رواية بيت جبر الفصل التاسع عشر 19 - بقلم هُدىٰ آذار

مَساء الخـير
رجعنا وياكُم بـ بارت جديد
مِن قُصة ( بيت جبُر )
لا تنسون التصويت
والتعليق، دعمًا لاستمرارنـا
للكاتبة : هُدىٰ آذار
_________

رحمَة :

نزلت لجوة رحِت يم امي
لكيت زعيَم جان يحجي وياهة
صفنت عليهُم وفاجئني الي جاي تحجي امي

ام رحمـة
والله يا يمـة انة اكيف وين لاكيتها يمكم
عاد اعيش بـ أمآن واغمض عيوني وانة مأمنة على رَحمة

رَحمة
يُمة شبيـج شنو سالفة ؟؟

زَعيم
عمي والله مو ويانة بالييت شني السالفة
خالة بتج راسها يابِس وكرامتها ما تسمحلها
بس انة كتلها اهل الخير ما خلصوا
والدنيا ما تتأمن

رَحمة
رحم الله والديك خوية ماتقصرون ولد اصول ادري بيكم والله بس ماكدر

بهل اثناء نزل اميـر

زَعيم
بس انتِ مراح تعيشين ويانة بالبيت ؟

ام رَحمة
يُمة راح يبنولنة بَيت يمهم

زَعيم
بُستانا جَبير ورحمة من الله، فـ راح نسويلكم هل قاسمة الله بي

رَحمة
تـرة ماكو داعي والله
يُمة شبيج وانتِ راضية مثلاً ؟
بُستانكم ادري بي انُ انتوا مرتبينة ومتقبلون احد يكون بي فَ ليش مثلاً علمودنا

امير
بس الغرفة والتخاريج ميصيرن ٥٠ مَتر، هل ٥٠ مَتر مراح يأثرن عَ ٣ دونمات ؟

زَعيم
خوية ترة والله لا نشيلكم منية ولاشي شني سالفة ناس تكاطعت

ام رحمة
لا يمة هذولة ولدي والله انة ربيتهم بـ ايدي
-ترفع ايدها للدُعاء- اريد من الله يَ ويلاد الشيخ جبُر الله يفتحها بوجوهكُم ويرزقكُم ببنية الحلال الي تستاهلوهة

ضجِت حيـل بَس ماكدرت احجي، احس ماريد احد يحملني منية مهمّا جان، ماريد احد يحسسني انُ هوَ جاي يشفق علينا، نفِس ما يدينا حياتنا كون ننهيها بدون مانمد ادينة لاحَد

رَحمة
انة اقبل بـس بشرط

زَعيم
يجرالج عمي

رَحمة
الكاع اشتريها منكم

-ضحكوا-

أمير
بـ ١٠٠ مليون، غيرها ما نرضى

زعيم
لا ولك شني ١٠٠ مليون لا تصير ظالم خل تطينا ٥٠ وتاخذها

صالحة
ما تطيحولها علمودي ؟

زعيم
عمي علمود امي كل الفلوس طايحة
ها اها عزلنـا

رَحمة
لا انة صدك احجي ما اشاقة والله خوية تبيعوها النة اكعد بيها وحتى بنيانهة تحسبوا علية

زعيم
عمي والله عيب تعاني النسوان والزلم موجودة
خالة شو احجي وي بِتج، ترة انتوا من عدنة وبينة صدِك جذِب

طلع زَعيم ومرت الشيـخ تكلي يُمة احسن الكم وامي مكيفـة، صرت عَ جهة وحجيت وياهة

ام رَحمة
يمة صدك تحجين، ولج انة بالمصابيح موتي والله، ماعرف على فجاة ولني لاحكة ابيج واخيج شلون بهاي الحالة ؟
ولج يمة رحمة اريد اغموض عيوني وانة مرتاحة ومطمنة عليج يبعد روحي ليش تخلين روحي معلعلة

رَحمة
يمة اسم الله عليج وعُمرج طويل بس انة ماريد واحد يمن علينا

ام رَحمة
والله يَ يمة ذولة يطون ويديرون وجهم مز يضلون مكابليج و يحجون خليني ارتاح ولو مرة بحياتي وعلي من كلالي لعد هَسة انة طايرة من الفَرح

اباوع فرحة أُمي جبيرة، احِس ماكدر اكسرها ازيد
بس بنفس الوقت ما اقبل اكسر كبريائي
وكلت كل الفلوس الي يطونيـاهة وخصوصًا اول شهَر رأسًا انطيها لزعيم بما انُ هوَ صاحب الفكرة واكيد راح يتكلف كل شي
اتفق وي امي الشيـخ وقتها كال الها انطيج ٥٠٠، صراحة جان مبلغ هائِل يعني بي فلوس إيجار بس من بعد الي صار حَتى انة خفت من كُل مكان

كلت ماعلية بزعيم اروح و احجي وي الشيخ واشوفة شيكول

جانوا طالعيـن برة بعد ماكملوا غَدة
وبِس النسوان كاعدات بالصالة
وانة امـسح بالدرّج

شوية وشفِت غَيث نزل
مبَدل وسابح، اول ماشافني ابتسم بادلتة بالابتسامة

صالحـة
عريس يمة هلا هلا بيك يابعد روحيتي

اجة كعد يمها وكُلها كام تهلي وتمرحِب بي

امير
اليوم ان شاء الله نروح اني وياك للحلاق تزين

هَز راسة بالايجاب والكُل صافن عليّ وعلى تغيرة

امير
سوينـا تحدي انة ورحمة وي غَيث
وغيث بعَد ما يصعد ابد فوك
نريدة يضل جوة ويانة حتى النومة هنانة

جبُر
اي بوية اي عفية عاشت ايدك، شعدك كاعد فوك بغرفتك ومچابِل روحك وجاعِد، انزل جوة شوف اميمتك اخواتك شوفنة احنة اطلع ويانة تونس اليـوم هم نطلع للبُستان واطلع ويانة وتونس

علي
لا هوَ منا وجاي مايصعد يضل يمنة

كاعد يم مرت الشيخ ومرت الشيخ تبوس بي
هوَ مبين ضاج، واضح اصلاً انُ عندة هوس

غَيث
يُمة دكافي ليش تخليني اكوم من يمج

صالحة
يلا عمي سكتت عفتك عفتة

غَيث
جوعان

صفية
يمة سيوف صِبي لـ غيوثي غدة

ملاك
اني هم اريدددد

غَيث
لااا اريد رَحمة تصُبلي

درت وجهي وهزيت راسي بـ ايّ ورحت سمعت ملاك صاحت

ملاك
ماااااا مااااااا ماررريد هاي تصبلي اديها مدري شبيهن نفس الدوائر بيض وصخات

من كالت هيَج كلها صاحت بيها، ملاك عمرها ٤ سنوات وهي دلولة الكُل خصوصًا علي

رَحمة
لا صيحون بيـها طِفلة ما تفتهم عااادي ترة

علي
لاااااا مرة الثانية اذا تعيديها اكسر راسج مووو عيب تكولين هيج؟؟

هيَ رأسًا برطمت وزعلت رادت تروح اخذ بـ ايدها غَيث
كعدها بـحُضنة وكال الها

غَيث
تعرفين شنو؟ هذا البياض اللي تشوفينه، مو وصخ...
هذا مو شي يخوف، هذا شي من ربي، مثل ما عيونج ملونة وحلوة، إيديها هم ملونة وحلوة.
بس إذا ضلينا نعيّب عالناس، گلوبنا راح تصير وسخة، مو الإيدين
باوعلي وگال
ورحمة؟ هاي رحمة أحسن من هواي ناس، گلبها نظيف، وما عابت أحد... فَ مو تستاهل نعتذرلها؟

ابتسمت واني اباوعلة شلـون يحجي وياها، كال الها يلا كومي اجتني جرتني من ثوبي وكالتلي

ملاك
انتِ كلش حلوة هلكدددددددد
وسوتلي حركة الـ هواي  بـ ايدها

ابتسمت ودنگت بستها وكتلها
وانتِ أميرة البيت كله... يلا نغسل إيدينا ونغديچ.

