رواية بيت جبر الفصل الثامن عشر 18 - بقلم هُدىٰ آذار

جان مايمي نَت مكملتة من ٩:٣٠ من شفتة تأخر فعلت عَ الخط لا تكولون كلبت علينا هُدى 😏

مَساء الخير
طبعًا خلوا ب بالكُم راح احجي وياكُم بنبرة زعل
الي يحِب رأسًا يروح عَ البارت براحتك
والي يحِب يُقرة ف اني مُمتنة ..
بِغض النظر عني، وبِغض النظر عن انُ اني كاتِبة
بالمستوى العام احنة بـ برنامج الواتباد تعرفون كُلش زين هوَ برنامج لا بي فلوس ولا بي مُقابل هوَ مُجرّد تطبيق تكتِب بدون مُقابِل، يجوز الفائِدة الوحيدة مِن عندة(تفريغ الهِواية) لا اكثر !
فَ من يجي هل كاتِب ويكتِب، شنو الي يحفِزة غير تفاعلكُم؟
واعتقد هل شي ما ينعطى بـ فلوس، يعني هوَ لا دعِم تيك توك وتشحن ولاشي هوَ مُجرّد دعِم بَسيط، تنطـون تصويت وتعلقون قَدر الإمكان ولو عجبتكُم القُصة اكو ناس مُتمكنة نسوي اكثر من هيج مثلاً تصاميم ونشُر وو.. هذني الامور، هَسة احنة بغِنى عنهن ونحجي بالاشياء البَسيطة، فَ اذا انتَ ابسط حقوق للرواية، انتِبه للرواية مو للكاتِب مدتنطيها شلون تريدة ينطيك حقوقك؟ مُمكِن حَتى يقصُر وي الرواية بسبب هذا الشي
اني هَسة مداقصر وي الرواية ولحِد الان دانشرلكُم بصورة مستمرة وبدون توقف ابـد، وهاي مرتين يصيـر عذُر شسوي ؟ اكتب الكُم بيوم الريست واعوضكُم وما ابخس حقكُم، فَ والله صراحة اني خوما اكعُد الح وياكُم؟ تفاعلوا تفاعلوا حطوا تصويت حطوا تعليق، اني حَتى استحي انّي اضل الِح بموضوع، وهالشي المفروض ينعطى بدون ما ينطلُب، ابسط مِثال البارحة تكلولي وين بارت هدية، ها طبعّا انتوا تطالبون وتردون هدايا وتردون مُفاجئات، طبعًا هرسائل من اشوف مُسريلها انصدم لان هوَ اصلاً ميتفاعل بالرواية ولا شايفتة فجئة اشوفة موجود، الرواية جاي تاخُذ ارقام جبيرة خصوصًا من بعد ما كطعت كطعة طويلة هذا الشي يعتبر شي حِلو، بس المُشكِلة ١٥٪؜ اظن من الديقرون ديحاولون يتفاعلون، شنو ليش مادري ؟
صراحتًا هذا الشي زعلني، ماحبيت اعبرة بنفس الوقت ماكدرت ماحجي، اني لو الكي تفاعُل ؟ صدكوني جان شفتوني عيوني بموبايلي واكتب وراسًا انشر يجوز باليوم ٢، كتلكم عندي عُطلة ومُتفرغة تفريغ تاااام بَس لتقصرون و اني ماقصُر، بس انتوا شو مادري
مدري ضاربكُم وآير جمود على گولة علي مادري بعَد حَتى من اسئلكُم شنو رئيكُم بالسرد بالاحداث گوة تردون معَ انُ القُارئ ما شاء الله عددهم.
عَ كُلاً لطالبوني ب مُفاجئات واني مشايفة منكم اشياء تحفزنييي ع هذا الشي، وخلوا ب بالكُم جنت محسبتلكم غير حسابات و وقت عندي كومة بس ماكو واهِس 🤌🏼🙃

نكمِل..
بيت جبُر
للكاتبة : هُدىٰ آذار ...
____________________

روآن

نهائيًا ما صرت احِس بشي وجنت فايدة كُليًا الوعي
ماحسيت إلا لمـن رادوا يخيطوني

الدكتورات يحاولن يحجن وياي
وتعاطفن وياي حيَل واني احس روحي مابين وبين

شويـة وحَسيت بـ إلم الخَيط احِس متت
حَتى البجي صار صعُب علية
وحالتي تعبانة لدرجة محد يتخيلها

جسمي احسة تخدر بالوجع
وروحي صرت ما اطيقها

امنيتي الوحيدة بـذيج اللحضة
اموت واخلص نفسي من هَل عذاب

فرفحِت من البجي، وحَتى النَفس ضاق علية
يتحّسِبن الدكتورات عَ السبب واني وياهِن
( حَسبي الله ونعم الوكيل، ماستاهل الي صار
والله ما استاهلة )

من كَمِلن حَسيت روحي راحت خلاص
وماصرت احِس غير وجع بكُل مكان بجسمي

التفتت شِفت مَرة واكفة عَ جانِب وتبجي
حاولت افتح عيوني زيـن شفتها أُم مازِن
مَرة نعرفها بالقرية
حَسيت روحي لكيت احد من ريحَة اهلي
حجت ويـاي ماعاولت اكول الها

خالة ما أريد أموت هيج،
إذا صار بيّه شي، گولي لأهلي،
گولي إلهم انة متت بسبب هذولة الوحوش
امانة بركبتج خالة انقذيني
انة متت متت خالة ...

جـاي احجي وياهة وطَبت ام ضرغام
هيَ خلت وراحَت بدون ماتخليها تشوفها

أيست انُ مُمكِن تكول لاهلي
مُستحيل تسويها
تخاف من مروآن
هذا كُل شي يسوي

اجتني واني دموعي ينزلـن
ويمي دِكتورة تحطلي مُغذيات

ام ضرغام
هـا خالة حبيبتي الحمدلله ع سلامة يبعد روحي
ولج شصار بيـنة مِتنة خوف عليج

المُمرِضة
لا واضح مِتوا خوف عليها، ترة الي يمج مو جاهلين مبينين معنفيها للبنية انتوا شراح تكولون ل الله؟ متخافون من ربكُم؟
اتقوا الله تقبلون بناتكُم هيج عند بيت ازواجهن؟

ام ضرغام
انتِ اشتغلي وماعليج لا تخليني هسة اطلع للشيخ اخلي يروح يحاجي مدير المستشفى وبعد تحلمين تداومين هنانة

اجت صديقتها الي جانت عَ ردهة ذيج وصارت تعتذر من ام ضرغام وتكول الها نعتذر خالة نعتذر
خلوا وراحـوا

باوعتلي وكلتلي

ام ضرغام
حيل وبالجِفن، ماريحت كلبي بيج اريد بعَد اكسر راسج اخليج طول الليل تونين، جا عود يبردلي كلب ويناملي جِفن؟ لا والله اذا ما اشوفج ميتة ما ارتاح

غمضت عيـوني ودرت وجهي عِنها
لاول مَرة احس روحي مو قادرة على ايّ شي

ساكتة وماكدر انطق بحرُف
كُل شي جان فووك طاقتي بـ اضعاف

دم هواي نازفة جانن ينصحني البنات المُمرضات
اني انطي مجال لنفسي ارتاح وانام بس
احِس روحي ما جنت اريد
لا اريد انام ولا اريد اضل كاعدة
ولا اريد اسوي شي
بذيج اللحضة اعظم اُمنياتي الموت وبَس ..

ماكو ورة نُص سـاعة اجت ام ضرغام كالت يلا كومي حضري نفسج
اباوع اجت مُمرضة
المُمرضات وحدة تحجي وي الثانية عن ام ضرغام وشكد هيَ همجية لان رزلت اكثر من وحدة، ومن تحجي تحجي بزودها وهيَ اساسًا مُرعبة

مُمرضة
خالة ترة لازم ترتاح البنية

ام ضرغام
وانتِ تردين تعلمينة مثلاً
احنة هناك نجيبلها مضمدة وترتاح نريد نطلعهـا

التفتت الي وگالتلي

ام ضرغام
يلا شبيج صافنة بوجهي

بالبداية جانت تتعامل وياي بالناعِم من شافت انُ الكُل يباوعون النة والكُل يدرون عنف كام تبرز روحها گِدام الكُل

اريد اكوم بَس حيلي ما يعني
هيَ ضلت واكفة بالباب ولا عبالك
بدون لا تجي وتساعدني
بَس واكفة بالباب بدون متطلع
حَتى ليكول الها مروآن شَي

اجن مُمرضات ثنين يساعدني حَتى اكوم
باوعت وحدة لوجهي وكلتلي

ممرضة
يا سودة علية حسبي الله ونعم الوكيل عليهم لا سكتين ع السوا بيج وان شاء الله يطلع بيهم بحق النبي

ممرضة٢
هو هذا حظ الجميلات
ما شاءالله عليج والله تكلك ملاك كاعِد يمنة

ما انطيت ايّ ردة فعِل بس اباوعلهِن
والقهَر مستولي علية

ساعدني حَتى اكوم واني احس روحي ما اكدر
يحجن بيناتهن انُ لو مار ساعتين عَاد مو رأسًا

من ردنة نطلع اكو مرايـة عَ طريقنا
باوعت بيها لنَفسي وانصدمت !

