#بيت_الشيخ_اسد
#يقين_التميمي
لَوَن .. شحت دموع الغيض
خل دمع العتب يلتم ..!
زمرد - كاعدة انضف بالمطبخ ومااسمع بس صوته گال
درغام - مو كتلج انه اجيج واعلمج
زمرد - بسم الله واحد يسلم اول شي
درغام - هم صدك ..سلام عليكمم
زمرد - هلا بيك خوية وعليكم سلام
درغام - شنوو خويةةة
زمرد - ليش يمة
درغام - كلشي كولي بس لاتكولين خوية
زمرد - اي غير اعرف سبب
درغام - بعدين اكلج
سعدية - يايمة هلا هلا اليوم عدنا درغام
شلونك شخبارك
درغام - هلا بيج عمه بخير انتي شلونج
سعدية - الحمد لله عمة
درغام - شنو عمه ماناوي تعرس هل كبرت انت عرس خلي نفرح بيك
زمرد - بقى يباوع عليه وگال
درغام - ان شاء الله عن قريب عمه
سعدية - الله كريم يمة
درغام - يلا انه اترخص جبتلج هذا مسواك اي شي تحتاجي گليلي
سعدية - ياعمه ليش عذبت روحك والله الولد مامقصرين والله
درغام - ميخالف
زمرد - بداخلي ضجت لأن گال عن قريب ازوج اذا يعني صدك عنده وحدة اباله اكيد هي حيزوجها اووفف هسه ليش افكر اني عفتهم يحجون وصعدت فوك
ريماس - يومين مرت ودهام مختفي ماله اي اثر اخوانه ماخلوا مكان عليه
مابحثوا عنه ناس معزومة باچر الحنة
ودهام مختفي لايكدرون يأجلون لأن
عازمين ناس عمتي الي خابصه الامه بالبجي وهو ماكوا رجعوا الولد منن
بعد مابحثوا الكل كعد والتم يشوفون
حل نتصل على دهام ماكو ابد كلشش
اجة اتصال للشيخ رفع جهازة من شافه بسرعه وگف وگال هذا دهااام ...
رفعه وحچه
عقاب - الو الو دهام لك وينك وين مختفي انت ماتكلي وييين
..العفو انت اخ دهام موو
عقاب - نعم منو حضرتك
..جابوة دهام هنا بمستشفى ___ واتصلنا عليك حتى نخبركم بييه
عقاب - اشكرك جايين
ريماس - سد الجهاز لأن جان فاتح مكبر صوت الكل سمع الولد كلهم طلعوا حتى
عمي اسد وابو درغام راحوا وياهم
مرت تقريب ساعتين ودخلوا كل الولد دهام كله مضمد راسه ادينه مجبريهااا
ركضت عمتي وحضنته وبقت تبجي علي
دهام - كافي يمة الله يخليج هاي مابي شي هلواگف كدامج
تهاني - ولك يمة يومين لاليلي ليل ولانهاري نهار منوو مسوي هيج بيك
سودة عليه يمةةةة
دهام - حادث يمة لاتخافين ماكو شي والله لاتبجين بعد روحي
فلة - الحمد لله على سلامتك دهام
ريماس - حمد لله على سلامتك
دهام - الله يسلمجن خوية
عقاب - تعال اكعد هنا بالديوان خلي فراشك لان اصدقائك خبصوا الامه عليك
دهام - شوكت عرس
عقاب - راح اجله على ماصير زين
دهام - لااا عقاب لاتأجل العرس والله ازعل عليك هاي مابيه شي مجرد رضوض بسيطة ناس عازميها فشله
اسد - اي بوية عقاب صحيح كلام اخوك فشلة من ناس نأجل العرس
عقاب - هاي هيه مثل ماتردون
فلة - اخذوا دهام للديوان هناك واحنا بدينا نكمل تحضيرات باجر حنة ريماس
حضرت ملابسي وكل شي باجر الظهر اروح وي ريماس للصالون
مسلم - انتم لو تدرون شصار بميسر من سمع دهام حادث اخخخ متت ضحككك
ميسر - لا ونوب لابس هل دشداشه العريضة رفعتها وصرت اركض بالممرات مستشفى اسأل عليه هل دهام هذا ومن وصلت اله لگيته مايع
سيف - وفوگ كلشي وكسرته رحت ضربته انت
ميسر - مو ضجت على تلفوناته راحن تكسرن سودة عليه
