رواية بيت جبر الفصل الحادي عشر 11 - بقلم هُدىٰ آذار

مساء الخَير، حبيت اكول الكُم بعدلنة ٤ بارتات ويكمل الجُزء القديم ونبلش بالجديد، بداية حلوة وقوية وغير مُتوقعة، وانتقالة جبيرة، اتمنى منكُم ما تنسون تدعمون الرواية بَ اقل ما يُمكِن
لا تنسـون التصويت ⭐️
والتعليق الحِلو ..
_______________________
روان
بدة الوقت يمضي ومحد يفتحلي الباب
احس روحي راحت
متت من الجوع والعطَش
اريد ابلل ريگي
ريگي نشف
وخايفة
ماعرف شسوي

باوعت لماي الهوايش الي يمي
للحظة و ع كد ما جنت عطشانة ردت اشربة
بس قاومت ومنعت روحي
شوية وحسيت نفسي فقدت من العطش والتعب الي صار علية
ماحسيت بنفسي
بس جنت اون من الجوع والعطش والحّر

شوية حسيت نفسي صحيت
حاولت افتح عيوني بالگوة
تدنيت للطاسة مالتهن الي بيهة مي لعبت نفسي
بس حاولت اتقبل و اخذ وامسح على وجهي بس حتى اصحى شوية
بللت وجهي ولعبت نفسي
وصرت احاول امنع نفسي اني ماتقيء
صرت اتكلب وابجي
وصرت اكول مُستحيل ابقى يمهم بعد ساعة
ماكدر ماتحملهم ابد

مضت ساعات ومحد فتحلي الباب والحجية اختفت

ضليت اقرة ايات ومگرفُصة ع نفسي ( لامة نفسي )
وكل شوية اسمع صوت هايشة واموت من الرعبة
كضيتها قُران حدما شوية واسمع صوت مروان

مـروان
احمد وينك احمد
ليش مامطلع الحلال شويـه

أجه فتـح الباب واني كمت بسرعه وذني يردن يطلعن اول مافتح الباب بسرعه رحت الـه

باوعلي وانصدم
مـروان
روان !!

لبدت ورا بسرعه وجنت ميتـه من الخوف وابجي حيَل لان الهوايش طلعن

مـروان
شجابج هنا شسوووين هنا؟

جنت احجي ويـا واشهك
ا احمد ا ا احمد

ماحس الا احمـد گبالي

احمـد
رجعهه رجعهه مروان رجعهه لهل ...... ولو هذا المكـان هواي عليّهه حتـه بس أنسب مكان الهه

مـروان
لككك اكل خررره لا اشگ حلكك شهل الفاظ هاي ومنو سمحلكم تسووون هيـج
التفتلي وكال
شكوووو شصاير ؟

احمـد
الله وكيلك والعباس كفيلك
لسانهه اطول منهه
تسب وتفشر وتغلط وتسوي سوايات مامسويهه واحد
ماخلت واحد ماسبتـه
ولسانهه يرادله گص
واذا ماگصيته انه اگصلهيا بيدي
لان الظاهر هاي مامربيـهه عدل بيت نعل بيت جبر

مروان
احمـد راح اكسرررر راسك
احجي ويااي عدل وبدون هـل تنتر
صوتك ما يعلة علية

قاطعتهم وهمـه يحجون
مـروان دير بالك تحكم من شخص و والله العظـيم
اتعده عليه وضربنيَ وكام يفشر عليه ويكفر والله العظيم وعساني اموت هسه اذا جذبت عليك بحرف
ضل يكفر حيَل وصيح ع بيبي همات
وبيبي تخربطـت وهي جوه هسه

مـروان
شنووووو شنووووو شنوووو
حبوبتي تخربطت؟

احمـد
لا تخاف مابيهه شي

مـروان
وحق الخلق السماوات اذا بيبيتي بيهه شـي اله ابتلي بيكم كلكم
امشي روان گبـالي

مشَيت بسـرعه وهوَ يمشي وراي واحمد اجه ورانه

مُستحيل اخلي حگي يروح
مو انه الي اسكت واخلي الطرف الثاني يحجي وينوخذ حگي
انه الي اخذ حگي من حلگ السبع

طب قبلي لان جـان مسرع ويصيـح
يمـه يمـه وينكم

اجتـه امه وكالتله
ام مروان
هـله يمه هله بيك حبيبي

مـروان
ويـن بيبيتي يمه

ام مروان
مابيـهه شي بغرفتهه

طب لغرفتهه وانة لازگه ويـا
أحس أخاف رغم القوه الي بيـه بَس اخاف هواي منهم مرات

جانت متمدده ونايمـة خَطيه ع جربايتهه وگاعده اول ماطبينـه رأساً كامت گعدت شافت احمد عاطت

گالتله وهي تحجي وي مروان
خل يطلع هذا الچلب النچس(نگس) الكافر ولك يكفر برب العالمين كل حجايه يججيهه شكبرهه وفوكاهه يصيح عليه ويكلي طبي ترضاهه يـايمه يامروان

مروان التفت الـه وگاله
مـروان
تصيح ع بيبيتي ولك ترفع صووووتك عليهه

تقرب يمـه ويگلـه
احمـد
انتتت ماعليكككك مروان
تكعد تدافع لهـل ..... الاجتنة من بيت جبررر السافلة

التفت علية وتفل على جهتي وهوَ يكلي
احمـد
من اجت لسه ماشفنه غير المشاكل

مروان عيونه صارن بگصته لزمة من ياخه دشداشته وقربه اله

مـروان
هاي من يمته انت تحجي هجي گبالي وماتحترمني

احمـد بصايح وعصبيه
اذا ماتربيهه اني اربيهه لهـل سافله الحقيرررره
انطيتهه مجـال اكثر من اللازم
هـاي كون ماتنام ويـانه وماتكعد ويانه
مكانهه مو هنا
فوگ ماخوهه چتل (كتل) عباس
جايتنه بگل عين صلفة

استغربت من عصبيتة، وشلون يحجي بهل طَريقة، صراحة حسيتة احسن من مروان بهواي، حَتى اول يوم من طبيت جان يباوعلي برأفة شبي هيج كام يسوي !

مـروان
ولككك احمد كاافي لا تخليني امدددد ايدي عليكك وانت بطولي

احمـد
عود انت شيخ
والشـيخ يعدل
ماشايف بيـت شيخ يخلي ........ بي

ردت احجـي سِبقني مروان وهوَ يضربة راشدي

يمه انـة تراجعت لورره بسرعه يم بيبي وانـة ارجف

المره گامت وهي تگله عوفـه يمه

ام مروان
ولككك تضرب اخوووك من وره هل ........ هااااي ولككك مروروان

احمـد
تضررررربني مووو وكدامهه والله لـ اندمج والله اندمج
ما اخليج تتهنين بلحظة دآمج انتِ هنا
انة انة وانتِ انتِ

راد يروحلة مروان مـرة ثانية امة صارت بينهم،
كوة طلعت احمَد وطلعوا
مـروان ضل يعيط حيَل ويكول الكل يطلع
صـار وجههه احمر وايده ترجف من العصَبيه

احس ميتة مِن احمَد
ماخلة شي ماحجا بحقي وفشاير فشر علية
والله لو يلزمة علي الا يعرفة الأدب عدل
ولو هسة مروان ماقصر بس انة اعلمة

راحـوا وصوت عياط بـره طلع مروان وضل يصيح

مـروان
والله العلي العظيـم أذا اسمـع حچايـه وحَده والله العلي العضيم اهدم البيـت فوگ راسكم كاااافي اسكتـوا ماريد اي واحد يحجي

ام مروان
اخوهه كتل ابني
وهسه تريد تكاتلكم بيناتكم
ولك يمـه خلي عقل براسك
ولك شسوتلك سحرتك
مو اول ايام شزينك من اجت هل .....
شجاك هسه شجاككك يمه

مـروان
يممممه راح اطب وحق العبـاس اذا اسمع صوتتت منكم حته لا انتِ اهجم البيت فوك راسكم مارررريد اي صوتتت

