رواية بيت جبر الفصل الثامن والعشرون 28 - بقلم هُدىٰ آذار

مـساء الخَير يا حلوين
واحلى بـارت لعيونكُم
لا تنسون التصويت والتعليق بين الفقرات
للكاتِبة : هُدىٰ آذار
_____________________

ايلول

ابو ايلول
دكتور هَسة اني جاي الاحظ علامات حَيل غريبة ومنها
ارتفاع درجة الحرارة بدون سَبب
رسم الدماغ ابدًا مو مُنتظم
نبض القلب ينخفُض ويرتفع فجأة !!

الدكتور
كُلهن هـاي دليل على تفاعُل جسمها وي المادة
دكتور يحيى لازم ندخل فورًا ونحتاج كادِر طبي مُتكامِل والافضل ننقلهة لـ اربيل حالًا واني وياكُم راح اكـون

الوضـع جـان غريب بالنسبة الهُم وحَيل خطير، ماكدروا يفسرون كُل شي رأسًا بس عرفـوا بالخطورة الي جاي تمر بيها ايلول بالتحديد

انتقلـوا بـ سيارة الاسعاف مُباشرتًا لاربيـل لـ احد المُستشفيات الخاصة والمتطورة
ابـو ايلول بمعرفتة استدعـة هواي اطباء لان العملية ما كانت طبيعية ابدًا

أثناء النقل إلى أربيل

السيارة تمشي بسرعة عالية، وصفّارات الإسعاف تدوّي بالشوارع، وداخلها موجودة أيلول على السرير، مربوطة بالأجهزة .
وموجود يمهـا ابوهـا و الدكتور عِماد ويّاه، يراقب الشاشات ويحچي ويّ المُسعِف .

فجـأة
أيلول تفتح عيونها ببطء
بس نظرتها ما تشبها، نظرة جامدة، باردة، كأنها مو هي.
تلِف راسهـا بصعوبة، وتباوع على أبوها.

ابو ايلول
ايلول؟ حبيبتي؟ إذا سمعيني گوليلي شي
بابا شبيج شنو الديأذيج شدتحسين بالضبُط ؟

باوعت ايلول عليّ بـ استغراب وكلتلة بصوت خافِت
ايلول
انتَ مو ابوية ..

الدكتور عِماد وهوَ يراقب الشاشة :
النبض ارتفع لـ ١٣٥ فجأة!
الضغط نزل بشكل حاد.
خريطة الدماغ طلعت موجات عالية بمنطقة amygdala (مركز الخوف والعنف).

أيلول بدأت تحرك أصابعها بسرعة، وكأنها تكتب شي بالهوا.
الأنوار بالسيارة تذبذبَت فجأة، وصار بيها رعشة بسيطة، كأن السيارة ارتجّت.

المسعف
دكتور!
أكو خلل بالكهرباء ! الشاشة طفت ورجعت!

الدكتور عِماد (بقلق)
حرارة جسمها ارتفعت للـ ٤٠ !
بَس هذا مو معناه ينطفي الجِهاز بسببة ابدًا دكتور يحيى

ابو ايلول (بتوتر)
دكتور عِماد مُمكِن المادة الي بجسمها اتفاعلت وي العصب الحِسي او الغُدد ؟؟؟

الدكتور عِماد
بلي بلي صحيح دكتور فَ لما الحرارة ترتفع، يصير تسارع بتفاعل المادة يعني تفرز شحنات كهربائية صغيرة
مُمكِن هاي الشحنات تخرب توازن الموجات أو تسبّب خلل بأجهزة دقيقة، خاصًة لو كانت غير معزولة كليًا ..

فجأة أيلول تفلت من الرباط بيدها اليمين، وتمد إيدها بسرعة، تمسك جهاز التخطيط وتسحبه.

ابـو ايلول لزمهـا حَيل وجان ديحاول يثبتها بالسرير
بَس فجأة ايلول كام تصرخ وتكول ( ابعدوا عني )
والصوت مالتهـا جان غريب وكإنما صوت احد صارلة نص ساعة يصرخ!

الدكتور عِماد
حقنوها بحقنة تثبيت فوري!
لا تفقد السيطرة، هاي بداية انهيار عصبي كامل!

المُسعف يجي ويحقنـها رُغم مقاومتها الة وصياحها وبجيهـا
بهل اثناء ارتخت ايلول بيـن ادين ابوهـا وهمست بـ
راح يرجعون بابا، راح يرجعون

بهل اثناء فقدت الوعي والشاشة ترجع طبيعية

ابو ايلول بِدة ينتفُض ويخـاف هواي على بِنتة وجان بس يريد يوصَل للمُستشفى ويشوف الجـاي يصير شنو !!

بعَد الوصول لـ احد مُستشفيات اربيل
الكادر متجهِز والاطباء موجوديـن
تم استعداء اكثر مِن دكتور بـ اكثر مِن تخصُص بطلب مِن دكتور عِماد
استدعوا اخصائي تحاليل سريرية لتحديد نوع المواد الداخلة بالدم
وبوجود الاستاذ الدكتور استشاري كيمياء حيوية وسموم عِماد
دكتور قليل التواجِد بالعراق يشتغُل معَ المُخابرات الدوليـة بَس لحُسِن حظ ابو ايلول بهل يـوم كان متواجِد واجة بطلب من ابو ايلول

المُستشفى مُستشفى مُتكامِل وبي جميع الاختصاصات لِذالك دخلوا ايلول لغُرفة الـ عمليات مُباشرتًا
دكتور عِماد طلب تحليلات دقيقة ونـادرة حَتى يكدر يحلِل المادة بشكِل أدق ويحدد اذا كانت المادة قابِلة للانتشار او التثبيت

سووا التحاليل وبهـل اثناء ابو ايلول لاحظ نشاط غير مألوف بمناطق الـHypothalamus وAmygdala (مراكز الشعور والخوف)

* جنت اكدر اكول الكُم بس بمراكز الشعور والخوف بـس بِما انِّ اختصاص طبي فـ اعرُف كل هذي المعلومات وحبيت اضيف شي مُتكامِل ..

ابو ايلول
لازم اقـرة رسم الدماغ الـ EEG واشوف اذا صار برمجة او خلل عَصبي

دكتور التخدير
الحالة جدًا غريبة واعتقد هذي المادة هيَ للتنويم
يعني نفس مادة التعاطي حَتى يخلي الشخُص يتصرف بلا وعي وحسب ماذكرت قبِل يوم ثنين ايام متعرضة للحـالة الغريبة الي حاجيتها لصديقتها فَ اعتقد هيَ حاليًا ٣٠٪؜ جاي تشتغُل عليها
الحمدلله هَسة اكتشفتوا مو بوقت ابعَد

ابو ايلول
دكتور اني مدافهم شديصيـر حالة بنتي غريبة واني جدًا خايف عليها، ماريد غير انُ تطلع من هذي السالفة بـ سلام

دكتور التخدير
زين ما لاحظتوا تصرف غريب من عندها خلال هذي الايام؟

ابو ايلول
دكتور اساسًا احنة وضعناه كُلة مو طبيعي بعد الي صار النة من تهديدات واشياء غير طبيعية لكِن ما لاحظت شي غير طبيعي عليها
بس صديقتهـا هذي نفس أُختها دائِمًا ويها لاحظت اشياء هواي حجتلياهن بمُستشفى الموصِل

دكتور التخدير
مثلاً شنو

ابو ايلول
وحدة من عدهن اني وامها كِنا خفارة فَ هي نايمة بالبيت تعرف حاليًا عُطلة الجامِعات ف كلتلها بابا اول ماتكعدين من النوم ترحيـن لبيت خالتج لا تضلين وحدج فَ صديقتها تكول بهذا اليـوم خابرتني وما اجت فَ اني هم خليت ونمت، تكول العصر فجأة خابرتني وهيَ تبجي وتكلي تعالي ومن رايحة يمهـا تكول الها انُ اني جنت اريد اطلع الج وفجأة اكو شخُص من وراي حط نفس المُخدر علية وبعد مادري ومن صحيت لكيت كدامي اشخاص يضحكون ورابطيني تكول فجأة انغمى علية بَس الغريب انها كعدت بغرفتها !
فَ صديقتها ضلت تقنعها انُ هذا حلِم والي صار طبيعي او تأثير افلام او غيرة  اليوم الثاني الي هوَ اليوم ضلت تلح علية انُ اجي اخذها بعد ماجينة من خفارتنة رُغم انُ هيَ حيل مُحبة لبيت خالتها وتضل يمهم هواي وضلت تلح علية انُ اشوف الكامرات شبيهن بس الغريب الكامرات ماجانن يشتغلن ابدددد!
ومن بعَدها صار الي صـار ( وبدة يحجيلة شنو صـار من راحت يم فَرس ) ..

دكتور تخدير
يعني بيتكم بي كاميرات !
اكيد عندة مفتاح اذًا ؟؟؟
ذولة فعلاً عِصابة مُحترفة
زين دكتور تواصلت وي الشرطة؟ تدري وجودك هنانة وياهة خظر لازم تكون مدعوم مِن قبل الشرطة
وياريت يكونون جهات معنية انتَ تعرفهُم حَتى العملية تِسهل

فكر ابو ايلول بعلي بس كبريائة ماجان يسمحلة
بس اكيد ماراح يقدم كبريائك على بنتة وسلامتهُم
خابر فَرس حَتى تنطي رقمـة بس صدمتة فَرس وهيَ تكُلة

فَرس
عمـو علي على وصلة يمكُم خبرتة بكُل شي صار بالتفصيل
وراح ياخذ اقرب طيـارة هَسة من مطار البصرة لمطار اربيـل ويجيكُم

طلع ابـو ايلول من الغُرفة وضل مراقِب كُل شي يصير ومنتظر دكتور عِماد الي جـاي يجيك التحاليل والاكس ري ( الاشعة )

يهـل اثناء وصل علي وجـان مذهول وماجاي يعرف شجاي يصير بالضبُط، تقدم لـ ابو ايلول وسلم عليّ

علي
عمي بشرني شنو الاجراءات حاليًا !!