ايّ انصدمت، انصدمت واني اباوع لوِجهي بالمراية
بياض عيوني ماعاد بياض صايـر احمر بكامِلة
وعدسة عيني اول مَرة اشوف زراگها هلگد باهِت وشاحِب
خشمي احمَر من البجَي
و وجهي ب اجملة صاير اصفر
من شفت وجهي دمعتي نزلَت

حَسيت ودي اكسر المراية
حَتى تنكسر وي روحي المكسورة
ومن بعدها اكتِل نَفسي واخلص من الجاي يصيـر

ام ضرغام
يعني شلون تضلين صافنة على وجهج حضرتج؟
يلا

المُمرضات يباوعن ومصدومات
ما يدرن هذا ارقى سلوب عِدها

طلعني و اول ماطلعت شِفتة
ماجان ودي اشوفة
جنت اتمنى هاي الثواني الي اجت عيني عليّ
تنمحي من ذاكرتي
جنت اتمنى اكو حاجِز بيني وبينة
ماجنت اريد اشـوفة
ولا اريد اشِم عُطرّة حَتى ..

كام من مكانة بـسرعة
تحمددلي المُمرضات عَ سلامة وراحن
مَد لي ايدة، هزيت راسي بـ لا بدون ماباوعلة

گوة تدنيت يم الحايط حَتى امشي وانتچي عليّ
حاوطني مِن ورا
ايد ورة ظهري و ايد لزم ايدي الثانـية

مروآن
مو وقت عناد ابد

سكتت لان فعلاً ماكدر امشي لوحدي
هوَ ساندني وبكُل لحظة اريد اوكع بـ ايدة

ام ضرغام
يمة ترة تتعاير الناس شتكول علينا حاظن مرتة
شنو ماشايف نسوان

مروآن
عمة رجاءً اسكتي ماتشوفين حالتها؟

ام ضرغام
ولك عيارة شكد فطير انتَ

مروآن
٥ خياطات عمة ليش تخليني احجي؟

ام ضرغام
نچُر بعدكلبي هههههههههه

هيَ حِجَت هيج واحس بعد ماتحمل عثرت و وي عَثرتي حسيت الخيط يريد يتحرك، لزمني حيَل وصار حاضني حَتى ما اوكع

كارهة نفسي اريد اكعُد بنص الصالة واعيططط
ابجي وبكل حرگة كلب

ما گدرت احبِس دموعي وصرت ابجي بكُل قوتي
النـاس كلها تباوع، بصالة الانتظار والكُل موجودة

صرت احاول اضم روحي من الناس بي
اضم روحي بالجرحني حَتى ما انجرح من نظرات العالم

اجـن عيوني بعيونة
حَضن وجهي بـ ايدة وحسيتة صار يبلعم
عيونة يعبرن عن قهَر جبير
و وجهة كلة متندم

شالنـي وصار وجهة مقابل وجهي
كام يمشي بـسرعة واني مستمرة ابجي

مروآن
كولي يا الله هسة نوصل وترتاحين

ماعاولت يصعدني بالسيارة
كعدني بالصدر حَتى اسهل الي
اول ما سد الباب طلعت الشهگة الي جِنت خانگتها
درت وِجهي للجامة وصرت احاول اكتِم البجي والشهگات

احسني تدمرت دمار بالشكِل الي محَد يصلحة
جـان كل ظني راح اكدر امللهُم
ومن امللهُم اروح
ويكون أمير حاس بقيمتي
وارجعلة وارجع لكلشي بحياتي قَبِل

اما هسة فَ حاسة كل شي تدمر وهاهيّ
اسمع اصواتهُم بس بالي مو يمهُم
بالي يم باب دار هلي
چني واكفة واباوع اريد واحد يفتحليا

ماحَسيت بالطريق إلا لمّن انفتح الباب
باوعت كدامي مروآن

صفنت بوجهة

مروآن
يلا روآن انزلي

هزيت راسي ب لا

احسة ارتبك وهوَ يشوف نظراتي ودموعي ومـا عرف شنو يسوي ضل بَس صافُن بوجهي

اخذ بـ ايدي وسندني ونزلني
ماريد اشوف وجـه ايّ احد دنگت وماهتميت لوجود ايّ احد
اول ما طببني للغرفة
صارت عيني عَ الفراش
تخيلت كُل الوحشية الي صـارت
ورأسًا درت وجهي

دموعي صارن ينزلن شلالات
صرت اقبضهن بقوة وكإنما اريد امحي الي صار !

وصوت بجيي صـار مسموع
ما سِمعت إلا

مروآن
الله يلعني ...
انة متندم عَ السويتة ويـاج

هزيت راسي بـ لا ( ماريد اسمع صوتك )
جان ودي اكلة روح ماريدك
بس مجِنت اكدر
احِس الحرف ميطلع مني
وتأثير الصَدمة جـان واضِح علية ..

همست بـ احرف متقطعة وكوة انطُق
خلي اروح يم بيبي

مروآن
ماهيَ روآن

اروح بغرفتها ميخالف

مروآن
ليش روآن

باوعتلة بعصبية وانة وجهي كلة دموع

روآن
لان ماريدددد اتذكر الي صـار ماررريد

تنهـدد من اعماق كلبة احسة واخذني لغرفتها
ماهيَ اكيد من زيارة ماخذيها لبيت ابو ضرغام حَتى ماتعرف بالي صار لان ماترضى علية

اول ماوصلت للغرفة نمت عَ جربايتها ودرت وجهي للحايط
حَسيت بي من غطاني وكعد يمي

حباب مروان حباب اذا تحب الله عوفني
حباب لا تضل هنانة روح
شهگاتي گطعن صوتي، چنت أشاهگ مثل الأطفال...
چنت أختنگ بالكلام الي اكولة ، ودموعي نازلة مثل النهر المكسور.

ضليت وحدي، أباوع السگف وأسأل نفسي:
لوين وصلت؟ شلون حياتي صارت هيچ؟
كمية الانكسار اللي انكسرتها ما تنوصف،
حسّيت كلشي بيه مات، بس چنت بعدني أتنفّس.

شويـة شفِت مروآن رِجع طَب
الانكسار مبين بعيونة، بس اكيد مو اكثر مِن انكساري
ضليت اباوع للسگُف ودموعي تنزل بهدوء
وبين كُل دمعة ودمعة اكو شهگة
كمية الإرتجاف الي جان بجسمي
ماجان ينوصف
وماعافني ولا دقيقَة

سحَب الكرسي وكعد يمي وصـار يحجي
بنبرة هادئة بَس خشنة
مروان
روان...
ماجنت اعرف الي صـار هلكد راح يسببلج أذية
بس كوني واثقة ب انّي اتاذيت اكثر
انتِ ما متخيلة ولو لشوي شكد الموضوع كسرني
تذكرين بساعتها لمّن صار اكو طلق ب بابنا؟
وطلعت وعفتج
جانت اكو مُشكلة جبيرة بين ثنين وطابين لبستانا
تخيلي عفت كلشي وردت بس اجيج
ماسيطرت على روحي ولا تحكمت ب اعصابي
انة غلطت، هاي كدامج واكلج غلطت
بس أنتِ... أنتِ سويتي بيه شي، ما گدرت أسيطر عليه.
انة محروم من البزر صارلي ١١ سنة روآن ؟
١١ سنة انة احط آمال وانتظر رحمة الله
واجيتي انتِ بلحظة تكليلي ماتخلف ؟
معَ هذا ماتوقعت يصير هجي شي ابد
وو ...

حركِت ايدي بخُفة ورفعت وجهي الة وكتلة

روان
ما أريد أسمع شي.
بس رجعني، لأهلي.
هذا كلشي أريده.

سكتِت بس شهگاتي جانن يحجن عني، ودموعي تنزل بدون صوت بس صوت النفس عالي وكإنما يدل عَ انُ روحي بعدها تنزِف

روآن
ما ضل بيـة شي الك، انة مُستحيل اتقبل اباوع لوجهك حَتى، ارحمني كافي الله يخليك ارحمني ورجعني لاهلي، اريد احضن امي
اريد احد يفهم هاي الغصة الي بية

مـروآن
كل شي راح يتصلح اوعدج..
انتِ بَس صيري بخير هَسة

حاولت اكوم من فراشي واكعد
باوعتلة واني معصَبة

روآن
هوَ شنو الي يتصلح شنو الي يتصلح؟؟؟
حياتي تدمرتتت تفهم شنـو حياتي تدمرتت؟

مروآن
شنـو الي ادمر بيها انة مافهمت؟
انّي اخذتج معناهة ادمرتي؟
روآن انتِ الي اول وتالي
لو ما ماخذج اليوم جان اخذج باجر
واذا مو باجر فَ بعدين

روآن
هـا يعني انتَ مقتنع؟؟
مقتنع انّي انحسب مرة الك
تريد تعدني معَدة سعاد وسعدية؟؟

مروآن
بالنهاية انتِ مو اول ولا اخر وحدة نزلت على شرِج
مافهمت وين مشكلتج بالضبط ؟؟
انتِ تحبيلج واحد مثلاً وحاطة بالج تطلكين من عندي وترحيلة لو شنـو؟؟

من كالي هيَج تذكرت اميـر
شلون اوصف الة واكلة انُ ايّ
وانة جانت آمالي اتخلص من عندة واروح
وبلكي آمال صِغري تنلم وتتحقق
بَس هسة مروآن بلحظة وحدة حَطم كل شي

باوعتلة بعصبية وكتلة
روآن
احس لو تكوم احسن الك

تقرب الي وخزررررني بكُل قوتة وكإنما يريد يخترقني بنظراتة هـاي

مـروآن
ليش سكتي احجي ؟؟

روآن
لا، عوفني ماريدك ولا اريد غيرك
اريـد ارجَع لاهلي وبَسسس ماريد غيرها

بعدة ما حاجي اندگ الباب
صوت احمَد وهوَ يكول شيخ مالك يخابرك

گالي هَسة اجيج وخلة وكآم
درب يسد ما يرِد يارب
شوية وطَبت سعدية بدون ايّ كلمة
خلتلي اكل وطلعت