ام مروان
بنيـه هيج تلعب بيك شنووو لان عيونهه زرگ لو شنوووو
ولك عمرهة ١٧ سنة بگد بتك لا تلعب بعقلك

مـروان
خرررررررررره بالحظ خررره بالحظ
شبيـججج يممممه شبيججج خليني افتهم الصـايرر
وحق القران راح تخبلوني
كافي ماررررريد نفسسس بعد

طب وسد الباب عليـه حَيل

انة صرت نفس الـ نملـه خَنست
بيبي گالتلـه
يمـه علكيفك يابعد حيلي لا يصير وياك شـي

مـروان
بيبي انتِ علكيفج وي روحج ماعدنه شـي
روووان يمته تبطلين هذااا لسـانج الزفرر هااا

والله العظـيم ماعليه انة والله هوَ

مـروان
جاي احاول اتمالك اعصـابي
بسرعه احجيلي الصـار بسررررعه
ماريد احكم بدون ما اسمع
موكلتيلي هيج يلا برريلي بسرعة

والله العظيـم انه جنت بالغرفـه واجتني مرته تصـيح وتكليلي تعاي اصعدي فوك نظفيلي الغرفه

مـروان
وانتِ بكل بساطه طلعتيلهه السانج الشطولة موووو؟

الحجيـه گالتله
يمه علكيفك وياهه شبيك علكيفك

مـروان
بيبي العباس عليج لا تدخلين خلفتهم منهه
ولا اكلـج كومي روان كومي خل أسمع
يلـه كووومي المرة دايخة

باوعتلة بنظرات خوف وانة ابلعم

مروان
من يمتى تخافين يالنجرة
كومي وياي روان كومي راح ابتلي بيج والله

كمت وبيبي تكلي روحي يمة مايسويلج شي
طلعنة وهيَ توصي ما يلمسني

طلعنه من الغرفه مال بيبي الكل يباوع النـه
هايهية نلاصت

طبيـت للغرفه
وطَب وراي وسـد الباب

يله روان يلـه تمالكي اعصابج الله عليج حتـه مايعصب عليج وتتكسرين گبالهن يله خليـج هادئه وفهمي كلشي وعوفي العصبيه بعد كلبي هسه مو مال عصبيـة ماطوله صيح عليهم كوني هادئة واحجي ويا عدل حتة تنتصرين كبالهُم ، اي اي انتِ ما ميتة عليه ساويج هسه تلعبين بي جولا بس هلمره لا بس هلمره الزمي روحج

طب وكتف اديـه وگالي
يلـه احجي خل افتهم يلـه

مروان والله اذا تسوي هيـج ماحجي واذا مانطيتني مجال تظلمني واذا انطيتني مجـال راح افهمك كلشي وماجذب بـ اي شي والله العظيم وجاي احلف انة، و انة ماحلف جذب

مروان
ماكو مجال جذبين بـ حرف اكمل منج اروح لبيبيتي واسمـع منـهه

انـه ماچذب خوش بس راح احجيلك كلشي

اجتنـي هيَ وگالتلي گومي نظفي وجان اسلوبهه استفزازي وشلـون تحجي وياي عبالك خدامـه عدهه فـ اني گتلهه انتِ بنگلادشـيه وموجوده ونظفي وصاختج انة شدخلني
عايلة؟

من گتله هيـج تحول وجهه الاحمر وملامح العصبيه لصدمة وبشكل لا ارادي انرسمت ضحكة خفيفة على وجهة ..

مـروان
عايلة ؟ لا يابوي وين عايلة انتِ
بنگلادشـيه؟ ولج تعرفين الاء بنت منو بت يـا شيخ وشلون

لا والله ؟ تـرا انة بت الشـيخ جبر تريدنـي انظف لوحده مثلهه ؟ بت اي ان جان جانت شنو يعني

مـروان
اي بله كملي وبعد شچفصتي

مثـل ماچفصت بالحجي چفضت بالحجي هي هم
واعتقد احنه نسوان وثنينه نحجي اي شي
شبي احمد يدخل بيناتنه
شدخله وشعلي بالموضوع كلـة
سوالف نسوان ترة زحمة

انه احجي ويـاهه واحمد اجه يكلي شلون تغلطين هيج ع مرتي والله العضيم الغلطتة نصـه هيه غلطته عليه بـ اضعاف وامك وياهه وكلهن عليـه
اجه احمد ومارديت عليه بحرف والله العظيم هاي انة طبيت لغرفتي فجاه طب عليـه نفس الاسد وشاف فريسته

وضـل يضرب بيه حيل مانطاني مجال حرررررف واحد احاجي

مـروان
روان يعني ماحجيتي وووي احمد شـي وهجي سوووه بيج؟
متاكدة ما طلعتيلة لسانج نفس ما تطلعيلي لسانج؟

والله اي شي ماحجيت وي احمد بالعكس ترة انة احترمة
حجيت وي مرته اي انة اكلك لعبت بيهه طوبه بالحجي
بس وي احمد لا

وامك جانت موجوده وتصيح وتكله حيل وحيل ودفعني و سحلني وودانـي لذاك المكان وانت تعرف شكد اخاف منه

بس تدري شنو
حقـه يسوي هالشي
هوَ تمـرد عليه لان شافك انت تمردت عليـه
بسببك خليت الكل يتمرد عليه
ويضربوني ويهينوني لاقـل شي
وانه علمود حجايه احجيهه وي مرته لان قللت ادب ماترضون
جا انت بس تكلي الاء بت شيخ مدري منو ومايصير تكليلهه بنگلادشـيه جا انه منووو مروان
تره انه حفيده بيت جبر
اعرف تكرهم بـس احنه يـا مروان النه احترامنه وتقديرنه
اذا انتوا تكرهونـه ف غيرنه يموتون علينـه ويحترمونه
انت شتتوقع بيـت اهلي راح يعوفوني لو دروا بيه انه هيج جاي انذل تتوقع؟؟؟
لا ابـد صدگ يكتلون وينكتلون وعدهم استعداد يموتون روحهم ولا يخلون وحده من بناتهـم تنذل
علاوي شگالي من ردت اطلع
گلي روان صح همه يكرهونه بس بالنهايه بيناتنه دم واللحم والاظفر مايتبره من اللحم ومستحيل يسون شي ياذوج واذا صار اي شي واذاج بـس انطيني خبر ومن يسالني علي اكله ابددد كلشي ماكو لان اعرف انه مستحيل ارجع واعرف اذا صارت تصـير دم بيناتكم وساكته

ضـل ساكت وصافن بوجهي كلشي مايحجي حتى ما سألني منين تتواصلين وي علي

مـروان الله عليك يمته تعوفنـي ؟
يمته ترجعني لاهلي الله عليك
مو كافي
تره اني ممامتعوده انذل ابد

خليني ارجع والي تريده يصيـر
بس خليني ارجع وريحني

جَر حسره وباوع لوجهي وگالي

مـروان
يعني انتِ تردين ترجعين؟

أي

مـروان
براحتج

خلـه ودار وجهه ويريد يروح
مـروان شنو يعني ؟

مـروان
براحتج روان اريد اروح واخليج براحتج يعني شنـو اكلج ؟
كل عقلج لعب زعاطيط هي !
كعده شيوخ وكعده ناس وعالـم
اوديج شنـو روان ماتفهيني ارجعج لاهـلج شنو هيج وبكل بساطه جا وكعده الناس جـا والخبصه السويناهه والناس الي ادخلت اذا سالوني اكلهم ها والله رجعتها هي لعب چعاب مو

وكرامتي وكرامتي الى متي ارد افهم ليمتى هـا ليمتى اضـل هيجي تهينون بيه وتضربون بيـه واسكت

