم نزلت

وجان البيت فارغ ولا احد بي

حسيت بنفسي حيل مخنوكه

كعدت بالمطبخ شويه وكمت

نضفته كله بس شنو مااكدر دوخه لازمتني حيل قويه

انضف شويه واكعد شويه ارتاح

ماكو اي شي طبخ

لعد ذوله شياكلون

ردت اطبخ بس مااعرف شكم شخص همه

اتصلت بفاطمه وسالتها

كالت ماما وبابا واخواني 2 وبنت اخويه بالروضه واني

كتلها راح اطبخ اني

كالت بكيفج

احنه متعودين لمن ترجع ماما تطبخ لان غدانه ب 3 ونص

طبكته الموبايل

فتحت الثلاجه لكيت اكو بيذنجان

كلت خلي اسوي تبسي

دورت التمن ومندليته

خابرت فاطمه كالت تلكينه بهيج مكان

فعلا لكيته

نكعته بالمي

وبلشت بالتبسي

خليتله ليمون وفلفل حار

بعدين اتندمت كلت اخاف ميحبون الحار والحامض

فتحت المجمده كلت خلي اشوف شبيها مبيها

لكيت بيها انواع المرگ

هاي لان عدهم دوام ميلحكون يطبخون

طلعت وجبة لحم وسويتلهم سوب ابيض

كملت الطبخ

وصعدت سبحت لان حسيت بنفسي راح ينغمي عليه

طلعت من الحمام

سمعت حركه جوه

نزلت لكيت خاله جايه هي وطفله مدنفشه تخبل

سلمت ع خاله ردت السلام من وره خشمها

كالت منو كلج اطبخين

خاله والله ممتعوده اكعد ابد

خلي الطبخ عليه

سكتت محجت

كالت اتغدي واصعدي

حتى من يجون الولد هنا يتغدون

فعلا اتغديت بس شنو كوه مااشتهي

كتلها للبنيه الصغيرونه تاكلين ويايه

باوعت ع خاله

كلتلها روحي اتغدي بيبي

بدلت واجتي

كتلها شنو اسمج

كالت نور

عاشت الاسامي نواره

غديتها وخلصنه

كتلها تصعدين ويايه تنامين

كالت عندي واجب اريد اكتبه

اي عادي جيبي جنطتج واني ادرسج

فرحت حيل كلت لخاله وصعدنه

كتبتها الواجب وحفضتها

خلصت كالت خلي انام سويه

فعلا حضنتها وحضنتني ونمت

مااعرف شنو قصتها لهاي البنيه

بس حسيتها فاقده لحنان الام

كعدت لكيت نفسي جوعانه

فتحت الثلاجه طلعت فواكه

كعدت الطفله

كالت جوعانه

كتلها تعاي اكلي ويايه فواكه

لا اني مااحب الفواكه

ليش حبيبتي متحبيهن

مو طيبات

كتلها لعد شلون تصيرين قويه وذكيه

كالت اكل حلويات وجبس واني اصير قويه

لا حبيبتي ذني يدمرنج دمار

شلون يعني

كتلها اسنانج تسوس وبعدين يوجعنج وراح نضطر نشلعهن الج

بس الفاكها لا تخليج قويه

جربي وشوفي

بديت اوكلها شويه موزه وبرتقاله وتفاحه

اكلت بس مو هواي هم ميخالف

شجعتها وكتلها يوميه ادرسج واخليج اشطر وحده بس كون تاكلين فواكه

وره شويه نزلت كالت اروح لبابا واخلي يشتريلي شوكلاته

كتلها شكتلج اني

ضحكت كالت نسيت

راحت لجوه تركض

اجتي فاطمه

كالت لج شنو هذا طبخج اليوم اله بشده

عبالي دتجذب عليه

كتلها عفيه لتستهزئين والله مااعرف شتحبون

لج والله العضيم حتى الكدوره غسلناهن ورانه

يخبل طبخج

حتى قررنه محد يسوي الغده غيرج

والله الصراحه اني احب الطبخ حيل

بس مااعرف شتحبون انتو

ولا يهمج اني انطيج القائمه يوميه شنحب ناكل

بديت مشوار حياتي بهذا البيت

بس مخليت احد يلمح طولي

صار يوم الاربعين مالت مروان

