بـيـن الـكـــاف والــنـــون
الخامس والستون
سجى الطائي🍃
ادور تلول حظي بليل تل تل
وشص وكتي بلهاتي حيل تل تل
حمل سود الليالي علي تل تل
يروط وما فلت حمل من أدية
سيف الدين
السنه 2012
سبوعين اني منهك من العمل غاط الراسي سطروني رغم نباهتي بس كثر العمل ارهقني
طبعي هادء مااستعجل تربيت احكم اعصابي مااتهور
وعملي دقيق بيها اركاب عالم وراي موت عمر كدامي
هم اريد الله يوفقني مايطلعها بعائلتي واطفالي
اذكر حجايت الشيخ " شما تعمل الدنيا دور بيك اعمل باصلك وعوف العالم خلي ربك يرضا عليك وكلبك بارد وعوف العالم
خلي قودتك اهل البيت اشترو اخرتهم بدنياهم صروح شامخه "
عدنه ضباط مجرمين اذا لزمو المعتقل حتى لو كان بريء يعترف على نفسه انه انبذ هاي الطرق
عدي طرقتي صح اخوفه وياخذله كم كف اذا مايعترف
سلمت الاوراق وطلعت مريت للسوك اخءت مخضر الحجيه خابرتني عازمه البنات اليوم البيت روضه يصير
نزلت ونزلت المسواك طببته للمطبخ الحجيه وام الما والبنات واكفات يسون اكل سلمت عليهم وطلعت الغرفتي سبحت وبدلت صليت
رجعت للمطبخ جوعان "حجيه غداج"
تلف بجدر الدولمه " باوعتلي يااا مامتغدي لا دكولها"
سيف"لا ماماكل من الريوك"
الحجيه" ياااا سوده بوجهي ولك مو كتلك تغده يمه لا تنتضرنه مامسوين اكل ابوك وانه تربكنه متاخرين "
سيف"يمه انتي يجن بناتج تنسيني يصير سيف بيش الكيلو"
الحجيه"لا يمه يرحلك فدوه بس غير كتلك ونبهت عليك جم نوبه وانه اوكد عليك اتغده ويه جماعتك"
ردت كالت "شون نسيت انت ماتستنضف اكل احد شون عاده زفره بيك"
رفعت حاجبي مستغرب ضحكت "يايمه انت ماتاكل من اي احد هم موحلوه قابل العالم مو نضيفه اكو بيهم نضاف واكلهم يخبل"
حجيه لا سويلي سالفه ماكو اكل اكوم انام
اشرت بيدها "لا لا شنهي تنام رنا باعي بيبي طلعي من الثلاجه دجاج متبلته من الصبح
قاطعتها يمه يادجاج ساعه يله يستوي
كالت" بتيته سويله وعدج مخضر سويله زلاطه وطرشي بلعجل بيبي ميت جوع
ام الما كالت "مسويه مركت حمص على لحم وتمن ابيض احميلك"
سيف"لا يابه بتيته كافي "
ضليت كاعد العب بجهازي وهنه يلفن دولمه وكبه شويه وصعدت ام الما كملت لف الكبه وراها البنات الزغار والولد ضلت رنا تكلب بلبتيته على الطباخ
والحجيه تخلي الاكل السوته بلمجمده كالت "يمه امدد بعد رنا ترتبلك الصينيه"
باوعت الرنا "بيبي رتبي صينيته حميله الخبز هذا يمج بالجدر طرشي وكلشي بلثلاجه تلكي ودولكة مي اذا ماكو بالثلاجه اكو بطاله جدج جاب كراتين جوه الدرج
عافتنه وطبت الغرفتها اباوعلها كوه تمشي
رنا سوي اكل واني عيني منها مااخليها تنتبه ماارتاحلها بالفتره الاخيره صايره هواي تهتم بنفسها وحركاته مال كبار
استغفرالله حتى تراكه كصيف وهي ضعيفه وصدرها مااعرف شمسويتله واصل الخشمها
