رواية بيت جبر الفصل العشرون 20 - بقلم هُدىٰ آذار

مَساء الخيـر
رجعنا وياكُم بـ بارت جديد
لا تنسـون التصويت
والتعليـق مابين الفقرات
اتمنى الكُم قراءة مُمتِعَة
____________________

سَبب

رحِت اغسل اماعين الجاي وصافنة
معقولة غير وحدة
او مُمكِن جان متوهم وظالمها

احجي بصوت مسموع تقريبًا واغسل الماعين
ماحِس الا عَ صوت زعيم

زعيم
شنو هـاي القابلية الي عندج تؤتؤتؤتؤ

وخلة وطلع

ياربييييييي ياربيييييي ليش جااااي يصيررررر هيـج والنبي راح اموتتتتت من الفَشلة يمة
احسَن شي اسوي مِنا وجاي اشوفة يجي منـا اروح منا

طَبيت شفت النـسوان يحچن ويچهزن ومدري شنو

صالحة
لازم ناخذ نيشان ويانة احنة هاي تقاليدنة و عاداتنا ف كون هسة العصرية نروح نجيب نيشان البنية

رَضية ام علي و سُراج و سَجاد و ملاك و روان جانت ضايجة ومقهورة هواي لان حسب ما جنت سامعة انُ روان جانت لـ امير

رَضية
اخخ اخ جان هَسة روآن بـ بدالها بنيتي انظلمت سودة علية هسة حـال الضيم يا حالها شكد ردت احجي وياها حتى ماتريد تِسمَع من عندي

صالحة
هاي قسمتها شسوي ماتكليلي ان شاء الله ربنا يعوضها بـ وليد الحلال الي يسر خاطرها ويريح كلبها وينك يربي وترأف بحالها وتبرد گليبها
ميخالف يمة هذا مو يعني انجن ماتفرحن لابنجن
زنوبة بكلوبنـا و روينة احنة يمها وان شاء الله تتخطى هل محنة
بس مو على حساب امير
خطية الولد هم كون تفرحن ويا شوية

صَفية
يُمة والله انة ما مقتنعة بالجوازة هاي كلها ومادري الشيخ شلون قابل بيها شني بنية لا يمنة لا كربانا لا هنا ولاهنا تجي وتعيش ويانة جايبلنياهة من الجامعة

صالحة
خايبة اسكتي اسكتي
امير ماهو مراهق ولا هو صغير يعرف ويفتهم وانة عندي ثقة بي اكيد وبعدين يايمة الكلب اذا هوة فيهوة
لا يهتم لا شني هذا الكدامة ولا شني اصلة ولا شني فصلة ولا شني ماضية او حاضرة يهتم بـس ب انُ الكدامة شخص كلبة صار يمة

ضحكت وكتلها
سَبب
يُمة احسِج عايشة قُصة حب اسطورية

باوعتلي بنظرات خجل وضحكت وكالت
صالحة
يا انجبي ولج انجبي

صالحـة
منو يروح ما منو كلتهن لـ مرت محسِن؟

صَفية
ايّ يُمة تكول ما اكدر عدي دوام بس كالت اودي تبارك وياكم

صالحة
يـلة خل تجي
وانتن حجيتن وي روآن؟

صَفية
قافلة ماتريد تروح

صالحة
صيحن الهـا كولن الهة بيبيتج تريدج خل احاجيها

صاحن الهـا نزلت
وجهة احمَر احمَر دم ومبين ستوهة باجية
حجت وياهة مَرت الشيخ بس جانت رافضة نهائي

سَبب
انتِ اذا بُقيتي هيج متوقعقة على نفسج بهذا الشكِل مراح تكدرين تطلعين من الي صارلج لازم شويـة تنطين من نفسج

روآن بعصبية
والله ما ضل غيرج حَتى تنطيني نصيحة انتِ شعليج وتدخلين بينة

بهل اثناء طَب زعيم

روآن
اصلاً والله عيب عليج انة رحت لهناك بعتبار مرتة وهم ما دخلت بسالفة بيهم ضليت كاعدة بغرفتي وبس انتِ ما شاء الله متريسة ع كل البيت عبالك بيت الخلفج

زَعيم
روآن شنووو هذا الحجي شبيـج

صالحة
يمة عيب عليج سَبب صارت من عدنة وبينة شهل كلامم

روآن
لا من عدنة وبينة ولاشي
انة لو منها اكتل روحي
تيتم طفل بسببها
وشخص فقد حبيبتة بسببها
واحنة خسرنا زينب بـسببها
وهيَ بكل بساطة كاعدة بيناتنة وعادي يعني ؟؟

رَضية
منو يسمعني شكد حجيت كلها عاطت بيـة

زَعيم
هااااي شبيجن انتن صدك تحجن يُمة

سَبب
بَس تـرة انة ما الي عِلاقة بالموضوع ليش تعاقبيني ع شي اهلي سووا ؟

زَعيم
اصلاً انة كتلكم مو اهلهة مو اهلهة ليش تضلون تلحون بالموضوع

روآن
لااا اهلها بس انتَ جاي تغطيلها

زَعيم
روآن لسانج صاير حيلللل طويل شووو

سَبب
لا بس دقيقة زَعيم
يعني حَتى لو اهلي جانوا السبب انة شدخلني مثلاً واتحاسب
هسة انتِ مو اخوج الي كتل ومو كلتي انة شدخلني وليش ادفع ذنب انة

روآن
بس انة دفعتتتت الثمن
دفعتة جااااي تشوفين جاااي تشوفين شـصار بية
صاررر بية اكثر ما صار بـ اخوي
بس انتِ، انتِ شوفي روحج شوفي روحج  شلون مرتاحة

اباوعلها انفعلت حَيل وكام تصرُخ وتبجي بهل اثنـاء طَب سراج حَتى يشوف شكو ( علي وامير جانوا طالعين للموصل )

زَعيم
لا هاي اكيدددد ضاربة انعدت من آل دحام واجت هنانة تطبقهن علينة

صالحة
ولـج يُمة اسم الله شبيـج تخبلتي

سَبب
يعني مافهمت هَسة شنو ترديني اطلع من البيت والله ترة مايهمني هَسة اطلع من البيَت

روآن
لا تنزلين دموع كدامهُم وتمثلين انتِ لو صدك وصدك من اول يوم طلعتي وخلصتينـا

سُراج
لا عيب شلون تطلع هيَ دخيلة عد شيخ جبر، وشيخ جبر ما يطي دخيلة وسُراج؟ سُراج عااااادي يفقِد مَرتة ويفقِد روحة ويموت عادي محَد يحجي

زَعيم
انتَ شبيك تخبلت وياهة ؟؟

سُراج
لا ما تخبلت بس انتوا جاي تتعاملون وي الموضوع عبالك شي عادي
عبالك طير دجاجة انذبح ومات وها اها الله يرحمة شني الشي اليستاهل نضوج عليّ
ولكم ترة الراحت مرتي مرتي

سَبب
يعني لو طلعت راح ترتاح ؟؟

سُراج
عـاد ضميري مايصير يأنبني ب انّي حاط المُسبب بموت مرتي ب بيتي

من گال هيـَج زَعيم راحلة وگام يضرب عَ عقلة ويكلة

زَعيم
عقلك ضرررررب انتَ شبيكككك

سُراج
ايدك لا تمدها علية

خفِت وانة اشوفهم ثنينهم معصبين و واحد واكف كدام الثاني بعصبية

دموعي كوة كابتتهُم بعيوني وماريد انزلهن كدامهم

جاي اريد اطلع مَد ايدة زَعيم واستوقف طريقي

زَعيم
سَبب هيَ مو بس دخيلة الشيخ جبُر
سَبب دخيلتي انة وما تطلع من هل بيت تحت ايّ ظروف
والي ما عاجبة هل حجي خل يعجبّة احسن

سُراج بعصبية
بس انة ماعاجبني هل حجي شنووو يعني اطلع انة؟؟؟؟

زَعيم
صيررر خوش رجال وفكِر بعقل لك سُراج شبيك انتَ فقدت عقلك ؟؟؟

سُراج
انة مافقدت عقلي انة جاي احجيلك بمنطقية
يعني هَسة هيَ كعدتها هنانة ب بيت بي ولد شنووو منتظرين منها
اشووو انتَ حضرتك فجأة اجيت وتكل لجدي لحد يضغط ع البنية البنية متأذية ولا تحجون بـ امور الزواج ابد وياها هل فترة هوَ هذا منطقي
ضحكت عليك بشجم كلمة
هاي تريد تعيش براسنة وتكمل دراستها براسنة وتخلي وتروح
ومنو الطايح بيهـا غيري منووووووو

بهَل اثنـاء طَب الشيخ يصيـح

جبُر
شنوووو هل صوتتت شنووو

روآن خلت وصعدت
انة هم خليت وطلعت لان احِس بعَد ما اكدر حَتى اكتم دموعي

دموعي ينزلن واحس كلبي احترگ مو شلون ماچان
ما ادري شنـو اسوي بَس الي ادري بي انّي ما اريد اضل هنانة بعَد الي سِمعتة
دخلت للغُرفة وانة ابجي ورحمة جانت يمي وتحاول تهدئني

جبُر
هاااي شبيكم ولكم ليش هل صايح

زَعيم
جدددي هذااا فقد عقلة هذااا تخبل بعد موتت زينب تخبل

- سُراج ساكِت -

زَعيم
احجي ليـش ساكت احجي
والله فشلتنـا ولك رجال شكبرك تحجي وي بنية يتيمة هيج؟
هسة روآن نكول ما تفتهم نكول صغيرة نكول كلبها محروگ والصاربها موهين وننطيها العذر انتَ شني هاااا شني نكول عليك ؟؟؟

سُراج
انتَ ما تهتم شعليك شدخلك ماتحس بنار كلبي ماتحسسس

زَعيم
ترة الرايحة اختي
هيَ اختي قبل لتكون مرتك
بس هذا ما يعني انُ نعاقب انسان على غلط هوَ ماسوى
حط الله بين عيونك ولك سُراج
حط الله بين عيونك

جبُر
هسة غير نفهم شصاير كافي تصيحون واحجوا وشبيها سَبب طلعت تبجي بس لا حجيت وياها شي ولك ؟

زَعيم
اي جدي اي تكابلوا هوَ و روآن
شعدها هنا وهيَ سبب بموت زينب وكدام البت
ولك شكددد عيب وعلي لو منك يا كاع انشگي وبلعيني

صالحة
داسوا بالحجي فرد دوسة وهذا المصخم يكلها تردين تكملين دراسة براسنة وترحين حتى مو بحالنة مو عيب ولك

جبُر كام يصفِگ
عفية عفية ب ابني الدكتور عفية
هيَ هاي الثقافة مال ال دكتور ؟؟
كعدتك وياي بهاي السنين وثقافتنا احنة ولك احنة
ماخلتك تميز بين الدخيل وبين العايل؟

سُراج
شيخ انة ...