حَتى نفسية للاكِل ماعندي
ايّ طاقة لشي ماعندي

كاعدة وافكِر و ابجي حسيت روحي دخت
مادري بنفسي نمِت

كعَدت ع صوت صايح بالصالة موطبيعي
وكإنوا صوت عرك اكثر من شخُص

صابني فضول اعرُف شصـاير
بنفس اللحضة كلبي فَز ب امل اهلي

كمت حَتى اسمع شنو صاير
كوة كمِت من مكاني ضليت انتجل حَتى الحايط وامشي
حَدما وصلت للبـاب

ضرغام
خوية تـرة آل جبر مو سهلين شكد ما تكول موسهلين فَ قليلة

احمد
اسحگ على راسهم واحد واحد منو همة مثلاً

ضرغام
منو همة ولك، الدولة والقانون همة هنانة

احمد
انتَ ويااااانة علينة ضرغام شو مافهمناك

ضرغام
خوية اكيد وياكم بس همة هسة جاي يكولون نريد بتنـا عبالك يتراجعون؟ لا بالله فلا اظن

من سمعت هل كلمة دموعي نزلوا وشهگت
حطيت ايدي عَ حلگي وانة ميتة من الفرح
صابتني قشعريرة بجسمي مو طبيعية
يعني عرفـوا واخيرًا ؟؟
يارب يارب ماريد اضل وياهُم والله يارب تصير

ام مروان
عمي انطوهم طركاعتهم بتهم وخل نخلص يمة خل تولي مانريدها من طبت لسة صخمت حياتنا تصخم

مروآن
يمة انتِ شتحجين
هيَ لعب زعاطيط لوشنو
أنا مروان آل دحّام، ما أنحنيت بحرب ولا بصُلح،
شلون أنحني اليوم گدامهم؟
طبيت لبيتهُم وهنتهم وطلعت
وخليتهم تاكلهم الفشلة شلون كدروا يفتحون مواضيع هيج كدام الشيوخ
انة شيخ عشيرة، وإنّ الشيوخ الباقين اللوگية صارت وياهم انة ما انحني ولا اتفاهم ولا ارضخ لاي شي يكولوا وان جان حَگ !
خلي يعرفـون بيت جبر انُ آل دحام للموت ما يتنازلون عن حجايتهم، وفصلهم ما يرجَع ..

ضرغام
زيـن بلة اجوا ؟
اذا انتَ الحجي الحاجي موسهِل

مروآن
خوية توكل بـ الله وروحوا لداركُم
انة اعرف ذولا الناس كلش زين
ما يبدِر منهُم هجي شي
يعرفون كلش زين الفصلية ماترجع
ويعرفون كلش زين صاحب هل فصِل منو
يلا خوية اخذ اخوك وروحوا

سمعتهم سلموا وراحـوا
ام مروان كعدت تقنع مروان يعوفني وهوَ يكلها من كل عقلج اعوفها وكرامتي كدام النـاس ؟

واكفة اسمع ماحِس واحس أيست خلاص
وبنفس الوقِت خفت وماعرفت شسوي
خايفة لا احد يتأذة بسببي
اهلي اعرفهم لو كالوا شي مُستحيل يتراجعون عنة
واذا سامعين علي اعرفة كلش زين
يموت ولا يشوفني متأذية

ماحِس إلا نفتح الباب
اجت عيني بعينة مروآن

سَد الباب والتفت الي
ماحاولت التفت ولا حاولت ماحاجي
لازم احاجي خلاص
شنـو اريد يموت احد يلا ارتاح ؟

مروآن عوفني خلاص الله يخليك
والله انة بعد ماكدر اتقبلك ولا اكدر اباوع بوجهك حَتى

مروآن
ان جان تقبلتيني او لا انة شي مفروض عليج بحياتج، قدرج انكتب يمي، وانتِ انكتبتي ب اسمي، مال ترحين مستحيل
مو مروآن الي ينهان

روآن
دائمًا تهتم لكرامتك ولسمعتك ولمكانتك بين الشيوخ، واذيتني بما فيه للدرجة هسة احس روحي بـدون روح والله
انة صغيـرة مروان، عمري بس ١٧ سنة
اليوم شفت اشياء بعمري ماشايفتها
اليوم اتعاملت وياي بوحشية انضربت بوحشية طبيت مستشفى صارت اشياء ماجاي اتخيلهن، مروآن انة مستحيل ارتاح  والله عوفني وروح اترجاك انة مانفع الك بعد اريد ارجع لاهلي

باوعلي وباوع لعيوني
حَسيت عندة حَجي هـواي
ركز بعيوني وهوَ ساكِت
تنهَد وگال

مروآن
لا تتأملين ابد ..

جـاي احجي ويـا ماحس إلا عَ صوت طلق قوووي
مـروان استغرب وطلع كُبل
ماعاولت امشي خطوات حَتى اخذ شالي واطلعلة

اول ماطلعت شفتة ستوة طالع من غرفتة وهوّ
يلف الشماغ بعصبية، ولازم سلاحة ، ويريد يطلع

مروان (بصراخ)
خليهم يجوون، آنة موجود!
ما حد يطب بيتي يضرب وياخذ ويطلع سالم...
آنة مروان آل دحّام، محد يهين إسمي ويطلع رافع راسه!
والله لاخلي الدنيا تگوم والله

يريد يطلع وطَب للمطبخ
طبيت بَسرعة ورا وصرت گدامة

مادري شلـون رگضت
شلون حجيت
شلون گدرت انطق
مادري بس كُل جزء مني جان يرجف
وخايف، خايف لا يكون سبب بدم جديد

روان
لا تطلع!
والله، ما تطلع مررروان !

باوعتلهم الكل طلع من غرفتة ومستغرب شجاي يصيـر

مروآن
لج روااان وخررري منانة

جاي يحجي الجاي مال المطبخ كزاز لِلحظة كلة اتكسر
شهگت وصحت بصوت عالي لان جان قريب علية
جرني بسرعة الة وهوَ يطببني للصالة ومنطي ظهرة للمطبخ
عرفتة شنو راد يسوي
راد يطببني للغرفة ويسد الباب

و اول ماطبينـة للغرفة صرت ورا الباب وصرت اصرخ
بصوت يررررجف

روان
انسى كل شي حباب
انتَ رجال، وهمة زلم
الكل يدري والله الكل يدري
مو علمودي
بس لأن كل قطرة دم تنزل من وراك، راح تصير بذمّتي!
كافي، تعبت،
ما أتحمل أكون السبب بكل هالخراب
الله يخليك كااااافي الله يخليك ...

حطيت ادية على وجهي وصرت ابجي ازيد واكلة
إذا طبيت بينهم ، راح تموت،
وإذا متت  أنة أموت وياك، غصب.
من دون سابِق انذار وخر ادية عَن وجهي، رِفع وجهي ب ايدة
عيوني تبجي وعيونة يكولن هـواي

صوت الباب وهوَ يندگ علينة
احمد يصيـح (مروان وينك خل نطلع الهم)
والطلق المـا وگف دقيقة
وصوت العياط و الهوسة وكل شي
وكإنه ما جان بـ بال مروآن

يباوع لعيوني بتمعُن، ويحجي بهمِس وحنان
مروآن
والله، لو ما عيونچ ردّتني
چان الگاع شربت دمّهم
وچان اسمچ صار على لساني ذنب،
أحچي بيه وأنه مو مسامح نفسـي عَ المرعِنة والدم النازل .
بس نظرتچ نزلت سلاحي،
وخلّت گلبي يختنگ ويسكِت يمج
وبدون مُقدمات، سحبني الة حَيل وحضني
هوَ طويل وانة قَصيرة، وفرق الطول بيناتنة جَبير
حاوط خصري ورفعني ونزل روحة بكل مابي وحضني بكل قوتة
حَسيت بهاي اللحظة راد يدمج روحي بروحة
وراد يلزمني بكل مابي لانه جان داري انُ هاي النهاية

وگف الطلق وصرنـا نسمعَ صوت علي، عافني ورجَع طلع بسرعة
ماهتم للي يحجـوا اهلة وراد يطلع مَرة اللُخ
جريت السلاح مِنة وكتلة

روآن
روح بـدون سلاح

ام مروآن
تردين تكتلييي؟؟؟؟؟
ولك يمة لا تطلع

روآن
لا مروآن اطلع واحجي وياهم بـدون سلاح

احمد
هاي شجاي تمسلت رحمة ل الله!!!

اتقربت منة وصرت احجي ويا بترجي

روآن
ثق بية واطلع لخاطري ...

عـاف السلاح وقبل لا يطلع كال لاحمَد لا تطلع وراي ابـد ..

ماخفت عليّ و أمنت عليّ بعد ما طلع
ادري بيهم مـا يكتلونة دامة ما مسلَح
وهمزين طلع هيـج
ما مَيتة عليّ و ودي اليوم قبل باجر يموت
بس مو بسببي ..