كملت خلت الصينيه كدامي واني منتجي وعيني على الصينيه وهي جيب ماعون ماعون من الكاونتر
رفعت حاجبي ستغفرت واني اشوف حركتها
كملت اخر شي ضل المي طلعت دولكه جامده موعتها جوه بوري السنك تموع بالثلج جابتلي الدولكه نترت بدون مااعلي صوتي" خلي المواعين بالصينيه يله جيبيها كدامي "
خافت من نترتي انثولت اذا انتي هيج تخافين شكو تتحشكين طبت جوه الغرفة الحجيه
اكتب بالجوال واكل عمار سطرني يريد ممعلومات واني اكل واكتبله على التلي شغلنه بي اي برنامج غيره ماعدي بهذا جهازي خاله للعمل الجهاز الثاني منزل بي فقط فيس
مخلي صورة اسد فقط مامخلي اي معلومه عني حتى الاسم مجهول مجرد اكلب بي واشوف المنشورات مرات اعلق اذا المنشور عجبني مااراسل بي شغلي كله بهذا الجهاز
فاتت رنا تعدل بشعرها كصيبتها طويله وثخينه اي ملامح انثويه مابيها والله اشوفها طفله غسلت مواعين الشغل
كملتهن واني اكل طبيعتي اكل على الكيف فأطول طبيعتي من زغري مااحب احجي والكمه بحلكي لليوم اني بليل اكلي خفيف حتى الشيخ تعلم مياكل باليل يكتفي بتمر ولبن لو شي خفيف
مسحت الكاونتر والطباخ شبعت شلت الصينيه خليتهن على سنك زاد اكل متعود الحجيه من سويلي اكل وتروح الغرفتها مره جبيره حركتها صعبه
من اكمل ارجع الاكل الزايد واغسل مواعيني شلت الزلاطه خليتها بلثلاجه والخبز بالجدر لزمت المواعين جوه المي وبلسفنجه والزاهي اغسلهن
اجت رنا ركض جرتهن من ايدي "اني اغسلهن عوفهن"
"ضحكت" اديه جرحن من المي شو وخري مالج شغل"
سوت حركه عود بعفويه متدري مدت ايدها لزمت ايدي تخليني اعوف المواعين وجسمها طبك بجسمي
حركتها طيرتلي راسلي عفت البيدي جبتها براجدي منها صرخت وكعت على ضهرها للكاع
دنكت عليها جريتها من شعرها وكفتها وهي فاكه عيونها لازمه خدها " حيوانه منين متعلمه هاي الحركات رناااااا عطت بيها اذبحج ومايرفلي جفن هزيتها حيل منو كلج سوين هيج منو علمج "
كامت تبجي بخوف حلكها يرجف طفله يربي طفله ماتحملت السوته ضربتها مره لاخ صرخت بصوت كعدت حتى الحجي "بطول النع..... ال وتتلزكين اريد اعرف امج وين ابوج العاررر بس يعرف يخلف مارباج مااكلج شنو هذا لبسج
على صياحي طبت امي تلف بشيلته اجت تركض من شافتني لازم رنا من شعرها وهي تبجي وتعيط
الحجيه" دهر فر راسك ولك عوف البت سوت"
سيف" هذا تعلومج يمه تالي هذا العمر تفتحين عينه بربج حجيه بربج بكد الفصمه "
جرتها من ايدي واني اعصابي فايره ختلت وره امي تناشغ وامي تريد تفهم من يمنه "ولك شمعلمتها غير افهم شمسويه ولج سويتي"
سيف"هذا اخر تحذير الها ولج سمعي ورب العزز واعيد تربيتج انه انه اسويلج حد اريد اشوف المدرسه علمتج تتحشكين بلزلم وعتج على الطياح حظ
الحجيه"سوت يمه بس كلي سوت ولك عيب من ابوها همزين ميسمعون "
سيف"شوفي يمه شوفي كتلك لا تخلي بالها النعل شوفي هاي النتيجه"..
