رواية بيت جبر الفصل التاسع والعشرون 29 - بقلم هُدىٰ آذار

مَسـاء الخير
رجعنا وياكُم بـ بارت جديد
من قُصة بيت جبُر
للكاتبة: هُدىٰ آذار
_______________

ايلول

ابو ايلول بـ ابتسامة مُزيفة ..
ميخالف اني متعود هجي ماحب اخلي واحد يتفضل علية ابد
ايلول بابا تواصلت وي اخوانج  قدمولنـا لجوء وراح يسحبونـا لكندا بس تصيرين زينة اسبوع واحِد احنة رايحين ومانرجَع بعد ابد
لتقلقين حبيبتي

اول مـا گال هَيج علي بَلعم وباوعلة وصُفن بوجهة

ايلول بصوت خافِت
بابا يـا كندا شدتحجي انتَ

ابو ايلول
بابا شنو يا كندا انتِ مقتنعة تضلين بظِل هيجي وضع احنة انسب النة وأمن نروح لكندا واخوانج ديدبرون الوضع اساسًا ..

ايلول وهيَ تباوع لعلي الي جان يفتح حلگة يريد يحجي ويرجع يسكت وكاعِد على اعصابـة

ايلول
اني ماروح بابا ماريد

ابو ايلول
بابا هَسة صيري زينـة وبعدين نتفاهم حبيبتي

گام علي وگال
علي
استأذِن انة

طَلع علي لبـرة وجان بُركان مال نار جان وِجهة مِكدّر و بگلبة نـار كِلها سبب ابو ايلول

ضل واگف بـرة وصافِن، شوية وراح يم الجنود الي جانـوا شاعلين نـار وگاعدين سوة گعد وياهُم وصـاروا يحجون سوة بس علي جان ساهيّ بگلبة ونيرانة المحّد گادِر يطفيهن ..

طّب للبيت او الفيلا الي جانوا مستأجريهـا حط قوري جـاي ويباوع من بعَيد ابو ايلول نـايم بالصالة مُقابل المطبخ و المُمرضات جانن ثنين بالغُرفة نايمات و وحدة يم ايلول

گلبة جان جوة وجـان يتمنى يطُب ويشوفها بس كِلشي جان يمنعة و اول شي ابوهـا هَدر الچاي وانطة للجنود

گاعديـن سوة ومسوين نفس الدائِرة، الدنيا باردة و واحد لازگ بالآخر

- سيدي ليش ماتروح تنـام انتَ هواي تعبت لهاي المُهمة

علي
اذا انة نمت نـار گلبي شيطفيها ؟

- هذا نار الكلب كِلة من ورة شني

علي
العشِگ

ضحكوا كلهُم وعلي ابتسم بخفة

- ماكو حُب بهذا الزمن سيدي

علي
ليش ماكو حُب يبعد طولي ؟
شني الـ گلوب ماتت؟
هاي انة هم جنت اگول هجي گبل لا تطُب المَرة لحياتي
بس بعدها كِلشي اختلف الله وكيلك

- سيدي انة حآب ومچرب لوعة الحُب وجاي احجيلك
انة من العمارة والحبيتها من بغداد ضليت اربع سنين انة احبهـا وبتالي اهلها ماطوهـا والله شني انتَ ضابط وحياتك بخطر والله شني انتَ من غير بيئتنا الله وكيلك ابوها ذلني ذل اخر شي بزعت ومليت فَ الحُب الحقيقي اخرطي صاير وماكو حُب

علي
هسة انة اذا اريد اعقِب اعقِب اعلى هواي سوالِف اول شَي ليش استمريت وياهة ٤ سنين بوية انتوا حبيتوا روحوا اخطبوا شلون تتحملون تضلون هجي

- سيدي جنت ب بداية دورتي اصلاً

علي
عمي وإذا اسوي ايّ خطوة رسمية يعني انة خوما اتعذب اربع سنين و اربعة لا هنا ولا هنا ونوبَّ كِلشي ماكو، اروح واجِس نبض واخذ الاكيد مهمّا صار ماكو شي اسمة ضل واكون روحي ومدري شِني

- والما مكون روحة سيدي ؟

علي
اااه طحنة ع العِلة شوفواهوَ الصوج بيكم وين اكو واحد يحِب وهوَ ما مكون روحة بوية الحُب يريد والمرة تريد الدلال وتريد الاهتمام ولتكلولي هذني ما ينشرن بفلوس لابوية ينشرن وفوك كِلشي اهلها هم يردون فَ انة ليش اورط نفسي و اورطها و انة موگدها ؟
هذا اول شي

ثاني شي بوية اليحِب يضحي ترة ويحاول مرة وثنين وثلاثة وما يكول بزعت، يتحمل سوالف هوَ ما يتحملهِن ويحارِب واذا اضطر الامُر يكتِل وينكتِل

- سيدي مرات الـ حمِل يچثر انتَ ماتدري ما عايش الشعور

ضحگ علي هَل مرة ضحگة مِن كِل وگلبة وگال

علي
والله لو حمِل يچثر انة حابلي وحدة ونوب من ورة ابوها لو اخوها لو مدري شني ما اخذهة ؟
جا انة حابها المّن حتى اخليها لغيري ؟ مِن عمت عيني كون اذا هجي

- واذا اهلك وناسك عادوك؟ وكالولك كافي

علي
بوية يا ناس يا اهل والله لو مِنو يوكف بوجهي هم ماشوفة دامني حآب اليحِب ميمل ولا يركِد ويحارب ل اخر لحظة الظروف اعذار جذابة احنة البَشر صنعناهة، اليريد شي يسوي المُستحيل حَتى ياخذة تاكدوا

- انة ابوي رجال معروف سَيدي اخر شي كلي انة ما اروح وياك واتبرة منك اذا تروح ويطردوك وضل يعير بية رجال شكبرك شعرضك ضابُط تخلي واحد يطرد بيك، وماخفيك سِر سيدي انة هم عزة نفسي وكرامتي ما سمحلي

علي
اطيني مجال اغلط عليك

- محولل وموهب سيدي ههههههههه

علي
استغفرالله اجت وردت، بوية يم الحُب ماكو كرامة
كرامتك ورفعة راسك من تاخذ شي انتَ محارب عليّ مهما جانت الخسارة والله لو اعرف اخطفها واخلي اهلها گدام امر الواقع ولا اخليها لغيري شني عمي شجاي تحجي انتَ

- وعلي گلبي يمها انة شتكول سَيدي احاول ؟

علي
حاول وعمي انة اتبرعلك اروح وياك واقنع ابوها
المهم لا تتنازل عن حگك
ولو اعمى يقود اعور بس ميخالف عسى ولعل من بختنـا الماموجود

ضلوا يحجـون ويضحگون سوة لحد ساعة بـ ٣
طلعت وحدة مِن المُمرضـات من الباب

- سيدي هاي مُمرضة طلعت

دار علي وَجهة بسرعة وگام خـاف لا ايلول شو شبيهـا

راحلهة مفزوع وهوَ يكلها بـ خوف
علي
خوماكو شي ايلول بيهـا شي !!!

المُمرضة
لا بـس رادتك تطُب

ذب الجكارة وسحكهـا برجلة
ريحتة كلهة جگاير ويدري بـ ايلول تضوج من ريحة الجگاير حَيل

راح للولد وگال الهُم اذا واحِد شايل عُطر بس محد بيهم جان بيدة ولا هوَ جاي بسيارتة الشخصية حَتى يكون بيها
ضل يحاول يشهق ويزفر و يطبب هوى لملابسة ويطلعة

مّسد شواربة وشعرة الخفيف وطب للبيت
ابو ايلول نـايم باوعلة وطّب للغرفـة

علي حِجة وهوَ انظارة على ايلول الي مغمضة عيونها
الله يساعدج

المُمرضة
تريد تكعُد اذا تكدر تساعدهـا

تقدم لايلول فتحَت عيونهـا رأسًا
باوعتلة بعيون تعبـانة ونفس ضَيق

ايلول
علي اريد اكعُد حَيل مختنگة ساعدني

علي
ايلول انتِ گاضية منتهية راح اوصيلج چَبدة هسة ضروري تاكليها ولج وجهج صاير اصفرر كركُم شني عمي

ايلول
هسة اريد اكعُد علي مختنگة

علي
بس ظهرج شلون؟؟؟
تكدر تكعِد !!

المُمرضة
ما انصح ابد بعدهي ماصارلها حَتى يوم من سوت العملية شكم ساعة بَس غلط تحركين روحج علكيفج وي نَفسج

ايلول
بس مختنگة عَلي

علي
حبيبتي الدنيـا باردة ثلج والغرفة ابرد بعَد ليش مختنگة بعّد شو اصبري

راح فِتح شبابيك الغُرفة و وخر البردات الهوى صار يلعب بالغُرفة لعب

علي
انة خايف عليج لا نوبَّ تتمرضين فوگ مرضتج هايّ

ايلول
لا علي هَسة احسني تنفست

علي
اصبري هسة جايج

ايلول
مو تتأخر علية

ابتسملها وهو يلاحظها شلون مچلبة بي وراح وصة الولد حَتى يشوفولة چَبدة ومعلاگ

رجع للغُرفة وهي عَ نفس كعدتها، سحب كُرسي وگعد مقابليها وهوّ مبعد رجلي ويباوعلها بخوف

علي
اي يبعد ابوي احجيلي شنو اليوجعج هسة

ايلول
علي احجيلي كُل الي صار بتفصيـل وشنو سوالي وليش ظهري هيج يوجعني واحس اكو خياطات برجلي حباب احجيلي كُلشي

علي
ايلولة مو وكِتها هسة درتاحي دخذي نفس وصيري زينة وكِلشي احجيلجيا بالدقايق وبالساعات وبثواني بعد شتردين

ايلول
بس اني اريد اسمع هَسة حباب احجيلي

علي
على شرط بينما تتسمعين يكون الاكِل واصلج وانتِ تاكلين شرايچ

ايلول
بس احِس نَفسي شبعانة!

علي
لايبعد طولي وجهج اصفَر لازم تاكلين
فَ خلروح اوصيلج اكِل واجي مطاعم اربيل تفتح حَتى لو هسة

ايلول
ليـش احنة بـ اربيل

علي
ايّ هسة اسولفلج كِلشي بس صبُر
راح طلع يستحي يطلب مباشر منهم سوة روحة يريد يروح بس استوقفوا وكالولة احنة نروح وصاهُم وتشكرهُم وطب جوة

لكة ايلول نَفس وضعها، اول ما صار كدام وجهة ابتسمت

علي
اويلي على الله الفرخة اليوم شبعتني ابتسامات وانة گلبي رچيچ

ايلول
يا علي شنو الفرخة حَسن اسلوبك

علي
فرخة تعبير مجازي يشفي الغِليل شبيج ايلولة

ايلول
دحجيلي يلـة

علي
احجيلي انتِ ب اللي صايرلج وانة يداخلي عتب جبير طبعًا، اشوفج متغيرة وانة بعِز الناس وبعِز الشغل و وحق علي ردت بساعتها اجيج انعنج تنعنع وانة تحلفت بيج على فِكرة بس استخطيتج هَسة

ايلول
علي انتَ مدتخييل الرُعب الي اني عاشتة تصور انُ اني رايحة لفرس فجأة احد يحط ايدة ع حلكي فجأة الكي روحي بمكان عَفن وبي مرايات لشكلي المشوه حجيت لفرس تكُلي حلم حالمة
بس من شفت الكاميرات مسدودة خفت والخوفني اكثر من شفت اثار احبال على ايدي بهاي الساعة بدة شك يلعب يمي وخفت هواي من تكلي فرس وشم ومن اجاني تصوير والله كمت ماستوعب شي احس ماجنت بوعيي اصلاً اني ماعرف شنو صار لسة احجيلي

حجـالهة علي الي صار بالتفصيل وهيَ مصدومة بـ الي صاير
بهل اثنـاء اندگت الباب فزت بسرعة

علي
اسم الله بوية اسم الله هاي الجنود جابوا الاكِل شجاج

ايلول
والله خفت علي

علي
هسة جايج اصبري

راح جاب الاكِل وكعد يمهـا

ايلول
علي كُل هذا صارلي والله احس نفسي بفلم

علي
هوَ فلم صدِك فلم بس المُهم خلص حبيبتي

ايلول
شلـون خلص وهمة ٥ بعدهم

فتح علي العلاگة ومد الخبزة يحطلهـا اللحمة

علي
وين يطيرون؟ توزع اسمهم بكل المطارات وبكل السيطرات وين مايروحون الزمهم انة لتصيريلي نفس ابوج ايلول
ابوج من امها وراس كندا، وكال شنو كال مدبر كلشي

ايلول
بس علي اني خفت والله واحس قرارة صح

عاف الخبزة على الماعون ورفع راسة يباوعلها
علي
شني يعني ترحيـن لكندا ؟

ايلول
علي والله الوضع يخوف وو ...