ابو ايلول
منتظريـن دكتور عِماد نشوف تحاليل ونبدي نشتغل على اساسهة بس جسمها بحالة تشبُع بشي غريب
علي اريد منك تروح لبيتنـا تفحص الكاميرات وتشوف وين الكاميرات الي مشدودات بالصالة اني اوكلك هاي المُهمة لان حاليًا ماكدر اعوف ايلول ابد

علي
ماكدر اروح عمي لازم اضل هنانة بس لا تخاف راح اشتغل منانة اول شي بيت فَرس عدهُم كاميرات مُراقبة؟

ابو ايلول
لا ماعدهُم

علي
الي بصفهُم او بصفكم عمي لازم اكو واحد بشارع عندة !!

ابو ايلول
الي يم بيت فَرس بيت المُحامي غسان عدهُم صحيح

علي
تمام عمي هذا اول شي نشوفة حَتى نتأكد فعلاً ايلول تعرضت للخطُف او شنو
عمي قبلها اريد احجي وي ايلول ضروري

ابو ايلول
ماتكدر علي منطيها ابرة مُهدئة
ايلول مو ايلول بالطريق حاولت تنهزم منة وتكُلي انتَ مو ابوية

علي
لا تخاف عمي كل شي راح يصير بخير انة راح اتصرف حالًا انتَ سوي الي عليك وايّ شي تحتاجة انة هنـا وهم عمي اريد عيونك مفتوحة ع كِل شخُص راح يدخل لغرفتها وايّ شخُص يطب لا تخلي يطُب الا هويتة تكون بـ ايدك رجاءً

هز راسة ابو ايلول بالايجاب ..

ابو ايلول
علي اريد شرطة هنـانة حَتى تكون السالفة واضحة ومكشوفة ومحد يتجرأ يسوي شي

علي
لاعمي موهيج ابد هذولة مايوكف كدامهُم لا شرطة ولا غيرها ولو رادوا يدخلون فَ راح يدخلون بصورة ثانية فَ يُفضل انّي اتواجد هنا بهذا الشكِل العادي  حتى ما تنكشِف هويتي لان تدري هُمة يعرفوني وانة متاكد راح يصيـر شي ولتخاف عيوني راح تضل مفتوحة، الي اريدة منك حاليًا تنطيني صدرية البسها وكمامة حتى اكعد هنـا بصفتي دكتور ومحد يشك بية

طب ابو ايلول للغرفة الي بيهـا ايلول
طب علي ورى وانتبه لـ ايلول
اجهزة براسها عصبية و جهاز يشتغل يمهـا ونايمة وكإنها على وشك الموت
ماكدر علي يكمِل وهوّ يباوعلها
بس توعد للي سوة بيها هذا الشي بالموت المُماثِل للحالة الي وصلوها الها

لبس اللابكوت والكمامة وطلع بّرة ..

علي بهمِس
عمي ضروري تروح وتوكف فوك راس الدكتور هذا عِماد
بية انة لا تثِق بهاي اللحظة يلا عمي انة هنـا

ابو ايلول (بتردد)
وايلول؟

علي
عمي ما تنلمس ايلول الا اذا علي مات لا تخاف انة هنا

راح ابو ايلول وعـاف علي وحدة كاعِد كَ دكتور مُقابل الغُرفة
حَس انُ مالازم يعوف ايلول وحدهي وطب للغرفـة

باوعلها وحَس بشي غريب اجتاحة
وخصوصًا شعـور النّدم لانهُ عافهـا وحدهة بهيج وضِع وراح

تفحص بالغرفة زيـن خاف بيها ايّ مدخل جانبي بس جانت آمنة تمامًا، طفة الاضوية حَتى يترصد للكاميرات ويشوف اذا اكو كاميرا اضافية غير كامرة المُستشفى بس مالِگة

خابـر جماعتة وانطاهُم آمُر يخابرون هذي المُستشفى ويدزون الة مُدير المُستشفى لشي طارِئ جدًا ..

خلال رُبع ساعـة وصل المُعاون الاداري للمُستشفى

- السلام عليكُم دكتور
ويـن المُلازِم الي موجود بهذي الغُرفة

علي
وعليكُم السلام
اني المُلازِم الاول علي حَسن جبُر
وهذي هويتي

- مافهمت بس ليش لابِس لبس الدكتور !!!

علي
انة حاليًا بمُهمة ( وبدة يشرحلة الوضعية )
دكتور احنة ان شاء الله ما نسبب الكُم ايّ ارباك و ايّ حركة تحسها غريبة بالمُستشفى تكدر تخابرني جماعتي راح يتوجدون داخل المُستشفى خِلال نص ساعة بس كُل احنة ما راح نكون لابسين زينا لعسكري لنفس الاسباب الي كتلك عليها اتمنى تتعاون ويـانة

- تمام سيد علي بس اتمنى اذا اكو خطَر تبلغني لان سلامة المرضى اهم شي بالنسبة النة

علي
سلامتهُم وسلامتكم مسؤوليتنا قبل متكون مسؤوليتكم
بس اريد تعاونك وياية استاذ واتعهد الك مايصير ايّ شي خطأ وخارق لقوانين هذي المُستشفى الي اطلبة منك شي واحِد تسليم الكاميرات لِ جهاتي المعنية حَتى يجيكون الوضع زين
الاستخبارات بطريقها لهنانة

اتعـاون ويا الُمعاون الاداري وبخلال هل وقت اجو ثنين مُمرضيـن طبوا وسلموا عَ المُعاون الاداري

- عفوًا منكُم بس هسة نريد عينات من المريضة

علي
هوياتكُم لو سمحتوا

- عفوًا ؟

علي
هوياتكم الطبيـة لُطفًا بدون ازعاج او بلبلة للوضعية
وياكُم المُلازم الاول علي وهذي المريضة مُستهدفة من قبل جهات مُعينة ف لدواعي السلامة واخذ الاحتياط جاي اطلب منكم هل طلبـات

طلعوا الهويات تأكد عليّ منهُم وراح واحد بيهُم اخذ عينة دم من الوريـد والثاني جان رايد عيـنة من نسيج جلدي صغير يم الوشِم

اخذوا العينات وراحـوا، ورة شوية طب ابو ايلول و ويا مجموعة دكاترة ..

علي
السلام عليكُم
وياكُم المُلازم الاول علي حَسن جبُر اذا سمحتوا اريد هوياتكُم الطبية

واحد باوع للثانـي

علي
انة اعتذر بس سلامة المريضة اهم من ايّ شي بهل وقت الحالي واحنة مُطالبين من التأكد من ابسط الاشيـاء

دكتور التخدير
بالعكِس احنة وياكم بهذي الخطوة عاشت ايدكم واتمنى توفرون الامآن بينما نكمِل

علي
لا تخافون دكتور العناصر راح تنتشر ب اقرب وقت وانة هنا مايصير شي

اخذ علي الهويات وتحقق زَين وخلة وطلع

دكتور عِماد
من بعد ما حللنـا عينات دمهـا تبين انُ هذي مو مواد سمّية عادية هاي المادة مصممة حتى تتخفّى بمجرى الدم.

شويـة وطب واحد

- دكتـور من بعَد ما حللت قُطعة الجلِد القريب من يم الوشِم
الصورة الي طلعت يمي انُ النسيج ديتحلل واكو نشاط غير طبيعي بالخلايا وكإنها دتفرز شي ذاتي !

دكتور عِماد
اذًا من خلال حجيك و حجي دكتور يحيى بالنسبة للاعصاب اكتشف انُ هاي المادة يزرعوها بالجسِم حَتى تسيطر على الافعال !

الدكتور عِماد (ينظر بتركيز للشاشة الحرارية)
ركزلي عالوشم الحرارة تختلف بمركزة، الحرارة جدًااا عالية بهذي الجِهة بالتحديد، اذًا أكو تفاعل كيميائي نشِط تحت الجلد

التقني
بس دكتور، هذا وشم مو مادة عضوية، شلون يتفاعل؟

الدكتور عِماد (ينظر للصور)
لأ هذا مو وشم عادي هذا حبر محمل بمادة كيميائية تتحلل بالتدريج وتدخل لمجرى الدم من خلال المسام.

اخذوا عينة من الحِبر نّفسة ولاحظوا انُ هيَ جُزيئات دقيقة جدًا مُغلفة بغشاء عضوي، دا تذوب وتتسلل تحت الجلد.
كل طبقة من الوشم تحتوي على "كبسولة ميكروية" من السم، تذوب بفعل حرارة الجسم وتفرز المادة يوميًا ببطء.

الدكتور يحيى بـ اندهاش جبير
هاي مو مجرد رسمة
هذا نظام زمني لإطلاق السم
ومُستحيل الي مسوي انسان عادي اكيد شخُص مُحترف وغالبًا دكتور .

ابو ايلول
دكتور عِماد ! الوشم دايبهت! لونه دايتغير!

التقني (بقلق)
المادة دا تذوب أسرع من المتوقع! هاي أول علامات الانتشار الكامل.

الدكتور عِماد
إذا ما نوقف التسرب من الوشم، خلال ساعات راح توصل المادة للدماغ وتسبب انهيار عصبي.
حاليًا نحتاج نخليها بالعزِل ونبدأ ب ازالة المادة تدريجيًا
بَس دكتور يحيى العملية راح تكون جدًا صعبة وايّ خطأ راح يخلي دماغها بصدمة كهربائية او تفقد ذاكرتهـا فَ العملية راح تكون على مسؤوليتك، كُل شي جاي يبدي بالتزايد فَ العملية تكون بهذي اللحظة احسن مِمّا بعد ساعة خليها ب بالك

ابو ايلول
دكتور اني حاليًا صرت على بينة تامة بالديصير
فَ اني اطلب منكُم وقفتكم وياية والبدء حالًا بالعملية

دكتور عِماد
نحتاج جراح تجميلي و جراح عام ومُختص اشعة وليزر حالاً
جهزولنـة الغُرفة يا شباب - للمرضين -
الدقيقة الوحدة تأثر علينـة
دكتور يحيى جيك كادِر المُستشفى وايّ نقُص خلينا نتواصل وي اقرب جِهة حالاً

جهـزوا كُل شي خلال نُص ساعة ودخلوا ايلول لغرفة العزِل

الحبِر كان مُتعمِق لمرحلة ما ف ماكدروا بَس بالليزر يوخرونة واحتاجوا تدخُل جراحي
بـدوا يفتحون الجلِد تخت التخدير العام واستأصلوا كامِل الطبقة الي بيها وشِم

انتهى شغُل الجراح العام وبدة شغُل جراح التجميل
بدة بعملية الترقيع فورًا وباخذ عينة من نفس الجسِم حتى الجسِم ما يرفضها واختاروا تكون من منطقة الفُخذ لانهُ جلد سميك ومايبين وسهل الترميم، طبقة جدًا خفيفة وبمهارة جدًا عالية حتى يمنعون التشويـه

بدوا بالخياطة وكملوا العملية بعدهـا انطوها حقن مضاد السم مباشرة بمكان الوشم حتى يمنعون بقايا المادة من الذوبان داخل الجسم ..

