في وجهكِ أبحثُ عن أنسان.
-مظفر النواب🤍
#انَـس،
ياريت يگون توصيت وتعليقات تتعدة 500 ☹️لكُل بارت، لطفًا يعني♥️
____________________________^
هذا عمي الشيفة! شجابة هسة!
- ما كلتلي هذا منين استاذ انس؟
رجع سأل مرة ثانية واجيت ارد بس رد مخُلد او بالاصـح طنش الوضع ورأح يسلم على بيبي، بآس ايدهَا " شلونها الحجية اليوم؟ صحتها عافيتها!" سالها
- بعد امك حبوبة بخير الحمدلله شلونك انت عافيتك شلونها!؟
- اذأ انتي بخير اني بخير،
- بعد گلبي اروحلك فدوة! ليش كطعت منّه عبالي راح تجي مره ثانية!؟
- والله جنت مسافر حجية والبارحة يلة كدرت ارجع للعراق وظروف صارت ماكدرت ارجع عليچ واطمئن اعذريني !
- لا يمة معذور حقك دنيا اشغال وتلاهي ،
ادخل عمي جاسم وحشُر خشمة" ما كلتلي يمة هذا منين شنو صالي ساعة أسال ؟!" ردت بيبي " دصبر شبيك دومك مستعجل متگلي! هذا وليدي جاسم اعرفك بي يمة! عم انس"
هـز راسة مخُلد بهدوء وإجـة عمي مـّد ايدة علية وسلم" اتشرفت يابة بيك استاذ مخُلد"
- الي اشـرف ،
سلمّ علية برود وإنوب اني دخلت جـٌو وعزلت الاغراض وبدلت ملابسي، ركض وسويتهم شي بارد واخـذت للصالة لگيتهم كاعدين...
انطيتهم العصير وطلعت للمطبخ... اجت بيبي ورأية تلطم على خدها
-لچ فضحني كدام الولد هذا جاسم!! يمة
- ياا بيبي شكـو شسوة عمي!!
- ولچ هذا نازع المستحة يمة بس شاف الوليد زنگيل لطش بي فدمرة! هسه هو مايجي الا بجيت عمج!
- والله يابيبي ماعرف عمي هنا مجان گتله تفضل وتعال! اعرفة ابو فليس ويدور هيج سوالف بس لا يحجي كلمة كـدامة علية لو يجفص واروح بيها!
- لا بيبي لا تخافين ابني واعرفة زين هسة بالة يم الفلوس يا انتي يا بطيخ!
تنهدت براحة" الحمدلله من بالة مـو وياي!"
- اكلچ بعد امچ هذا عمج يريدنة نروح يمة كم يوم يكول اجيت اخذكم شتكولين انتي؟
عقدت حاجبي " بيبي صدووك تحجين؟وين نروح ومرتة نهال ! ما تگبلنه ولا تشوفنه بصرأط المستقيم! يعني اذا نروح طلعها من خشمنة روحـة!
- اندري يايمة بس هـو اجاني من صبح واجـة حظرن روحج ومتحمسة ، شگلة خطية،!
- بيبي تعرفين شي هـُو اجة هسة وراح ياخذنه مو حبنَ بيَنا بس بعد كـم
راتب جدو تقاعد ويريدج هناك حتى يسيطر علية! والله!
- ماعرف يمة والله بـَس اني اكـول هسه نروح نشوفه شيسوي وبعدين اشوف نروح لو لا امشي!
هزيت رأسي الهًا وانـي اشوفها تطلع من المطبخ وتروح لصالة فرگت شعري بقهر! هذا عمي راح يجلطني يردون ياخذون فلوس بيبي! بحجه اني ابنها وماعندي غيرهًا ، استغفر الله! عدلت شعري ورحت لصالة وراها واني اسمع صـوت ضحگته لعمي توصل لسابع جار، گعدت بصف بيبي، ومخُلد كبالي وبصفة الشفية.... عدلت بيبي شعري من شافته هـوسة ابتسمت الهًا ،...
- ما كتلي استاذ مخُلد شنو شغل الولد؟
سأل عمي! يافشلة بلة هذا هم سوال! انتبهت على مخُلد رد برود" والدي تاجر" اختصر
- ما شاء الله تاجر شنو؟
ضحك بستهزاء - بكل شي تاجر هههه ،
عقدت حاجبي وانـي اشوفة عيونة تغيرت ! كآنو مايحب احد يجيب سيرة ابو كرصت لبيبي! تسكت عمي !