علي
وووو شنـوووو ايلول لا تخلين خبالاتي يطلعن عليج هسة والله ترة مايصير هذا الحجي وين ترحين وتعوفيني وحدي ؟
بعدين شني انة مو بعينج ! تتوقعين تكونين وياي و واحد يندگ بيج ؟؟
بهجي حَجي معناهة جاي تنقصين من عدي وتستحگريني بيهـا

ايلول
علي موهيج بس والله الي صار احسة رُعب وفوك ما جنت بوحدة صرت بـ ٣ ظهري ورجلي و وجهي احس نفسي تشوهت ما ضلت ايلول بعَد

علي
تشوهتي شني وجهج ما شاء الله كِلش متحسن حتى اللون شوية متحسِن بس انتِ كطعتي هذا الكريم ورجلج مابيها شي وظهرج يطيب شني هوَ

ايلول
علي خايفة اني والله خايفة

علي
بس انة وياج شلون تخافين وانة وياج والله استنقص من نفسي من اشوفج هجي تحجين بحضرتي، مو كتلج انة سندج وانة عزوتج و كلشي ولج والله فريتهم فر بالمُتسشفى وماخليت واحد يدنالج تردين وانتِ يمي يدنون؟

ايلول
زين انتَ قابل راح تبقة وياي ٢٤ ساعة

علي
ايلول ابوج قافلللل على الروحة والحجي بينة خايف فَ لو يجي منووو مايضل فَ انة اخذج وهاهي

ايلول باستفهام
شنو اخذج ؟

علي
اخطبج ازوجج الي يعجبج
واذا الي يعجبني ازوجج
كال اخر حجايات وضحك وهوَ يباوعلها

ايلول
وتتوقع بابا يقبل؟

علي
نقنعة نفس ما قنعنا بتة نقنعة

ايلول
ومنو كلك بتة موافقة

تحولت ابتسامتة لـ عبوس غمض عيونة وحجة بعصبية قاتمة

علي
بلعت السبة وسكتت لا تخليني هسة اكتلج وعلي ايلول ترة روحي واصلة لهنا، وبعد اريدددد اسمع منج يا ايلول تكولين انة خايفة لو مدري شني يابة والعباس والعباس ابسطج وهاااج اكلي يلة

باوعت لوجهة شلـون معصب، كل الناس شكلهم يخوف من يعصبون إلا علي يصير شكلة محبوب ويضحك، نفس الطفِل الي يعصُب لان ما منطي اللعبة مالتة  و ودي بَس اجعصة

يسويلي باللُگمات وما يباوعلي ضايـج واني بداخلي مبتسمة واكول
- عود هذا حَقيقي ؟

هذا السؤوال تراودني من يـوم الدافعلي بالكُلية لـ يوم الحريق الي صار و وگفتة وياية وبـ ايام لعِلاجي ولحد هذا اليـوم

بساعتها اجتاحني شعور حَيل حلو انُ علي يمي ومسوي كُل هاي الاشياء علمودي، حَسيت اكو شعور لگلبي غريب وكإنهُ اكو هوى طاب لگلبي بس هذا الهوى جبير ومـا يوسع گلبي، وحَسيت گلبي يريد يطير ويطگ من الفرح

اول مَرة اباوعلة وهوَ بهل قُرب واني بهل تمعُن
رفع راسة تِجاهي وهوَ يباوعلي
اتحولت ملامحة لعصبية لملامح مرخية
وتحمحم

علي
شبيج تباوعيلي ما عندج اخوان
لو عرضج مطشر بكندا مايهمج

من گال هيج ضحكت وهوَ يباوعلي ومبتسِم
ابتسامتة راسًا تحولت عبوس
وكإنما جان زعلان ومنتظرني اصالحة
كملي الماعـون وگام

علي
يلة محتاجة شي ؟

بحجي وهوَ داير وجهة ومبين انُ هوَ مامهتم عود
واني اباوعلة ومبتسمة
مـادري منين جبت الجُرأة ومنين جبت الحجي
بس جان بگلبي هل كلام

ايلول
ما محتاجة لأيّ شي غير وجودك

من حجيت هجي الضحكة ملَت وجهة قبض ايدة وعض اصبعة ورجع ضرب على رجلة

علي
ولـج وعلي متحلفلج انة بس موهسة موهسة بعديييييييييين
خل اطلع لا يجي ابوج
خليتيني جني مُراهق بنصاص الليالي اتنطر لحبيبتي

ضحگت على لهجتة وحجية خلة وطلع واني حاسة بـ فرحة وسط كل هذا الخراب الي يصيـر اجتِ المُمرضة كتلها عندي اوجاع ب ظهري كلتلي هَسة موعد ابرتج

المُمرضة
مساع راد يطب يكول النـة سولي طريق خاف البنات مفرعة
ربع ساعة واحنة مفاهمين شيقصد ههههههههههه

ضحكت وكتلها
ايلول
هوَ خجول يخجل من البنات

المُمرضة
اي لاحظنا شكد خجول وحبيب وفي هم ههههه
والله قلة نلگة شخُص هيج تلگي هوَ وياج وعينة على غيرج

ايلول
اني هم هواي اسئل نفسي اذا هوَ حقيقي
مرات احسة فضائي

ضحكت هيَ وانطتني الابرة شويـة وغَطيت بنوم عَميق كعدت من النوم عَ صوت بابا وماما فوگاي من شفت امي فرحِت حَيل وهيَ هم جانت فرحانة بشوفتي زينة

كلت لبابا يحجيلي عَ عمليتي كلي بابا انتِ تكدرين تتحركين لان احنة لا لمسنة عمود فقري ولا اعصاب مُجرد جلد مُمكِن يحركج هوَ بس الحركة ما الها دخّل الرجِل جانت مواضحة ابد مُجرد جانت انحف بشوي اما ظهري فَ گلي بابا سوينـاه ع شكِل مُربع بنص الظهر موكلش جبير واللون ابيض حالة حـال بقية الظهر لان هوَ اساسًا جلدج ومن جسمج بس اثار الخياط ومدري شنـو گالي بمرور الوقت يروحن وحَتى هوَ يتأقلم وي الجسم ويبدي يفرز ميلانين(صُبغة الجلد) وي الباقي طبيعي

ردت اسئلهم عَ علي بس مكدرت احجي لان بابا موجود وهوَ شلون يطيق علي ما شاء الله

شويـة وطبت فَرس انصدمت بوجودها وبنفس الوقت حيل فرحت جانت جاية وي اهلي بـس من شافتني نايمة نامت شوية

طب بابا، ماما كلتلة منـو

ابو ايلول
علي يريد يروح و وصاني حسبالك هوَ حريص اكثر مني

ام ايلول
والله مادري المن هَل عظمة هاي من بعد الي سوا كُلة وانتَ بعدك تحجي عليّ والله بطل الولد وشمهما نحجي قليل بحقة

ابو ايلول
ايّ شلون مساع لزمتي بالباب ساعتين تتشكرين منة حسبالك شنو ترة هذا واجبـة يسوي هيج شنو يعني وهم هسة خاف لا يبقة مآن علية اطيتة فلوس إيجار هـذا البيَت
وهم شلتلة صك بي حساب بالبنك بي ٥ ملايين بس رجعة علية عود يابة هوَ ماياخذ رشوات وهيج شي

من گال هجي احس عصبني بشكِل موطبيعي هذا شبي بابا وشلون هجي يحجي !!!

ايلول
بابا تـرة مايصير هذا الحجي ليش دتحجي هيج وي علي ترة هوَ مو خادم عِندك حاوِل تحترمة اذا مو علمود شي علمودي

ابو ايلول
ليش علمودج مثلاً انتِ شصيرين منة وتردين احترمة علمودج؟
ايلول شوفي اني انطيتج مجال اكثر من اللازم اصلاً اخوانج ديسون كُل شي وبعد ضلة بالعِراق ما تضلين اليوم شنو خميس يوم الثلاثاء طيارتنـا قدمناهة اصلاً

فَرس
وين طيارتكُم عود لكندااا ؟؟؟؟

ام ايلول
اي ماما اخوانهة ديسون بالامور وقدمولنا لجوء وسحِب لان هُمة هناكَ وماخذين الجنسية فَ سالفة سهلة والوضع هنا هم ما يطمن بعَد الي صارلنة فَ نروح احسن ..

باوعتلي فَرس والدمعة بعيونهـا
كالتلي بهمِس : ايلول

حَطيت ايدي ع ايدها وهزيت راسي بـ لا

ايلول
بابا اني هَسة هذا مو موضوعي
موضوعي علي رجاءً بعد لا تقلل من احترامة ترة علي ساكت علمودي والله وإلا هوَ ما يقبل ابد شخُص يحاجي هيج واني هم مارضة

ابو ايلول
والله هذا الي عندي عجبة عجبة ماعجبة الله ويـا

گال هَيج وخلة وطلع حتى مانطاني مجال احاجي

ايلول
لا ترة اوفر حَيل اوفر الديسوي والله

ام ايلول
من يوم يومة ابوج بي داء العظمة شتنتظرين منة

ايلول
بس موهيج ماما الله اعلم شحاجي وي علي هَسة
والله علي مادري شلون ساكت

فَرس
ايلول عوفي ابوج واحجي وياي صدُك تردون تسافرون!

التفتت الفرس الي عيونهـا جانت مليانة دموع وعلى لحظة تكُتهن يمي

ايلول
لا، ماما اني ماروح لاي مكان ترة

ام ايلول
ويـن تبقين لعد منين تجيبين هاي سوالف ايلول لا تخليني اصير وي ابوج عليج حياتنا وحياتج انتِ بالذات بالخطَر ونفس ماكال ابوج يوم الثلاثاء نروح هَسة ارتاحي وعُكبة نرجع ناخذ بس الاشياء المُهمة ونروح

نفس بابا هم حِجت الحجي وخلت وطلعت
باوعتلي فَرس ونزلت دمعتها

فَرس
والنبي مداصدك الداسمعة شنوهـاي ايلول

ايلول
ماعليج مو بكيفهم والله ماروح مو بكيفهُم

فَرس
شلون مو بكيفهُم مدشوفين شلون مُصرين نوب يوم الثلاثاء طيارتكُم

ايلول
فَرس كتلج ماروح شبيـج نصبتيها مناحة ماروح والله

فَرس
والله اموت من القَهر غير اذا صدك صارت
وبعدين علي شلون علي تعوفيـن علي الي ضحة بروحة علمودج وترحين !! لج سوة ما سوة تدرين بساعتهـا لمن خابرتة وسولفتلة تخَبل وهسة تردين ترحين يسودن والله

اخذت نَفس وابتسمت ابتسامة جبيرة
ايلول
ايّ واحد يشوفني هيج يكُلي تدرين

فَرس
لان كُل احنة دنشوف الا انتِ مدري غبية مدري تستغبين وين تلگين شخُص نَفِس علي وطيبة گلبة وخوفة عليج

ايلول
مراح الگي ابد
فَرس اسمعي حكُلج شي بس موتكولين لاحد ديري بالج لسانج يفلت خصوصًا يم امير

كلت هيج واني اعدل كعدتي وشعري بنفس الوقت ع كد ما مرتبكة

فَرس گابلتني بحماس وهيَ تكلي اي اي احجي

ايلول
مو اي اي يالفاهية والله اذا سمعتج فالتتهة وحاجية

فَرس
اهو هسة غير تحجي

ايلول
احم اسمعي البارحة بابا جان نايم واني فزيت فَ كلت للمُرضة تجيبلي موبايل بابا

فَرس
صدُك جبتلج موبايلج

ايلول
ايّ عفية واخيرًا سويتي شي بي حظ شوية
المُهم خل اكملج فَ خابرت علي وطبلي وجابلي كبدة ومشويات وكعد يوكلني بـ ايدة

فَرس
هااااااااااااااااااا كعد يوكلج بـ ايددددددة هااااااااا هههههههههههههههه

من گالت هيج ضحكت وضربتها بخُفة عَ ايدها

ايلول
يولي لا تخليني ما احاجيج لا تتساخفين

فَرس
الله عليج كملي شصار بعديـن

فَرس
ايّ المُهم بعدين حسيت بشعور مادري شنو هوَ بس حسيت گلبي هيج يريد ينفجر فَرس اظن كمت احبة