الحجيه "يمه ضغطي صعد احجي سوت لا تعل كلبي"
درت وجهي اطلع"سوت كلان خ.... اذا بيها خلي دكلج صخام وجها "
عفتها تناشخ والحجيه صيح وراي
طبيت للغرفه توضيت وصليت اريد اهدء زين ماخنكتها
كملت لميت السجاده لبست دشداشه سوده جريت الجراويه لفيتها على راسي
سحبت سويج السياره اتوجهة للكلبي يمها وروحي ترف على شوفتها ماتاركها اول مره اكول شهر بدون ماازورها
انطلقت صدري مقبط الطريق طويل شغلت المسجل
اكو قصائد الباسم الكربلائي على جرحي
قصيده من سمعتها سرت بيه رجفه من الحن والكلمات والصوت الرهيب شغلتها
أعتاب الموت
زينب و الزمن و الموت توديع و عتاب و ونّة مخفيّه
تنازع و العمر ما بين رمش و عين بديار الغرب جانت تواليّه
صاحت من زمان أتنطرّك يا موت و أتربى اعلى جيتك جنت ليلي
ردت منّك تجيني لكربلا و ما جيت تمنيتك بيوم الـ رحت فوق الهزل مسبيه
تمنيتك بيوم الـ راح كافل هيبتي و ما رد بعد ليّه
ردت منك تجيني من وقع عباس ظلّت رايته اعلى النهر مطوي
شلي بعمري و أشوف الظعن لمّن سار شامت جان القاع رجليّه
ردتك من دخلت مجتفه اعلى يزيد هاي امنين أسمعه يناشد اعليّه
عاشرت الصبر ياموت مثل عشرة نفس و معانق الريّه
من سمعتها اخذتني الغير عالم كلبي محترك عيوني مانزلت دمعه منها مو استنكاف بس كلبي تحجر هواي طعنات واجهة وهواي دكات الكلب ياهوه اليدخله يفاركني
وصلت المغرب توجهة للامير صليت وزرت ودعيت طلعت متوجه صوبها صوب الجمت جروحي صوت الخلت عله بداخلي وعافتني صوب المفاركتني
كعدت كبال كبرها رصيت على سنوني منين اخذلج حكج مني الماعرفت احافظ عليج من ابوج العار وعمامج منين
الماا عاينيلي وخليني على برر من رحتي وانه جسد بلايا روح عمري ضاع وياج
انسلبت ارادتي انتي الجنتي مهونه عليه غربتي
دكيت على صدري هنا ضميتج وشميت عطرج هناا اخذتج بين ايديه واكول هذا يكفي يروي روحي
اكعدي وعايني عليه ماحلالي بعدج يوم ولا شفت الضحكه ولا فرحت ضعت بعدج والضيعني بُعدج
اهوون عليج اعاين بالوجوه وادور صورتج
مديت ايديه بجيب دشداشتي طلعت السبحه بطرها رابط تراجيها شميتهن مايفاركني
احس بيهن بوجودج عاتبتها وطال العتاب بينه
لزمت القران قريتلها ياسين والواقعه رشيت مي على قبرها مسحتها فتحت صندوك السياره جايب معطر قوي مركج خففته بمي ورشيت عليها
نضفت داير مداير قبرها من الجياسه والبطاله
وكفت مقابيلها تمتمت كلمات ودعتها وتوجهة الحميد
هنا كان عتاب اخو الاخوو حميد كاسرني ماناسي
دكنت راسي على حافت قبره ضربت الكاع
اريد دمعه تنزل مني راح اطك القهر ترسني واني صامد
قريتله كم سوره من القران سويت القبره مثل ماسويت القبر حبيبتي
لل١٠ليل والمقبره ضلمه مااعرف شون مشيت وعفتهم بوست هلضلام روحي يمهم