- شلون يعني بكلشي تاجر! العفو منك اكو تجار بضاعات واكـو غير شي مثلاً!
قاطعته بيبي" يمة مخُلد ما كتلي وين جنت مسافر؟!"
ابتسم الهًا ورد" جنت بيروت حجية شغل جان عندي"
حشر خشمة عمي!" وشنو نوع هذا شغل؟"
حـّك لحيتة على خفيف وطلع فـونه من جيبة" هيج شوي شغل خاص وهسة من رخصتكم لازم اروح، شفت الحجية واطمئنيت عليهًا وان اشاء الله بعد يوميا اجي الهاً واشوف صحتها، بس هسه لازم اروح عندي طلعة مهمه"
وكف وگفنه وياا وبسرعة عمي حجه" صدك جذب استاذ مخُلد هسه وكت طلعه اتغدة ويانا اقلها!"
- اي بعد امك اتغدة وهسه وكت غدة! وداعتك مسوية تمن وباميا تاكل اصابعك وراهن"
ضحك ورد" عافيات على گلبكم حجيه بس والله مستعجل ويعرف انس اني طالب ولازم اشوف دوامي هسة اروح لجامعتي واني انتظر عزيمة ثانيه على باميا ماشي حجية؟"
ردت بيبي بـحُب" يمة عسآك على باميًا ابطن عيوني ابني"
مخُلد، سالمة عيونچ يوم، وهسه اني اترخص مع سلامة،
طلع واني طلعت ورآ وعمي لأطش بينا شاف سيارته مركـونة بالباب فتح حلكة فداستحيت منه اباوع لمخُلد غلس وضحك!
- محتاج شي استاذ انس ! قبل ماروح!
سالني ابتسمت ورديت" سلامتك بسَ مو تنسى تمَر النا! ها!"
أشر على عيونة " من عيوني يابة بعد انعزمت على باميًا شلون ماجي! ها!"
جاسم، اي والله تشرف بـ إي وقت كُل الهلا بيك ،
مخُلد ، تسلم عمي وهسة اني استاذن مع سلامة
صعدت بسيارتة ورآح ابتسمت اله واني أودعـة ، شكد حباب! هالشاب!
اكـو هيج نماذج ! بعدهي ! دنيا بخير تنهدت واني اسـدّة لباب اجاني عمي يسال وراية
- ما گتلي لك منين تعرفة هالقطة هاي!؟
تنهدت ورديت" عمي شنو لقطة! ها ادري هو سلعة حتى تكول هالشي!"
- لك غبي مدري غبية! هذا ينگط فلوس! ماتشوف سيارتة الصاعدها بـخمس شدآت لك منين عرفك وانت حافي؟!
عضيت شفتي بقهر" عرفتة من شارع وساعدني وصرنه اصدقاء بس مو كُلش يعني! بعدين حتى لـو غني لا تفكر ياعمي تقترب منِة!! تـرة حتى مايعرف قصتي الحقيقه دير بالك ماشي!!"
- لك صدك تحجين انتي اصًلا عشتي ولـد لو ما العيب ازوجج لرجال! بعدين اني راح استفاد هواي منه للأهل شاب مبين مثلي ويدرو كعدآت راح اتـوونس هواي وانت ابقى هيچ احسن الك ههههههههههه ! وينج يمة صبينا غدة وخلي نتوكل بالله ونروح لبيتي
غمضت عيوني بقهر وانـي اهّدي بروحي! هذا البشر ما ينتظر كلمة ويذب سمة! علية اللهم صبرني علية حتى ما اقتلة وابتلي تالي عمري!! خرب شلون راح اتحملة هاي المدة من اروح! هسه شكول عليچ يابيبي الا نروح!
