رواية بيت جبر الفصل الأربعون 40 - بقلم هُدىٰ آذار

مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________

شَمس

اول ماطُفرت السيـارررة من الحاجِز للگاع ضليت لازمة ايد سُراج بكًل قوتي ومغمضة عيوني حيل واصرخ بـ اسمة، نزلت السيـارة بسرعة بتوازززن بس رأسًا سمعنـة صوت طگة عالية صارت ورة

الطـريق التُرابي جان كُلة مطبات و جان مقابيلنـة اكو نفس الطابوك الي مجمع مال بِناء وسُراج فقد كُليًا السيطرة عليها

اصوات صراحي اعتلى والغُبار اتعالى سمعت صوت سُراج وهوَ يصيح
سُراج
دخيلك ياعلي نجينـااااا

كُل هذا صار ب لحظات مو دقايق، الطابوگ والحجار قوي والسيارة سُرعتهـا فائِقة، خلة السيـارة تصعد بسرررعة عليّ

شَمس
لالاااااااا سُراج لااااااااااا

نزلت السيارة وبدت تنگلُب بينة اكثر من گلبة وبكِل قووووة وعُنف
صوت الجام وهوَ يتكسر علينـا و ايد سُراج الي ماتركتني لحظة والدم الي صار يتطافر مادري من مِنووو

ضل راسي ينضرب تارة بالكشن الي كدامي، وتارة أخرى بالجامة الي يمي وايدي حَسيت شي حيل جبير وكع عليها وانحصرت بيهـا بس ماجنت اعرفها منو

حسّيت جسمي داينضغط حيل، السيارة جانت مقلوبة عالجهة اليسرى، يعني وزنها كله ضاغط على بابي اني، وجنت محصورة بين الكشن والجام المكسور و التراب طابع ع نُص وجهي. كل نفس اخذة يصير اثگل من اللي قبله، ورؤيتي تغوشت تمامًا من الدم الي نازل ع عيوني

صرت اسمع صوت مُتقطع لسُراج وي تأوهآت موجوعة رجولية
سُراج
آه شَمس تسمعيني اخ .

ماجنت اكدر انطق بشي بس باوعت بعيوني الي ماليهن دّم عليّ، سُراج جان معلك فوك، الكشن ماسك نص جسمه، وجان خايف يتحرك لا يوكع بكامل وزنه عليَّ ويكسرني أكثر. إيده ترجِف و وجهة مملي دم

سُراج
ايدج شَمس ايدج انطينياهة

مديتلـة ايدي واني اهمس
ساعدني، ماريد اموت سُراج، ساعدني

سُراج
لا تخافين شَمس انة يمج، تحملّي راح اطلعج

حَسيـت بحديد ينغرز ب ايدي صحت آخخخ بكُل قوتي وسحبت ايدي من سُراج بقوة بس ماجنت محَسبة راح يطيح سُراج عليَّ بكُل هل سرعة ..

ماصار عِندي حيل احجي كِلمة وكُلشي بية سكت حَتى نفسي، جان يحاول ينقذنة ويكوم بس ماجان يكدر

مـادري شلون سحبني بقوة بذاك الوقت وثبتني فوگا وهوَ صار جواي اشتميت ريحَة حريق وصار صوت التطكطك يتعالى
اخُر كلمة سمعتها من سُراج
سُراج
سامحيني شَمس سامحيني ..

السيـارة بدت تهتز وانقلبت بسرعة

الالم الي جِنت احسة فضيع، بكُل انحاء جِسمي، راسي و ايدي خصوصًا بس مجنت ارضى افقد الوعي واخلص من لعنـة الالم الي حاسة بيهـا

صرت اون بالالم بـ اسم بابا بعَد ما ماسمعت صوت سُراج
اصوات النـاس داير مدايرنـا وريحَة حريق هائلة اجتاحتنـا وحرارة سرت بكُل المكـان

فجأة وشفت وكانهُ بابا واكف ورة السيـارة وديمدلي ايدة، ابتسمت بـ الم وهوَ جان حيل قووي بحيث اخذني وخلاني بحُضنـة، صرت بين ادي واحس روحي اشتميت عُطرة

ابتسمت بـ راحة وغمضت عيوني وبعَد مـا حَسيـت بشي

مـا بينّ الدُخـان وصُراخ الناس، اكو ابطال عِراقيين، اكو فـزعة وغيرة عِراقية تحاول تلقُط طَرف من الأمل رُغم الوضع مُزري والسيارة على حافـة الإنفجار من شِدة الحريق الخلفي الي صـار، ابطال واقفيـن على حافة الجِنون، يصارعـون الموت لإنقاذ نـاس مجهولة بقلب ينبُض بالشجاعـة والقوة
- احنـة وياكممم لا تخافـون بس ساعدونـا
- خوية انتَ وااااااعي ساعدنـااا خل نطلعك ساعدنا
- احنة وياكم لا تخافوننن

فجأة ص ار كل شيء حركة واحدة، جسد يُرفع، نفس يُسترجع، ورجاء ما يضيع ..

تحيُر وخـوف شَديد بداخل النـاس، شلـون يكدرون ياخذون المُصابيـن وهُمَّ يعرفـون القانون العِراقي يستنكُر المُساعدة بهذي الطَريقة ويشجع بـ الأتصال بالاسعـاف وتوجد عقوبات ولو صار ايّ خطأ بسيط ب اثناء نقلهُم ع الشخُص المسؤول بنقلهُم..

ما بين الخـوف من المسؤولية والرجفة على هول منظرهُم ودمايتهُم صاح احد الاشخاص
- حاولوا تصحون الرجال حالتة احسن من البت

بلشـوا يصحون بـ سُراج و اول شي نُطقة

سُراج
زينَب ..

فتح عيـونة بصعوبة صار ضوة الشَمس ع عيونـة ماجان محتاج يشوف وينفزع لان عقـلة الباطني اساسًا جان يحجي بهسالفـة

شاف شَمس واكعة بالگاع والدم مغَطيها كلها
راح الها بسرعة وهوَ يحط ايدة على خدها ويحضن وجهة

سُراج
شَمس، شَمس اصحييي شَمسسسس

-
خوووووية البت جاااي تنزف ايدها طلعنـاهة ب اعجوبة استعجلوا الله يخليكُم خل ناخذهُم

- شيلوا البت شيلوهـااا الرجال حالتة مو احسَن منهة

سُراج
لااااا وخروا انة يمهـا انة يمهـاا
شَمس تسمعينييييي شَمس

حط ايدة ع مكـان النبُض نبضهـا حَيل ضعيـف شالهـا بسرعة وهوَ مملي دم ويلهث و يستنجد بـربة

سُراج
يارررب لا تفزعنة بيهـا، يارببب خليك ويـاهة يارببب لا تتركهـا وحدهة بعدهي ما اخذت نصيبها من الحيـاة

راحوا بسررعة بسيـارة احد الاشخاص وسُراج جـان حاط شَمس بحُضنـة وبَس يدعي

وصلـوا بسرعة للمُستشفى وسُراج جان بحـالة جِنون
وجان يريد هوَ يوكف وياهُم

كوة هدوا وطلعـوا برة، الدكاترة والمُمرضين ياحجـوا بس هوَ وكإنهُ جان بغيـر عالم نهائي

كعد ع الكراسي مال الانتظـار وهوَ مدنگ راسة ومو حاس بـ ايّ شي غير بنبضات گلبة الخفيفة الي جانت تنادي بـ اسم شَمس

سُراج
اذا ماتت ماراح اسامح نفسي ومحَد راح يسامحني، انة انسان حَقير وماستحق اعيش بهاي الدنيـا بسببي شّمس وصلت لهل مرحلـة بسببي انة

عذبتهـا هوووواي وياي وتعاملت وياهة بحقارررة اعترف انُ انة اكرهة، انة اكرررهة ايّ بس ماجنت اعرف شني السّبب وليش لهل درجة هـاي، معَ انُ هيّ ماجانت تسوي اشياء جبيرة حتى اخذها بهل جدية الفائقة

سُراج بعده مدنگ راسة وصـافُن، انفاسة صايرة ثگيلة، عيونة تعبت من كثر كتم الدموع الي جانن بيها، بس الموقف لسة ماخلص.
فجأة حس بصداع قوي، راسه كأنه يضرب بيه طبل، نبضاته صارت سريعة وتضرب بصورة مُتعـبة .

كام وهوَ يمسك صدره، دگات گلبه مو طبيعية، حس روحه جاي يختنگ.
كل ضربة چانت مثل سهم يخترق صدره
الأولــى خلت عرگ بارد ينزل من جبينه،
الثانيــة خلتة يتلخبط بالنظر، والدنيا صارت تلف،
الثالثــة گامت إيديه ترتجف وما يگدر يوقف،
والرابعــة چانت القاضية، حس دمه كله ينزف جوه جلده.

رفع عيونه عالفراغ، كأنّه يريد يگول شي، بس لسانه ما ساعده.
بعدين هَوّى عالأرض، فقد الوعي وهو آخر كلمة تدور براسه:
شَمس..

سَبب
گعدت من النـوم بـ ٧ كالعادة، هل ايام رَحمة موهنـا فَ تقريبًا كِل الشغُل علية لان ادري بـ شَمس وسيوف ما يدبرنهـا

بوست علاوي وشفتـة اذا يحتاج تبديل حُفاظة بس مجان يحتاج، غطيتة زيَن وطلعت

انصدمت بـ گعدة امير وعلي بالصالة، وجانوا كاعدين يحجـون بجِدية وامير شكلة حيل حيل تعبـاان ولا كأنهُ امير المرتب، شعرة مخربط ونظراتة تايهة وكِلشي بي تعبااان حتى عيونـة حُمـر

سَبب
صباح الخيـر

علي وامير
صباح النـور

سَبب
من زمان كاعدين؟ لو مكعديني اسوي ريوگ

علي
لا شبينة رجلينة مگرمة خو احنـة نسوي

سَبب
لا صدِك جذب هسة اسويلكُم ريوگ، بَس أمير خو ماعندك شي ؟

هز راسة ب لا وابتسلمي ابتسامـة مُزيفة، ماكدرت اضغط زايد رحت حطيت الجاي ع نار وطبيت اسبح كملت طلعت من الحمـام بدلت ورتبت نفسي وطلعت اجهز الاكل الهُم لان تقريبًا الكِل كعد ..

جبُر
جـا شني البناويت نـايمة ما يجن؟

علي
البنات مو هنـا جَدي البنات راحن للموصل ..

جبُر
شني ؟؟ خير ياستار شكو بنُص الليل وي منو

علي
جدي سالفة مستعجلة صـارت بعدين اسولفلك بيها بس سراج اخذهن

جبُر
شصاير عليوي ترة عقلي كام يروح يمنى يسرى

علي
لا شيخ لا يروح عقلك يمنى يسرى ولاشي هجي شـي صار بعدين نحجي بي

صالحة
ايّ يا يمة غيـر نعرف شصاير مو يبست دمنا

امير ماجان موجود بس حطوا الاكل خلة وطلع بـرة

تنهـد علي وبلش يحجي

علي
جَـدي أمير حاجي وي مسرّة

جبُر
شنيي؟؟؟؟ ذيج البت ما غيرها الي من آل ... !!