كلتلهـا هيج وضحكت
شو هاي باوعتلي وغندبت

فَرس
طيح الله حظج حسبالي باسج شو شنو
يعني انتِ هسة يلة حبيتي ؟
كلب لو حجارة اريد افهم

ايلول
اوي فَرس شو انتِ هم صايرة قاسية نَفسة

فَرس
ولج حتى حجيهم كمت احجي نفسهُم هههههههههه لج ايلول اجوائهُم حيلللل حلوة والله العظيم وعدهُم خيولللل تخيلي

ايلول
كولي والله

فَرس
والله لج مزرعتهُم شكبرهااااااا وعلي عندة خَيل اسمة الشاهين اظن وامير الآسِر وهمة ناس حبابيين حَيل واجوائهُم حلوة متحسسج بالممل اصلاً
وبعدين علي يا علي ترة علي حلو شايفتة من لبس دشداشة وهـاي

من گالت هَيج خزرتها وباوعتلها

ايلول
اكُلج شو انتِ متستحين تتغزلين بي كدامي خيررر

فَرس
ههههههههههه انجبي ولج داصبغ بي يمج هسة على حورة هوَ حلو اوكي بس اكيد ما يتقارن بـ اميري

ايلول
دولي ولي يعني تجيبين امير البارد لعلي
والله علي احلى مِن امير بميَت مرة
وبعدين امير شدعوة هلكد مرتب تحسين اوفر
قميص ابيض بنطرون اسود لازم الحذاء بيضة
شمحلاة علي لازك بالقميص الاسود والبنطرون الكابوي
والله عندي حساسية من الولد المرتب حَيل

من گلت هيج ضحكت فَرس حيل واني ضحگت

فَرس
والله لو تشوفين غرفة امير
كد ما مرتبـة استحيت اباوعلهة
بَس ايلول صـار شي حَيل سيء تدرين
بهاي الايام الي جنتي بيهـا بـ المُستشفى جَد شفت الضيم
وضليت بس ابجي لومـا امير يطمني جان متشوفيني هَيج اضحك

ايلول
ليش شصاير ولج شكو؟ بس لا حجوا شي اهلة ع لبسج كذا

فَرس
لا يمعودة ويـن ماكوشي اصلاً اهلة كتلج ماكو احسن منهُم وحبابين كلهُم بس امير وحُسام تعاركوا سارة رجعت دزت رِسائل وربج امير جان هنـا

ايلول
عززززززة هاي شنووووووو اصبري بالبداية خل اخابُر علي اطمن عليّ ونطلع برة نسولف

فَرس
اوكفي خل اجيبلج موبايلج واجي وهم جبتلج ملابِس

جابتلي موبايلي وملابسي

رحِت للحمام بدلت باوعت لظهري بالمراية المنظر يخوف صح لون البشرة نفس شي والخياط مرتب بـس جان مبين انُ القطع ما ملتئمة سوة
غسلت وبدلت وطلعت

طلعنـا برة اني و فَرس
مأجر فيلا حيل جبيـرة وحلوة ومؤثثة
اكو برة مرجوحتين وحدة من جهة وثانية بنهاية كعدنة بوحدة وخابرت علي

اول رنة رد

علي
هااااا ايلول خوماكو شي !!

ايلول
ها لا ماكوشي لا تخاف بس انتَ وين ؟

علي
رجعت ايلول ضروري اريد اروح للمركز عندي شجم حاجة وهم اشوف اهلي وارتاحلي شوية وباجر ارجع وهم مارجع لاربيل اشوف شني الاحداث ببغداد وبالموصل

ايلول
علي شحاجاك بابا اليوم وليش ضايج هيج

علي
ايلول ابوج كلش مصخها وياي والله لو ما انتِ ماجان سمحتلة يتمادة

ايلول
شبي علي شحاجاك غير تكلي ؟

علي
ماسولف ؟

ايلول
كال انطيتة صك والاجار وبعد ؟

ايلول
جا انتِ عندج هاي هينة من هجي يسوي
عمي ميخالف هوَ رجال عندة عزة نفس وكرامة وميرضة أدفع فلوس الاجار ومدري شنـو ميخالف على عيني وعلى راسي بس انة هم عندي عزن نفس وكرامة شني يطيني فلوس ويمن علية بيهن حَتى طريقة تعاملة كلِشششش موحلوة ايلول

وفوك كِل شي كل ساع وعاد سالفة كندا نعال علية استغفرالله لا تخليني اغلط هَسة من كِل وعقلة حَتى مادري بشي ارد امآهي كتلة عمي لازم وجودك دعوة هسة انتَ رافع تسقط ترة يكلي شعلية خل تسقط انة راح اخلي واروح

ويـن ترحين ايلول وين ؟
ترة لو هسة منو يجي هم ماترحين خليها بـ راسج

ايلول
هَسة انتَ اهدئ و اوصل بسلامة وبعدين نحجي
تعال السبت الصُبح لا تجي باجُر بليل علي

علي
لا ويـن يادوب اكمل حوايجي وباجر بليل جاي
انة بعد ماتحمل ترة احجيهن كلهِن يم ابوج واكلة رايدج وهاهي شيسوي خل يسوي وانتِ هم مو تطلعيلي صفح ايلول ترة انتهيت والعباس

باوعت لفَرس وكتلة الله كَريم

ايلول
علي هَسة انتَ اهدئ كافي لا يصعد ضغطك

علي
وربج حرگني حرگ ابوج حرگ حرگني
جد جدي شفتة بعيوني عبالك عِدوة مو تكلك اراكض واسوي ماجاي أمِن انة ايلول انتِ روحي وانة جاي اسوي هذا كِلة ما منخي هذا واجبي تِجاهج بس مو يعني انذل بي عبالك خادم عدة انة

ايلول
علي والله بابا هَيج يتعامل وي الناس قاسي بس گلبة طيب صدگني لا تاخذ على بالك منة واني احاجي

علي
انچبي وديري بالج تحاجي
هوَ رجال وانة رجال
انة اتفاهم ويا
انتِ ممنوع تحجين بسالفتنة ابددددد
إلا الموضوع بعدين اكلِج بوية ابدي رآيج
هَسة لا تدخلين ابد

ضل يسئلني شلون صرتِ ومدري شنو بعدين سد الموبايل بسرعة لان جان حَيل ضايج، التفتت لفَرس وكلتلها بضياع

ايلول
والله خايفة ومـا ادري شلون راح تصير النهاية بينهُم

فَرس
المُشكِلة اهلج مُصرين يطلعـون
و علي لو يموت ميخليج ترحين
واذا ردتوا تخطون شي كون زواج حَتى تضلين هناكَ
بس وين وهُمة عمهُم ستوة مَيت ماصارلة اسبوع

ايلول
عَزا زواج ومدري شنـو وين طبيتي فَرس مو لهل حّد اني حَتى لو كلي علي اكُلة هيج خلي يقنع اهلي هَسة بـس حجي وبعدين الله كَريم لان بصراحة اني ماريد اخسرة بعَد
المُهم انتِ سولفيلي وبتفاصيل هّم

دنحجي واندگت البـاب

ايلول
يُمة هذا منـووو

طلع بابا شـاف بالكامرا الي موجودة يم الباب ابو توصيل سألنة موصين كلنالة لا

ايلول
بابا لا تطلع خاف شو شنو

ابو ايلول
ماكو شي بابا امآن هنا اهدي

فِتح الباب وحاجا كالة احنة ما موصين

سـد الباب بابا وطّب شوية وندگ الباب مَرة ثانية هم ابو توصيل

- عمو هـذا من علي هوَ دزة

يمة اني جنت خايفة وحسبالي شو شنو من گال هيجي ابتسمت

ابو ايلول
حبيبي عمو رجعة وهـاي فلوس الك لان تعبناك ويانة

من گال هيجي گمت بسرعة واخذت الماعون مِن عندة

ايلول
شُكرًاااا عيني زحمناك ويانة
وخزرت بابا وطَبيت

فَرس
ههههههههههههه عزااااا شيخلصج

ايلول
بابا اخلص منة بس علي شيخلصني منة
اوييييي شوفي شجايب مشويات بعدطولي على كولتة

ضحكت وبابا طب وراي يرزل ويكلي انتِ راح تموتيني كتلة بابا شسالفة وعيب وخليت وطبيَت
فَرس متحب اللحوم همزين جان اكو اجبـان بثلاجة بابا جايبهن طلعنـة صينية اني وياهة وسوينة صينية لاهلي وطلعنـة برة

ايلول
ايّ يلة احجي

فَرس
دخابري سمعي كلمة حلوة وجه الحلو

ايلول
هاي منيلج وجه الحلو مال علي

فَرس
لاااااا مال اميررررر هوَ يكُلياهة والله

ايلول
امممم الظاهر ثنينهم يضحكون علينة بيهم
ماردت اخابرة لان جنت اريد اسمع من فَرس
فَ دزيتلة رسالة عَ الخط

احتاريت شنـو اكتب بس ردت اعبر عن حُبي الة ولو لشوية
اتشجعت وكتبت

- شُكرًا يا احلى شي بحياتي

فَرس
هاااااااااا

ايلول
اصبريييييي ولج خل اكمل
-مِن بعّد فرس طبعًا

دزيتلهـيا واني اضحك

بعدهي فَرس دتحجيلي بالي صار هناكَ وامير شلون عاملها خابرني بـس كلت الو اجاني صوتة اليرعد رعد

علي
طيح الله حظ فرس تريد نشاركني بيج صارتلي يحيى الثانييي

فَرس
احترم مرت اخوك عينيي

علي
مرت اخوي احتاري ب اخوي واسكتي
بعدني اقرة ب اول كلمتين ضحكتي صـارت بكبر بغداد
بعدني ما كملت انسدت حَتى نفسيتي

ايلول
هسة انتَ عفت كُلشي وركزت على فَرس

علي
ايّ وعلي هم صدك المگرودة الفاهية هاي شنو حاط عقلي وي عقلها يكفيها خبالات امير
اكلِج بعد طولي ايلولة عود صدِك انة احلى شي بحياتج

ايلول
ابـو شوارب روح عنة ترة دنحجي امور مُهمة

علي
هنيالج فَرس الله ربِج لو انة منج بعد ماتحاچة

گوة سَديت الموبايل منة وسكتنة نفسنة من الضحِگ وبدينة نحجي ..

فَرس
شوفـي وصلتلج هَسة من جنة كاعدين سوة من اجة امير بسالفتج هاي البارحة فَ جنة گاعدين ومانحِس غير طن طن طن طن طن طن

حسبالك رسائِل مكتوبات وجاي ينرسلن بسرعة بسرعة

فتح الموبايل حِسام واباوعلة عيونـة صارن بگُصتة هلگد ماجان عَصبي اني حَسيت گلبي نغزني لان اميررر اخ امير راح يموتني

من جنـة بالحَضيرة على گولتة مال الفرسان وكذا نشَر ونشَر اني ويـا واقتباس وكذااا شفتي خووو هاي قبل سالفتج

ايلول
ايّ شفتـة بس ماجنت بوعيي

فَرس
و من جايني للموصِل مصور بسيارتة وحاط اللوكيشن الموصِل وكاتب شعر ع اللِقاء بالمحبوب ومدري شنو

عَ العموم اني خفت وباوعت لاميـر هوَ جان گاعِد بصفي وحُسام مقابيلنـة هوَ وريڤان

يباوع لموبايلة وصافِن وعيونـة هجي بگصتة صارن

همست لاميـر
فَرس
امير والله گلبي ما مطمِن شو

امير هزلي راسـة بـ لا وگالة

امير
خَير حُسام شبيك خوماكو شي

رفع راسـة بعصبية من بعَد ما كمل وگال

حُسام
ترررررة اني راح اتخبل من هاي رسائل الي تجيني
اريد اعرُف مصداقيتهـا شنوو، وشنوو الغرض من انُ يحجون هيج

اخذ الموبايل امير حَتى يشوف شنـو مكتوب بس اني بهساعة مَيتة من الخوف، رقُم مجهول وداز لحُسام

- انتَ گرن عايف اختك هيج تلعب شاطي باطي ؟
- ترة اختك جذابة وجاي تضيع وكت براس امير لا اكثر وانتَ غبي لان ماشفت الفيديو الي دزيتلكيـا وشلون رقمها ظاهر
- وبعدين ترة حَتى امير يدري وهمة متفقين شكم شهر ويفسخون الخطوبة
- واني جاي احجيلك بدافع النَصيحة والله وإلا شنو مستفادة بس الكل يدري بيها هيجي

اميـر من شاف الرسائِل عَصب هوووواي ورأسًا خابر عَ الواتساب طلع يرُن شوية وبعّد ماكـو حَتى اتصال، اتصل عَ الخط هم ماكـو مبين تكسر الخط وانذب

