رواية بين الكاف و النون الفصل الثامن وأربعون 48 - بقلم saja altaie95

بــيـن الـــكــاف والـــنـون

الـــــخـمــســون

بـقـلــم...  سـجـى الــطائـي

نشف شط الگصص
وأنشطب رب الهم
ولا عثرة هـوه تحرك زراگ الدم

أحس روحي . .
ضوه مصلوب . .
شما جاسته زلوف الريح
يتكسر بحضن الماي

وبهداي أحترگ بهداي
گضه عمره الشمع من يحترگ سكته

وين الگه اليهيسني
درفعني الحزن حد ماصرت كاروك

ـــــــــــــــــــــــــــــــــــــــــــــــــــــــــ
لاتنسون تابعون حسابي الانستا متقصرون
ضورة احد الابطال النزلته لهسه محد حز منو ☺️

اذا حزرتو انزللكم بقية الابطال

ـــــــــــــــــــــــــــــــــــــــــــــــــــــــــــــــ

ريــــحـانــــه

نقلو ماما للمستشفى تحت القلق وسهر ضليت اكل بروحي ليش عيطت وخليتهم يخافون تكتم لازمه ابنها وتفتر عود خايفه ماادري صدك خايفه على امي

طلع الصبح واني على كعدتي حتى صلاتي نسيته كمت تعوذت من الشيطان وصليت كملت اخذت وصله مااريدها قريت عليها ايات السحر ونفخت عليها مسحت المكان وذبيت الوصله بلزياله

للضهر اني بله اكل تكتم تفتر يمي تريدني اكل واني بالي مو يمها نفت الباب ركضت  رضا وبابا لازمين ماما يكودوها

وجها اصفر تمشي بس على كيف

كال بابا " سولها اكل  كامت تكتم واني كعدت كبالها
بابا تجاها على الحايط تتلوه من الوجع

رضا كال "شكووو تعيطين ماتبطلين عياره على شنوو"

ريحانه "ماادري خفت"

رضا "من شنو خفتي بعبع شفتي هوه مي بلكاع انتي ماتستحين صوتج ونص اليل ريحانه حابه تنضربين
ماعدي مانع ادبج من جديد"

ابو رضا "ابني شبيك وياها قدر وصار قابل متعمده تاذي امها مااتدري"

رضا "يابه انت ليوين اضل بدلالك الها هاي حالتم امي بسبب دلالها  وتنعوصها اريد تفهمني ليش صيحت شافت جني لو حرامي طفر"

ابو رضا "ابني صار الصار عوفها هسه المهم امك طلعت شلامات دفع الله عما كان اعظم الحمدالله يراد صدقه ندفع"

رضا " باعي هاي المياعه تبطليها لا اشوف شغلي وياج ساكت عنج اكول خطيه ماتتحمل ضربه مره لاخ اخبزج خبز فهميني عليمن عيطتي تكتم شافتج من اخذي مي ودخلتي الغرفتج يعني كلشي مابيج "

فتحت عيوني مصدومه التفتت تكتم بيدها  ابنها تهز بي ينام تكتم "اي اني جنت جوه شفتها ماكان مبين عليها شي حتى اخذت دوركت مي وفاتت الغرفتها رضا يمكن سمعت صوت بزون لو شي وخافت"

ضليت ساكته للعصر اني مكابله امي
مرت الايام سبوع وره اسبوع امي تحسنت بس ضل ضهرها يوجعها صار عدها انزلاق باحد الفقرات

حايره شسوي بأمري البيت يخنك ماعدي احد اشكيله غير اماني وشبيدها اسوي ضليت ملتزمه رجعت بعبادتي مثل الاول  بس ثكل احس على اجتافي

خلصت شغلي ودكيت على سكينه

سكينه "بذاته ولا حجايه شكو مخابره هسه"

ريحانه "ههههه احجي لو اسكت"

