رواية بين الكاف و النون الفصل الرابع وأربعون 44 - بقلم saja altaie95

بـــــيـن الـــكـاف والـــنــون

الســادس والاربـــعــون

بقـلـم...... ســجى الطـائي

وعيونك ابغير عيونها اتهنت

وجفوفك ابغير اجروحها اتحنت

يا تل الورد . . تل آخر السباح

حته اطفه . . من اشوف ارويحتي انتلت

ســيف الـــديـن

(يضيع جروحي غواها ويعتلگ شوگي جرح وانت دواي)

صح حلم وانه رسمته بكلبي خطيت كل نقوش الحب
ردته مثل فراشة ربيع بجماله همساتنه وشوكنه المعلول صباحنه المتغني بنزف ارواحنه صار واقع

مشيت من زياد مافرحان موهذا الردته مو بهيج وضع
ردته طيب وتشفه جروحها وتجيني بكامل شوكها

ثاني يوم انطيت خبر للشيخ وطلعت للدوام زياد محاجي والدها الرجال ساكت كتله لاتضغط عليه تأنيب الضمير ذابحه

مشه اليوم بين التحضيرات رغم وضع البيت الشيخ جبرهم يجهزون رجعت من الدوام لكيت زياد جايب ذبيحه مخابر الشيوخ

فرات بلش بلحديقه نشرات وكراسي حسيت بحماس كل هذا مامرتبله تفاجئة بزياد وفرات والشيخ وياهم حسيت بفرحتهم

الحجيه جنها ماراضيه حسيته من دورت عينها وراي ماتعرف عظمت سعادتي اليوم متعرف كبر جرحي

لليل اتفقو باجر المشيه

خواتي براء والبقيه اجن رغم طريق حركهن فرات حرك ومكالن لا اسمع هوستهن وفرحانات الفرحتي دعيت ربي
يمشيها على خير مااريد يجي شي يخربها

اجه هذا اليوم صارت مشيه مو على البال صعب وجماعتي اجو سدو مكاني مااعرف شلون دبرولي اجازه واني مستوفي
باجازاتي

الوالد كال اني اعقدلكم ابوها كاعد من طلبها الشيخ عيونه دمعن كسرني بدمعته ماتمنيت اشوفه بهذا الضعف المر بي
كسر ضهور الله يكون بعونه

عقدنه سيد وهلاهلهن ترس البيت كمت سلمت على الحضور طلعت بره الولد شغلو ديجي وركص صدك فرحه عمري مافرحتها ركصنه فرات وياي يركص

زياد واكف صاح لاصيرون مزعطه دكولنه جوبي كلها صاحت عشت ودكو الجوبي لزم راسها زياد ورا الامر صعب واني وجماعتي الحديقه اكثر من ١٥٠متر بس الواجهيه والكراج

ساعه نركص جوبي الشيخ كالهم بويه خلو يروح يلبس مرته الحلقه وانتو كملو

الحجيه وامها جايبات الحلقات دخلت تلكني خواتي هلاهل وجكليت ماجرئات ابوسهن من جبينهن ابقه غريب رغم ازواجهن ماعدهم اعتراض اني استصعبها

مشيت مدنك دخلتني امي

كاعده مدنكه عصرتني عصر بدموعها كعدت بصفها رغم مستحاي لزمت ايدها عصرتها زادة بلبجي همزين محد غريب
بس خواتي وكم مره من الجيران سوتها الحجيه علمود تسد حجي العالم

نصيت يم اذنها "دموعج عليمن مارايده الخطبه لو رافضتني علمود هسه اكوم افركشها واخرب الاول والتالي لا تسوين روحج ضحيه بعيون الناس وعبالهم جابرج"

خنست تهز براسها لا

"شمالج تبجين هذا اليوم شكد جنه منتضري انه وياج وتمنينا"

همست سيف ماادري خايفه منك وخايفه من الزمن كلشي
بيه متوتر لاهذا بس كدام الوادم وبعدين كلشي يخرب
وانت متريدني وهذا السوي عطف منك "