فارس - امداك ضايج على تلفون وماضايج على اخوك
مسلم - الحمد لله حادث الله ستر وطلع منه
سيف - اي دهام شلون صرت هسه ركبتك بعدهي تأذيك
دهام - اي شوية الم بيها
ميسر - متأكد زين زين
دهام - خاب جوعان شبيكم جيبولي اكل
فارس - مريض ويفكر بالاكل هههه
ميسر - اي عود هو مريض ويدلل علينا وجيبولي هيج وسولي هيج
دهام - بوية جوعان ماماكل شي
مسلم - هههه شتريد
دهام - طلبوا دجاج شي
ميسر - نوب يشرط
دهام - ولك والله بس على هذا بطل ماي مااكلت شي من يومين
مسلم - خذيت علاجك
دهام - اي
سيف - وتحجون على ميسر وتكولون مو حنين على اخوانه دشوفوه شون يدهن المرهم
ميسر - اي والله سودة بوجهي شبيك شون مانتبهت من سويت حادث غير
تفتح عيونك وتركز
فارس - بعد حادث وصار
ميسر - تعال مسلم اكعد مكاني ديربالك على اخوك هسه شوية واجيكم مااتأخر
مسلم - خوش كعدنا نسولف وي اصدقاء دهام اجوا تحمدولة بالسلامة وبعدها راحوا دخل ميسر وبأيده علاگة
ومسوي نفسه يبجي هاي شبيك
ميسر - ولك خايف خاف مايطول يومين ويموت دهام
مسلم - هههه وانت شبيك مفاول عليه
ميسر - اووفف منه اووفف
مسلم - هسه شجبت غير تفهمنا
ميسر - حلويات
مسلم - منيلك فلوس
ميسر - هم گال منيلك ولك اشك هدومي شون بله يعني مثل منيلي فلوس
مسلم - اي غير اعرف
ميسر-انت تفكر بأخوك لو بالفلوس
مسلم - لا بأخوي
ميسر - خلص اسكت بعد
مسلم - دحجي وفضني
ميسر - اهوو خذيتهن منك
مسلم - ونوب تعترف
ميسر - عود بعدين انطيهن الك
مسلم - وانت منو گلك تاخذ مني
ميسر - شوو وخر مني ..دهام شوف شجبتلك اجباس وخلويات اشكااال
دهام - اي جيت بوقتك جوعان
مسلم - مو هسه اكلت قبل شوية
دهام - اي بعدني
مسلم - مد ايدة دهام يريد ياخذ جبس وهذا ميسر طك ايد دهام
ميسر - وخرر ايدك... انه اوكلك
مسلم - والله انه اكول هاي جبتهن لروحك الحلويات اذا ماتخلي دهام
ياكل اذا الك
ميسر -هاك خاي جبسة وحدة ..وانت مسيلم الوصخ ترة طبعا هاي جبتهنن
الي يعني انه راح اسهر عليه غير اجيب
شي اكله قابل اضل هيج
فلة - كعدنا ساعه 10 الظهر لكينا يجهزون بالغده شيوخ عدهم جايبين طباخ هو يطبخ تريكنا اني وريماس وبعدها مرت كم ساعه صار الغدة تغدينا ولبسنا حتى نطلع للصالون
- ها رموسة شنو شعورج
ريماس - لج ماادري احس گلبي راح يطلع شعور محاسته من قبل
فلة - هههه دمشي يله ...خذانا مسلم وصلنا للصالون وراح بدت تشتغل ب
ريماس وحدة ثانية جتي كتلها اريد مكياج هادئ وحلو بدت تشتغل بينا
عمتي تهاني بقت هناك نسوان تجي والبيت محد بيه لازم بي احد اجتت
ويانا عمه سعدية
كملت قبل ريماس وكعدنا ننتضر تخلص شوية وكالت ام صالون خلصت رفعت راسها ريماس صارت حييل حلوة طالعه
عبالك اميرة بدلتها لون مشمشي وكلها
كرستال من صدر ومن جوة منفوشة
سعدية - الله مصلي يحفضج الباري يعمه ويستر عليج بحق محمد وال
محمد
ريماس - شكرا عمه
-اتصلت فلة على الولد شوية واجة درغام صعدنا بسيارة تباركلي وبعدها
وصلنا للبيت جان دنيا ليل حتى الاذان
مأذن حييل تأخرنا بالصالون
نسوان كلها متجمعه دخلت وعمتي تهاني صارت تهلهل وطش جكليتت
گلبت الدنيا بالهلاهل كعدت على..