جبُر
اششش ولا نَفس اسمعلك
ولك رجال طول بعرض تصير عاطفي نفس النساوين ؟؟
ولك انتَ لوبيك خير انتَ التسكت اليحجون وترد العايل
ولك بنية يتيمة ما قاري بكتاب ربك من يكلك
( فاما اليتيم فلا تقهر )
ولك شكال كلبك وانتَ تستقويلك على بنية
والله لو انة منك؟
يا كاع انشگي وبلعيني

زَعيم
انة هم كتلة والله انة لو بمكانك اطم روحي من الفشلة

سُراج
زعيم انتَ لا تدخل ولا تبيع مثالياتك علية

جبُر
وتعلي صوتكككك على ابن عمك بوجوددددي !!!
ولك سُراجج باوعلي انة لا تباوع لزعيم
انتَ رجال لو مو رجال احجي جاوبني ؟؟؟؟
سُراج
اي جدي اي

جبُر
لا والله مو رجال وخرة بالرجال اليحجي وب بت وفوكاهة يتيمة هجي
ولك شلون عقلك سمحلك هجي تحجي
جا شكد انتَ ناقِص عقل
جان صار بعينك السوتة لبنك يالاغم

صالحة
اي وعلي البنية
تبدل وتغسل وتفتر ومداريتة مثل الماي البلصينية
تتعارك وياي معارك عليّ هاي بيبيتة اليمكم مو نفس سبب ويا

جبُر
اطلع!
اطلع برّه قبل لا أطيح مستواي وأمد إيدي عليك،
إنت مو منّي، ولا عرفت يوم شتعني كلمة رجولة
دماغ سز ...

فوك القَهر الي انة بـي نوبَ تتعاركوا بسببي
شحجي وشكولا ياربي
والله انة بهاي اللحظة ما اتمنى غير انّي اطلع من هذا البيت عَ الاهانة الي وجهولياهة

سَبب
مادري ليش جاي يحجون علية هيج والله العظيم انة شكد استحي وشكد ابتعد واحاول اكعد وحدي لو الشيخ لو سيوف لو مرت شيخ يحاجوني ويكلولي تعاي اكعدي ويانة ومن اكون وحدي ميقبلون يعني مافهم شنو الغلط

رَحمة
سَبب اتمنى متعتبين عَ سُراج
سُراج حيل متأذي
شتترجين من شخُص ميقبل اطب لغرفتة حتى انظفها
يكول ماريد ريحتها افقدها
اريد هاي الغُرفة تضل مليانة بعطري وعطرها بَس
ترة مو سهل الي صارلة والله
بس انتِ هم مالج علاقة الي صار
بس لازم تتفهمي ويتفهمج
ويجوز هسة هو متعصب متذكرها شي
هم الله يعينة ولازم نعذرة رغم كلشي
وروآن هم ترة الصاير وياهة موهين
والله حتى العقل مايستوعبة
فَ اعذريهم حبيبيتي

كلام رحمة خّفف عني شوية
بس بنفس الوقت احس كبريائي أنمس
وكلبي ما يطيني اضل يمهُم كاعدة

سَبب
رَحمة شلـون والله احس روحي ما تسمحلي بعد اضل كاعدة يمهم ع الصار

رَحمة
صراحة؟ حقج
هَسة جان اخذتج ويانة للبيت بس هل تشوفيـن
الشيخ كال للولد يجيبون كُل غراضنة عمّا يكمل البيت
لان زعيم كال طلعت اكثر من واحد شجم يوم ويخلص
ف كالوا ضلوا هنانة
اوفففف والله اني كاعدة ع عيوني نوب صارت سالفتج
بعد اكثر ضجت
بس لو ما امي

اندمجنة بل حجي اني ورحمة
تقريبًا ورة نُص ساعة ندگت الباب
طَبت مرت الشيخ كمت

صالحة
يُمة سودة علية ليش هل دميعات بعيونج
البسي شالج الشيـخ يريدج تعاي حبيبة

حَطيت شالي عَ راسي وطلعت

جبُر
ها بويـة امسحيها بوجهنة والصار ما يتكرر ان شاء الله
وانة اعتذر منج نيابةً عن سُراج
بس بوية هم اعذري انتِ هوَ هم فگد مريتة وهاي هل تشوفيها لسانهة طويل بس حبابة والله بس تعرفين حالتها انتِ وصحيح انتِ ما مضطرة تتحملين حچيهم فَ حگج علينة يابوية

صالحة
يلا ميخالف الاخوة تتعارك وي بعضها وهمة بحساب اخوانها

ابتسمت عليّ شلون يحاجي وكتلة
لا شيـخ نفس ماكالت همة بحساب اخواني ويمونون

كلتهـا بَس بنفس ضيق و بكرامة مبينة مخدوشة ..

زَعيم واگِف عَ جانِب ومدنگ يلعب بمسبحتة ..

جبُر
بارك الله بيج بوية، هسة اذا مابيها زَحمة ترحين وي زَعيم عدة شچم حچاية وياج

استغربت من گال هجي
وماعرفت حَتى شگول
كعدوا هوَ ومرتة بصالة
وزعيـم واگف
اتتفس بـ بُطئ ورفع عيونة علية وگال

زَعيم
اذا بيهـا مَجال تلبسين عباتج ووتسترين روحج زين وتجين وياي

صُفنت عليّ وكتلة

سَبب
ليش شكو

زَعيم
امشي وتعرفـين

استغربت من الطلب كلة
نوب كدام الشيخ يحجي وهُمة يشوفون وكانما يعرفون الجاي يصير

صالحة
يلة يمة البسي وروحي ويا مارايحن بعيد هاي هنا بالبستان يريد يحجي وياج كلمتين ثلاثة

طبيَت للغرفة وكلت لرحمَة
باوعتلي وصفنت مدري شبيها

سَبب
رحمة شبيج صُفنتي بوجهي

رحمة
لا ماكو شي بس اعتقد عوضج جـاي

سَبب
ههه أيست من عوض الي بهاي الحياة

رحمة
لتكولين هيج رحمَة الله واسعة
مهما ضاقت تُفرج
وكُل الجاي يصير حتى الله يعوضج بشي
تستاهلي، انتِ بس اصبري
كلة اختبار

تنهدت وكتلها
سَبب
والله تعبت... تعبت لدرجة ما بقة بيّه نفس أتحمّل بعد.
ما أظن أكو شي ممكن يعوضني، لا فرحة، لا بشر، لا حتى وقت.
كِلشي راح، كِلشي ضاع، وكِلشي بطّل يهمّ.
كل يوم أگوم وأگول يمكن يتغيّر شي، يمكن الله يبدّل،
بس لا يوم تبدّل، ولا شي يتغيّر...
صرت أشوف الدنيا سواد، والكلوب صارت غريبة،
وحتى ضحكتي، صارت بس صورة... ما بيها روح.
والله ما أدري شلون أكمّل، ما عندي طاقة،
ما عندي شي يخليني أگول "باجر أحسن".
يمكن هاي النهاية... أو يمكن النهاية أمنية.

رَحمة
انتِ متدرين شنو الله ضاملج، اني متاكدة عوضج جاي بَس اصُبري

كتلها ان شاء الله عدلت شالي عَدِل ولبست عباتي وطلعِت

صالحة
واكفلج بالباب يُمة

هزيت براسي

سَبب
عن اذنك شيخ

جبُر
اذنج وياج بوية

طلعـت لكيتة ب باب المطبخ واكف وصافُن
تقدمت تِجاهة ما جان منتبه لوجودي

سَبب
اا كملت

فز من صفنتة وباوعلي وگال يـلا

طلعنة انة ويـا ورأسًا مِشة بجهة البُستان ..

زَعيم
هسة اكيد جاي تتسائلين
شنو يريد
وليش جايبني هنا
وشلون الشيخ رُضة
ووو...
انة ردت افتح ويـاج موضوع، وصراحتًا هذا الموضوع مو سهل ابدًا وكذالك انة اعرف رآيج تِجاه هذا الموضوع سابقًا رُغم كُل شي احنة ولـد شيوخ وانتِ بعد بت شيوخ وتعرفين الاصل والمنطِق، وكعدتج بـ بيتنا غلط

تنهدت بصوت واضح وكتلة

سَبب
والله ادري كعدتي غلط واصلاً انة ما راضية ولا مقتنعة بيهـا ولا عبالك مكيفة لو ساكتة ومايهمني اصلاً حجي روآن وسُراج وكفلي هنـانة وماجاي اتقبل لحظة اكعد بالبيت وقررت بَس يكمل بيَت رحمة وامها اروح وياهن حَدما الله يفرُجها

حجيتها والدمع غرغر بعيوني تغرغر
درت وَجهي حَتى اتلافى انُ يشوفني
ماريد اكسِر كبريائي يم ايّ احد
بس احس كل شي صار فوك طاقتي

زَعيم
التفتي اريد احاجيج

سَبب
ماريد رجاءً خلي نرجع الي تريد توصلة وصلتة وهاهي هسة اريد ارجع

مسحت دموعي الي طاحوا بـ ايدي والتفتت حَتى اكمل مشي وارجع للبيت

رأسًا صار كدامي، رجعت التفتت

زَعيم
شنو نلعب لعبة احنة
يا بت الناس انطيني مجال احجي
مو حتى صبري خلص

سَبب
احجي اسمعك

زَعيم
جا هيَ هاي الاحترامات يا بت شيخ عدنان؟
من احاجيج تنطيني ظهرج؟
افة هجي المضايف تعلم ؟