ابتسمت بعيونها السحرني بجمالهن بياضها الناصع شعرها
سبحان المغير صاير مي واصل لرجلها همست الهمسه
"اذوب بانفاسج هذا اليوم الخايفه منه اليوم نولدت
وحسيت بطعم الحياة كلشي مخططله راح نعيشه اني
وياج

انتي رويحتي اكو واحد يخاف من روحه اله اذا اناي مرايدتني وضحكت بداخلي اعرف بيها ميته عليه

ابتسمت يربي تنكط برائه مسحت عيونها وبينت رصعت خدودها هاي شنو اول مره اشوفها حسيت الدنيا ضحكتلي

همست والخجل ماليها مدنكه" بلعكس فرحانه بس جنت خايفه منك بعد متريدني "

جريت ايدها بستها مامهتم للداير مدايري "يامخبل يشوف هذا الكيمر ومايريده مو حكي من اسميج جبنه"

دنكت تضحك ورجعت رفعت راسها عيونها حايره "يعني صدك ماتقشمر عليه"

وداعتج وداعت ابوي ومعزته بكلبي اموت بيج وماتغير بحبي شي زاد مانقص "

وجها فتح براء تغامز وسويلي حركات كتله طيري بابا بعد ماهدها ضحكت امي "ولك يمه صاير خفيف مامتعلمه عليك هيج اكلهم هذا مو ابني سيف مبدلي مدري المراكز علمته"

سيف "حجيه ابنج فرحان واسعد يوم بحياته"

الحجيه "يمه عساك دوم كلبك يشوف الراحه وعيونك شوف السعاده وينور دربك ويحرسك الشبابك"

كمت بست راسها وصيتها دير بالها على الما

ضربتني على جتفي صارت مرته وكام يوصي بيها امشي ولك بعدك ستوك استجن وشوف دربك لا تعثر

طلعت اضحك اليوم كلشي تغير بيه مااعرف السعاده هيج سوي يمكن غيري يستغرب فرحتي وضع الما معرف

ميدروني مايهمني هاي الامور بكد مااعرف الما ورابيه على ايدي انسانه تستحق اصير ام بيتي وام الجهالي السنين
العشتها وياها تمحي كل العاشته ماياثر عليه بشي ولا
يغير قراري

سوينه عشه لل١٠ فضت لمينه الكراسي والميوزه جماعت زياد وفرات وجماعتي صارت لمه حلوه

فضت دخلت سبحت لبست تراك وطلعت دخلت للبيت امي الحجيه كاعد الواىد نايم كالت هايمه شو مانايم

سيف"ماجاني نوم "

الحجيه "جوعان اسويلك لكمه"

سيف "لا يمه ماكل وشابعان"

الحجيه "دكوم يمه نام وراك دوام وانه هم اكو اطفي الاضويه وامدد رجليه موتني من الوكفه والركضه"

سيف"اخذي راحتج يمه انه كاعد ماعدي شي "

باوعتلي "سويف اضنك ماجاي عليه ها ها وانه اكولن اول تالي هلولد دومه وره العشه بغرفته مايلفي يمنه اثاريك
الك غايه دكوم يمه كوم لا تخلي الشيطان يوسوسلك
بعد بيتي"

خرب بعد الحجيه شيقنعها " شنو يمه طرديني واني عزيزج المفروض ادلليني وتدرين بيه ماعدي هاي السوالف البالج
نامي مطمأنه شويه واروح "

الحجيه "ابد والله كوم كدامي وكفت طفت التلفزيون وباوعتلي يله يمه مابيه حيلك موم نام والصباح رباح عود تعال شوفها سوالف نصاص اليالي عوفها"

سيف " هاي كايم بس خليها يكون بعلمج هاي ذمه وبركبتج
مايصير تحرميني وهيه مرتي "

الحجيه "عشتو يمته صارت مرتك عود من صير بغرفتك محد اله لزوم بيك لا ضل تحوس جنك زنبور اليل وطنطن فوك راسي وتسلب راحتي تخلي بالي يمكم"

سيف" شوفه مراح اكلها "

