#بيت_الشيخ_اسد
#يقين_التميمي
مشتاكلك حيل وعلي
بس جنك مضيعني
فلة - طلعنا احنا والبنات من سمعنا هوساتهم وراح يزفون الشيخ دخلت
بغرفة وفتحنا شوية من الباب حتى..
نشوف الزفة والبنات وياي صارت لخه
دخل الشيخ وراه الولد كلهم يهوسون
ويدبجون صار بنصهم دمار يهوس
دمار - اخوته سباع والليلة يزفونه اخوته سباع
سيف -شد شد بعد اخوك
درغام - الحاكم گال هذا العرس منين اخوته سباع واهل امه السلاطين
فارس - كلووووششش
ميسر - تونس خوية تونس سد البردة وسد الباب تونس خوية تونس
مسلم - ولك فضحتنا حتى هوستك استغفر الله
ميسر - خلي اطيك اقوة احم سمعونيي
وعقاب طفي الگلوب خدها يشع وي الروب
سيف - كلوووشش العببب اردححح
ميسر - شدددد بعد خاااااالي
فارس - كلوووووششش شعرر شعرر
دمار - وزفيناه بصاية حيدر
فلة - لحد مادخلوا عقاب للغرفة وهم يهوسون والله خوش هذا دمار الخبل طلع يعرف يركص عبالي مايعرف راحو
يهوسون وطلعوا من البيت كله وهلاهل
نسوان بعدهي
ريماس - دخل عقاب للغرفة واني واگفة تقدم عليه وباسني براسي وهمس يم اذني. بصوت رجولي هادئ
عقاب - الف مبروك الج والي يابعد كل العشيرة
ريماس - سرت رجفة بكل جسمي هو حس عليه قربني اله وحضني وصار يهدي بيه
عقاب - اششش اهدي بوية اهدي عليمن هل رجيف هذا گومي نزعي البدلة خلي نصلي اول شي نبدي حياتنا
بالصلاة والدعاء
ريماس - هزيت راسسي ورحت طلعت ملابس الي وهو عيونه احسها عليه دخلت للحمام اريد افتح البدلة ماتفتح
طولت هواي واني احاول افتحها گوه يلا نفتحت خذيت نفس بدلت ملابسي لبست روب ابيض قصير هو بس فوگة قطعه ثانية طويلة وتغطي كل جسمي
فتحت تسريحة احس شعري تكطع كله
غسلت وجهي من المكياج طلعت وهو
هم دخل للحمام فرشت المصلاية وهو
طلع متوضي يعدل بردان دشداشته تقدم صار كدامي صلى واني اصلي وراه
كملنا صلاة وهو رفع ادينا صار يدعي
بعدها التفت عليه خله ايده على راسي
وصار يدعي
كملنا صلاة وندك الباب راح هو فتحه
تهاني - تفضل ماما هذا عشاكم
عقاب - الله يحفضج يمة
تهاني - على كيفك وي بنيتنا
عقاب - ههه ليش قابل راح اكتلها
ريماس - صار يم عمتي ويحجون همس ماادري شنو بعدها سد الباب ودخل
عقاب - يله تعاي تعشي
ريماس - لا ماريد مااشتهي
عقاب - دگومي بوية حتى لو تاكلين شوية مو زين عليج ماماكله شي من الصبح
ريماس - سحبني من ايدي وكعدني على الميز وهو گعد هم بدينا نتعشى كليت شوية لأن ابد مااشتهي
خلصنا وهو راح للحمام يغسل
شوية وطلع من الحمام ردت سويت نفسي الم بالغرفة على رغم هي مابيها شي ونضيفه كلش
ماحس غير شيخ اجة وحضني جمدت بمكاني وهو كسر ضلوعي كلش صار
يضغط عليهزحيل بحضنته بقيت
ماسويت شي بس بادلته الحضن وماحس غير شي بلل متوني واشوف
متون شيخ يهتزن طلعت شهكة من عندة وصار يبجي بصوت عالي وحاضني