فَرس
كالعادة اميرة لو سـارة

امير
اميرة شدخلها؟؟؟ هاي سوالف سارة فَرس

فَرس
ليش تدافع عن اميرة ما هيَ و سارة صايرات كُلش وانتَ تدري كُلش زيـن شلون اميرة مبينة مُعجبة بيك

قاطعنـا صوت حُسام وهوَ يحجي ويانة
اخذ الموبايل من اميـر ورجع يباوع للفيديو

حُسام
هذا رقمج وهاي صورتج وهذا حجيج شلونننن تكدر تسوي فوتوشوب بهيج شـي

ريڤان
الوتشوفوب يصير بصورة بس خوما فيديو هذا اسمج ورقمج فَرس

امير
الرسائل مو الهـا حُسام

ريڤان
شنو مو الهـا ترة واضح فيديو و واضح كلامها فَرس اعرف نبرة كتابتها جان كتلكم يجوز موهيَ الحاجية بس هاي هيَ

حُسام
اميـر، فَرس اذا طلع هذا الشي الي بينكُم لعبة فَ ماراح يصير خير خصوصًاااااا انتِ يا فَرس صدكي متلوميننن إلا نفسج اذا صـدِك طلعت

گال هيج وهوَ يعيط ويرفع اصبعة بوجهي ويتقدملي

فَرس
حُسام علاقتي وي امير حقيقية ومابيهـا ايّ كذب

حُسام
لعددددد هذولي الرسائِل شنوووووو هااااا؟؟؟؟؟

امير
حُسامممم ليش تصيح عليها وانة موجود ؟؟؟؟
انة ترة ماقبل
ترة هذا كِلش عيب انة رجلها واكف يمك احترمني عـاد !!
جاي اكلك هذا الشي ما الة صِحة

حُسام
امير هاي اختي تعرف شنـو اختي
موبس اصيح عليها اكسر راسها هم اذا طلعت فعلاً مسوية هيج
من بداية حياتها لِسة انة محافظ عليها ومربيهـا ف لمّن تسوي هيج موبس اصيح هيَ تعرف شنو اسويلها هناتين

بساعتهـا تفشلت وحَسيت نفسي ضعت ومتت من القهّر يم امير ماجاوبت بَس امير جاوبة

امير
حُسام هذا الحجي انة ما اقبل بي ابد
هيَ گبل اختك وهسة هم اختك
بس الي تغير انُ هيَ هسة صارت على ذمتي وانة ماقبل ابددد تحجي وياها هيج خصوصًا على هذا الموضوع

ريڤان
ترة الرسائل الها شمدرينة ما انتَ وياها جاي تضحكون علينة واكول اني بيوم الي اجيت خطبتها ليش جانت ضايجة حَتى من صعدتلهـا انتَ من نزلت جانت مبينة تبجي اثاري سالفة هيج

ريڤان جانت تزيد الطَين بلة وحُسام من سمع هَيج تخبل

حُسام
عود صدِگ تحجون
تعـاي فرس تعاي اريد احاجيج

امير
خوية ترة هذا الحجي مايصيـر فَرس جانت تعبانة لا اكثر وهسة احنة ماعدنة شي ومتصافين

اجة حُسام يريد يتقرب مني حَسيت نفسي چفلت وخفت من عصبيتـة لزمت القميص مال امير من ظهَرة

صـار گدامي وغطى علية بصورة كاملة

امير
حجيك خلي وياي حُسام

حُسام
شنووو وياك انتَ اختي لو هيَ اريد اسولف ويـاهة امير وخر

امير
ايّ اهدئ وتسولف وياك مالة داعي تصير عصبي حُسام

مسح على وِجهة حُسام والتفت الي امير
عيوني جانت مدمعة وجنت خايفة حَيل

حُسام
بـروح امج وابوج فَرس
بروح امج وابوج واني حلفتج
وانتِ ادري بيج ما تكولين شي كذب على روحهُم
احجي انتِ مسويـة هل سوآية ؟

امير
حُساممممم عاد كافي جاي اكِلك علاقتنة ماكو احسَن منها
بشرفك لو صدِك وصدِك علاقتنة هجي اخذها لاهلي مرتين وابيتها يمنـة واجيها هسَة منيلك هسوالف اخوي

انتَ تريدني احجيلك هجي لو هجي ؟
عمي فَرس احبها وهيَ تحبني

حُسام
لعد هاي شنو معناهة؟

امير
غَيرة لا اكثر

ريڤان
ورقمها الهنانة شنـو ؟

فَرس
ريڤان مالة داعي تدخلين لهاي الدرجة رجاءً

ريڤان
والله يفَرس سالفتج ولا خاليـة تلگين شفتي هيجي وكلتي صدِك خل اضحك عليّ وانتشرت سالفتج شو شنـو وردتوا تسدون السالفـة

حُسام
ريڤانننن

امير
لا خويـة مايصير هذا الحجي مايصير اني وفَرس سوة و الله وكيلكُم لو ما وفات عمي جـان هَسة انة وياهة متزوجين وهيَ تدري كلِش زين بهذا الشي

فتحت موبايلي وطلعت صـورنا اني وامير من رحنة للحضيَرة وراويتهيـا كُلهن

فَرس
يعني هسة هاي شكِل علاقة فيك لوشنو؟

حُسام
تؤ والله راح اتخبل لعد هاي شنو وشتريد منك امير شنوسالفة

امير
انة استحي خوية اكول طالباتي وفد يوم يجن ويعقلن قابل انة طالب وياهن واروح ارزلهن وعادي والله استوگفها بَس هسة لا انة خوش راح ازفهن زفة معدلة واهددهن بالعمـادة

ريڤان
والفيديو؟؟؟؟

امير
خويـة الفيديو ما الة صِحة رجاءً سدوووا موضوعة

اخذ بـ ايدي وباوعلي بنظرات حلوة وگال
كتلكم اني وفَرس حاليًا علاقتنة مابيها ايّ شي والعكس فرحان وياها ولو رجع بيـة العُمر مرة ثانية جان هم اخذها وما متندم ابد ..

حُسام سكت بـس جانت ريڤان تنبِش ورا ياربي شكد حَية هاي البنيـة وخصوصًا من رجعت وشافت الحلقة الجديدة الي جايبلياهة امير ضَلت تكول شدعوة وثگيلة وايدج ناعمة ومدري شنـو معَ انُ حُسام ممخليها عايزة شي بَس يالله شكد مسمومة

فَ امير وحُسام بالبداية كُلش انشحنت بيناتهُم للامانة بَس بعدين تدرين بـ اسلوب امير شلون حلو وكذا فَ نساهُم سالفة بَس اني جنت كُلش خايفة مِن ورة هسالفة

امير يستحي وما يكدر يضل اكثر فَ راح
اول ماطلع اميـر طبيت للغرفة وجِنت متوترة عَ الصـار حَيل
رأسًا خابرت اميـر رد علية بعدنـا ستونة دنحجي وگال اني اعلم سارة هَسة دزيتلها رسالة وراح العب بيهـا جولا بهَل اثنـاء وجان يطُبلي حُسام

مانتبه انُ اني داخابر لان الضوة مسدود فَ اول مادخل وخرت الموبايل وحطيتة عَ الجرباية

حُسام
اكُلج فَرس ترة اني ماجاي اقتنع بسالفـة وهسة تحجيلي لا والله اندمج

يحجي بطريقة معصبة مال واحد بنُص العركة ولا كانهُ ستونة هدينة بسرعة عرفت ريڤان شاحنتة الي وجـاي

فَرس
حُسام شحنتك ريڤان واجيت لوشنو!!!

ريڤان
لا تجيبين طاريي عَ السانج شفتي حلو وعندة فلوس واستاذ جامعي كلتي خل اخذة مـووو والله فضحتينا ومبين كُلشي بينكُم فَيك ومو حقيقي هم خل اكولها

حُسام
انجبي لِج ريڤان شحنتني شنـوووو اكلي خَرة وهسة تحجيلي كُلشي بتفصيل لا والله متلومين الا نفسج

ريڤان
طول عمرج تغارين مني لان ماخذة حُسام واني مُحللة وهوَ مُحال وانتِ الفگُر رحتي عربي واخذتيلج أُستاذ جامعي وبالضحك عليّ

كمت من جرباية واحس روحي فايرة من العَصبية
وفوك ما جان يصيح علية حَتى ما كال الها لا لا تحجين هَيج عليها

فَرس
حُسام ترة اني مونفس قبِل واسكُت كول الها خل تتجفة شري احسن الها ليش اتخبل عليها هَسة احترمي نفسج وما غيرج فُگر
فُگر شكالولج علية مگدية منج من ابـوج

ريڤان
وفوك كُل شي باع الالفاظ السوقية الي عدها هـاي ايلول ماغيرها معلمتها عليهن

ايلول
لا يا خايسة والله لويمي هل حية جان تفلت بنص گصتها وراويتها الالفاظ السوقية على اصولها

فَرس
اسكتي ولج خل اكمل لعبتي نفسي هسة انتِ حشة نعمة الله حَتى الماعون حتاكلي شنو من ريحة علي

ايلول
لج والله جوعانة صارلي يومين مماكلة بس مُغذيات وبعدين اني احب الكبدة والله طعمها هيج علاجي

فَرس
ايلول بداعتي اسُكتي ونبي لعبتتت نفسي كافي

ايلول
لج اويلي شايفة كِبدة البقر شلون اطيب من كِبدة الخروف تحسيها هيجي تموعععع بالحلگ

باوعتلي بقرف واني اضحگ عليهـا
ايلول
دكملي كملي كون تفوخين كلبي وي هاي الخايسة

فَرس
دسمعي سمعي
هيَ من گالت هيج احس تخبلت
والله ايلول شكد جنت اسكت الهُم شتدرين بية حجاية ماحجي
بسببها حُسام حَتى يضربني مـرات
لسة اتذكر من مَرة لبست وتكشخت و والله جان لبسي نفس لبسها ولبسها يجوز مفضوح اكثر عبت براسة تعبي علية وبس كتلة ليش صاح بوجهي ورگعني حَيل على خدي
واني سكتت حَرف ماحجيت

عَ العموم هذا الحجي كُلة واميـر عَ الخط ويسمع واني مادري بَي

كمت من جرباية وكتلهـا بصوت عالي

فَرس
طاري ايلول اذا تجيبي بعَد متلومين الا نفسج ديري بالـج تجيبين طاريها ايلول احسَن مِنج بميت مَرة

ريڤان
يمة يمة باعععع اللسان حُسام شوووو ساكت والله هَسة الم غراضي وما اضل بالبيت

حُسام
ماريد اسمع صوتجن ثنيننجن اششش
وانتِ تعـاي جاي اكُلج حجي هاي البنية صحيح لولا

گال هَيج وهوَ جارني حيل من شعري وضغط على زندي بـ ايدة بكُل قوتة بحيث بساعتها حسيت عضم الكتف راح ينكسر ويطك بـ ايدة

ايلول
حباية بـ ايدك حُسام والله انتَ خوش حُسام بس هاي مرتك مخليتك طلي وتفتر بيك عربانة مـال دفِع ونوب انتِ ماعندج لحمة ولا تاكليـن لحم خوش اكلتيها

فَرس
ايّ والنبي ايدي لسة توجعني تخيلي

بـس اني شنـو عيوني گام تدمِع واگُلة حُسام شبيك عوفني وهوَ يصيح حيل ويجر بشعري وريڤان عود سكتت؟؟

لا والله ضَلت تلعلع وتكول اعـرف الحَقيقة منها وشوف اختك شلون منزلة راسك كتلك من البداية لا توديهـا

حُسام
داكُلج احجي

فَرس
حُسام شحجي صدكني اني وامير نحب بعض ومابينة شي صدكني

حُسام
وشمدريني ما قبِل انتِ مسويتها
اني ماعلية بهسة اريد اعرف انتِ مسويتهـاااااا لولاااا

امير ستوة طالِع يعني واصل هيج تقريبًا لـ ابو فُراس ابو صمون الي عَ شارع العام موبعيد يعني، ومن اول مـا سمع شلون يصيح رجع بسرعة فَ حُسام يجر بية ويريد يحاجيني واني ابجي واكُلة ايدي بٌس هدها وهوَ مستمر يجر ويريد يسمع مني

اخُر شي اندگت الباب راحت ريڤان دتفتحة سمعت صوت طبة واحِد وصوت ريڤان وهيَ تصيح حُسام
بعدهي مكايلة امير اجة متريد امير يشوفة وهوَ هيج يعاملني
امير طَب لغُرفتي

هوَ شافـة هيج وهوَ رأسًا بدون تفاهُم اجة ودفع كل جسمة بالگاع حَيل
يُمة لـج اني شفتة هيج واني نزيت نوب هوَ عافة واجة يكُلي

امير
انتِ زينة فَرس بيج شي

گال هَيج وهوَ يمسد ايدة على شعري واني لازمـة ايدة

اجتِ ريڤان وشافت حُسام شلون جان واكع وگام تخبلت

ريڤان
انتَ بـ ايّ حق جاي وتسوي هيج

حُسام
انتَ شلون تدفعني هيج وانتَ بـ بيتي !!!