العملية استغرقت ساعتين ونُصف تقريبًا
لانها كانت بـ ايادي ماهِرة وآمنة ..

كملوا العملية بِنجاح
وبدوا بالعلاج الداخلي
و اول شي سووا الهـا Plasmapheresis تبديل بلازمـة الدم حتى تكون نظيفة وخالية مِن ايّ سموم داخلية ..

دكتور يحيى
حاليًا لازم ننطيها محاليل وريدية لتعويض السوائِل وتنظيم ضُغط الدم ولازم نكتبلها ادوية تمنع تهيج الجهاز العّصبي او تشنُجات اذا ظهرت واهم شي تنطوهـا ترياق ومُضاد سموم حالًا واهم شي تراقبون الجهاز المناعي عندها والدماغ دكتور يحيى هاي عليك ما اوصيك 

ابو ايلول
بلي دكتور ولازم كُل ساعة نسويلهـا سحِب ل عينات دم حتى نراقِب نسبة السم بالجسم
ان شاء الله الجسم يطرحها طبيعي بدون ما تتراكم

اتشكر ابو ايلول من كُل اصدقائة وزُملائة الدكاترة
وطلع من الغُرفة وهوّ منهار من التعب لان بال ٣ ساعات هُمة على نفس الوگفة
وخصوصًا المريض هل مرة بنتة فَ جان شي نفسيًا صعُب عليّ

اول ماطلع شاف علي
كاملة بسرعة والتوتر والخوف واضِح عليّ

علي
بشر عمي

ابو ايلول
كُل الوضع تمام بس حاليًا تحت المُراقبة راح نضل نجيك وضعها كُل ساعة ونشوف الوضع شلـون

علي
تمام عمي الله يطيك العافية ان شاء الله
اكعِد ارتاح

كعَد ابو ايلول ع كراسي الانتظار ويمة علي
وبدة يشرحلة كل شي صـار بتفصيل

علي
غايتهم لحد الان مجهولة
تجارة اعضاء او استعمال غير شرعي
ما ندري بـس الادري بي انُ هُمة راح يدفعون الثمن واحد واحد

ابو ايلول بتعصُب وخوف
تـرة الي كدامك عصابة خطيرة شلون راح تكدر تدفعهُم الثمن بلة!!!
اني مُستحيل اضل هنا مُستحيل اعرض بنتي للخطر بس خل يعدي هل يوم ع خير مُباشرتًا اسفرهـا يم اخوانها

علي
عمـي كِل المعلومات صارت يمي حاليًا
اتمنى منك تسمعني وتهدي
وبعدين نتناقش على هذي السوالف ان شاء الله ..

فتح موبايلة وبلش يحجي

علي
خَل أردّلك التفاصيل حسب التسلسل اللي وصلنا إلَيه وتابعناه خطوة بخطوة.
العملية بدت يوم الحادث، امس الساعة 10 الصبح. أيلول جانت طالعة من البيت متوجهة لبيت فَرس 
السيارة جانت واگفة بانتظارها راكنة صفح وكإنما جانت تدري انُ ايلول راح تطلع، وهاي احتمال جبير انُ هُمة جانوا مراقبيكُم اساسًا ومن شافوكُم طلعتوا انتظروا اقرب فرصة حَتى يدخلون لـ ايلول

من سدت الباب وگامت تريد تطلع، نزل شخُص من سيارة مُقنع شكلة ما معروف ابدًا من گفاها حط ايدة عَ حلگها الكلب والله لو يوگع بـ ايدي اخ اخ

من بعدها سحبها بالقوة، وصعدها بالسيـارة بمُساعدة شخُص جان كاعد ورة و السايق مشّى فوراً

السيارة چانت بيها تظليل مُحكم، ما نكدر نميز الوجوه، بس الصور الأمنية تثبت وجود شخصين إضافيين بالسيارة غير السايق والخاطف.

التحقيقات تدل على إنهم اتجهوا بمسار شمالي، بس الموقع النهائي بقى مجهول استخدموا تقنية تشويش أو قطع GPS، وما گدرنا نتابعهم لحظتها.

يتنفس علي، وبنبرة عَصبية وگوة يحجي

لحد الساعة 2 بالظهر ظهرت حركة غريبة بالمنطقة. ثلاث أشخاص، ملامحهم غير معروفة، ظلّوا يراقبون بيتكم من مسافة بعيدة رصدناهم من الكاميرات الخلفية للمنطقة.

من تأكدوا إن البيت فارغ وما بيه أحد تحركوا مباشرة، دخلوا بدون كسر أو عنف. وياهُم كانت أيلول من الفيديو، باين إنها نص وعيها رايح، ماشية بس مو مستقرة.

خلوها بالبيت وطلعوا مُباشرتًا يعني العملية ما كلفت غير رُبع ساعة او اقل

بنفس اليوم بليل الساعة بـ ٣ صارت حركة غريبة ثانية وجانوا مجموعة كاملة ٤ اشخاص دخلوا للبيت باستخدام مفتاح
وهذا يدل على انُ هُمة استنسخوا المفتاح الي جان بـ ايد ايلول ، وبعد ساعة ونص بالضبط، انسحبوا، بدون أثر لا بصمات، لا تسجيل أصوات، ولا ايّ شي ..

باليـوم الثاني من الساعة بـ ٧ نفس السيارة جانت واگفة ومنتظرة وبـ ٨:٣٠ من تعديتوا انتَ وايلول خلت ومشت كدامكُم بعتبارهة ماشية طبيعي بالفرع

و اول مادخلتوا رجعت مَرة ثانية بَس هل مرة لمكان ابعددد
ونزل من عدها شخُص وضل واكف بس هل مرة جان بدون قناع
استخدمنا كامرات البيت الي مُقابيل و طلعنا شكلة
غالبًا انة شفتة من رحنة الهُم نفسة الاصلع الي تحس عينة بيهـا خلل بدة يلوح ل ايلول ومن تقدمت ايلول لبيت فَرس لبد ورة حاوية الزبالة اجلكُم الله الي ب باب ناس ثانين
وهل حركة استخدموهـا لتشويش عقِل ايلول  ..

بعدها طبـوا للبيت وسدوا الباب والشخُص هذا ركب بسيارة وتقدم بسرعة جنونية كدام البيت وكإنما يريد يسمعهن الصوت

بعدهـا ب دقايق نزل وهوَ يتقرب للباب حَيل وبهاي اللحظة جان يريد يرسِل لايلول الفيديو وطلع من جيبة الـ ظرف دفعة من جوة وراح بسرعة

الغرض من هاي العملية تخويف لا اكثر رادوا يشتتون فكر ايلول بس ماجانوا حاسين حساب تصير هل مشاهِد يم احد ثاني غير ايلول بس هذا مبين خرب عليهُم الخطة لمن صارت يم صديقتها ..

(يسكت لحظة، و يرفع عينه بثبات)
اللي صار، مو حادث عشوائي. هذا شغل جهة مدربة، وتعرف شتسوي. لكن وعد مني راح نوصّل إلهم، خطوة بخطوة.

ابو ايلول بـ استهزاء
ليش هُمة واحد ثنين وتريد توصل الهُم حضرة الـ مُلازم علي ؟

علي
عمي انة ماحجيلك بتهمبُل ولانّي اقرب لايلول
عمي انة رجال دولة واعرف شصرف واعرف منين اضرب
ونفس هاي الحالات متكررة علينا، شايفين وعايفين الله شاهد

ابو ايلول
ايّ والدليل صار الها كل هذا !!!

علي
عمي انة لوما فاتحة عمي كفيلك العباس جان هسة هُمة كلهم جوة رجلك بس انة فاتحة عمي گضتني وهواي سوالف صارت بسلف يمنة
هسة لو ببغداد جان كلبت الدنيا بس هسة ماكدر اعوفكم سلامة ايلول حاليًا اهم شي عندي

وهسة انة عبالك ساكِت؟
الله شاهِد أول اتصال سويته جان للواء .... ، مدير استخبارات بغداد،
وثاني اتصال، العقيد ..... ، مكتب مكافحة الجريمة المُنظمة،
وثالث واحد، الفريق ... ، المكتب الأمني لرئاسة الأركان نفسه.

وهم عمي انة عندي معارفي وزُملائي منتشرين بكل گاع بهذا البلد عندي أخوة بالسلاح ما يردّون طلبي، مو لأنّي ابن أحد، ومو علمود رتبتي لان بينا دم موبس زاد وملِح فاديهُم بدمي وفاديني بدمهُم وهسة الله وكيلك بال ٧ ازلام هُمة ودورياتهم جاي يتصرفون

خل اسمعك هذا

علي
عامِر اخوي انة رايد فزعتك اليوم ما اريدكم تنامون إلا وانتوا لاگين راس الخيط وباجر كلشي مگضي ما اوصيك عامِر

عامِر
صدِك تحجي خوية والله بدمي افديك مواقفك علية ما تنسي علاوي حبيبي وانة عد عيناك انتَ رجال ونعم منك كلبك ابيض و واگف بظهر ناس بدون ماتحسب حساب ل ايّ شي وانة من هذولة الناس ما انسى وگفتك ورگضتك وياي من تسكنت وعلي
والله اليوم العنلك ابو ابوهُم، دورياتي ودوريات المُلازم ... و .... و .... و ... كلهن راح يطلعن اليـوم وبمكانهم خصوصًا راح نچودر خوية وانة بطريقتنا نجيبهم جوة رجليك ..