ودعتهم ورجعت للسياره لكيت الشيخ داك كومه زياد وفرات متصلين الحجيه هم
خابرت الشيخ طمنته ماراضي على روحتي والطريق مو امان باليل واوضاع ب٢٠١٢مو هلكد مستقر
وصل الفجر صليت ونمت ساعتين وطلعت للدوام
شفت الرائد يريد ينزل من سيارته تقدمت سلمت عليه صافحني دخلنه سوه طبعاً هوه يتقدمني واني وراا
احترام المنصبه ميصير نقدم عليه اثناء المشي
دخل المكتبه واني ويااا كعدت كعد بمكان مبتسم
"نعم سيدي"
على بسمته"حضر روحك "
"خير ان شاءلله سيدي"
الرائد"ان شاءلله كل خير بطل ابني بطل الشغل السويته اتحده عشره مثلك نبه ومتنطي مجال النفستك تستراح حتى وكت استراحتك مستمر بعملك وهذا اعتبره ولاء عظيم العملك "
"مامسوي شي سيدي هذا واجبي وكلي فخر اخدم بلدي وانت فوك راسي اكيد هاي من توجيهاتك"
اثنا عليه طلعت اكمل عملي الرائد غامرنه بكلامه وتشجيعه يزيدنه حماس الكل الضباط
اليشتغل بامانه يقدسه كاعد اكمل اوراق المتهم يحولو الضابط التحقيق وقعت ودزيته بيد الجندي
ملتهي بعملي دك جهازي عمار" اختصر "
عمار "اطلع بسرعه"
سيف"شكوو اطلع"
احجي وياا وسمعت صوت حركه وركض بالمركز كمت وعمار على الخط سديته توجهت للممر المكان انترس
امريكان جنود وضباط
سلم عليه الضابط الامريكي انطيته ايدي سلمت عليه اباوع للمكان اطوق
عمار اجه يمي كتله "شبيهم ياجوج وماجوج" ثواني اريد افتهم شكو طلع مدير القسم مكلبجين ايديه
الرائد واكف بثبات يباوع نص ساعه طوقو البنايه القو القبض وطلعو
توجهة للرائد "سيدي شون كدرت تلقي القبض عليه"
الرائد"اندك بالناس الغلط سويتله جرد عام جبتو من سابع جد الو وكل قضايها مدونه بسجلات بغداد "
سيف"يعني صح ابن عم المهرب
هز راسه عما كال "وكفووو وكفوووو سيدي بروح موتاك خل نحتفل يرادلها عزومه"
الرائد باوعله بطرف عينه "جلدك يحكك"
عمار رفع ايديه مستسلم نعرف اذا جلدك يحكك يعني عقوبه
يومين اني وعمار ملف المهربجي بيدنه بالتعاون ويه الامريكان ليلتين مانايم
عمار كام يفشر دفن توتر وقلق كدرنه نحدد موقعه نفس اليله هرب من صلاح الدين البغداد
الصبح القو القبض عليه بمزارع بغداد باحد مناطقها
سبوع وعرفنه الصواريخ والتهديد واطاحت الرائد صعب وهروب السجين كلها مخطط من قبلهم
خلصت المهمه اخذت نفس الايام تمشي بيه
رنا بعد ماشفتها اذا شوفني تشرد
الحجيه زعلانه لان مديت ايدي عليها متدري اني مااعرف شنو الخلاني مااذيها
كعدت حاسم امري الحجه والشيخ بلهول ملتمين
سيف"شيخ عدي حجايه وياك واترجاك تسمعني للاخر "
الشيخ جان منتجي عاكس المخده والعكال والشماغ يمه كدامه ستكان الجاي ويفر بخرز السبحه
كعد عدل ولم السبحه بيده مستغرب كلامي"كول بويه "
الحجيه باوعتلي هم مستغربه"