سكينه "هاي لو صديقتج  اذانج مايعه من الاول واني  ياطير طير بعد ياهوه يكضج"

ريحانه "هاي شبيج متردين اخابرج والله هاي حلفت بس دكليلي لا تخابرين ابد تحلمين اتصل عليج"

سكينه "انجبي لكتها من الله علمود تعيريني بيها وبن متكعدين دكليلهم سكينه كالت لتتصلين واني متاكده
انتي فاهيه بحجايه وحده تفضحيني"

ريحانه "جدو شلونه مشتاقتله مشتاقه الخالو مازن"

سكينه "جدو زين دوم يسولف بيكم زيريد يجيكم بس تعب الطريق ماايكدروتعرفين خالو لهسه زعلان عليكم ومايريد يجي يكول ماقدروني"

ريحانه "هوه خالو مايعرف المريت بي مغلوب على امري اذا احجي رضا مايقبل وصاير يمد ايده حتى من بابا يحاجي ماايقبل واني مااريد اصير مشاكى بينهم ماما ماتتحمل بعد"

سكينه " حبيبتي انتي ليش هيج مستسلمه تخافين تواجهين اخوج واحد ميستحي مو زعلين لان صدك صاير اخو مرته مكلوب مو رضا النعرفه حتى على خوالي كالب "

ريحانه"الله يهدي هوه اله فتره متبدل وضعه ومايسمع كلام احد واليريده يصير "

سكينه"محد طايح بيها غيرج سولفيلي شكو ماكو يمج "

ريحانه "اريد اسولفلج وحايره سكينه عقلي حيوكف"

سكينه "لحضه  انتي وحدج اذا بلهول اكعدي بلغرفه وتأكدي محد يسمعج"

ريحانه "اني بغرفتي ليش اكعد وحدي"

سكينه " يربي يلثول ريحانه عزيزتي مو زعلين مني انتي تفتين كلبي وتورمينه  هسه سولفيلي شكو "

ريحانة كعدت اسولفلها الشفته بذيج اليله لحد هذا اليوم سكينه سكتت تسمعلي كملت كالت "متاكده تكتم شفتيها ولج هاي بت عمتنه مااصدك اعوذ باالله "

ريحانه "واني هم ماصدكت لو واحد شيحجي مااصدك لحد ماشفت بعيني سكينه خايفه اني المن احجي اخاف اكول لمي وتجذبني لو اصير مشكله واذا عرف رضا يذبحني  ماايسكت واني بديت اخاف كلش"

سكينه "سدي وبعدين اتصل عليج"

سديته منها طلعت للهول تكتم لا زمه عباس تبدله بعصبيه وهوه طفل عمره اشهر كتلها "على كيفج الولد ينمتن بعدهن اعضامه راخيه"

نترت "معليج بي اني اعرف شلون ابدله"
ريحانه "جيبي مبين عليج تعبانه منه عوفي عليه وروحي ارتاحي "

تقدمت اخذه دفعتني بكل قوتها صارت وكعتي على ايدي اليوره " دوووخري صايره حنينه كلشي مايغزر بيكم ميت وجه الكم حيري بروحج وعوفي ابني"

بهيج مواقف يربط الساني مااعرف ارد كمت دخلت للمطبخ نهضمت بجيت كارها روحي كارها حياتي واصله المرحله مااتحمل نزويت بغرفتي ضليت اردد استغفار ذكرة ايه

بابا مره كال هاي من المعجزات اليرددها بقين وايمان قوي هواي تفرج عنه (من يتقِ الله يجعل له مخرجاً و يرزقه من حيث لا يحتسب  ومن يتوكل على الله فهو حسبه ان الله بالغ امره قد جعل الله لكل شيء قدراً) 

البيت من ادخله اختنك رغم والدي ملتزم بقرئانه وصلاته والدتي هم اني متاركه عبادتي

سيد مصطفى لليوم مابدر منه تصرف موحلو بلعكس محاوطني بعيونه وين مااروح مصرفي ماعايفه يدزلي
لو يجي يسلم عليه يشوفني شويه ويروح