مـروان
كافي روان كافي محـد راح يتعدى عليج بعد وهذا وعد

ردت احجي ماخلانـي احجي رأسـًا طلع

دموعي ينزلن احس الدنيـا ضايگه بـيه
وتالي وتالي يالله
شلون نهايتهه
اخابر اهلي واخلص ماترهم كلشي مايهرم
ماعرف شسـوي ولا اعرف شنـو اتصرف

ضليت ساكتـه وشوي سمعت عياط
تقربت للـباب وسمعت صوت مروان يعيط

مـروان
اليمد ايده عليهه اكسرررر ايده والقران

ام مروان
هـا غيرتك الحيـه شبسرعه هااا ركعتك بسحر بت صفيه لو شنوووو احجيلي

مـروان
يمه وحق الخلق السماوات والارض انتِ اذا ماسكتين
بدال مـا انتِ تهدين الوضع هيـج تسوين

احمد
والله خوش فصليه هاي هه
عوزنا مانجيبلهه ماي ونمدد رجليهه ونغسلهن بعد كلبي

مـروان
احمممد ديرر بالك دير بالك التحجي عليهه مرتي وحق الله اذا ينجاب طاريهه بالسوء ع لسانكم الا كلكم ماتلومون روحكم
اكلب البيت عله راسكم والله كافي كافي زهكتوني شنووهاي

ام مـروان
يحجـي وي أخو هجي علمود بنيـه
تالي عمرك ولك
عمرك بـالـ ٣٠ سنه
تفترلك وره زعطوطه هـا

مـروان
يمـه يمـه افترلي وره زعطوطه مافترلي انتم مادخلكم حياتي وانه حر بيهه خوش لحد يدخل بيهه ماريد اي واحد يعيل بيهه
وهي بالمقابل تحترمكم وما تعيل بيكم غصبًا عليها

الاء
اذا مرتك لسانهه شطوله اكووو واحد يكدر الهه

مـروان
لااااا وانتن عايزات كل وحده لسانهه شطوله
يعني هجي وحدهه طخت براسهه اجت وتهجمت عليج مو انتِ حضرتج ترديلهه تنظفلج شني عايزة ايد رجل وتنظفلج؟؟

الاء
اي جا شنو واذا نظفتلي هي بنهايه فصليه

مـروان
مو فصليه هي مرتي خوش؟

الاء
هي فصلية وبشهادة الكل
وترررره لا تنسه انه بت منوو تريدني احترم فصلية
خابصتنا يا نسبنة يا حسبنة ترة احنة هم بنات شيوخ
وابوي اذا درة يسحگ على راس جدها هذا الي تتفاخر بي

مـروان
ترررره جدهه من يكعـد بديوان
ابوچ مايصيح غير شيخنا ويبوس ايده
اذا انتِ بـت راشد هي بت جبـر
واذا ابوج مصارله شوي بالمشيخه شجم سنه
جدهه گبل لا انولد انه هوه شيخ
واذا ابـوج شيخ ع ٢٠٠/٣٠٠ ازلمه
جدهه شيخ عله عشيره كامله وانتِ ادره آل ..... شكد هُمة
وهسـه حجايه ماريد اسمع ويفضل ما تقللين أدب

اسمـع حجيه واني ملتسمة

عزه العزانـي هذا منو يدافعلي ؟
اها يعني هذا يرهم ويا الحجي؟
من النـوع الي دماغه يستوعب الحجي

تمام چا اعرف شون اتصرف ويـاا

ارتاحيَت شويه وابتسمت
عـاد شخص دافعلي
احس روحي راح اموت جوع وعطش شفت مي يمي شربت
يمة اريد اسبح بعَد ماتحمل

داطلع غراضي من الكنتور طب مروان

مروان
سمعتي اكيد الي صار

لا ماسمعت

مروان
انجبي روان ادري بيج سمعتي

لتكلي انجبي

تقدملي بعصبية

مروان
روان لا تخليني هسة انفجر بيج
بعد ممنوع تحتكين ب ايّ احد بيهم تحترميهم نفس ماهمة راح يحترموج خوش

روان
اي خوش دام محد يمسني انة هم ماعلية بيهم
هسة ممكن تعوفني اريد اسبح

مروان
حضريلي هدومي انة هم اريد اسبح

روان
ها خير عشت الدور ؟ شحضرلك هدوم ما تحضر انتَ هيَ دشداشة طلعها والبسها نوب تريدني اخدمك انتَ عندك نسوان ثنين روحلهن

مروان
برنووووو برنووو مو السااااان الله اكبر عليج راح تجلطيني

خلة وطلع
خيولي نوب علية واحد يتأمر علية ويصيح سوي هيج وردي هيج، هوَ انة ب بيت اهلي عشت مدللة، حَتى ملابسي ما اغلسهن مو نوب مروان وغراضة

اخذت غراضي ورحِت للحمام هوَ صاير بداخل البيت
فَ مريت عليهُم من الصالة
احمد ومرته وسعاد وام مروان كاعدين سوه
شلون لمه حياية دخيـل الله تسد النفس

جاي اطلع اريد اروح لغرفـه بيبي اشوفها قبل لا اروح
شفت هاي الهبـشه مرت مروان سعديـه

باوعتلي وضحگت
سعديه
والله عفيه عليج خليتي مروان يكلب البيت عليـهم

ابتسمت بغرور وگتلهه
جا شعبالج انه روان

عفتـهه ورحَت للغرفه طبيت لگيت مروان يمهه وگاعديـن يحجون

ها بيبي شلـون صرتي

الحجية
كواكه(يعني زينة نص ونص ) جده تعاي اكعدي هنانه

هي نايمه ع جربايتهه ومروان كاعد يم راسهه ع جربايه
اجيت وكعدت يمهه ع جربايـه

بيبي اسفه الي صار وياج بسببي

الحجية
لايجده صدك جذب ذوله المايخافون الله بسببهم
مروان دير بالك عله روينه تره هي خوش بنيه والله بس لسانهه شويه فالت

مـروان
موشويه هواي فالت وشلون بيَ وشيكضة مادري

الحجية
عيونهه جنهن گزازه ولك وين لاگيلك هيـج بنيه سعاد الجربـه مثلهه لو سعديه الهبشه

من گالت هيـج ضحگت وهوَ ضحگ

الحجية
تدرين تشبهين عمج حسنين الله يغفر ذنبـه

اممم اي صـح بيبي كلهه تكلي بهذا الشـي
يلا انة اترخص منج رايحة اسبح حتى اسويلج شوربة شوية زينة الج

الحجية
يبعد طولي طولج روحي يمة

طبيت للحمام بعدني ستوني جاي اسبح اجاني مي بارد ثلِج
بنُص سبحتي لا اكدر اطلع ولا اكدر اكمِل
اصيح لمنو هَسة، ماعدي خيار غير مروان و والله استحي ياربيي
غصبُت روحي بالگوة وكملت سبِح، الجو مُغرب وباردة حيل

طلعت غراضي الشامبو والمرطب ومدري شنـو بعلبتهن ولفيت شعري بخاولي ولبست برنص فوگ دشداشتي وطلعت
شفت مطفين الكيزر و انة من طبيت فتحتة
شكد حُقراء، اباوعلهُم يباوعون صفح ويضحكون
عصبت حيل وخليت ورحت لغرفة بيبي
شفتهم على نفس الكعدة

يعني كيزر فتحتة وطبيت اول ماطبيت سدوا
الله يرضاهة

مروان
منو سدة

شمدرينيي مروان انة متاكدة فتحتة
ومن طلعت يضحكون

مروان
استغفرالله شلون راح تگضي هاي

كعدت يم الحجية وانة ارجف هوَ كام سد السبلت

الحجية
انطيها بطانية يمة خل تتغطة بيها

كعدت ع الجرباية ودنگت وارجف من البرد
الله ياخذهم كُلهم شكد حقراء

مروان
شجاج هيج جاي ترجفين

حاوطني بالبطانية وهوَ يباوعلي بقلق

ضليت بس ارجف من البرد، نوب احس روحي متتت من الجوع ردت اطلع واكل، حسيت جسمي صار هزيل حيل ومصرت اتحمل حتى اضل كاعدة وانة بمكاني،ردت اوكع وجسمي احس بطل يمة طاقة، صحت بصوت ناصي
مروان