شلت راسي لغَيث وابتسمت
اني مو من نوع الي يخجَل سواء مِن مَرضة او نَفسة او الناس

يمي الثقة الكافية بنفسي ومهمّا حجة الواحد علية او حاول يتنمر وتعرضت لهـواي هجوم  وتنمر من كبرت جنت ابدًا ماهتم واتقبل هل شي برحابة صَدِر وابتسم الهُم واسكت

حاولت اشوف الناس من جانب ما جنت اشوفهم بي من جنت صغيرة
من جنت صغيرة، جنت اتحسس واضوج وابجي وانهار للرجة حَتى المدرسة تركتها من ورة التنمُر، بَس من كبرت حاولت ما اشوق الناس كَ مُتنمرين وإنما صرت اشوفهُم كَ ناس ناقصين عقول، ماعدهُم ثقافة ولا مشاعِر ولا عدهُم ثقة عالية بنفسهُم، هُمة ذولا بالضبط من تجون الهُم وتواجهوهم تشوفوا متعرضين لتنمر
اجة احد كلي انتِ سَمرة فَ اكيد اكو احد غيري معيب على لونة
اجة احد كلي انتَ فقير اكيد هوَ مر بفقر وصار زيـن
البشر دائِمًا يجونك من جانبهُم الناقص فَ صرت ما اتأثر بـ ايّ احد

يجوز لو هذا الموقف صاير سابقًا، بشخصية رحمة القديمة، جنت تلكاني اتوتر والدموع بعيوني وكُبل اطلع ما اضل يمي استحي
ويجوز لو غيري هم جان سوة هيـج بالضبط

بس اني كُلي قناعة صرت ب انّي مُميزة
والشي الي بية حيل مُميز
واصلاً دائِمًا احب اشوف الي جواي مو الي فوگاي
يعني اني ليش اباوع للانسان الصاحي؟
خو اباوع للانسان الي مرضة اكثر شِدة مني!

من صفنت على نفسي لكيت الله راحمني
هوَ صح اختبرني بالبهاگ
بَس كرمني ب انّي امشي ع رجلية، كرمني بالنظر بالبصر وبهواي شغلات، لمن اشوف الامراض وخطورتها اكول الحمدلله والشكر وصدك الله منطيني الابَسط
وحَتى الانسان الصاحي بذاتة ما اقارن نفسي بي
لان اني كُلي ثِقة ب انُ
كُل بَشر بينة مُختبر بشغلة مُعينة

شخُص عندة اهل زينين
بس حالتهُم المادية ضعيفة
وشخُص حالتة المادية زينة
بس اهلة مو زينين
بالنهاية الثنين يباوعون لبعُض من جانبهُم الفاقدي
و واحد يتمنى حياة الثاني، و واحد يكول عَ ثاني هو حياتة احسن مني
بس بالنهاية حياتنـا متساوية

وحَتى لو تجي وتشوف شخُص الله ما بالي ب اشياء تلگة طاقتة ضعيفة وما يتحمل ايّ شي عكسنا احنة الي الله منطينا طاقة تحمُل مخليتنة نتحمل كُل الي صـار

فـ اخُر١٠ سنوات من عمري حيل رقيت بشخصيتي ومصرت اسمع من ايّ احد ولا صرت اتاثر ب احد ..

رحِت للمطبخ
حَسيت اكو احد طب وراي
ردت افتح المي داغسل
شفت ايد انمدت من وراي
التفتت غَيث
وهوَ ديسد المي

المسافة بيناتنـة شُبه معدومة
اباوعلة ميباوعلي، يباوع لجوة، باوعت لنظراتة يباوع لايدي
جنت اجر بطرف رداني حَتى ما يصعد ويبين لان هوَ شوية نازل جان عَ ايدي
وخر طَرف الثوب بـ ايدة
عَ لحظة ردت اموت من القُرب مالتة

غيث
لاتغسلين إيدچ...

رحمة
ها، غَيث وخر ليجي واحَد

اخذ مسافة بيناتنة وگال بصوت هامِس

رَحمة
ترى ما بيهن وسخ...
انة اشوف كلشي بيچ نظيف... حتى التعب، حتى البهاگ هذا، حتى شغلج، و صمتج هم
صحيح ايدج بيها أثر التعب، بس بيها طمأنينة جبيرة..

سكَتِت بس نزلت عيني عَ ايدي وانة اشوفها ترجِف من الصَدمة العاطفية هاي، ما متعاملة وي ولد ابد، وما صاير موقِف مثل هذا سابقًا وياي، اصلاً العاطفة احسها ماتت وي بابا الله يرحمة ومن بعدة ما حاجني شخُص ذكر بحنية ..
غيث
كلشي بوجهج، وبجفوفچ، ما بيه شي يخليج تخجلين منه.
إنة أول مرة بحياتي أشوف بشر... ما يحاول يغطّي عيوبه... بس يخليها تمشي وياه مثل النفس.
إنتِ جنتي طبيعية بوقت الصدگ جان نـادِر ..

ارتبكت هواي، احس اول مرة ارتبك بـ موقف وكتلة
رَحمة
اوكي غَيث بس خلي اغسل اريد اصُب
مو عن شي بس اني متعودة اغسل قبل لا ابدي بكُل شي

غَيث
عادي اضل واكف يمج؟
احِب اشوفج وانتِ تشتغلين بهدوء

هزيت راسي بـ ايّ بس اني مدري شبية مرتبكة
صبيتلة وانطيتهيـا اتشكرني وراح كعد

العَصُر رادوا يرحون للبُستان
طلعنـا اني والبَنات

باوعت غَيث جاي
مزين جان بالحلاق هوَ وأمير
احس شكلة جذريًا تغير
شعرة جان طويل ولحيتة مخربُطة
هَسة مخفُف شعرة ولحيتة حَيل

شكد ما اكول وَسيم فـ قليل بحقة
الي يشوفة كون يذكر اسم الله مُباشرتًا
ويكول ما شاء الله
ع كد ما جان الولد جمالة يوسفي

اول ما باوعلي اجاني
و اول ما اجاني ابتعدن عني البنَات
حَسيت بدة يحرجني گدام اهلة
والكُل كام تلاحظ هذا الشي

حسيتة نفس الطفِل الي يدور عَ امُها واول ماتجي يروح حتى يجلب ويـاهة

غَيث
عادي ارافقج

هزيتلة راسـي بَ ايّ
نمشي بالطريق وثنينة ساكتين
ماصارلنة مسافة بسيطة ماشين كسر الصمت بـ

غَيث
اعترفلج بشي؟
انة ماطيق بشر يحجي هـواي
بس من تحجين انتِ اتمنى ما تسكتين لحظة، احب اسمعلج وانتِ تحجين بكُل هدوء، يعني انة مستعد اسمعلج من اليوم لباجر بدون ملل تخيلي !

من گال هيَج ضحگت

غَيث
يلا سولفي شوي لضلين ساكتة

ابتسمت وباوعت لظلال الشجر الي بالارِض وگِتلة

رحمة
تعرف غيث مرات أحس الدنيا مثل هاي الظلال... تتحرك حسب نورك.
يعني إذا داخلك ضلمة، كلشي يصير مخيف... حتى الشجرة تصير وحش...
بس إذا عندك نور جواتك، حتى الوحش يصير طيف حلو.

غيث (بصوته الخافت)
شنو تقصدين بالنور؟

رحمة بابتسامة وهدوء
النور هو التصالح ويا نفسك
يعني تسامحها، حتى على أخطاءها.
أني من چنت صغيرة جنت ابجي على نفسي بالليل، من وره مرضي والتعب، چنت أحسني أتآكل... بس يوم قررت أحبني، حتى لو ما أحد حبني، اختلف كلشي.

باوعلي وكلي
غيث
يعني تحبين نفسچ هسه؟

رحمة
ماكو شي اسمه أحبها تمامًا بس يوم بعد يوم، دا أتعلم أضمها، حتى لما تنكسر وتصالحت وياها ب ايجابيتها وسلبياتها ..
قريت مرة لدكتور عادل صادق يكول: (الإنسان مشاكله مو من الحياة، مشاكله من نفسه اللي ما عرفها، ولا حاول يصالحها.)
وأنا دا أحاول، حتى لو أتعب.

غيث سكت، بس حس بجملة "دا أحاول حتى لو أتعب" تضرب بيه مكان بعيد.
مرّت دقيقة وهو ساكت، بعدها گال:

غيث
أني ما سامحت نفسي.
كلشي بيه أحسه غلط
حتى ضحكتي، حتى نومتي، حتى ردات فعلي...
مرات أتمنى أطلع من جلدي وأصير غيري
تخيلي رحمة!