اتنهـد ابو ايلول وسكت

علي
عمي اريد منك شي واحِد
لا تستخف بروح رجال وگف گدام الموت أكثر من مرّة، وكل مرّة يرجع حي مو لأنّه محظوظ، بس لأنّه صاحي، وراسه يشتغل.
ثق بية وكول يا الله وانة هنـا ما اعوفلك هسالفة الا وهيَ محلولة

علي
وثِق بالله ياعمي الايد الي فكرت تنمد على ايلول راح تنكسِر، أكرهم كر وحق مُحمد واخلي التلفزونات تحجي بيهُم واخليهُم يصيرون عِبرة لمن اعتبر ..

ابو ايلول
اذا اسئلك ليش جاي تسوي هيج راح تگلي انة رجال دولة و واجبي هذا بس راح اغير سؤالي واكلك، شنو علاقتك ب ايلول وشتريد من عدها ؟

علي
عمي راح احجيلك حگ الله وما ازِل وياك بحجاية وحدة، والله شاهد على نيتي شكد طيبة بس ايلول صارت جزِء مني واذا ضاعت اضيع وراها فَ انة جاي احاول بكل مابية ماخليها تتأذة ابد ..

أبو ايلول يعگد حواجبه، يضحك ضحكة باردة كلها استخفاف
بابا انتَ صدِك جذب تفكر ب ايلول ترة ايلول صعبة عليك

علي يتنفس بعمق، يگعد عدل، يباوع بعين تلمع بعزم وينطي ابتسامة جانبيـة
علي
عمي ماكو شي صعب إلا إذا انت خَليته صعب.السماء بعيدة بس الناس تطلع للفضاء وانة مو طالع للفضاء أنة طالع آخذ بتك بالحلال،
إذا الله كتب، ورضيت، أيلول إلي ورح أوگف بين إيديك كَ رجال،
ما أطلبها خوف، أطلبها حق.

وهسـة تكدر تكوم ترتاح انة موجود هنانة - بابتسامة خفيفة -

ابو ايلول
ما يحتاج راح اگوم اغسل واجي حَتى اسويلها فحص خلي عيونك مفتوحة عليها

علي بنبرة شقة
دطيني السماعة والاشعة خل اعيش الدور الدكتور من صدِك

اخذ من ابو ايلول السماعة والاشعة وابتسم لابو ايلول الي مايرضة يفردهـا

علي
خرة بيك عمي والله شگيتني شگ
شسويلك متكلي شسويلك

بهل اثنـاء اجة شخُص لابس سكراب طبي و كمامة و مامبين إلا عيونة ويمشي ويدفع بعربة الادوات
ومُباشرتًا طب لغرفة ايلول وهوَ يباوع لعلي بحذر

علي حَذر جدًا بخطواتة وما يسوي شي بالممرات حَتى خاف تصيـر عملية ما يحسون الباقين بهذا الشي سواء كانوا المرضى او بقية العصابة

سحب اقسام علي سلاحة وحضرة وطب مُباشرتًا ورا
التفت بخوف وگال

- نعم دكتور تفضل اني جاي حَتى انطيهـا محاليل مائية

تقدم علي الة وهوَ لابس ماسك ( كمامة ) وشكلة ما مبين

علي
انطيني هويتك الطبية بـلا زَحمة

باوعلة بتوتر ..

علي
ليش صفنت جااااي اكلك اطيني هويتك الطبية بسرررررعة

جانت بـ ايدة الابرة باوع لعلي وراسًا اجة وحط الابرة بـ ايدة
يُتبععععع ..

شنو رأيكُم بالأحداث؟
هل عندكم معلومات عن هالأمور اللي تصير بالعراق؟
وطبعًا مو حيل مُسلط عليها الإعلام، رغم إن هالنوع من العمليات ممكن تصير أكثر من مرة بالسنة، مو بس مرة أو اثنين.
غير مئات العمليات اللي تبقى مخفية وما أحد يعرف عنها شيء.
هذي السوالف مو بس تصير بتركيا أو كوريا أو بأي بلد ثاني، بالعراق الوضع خطير جداً، وفيه أشياء كثيرة مغمورة، لكن محد يسلط عليها الضوء. العراق هو أيضًا مسرح لهالأحداث، والنواة لهالمشاكل اللي ما تنكشف وما اخفيكُم سِر انُ العِراق بي عمليات هيج واخطر بعَد وسامعتها مُباشرتًا من ناس داير مدايري
بس اعلامًا ؟ ابد مو مُسلط الضوء عليها
ليـش ؟ مادري صراحتًا ..
_____________________

سَبب

باوعتلة واني مصدومة ..

هـاي شبيك زَعيم حباب لتشاقة وياي

زَعيم
سَبب انة ماحب اجذب عليج ابد وتدرين بية وياج انة هيج
مو هيج

عضيت شفتي من توتر واحس نبضات گلبي صارت مسموعة وگتلة

سّبب
احجي اسمعك ..

زَعيم
شحجي سَبب انة هسة كتلج واعترفتلج بهذا الشي
ليش تردين تفاصيل مثلاً ؟
تردين تقهرين روحج غصُب بوية !

سَبب
زَعيم احجيلي ورجاءً رجاءً لا تخفي شي علية
كِل شي اريد اسمعة

زَعيم
ما حاج سَبب ما حاج
المُهم عرفتي حَتى لا بعدين يصير شي مدري شني انتِ بعِلم

گال هجي وحرك سيـارة وكإنما كل شي ماكو

سَبب
يعني هسة انتَ معترفلي وكإنهُ جاي تسولفلي على فد سالفة سخيفة

زَعيم
ليش هيَ شنية بوية
هيَ فعلاً سخيفة ومتستاهل حتى تفكرين بيهـا

ابتسم الي واخذ بـ ايدي باسها وگال

زَعيم
الماضي ماضي والحاضر واحد بَس
وهوَ انتِ ..

نترت ايدي مِنة بعصبية وباوعتلة وكتلة بنبرة عالية

سَبب
زَعيم جااااي اكلك احجيلي ليـش تغلس !!!!!

زَعيم
هوبج هوبج شبيج تعلين صوتج علية !
وليش هجي نترتي ايدي شبيج تخبلتي ؟؟
جاي تحسسيني كتلج متزوجها گبل شبيج ثرتي علية

سَبب
زَعيم ترة مُخي جاي يسوي احداث وحدة حاليًا
احجيلي اريد اسمع

زَعيم
وليش احجيلج حبيبة روحي انتِ
ام يعگوب يا نور عيوني  بس اسمعيني

حَط ايدة عَ خدي وگال وهوَ يتقرب مني ويمسح بخدي

زَعيم
الي صار مايستحق تفكرين بي ابد
كِلة جان سخيف والله

وخرت بهدوء عنة وگتلة

سَبب
يعني هَسة ماتحجي مو؟؟

زَعيم
استغفرالله العظيم هاي ثاني مرة توخرين مني
شبيج انچلبتي سَبب ؟؟؟

سَبب
انچلبت انة مووو؟ فوگاهة تغلط عليّ يَ زعيم !

كتلة هجي ونزلت دمعتي ودرت وجهي للجامة

زَعيم
استغفرالله العظيم والله لو ساكِت احسلي من هاي الرطينة

سَبب
زعيم شبيك اليوم ؟ رطينة وانچلبتي ومدري شنو شو صاير كلِش انتَ !

زَعيم
هاي شبيج خاب تردين اتعامل وياج نفس الباقي بـ رسمية وهاهي ؟ على عيني وراسي يبوية صدك جذب تدللين ام يعگوب تدللين بس هسة هاي الدموع ماريدها انة شگتلج مو گتلج ممنوع ايّ دمعة تنزِل لايّ سبب جان

باوعتلة واني على وشك البجي وگتلة

سَبب
يعني انتَ چاي تگلي انة على عِلاقة سابقة بتبارك وتريدني افرح لوشنو نوبَّ
يعني هسة انتَ ترضى لو كتلك ...

زَعيم
هاها هوبج هوبج يمعودة لا ترحين زايد وعلي تغثيني هجي نوب يطلعلج شخصية علي المخبل البداخلي اسكتي حبابة

وبعدين شني علاقة تحسسيني .... استغفرالله خليني اسكِت احسلي
بوية والله السالفة ومابيهـا انُ انة هم جان عدي مشاعر تِجاهة بس بعدين ماتفقنا

سَبب
شلون يعني ماتفقتوا احجي زَعيم شبيك تقسِط بالحجي

زَعيم
هسة يابوية ليش المغثة
إلا تغين روحج يابوية النساوين وعلي يموتن على كراب الگلب
هسة انتِ شعليج جاي اكلج سالفة وانتهت بوكتها
تعيدين المواضيع ليش
تنبشين الميت من گبرة ليش

سَبب
تدري شنو لا تسولف احسَن بس خليها حَسرة بكلبي

زَعيم
اسم الله على گلبج يابعد گلبي لا انة احجيلج
بس وعلي تنغثين

سَبب
شوف يعني تعرف السالفة تغِث

زَعيم
جا قابِل اعرف انتِ راح تجين واغثج من عمت عيني كون اذا هجي

سَبب
زعيم حباب احجي والله عليت گلبي عّل

اخذ نفس وگال

زَعيم
على شرط

اخذ ايدي وباسهـا وگال

زَعيم
ماريدج تضوجين ام وليدي

هزيتلة راسـي ب ايّ
وانة احس براكين الدنيا كلها مجتمعة بنص افادي

زَعيم
من احنة وصغـار جنة متعودين على سالفة
تبارك لزَعيم وزَعيم لتبارك

ويعني انة جنت اشوفها هيَ واهلها يحبوني سواء ابوها او امها
وبصراحة جان بگلبي مشاعر تِجاهة من الحچي الي يحچوا وهلگد ما علگوني بيها

بس يابوية بعدها شفتـها البت متناسبني يعني اكلها بوية لتلبسين هجي تلبس وتعاند اكلها انة ماحب هتصرف تسوي ومتهتم

وشفت تصرفات منهـا تدل على انها ماتريد تحافظ علية ولا تريد تكون وياي فَ بصراحة من شفتها انة هجي انسحبت وهذا الحجي صارلة بالسنتين انسحبت وكلت لجدي انة ماريدها كلي بوية تكبر وتعقل

بس انة جنت اعرف انُ العرِگ دساس وهي اساسًا من امها متعلمة هل حرية الزايدة وشفت روحي ما اكدر اكون وياها وهيّ اساسًا متفهمني فَ رفضت رفض تام م  و هاهيّ سدينا الموضوع

عمي ضل يحاجيني عليها وهيَ هم جانت تسوي محاولات بس انة جنت قافل انُ هاي البنية متفيدني وانگطع املهم فردور من بعَد من خطبتج

بس لا عبالج علاقة الي ببالج لا يشهد الله اصلاً انة تعرفيني احط عيني بعين بنية ؟ الله يشهد ماسويها وحاط الله بين عيوني
بس جانن يصيـرن بينة احاديث بصورة عامة وهجي الوضع ..