عافني امير ودار وجهة الهُم، بس ايلول مو ذاك امير الي نعُرفة وبرودة وهدوئة لو رومانسيتة الحلوة لِج جان كُتلة مال نار
شايفة علي شلون يتخبل ؟ والله العظيم نفس شي تحسيهُم

ايلول
ايّ ولج شبيج رِس غير اولاد عم
بس تدرين شنو الحياة هيج يلا تمشي وياك
اذا صرت مُحترم محد يحترمك

فَرس
والله صح دسمعي شصـار امير باوعلهُم بعصبية حَيل وگام يصيح

امير
اول شي انتِ تطلعين من سالفة انة ما احاجي نسوان
ثاني شي هاي مَرتي انتَ شلوننن ترفع ايدك عليها ؟؟؟

حُسام
شنـو ليش ارفع ايدي عليها ترة هااااي اختي

امير
اختككك قَبِل هسة هي مرتي والي يمد ايدة عليها يعني مـاد ايدة علية والي يمد ايدة علية تنكسررررررررر ايددددة
جاي تسمعني حُسام، ايدددددددة تنكسُر وكائِن من كان

حُسام
وهسة انتَ شنووو جاي بنُص بيتي وجاي تهددني ؟؟؟؟

امير
خوووية الله بالخير عليك؟ اهدِد ما اهدِد شتحسبها احسبها
هسة انتَ تقبل مرتك هاي تروح لاهلها وتنطگ تقبل؟؟؟؟

لا ماتقبل، وانة هم ماقبل فَرس خططط احمر وممنوع ايّ احد بمسها بحجاية اعتبروها خطار عدكُم ومالها الا شجم شهر واخذها حَتى مانتظر للسنة بَس تخلص اول مرحلة انة بالعطلة ماخذها

واذا تكلولي لا والله خوية واحنة نضل على اسلوبنا هذا وهاي سالفة تنعاد لا والله هَسة اخذها واروح وابن امة وابو اليوكف بوجهي !!

حُسام
ها يعني صارت تحدييي ؟؟؟

امير
خويـة كتلك وارجع اكلك تحددددي مو تحددددي مالي دخل انة
العندي سولفتة، حُسامم انتَ جبير وانسان عاقِل وفاهم ليش تنچرُف ورة كلام غلط ! اختك هاي وحيدتك امانة بركبتك لنفُرض انُ هيَ غلطت
بس هيَ ماغلطت ابدددد

لنفرُض غلطت جا انتَ بدال ما تعلمهـا وتسندها تصير هجي ضدها؟ حَتى لو هيَ مسويتها ماراح تكلك وراح تنفُر منك
لو اهلك يدرون بهذا الشي رضواااا ؟؟؟
لا ماراح يرضون وراح يغضبن وعليك
وينامون بگبرهُم وهمة ماراضين
وكلشي ولا غضب الاهل خوووية

الي صـار ما مرضي من كِل الجوانب
وانتَ بهيج سالفة هنتني الية وقللت مني
انة رجلها، وما اقبّل كائِن من كان يقلل منها
هوَ انة وتلعب بيـة جولة مرات تصير بيناتنة
ماسترجي اسويلها شي
تجي انتَ تضربها وتعنفها هيج
وهذا انتَ العاقل المُثقف

لا خوية احنة المَرة عدنة ما تنضرب
ولا يتعامل وياها هجي مُعاملة
فَ رجاءً رجاءً لو تخليني اتعامل بالتي هيَ احسن
وهذا بسببك وبسبب مُعاملتك الزينة
وبهاي الحالة نرضي ضمايرنا ونرضي اهلك وربنـا

لو تكلي لا والله اتعامل ب الي يصرفلي
حَتى تخليني انة اتعامل ب الي يصرفلي
وتنتهي العلاقة وهـا اها ...

من گال هيَج امير حُسام تباوعيلة وجهة كام ينطي الـوان وما حِجة ايّ شي خلة وطلع هوَ وريڤان

اني جنت بَس ابجي وحَيلل مقهورة من المنظر الي شافني بي امير اذا اخويـة هيج يعاملني وكدام زوجي اكيد راح يكول هاي تايهة ومراح يحسب حساب لتصرُفاتة وياي

ايلول
هاي مو من تصرفاتهُم ابد صدكيني

فَرس
ايّ هوَ هيج فَ مِن طلعوا بعد مالهُم وجه حَتى يحجون راح سد الباب واجـة حضني حَيل، من كد ماحضني قوي حَسيت اجسامنـا متزجن سويـة

امير
والله من سمعِت شلون حجة وياج ماعاولت بَس اجي نوب مرت اخوج ورة الباب ما لابسة حِجاب طبيت بسرعة وحَتى ماشفتها
كافي تبجين فَرسي

جنت كُلش مقهورة لان صار الموقف كدامة كَعد عَ الجرباية وجزني كعدت ع رجلـة مسحلي دموعي وگال

امير
من زمان حُسام هيج يتعامل وياج؟

استحيت اكُلة ايَ ورفضتلة رفُض تـام وكتلة ماكو هيج شي بس هوَ حسيتة ما قتنع
حسيت كتفي جان يوجعني حيل

حطيت ايدي عليّ وتأوهِت

انتبهلة وفَز

جنت لابـسة تراكي الوردي شتوي وردان كاملة فَ كَلي

امير
لزمها الج حَيل مو

جريت ايدي منة وردت اگوم ماقبل

امير
شو افتحي دگمة قميصج خـل انزلها خل اشوفة

فَرس
يا اميـر شبيك وخُر

امير
حبيبتي شبيج خل اشوف ايدج شنو هَسة تستحين مني تذكرين بـ وقت الحَريق من اجيتي وطبيت عليج بنص الليل شنو جنتِ لابسة

شهگت وفتحت عيوني حَيل
فَرس
عزاااا ليش انتَ شفت

امير
شفت شفت لِدرجة الولد يكلولي شبيك اكلهم چفلت من صوتهُم بس انة چافِل من غير شي، چفلت مِن ....

ديحجي ويباوع لوجهي بتمعُن
يُمة حَسيت نفسي صخنت فول ما تحملت يكمِل الحجي
والمنشفة الي بساعتها اني حاطتها علية شمغطية ما مغطية شيييي ايلول

حطيت ايدي عَ فّمة حَتى امنعة من انُ يكمِل
باس ايدي و وخرهـا بـ ايدة

امير
ليش ايدج صارت حارة؟
رجع لمس گصتي وضحك حَيل

امير
هاي شنـو ليش هل حرارة كِل ماجي يمج ولج

فَرس
يا امير اذا انتَ متستحي صاير

امير
اوف انة ماستحي يا بزونة

فَرس
هسة خليني اكوم شبيك محاوطني هَيج ليطُب واحد

امير
واذا طب لتخليني اغلط هسة عَ العموم شنو ردت اكول
ايّ شبيها حرارتج يمي

گال هَيج وغمزلي يمة حَسيت نفسي متت
ضحگت بخُفة ونزلت راسي عَ متنة
رجع متني أذاني
صحت اه

امير خل اكوم اشوفة شـو

امير
اكعِدي بابا شو لا تخليني اني افتحلجياهة افتحيهة خنشوف شبيهـا

درت وجهي وفتحت دُكمة من قميصي ماكفة حَتى يطلع كتفي فتحت الثانية وحطيت ايدي عَ صدري

باوع لكتفي وباوعتلة جان صايـر احمر واصابعة مطبوعات ع زندي حَيل

امير رجَع عصب وهيج زفر الهوى بعصبية

امير
استغفرالله فَرس والقران لوما انتِ
بس كليلي هوَ قبل هم هيج يعاملج ؟؟

سكتت ماكلت شَي

امير
ابد ماتوقعتهـا مِن حُسام

فَرس
مرتة موهوَ امير حباب اسكُت مانريد مشاكِل اكثر

امير
هسة هوَ حتى ما واجهني خلة وراح والله ودي هَسة اخذج وياي واروح

فَرس
لا امير حباب مانريد الموضوع يتازم ميسوى والله

امير
هيَ تسوة تسوة شلون متسوة فَرس
بس ماريد علاقتج تخرب ب اخوج الوحيد والا انة جان تصرفت
عَ العموم بدلي وخنطلع هـاي هَسة تصير زينة لتخافين

طَبع بوسة خفيفة عليها، اني استحيت وكمت عدلت قميصي وجان يلح علية نطلع بس اني ماقبلت كتلة حَتى ترجع من وقت
طلعنـا اني ويا سوى راد يحجي وي حُسام شفتة ماكو كلي صيحي كتلة عوفة

ماقبل وراد يحاجي كوة قنعتـة يعوفة

ايلول
هوَ لو صدك وصدك جان ماعافة وراح بس يدري بروحة غلطان
انطم يم مرتة

فَرس
بالضبُط هيج المُهم كوة قنعتـة يروح حتى يوصل من وقت حضني حَيل وباسني من خدي ووصاني وراح

ايلول
اممممممممم متاكدة من خدج

فَرس
ههههههههههههههه شوية على خدي وكملهـا على شفتي ع سريع وراح

ايلول
ولا اتخيل استاذ أمير بهسوالف يمة اتخيلة ذاك البريء الحباب حَتى علي بس هسة صدمتيني بـ استاذ امير شصايررررر

فَرس
علي ؟؟؟؟؟؟؟ والله احِس علي ازيد من اميررر جريء بس هوَ لازم روحة لان انتِ مو حلال عليّ

ايلول
اي ملاحظتة حيل يحب يلزم روحة وياي رُغم انُ احس مرات ودة اقل شي يلزم ايدي بس هوَ هم مايقصر ويلزم ايدي ويبوسها ب اوقات الشدة

فَرس
عجبتني هاي مال اوقات الشِدة
المُهم راح هوَ وحُسام ابدددددد ماحجة وياي طول اليوم لا هوَ ولا ريڤان
الصُبح امج اجتني بـدون مادري حتى مكايلتلي كلتلي ترحين هوَ جان بدوام فَ خابرتة وانطيتهيا سكت ماحجة شي وهم خابرت امير كلي باجُر بليل اني وعلي نجي

ايلول
اممممم يعني مقررين باجُر يجون؟

فَرس
ايّ باجُر علي يريد يجي ويجيب امير ويا لان تعرفين ابوج يحب امير فَ شسمة كال نجي ونسولف ويا كَ مبدئي ونشوف ردة فعلة

ايلول
تدرين علي مايعرُف طيارتنة الثلاثاء والله لو يعرُف يموتتتت

فَرس
هوَ اني من يمي ومتت، ايلول خاف يسويها ابـوج صدُك

ايلول
مو بكيفة فَرس اني ماريد قابل يغصبني ماعليج

فَرس
ايلول المنطقة تجننننننننننن تدرين ورانة اكوووو جبال وثلـج نازل وهيج تخبل المنطقة

ايلول
والله مختنگة ودي اطلع بَس ويـن اكدر كُل شي يصيـر ماكدر

فَرس
اذا اجو الولد باجُر نخليهُم يطلعونـة

رجعت طبيت شويـة لفراشي لسة تأثير البنج بيـة نمت وفَرس نامت يمي
فَرس ب ايّ وقت تكلولها تنام عادي تنام ميهم

نمنة للعصُر يـلا كعدنا باوعت لوجهي حَيل متحسنة وهمزين امي جايبتلي علاجي حَطيت مرهم وفَرس جانت جايبة فانديشن ابيض بس حطيت من عندة صـار ضبُط وي لون بشرتي فَ انطتنيا كالت اذا ردتي تحُطين منة حطي

طلعنـة برة اني وياهة جنة ضايجين نستكشف البيت شوية البيت يجنن وكُلة خضار ومكان حلو صرنـا نتمشى ونشوف
تعبت كعدنـا سوة عَ المرجرحة
اجة لفَرس اشعار

فَرس
ااااااااااااا عَيسى المرزوق نزل أُغنية

ايلول
المُحتوى الهابط بعينة وعيانة، بلة امير هم يسمع عيسى المرزوق ؟

فَرس
لايسمع عبد الحليم حافُظ
اول مرة تحب يقلبي واول يوم اتهنى هههههههههههههه

فتحَت الاُغنية وصرنـا نسمعها اسمها قنابُل هوَ يغنيها وفرس مدموجة وياها واني اباوع واضحك عليهـا اخُر شي وصل لمقطع