طَبيت لغرفة الحجية
وضليت اقرة ايات قُرانية وابجي
يـارب حّل هل سالفة
يارب رجِع الحياة لمجاريها
يارب رجعني لاهلي بدون دم بدون فقد
يارب العالمين كون ويـاي

ابجي وافكر شراح يصير ياترى
مر اكثر من نص ساعة وماكو خَبر
طلعت لكيت الكل راجع لغرفة
شفت ضوة غرفتنـا مفتوح
ترددت اطُب بس لازم اطُب
هاهيّ لازم يتنازل مروآن لازم

فتحت الباب وطبيت
اباوعلة متمدد عَ الجرباية وراسة عَ التاج وصافن بالسگُف
اول ماطبيت رفع راسة الي وماستغرب
وكإنما جان منتظر وجودي

وكفت كدامة وكتلة بصوت خافِت من الوجع

روآن
اكسر عنادك العشائِري الي بانيه
باوعلي كَ انسانة مو كَ فصلية

باوعلي بعيون تعبانة وگالي
مروآن
شتردين روآن، ترة تعبان هـواي

روآن
انتَ غلطت بحقي هواي انتَ كسرتني وأذيتني صلح غلطك خليني اعيش باقي عُمري ولو مو سعيدة بس بدون ما اتعذب بعّد
انة ماكدر هنا، ماكدر الك ولا اكدر لاهلك
اهلك راح يضلون يشوفوني انة السبب بموت عباس
وراح يضلون يحاولون يكسروني
اهلي مراح يسكتون
وانتَ مراح تسكت وراح نتعذب كل احنة
وصدك نتيجة هذا الشي راح يروح واحد
وماريدة يكون هل واحد انة
واذا استمرت هيج لا تستبعد تشوفني منتحرة مروآن !
انة ١٧ سنة بس مروآن
تعبت بعد ماكدر اتحمل
الله يخليك
مرة وحدة ضحي لجلي
مرة وحدة بَس

احاجي ودموعي تنزل مني بغزارة،
باوعلي وعَدل گعدتي، صُفن بوجهي لثواني وگال

مروآن
شتردين؟

روآن
طلگني ...

مروآن
هل شي راح يخليج مرتاحة ؟

روآن
يخلصني من تأنيب الضَمير

مروآن
ضميرج راح يأنبج لو ضليتي يمي ؟

روآن
راح اموت الف موتة كل ما اشوفك
وماراح انسى ابد، طول عمري مراح انسى الي صار ..

مروآن
خلاص انتِ طالِگ
حَضري روحج الصبح اوديج لاهلج ....

گال هذا الشي واخذ سبحتة وموبايلة وطلع
عيوني ما مستقبلـة الصَدمة
شجاي اشوف گدامي
دخيلك ربي
الكابوس خُلص
واخيرًا

ماجان اكو لَذة فرح كد ما جانت اكو غّصة وقهر
شرحع لاهلي بيمن وشلـون ؟
ماكو شي يكدر يوصف كَسرتي ولا شي يكدر يهون جَرحي

لميت كُل غراضي واني بس اريد اروح
حَتى اهلي ماريد اشوفهم
اريد اصعد بغرفتي اشم فراشي
وابجي بي ...
هذا مُنتهى آمالي

صارت السـاعة بـ ٦ ماعاولتها تصيَر كمت بدلت ورجعِت لمكاني
بـ ٧ انتظرتة ما اجة
خفت لا يكون تراجع
ضليت عَ نـار شوية وطَب
اباوعلة باوعلي وضحك بإستهزاء

مروآن
ههه ماجنت ادري هلگد مختنگة

جاوبتة بـ انطفاء وكل رغبة ماعندي

روآن
ازيد مِمّا تتخيل

جَر حَسرة وگال

مروآن
لا تحقدين علية وضلي ادعيلي الله يرزقني بَزرة
بِما انّي راح اكسر كبريائي
وراح اهلي اهلي ينصدمون
وناس يشمتون و اولهم اهلج
وراح يضنون كسروني ولبيت الهم اوامرهم
بس هذا كلة علمودج انتِ
فَ بالمقابل ماريدج تحقدين علية
ادعيلي وبَس ..

مادري ليش كلي هَيج هزيت راسي وگال يلا

صعَدِت بسيارة ومن صعَدِت
صعَدِت ورا
رّد صامِت ب انّي ماعدِت الك هاهيّ ..

الطريق مچان طويل ، بس الوقت گام يمشي بالگوة،
صوت العصافير الصُبح، أنفاسي، وگلبي الواگف من يوم.

عينَي على الجامَة،
وعينه علَيّ...
بس ولا مرّة التقينا.

ما بينا شي ينحچي بعد،
ماكو لوم، لا عتب، ولا حَتى مشاعِر
بگد ما بينا صارت مسافة

صرنـة گدام بيت اهلي
فتحت باب السيـارة مينفتح
كلبي كام يرجِف
التفَتِت الة
باوع بعيوني وگال

مروآن
انتِ شي انتهى قبل لايبدي
وتدرين الصراحة؟
جـان ودي يَبدي ...

فتح السيارة وگال

مروآن
الله وياج بَت عمي ..

نزلت من السيـارة ودموعي تنزِل
صرت أدِگ بالباب بالگوة
احس انفاسي گوة تِسعفني

و اول ما نفِتح الباب، باوعِت علي گِدامي

صاح بروآن
ذبيت روحي عليّ مثل الطفلة
حضنتة بكل مابية وصرت ابجي بحَضنة
حاضني حيَل ويبوس براسي وما مصدِگ

مروآن
نفس ما طلعَت بـ ارداتي، رجعت بـ رغبتي
اما قراراتكم تنكعوها وتشربون مايها يـا بيت جبُر ..

وخرت من حضن علي اباوع علي يباوعلة وصام ادي وكوة مثبِت روحة و مروآن منزل الجامة ويحجي وعيونة يريدن ينطن على علي

علي
إحنة ما ننكع قراراتنة
إحنة نوگف عليها، ونحاسب اللي يعبرها ..
واهم شي تضل تذكر
احنة بيت منو
وشنـو نسوي وشنو افعالنـا
واذا ماتدري فَ اسال الناس
وانتوا اعرف ....

توجهت انظار مروآن الي وخَلة وراح

حَسيت بوجودهم وهمة يطلعون
لزم وجهي علي
باوعلي
غمض عيونة بقهَر

علي
عمت عينك ياعلي
شصـاير بيج ؟
لو انة ميت ولا صاير الصايرلج

رجعِت حضنتة حيل وصرت ابجي وما مصدگة
استقبلوني استقبـال يجنن
وما حسسوني انّي راجعة وكل هل تعب بية
خصوصًا علي جان حاضني بكل مابي
وما منطي مجال لايّ احد يكون يمي

بيبي تبوس بية
وامي تحضني
وجَدي ودة يسمع كُل شي
امير يبتسم الي
والكل فرحان بجيتي
إلا انة
احس روحي ما فرحانة ولا راح افرح ب ايّ شي
واحس روحي تعبانة وبَس ..

محَد تجرأ يحجي شي او يسالني شي
متاكدة علي الي كايللهُم لان صدك وضعي مومال احد يحاجيني كِلمة
فوك كل شي البيت تحِسة يخنگ لان زينب ما موجودة
وابد ماكدرت اتقبـل سَبب و وجودها ويانة

جنت كاعدة بغرفتنـا انة وسيوف وملوكة
وابجي
احس روحي تعبانة
وماعرف شريد
بس احس حياتي كلها خربت

يعني لوما مروآن لامسني ؟
جان اكيد راح ارجَع وجدي يحجي بموضوعي وي اميـر

كاعدة وطبَلي علي

اول ماشفتة ركضِت لحضنة
حضنتة بكُل مابية

علي
ولج انتِ كسرتي بهاي الدنيا يروآن
انة هسة بس ودي يرجع الوكت ويرجع كل شي
والله ماخليج تتأذين هيَج
يطب سجاد الف مَرض
اصلاً سجاد بالسجِن ما مرتاح
ولايم روحة عليج
ولج وعلي ودي اضمج بين ضلوعي هَسة
ودي اروح لهذا مروآن
واضربة اضعاف الي ضربجيـا

صرت احاول احَسِن صورة مروآن يم علي
لان ادري علي اذا حط احد براسة
مستعد يلبسة ٤ ارهاب بدون وجع راس
كتلة هوَ جان زين بس نسوانة وامة ومرت اخـو
معَ هذا ضل يستهزأ بية ويكلي لدافعيلة
وانة اعرف بكل شي
وبين الي هوَ يعرف بسالفة

علي
يا بعد روحي إنتِ، يا لبوتي
يا جنة عيوني، ويا دفوة گليبي بـ الشتا،
يا اختي وبنتي وصديقتي، يا نور دنياي...
يا أحلى وردة طلعت من بيت جبُر،
ويا لؤلؤة ما تنشرى، ولا تنوصف، جوهرة الديرة كلها.
كل دمعة منج تسوى مروآن، وابو مروآن وهوَ بكبرة وكل من عدهُم وكل من ينتمي لـ آل دحام
يجيلج أكبر واحد، ويتمناج،
وكل أحلامه تصير بس "لو تباوعيلة" بهاي العيون الـكزازة،
اللي تذوب بيها گلوب وتحيي بيها أمل
ما انخلقَت للبچي انخلقت حَتى
تِضحگ وتدلل وبَس

ضحگت وهوَ يحجي ويـاي هَيج

علي
يلا اريد تبلشين بحياة جديدة
شني كاعدة هنا جنج ارملة وكاعدة تبجين
يروح نعال يجي ميت نعال بعَد اخوج

لا لا اوكفي شجاي احجي انة

ضحكت حيَل وهوَ يحجي هيج، يحاول بَس يضحكني بدون حساب لشي

علي
لا وعلي لا تستفلكين الوضعية
انجبي ويلا اريدج تنزلين وانة راح اوصيهم محد يزعجج بالحجي
وابدي حضري روحج

روآن
ليش شكو؟

علي
باجر مشَية اميـر ..... يتبعععع

_________________

فَرس

شفت عِبارة( الموصل ترحب بكُم)
حسيتها تستقبلني نفس حضن الاُم
باردة.. بس بيها أمآن جبير

الطريـق طويل ويستغرق وقت طويل
طلعت من الساعة بـ ٩ الصُبح لحد الساعة بـ ٥ احنة ستونة طبينة لاطراف الموصل

شكد حجة وياي الرجال ننزل ناكل شي بس اني جنت رافضة
لان احس معدتي شبعانة
من شنـو مادري

غفيت شوي ورجعت فتحت موبايلي داطمن اخوية وين وصلت

باوعت وانصدمت رسالة مِن استاذ امير !