علي
ايّ جدي ايّ وفرس شايفتـة وحازة بخاطرها

زَعيم
زين شجان يحجي ؟

علي
جانت تكلة تطلكت وتمسلت هوَ ما مطيها مجال بس متخابرين نص ساعة وهي هاي الموتتها قارية الرسايل كلهن وذيجّ تكلة شلون تتزوج ولو ما راح تتزوج كلشي راح يكون غير ؟ وهوَ يكلهة لوما

جبُر
آااااااا ومِن الجِفن حتى جِفن لامير، وانة جنت احسة انسان مُثقف ويفتهم و عاقل تالية طلع هجي

زَعيم
ترة ماجان اكو داعي انُ يحجي وياها ينطيها حظر وهاهيّ
مو خوفًا من فَرس
بس اولاً انتَ اعلى ابواب زواج
ثانيًا حجيك وياهة يُعتبر اهانة لنفسك بسبب السوتة
ثالثًا احترام لفرَس

علي
هيَ خوية من شافت كِلشي انهارت، نوبّ شلون شافتة ؟ دكت اعليّ والموبايل جان يمها بنص الليل اتدگ الاستغفرالله

صالحة
ياااع ياااع برررد شني من بنـات ذني

جبُر
هسة البنات مو خوش ابنج شبي!!!
وانتم شلون تصرفون بـدون ما تكلولي

علي
جدي ترة الدنيا جانت ليل وانتَ بعاشر نومة خوما اكعدك علمودهُم خلينـا سراج يوصلهن وهم ايلول كالت اعتذرالنة منهم

جبُر
وهذا سريج تعرفوا كلش زين اذا مشة طريق طويل و وحدة يريد يسوي الطريق ساعة خابرتوا كتولة ويـن وصلت

علي
لا لتخاف جدي وديت شمس ويـا حتى يسوق علكيفة

جبُر وصالحة بنفس الوكت
شننننني

جبُر
ولكككك ليششش تودي بت عمك ويـا ليششش

علي
جدي شني سالفة هيَ راحت وي فرس
وهو هم حتى بطريق ما يصير شي ويحسب احساب شَمس ويا ف مايسرع

صالحة
ولك عليوي انتَ بكامل قوووواك العقلية درب شطولة بلة صارلهم شي

علي
برد شرج يمة دكولي يالله هسة انة خابرتة ذابين البنات وراجعين وشَمس نايمة

جبُر
ايّ ادري انتَ من سويت هسالفة بشني جنت تفكر ارد اعرف

علي
هسة عوفني واحتار بـ أمير جدي، هوَ ما اكلك حان بس من جاية وتتمسكن اعليّ محتار شايف هاي الحيرة مال انُ امد ايد المُساعدة لانهُ انسان لو اروح لانهُ انسان سابقًا جان وياي وهجي يعني
بس مع هذا يرادلـة ترزيلة كاملة

جبُر
ايّ كلولة فَرس بعد ماكو وياكل خرة وينجب
شني هل تلطلط

علي
هيَ نزعت الحلقة وذبتها اعليّ وراحت بس انة هدئتها شوية و وصيت ايلول تهدئها بس انتَ سويهـا كلش للسالفة

جبُر
لا تخليني اجيبن فَرس اعلى امير هسة خابرلي ذولة خابرلياهم وانطيني سُراج

علي
ستوني خابرت شيخ والله طالعين من الموصل، اصبر اخابرلك

خـابرلة سُراج كال احنة جايين، الشيخ ضل يوصي ما يسرع ولا شي وهوَ يكلة ان شاء الله

سَد الموبايل وتريگنـا، من بعد الريوگ رحت للمطبخ اباوع من الشباج امير كاعد برة ولازم راسـة ومحتار

انقهرت عليّ صراحة رُغم كِلشي، لان انة ادري بحُبة الها حقيقي صاحلة علي حَتى يطُب

و اول مـا طب استلمة الشَيخ، طبعًا الشَيخ كال ممنوع احد يدافعلة والكل تگلب ضدة وتلومة

جبُر
وانتَ ليش ترد اعليها ليشش؟

أمير
جَـدي ترة انة قصدي جان شَريـف وحسيتها حالها حال ايّ شخص يطلب مُساعدتي والله وبالله وتالله ولا للحظة فكرت شي سلبي بيها بالعكس انة طول ما احاجيها افكر انَّي رجال راح اتزوج وكتلها هذا شي بس هيَ ضلت تلح بالمُخابرة ولمن رديت جانت تبجي وتشكيلي اعلى رجلها

جبُر
وانتَ شني جسرررررر للنسوان ويشكنلك اعلى رجولتهن ولك شلون تقبلها شلوننننن، تقلل اختك هجي يصير بيها لو مرتك هاي مرتك ترضى؟؟؟

علي
لا مايرضة هوَ لعب جولا بالمسكينة اعلمود شي بسيط

امير
علي ترة ماعااااايزك والله

جبُر
انجب ولك انجب قابل حاجي شي غلط علي

حسين
يعني بوية والله عجيبة انة اتوقعها من الكِل الا انتَ، شبيها مريتك شعايزة وترجع لسوالف خلصن من زمان ليش تريد تخسر كِلشي

علي
شمدريني ماتكلك البت ذبت حلقتها وراحتك ختفيدك مسرّة عود

جبُر
ايّ حيل هذا استحقاقك انتَ هجي يصير بيك وانة لا اروحن ويـاك ولاشي نارك تاكل حُطبَك

امير
هاهيّ جدي انعم الله اعليك انة احلن مشاكلي بحدي ما طالب من واحد يساعدني اصلاً

علي
اخذها مني انة ماترجعلك لو توذن

امير
علي ترررررررة حَيل مصختها وين تريد توصل؟؟؟؟

علي
خوية انة حجيت وياهة وشفت قافلة ترة

امير
ايّ ماعليك انة اعرف شلـون احل الموضوع

جبُر
والله اخر واحد ممكن اتوقعة يتصرف هل تصرف هوَ انتَ ولك عوف مرتك بغض النظر عنها مرية متزوجـة شلون الك عين تحجي وياهة حتى لو مطلكة متكول اهلها اذا شافوها ياخذوها حجة ويكربسوها براسك وغصبًا اعليك تتزوجها وتطلع حتى مطلكة رجلها اعلمودك
تصيرررررر لو ماتصيررررر؟؟؟

زَعيم
لا بالله تصير

علي
والله تصير شني

امير
مسرّة ما تلعب هجي الاعيب سخيفة جَدي

علي
وفوك كِلشي يدافعلها !!!!

امير بعصبية
ترة انة ماجاااااي ادافعلهااااا ماتسوى عدي ايّ شي بس هاي الحقيقة اتقبلوها وبسسس خلاص

جبُر
صوتك لا يعلى بوجودي لا يعلى بوجودي، فوك شينـة گوات عينة

رَضية
اكلكم اعلى كيفكم وي ابني ترة هوَ ما حاجي وياهة حبجيات وبعدين الزلم كلشي تسوي

حَسين
انتِ اكرمينا بسكوتج، الي يسوي هجي مو ازلمة اصلاًً واحنة ما متربين اعلى هاي السوالف وهاي السالفة ما تنعاد وتواصلك وي هاي تكطعة نهااااااائي سمعت

امير جان بس عصبي وكاعد كِلشي ماحجة ولا رد اعلى ابو
خابروا زَعيم

زَعيم
يلة شيخ احنة مواعدين شيخ ... هَسة يلة خل نطلع

جبُر
وانتَ الاخر الأغم خابر اخوك شوفهم ويـن وصلوا

علي
شيخ غير ستوني حاجيتة شبِع هيَ

جبُر
وعلي يعلي الي بيك بلشة الا اعلمك بيها شلون تاخذ قرارات تخص الثانين بكيفك

طلع الشَيخ وجان معصُب حيل

علي
ايَ ادري انة فوك ما سويت زين شبي جَدي رحمة ل الله، أغم ومدري شني يمتى نبطل هل الفاظ

حَسن
دنجب انجب اغم ونص هماتيـن

علي
خل اطلع احسلي انتم ماتصيرلكم چارة

حَسن
ولك عليويي مو اجيككك

علي
بوية سكتت سكتت عمي انة اغم اغم

حَسن
ونص هماتين صوتك لا يلعلع بالبيت عود خلي يعلى اعلى مرتك مو اعلى ابوك وجدك

علي
ادللها لمرتي والله صياح شني

صَفية
امدة حظي شلون خلفة

علي
ها يُمة شبيج جا وحد مو ابوي مدللج هم

صَفية
ولكم يمة كلنالكم خل ناخذلكم بنات اعلى ذوقنا هسة هاي انتوا كلكم ولا واحد اخذ وحدة بيها خير شجاكم

رَضية
ايّ وعلي وفنج تحجيلج كلمة

علي
اهوووو يمة ذوقج خلي بملابسج و ب بيتج مو اختيار مرتي

صالحة
اكلجن شو اسكتن اسكتن انتن احنة ويـن وانتن ويـن

طلعوا عمامي حَسن وحسين وامير راح يم يُمة صالحة

امير
يُمـة تعبان

صالحة
تعـال يُمة سودة اعلية كلهم وكفوا ضدك بس والله ي يُمة انتَ تستاهل شعايزة مريتك ماتكلي، العندة وحيدة نفس فريسّة شيريد من الله بعد هادئة حلوة الي رايدها انتَ، ايدها ما تشيل رجلها ليش هجي ي يُمة

امير
يُمة حبابة لا تلوميني جنت اريد اتخلص ب ايّ طريقة بس ماصارت لونّي صدِك رايد اتلاعب جا محَد عرف سري بس لانِّي ماعدي شي صار كل هذا وياي

صالحة
سودة اعلية ي يمة لا تخاف والله جدك يجذب اعليك يريد يكرص الك اذانك شوية

ضحگ بخفة
امير
ادري بي يُمة، جدي يعاملنة وكانهُ احنة لسة صغار

صالحة
لمصلحتكم يايُمة

امير
ادري ادري

نـام على رجلها وهيَ تمسد بـ شعرة شوية وغُفة لان ماجان نايم بكِل الليل، اشوف الفرق شكد واسـع بين امة الحقيقية وبين يُمة صالحة صدك حنينة وحاويتهُم حيل

للـ ١١ تقريبًا طَب زَعيم وعمامي و الشيخ برة اجة كعد رحت سويتلة جـاي واجيتة

سَبب
الله يساعدك زَعيمي

ابتسملي واخذ الجاي مني وجرني من ايدي الثانية حتى اكعد يمة
زَعيم
يروحلج فدوة هل زَعيـم بدونج ما اسوى شي والله

ابتسمت الة بفرح سمعت صوت علاوي يبجي رحت الـة جان كاعد بدلتلة وغسلتلة وطلعتـة يمهُم

شافتة يُمة صالحة اخذتة وصارت تكفُلة شوية وراح يم زَعيم يبوس بي

زَعيم
وكِل الولد لوخ بس ابني فنجان شيوخ
وليدي حالي ومالي وجَنة گُمر ويلالي
وليدي فُستق حلبي ويحفظة الله والنبي

متعلم هاي الگفلة من يُمة صالحة كِل ما تلزمة تگفللهيا وعلاوي يفرفر بـ ايدة تفرفر
ابتسمت ع منظرهم وبنفس الوقت حسيت كلبي انعصر لان ماراح اكدر اعيشة بهجي شعور

بعيوني صـارن دموع تكومن بـ وجع جبير، عاينلي زَعيم واتجهت انظارة لعيوني، فزن عيونةو وجهة كِلة انتفض