هيَ حجاية وهيَ وكعة من الجرباية للگاع
حسيت بي اجة بسرعة
وحسيت لمن صار يضرب على خدي ويصيح ب اسمي

ماجان بية حيل اكلة ها
بس جنت جاي ارجف واكلة غطيني

احس بكل شي يسوي واسمع من يحاجيني بس ماكدر اكوم ولا اكدر احاجيهم

الحجية
يمة شيلها وديها لغرفتها هاي لان ما ماكلة من الصبح لسة سودة علية عود كالتي اسبح وناكل سوى
دفيها وخل يسونلها شي

صرت احجي بس مادري اذا كلامي جان يسمعة او لا
اريد مي بطني توجعني اريد اكل
دفيني مروان

مروان
هسة روان هسة لتخافين انة يمج

شالني وفتح الباب اسمعة يكول

مروان
عدي حساب ثاني وياكم حسابنا ماخلص
سعاااااد بسرعة تكومين تسوين شي البت راح تموت ب ايدي من السويتوا بيها

ام مروان
وين الله وتموت وتطلع حوبة ابني يمة دخيلك ربي من بابك ولا يخيب طلابك

مروان
بعدين يمة بعدين ..

طبيني للغرفة وحسيت بي لمن حطني عَ الجرباية وطفة السبلت
تقرب يمي وهوَ يشوفني مگرفُصة على روحي من البرد واهمس
ب غطيني

مروان
بس انزعي ذني مبللات عليج خل اجيبلج غير دشداشة

ماجنت متقبلة يمد ايدة علية حاولت اقاوم بشي بس ماكدر احس عقلي و بالي يم الاكل وجسمي يستغيث من البرد

مروان
روان لا تعاندين ماشوفج مغمض

وخرت ايدة عني

مروان
اخلي سعدية تجي تبدلج ؟؟

هزيت راسي ب لا

مروان
مغمض عيوني بس انزعي لخاطر ربج

ماكدرت اقاوم بعد ولا حسيت شي بوراهة
شوية و حسيت روحي مدفية

مروان
بس افتحي عيونج روان لازم تاكلين
اوديج دكتور !

هزيت راسي ب لا
جوعانة بس ماعدي طاقة اكوم
احس ماعدي حيل حتى احرك ايدي
فتحت عيوني كوة
باوعتلة وكتلة
مروان تعبانة وخايفة

باوعلي بنظرات غريبة وماكدرت افسرهن
اخذ ب ايدي وكال
مروان
ماراح يصيرلج شي بعد بس لازم تاكلين حاولي

شال راسي گوة وحاول يوكلني شوية وكتلة بعد ماريد ضل يغصب بية حدما اكلت كمية زينة بس احس نفسي فحطانة من النعاس بس اريد انام وبَس وعيوني كوة فاتحتهم من الدوخة

كمل وانطاني حباية مادري مال شنـو رأسًا انة نمت
شوية وسمعت خطواتة

مروان
انة راح انام يمج، خاف كل شي يصير بيج
ولتخافين ماشي

احس روحي بغير عالم وبالي مو ويا بس اريد انام
هزيت راسي ب ايّ

طفة الضوة واجة نـام على فرق مسافة

دايخة حيل واحس البرودة ب عظامي
وجسمي جاي يرجف من البـرد رغم حتى المروحة طفاهة
بس الجو جان بارد ساعتها وانة جسمي مستمر بالرجفة

مروان انة حيل بردانة

دار وجهة الي وهوَ يكلي بنعاس

مروان
مغطيج بـ ٣ روان شو

حط ايدة على كصتي

مروان
زينة حرارتج ليش هيج بردانة خاف صخونة داخلية

مادري شبية بس جاي ارجف ميتة برد

مروان
اجي يمج؟

هزيت راسي ب ايّ

تقرب مني وفتح ايدة، انة كوة اشوف وما بالي ايّ احداث او ايّ تفكير احس بس اريد ادفة وبس

سحبني يمة ونيمني على ايدة وحضني
جسمة حـار، وجسمي يرجف من البرد
حسيت ماريدة يوخر عني على كد ما شفت بحضنة دِفة

مروان ضخُم و ايدة ضخمة، احس صارتلي مُخدة
ضميت راسي بصدرة الي جان حيـل حار
حضنتة ازيد، وابتسمت براحة انُ واخيرًا لكيت الدفة ورخيت عيوني وبطريقي الى النوم

مروان
شايفة باجُر اذا لبستيني تهمة، اكص لسانج
انتِ التحارشتي مو انة

همست - ارد انام -

مروان
يلة نامي

رأسًا غطيت بنوم عميق، صحيت على صوت الديج
مافاهمة شـي من الي انة بي، باوعت الساعة بـ ١٠
حيل شكد نايمة

كدامي ميز التواليت باوعت لنفسي لابسة قميص بدون اكمام فوك الركبة و اكو دشداشة مشمورة بالكاع
هنا فتحت عيوني بصدمة وبديت اذكر الي صـار

اوكفي اوكفي روان
طبيت سبحتي
مي بارد
رحتي لغرفة الحجية
حجيتي وياهم
وبعدها وكعت
شالني مروان
طببني لغرفتي
و عزااااااااااااااااا
نزعني البرنص والدشداشة جانوا مبللات
اااي والنبي هوَ يمة
اباوع بصدمة وميتة ميتة من الخجل
باوعت الدشداشة الي يمي اكيد هاي لبسنياهة
جا شلون لبست هاي

غمضت عيوني اريد اذكر ازيد

اجة راد يوكلني
اذكر بعدها نمت
اجة نام يمي
ااااااييي والنبي اي اجة نام يمي

اوكفي وبعدين شصار ؟
نمت بحضنة!
اذكرت من حضني وكالي مو تلبسيني التهمة الي باجُر اكص لسانج
من الخرعة كمت من على الجرباية وردت اصيح حيل
صخام الصخمج رووووان شسويتيي
حضنتة اي والنبي حضنتة تذكرت
وين اضُم روحي وين اختل
والله بعد ما اواوي وجهي
هسة يكول ميتة علية

جاي اكمز ماحس إلا سمعت صوتة بالصالة
وانة سويت انبِطااااااح

كُبل نمت وغطيت روحي
نوب صابني ضحِك هستيري من الفشلة اريد اسكت ماكدر
اخاف لا يجي ويشوفني
حاولت اتذكر موقف محزن صخام لطام يلا هدئن ملامحي

انفتح الباب، خطواتة يتقرب مني وانة احس كلبي ينبض وياهن وصل الي واني مسوية روحي نايمة مد ايدة على گصتي انة جسمي رجف حسبالي شو شنو
ضحگ وكال

مروان
كاعدة مو

من الغباء الزايد هزيت راسي ب لا
اسمع صوت ضحكتة عالي صـار

هاهيّ انكشفت كمت رأسًا واني شعري منفوش ولازم البطانية من جهة صدري واحجي

ليش ملبسني هذا مو جنت لابسة دشداشة

مروان
ترة انتِ مو انة ، كتيلي عرگت ماريد هاي
فوگاهة تصيحين هاي لان كلبي طيب وساعدتج
ترة ايدي لحد هسة توجعني منج وفوگاهة ماراضية بت جبُر

يحجي والضحگة مرسومة على وجهة
خزرتة ورجعت نمت وتغطيت
هسة انة وين اروح انة وفشلتي
لو اطم روحي بعاشر ارض هم ما ارتاح

مروان
تتذكرين شصار البارحة؟ وشنو طلبتي مني

يمة صخاااااام شطالبة منة
ولج روان شمسوية انتِ
يمة انة ماعلية امان والله ادري بروحي من انعس امخرط

اكلك عاد لا تحسبها علينة ولا تضل تجيب من جيبك انة كلشي ماطلبت وكلشي ماردت وجنت نايمة واصلاً كلشي ماذكر ولا تضل كل ساع وتذكرني