ايام وتكتم شاده وياي خفت سامعتني من احجي ويه سكينه
ضليت اتكرضم

شهر مر كاعده بلسنتر اراجع محاضرتي دك جهازي رفعته سيد مصطفى داز مسج اذا ماعدج شي خلي اخذج نتغده

سديته غمضت اخذ نفس ميخالف ريحانه تعودي هذا زوجج هسه لازم اكسر حاجز الخوف اخذت جنطتي وملازمي دخلت لغرفة الأساتذه لكيت استاذ المحاضره ابتسم بوجهي

كال "توكلي بتي السيد اخذ مني اذن"

نصيت وطلعت مبين يعرف اني خطيبته طلعت اندل مكان سيارته لكيته منتضرني صعدت كلت "السلام عليكم"

ابتسم وهوه داير وجها اتجاهي "وعليكم السلام ورحمة الله انستي"

شغل وتحرك السياره دافيه الجو بارد اعصابي رخت دار " شعاجبج يامطعم نروحله

ريحانه "مااعرف مرايحه مطعم قبل"

سيد مصطفى " هنه مطعمين راح ادخلج بواحد متاكد من اكلهم راح شكريني بعدين "

ابتسمت خجلانه على اعصابي دااجامل وصلنه كعدنه وهوه طلب وكعد يسولف يحاول يخليني اندمج ويااا واني مرات اتوتره ومرات عادي اندمج ومرات التزم السكوت

وصل الاكل صدك كان طيب نقشت وضليت ساكته هوه ياكل ويسولف كمل راح غسل ورجع كال "ريحانه اريد اسالج على فد مسأله لاتضنين مارايد بس اكو استغراب من ناحيتي"

ريحانه "تفضل"

سيد مصطفى "ليش غيرتي رائيج وقدمتي تاريخ الزواج و شرط والدج بيوم العقد عن لسانج  تكملين الجامعه يله نزوج"

انصدمت ضليت اباوعله "اني مقدمه الزواج اني ماادري شوكت حجيت بلزواج"

سيد مصطفى "اخوج قبل يومين كال استعجل وبلعطله نصف السنه ازوجو ماله داعي التأخير

سألته ريحانه قابله كال اني الاقرر واعرف مصلحتها مايحتاج
ترجع الريحانه وهذا رائيي

اني مااريد افرض عليج اشوفج مامستعده  وخجوله لهذا اليوم انتي ماشيفتني خطيبج معتبرتني غريب والدليل
اني الاخابر واني الأسال كل مبادره منج ماكو

ماالومج حقج بعدج مامتعرفيني وتربيتي على مبادء وقيم
احيي والدج وافتخر كوني ناسبتكم هسه اريد منج جواب

رايده زواجنه هسه حتى اجهز نفسي وابلغ الاهل وانتي هم تجهزين امورج ملابس والتحتاجي هاي سوالف البنات

ضليت لا اخذ ولا انطي بسرعه يصير عدي تشنج بلعت ريكي
رضا ليش هيج يسوي وياي

رجعت للبيت الدمعه بعيني دخلت امي كاعده صلي على كرسيها الخشب بعد طيحته ماتكدر تصلي واكفه

فتت للغرفه بددلت وتوضيت وصليت  كملت
فكرت  بس تكتم كدامي اذا احاجيها تقنع رضا يتراجع

طلعت للهول لكيتها خاله ابنها هي من جابت اغلب وقتها جوه قليل تصعد وبس من تنام

تقربت يمها" تكتم اذا اطلب طلب سوي "

تكتم رفعت حاجبها نترت "شكو جايتني"

عصرت ايديها حيل ربي سهل عليه " رضا ليش يريد زواجي بلعطله واني بعدني مامكمله جامعتي "

تكتم "واني شكو ذاك اخوج صعدي حاجي"