الحجيه " ابد يله يمه توكل حبيبي ونام يله يله

مشتني طلعتني وققلت باب المطبخ هاي شلون سالفه
الحجيه اشتغلت شرطي من هسه

نمت كعت جهزت روحي وطلعت حتى بدون ريوك اليوم
اكو امر تفتيش والقائد جاي كلها جايه من وكت

اليوم متعب بشكل رجعت عدنه عامله متوسطه العمر تساعد الوالده لان البيت جبير وام الما هم متكدر تنزل تنضف وبلاخص الطابق الفوك على الجوه وعدها بنات ولد متلحك

هم ام عبير كتلها صبلي اكل وجيبه للغرفه دخلت سبحت وطلعت لبست تراكي ومددت ارتاح دقايق نفتح الباب

الما شايله الصينيه خلتها كدامي كعدت نزلت بلكاع تربعت
اباوع دجاج مكله وتمن وسوب وخضره وطرشي

"اي عاشت ايدج تعالي اكلي وياي"
"لا الف عافيه ماكله قبل شويه"

اكلت رفعت راسي اكعدي لا ضلين واكفه

كعدت على الكرسي ضليت اكل واباوعلها "تدرين اطيب اكل اضوكه طول حياتي"

"ليش لان الحجيه طابخته"

سيف"لا حبيبتي كدامي واكل الطعم يصير اطيب ونكهته تتغير يصير بي طعم مااعرف حتى اوصفه "

ضلت ساكته كملت وكمت اغسل طبعاً غرفتي كامله مسويها مينقصها شي حمام كامل ومغسله داخل الحمام بديكور تركي والسيراميك سويته اسباني ستوه نازل بذيج السنه الشيخ بفترة البناء خلاني اني اختار الارضيات وديكور البيت

طلعت انشف بيدي لكيتها تريد شيل الصينيه "عوووفي كلبي البيدج وتعالي"

كعدت على الجربايه اجت كعدت مسافه من يمي جريتها بصفي مايفصلنه شي مدنكه عيونها على ايديها تعصر بصابعها مو جنها الما الي بذاك الوكت اكثر جرئه مني من شوكها ولهفتها

دنسيت وجهي يم اجنها همست "ليش تخجلين مني"
لفعت عيونها بعيوني هزت راسها مبرطمه" لا مخجلانه "

سيف" خوف "

نزلت عيونها ترجف حسيت بخوفها "قربت وجهي الخدها " عمري ماافكر اذيج بريشه رخي اعصابج مجرد مشتاكلج واريد اجرب طعم الحب وياج بستها بخفه غمضت عيونها

ضلت شفايفي على خدها بدون ماابوسها همست لتصورين اذيج او اسوي شي بدون رضاج وبستها بخفه

احبج وتعرفين عمق حبي الج اني اقربلج من ابوج اقربلج من وريدج هدئي اخذي نفس وتعالي الحضني بست خدها وخرت

هدئت رخت اعصابها جريتها حضنتها خليتها بين ضلوعي اشتم بركبتها وخرت الحجاب شمرته سحبت القراصها نزل شعرها

هذا الشعور متمني من زمان شبعت بعطرها صلت لابده بصدري حسيت على دموعها سكتت ميخالف خلي تبجي
حاس بيها عفتها على راحتها مددت ومددتها يمي خليتها على
صدري جنت تعبان مجرد لفيتها بحضني وغفيت

كعدت لكيتها غافيه التلفون ماسكت سحبته الشيخ فتحت الخط ذيج الرزاله المعدله عرفو هي يمي سديته واكلتها
بحلاوه باوعتلها وخرت شعرها من وجها

بستها بخدها فتحت عيونها "تردين تموتيني بهاي عيونج ارحمي حال المكرود"

"شمسويه"

سيف ماتحملت دنيت تخربط نفسها همست رخي لامست شفايفها بستها ماحسيت بنفسي لحد ماندك الباب ابتعدت كعدت تضرب على خدها
وتباوع الساعه ب٥ العصر الها ساعتين يمي لبست حجابها تبجي "شكو بايكج اسكتي"

كمت افتح الباب جرتني "لا فدوه سيف ابويا يضربني"