انطيتة نَظرة عابرة وكتلة
وإذا گلتلك هذا الجلد نفسه يرتاح، بس لمّا تنتفض من الداخل وترفُض العذاب الي انتَ بس !
گلتلك يوم راح تشوف نفسك بنظرتي راح تعتب على روحك لأنك ظلمتها.
كلشي يبدى بخطوة وحدة

غيث
شنو هي؟

رحمة
أنك تتنفس وتسمح لنفسك تحس من جديد.
لا تخاف من الإحساس، لأن هو اللي يرجعك حي.

بـ اثناء كلامنة امير صـار يمشي ويانا ..

أمير
أحلى شي بالبستان إنه يسكتلك ضجيج الراس
يعني ما تسمع إلا الطيور، أو صوت حچيك الداخلي

غيث
انة راسي ما يسكت حتى هنا.

رحمة
بس من چنت تحچي، چنت هادئ... يعني راسك يسكت لو يقتنع بالمكان الي هوَ بي ..

أمير
كلام رحمة صح، تعرف شنو؟
إحنة مو دائمًا نحتاج نرتب كلشي برأسنا،
مرات نحتاج بس نكعد ويا ناس مانخاف نظهر وياهم مشوّهين.
ناس ما تنتظر منّا نضحك، بس تنتظر نكون صادقين.

غيث يباوع للأرض، يحرك ريشة طاحت من الشجرة
غيث
انة كلشي صاير بيّة غريب من سَنة،
أتغيرت، حتى أكلتي، مشيتي، صوتي، كلشي...
حسّيت أنة مو أنة ..

رحمة
يمكن لأنك بطّلت تمثّل.
بطّلت تسوي مثل باقي الناس، بطّلت تلبس قناع.
مرات التغيير موجّع، بس صدگني... هو اللي يكشفك على حقيقتك.

أمير
كلنا مرّينا بهذا الشي، حتى أنة
احس محد ما بينـا ما يمر بسي يغيرة بس بطريقة مختلفة

رحمة
اصدق شي اسمعة، فعلاً هيج ..

أمير
چنت أخاف من الفشل، أخاف من نظرة أبوي،
بس يوم كدرت أگله "ماعرف"،
حسّيت أول مرة أنفاسي تطلع من رئتي مو من راس غيري.
يعني شرايك نباوع للمستقبل، مثل ما نباوع للسماء؟
مانگدر نلمسه... بس نگدر نآمن إن باجر راح يجي.
وانة مؤمن، إن غيث القديم مات، وراح يولد واحد جديد... أحسن.

باوعتلة باوع للسماء، تحس صدرة تضيق وفجأة تنهد بتعب ..
بهاي اللحضة مادري بَس حسيت شي بية انكسر عليّ
احسة موجوع بس مو كادر يعبُر
ماكدرت اسوي شي ثاني
بَس دعَيت بكلبي
وهل المرة جانت من كُل وكلبي ...

رَحمة
يـا رب... يـا رب ارحمة
رجّع لقلبه الراحة، رجّع لعينيه اللمعة،
هو مو سيّء، هو موجوع...
"يارب سهّل عليّ التعب، وگص جناح حزنه،
يارب لا تخلّيه يحس نفسه غريب،
ولا تخلّيه يخاف من روحه.
يارب طهّره من جوّه، مثل المطر من ينزل على الغبار،
خليه يتنفس، ويضحك، ويگول الحمد لله وهو حاس بيها مو بس حاچيها.
خليه يشوف نفسـه مثل ما أني شوفه... طيب، وصاحي ونقي من الداخل
دمعتي نزلت بهدوء، مسحتها بسرعة حَتى محد يشوفها
بس احس كلبي ينزف عليّ وعلى حالتة وشكد هيَ صعبة بالنسبة الة .

رفعت راسي وامير رفع راسة
بالغلط اجن عيونة بعيون بعُض

احس شفت هواي اشيـاء بهاي اللحظة، بعد نظرة بَسرعة عني بس اني صرت اباوع عليّ من بعيد
ولان اني انسانة ما احِب اكتِم الي اشوفة فَ كتلة ..

رَحمة
تعرف أمير... أني مو أشوف المستقبل،
بس مرات، العيون تحچي أشياء الجوف ما يگدر يصيحها.
واني شفت بعيونك هَسة اشياء

أمير (يبتسم بخفة)
وشتحچيلج عيوني؟

رحمة
تحچيني عن رجل صابُر متعود ينطي، بس ناسي نفسه،
وعينك اليسرة، من تضحك، يصير بيها ضوّ مو طبيعي،
وهالضوّ ما يجي إلا من حنيّة نادرة.

أمير
يعني شتتنبئينلي؟

رحمة
أتنبألك ببنية مثل كلبك نظيفة، ما تعرف تلف،
راح تدخل حياتك بهدوء، وراح ترگد تعبك،
راح تعلّمك تتونس، وتخليك تضحك من غير سبب.
وبيتك راح يصير چنّة بيت چبير من نخيل، ظلّه بارد،
بس الدفا جواه.

ضحگ وكإنما باستهزاء وگال

امير
ابد ماعتقد

رَحمة
اكو شغلة انتَ متردد بيها ؟

باوعلي وكإنما اتذكر شي واستغرب 
امير
ايّ شمدريج ؟

رَحمة
ايّ امشي بي، بدايتة موجعة ومتعبة الك وللطرف الثاني
بَس بعدها راح تشوف سعادة وخير عليّ

أمير
إذا الله كتب وهالتنبؤ صار
راح أذكرج بكل ضحكة تجيني.

رحمة
وتذكر... إن كلشي حلو جاي،
بس لازم تكون إنتَ حاضر لما يوصل.

مادري ليش حجيت هيج بَس حسيت لازم احجي
باوعتلة باوعلي وكإنما جاي يفسر الي كلتة

وصلنة هناكَ طبينة شوية والولد طلعوا يشوون
ماعدا غَيث گاعِد
حاجيت الـشيخ وكتلة عَ كلام زَعيم

رَحمة
فَ يا شيخ انة اريد اشتري الگاع مِنك

جبُر
الله محيي اصلج بوية، الكبرياء وعزة النفس اهم شي عد الانسان ولو فقدهن يفقد روحة
بَس يابوية وي الاهل ماكو لا كبرياء ولا عزة نفس لان لو تصير عندة هل سوالف ويـة اهلك تخرب السالفة
وانتِ بنيتي بوية حالج حال البنات وانة ماقبلها ابد، واعتبريها هدية من عندي الجن انتِ واميمتج ولا تخجلين ابوج انة ان شاء الله

رَحمة
شيخ انتَ على عيني وعلى راسي
وعطائك دايم ان شاء الله
بَس شيخ انة ما ارضاهة على نفسي والله

جبُر
بوية شني انة محد يثني كلامي هههههههههه

رَحمة
اعتذر منك شيخ بس والله ماتصير

جبُر
يابعد ابوج يابوية كتلج خليها علية وهاهيّ

مِن سِمع غَيث قريت بعيونة فرحة جبيرة، بس جانت مضمومة
ابتسمت عليها وكمت حَتى اطلع شوية
طلع وراي وگال

غَيث
خل نمشي شوية احتاج اسمع حجيج بعَد ..

من گال هيج ابتسمت واستغربت
شنو كلامي ممة ولازم كل شوي يشرب منها؟
حَسيت انُ ما لازم اعودة
خصوصًا اهلة هنا وانة استحي
ولو امير أمنلي انُ ما ياخذون غير نظرة
بس مع ذالك استحي جِنت

تذكرت انُ الي كدامي غَيث المريض
الي لازم اساعدة
واسوي كُل ما بوسعي
حَتى يصيـر زين

نمشي بالبُستان ونحجي
اني المتكلم وهوَ المُستمع
ويكفي ب انُ يباوعلي ويبتسم
شوية وصاحاولنـة عَ الاكل

مِن رجعنا من البُستان غَيث جان تعبان، والكل جان كاعد فَ جانت النية ينام بغرفة مرت الشيخ المُهم ما يصعَد وفعلاً اخذ عِلاجة مُهدئات ونـام
بهاي اللحظة بالضبط الحمدلله من انه نام لان جان الجـو مكلوب عدهم بسبب سالفة روان، بعدهي اجو ناس وماكدرنا نرجع لبيتنا فَ ضلينا يمهم

الصـبح گعد غَيث والحمدلله جان كل شي محلول ساعتها
كاعدة بالمطبخ احضر ريوگ وهوَ واگف فوك راسي
مو شَرط يحجي المُهم واگف ويتبع خطواتي

جانـوا مشغولين بـ مشية امير، غَيث ماجان يريد يروح لان طريق ضَجة وهوَ مايحِب هيج اماكِن

اليـوم الي بَعدة جانت مشية امير وجان الكُل مو بالبيت
ماعداي انة و روان و غَيث وامي
والباقين كُلهم راحوا ..