حاولت اسحَب نفس من الهوى
بي برودة شوية وحلو حَيل
مسحت وجهي مرة ثانية والتفتت الة

سَبب
احجي شي

زَعيم
احد قبلي كايلج انُ عيونج حيل حلوات؟

من گال هيج انصدمت وماعرفت شحجي

زَعيم
تعاي نمشي منا، من هاي الجهة عمال اكو
واتمنى هاي المرة تنطيني فُسحة اسولف

صار يمشي وانة امشي ورا
الهوى جـان يجنن، الساعة بـ ٤ تقريبًا وبدت الدنيا تغورب وتبرد

زَعيم
خل نوگف هنا شوية
لان اذا اضل امشي يجوز نوصل لنهاية البُستان

مادري شبي جنت احسة يفكر وجان متوتر وگفنة بمكان باوعلي وگال

زعيم
اسمعي يا بت الناس انة ماريد اجر طول ولا اريد اجر عرض، انة من شفتج بذيج الليلة وكتيلي انة ما مستعدة لايّ شي عفتج براحتج، بَس هسة احس كافي، مو بس علمودنـا احنة لا علمودج انتِ وعلمود احترامج و وجودج بالبيت يكون وتكونين حالج حال ايّ شخُص موجود هنا كَ جُزء مُجزء منة مو كَ شخُص عابِر

اتمنى منج تركزين زين بكلامي وتسمعي، ورايد الجواب من عندج هَسة مو بوقت ثاني، انة من وقت ما شفتج لحد الان وانة جاي ادرسج
شفت ايجابيات وشفت سلبيات، بس ما انكر انُ الايجابيات جانن اكبر من السلبيات بهـواي، انتِ بت شيوخ وتعرفـين وتفتهمين ذبتنـا ومعزبّة نفس ما نكول، وانة شخُص عُربي وعقلة صعُب وما اعتقد احد يكدر يفهمني گدِج، انة صعُب وما انجرع وممكن اكون مُعقد بنسبة للبنات الباقي، بس راح اكون نشمي وشهِم بالنسبة للتفهمني، وانة صراحة الي ردتة ما لكيتة حَدما لكيتج ..
ما اعتقد اكو شي بيج موحلو وما يناسبني
غير فضولج الي شويـة زايد وهذا نكدر نعالجَة
بس الباقي لا بالله
ما ينشهد الج غيَر بالـ أدب وبالـ اخلاق وبالـشي الي يناسب زَعيم
وحتى اكون صريح وياج ماعتقد راح الاكي شخُص يناسبني گدِج

بنفس الوقت هذا انة واعتقد صارلج ويانة مُدة زينة حَتى تعرفين تصرفاتي و اطباعي و شخصيتي
وهماتين انة راح احجيلج عني

انة إنسان يمكن عصبي، بس عصبيتي مو ضعف... لا، عصبيتي حدود. ما أحب التجاوز، ما أحب اللي يتمادى، وخصوصًا إذا جان الموضوع على كرامتي أو على أهلي.
ديني حاضر بكل خطوة أمشيها، مو صالِح... بس أحاول اكون  من الصالحين، وأخاف ربّي، وأكو خطوط بحياتي ما أتعداها، لا بكلمة ولا بفعل. مواقفي ما تتبدل حسب المزاج، وأنه مِو من الناس اللي تلعب بمشاعر الغير، عندي شي اسمه 'وفه'، وإذا چنت ويا شخص، أكون سنده وسقفه وظهره. بس بنفس الوقت، ما أرضى أكون بخيار ثاني،
ما أحب أكون موجود بنص، يا آني بكلّه، يا آني أطلع منه.
ما أطالب بالكمال، ولا أدوّر ملاك،
بس أريد وحدة تگدر تفهم روحي قبل كلامي،
تحترم هدوئي، وتحتوي عصبيتي، وتعرف انُ القسوة مرات تطلع من حرص مو من جفا.
انة رجل واضح، صريح، وماتهمني المظاهر...
تهمني النية، وتهمني المواقف، وتهمني الرجفة اللي تصير بگلبج لمن تذكريني مو مِن الخوف بَس من الحُب بسبب العَطاء
وانة احب انطي دام الشخُص الي كدامي يستاهلني ..

والاهم بكل حديثنـا
آنة مو أيّ شخص، آنة اليد اليمنى للشيخ، وهاي مو بس كلمة تنگال، هاي مسؤولية ومكانة، ومحد يگدر يطب بيها ولا يفهمها إلا اللي يعرف شنو يعني تعيش بنص المعمعة.
آنة، أطلع، وأطب، وأروح، وأرجع، وهذا جزء من حياتي، مو مزاج ولا طشة، هاي هويّتي، شغلي، مكاني، وهواي ناس تستند علي، وانة هذا الشي ما فاصح عَنة حتى يم اهلي عدا الشيخ طبعّا، بس انة كافِل هواي عوائِل واساعد هواي نـاس فَ طبتي وطلعتي وجزء من اموالي الهم فمن تجين تكوليلي 'ليش تروح؟ وشدعوة؟ وما أريدك تطلع'،
هنا توقفين عَ خط أحمر.
آنة ما أحب أحد يتحكم بيا، ولا أحب أحد يگطع طريقي،
مو لأني عنيد، بس لأنُ الكَطعان بخطاري معناها ماكو ثقة،
وآنة إذا ماكو ثقة، ما أبقى، حتى لو گلبج كلة الي..
انة كلشي أتفهّمه، حتى الغيرة، بس الغيرة اللي بيها احترام،
مو اللي تنگلب سيطرة وتشكيك صراحتًا انة ضَد التقييد وهل تشوفيني لسة مـا متزوج بسبب الخوف ب انُ الشخص الي المفروض يكون شريك ينقلب ضدي بسبب وضعي بالحياة ..
فـ خليه واضح آنة مو حبس، ومكاني مو گعدة ببيت ومراقبة،
آنة رجال إلي اسمي ووضعي، واللي تحبني لازم تفتهمني، مو تحاول تغيّرني

عملي وشغلي شنو، طبعًا الج حّق تعرفين كل هذني التفاصيـل ما جاي احجيهن اعتباطًا، انة ما كملت دراسة لظروف جنة نعاني منهـا بالصغر، بس انة ضليت اشتغل وما استسلمت أسَسِت روحي وما استندت لا عَ اسمنا ولا عَ جدي ولا عَ ابوي حَتى
من عمر ال ١٦ لسة انة اكون بنفسي والحمدلله والشغل مشَت وياي، عدي معامل لوازم خياطة وعندي ٤ محلات مأجرهن وحاط بيهن نـاس تبيع الي ومن المعامل امول لمحلات اضافية هم، من بداية مشروعي وانة راهن نص شغلي للفقراء والمساكين، ودخل محليـن يروح الهم اما الدخلين الثانين فَ راح يكونن النة، ماراح اخليج محتاجة لشي وراح احاول اسعدج واعوضج عن الي صـار بحياتج
وبصراحة ؟

انتِ تستاهلين
وشفت اكثر مِن موقف عنج الي يخليني اكدر احجي وياج واعرض هذا الشي بحياتي عَ بت لاول مرة بحياتي، مو تكبر بس انعرض علية اكثر من وحدة و وحدة من بنات عمي لحد الان اكو كلام بس لنة ما مقتنع
كتلج عقلي صعُب وصعُب احد يفهمني
قدمتلج كل الي لازم تعرفي ولو صار نصيب ان شاء الله تفتهميني اكثر

أما بالنسبة للتفاهم، فآني بصراحة شايف التفاهم وياج، وعاجبتني، ومو بس شكل أو اسلوب، عاجبتني بروحج، بعقليتج، بطريقة حچيج، بشلون تتصرفين. بت شيوخ بعَد وانة طالب هل عقلية من زمان .
أما بالنسبة إلي، فآني چنت واضح، وگتلج على نفسي من البداية، وقدمتلج روحي مثل ما هي، لا غش ولا تصنّع.
ما حبيت ألبس قناع، لأن آنة  ما أقدّم إلّا الشي الحقيقي وكتلج كل شي بسلبياتة قبل ايجابياتة ..
أما بالنسبة للمشاعر، فبصراحة آنة مؤمن إنُ الحُب الحقيقي يجي بعد الزواج، لأن هو أساسة العِشرة والمعرفة والنية الصافية.
بس بنفس الوقت، آنتِ ما ماخذة طابوگة، لا والله...
آنة بشر، وعندي گلب، وعندي إحساس،
وإيه... أكو مشاعر بداخلي، مشاعر واضحة، من أول يوم چنت أشوفج وأراقب كل تفصيلة بيج.
يمكن انتِ تگولين زعيم متجاهل، أو ساكت، أو ما يبين عليّ شي،
بس آنة شفت كل شي،
شفت تصرفاتج، طريقتج، احترامج، هدوئج، ديانتج وعلاقتج وي ربج، وغيرتج، وحتى عنادج...
وكل وحدة من ذني، چنت أدوّر عليهن من زمان.
ما چنت احچي، بس چنت أراقب،
وكل مرة چنت ألگاج بيها، أقتنع أكثر إنُ هاي البنية تصلح تكون شريكة عمر، مو بس مُجرّد إعجاب ويعدي.
وعجبتيني... بكلشي
بطباعج، بأسلوبج، بنظرتج للحياة... حتى بصراحتج.
وآنة اليوم أحچي، مو حتى أفرّغ كلام،
لا، آني جاي أوضّح إنُ آنة فعلاً أريدج.