عكدت حواجبي "شحده اليوصلج مرتي مامسويلج شي خلي شيريد ايسوي"

الما" لا لا لا مااطلع "

ضلت تبجي فتحت الباب الشيخ واكف ولازم عصاته ويضرب بلكاع باوعلي " زحمه اهينك وانت بطولي لو ماعيبه جان طيحت حضك "

حجي شنهي السالفه بايكهه

زمخ "جب ولا كلمه صيحها خلها تروح لمها"

طلعت الما ميته بجي سكتت عافها راحت عاينلي "هنه سبوعين وازوجك اكحم نفسك لذاك الوكت يرفعت راسي"

عافني وراح فركت وجعي استغفر ابوي بي طبع يحسس الواحد بخطأ ويذله بكم حجايه بدون مايصيح ويمد ايده

كرهني بنفسي رجعت اورث جريت المخده اخليها على رجلي انتجي عليها اعاين كومت شعر طايح من شعرها لميته مو شعره وحده لو اجمعه خصله

هاي كل البنات هيج يوكع شعرهن اذكر مره شفتها قبل سنه
لافه راسها بجيس خاله دهن ضحكت هاي كل الاعتناء وهيج يطيح لو مامعتنيه تتكورع

يومين رجعت للبيت ستوني نازل من الواجب دخلت
للبيت خابرت ابو الاخشاب ينجرلي غرفة تسكام
قاولته طلب مليونين صح هواي بس ميخالف

سحبت القاصه طلعت الضامهن اخشاب وذهب وتجهيزات الما بس يعني للعرس اوشل

بت الاوادم صارلي يومين مالامح ضلها خوش الحجي والحجيه مسوين عليه حصار نتحمل

بدلت وطلعت للبيت اتغده طبيت محد موجود ام عبير بلحدام طلعت منه

ها خاله الله يساعدج

ام عبير "ويساعد بختك يمه جوعان اصبلك لكمه"

سيف "مشكوره بس الاهل وين شو ماكو"

ام عبير "يا عيوني ماتدري خطيبتك طاحت اليوم واخذوها للمستشفى وكلهم يمها"

ســـــــديــم

ايامي مثل بعضها دراسه وحياتي مابيها طعم الراحه لازم تكون بين الاهل بحضن امج وصدر ابوج احنه صار ابونه ذيب علينه وياكل بلحمنه همشنه من الحياة واحنه عايشين

اكل بينه كدام اليسوه والمايسوه استحقرنه كانو مو والده
ومن لحمه ودمه كانو غرب عشنه ايام سوده ايام ضلمه
اريام واماني جارعات المر

ايام امي تروح بشكل يوم تنضف وتركب البيت تحسين وترجع

وحسام شكد مايكدر يترس عين مرته كدام عيونه نباوعله شلون يشاريلها مواقف صير مااكدر احجيها

امي ساكته المهم البيت هدوء لحد مااجه تحسين يريد فلوس من امي دين بيت اهل زوجته طالعين من بيتهم
والخانم تريده ياجر لمها واختها بيت وهو يدفع الأيجار

اماني خلت راسها بين ايديها ساكته امي كل العدها انطتيا وراح اريام تباوع بعيونها وخانسه مثلنه

شنريد انسوي وحده بينه صارت شاطره ورادت العون من
والدي اجه مثل يوميه بعد العشه شرب جايه

اريام "يابه هذا تحسين ماعده وكافي عليه ايجار بيته
ومصرف جهاله انوب هسه ام نعمه واختها"

"وشكو بيها اذا صرف على عمته وبتها اخوج جبير وهوه يحير بنفسها وبعدين هوه زغير وتشتكيلي منه"

اريام " تره ماعده منين يجيبلهن مو عدهن اخو ليش مايرحن يمه تحسين مبتلي بيهن "

زمخ بيها "بت الكلب تردينه يطردهن اشو انتي ماتستحين بت الزمال تربيت امج العوجه شعليج
بتحسين لو يريد هوه يطردهن امشي ولي"