روآن بغرفتها نفسيتها تعبانة، حاولت احجي وياهة بس جانت رافضة تمامًا وتحب تكون وحدهة، وامي جانت نايمة بغرفة سبب الجوة وغَيث ساعتها جان كاعِد

گضيناهة طول اليـوم سوالف
وهوَ جان فرحان ويسمع بكُل اريحية صَدُر
واكتشفت سَبب شفائة المتأخر اهلة
لان جانوا تاركي يعيش بفُسحتة الوحدة
من دون ما يجبروا حَتى يكون وياهُم ويعيش حياتهُم

بنُص الحَديث و وسط اندماجة
باوعتلة صفن سألتة شبيك مجان يرد بـشي وراد يصعَد

رَحمة
غيث لتصعد اذا تصعَد ترة تخرب كُل شي ضل هنانة حباب

غَيث
بس انة مخنوگ ماگدر
محد راح يحس بية

رَحمة
تطلع وياي ؟

غَيث
وين؟

رَحمة
برة، ثق بيـة واطلع وياي بَس ..

جانت الدنيا مُغرب والاذان عَ وشك انُ يصيح
طبيت للحمام توضيت ولبـست جادري وجبت قُرآني واجيتة
باوعلي ابتسم
كتلة يلا نروح

طلعنا برة وحطينـا ثنين كراسي
جنت اريدة يسمع صوت القُرآن
وجنت موقِنة انُ هوَ راح يرتاح لو سِمعَة
خصوصًا بهيج وقِت يخنگ
هوَ جان ملتزم الصمِت
بس يباوعلي وصافُن

بديت ارتِل سورة الحشـر
اني عندي صوت حَيل حلو ومُريح نفس ماجان يكول ابوي الله يرحمة
صرت اقرة بالقُرآن وهوَ ساكت
وانظارة جانت علية،
ما جنت اشوف بس جنت احس بيهن

وصلـِت لـ :
فَإِنَّ مَعَ الْعُسْرِ يُسْرًا
إِنَّ مَعَ الْعُسْرِ يُسْرًا"

انتبهت لـ ايدة صارت ترجِف تصدقت وكتلة

رَحمة
انتَ بخيرر ؟

باوعلي واحس عيونة راح ينطفّن وصدرة يصعَد وينزِل

غَيث
كملي رَحمة

قلقت عَ وضعة ردت اكلة شبيـك كال

غَيث
كملي رَحمة

رِجع راسة عَ الشباك وانتكى عليّ وغمض عيونة ويأشر بـ ايدة انّي احجي

صرت ارتِل القُرآن واباوع ع وجهة ابتسامة موطبيعية
جانت مرسومة بهدوء وكعملامة عَ الطمأنينة

كملت السورة وكلت
رَحمة
صدق الله العلي العَظيم

فتح عيونة وشال نَفسة وعدل كعدتة وگال
غَيث
صوتچ بالقرآن كإنهُ دوة.

غَيث
راسي جان مليان
بس أول ما سمعت صوتچ تقرين "فإن مع العسر يُسرا"... حسيت أهدأ.
أحس كأن كلشي بداخلي يخنكني، صاير بيني وبين الدنيا جدار.
بس أنتِ... صوتچ، سوالفچ، وجودچ... تنطيني نفس.

رحمة
أنتَ ما مكسور، بس متروك.
وهواي ناس تعيش بهالزاوية، بس مو الكل يعرف شلون يطلع.
بس أنت عندك قوة، بس خايف تمد إيدك وتگول "ساعدوني"
وتخاف حَتى تساعِد نَفسك

غَيث وهوَ مرخي عيونة
كملي رحمة ..

رحمة
القرآن مو بس للحزن، هو للراحة.
مرات مو لازم نحچي، بس نسمع. وهوَ يتكفل بالباقي.

غيث (سكت، باوعلها):
رحمة...
أنة ما أعرف شلون أوصف...
بس كلشي تغيّر بيه من دخلتي لهالبيت.

غَيث
رَحمة اريد اطلب منج طَلب صعب هـواي بالنسبة الج
بس انة راح اكون اسعَد انسان بالدنيا لو قبلتي بي
ولو قبلتي بي صدكيني راح اكون غير انسان
يتبععععع......

________________

فَرس

راح امير يأجرلنـا تكسي
وعلي ويا

كلتلها روحي وياهم ميعرفون المنطقة خاف

ايلول
حبيبتي حتى جدج العاشر يعرفوا هُمة رب الي اجونـا وين ما احنة واندلونا ما يندلون بيتج؟
ولج صدك ذولة بيت جَبر مينگدرلهُم

فَرس
شنو انطاج امير ؟

ايلول
فلوس لتحضيرات باجُر
شفتي سارة الحَقيرة شمسوية!!!!

فَرس
انتِ مقتنعة انُ اني راح اقبل مثلاً ؟

ايلول
انتِ مخبلة صح ؟؟؟
تدرين حُسام لو درررة بيج شيسويلج لو متدرين ؟؟؟
والله العظَيم اخوج يكتلج تعرفين شنو يكتلج
ياريتة حُب عادي
لج سـارة اذا دزتلة الرسائل والتصخيم الي انتِ مصخمتة
وشلون مراهنة على استاذ امير
وربي ينلعب بيج طوبة
فَرس انتِ غلطتي ولازززززم تتحملين مسؤولية الغَلطة الي صارت
وتردين الصراحة؟
شنو ذنبة استاذ امير يتعاقب هيج
وتتشوه سمعتة يم الكل !
عاد اذا خطبتوا حَتى لو طلعت اشياء محد راح يصدك
من يشوفكم مخطوبين
لان اكيد هوَ مو مخبل يزوج وحدة ضاحكة عليّ

فَرس
يعني انتِ كُل وعقلج تردين ادمر حياتي ايلول؟؟

ايلول
ماكوشي يدمر فَرس
وبعدين انتِ شلون جاي تباوعين لحياتج؟
اني ماجاي اباوع غير لهسة
اني حكعد ادعي بَسسسس ماتسوي شي هل ليلة ولا باجر
اريد بس تعقدون وينشر الصور استاذ امير نَفس ماكال علي
وبعد شسوي خل سوي حَتى لو تدزلة شي سارة
ف امير يكولة مُجرد غيرة بنات لا اكثر
و احنة هم مناخذ ٣ ايام ونرجع

فَرس
ايلول كل شي بعيني اسود كل شي والله
خايفة شلون حُسام راح يصدك
حسبالج من راح يربط جيتي وجية امير ومدري شنـو راح يحسها لـ الله وهيج صدفة ويسكت؟

ايلول
ترة بنهاية حُسام تزوج على حُب مو لهل درجة مُعقد هوَ لتنسين
وبما انُ امير راح يخطبج من اول شهرين فَ اكيد مراح يمانع
وبعدين بعَد شي صديق امير دارسين دكتوراه سوة يعرف حُسام علي كلي فَ هوَ الولد وحُسام وامير وعلي متفقين وعازمين بعُض اليوم بمطعم هَسة بس يكملون يرحـوون وراح يحجون وياه
وعلي جان واثق من نفسة وهوَ يحجي اصلاً
كال ماكو مجال للرفُض
السالفة تحتمت علينة فَرس حبابة لا تعارضين ولا تحجين شي
حَتى لو كانت جذبة امشي بيها وبعدين لو ما كدر امير يتقبل الي صار وانتِ حسيتي نفسج مضايقة ف الغي كل شي وهاهيّ

كل هذا احنة نحجي و واكفين وذولا احسهُم يختارون السايق اختيار اخر شي كالوا يـلا، تقدمت واني كُلي دموع بسبب الحقيقة المُرة الي صارحتني بيها ايلول

رفعت عيوني وباوعتلة بحقد
بعَد نظرة عني بسرعة

رحنـة للبيت و ايلول كلتلي حاولي تسوين كُل شي طبيعي وتبطلين دموع بس اني جنت مو گادرة

ايلول
ترة احسبي حساب يجوز بـ ١٢ يجيج حُسام ويحاجيج مو ترتبكين وتبجين

فَرس
ايلول والله ماكدر والله

ايلول من شافت حالتي حيَل تعبانة، خابرت ابوهـا وكالتلة راح ابات اليوم يم فَرس

اهل ايلول كُل شي ما مفتهمين يمتة اجت وليش تريد يمي
كلتلهم بعدين اكول الكُم
وهمة من نوع المُتفهمين مـا ضلوا يلحون
مع انُ ابوها مُنفتح بس مو من نوع الي يقبل تبات يمي
بس بِما انُ ايلول ضلت تلح حيل وتكول الة انُ الموضوع جِدي فَ قِبل وهوَ هم يعرُف حُسام ويحبة فَ مارُفضلة طلب

اول ماطبيت ريڤان تلگتني شكو ومدري شنـو خليت ايلول تتعامل ويـاهة

صافنة ومحتارة شَسوي وشلون السالفة صَارت بسرعة
واحس حَتى شغف بالحياة بعَد ماعندي
وما اتمنى غير انُ ارجع لاول ايام دوام
وماشوف سـارة اساسًا ..