وآخر شي شوفي ، آنة چنت صريح، وگلت كلشي بگلبي، والباقي عليج
إذا گلتِ (إي)، فـ الخير يجي من أوسع أبوابه، وراح تشوفين مني رجال واگف يمّچ بكل لحظة، سند وظل وستر.
وإذا گلتِ (لا)، فـ آنة أحترم ردّچ، وأظل أكنّ إلچ التقدير، لأن آنة ما أفرض نفسي ع أحد
بس شهادة لله... ما چنت أشوف إلّا إنتِ، وما چنت أريد غيرچ.
وللامانة؟ طول عمري هذا ما دشت بنية بعقلي گدج ..
والله يشهد انّي ما چنت ألعب، ولا چنت أمرّ الوقت، چنت أقره بيچ عمر، وشريك، وأصيلة تِمشي وياي بدربي..
فكري زين، وردّي عليّ من گلبج، مو من تردد ولا من خوف.
آنة رجل إذا وعد وَفى، وإذا اختار ما يرجع، وإذا حطّ اسمچ بگلبة، ما يشيله غير الموت.
وهاي كلمتي، خليها ترنّ بذنج:
آنة مو مجرد واحد مرّ... آنة زعيم، وإذا صرت الج، راح أكون إلج بكل ما بيّه.
رايـد الجواب هَسة ....
بُتبعععع ...
( توقعاتكُم)

ومن بعد الي صار منو برائيكُم جنتل اكثر
امير، زّعيم، علي ؟

______________________

فَرس

فتت گدامة للغرفة وهوَ طب وراي

مادري ليـش
بس جان كُل احساسي يكول
احضني
وعبري عن الي بداخلج
ماعرُف منين اجتني الجُرأة وشلون
بس جنت اريد اعبر الـة عَن فرحتي وامتناني تِجاهة

وبشكل غير ارادي وهوَ ديسد الباب حضنتة من ورة بكُل هدوء
وهمِست

فَرس
انتَ ماتصور شلون گلبي جاي يرجِف، اني مُمتنة لكُل لحظة عيشتنياهة اليوم

التفت وبَعدني مِن حُضنة
كُل ظني حَتى يحضني
باوعلي ونظراتة تحولن لعصبية ابتعد عَني وگال

امير بعصبية
ليـش حضرتج مِن البارحة لليوم ماتردين على موبايلج ؟؟

توترت واني اشوف شلون وجهة عَصب ونكلب لِلحظة وحدة
وجاوبتة ب استغراب

فَرس
ماجنت ادري بي ويـن جنت ملتهية

امير
مرة ثانيـة حطي بالج يجوز اريد شي مُهم منج
ثانيًا انة راح اروح
تاخذلج فَد ٣ ايام وترجعين كولي اريد اقرة وابدي استعِد
وهم لا وي ايلول ولا غيرها انة اجيج
وهـا لا عبالج حُبًا بيج كُل الي صار
مُجرد كدام الناس لا اكثر
ولا انتِ ؟
ماعاد تعنيلي ولاشي
وماصرت اشوفج كدامي الا بنت لعوبة
تدرين شنو؟
هيَ مُجرد لعبة تكمل السنة وتنتهي
بس انة مُجبر مُجبر انّي امثل كدام الناس لا اكثر

دموعي ما صرت اكدر اسيطر عليهن، جَسمي كوة عايني حَتى اوكف و ادية صارن يرجفن بشكل ملحوظ

باوعتلة بكُل برود وكتلة ..
فَرس
بعُمري وبحياتي ما ظنيتك تكون بهل سـوء
انتَ كسرت فرحتي
وكسرتني
ومُستحيل اسامحك عَ السويتة
مُستحيلل

كلت هيـج ومشيت داطلع جرني من ايدي حَيل
صحت بصوت عالي

فَرس
اميررر عوفني جاي اكُلك

سَد الباب وهوَ لازم ب ايدي حَيل وعيونة كلهن حقِد

سكرت عَ اسناني بعصبية وكتلة بصوت مسموع
فَرس
انتتتت ما تفتهم دا اكُلك عوفني !!!

حَط ايدة ع حلگي وقربني الة
عيونـة مليانات حقِد وعيوني مليانات دموع

امير
ديري بالِج تحجين كَ مظلوم، ديري بالج تلعبين دور الضحية
انتِ الي خطأتي وهذا جزاة اخطائج
عيشيهن نفس ما انة عايشهن

هاي العَصبية وهاي العيون المليانة حُقد ولؤم اني ماشايفتهن ابد، ومصدومة من منو جاي يطلعن !
عيوني ما جنت اكدر اسكتهن بالبجي، وايدة انملت بدموع من عندي

وخر ايـدة وملامحة رِخّن، وعيونة نظرتلي كَ نظرة قبِل
بجيت بقوة وصرت اگح وگوة اتنفس من الخنگة الي خنگنياهة

راد يتقدم الي حطيت ايدي بوجهة

فَرس
ابد لتصيـر بوجهي
اريد التفتت ما الكاك
ما اريد اشوف وجهك بعَد ابدددد

امير
الله يلعنج فَرس
كركبتي حياتي كلها
دخلتي كَ ظالمة وخليتيني احس انة الظالم وانتِ المظلوم

طلع وسَد الباب ورا حَيل
ما مرت دقيقتين و ايلول فوگ راسي

ايلول
شبيـج دتبجين فَرس !!

اول ماشفتها حضنتها حَيل وكمت ابجي بكُل قوتي

ايلول
اسم الله اسم الله لج شكوو احجيلي شسوالج امير والله هَسة اطلع افضحة فضيحة بس احجي

ماكدر احجي ايّ شي سوى انّي ابجي وبكُل قوتي

ايلول
ونبي بعد ماعرف شسوي حبابة فَرس شبيج احجيلي

من كثر العجز الي وصلتة ايلول كام تبجي وياي ومتعرف شسوي
شويـة وسمعنا صوت ام ايلول تكول انزلوا حضروا العَشا

ايلول صارت بس تحاول تهدأني حَتى اسكُت شوية
احَس روحي مخنوگة وما اگدر حَتى اهدئ
فوك كُل شي خنكني حَيل وما خلة هوى يوصلني لمُدة زينة واني عندي ربو

گوة حاولت اعدل نَفسي واضيع بالميكب الخراب الي صـار
حاولت تقويني ايلول ونزلت

حُسام اخوية ما خلاهُم يرجعون لا هُمة ولا المشية بـدون ما يسوي عَشا للكُل وفعلاً سوا اكل يرفع الراس لكُل الموجودين بما انُ همة جاين طريق بعيد و وقت عَشا ف ماحب يطلعهُم هيج ..

حضرنا للبنات العشـا بس اني جنت مخنوگة والدمعة كُل شوي نازلة من عندي
ما ادري هاي الليلة شلـون خُلصت ولا ادري شلون ضليت كاعدة وياهن ومتحملة
صارت تقريبًا الساعة بـ ٩ بعد ما تعشوا وشربوا الجاي والمشية مشَت قبل الكُل اما هُمة فَ ودعوني وكلتلي بيبيتهم انُ سويلج مـرة ودائمًا تعاليلنـا وقت الدوام، جانوا جايبين جنط وياهم كالت انُ هاي من عاداتنا انُ نجيب نيشان للبنية

جانوا جايبين ٤ جنط بيهن اشكال و الـوان و اشياء كُلهن فَخمة وحلوة و وي النيشان ( عباية راس ) ( تخُم ذهب )
كملوا كُل شي وخلـوا وراحوا
اول ما راحوا كلت لايلول انُ اني رايحة للبيت بعَد ابد ماكدر اتحمل
ايلول كالت اروح وياج
شكدددد حاولت وياهة ماقبلت
لبست بشت فوك ملابسي وحجابي وطلعت
ردنـة نطلع اني و ايلول
ابوها شافهة

ابو ايلول
لج بابا انتِ شو كل ساع بمكان ما شفناج ولا شبعنة منج من رحتي واحنة عارفين قيمتج هههههههه
هسة ماشبعتي من فرس ٢٤ ساعة وياهة ضلي يمنة خل نشوفج ياجُر عندي دوام وماكدر اشوفج بعَد

ايلول
بابا ما اتاخر والله

ابو ايلول
ابد ابد تعاي خنشوفج باباتي

كتلها اي والله ضلي هيَ ضلت كوة خليت ورحِت
اول ماطبيت استلمني حُسام يحجي عَ المشية
وجان يمدح الموجودين ويمدح امير خصوصًا
اترخصت منهم كتلة تعبانة وخليت ورحِت لغرفتي

اول ماطبيت اجت عيني عَ الحلقة
حَقيرررر تافه لئيم وما يفكر بس بنفسة
شلت الحلقة من اصبعي وگُطفتها حَيل

جـانت اكو نار بكلبي جبيرة ومحد يكدر يطفيها
موبايلي اشتعل شعِل
رسائِل من كُل الجهات ان جان من الي بالجامعة او من ايلول
فتحت الموبايل طَبيت ع الانستكرام شفتـة ناشر صورة الة و صورة للمشية وصورة للحلقات ومحَدِد الموقع(الموصل)
وحاط الشعـر الي هوَ هدآنيا
ومبين و واضح بي اسمائنة
واصلاً مُجرد ما يشوفون اللوكيشن الـموقع راح يعرفون اني

راسًا حولت الة البوست وكتلة
فَرس
كملت ؟ يلا ارجع لوجهك الحَقيقي ...

سَديت الموبايل واني ما طايقتة نهائيًا وكُلي حُقد تِجاهة
هذي الليلة جانت من اصعب الليالي علية
جِنت تعبانة نَفسيًا بكُل مابية
وجنت ماريد غير انّي ارتاح

شفت مراسل عَ الواتساب كومة البارحة وكلهن حاذفهن
رد علية عَ الانستكرام كومة ما فتحت ولا وحدة منهن
طمنت ايلول انُ اني مابية شي كتلها اريد انام
خَطية ما عافتني إلا اكدتلها انُ اني راح انام

بس اني بيومها؟
عيني ماغُفت دقيقة
وجانت الدنيا مسوّدة علية بكُل مابيهـا ..