زَعيم
عيونج ماريدها تلالي غير من الفَرح، امسحيهن انة الله معوضني بيج وبعلاوي وهذا كافيني

عاينتلة واحس جسمي كِلة يرجف سكتت وهوَ يحط ايدة اعلى ايدي ويسحبني حتى اكعد يمة حَط علاوي بحضني

عاينلي علاوي وكالي
ماما

ابتسمت وشبكتة حَيل ونزلت دمعتي
وجهي صار مقابل وجه زَعيم
مسحلي دمعتي وضل مبتسم اعلينـا

صرت العب بعلاوي و يُمة صالحة كامت لغرفتها هيَ تكعد قبل الاذان ب ساعة تقرة قران وتصلي

امير فَز وكعد يحجي هوَ وغَيث وزَعيم

زَعيم
انتَ شني شتفقتوا اليوم العقد لا ؟

غَيث
لا زَعيم سد الموضوع

امير
شني رفضت؟

غَيث
موهجي بس انة وازيتها حيل انة ردت هذا الشيخ يعقد النـة بس هسة عفت الفكرة خليها اعلى راحتها وبعدين تطيني جوابهـا

زَعيم
اي خوية احسن الك شني حاطلك يوم وتريد البت تفكر اطها مجال

غَيث
هوَ هجي

امير
انتَ شمدريك حجيت وياها ؟

غَيث
ايّ امس جان اول مرة يصير بينـة حديث طويل هجي، حجينـا شوية وجان تستعرضلي بعض العوائق الي انة ماشوفها عوائق وجانت رافضة حيل

سَبب
ميخالف غَيث اصبر اعليها ترة انتَ من بعد ما صرت زين انسحبت عنها نهائي وهسة راجع تكلها اخطبج اكيد عقلها ميستوعب

غَيث
صحيح كلامج بس انة ماردت ادخل وياها بالحرام ابد

زَعيم
زين ماسويت خوية الله كَريم

بهـل اثناء اجة علي وجان مبين فكرة مدهوش

زَعيم
خيرك؟

علي
اكلكم سُراج من ٩ لسة اخابرة ماكو ! وموبايلة مُغلق نوب خابرت شَمس موبايلها مُغلق همين احس روحي لاچت وعلي

زَعيم
يالله دخيلك كول يالله يجوز ماعدهم شحن

علي
سُراج ميخلي موبايلة يطفة لو الدنيا تنكلب اربعة وعشرين ساعة انترنت وشحن بسيارتة

غَيث
زين هسة هُمة ويـن المفروض يكونون !

علي
بـ ٧ الة موصل البنات للبيت يعني المفروض هسة اعلى سياقة سُراج بـ صلاح الدين

زَعيم
يااااااا علي هـااااي ب ٧ واصلين خرب عرضك سُراج

علي
اكلكم انة اعتقد صدك تسرعت بسالفة شمِس

امير
زايدة منك هاي يعلي
كلش زايدة

سَجاد
نوب تدري بيهم ما يتراهمـون وهذا مسودن وشمس ما تسكتلة و ...

زَعيم
برررد شركُم شو اسكتوا ان شاء الله ماعدهم شي لا توصلون شي لجدي هسة ينجلط جلطة ثانية والله تدرون شكد شَمس عِزيزة عِـدة

ضل الكِل متوتر خصوصًا علي لـ ١٢ تقريبًا لمن گطعوا الامل نهائي جانوا واكفين كلهم بالمطبخ زَعيم كال لعلي تصرف الوضع صـار يخوف وسُراج سمع جَدي شلون جان خايف اعليهُم ف مُستحيل يطول هجي وما يخابر

خابر علي على كِل السيطرات و وزع اسم السيـارة واسمائهُم على السيطرات، بدوا يتبعوهـا و وصلنة خبر انُ اخر سيطرة مارين بيهـا هيَ سيطرة صلاح الدين

اما سيطَرة الدجيل نفت دخول سيـارة بهجي مواصفات الها نهائيًا

علي
اذًا صاير الهم شي ب بلد اكيد

زَعيم
دخيلك يـاربي بلدددد موووو امينة موووو امينة

علي
اصبروا

خابـر علي على عرفة الي بـ بلد وخبرهم يبلغوا ان جان اكو حالث او ايّ حدث غريب وانطاهُم المعلومات الكافية عن سُراج

وكل احنة جنـة واكفين على نـارررر
ماخلوا احد يحس بهذا الشي
بس هُمة الولد سَجاد وغيث وعلي وامير وزَعيم واكفين برة و انة واكفة بالمطبخ وساعة اوكف بالباب حتى اطمن

كلبي صـار نـار وصرت بس ادعي يكونون مابيهُم شي بس احنة تقريبًا فقدنا الأمل بسلامتهُم

طلعت بالباب يمهُم علي يمشي ومتوتر ولازم موبايلة يخابر وصار عَصبي مو شلونن ماجان

سَد الموبايل وهوَ يكول
نص ساعة اذا ماكو انة اطلع بعد السالفة صدك تصيـر خَطرة

بهل اثناء اتصل موبايل علي
فزينـا كل احنـة وعلي رد

علي
يااااااااااا علي دخيلكككككك لا تكولهااااااااا
محرووووووكة السيـاررررررة
عااااايشن همممممة عايشييين

بـس سمعنة صرخة علي انة حسيت رجفة انتشرت بداخل جسمي خلت ظاهرة كلة ينهارررر

اعاين للولد انخطف لونهُم كلهم

سد الموبايل علي وهوَ مفزووووع ويحجي كووووة

علي
مسوووووين حادث سيارتهم محتركة كوووووة مطلعيهم

زَعيم
وشني عايشييين لووووو ميتين علي احجييييي

علي
محد يدري زَعيم محددد يدري

زَعيم
سَبب بسررررعة روحي جيبي محفظتي وسويجي من فوگ ولا تخلين ي واحد يحس بيج بسررررعة
سَجااااد غيث ضلوااااا هنانة لا تخلـوننن جدي يعرف

سَجاد
لككككك انتَ مخبللل اخووووي مادري بي عايش لوووو ميتت شلون اضللل شلوننن وعلي ماكعد ماكعددد

طَب علي بسرعة وهوَ يركض طبوا ورا
صاحوا شكوو ؟

زَعيم
خبروا عدة مُهمة مستعجلة، جدي انة رايح عدي شغل ب واحد من المحلات ورايد الولد وياي خوما عدك شي

جبُر
لا بوية ماعدي شي بس كلكم فرد مرة تطلعون شجاكم

زَعيم
جدي رايدهم ترتيب وتعديل شوية

حسين
شبيك بوية شو روحك لايچة

زَعيم
لابوية مابية شي

جبُر
بوووية زَعيم ابني عمك وبت عمك وين صاروا والله تاخروا

زَعيم
جدي تريدهُم يطيرون اطي صبر يتاخرون الدرب طويل

بهاي الاثناء انة جبت لزَعيم شغلاتة بينما يلهيهُم بالحجي وعلي نزل ع سريع

جبُر
هذا شمالة

زَعيم
جدي امر طارئ عدة يلة مع سلامة احنة طالعين
الكل طلع بسيـارة علي
وماضل ولا واحد بالبيَت

ضليت ابجي وماعرف حتى شكول بس ادعي من الله مايكون صايـر شي الهم ويكونون بخير

صبيت الهم اكل اكلوا وكل مرة ورة نص ساعة يرحون ينامون الا هل يوم الشيخ كال مايجيني نوم بالي يم سُراج وشَمس بلكي يوصلون حَتى انامن

تالي كوة قنعتـهم يرحون يرتاحون شوية وينامون، صدك والله كلهة طبت نامت اجتي سيوف جانت كاعدة متأخرة سولفتلها بالصـار وانفزعت وضلت بس تبجي

كعدنـا انة وياهة نبجي وما نعرف شنسوي وندعي من الله محد يموت
لا نريد شَمس تموت ورة ابوها
ولا سُراج ورة زَينب

خابرت لرَحمـة حتى تجي يمنة شوية واجتِ كعدنـا ندعي الهُم مايكون صاير الهُم شي

وماكدرت اخابر زَعيم لان ادري بي لو عندة خبر هوَ يجي ويحاجيني

للعصر تقريبًا كعد الشيخ ولمن سمع انُ سُراج وشَمس لسة ماواصليـن انهبط

ضليت احاول وياهم واكلهم سيطرة موكفتهم شو شني بس هوَ اصر اخابر زَعيم خابرت زَعيم كتلة هجي وهجي السالفة يُمة صالحة تبجي وتكول اكيد سالفة مو خالية والشيخ معصب ومتوتر حَيل

زَعيم
سبب انة بنفسي مادرررري شني الي صاير الهم مادرررري
خل اخابر بيت عمي محسِن واشوف يجون يمة
روحي اطينيـا بالبداية

اجيتة وانطيتة الموبايل

جبُر
بويـة اخوك وينـة تاخروا شني سالفة والله گلبي لعب

زَعيم
ها شيخ ستوني خابرتة ماخريهُم شوية بسيطرة بلد وهم نازلين ماكلين ومدري شني تدري شكد غثيثة ف لا تخاف هسة همة جاين ان شاء الله

جبُر
بوية تضحك اعلية انتَ من صبح لسة ويـن بطرابلِس همة

زَعيم
شيخ صدك مااااعدهم شي جايين بالطريق

سـد الموبايل زَعيم بالكوة من عدة
بيت عمي محسِن جانوا يم بيـت جدهُم ب بغداد
كال راح اخابـر مروآن آل دحام يجي يمكُم
ويلهيكم شوية

صدك والله ماكـو نص ساعة واجو مروان و روان
وروان جانت مبينـة ماتدري شَي

شـوية وطَب عمي حَسن مفزوع و وجهة مخطووف لجوة
يُمة صالحة جانت كاعدة اعلى نـار ومنتظرة بس خبرية

راحت بسرعة لعمي حَسن وهيَ تكلة شعندك يُمة احجي شبيك

حَسن
يُمة سُراج و شَمس مسويـن حادث

من كال هجي هيَ دكت على وجهة بسرعة
صالحة
يممممممة صخاااااااام بوجهيييي

حَسن
يمة لا تخاااااافين ثنينهم بخير لا تخااافين

سَبب
عمي منين سمعت

حَسن
بووووية الحادث من زمان بس محد كايل النـة هَسة خابر زَعيم مروان وكايلة ثنينهم زينين سيارتة محروگة بيهم ومسوين حادث وشَمس متأذية اكثر من سُراج

يُمة صالحة ضلت تدگ وتلطم كوة كعدنـا نهدي بيها بس الرعب جان مالي عيونة ملي

طلعت روان يمهُم ويُمة صالحة ضلت تبجي الا تروح وياهُم كالوا خل تروح لان اذا ضلت هنانة تموت

راحوا كلهم بسيارة مروان ال دحام واحنة ضلينـة بالبيت وماندري شصاير ماصاير ..

بعـد وصلوهُم لمُسشفى سامراء جانـوا الكُل يركضون حتى يلكون خيط يوصلهُم لسُراج وشَمس، والكل منهـار خوف لسماع كلمة خَسارة ..