فتحتها واني كلبي يخفق بسرعة واحس روحي انشِدهّت بس بنفس الوقت انصدمت وبهتت لمن شفتة شنـو كاتِب !

أمير
اختصرتي علية هواي حجي و افعال احسن شي سويتي من اجيتي للموصل لحد هسة

نزلت دمعتي واني اباوع شكاتبلي، والله حتى احس بعد ماستوعب شي

ضليت صافنة وماعرف شرد حتى

كتبتلة
لتخاف رايحة وراح تخلص مني نهائي

سديت الموبايل بسرعة
حتى ماودي افتحة بعد ابد
قفلتة وهاهي

اول ماطبيت للبيت لكيت اخوية ماهو وبس مرتة بالبيت

مرتة انسانة حيل مغرورة ومكروهة وهي الي دائمًا تحيل اخوية علية

سلمت عليها وضلت تسالني شكو وشنو وليش رجعتي
احد اسباب قبول حسام بالسكن الجامعي من بعد أيلول هي لان جان وجودي زاعجها بشكل موطبيعي

فَرس
كملنا امتحانات فصلية وبعَد ١٠ ايام امتحانات المِد فَ كلت انزل

ريڤان(مرت اخوها)
هيَ ١٠ ايام قابل هيَ كركوك واجيتي
هنا هنا طريق ٩ ساعات عليش اجيتي ماتكوليلي
والله مادري بس اني احسها موهيج سالفة
اول تالي تجين بدون ايلول

حاولت انطيها اعذار بس هيَ جانت تستصغرها وتضحك
كلت على ريڤان ما عُبرت لعد حُسام شلون

جان هوَ بوقتها بالعيادة لان هوَ مُحلل
تقريبًا لـ ٧:٣٠ اجة و اول ما اجة صاحني

سلمِت عليّ ومُباشرتًا كلي

حُسام
شنو شعندج جاية، جيتج كلها اني ما مرتاحلها

فَرس
حُسام عندي عُطلة ١٠ ايام وردت ابقى بيها بالبيت اقرة براحتي احسن السكن كلش مُزعج والبنات هوسة ومدري شنـو

حُسام
يعني انتِ البارحة كملتي امتحاناتج الفصلية؟

فَرس بارتباك
اي

حُسام
خوش طلعيلي الجدول خل اشوفة
من كالي هيـج احس دمي يبّس وماعرفت شنو اتصرف
حُسام ذكي ويفتهم وما تعبر عليّ شغلة ابـد

فَرس
ماعدنة جدول هنّ امتحانات فصلية مو مِد وينزلون جدول

*مِد : امتحان نُصف سنة

حُسام
تمام جاي وياج اني
انطيني افتحي موبايلج وانطينيا خل اشوف

يحجي واني احس راح اموت وما اعرف شنـو اسوي دموعي تكومن بعيوني وصرت اباوعلة
عاط بوجهي

حُسام
كتلج انطينيا شبيج !!!!!!

رحت اجيب موبايلي من الغرفة وكلت
خلاص شيريد يسوي خل يسوي
اني هم روحي بعد ماصارت تعيني على شي

جاي اريد اطلع سمعت الباب يندگ
طلع حَتى يفتحة
اجيت وجبت موبايلي انصدمت واني اشوف ايلول گدامي

ابتسمت، وماكدرت اسيطر على دموعي
جَد هاي ملجأي الوحيد، والانسان الوحيد الي كلما ادير وجهي الكا يمي، ومُستحيل ما اكون بمحنة الا والكاهة كِدامي

حضنتها حَيل وكإنما داتمسك بيها
وهمِست بـ أذنها
( البارحة كملنا امتحانات)

ريڤان
يا لعد اول تالي تجن كل وحدة وحدهي
والله انتن سالفتج ما تنحزر شو

ايلول
عيني ريڤان علكيفج عيني شبيج راح تاكلينة وتشربينا

ريڤان
ههههههه لا لولي والله ضحك وياجن
بس صار فضول بداخلي اعرف

ايلول
اني ماردت اجي ردت ابقة هناكَ بس فَرس رادت تجي
بَس فجأة من راحت فَرس حسيت الغرفة فضت وهيج ضجت
خابرت ماما كلتلي تعالي اذا عدكم عطلة
تدرون احنة كملنا وعدنة عطلة للمد

حُسام
شكد عطلتكم

ايلول و فَرس
١٠ ايام ( بالاصل جانت ١٠ ايام صحيح )

فَرس
من سمعنا حُسام حجينا سوة ونفس الشي سِكت وكال زين سويتوا

ايلول
تعالي فَرس خلي نسولف شوية

اول ماطبينـا للغرفة عاطت بية
بس كُلة بـ همس حَتى محد يسمعنا

ايلول
شوفي حطلع اقنع حُسام نطلع سوة هَسة
ابدددد لا ترفضين ابددد

فَرس
انتِ صدك تحجين ايلول اني ماعاولت اوصل اريد بس انام مُستحيل

ايلول
عندي حجي كومة فَرس لازم تسمعي ابد لا تكولين لا

راحت طلعَت حَتى تحجي وي حُسام
اني اعرفة ميرفُض طلب لايلول
كُلش يحبها ويحترمها ويحترم اهلها خصوصًا
وهواي عمو يحيى يوصي علية
بدلت شوي وكلتلي يلا

وصانـا منتأخر، قَبل لا اطلع انطاني فَلوس
كتلة ما محتاجتهم كلي لا خليهن يمج

رُغم قساوتة الاساسية الا انُ هوَ حنين بشكِل مُفرط وخصوصًا قبِل ما يزوج، بس احنة من النوع الي حيل جافين، يعني بعُمري محاضنتة وبعمرنا مسمعنا بعض كلام حِلو، حالنـا حال اغلب العلاقات بالبيوت العراقية، عِلاقة يسودها الجِفاء ازيد من اي شي بس متخلوا من الحِنية رُغم كُل شي ..

ايلول
ادية متكسرة من السياقة والله
راح اخُذ تكسي احسَن شي

اول ما صعدنـا بالسيارة ايلول استلمتني لحَد ما وصلنـا
هيَ بس ترزِل بية

فَرس
اكُلج انتِ مطلعتني حَتى تاكلين كلبي لوشنو؟

ايلول
ليش هيَ هاي عملة عاقلة ترحيـن بدون ماتكوليلي ؟
صدك انتِ بلا عقِل

فَرس
ايلول والله مزاجي سيء
يعني انتِ شعدج اجيتي وضربتي امتحان باجُر متكوليلي

ايلول
ماطولة امتحان استاذ امير فَ يروحلج فدوة ههههههههه

من كالت هيَج ضحكِت ويـاها
وصارت تحجي بالموقِف الي صار اليوم وي علي

ايلول
فَرس مو ذاك اليعربد علية آنة و آنة ويا كال جَدي ويا كال عمي ولج واكف بكل ثبات ويحجي وياهُم فصيح فصيح تخيلي
لج اني صافنة بوجهة ومنتظرتة ياخذ نَفس وهوَ مستمرررر
احلى شي من أُستاذ حَيدر راد يحجي
و حط ايدة بوجهة يايابة ردت إنتحر هنانة
حَسيت حقي وحقج رجعن ههههههههههههه

ابتسمت شلون تحجي وشلون اكـو فَرحة بداخلها وكتلها

فَرس
تدرين شي؟
انتِ غبية اذا ضيعتي علي
علي انسان ميتعوض ابد

ايلول
انجبي فَرس انتِ تعرفين وتحرفين مدري شبيَج

فَرس
شعرف واحرف
شنو بيئة شنو ثقافات شنو اختلافات وانسان يحبني ؟
كُل شي تكدرين تغيري الا الحُب متكدرين تخلين انسان يحبج هلكد بسهولة وعلي يحبج هـواي ومستعد يسوي كُل شي علمودج
تدرين أُستاذ حَيدر صديقهم كلش ان جان ع علي او امير

ايلول
جَد يعني كلش كلش؟

فَرس
اي والله شايفتلهم صورتين تقريبًا سوة موجودة بحساب امير واستاذ حَيدر فَ اني مصدومة شلون حجة هيج ويا

ايلول
واني اكول راد يجي يحُضنة بـَس علي وگفة

فَرس
علي ميتعوض، لو هيج الي يحِب لو بلا
كدامج احجيها هواي غلطتي بحقة
وتدرين همة طبعهم صعُب ومايتحملون احد يحجي وياهم شي ويكلهم عَ عينكم حاجِب؟ ومعَ هذا علي صُبر وياج ولسة وياج
امير كدام عيونج من اول غَلطة راح ههه
اني متاكدة لو علي مكانة فَ جان بحث واستفسر وعرف كل شي وماراح عنج

ايلول
تدرين علي شكلي؟
حتى لو متحبيني مو مُشكلة اضل احبج من طرف واحد اما بنسبة الج ف تحبيني بعد الزواج مو مُشكلة

من كالت هيج ضحكنة ثنينة من كُل وكلبنا

ايلول
بس معَ هذا كلهم نفس شي يمعودة يخزون والله

فَرس
بس علي غير
املي بي جبير ومتاكدة ما يضيع املي

ايلول
امير هم جان غير لوما..
اوف اسُكتي فَرس الطرفين غلطان صدكيني
خل نغير موضوع كافي

نزلولنة اكِل
اني كوة اكِل، وماكدر اتخطى الموضوع

ايلول
ليش مدتاكلين يا فَرس

فَرس
صافنة برسالة اميـر وشلون كدر كلبة يحجي هَيج
فَرس ولا ذاك امير متغير كُليًا مونفسة ابد
احس جان يمثِل ع كد ما وجهة هذا بشِع

ايلول
سالفتة تحيَر اني خوماصدك ب احد بس صدك امير احسة قبل جان صادق بكُل شي يحجي بس مادري جَد
الي سويتي موسهل فَرس
ومنكدر نكول ردة فعلة مُبالغ بيها
لان هُمة عدهم الحباية يسوها كُباية
خصوصًا ذولا بيت جَبر

تحجي واني صافنة عليها ماحِس الا ضلال ثنين فوگانة
وصوت علي وهوَ يكول

علي
اللهُ اكبر حَتى بالموصل وتحجين علينة؟؟؟

باوعت على ايلول بصَدمة
علي وامير فوگ روسنـا

حَسيت روحي بحلم

ايلول
اللهُم ان كان سحِر فَ ابطِلهُ

علي
لا لا حقيقة حَتى ب احلامج بيت جبر يطلعلولج

أمير
اذا مابيها زَحمة تعوفينـا شوي انة وفرس

علي
يلا كومي يالكارثة المُتنقلة، يالكلساع بمكان، وعلي ماجذبت من كلت كارثة مُتنقلة، ستوج جاية ما تثبتين ما تجزعين كُبل طلعتي شكوو متكليلي شكو

ايلول
وانتَ شعليك جااااي وتصيح
واصلاً انتوا شكوا جايين !!