فقَدِت شغفي بكُل شي واحس صابني برود فَضيع وحَتى مابية حيَل احجي وي احد
الصُبح جنت كاعدة و ويڤان و حُسام جانوا بالدوام
موبايلي قافلتة ومالي خُلكة

اجتني ايلول الصُبح ما حبيت احجيلها عَ الي صار بالتفصيل حَتى لا تحقد اكثر خصوصّا اخر فترة هيَ واستاذ امير كُلش جانت متوترة علاقتهم، رُغم بالبداية جانت حيل ودّية وحلوة

راوتني مسِجات الطلاب وشلـون الاغلبية مباركيلة
وكعدنـا نحجي على البارحة وشلون جان

ايلول
اني ماضحكني غير العباية الحاطيها يعني يردوج تلبسين عباية وكذا

فَرس
والله لو اموت ما البسها اطلع جني مخبلة بيها يمعودة

ايلول
بس للامانة تدرين توقعتهم موهيج
يعني تـرة النسوان والي جابوا والي نحجة وكُل شي جان مرتب حيل اني جنت اظنهُم هيج عرب وريف وكذا ماتوقعت يكونون هيـج مُثقفين
وهاي المرة بيبيتهم يا الله شكد طيبة وحبوبة
بس هذني الثنين امهات علي وامير ماحبيتهن

فَرس
اي مبينات مو كُلش
أُنفة

كاعدين ونسولف بتفاصيل مال البارحة واكلب بالصور الي نوخذن
كُل صورة بيها شي حلو عدا صوري وي امير
شكد جانن يبينن انُ هنّ بيهن مشاعر
بس بالحقيقة مجان اكو ايّ مشاعر موجودة

حَتى رغبة وحيل لموبايلي ما الي فَ ضليت ب اغلب الوقت سادة الموبايل صدمني بجرأتة مِن اجة حُسام جان يكُلي امير يكُلي ليش ماترد علية خوما بيها شَي، سالني اذا صاير شي

تحججت الة بموبايلي ومدري شنـو

الظهر جانوا نايمين انصدمت من طب حُسام لغرفتي وجان معصُب

حُسام
اكُلج هاي شدتغلي؟؟؟
شنو فَرس جانت مراهنة عليّ شنو بينكم علاقة مدافهم شي

جِنت نايمة عَ فراشي من اجة وكال هيج انصدمت وكمت من فراشي

سويت روحي ماعرُف وكتلة ش شنو؟

حُسام
هـاج شوووفي شنو هاي الخرابيط

قريت رسالتها كاتبتلة انُ كُل الي بينهُم جذب ونفضحوا بالكُلية وطاريهُم عَ كُل لسان ووو.. ودازتلة رسائل بيناتنة شلـون اكُلها اجيب امير ومدري شنو

حُسام
هذني شنووو رسائل

فَرس
حُسام كُلهن جذب اكيد غيرة

حُسام
اني هم كلت هيج بس رقمج هذاااا فَرس رقمج تعرفين شنـو رَقمج

فَرس
حُسام صدك مو الي هاي المُحادثات

حُسام
فَرس اني راح اخابر امير واتفاهم ويا و والله و الله اذا عرفت هاي المُحادثات حَتى لو بالماضي فَ ما راح تلومين الا نَفسج سمعتي ؟؟

سكتت بس دموعي نزلت كالعادة
احس كُل الي صار اكبر من طاقتي بقاطات ومالي خُلك اتحمل ايّ شي بعَد

خابر امير يمي

حُسام
السلام عليكُم

أمير
وعليكُم السلام ها خوما فَرس بيها شي

حُسام
شمفاول عليها شبيك ناز

أمير
ها لا مو وضعها البارحة ماعجبني جانت تعبانة

حُسام
فَرس بخير امير بس هسة صارت سالفة قلقتني الصراحة
اكو مُحادثات هَسة وصلتني من رقُم مجهول
-وحجالة السالفة-

طبعًا الصوت جان مسموع واسمع كُل شي

امير
حبيبي حُسام هذا الشي وارد انُ يصير وعرفت راح يصير وتكلمت مع فَرس مُسبقًا بهذا الشي وكتلها مُمكِن يصير وصار
وهذا الموضوع ما الة ايّ صِحة ابدًا

حُسام
ورقم فرس ما اني شفت بالفيديو رقمُها

امير
اكدر اكول الك وانة مرتاح انُ كُل شي مُفرك

حُسام
مصوّر فيديو أمير شلون مُفبرك حسابها وصورتها ورقمها وكل شي

امير
عزيزي حُسام يعني انة خوما فَرس ضاحكة علية وكل الي صار البارحة كدامك؟ شنو هيَ لعبة ؟ المشية والعالم وعقد القُرآن وكل شي
هذا الشي ما الة وجود وانة احب اختك بالشكل الي ما تتصورة واجيت من الباب وخطبتها ورجاءً انة الي يمك طلب ايّ حساب نفس هذا يوجه الك ايّ رسالة احظرة مُباشرتًا لان نفس ماتعرف انة بالكلية ووهواي ناس تحب تخرُب

حُسام بين المقتنع وبين الما مقتنع
بين الي يشوف الفيديو الي مصورتة هيَ شلون مُحادثاتنا اني وياها نوب راسًا تطب عَ حسابي وكُل معلوماتي تظهر وبين امير من كالة اني شلون اعرف هيج شغلة واجي واخطبها ف جانت اكو لخبطة يمة بس جان شك حَيل قوي
والله احِس حَتى طاقة ماعندي بعَد حتى اسوي ايّ شي

سولفت لايلول ع كُل شي
وهوَ ضل يلح علية ب انُ شبيج وليش كاعدة وحدج وليش هيج وجهج

قررت انُ ارجَع احسن شي لازمني راحة ولازمني اكون وحدي بعيدًا عن انُ شخُص يسالني شبيـج سولفت لايلول وكالتلي تمام بس اريد اشتري ملابس لان ماجان عدها ملابس مال مُحجبات
طلعناه بساعتها اني وياها واشتريت وجبة ملابس حلوة الي وهَي هم اشترت واتفقنا اليوم الي ورا نروح
اما بنسبة لامير فَ مجنت افتح مسجاتة اساسًا وحَتى اكون صريحة مجان يتناولني فضول اساسًا تِجاهة خصوصًا بعَد الي صار ..

توجهنا باليوم الثاني وگضيناه اليوم كُلة طَريق ف جنت حيـل تعبانة، الظاهر امير سمَع من علي انُ احنة راجعين

بساعتها موبايلي ما سكت من المُخابرات والرسائل من عندة
قررت افتح الرسائل واشوفة شَبي

نفس الكلام، نفس السوالف، نفس اللوم وماكو ايّ شي جديد عداه

اخُر رسالة

امير
انتِ شحاسبة نفسج تتصرفين بكيفج تطلعين بكيفج ترجعين بكيفج وفوك كل شي ماتردين عَ ايّ رسالة ادزها صارلج ٣ ايام
اكدر اعرُف سَبب مُبرر للجاي تسوي ؟

دزيتلة
بِما انُ الشي الي بينة مسرحية ف يُفضل كُل شي يكون بي تمثيل، مو حضرتك تريد تمثل حَتى بهاي السوالف انتَ ما الك دخل بحياتي ولا تحاول تفرُض علية اشياء لان بنهاية كُل شي عِبارة عن مسرحية وبَس ..

امير
لا تخليني اطلع عن طوري هذا الاسلوب ما تحجين بي وياي فهمتي فَرس ؟؟

فَرس
مافهمت ولا راح افهم وحياتي لا تدخل بيها ومالك ايّ دخل ب اي شي يخُصني
ولتضل تراسل حُسام كُل ما مارد عليك اني ماعندي شي مُجرد كارهتك وماريد ارد عليك

امير
فَرس ترة مو اني التحجين ويـا هيج
انتبهي كلِش زين لكلامج
و اوزني قبل لا تحجي
وإلا ما يحصَل خير

دزيتلة استفهام عَ اخر رسالة الة

امير
قبل امتحانات المِد يردون من عدنة درجات تجون انتِ و ايلول عُكبة للجامعة تمتحنون وي المرحلة الاولى عدهم امتحان
لمادتي ولمادة اُستاذ حَيدر
واقري زين درجاتجن ثنيناتجن موزينات

مارديت عليّ بس كلت لايلول
اليوم الثاني كعدنة قُريناه المادتين سوة

ماراسلتة اني ولا حجيت ويـا خَليت ايلول تحاجي وتفتهم من عندة الوضع ويمتى و وين الامتحان
هوَ هم شرحلهة كُل شي

اليوم الثاني كعدنة دنروح للجامعِة
لبست بنطرون جينز هاڤ(عريض) اسود
وتشيرت طويل اسود، جان شوية ضيق علية وتقريبًا يغطي الورِك بَس ولبسِت حذاء حمرة وشال اسود
وجهي جان حَيل تعبان، من البجي الي باجيتة طول هاي الفَترة ف كثرت من الكحُل وحطيت حُمرة حَمرة حتى اخفف البُهتان الي صـاير بوجهي

ايلول
لا هَسة صدُك شكلج شكل المخطوبات ههههههههههه
لج حلقتج ويـن

فَرس
مدريني گطفتها بغرفتي

ايلول
خرب يومج كدام الطلاب يمعودة

فَرس
هسة اكو طلاب مداومة قابل

مشينـة للجَامِعة وجان الامتحان بقاعات الاولى الصيدلة لان هُمة نظامهم يختلف عن نظامنا ف جانوا مداومين

اول ماوصلنـاه للمكان انصدمت ب امير واكف وي بنيـة

ايلول
هاي مونفسها الي مَرة اجتِ وطبت للقاعة مالتنة؟

فَرس
لا مونفسها بس تشبها اظن

اجت عيونة مقابيلنـا باوعلي مِن فوك لجوة بصدمة

فَرس
اكُلج هذا شبي ديباوعلي هيج
حسسني ملابسة شي
ترة لبسي نفس كُل مرة

ايلول
لانج طالعة حلوة اليوم زايد

تقدمـنا تِجاهُم وكلنـا مرحَبا

أمير
اهلاً، شَمس اقدم الِج فَرس خطيبتي

كال هيـج وهوَ يجُر ايدي ويوگفني بصفـة

أمير
فَرس اقدم الج شَمس بنت عمي

فَرس
اها بنت عمة وكُل هاي الميانة؟
توقعت اقل شي اختة موشي ثاني

سلمِت عليها والبنية جانت لطيفة باركتلنـا عَ الخطوبة بكُل حُب و وِد

امير
عن اذنكُم اريد احجي وي فَرس شوية

جَرني من ايدي ومشة بية لمسافة شوية
اباوع الكُل تباوع النة
خصوصًا البنات
هاي عود مو طلابنا وميعرفونة وهيج
لعد اذا طلابنـا شلون؟