هوَ يحجي وانة اتخيل مشاهد ممكن تصير بينهم واموت قهر خصوصًا تبارك مو بنية ملاك بجمالها عيونهـا زرِگ وحيل حلوة تشبه روآن بس روآن احلى منها كملامح

ماكدرت احجي شي بس عيوني جانت مچلچلات دموع بس ماريد انزلهن وگلبي احسسسس نار كبرة صار

زَعيم
انة شكتلج مو كتلج ماريدج تزعلين يبعد روحي والله سالفة قديمة وكتلج شني سالفتها لا تضوجيـن حبابة

سَبب
زعيم ماضايجة بس خنرجع للبيت

زَعيم
هوَ راجعين بس ماريدج تضوجين حبوبة باوعيلي ديري وجهج

سحب وجهي من يم فچي ( فك )
رُغم محاولاتي لنفرة بس جانت ايدة اقوى

زّعيم
اوف اوف عيوني بيهن دموع ليش ؟
انة اخو سيوف الفاهية
ولج لا تمردين گلبي الله عليج

سَبب
زّعيم كافي لتلح علية حباب مابية شي منا لباجر انسى اصلاً

زَعيم
شتنسين يبعد روحي انة انسيج بنفسي ما مضطرة تنسين انتِ
عادي اضمچ بروحي؟ ومحد يوصلج ولا اخلي ايّ اذية تجيج حَتى لو جانت مني!

ولـج والله انتِ احسج هجي بمقام بنيتي 
مو يكولون البنية قطعة من روح ابوها احسج هجي والله

بروحي اضمچ والله ولا ارضالِچ التعب
وعيب عليج ابچيج واتعبچ
بس وداعتچ جان ماضي وحاضري مملي بيج وبس

تعاي گربب تعاي ام يعگوب

قربني الـة وباس راسي ورجع باس ادية وحدة وحدة
احچيلي ايّ شي يدور بگلبج حَتى لو جنت انة السبب
اشكيلي علية ولا تضلين هچي ساكتة والدموع مچلچلات بعيونج هجي

تعاي نتصالـح يلا
شو هاچ اصبعي ؟

دهر دهرج سَبب چا انة الزعيم ابو يعگوب العليّ الاعتماد، ايد جبر اليمنة التلعب نفسة من هسوالف وما يثق بيهن وكل العالم مراهنة على خراب علاقتة وعدم استمرارها بسبب يبوسة راسة هجي اتعامل وياج؟

لا نوب الله هداني بوحدة راسها يابس اكثر مني
والحلو بالموضوع راسي لآن رأسًا بوجود هل راس اليابس الحلو

اكلني وشربني بالحجي واحس گلبي زاد بنبضة ساعة من الفرح ساعة من الصدمة والقهرة الاكلتها ابتسمت ودرت وجهي وبنفس الوقت دمعتين نزلن من عدي

زَعيم
يبعد حيلي لا تضوجين مني والله ماضي والله
جاي اكل بروحي اكِل هسة كافي يابعد كل السلف
والله كِل النسوان يروحلج فدوة
چا غير انتِ ام يعگوب المعدلة
وعلي امشي واتنومس بيج
حارِگ الولد حرِگ

اگل لامير مقتنع بهاي الفاهية الجايبها شلون تبردلك گلبك، وهذا علي كل ساع واكِلة هاي بس تجيبها تمِل منها وتمِل منك و واحد يزهك من ثاني لانها لامن ثوبك ولامن اطباعك

بينما انة ملك بينهم ماخذ عِزيزة گلبي وشيخة النساويـن
المعدلة المُهرة الماتنعاب انتِ

مسحت دموعي ودرت وجهي وكتلة
سَبب
دير بالك اكتشف انُ اكو غير اشياء

زَعيم
ولج لا تصيرين عرمة
مو ستوني امدحج واصبغ بيج قابِل اجذب انة افة عليج ام يعگوب

مشـة بسيارة وصار يتغازل بية ويحاول يضحكني ما قسيت كلِش عليّ بس جان اكو بگلبي قهرة جبيرة بس ماردت ابيـنها يمة وبنفس الوقت ما بينت انة راضية عليّ

اول مانزلـنة طبيت بغرفتي
اول ماطبيت دموعي نزلن وجنت كلِش مقهورة عَ الصار وگلبي احسة محروگ حرگ
حاولت اطرد الافكار السلبية ومـا احطهن براسي

لليل راسلني

زَعيم
نايمة ام يعگوب ؟

مارديت عليّ وخليت ونمت
اليوم الثاني گعدت الصبح من وكت نفس عادتي سبحت وطلعت لكيت رَحمة جاية

كعدنة نسولف وسولفتلها عَ الي صار

رَحمة
حبيبي والله لا تكبرين المواضيع سالفة قديمة صارت بعد لويش تحرگين بگلبج

سَبب
مادري بس والله موبيدي احس گلبي محترگ

رَحمة
تغارين من ماضي ماجنتِ بيي هههههههههه

سَبب
موهيج رَحمة بس هيَ لسة موجودة
حسيت روحي طرف ٣

رَحمة
الحياة اختيار وقدر
وانتِ قدر زَعيم
وزَعيم هوَ بنفسة اختارج فَ بعد شنو
اطردي الافكار هاي وانسيهن يمعودة

التهيت وي رَحمة ننظف بالييت ونرتبة
شوية وبدوا يگعدرن كلهم
والتموا علمود الريوگ

رَحمة وسيوف جانن واگفات عَ الـ طباخ وانة بالمطبخ البارد وجان اكو حاجِز بينهن احضر بالزيتون ومدري شنو

شوية وطَب زعيم

درت وجهي ورجعت اكمِل تسفيط
بس انة گلبي احسة هاج علية

تقرب يمي حَيل وگرصني من خُصري بخُفة وگابلني واخذ زيتونة ياكلها

سَبب
هاي شبيك منا البنات

زَعيم
مو يمج شبيج
مـا ناوية تبطلين الزعل يم يعگوب ؟

باوعتلة بغضب ورجعت اسوي بيهن

شـال من ماعون وكثر بالثاني

شلت راسي وخزرتة
سّبب
ياااااا هاي شبيك انتَ !!

زَعيم
علكيفج ما تكاتلنة يالعِزيزة
عمي شو زعلاتِچ ثگال

عفتة ورحِت يم البنات
التفتت شوية لكيتة رايح

احنة متعودين نحطهن بصواني وهمة يجون ينگلون الاكِل
ماعدهم شي اسمة البنات تنگل الاكل وتدنگ ومدري شني

كملنة واجوا هُمة ياخذون الاكِل
مر من يمي وتعمد يطخني وگال

زَعيم
يلا ميخالف اعبريني
راح اكول لنفسي ماشافتك لا تزعل

گعدنة عَ الـ سفرة واكلنة كِل احنة وزَعيم عيونة ما وخرهن مني وانة اسوي روحي ما مهتمة

من كملـوا طلعوا للديوان للظهر يلة رجعـوا

جنت گاعدة يم البنات طَب زَعيم

زَعيم
ام يعگوب تگدرين تغسليلي هاي دشداشتي

رَحمة
اني اسويلكياهة خوية

زَعيم
لالاااا خوية

سَبب
انة كايمة اكعدي حبيبتي ماكو داعي

كمت من مكاني ورحت يمة

سَبب
نزلياهة وانة اغسلها

حط ايدة ع راسي وگال

زَعيم
بوووووية ولج جنج بتي شگصرج

سَبب
ترة مو گصيرة انتَ طويل فوگ اللازم

زَعيم
بَس حلو فرق الطول ها
ولو يتعبني مرات

گال هچي وغمزلي باوعتلة بغضب وگتلة
صاير كلِش شو

زَعيم
اهو عمي هسة انة مفزع الناس عليج دمشي امشي

سَبب
يابة ماصعد هفلياهن منـا شبيك

زَعيم
هاي شبيج خايفة عمي ماسوي شي دصعدي

سَبب
ماريدددد زَعيم

زَعيم
وهاي شبيـج تصيحين وخري ماريد

خلـة وصعد
التفتت لكيتهم يباوعولي
خَليت وصعدت ورا

شافني گالي
زَعيم
انزلي سَبب مايحتاج

خليت ونزلت وطبيت لغرفتي
ضَل طول اليـوم زَعيم متجاهلني ومايحجي وياي وانة هم گضيتها بغرفتي

اليـوم الي ورا صارت سالفة عَمي حَسنين وجنة كل احنة متأثرين
بوكتهـا جان زَعيم حيل متأثر وشاد حزامـة وما جان بگلبة ولا شوية رَحمة عليهم

خفِت عليّ هواي خصوصًا من اجة دشداشتة كلهة دم وگال ما ابدلهـا إلا اخذ ثارهُم

اني جنت محتارة اكثر شي بمرت الشيخ لان جانت حَيل تعبانة سودة علية

وبوكت مـا جابوا الشيخ من المُستشفى وسمعتة من يگول انة اخذ القرار احس گلبي انخمش وحيل خفت عليّ

فَ بساعتهـا ردت احاجي واحس نچلني گلبي عليّ

جان واگف هوَ وعلي ويحچون اجيت انة

سَبب
زَعيم بس تكمِل اريد احاجيك

علي
تعاي ماعدي شي رايح انة

سَبب
لالا كمِل مو شي ضروري اصلاً

علي
لابوية تعاي احجي ويا

خلـة وراح باوعلي صارت انظاري على وِجهة
جـان ممزوج بين التعب وبين الغضب
بس اكثر شي جان مبين عليّ الغضب