بجيت وياه واصلا ماعرف ليش بس اني اذا اشوف احد يبجي ابجي بسرعه وياه
كعدنا بالگاع وهو بعده حاضني همس يم اذني بصوت بي بحة
عقاب - احبچ يرجفة روحي
ريماس - مااعرف شنو سويت بس بقيت ارجف سرت رعشة بگلبي گال
عقاب - ريماسة گلبي
ريماس - حضن وجهي بأيده ميلت راسي علي ايدة دافية حيل
عقاب - تحبيني
ريماس - صارتت عيوني بعيونه بقيت اباوعله وهو منتضر مني جواب هزيت
راسي وكتلة
- احبك ياشمعه حياتي
عقاب - گولي يامملوح احبك حتى
احس ينهاب طيني
- ضحكت وكتلة احبگ حد كطع النفس
عقاب - شما بيچ اضحكي هواي خليني بهواچ انجن"
ريماس - ابتسمت وهو صافن بيه
عقاب - العيون شبيهـا تخدر من تلمحج
ريماس - صفنت عليه وبس صوت كلامنا يتردد بالغرفة
عقاب - احبج حيل يل كل حيل مابيه
ريماس - ماحس غير سحبني وصرت بحضنه صار وجهه قريب عليه انفاسه
اختلطت وي انفاسي ماعرف شنو صار
بس كل الي احسه اني مثل اللعبه ويحركني تقرب عليه وطخت شفايفه
بشفايفي صار يعضني وبعدها رفعني
وگام واني مستسلمته صار يبوس بيه
نزل على رگبتي خلاني على سرير صار
فوگي رفع راسه باوع بعيوني وگال
-اليوم للصبح
وووو ويله كافي نسد الباب ونطلع هههه
الصبح:
ريماس - كعدت من نوم واشوف شيخ گبالي مخلي ايدة على وجهي ويتلمس
بشرتي ابتسمت بوجهه
عقاب - اول مرة الزم صباح الخير تدرين
ريماس - ابتسمت وصبحت عليه
عقاب - ياصباح الله وفرحتي
ريماس صار يغني بهاي الاغنية
عقاب - الفاتنة الي على گلبي تمون
-اهي صباح الخير ولا الخير هي
-ناضرتني وسلهبت بيك العيون
-الغزل والشوك واسرار الحكيم
ريماس - ابتسمتله وگمت اروح اغسل دخلت للحمام سبحت ونشفت شعري بشسوار
غيرت ملابسي وطلعت وهو دخل للحمام. مشطت شعري وغيرت ملابسي
لبست مثل زي الكردي وجان بي حزام من ذهب الشيخ هو جايبة كله ذهب لبسته وشعري طويل وسرح بقيت اعدل
خليت مكياج خفيف وطلع شيخ من حمام بقى صافن گتله ..ها حلوة
عقاب - ياحلوتهن وكل حلوة توگف بصفج مو حلوة
ريماس - هههه لا شسالفه
عقاب - وداعت عيونج الحلوة يتروحلج كل العشيرة فدوة
ريماس - باسني براسي وهو بدل وكمل لبست شال شيفون بلون لبستي وطلعنا
من الغرفة لازم ايدي ونشوف اسراء
اسراء - صباح الخير
عقاب - صباح نور شنو ريم وينها
اسراء - نايمة ريم
ريماس - باوعتلي وخزرتني رفعت حاجب
اسراء - ااا الف مبروك
عقاب - الله يبارك بيج محتاجة شي
اسراء - اي هي اختي معصومة تريد
تجي هنا يمنا تبقى فترة لأن بيتنا
ديبنون بي وهي تختنك من ريحة صبغ
عقاب - هلا بيها خلي تجي
اسراء - اخذوا راحتكم
ريماس - عافتنا وراحت حجيت بگلبي والله لو فلة عرفت معصومة راح تجي
عدنا تتخبل علينا
نزلنا جوة وصار الكل يبارك اليه بعدها
جتي ناس وشيخ راح يمهم للديوان