ضم ضم طخ
عقلي انطخ
من شفتك طحت بالفخ
يا حافرلي يا ناويلي
بكرة انت تطب بية
واصوب بيك بوسة سكود
مثل هلزين ما موجود
ضلمة وصرت انا المكرود
وصاروخي ضرب بيـة

گمنة نضحك ع كلمات الاغنية الي جانت نص توصف لعبة ببجي والنص الثاني عَ الحُب
بس علگنة عَ سالفة ضم ضم طخ عقلي انطم من شفتك طحت بالفخ وصرنـا نمشي ونغنيها

علي عرفتة وصل ومن يوصل علي لبيتة يعني كون ماحاجي ولا احصلة بعَد يضل يا طالع يا مدري شنـو

بليل امير تخابر هوَ وفرس وصدمنـا وهوَ يگول احنة هَسة طلعنـا

امير
والله حبيبتي حاليًا احنة متوجهيـن ل الله اعتقد لا لاربيل ولا للموصل ولا لبغداد

فَرس
يا اسم الله شكوووو

امير
ابتليت وصعدت وي هذا المخبل
جايين هَسة على اساس لبغداد انة ابات وهوَ يكمل سوالفة بالمركز مدري شني وللصبح نتجه للموصل هم يكمل سواليفة ونجي بعدين لاربيل يعني باجر تكسيرة معدلة بـس بسيارة

علي
هاي كِلة علمود منننو علمود مدام فَرس وايلول
وراضيات؟ يا ريتتتتتت راضيات

ايلول
ابو شوارب شبيـك شو ما عاجبك الوضع ؟

علي
اسكتي ولج خلي ابو شوارب بيناتنا مومال يم ناس

امير
جددددددي انة رجال عمري ٢٨ سنة الي كلمتي لا تكلي نجب مارضة

ضحكنا عَ كلامهُم وسدوا الاتصال لليـوم الثاني اجوا
خبرت بابا قبل لا يجون كلتلة فَرس امير يريد يتحمَد لايلول بسلامـة

ايلول
بابا حباب لا تحجـي شي موحلو على علي فشلة ترة هوَ لسة ضايج ع سالفة البارحة

ابو ايلول
يعني يحجيلج ويشكيلج بسم الله ما شاء الله بابا الرجال الي يحيل البنية ع ابوها هذا مابي خير من هسة اكُلج

ايلول
بابا والله مايشكيلي بس هوَ مبين جان ضايج اصلاً ميقبل احجي ويـاك على شي صدگني

ابو ايلول
ايلول هذا علي المهتلف اقطعيلي كُل تواصلج بي احسن
ولا اكُلج ضلي شكد ماتردين اصلاً الثلاثاء احنة رايحين

ايلول
بابا شكم مَرة داكُلك اني ماروح وياكُم ماريد اروح

ابو ايلول
مو هيَ بكيفج

فَرس
اسُكتي ايلول موهسة تحجين موهسة

ايلول بهمس
استغفرالله والله غثني يمعودة

رحنة اني وفَرس لبسنة فساتين طوال نفس الدشداشة بس عَ شكِل ثوب ومخصرات وحلوات فَرس جايبتهن النـة من جانت بالسكن وطالعة هناك، حطيت فونديشن لوجهي ولونة صـار مساوي تمامًا
لبسنة شالنة وطلعنـا اني وياهة نفتح الباب

اول مافتحنـة الباب صـار بوجهي علي لابس بدلتة العسكرية واميـر لابس رسمي وبيدهُم ثنين باقات ورِد وعلبة مال بقلاوة وكرزات

امير
عمي جاي اتحمدلج ع سلامة شني شو انتِ طالعة تفتحيلي الباب

باوعت لعلي بـ ابتسامة وعيونـة تفتر علية وبـ وجهة بسمة جَبيرة

ايلول
اهلاً وسهلاً بيك أُستاذ

امير
راح نتزوج وتنخطين واصير حماج وانتِ تكوليلي استاذ

كال هَيج وكلهُم ضحكوا الا اني احسني خجلت من كال هيج وسالفة هلكد صـارت مكشوفة

طبوا ثنينهُم وانطونـة الباقات مال الورد، وحدة الي والثانيـة لفرس
امير حَضن فرس وعلي توجه الي

علي
طالعـة احلى من ايّ مرة اشوفج بيها، مادري لان مشتاقلج مادري انتِ مِحلّوة شني سالفة مادري

هاي جانت اول مَرة اضيع وماعرُف شنو ارد عليّ
سكتت ودنكت وجهي بخجَل

علي
احمم جبتج كت كت هم تلكين بيهـا

باوعت جايبلي كت كات
كتلة شُكرًا والتفتت لفَرس وأمير الي يحجون مدري شنو

أمير بهمِس
هذا الجمـال كلة الي

فَرس
طبعًا

أمير
تعالي خل احضنج جا

حضني وطبع بوسـة على خدي واني مستحية من وجود علي
بس علي ذايب بـ ايلول

أمير

أهديكِ وردًا..
أهديكِ وردًا من جنانِ مشاعري
قد نبتَ في صدري وسُقـي بأنفاسي
‏
أهديكِ وردًا.. ليسَ يُشبهُ غيــرهُ
عبقُ الحنينِ به يفوقُ قرطاسي
‏
في كلِّ بتلةِ حبِّـهِ أسرارُنا
وعلى الشذا خطّت يدي إحساسي
‏
إن مرَّ طيفُكِ في الليالِ تألّقَت
كلُّ الزهورِ.. وكم تراقصَ كأسي
‏
خذي الورودَ.. ففي خُدودِكِ مثلُها
لكنها من شوقِ قلبٍ قاسي

كتبتة الـِج وانة بسيارة

علي
عمي يلة خل نطب لايفشخنة ابو ايلول الحِنين

خزرتة وكتلة بغيض

ايلول
علي لا تحجي على بابا

علي
اويلي على بابا شكلت انة كلت حِنين بيها شي مرت اخوي؟

فَرس
ابدًا مابيها شي

ضحكنـة وطبينة سوة لاكنـا بابا باوع الورد ب ايدي وخزرني

سَلم على اميـر سلام حار وعلى علي من ورة خَشمة وطبـوا
طبينة گعدنة كُلنـة وبابا وامير اندمجوا بالحجي الدرجات الوظيفية وسلم الرواتب ومدري شنـو

شويـة وخابروا على علي
كام بس صوتـة عالي اسمعة

علي
ااااااااي لككككك كفوووووو، كفووووو من الزلم
لك انة شكتلك خرررب انّ موكتلك تلگوهم راجعين لمقرهُم كتلك لو ما كتلك الحمدلله يلا، لا وعلي وين ولك مبنددد الصبح ان شاء الله اجي يلا ضيفوهُم عيب فشلة سووا اللازم هههههههههه حَبيبي اهلاً وسهلاً ..

سَد الموبايل واجـة

امير
ها شكو

علي
راس الخَيط لزمنـاه ابو رجل المبتورة وثاني وبعد واحد وياهُم والثنين بطريق دام ذولة نلزموا الباقين هينين

امير
يا الله ايّ الحمدلله شلون؟

علي
صَديق انة كتلهم فرغوا مقرهُم ولا تخلون جيش لوشي بينوا انُ عفنـاه وكذا وانصبوا بي كاميرات ومن تحسون حركة روحولة لان خوية اغراضهم كلهة هناكَ خوية يكلك ب ٩ جايين وخوش لازميهم لزمة معدلة

امير
ماطول الرئيس لزمتوا هذولة ثنين هينين

ابو ايلول
يطلعون شعليهُم

علي
لا ويـن يطلعون والله انعل ابهاتهُم كُبل لسجن الـ .... اخلي ابو ابوهُم ينسمُط هاهيّ والله انة هسة ارتاحيت دآم السالفة هاي خُلصت

ابو ايلول
احنة ان شاء الله الثلاثاء طيارتنـا

امير
هـا شنو وين ؟

من گال الثلاثاء طيارتنـا علي جان كاعد وفرحان تقدم وباوعلي بصدمة

ابو ايلول
والله اخوان ايلول بكندا وقدمولنا سحِب لان هُمة عندهُم الجنسية ف الهُم حق

امير
وجامعة ايلول؟

ابو ايلول
يا جامعة بابا هيَ مد ما مِمتحنة تروح هناك وعلى شهادة السادس اطببها حَتى طب مستعد

علي
اوكف عمي اوكف بس انة كايلك تـرة ومحاجيك

ابو ايلول
على شنو بضبط محاجيني ؟

علي
على موضوع ايلول عمي
عمي انة رايدها لـ ايلول وعلى سنة الله ورسولة
وما مستعد افرط بيها ابد
وشنو الي تريدة انة مستعد الة

امير
عمي ابـو ايلول
ترة علي مو لان كدامك بس حجاية الحّق تنگال
هوَ رايد ايلول وماريدها تملعب لو شو شنو
لا الله شاهِد احنة هذا مو ثوبنـا وانتَ تدري
انة انعجبت بـ فرس اجيت خطبتها
بس علي سكت كل هاي الفترة بسبب السوالف الي صارت
من حرق لعلاج لهسة هاي السالفة الي الحمدلله الله چفانا شرهّة
بـس علي رجال واخو اخيتـة وهوَ يحِب ايلول وراح يصونها ويدللها ومايخليها محتاجة شي واذا ع الحماية ف اخذها مني انة
يموت ولا يخلي ايلول تنمّس شوية

ابو ايلول
عمـو اني رائي بهل خصوص ثابت وعلي يعرُف شنو رئي فَ هاي السالفة اذا جانت موجودة عند علي ف خينساهة واذا عدهم ثنينهُم ف ثنينهُم خل ينسوهة لانها مُستحيلة ..

علي
ليش مُستحيلة عمي
شني عيبي انة ش شايف علية مثلاً ؟
شني الخطأ الي بية ؟

ابو ايلول
هههه عمو الله يخليك انتَ من راسك لساسك غلط
لبنتي
يجوز لغيرها انتَ ملك بس لبنتي لا بابا

امير
هوَ الكلام مفاهم ابو ايلول
يعني مثلاً شنـو الي مايعجبك يجوز نكدر نغيرة؟

علي
شني الي تغيرة وظيفتي مثلاً ؟
لو كلامي؟
لو بيئتي !

ابو ايلول
شوف هوَ يدري كُلشي بي غلط

علي
عمي ترة هذا الحجي مايصيـر والله تؤ استغفرالله

الوضع حَيل متوتر وعلي تكلك قُمبلة وراح يخلص عدادها واميـر كل ساع ويخزر بعلي حَتى يسكُت وعلي كوة ساكُت

ام ايلول
خالة علي والله انتَ ماكو احسن منك رجال وشهم وتخبل
بس ماما احنة بعَد مانكدر نضل هنانة هذولة ماراح يعيفونك صدكني وايلول خَطر عليهـا هنانة

علي
خالة عيوني انتِ والله انتِ متعرفيني يجوز بس ايلول تعرفني عدل وهذا ابن عمي يمي ويدري
انة شلون اعوفها وحدهي شلون
هجي زايدة عدي
والله اموت ولا اخليهـا اظفرها يتأذة

ابو ايلول
من الاخير ؟ لا اتعبك ولا تعبني ايلول ماكـو
ويوم الـ ثلاثاء طيارتنـا
كام بابا وهوَ يحچي هيج كمنـا كل احنة ورا
هنـا علي احسة انفجر مدري شراد يحجي امير صار يمة واشرلة يسكت وعلي يريد يموتتت

ايلول
بابا بس اني كتلك اني ماريد اروح

ابو ايلول
عفوًا ؟ ليش بابا مـا تردين ترحين
بغض النظر عن هذي سالفة اني من زمان كايلج تكملين سادس وترحين يم اخوانج واحنة نتقاعد ونجي هسة تغير الوضع واكيد لصالحنـة فَ شنو سَبب رفضج ؟
بَس لا هـذا ؟

گال هيج وهوَ يدير وجهة ويأشر على علي بـ اصبعة
اباوع لعلي صام ايدة ويصك بـ اسنانة

باوعت لبدلتة العسكرية الي لابسها واجت على بـالي المواقِف الي سواهِن علي علمودي
باوعت لعيـونة وكإنما دينتظر الحجي يطلع مني عَ نـار

احس نَفسي توترت ماكدر افرط بي ولا اكدر ما ادافعلة بس احس اكو شي يمنعني

ابو ايلول
السكوت هذا شكدر اعتبـرة؟؟

ام ايلول
ماما احجي انتِ الي تردي شترديـن ؟

علي
ايلول هـاي السالفة مو لعب جهال ولا ضحِك وشقة
هاي كدام أهلج وكدام أهلي، وجاي أحچي وياج بكرامتي

إذا انتِ رايدتني، كولي
وإذا ما ترديني، هم كولي

بس لا تخليني معلّگ بنصّ المي، لا انة الطالع ولا انة السابح
انه جايچ عالنية وماعتقد اكو واحد گدج صار يعرف علي شني
وانتِ تعرفين كِلش زين شكد انة احبج ومستعد اسوي علمودج
ورايدج على سِنة الله ورسوله

گلبي ما عرف غيرچ
و ولا يوم حنّ لغيرج
ولا راح يحن، لأن انتِ بَس الي بي

ومعَ هذا تكليلي "إي" آنة أجيب السما يمج وأهزّ الدنيا برجلي واطيّچ المستحيل ولو تكليلي "لا" والله لا أخلّي وجهج حَسرة بگلبي وما اتعداج بعَد انة مو لعبة، ولا واحد ينحط احتياط ولا واحد ينلعب بـ اعصابة ويُستاهن بي، يا أما تكونين إلي يا أما الله وياچ، بس تروحين وانتِ مغصوبة ومارايدة ترحين فَ لا والله ماقبل
فَ احجيلي ايلول

يُتبععععع..... القرار المَصيري
____________

سَبب

شوي وكتبلي وصلت حطيتهة بمكاني وكمت بحذر، طلعت شفتـة واگف گدامي بسيارة من شفتة اجتاحني الخوف بس تمالكت نَفسي وصعدت ..