علي
كومي هَسة عوفي العرسان يتفاهمون بـراحتهُم

صِدمني علي وهوَ يكول ( العرسان )
باوعلة امير بإنزعاج

ايلول
عفوًا شجاي تحجون؟

أمير
ايلول شلون مراح تعوفيني احجي شوي ويّ فرس ؟؟؟

فَرس
بس اني ماعندي شي احجي ويـاك
مادري اصلاً ليش جاي لهنا؟؟

أمير
جاي حَتى ....
- حجة بعصبية اول كلمتين وسِكت رأسًا -

علي وهوَ يهدئ الوضِع المتوتر

علي
خوية فَرس هسة انتِ اسمعي منة ماخسرانة شي
ايلول كومي عدا الشَقة

باوعت لعلي خُزر ايلول حَتى تكوم وكإنما الموضوع حاسِم
كامت ايلول وكالتلي

ايلول
لتخافين اني يمج، اذا حسيتي روحج مضغوط عليج كومي بدون ايّ توتر وطُز بالكُل

امير
تؤ استغفرالله ..
ماجذب علي من گال كارِثة مُتنقلة على فكرة

علي جان ماخذ وضع جانبي من بعد ما حجة اخُر شي
باوعت ايلول لامير بإستهزاء وراحَت

مادري شصاير بينهُم
شو واحد ما يطيق الثاني

جنة كاعدين بالطابق الـ ثاني للمطعم وجان مُطل عَ الشارع العام
درت وجهي عَ الشارع، وكلبي احِسة يدگ بسرعَة

أمير
انة حجيت وي اهلي، باجُر ان شاء الله المشية، واليوم انة جاي حَتى احجي وي اخوج

من گالي هيَج احِس صدمني
هَذا شيحجي !!

رأسًا التفتت الة
وكتلة
نَعم؟؟؟

أمير
نفس ما سِمعتي وما اعتقد راح يكون عندج جُرأة وترفضين ؟

فَرس
ليش منو كلك راح ارضى !
شنو هلكد اني مخبلة ؟؟

ضرب عَ طبلة ب راحة ايدة بصورة خَفيفة وهوَ يقرب راسة تجاهي ويحجي وصار يحجي بغضب هامِس ويطلع الكلام من بين اسنانة وكإنما يريد يلتهمني من العَصبية الي هوَ بيها

امير
راح ترضين يعني ترضين
انة ما ميَت عليج ولا شايلج مِن ارضِج اصلاً
هاي سـارة وحدة بلا تربية وبلا أخلاق
جاي تبتزني حَتى انة !!
هاي وحدة بايعة نَفسهة
وكُل شي يطلع من عندها

فَرس بخوف
مدافهم شدتحجي رجاءً وضح كلامك ..

فِتح موبايلة و انطانيـا
شفِت اخر مُحادثة بينة وبيـن سارة

سارة
استاذ أمير المحترم الثكيل هههههههههههه لا تفكرني غشيمة، كل المحادثات بينك وبين فرس عندي، من أول كلمة لآخر حرف. وإذا بعدك تتمادى وتتهدد بية تره آني مستعدة أبعثهن للعمادة، وأخليهم يشوفون شلون أستاذ يغازل طالبته، وبعيون الكل."
"وتدري شنو بعد؟ اكدر أوصل كلشي لأخوها فرس، وأخليه يشوف بعينه الرسائل، ويعرف شنو كنت تحچي وياها. تتخيل شلون رح تكون ردة فعله؟ مو بس انت رح تروح، حتى هي رح تدفع الثمن.
فلا تلعب وياي، تره آني جادة، وكلمة وحدة مني تقلب حياتك فوك لجوة، وصدكني لا كلية تهمني ولاشي
واني سَنة وحدة واسوي استضافة وارجع لجامعتي فَ اريدك تضبطلي وضعي وي بقية الاساتذة وبعدها راح اسكت ههههههههه .

دازتلة صورة فتحتها
رقم اخوية !
مصورتة من موبايلي ودازتة ودازة مُلصق يضحك

عيوني نلمن دموع
صُفنت شنو اسوي
حَتى وجهي ما استرجي ارُفعة والله

أمير
شفتي شسويتي بينة شفتي ؟؟
ولج اختي ما صارلها من مَيتة
وفوگ عيون الكل سويت ما سويت بَس حتى اضبط الموضوع
ماريد اكعد ولا اريد ابررلج
الوقت تاخر اليوم وستونة اجينة
باجر ان شاء الله الصُبح انة يم اخوج بالعيادة احاجي
والعصُر المشية
ويجون اهلي وياي هَم
لا حفلة ولا رگصة ولا بطيخ
كلها لعبة لنهاية السَنة تنتهي وبَس

باوعتلة واني حَرف ما طالع مني بَس دموعي تنزل وصافنة بالجاي يحجي

امير
لا تبجين ولاشي
شتكولين علية انة؟
انتِ لتخافين عَ نفسج بكل الاحوال مراح تنضرين بحجاية، واخوج موافقتة يمج و اصلاً مراح يرفُض اما انتِ فَ ماعتقد عندج غير خيار ؟

كمت بسرعة من كدامة واني اسمعة يحاجيني بهل نَبرة اللئيمة وكتلة

فَرس
انتَ مو بحاجة تنقذني
نفس ما اني غلطت انتَ هم غلطت
ونفس ما انتّ حتتعاقب وتكول سمعتي ومدري شنو
فَ اني هم راح اتعاقب
شنو العقاب وشلون مادري
المُهم حَنال عِقابي
بالنهاية عِقاب اخوية
اهون بميت مرة من عِقابك هذا ...
وخَليت ونزلت بسرعة

اول مانزلت لكيت علي و ايلول واكفين سوة

تقدمت ل ايلول وكتلها واني منهـارة بالبجي
بسَرعة خلي نرجع ايلول

ايلول
شبيج فرس ليش دتبجيننن؟

دتحجي ويـاي اجة هوَ وصار گِدامي وصار يحجي بعصبية

أمير
هيَ مو لعب زعاطيط عبالج
الي كلتة راح يصير شئتِ ام ابيتي فهمتي ؟؟؟

ايلول
انتَ ليشششش جاي تحجي هيج وياهة ؟؟؟

علي
موهيج امير اهدئ

فَرس
والله افضل الموت عَ انّي انجمع وياك والله

علي
بس اهدوا الله يخليكم اهدوا خلي نحجي
ايلول لا تزودين الطيّن بلة !!

ايلول
دشوفة شوفة شلون يحجي وياهة!!

أمير
ايلول رجاءً لا تدخلين يشي يخصنا اني وفرس
من هَسة اكلج
خصوصًا القرارات الي جاية اكثر مِن الرايحة
فَ اذا ما جنتِ محضر خير فَ لطبين ابَد

علي
هَسة شبيك اميـر احجييي بهدوء عَاددد !!

ايلول
لا ادخل وبكُل شي ادخل
شنـو معناهة عود جاي تعاملها هيج ؟؟

علي
ايلول انة شرحتلج الوضعية

ايلول
فهمت فهمتتتت علي اني مو حمارة فهمتتت الي حجيتة
بس الطريقة الي يحجي بيها استاذ امير مُستفزة حَيل
أُستاذ ترة فَرس صح غلطت بَس غلطها ميضاهي غلطك لو استمريت بهيج اسلوب !
هاي كدامها داحجي حَتى لا تكول شي او تحيُز او مدري شنو
واصلاً اني مساع شجنت اكول لعلي احجي علي ؟؟؟

علي
اي لا بالله كلتلي احسن شي سويتوا وخلي المَشية باجُر

امير
انة ماجاي اكول شي
ايلول انتِ تعرفين معزتج بكلبي شنـو

علي
ماتاكل خرة؟

امير
اكلك انتَ متسكت وكت حجيك؟؟؟؟

تعرفيني شكَد احترمج وحاسبج حساب اختي واكثر، واصلاً انتِ اعرفج قبل لا اعرف فَرس بس انة انسان فقدت طاقتي فقدت طاقتي خلاص بعد ما عندي اي طاقة حَتى اتحمل بيها شخص
بطول هاي الفترة انة شي ورة شي، موت اختي، مرض اخوي، صدمتي بـ الي ميزتها عن الكُل، مشاكل بس الله يدري بيها بالبيت، وفوك كل شي تجيني وحدة ماتسوالها فلِس تهددني وتريد تدمُر كل مسيرتي التدريسية؟؟
شنو بـ ايدي اسوي اكثر من هيج شنووو !
هاي الغبية جاي تشوفوها كدامكم
عبالكم شنـو انة شراح يصيرلي مثلاً ؟
تروح وظيفة؟ تجي الف
وهوَ منو يجرأ و يحجي بية كفيلكم العباس دقيقة ما اخلي انّ جان عميد ولا طالب ولا ايّ ان جان وانتن تدرن وتعرفن كلش زين هذا الشي وشفتنة بعينجن انتن
بس انة خوفي عليهـا هيَ وشراح يصير بيها !
بنهاية احنة بمُجتمع مُعاق، ميحطون الصوج بالرجال وياكلون المرة تحت شعار ( الرجال ما يعيبة شَي )
ولو ترجعون للحقيقة فَ انة ماغلطت
غلطي الوحيد انّي حبيت
الشخص الغَلط !!!
هذا هوَ غَلطي ....