شلون راح اكدر اكذب كدام الكُل
وشلون ادعي الحُب وي انسان حتى بنظرة مايريد يباوعلي ؟

طول هل ٣ ساعات كاعدة واحس نَفسي ميتة
بس ايلول كاعدة وتهون علية وتطلب بموبايلها

ايلول
امير انطاني ٣ ملايين كلي خلي تجهز كُل شي لباجُر وتشتري ايّ شي بنفسها، ترة لطيف رُغم كُل شي
هسة اريدج تعوفين البجي وتختارين وياي الكوشة والبدلة وهووواي اشيـاء، حجيت وي البنية الي ويانة بالسكن هيَ هم من جنوب بس مو من نفس المُحافظة وعلمتني عَ تقاليد يعني نفس التقاليد تقريبًا
هم كون توزيعة للزلم ومدري شنـو يووووه فَرس كاااافي بجي احسس ورانا كومة اشياءءء اختيار الصالون والبدلة والكيكة وكل شي كل شي

فَرس بدموع
انتِ من كُل وعقلج ايلول اني لحد هسة ما مصدكة بالفكرة نوب ترديني اعيشها

شكد حاولت وياي بَس اني جنت مطنگرة
وجانت هيَ تختار بدون ماتكِلي حَتى

صارت الساعة بـ ١٢ سمعت صوت حُسام
كلبي كام يدگ حَيل وخفِت

ايلول
لا ترتبكين ولاشي كوليلة نَفس ما اتفقنا ونَفس ما حجينا

فَرس
والله خايفة ايلول

ايلول
لا تخافيـن ولاشي شو انطيني حجابي اني نسيت شو
كامت بسرعة تركض تدور حجابها صارت عندها لحظة ادراك انُ هيَ تحجبت
ضحكت عليها و على ركضتها وكمت دامسح دموعي زيـن

شوية وصاحلي حُسام
طلعنا اني و ايلول

حُسام
انتِ. أبليسة جياتج مو لله طبعًا

ايلول
ها حُسام اخوية الجبير شنو جزعت مني اطلع اذا تريد

حُسام
لا صدُك جذب بعيوني اخليج والله
فَرس تعاي خل نسولف شوية

كعدت يمة عَ التخُم و ايلول مقابيلنا

حُسام
من فركة الايد اكدر اعرُف انُ انتِ تعرفين بالموضوع؟

ايلول
ايَ نعرف بالموضوع
وأستاذ امير حجة وياها سابقًا بوجودي وبصورة حَيل مُحترمة وراد يعرف جوابها حَتى يتخذ هل خطوة، وفَرس سكتت ومن سكتت هوَ كال اخذت الجواب وبالعطلة هاي يقصد ع هذي اجي واتقدم الج لان اريد كل شي رَسمي - هذا الحجي جان مُتفق عليّ من أمير لعلي ومن علي لايلول ومن ايلول لفَرس -

فَرس
نفس ماكالت ايلول
ما استرجيت ارفع راسي واشوف نظراتة، احس ميتة وخايفة بنفس الوقت وماعرُف شنو ارد حَتى

حُسام
صراحتًا الولد حيل حيل حيل مُحترم، وهوَ من عَشيرة معروفة، اني دائمًا اشوف الهم فيديوهات بالفَيس وناس معروفين و وجهاء ومعدلين، والولد مُثقف وما عايبة شَي وماطولة ما طولها واجة من الباب فَ كبر بعيني اكثر وهوَ اختة ميتة ومايريد شي جبير وبنفس الوقت كال ماريد انتظر اكثر اريد اخطي خطوة رسمية وبعَد السنة يسوي كل شي
فَ يريدها باجُر، بَس قبل كل شي اني اريد اسمع الموافقة منج

من حجة هيـج احس ارتاحيت
ماتوقعت يحجي بهل أريحية بَس مبين امير قانعة وجايلة من اسلوبة الحِلو، توترت حَيل بساعتها
جنت اتمنى هاي اللحظة وشكد حلمت بيها
بَس بهاي الطريقة ؟ ابد لا ..

كتلة واني عيوني مليانة دموع وعلى وَشك تنزِل
فَرس
اذا انتَ موافق فَ اني موافقة

ريڤان
اذا استاذ جامعي ليش لا والله مابيها شي اقبلي وين لاكيتها

حُسام
هاي حياتج مو حياتنا احنة فَ انتِ الي تقبلين او ترفضين
فَ اذا حسيتي نفسج مستعدة كولي
واذا حسيتي لا ف هم كولي
واني ويـاج ب ايّ قرار

هزيت راسي بـ الـ ايّ ومشيت بسرعة لغرفتي
سمعت ايلول تكول خجلت وتضحگ

ماعاولت اوصل للغُرفة
واشمر راسي على الفراش وابجي من كُل وكلبي
شنـو اسوي ياربي
ما بفَد يوم تخيلتها مُمكِن تكون بهطريقة

اجتِ ايلول بسرعة وسدت الباب

ايلول
فَرس والنبي مرت اخوج الحية شكت تدرين اذا شافوج يبجون راح تألف حجي من كيفها وتطلعين مسوية ويـا اشياء و اشياء
حبابة فَرس كافي لتبجين

حجيت وياهة واني كوة اكتِم انفاسي وشهگاتي

فَرس
ايلول ماكدر والله ماكدر

ايلول
ياربي فَرس ونبي اذا شافوج بهل حالة شيخلصنا منهم
كل شي ينكلب علينا ويصير الما متوقعي
حبابة فَرس استري علينا بس هل ليلة
لج المفروض هَسة انتِ تضحكين كدامهم مو تبجين !!!
زين ترحين وياية للبيت ؟؟

هزيت ب راسي ايّ
لان اذا ضليت هنا اعرف انُ راح يشكون نَفس ماكالت ايلول

طلعت ايلول حَتى تحاجي حُسام واسمعها تكُلة عدنة هواي شغلات نريد نسويها ماعارض هوَ
كلتلي كومي بسرعة يلا
گوة مسحت دموعي وطلعت واحاول ماخليهُم يشوفوني

قَبل لا اطلع صاحني حُسام

حُسام
هذني حبيبتي خليهن يمِج اشتري بيهن كل شي تردي
ايلول المشية راح نسويها ب بيتكم اني باجر اشوف ابوج واحجي ويا
وهم ننصب جادر لان حسب ما كالي راح يجون ناس هواي
لا تهتمون للتوزعية وهل امور هذني علية
بس ايّ شي يخصجن انتن سووا وهاي ريڤان هم يمكم
واي شي تحتاجوا او نقص يصيـر عندجن اني هنا موجود

ايلول
هايهية واني احاجي بابا حَتى هم باجر ما يروح للعيادة

حُسام
ولو راح نزحمكم احنة

ايلول
صدُك جذب والله عيب تكول هيج
فَرس اختي وانتَ اخوية

ريڤان
فَرس شو وضعج معاجبني

فَرس
ااا لا والله ماعندي شي بس تعبانة من الطريق ودي بس انام بـس ايلول خابصتني خبص