زفـرت انفاسي واني اروح اساعد بيبي صبينه الغـدة وتغدينا وهـو مابطل يحجي بمُخلد وفلوسة! يعني شاب كعد يمك نص ساعة عرفته شبي مابي وفلوسة وسوالفه همات! هذا شنو البشر! لعد شبية اني ماعرف شي على العالم! امداية ، خلصنه غدة وغسلت مواعين وعـزلت البيت ،
وطلعنا گبل لبيت عمي هـَم استقبلتنا مرته نهال وهالمرة بهلاً ، فعلًا تواقعاتي صحيحه علمود راتب جدو ديسون هيچ ، كعدت بصف بالصالة على قنفة، وهـي كاعدة كبالنا لابسة احمر ثوب ضيگ كُلش واردناته نص ،
مثل تـور اسود مبين نص زندوها والمكياج طـن ، مدري شاف منها عمي شكلها استغفر الله.... سالتني واني اتفرج ويه البنات على اليوتيوب...
- ماجتچ شهرية انس؟
رفعت راسي الها! بلة هذا هم سوأل رديت برود" اي قبل اسبوعين خلصت تقريبًا ليش هالسوال؟"
- اكولج شلون تجيچ وانتي تفترين بالبس الولد ! شنو ماتبين يعني! منا منا!
- شقصدج نهال! يعني البس شدخلة بيها! مثلاً! اذا اجت لو لا؟
ردت وهي تضحك" يمة شبيج اكلتيني وشربتيني! اقصد شلون تطلعين وهـي عليچ! تعذب الوحده يمعودة،"
- انتي مو جديدة علية وتعرفين مرات من تجيني ماطلع ! يعني ليش هسه تسألين؟!
رفعت حاجبهًا وكامـت" اكـوم حظر النواشف قبل مايجي عمچ السوالف وياج تعبانه صايرة"
خفتنًا وراحـة ! شكد مكروها هالانسانة دائمًا تذب كلام يجرح ألية! لو تهيني بنوثتي وتحسسنّي إنو اني فعلاً ولد رغم اني ماسگت الها واردها بس تستمر تحجي لو اسكت الها يمكن انُوكلت من زمان... اجتي بيبي جانت صلي..
خلت السجادة على القنفة، وسالتني
- ذبتلها شي كلمة هاي الحية؟
هزيت راسي بـ لا" لا حبوبة ماحجـت شي اليوم عاقله ههههه"
كعدت بصفي" هاي عاقلة! اعوذ بالله منك يالساني! تعاي حبوبة زهراء انطيني بوسة بعد كلبي"
تركت الفون بيد اختها واجتها تركض حظنتها وباستها جانت نايمة وهسه كعدت، ابتسمت الها وانـي اشوف بيبي تبوسها براسها وخـدها.... " يمة اروح فدوات اني للبنات يمة" شوي ودخل عمي جايب اكـل من المطعم ..
ورحـت ساعدتها شوي عيب لازم اعمل بـ أصلي حتى لو زينة هي، وفعلا لكيتها مگليه بيذنجان وبتيته وطماطة ، ومسوية زلاطة رحت عدلت سفرة وفرشتها بصالة هي مكالت لا انطتني صينيه كلهُا ونقلتها واسمع سوالف بيبي وعمو يضحكون ، على رسل وزهراء شحلاتهم هيج لو يبقى عاقل بس خباله والبي مايخلي.... رحـت صحت عليهم من كملنا ... وتعشينا وخلصنه وعزلت المواعين وغسلتهن الهاً ... اجتي وراية واني انشّف اديانتي،..
نهال بستهزاء، يمعودة زلم مايغسلون مواعييين ،
مارديت عليهًا واني اروح اشرب چايي يم بيبي لشوية وعمواجة يطلع اجوي علية اصدقائة... وشگلها لنهال ضاجت لان اخذها وصعد مبين راح تگب العيطة.... وفعلا اجت اصواتهم ليجوأ....
نهال- اذا هسة تطلع وتروح اخذ بناتي واروح لأهلي! كافي شرب تره ربع دينار ماعدنا وانت تروح ويه ذولي تخلصونها على العرك والگحاب!!!
جاسم-نصي صوتج بنت چلب!! قابل اني شنو اني راح ادفع شي همَ اخذوني يعني ربع دينار مراح ادفع شبيج بعد متكليلي!!
نهال بصوت عالي- والله وداعت بناتي! اذا رحـت هسه وتركتني وحدي! اخذ البنات واروح وبعد ما خليك تشوف اضفري وانتَ تعرف زين اذا طحت بيد اخوتي! ما ينطوني لو تنطبك سمة على الارض!!!