بعـد ما وصلوا لـ صالة العناية المُشددة ودخلوا لمكان الي جان بي سُراج لكوا فاقد الوعي ونـايم عَ السرير منزعي التشيرت ولافيـن كُل صدرة وبطنة من جوة
بعـد ماحجوا وي الدكتور بلغهُم الدكتور انُ عِندة جروح قطعية عميقة بالصدر والـ بطن والـ راس ( الجبهة )
بس جانوا مسيطرين ع النزيـف ومخيطين جروحـة

سئلوا على شَمس والصدمة انُ هيَ جانت بالطوارئ وحالتهـا حيل خَطرة، راسها ماخذ ضربـات حيل قوية سواءً من الجام او من السيـارة ومسبب الها نزيف داخلي بالمُخ وي كسُر بسيط بالجُمجُمة
الدكاتـرة سووا الها عملية طارِئة حتى يسيطرون على النـزيف وكالوا لازم تُبقى تحت العِناية المُشدة وتحت اجهزة التنفُس

علي
دكتور يعني شنـي حالتها خَطرة !! ننقلها لمُستشفى هَسة لو شني الي نسوي

الدكتور
ابني لو اكو شي يفيدها اني جان كتلك عليّ بس البنية حالتها واضحة ومانكدر نحدد ايّ شي الا بعد ما تصحى والمُشكلة هيَ صارلها خمس ساعات فاقدة للوعي تمامًا من غير ساعات الحادث

زَعيم
والحل شني دكتور

الدكتور
الدُعاء فقد الدُعاء، ادعولها ولا تنسـون

سَجاد
دكتور يعني اكو أمل !

الدكتور
الله يُحيي العِظام وهيَ رميم ابني ..

علي
كِلة من ورررراي كِلة من ورررراي انة
ولككك جَدي اذا دررررة ينجلطططط تعرفون شني ينجلططط

زَعيم
انتَ مالك دخل هاي قضاء ربك، ربك مقدرلها هذا الشي مابيدنة شي غير انُ ندعيلها ندعيلها وبَس
انة راح اخابر مروان يكل لجَدي بعد مابيها مجال جذبة خل يجيبة ويجي بس راح اكلة انُ ثنينهُم صاحين ومابيهم شي..

خبروهُم الدكاترة انُ سُراج صاحي من زمان بس منطينـة ابرة مُهدئة لان جان داري بحالـة شَمس وخابص الدنيـا خبُص

بهل اثنـاء انطوهُم خبر انُ سُراج صحى، راحوا يمـة كلهم لكوا جاي يحاول يلبس تشيرتة حَتى يطلع

علي اول ماشاف سُراج راح حضنـة حيل وماجان منتبه حَتى للجروح الي عندهيـا، خوف علي وسُراج على اخوهُم جبيـر وبنفس الوقت مايقل عن خوف امير وزَعيم

سُراج جان مُصر يطلع يروح يشوف شَمس حجة وي الدكاتـرة وكوة خلوا يطب، طب وطلع وهوَ تايـه

يباوع للگاع ويمشي وكانهُ سكران
باوع الهُم واحد واحد وشكلة يوحي انهُ واحد يريد يوكع

علي
تعال سُراج اكعد ارتاح

كعد بالكراسي مال الانتظار وجـان صافن وبالة يم غير شي

زَعيم
سُراج احجي لاتضل ساكت شبيك، شَمس تصير زيـنة والله انة متاكد

سُراج بصوت خافت
بسببي صار كِل هذا بسببي صارلها كِلشي

علي
سُراج خوية اسمعني ماكوشي اسمة بسببك وبسببي هاي ب ارادة ومشيئة ربك كلشي صـار

سُراج
علي عدها كسر بالجمجمة تعرف شني يعني كسر بالجمجمة؟
هاي اذا صحت والله نجاهة راح تنجي ب اعجوبة
وماراح تنجي صاحية اذا ما فقدت الذاكرة ..

سَجاد
كول يالله ان شاء الله تطلع منهـا

كالة علي سولفلي بس هوَ ماجان يريد يسولف اساسًا جان بس صافن، اجوا الشرطة رادوا ياخذوا بس علي بـعرفة حاول شوية يأجل التحقيق علما امورة تتحسن

الي عرفـوا حسب تحريات علي انُ سُراج ما مأذي ايّ احد بالعكس هوَ طلع ع الترابي بس حتى ما يصدم السيارات الباقية، وسيـارتة والي بيها كِلشي محروگ، والناس اوصفت انقادهُم الهُم بالاعجوبـة لان جانت نص السيارة جاي تحترك ع كد ما راحت مسافة حيل طويلة ومكلوبة اكثر من كلبة ولو ما جانت قوية لا جانوا ميتين من زمـان

سُراج جان مصدوم وكوة ينطق الحرف الواحد بس بالة جان يحجي ويذكر شلون وكع على شَمس وكلبة ينمرد اكثر واكثر، المنطر جان مُرعب بالنسبة الة وكل ما يتذكر صوت صرخاتها من وكع عليها ومردهـا يتأذة اكثر

حاولوا الولد يحاجـونة ويسحبون منة الحجي شوية احسن مِمّا ضال كابت ويفكر بالمشهّد بوحدة

بدة يسولفلهم كِلشي و وصل للموقف هذا
يغمض عيونـة بقوة ويفتحهن وياخذ انفاسة گوة

سُراج
جنت احاول بس اثبت روحي ماردت اوكع اعليها ابد وجانت لازمة ب ايدي حيل، صوتها خافت بس ايدها جانت مجلبة ب اصبعي واخر شي جرتني الها، من وكعت مردتها مرد

زَعيم مردتها تعرف شني مردتها
حتى وناتها الجنت اسمعهن ماصرت اسمعهن وصار كِلشي ساكت بيها

بذيج الساعة كتلة يارب اذا مكتوب النة نموت سوة خلينة نموت بس ماريد نموت وانة معذبها

الكزاز زرف جسمي تزرف والمكان محصور والسيـارة كام تطلع منها نار، مادري شلون شلتها بضيگة المكان وضعف حالي بس جنت اريدها تتنفس وما تضل جواي

وبكل حركة جنت اتحركهـا جنت اسمع ضلوعها جواي تطگ والسيارة تتحرك اكثر، مادري شلون حطيتها على صدري ردت بس اطلعها من الجامة الامامية ب ايّ طريقة

بس من ثگل حركتي السيارة انگلبت بينـة وهنا سمعت صوت النار داير مادايرنـا وبنفس الوكت راسي انطگ حيل بدشبول السيـارة

محَد جـان يكدر يتخيل المنظر من حجي سُراج و وصفة الة شكد جان بشع، جـا شلون وهوَ جان عايشة ..

محد كدر يهدئة ابـد وضل سُراج تايـه ساكت مايحجي ايّ حرف وصلوا لليل مروان ال دحـام وهوَ جان جايب شيخ جبُر وصالحة وحَسن وحسين
كالوا لغَيث وسَجاد يرجعون يمهن بس سَجاد جان رافض نهائي يعوف اخـو فَ غيث كال انة رايح يمهن

حاولوا يلفون على الحَقيقة مال حالـة شَمس و وصوا الدكاترة ما يكلولة هم، بّس الشيخ جـانت حالتة جنونية اعلى بت ابنـة و اول فريسة جانت كدامة سُراج وبنُص المُستشفى وبـ اعلى صوت صار يهزئة ويلوم بي بحرگة گلب ..

جبُر
لك انتَ واحد عددددديم مسؤولية اذا البت ماتت انتَ السبب سمعت انتَ السبب الدم برگبتك انتَ

ماجان يحجي شي سُراج جان هادئ ويباوعلـة بَس

اندار على علي وانهار عليّ بالكلام وحملة مسؤولية شَمس هو الثاني هم ماجان يحجي شي علي بس جان خايف عليّ لا يصيرلة شي من كد ماجان معصب ومقهور وايدة ترجف

حاولوا يهدئونة شوية وحجوا وي الدكاترة حتى يطمنونة وفعلاً حاجوهُم الدكاترة وطمنوا الشيخ انُ حالتها جدًا زينـة بس ماتصحى بسبب البنج

سُراج جان كاعد وحاط راسة على جتِف يُمة صالحـة وكل ساع يسد عيونة بقوة وكإنهُ يضل يذكر بـ فد موقف

مَرت ليلة حيل عصيبة عليهُم، وجان كل شوي سُراج يروح ويشوف شَمس اذا صحت او لا، اخر شي ماتحمل وكعد يحجي ويـاهة ويحاول انُ هيَ تستجيب الة بس ماجان اكو ايّ استجابة

هنا سُراج فقد هدوئة وبدة ينهااررر من العَصبية بسبب التشنُج والعصبية الي صارن عندة، اكثر من جرح انفتح خيـاطة واضطروا يخيطونة مرة ثانيـة وهوَ مو حاس بـ ايّ الم وجان المة الداخلي طاغي على كِلشي

من شافـوا حالتة شلون سيئة انطوا مُهدئ بس حتى ينـام لان كالوا مو زين عليّ ومُمكِن تصيرلة احد علامات الصدمات

الكِل جانت حالتة حـالة والكِل منتظر نتيجة بَس ..
الشيخ من شاف حالـة سُراج بطل يحجي عليّ وصار خايف عليّ هم

اليوم الثاني سئلوا الدكاترة منعوهُم يطلعوها واصلاً مالازم تتحرك لبس ما رادوا يعتمدون بس عليها فَ دزوا على دكاتـرة

طمنهُم الدكتور الي اجة وكال انُ حالتها مستقرة حاليًا وكُلشي بخير بس جسمها كد ما تعرض لصدمة وتعب ماجاي يساعدها انُ تكوم

لليل تقريبًا بعد ما أيسوا وهُمَّ مكابليها وكاعدين وماكو ايّ نتيجة كال الشيخ جبُر بصوت مكسور لزعيم
كوم كوم ودينـا لحَسن العسكري بيبيتك حِسها راح خل ندعي شوية

سُراج مارضى يروح بس صالحة اصرت يروح
صالحة
ولك يمة شوية خل تروح الخرعة منك ارتاح شويونة يبعد امك كوم لا تشل احوالي

كوة قنعـوا يروح ويعوف شَمس راحوا كلهُم وضل بس امير و علي يمها واحد مكابل الثاني وصافنين بالجاي يصيـر

اجـوا من الامام وجانت صالحة شـادة علگ ع ايد سُراج اجت يم شَمس و مسحت وجهة بي وحطتـة بـ ايدها

جانوا حاجزين غُرفة مُرافقِة هماتين راحوا يرتاحـون بيها وجان بس امير وعلي وسُراج بالغرفـة

فجأة حركت راسهـا شَمس، انتبه سُراج ونط من مكانـة بسرعة الهـا

جانت تباوع داير مدايرها بـ صعوبة وتعب

سُراج
شَمس لا تخافين احنة بالمُستشفى
تعرفيني انة منو؟؟

باوعتلـة وكانهُ بدت تتذكر شي
شَمس
سُراج

سُراج
ايّ عفية، عمي حَسنين وين شَمس

شَمس بصعوبة ونفس ثكيل
بابا ويـن بابا مويمي بس جان يمي بالحلم
بعدين كلي راح ارجع ورجع لقبرة

علي
هاي شجاي تمخرط

امير
انتَ شمعرفك جاي يسالها حتى يشوف ذاكرتها فاقدتها او لا

سحَب نفس سُراج براحـة وردد بـ الحَمدلله الحَمدلله يارب

سُراج
شَمس تذكرين الحادث

هزت راسهـا ب ايّ

سُراج
لا تخافين احنة هسة بخير، اني بخير وانتِ بخير وجدي ويُمة صالحة جانوا هنانة علي ضروري تصيحلهُم هَسة