والناس هواي اجتهم

وثاني يوم راحو للنجف

صحيح كاعد اعاني من الكعده بس مو مهم

نور جانت متعلقه بالايباد

بديت وياها شويه شويه لمن عافته

نقره قصص بالليل وافتحلها البلازما

حيل طبعها معجبني بالبدايه وجانت تعاند

بس هسه لا مطيعه

علمتها ع اشياء هواي

بعد فتره

كلتلي خاله امشي اخذج للدكتوره لان حست بيه حيل متاذيه

رحت مبوشه ولابسه عبايه

مااعرف منو الي اخذنه

بس اعتقد نفسه اخو لمروان

فحصتني واخذتلي سونار

كلتلي امورج توب وانت حاليا نهاية شهر الثالث

كتلها ع الدوخه وع نفسي تلعب دائما

كالت روحي حللي هاي التحاليل

حللت وكملت

كالت عندج فقر دم

راح انطيج مقويات

بس لازم تاكلين كرفس وكبد وزبيب

لازم ترفعين نسبة دمج

كالت راح انطيج علاج حتى نفسج متلعب بعد

انطتني علاجات وجبناهن ورجعنه

سمعت خاله تسولفله

كال بسيطه

نجيبلها جبده وخل تاكل

وكف يم محل وجاب علاكه وانطاها لخاله

كللها هذا زبيب وكرزات

وهذا حليب يفيد الطفل

انطتنياهن خاله

رجعت للبيت وفعلا اخذت العلاج وحسيت بنفسي شويه احسن

نور حسيتها اتعلقت بيه

وجانت شامنعها اطيعني

واتعرفت ع اخوات مروان المتزوجات

وحده متزوجه هنا

وحده بغير محافظه

هم حبابات حيل

دخلت بالرابع وصرت احسن

الحليب يوميه اشرب منه

اني مااحب الحليب بس مجبوره ع مود الطفل

بس اشتاقيت لاهلي حيل

كلت خل اشوف خاله بلكي تخليني اروح

كتلها كالت روحي وابقي اسبوعين او اكثر براحتج

بس امانه عليج مااطلعين من الباب مو زين

ولازم تروحين بالبوشيه

كتلها ميخالف

كالت واهلج

كتلها اكولهم لبسوني يخافون عليه

كالت روحي ماعدنه اشكال

فرحت حيل لان راح اشوفهم لاهلي

مااعرف منو الي راح ياخذني

سالت فاطمه كالت اخويه حيدر

نور كامت تبجي ورايه خطيه حيل ضجت عليها

بس صوت من ابوها سكتت

عندي مشكله اهلي شايلين ومااندل وين بالظبط

وصفولي بس هم مااندل

كلت لفاطمه روحي انت ونور ويايه وارجعوا

استحي اصعد بوحدي

ولازم انطي جهازي حتى يتواصل وي ابويه

كالت مراح ياخذج حيدر

بابا راح ياخذج

فرحت همزين مو ذاك الغثه

رحت لاهلي وعمو كام يتصل ابابا

ووصلنه وجان البيت تعبان

حيل ضجت عليهم

عمو نزل بس شرب جاي

مقبل يتاخر

كلي خابريني اني اجيج

من تردين تجين

بس حاضنه ماما واخواتي

وابويه خطيه يطب ويطلع يبوسني من راسي

خبرتهم حامل وحيل فرحوا

جانت بطني ممبينه كلش

ماما كامت تحجي عليه ليش مذبيتي الاسود

كتلها مااذبه هو هم ميقبل

لج ماما ميجوز

كتلها سدي لهذا الموضوع

اباوع ع البيت حيل تعبان

شلون كدروا يعيشون بي

اووف يربي وين جنه وهسه وين

بس ارجع واكول الحمد لله ع كل حال

سالوني ع زوجي

واني مااعرف شاجاوب

الي عرفته من فاطمه اخو لمروان اسمه

حيدر وضابط

ومطلك زوجته معرفت السبب

كتلهم زين ويايه ومدللني

كلولي لويش مبوشه ولابسه عبايه

كتلهم حيل يخاف عليه ويغار

مقبل احد يشوف شكلي