جاسم بستهزاء- ايببااااه شلونهم همه اخوتچ على اساس! باعي لچ اني ما تهدد فاهمه ! وهسة راح اروح واريد اشـوف المرة تطلع وتاخذ بناتي! الا احط نعال بنص حلگها!!!
- هيج صارت مو! احلف بالله بعد متشوف وجهي مره ثانيه!! بسيطة!!
كامت بيبي واني وراها اركض من سمعنا صارت تصرخ اعتقد صار يضرب بيها... رحـت على باب اني وبيبي لگيته فعلاً ديضرب بيها هذا الخبل!
- ولك شبي جاسم يمة تخبلت! عوف البنيه !!
بيبي تحاول توخره من راسها بس متكدر وذيج لسانها ما يبطل غلط...
وهـي جـوإ ! " عمو الله يخليك اتركها!!" حاولت اجـرة بس مفاد! سمعت صوت بناته يبچن رحت عليهم اركض ودخلتهم بالغرفة... طمنتهن ورجعت الهم شفت عمي طلع من باب شارع صعدت لغرفتها... ولكيتها تلّم بملابسها وبيبي كاعدة تقنع بيها متروح....
- والله يحبچ يايمه استهدي بالله واكعدي علمود بناتج !
نهال، انعل ابو بناتي! اني يمّد ايدة عليه هذا ابنج ابو العرك مايفيد ويـا شي الا خواني علاجه! بسيطة!!
اباوع عليهاً طلعت الفون واتصلت بأخوها اجـة ياخذها، وفعلاً تقريبًا نص ساعة اجـة اخوها وجـرت بناتها جـِر مايقبلن يرحن! كتلت رسل رحت اركض عليها وحميتها ورا ظهري
- شبيج متكوليلي خليتي قهرچ بالبنات!!
عاطت بيه" انني انجبي لچ معليچ ذني بناتي اذبحهن اكطعهن تگطع انتي لا تدخلين انوب علية بس انتي والله يالله اشـو دوخري مني وجهي وتعاي انتي!!"
دخلت بيبي وهـي تكوم " استهدي بالله يمة وترگي البنات هنا! يردن ابوهن!"
قاطعت بيبي وهـَي تچرِ برسل من ورإ ظهري" ابوهن اليوم اشعلة! يرحن وياية وبعَد ما يشوفن خلقتة الا على جنازتي وخـري انس من طريقي!!"
دفعتني واخذتها ورسل شبعت بچي وهـَم زهراء خطية ، وبيبي تتوسل بيها
ترجع لـو لا تضرب البنات بس هي شنو لسانها ما يبطل غلط! صعدت بسيارت اخوها ورأحت واني قفلت الباب وانطيت مـَّي لبيبي وعلاجه مال ضغط....
- بيبي لا تعبين نفسچ علمودهم ! تـرة همه دومهم هيچ يعني فدوة لا تقهرين روحچ عليهم،
هزيت راسها بتعب" حبوبة هسة يرجع ويگلب دنيا ابني واعرفة ، لو يروح لبيت اهلها ويتعارك ويه اخوانهم واثنيهم لساننهم الله متبره منهم "
- ههههه والله يابيبي ان اشاء الله ماكـو شي، هسه نامي ارتاحي واني راح اعزل غرفتهم مگلوبة واجي،
هزت راسها واخذت الكلاص الفارغ للمطبخ وصعدت للغرفة عـزلت اغراضهم مطشرة، هسه ذولة شلون اثنين سبحان الله يتشابهون بكُلشي...
حتى بطولة لسان! يعني جنت افكر محَد يزوج واحد يشبها بس صارت! شكلها وتزوج عمي من نسخته... عزلتها وقفلت الباب ونـزلت لكيت بيبي تسبح وكاعدة بالكاع رحـت جبت الها فراش وفرشته ونموتها بالكـوة ...
وطفيت الضوة خليها ترتاح شويه قبل مايجي هذا يگلبها لدنيا....