اريام دمعتها بطرف عينها

اماني "اريام ماحجت شي غلط اخوها ومن حقها تشيل همه اليحصله مايكفي ليش يتحمل مسئولية امها واختها وهنه عدهن اخو وعده بيت يكدرن يمه يروحن"

"والله حلووه بناتني ويوكفن بوجهي منيلجن هاي الحنيه الزايده تحنن عليه بكده لو هذا اخوجن واني شسويله كاعدت تشتكلي منين اجيبله هوه خل يجي ينطيني

اكول هم عدي ولد مثل العالم همه يصرفون عليهم واني
ولدي بلأسم محسوبين عليه ما بيهم كواد كال اساعد ابويه كلماً همه على جيبه ولد العارات الحك على حلوكجن ناهباتني نهيبه نوب جايات يتشكن ال تحسين"

اماني ماسكتت " سنين تحسين وحسام يصرفون على البيت سنين امي تخيط ومعيشتنه شوكت انت صرفت

شوكت اخر مره فرحتنه ونطيتنه مصرف لو عيديه مااذكر يوم كلت اشتريلهن هدوم عيد حالهن حال البنات

امي تخيط وتلبسنه تحسين يشتغل ويصرف تلى البيت حسام بفلوسه رمم البيت بعد ماجان يخر من المطر اليل مانامه

اليجي ويسمع كلامك يشوفك حنين ميدرون حالك ومالك لمك واخوانك ملينه امي كوه جرتها وسدت حلكها

ابويا علك عيونه ضربها ركضت بلغرفه قفلتها عليها
انواع الغلط سمعنا اني ختات جوه الدرج واريام اخذت ابنها وبلمطبخ كعدت همزين زوجت حسام يم اهلها

بس امي ضلت يمه خفنه يضربها ضليت اسمع صياحه
ساعه وطلع

صاني يوم رحت للمعهد كعدت منتضره ودق تجي مامريت عليها لان متاخره ولكيتهم بعدهم مجايين بس كم طالب

دنكت بلدفتر اقره الدرس مندمجه وعيوني مارفعته استحي من الولد كدامي ميستحون يضلون يباوعون

شويه ورفعت راسي ركبتي توجعني قصي عينه عليه

ضل يباوعلي ضايقني نضرته عيونها ملونه
ودق اجت كعدت بصفي تلهث

سديم"عابت الوجه وين جنتي "

ودق "اسكتي متت جريتها ركض من بيتنه لحد ماوصلت"

سديم "ليش متأخره"

ودق "وخذتني النومه وامي ناسيتني لو ماااختي تكعدني
مااكعد"

سديم "تبل شكد تنامين"

ودق "عشقي الابدي وتهزلي بحواجبها"

دخلنه للدرس قصي صار وراي جريء خبلني ماخله عليه مساحه ولا قلم كل شويه طالب شي

ودق بصفي ضجت حيل منه شلت المحفضه كلها ونطيتها اله

عيني اجت بعينه ابتسم واني خنزرت رغم مايوم طلعت ضايجه وجهي يضحك بدون مااضحك اشو هذا الضحكه
شكت حلكه

درت وجهي عنه نهايت الدرس مد المحفضه على الكرسي خلاها البصفي

اتكررت الحاله صرت اشوفه باب القاعه ينتضرني ويا جماعته ضحكهم عالي من اسمع شقاهم اني ودق نموت ضحك ماكو واحد بلمعهد ماحششو عليه

رجعت للبيت تعبانه نمت كعدت طبيت للمطبخ صبيت اكل اماني تخيط واريام سبح بأبنها

كملت فتت ادرس

ساعتين اني على كعده وحده فاتت اماني كالت ابو سلام خابرني طلبج وكال شتريد احنه حاضرين وشوكت متحبون نجيكم الرجال يريد ياخذ الكلمه المضبوطه

ويجي يفاتح ابوج واخوانج

فتحت عيوني صارت صدك خفت بنص دراستي بالي شوش ضلت تباوعلي كعدت خايفه عفت كتبي

رفعت حاجبه هاا ست اشوو انعقجتي جنه ماعاجبج الحجي هزيت راسي خايفه من ردت فعلها تحطني وتكتلني سكتت