مروان
ها خوش اذا مارايدة تعرفين شعلية بيج

كمت وكتلة
لا بلة احجي شردت

ضحگ بوجهي
ردت ابجي

الله ياخذك لتراوييني وجهككك روح
ورجعِت نمت وتغطيت

مروان
اكلج هسة انة شمسويلج شو اكلتينة بصوتج العالي
وبعدين واذا صاير بينة شي ترة هذا بيتي يعني بيتج لان انتِ مرتي

الله ياخذككككك شكول عليج امممم ضرغاممممم

ضحگ حيل وخلة وطلع
هسة انة بعمري مشايفتة يضحك
مبوز ٢٤ س هسة علية كام يفحط من الضحك
شكول عليج يروان اخ اخ

كمت ابدل وميتة قهر وفشلة بسبب الي صـار
كملت وردت اطلع وانة مترددة
لا روان لتضحكين ويا وتنطي على ماية
كومي وراوي شخصيتج الي دائمًا تطلع بوجهة
واهم شي متخلي يتمادة

طلعت هوَ ماهوَ وهنّ كاعدات بالصالة و سعدية بالمطبخ
رأسًا توجهت للمطبخ لسعدية

ولج سعدية منية منجن البارحة سدت الكيزر

سعدية
والله انة ماعلية هاي سعاد و الشيخ لعب بيها فلك الله وكيلج وهي هم خطية ترة خالتي ودتها بس والله لتخافين لعب بيهم جولة الشيخ البارحة

شوفي سعدية تردين تسلمين على روحج مني لو تردين اصير عليج واعاملج معاملتهم

سعدية
لا والله انتِ خوش بنية شتردين اسويلج

انة ماريد تسويلي شي بس ماريدج تسوين شي يكللج هنّ عليّ
واذا خططن لشي تجين وتكليلي خوش

سعدية
هايهية صار
بس اكلج حبابة اريد اسئلج سوال اذا جاوبتينيا شتردين انطيج

كولي

سعدية
انتِ ومروان صاير بينكم شي البارحة
ههههههه احجي لا تستحين ترة والله عادي هوَ هم زلمة ومن حقة

صخام الصخمج منين جايبة هاي سوالف لاااا ماصاير بينة

سعدية
جا سمعتة يحجون هوَ والحجية انة

فتحت عيوني بصدمة
شيحجون ولج

سعدية
يكل الها حبوبة ترفة من جوة طلعت

عطت بوجهة
هااااااااااااا
اكيدددد مفتهمة غلط ترا اكسرر راسة اذا سواه شي بدون مادري
اكيد انتِ فاهمة غلط واحنة ماصاير بينة كل شي خوش
ديربالج تحجين بيها والله سعدية اروح لمروان اكوله عليج

سعدية
لا والله راح اسكت والله ماعلية

نبهتها ورحت كبل للحجية بس انة شنو دمي جمد من الخوف
طبيت للحجية وضلت تحاجيني وتسالني علية

بييي حبابة بروح عباس اريد تحجين الحقيقة حبابة بيبي
مروان كايلج انُ طلعت ترفة من جوة وسعدية سامعتكم حبابة شنو يقصد

الحجية
كالي حبوبة وهيَ فاقدة طلعت على حقيقتها بريئة وحبابة ونفس الملاك كوة تحجي طلعت ترفة من جوة هذا الي يقصدة يمة

اكيد بيبي

الحجية
اكيد يمة شمالج

وصيتها متكول شي ع سعدية وخطية هيَ هم جانت تعبانة لِسة

كضيت طول اليوم اراقب مروان رِقابة مُشددة
يطب منا اطلع منا وماخلي يحِس بية

لحد بليل صاحني هوَ يبو يبو يبووو شلون بيـة
كمت رحت لكيتة يم الحجية

مروان
شبيج ضامة روحج جنج بايكتلج بوكة
الحجية تريدج اكعدي يمها شوية

ماباوعت الة ابد بس كاعدة وساكتة خانسة بهدوء
ضلينـه يمهه شويه وضلت تحجي ويانه تجيب سالفات قديمـه وتحجي بيهن وانه اسمعهه ومروان گاعد وصافن مدري ويـن

حسَيت بروحي نعست وبيبي مستمرة تحجي نوب تعيد بسوالف وترجع لورة وغصبًا عليك تسمع كون
ماحسبت  بروحي غير غفيـت

فززني صوت مروان وهوَ يكلي كومي لغرفتج

هااا لا لا انام هنا خاف الحجيه شو شيصيرلهه خليني يمهه

الحجيه
لاجده روحي لفريشج(فراشج) نامي ورتاحي يم رجلج انه ماعدي شي

لا بيبي انام يمـج ماعدي شي

مـروان
روحي نامي بغرفتج انه انامن يمهه

لا انة انام يمهه روح انت ارتاح متعرف تنـام الا بغرفتك

مـروان
نومج ثگيل انتِ وماراح تكعدين بسرعه ف خليني انه هنا

وانت شمدريك بيه وبنومي خفيف

مـروان
شعليج بويه امشي نامي واسكتي يلـه

لاتحاجيني بهل اسلوب انه مو خدامه عندك

مـروان
يارب صبرك اعصابي تالفه مالي خلك اتعارك وياج

الحجيه
ولكم يمة روحوا ثنينكم ماريدكم ماريد انام وحدي روحوا

مـروان
لا انه انام هنا

كتلك انه انام روح انت شكد تعاند

مـروان
ارد اعرف هذا العناد ماخذته من جبر لو من ابوج لو من ياهو بالضبط

الحجيـه
ماخذته من ابـن عمهة مروان الدم واللحم اله حوبه
يله امشوا اطلعوا ثنينكم ماريدكم اردنامن والله مابيه شي

مروان
حبوبه انه انام يمج ماعليج

من حبايـه بـ..... امش اطلع خليني انام امش ماريد واحس هنا

من گالت هيـج ضحكت حيـل اباوعله تفشل ماعرف شيحجي خله وطلع

والله عفيه عليج بيبي عفيه
هيج اريدج دومج فشلي هيج خلي مايعرف وين يضم روحة
عفية عفية
من الحماس رحت وانطيتها ايدي واريدها تصدها

مروان
ولج مو اجيجج

هيَ ضحكت وانة ضحكت

الحجية
امشي نامي يم رجلج امشي بلكت الله تحصلولكم فرخ بجاه هاي المسـية

اي يجي الفرخ من زرف الحايط والله يالله

الحجيـه
وانتي ماعندج زرف حته يجي من زرف الحايط مو

من كالت هيج فتحت حلكي بصدمه وكمت اضحك
الحجيه شقاهه ثگيل
خل اشرد لا تثگل وياي

عفتـهه وطلعت

ضالين ع نفس گعدتـهم محد حجه وياي بس يباوعولي بحقد

وانه امشي واتمختر گبالهم
احس روحي ملكه الساحه وغصبًا عليهم
والله اني اصير فقيرة واهتم لرضا هذا وذاك
ياكلوني ذولة
فَ احسن تعامل هوَ هذا وياهم

طبيـت للغرفه لگيت مروان نايـم بالغرفه
عود هذا شنو
يعني ميروح يم نسوانه لو شنو

رأسًا ومن دون تفكيـر كتله

اكلك يعني انت ماتروح تنام وي نسوانك ؟

مروان
انام وي نسواني
لو انام يم نسواني حددي بالضبط

لسانك نفس الحجيه هم فالت؟

ضحگ وكـال
مروان
احترمي نفسج لـج
عود اذا جاي على بالي هنه يجن لهنا مو انه اروح الهن

ماجرد ماتخيلت الموقف
وشلون حاس نفسه نفس السلطان سليمان
وكل مدري شكد يدخل بخلوه ويجيب نسوان