اني من تعب ماحسيّت حتى على روحي نمت على القنفة وكعدت الصبح على صـوت عمي وبيبي يتعاركـون.... وفعلاً مثل ما توقعت بيبي گلب البيت ويگسر ومبين سكران جان ريحته طالعة ! وبيبي تغلط علية وهـو يگسر بالاغراض واني ما اكـدر الزمة حتىٰ.... واستمر هذا الحال لمدة يومين... احنا يمهم وهـو يروح صاحي ويجي سكران ويضل يعيط... ومن هالحجي، اني مكدرت اروح لشغلي ليومين... فـ طلبت من بيبي اروح اجيب ملابسي اقلهًا وإجي من بيتناً ورحـت كبل لبيت اخذت كم شغله ورجعت لبيت عمي... وعلى هذا الحال استمرت الايام لحتى ماصارت اسبوع كامل...
واخيًرا راحت بيبي رجعتها ورجعت ست الحسن بعد العذاب الشفنا من عمي ....
رجعت للبيت ووطلعت ابيع خبز ، ورجعت دنيا ظهر تقريبًا....
ميته تعب ومتكسرة تگسر... شفت عمي باب جان يمنه يريد يطلع شكله
- لك ها الله يساعدك يابه ههههههه
ابتسمت من ورا خشمي" اهلا عمو "
- بعد عمك شلوونه شغل؟
- زين ....شوي عمي وخر خلي اطب ميته تعب!
اجيت ادخل بس وكف بالباب " ها خير؟"
- لك انس! وينه صديقك الطاك؟ شو ماكو؟
عقدت حاجبي من سوألة" يا صديق مافهمت؟"
ضربني على رأسي" لچ غبية مخُلد اشو مختفي صارله اكثر من عشرين يوم؟ خير ؟"
والله صدك نسيته! مخُلد ليش مـاكو؟ يعني اني انشغلت هاي الايام بالمشاكل وراح من بالي! " ها لك وينه؟"
- ماعرف عمي واذا اعرف مـراح اكولك ! شوي وخـر عمو!
عفتة بالباب ودخلت واسمع صـوتة وراية" لك والله اذإ ما يصير صاحبي واطردك واخلي مايشوفك اطلع مو جاسم لك حيوان!!"
شكد بطران هذا! هسه اني بحالة يالله! اجتي بيبي على صـوته اخذت مني جنطه والعلاگات" يا هذا جاسم شبي! يلعلع صـوته ومنا شارع!"
هزيت راسي واني امسح وجهي مـِن الحر" مابي شي بيبي عوفي وحـده اروح اسبح واجـي اصب غدة تمام!"
- روحي حبوبه سبحي وتعاي تلگين الغدة جاهز بعد امچ،
بوستها وركضت على حمام نـزعت ملابسي كـلهن وگفت تحت الدوش...
حـَسيت بالمّي البارد نـزل لكُل انحاء جسمي... الانتعاش بدأ يسيطر علية فـرگته لجسمي حيل... واني افكر بكلامي عمي وين راح مخُلد! ليش ماكو!
فعلاً مختفي صارلة هـواي... معقولة صار علية شيء! هزيت راسي واني اطرد هاي الافكار من بالي! ليش افكر بي! بشنو يهمني! مثلاً .... سديت الدوش وفتحت الباب حمام مدّيت راسي وانـي احس بقطرات المّي بدات تنزل من كـُل جسمي وشعري... بيبي ماكو فـ طلعت اركض للگنتور، انسى دومي ملابس من ادخل للحُمام.... قفلت الباب وطلعت ملابس بدي نيلي نص ردن.... وبجامة سودة تقريبًا اني متعودة على ملابس شباب.... من زمان تغيرت وصـرت ولد يعني ما اهتم .... وكفت علىٰ المرآية واني اشوف شعري شويه طال... وراح يعبر رقبتي! لازم اكَصة باجر اروح... مشطته وجبت بآند خليته بشعري... مسحت وجهي بيدي وطلعت ماحب اشوف وجهي ابداً احـَس نفسي محلـوة......
لكيت بيبي صابة غدة تمن ومركه فاصوليا... فهجمت على صينيه وتغديت...
بين سوالف بيبي وضحگها خلصنه غدة ورحت غسلت مواعين.... وسويت چاي واخذته لصالة... اجـيت اروح انام شوي بـسَ صاحتني بيبي...
- تعاي يمة عندي سالفة وياج
-ها بيبي خير صاير شي؟
- لا يمه مصاير شي بس هذا الحليوو مخُلد اجـة اليوم زراني، الصبح وراح قبل ماتجون بساعة لو اكثر انتي وعمج ويسال عليچ يكول ماكو، كتله جنه يم ابني وجانت مشاكل فـ بقينه يمهم اكثر من اسبوع...