ايلول
طبعًا كومة تحضيرات ورانة يلا تصبحون ع خير احنة رايحين

رحنة لبيت ايلول اهلهة جانوا موجودين سلمت عليهم وصعدت لغرفة ايلول وهيَ ضلت جوة

اتمنى يطلع هذا كُلة حلم
واتمنى مايصير ابَد

نظرات امير وعصبيتة
مُقابل
حنيتة و مشاعرة قَبل
تموتني وتخوفني
وتخليني ارفض كل شي

اجتِ ايلول وحاولت تهدئي وكعدت تحجي وياي بخطورة الموضوع
حاولت اتقبل الي راح يصير
بس جان كلبي نـار مشتعل
كلتلي ايلول نامي لان باجُر وراج تعب هواي
وخلي كُل شي علية
نمت ودمعتي بـ وسَط عيني
بعدهي مادريت بالدنيـا طَشت لو رَشت

فجأة كعدت عَ ضوة الشَمِس باوعت كدامي الساعة بـ ١١
عزا هلكد نايمة اني ؟؟؟؟

زين شلون اجهِز نفسي ويمتى ؟!!
المشية كال حُسام الساعة بـ ٥

سمعت اصوات مُزعجة من برا، باوعت من الشباك لكيت نـاس جاي تنظف بـ طارما بيَت ايلول ويحطون كراسي ومدري شنـو

غرفة ايلول مليانة علاگات بيهن اشكال و الوان ملابس و اشياء كومة كومة

نزلت و اول ما نزلت انصدمت
باوعت من الدرج لحد الصالة هذا كُلة مزيّن
ومسوين جوة شلون الكوشَة وكُل شي

اول مانزلت شفت ام ايلول باوعتلي وابتسمت

ام ايلول
يمة صلاوات على النبي وبنيتنة صارت عروسة يابعد روحي تعاي تعاي خل ابوسج

ضحكت وهيَ تحاجيني بكُل حنان حضنتني حَيل وكعدت تباركلي

سالتها وين ايلول كالتلي راحت تجيب فِستانج وتجي

ام ايلول
يلة شـوية ويجنج بنات روحي تريكي ماما

خالة لعد ليش مكعدتني ايلول

ام ايلول
كعدت من ٧ خَطية كالت خليها ترتاح لانها تعبانة هسة هيَ ع جية روحي تريكي هَسة حبيبتي خليت العاملة تحضرلج ريوگ يلة حبيبتي روحي

رحت اكلت وقررت اعوف كُل شي ورة الله شيصير خل يصيـر
ماريد ابجي اليوم ابد وحتى مابية حيل ابجي
احَس نفسي استنزفت كُل طاقتي

شويـة واجتِ ايلول
تعبانة وشعرها نصة طالع من الحجاب وملعوب بيها جولا وجايلت بنات وياها كومة

ايلول
فررررسي كومي بَسرعة

جنت بالمطبخ اشرب جاي عفتة ورحتلها

ايلول
يلا غمضي عيونج

فَرس
شكو

ايلول
دغمضي عيونج وشوفي

غمضت عيوني واني مبتسمة
كلتلي افتحي
فتحت عيوني شفِت جايبة فُستان ناصع البياض
يصيـر قَصير لحد الافخاذ ومن الصَدر مفتوح وبدون اكمام، الفُستان جان مو طبيعي جمَالة وكإنما فُستان اميرات

ام ايلول هلهلت وكلتلي يجنن وهوَ فعلاً جان يجنن وعلى مقاسي فَت
تقربت داحضن ايلول همستلي

ايلول
انتِ مطنگرة البارحة متت يلا لكيت هذا الفُستان وحسيتة ذوقج

هوَ فعلاً ذوقي باوعت لايلول واني عيوني كُلي دموع

فَرس
اني كلت اليوم مراح ابجي بس اذا تُبقين هيج تعامليني راح ابجي هههههه

ضحكنـا اني وياها وكللي قيسي
قستة وجان خيالي علية
اني جسمي رَشيق
جسمي بوقتها ٥٤ و طولي ١٦٤
فَ جنت اعتبر رشيقة، ويّ هيج فُستان
جنت طالعة حلوة بشكل
طول عمري ما البس ابيض
واحس يطعني لان اني حنطية
بَس من لبستة جان لايكلي بشكِل
خصوصًا يفصل الخُصر
واني صاحبة خُصر حلو

الكُل مدحني وكلي حلو
بوقتها ريڤان هم اجت
ايلول جانت حَريصة عَ انُ توخر السترس والتوتر مني
موبايلي مادري بي وين اساسًا
فَ مجنت منتبهة الة

ايلول جايبة بنـات من صالون
وبدينة كُل شي نسوي
سون الية كُل شي من العناية
وكالن انُ نخلي اخر شي المكياج والتسريحة
ما ياخذن ويانة هـواي

الساعـة بـ ٣ صارت والنسوان يجن قَبل الـ ٥ حَسب ماكالت ايلول علي كايل الها .

بدن يحطلي مكياج وكلت الهن انُ كُل شي اريدة ناعم، مع انُ اني بطبيعتي احب المكياج الاوفر بالاعراس والمُناسبات وبطبيعتي احط ميكب حَتى بالايام الدوام العادية بَس كلت احترامًا الهم ولان بتهُم ميتة ماريد ابالغ بشي حَتى موسيقى وهلاهل كتلهُم لسـون شّي

خلصن مكياجي وجـان يجنن وبسيطَ وبرز ملامح وجهي بَطريقة حلوة
اما شعري فَ كالن الي خلي مفتوح احلى الِج بس سونة ويڤي شوية مِن جوة، شعري يوصل لظهري ف هيج تسريحة جانت حلوة عليّ
ورفعن شعري مِن كدام كم خُصلة فـ شدت ملامحي بَطريقة حلوة
وحطلي طَرحة قصيرة اقصر من شعري وتصير من ورة انطت فخامة لان فُستاني جان بسيط

واكفة كدام المراية، وفستانها نازل برقة مثل الاميرة. شعرها مرتب، وملامحها ناعمة، و وجها مُهيئ للتأمُل لايّ شخُص متوتر ومحتاج الهدوء . طالعة حلوة... يمكن أحلى مرة شافت بيها روحها.
بس قلبها؟
مو مثل شكلها.
تحس كأنها لبست الحلو كقناع، تمثل، تضحك، بس من جوة تبچي.
ووتمنى لو مـا صارت هل لحظات بس بصورة اكثر طمأنينة مِن هَسة ..
تباوع لنفسها بالمراية وكإنما دتشوف شخَصين
الشخص الاول عَروس
والثانية فَرس وهيَ تكول الها
هذا مو مكانج ليش رايحة بي ..
صارت تهمس بينها وبين نَفسها
وتحاول تكتم الدمعة الي صارت بعيونها
صح اني حلوة اليوم بس مو سعَيدة
صح اني ماشية بس ما مقتنعة ..
وفجأة قررن عيونها ينهارن

ايلول
عَزة حبابة فَرس لا لا احنة شوصيناج

حاولت اضحك وامسح دموعي بس مجان هل شي بيدي
صوت سيـارات بـرة
باوعنة من جامة ايلول المُطلة عَ البرة
سيارتين اسود اجن
ونزلت من عندها نسـوان كلهن لابسات عبايات رآس
دگن الباب وام ايلول فتحتالهنيا

ايلول
فَرس روحي انتِ حبابة لا تبجين لازم انزل جوة حَتى استقبلهم وي ريڤان وامي حبابة كافي امسحي دموعج واهدي

هزيتلها راسي بـ ايّ
صرت احاول اخذ نفس واكول يارب عيني
يارب لا تخلي دموعي تخوني ابَد ..

مسحت دموعي وهديت نَفسي والبنية حاولت تصححلي الوضع

شوية وصعدتلي ايلول وهيَ تُضحك

ايلول
يمة عززززة عزززة عزززة يمة متتت من الخَجل

ماجنت انكُر انُ جنة اني و ايلول متحمسين حيل نتعرف ع اهلهم ونشوفهم شلونهم

ايلول
لج توقعتتتتت غيرررر!!!

فَرس
دحجي شنـووو !!