مرت على ايام زواجي ثلاث ايام جانت
احلى ايام بحياتي معصومة اجت يمنا
وصارت هي واختها دوم فوك بس من
يجي دمار هي تنزل وتكون على اخر
حباية مكياج طووخ
فلة - دخل درغام للبيت سلم على عمي اسد وباقي الولد دمار ماكو ماشفته عبالي بقى هناك بغداد ماتحملت گمت اشوفة وين طلعت برة ماكو حتى سيارته
ماهي نزلت دمعه مني حيل اشتاقيتله
ولا كأن يومين مختفي عبالك سنين ماحس غير كرصة بمتني اخخخ اكو احد درت وجهي وسكتت من شفته واگف
دمار - شلونها فلايتي
فلة - انت وين جنت عبالي ماجيت طلعت ادور عليك وشفت سيارتك
ماكوو
دمار - ليش دورين عليه
فلة - كتف اديه ويحجي رافع حاجب
- عبالي اكلك الذيب الي مربينا بالحديقه
دمار - افا عليج رجال شكبرني ياكلني ذيب شمالج بوية مكبسلة انتي
فلة - دنحجي وماشوف غير هل بريعصي دايح اجت تركض وكفت يمنا
معصومة - هلاوو دماري شلونك
فلة - شنو دمارج ماما اسمة دمار خوووش
معصومة - وانتي شعليج
فلة - شنوو شعليه بت عمه اني ومن تحجين احجي وياه بأدب مو مستخفه
ومخليتلي طن مكياج كولي عدنا ولد
استحي شوية
معصومة - ماراح ارد عليج لان جاهله
فلة - نجبي ماغيرج جاهله حيوانه
دمار - كافييييي بس شبيجن تخبلتن انتن
معصومة - احجي وي هااااي بس يلا اعذرج لأن تغارين مني
فلة - اگدر اهين كرامتج بس أني ماگدر اهين شي مموجود اصلاً
معصومة - دتشوفها دمار
دمار - فلة كافي يله روحي دخلي جوه
فلة - ماادخل خليي هي تدخل هاي انتي المفروض يسموج معصورة مو معصومة
معصومة - وحدة متستحين معدج اخلاق
دمار - معصوماااااا امشي جوااااا يله
فلة - خزرها دمار وهي باوعتلي بغضب خلت وراحت والله يالله يردوني ادخل واعوفهم وحدهم التفتت واشوف دمار
كوه مسيطر مايضحك بصوت عالي
دمار - ولج بوية شسويتي بالبت كلتيها وبلعتيها شمالج
فلة - والله تستحق اكثر بس انت ماخليتني احجي اخخخ لو بسس
شوية مفرغلي ساحة جان مطلتها
وكسرتها تكسر هل معصورة هاي
جنها بريعصي دايح
دمار - ههههه ولج كافي شنو من لسان انتي احم ميخالف بوية تحمليها هي خطار هنا كم يوم وتروح
فلة - نتحمل ونشوف حتى اذا مامشت عدل اني اعدل مشيتها
دمار - اعصابج ترة تكبرين من وكت بسبب العصبية وتحترك بشرتج
فلة - اوووويي اسم الله يمة والله بس يصير شي بشرتي هاي بريعصي دايح
محد يخلصها من ايدي ساعتها
دمار - مايفيد وياج الحجي ضايع وياج
فلة - هذا الموجود عدي ..دخل وسلم على اهله وهاي معصومة بس تخزر تهي بهي عبالها اخاف منها هي ايمان مرت ابوي خليت دمها بطولها كتلتها بالطاوة وهاي هسه اسحكها سحك بسيطة
سيف- باع هذا الخبل يحجي ويه تلفونه
فارس - هههههههههه
ميسر - ليش ضايج حبيبي صارلك يومين اكو يوم مأذيك بس گلي هسه فراش وشتريتلك بطانية وجبتلك اشغلك سبلت( ويبوس بتلفونه)