اخذني لمكان قريب بس جان مابي ناس قليل ما نـاس تجي

أمير
اولاً وين الحَلقة ؟؟؟؟

فَرس
ما ادري

أمير
شنـو مادري ؟؟؟ جاي اضحك وياج اني مثلاً شهل كلام السخيف ومن يمتى نزعتيها

فَرس
من اول ليلة نزعتها بعَد شتريد ؟؟

أمير
وهيج بـ كُل بساطة جاية وتكوليلها بوجهي ؟؟؟
الحلقة ما تنزع فهمتي !!!
اليوم انطيج حلقة تحطيها بـ ايدج وممنوع لايً سبب كان تنزعيها

جان لابِس بنطرون اسود و تشيرت اسود وكوت اسود لان ديسمبر والدنيا باردة خصوصًا الصُبح

نزع الكوت وانطانياه

فَرس
شنو هذا ؟

أمير
البسي

فَرس
بس ماعتقد كتلك بردانة؟؟

أمير
بس ماعتقد كتلج حَتى لتبردين ؟
لبس هيج بعد متلبسين فَرس
لبسج حولي كلة لفساتين واذا صايات بعَد احسن

فَرس
هه شنو عشِت دور وبلشت تتحكم؟

أمير
فَرس ليش تعصبيني ؟ الامتحان بعدلة بَس ٥ دقايق البسي احسَن

فَرس
بس كتلك ما البسة

أمير
فَرس لتحطين راسي براسج البسي كلت

كال هيج وهوَ يخزرني
اباوع اكو ناس صارت تمُر وتباوع باستغراب
اخذتة بانزعاج ولبستة
غَطيتت بي وطلعت جني مخبلة
جاي اريد انزعة لزم ايدي

أمير
ممنوع ممنوع

فَرس
امير وخر عني مدتشوفة شلون جبيررر

أمير
ايّ احسن كلششش احسن هذا القياس المُناسب الج واذا ردتي تشترين شي اشتري نفس هذا لتشترين عَ قياسج

فَرس
انتَ صدُك تحجي مارررريدة اريد انزعة

أمير
لتحاولين لان بدون جدوى

فَرس
اني مو عَ كيفك كتلك ماررريدد وخر ايدددك عني

أمير
شنو تردين تتماطلين وياي انتِ ؟؟
بابا العبي عَ كدج ايدج بكبُر اصبعي الجبيـر ترة وتردين توخريها منج؟

فَرس
استغفرالله يلا وخر اريد اروح

أمير
اصبري

مَد ايدة لجيب بنطرونة طلع كلينكس

أمير
هاج

فَرس
ماريد شكرًا

أمير
امسحي الحُمرة الي حاطتها

حجيت ويـا بنفاذ صبُر واني احس اريد اطُك من القهر عَ السوا بية احس لوبيدة ينزعني الكعب ويلبسني حِذائة حَتى يرتاح
فَرس
اميررر كاااافي

أمير
فَرس تمسحيها لو اتصرف اني ؟؟

فَرس
لا والله يعني شنو تصرف انتَ !

أمير
امسحلجياهة بيدي وافشلج كدام الكُل والله !
يلا امسحيها

مروا مجموعة ثانيـة من عدنة
سلموا عليّ وراحوا

أمير
اليوم اجيبلج حَلقة تلبسيها وماريد تنزع ابددددد
ويلا هَسة امسحي هاي الحُمرة خلي ندخُل ماضل شي

شفتة مُصر حيل و وقت ماضل للامتحان اخذت منة الكلينكس بعصبية وصرت امسح بالحُمرة

فَرس بعصبية
وهسة تماممم ارتاحيتتت؟؟؟

مَد اصبعة مُباشرتًا لوجهي
من لمس وجهي احِس جسمي صارت بي كهرباء
مِسح طرف شفتي وگال

أمير
ولو اكو بعَد مُلاحظات بس يلا بعد متلحكين لامتحانج

كال هيج وجر ايدي ومشة بسرعة عِطت ( اميرررررررر )

أمير
هذا الكعب شنوو؟ نوب بدون جواريب واحمر !!
استغفرالله فَرس هذا اللبس ممنوع تعيدي ممنوع !!

فَرس
اعتقد لوبيدك تخليني انزعة وتنطيني حذائك

أمير
لو عندي شي البسة مجنت اتردد

فَرس
و عَ اساس اني حسمعلك

أمير
لج طلعتي راعية لسان وانة مادري ؟؟

باوعتلة باستهزاء وسكتت
ردتة يهِد ايدي ماقبل
طبينـة جان الكُل بمكانة

انتبهت انُ موبايلي بجيبي وقلم ناسية اجيب همسِت لامير
اخذ موبايلي وراح لجنطتة طلع منها قلم وانطانيا

جان واكف أُستاذ حَيدر و أُستاذين بعّد
عرفهُم علية وهُمة باركولنـا

ماعاولت اكعُد بمكاني
كُل الانظار جانت علينة
واحس نَفسي ميتة من الخَجل

وزعوا الاسئلة وجانت دمِج اسئلتهُم سوى مدري شلون مرهميها نُص لهذا ونُص لهذا
جنت قارية بس مادة أُستاذ حَيدر لان من فتحت مادة امير انسدت نفسي
اما ايلول فَ عكسي
بس المُشكلة كعدوها بغير مكان عني

حَليت لأُستاذ حَيدر كُل شي لان حظي جان حلو ساعتها، ايّ شي قريتة اجة، اما أُستاذ امير فَ عفت كُل شي فارغ
كمِت حَتى اسلم الورقة عمدتًا رحِت انطيتها لأُستاذ حَيدر
اباوع لامير يباوعلي بعصبية
ابتسمت بخُبث وطلعت انتظُر ايلول
ورة شويـة طلعت

ايلول
ها شلونج؟

فَرس
جاوبت كُل الي جابة اُستاذ حيدر سهِل

ايلول
انتبهتي شنـو جايب اُستاذ امير ؟
جايب الشعر الي هداجيا بيوم عقد القُرآن؟

فَرس
صدُك؟؟
مادري اصلاً ماقريت اسئلتة

ايلول
والنبي متتت ضحِك ساعتها

فَرس
ديلا خلي نرجَع

ايلول
لج هذا شمسوي بيج
الغيرة العراقية صعدت عندة لوشنو

فَرس
عزااا ذكرتيني نسيت شكلي شلون طالعة
دمشي امشي خل نرجع

ايلول
قبل لا اطلع كلي كولي ل فَرس تنتظرني انطيها الحقلة

فَرس
اهووووو هذا شبي دمشي امشي عوفي وحدة يحجي

أمير
منو الوحدة يحجي

نزيت واني اسمع صوتة

ايلول
ميحتاج الكُم DNA واضح انكُم اولاد عم من سالفة انكُم تجون وكت ما ينحجة بيكُم

ضحك وگال الها

أمير
نعجبج احنة

ايلول
لااااااا كُلشششش

فَرس
حيللل حيلل

أمير
هسة يلا امشوا خل انطيج الحَلقة

ايلول
اني اريد ارجع للسكن تعبانة مالي خُلك

أمير
براحتج انة هم ماعدي شَي وياهة بس نشتري حَلقة وارجعها للسكن لان حضرتها عايفتها بالموصل

فَرس
خليها بغير وقت
تعبانة اريد ارجَع

أمير
ابدًا ماكو تأجيل مُستحيل ..

فَرس
ايلرل لعد روحي ويانة

ايلول
شنو مخبلة اطلع متشوفين الشمس بدت تطلع
رايحة للقسِم والله حَيل تعبانة مومال اتأخر ابـد

مشيـنة سوى بالبداية لان جان طريقنـا سوى حدما وصلنـا للكراج كُل واحد اخذ سيارتة وراح

أمير
شوفي فَرس

فَرس
ماريد اشوف شي

باوعلي صَفح وخزرني خزرة قوووية
أمير
فَرس هاي اخُر مرة تحجين وياي هيج
قسمًا بالله اذا كررتي قلة الادب هاي مراح تشوفين نفس امير كدامج

فَرس
ليش مثلاً اني جاي اشوف نفس امير الي اعرفة مثلاًً؟؟؟

أمير
امير الي تعرفي انتِ موتتي بيدج ترة بيدج
ترة والله المثلي مالة دخل بيج بس انة ترة سترتج
ولو ما اخاف الله مجنت اسوي هشي بس
( مَن ستر مؤمنًا سترهُ الله في الدنيا والاخرة )

هوَ يحجي هيج واني مصدومة منة
باوعتلة وكتلة بكُل برود

فَرس
ليش محسسني شو شمسوية وانتَ سترتني
انتَ مقتنع بكلامك هذا ؟

سكت ماحجة شي
التفتت للمراية بكُل هدوء ودموعي تنزل

فَرس
رجعني

أمير
ماضل شي انزل. اجيب حلقة واجي

فَرس
بس اني كلتتتت رجعني تررررررة !!!

أمير
وليش جااااي تصيحين هيج ؟؟؟؟

التفتت الة ودموعي تطافر مني وكتلة

فَرس
شوف امير اذا ما ترجعني والله والله اذب روحي هَسة منا رجعني بَسرعة

من شافني هيج عصبية وشلـون ابجي سكت وفر السيارة
ماحجة ولاشي ولا حجيت شَي

وصلنـة لمكان السكن جان اكو مِثل البناء قريب وسادين الشارع، كتلة عوفني اني انزِل اتمشى هوَ هم وكف سيارتة نزلت وراح ..

گلبي محترگ وروحي رايحة احس بعد مُستحيل اطيق امير بعد الي صار ومُستحيل شي يجمعناه بعّد
هاهيّ كُل شي بينا انتهى من اليوم هذا ..