ايلول
لج انزلي بسرعة قدمي الگهوة وشوفي بنفسج

يمة كلي توتر ودي ابطُل كُل شي
كُل ساع اتقدم خطوة وارجع
احِس نّفسيي خايفة بكُل مابية
بعـدين ايلول سحلتني گوة

اول مانزل هنّ كدامي كاعدات بالـ صالة

جسمي صار يرجف وكإنهُ داشوف امير كدامي

اجت عيني عَ وحدة
مرة جبيرة كاعدة بالنُص لابسة شيلة سودة وعيونها ذهب نَفس عيون امير بالضبُط وبياضها ما ينوصف وجمالها شَي ثاني

شجعت روحي بالگوة وسلمت عليها وهيَ تصلي على مُحمد
سلمت عليهن وحدة وحدة واني على شوية و اوكع
ماعاولت اكمل وافلت رأسًا للمطبخ

طبيت واني ميتة من الخجل
طبت ايلول ورايّ وهيّ ميتة من الضحكك

ايلول
ل لج تمشين كإنما وحدة بيها كُساح يمة راح انهااااارررر

فَرس
الله ياخذج ايلول الله ياخذج يارب تصيرين بموقفي لج لج حموتتتت ونبي يمة جسمي يرجف

كعدت عَ الطبلة واني مثل المخروعة مدري شبية
نوب اني و ايلول خربنا ضحك عَ روحنا

ايلول
لج بسرعة صُبي الگهوة وقدمي بسرعة
عَزا ولا توقعت هيج شو توقعت يكونن ما مرتبات

فَرس
عززززة شفتي هاي المرة الجبيرة؟؟؟
اعتقد بيبية امير لج تجنننن تجنننن

ايلول
لج اييي هاي جبُر مات عليها واخذها
خلف الله عليهم حسنوا الانتاج

فَرس
حَتى البنات يجنن شفتِ هاي البنية الي عيونها عَسلية شكد حلوة

ايلول
يخبلن كلهن ما شاء الله
نوب جايات وكُل وحدة لابسة طننننن ذهب
من يمي اختنگت
خالة والله ندري بيكم عدكم والله
صرت اشوف ذهبهن اكثر مِمّا اشوف رداينهن

ضحگت وهيَ تحجي هيج صَبيت الگوة وطلعت اقدمهـا الهم
هاي المَرة كعدتني بصفهـا

صالحة
والله عمي اموري اخذ نفس المواصفات الي يريدها
احنة ما شاء الله بنياتنة بيض وعيونهن كلهن زرگ وعسليات
عدنة بنيتنة روآن فلقة من الگُمر ما شاء الله

ام ايلول
ياعيني ما شاء الله الله يستر عليها

صالحة
شايفات هاي ملوكة نسخة جبيرة منها جنة نكلة تاخذها جان يكعد وياي ويكلي يُمة، انة يصيحولي يُمة بالبيت
يگلي يُمة انة اريد بنية سمارها فاتح، وتكون نفس الغزالة برشاقتها وهاي لگاهة نفس الي يريدها وازيد بعَد ماشاء الله شنو هل جمال

كالتها وهيَ تمسد عَ شعري
ابتسمت الها واستغربت منية هاي النفس فلقة القمُر الي رادوها الة

الباقيات مبينات حبابات البنات بَس النسوان الي وياهة الثنين مادري شبيهن مجانن فرحانات كُلش
اما بيبيتة فَ جانت دُِرة مال الله وتفاعلت وي ام ايلول وتسولف وتضحك
والحلو بالموضوع انُ اكثر شخُص ارتاحتلة ايلول

وايلول تحجي وهيَ تحجي وياهة وثنينهن ارتاحن لبعُض
شويـة واجتِ المشية وصوت الزلم صـار عالي
الاستقبال انترس
والـ طارمة وبرة ناصبين همين

نشوف بالكاميـرات سيارة ورة سيـارة
وكلهن سيارات عاليات وفخمات
الشارع انسد كُلة
والعگل ملت الشارع
بحيث ع كولة ايلول متباوع وجه تشوف عگُل وبَس

صالحة
والله يا يُمة ودي نسويلج احلى حَفلة بس الوضعية انتِ تعرفيها وان شاء الله نعوضج بالعرس ونسويلجياه احلى عرس ان شاء الله
واريد من الباري يتممها عليكم على خيَر

تشكرت من عندها خالة ام ايلول وكالت الها ان شاء الله

كاعدة ام ايلول وتحجي عَ حالات بالعيادة تجيها وحمل ومدري شنـو حَبيت ابادر واروح من طَرف البنات

كتلهن كومن وياي حَتى تنزعن وتاخذن راحتجن شوية محد هنانة

صالحة
لايمة خاف ولد شي يطُب

ايلول
خالة اني لا عندي اخو ولا عندي احد وبابا ما يطُب لا تخافين

صالحة
ها اذا هجي جا يمة كومن محد يمجن

ايلول
اذا تحبون تصعدون فوگ محَد اكو

گامن ويانة مع انُ جانن مستحيات

ايلول
ايّ عرفنا عليجن انتن اخوات منو

ضحكت عَ ايلول وهيَ كالت هيج

سيوف
ايّ حقج تعرفين كُل شي طبعًا

ايلول
اااااا شنووووو

سيوف
ترة احنة نعرفج يعني مو غريبة علينة
مَرة علاوي نايم جوة وعايف موبايلة مفتوح وشفناه يتراسل ويـاج

سَبب
بس صراحة علي ماكوووو منة ومن حنيتة ورجولتة ف صدك انتِ محظوظة بي والله شكد احجي عليّ فَ قليل

ايلول خجلت من كالت هيج وماعرفت شنـو ترد

فَرس
اي امانتًا علي ماكو مثلة هوَ حيل حباب وراقي

نزعن عباياتهم، جانن لابسات فساتين اسود طول ورتبـن شعرهن،
سيوف جانت جَميلة حيل وبريئة بنفس الوقت
اما سَبب فَ جانت ملامحها حيل جنوبية وحلوة
شوية ونزلت واجت بنية

ايلول كالت هـاي مصورة
كتلها صدك تحجين
كلتلي انجبي
سكتت عنها

شوية وگالوا يـلا راح يعقِد الشيخ
يُمة اني كلبي صـار يغلي وخفِت
مشاعر هل لحظة مشاعر متضاربة
ومشاعر مُستحيل تتفسر

صـرت ورة الباب الي بين الاستقبال و الغرفة وصرت اسمع صَوت الشيخ وهوَ يحجي

وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا، وَجَعَلَ بَيْنَكُم مَّوَدَّةً وَرَحْمَةً، إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ."

بسم الله الرحمن الرحيم
الحمد لله الذي بنعمته تتمّ الصالحات، والصلاة والسلام على خير خلقه محمد وآله الطيبين الطاهرين.

إخواني وأخواتي، إحنا مجتمعين اليوم حتى نبارك رباط مقدّس، وعهد شريف، عقد ما بين شاب محترم وفتاة طاهرة، أراد الله أن يجمع بين قلوبهم بالمودة والرحمة، وتكون هذه اللحظة بداية حياة مباركة، يسودها الفهم والوفاء، وتصير لبنة لأسرة صالحة، ترفرف عليها بركات السماء.

الزواج سنة إلهية، وميثاق غليظ، جعله الله سكناً للنفس، وأماناً للروح، ومصدر طمأنينة وسكينة.

وهسه نبتدي بعقد الزواج المبارك، على الطريقة الشرعية الجعفرية، بحضوركم الكريم.

بنيّتي، هل تقبلين  ( حُسام ابن  أحمَد) أن يكون وكيلكِ في إجراء عقد الزواج على أمير ابن حسين ، زواجاً دائماً، على مهرٍ مقدارهُ ٥٠ مليون دينار عِراقي..
أما المقدم، فقد أُعطيَ عن طيب نفس.
وأما المؤجل...
فقد اختار العريس أن يكون مؤجل مهره شيئاً لا يُدفع إلا إذا توقّف نبضه،
وأن يُكتب في ذمّته لا كدين مالي، بل كعهد أخير، لا يُؤدّى إلا عند الفقد.
فقال:
"مؤجّلي هو دمي... وإن فُرض يومًز أن نفترق، فذلك لا يكون إلا حين أفارق الحياة."

من گال هيج سمعت ام ايلول كالت ياعيني
عيوني انملن دموع واحس كلبي گام يخفق بكُل قوتة
شلت راسي باوعت ايلول مدمعة
ماكدرت اكتم دموعي ابد ساعتها
مجان مُجرد حجي
جان بي كلام مُبطن، وكلام صعُب على كلبي يصدِگ بي

كُلها كام تكول جاوبي واني محتـارة بدموعي الي تنزل
جاوبت نعم بصوت خافِت

صالحة
يمة لا تبجين مايصلح يبعد كلبي

الشيخ
وبهذا يا أحبّة، لا يبقى للمهر قيمة مادية فقط، بل يتحوّل إلى وعد أبدي... أن لا طلاق، لا خصام، لا فراق، بل محبة حتى آخر نفس

بـدة الشيخ يكمل المراسيم وبكُل نعم تطلع من واحد بينة كلبي يرجِف وعيوني لحظة ما وگفن

فززني من خيالي صوت الشيخ وهوَ يگول :
وقد تمّ القبول، فالحمد لله الذي بنعمته تتمّ الصالحات.