الكرسي جتي امي بوستني براسي
فلة - صعدت الدرج ركض بعدني ماواصله للغرفه شفت محد واني مستعجلة رفعت تيشيرت قبل لاادخل
للغرفه ردت انزعه فتحت الباب شفته فتحت عيني على وسعها نزلت تشيرت وعدلته يشرب جكاير ومخلي سلاحه على الميز الي بصف السرير
-هاي انت شعدك هناا بغرفتي
دمار - اجيت اشوفج
فلة - ههه ضحكتني والله ممكن تطلع اريد ابدل رجاءا
دمار - ماتبدلين منو لازمج
فلة - فتحت عيوني على وسعها
شلووون ابدل وانت هناا
دمار - قابل غريب
فلة - دمااااااااار
دمار - شغف گلبي
فلة - استغفر الله ربي
دمار - اذا تبقين تستغفرين راح دخلين الجنه بسببي
فلة - لا حول الله لك دادة شون هسه مو تأخرت اطلع خلي ابدل
دمار - والله يادادة عدي شروط اول شي يلا اطلع
فلة - نوب يشرط
دمار - بكيفج حبيبتي
فلة - احترمم نفسك مو حبيبتك اني
دمار - چا حبيبة منو
فلة - ماعليك
دمار - اوييي تحجين صدك
فلة - وتالييي وياك
دمار - صوتج لج لاتعلييي عليه
فلة - تفضل شنو شروطك
دمار - شايفه هذا المسدس كدامج لو لا
فلة - باوعت عليه عقدت حواجبي اي اشوفه قابل عمية
دمار - تمام حبيبي شوفي هذا الصبغ الي بوجهج كله هسه ينمسح
فلة - شنوووووو
دمار - وجع حتى وجع اذاني راحت
فلة - انت تعرف روحك شجاي تحجي
دمار - خليي اكمل ...اي المهم لبس مخلع وغيرة ماكوو وتلبسين عبايه
من طلعين بالزفة هم واذا لمحتج قريبة على المطبخ لو يم الولد ماا تلومين الا نفسج هذا مسدس شوفي افرغه براسج والله
فلة - يحجي بعصبيه ويعدد بأصابعه من اشر على المسدس هذا مخبل اكيد يسويها بلعت ريكي هزيت راسي بخوف
دمار - يلا كدامي مسحي هل صخام بوجهج بسرعه
فلة - خزرته ورحت للميز خذيت اكلينس وبقيت امسح بعصبيه
-هاييي خلصت
دمار - شو باعيلي
فلة - وكف صار مقابيلي متخصر بقى يباوع عليه واني خازرته
دمار - عيونج لافكسهن
فلة - هو انت فالح بس بالتهديد
دمار - ديلا انه طالع مثل ماكتلج لبسج يالبسج
فلة - فهمناااا استاذ اوامر ثانيه
دمار - اذا ذكرت اكلج
فلة - طلع وسد الباب وراه واني رحت غسلت وجهي واسب واغلط عليه خلاني امسح المكياج الي بقيت ساعتين بس اخلي الله لاينطيه بدلت وعدلت وجهي
نزلت صارت بوجهي معصومة لاهلا
معصومة - هي لج دمار شعده جان بغرفتج
فلة - شنو ماما جنتي تراقبينه
معصومة - لا صعدت للغرفة وشفته
فلة - خليتها تحجي رحت يم البنات وشغلنا ساجدة عبيد بقينا نركص
لحد ماصارت ساعه 8 ونص بليل
كالوا الولد راح يركصون جوبيي
ركضنا طلعنا اني وزمرد وفضة وذهب وماسة واكو بنات هم مانعرفهن اجنن
جان هو يركصون برة بالحديقة الولد كلهم يركصون الشيخ عقاب هو لازم
راس الجوبي ومن طرف ثاني والمح
دمار لابس دشداشة وغترة ولازم نهاية
راس جوبي هم وباقي الولد يركصون
بقيت صافنه علية هاي شنو اول مرة
اشوفة لابس دشداشة حيل طالع هيبة دشداشه حاضنه عضلاته والغترة لافها
لفة امارتية شفت بنات يمي يحجن عليهم وكل وحدة مخيلة على واحد بيهم امداجن كون
صار دمار ودرغام تكابلوا اثنيهنم صاروا يركصون جوبي لازمين بأيدهم سبح والايد ثانية لازمين بيها عصا وي كل حركة يسوينها گلبي يذوب واشوف ذني يتغزلن بيهن البنات وگلبي شتعل نار
شوية وصارت هوسه بعد ماكمل الجوبي شغلوا الديجي والولد مسلم ميسر فارس سيف درغام كلهم دخلوا يركصون
وصوت ضحكهم عالي لعبوا لعب
التفتت على صوت واشوف ماسة تغني وطك اصبع وتهز رگبه
- چم گلب يرادلي احمل هذولة وذولة..