اول مـا صعَدت قفل السيـارة

سَبب
شلـونة ابوي ؟

ماحجـة شي، حَسيتة ماسمعني من الهـوى البارد رفع الجام ورجعِت سألتة

سَبب
حَسن ابوي شلون صـار ؟

ماباوعلي ولا حِجة شي

سَبب
بيك شـي حَسن شبيك ؟

هم ماحِجة شي، حَسيت اكو شي بي غَريب وهنانة بديت أفكِر بعقِل بـ اخُر لحظات!
هوَ منيلة رقمي ؟ ومعقولـة صدِك ابوي بالمستشفى ؟ كاعدة بمكاني وصافـنة حَتى ماصارت جرئة عندي حَتى احجي

شويـة و وگف باوعت بيت الشيـخ جبُر

سَبب
شنـو هاي حَسن

حَسن
مو تردين ابـوج انزلي يلة بـس بهدوء علكيفـج

استغربت الوضع واحس اكو شي غَريب ! معقولة تصالحـوا او صار شي مثلاً بيناتهُم الافكار براسي تضاربت وهذا نزل وعافني وحَدي وكإنما جاي يتجِة لبيت الشيـخ

نزلت ورا اجيت يباوعلي ومبتسم
حَسن
امشي كدامي انتِ تعرفيهم انة استحي

سَبب ب استفهام
حَسن شصار غير تفهمني ترة ماجاي افهم شي

حَسن
اششش صوتج هسة نطُب وافهمي يلة حبيبتي امشي
مَشيت گِدامة و خطواتـة بطيئة وخطواتي جانت بطيئة نَفسة

حَسيت بروحي ثگيلة وحَسيت نفسي مـا مرتاحة درت حَتى احاچي ماحِس إلا وهوَ نابِت السچينة بـ بطني جوة صرتي

بهاي اللحظة اجة بـ بالي زَعيم
وعرفت روحي راح اموت
وسئلت نفسي بهل ثواني هل ياترى راح يتزوج تبارك؟

اباوعلة يضحگ ويگول

حَسن
ياغبيـة هاي چزات السويتي بينـة

قَبـل لا ابجي وشهگتي تطلع لزمني حَيل وضربني ضربة ثانيـة فوك بطني حَسيت امعائي انلوت وعيوني انملوا ادموع، عافني وطحت بالگاع حيل على وجهي وبـدت روحي تطلع شي شي

حَسن
غبية عاررررر كتلتج بـ ايدي وشمرتج كدام بيتهُم حتى يعرفون آل عدنان منوووو

عيني عليّ راح صعَد سيارتة وحركهـا وراح عيوني صارن يبجـن بهدوء اباوع الدم ملـة المكان

عيني على البـاب وگلبي يم زَعيم، الدنيا باردة ثلج وحسيت نفسي ثلجت بعَد ما اكدر اقاوم ولا اكدر اتحرك حَتى

استسلمت لواقعي وعرفت ماراح اكدر انقذ روحي

اتخيلت كدامي زَعيم وهوَ لابس دشداشتة وبـ اتم كشختة وهوَ يكلي احبج، اتخيلت مواقفة ويـاي وجنت مبتسمة

اخر شي حَسيت جسمي جاي يرجف وبطني صارت ترتفع وتنخفُض
الدم احسة غرگني تغرگ وفوگ كلشي حَسيت نفسي ثلچت

ضليـت عايشة بهل الالـم وماكدر لا اتحرك ولا احجي ولا اسوي شي،

بالربع ساعة انة عايشة هل شعور بنص البرد وبنص الـ ظلمة و الهوى العالي

غمضت عيوني وتمنيت الله ياخذني واخلص
بعَد ما اتحمل هذا التعذيب النَفسي الجاي اعيشـة

غمضت عيوني وبديت اندِب بـ
يارب، يارب، يارب، يارب

حَسيت صار عندي الم حاددددد بـ جوة صرتي وكإنما بطني جاي تذبح صحت اخخخ بـصوت عالي بس ما مسموع بالنسبة للبيت
جسمي بدة كِلة يرجف وشفايفي يرجفن وبديت اتلوى بمكاني من الالم وماكدرت انطق ولا حَتى اصيـح

غمضت عيوني وتخيلت امي كدامي
يجوز ملامحهـا ماواضحة الي
بس هيَ امي انة ادري
ندبت بـ الم وانة اسد عيوني بـ قوة
وهمست ( يمة دخيلج راح اموتن )

حَسيت النفس ضاگ بية وعيوني بدن يثگلن
فززني صوت الباب وهوَ ينفتح بسرعة

باوعت زَعيم طلع والولد ورا غَيث و سجاد و سُراج

صارت عيني بعين غَيث صاح

غَيث
سَبب هاااااااااي

اجوني وهُمة يرگضون تقدملي زَعيم وهوَ مصدوم

زَعيم
ليش ليشششش سويتيها بنفسج ليشششششش
ليش هجي سَبب ليششش
انة شكتلج شكتلج

جنت اهز راسي بـ لا وحاسة الالم بدة يگطعني تگطع

سُراج
لكككك شيلها وكتتت هل حَجي

شالي زَعيم بسرعة وغَيث طب يجيب السيـارة

زَعيم
ليش هيج سَبب ليش
ليش سويتيها شلونننن راح تعوفيني لا ماراح تعوفيني متاكد
لا تعوفيني سَبب بعد ماعشناه الحياة سوة
بعد ما اجة يعگوب حبابة

وجهـي بـ وجهة وابلعم وبالگوة احجي

سَبب
اني ما رحت اني

احجي واتلعثم بالحجي لان ماحس جاي اشتم النفَس
طلع غَيث سيارة وشفت سيارة مروآن آل دحام جاي
نزل بسـرعة وجان رابط حَسن وجايبة

زَعيم صار يصيح ويكول حصتي هذا لحدددد يلزمة وسُراج يصيح بسررررعة البت راححح تموتتت

صعدنة بالسيـارة غَيث يسوق وسُراج بالصدر وزعيم ورة وانة نايمة ع رجلة

زَعيم
ليش سَبب ليش بس كليلي ليش
تردين تعاقبيني وسويتي هجي مو تدرين بية اموت بدونج
مو كتلج انة احبج عبالج جذب لو شنووو
عبالج انة من كلبي كلت هل حجي
ولج جنت اتكطع ميت مَرة

عيوني صـارن يغوشن وملامح زَعيم بدت تصير غير مرئية بنسبة الية ماصرت اشوف شي بس السمع جنت اسمع بس موبتركيز

اصوات ضجة، اصوات زَعيم وهوَ يصيح، اصوات سُراج وهوَ يگول للطبيب ( جوة الصُرة ب ١٠ سم مكان الرحمّ دكتور، العملية حالاً تنجري ايّ ايّ زّعيمممم روح وقع على مسؤليتك )

كُل هاي الاصوات واني بعدني احس بالالم واحس بالوجَع وكُل شي
حَسيت روحي محطوطة بمكان بـارد واكو شي بارد صار ع بطني بال ٥ د تقريبًا ضليت وضلت روحي تفرفح من الوجع بس من داخل وماكدر كلمة انطق بيها، شوية وحَسيت شلون ثنين بنات نزعوني عباتي ورفعوا ثوبي

نثاريت بـ لا بس اجاني صوت سُراج

سُراج
لا تخافين انة يمـج سَبب مستورة مابيج شي

همست بـ الم وملامح موجوعة ( زَعيم )

سُراج
برة لا تخافين راح تعديها سهلة سهلة

- مُباشرتًا نسويلها Hysterectomy

سُراج
Hysterectomy !!!!!
دكتورة متأكدة

- بلي ابني حياتهـا اهم سارعوا بالعملية

سُراج
بلي دكتورة راح انطيها تخدير عـام

سمعت يحجون شي بالانكليزي بس ماعرفت شنـو يقصد بالضبط بهل اثناء حطولي نَفس الـ اوكسجين بخشمي وحسيت بسُراج قريب ويحجي وياي كلي شنو اكلِج هزيلي راسج بدة يسالني وانة اهز راسي اخر شي حَسيت نفسي دخت وبعد ماكدر افتح عيـوني

غمضت عيوني وكلشي بدة لي نَفس الواقع المُتعب وستوني راح انام وارتاح منة ..

فِي صالـة الإنتظار 📍

زَعيـم گاعِد ع كراسي الانتظـار، ادي على وِجهة ومثني ظهرة ويقرة
( اللهُ لا اله الا هوَ الحي القيوم، لا تاخذهُ سِنةً ولا نـوم .. )
قراهـا اكثر مِن مَرة وبـدة يردد بصوت هامِس بس مسموع
يارب، يارب، يارب، يارب، يارب ..

بهـل اثنـاء اجـة مروان وطبطب عَ كِتفة

مروان
ان شاء الله تعدي لا تخـاف

باوعلة وهز راسة بالايجاب ورجع ثنى راسـة
غمض عيونة بقـوة ورجع رفع راسة

زَعيم
وينـة هذا الكلب ؟

مروان
مربط ومسدود عليّ باب الديـوان وسجاد بالبيت ضّل

زَعيم
شلون صارت السالفة ؟

مروان
انة جنت جايكُم علمود ...
راد يكمِل واستوقف كلامة
رحع تحمحم وگعد عدل وكمل ..

ايّ فَ شفت بطريقي سيـارتة لهل جلب، والـ جام مفتوح وبيدة دم ويمسح بخشمة، عرفتة جاي صوبكُم ورحت لحگتة بس هوَ لمن حسني كمت الحگة شرد
بهل اثناء انة خابرتك وماردت ارجع وافلتة من ايدي
اخابر اخابر اخابر ماكـوو

زَعيم
مگبور جنت، اخخخ اخخخ من يمتى انة انامن هجي وكت ومن يمتى انة هلكد نومي ثگيل حَتى لو موبايلي يدگ ما اسمع اخخ

مروان
قَدر مكتوب عليها وعلينا، يارب بـ ابسط الخسائر وتطلع النة بخير وعافية

زَعيم
ماعرف شلون اجازيك

مروان
مابينـة ..

گلم زَعيم من مكانة وهوَ بحس بروحة مخنوگ شويـة وغَيث اجة

غَيث
لك شوف الحيوان شوف كايل الهـا ابوي بصالة العمليات ويريد يموت ومدري شنوو

زَعيم
شمدريك؟؟؟

غَيث
عاين

اخذ الموبايل من عندة باوع رَحمة دازة لـ غَيث صورة
قرة المكتوب زَعيم وحس گلبة انقبض

غَيث
اهدئ، مرتك محتاجتك هسة بعدين اتصرف

زَعيم
نفس ماكتلها اكتلة وبيدي هم بيدي اكتلة

غَيث
ميخالف بس اهدئ هسة

غمض عيـونة بعصبية جان كلشي بي يريد يروحلة بس گلبة جان مانعـة

بهَل اثنـاء طلع سُراج وهوَ لابس ملابس العملية أشر لزَعيم حَتى يجي
اجـة زَعيم و ويا غَيث

زَعيم
بشرررررني سُراج سَبب شلونها ؟؟؟ العملية كملت ؟؟ وضعها خطر احجيلي

سُراج
لا العملية ماكملت بعدنة بالبداية
ولتخاف ماكو خَطر، بس ..