ريحانه "انتي متغيره وياي صيحين شمسويتلج"

تكتم تقربت وحجت بعصبيه "والله انت كل خير مايصير بعينج وماتستاهلين واحد يسويلج شي لان ناكر الجميل"

ريحانه "اني ناكره الجميل شسويت"

ابتسمت "تحجين عليه كدام سكينه"

دنكت همست بذني "اكدر اخلي يتركج بس شرط تقبلين باخويا

سديم
مرات الحياة تنطيك فرص تعوض الندم تصحح الخطأ

ابويا ويانه من السيء الاسوء ويه الغريب حبيب
ويانه ذيب

اريام تقدملها واحد بكد ابويا من ضيم والدي ومرت حسام قبلت وزوجت خلال شهر عافت ابنها يمنه متعود علينه

بده الدوام قصي مثل عادته تحشيش وضحك تعودت عليه ويشوفني ابتسم علىسوالفه يكوم يشيم

بلشت المدرسه كمت مااشوفه بس بلحله يوكف بلركن على فطاريتي من المحه ياخذني الواهس ابتسم اخرب ضحك

ضعيف واسمر وعيونه ملونه مابي كل جمال اقلد ودق وياي تضحك ايام مشت

امي بشكل يومي تروح تنضف بيت تحسين وترجع شاده راسها من كميت الوصخ مره رحت وياها اساعدها بعد

ماامي ماراحتلهم سبوع مريضه اليوم لحيت اروح وياها
لبست وطلعنه وياها وصلنه دخلت لكيتها كاعده

اول مافتت كالت" هلو خاله شلون صرتي "

امي "هلا يمه بخير هسه صرت زينه"

نعمه "هاي سديم جايه اول تالي"
سلمت وضليت اباوع الاوصفه قليل 

حسيت نفسي خدامه ودازه علينه نضفلها بيتها رحت للترك انضفه سديت خشمي المنور من يم غرفتها تل حفوضات الجهال واصل للشباك 

والشباك بينه وبين الارض مسافة متر واكثر لفيت خشمي بشال ولبست جفوف بس كملت طلعت اركض اريد اتنفس

اريد بس نكمل ونطلع هاي امي ماتفوت للمنور بس تنضف داخل البيت وتطبخ وترجع وهي نعمه تغسل الطرمه

رجعت للبيت وامي كوه تمشي تعبانه حجيت الاماني
هزت راسها شبيدي على اخوج نوب جاب امها بصفها

وهذا الثاني حاير يجيب ويعبي بحلكها ويشبع عينها وهي عينها فارغه سديم خلي عينج بعين الله وتحملي لحد ماربج يفرجها عليج وعلينه

الايام البقيه دوام ودراسه ذبيت كل جهدي على دراستي

هاي الايام كعدنه ندرس للوزاري وهي مرحله صعبه نفسياً وجسدين شغلت بالي كله بلدراسه ومتحنت والحمدالله

ماضاع تعبي صح مو معدل عالي بس كدرت ادخل جامعه نقبلت تربيه جغرافيه

هاي الايام اشوفها احله ايام حياتي صرت بلجامعه
وكمت احضر للدوام يوميه ماخذه امي للسوك اشتري ملابس

مااعرف هاي الايام مجرد جرعت مخدره

اليوم كاعده من وكت واكفه ارتب بوجهي رغم مشاكلي ويه اماني على لبسي واني مقتنعه وهي تريدني نسخه منها

لابسه تنورتي مفصله على خصري وياها قميص بارز ملامحي وشال وحذاء كعب مكيفه اطكطك بي

وصلنه للجامعه ليغاد ودق واكفه اشرتلها رحت ركض
حضنتها جرتني اماني " شويه انتبهي على نفسج انتي مو بلبيت "

سكتت ماردت تخرب فرحتي دخلت وياي ودق فتت للقسم همزين طلعنه نفس القسم معدلاتنه متقاربه