اسمع كلامة واحِس سهام وتنبت بصدري، وفوك كُل شي ايلول مسانتدة بكلامة ؟

علي
ديلا كافي يلا خل نوصلجن

امير
لا يرجعن وحدهن

علي
شبيك وين يرجعن وحدهن بنص الليل

امير
علي لتسويلنة سالفة اجرلهن تكسي رِجال جَبير وخل يرجعن مدينتهم و واحد يعرف الثاني ماريد شي يعكِر علية باجُر

صافنة عليهم ودموعي تنزل وماعرف شجاوب

علي
( قُل لن يُصيبنا إلا ما كتب الله لنا  )
لا زعلين وداعتج كل شـي يتعدل

أمير
لا خل تزعل وخل تلوم روحها وخل تتعلم ما تثق بـ احد من يوم وجاي
ايلول تعاي شوي وياي

ايلول
انتَ بس لتحجي عَ فرس واجي وياك

راحوا عَ صفحة شفتة مدري شنطاهة
درت وجهي ودموعي صارن ينزلن حَيل

علي
انعل يوم الساعة الشفتي بيها هاي المصگوعة سارة
والله لو مو بنية البسها ٤ ارهاب وانعل يوم يومها
وداعتج بس حجي
اعتبريني اخوج واسمعي مني
يحبج وعلي يحبج، ومو شلون ماجان هّم
بس كل هذا عود علمود يعلمج
فَ انتِ هم كولي يالله وتوكلي على الله
و ارضي
احسن مما توصل لاخوج
وتخسري
و والله ثم والله حجالي امير انُ اخوج صعب ومدري شنو
مهما شد عليج بس اكيد بكلبة حنية
وما شد الا لمصلحتج وحتى يحافظ عليج
بنهاية انتِ امانتة من بعد رحيل ابوج وامج الله يرحمهم
فَ لا تكسرين روحج بعيونة
ما تسوة والله
وكوني واثقة امير ماراح يطول بزعلة
وامير يستاهلج
وانتِ تستاهلي
وانة اكسرلج راسة صدك جذب

درت وجهي وابتسمت عَ كلامة وكتلة

فَرس
شكرًا لوجودك علي
والله انتَ ماكو مثل طيبة كلبك

علي
يابوية وعلي نقطة ضعفي دموع النسوان

ايلول
نقطة ضعفك النسوان؟؟؟؟

علي
نسوان شني عمي
اليمي بعدال مية مرة، عيونج ضعُف نقطة ضعفي بعَد طولي النچرّة

يحجيها وهوَ يضحگ خلاني اضحگ
رفعت راسي لكيت امير مبتسم، وايلول خجلانة
مادري شعجَب ايلول تخجل وتسكُت ..

راح امير يأجرلنـا تكسي
وعلي ويا

كلتلها روحي وياهم ميعرفون المنطقة خاف

ايلول
حبيبتي حتى جدج العاشر يعرفوا هُمة رب الي اجونـا وين ما احنة واندلونا ما يندلون بيتج؟
ولج صدك ذولة بيت جَبر مينگدرلهُم ...
يتبعععععععععع
توقعاتكُم لباجُر ؟ نارررري البارت حيكون 🤭🙂‍↕️
____________________

سَبب

مِن صارت طلابة روآن البيت انكُلب گلاب خلال ليلة وحدة وامهـا خالة صَفية و مرت شيخ جانن منهارات على روآن وفوگ كل شي اخبار الولد مانعرف عنهم شي

جانت جوة هوسة والولد ستوهُم جاييـن ف كالتلي مرت الشيخ صعدي علاوي واصعدي وي سيوف
لان علاوي نومتة خَفيفة وكُل ساع ينز
فَ صعدت وي سيوف سَوى

نيمت علاوي وجنت ميتة من التعَب
حجيناه اني وسيوف شويـة
كتلها تعبانة حيـل

سيوف
طبي اخذي دوش هنانة الولد جوة متكدرين تسبيحن بعَد

سَبب
بس ملابسي جوة

سيوف
يمعودة البسي ايّ شي من عندي افتحي الكنتور بي كومة دشاديش قصيرة مال نوم اخذيلج وحدة واسبحي هسة ترتاحين وتنامين

كتلها تمام وكمت هيَ خطية نامت، تعبنة حيَل هم جنة طالعين بالبُستان وهم المرة اجت نوب سووها مناحة نوب خفنا عليهُم احس يوم شطولة

هنّ الحمام مالت غرفتهن بنفس الغُرفة بس بديكور مرتب يعني بالبداية شلون الكعدة الصغيرة نفس الصالة، وعلى جهة الحمام بعدين نطب لغرفة وبيها ٣ جربايات

طَبيت للحمام واحس ارتاحيت بكُل مابية
لبست دشداشة سودة قَصيرة وردان رُبع

جنت واكفة كدام المراية الي موجودة بالصالة وامشط شَعري

شعري اني حيَل طويل يوصل لحد رُكبتي
اسود وفاحِم حيَل
وابد ماحِب اكصة

شفت اكو كُحلة مال عَرب عَ ميز المراية
ذكرتني بـ ايام قبِل عد بيت اهلي
جنت كُلش احِب كُحلة العرب
فـ جنت احط منها بليل والصُبح امسحها تبين وكإنوا عيوني مكحلات طبيعي ويخبلن
جانت مرة تبيعلنياهة جيرانة

كيفت انُ عدهُم وكلت اكول لسيوف منين تجيبها واشتري مِنها، عجبني احُط مدري شبية وكإنما جاي اتزين للچني
واكو مُرطب مال شفايف شلتها داحُط منها ماحِس إلا الباب انفتح

زَعيم
سيوف كاعدة ؟

يمة اني شِفتة وإلا شايفتلي جِني لبدت بِسرعة عَ جنب الحايط، ورة الباب بحيث ميشوفني

هوَ رأسًا سَد الباب وگام يصيـح

زَعيم
استغفرالله، صدككك جذِببببب!!!!!!

اني مدري اخترع مدري اتفشل مدري شيصيرلي
سودة بوجهج يسبب مواقفج المُحرجة مَتصير إلا وي زَعيم
يمة احِس روحي متتت من الخَجل
رحت جاي اكعد سيوف
اريد احجيلها وانة ميتة خوف
وهاي تكلي عوفيني نايـمة
شوي وندگ الباب

جسمي گام يرجِف وعرفتة هوَ بس شنو اسوي

صحِت منو وجسمي يرجِف من الخوفة

زَعيم
تقدمي اريد احاجيج
تسمعيني؟

سَبب
اي اي خوية

زَعيم
تـرة البيت مو تايه وتفترين بي وين ما يعجبج بهذا اللبس، البيت بي ولد فكري بيهـا واستري نفسج ترة ابد مو حلوة يشوفونج بلبس مو لايق، احنة اولاد شيوخ وانتِ بت شيوخ وتعرفين بعَد، وفوك كل شي الله من فوك مايقبلها وهمة لا اولاد عمج ولا يگربولج، لبسج احشمي واحشمي نفسج زين واتمنى بعَد ما اشوف هجي منظر ابدددد ! والحجاب ما ينزع خارج غرفتج

من حِجة هيج ياكاع انشكي وبلعيني والعباس تعبت واني بس اترزل منة ساعة ع الفضول ساعة ع مدري شنو
ياربي هوَ انة ليش اتفشل بَس ويـا
عود اريد اخلي يشوفني بـ احسن حالاتي
ما فد يوم شافني إلا وانة باتعس حالاتي

الدمعة لاچت بعيوني من الفشلة
سكتت ماحجيت شي وخليت ورحِت
نمت بمكاني وانة تعاسة الدنيا شايلتها
واريد ابجي بكل مابية عَ الفشلات الجاي اتفشلها وي زَعيم

الصبح سمعت صوت ضَجة مادري شكو جوة
كعدت سيوف حَتى نشوف شكـو
كتلهَا عَ الكُحلة كلتلي اخذيها انة ماستخدمها ماحبها جانت قَبل روآن تستخدمها
كتلها اخاف تريدها كلتلي لا اخذتها الي ومسحت عيوني زين بـس ضل اثر كلِش حلو، لبست دشداشة من سيوف طويلة ولفيت شالي وصرت اردد ( يارب ماشوف زَعيم يارببب )

بعدنة ستونة جاي ننزل صار گدامي يريد يصعَد
باوع بطرّف عينة على عيوني وخلة وعُبر
يمة هذا شبي مو جان مؤمِن ومتدين ومدري شنو وميباوع؟
ونبي صار يخوفني هذا شبي

نزلت وشفت روآن جاية
ضلوا يحجون وياهة ومدري شنـو
من سلمت عليها
سلمت علية من ورة خَشمها
انطيتها عُذر كلت تعبانة ومالهـا خلِگ

شفت رحمَة كاعدة تسوي ريوگ وغَيث گاعِد يمها ويسمع وهيَ تسولف مدري شنو، ٢٤ ساعة تحجي بـ اقتباسات واشياء حلوة
كُل شخص بينا يحب يكعد وي رحمة ع كد ما عدها اشياء وحكم حِلوة

المطبخ حـار وبارد
ورحمة وغيث بالحار لان جانت جاي تُطبخ وانة ارتب بالثلاجة لان جايبين مسواگ
طَب زعيم دنگت بسرعة
تقَدم الي وناداني بـ اسمي

زَعيم
سَبب ؟

يمة اريد اثبت روحي ماكدر ودي الوف من الجهة الثانية واخلي واروح، الله يخليك كافي تفشلني كافي

رفعِت راسي وكتلة ها

زَعيم
ترة ماعدنة عرِس وحاطة كحلة؟

حَسيتة تدخل زايد وكُل قهرني يحجي وعاقج وجهة مَدري شبي

سَبب
ترة زودتها خوية
ماحاطة لا كُحلة ولا شي واذا حاطة فَ ماعتقد انتَ الك علاقة؟؟

عفتة وردت اطب للصالة صـار گِدامي بسرعَة وهوَ يسد باب المطبخ بطولة ومتانتة ما شاء الله ..