يومين اماني عايفتني سلام شفته واكفلي باب المعهد بحجة منتضر احد دنكت وعبرت من يمه يله راح

حسيت نفسي تورطت ضليت ساكته واكل بروحي

اليوم اخر يوم هم ابو سلام مخابر اماني اجتني للغرفه تريد مني قراري الاخير

شجعت روحي حتى لو انكتل اتحمل كتلها اريد اكمل دراستي مامستعده ازوج

اماني "الولد ماعده مانع تكملين دراسه وابو ايد كلام ابنه ومو زغيره عمرج وجسمج متهيئ للزواج مو طفله"

حصرتني من جميع الجهات

صفنت بيه "سديم صارحيني شنو البالج مو هذا الردتي ونصاص اليالي تخابري وكتيلي يريدني والولد كد كلمته
ليش متردي ومتردده"

بجيت بذيج الحضه "مااعرف خايفه ومرايده ازوج فدوه اماني عاقبيني باي شي بس لا جبريني صح غلطت بس والله بعد مااعيدها شتردين سوي هاي ضربيني شكد ماتريدين بس لا زوجيني مااريد

وخرت ايدها بعد ماجنت لازمتها ضلت تستغفر" هسه شكل الرجال يوميه يخابر والولد رايدج انتي يمته تعقلين سديم راح تخليني بموقف مااحسد عليه "

سديم "مااعرف شتكليله كليله المهم مااريد عوفوني ادرس"

كامت كفختني على راسي "عيدها اذا مااكسر راسج وابطلج كولي اماني ماكالت"

سديم "لا والله مااسويها بعد ابد التوبه"

عافتني وطلعت هم ونزاح مني

ريــــــــحانــه

رضا حاربني حرب نفسي يادوب اكل وارجع الغرفتي صار ملجئي الصلا وقرئاني اشغل روحي دوامي كوه اداومه

مالي نفس بكلشي بلصدفه سمعت كلام تميم الوالدي بيوم المشيه دمعت بجيت بقهر شكد يحبني وحبه عم عليه

شنو الخلاك هيج تتمسك بيه اشفت بيه وكلت امري الربي
ضليت عايشه بخوف ومراقبه يوم بعد يوم اتكأب

تكتم كاتمه على انفاسي كمت اخاف احجي شي كدامها
اماني وتحذيراتها خلتني مااحجي وهي موجوده

مااعرف احساس يكلي البنيه مامسويتلي شي ليش اماني وسكينه بت خالي يخوفني منها مشيت وره حجيهن وصرت حذره

بيوم كاعده اقره دعاء عاشوراء ختمة اربعين يوم دخلت تكتم بيده صينيه بيها ماعون كيك وكلاصين عصير فتحت الشبابيك وخرت البردات صار ضوه بلغرف

تكتم "اوووي هاي انتي شلون متحمله الضلمه وضاله على ضوه الشمعه"

ريحانه"متعوده من اقره اشعل شمعهنفسيتي ترتاح"

تكتم "ولج سوي عدج كئابه دعوفي البيدج بعدين كملي وتعالي كعدي خلي ناكل كيك وعصير تدرين سويتها علا حسابج اشوفج حابسه نفسج"

ابتسمت " ليش كلفتي روحج مااشتهي شي "

اخذت الكتاب من ايدي سدته قربت الصينيه وكعدت مقابيلي وبينه صينية الكيك

"مطايره القراية تعالي ناكل مشتاقتلج واريد اسولف وياج مانشوفج اليسافر مو مثلج"

سكتت مديت ايدي اكل الصعم طيب والعصير طبيعي ضليت اكل ونسولف بطنه كلش كبرانه وماضل شي وتولد بيها ولد ارتاحيت من حجيت وياها

دخلت ماما شافتنه نسولف سكتت الصار خله مسافه بيني وبين امي كامت هواي تتفقدني تابع تلفوني

يحز بخاطري رغم هي تامن بيه وثاقه بس كلام رضا خلاها تخاف اتكم بداخلي واسكت

من بعد هذا اليوم كمت اطلع ويه تكتم انضف ارتب من يجي رضا اركض ادخل للغرفه وهي تنقهر عليه وماتقبل
ومره سمعتها تحجي ويا