كضينه اليوم تعارف على الجامعه فرحانين فريناها فر
ماخلينه كليه مافتنالها  اكلنه بكافترية وطلعنه نفتر بلسنتر

ودق لزمتني"ولج باااعي كدامج "

سديم "منو كدامي بس الطلاب"

ودق "ركزي يلعوبه شووفي"

ركزت زين قصي مقابيلي بلعت ريكي متغير شويه صايره بي شوفه وسمنان  درت وجهي امشي نكوم يضل صافن بوجهي واني تلزمني الضحكه

طلعنه للخط اني وياها شكلنه ويه اماني مؤقت على ماداوم صديقتهم حامل وماخذه اجازه

مرت الايام وقصي بكل نزله للسنتر  ايصادفني نضراته حلوه مرات باب الأستعلامات تعودت على شوفته

بيوم كالو اكو مهرجان كل طلاب المرحله الاوله يرحون القاعة المؤتمرات يحضرون المهرجان

كلنه دخلنه للقاعه كعدت بلستولات المقدمه شويه قريبه واكدر اشوف المهرجان وبصفي ودق كدامنه سراويين سره للدكاتره والاساتذه

ضلينه كاعدين بين مالتمو الطلاب انملت القاعه فات قصي كعد بلستول الكدامي توترت

ودق ابتسمت سكتت طول المهرجان بالي مو يم المهرجان  التفتت بدوم ميباوع بله زحمه قلم "

ودق تباوعلي مستغربه واني مثلها فتحت جنطه انطيته قلم كعد طول المهرجان يفره بين اصابعه

ساعه ردنه نطلع صارت هوسه صار وراي كال بصوت ناصي "لا تتحركين يخف الازدحام وطلعي كعدي مكانج"

كعدت شمر بحضني ورقه فتحت عيوني شلتها ضميتها بجنطتي

طلعنه اني ودق صعدنه بلخط طول الطريق بالي يم الورقه بس وصلت بدلت ضليت افكر شكاتبلي

ضميت الورقه بصدري دخلت للحمام فتحتها

كاتب رقمه وعباره "ممكن احـبـــــــك"

ضل كلبي يرجف بسرعه طلعت امي واكفه تخبز شمرتها بلتنور  كلش اثر بيه العباره ضل كلبي طول اليوم يدك وضعي تخربط

ايام وقصي شخل تفكيري رغم شخصيته الاجتماعيه جنت اشوف بي غرور ماايصادق هواي كم شخص يمشي وياهم

داومت  كملت محاضرات ثنين ماتنين المحاضره الثالثه اقترحت ودق نطلع  ناكل شي بلنادي عدنه وقت ساعه

اخذت جنطتي ومشيت وياها جنت معتنه بنضافتي وملابسي كلها على الموديل جان تحسين وحسام واريام من زوجت كامت تناوشني مصرف كلهن اجيب بيهن ملابس واحذيه وجنط

معتنيه بادق تفاصيلي اضافري مصبغتهن مكياجي مرتب
واني بيضه كلشي يبرز على ملامحي اغلبيه يشوفني يشبهني بايناس طالب  اضحك ويني وينها

طلبنه  كعدنه ناكل اسولف واضحك ودق وكم بنيه ويانه
هوسة النادي وضحك الطلاب واكو طلاب يقرون

اثناء سوالف رفعت راسي اغطي ضحكتي بيدي طاحت نضرتي على كرم مقابيلي كاعد وعيونه عليه

مسحت حلكي درت على ودق كتله امشي نطلع
ودق "بعدنه مامكملين اكل"

سديم "امشي ضجت"

ودق "ولج وين نروح خلينه هنا احسن ماانفتر وهسه تلكين السنتر مابي مكان تكعدين بي اله نطلع بلحديقه"