زَعيم
تَرة بعيوني هـاي شفتج حاطة كحلة
وهاي وينها بعيونج موجودة
فَ روحي امسحيها احسَن

باوعتلة وعيوني عَصبت وكتلة

سَبب
ترة خَيرر؟
مالك حّق تدخل بيـة

غمض عيونة، واخذ نَفس وگال

زَعيم
انتِ وين؟
انتِ ب بيتج؟
لا !
انتِ ب بيت جبُر
فَ من المفروض
انُ تحترمين هذا البيت وحُرمتة
وماتمشين بـ رآيج انتِ وبَس
اكل ما يعجبك، والبس ما يعجِب الناس

خزرتة بعيوني حَيل، اجة امير راد يمُر وخر وانة وخرت، صدك طلع مايستحي وبوجه ثاني، شكد لئوم وحُقنة
والله على عنـادة ما امسحها، هيَ مو شغلة شي بس جد ما مبينة شلـون هوَ لاحظ مادري

عفتة ومَشيت وصرت اتجنبة يجي منا اطلع منـا

الظهُر جاب علي ثنين ذبايح بُمناسبة روآن ذبحوهن وخلوا طباخ يطبخهن

روآن مبينة ولا طايقتني وحَتى تباوعلي بنظرات موحلوة ابد
عرفتهـا على زينب وهم ما لِمتها لان سيوف حاجيتلي شكد هنّ مُقربات لبعُض، وهم انة شفت شكد بفاتحتها تألِمت

بَعد الغدة گاعديـن كُلهم، رحمة سوت الجاي وانة اجيت انطيهُميا
كام زَعيم واخذ الصينية مَني
يباوعلي ويخزرني، وانة انطي نفَس الخزرة

رحت يم مرت الشيخ اريد اخذ علاوي منها شوية
كاعدة يمهُم واسمع الحَجي

علي
جدي بوية عمي اسمعوا كلكم أمير عندة حجي وياكم

أمير
جدي وشيخنا وابوي وعمامي وكل الموجودين، أحب آخذ من وقتكم شوي، لأن عندي موضوع مهم وأريد تشاركوني بي ، واريد تعرفون قبل كلشي رأيكم وشوركم غالي عليّ.

أنة تعرفت على بنت محترمة من خلال الجامعة

جبُر
اللهُمَّ صلِ على مُحمَد وآلِ مُحمَد
عود انة وصيتة ما يطيح بهل الالاعيب هذني

علي
هَسة انطي مجال يكمل ياشيخنا

امير
صدكني يا جدي، مو مثل باقي البنات. أبد ما رفعت عينها علي، ولا يوم حاولت تحچي أو تتصرف بطريقة مو محترمة. كلش هادئة ومؤدبة، ومن أول ما شفت تصرفها وأخلاقها، حسّيت أنه هي إنسانة نادرة، ومحترمة، وبيها كل صفات البنت الأصيلة.

أنا ما حجين وياها ولا صار بينا شي، بس احترمتها من بعيد، ودايمًا أراقب تصرفاتها من باب الاحترام، وأشوف بيها أخلاق وتربية عالية، مثل أهلنا. حسّيت إنه تستاهل أنه الواحد يفكر بيها بالحلال، مو مجرد إعجاب.
وحَتى من حاولت احاجيها البنية رفضت تحاجيني وحظت حاجز جبير بيناتنا وهذا الشي زاد من تمسكي بيها ..

أعرف إحنا أهل عشائر ونحافظ على العادات، وانة أبد ما فكرت أطلع عن طريق الأصول، وعلمود هيچ جيت أحچي وياك أول واحد، لأنك سندي وظهري، وإذا أنت وافقت، راح أخلي كلشي يصير رسمي وبالطريقة اللي ترضيك.

هي من عائلة محافظة وهم ناس طيبين حسب ما سمعت، وإذا الله كاتب، أتمنى تكون هي نصيبي بالحلال.

جبُر
بوية انتوا ليش تعيدون غلط عمكم الشفية محسِن؟ هم تجي وحدة غريبة علينا وتفرقنـا وتغيرة عنة، بوية اخذوا منكم وبيكم
الشين الي تعرفة احسَن من الزين الماتعرفة!

امير
اولاً ياجدي كلامك على عيني وعلى راسي بس حسب ما اعرف انة ما الي وحدة من بنـات عمي وإلا انة غلطان؟

محد كدر يحجي لان همة حاجين قبل بسالفتة وي روآن اما حاليًا ف كلشي اختلف

امير
ثانيًا جدي البنية تختلف وحبابة حيل وانة لو ما ضامنهة ما اخطي خطوة ب اول شهرين من معرفتي بيها
وانة كبرت جدي وهاهي صار لازم استقر

علي
اي وعلي شيخ رجل الدجاجة ما تحلها

جبُر
وانتَ عليوي شمدريك رجل الدجاجة ما تحلها ؟

علي
مرة شفتـها بالجامعة جدي جنت رايح لامير وهجي بالصدفة من بعيد راونياهة مبينة حبابة وعلى نياتها

صالحة
لاباس يمة لاباس
شيخ لا توگف بوجهة ماطولة هاويها خلة

جبُر
وشنو هيَ ومنين وشلون

امير
من الموصِل من بني ...

جبُر
هلا هلا جا انتَ لا هنا ولا هنا كلبك حان للموصل،؟؟

علي بضحكة
شنسوي جدي كلبنا راح رون سايد فردور

جبُر
علاوي خاف عاشگ اختها وانة مادري بعد كلبي ؟

علي ضحگ وامير تلافة الموقف

امير
لا جدي هيَ الوحيدة لاهلها هيَ واخوها، اخوها انسان مُحترم ومُحافظ ومعروف هواي دكتور مُحلل ماخذ الدكتوراه
امها وابوها متوفين من زمان، والبنية يتيمة

جبُر
ان شاء الله خير جدي لا بآس
والله لو ما مروآن الجلب انة جنت اريدك انتَ وروآن وو ...

علي
جدي وعلي انتَ على راسي
بس الله يخليك سد هاي المواضيع افضل ..

امير
جدي اكو مشكلة وحدة

جبُر
الي هيَ ؟

امير
انة اريد المشية باجر تكدر مو؟

حسين
شبيك تخبلت بوية ؟؟؟ خَل تطلع دورة سنة اختك عاد

امير
جدي انة متوازي والامتحانات جاية وماكو وكت عندي ابد وماريد اطول بالسالفة ابد وماعدي غير باجر فراغ
اما بنسبة لاختي ف اختي بكلبي ومستحيل انساهة بس انة مضطر
وسراج يدري بسالفتي كلها بعَد

سراج
صحيح شيخ، امير عندة هواي اشياء بهاي الفترة ومايكدر الا هَسة وهوَ رايد بالحلال ف حرام علينا نوكف بوجهة

امير
وهم لا صفكة ولاشي
مجرد مشية وكتب كتاب وان شاء الله ورة السنة مال زينب بيها خير وتدلل

جبُر
جدي عود انة اكول امير عاقل ويفتهم
شجاك مطنگر مثل العِبيد
ولك اول واحد بيكم يزوج
اريد افرح بي اسويلة مشية جبيرة
شني السالفة

امير
جدي عدك يوم كامل
فزع الناس وانة اشجعك بيها
الزعيم موجود ومايقصر ان شاء الله

زَعيم
صدك جذب اخوي اكلب الك الموصل كلاب وعلي

امير
ماتقصر اخوي
هَسة احنة نترخص طالعين للموصل ان شاء الله ارد احاجي اخوها حتى اخذ الـ اكيد وانطيكم خبر وان شاء الله السالفة تامة لان الولد من معارفنة بالدراسات من واحد لواحد

حجة ويـا الشيخ انُ ليش انة خو احاجي بس هوَ جان مُصر انُ هوَ الكُل جان فرحان لامير لان صراحة هوَ انسان حيل يستاهل

بَس اني جنت صافنة
عَ الي سمعتة ذاك اليوم وشلون يكول لعلي ضحكت علية
وعلى اليوم وشلـون يمدحها ومسويها ملاك كدام الكل

رحِت اغسل اماعين الجاي وصافنة
معقولة غير وحدة
او مُمكِن جان متوهم وظالمها

احجي بصوت مسموع تقريبًا واغسل الماعين
ماحِس الا عَ صوت زعيم

زعيم
شنو هـاي القابلية الي عندج تؤتؤتؤتؤ

وخلة وطلع

ياربييييييي ياربيييييي ليش جااااي يصيررررر هيـج والنبي راح اموتتتتت من الفَشلة يمة
يتبعععع
بارت طويل لعيونكُم، ان شاء الله بارت باجُر اقرى وانتقالات لاكثر مِن طرف اكثر للحقيقة 👀