دامشي وشفت سيارة ايلول مصفوفة عرفتها هنـا

اول ماطَبيت للسكن حَسيت اكو ريحة حرگ والريحة قوية جانت بس مجان اكو احد لان الاغلبية ستوها جاية من دوام واكو مجايين اساسًا، رحِت لغرفتنا لكيت ايلول ماهيَ
بس لكيت ملابسها مطلعتهن والبرنص ماهوَ عرفتها جاي تِسبح

كمت قفلت الباب وشغلت السبلت لان جنت محترّة
لابسة كون والدنيا شمست حسيت روحي ميتة الحَر

اول ماضغطت عَ السبلت ماحسيت إلا صارت طگة بي
والكهرباء كام تنطي وتاخذ وصار يطلع السبلت صوت مُرعب

من صار هل موقف احس رجلية بعد مايعينني امشي ولا اعرُف وين البد خاف نار تطلع منة
كمت اصيـح حَيل ولبدت بين الكنتور وبين الحايط
ما حِس إلا واني اسمع صايح بنات ثانين وصايح لـ ايلول

سمعت صوت بنية عشوائية وهيَ تكول ( السكن احترك الكُل تطلع )

الغُرفة دخنت اريد اعبُر للباب ماكدر، عيوني صرت كوة اشوف بيهن من كمية الدُخان الي احتبس بداخل الغُرفة
وفوك كُل شي كمت اكح حيل بسبب ضيق التنفُس الي صار يمي

سمعِت صوت ايلول وهيَ تدك الباب وتنادي بـ اسمي
اريد اكوم ماكدر
احس عيوني غوشن وبلكوة صرت اشوف المكان

حاولت اكوم اخطي خطوة بَس وكعت
بهاي اللحضة ماصرت اتمنى غير انّي اتنفس
اريد هوى اريد هوى
وعيوني مفتحتهن عَ النُص
بهاي الاثناء اني كوة فاتحة عيوني بـس اسمع الاصوات

سمعت صوت ايلول وهيَ صاحت

ايلول
اخخخخخخخخ احترررركت ....
يُتبع ..
* هاي حادثة حقيقية صارت بـ احد الاقسام الداخلية في الجنوب ..

______________________

ايلول
* اغلب الاحداث الي صارت وي فَرس صارت وي ايلول بالموصِل ف راح اكتفي بذكِر تفاصيلها وي عّلي بـس ..

من بعَد ما جِنة كاعدين بالـ مطعم واجة علي وامير انصدمت مِن وجودهُم
ونزلنـا اني وعَلي جوة

علي
شنـو هذا الملاك الواكف يمي شنو هذا الجَمال بَس
سطرتيني سطر ايلولي

ايلول
ايلولي شنو انتوا شنو شعدكم هنا وشِسون ؟
حَتى للموصل لاحكينا ؟؟

علي
لج لو ترحين لنهاية العالم هم الحكج، القطب الشمالي تندلي ؟ لو ترحيلة هم اجي وراج

ضحكت عليّ وكتلة

ايلول
هسة دحجي شنـو سالفة

سولفلي عَ سارة

ايلول
اخ يهسارة هـاي والله ودي اموتها تموتتتتتت

علي
جا بَس حجي يبعد كلبي ؟؟؟
ولج من تداومين اريدج تلعبين بيهـا جولة وانة وراج لتخافين من العواقِب هاي فد وحدة صلفة المُشكلة والله بنية ما اكدررر اتخذ اجراء بحقها بنية هـاي بنهاية

ايلول
لا والله اني اعلمها اصلاً بَس ارجع اتصرف ويـاها

علي
اي طلعيلي مهاراتج ولا صلافتج بَس وياي
تعاي تعاي اليوم ليـش كسرتي سيارتي هجي ؟
شاهد الله سيارتي راح تتكسر فردور من وراج ولج انتِ شني متكليلي شني، شي ضاربتني بكلبي شي ضاربة سيارتي شتردين انتِ عمي

ايلول
شريد منك اريد اكتلك وارتاح

علي
هوَ انتِ كاتلتني اساسًا
اكِلج ايلول ابوج دكتور شنو؟

ايلول
جراح

علي
اكلج عندي صديقي خطية محتاج جراح اعصاب ومدري شنو هيَ يم ابوج مو؟

ايلول
اي هوَ بابا جراح اعصاب

علي
ايييي رحم الله والديج اجت فيت الحمدلله شوف شوف شلون نيتنة صافية

وين عيادتة خَطية خل ادلي لان والله انة معجب بذكائج هواي ف اكيد ابوج نفسج

ايلول
اي والدليل هوَ بالعيادة وانة بالجنوب يمكم هههههههههههه

علي
شنو قصدج احنة اغبياء

ايلول
لاااا اني الغبية محد بيكم غُبي المُهم عيادتة بـ .....

علي
ها خوش حتى اكلة ان شاء الله

رحـنة للبيت ساعتها - وانتوا تعرفون شصار -

اجة بابا بليل و فَرس فوك صعدت
ضليت يمهُم شوية حَتى نسولف

ابو ايلول
اليـوم الله سترني طبعًا مَدري شلون جنت دايخ مدري شنو والله وسويت حادث وي ولد وخطية مردت سيارتة مرد

ايلول
يا بابا عَزة وتالي شصار خوما تأذة

ابو ايلول
لا والله ما تأذة بَس هوَ جان ولد مؤدب مو شلون ما جان ومبين عليّ ابن خَير كتلة اعوضك الي صـار ماقبل ابد
هوَ ولد من جنوب والله اكلني وشربني بكلامة الحلو

ايلول
ميخالف بابا جان لازم تعوضة خطية

ابو ايلول
لا والله ماقبل شكد حجيت ويـا
وفوكاهة هوَ عزمني عَلى جاي واصر
كالي احنة نعرفك ومسوي عملية مَدري المن
الظاهر مسوي عملية لاحد اقاربة
بَس غريب ولا اتذكرتة
شكد حجالي عنة ماتذكرت
مع انّي مانسى مرضاي غالبًا

ام ايلول
اني سامعة الي يدعمون هُمة يعزمون ويتعوض الهم بس ما شقت العكس ههههه

صعَدت بعدها يم فَرس
خطية هيَ نامت واني ضليت اختـار لباجُر
شوي وراسلني عَلي
طاگ صورة هوَ وبابا وثنينهم يضحكون وكاعدين يشربون چاي

ايلول
هااي شنووو

رأسًا خابرني، رديت

علي
جا غير ابوج دعمني

من كال هيج بديت اربُط المواضيع سوى من سألني عَ عيادة بابا وين ومن بابا كلي واحد دعمني وخوش ولد وعرفت المقصد من كل شي

علي
ولج ابوج صاكككك
وانة اكول شنو سررر هجمال كلة

ايلول
علي شهل مهزلة؟؟؟؟؟
يعني انتَ عرضت حياة الاثنين بالخطر علمود سوالفك السخفية !!

علي
شبيج انهديتي علية شبيج
ترة الحادث صار صدفة وابوج غلطان
شسوي

ايلول
اها صدفة متاكد؟؟؟؟

علي
لا مو صدفة انة جنت مقرر اسوي هجي
جاي امهد الطريق لابوج شبيج ههههههههههه

ايلول
ترة مُستفزززز وماكو ايّ شي يضحِك بالموضوع ابددد ابددد ابددد

علي
تدرين انة ويـن؟!

ايلول
وين !

ايلول
جوة بيتكم جاي اشتم ريحة المنطقة
احسها شايلة ريحتج

عندي شباك بغرفتي جبير واكو بلكونة هم، هل شباك مُطل عَ البرة يعني اكدر اشوف كُل البرة من عندة

فتحتة داشوف شفِت سيارة علي واكفة
بدة يأشرلي بالهورن مال السيـارة

علي
الله هسة شيصيـر لو بيتنا مقابيل بيتكم هيج
جان اشبع شوفففففف بيج
شووو اوكفي ولج اوكفي

اباوعلة نزل من سيارة ورفع راسة للبيت المقابيلنة

علي
ولج ذولا عدهم غرفة مو تفتحين الشباج طبي طبي وسدي الشباج

ايلول
بنية بالغرفة ترة

علي
حَتى لا
لا واحد يجي دطبي طبي

طبيت وسديت الشباج

ايلول
علي حباب لا تسوي هيج سوالف مَرة ثانية يعني لو احد بيكُم لا سامحَ الله متأذي انتَ او بابا شحجي اني مثلاً

علي
تخافين علية؟

ايلول
مو موضوعنا هذا

علي
كولي اي لولا؟

ايلول
بصفتك صديقي فَ ايَ ليش لا

علي
هم كالت صديقي اويلي عليج

ايلول
علي روح عني ونبي وراي كرمة تجهيزات والصُبح عندي كووومة طلعات اروح للصالون اروح اجيب البدلات اروح اسوي هوووواي سوالف فَ حباب عوفني

علي
الصبح وياج انة وين ماترحين اروح وياج
وين ماتحطين رجلج تلكيني بوجهج

ايلول
نفس اليوم انتوا شمدريكم احنة بهذا المطعم

علي
والعباس صدفة فلا ندري جاي نمشي وفجأة اشوف كارثتي تتنقل كدامي والله ما جذبت من سميتج كارثتي المُتنقلة
المُهم باجر اريدج تفريني بالموصل اريد اشوف شبيها مابيها صارلي هواي ماطابلها من ٢٠١٦ اخر مرة اجيتها

ايلول
علي عندي فرة هواي وبعدين سوالف بنات انتَ شدخلك

علي
جا انة شعلية
انة المُهم افتر وراج
حارس شخصي اعتبريني
اشيل غراضج مثلاً ؟
خرب عرضج شتردين بعَد وين لاكية هجي واحد

ايلول
اممممم ترة من ٧ عندي كعدة

علي
ميخالف ويـاج

كتلة تمام واتفقنـا عَ الوقت ورحت اكمِل
استغرق وياي الموضوع لحد الـ ٤ الصُبح يلا نمت
والساعة يـ ٧ كعدت فَ جنت ميتة ميتة ميتة نُعاس

ماحبيت اكسر بـ فرس ابدًا وحبيت كُل شي ارتبة ب احلى صورة مُمكِن، واختيارت كُل شي بعناية وكإنما داختار الي
بنهاية فَرس معصبة وضايجة بس مع هذا عندي أمل بـ أمير وبحُبة تِجاهة