رحـت كعدت يمها واني أسال" صدوك والله لعد ليش ماكو! هو ومختفي؟"
- سالته گال جنت مشغول بدراستي، وانطاني رقمة گال خلي انس يتصل بيه عندي شغلة ويـا مهمه، مدري وين خلة رقـم ! هاچ بيبي شوفي موجود بالارقام گال حفظته بأسم مخلد
انطتني موبايلها وانـي ادور بالاسماء على اسمة... بصراحة فرحت هواي ماعرف ليش! بس يمكن لان ساعدني ماحبيت يروح بسهولة.... لگيته باسم مخُلد" هياتة لگيته!" رحـت جبت فوني وسجلت رقمة.... انطيت جهاز لبيبي ورحت اركض للغرفة واني اسمع صوت بيبي وراية...
- على كيفچ يمة لا توگعين شجاج تركضين هيج! ليش مستعجلة...
قفلت الباب وتمددت على فـراشي بالكـاع.. اباوع على رقمة بشنو اكتبة!
اممم وبعد تفكير ابتسمت بعرض ونقرت على شاشة المكسورة...
وكتبت مخُلد الخبل" ابتسمت وانـي احَس بكلبي ينبض بسرعة هسة راح اتصل لو شنو... بلعت ريقي بتوتر وعيوني تفتر على اسمة! تقريبًا مرةَ اكثر من ساعة فـ قررت اتصل نقـرت على أتصال واخذت نفس عميق وتصلت.... رن واني بدأ كلبي يتسابق بنبضاتة ... اهدي انس اهدي،
رنـة رنتين.... بسَ مارد.... رن الاخير وبعد ما اتصل يجوز مشغول... فـ تصلت ورن فعلاً حبست انفاسي وانـي اسمع صـوتة مبين نامي!
مخُلد بنعاس، الـوو،
بلعت ريقي واني اهمس" الوو...مخُلد هذا اني انـَس! "
رد علية بصوتة الخشن" منو انـسَ ؟"
عقدت حاجبي مستغربة وكعدت " شنو منو انس! شنو نسيتني!!"
حسيّت صـوته بدآ يضحك بصوت عالي! شنو هذا سكران! اخاف غلطانه!
بالرقم اتإكدت من رقمة ورجعت لأذني....
مخُلد بضحكة- لك مشت عليك خرب عمك
تنهدت واني ارد" متضحك تـرة بعدين لا تسب عمي!"
قاطعني بصوتة رجولي" اي بلة شسوي اذا سيبتة! استاذ كـوري!"
كتمت ضحكتي واني ارد" مـا اسوي شي بسَ اعضك واخليك ما تعيدها مره ثانيه!"
لشوية ورد علية وهـو يضحك بصوت عالي!" لك هاي كل قوتك تعضني! بعدين تعال اكلك ليش صـوتك ناصي مثل البنات! علّي صوتك حتى اسمع زين! وهسه ولي مني اريد ارجع اكمل نومتي... ها نسيت راح انطيك عنوان شقة تجيني باليل ماشي !"
عقدت حاجبي " شنو شقة! ليش اجي! صاير شي؟"
رد برود" خالتك احسن! شبيك يول تخاف! راح اغتصبك؟ قابل
شوف هذا العنوان هو شقتي! وقريب على بيتگم ماشي ومن تجي باليل افهمك وهسة ولي اريد انام"!
ماخلاني ارد وقفل الخط! هذا صدوك يحجي شلوو اروح! بلة... رن فـوني برسالة مكتوب"العنوان هذا ولا تنسى تجي حتى لااجي اجِرك مـن رگبتك ياكوري" ابتسمت واني اشوف كلمات الرسالة.... هذا واحد فعلا ما يستحي... ومايخجل... تنهدت ونمت بتعب...
تقريبًا كعدت بسته ونص المغرب... كمت غسلت وجهي واحسَ بنشاط فضيع لأن نمت هواي شفت بيبي كاعدة بالحوش ومشغلة قران ... رحـت الها بستها بخدها... وكعدت بصفها بالفراش بالكاع.... دنيا مغُرب وصوت القران راحـة نفسية...