سكتت كعدته كبالي ضوجتني قيدني بنضراته بين ماكملت ودق طلعت روحي دخلنه للمحاضره

كملنه وطلعت دنعبر للخط نمر من الكراج اشوف
قيص واكف ويا كرم ومبين بينهم جدال قوي

ودق واكفه تباوع كالت "هذوله منين يعرفون بعض"

سديم "نسيتي كرم ان بنفس المعهد مال الدورات بس داخل غير مدرسين"

ودق "هذا شبي عصبي دهر ولج فدلا من وراج يتعاركون"

سديم "مو الاميره ديانا اني مشوفين بس يحجون وين تعاركو اسكتي ودق لا تهبطيني اكثر"

ودق " اذا ماطلعت السالفه بيها انتي اكص ايدي "

سديم انوب حجيها خوفني كتله "دمشي شعلينه بيهم"

رجعت للبيت والخوف موتني

ايام اني من اشوف قصي لو كرم اشرد مااباوعلهم
سولي خوفه

لحد. مابيوم كاعده اقره بلمكتبه وحدي ودق ضلت تستنسخي  الماده شويه بيها صعوبه مركزه بلملازم جهازي بصفي خابرت اماني تطلع من وكت

مندمجه اقره  حسيت شخص وكف فوك راسي باوعت كرم  نصدمت ضليت اتلفت محد موود عرف كلها طلاب

كال "مرحبا سديم"

سديم "هاا هلو مراحب شلونك"

كرم "زين دامج انتي زينه"

ابتسمت مجامله "الحمدالله" كلتها ارجف ودنكت

كال " اريد احاجيج شوكت عدج مجال "

استغربت "هااا يعني شنو تحاجيني اني مااكدر اكعد وياك ولا اوكف اسولف تعرف اهلي مايقبلون واختي وياي"

كرم "مراح اسببلج احراج مجرد كم سؤال واليحجي عليج اشوفه كرم ابن منو كلها تعرفني"

سديم "لا عفيه كول هسه شنو تريد وروح"

كرم "لا ميصير خلصي امتحانج وتلكين واكفلج وره الكليه  منتضرج"

عافني وراح خلاني اطكطك مااعرف شلون كملت مراجعه
ضليت بلقاعه امتحن خلصت من وكت ماطلعت امسح واكتب في سبيل اضيع وقت

صار موعد المحاضره الثاني طلعت من قاعة المتحان لقاعة المحاضره بيومها ماطلعت من القسم ودق رادت اطلع كتلها انتي روحي وحدج

طول اليوم كضيته بلقسم ماطلع وهيج كضيت بقية الايام
قصي نفس وكفته ماتغيرت بس وجهه مايكصه السيف

عرفت اكو صاير شي 

اليوم جمعة وكاعده من وكت امي مثل عادته تروح ساعد مرت تحسين واني واماني علينه البيت للعصر كملنه كل البيت

جان بيومها حمله على البيت كعدت اكلب بجهازي باوعت رقم غريب داك  وراها اجاني مسج ستغربت فتحته شعر

خفت هذا منو ضليت لازمه كلبي ايام
الرقم يوميه رساله شعر مايمل ويدك واني
مغلسه من غير مقاطع اغاني

داومت بنص المحاضره خابرتني اماني طلعت جاوبتها ضلت تلح كالت من ترجعين كلشي لتحجين طبين الغرفتج  بدون صوت

خفت كملت دوامي بس اريد اوصل رجعت دخلت
تحسين كاعد وايده على راسه شافني ماحجه

حتى ماسلمت من الخوف فتت للبيت نعمه كاعده وتهز بيدها صاحت هاي البس منك مووو شوووف الملابس شوف الجنطه واني حسره عليه وتعيرني تصرف على امي

دار ضربها شمرت ابنها وصاحت "غصب عنك تصرفي عليه وعلى اهلي فوك مامتحمله فكر مالتك وحسره عليه الكمه وانت تكت صرف على هاي الشكول تقصدني