سَبب
زعيم اريد احاجيك

اخذ بـ ايدي وگال تعـاي

صرنة بالمُمر مال الباب الورة الي يم غرفتي بآس راسي وحضني حَيل وبحضنتة گال

زَعيم
خاف يصيرلي شي
انة اليوم رايح وحاط دمي بشيشة مادري شني يصير بس ماريد ارجَع بدون ما ماخذ حگ عمي فَ اريدج

بعدة ما مكمل حجي وخرت من حضنة بسرعة
باوعتلة بغضب وكتلة

لاااااا حباب لا تكول هجي زَعيم
منو الي چا انة؟
حباب زعيم دير بالك على روحك علمودي

باوعلي وابتسم وحط ايدة عَ خدي وگال

زَعيم
على گولة علي يگول
هيَ الموتة وحدة، فَ لو تموت جبان لو تموت شُجاع
وانتِ شترضيلي ؟

سّبب
مارضالك ايّ شي اريدك يمي وبَس

گلت هجي وانة مرعوبة من كلامة
رفعت رجلية وحضنتة بسرعة من يم صدرة
وهمست

سَبب
ماكدر بدونك زَعيم
انتَ كِل حياتي والله

رفعني الة من خُصري وحضني حيل
دفن راسة برگبتي وطبع بوسة خفيفة و وخرني

زَعيم
شكاتب النة ربنا نشوف
بالج على روحج ام يعگوب

گال هجي وباسني من راسي وراح
لزمت ايدة قبِل لايطلع وباوعتلة ودموعي بعيوني

زَعيم
لا انة ماريدج هجي
انتِ ماعدج واحد جبان انتِ ماخذتلج واحد يطب بنص الموت ياخذ حگة ويطلع، اريدج تشجعيني مو توگفين بطريقي
گليلي الله وياك والله ينصرك
مو تصيرين فوگاي وتدرين بدموعج نقطة ضعفي !

سَبب
احبك زَعيم مالي غيرك والله

ابتسم ابتسامة خفيفة والخفيفة تحولت لواسعة
رجع حضني حيَل وهوَ يگلي

زَعيم
وانة اموت على حُبچ
واعشگج بكِل مابية ..

اريدچ سَندي ونقطة قوتي ابد لا تصيرين نقطة ضعفي

سَبب
بس والله اخاف عليك

زَعيم
هههههههه انة ينخاف مني مينخاف علية مايصير شي لا تخافـين خوش
ديري بالج على امي والكل لتخافين راجعلج ب اگرب وكِت

راح وهَد ايدي واحس گلبي اخذة ويـا ماتحمل يصيرلة شّي والله

رحت توضيت وطبيت لغرفتي مديت سجادتي وبلشت اصلي واندعي الله يرجعليـا سـالِم

حَسيت روحي طگيت من البجي وانة اتخيل يصير بي شي
بس بنفس الوقت عدي ثِقة بي وبشجاعتة
ضليت اصلي واندعي الة
ماخليت صلاة إلا وانة سويتهـا

والمشكلة انّي ماكدر اخابرة لان ادري بي كاعِد يم ناس

آخُر شي وبعد مرور ٣ ساعات تقريبًا سمعت صوتهُم بالبيت يمة انة احس نفسي فَزيت

كمت بسرعة وانة لابسة جادر صلاتي اباوع منـا ومنا واتنطر شوفتة

طَبيت لغرفة الشيخ لگيتة گاعد يم راسة ويحجي ويـا

رفع راسة وباوعلي صارت بسمة خَفيفة ع شفايفة
رجع حِجة شوية وگال

زَعيم
نعلت الله ع شيطان نَسيت

رجع باوع لوجهي وحاول يضم ابتسامتة
واني واكفة كدامة ومبتسمة واحس نفسي ميتة من الفرح
انُ هوَ كدامي ومابي شي

رحت لغرفتي سجدت سجدة الشُكر
وجنت نـاذرة سورة يس لام البنين

گعدت اقراهـا و وصلت للصفحة الاخيرة اندگت الباب وطب

رفعت راسي وباوعتلة وابتسمت
الابتسامة مالية وجهة مَلي

عاف الباب مفتوح
كملت قرآني وهوَ اجة گعد يمي باس راسي
وضل ساكِت

كملت القُرآن وباوعتلة

سَبب
يمة اسمع دگات گلبي

اخذت ايـدة وحطيتها عَ گلبي

زَعيم
يابعد دگات گلبي اسم الله عليج ام يعگوب
شو عالگتها هنا امي تكلي من رحت لسة حاطة سجادتها وتدعيلك
وانة اكول شني هذا الماي البارد المصبوب على كلبي
اثاري اكو من يدعيلي بالخِفة

سَبب
اهم شي انتَ مابيك شي كلي السالفة خلصت ؟

سولفلي السالفة بالتفصيل احس هم وانزاح مني كلت الحمدلله وشكر خلصت السالفة هجي

زَعيم
طالعة ملاك بجادر الصلاة هذا تدرين
نوب لا هذا الملاك يدعيلي اويلي عليك زَعيم
نوب لا گبل لا اطلع گلتلي احبك
غير بنص الديوان واتذكرتها وردت ابتسم بوجه مروان الخايس
مدري شلون نعلت الشيطان !

ضحكت وكتلة

سَبب
عزة وينك وينها هَسة

زَعيم
لا وعلي انة طالع منة محمِل بگلبي تحمِل بس كلمتج ضلت براسي ترِن ومادري شلون اجت بساعتها براسي مع انّي داخل بالجو وتوتر ومدري شني بس مادري
شفتي حُبج شلون سطرني ؟
بس احلى سطرة وحگ علي

بهل اثنـاء نزلت شَمس وهيَ تبجي خطية احتارينـا بيها گوة هدأت
من هدأت رحت لزعيم وگتلة

سَبب
زَعيم هاي دشداشتك خل اغسلها انزعها

زَعيم
لا ام يعگوب يحرم لبسها علية ودم عمي بيهـا، ذبيها بوية ذبيها ماريدها

سَبب
تمام محتاج شي هسة ؟

زَعيم
والله حضنج واستكان جاي غيرهن ماريد

سَبب
ما تبطل سوالفك

تنهد وگال
زَعيم
لا نوب السالفة مبينة مطولة وانة عود انطر يوم يوم لليوم الي تصيرين بي بحضني

سَبب
الله كريم حبيبي المُهم هسة تگضي هسالفة و يبرد گلبك امي وشمس ويگوم النة الشيخ بخير وسلامة

زَعيم
ان شاء الله

سّبب
راح احضرلك اكلك عمّا تسبح وتجي

خلة وصعَد واجيت جهزتلة اكلة هوَ والولد

التهينـا هذا اليوم بتحضير للفاتحة
واليوم الثاني بدت الفاتحة
ماجنت اشوف زَعيم هـواي لان الصبح احنة نسوان وهمة كعدتهم العصر لحد الليل

اجت تبـارك وامها بنفس اليوم
حاولت اتجنبها وماحجي وياهـا ابد

بس صفنت عليها شنو من صلافة عدها
مِن بعد الي سوتة اجت وعادي
وفوكاهة حاطة مكياج طبيعي وكاعدة
عبالك عدنة عرِس

كملوا الفاتحـة وطبوا الولد ياكلون بالمطبخ لان مكان ماكو وانطوا لكل الناس اكِلهم

جان واكف زّعيم ع الكاونتر وياكل شوية وانة اباوع من بعيد اريد اكمل البيدي واروحلة

شَفت تبارك مرت من يمي وراحت يم زَعيم سوت روحها تمُر بهدوء بس هيَ حجت مدري شنـو وخلت وراحت ..

باوعت لزَعيم ملامحة تغيرن بس ضل ثابت بمكانة وياكِل

اجتِ طبت وباوعتلي وضِحكت

راحت يم امها ومدري شنـو واني واكفة ومصدومة حَتى ماعرف شحجي
رجعت مرت من يمي وبهدوء گالت

تبارك
اذا صدك مايحبني بعَد ليش لسة محتفُظ بهديتي ؟
واذا تسئلين شنو هيَ الهدية فَ هوَ يكلج مو اني

كالت هجي وخلت وراحَت
انتبهت لَزعيم واگف ويباوعلنة من باوعتلة طلع

جنت حاطة علاوي بحضني وكاعدة
بس عيوني صايرات بگصتي واريد الزم طَرف الخيط واعرف شجاي يصير من وراي

زودت النـار وهيَ تجيني وتكلي

تبارك
بَس عفية تكدرين تسديلي الاسوار

مدتلي ايدها اباوع اسوار اسود وبي حَرف z
لا جَد تعدت الحدود هاي شبيها

سَبب
اكِلج ترحين لا هسة افضحج فضيحة من الكِل هسة والله!!!!

ضحگت وراحت
كمت لغرفتي وانة نار تسعر بگلبي احسها
راسلت زَعيم وگتلة
هَسة تجي

شفتة ما شاف رسالتي
خابرتة ورة شوية رد

زَعيم
ها بوية شكو؟

سَبب
هسة تجي زَعيم

زَعيم
شكو امي بيها شي

سَبب
لا انة البية شي صاعدة بغرفتك واريد تصعد وراي هسة هسة هسة ...

صعَدت فوگ لغرفتة واحس منتظرتة عَ نـار
شوية وانفتح الباب

زَعيم
شكوووو شصاير من بين ناس وصحتيني
وهسة تعال واصعد وراي ومدري شنوو شكو !!

سبب
ارد اعرف العِلاقة شنووو بينك وبين تبارك وليش انة ما ادري

حجيت بصوت عالي
فتح عيونة بوسعهن وحجة بعصبية

زَعيم
اششششش صوتج اليسمعج شيكول

بهـل اثناء انفتح الباب وطبت تبارك

زَعيم
شجاي سوين هنا ؟؟ مو كايلج غرفتي متصعديلها بعَد ؟؟؟

سَبب
حلو يعني صاعدة قبِل ؟؟؟

زَعيم
سَبب شبيج!!!!

تبارك
تـرة هيَ مِن حقها تعرُف شنـو صاير بيناتنا قبِل ليش ماتريد تحجيلها هااا؟ لو تريد تضحگ عليها وتغرگها بكلامك العسِل نفس ما سويت وياي !!