زَعيمم
بَس شنو سُراج!

وخر سُراج الكمامة عنة ومسح جبينة ومحـتار شلون يحجيهـا، زَعيم اكثر واحد يحب الاطفال واكثر واحب حاب يصير عندة ولد
فّ شلون سُراج راح يمتلك قوة حَتى يگدر يصارحة بـ فقدان اكثر شي متحمسلة بهل حياة؟
تنفس بقوة وحَط ايدة على چتِف امير وگال
سُراج
انتَ انسان مؤمُن ومُتدين وتعرف الله يحِب يختبُر عِبادة المؤمنين، الاختبار قوي خصوصًا عليك بس اكيد انتَ اكثر إيمان من هالشي

زَعيم
گطعت گلبي احجي سراج شكوو ولك

سُراج
اضطرينـا نشيل الرحم، وانتَ اعرف بالباقي بعَد ..

گال هجي وطّب مرة ثانيـة لغُرفة العمليـات
ضل زَعيم واگف ومصدوم ما يعرف شيحجي

بس حسّ وكإنهُ  شغلة جوّاه طاحت ومارجعت
كأنهُ أحد مد إيده جواه وسحب الطفل اللي جان ساكِن بروحة،
الطفل اللي من سنين يتخيل شلون راح يشيلة،
شلون راح يناغي، شلون راح يكون يشبهه وشلون راح يحمل اسمة.

زَعيم بهاللحظة ما حزن
زَعيم گد ما غَص

كل الحجي اللي بگلبة صار غُبار،
وكل الأحلام البيضا اللي يخاف يحچيها حتى لا تنصاد،
احترگت بجملة(اضطرّينا نشيل الرحم)

جـان حاط بـ بالة الف سناريو وحبيبتة طبت للعمليات
بس بهل قسوة وبهل صدمة؟ ماجان بحس ..

بهاي اللحظة حس روحه واگف بباب حضانة،
وصوت يعگوب يبچي بالداخل،
بس ميكدر يفوت
ميكدر ياخذ بيده،
لأن جان الباب مسدود عليه وللأبد.

جانت الدنيا بالنسبة إلة ضحكة مِن فم صغير
وكِلمة بابا من طفِل حلو ويشبهة
بَس هسة كلشي تخبر وكدام عيونة هم ...

كام يمشي بالمُستشفى وايـد غَيث تهز جتفة
يريد يحاچي بَس هوَ ماكو

زَعيم
اشششش ماريد اسمع عوفني ..

ضَل يمشي بـدون وعي وبگلبة كلام ما ينگال
بس جان راسِم صورة لمنظر براسة
هوَ جاي وجايب علاليگ ويا ويعگوب يفتحلة البـاب ويحضنة وسَبب تباوعلهُم وتضحك

شلـون يكدر يبخر هل مشهَد من راسة
وهوَ مضة ليالي يتخيلة وينـام عليّ

طلع برة المُستشفى وكف يم السياج
الضوة ضَرب عليّ
انتبه دشداشتة مليانة دم

يعني هذا الدم ضحيتة يعگوب ؟

طّب للمستشفى وهوَ مايشوف من العَصبية ايّ بشررر
الكل صار يباوع لذاك الرجال الـ لابس دشداشة سودة ودشداشتة من كد ماعليها دم يابسة ويمشي بسرعة وكإنهُ رايح ينتقم من احَد

زَعيم
اطيني بسرعة سويج السيـارة

غَيث
زَعيم شكو

زَعيم
ليش تتسئل جاااااي اكلك اطيني السويج

غَيث
امشي انة اخذك وين متريد متشوف حالتك شلون صارت!!!!!

مروآن
اششش اطي الـ سويج غَيث

غَيث
شلونننن اعوفة

زَعيم
انة شجاااااي احجي

انطـا السويج غَيث
اخذ سويج سيـارة سُراج وطـار بيها للبيت ...

جم حادِث نِجة منة، وجم سَبة انسبها من العالم
زَعيم الماجان يقبل واحد يتدحچ بي بحچاية
سمع من واحد يكلة ( نعنعلا العگال هذا اللابسة )
وسكت!!؟

ماجـان ب بالة شي غير صوت طفل يبجي وغير بيتهم
راد يوصل بـ اقل وقت ممكن

وصل للبيت عاف السيارة برة مفتحة وفتح الباب بالمفتاح وطب
لكة ابو وعمامة وجدة وسجاد وبيبيتة جوة واكفين

صالحة
بشر ولك يمة شلونها سَبب

ماهتم لاحد وراح كبل للمطبخ جـاب سجينـة بـ ايدة واجة

صاح بصوت مبحوح ويخوف
زَعيم
سجادددددددد افتح الباب بسرعة

تقدمولة كلهم
وبهل لحظة وصل مروآن آل دحام

زَعيم
كفيلكم العباس الي يطب ينطبگ ويـا
جيب المفتاح جاااااي اكلك حيووووووووان تضمة علية

مروآن
انطوا المفتاح بوووية انطوهيـا خل يطفي نـار گلبة بي

صالحة
ولككككك ماتتت البت ماتتتت احجي !!!!!

مروآن
لا ما ماتت

اخذ المفتاح غصُب وطب بسرعة مربطي وعايفي بالگاع
شاف زَعيم بيدة سجينة تراجع وخـاف
جرة زَعيم بسرعة ومشة بي لحد باب البيت
مايريد يكتلة بـ بيتهُم ويلوثة..

زَعيم
بكل مرة جنتوا تكتلون سَبب
ومرة كتلتوا اختي
بس هاي المَرة انتوا كتلتوا ابني الجنت احلم بي

محَد جان مفتهم السالفة وعبالهم زَعيم مسوي عِلاقة وي سَبب
اجة وجاب السجينـة وضربة بنص گلبة بدون ايّ رحمة

زَعيم
هاي حگ زَينب وحگ سَبب وحگ يعگووووووب

وخرهـا وراد يضربة مرة ثانية اجو سَجاد و مروآن لزموا

مروآن
لا تصيررررر نفسهُم انتَ احسن منهُم كااافي زَعيم

زَعيم جان منهـار ويريد يروحلة مَرة ثانية بس جانوا لازمي الولد وابو وعمامة وجدة بالگوة مهدي ومصَبرة

زَعيم
اخذوووووا لهذا الحيوان اخذوووووا لبيتهُم
وخلي الكل تعرف زّعيم آل جبًر الي كتلة
انة الكتلتة ولو تصحلي فرصة اكتل شكووو فرد تابع الهُم

جبُر
كااااافي ولك راح تموتتتت وجهك صار اصفر
چتلتة هسة شتريد بعَد كااااافي

زَعيم
رايح ماريد سَبب تصحة وما تلگاني رايح

راح طلع ومحَد لحگ ورا خلة ومشـة

امـا مروآن فَ تكلف السالفة وگال انة اروح اخذ ثنين من عمامنة واروح، كَ شاهد وكَ وسيط عَ سالفة الصارت

موقفة جـان حيل حلو ومُشرف بس بنفس الوقت
البيت جان كلة حزين بعد ما عرف الي صار وي سَبب
بس كِل واحد حَزنة يختلف

زَعيم جان يشوف روحة انحرم من الاطفـال
بينما الباقي جانوا يشوفون سَبب انحرمت من الاطفال بَس عسى ولعّل زوجهـا يعوضها بيوم بـ اولاد الثانية ..

مَر على بيت رَحمة ودگ الباب اخذ الورقة منهـا وراح بسرعة بدون مايحجي ولا حَرف

يباوع للورقـة ويقراها حَرف حَرف
حَس بذنب جبير وحَس روحة المسؤول الوحيد بهاي الحَادثة

- انة رايحة بطريق يمكن مابي رَجعة، بس هل مرة رحت وانة سامعة كلبي واحس كلبي مايطيني وابوي بين الحياة والموت ماروحلة، لو رجعت ف هاي الورقة ماراح تقروها ولو مارجعت ف اريدكم تسامحوني وتعرفون انُ انة اعتبرتكم بمقام اهلي وجنت احس الشيخ نفس ابوي ولكيت ب مرت الشيخ الحنان الي ما شفتة و علي وغيث وامير مانسى وكفاتهم وياي وسراج ب اخر فترة جان وياي زَين اما زَعيم ف كسر كلبي بـ اخر ايام بس مع هذا راح اضل احبة مهمّا صار ..

لِلحظة حس عيونـة دمعت وهوَ يقرة اخر سَطر انكتب
كِره روحة كره فَضيع، حرك سيـارتة وتوجه للمُستشفى بعد ما سُراج خابرة

توجه زَعيم للمُستشفى والكرة الي شايلة لنفسة موطبيعي وجـان محتار شلون راح يواجِه سَبب بالحقيقية!
شـاف غَيث گاعد و يقرة قرآن
اجت عيون غَيث عليّ

زَعيم
بشر ؟

غَيث
العملية صعبة وتطول حَسب ماكال سُراج تحتاج ساعة ونُص الى ساعتين يعني فَد رُبع ساعة المفروض يكملـون

گعد زَعيم عَ الكرسي وهوَ ماطايق نفسة على گد التفكير والاصوات الي براسة، اتدنى غَيث يمـة وحط ايدة على چتفة وگال

غَيث
بهاي الدنيا مو شَرط انتَ مو زين حتى الله يختبرك، الانسان الي گلبة طيب الله يختبرة وانتَ انسان مؤمن والكِل يدري شنـو زَعيم وشيسوي وشكد يساعد، وسَبب بنية معدلة تعبت بحياتها هـواي والي يتعب من اهلة ميضاهي وجع احد بنفس الوكت هيَ بنية مؤمنة صايمة مصلية تعرف الله عن حق وحقيق لهجي الله جاي يختبرها
بس انتَ تأكد انُ هذا اختبار من الله الكُم واكيد بيها حكمة الاهيـة

باوعلة زَعيم بعيون تعبـانة وگالة

زَعيم
ولك غَيث انة السبب بهذا الشي شلون راح اسامح نفسي ؟ لو مصدگها ماجان راحت يم رَحمة ولا جان كدرت تطلع واجة هذا وضحگ عليها واخذها لك انة المسؤول عن كلشي، بسببيي صار كِل هذا بسببي

غَيث
ماكو شي اسمة بسببك! هاي ارادة وحكمة ربك
راد يسوي هجي فَ قلب كل الموازين
صير قوي خوية بنهاية ألمك ما يظاهي ألمها

الخيانـة صعبة
بس الشك بوجود شخُص مُخلص بعَد اصعب بميـت مَرة يخوي ..

سَبب انظلمت ومن عدنة كل احنة وفوك كِلشي انحرمت من الضِنى وهذا وحدة دمار بنسبة لبنية بـ بداية حياتها ومارة بهلكد ظروف
اندعي الله يگومها بسلامة وهاهيّ ..

تنهد زَعيم وهوَ يسمع كلام غيث مسح وجهة وضل يستغفر بربة
بهاي الاثناء طلع الكادر الصحي يتحمدولهُم ع سلامة وبلغوهُم بـ الي صار

راح زَعيم وي الدكتورة وفهمتة بـ الي صار بالتفصيل
ماجان يعرف بالضبط الموضوع بس كال الها بترجي شكد نسبة الحمِل ؟ ظن تكلة ١٠/٢٠/٣٠ ايّ شي المُهم يحس اكو امل
بس جاوبتـة بـ صُفر بالمية ..

ماكو أمل ابد الا تاخذ بويضة من بويضاتها اذا بويضاتها ما متضررات وتسون تلقيح اصطناعي بـ رحم امرأة ثانية هذا السي استبعدة زَعيم نهائي ورجع يائس ومكسور من الي صـار

سُراج
تكدر تفوت سَبب صحت، بس حاول لا تذكرلهـا ابد الي صار بعدين شي شي انتَ تدرجلها بالموضوع

هز راسـة الة زَعيم بالايجاب
بس جان خجلان منها حَيل
شيريد يحجي وياها شرييد يكللها

طّب للغرفة شافهـا گاعدة اول ماباوعتلة .... يُتبععع

ردت اضيف الكُم سُراج وشمس بس بسبب التاخير الي صار(نفس مكتلكُم اجونا زوار للعشا) فَ مالحك لِذالك بالبارت الجاي الكُل مذكور و اولهُم سُراج وشمس وبصورة طويلة وتدللون 🤍

لا تنسون التصويت والتعليق الحلو ..