صراحة
اكو فرق شاسع بينة وبينهن
نسوانه وصخات حيل لدرجه من اجيت لسـه ماشفت وحده سبحت وشعرهن معطب وحيل مامعتنيات بروحـهن
بينما هوه نظيف حيـل لدرجه يسبح باليوم ٣ مرات الاحظه
نفس البطة كل ساع سابح ولابس دشداشة غير وعود هذا شتا

بـس قرفت وهوَ يحجي هيج

من دون ماحس گلت ايع
وانطيت ملامح القَرف

ذب الموبايل الي جـان بيده وگال

مـروان
شنـو قصدج بال ايع هاي الكلتيهه؟

طفيـت الضوه واجيت يم التيبلام فتحته

مـروان
موجاي احاجيج شبيج انلصمتي

موعن شـي بس انه اكره هسوالف

اجيـت والفراش جان مفروش بـس نمت عليّ

شفته وهوَ گعد ع حيله ويباوعلي ويحجي

مروان
اكلـج عود صدك يعني انتن بنات جبر كلجن هيج جريئات لو بـس انتِ

بـس انه الباقيات كلهن فاهيات لا تخاف

مـروان
زين وانتِ عليمن طالعه هيـج

وحدي ما طالعه عله احد ، ماحب واحد يستضعفُني وبَس

مـروان
زين اكلج انتن البناويت كلجن عيونجن ملونه وهيج حلوات ؟

وانت شدخلك نام واسكت

مـروان
هييي لا تحجين وياي هيج مو مال واحد يحترمج

لا ولله وانه كاتله روحي حته احاجيك

مـروان
شكد لسانهه متبري منـهه

سكتت ونمـت اشوف اضاءه موبايله مفتوح

كمت وطلعت موبايلي من الكنتور
وتعمدت افتحة واخلي يشوفة
ماسئلني عليّ ولاشي فَ غلست
ضليت اكلب بي شوية ونمـت
كعدت الصـبح ع صوت سعديـهة

سعاد
نايمه لظهاري اكعدي عمتي تريدج

اهوو دعيفوني خل انامن شهل حيـاه

سعاد
والله انه ماعليه هي كالتلي كومي احسن الـج

گمت من نومي وانه ماطايقـه روحي

مشطت وحطيت شال ع راسـي وطلعت كل وحده جاي تسوي شـي ويشتغلن اول ماشافتني كالتلي

ام مروان
روحي اطلعي للطارمـه اغسليهه ورشي الحديقه يله احنه مشغولين

اخاف اكو احد بره

ام مروان
ماكو واحد اطلعي

بس احنه مايخلونه نطـلع عد بيتنه لان اغلب المرات اكو زلم يطبون للديوان وخاف يجي واحد لان ديوانكم هم بره البيـت

ام مروان
اطلعي ماكو احد شبيـج

تحجي وياي زين يعني مو اسلوب تأمر ف كلت اطلع شفت الحجيه نايمه

طلعـت ومديت صونده وبديت اغسـل اسمع صوت زلـم

حسيت اكو شـي غريب وحسيتهن يلعبن عليـه ومن سون هجي يقصدن

جنت بـ آخـر الطارمه ماحس الا شفـت طلعوا من باب الديوان ...... يتبـععع
______________________
شمِس :

رحت كعدت بمكان وحدي
نفس المكان الي محمّد واني حجينا بي
هلمكان مابي احّد غالبًا فَ احب اكعد بي
كاعدة وصافنة وافكر بمحمّد ودموعي بعيوني

ماحس الا صار كدامي حسين

حسين
واخيرًا لكيتج صار ساعة ادور عليج

عفوًا وليش تدور علية؟

حسين
اني اسف حيـل لان سببت الج مشكله وانطردنه من وراي

لا ماكو مشكله خلاص

حسين
مبينه زعلانه وهاي جاي تبجين اني اعتذر حيل والله موقصـدي

تمام تمام هايهيه ولا يهمك

حسيـن
شنو اسمج؟

شمس

حسـين
واذا طلعت شمس طب انت للبيت لان شمسـين معناهه احترگنه

غنـاهه هيج اعتباطاً ابتسمت بوجهة تسليك اريدة بَس يروح

ماحسَيت الا ع صوت تصفگ ورانه درت وجهي وجان انصدم ب وجود محمـد

اباوعلـه واگف ويصفگ ويباوعلنه وبعصبيه

حسـين
شبيك محمد شكـو

باوعلي وگـال

محمد
يعني انتِ شنو قصدج بهاي الحركـات
حولتـي لـ صديقي شنو وليـش تردين مثلا شنو تغيضيني بيَ؟

حسـين
هاي شجاي تحجي محمد

باوعتلـه واني مصدومه هذا شجاي يحجي وشجاي يخربط وياي!

عصـبت حيل منه وبنفس الوقت دموعي ملن عيوني
تعودت دموعي يكونن رخاص وبكل وقت ينزلن بٌسبب محمـد

تره الـي براسك مجرد اوهام وانت الي جاي تطلعهن وانت تصدگهن

محمـد
لا ترخصين روحج وتنزلين لهذا المستوى ابد لان ماراح انغاض ولا راح راح يرف الـي جفن لانج ماتهميني ابـدددد فاهمه

احس ماتحمل يحاجيني هيج ولا عندي قوة حَتى الي تخليني اسمعة وهوَ جاي يوجه هيج اتهامات الي
عفتهُم ورحت رأسًا ..

معقوله هذا الانسان نفسـة
هذا نفس الانسان الي تعرفت عليّ من قبـل ٦ سنوات
هو هذا نفـسه الانسان الي ضيعت ٣ سنوات من عمري ع انتظارة !!!

لو جـان غيره مُستحيل اسكُت
بـس محمد !
محمد الـي سويت ماسويت علموده !
انخذلت هواي
حسيت روحي عاجزه بـ انُ احجي حرف واحد

مشـيت بسرعه واني بالي مو يم احـد

شديصيـر ؟
انـي بحلم ! بحقيقـه ! لو ويـن؟ والله مادري

صدمة وقساوة موطبيعية تعرضت الها
رحَت بمكـان وحدي وضليـت بـس ابجي

محمد شلون تغيـر هيج
شلـون انطا گلبـه هيج يسوي وياي

من بعد ساعتين بنفس المكان
ودموعي مانشفن ابـد

احس الجامعة بدت تخنكني
ماريد اضل هنانة ابـد
ماكدر اخابر بابا اذا شافني بهل حالة راح يعرف
اخابـر أمير مايرد

اخـر شـي رحَت للعماده كالولي عنده محاضره
عفت وكعدت يم العمادة
الشمس عالية ولا حسبالك شتـاء
واحس روحي انسلحت من الحّر

خابرت بابا مايرد
ردتة يجيني لان احس كلش تخربطت وبعد ماكدر
استلسمت وكلت خل اروح لامير احسن شي

رحت لقسم العربي لان جان قريب يم العماده

جنت دايخه وبالكوه امشـي سالت طلاب كالولي بهـاي القاعه

طبيَت لگيته ديشـرح

أمي... العفو استاذ
ممكن شوي تجـي

باوعلـي واستغرب مني لان جانت وضعيتي كلهه مادري شلونهه
اتقدم نحوَي وحجه بهمس

احجي ويـا ولازمه الحايط اخاف لا اوگع

اميـر
بيـج شي شمس ليش حالتج هيج

امير خابر الـي بابا حيل دايخه واحس راح اوكع واخابره ومايرد عليـه

امـير
تمام جاي اني روحي اكعدي ع هاي المصطبه الي گبالنه اجيب غراضي و اجي

تمام منتظرتك

طب للقاعه واستاذن منهم

اجت عيوني ع بنيـه

تباوعلي وتباوعله بنضرات غريبه
مع انُ الكل جان يباوعلنه بـ استغراب
بس هي حسيت بعيونهه دموع

طلـع اميـر وگال اني اوصلج للبيـت

مشينـا وراد ياخذني للمستشفى ماقبلت
گال خاف يصير وياج نفس ذيج المـره

كتله لا والله ماعندي شي بس شويه دوخـه

جان فاتح تبريد السيـارة واشترالي عصير و كيكة وضل يلح علية انُ اكلهن
مُستحيل اكدر اوصف شكد هوَ انسان زين
احسة يريد يحاول يحجي وياي بس اني ماجان الي قابلية كلام ابد