سيف الدين "بويه انه غاط الهامتي بافضالك سنين عمري افنهيهن مااحاز ربع من تعبك وياي حسبتني ابنك وعاملتي معاملت زياد وفرات
يابه الماله اصل ماله وطن صرت شكدني واني اريد اعرف اصلي اعرف اهلي وين صفه بيهم الوكت اخر امل ضل هسه الي
تعبت من التفكير بيهم
الحجيه" يمه مقصرين وياك "
سيف"لا يمه كل قصور مابيكم انه مقصر بحقكم انتو اهلي بس يمه اريد ارتاح من التفكير
الحجي "توكل باالله اني ودورهم وشتحتاج اني حاضر"
امي الحجيه عوينها دمعن "لا حجي فدوه الكلبك شون اذا لكاهم يعوفنه باوعتلي عيونها مدمعه"
سيف"لا يمه افاااا شاربي مو عليه اذا اخطي خارج هاي الباب واعوفكم للموت اضل وياكم وقاسم يمين حتى زواجي يمكم مااعوفكم انتي تربين جهال
الشيخ"حجيه الولد كلبه نار على اهله خلي يبرد ناره ويلكاهم ادعيله بلكت الله ويردهم يعرفم عدلين ميتين"
بجت الحجيه"حجي كلبي ماينطيني ربيت وكبرت وتعبت تالي يروح منيدي "
الشيخ"ام زياد ماتعرفين سيف هوه يفاركج يوم اهله حق عليه "
الحجيه"لا مو حقهم حقي اني الربيت اني التعب عليه وحسبته ولدي وكدام عيني صار رجال "
سيف تقرب يمها جريت راسها بسته"وشيلتج يمه مااعوفج انه مااكدر على فراكم هناا متعلم "
الحجيه "متامده بس تلكه امك تنساني سيف وحك علي يكون صدك سويه وتروح يمهم ازعل منك ومااريدك طول عمري ومااسامحك اريد حك رباي منك"
ضحكت بخفه "رجعت بستها من راسها وخرت تمسح بدموعها
الشيخ" موحجي هذا ام زياد "
الحجيه"لا حجي مالهم حك بي عود جابو للدنيا هذا موحك "
موه رضيت الحجيه واني بس ابوس واقنع بيومها هواي بجت مامقتنعه بكلامي
خابرت مقدام اذا عده رقم صديقه الكردي هلمره اكثف جهودي وادور اكثر
هذا اخر امل عدي تعبت من البحث الانتضار متعب
اخذت اجازه سبوعين اترخصت من الحجي واخذت سيارته متوجه لاربيل
رغد
محروك دمي انفعلت متت من تصرفاتهم وصلت بيه للانهيار شيردون مني مااكافي عليه العشته ويه والدي
ماكافي عليه وضعي لا اني مستقره ويه ارغد
امه
خواته
وسن
سعاد
الدنيا وكفت بعيني خابرت بهاء انفجرت بيه وعساني لا خابرت ولا خطيت هيج خطوه
سديت الخط على صوت تكسير طلعت اركض اريد اعرف هذا الصوت منين اخذتني رجليه الغرفتي فتحت الباب
انصدمت مراية الميز مفلشه الكزاز مطشر بالكاع هوه واكف فاتح الشباك يدخن اتلفت بارجاء الغرفه الغراض على الميز كلهن بالكاع
العطور مكسره
كلت ارغد
التفت عيونه حمر رمقني بنضره يبس الدم بعروكي
رجع يباوع للشارع من الشباك
تحركت اريد الم الكزاز دار النتجه على حافة الحايط
عصبي عيونه ناطه شراين ايديه واضحه عاكد حواجبه بغضب
دنكت الم الغراض كال"عوووفي الكزاز اسالج وجاوبيني"
كتله شنو
كال "اذا جذبتي بحرف بحرف تعرفين شنو الحرف مشه تقرب يمي وعيونه تاكلني والجكاره بيده وصل يمس تفصلنه اشبار