مااكدر اني انساهم مو بيه صارت لوله
اويلي ...اويلي منهم گلبي ذايب
اويلي ...اويلي بس هم ومصايب
زمرد - اي والله صدك يرادلي گلوب هوايي اني اريد ابو دشداشة سودة
محجوز الي هذا يركص جوبيي
فضة - خيه هم كلهم حلوين يربييييي اشك هدومييي هسه شسوي يعنيييي
تخلق بهل حلوين مااتحمل بعد
ذهب - يمة احبهم كلهم شلع قلع اموتت عليهم ولد خوالي صاكييين هههه
ماسة- اخخخ دشوفن شوفن جمال الاناقه يربييييي شون يركصون جوبي
فلة - اني گلبي يحمل بس دمار
زمرد - نحن هنا ههههه
ماسة - ذولة شاردين من الجنه
فضة - بعد انتاج البصرة
فلة - دمشن عفنا العروس وحدها هههه رحنا احنا والبنات رجعنا نركص لعبنا لعب بعدها الوكت تأخر كلمن طلع راح
الي اهله قريبين راح والي بعيد بقوا يمنا ..
ريماس - بعد ماخلصت الحفلة خليت وتعبت صعدت فوك بالغرفة اريد ابدل
لأن ختنكت كلش نزعت البدلة وبقيت ادور لكيت دشداشه دالبس بيها وماحس
غير الباب نفتح بسعه كمزت من مكاني
فلة - اكلجن بنات اني جتي فكرة گومن خلي نسويها حبابات
زمرد - الله يستر من فكرتج
ماريا - لاتورطيني وياج فدوة
فلة - امداجن غير ضوجة نغير جواا شوية
ماسة - بله اطربينا شنو
فلة - خلي نهجم على غرفة الولد وكل وحدة تاخذة دشداشة مغترة وعباية نلبسهن ونهوس
فضة - اني عجبتني خوش فكرة
ذهب - كومن يله هههه
فلة - ركضنا على غرف الولد كل وحدة بيهن دخلت لغرفة رحت لغرفة دمار همزين طالع طلعت دشداشة وغترة وعباية هم خذيت سبحه من سبح الي عده طلعت رحت يم البنات لكيتهن جاهزات
زمرد - ههههه صرنا زلم
ماريا - انه لبست عبايه نسوان فوك الدشداشة شلوني هههه
فلة - تخبلين هههه
ماسة - وهسه شنسوي بعد
فلة - شوفن هاجن هاي علاليك تشدنا براسجن فوك الغترة حتى تصير مثل العگال
فضة - خوش جيبي ..خذيت العلاكة ولبستها شديتها فوك الغترة باوعت
لروحي يععع صخام بوجهج فله شسويتي بينا
فلة - شبيجن والله طلعنا نخبل
ذهب - والله الولد لو يدرون جان موتونا هههه
فلة - دمشن هم طالعين كلهم برة عدهم شيوخ وناس مايجون
ماريا - نزلنا للديوان الي بالبيت وشغلنا ديجي وبقينا نهوس ونركص
فلة - اسمعن اسمعن
-بين ضلوعي
يلهيبه اسمك
ماريا - يلهيبة اسمك بين ضلوعي
ماسة - ها ها مسودن بيك وقافل
بالشط ذبيته المفتاح
فضة - بالشط ذبيته المفتاح
زمرد - ها خوتي ها
البنات -هاااا
زمرد - احنه من اهل الله
لاجن بلشر تفاكه
ذهب - احنا من اهل الله ها ها
ماريا- كاعدين نهوس ومانشوف بس الباب نفتح وذني ماريا وفلة يهوسن وكل الولد وياهم شيوخ كبار هم خطيه صافنين
فلة - خزرتنا ماريا التفتنا واشوف بس دمار والشيخ عقاب وكل الولد
موجودين وشيوخ هم صفنت بوجههم
عقاب - من رخصتكم الضاهر الاهل ميدرون بيكم مسحوها بوجهي
الشيوخ - لا عادي بوية عادي اخذوا راحتكم
فلة - طلعنا احنا والبنات وحدة تصفن بالثانية صخام بوجهنا هسه يلعبون بينا طوبة
ماريا - اني شاردة لبيتنا باييي
فلة - طاححضج تعاي عاد نكتلي ويانا مو بس احنا ننكتل
ماريا - دروحي بابا مارايده روحي
زمرد - اني راح اقفل الغرفه اني وخواتي امشن يله وفلة قفلي عليج قبل لايجون
فلة - خوش يلا روحي بسرعه راحن البنات لغرفهن واني صعدت فوك نوب درج صار شطولة عليه اريد اوصل الحك على روحي لاحصلي رزاله بعدني جاي اصعد وماحس غير نسحبت من ايدي ونضربت بخدي طراك يخبل رفعت عيني واشوفه .....!!
-هاييي ليش ضربت
يتبع ....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!