امير اسفة خاف حرجتك لان اجيت

امير
لا بالعكس ماصار شي زين سويتي لو ضالة مُمكِن تسوء حالتج

أكوبنيـه عيونهه دمعت من شافتني وضلت تباوعلك هـواي عندك معجبـات مبين بالكليـه هههه

اميـر
منو قصدج عيونهه دمعن؟

ماعرف بنيـه حنطـيه بالوسط حلوه وبصفـها بنيـه سافره البنيه الحنطيـه ضلت تباوعلك وعيونهه مدمعه ع عكس بقيه البنات الي اكلني بنضراتهن

اميـر
فَرس اه

هزيت راسي الة، باوعت ملامحة نكلبت وضاج هواي
وسكت
اني هم سكتت

التفتت للمراية وأحس عيوني خااننـي
دموعي بدن ينزلن واني اتخيل شكل محمد وهوه يصيح عليه ويحجي هيج حجي وياي

وصلنـه للبيَت امير ماراد يعوفني وحدي بـس كتله والله ماعندي شي

طبعًا بابا ابد مايرضى ارجع للبيت وحدي وموصيني لو هوَ لو امير وممنوع ارجع تكسي ابد هنانة ..

عافني وراح ووصاني اي شي احتاجة يخابرني
طبيت للبيـت تعبانه حيَل
ذبيت روحي ع الفراش ونمت وصرت افكر

عود بيـه حيَل ابين اني قويه؟
بيه حيل اكله لا تحجي هيج وياي
بيـه حيل ادافع عن روحي كلمه

والله ولا اكدرماگدر والله ماگدر

هوَ اني بس اباوع بعيونـه اضيع وانسه كل حجيي

شلون احجي ويا كلمه
شكلـه وشحاجي

غمضت عيوني ودموعي ينزلن منهه

اااه يامحمد اااااه ليش هيج ياحب عمري
ليـش هيج تختبرني
ياريت لو ماشايفتك
عاد ظليت احس بنفسي غلطانة احسن مِمّا تتشوه هيج صورتك بعيوني
ليش سويت هيج

اباوع لشغلاتنا القديمه واعاتبـة
احسني تخبلت ع كد ما احجي وي اشيـاء مجهولة

كمت شوية اريد اشرب مي
الكامرات بالصالة
انتبهت سيارة امير موجودة
يا سودة علية هذا واكف برة !!!

حطيت شـال على راسي ومديت راسي من الباب

هوَ شافني نزل
اجة وكف وانطة ظهرة الي

امير
ها شَمِس خوما محتاجة شي ؟
بيج شي تحتاجين مُستشفى؟؟

لااا مابية شي بس انصدمت من شفتك بالباب

امير
العفو مو تاخذيها بغير نظرة بس خفت تتخربطين وانتِ وضعج الصحي موزين ف كلت اضل خاف تحتاجني

لا امير موهيج
بس ليش واكف برة طب اتفضل الدنيا حارة !

امير
لالا ماعندي شي وهوَ عمي هسة على جية ويجي
كاعد بالسيارة وتبريد بس اذا تكدرين اريد جاي لان راسي ياذيني

امير صدُك تحجي شنو انتَ غريب ترة انتَ ابن عمي
طُب لتستحي

حاولت ويا يطُب ما قبل ابد هُمة عدهُم عيب يطب لبيت مابي رجال حتى لو بيت عمك، ياربي احس امير متربي ١٠ مرات شنو من اخلاق وشنو من تربية مادري، ياترى الباقين هم نفسة؟

هو بالبداية حسبالة اني فهمتة غلط وانُ هوَ واكف ديراقبني او شي بس اني عرفتة راسًا ضل لان خاف اتخربط ع كد ما طول الطريق ضل يسالني بيج شي نروح مُستشفى محتاجة شي

حنانة واهتمامة نسخ من بابا
اصلاً حتى ينطيني شـبه
يعني اذا وكفنة سوى تحسون بينة شبه قوي وتحسونة من نفس الدم

خابرت بابا وكتلة بالسالفة
خطية قلق علية كتلة والله ماعندي شي
سولفتلة على امير كال راح اخابرة اني
اخلي يطب عمّا اجي
خابرني شوية بابا كلي بابا ميرضى طلعيلة جاي
واني شوية وجاي وجايب غدة وياي

صدك والله سويت جاي، وكيك وانطيتهيـا

الي عجبني بي ثكُلة، ما شاء الله شكد خلوق وثكيل
بحيث ابد ما باوع علية بنظرة

كتلة بابا راح يجي ومعزوم ع الغدة ابـد ماقبل كلي هسة اني اخابرة واعتذر منة عندي بصمة بدوام ولازم اروح
اني هم رحت نمت لان جنت تعبانة هواي

كعدت بابا سالنـي ضليت اكله ولله تخربطت ومو عن شـي
ضل يلح وياي ويكلي شَمس خاف الي بالي قنعتة انُ لا
من كعدت من النوم حسيت نفسي مريضه حيَل ومالي خلك بشكل
لليـل زادت عليه واني ادري روحي ماتحمل الا دورة ابُر يلا اصير زينة فَ رأسًا رحِت اخذت ابر 

حَسيت اريد اخُذ اجازة ثانية و ارتاح، اتواصل وي امير وشرحتلة وضعي وكتلة هُمة يدزون تسجيلات بالكروب ف اكدر اسمع بالبيت كلي دام ماكو امتحانات ميخالف اجددلجياهة اني وصدُك والله سوالي اجازة وي الجُمعة والسبت صارت ١٠ ايام

كعدت فتَرة معينة بالبيـت، احاول اوازن الي صار
الملم نفسي اعوض خسارتي
بس لكيت ماكوشي يتعوض ولا اكو شي يرحع لمكانة
مكسورة اني وبشكل محد راح يتخيلة ابد ..
مخنوگة ومخذولة و متندمة وكل شي بنفس الوقت
خلصت اجازتي و
اليوم الثاني داومت

اباوع لمحمد أحسه يريد يحاجيني
عكِس كل مرة، نظراتة جانت تجاهلني تجاهُل تام
اروح منا يروح مناك حَتى لو طريقنا يشابه
شو بهـاي المَرة عيونة ما رافقني
ربكني حيَل واحس توترت بسبب نظراتة
حسـين ماشفته بهذا اليوم مبيـن ماجاي

صادفت اخر محاضـره عدنه احس روحي دايخه حيل ونفسي تلعب وكوه متحمله

احنه بطبيعتنـا محد يضل بالقاعه من يكمل
كلهه طلعت ضليت بس اني نمت ع الستيـج واني ميته من دوخه

شوي سمعت صوت محمـد وجان صوت مليان حنان وخوف

محمد
اسم الله عليـج شمس شبيج

رفعت راسي انصدمت من وجودة
باوعت اكو طلاب بالبداية موجودين
رأسًا كتلة
مابيـه شَي بس عوفني وخر عني

محمـد
اسمعي شمس اني اعتذر و

من شنو تعتذر و المن

احجي ويا وماكدر اكون قويه ماكدر احس روحي تحترك من اشوفه مو هيـن عليه ابد مو هيـن اشوفه كبال عيوني وماحاجي وماكلـه عله حبي الة شلون امنع نفسي منة واني انتظرتة ٣ سنوات شلون؟

كوة حاولت اقوي روحي بس احس اذا حجه كلمـه زايده ابجي

محمـد
شمس اسف عله كلشي عله كلشي اسف

شمـس اني تره اموت ميت موته باليوم لا عبالج مرتاح لا عبالج بـس انتِ تعانين
ليلي ماجـاي اگدر انامه وحق ربـج افكر شلون اگدر اتخطى هاي السالفه افكـر شلون راح احلهه