زَعيم
تحترمين نفسج لا والله هَسة اربيج اذا محد مربيـج ادبسز

سَبب
ليش جاي تمنعها عوفها خلي تحجي

زَعيم
يعني انتِ تصدكين بهاي ومصدكين بية

تبارك
اذاا صدك انتَ ماتحبني ليش بعدك .... يُتبعععع

ياترى زَعيم فعلاً مُحِب، لو مُجرّد ذكي يعرُف شلون يحسسك بالحُب ؟ وهل فعلاً كانت علاقتهُم عميقة هوَ وتبارك، لو مُجرد كذبة
ولو كانت هل راح تأثر عَ علاقة سَبب وزعيم؟
او يكدرون يتخطوهة ؟

______________

فَرس

هوَ يحجي وعيونة مقابلة عيوني
وايدة يمشيهـا داير مداير خُصري بهدوء

تلخبط المشاعِر والتوتر بهذي اللحظة ماكدر اوصفـة

بلعمت وردت احجي لكيت ما يطلع وياي غير حرف الـ ااا

فَرس
ااا ، انُ يعني اا
امير صدعت عوفني

من گتلة هَيج ضحگ ضحگة قوية ورجعت مسكني اقوى

فَرس
والله ماشاقة وياك جَد دخت عوفني امير

رفع فكي بـ ايدة وضحكتة واسعة لدرجة انُ اسنانة مبينة
اول مَرة اشوفة يضحك هل ضحكة
اقوى شي عندة بسمة عَريضة لا غير

امير
وَمَالي أرَاك في كُل الوَجوِه أغَزوت عَينَي أم غَزوَت الأمَاكِن؟
احبج حُب ما يكدر ايّ احد يوصفة
انة بس اشوفج والمح طولج احس گلبي يرتعِش
انة مغرم بسمارج الخّفيف وبخصرج النحيل وبكُل جزء بيج

انتِ فرس وانة امير
وانة مارايد اميرة ولا رايد غيرها انة رايد هل فَرس وگلبي قافِل عليها

كلِش حاب ارتوي مِنج
تسمحيلي اكون اول لَمسة بحياتج؟
ومن هاي اللمسة تبدي حياتنـا المليانة حُب؟
اذا كلتي اي فَ راح اقرب
واذا كلتي لا فَ راح اضل احرسِج من بعيد

گال هَيج وحسسني بـ دگات گلبة السريعة
هزيت راسي بـ لا ..

امير
بس گلبج جاي يكول غَير
وبيناتنا الحجي گلبي وگلبج تراهموا فَ كلامنـا مالة داعي بعَد

كال هيَج وماطاني مَجال حَتى احجي
راسًا طُبع قبلتة على شفتي بهدوء

ايـد تحاوط خُصري وايد تحاوط رگُبتي

مشاعري بهذي اللحظة جانت ضايعة
جِنت بس اريد اروح مِن ايدة بس ماروح لمكان ثاني
ماروح غير لحضنة

تحولت بوستة من هادئة لعنيفة

جسمي رِجف وانفاسي تباطئن
وماجنت اكدر احجي

وخَر مني واني اتنفس بسرعة وجسمي كُلة يرجف

كعدت عَ الجرباية وصرت افرك ب ادية بخجل
وكلمة وحدة ماكدرت احجي

اجة گعد مقابيلي على ركبة
وجر ادية الي جانن يرجفن

فَرس
لا امير

امير
اسِف والله ماكدرت امنع نَفسي

فَرس
لا امير بَس

امير
شَ بس باعي جسمج شلون كام يرجف

راح للصالة جـاب گلاص مـي واجة
شربني بـ ايدة ورجع گعد مقابيلي
اخذ ادية وگال

امير
حطي عيونج بعيوني

رفعت عيوني الة وضميت جِزء من شفتي بتوتر

ابتسم وصار يمسح داير مداير شفتي

امير
فَرس انة اذا سمعت واحد جاب طاريج ابتسم
جا شلون من هَسة انتِ كدامي ؟
ماكدر امنع روحي عنج ابد
احبج وهـواي هم

ابتسمت الة
لزم ايدي وگال

امير
يابوية صخنتي يلة كومي خل ننزل لا تموع روحج بعدين ههههههههه

كمِت من مكاني
رحت للمراية اكو داير مداير شفتي حُمرة
كعدت امسحـها بوجهي اجة من وراي
حضني ولفني الة وهوَ لازم ايدي

امير
فَرس البسي صايتج فوگ دشداشتج حبيبتي
الدشداشة حيل مخصرة جسمج
وخُصرج محد الة حق يشوفة غيري
فَ مُمكِن؟

هزيتلة راسي بـ ايّ
اريدة بس يسكت ما تحملت كلامة جريء

لبست صايتي فوگاهة وخليتهـا مفتوحة

لزم ايدي وگال يـلا ننزل ؟

ابتسمت الة وهزيت راسي

نزلنة ولاگانة علي وجـان يضحگ ونضحگ ويا

الاجواء جـانت حلوة ولمتهُم بعَد احلى
شوية واجتِ شَمس و واخيرًا صحتلنة فُرصة نحجي سوى

حجينة اني وياهة واعتذرت منها لان ظلمتها وسئت الفهِم بيها

اميـر جان بَرة يم الزلِم بس كُل ساع يدزلي رِسالة

- مرتاحة ؟
- خوما احد ضوجج ؟
- اتأقلمتي وياهم؟

كلامة واهتمامة هذا احسة نِگع بنُص گلبي وطيرني مِن الفرحة بليل رجعوا التموا كُلهم

جان گاعد واني گاعدة بصفة وحاط ايدة ورة ظهري
ماحسيت نفسي غريبة ابد بينهُم
لان هُمة مايحسسونك بهذا الشي
وفوك كُل شي امير ماجان يخليني اواجه ايّ شي غلط

و اول ما يحجون وياي شي يرد عليهُم ويبتسم بوجهي

جانت لحظات حلوة وما تمنيتهـا تتعدى ابد

اتفقنـا اني وشَمس و سيوف نسهر سوى
روآن جانت يم رَحمة وهيَ اساسًا مو كُلش تحب تتواجد ويانة
و سَبب جانت طالعة وي زَعيم ومن اجت رأسًا نامت

امير كلي اصعدي فوگ نامي خاف ماترتاحين واحنة محد يصعد لفوگ
فَ صعدنة بغُرفة اميـر نسولف ونضحگ سويـة

شوية راسلني امير

امير
فَرسي اريد ابدل ما اطُب للغرفة براحتجن انتن بـس بصالة اذيني ملابسي اسبح وابدل وانزل

دلاني عَ ملابسـة فتحت الكنتور وغميت روحي

فَرس
بنات هذا امير اذا ازوجنة يريدني اني اسفطلة ملابسة هيج لو شنو؟

شّمس
عزة هذا اوفر مرتببببببب

سيوف
لا حبيبتي هو يسفطهن وهو يغسلهن لتخافين ههههههههه

فَرس
صدُك تحجين هوَ يغسل ملابسة

سيوف
ايّ والله عدنة امير وزَعيم هُمة بيدهم يسون غراضهُم
عندج علي لا يشمر وين ماجان ماعدة مانع ينزع ع درج وينزل ههههههههههههه

فَرس
اكلتي هوى يا ايلول الحمدلله والشكُر اني وامير مُتضادين بكُل شي

شَمس
يمعودة من الترتيب صار عندي دوار هسة اني هم ارتب بملابسي بس مو لهل هوس احس مرتبهن عَ حسب تدرُجاتتت

فَرس
زوجي مرتب حبيبياتي ان شاء الله حَتى ملابسي يرتبهن ويا هيج

اندگت الباب عرفتة امير
جِنت لابسة دشداشة قصيرة وفالة شعري
فتحتلهيا وكتلة

فَرس
اصبُرررر ما حضرتلك دقيقة

رگضت بسرعة للغرفة فتحت الباب واخذت تراك واجيتـة

فَرس
ها نسيتك التهيت احجي وي البنـات

باوعلي من فوگ لجوة وگال

امير
شنـو هل فَرس الرشيق الي كدامي

فَرس
اششششش البنات

امير
حرامات البنات هنـا

اخذ مني الملابس وطب للحمام واني رحِت للبنات وبداخلي صدمة من جُرئتة بهل ايام وصافنة شلون امير كدر يتغير هيج فجأة
معقولة هوَ خاف لا يخسرني صدك ؟

رجعِت كعدت يم البنـات شوية وصاحني امير
رحت الة

فَرس
اهو امير شبيك كُل ساع صايحلي

امير
ها شبسرعة تململتي هاي عود انة علمودجن ردت اونسجن

فَرس
ايّ ايّ حباب احجي شنـو

راح اجيب الجن شغلات وشغلن فلم هنانة واسهرن عليّ شنو رايج

فرحت بفكرتة هووواي

فَرس
ايّ حباب يلا

ابتسم الي وربط الـ شاشة على موبايلي وگال هَسة شوية واطلع اشتريلجن
صدك والله شوية وجاب النة اشياءات كومة

فَرس
شُكرًا اميررر

امير
شُكرًا متوكل خُبز

گال هيج وأشر على خدة باوعتلة و وكفت
بعدين ابتسمت ورحت بستة بخدة بهدوء

رجع باسني بهدوء وخلة وراح
سهرنا اني والبنات وتونسـنا سوة هواي

جنة دنباوع للفلم ونعسنة حَيل
سيوف ماقبلت تضل يمي راحت لغرفتها
وشَمس كلتلي خاف امير يصعد الصُبح راحت هم وي سيوف

ضليت وحدي بالغرفة والفلم بعدة مانتهى
ضليت اباوع عليّ اخر شي خليت ونمت بمكاني من النُعاس

شويـة وندگت الباب
سمعت امير يحچي وصوت بنية
فَزيت وگمت طلعت
باوعت امير يحچي وي روآن

امير
ها حبيبي شنـو انتِ وحدج؟

باوعت لـ روان خلت وراحت

فَرس
ايّ وحدي
شجنت تحجي وياهة؟

امير
جانت تكلي انُ
هاي شبيج تعاينيلي هجي يمعودة

فَرس
انُ شنو امير

امير
انُ البنات بالغرفة
لدققين فَرس ترة احنة ولد عم عادي نحجي وي بعُض

فَرس
شعندك صاعِد

امير
راسلتج مارديتي ردت اوصيج تطفين التلفزون قبِل لا تنامين
دطبي طبي لا يصعد واحد انتِ ولبسج هذا