ركضت دخلت للغرفه اسمع صياحهم وحسام صوته يسكت بيها اماني خاله راسها على ميز المكينه تتنهد

ضليت ارجف من وراي هاي المشكله اماني ساكته

تنهدت بالم" تفتهم  اريام من زوجت حتى لو شايب كسبت راحت كلبها "

امي يمهم تريدها تسكت مااعرف شجابها النه للعصر راحت وتحسين جاب ملابسه غلستهن امي وحسام اخذ مرته وصعد

لليل كاعدين على العشه ابويا "شمسوي ويه مرتك"

تحسين "وصلك الحجي"

"شنو مستنكف حضرت جنابك لا ن عرفت مو ابوك وجبير مالي قدر واذا عرفت مالكم جبير انتو"

تحسين "حجي مو هيج الحجي احترامك واجب واني ماقاصد بس سالفه بيني وبينها"

" صوتكم لبيت جدك واصل بعدين مادكلي شرايد منها البنيه حبابه ومخلفتلك ثنين وكاعده بيتها شتريد اكثر من هذا احمد ربك واسكت "

تحسين "نسيت ماترادد ولا تفتح حلكها ههه حجي ليش ماتخليني ساكت مو الله راحم بحالي ومنطيني صبر عليها وكاسب اجر على تحملي لو غيري يشمرها وينعل يومها"

"شتريد اطلك حتى اكسر ضهرك"

تحسين "هسه اني مطلك استغفرالله"

ضل ابويا يحجي مقابل مثل عادته صف ويه  نعمه على ابنه

ايام واماني كالت  عم صديقتي يريد يتقدملي واني قابله خلت امي دكمز وهي قافىه قابله بي

ايام واجو اهل الولد على شرج امي بيومها بجت

دخلت على اماني ساكته تخيط ومامهتمه

"مقتنعه تاخذين واحد عده زوجه ويريدج علمود الاطفال"

اماني "شي اكبر منج لدخلين نفسج بي"

سديم "اني كبرت مو طفله اكدر اتحاور وياج وانتي اختي صح اكبر مني بس هذا مايمنع تاخذين رائيي"

تنهدت متاكده مارايده "سديم يجي يوم تمرين بلمريت بي وهم سوين مثلي هذا طريقنه الماله ضهر يوكع والايام تلوي

عيشتنه صعبه اني بتعبي دهلت جامعه واصرف على نفسي اشوفيني مرتاحه عيوني مااشوف بيهن من السهر على المكينه

ضهري صار بي سوفان من التدنيك بليوم اخيطلي اربع دشاديش نص نهاري افصل واخيط وادرس عيشه هاي

حصره عليه البس حصره عليه اكل مثل البنات كل البنفسي ماحصلته ليش تعرفين  ليش

ماعدج اب عادل ويخاف الله

ماعدج ام قويه وتحارب

ماعدج عمام بيهم حظ

ماعدج معيل يباوع لحالج هذا حال شابه فكت شعرها مشيب بجيت ولج اريام ازوجت رجال اصغر من ابوج بكم سنه شااايب واريام ستوها ثلاثين ليشش

تعرفين ليش ماعدها تلبس ابنها تشكي من كلاتها من انطاها وكلها امشي شوفي طبيب

سديم الزواج النه حبل نجاة واني هذا حدي اريد اعيش باقي عمري

سكتت شبعت بجي وهيه تحجي بحركه دمعه مانزلت منها اماني مااكدر اوصفها

ايام ودزو الموافقه وصارت خطبتها

........... يتبع

اعتذر لقصر البارت

تنويه حبايبي تره البارتات السابقه مايقل عن 3000 كلمه مااشوفه قصير بس لان اخلي كل بطلين بارت اشوفو مو كافي

اني عن نفسي اتمنه اكتبلكم البارت 5000 كلمه
صدقاً مااعدي مجال وهذا التأخير بلتنزيل يادوب
افرغ نفسي واكعد اكتب