وبهالشكل، نعلن أمامكم جميعًا، أن العقد الشرعي تمّ بين الطرفين، برضاهم وبشهادة الحضور، على كتاب الله وسنة نبيّه، نسأل الله أن يبارك لهما، ويجمع بينهما بخير، ويجعل حياتهم سعادة وذرّيتهم صالحة، ويجعل من بيتهم بيت إيمان ورحمة ومحبّة.
اللهم بارك لهما وبارك عليهما واجمع بينهما في خير، واجعل هذه الخطوة فاتحة خير وسلام وطمأنينة

صالحة
هلهلن يُمة هلهلن
اخوجن يستاهل تفرحلة

كامن يهلهلن كُلهن واني احس كلبي يريد يطلع من مكانة تقربت من ايلول وصرت احاجيها بدموع

فَرس
شفتي شنو حاط مؤخر ؟

ايلول
دموعي شلالات صـارن

كامن يباركلي كُلهن
شوية وگالت مرت الشيخ انُ امير والشيـخ يردون يطبون
هيَ من كالت هيج اني احس جمدت بمكاني

كالتلي مرت الشيخ البسي عباية فشلة من الشيخ فستانج مكشوف حيل
استحيت اكول الها ماعدنة عباية بَس البنات تداركن الوضع وانطوني عبايتهم

طَب من جهة المطبخ ابو ايلول وحُسام و امير و رجال ابو امير مبين ورجال ثاني و الشيـخ

صالحة
يلا يمة كُل الموجودين اهلج صاروا سلمي عليهُم
سلمت عليهُم واني ما شايلة عيوني من الگاع من المستحة

جبُر
اهلاً بيج بوية ونتمنالج زواج الدهر، امير ماكو أحن منة وماكو احسَن منة رجال والنعم منة بس لو فد يوم اذاج لو ضوجج فَ تلكيني انة اول واحد بوجهة واكِف وان شاء الله انتِ صرتي وحدة من بناتنا

تشكرت من عندة ام ايلول واني ماخذة وضع الصامِت حَتى شكر ماتشكرت من عندة طلعـوا وطبيَت رأسًا
احس روحي مختنگة ومَيتة من الفَشلة

رحت بالمطبخ وهيَ تكلي

ايلول
واخيرًا شفت جبُر واخيرًا يُمة ولجج يخوففف شطولة
عيونة عبالك خرزةة تخزر خزررر

فَرس
لج كلشي ماشفت حَتى مارفعت راسي عَ كد ما جنت متوترة

جاي نحجي اجتِ سيوف

سيوف
فَرس يلا تعاي حَتى تلبسون الخواتم

باوعت لايلول واني ميتـة وشاردة من هاي اللحظة
بهل اثناء اجتِ ام ايلول

ام ايلول
يلا ماما تعاي حَتى تلبسون الحلقات
تعال ماما تفضل طُب لتضل واكف 

كمت من مكاني واني اشوفـة لابس قاط اسود وقمَيصة ابيض، ولازِم بوكي ورد احمَر
راح گعد وهوَ منتظر يشوفني ويدور بعيونة علية

طَلعت من المطبخ گوة واحس انفاسي تتسابق واحسني اريد اوكع بمكاني من الدوخة الي صابتني

عيونـة تجولت
من رجلية لخُصري لشعري لوجهي

باوعلي وإبتسم وگام وگف

كُل خطوة اخذها تِجاهة احَسهة ميت خطوة
التوتر والخوف جـان واضح علية
تَقدم كم خطوة حَتى تتلاقى خطواتنا
مَد اديّ حتى احُط ادية بوسطهن
قدمت الة اديّة واني اتنفس بصعوبة
باسني مِن راسي وگال

امير
أهلاً بفرسِ الأميرِ إذا تجلّتْ
كالشمسِ في إيوانِها تتجلّدُ
أهلاً بمنْ سُقيتْ بروحي كلَّها
فكأنّها من مقلتي تتولّدُ
أهلاً إذا نادى الهوى، قالت: أنا
أهلاً، وإن عَصفَ الزمانُ، تُصمِدُ
أهلاً، وما "أهلاً" تُفي بوصالها
هي في دمي، إن غبتُ، لا تتبدّدُ
يا منْ لها المؤجّلُ المُختومُ بي
ديني... و"مهري" نبضُ قلبيَ الأوحدُ
إنّي وَهَبتُكِ عزّ مُلكي كلّه
وأنا الأميرُ... وأنتِ فيهِ الفرّس ..

ابتسمت بوجهة ونزلت دمعتي مسحهة بـ ايدة وابتسم بوجهي دنگ حَتى ياخُذ الورد قدمة الي و ضل حاضِن أدية وصار يحجي بصوت مسموع وثابت

امير
إليكِ وردي، وما الوردُ إلا عذرُ قلبي لينحني.
إليكِ قلبي، وما القلبُ إلا قُبلةُ الضوءِ حين يرى عينيكِ.
يا فرسَ قلبي، يا وعدَ روحي، يا تاجَ هذا المجد، ويا نغمةَ السيف حين يبتسم.
أهلاً بمنْ أهواها قلبي قبل أن تراها عيناي،
أهلاً بمنْ جاءتْ لتُتمّ ملكي، لا لتُزيّنه، فهيَ الملكُ كلّه.
أهلاً،
وكلّ "أهلاً" أقولها، تنحني لها النجوم، وتبتسم لها الكواكب.
أهلاً بكِ نُصرتي، وعزّي، وصهيلُ فجرٍ لا يغيب.
قد نذرتُ لكِ دمَ المؤجّل، لا مالَ ولا ذهب، بل وعدٌ لا يُكتب إلا إذا سُكِبَ من وريدي.
فخذي الورد... خذي عهدي... وكوني كما أنتِ:
فرسُ الأمير، وملكةُ النبض، وبهجةُ المجدِ العتيد.

ام ايلول
والله هسة صار كُلي يقين انُ فَرس مختارة الخيار الصح
الله يخليكم ماما هههههه

يباوعلي ويتأملني بكُل حُب، و ايدة ما فارقت ايدي ابد
بهاي اللحظة بالضُبط عرفت امير شكد يحبني
وعرفُت انُ هوَ سامحني عَ كُل شي

لبسني الحَلقة مالتي ولبستة حلقتة
وبدت المـصورة تاخذلنة صُور
بكُل صورة بكُل وضعية مُعينة
احس كلبي يريد يطلع من مكانة
واحس روحي ما مصدگة الي صاير الها

امير
ليش مدمعة؟

فَرس
لان مامصدگة الجاي يصير

هز راسة وگلي
لا صدگي

كملنـا وگعدنة شاور بيبيتة مدري شنـو

صالحة
اي يُمة
يُمة ام ايلول خلي الولد يكعد وي البنية براحتهم

ايلول
اي اي خالة خل يصعدون بغرفتي

باوعت لايلول وكلت بكلبي

فَرس
صديقك سَند
شكول عليج ايلول

صعَدت گِدامة وهوَ صعد گدامي
متوترة
بس بنفس الوقت فرحانة
واحس فرحتي اكتملت من امير
سوة كُل هشغلات
المؤخر والشعر
كُلهن علامات مُبادرة
وعلامات صلِح

فتت گدامة للغرفة وهوَ طب وراي

مادري ليـش
بس جان كُل احساسي يكول
احضني
وعبري عن الي بداخلج
ماعرُف منين اجتني الجُرأة وشلون
بس جنت اريد اعبر الـة عَن فرحتي وامتناني تِجاهة

وبشكل غير ارادي وهوَ ديسد الباب حضنتة من ورة بكُل هدوء ....
يتبعععع
باجُر ريست لا تنسون، بس مُمكِن ينزل الكُم مُفاجئ لو شفت التفاعل 🤍 البارت القادم حيكون طويل وحينذكر بي اغلب الابطال ان شاء الله هل يومين طولت بَفرس حَ

حتى بالبارت الجاي نعوف الموصل ونرجع لمدينتنا 🤍