علي
نايمين ولك

سُراج بهمس قاتِم
تحتاااااج تطمن بسررررعة صيحلهُم

سُراج
عدينـاهة الحَمدلله والشكُر وبـ اقل الاضرار ثنينة زينين هَسة

شَمس
سُراج شصار بية

سُراج
مابيج شي

شَمس
بس راسي يوجعني

سُراج
ايّ شجم خياط براسج صـار وبس الباقي كِلشي بخير، نفذنا ب اعجوبة بس نفذنا

صار يطمنهـا بالكلام لان يدري نُصف العلاج النفسية، تقرب منهـا وفتح عينهـا زين سلَط ضوء عليها حتى يشوف استجابة عينهـا والحَمدلله جانت اكو استجابة للبؤبؤ ضرب رجليها واديهـا حتى يعرف اذا اكو احساس بيهن وكال الها تحركهن بس علكيفها وكِلشي جان تمام
تاكد من ضغطها ونفسهـا ونبضها، نسبة الاوكسجين جانت عندها شُبه مصفرة ونبضها ضعَيف بسبب كسر ضلوعها من جهة الصَدر

سُراج
تنفسي شَمس تكدرين

شَمس
ااااه ماكدرر

سُراج
تمام تمام اذًا لازم ننطيها مُسكن قوي حيل حتى تكدر تتنفس بصورة اعمق بدون وجع

بهـل اثنـاء طَب علي و ويا الشيخ جبُر وصالحة جانت فرحتهُم ما سايعتهُم بـ صحوتهَا

اجوا المُمرضين سُراج جان مجيك كُلشي ف ماجان اكو داعي لوجودهُم مُجرد يجي الطبيب المُختص حتى يشوفهـا

بدت شَمس تتأذة حَيل من صدرهـا لان ماجانت تكدر تتنفس بصورة طبيعية ابد والمها جان حيل جبير لان الاضلع ال٣ مكسورات وجاي يأثرن على نفسها ونبضها انطوهـا مُسكن حيل قوي وطمنوها انُ تضل مسترخية وكُلشي راح يتحسن

الكُل فرح ساعتهـا، من الشيخ جبُر لصالحة لعلي الي جان شايل همها ويلوم بروحة عليها، للولد وخوفهُم على بت عمهُم والامانة الي حطها عمهم عدهم

بس محد جان مثل سُراج، جانت الفرحة غامـرة وجهة غمُر لان صحت شَمس بدون ايّ خسائر جبيرة لان جان حاط ب بالة ٩٠٪؜ تكون فاقدة الذاكرة و١٠٪؜ مُمكِن الضربة مسببتلها شلل بس كلشي جان تمام ..

من بعـد ما اكتشفوا وثبتوا انُ اضلعها الـ ٣ مكسورة وكسرهن ابد موهين ويحتاجلهـا اسابيع من ٦-٨ يلة تتشافة ..

شَمس
اول ماكعدت من النوم لكيت محَد يمي غيـر سُراج نايم ع الكُرسي المقابيلي وهوَ كاعِد،  اجيت داخذ نفس طبيعي حسيت اكو الم بداخلي فضَيعع، وكانهُ سجينـة وكاعدة تطعن بـ صدري بكل قووووة فجإة حسيت نفسي انقطع عني وصوت تطقطق بداخلي، ماتحملت وصحت بتألُم و وجع ودموعي نزلن

فز سُراج مرعوب اول ماشافني اجـة يمي وهوَ يلزم ايدي صرت ابجي و اشرلة على صدري و اون من الالم حتى حجي احس ماكدر احجي

سُراج
اااااهدي اهدددددي شَمس لا تبجين البجي يخلي الوضع يزود اهدي الله يخليج هدي انة هنانة يمج بس لتخافيـن لتخافيـن خوش يلة انة يمج اهدي استرررخي

صار يفرك ب باطن ايدي على كيف واني احس اريد اموت من الوجَع، كوة هدئت نفسي والالم احس ذبحني ذبح

ضربني ابـرة بسرعة مُسكن الالم، جنت لازمة بـ ايدة حيل و وي كُل نفس سطحي اخذة احس داخلي ينطعن بقوووة

كعد على ركبة كدامي ولزم ايـدي وصار يحجي وياي بنبرة غير
سُراج
شَمس الشغلة شغلة اربع خمس اسابيع اريدج بس تهدئيـن وتكونين قوية اضلاعج الي بصدرج ٣ صاير بيهن كسر وراح تعانين من النفس والبلع والشرب وكلشي بس انتِ اقوى وراح يخلص هل وقت بسرعة وتضميهن ف انة ماكدر انطيج مُسكن قوي لا اكدر انطيج المورفين أو الفنتانيل الوريدي لانهن يبطئن النفس فَ انة مُضطر انطيج مُسكنات اضعف لان انتِ نفسج تعبان

فَ بس هل فترة تحملي الله يخليج، ادري راح تعبين وادري راح تتوجعين بس وقتي وعيونج، ايام وكِلشي يمضي خوش

نزلت دموعي بـ هدوء، حتى النفس صرت كاتمتـة وخايفة

سُراج
اشششش ماريدج تبجين ماريدج تتوجعيـن لا تبجين الله يخليج لا تبجين تگضي وعيونج تگضي وتصير سوالف هماتين بٌس اتحملي انتِ قوية وراح تتعديهـا وانة وياج وجدي وامي وابوي وكل احنة وياج لا تخافين

حَط ايدة ع شعري يمسد بي ويحاول يهدئني، احسة بغيـر عالم تمامًا ما بالة غير تأنيب الضمَير ومايريد يسوي شي غير يخلصني من الوجع الي اني بي

طبوا علي و امير ابتسمتوا الي واجوا من جهتي الثانية، بس سُراج جان فاصل وما جان مهتم لوجود احد

سُراج
انة اسف، اسف شَمس اسف على كل شي بسببي راح تعيشين هذا الألم واتمنى، اتمنى لوو انة المكانج نايم اتمنى لو انة الميت ولا انتِ متأذية بس مو بكيفي والله كِلشي صار مو بكيفي

انة اسف اسف اعلى الراح تعيشي بهاي الايام بسببي اسف والله، ادري بيج ماراح تتحملي ادري بي فوك طاقتج ادري

كلامة يخوفني وبنفس الوقت احسة كسرني من جوة، نبرة صوتة بيهة رَجفة فضيعة و وجهة اصفرررررر كركم صاير وشاد ضماد ع جبهتة كِلهة منظرة مال شخُص مُتضرر نفسيًا وجسديًا بس جان بقمة ثباتة الخارجي ..

علي
كولوا يـا الله جا انت هجي تحجي وياهة، شموسة قوية وراح تعديهن هذا اختبار من رّب العالميـن الج وانتِ كدهة اكيد هيَ شجم اسبوع ويمضن وترجعين اقوى من قبل بميت مَرة بت عمي

امير
فوك ما جنتِ تدللين اعلينا وجدي خابصنا خبص بيج هسة راح تدللين اكثر بس تدرين شنـي تمونين بت الغالي انتِ

علي
وانتَ كوم مكابلها وعوزك ما تدك وتنوح هاي ارادة الله ونفس ماهيَ تأذت انتَ تأذيت صدرة وبطنـة ورجلة مليان خياطات وشلون واكف اعلى رجلي مادري

سُراج
انة ماريدن شي، اريدها هيَ بس تكون زينة انة اتحمل ميخالف

علي
والله وكِت سُراج يهتم لشمِس يلة نعيش ونشوف

امير
جا شَمس مني، غير بت عم سُراج ومنة وبي لا تخربط بالحجي

ابتسمت على كلامهُم ورهبــة الحادث بعدهي بـية اجـوا جدو وبيبي ضلوا يمي وصاحوا لدكتور الاختصاص

الدكتور
نفس ما موضح يمنـا الكسور يرادلهن وقت يلة تتشافيـن منهن

سُراج
والمُسكنات مانطيها قوية علمود تنفُسها ؟

الدكتور
بالضبُط بعد انتَ تعرُف ما شاء الله عليك وبابا الكسر شوية ياخذ وقت
الاسبوع الاول راح تتألمين هواي، اني اكلجياهة التنفس صعب الكحة العطسة صعبة، الاسبوع الثاني يبدي يخُف تدريجي بس مايختفي بس نكول اهون من ناحية التنفُس، الثالث يبين انُ الوجع قّل وكلشي يصير احسن بس الكحة شوية تأذيج، الرابع الخامس يصير الالم اقل بهواي الـ ٦ بعد هاهي حتى تكدرين تتحركين

٦ اسابيع لعد شلون يكلي سُراج شكم اسبوع اكيد يريدني اهدئ شوية واريد ابجي عَ الصار ولو ما الدكتور جان اني باجية

المشي الخفيف من اول اسبوع حتى مـا يصير تجمُع بالرئة بس مايصير بدون مُساعد لازم اكو مُساعد يساعدها، الاسبوع الثاني تكدر وحدهي بس بجهد اكبر احنة بغنى عنة فـ هم احد يساعدج كون الاسبوع الثالث الحركة تصير عليج طبيعية

اتحمدلي الدكتور ع السلامـة وراح وضلوا يمي همة وبيبي وجدو يم راسـي
شَمس
بيبي والله خايـفة ليش هجي صـار

صالحة
يمة سمعتي شكال الطبيب كـال البجي موزين اعليها فَ حبابة لا تبجين يخلصن وربج يخلصن وتكوميـن بـ الف سلامة

جبُر
ايّ يبعدروحي احنة يمـج هنانة وكِلشي يمضي احنة وياج جَدي احنة وياج

سُراج جـان طالع وي دكتور طب وكام يباوع لعيوني الي كلهن دموع كال جَدي شلون سويتوا حـادث حِجة علي

علي
الستوتة الي وراهم ضاربتهُم وسُراج راد يشرد منة بدون مايدعم السيارات وطلع طول

باوعتلة وسُراج باوعلة، اكيد سُراج حاجيلهُم بس علي ماراد يحجي

جبُر
وهذا من مني ومن ياعمام

علي
جدي يا من ياعمام غير الرجـال عدة ستوتة وحال ضيم ياحالة يبجي ويتوسل

جبُر
ايّ ادري جا شكلولك اعلية ادور فصول يجيني يكلي الحمدلله ع سلامة شمحتاج يعتذر

علي
جدي الرجال بالسجن من طلعت سُراج بكفالة ومدري شني شفتة وخطية هو هم متأذي وانة كتلة روح لحال سبيلك كِلشي مانريد منك فقير جدي فقير

جبُر
والله يعمي علي صاير يشرع قوانين من وحدة حَتى شوري ما ياخذة

علي
جَدي قضاء وقَدر قضاء وقَدر

جَدي ما يرحـم سُراج لو يدري بسبب عركة هجي صارت سكتنة ثنينة

وسُراج صار يحجيلهُم شنو الي صار هوَ يحجي واني استذكر واحس الرعُب كُلة انعـاد علية

وصل لمشهَد الوكعة شلون وكع علية وجـان كوة يحجي ويمسح بجبهتة من العرگ ع كد ما ارتبك وهوَ يتذكر المشهَد

مُستحيل انسى بشاعتـة وكمية الاذية الي صارت بهاي اللحظة بالذات

شَمس
بيبي بهـاي اللحظة حَسيت كُلشي انتهى يمي وما طلبت غير النَفس وخفت وانرعبت انُ اموت واني محترگة احس ما اجة بالي يم بابا ابد بذيج الساعة جنت افكر بنفسي وبَس واكول ماريد اموت واني صـلاة الصُبح ما مصليتهـا بس هذا الي جان ب بالي، وكعدت استرجع ذكرياتي واشوف اني بيمن غلطانة لان خلاص حَسيت الله راح ياخذني

بس الالم لِفجأة زاد وكُبر حيل بحيث صرت اتمنى بس افقد الوعي، بيبي بذيج الساعة شفت بابا اجاني وجان هَيج لابس ابيض كإنما نفس مـال الحِج وشالني وحطني بحُضنة والله بذيج الساعة احس كُل وجعي اختفى وماصرت احس بشي واحس اشتميت عُطرة ولمست ملابسـة

صالحة
يايمة يبعدروحي ماعايفج أبيج بـ اصعب لحظة بحياتج سودة بوجهي

سُراج
تصدكيـن يُمة انة هم شفت زَينب هيج تراودتلي ركإنهُ من بعِيد بس جانت تكلي موهَسة موهَسة، احس ستوني فهمت شنو الموهَسة ..