تقرب كلش خفت نضرته ترعب ارغد هادء مشايفته بهذا الحال همس بين اسنانه" تردين اخوج "
صفنت من الخوف مااعرف شجاوب حتى السوال ماسمعته او سمعته بس مااستوعبته "رفع ايده ضربني باصبعه مثل واحد يضرب دعبله باصبعين السبابه والبهام
كلبي يدك متجاهله سبب تغيره سبب العصبيه
عاد السؤال" تردين ترحين يم اخوج "
هزيت راسي
ابتسم بخفوت ابتسامت ألم "هاي هيه ضفيت حسابج"
ياحساب
من بين اسنانه كال" عمرج لا تنسين هذا الدرس الايد التنمد الج لا تعضيها لا تتاملين بعد مني اعتبري نفسج ضيفه اقوم بواجبج لحين جيت اخوج "
ابتعد واني دموعي تجري حسيت لا تاكدت سمع كلامي سمع اي ليش هيج تغير فجئه
لزمت جهة كلبي وهوه داير وجها عني صاح بصوت فززني" ولي بره "
اريد اشرد الملم الباقي من كرامتي بعدني افتح الباب
كال اوكفي نزلت ايدي بدون ماادير اسمع صوته
"منا وجاي تعتبرين نفسج غريبه عني التردي طلبي من امي هااا ابوج هم رايدج اذا تحبين ترحين لا تستحين ضحك
لا عمي اني الاستحي انطيني خبر وتميم يوصلج اله تردين عمتج هم ماعدي مانع
معاملتج اني اكملها طول اتحملي هذا الشهر اخذ باقي مستمسكاتج
والطلاك شوكت ماتردين اني حاضر
عمري متخيلت انحط بهيج موقف كل حيلي نهد كلهن حجاهن دفعه وحده مال واحد ضام بكلبه حقد سنين متخيلت اشوف ارغد بهذا الشكل
طلعت ابجي زويت نفسي بالحمام اعض بايدي اني اني تعيرني بابويه صرخت من كلبي ساده حلكي ودموعي على خدي
ليش ليش اني من هاي الناس جريمتي شنو ضليت ابجي ساعه اني فرغت كل البداخلي
غسلت باوعت عيوني نفخت وجفون عيني مورمه خشمي احمر طلعت طبيت للغرفه مامودجود لميت الكزاز كوه
حيل ماعدي جسمي نحل
لميت الغراض كلهن ذبيتهن حتى النضيف اريد انام راسي انفخ كوه اجر النفس
مديت فراش بالكاع نمت غطيت راسي عيوني متوكف ولا كلبي يبرد اذكر وازيد بجي كمت اناشغ مر الوقت واني مااكدر اغمض عين ولا اعرف وين انطي وجهي
عمتي وزوجها المتحرش لو ابويا اكبر عدو الي بهاء الي مابيده شي اجرائات الحكومه وديرفون الدعوى
تعبت بس غمضت نمت
ارغد طلعت مفول اعصاب ماضلت عدي اخذتني رجليه البستان الشيخ فتت بي صاحبه الجديد متعود عليه مخول بدخوله الفلاح شافني رحب بيه
ابتعدت مالي خلك اسولف كعدت كدام الساكيه كانو نهر مصغر وعلى جوانبها طريق ونخل تقربت كلش كعدت
باكيت بجيبي دخنت واني اباوع للمي شون يجيري
لجمتني اذتني كل السويته الها مو بعينها تاملت كلبي دك الكلبها تاملت تحبني وتبني حياتها وياي
تنسيني جروحي ماادري تعض ايدي وتشكيني اخر كلامها ماحبيت اكوله ولا ردت احد يسمعه وتنزل من عيونكم
خليته بكلبي وتحملت جروحه وخدشاته ساعه بعد ساعه
التفكير ماتركني الف حسبه اجت