بس ماما ممقبوله منه شلون قبلتي

شنو احنه بيازمن ومنقبه

ماما اني راضيه

كلتلي ماما ولويش ممسويه وجهج

كتلها وره دورة السنه لمن اذب الاسود يله انظفه لوجهي

كلتلي ماما لعد ليش متغيره وضعفانه

لان ابجي عليكم وممتعوده ع فراكم

واكلي مو شي وحملي اثر عليه

خطيه بابا كلي شنو مشتهيه حتى اجيبه الج

كتلهم والله كولشي ممشتهيه

حملي حيل مضوجني

كلتلي ماما هسه راح تتغير نفسيتج هنا وراح تاكلين

مااعرف بعد يجوز

بقينه نسولف وصدوك تغيرت نفسيتي

يوميه نتخابر اني وفاطمه وتكول

خطيه نور تريد تحجي وياج

حجيت وياها تكولي مشتاقتلج

كتلها حتى اني

كالت شوكت تجين

كتلها بعد اسبوع

كالت لا عفيه هواي تعاي باجر

كتلها مو مريضه مااكدر اجي

زعلت وانطت الجهاز لفاطمه

كلتلي شسويتيلها للبنيه وخليتها تتعلق بيج

والله مسويتلها شي هي بوحدها اتعلقت بيه

زين شوكت تجين لان الصراحه اشتاقينه الج و لطبخجً

كتلها والله ماادري

شوفي عمو شوكت ميفرغ خل يمر بيه

حيدر : قررنه من يرحون اهلي

ابد ميجيبون طاري مروان

ابويه اقترح كال لازم كدام اهلها ناخذ ذهب

ميصير هيج ندخل عليهم

قبل يوم اتواصلت وياها واخذت العنوان وكتلها خلي جهازج قريب عليج

ثاني يوم رحنه اني وابويه وامي

بس من وصلنه قريب عليهم

ادك عليها متجاوب اراسلها هم ماكو جواب

زين مااعرف بيت ابو منو

بقينه نفتر روحي طفرت

كمت اكفر واصيح واغلط

قررت نرجع ويطبها مرض

بس ابويه مقبل كال خل ننتظرها ابيت مروان الله يرحمه

بس باخر لحضه خابرتني

طفرت وياها بس ابد مجاوبت وسكتت

كتلهم راح اتانيكم ابيت مروان وصلوني

ومن تكملون اطلعلكم

وصلوني وراحوا

ع نفس العنوان

اني افكر اكول ليش هيج سوت مااعرف

يعني بنيه بعمر الورد شنو اليجبرها هيج تسوي

بس يجوز عدهم علاقه

واحد يحب الثاني

ولو اكيد ع الفلوس

لان هي اعترفت وكالت انطاني 15 مليون

مااعرف بعد

رحت بقيت بالبيت

بعدين طلبت اكل عن طريق النت

جابو للباب

اتغديت وكملت ونمت شويه

اتصل بيه ابويه كلي راح نمر بيك

فعلا مروا عليه ورحنه للبيت

جانت البنيه لابسه عبايه وبوشيه

كولشي ممبين منها

هاي سوالف امي لان كالت لازم تلزم عده

شكد حجيت عليها بالسياره بس ابد مجاوبتني

بس شلعت كلبي كل شويه واوكف السياره تذب من راسها

بعدها وصلنه وهي بسابع نومه

كعدتها ونزلت

وصعدوها بغرفتها

بقت محبوسه بالغرفه

بعدين كلت لامي خلي يجي امير ويايه

وخلي تاخذ راحتها وتنزل

وقابل تبق تخدمنزبيها

من نريد نجيكم نخبركم وانتو تكلولها

فعلا اجه اموري

اول يوم الي نزلت بي

طابخه غده

بعمري وحياتي مضايك مثله ابد

حيل طيب واكلنه هواي

صحيح التبسي جان بي حراره لان الفلفل حار بس حيل طيب

وسالت امي ع نور

كالت امي فوك وي البنيه

استغربت

بعدين نزلت فرحانه

بابا اكلت فواكه

شنو فواكه اكلتي معقوله

اي والله بابا

شاكلتي

اكلت برتقاله وموزه وتفاحه

واريد تجيبلي فراوله