علي
عمي هوَ شني غير كلها تكول نفذوا بـ اعجوبة هم الناس الله يطيهم العافية والله لو ماهُمة سباع واهل نخوة جان انتوا بالفتحة السادسة هسة

جبُر
اسم الله الرحمن برد شرك شبيك

علي
والله جَدي قابل مجذب

صالحة
منية وشگفها الله عنهُم يمة
محمود مشكور ربي

ضلوا كاعدين يمي وكالوا للعَصر نطلعج ع مسؤوليتنـا ونطلع شوية وعلي جاب البنـات واجوا يمي خَطية ضلن يتحمدلي ع السلامة وفَرس ضلت تحمل روحها المسؤولية للي صـار كلنالها هذا قَدر الله وهوَ الي مقدرة الي ف ماكو داعي تضوجيـن

ماطولن هوايّ وراحن انطاني سُراج مُسكن وحسيت روحي تعبانة ارد انام ف نمت على صوت بيبي وهي تقرالي دُعاء

كعدت ع صوت احد ديحرك وجهي فتحت عيوني بهدوء لكيت سُراج يعدلي بشالي

ابتسم ابتسامة هادئة وكال بهدوء
مروان
مروان ال دحام وبيبيتج جايين

ملامح الانزعاج بينت بوجهي
شَمس
ماررريد اشوفهُم راح اسوي روحي نايمة لا تحاولون تكعدوني

يدرون شنـو ردة فعلي ع هذا الموضوع بالذات، وابد ماكدر اتقبل واحد بيهُم غمضت عيوني بـ انزعاج هوَ ماحجة شي

سُراج
عوفوهـا لا تضغطون عليهـا

صالحة
يُمة خطية بيبيتها تريد تشوفها

سُراج
يُمة عوفيها لخاطر الله لا تضغطين اعليها

علي
يلة اهلاً وسهلاً تفضلوا تفضلوا

جبُر
شجابج حجية شجابج هوَ احنة اليوم طالعين

مروآن
لا شلـون مانجي غربة احنة قـابِل

فضيلة
يايمة سوووودة اعلية يشموسـة سودة علية ي يُمة شكال كلبج من صارلج هجي ولج سودة اعلية يبعدروحي

ضلت تبجي يم راسـي بحرگة وقهر حسيت روحي تأثرت عليهـا وتذكرت انُ هيَ ام امي

فتحت عيوني علكيف باوعت هيَ كدامي من شافتني فتحت عيوني كام تبجي اكثر وتريد تدنى يمي تحضني

سُراج
حجية علكيفج حجية مايصير تجيسيها

مروآن
لا تبجين فوگ راسهـا حجية
الحَمدلله ع السلامة

باوعتلة مادري ليش للحظة حَسيتة ينطي شبه مني معَ انُ هوَ ما يشبهني بَس وكانهُ الدم الي شايلينة فعلاً من بعض هزيتلة براسي وباوعت الهـا

فضيلة
بيبي شلونج انتِ هَسة زينة شتحسين

شَمس
ايّ زينـة شوي بس ااه سُراج

مالحكت اكمل جملتي واكلة اريد اكح بسرعة كحيت حسيت روحي ارررريد اموت ودموعي صارن ينزلن من الالم الي حَسيت بي لِلحظة وحدة

صار وراي سُراج وسندني بسرعة وحط المُخدة ع صدري وعلي يمة لازمة ب ايدة واحس روحي تريد تطلع

سُراج
يلة على كيفج على كيفج شَمس كحي

من الخوف ماكدر اطلع الكحة
باوعتلة واني ابجي وبكل بجية من بجياتي يطلع نفس واموت من الالم

سُراج
شَمس انة يمج يلة يلة كحي وخلصيها

اجتي بيبي صالحة يمي وهي تقرة بصوت عـالي ( ياهادي يا مُهدي، ياهادي يا مُهدي) انجبرت اطلعها ماكدرت اكتمها من الخوف اكثر، كحيت وهوَ يضغط المُخدة ع صدري وكانهُ جاي يثبت اضلاعي الركيكة بحركتـة هاي

كمت اتنفس بصورة سَريعة استلقيت بصدري ع سُراج واني ما حاسة شي غير ب الم فضيَع جاي يخترق احشائي وعلي صـار كدامي ويهفيلي لان العرگ كام ينزل من وجهي رُغم السبلت مفتوح وجدي لازم ايدي ويفرك بيها ويكلي خلصت جَدي خلصت

ماصرت اخاف من البجي ولا اخاف من انِّي اتنفس
لا صرت ابجي حَيل واباوع لسُراج واتوسل بي
شَمس
سُراج حباب انطيني فاليوم بعَد ماتحمل الالم الله يخليك سُراج

صالحة
ايّ يمة انطيهة جا شلون تضل هجي

سُراج
موزين يُمة موزين احنة نريدها تكعد وتسوي تمارين التنفس المضبوطة نثبط كلشي اذا طيناهة ڤاليوم

مروآن
زين شني السالفة معقولة تضل على هجي وجع ؟
الطب تطور وماكو حالة الا والها علاجها

سُراج
هسة انطيها مروفين بجرعة اقل وخر عني بهدوء وساعدني علي حَتى استلقي بدون ما احرك جسمي هواي صار كدامي سُراج وگال

سُراج
كافي تأذين نفسج لا تبجين هسة كل شي يمضي

باوعتلة واني الدموع مجلجلة بعيوني هزيت راسي باوعلي بنظرة ماكدرت افسرهة وتنهَد وراح

مروآن
انتِ حاولي لا تأذين نفسج اتنفسي على كيف والبجي هم عوفي هيَ شجم اسبوع واحد يتحملهن وهاهي جا شسوين بعَد انكتبت اعليج

ماجنت احجي بس جنت لازمة ايد جدي حَيل وبداخلي وجَع موطبيعي، راح سُراج واجـة بيدة ابـرة

سُراج
مادري هايّ المُسكنات لوين راح تاخدج، بس اليوم هلكد اطيج مُسكنات شَمس بعدين انطيج باليوم مَرة وحدة بس

هزيتلة راسي بـ الم وكتلة بصوت يريد يبجي
بَس اريد اتخلص من الالم والله

هز واسـة وتنهد واجة كعد يمي رفع ايدي وعلي صار يحاجيني حَتى يلهيني عن الابـرة

ايد سُراج خفيفة ومو من النوع الي يضل يعبث بالوريد
ضل ينطي شوية ويرجع يمرغ الوريد الي فوگ وينطي شوية ويرجع يمرغليا حدما كملها الي كُلها ..

ضلوا كاعدين ويحجـون وسُراج قابلني وضل صافن علية وكاعد ادري بي ديراقب حالتي بس احس روحي ارتبكت من نظراتـة اول مرة يباوعلي هَيج

شوية وگالي من مكانة هـا
كتلة بعَد

بغضون رُبع ساعـة حسيت روحي شوية تسكنت من الالـم، اجة يمي

سُراج
اخذي نفس

خفت وباوعتلة بخوف

سُراج
اخذي نفس لا تخافين شَمس

اخذت نفس شوية عميق حَسيت الوجع اخف بهواي، جاوبتة ب برائة

شَمس
الله سُراج انطيني دائمًا من هذا حباب

ابتسم الي وگال
سُراج
مايصير حسب الحاجة هيَ شدتها بس هل شهر شمس الاسبوع الثاني انتِ تصيرين زينة خارجيًا ترة بس عود من الداخل الضلع يلتأم ٦ اسابيع فَ تتحملين هل اسبوع وتصيرين بخير لا تخافـين

شَمس
بس ماتحمل الالم سُراج

سُراج
تاخذيـن مُسكن وشوية يهود الالم لا تخافين
يلة هَسة اخذي نفس وازفري شوية عودي رئتج

سويت نفس ماكال الم خفيف بس تخطيتـة
دار وجهة الهُم وكال

سُراج
يلة ياجماعة من رخصتكُم وقبل لا تغورب الدنيا ودامني منطيهـا مُسكن قوي يضل بال٤/٥ ساعات خل نروح للبيت
انة راح اروح اسوي اوراق تسجيـل الخروج واجيكُم. بوية تعـال انتَ وياي تفيدنا حتى توقع على مسؤوليتك ونطلعها لان مايمشون اعلية ..

جان موجود عمي حَسن و امير وعلي و غَيث و بيبي وجدو والباقين كُلهم راجعين لان صارلهم ايام يمي

ساعدتني بيبي حتى البس جُبة موديلياهة ولبست حجابي راد علي يكومني بس جَدي ماقبل كال خلي سُراج يجي ويعرف شيسوي

مروآن
يلة ترجعون وياي حتى تاخذ راحتها اكثر بسيارة لو شلون

علي
لا خوية انة سيارتي وسيـارة امير هنانة تكفينة انتوا توكلوا على الله وهم بالكُم من طريق

مروآن
لا ان شاء الله ماكو شي
وانتوا ايّ شي تحتاجوا انة هنا الله اعليكم لا تترددون

جبُر
ماتقصر بوية احنة يمهة و ولاد عمومتها يمها ماعدها شي ان شاء الله

بهل اثنـاء طب سُراج وحدة ومروان التفت الي وگال
مروآن
الحمدلله على السلامة مرة ثانيـة وان شاء الله ما تشوفين شر بعد، ايام وتمضي تحمليهن دكتورة

ابتسمت الة وهزيت راسي باوعلة سُراج وباوعلي واجـاني

سُراج
يلة علي محضر سيارتك؟

علي
ايّ خوية طالع كدامكم هسة احطهـا ضبُط كدام باب المُستشفى

سُراج
يلة استعجل، يلة شَمس كولي يالله واهم شي ماتحركين نفسج حَيل

شَمس
خايفة سُراج

سُراج
شوفي انة منطيج مُسكن ماراح تحسين ب الم قووي بس بنفس الوكت ماريدج تحركين روحج هواي

شَمس
والله خايفة
جدو شلون

جبُر
سودة اعلية جَدي اتحملي هي هل شوية بسرعة

امير
خل اشيلها سُراج احسن شي

جبُر
ايّ بوية شيلها بس اعلكيفك خاف تسويلك سالفك غلط

سُراج
وين تشيلها امير كون ما تحرك الجزء العلوي هواي، اوكف انة راح اشيلنها

جبُر
وين تشيلها انتَ بوية

امير
ولك صدرك وبطنك شني نسيتهن

سُراج
ماعدي شي لا تخافون وماعدنة غير هل حّل يلة شَمس راح اشيلج واحاول اسندج اكثر شي من ظهرج وانتِ ارفعي راسج لية