فارس - مسلم انت شبيك واكف ومخلي اصبعك بحلكك ههههه
ميسر - ولك مسيلم يابه لاتخزر بتلفوني يخاف منك وخر من عنده وخر
مسلم - خاب شووو وخر وكفوا يتعاركون
ميسر - لااااا لااا مسلم خرب كسرة
فارس - ههههههه معتني بتلفونه اكثر من روحة
ميسر - لاااااااااا بوية گلبيييي جهازييي راح
فارس - شو بله لا مابيه شي مابي
ميسر - ولك يا مابيه شي راحت حباية منه
سيف - ياخوية مابي والله جنه العافيه
ميسر - تفووووووو عليك مسيلم الخايس
مسلم - بوية امشي اخذك للمحل واخسرة الك اشتريلك جديد رحنا
للمحل وصلنا وسلمنا على رجال
ميسر - داريه اليه داريه عفيه
سيف - ههههههه هو تلفون شسالفه
ميسر - هاك الزمة لاا اوكف امسح ايدك هاك اكلنس يلا لزمة
...ماكو هيج قابليه
فارس - يلا بوية مسح ايدة الولد انطيه تلفون خلي يفحصه حتى نطلع
ميسر - لزم تلفونه وباسه ولك انت اعز من مسيلم اخوي احجي ويه تلفوني
ابو المحل اخذ تلفون ويريد يخلي لزكة اله
ميسر - خوية على كيفك فدوة
ابو محل - هاك انت خليها
فارس- ههههه لالا انت خليها خوية
ميسر - بوياااااااا بوية ميسر اشترة تلفون اخر موديل ولك مسيلم الا ماخليك تاخذ بيه صورة
مسلم - هههههه مخبل والله
ميسر - حضنت تلفون وابوس بيه بوية عزيز گلبي انت شو خلي ابوسك
سيف - وهذا تلفونك القديم وين توديه
ميسر - طلعت تلفوني القديم ياحبيبي انت اني اشكرك كلش هوايه على سنتين خدمتني بيهن بس شسويلك انت ضعفت اخر سنة كمت لاتشحن لاتشتغل عدل
فارس - هههههههه خبل احلف عليه
ميسر - المهم خوية على كيفك ويه التلفون
ابو المحل - وخر من يمي وخر
ميسر - هيي انت مسلم لاتباوع عليه هو تلفوني مو تلفونك
مسلم- هسه اني يمك ثول
ابو المحل - تفضل على الخير
ميسر - اشكرك لزمت علبة تلفون ومسلم راد يلزمة وكع بالگاع
ميسر - بووووووية دك على رجلينه ولطم بوية وكع تلفونيييي
فارس - شيلة شيلة
ميسر - بوية بعد روحي انت ولك مسيلم اليوم شيخلصك مني
سيف - مسلم ليش وكعته انت ههههه
ميسر ااااخ يمة راح التلفون راح اهئ اهئ ولك اليوم اموتك مسيلم
سيف - بقية بحياتك خوية
فارس - ولك شبيك كلبتها مناحة كوم مابيه شي شو خلي اشوفه
ميسر - وخرررر لحد يلمسة وخر خابروو الاسعاف خلي تجي ناخذة للمستشفى
ابو المحل - بوية اني ارجعلك افلوسك واطلع منااا
سيف - ههههه لا خوية مشكور يلا
ميسر مابيه شي كوم نطلع
سيف - بوية احنا جايينك بموضوع بس مستحين منك
فارس - كلش مستحين بوية
ابو درغام - وشنو موضوعكم
فارس - بوية ااء ء ارد اعرسس
سيف - مفخت فارس على علباته
- ولك گله سيف يريد يعرس وانت
فارس - هو شنو انت انه ارد اعرس
هم
سيف - دكل خره انه اعرس اول
فارس - لك انه اخوك جبير لازم اعرس اول
سيف - هو كله اكبر مني بخمس دقايق
فارس - هههه المهم بوية شو غلست