فرحت حيل لان هاي يوميه بس نساتل وكاكو وجبس

كالتلي بعد مااريد شكولاته

ابويه وامي فرحوا

كلولي خليها يم البنيه هم تعلمها ع الاطباع الزينه وهم هي خطيه بوحدها تضوج

اني سكتت اهم شي بنتي تعوف الاطباع السيئه

حسيت بنور هواي اتعلقت بيها

بعد متحصرني اشتريلها من المحل

كمت اشتريلها بوحدي

بس تحجي عليه مااريد تسبب امراض وتسوس اساني

حيل فرحت

كامت تحضر واجباتها

هواي اتحسن مستواها بكلشي

بعدين كامت تطبخ الغده

يوميه تسوي شكل

امي مو هاكد طبخها وفاطمه مينوكل اكلها ابد

امي ارتاحت لان جانت ينشلع كلبها من الدوام وتجي تطبخ

بعدين كالت امي خطيه وجها اصفر وكاعد تتخربط

بس ابد متحجي ولا تشكي

كتلها خلي نعرضها ع دكتوره

كالت نسويها لا الله هم خطيه

فعلا دزيناها

وكالت امي عدها فقر دم واكلها مو شي

اخذتلها جبده وزبيب

كال ابويه خطيه لخاطر مروان عاملوها زين

وهي تعتبر بغربه هنا

وزين منها عمرها 18 ومتحمله هيج

ولازمه عده ومتطلع ابد

احسن من زوجته الي تفتر بالسوك ولا جنها زوجها ميت

طلبت من فاطمه تراقبها بوقت علاجها واكلها

بعدها كالو تريد يم اهلها

كالت امي خليها تبقى يم اهلها اسبوعين اكثر

طلبوا مني اني اوديها

بعدين كامت تبجي وراها نور

حيل اتعلقت بيها

وهذا الشي حيل خوفني وقلقني

لان البنيه اول وتالي لازم ترجع لاهلها بعد الولاده

قررت ابقى اقنع بنوره

ابويه كال اني اخذها

وهواي وصيناها ممنوع تطلع من الباب

راحت لاهلها

نور ذبحتنه ذبح اريد ماما اريد ماما

عبالي تريد امها الحقيقيه

بس طلعت تقصد البنيه نفسها

بقيت احجي ع امي كتلها بعد ممنوع تخلنها تصعد يمها

شنو ناويه تخليها تتعلق بيها حتى عود نبقيها يمنه للابد

لو تريد تلزمني من الايد التوجعني

كلتلي امي

لك يوم البنيه معتنيه ابتك هواي وهي نور بوحدها كلتلها تقبلين اصيحج ماما

لان مفتقده لحنان الام

عوفها خطيه

ماشفنه الموزين منها حتى نمنعها

كمت اصيح وفقدت

بس الكول بقه يحجي عليه حتى اخويه محمد مقبل عليه

سكتت بعد مكدرت احجي

بس بداخلي افور

اني متاكد تخطط لبعيد

تريد تخلي نور تتعلق بيها

حتى تجبرني واهلي هم يجبروني اتزوجها

بس هيهات لو تموت

مستحيل اخذلي وحده متزوجه بالسر

يوميه يتخابرن هي ونور وفاطمه

فاطمه متلهفه تريدها بس تجي

مااعرف شسوت وخلتهن يتعلقن بيها

طبعا ابد ملمحناها ولا سمعنه صوتها

صار 10 ايام واجت فاطمه كالت بابا عفيه روح جيبها لزينب

تريد تجي

ضحكت كلت لازم اتعودت ع الرفاهيه

وين لاكيتها اكل وشرب ونوم

طبعا ماتعول تجي

حجه عليه ابويه

كال ولك هاي اختك ام نفس هي الي لحت عليها

تكلها اتعودنه ع طبخج

كلتلي فاطمه والله اني ونور لحينه عليها

وليش عود خلوها هناك خل نرتاح منها

كول والله نرتاح منها

لك من يوم الاجت لليوم كمنه ناكل اكل مثل الاوادم

لعد متكلين لروحج زغيونه وكلشي متعرفين

هسه انت شعليك بيه

دسكتي وانجبيد