مروان
خوية ماتكدر خل انة اساعدها فهمت شلون

سُراج
لا خوية اقل حركة تروح بيها انة اعرف الاماكن واعرف اسيطر اعلى منو وشلـون، ماعدي شي لا تخافـون
يلة شَمس مستعدة؟

هزيتلة راسي بخـوف تقرب وحط ايدة بنُص ظهري تقريبًا وشالني علكيف رفعت راسي گوة وجلبت بي

جان ساندني من جهة ظهري اكثر شي ضليت مختبية بصَدرة واسمع بيبي وراي يالله يارب يامحمد ياعلي سهلولنة
كمت الفُض وراهة واني خـايفة

شوية واجاني صوتة
سُراج
كافي لا تخافين نبض كلبج مسموع صار هاي راح نوصل

حاولت اهدي نَفسي و وصلنا للسيارة بيبي مارضت تعوفني فَ صعدت بالصدر و علي يسوق وسُراج ورة يمي

ساعدوني هوَ وعلي حتى اتسطح ورة وسدوا الباب واجة سُراج من الجهة الثانيـة كعد

سُراج
يلة حطي راسي اعلى رجلي ونامي
علي ماوصيك لا تطلع بمنعطف ولا بشي وتمشي على كيفك

علي
صار

حرك راسـي ع كيف وحطة على رجلة
باوعتلة ون بوجع شويـة وحط ايدة على بطنـة

ماكدرت ما اسئلة باوعتلة بهدوء وكتلة
شَمس
بطنك جاي توجعك

سُراج
لا هجي بس شويـة لا تخافين هسة نامي وعوفج من كِلشي وحاولي تثبتين روحج خوش

هزيتلة راسي بـ ايّ باوع لعيوني لثواني وتنهَد، بعدت نظري عنة وكلت لبيبي تُقرالي دُعاء

خطية ضلت تُقرالي دُعاء التوسل بصوت عـالي واني اردد وراها وعلي يمشي خَفيف

علي
سُراج ثبتها هاي الطريق تعبان ديربالك

سُراج
يلة اطلع ماعليها شي

حَط ايدة ع جسمي من الطرف والسيارة صارت تهتز، حسيت بشوية وجع طَفيف تأوهت علكيف

سُراج
ها شني تأديتي

شَمس
شوية

سُراج
لا تدللين العلاج قوي ماتحسين ترة

شَمس
والله مداشاقة توجعت بس علكيف

ابتسم وگال
سُراج
اشاقة اشاقة لا تبجين

وخرت انظاري عنة بغضب هوَ هم وخر ادي بس ضل حاط ايدة قريب ع جسمي بدون ما يمسة خاف اتحرك

سُراج
علي دوسلها شوية لان اخاف تبدي تحس بالالم وتتوجع ف انتَ هسة اسرع وبعدين خّفف

صدك والله كام يمشي علي ع سريع، بس بتوازن باوعت لسُراج رجع راسة للكشن وغمض عيونـة
مبين تعبـان بس ماجاي يعترف بـ ألمة
غمضت عيوني بتعب ردت انام سمعت صوت علي

علي
سُراج اظنة نـام

صالحة
سودة اعلية تعب وليدي ولا نام

علي
ايّ وعلي فوك كِلشي هوَ هم ملعوب بي جولة شلون خليتوا يشيلها

صالحة
ماقبل كال انة اعرف

علي
انة اعرف لو يغار اعليها

صالحة
منين يغار اعليها يمة من امير قابِل

علي
ايّ يغار اعليها من امير، اصلاً هوَ من عدنة كل احنة يغار وميت مَرة يلزم سَجاد يرزلة لان سَجاد عدة ميانة وي شَمس

صالحة
يمة هوَ هذا مسودن ويغار حتى اعلى خيالة شبيك

علي
لا يمة مو الي ب بالج
هذولة سُراج وشَمس نهايتهُم واحد للآخر وكولي علي ماكال

صالحة
سُراج وشَمس ؟

علي
ايّ يمة سُراج وشَمس

صالحة
والله ماجذب جدك من كال يمسلت
ولك يمة هوَ غير هيَ ماتطيقة وهوَ مايطيقها شلون ينجمعون بالمشمش

علي
يُمة انة اعرف اخذيها مني وكولي علي كال

صالحة
يلة الله وايدك ياااا شرايحلي اذا سُراج ياخذ شَمس
بس وين يُمة انتَ شتحجي ولك غير يتعاركون كدامي
البت هادية بس تصير ويا يصير لسانهة هاطولة ويتكافشون

علي
وازيدج بعد بيت الحادث سببة مو ابو ستوتة ولا ابو بطيخ متعاركين وفاقد اعصابة الاخ

صالحة
يايايااااا شوف بالله

علي
موتكولين لجدي يمة مو تفلتيها

صالحة
ما افلتها ولك بس اعلى شني متعاركين؟

علي
شمدريني يمة مشاكلهم السخيفة هاي

صالحة
وتكلي يصيرون من نصيب بعض شتحجي انتَ

علي
يُمة شايفـة ذولة الي واحد يكره الثاني؟ اذا ما اجة يوم وصاروا دهن ودبس و واحدهُم مايكدر بدون الثاني ما اتسمى علي انة
وبذاك الوكت انة عايش ميت مادري بس كولي كال علي

صالحة
اسم الله اعليك يمة اسم الله اعليك
بس والله ما اصدك انة الا اشوفن بعيوني
وان جان ع الغيرة ف هوَ يغار اعلى خواتة

علي
ادري يغار بس مو هجي ابد، شني لازمها وخانكها خنك للبت خو من يحجي مروان وياهة يباوعلة ويريد ياكلة وانة شايفة بشجم موقف انتِ ماشايفتة وهمين وي سَجاد اكبر دليل

سَجاد جان يضوج وينقهر وخو شفتي جان يتعارك ويا بالبداية تالي كتلة ولك يغار اعليها كلي دوخر هوَ يطيق شَمس حتى يحبها ويغار اعليها كتلة عادي الغيرة تنبع ب بداية الحُب وانة آمن ب انُ الغيرة تصير بالبداية حتى قبل الـ حُب تالي سَجاد صفن كالي ايّ والله وكام يضحك من سَجاد يحاجي لو يغثة ازيد

هوَ يحجي واني ودي استوقفة واحاجي صدُك يحجي هذا ويـن الحُب بموضوعنـا اني اكرهة وهوَ يكرهني ويجوز هوَ شايف هيج بس فعلاً سُراج يكرهني ومُستحيل يحبني
بيبي هم ماجانت تصدكة، خليت ونمت من تعَب

احنة تقريبًا جنة قاطعين اقل من نُص طريق ف تقريًبا اربع ساعات ونوصل غَطيت بنوم بدون مادري لحد ما حَسيت بسُراج يكعد بية

سُراج
يلة وصلنة

ابتسمت لان وصلنة لان جان عقلي الباطني خايف ويردد انُ خاف اوكع او اتأذة

تقريبًا الدنيـا الليل ب ٩ بس بيت جدو كُلة مضوي نزلني سُراج علكيفة والكُل جان كدامي تلكاني سَجاد وبيدة طلي يجر بكرونة وبيدة الثانية سجينة

سَجاد
ها ولج شميسة الحَمدلله ع سلامتج
هذا الطلي الج مو السُراج
سُراج يروحلج فدوة

ابتسمت الة وكتلة
الله يسلمك

باوعلة سُراج بحدية وكالة
سُراج
ديلة اذبحة روحي طالعة انة

سَجاد
شبيك ما تتحاجة عمي
المكرودة متكسرة تكسر وتبتسم وحضرتك عرج ما طاگك وتتعارك وي خيالك وفوكاهة طايح اعليها ومكسرها تكسر هسة لو ما ابن عمنـا ناخذ منك فصل

ضحك سُراج بخفة وهز راسة وهوَ يكول استغفرالله ..

جبُر
ولك سَجاد اذبح الصخلة يا صخل ابن صخل

حَسن
انعم الله اعليك بوية

جبُر
ولك ابننننك راح يموتني

زَعيم
ولك سَجاد يلة شمنتظر

سَجاد
يلة راح اذبحها بس خطيتها بركبتك يجبُر

جبُر
يلة بلة وتلوموني اعليّ

ضحكت بصوت واضح لكلامة رفعت راسي لكيت سُراج يباوعلي بملامح مزعوجة اختفت ابتسامتي واتذكرت كلام علي من يكول سُراج يغار عليها وسَجاد يغثة بيها

باوعت لسَجاد سمة ب اسم الرحمن وبـدة ينحرة كدامي حَسيت روحي ماتحملت كُبل درت وجهي لسُراج بقوة

شَمس
سُراج طببني حباب ماريد اشوف

سُراج
يلة جَدي احنة طابيـن انتوا كملوا
خافت هاي

طببني سُراج وكبل بغرفة بيبي وجدو ع الجرباية خلاني بحَذر وكال

سُراج
انة راح اصعَد ابددل واجي اذا احتاجيتي شي صيحيني

هَزيت راسي الة بالايجاب طبوا هُمة وصاروا يتحمدولي عَ السلامة ردت اروح للتواليت ساعدني عمو حَسن حدما وصلت

كُلشي جان صعُب علية لدرجة كمت ابجي كوة طلعت من الحمام والالم كُلهة بدت ترجعلي

علي وامير وسُراج كلهُم صعدوا لفوگ اجيت اريد انام واحس الالم كلة راجعلي وماعرف حَتى شلون انام

ضَليت واكفة والدمعة بعيوني وخايـفة لا ابجي

زَعيم
عايني شَمس انة يسندج من فوك وسَجاد يشيل رجليج بحيث حتى ما تتوجعين والله

شَمس
ماريد زَعيم انتوا ما تحسون بالوجع الي اني بي

جبُر
جا شلون جَدي تضلين هجي واكفة حتى موزين

شَمس
جدو خل يجيني سُراج حباب بس هوَ يعرف والله جاي اتوجع ااااخ

حجيت واحس انضغط داخل صدري بصورة جبيرة، حَطيت ايدي على صدري بـ الم سَندني عمي حَسن وصار وراي بسرعة

راح سَجاد يصيح لسُراج واني دموعي تنزل واتأذة وعاصرة ايد جَدو حيل
نزل سُراج بسـرعة وعرف شلـون يهدئني بالكلام و بحركة ايدة وهو يمدها ع ظهري علكيف حتى يسند معظم ظهري ويخليني انام بـ اقل وجع

بـدة اول اسبوع يمضي وجان نفس الجَحيم علية، سُراج اخذ اجازة من دوامـة وجان مكابلني وكاعد هوَ وبيبيتي وجَدي

جان اسبوع مملي بالوجَع والبجي بَس حتى ماجنت احس بشي غيرهن، والنوم صار حَسرة علية، كِلشي بية تعب حتى روحي وصرت ماطيقهـا ابد

بدة التخدير يطلع مني وجنت بس اريد اكح ومن اكح اموت من الالم الي احس بي اما الاكل فَ جنت ب الف ياعلي ابلعها وانزلها بمعدتي

جَدي جان عايف كلشي ومكابلني وبيبي ٢٤ ساعة تُقرة قران يم راسي وسُراج بس اصيح اخ الكآ يمي