ابو درغام - شنو بوية شذكركم بالعرس
فارس - شنو شذكرنا بوية غير كبرنا
سيف - صرنا شياب ومامزوجين
درغام - عدكم فلوس انتم لاميلكم لمه
سيف - لا والله
فارس - انه هم ماعندي
سيف - وين اكو واحد يعرس ال روحه غير اخوه الجبير وابوه هم يعرسوله
ابو درغام - اول شي ازوج درغام وبعدين عود انتم وراه
فارس - المهم بوية انت تعرس النا انه وسيف سوه بهاي الايام
سيف - اي بوية عرس النا قبل درغام
درغام - دروحو رتبوا شعركم بالاول عبالكم مزعطة
سيف - والله صحيح كفخت فارس على راسه لك انت صدك زعطوط
درغام - بعدك صغير عمرك 23 لاحك على العرس
سيف - هو شنو بعدني صغير هسه هذا وكت عمر 15 ويعرس
فارس - هسه سيف زعطوط انه بعير وطرن عرسولي
سيف - اها فارس بكد المطي ماتعرسوله
فارس - نجب شنو بكد المطي
درغام - ترة نفس العمر تؤام انتم
ابو درغام - كلت لا اول شي درغام يله انتم
فارس - بوية هسه انت اذا تاخذها على الاعمار اكو اصغر من عدنا ويعرسون
درغام - عرسلة بوية هسه شتريد من عندة
ابو درغام - لا بوية شنو هل مزعطة هاي تعرس
سيف - شوف بوية انه طويل وجبير عرسلي انه
فارس - ههههه
ابو درغام - لا اول درغام صار شايب نزوجة يله انتم
سيف - اذا ماعرستولي اشرد
درغام - لالا شسالفه نعرسلك ماعليك
سيف - اي شوف انه اطول من حبيش وشواربي كبار
فارس - هههعع
درغام - ولك جا هي مو بالطول ههههه
فارس- شنو مو بالطول رجال جبير ومرحلة رابعه
سيف - انه بعد مابيها مجال اكو اصغر مني جهال وتزوجوا كبرت وارد ازوج
فارس - بوية هذا راسك ابوسة خلي اسولفلك هذا سيف خيولي بعده زعطوط جاهل
ابو درغام - اذا تنازل سيف انه ازوجك
فارس - انه مااتنازل لو هسه شيصير
درغام - هههه ليش ماتتنازلة
فارس - نريد عررررس
درغام - زين عدكم نسوان انتم
سيف - بكيفكم انتم اختاروا النا
ابو درغام - لا زعاطيط خيولون
فارس - بوية هاي كل الشوارب وتكول زعاطيط شسالفه
ابو درغام - بس درغام اذا راد ازوجنه
سيف - هااااا
درغام - لأن انه عقلي جبير مو مثلكم مخبلين
فارس - شنووو هاي مايصير هيج
سيف - كوم صيح وياي
هذااااااا البييييييت بااااااااااطل
ابو درغام - نجبوا واكعدوا
فارس - وهاي كعدنا
ابو درغام - بوية درغام شرأيك بنت عمتك زمرد اخذها الك خوش بنيه
درغام - مدري بوية افكر
ابو درغام - مايحتاج تفكير شتكول
درغام - انه اگول ........يتبع
شلونه البارت ادري جاي اتأخر يلا انزل الكم بس هذا الاكدر عليه والله
قراءة ممتعه
هاااااااااااااااااااااااااااا صدك
ذكرت بنات طلبوا مني حسابات ابطال الرواية حجيت وياهم ماقبلوا
بس فلة وريماس انزل الكم حساباتهم
لأن كالن عادي وهم يردن يتعرفن عليكم
حساب فلة ...👇
حساب ريماس ...👇
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!