راح ابويه جابها

ورجعنه مثل قبل

لازم نكون حذرين ماندخل ابد للبيت

بس اذا فوك هي

ما ندخل ودائما بس وقت الاكل نتجمع

طبعا نور صدفه اشوفها

مااعرف شمسويه الها

مرات ابقه احجي ع امي وفاطمه

بس امي تكولي عوفها متخلصين من وكاحتها

صايره حيل هادئه

حتى من اريد اطلها متقبل

تكولي انت جاي تعبان خليها بوقت اجازتك

ابقى صافن عليها

وين جانت نور وهسه وين صارت

اتغيرت 180 درجه

الكول فرحان بيها

بقيت اني ملتهي بالدوام

من ارجع نتغده سويه وي اهلي

يوميه تطبخ شكل

طبعا حيل عجبنه الاكل الي تسوي

بالنسبه لنور طلبت مني اجيبلها قاصه

وبدت تجمع بيها

كتلها شراح تسوين بيها

كالت لمن يصيرن هواي فلوس

اخلي بيبي تجيبلي بدله وذهب

كمت اضحك كتلها ميخالف

كالت ماما شجعها احسن من الكاكو الي يدمرها دمار

بالنسبه للايباد جانت ليل نهار عدها

هسه تقريبا نسته

هواي عجبني طبعها لنور

صارت حيل هادئه

بينما جانت اعصار

امي كالتلي خل ناخذها للبنيه للدكتوره نجيكها من جديد

اخذناها بس هالمره استوجبت دخول مستشفى

لان لازم يديرولها دم ظروري

دخلانها وكالت امي اني ادخل وياها

بس لازم ندبرلها دم نفس زمرتها

انطوني ورقه الدم وجانت فصيلتها +AB يعني تستقبل من اي فصيله

وبنفس الوقت ماتنطي اله لنفس الفصيله ويسموها الفصيله البخيله

عكسي جانت فصيلتي +O يعني فصيلتي تنطي لجميع الفصائل بس متستقبل

اله من نفس الفصيله ويسموها الفصيله الكريمه

لهذا السبب قررت انطيها دم اني

لان بين فتره وفتره اتبرع بدم

كلت هم اتبرع الها لان ماكو فرق بينها وبين غيرها

رجعتهن للبيت بدلن ملابسهن واتعشن

ودزيتهن للمستشفى

طبعا ابد متتنفس نفس

حجزنالها خاص حتى ياخذن راحتهن

عفتهن ورجعت

كل شويه واتصل بامي اخاف محتاجه شي

بعدين كالت راح انام

اني هم نمت

ثاني يوم رحنه اني وابويه وجانت زوجة محمد ويانه لان دكتوره بنفس المستشفى

سوينه الفحوصات اللازمه واتبرعت

وهي هم خلولها

بس يكوللون بعدهم مخلولها الدم اتحسست واتخربطت

وخروا عنها باللحضه

كالت الدكتوره منكدر ننطيها لان اتحسست من الدم

لازم نعالج الفقر بشكل جدي

لازم تنجبر ع الاكل الي يحتوي ع الحديد

الكبد والسمك والزبيب والكرفس

قررنه نجبرها ع الاكل لازم

اخذولها سونار واتحدد نوع الجنين

وجان ولد وصحته تمام

وحاليا هي بشهر السابع

بقوها بعد يوم وثاني يوم خرجوها

رجعهم ابويه

واتفقنه لازم تاكل

بعدين كال ابويه خل ندزها يم اهلها احسن

فعلا جهزوا نفسهم وهاي نور هم سوتها مناحه

وجانت فترة عطلة نصف السنه

كال ابويه خلي تروح وياي هي وفاطمه وارجعهن وياي

كتله عادي روحوا

فرحن حيل

راحوا تقريبا ب9 الصبح

وبقوا للغده

بس فجأه خابرني ابويه

وجان يكولي ......... وكع كلبي بالكاع

توقعاتكم حبايب شنو الي صاير

لتنسون التصويت والتعليق حتى تنجح القصه بفضلكم وتوصل للمركز الاول

وراح اكون ممنونه منكم

تحياتي للجميع 😘😘😘