طبيت وجنت منعسة واثاوب
شفتة طب وياية

نمت عَ القنفة وكتلة

فَرس
شكو طبيت وياي

امير
شنو رئيج نسهر ع فلم سوى

فتحت عيوني بوسعهن وباوعتلة

فَرس
شو عجبك الوضع امير اطلع حباب فشلة من اهلك شيكولون علينة هَسة

امير
ترة محد يدري

فَرس
شيدريييييييي عزة بعينك اميرر شو انزل حباب ونبي استحي

امير
بالي يمج من الظهر لسة افكر بيـج وو

فَرس
صخنت والله ونعسانة حباب كافي

امير
تمام تمام بس كومي نامي ع جرباية موهنانة

دحست راسي بالمُخدة وكتلة
لا حنام نعست كلِش

ماحس الا ادي يصيرن عليّ ويشيلني

فَرس
اميرر شبيك نزلني

امير
بس لتخرمشين احطج بفراشج واروح

حطني بالفراش وغطاني
جنت اباوعلة بنُعاس احس نفسي بالحلقة الاخيرة

امير
باجُر نتغدة ونطلع ان شاء الله

هزيتلة راسي ب الايجاب دنگ طُبع بوسة ع جبيني وخلة وطلع

نمِت واني احس بطاقة حلوة حَيل وجان گلبي مرتاح بشكِل موطبيعي

كعدت الصبح بـ ١٠ كمت بدلت بسرعة وراسلت امير يجيني
اجة امير ونزلنة سوة

اخُر شي كملت واخذت اشيـائي و ودعتهُم وطلعنـا

امير
جاي افكر نكمِل اليوم سوى شنو رايج
نروح فد مزرعة شي

فَرس
لا امير وراك طَريق حباب هوّ اساسًا هيج ونوصل متأخر وانتَ توصل وجه صُبح شلون لو نروح هسة

امير
حَتى لو ابات واطلع من الفجُر مو مُهم

فَرس
الله تبات يمنة؟؟؟؟

امير
بغرفتج شنو رآيج

فَرس
عندي بس سرير واحد اعذرني

امير
لا عادي انام واخليج بحضني وهيج يوسعنـا اني وياج

فَرس
امير صاير كُلششش جريء ترة

امير
دوختيني وتعبت من الثگُل

من گال هَيج ضحكت

امير
تدريـن عدنة خيل ؟

فَرس
كول والله!!!

امير
والله خيل اصيل يعني مو شون ماجان ورة بيتنـا تقريبًا امشي اخذج اراويجيـا

وصلنـا لمكان اباوع مِن بعيد نفس الكوخ واكو رجال جبير گاعِد
يمة اني من شفتهن احس نفسي بحلم
طول عُمري جنت احب الخيول واحب اشوفهن
بس ولا يوم بعُمري شفتهن
شكد اني اخاف من الحيوانات
بس جنت مواعدة نفسي اذا اشوف خيل اركب بي بدون ماخاف

فَرس
عزة اميرررر والله مامصدگة فرحانننة

ابتسم بوجهي و وكف السيـارة وگلي

امير
انتظريني احاجي ابو احمَد حتى نضل وحدنة

نزل من سيارة اباوع للمكان يجنننن بمعنى الكِلمة ورود كومة مزروعة والخضار والاشجار مالية المكان شكد بداية بيتهُم حلوة بس هذا المكان غير صدُك غير

سلم ع رجال وحِجة ويـا
جان اكو سياج داير مداير الحَديقة واكو باب تودي لبرة واسمع صوت شارع عام وسيارات

اشرلي امير انزل نزلت

فَرس
الله اميرررررر شنو هـاااااي

مدلي ايدة رحت ارگُض الة لزمت بـ ايدة وصرت ادور واباوع للبُستان بفرح

فّرس
كُل شي هنا خيالي

امير
نفسج انتِ خيالية وفوق الوصِف
يلا تعـاي اراويج الخيل

مشينة سوة باوعت من بعيـد اكو ٦ بيوت الهن و ٦ احصنـة

فَرس
الله شكد حلواتتتتت

امير
تكدرين تحزرين منو مالتي ؟

باوعت اكو جوزي ٣ و ابيض ٢ و واحد اسود
اممممم الجوزي اكيد الك

امير
صحيح الابيض لغيث وسُراج والاسود لزعيم والجوزيات انة وسجاد و علي
علي الشاهين
زَعيم الصقُر
سُراج الرعد
غَيث العاصِف
سجاد الجواد
و انة الآسِر

فَرس
ليش الآسِر

امير
لان آسِر گلبي

باوعتلة صفح

امير
بس اكيد مو بكدج هاي منتهين منها

ابتسمتلة وگلي
امير
يـلا تعاي خل نطلعة

فَرس
يمة شو خفت من صارت حقيقة

امير
لتخافـين انة يمج

صـار يناديلة بـ اسمة وطلعة
شجعني حَتى احُط ايدي عليّ بدون ما اخاف

ركب هوَ ساعتها وناداني حَتى اصعد ويا
شكد خفِت ساعتها بس جنت فرحانة

صعدت ويـا جان حاطني لكدام وهو وراي ولازم بالحبل ويشد عليّ
فرينا بالبُستان جزء جبير وجانت اصوات ضحكاتنا متعاليـة

فَرس
منيلكم ذني

امير
انة وعلي خصوصًا كلِش نحب الخيل ويوم من المرات حضرنا مهرجان بالبصرة وعرضوا المدربين خيولهُم للبيع صح جانن غاليات بس يستاهلن اشتريناهن ثنينهن والبقية لحگونة

تونسنة هواي وگضينة اكثر من ساعة بالمكان
بعدين كتلة يـلا لازِم نروح هم يلة

اتجهنـا للموصل وجنت فرحانة حيّل بوجودي ويـا
كضينـاه الطَريق سوى بس جان طريقنا حَيل مُتعب

ضليت الح ع امير وكتلة مُستحيل ترجع بس هوَ جان يسلكلي انُ ايّ ايّ بس ادري بي يستحي

وصلنة تقريبًا فوگ ٩ بليل

طَب امير بـ بيتنا حجيت وي حُسام وكتلة لا تخلي يرجع بس هوَ جان مستحي حَيل ومايريد يضل بالبيت اخُر شي كال علي موجود هنا وحاجِز فندق اروح يمة

شكد حرمصلة حُسام بس هوَ جان قافُل
وهم يدري انُ بيتنا موكُلش جبير فَ خاف يضايقنا او يضايف ريڤان
سلم علينـا وراح واطمنت انُ هوَ راح يم علي

الصُبح خطية من الساعة بـ ٤ طلع من البيَت

استمرت علاقتنـا هيج وجانت حلوة بشكل موطبيعي
بنفس اليوم الي جنة اني ويا بالبستان جنة ماخذين صور كومة

من صور جنت اني مصورتة وهوَ بباوع لحصانة ويضحك ولازم ايدي
حاطها ومشخبط على ايدي وكاتِب ..
ذهبتُ إلى البُستان أبحث عن ظلٍّ يُشبهكِ،
عن نَسمةٍ تُشبهُ ضحكتكِ حين تهبّ،
فوجدتُ فرسةً أخرى...
جميلة، ناعمة الخُطا، تُجيد الركض وتُتقن اللين.
لكنّ الجَمال لا يُشبه الدفءَ يا فرس.
ولا الأُلفة تُشترى،
ولا التكوين يُعاد.
فرأيتني – دون أن أشعر – ألتفت إليكِ،
وأقول في سري:
صار لي فرسان الآن،
لكن لا زلتِ أنتِ الفَرس الوحيد الذي يسكن قلب ..

ابتسمت بعُمق عَ المنشور بنفس اللحظة خفت
اعدائي بالكلية ما شاء الله وماريد ايّ شي خارق للطبيعة يصيـر

حاجيتة ضحك علية وكلي عادي طبيعي ومحد الك عِلاقة

مضت الايام وبديت اكتشف امير ويكتشفني وجنت حَيل مُعجبة بالتغير الي صار بشخصيتة من بارد وجامد وهادي لمُتحمِس وطرف اكثر حماس

هذا الشي خلاني اموت بي وصرت ما اتخيل الدقيقة بِدونة
بوقت وفاة عمة جنت ويـا وجانت امنيتي اروح واضل وي شَمس بس امير رفض رفض كُلي كال الطريق بعيد ومُتعب ابد لتجين فَ الي راح بس حُسام

وتقريبًا علاقة حُسام وي امير جـانت حَيل حلوة و وديّة وبما انهُم بعُمر بعُض فـ فهموا واحد الثاني

من بعّد ماصارت سالفـة ايلول
اجة ابوهـا وحُسام ونقلنا للمُتسشفى فورًا
وضعها جان يخوف واذا نضل ع ابوها فَ مراح يخابر علي

خابرت علي واني بالمُستشفى وحجيتلة ع كُل شي صار ما جان مستوعب وجان مصدوم نفس صدمتنـا واكثر
شوية وخابرني امير سولفتلة عَ الي صار وگال انة هم جـاي

صدِك والله اجة امير لان جان كُلش خايف علية
جنة كاعدين سوة بالبيت ونحجي بسالفة ايلول اني وحُسام وامير وفكري كُلة يمهـا

امير جان اكثر شخُص بينـا اكتف(متفاعل) بالنشر حيل يحب ينشر اشيائة ويشاركهن
فَ جـان ناشر ستوري انُ هوَ بالموصِل

جنة كاعدين سوة شوية و موبايل حُسام كام يرن بسرعة بسرعة
ماعاول يوخرة من جيبة حَتى يشوف منو جـاي يرسلة بهاي الطَريقة

اول مافتح الموبايل شـاف .... يُتبعععع
جنت رايدة اكتب اكثر بس الوقت تأخر وماريد اخليكُم تنتظرون اكثر
البـارت الجاي حيكون احلى ونـار انتظروني، احبكُم .
للامانة تعبانة حيل، بس تستاهلون بارت مُفاجئ ..

لا تنسون التصويت ..