جان علي جاي بسيـارتة فَ رحنة سوى بيها

علي
هلا يالتارس عيوني بحنانة
هلا يالمحَد يصير بمُچانة

ايلول
مُچانة شنو خو كول مكانة واسكُتت

علي
اسكوتتت اوي عيني فدوة للمغندب شبيج من الصُبح

ايلول
منايمة بس ٣ ساعات ياربي شكول عليكم

علي
يلا ان شاء الله فرس تردلجياهة بعرسج

ايلول
ماعرس اني
اسكُت عني علي

علي
اويلي عليك علاوي
جا هوَ هذا حظي ؟

ايلول
شبي حظك؟

علي
عندي حظ الدنيا كلها دامج وياي

ابتسمت من كال هيـج

علي
اهم شي ضحكناج
الباقي ينحل مهمّا جان جبير
يلا ويـن انطلاقنا ؟

بالبداية تنزلني يم ...
اريد اخذ من عدهن موعِد حَتى يجنة البنات للبيت

علي
عفية وعلي سنعة شني صالونات شني دنيا يجنجن للبيت وها اهـا

نزلني يمهُم اخذت موعد بالگوة صعَدت

ايلول
هسة نروح لـ ..... حَتى اجيب فُستاني وفُستان فَرس

علي
اااااخ اخخخخ

ايلول
ها مليت؟؟؟؟ مو كتلك عندي هواي شغلات روح

علي
عمت عيني اذا اضوج انة منج
بس هجي فكرت بشغلة
هسة جاي اكول هنيال امير
كون الله يسهلي واصير مكانة
الا اسجد لربي شكر ورة كل صلاة لو صارت

سكتت ماحجيَت شي

علي
ماناوية تحنين علية؟

ايلول
علي حباب لتجيب طاري هل موضوع نوب من صُبح ومن دون شي سترس والدنيا محترگة

علي
بعد طولي ام السترس
سترج الله بحق ابو فاضل العباس
ولو انتِ مستورة وتخبلين صايرة بس تحتاجين تعديلات

ايلول
خلي تعديلاتك الك وامشي يلا

علي
ولج يمصگوعة شني سايق عدج عد الخلفوج
تتأمرين علية تأمُر
تالي وكتك يعلي تالي وكتك
يلا ميخالف تمونين تمونين

رحت اجيب الفساتين وهنـا تحسنت نَفسيتي حَيل
فُستان فَرس جان يجنن بمعنى الكِلمة
اما اني فَ جبت فُستان ضيق جوة الركبة اسود سادة مابي ايّ شي مُجرد بدون اكمام و جوة الرُكبة

علي
هـا شو جاية تضحكين

ايلول
حيل حيل حيل حلوات طلعن

علي
خل اشوف مالتج بلة

راويتهيا بالصورة

علي
وهذا هجي مكشف ؟

ايلول
محد يمنـا اساسًا

علي
بس ترة امير يطب

ايلول
اذا طب اكيد البس قابل اضل هجي

علي
اي عفية عفية

ايلول
شو ضجت؟

علي
مادري جاي احسد امير
خطية الولد هم دمة محترگ لا شو شيصيرلة خل اسكت احسلي واتحمل

ايلول
شجاي تحجي

علي
ولايهمج حبيبتي ولايهمج
بس الظاهر احتاج فعل نفس فعل البارحة بصورة اقوى
وبالكوة تصير يلا ترهم لان لو ابقيها هيج لا بالله محد يحن ومحد يرضى

ايلول
والله ماجاي افهمك
شنو هوَ فعل البارحة وشجاي تحجي؟

علي
اسكتي غلسي غلسي

مدري شبي ضاج اني ضليت بفرحتي بالفساتين رحنـة حَتى نتريگ وكلت الة هل مرة اني اعزمك ولحيت عليَ حَتى ادفع اني

علي
وعلي ما ترهم عيب ولج عيب

ايلول
شنو هيَ العيب ترة بكُل مرة انتَ تدفع هل مرة خليني اني ادفع

علي
لا وعلي مترهم ابددد لو تموتين ماتصيـر
شني عمي انة رجال لو انتِ شو اسكتي

راح ودفع هوَ وماخلاني ادفع
شكد ضجِت ساعتها واجيت الا شوية اتعارك ويـا

رجعنا بوقتها للبيت بعد ما فريت بي الموصل كلها
وجبنة البنات هم ويانة

بيومهـا جان كُل شي حلو واحلى شي بالموجودين جانت بيبية علي شكد جانت حبابة وتنحططط بالكلب عكِس امه وام امير

بعدها بيـوم احنة رجعنا وعلي ماشفتة لان رجَع وياهُم بَعد

رجَعنا للموصل وبنفس اليوم الي رجعنـا بي علي راسلني
هوَ جـان يدري بية انُ جايين للموصل وكُل ساع يراسِل ويطمئِن لو نفس قَبِل جان كلت عادي بس المُشكِلة هَسة اهتمامة صار حيل يقلقني ويخوفني واخاف لا يتعلق اكثر واكثر

علي
ها روحي وصلتوا ؟

ايلول
وصلنة علي وصلنة

علي
جا شبيج شنو تعبانة

ايلول
ماتعبانة علي
بـس لا تضل تكلي روحي ومدري شنو

علي
هسة ذني مضوچاتج؟

ايلول
اي علي تضوچني لان انتَ تعرف الي بينة مُستحيل ومستمُر

علي
ليش الي بينة مُستحيل؟
اكثر من انُ الي بين فَرس وامير مُستحيل وصار
فَ ليش مُستحيل ؟

ايلول
علي من الاخير انطيكياهة ؟

علي
اي ؟

ايلول
علي مُستحيل مُستحيل مُستحيل
اني شي وانتَ شي مُستحيل نتوالم كَ حُب
فَ خلينا اصدقاء احسن

علي
ليش مُستحيل نتوالم شبينـا ايلول؟

ايلول
واضل احجيلك اني بكُل مرة؟
علي ترة انتَ شي واني شي عقلي شي وعقلك شي ماكدر ابد

علي
بس مع هذا حُبي الج اكبر من كل شي وانة واثق بي

ايلول
الحُب مو كُل شي

علي
الحُب كُل شي

ايلول
انتَ متوهم علي الحُب مو كُل شي

علي
انتَ اذا حبيت ف تكدر تهتم اذا حبيت تكدر تثق اذا حبيت تكدر تتأقلم اذا حبيت تغير من نفسك اذا حبيت تغير من اطباعك الحُب كُل شي اذا حبيت انسان ف انتَ قادر عَ تغير كُل شي وانة احبج

ايلول
علي لضل كُل شوي مكررها
وانتَ هيج مؤمن بالحُب ؟
هذا امير حتى اني خدعني بالبداية هَسة وينة وين حُبة ؟

علي
مو اجة وخطبهة مع انُ فَرس خطأت ليش تكولين وين حُبة؟

ايلول
اسكت علي اسكت عايف فَرس دموعها ٢٤ ساعة ع خدها وتكلي حُب !
هوَ هذا الحُب ؟
الحُب انكم تحصلون ع شي ومن بعد ما تحصلونة هاهيّ ينتهي شغفكم بي

علي
انة مو امير ولا غير شخص انة الكدامج علي

ايلول
وشنو اليفرق ترة كلكم نَفس القرف

علي
نَفس القرف ؟

ايلول
اي علي تقبل او لا هاي حَقيقة ..
وانتَ اصلاً يمتى لحكت تحبني ترة الحُب موهيج انتَ متوهم علي
انتَ حاب شكلي لا اكثر

علي
هههههههه كل هذا وتكلي حاب شكلي ؟؟؟
لج ايلول انتِ مريضة قسمًا بالله مريضة
مريضة ثِقة ولو ما اعرفج اكول هاي مارة بعلاقة قبل وتخاف
ايلول انة حبيتج حبيتج يا ثولة شكل شني
لج لو تصيرين شنو وانتِ ايلول هم احبج

ايلول
كلاوات

علي
كلاوات؟ هه راح اعبرهن بس لابد يجي يوم واثبتلج

سكتت...

علي
وشنو يعني ترة صدك انة تعبت
اريد استقر اريد ارتاح اريد من اغمض عيوني واعرف انتِ الي وارتاح

ايلول
اني مو الك وبعُمري ما راح اكون الك حاول تستوعب هذا الشي

علي
ليـش هيج جاي تحجين؟
شبيج ارد افهم !

ايلول
ماريد افهمك ولا تفهمني علي
اني مُصرة عَ كلامي

علي
هذا آخر كلام الج؟

ايلول
اي

علي
رايح، بس مارايح فردور انتبهي
ماعوفج انة ابد خليها بـ بالج ..

ماجاوبتة ع اخر شي
احس طاقتي خلصت ساعة انسى كُل شي واتعامل ويا كَ صديق
وساعة ارجع اذكر واخاف
ومحتارة شلون اصرف ويـا

جان عدنة امتحان  رحنـة نمتحن وكملنا
بوقتها رجعِت تعبااانة حيل ما تكلك امتحنت واجيت ونص المادة مقاريتها تكلك رايحة حَتى اجيب ١٠٠ واجي

الصُبح جانت باردة هسة فجأة حرت شلون مادري
بس الشمس تصگع جانت

بحيث اول ماجيت رأسًا طبيت اسبح
واني بالحمام كمت اسمع صوت البنـات وهنّ يكولن صار حريق والكهرباء انطفت

خفت وبسرعة لبست البرنُص مالتي وطلعت
البنات صارن يطلعن واني لابسة البرنص ماكدر بس اريد اروح لغرفتي وابدل
دكيت الباب وانصدمت الباب مقفول
عرفت ساعتهـا انُ فَرس جاية

فَرس يمها ربو وحيل جانت خَايفة بسبب هالشي
الطابق الي فوگ كُلة احترگ
جنت اشوف النـار وهيَ تنزل واني ميتة من الرعبة وبنفس الوقت ادگ بالباب حَيل

شويـة وماحَسيت إلا السلك الي فوگاي كام يذِب نار ورأسًا نزلت شرارة على وجهي .... يتبعععع
دور ايلول اليوم قليل ذكرت اصلاً ردت اذكر شَمس بس انتوا لحيتوا علية تردون ايلول، بارت طويل لعيونكُم وخلوا ب بالكُم ابدي اكتب من ٢ الظهر تقريبًا لحد هاي اللحظة بس كُل شي ياخذ من عندي وقت جَد والبارت ابد موهين واني هم تدرون بية ادقق وماحب انشر الكُم بارت قصير او بي شي ..
📌
بالنسبة للحساب هواي كلولي يا حساب قصدج
حساب الواتباد حبايب ضروري تتابعوني كلكُم عليّ
دانزل عَ العام مُقتطفات من تابعوني تلكوهن بالتنبيهات