- رتاحيتي بنومتج يمة؟ ماكعدتج خليتچ تنامين حتى ترتاحين...
هزيت راسي بـراحة" اي والله بيبي نومة عدلت مزاجي.."
- الحمدلله يمة.، باعي يمة شوي واروح اني لبيت ام كرار، عزمتني على سفرة مسوية لأم البنين، ما تاخر ساعة ساعتين واجـي، والعشة بثلاجه اذا جعتي،
- تمام بيبي روحي ، لا تخافين علية .. واني يمكن راح اطلع شوي اجيب كم حاجة من سوبر ماركت واجي ،
- ماشي بعد امج ولا تتاخرين بسوبر ماركت دنيا ليل واخاف عليچ،
ضحكت بستهزاء" يعني شنو راح يتحرشون بولد يابيبي"
- والله يمة دنيا محـد يأتمن بيها الكل شياطيين صار ولد الحرام هواي ...
وما يفرقون بين ولد بنية...
هزيت راسي واني افكر ليش! ما اكلت الها اروح لمخُلد اكيد ترفضء! هسة تكولي شسوي وتفتح تحقيق ومن سوالف ما تخلص... لشـوي وأذن صلت بيبي وانـي همات... ولبست ملابسها وراحـت... اني هم ركضت على غرفة وطلعت ملابسي كلهم قديمات وماعندي شي حلو ... فرگت شعري بقهر
وطلعت بٌـدي ابيض نص ردن مو ضيق شوي واسع وبنطرون بوري فريند
اسـود لبست ضيق .، رهمت حذاء سوده سبورت ومشطت شعري عدلته زين ... نزل كُلة على عيووني حقة لو يصيحلي الكوري! مخُلد اشبة الكوريين فعلاً،، رغم عيوني كبار بس بشعري هذا.... رشيّت عطر واخذت موبايلي وقفلت البيت وطلعت كبل على عنوان شقة الانطاني ياهاا ....
تقريبًا نص ساعة وصلت فعلاً قريبًا على بيتنا بس هذا المخُلد صدك
طاك على كولت عمي .... انطاني رقم شقة بالرسالة فـ صعدت مصعدت
ورحت الها.... انتبهت بعيوني على رقم شقته هياته وصلت...
اخـذت نفس عميق ودگيت الباب..... من ثاني دگة فتح الباب....
مخُلد، لك واخيراً عبالي مراح تجي من طاح حظك!!
خطف انفاسي بشكلة ! بدون بدي وجسمة معضل وعندة وشـم على صدرة! وشعرة مهُمل نازل على وجهه وعيونة.... هذا شنو ! ملاك لو شيطان هسه!
اشِر بيده كدام عيوني" لك يالكوري وين صفنت!! ولك بس لا دور ولـد !"
ضحك....
- ها!!!
مخُلد بضحكه- وجعاا تعال ادخـل يابة... شلون نخلصها بس بالباب ،
جـرني واني صافنة بعدني بي ودخلني جـوة... بلعت ريقي اني اشوف الشقة عبارة عن شباب! وكـعدة واكـو عرك! واكـو اكل ! لا ياربي ورطت روحي.......
حظني من رگبتي وعرفني" هذا انس صديقي صغير اعرفكم بي شباب"
واحد منهم جان ينركل ضحك وگال" شنو صغير لك مخُلد خجلت الولد!"
- دشوفه شلون ناعم متكلي ! يذكرني بالكورييين نسخه منهم!
احَس برعشة بدأت تسيطر على جسمي وهذا بعدة حاظني من رگبتي واخير وخـر وكعدني على الاريكه بصف واحد منهم.... وهـو شفته راح يلبس بدي اسود ...
اباوع على المشروب والارگيلة! وذولة شباب شكلهم مو راحـة ابدا،
يعني مخُلد يشرب! رفعت عيوني واني اشوفة يجي وجكارتة بين شفايفة كعد كبالي وشـرب من كاسة.... وهو يدخن" تعرفتوأ لا! تره انس خجول ومايحجي هواي"
حجه واحد منهم جان عينه بفونة ركـز بية وضيق عيونة ... شمّر الفون على القنفة واقترب مني! رجعت للورا بخوف وتوتر!
- خـ خير شـ شكوو؟
علي، انتَ .........
___________
يتـُبع .....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!