كلها "مالج شغل اني وياها لا تدخلين"

تكتم "مايصير سجن هوه شمسويه هوه ذاك حقير وعينه عليها"

رضا "سدي الموضوع ولا جيبين طاريا مره لاخ"

تكتم "صاير ماتتحاجه شبيك"

رضا "تكتتتتم سكتين لو شلون تردين تنكتلييين كافي سظي حلكج ومالج شغل بيها"

من سمعت صياحه خفت تكتم صعدت فوك اسمع بابا يحجي وياا وهوه قافل عليه حتى كلبي احسه يوجعني

رضا كلش متغير مبدلي مو اخويا الربيت ويااا

ايام مشت وخلصت هاي المرحله امتحنت واماني وياي
كملنه وكعدت اول سبوع

وفاتت امي للغرفه جنت كاعده اصفط بلملابس الشتائيه اضمهن

اسماء" راح يجونه خطار اهل صديق اخوج عاوني تكتم ماتكدر وحده مسوين كليجه ومخدره جاي بس صبي وقدمي هاي متكدر ادنك "

هزيت راسي ساكته كملت وطلعت حضرت الستكاين وطلعت الكليجه قسمته بمواعين اقل الربع ساعه ندك الباب اجت تكتم سدت باب المطبخ

تكتم "راح يطبون زلم"

ريحانه"منو جماعت رضا "

تكتم "اي واهله وياا"

صدك ندك باب المطبخ فتحت الباب طبن ثنين نسوان وبنيه شابه باوسن تكتم وسلمن عليه تلكتهن ماما سلمن عليها وطببتهن للهول

فات رضا كال " حضري ٣ جاي

حضرت الصينيه اجه اخذها وشلت صينيه النسوان قدمته وكعدت تكتم جرتني يمها

النسوان طول الكعده ماشالن عينهن مني ساعه وطلعو

طب رضا والدي امي على كعدتها

كال " ريحانه تعرفين مصطفى ابو الأمنيه بلجامعه صاحبي "

هزيت راسي خايفه لا تهمني ويااا

رضا " طلبج و انطيته "

بابا " بنتي خوش ولد ابو صاحبي من ايام الخوزه درسنه سوه وقبل فتره رحنه ليران سوه مايعيبه شي خلوق وملتزم دينين ومعين النفسه "

رضا " والولد صاحبي واعرفه عز المعرفه ماعده لا سوابق لا صاحب بنات مثل عائلتنه مو مطربكجي "

اخر حجايه كالها وخزرني دنكت الدمعه بعيني تكتم شاورتني بس تبجين راح يكول عدها شي ويه تميم
تحملي وسكتي

امي "اني حبيت الام واخته مثل ذبتنه ملتزمين وعائله وقوره"

بابا " ام رضا الرجال عينت الزلم والولد مثل طبع والده هادء وخلوق واني ارتاحله من زمان ريحانه بابا مااضغط عليج فكري ورجعيلي جواب وبراحتج "

رضا "ميحتاجلها تفكير مايجيها احسن منه خل توافق وتسكت"

بابا " رضا شنو موضوعك ابني هذا زواج مابي جبر انت اعرف العارفين اذا جبرتها معناها عقدهم باطل ويعتبر زنا

ابني اخذ الامور بلتريث واختك ماسوت شي اني واثق من تربيتي ممو معقوله تغلط هيج غلط انت متسرع
وحكمت بدون دليل "

رضا،"يابه مايحتاجلها دليل ليش مصر عليها ماشفته شلون يحاجيك كدام الشيوخ وهوه الراهي وكف بعيونه
لو ماشايف منها عين مايكتل نفسه "

بابا" ابني عجبته اخلاق اختك وتمسك بيها تميم مو اول واحد يجيني اكثر من مره قبل حاولو وجانت زغيره ورفضتهم لتخلي الولد براسك فك من ريحانه لا تضوجني وتخليني اضوج منك "

رضا " توافق على مصطفى وسد حلكها "

........ يتبع

تابعوني حبايبي