والباقين ما قصروا وياي لا بالكلام ولا بالمودة
وماحسسوني لدقيقة انُ اني محتاجة لبابا 

من بعَد اول اسبوع الاسبوع الثاني جان اقل وجَع شوية
وهم صرت اكعد واكوم علكيفي
وسُراج رجع للدوام

نظراتي تِجاهة ونظرتة تِجاهي صارت اكثر هدوء من بعَد الي صار وماصرنـا نشوف بعضنا بالنظرة العَصبية والكره والبغُض القَديم

يوم من الايام بليل جـنت نايمة على فراشي واندگت الباب عرفتة سُراج دائمًا يجي هجي وقت يضربني ابرة المُسكن
حطيت حجابي ع راسي جان يمي
وبيبي وجدو جانوا فارشين بالكاع

طَب ورة شوية باوعلي وجانت بيدة علاكة
مشة بهدوء تِجاهي، حاولت اعدل نَفسي واستند ع تاج الجُرباية

همس
سُراج
انة جاي اصبري

اجـة وساعدني حَتى اكوم، حط العلاكة بصفنة ع المـيز وكعد يمي

سُراج
بشري شلونج؟

شَمس
زينة بس شويونة وجع

ابتسم وكال
سُراج
ان شاء الله حتى الشويونة فد شجم يوم ويروح
شَمس اذا متحتاجين مُسكن كليلي حتى ما اضربج هم موزين الكثرة

شَمس
لا سُراج والله متوجعـة ماكدر اتحمل الوجع

سُراج
يلة يجرالج ولا يهمج هسة اضربجياهة

حضر الابـرة ورفع ايدي درت وجهي وغمضت عيوني بخوف ضربني الابـرة وكال كملت درت وجهي ونزلت رداني بـ توجع مو وجع

سُراج
شَمس صدك انتِ تدللين ترة ما توجع شبيج

جاوبتة ب انزعاج
شَمس
ترة والله توجع شنـوو اجذب

اندار وطلع من العلاگة كارتونة موبايل جَديد صدمني وهوَ جان جايبلي اخر اصدار من الايفـون، ايفون x

ابتسمت وفرحت هـواي وبلا وعي كتلة
شُكرًا شُكرًا سُراج هـووواي حلو

طلعليا من الكارتونـا وهوَ مبتسم
فتحة الي وگال

سُراج
موبايلج رجعلج
وان شاء الله صحتج ترجعلج
وسعادتج هم ترجعلج
وكِلشي اخذتة انة راح ارجعلجيا

ابتسمت الة، فهمت كلشي الا شنو قصدة من كال سعادتج ترجعلج

كالي دليني ع الكـارت مال الموبايل مالتج كلت الة رايح كايل لسيوف وجاي دخلة بموبايل الجديد رجعن كُل المعلومات والصور القَديمة

تشكرتـة بفرح ابتسملي وخلة وكام .

مُضـة الاسبوع الثاني وجِنت احس ب اختلاف جبير ان كان بنظرات سُراج او افعالـة وجان حَيل لطيف وهادي 

بيبي جـانت تجيني يومية العَصرية بصراحة ماكدرت اقسى عليها اكثر وتقبلتها بس ابد ماجنت احبها كد ماحب بيبي صالحة
بيبي صالحة جانت دائمًا غير وجانت هيَ الي فعلاً اكدر اكُلها يمة لان عوضتني هذا النقص الي جان بية
اما عمي حَسن خصوصًا وحتى حَسين وجدو جانوا معوضيني حتى عن حنـان بابا وشكد ما جنت اكول ماكو احد يجي لبابا بس عمي حَسن خصوصًا جانت حنيتة عليَّ حتى تماثل لهفة بابا

مُضى الاسبوع الثاني واجـة الـ ٣ وصار اكو تحسين بحالتي بصورة ملحوظة، كعدت بيومها من الصُبح سبحت علكيفي ولبست دشداشتي السودة طلعت من الحمـام تعطرت وكعدت يم بيبي وجدو وعمامي بالصالـة

محد جان موجود من الولد فَ كعدت وبيبي صارت تمشطلي شعـري
كتلها عوفي مفتوح علما ينشَف و اظفرة

كمت للمطبخ احط الغدة ع نـار لان سَبب جانت محتارة وي علاوي مَريض حرارتة مرتفعة

فَ جنت داثرم بَصل ماحس الا انفتح الباب نزيت وانداريت

باوعت سُراج كدامي
من الثول والجفلة الي صابتني ضليت بَس اباوع عليّ
وهوَ صفن عليّ

ثواني وفززني من صفنتي وهوَ يعلي صوتـة
سُراج
شني السالفة ليش طالعة مفرعة مـا تكولين واحد من الولد يجي

ماحجيت شي خليت وطبيت بسرعة لغرفة بيبي وجدو وجنت متوترة وخجلانة بنفس الوقت، لميت شعَري ولبست حجابي وطلعت
لكيتة دياخذ علاوي من سَبب حتى يشوفة شبي
بهل اثناء وصل زَعيم

عفتهُم ورحت اكمل الاكل
انداريت ع صوت سُراج وهوَ ينادي ب اسمي

سُراج
حجابج شَمس انتبهي اعليّ ولد عمج وياج بنفس البيت
اعتلى نظرة من فوگ وگال
وهم شعرج لا تخلينة من فوگ يطلع
بنهاية هُمَّ ولد شباب ويحلون اعليج

كال هجي بهدوء وصُفن عليَّ منتظر الاجابة
استحيت، جاوبت بـ ان شاء الله ودرت وجهي
جان غلطت عليّ وكلت فشلني بس المُشكلة حجة بـ اسلوب حلو

راح طب لجوة شوية وطبيت الهُم لكيت سَبب لابسة عباتيها وشايلة علاوي ويردون يرحـون باوعتلة حبيبي مصخن وصاير وجهة احمَر بستة من خدة وهوَ يبجي اخذة سُراج منهـا كام يبجي اكثر خلة ورجعة

راحوا هوَ وزَعيم وسَبب للدكتور مادري ليش بذيج اللحظة اجة بـ بالي الي حجيتة

كعدت يم عمامي وجدو وبيبي ونسوانهُم وكتلهُم بتساؤول

شَمس
تتوقعـون سُراج يكمل حياتة لو يضل عزابي هيج؟

جبُر
لا ما يضل يكبر وينسى ويكون عائلة بنهاية هاي سنة الحيـاة

شَمس
واني هم اكول هيج جدو
وزَعيم يصير اخـو زينب يعني خالة والخال بمقام الاب
وسَبب هواي دتتعب ع علاوي حتى ديصيحلها ماما

ودينام يمها بـ اكثر الاوقات
وهُمَّ سالفتهُم مُستحيلة بعَد
اما سُراج فـ مُمكِن الله يعوضة بحياة ثانية

اما انتن عماتي فَ بالحالات انتن بيبياتة لان واحد مرتبط بثاني
فَ ليـش ما تفكرون ب انُ تسجلون علاوي بـ اسم زَعيم وسَبب ؟

باوعولي كلهُم بتفاجئ

شَمس
لا تسكتون تـرة مؤلم لو علاوي كُبر وماشاف عندة ام بهل حياة
اسئلوني اني عن هل موضوع

وسُراج راح يضل يمة يعني ماراح يعوفـة وبالنهاية العم نفس الاب
وماعتقد اكو اشخاص يستحقون علاوي كَد سّبب و زَعيم
هُمََ حيل مؤهلين لهذا الشي

واني اشوف اذا صـارت صدُك فَ الكُل راح يكون بخير
خصوصًا زَعيم وسَبب

واني هم داشوف بعَد انُ سُراج كُلش مرتاح لعلاقة سَبب وعلاوي
ومرتاح من ناحية هيَ دتعوض حنان الام بحياتة

رَضيـة
والله يشَمس حجيج بمكانة لان انة غسلت ايدي من انُ زَعيم يتزوج اعليها فَ انتم بلة شتكولون وهوَ ابن بتي ف ليش مايكون ابن ابني

جبُر
مادري انة ابد مافكرت بهسالفة ومن هسة فكرت بيها لكيت بيها مصلحة وبالنهاية الابن ابنـة ماجايبينة من الشارع

اباوع الهُم كلهُم رحبـوا بالفكرة بس خافوا لا سُراج يعارض، جَدي كال اليوم اجِس نبض سُراج واشوف شيكول

مادري ليش كلت هيج وشنو الي دفعني، اعتقد دموع سَبب وهيَ شايلة علاوي وخايفة عليّ هلكد وكانهُ امـة واكثر، او فقداني لحنان امي و حنانهُم الي نحرمت منة سنوات

شويـة واجوا سُراج وسَبب وزَعيم وعلاوي جان مجلب بـ سَبب ويبجي جانت عندة نشلة

صبيتلهُم اكل علاوي مجلب بـ سَبب ف زَعيم سوالها لفة وانطاهيا تاكلها بمكانهة

سُراج
سودنـة مجلب بسَبب هجي عبالك تريد تشرد منة كوة خلة الدكتور يفحصة

باوعت لسَبب حاضنة علاوي وعلاوي لازم بطرف عبايتها حَيل وزَعيم يباوعلهُم بكُل حُب

باوعت لجدو وكتلة بدافع غَريب
جَدو تسمحلي احجي الي كتلك عليّ اليوم الصُبح؟

باوعلي سُراج وزَعيم وسَبب ب استغراب
جبُر
دامج انتِ بديتي بالسالفة فَ ليش لا احجي بوية

شَمس
سُراج كلامي وياك انتَ

عاف الخاشوگة وباوعلي بـ استفهام
سُراج
اسمعج شَمس احجي

شَمس
بما انّي بنية عشت بلا ام ف افهم كُلش زين الوجع الي مُمكِن يتعرضلة الشخُص لمن يفقد الام، سواءً جان بنت او ولد ف الام وجودها حيل ضروري بحياتنـا ونقصها مُستحيل يعوضة احد حَتى الاب

شكد بابا سوالي وانطاني حَنان، يعني هَسة انتَ صح تحب علاوي وتلعبة بس مُستحيل توصل شجان يسويلي بابا، بابا عاف شغُلة كُلة في سبيل يكعد ويربيني واني وصغيرة وجانلي بمثابة الام واكثر حَتى

سُراج بحدية
بس انة هَسة ما مقصر وي علاوي اعتقد
وانة لو ما شايف سَبب معتنية بي ومأمن بي ماجان ارتاح هلكد

شَمس
هيَ هاي النُقطة اريد اوصل الهـا انتظرني، فَ مهما تسوي انتَ ماراخ توصل للي راح توصلة الاُم واني اشوف انُ علاوي حيل متعلق بـ سَبب وزَعيم خال علاوي و سَبب معتنية بعلاوي كَ أُمة الحقيقية

وبالمنُاسبة هذا الشي حتى زَعيم وسَبب ميدرون بي هسة كعدنا احنة وكتلهُم هيج وهيج

فَ اني كلت بيني وبين نفسي محد مؤهل انُ يسعد علاوي غيرهُم وهُمَّ احق واحد بي وانتَ بعد يوم يومين تكون حياتك قابل تستمُر هيج؟

فَ شنـــو الي يخليك ما تنطي الهُم نهائي؟
مع وجودك فوك راسة اكيد
بَس كَ عــم مو أب
يُتبعع .......
توقعاتكُم؟

لا تنسـون التصويت 🤍