اعوفها لبوها واذكر معاملته ودموعها وصيت عمتها
ارجعها العمته ورجله الفاسد اخاف عليها
معاملتها بيدي ومتفق ويه بهاء يصبر عليه اعودها احبها وتحبني مااريد اخسرها ثنينه مجروحين وثنيه موجوعين
الولد متفهم وقدر موقفي وايدني بهذا الوقت احتاجيت سيف وحميد سحبت نفس الكم وحشه
تنهدت بعد تفكير طويل حسمت امري التريده يجرالها المعامله الموقفه اني هسه بيدي امشيها
كمت رجعت للبيت صعدت دخلت للغرفه ضلمه شغلت الضوه نايمه بالكاع ويطبج مرض
نمت على السرير كعدت الصبح سبحت وبدلت طلعت مستعجل ماتريكت
خل الدوام رجعت ب٣ البيت متروس خطار على ابن ابراهيم كوه سلمت وصعدت الغرفه فارغه سبحت لبست بجامه وفانيله
مشه الشهر اني بوجه رغد مااباوع وهي هادئه شكد مااحاول انسه كل يوم يذكرني بكلامها
محاولت تعتذر اذاني موقفها مهامها زعلي ولا حاولت تبرر
امي اشوفها شاده وياها وتبسمر بيها
وسن يوميه تجي للبيت واني كاره روحي
اليوم واكف اصل بالمبرده الجو حار بطرك التعلاكه البنات بالهول تميم وتمام بالاسواق
الوالد بالحديقه يمي يرش الزرع واني اربط ماطور المبرده
اسمع سناء ورغد يجادلن
سناء"بس اني اكرب مطلعين تغسلين الطرمه "
رغد "نضفت المطبخ والماعين غسلتهن كملت كل شغلي وصاعده انضف غرفتي"
سناء" امشي نضفي الطرمه وصعدي نضفي خرابتج "
رغد" سناء ماالحك انضف واغسل الديباج واسبح وانزل اسوي عشه ضحى وسندس موجودات يكدرن ينضفنها ماعدهن شي"
سناء" انتي ايديج محنايه اتعبي شويه حركي نفسج تخافين على اضافرج "
رغد" مو كاعد انضف واغسل شعليهن اضافري كتلج ماالحك اليوم اغسل الطرمه خلي وحده بمكاني "
انصطرت وهنه وحده ترد على الثانيه صحت وحده منجن تنضفها لا اجي اطيح حظجن
اسمع امي ترزل بيها مبينه على صوتي طلعت كالت"انتي امشي غسل الطرمه خارمات من خيس.... طلمه محد تقبل تنضفها"
طلعت رغد على اعصابها اخذت الصونده بدت تغسل الطرمه الماطور يم باب الشارع
وكفت اباوع الجيران كبالنه محد على السطح وهاي رافعه ثوبها متستحي من ابويه
رجعت اكمل تصليح تتحرك كدامي تمسح بالماسحه
صفنت عليها وين جانت رغد بكشختها والاتكيات والنزاكه
عطرها الأنثوي اذا تفوت كل القسم يشتمه
كعبها دلعها مزاجيتها رغم كانت ملتزمه بالدوام بيوم الميعجبها تجي مجرد تلفون من ابوها تغيب
حالين رغد نسخها اخرى
كمت اجيب سباين من الفوك صعدت ادور لكيتها نزلت صارت ركضه وصوت عياط
شمرت البيدي ركضت على صوتهم ملتمين يسحلون برغد
فقدت من شفت دمهاا
..... يتبع
اعتذر عن قصر البارت اليوم استلمت احداث البارت
باقي الابطال مموجودين
ماكدرت اعوفكم بله بارت اكتفي بهذا القدر احاول اليوم اكمل الاحداث
احبكم💋
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!