شمس
محلوله تره محمد شتحلهه وشتسويلهه هايهيه الحمدلله على كلشي

محمـد
باوعي لعيوني

شلت راسي وباوعتله لا ارادي الدموع تكوومن

محمـد
بعدج تحبيني مو؟

ضليت صافنه بوجهه شحجيلة وشكلة

محمـد
احجي بعدج؟

محمـد كافي انت شجاي تحجي قبل شكم يوم شنو كتلي انت متزوج

حجيـت كلمه متزوج وبينت الخنگـه عله صوتي

محمـد
گلبـي بعده يمج ومانبض لغيرج ابد شلون بي؟ 

رجعت رفعت راسي الـه وكتلـه
جنت مخططة راح اجي والكاك و هههه جنت مخططة لغيـر شي وياك

محمـد
خلاص شمـس ماراح اخليج تعانين اكثر مستحيل ولا اكددر احجي وياج هنـانه انطيني رقمج خل احاجيج، انتِ حتى بالكروب ماطابة بس قناة الدُفعة ومايطلع منو مامنو بيها

ضليـت ساكته ودمعتي نزلت

محمـد
بس لا تبچين والله كلشي ينحـل والله

بيمن ينحل محمـد شلون ينحل شو فهمني

محمـد
ينحل الله يدبرها لان يعرفني شكد احبـج ويعرفج تحبيني

تطلگ مرتك مثلاً وانتَ عندك بنيـه لو شنو؟

محمـد
لا ماطلگهه
بـس نزوج بالسـر...

انت مخبـل؟؟؟
هيج وصلت ويـاك لهل درجه هاي !
شنو اني بية شي لو شنـو وتزوجني بالسـر؟ 

محمـد
والله مادري شصرف والله مادري
شمس احنه حياتنا بس مشاكل لا تشوفينـه بالكليه احنه ايد ب ايد مامتراهمين ابد بس بنفس الوقت امـي مستحيل تخليني اطلگهه او اتزوج غيرهه لان هي بنت اختهه

هـي هاي حلولك لعد؟
خليك عليـهه والله يوفقكم

كمت من الستيج مالتي وجنت حيـل معصبه
الحُب والانانيه استولونـي كانما طفل صغير
نسيت ببداية الدوام شلون حاجاني وشكد وضحلي انُ هوَ مايريد يخسرها.
وكانمـا شمس القديمه رجعت ونسيت كُل الظروف الي جاي نمُر بيها

رجعت المكاني المُعتاد كاعدة ودموعي تنزل بهدوء
واحِس نار بكابي

ماحِس الا صار كِدامي
وفاجئني وهوَ جاي وماخذ ايدي
باوعتلـه وباوعت لايده وهي حاضنـه ايدي
نسيت كل الي صار وخليت ببالـي الي لازم ايدي محمـدي الي انتظرتة كل هاي السنوات

اخـذ بايدي وقربهه اله
اشتمـهه وباسـهه

محمـد
ماطب گلبي غيرج والله ثم والله ، نفس ماعندج تبريرات عندي تبريرات اكثر ، ولتبالين بـ الكلته اول يوم ، جنت مصدوم انُ انتِ بعدج تحبيني ، جان ابالي نسيتيني والله ، لتشوفين وضعي هسه ! عشت بجحيم بعدج والله

احـس اكو ضحكه صارت بكلبي موطبيعيه مستحيل انكرهه
نترت ايدي منـة ورحت بدون ما احاجي
بوقتـهه جانت عدنه استراحه(ريست) طويـله لذالك رحَت للنادي

أحس كلبي يريد يوكف
الضحكه انرسمت عله وجهـي

نسيت انُ محمـد متزوج ونسـيت كلشي وضل بالـي كله محصور يمـه
كعدت بالنـادي شفت مرتـه گاعده هي وصديقاتهه

حسيت بذنب جبير
اني شسويت
ماسويـت شي بس احس كلبي طفح احس كلشي جاي استثگله وماجاي اكدر اكمل

موبهسوله هاي اكدر انكر وجود محمـد
موبهسوله انسـا هذا الانسـان اني احبـه من جان عمـري
١٦ سنه
وانتضرته ٣ سنوات وبذلت كل جهدي حته بس اشوفه ومن اجي الكا يم غيري !

موبسهوله اقنع روحي ابد بفراكه

شويـه و اجه هوَ
گعد مقابلي ضبط

ضل يباوعـلي اني ارتبكت دنگت راسي بس احس بشعور غريب

شعوري مايكـدر احد يوصفه بـس جان ممتزج بين الفرح وبين الخوف

شلت راسي شفت مرتـه جايه يمه

اخذت نفس طويـل وفتحت موبايلي وكعدت اشوف ذكرياتنه القديمـه

شعوف وشخلي ياربي
الانسان الي انتضرته عمري كله

اباوعله تحجي ويـا وهوه يباوعلي خفت لا تصيـر مشكله ابيناتهم او تنتبه خليت وكمت

احس المكان خنكني
المكان الي طول عمري امنيتي يجمعنه هسه صار يخنكني

احس روحي بحلم وهل حلم حيـل صعب
بحيرة وهل حيرة صعب يوصفة احد
انتـهه الدوام ومحمـد يباوعلي بحزن جبيـر وعيونه مافارقني ابد

بالطريق افكر، افكر شلون اول ماشافني يكلي نسيتج وهسة يكلي لحظة مارحتي من بالي، ساعة يكلي احب رسل ومتفاهمين ساعة يكلي لا تشوفينة هيج احنة ممتفاهمين احس صار يمي لخبطة
رجعت للبيـت واحس روحي مكسوره. مكسوره حيـل لدرجه جنت اتمنى من جنت بثالث لا نزلت الفيـس ولا تعرفت عليـه

نمت وكعدت العصـر
فتحت موبـايلي هل مره وجانت صدمتي انُ محمـد دازلي رساله

فتحت الرساله وعرفتهه منـه صورته و اسمـه وكلشي

انعادت عليـه كل ذكرياتي القديمه بس هل مره احس شي يختلف مونفس كل مـره ومو بنفس الهفة ابد

محمـد
شمس ضروري احاجيج

كتبت
اي

ضليت بالمحادثـه شويه وگال راح اخابرج مانطاني مجال اكتب او افكر رأسا خابر

رديـت عليه من بعد تفكير طويل وصراع جبير بين عقلي وكلبي

محمـد
تدريـن اليوم مادري شصارلي ماعرف احس كلشي قديم راجعلي

هه وستوك محمـد تره صارلي من مداومه شكد راح يصيـر شهرين بالجامعة وانت ستوك حسيت عله روحك ومن بعد شنو محمد شجاي شتريد تعمر وانت خربت العماره كُلهه

محمـد
شمس تره الفعله الي سويتيهه ماتشفعلج تحجين هجي ابـد
ولا نسيتي حجيج وي صديقتج؟

جاي تحاسبني ع شغله صارت بوقت المراهقه سويتهه واني عمري ١٦ سنـه ؟ جاي تحاسبني  الي وتعوف روحك؟ الي عفتني ٣ سنوات بدون مايرفلك جفن ؟

جان بامكانك تعلمني وتفهمني !!!
انت جان عمرك ١٩ وتريد تطب الـ ٢٠
واني جنت ستوني طابه الـ ١٦
وهيج عفتني رأسا

اني مانخذلت لمن رحت
بكد ما خذلني السبب الي رحت علموده

رحت ع سبب تافه حيـل
رحَت ع سبب خلاني اكره روحي بسببه !

جنت اكبر من عندي وجنت تكدر تكعد وتفهمني وتعلمني

بس انت ههههه
انت حسستني نفس الطـير ولگاله حجه بَس حته يروح بسببهه

٣ سنوات ضبط ماجيت ببالك اني ؟
ماكلت خطيه ؟
ماكلت هي وين ؟

ماكلت خل اراسلهه
كلشي ارقامي صفحاتي كلهه يمك
بس انت ماخليت اثر لروحك

يعني معقوله خلال هل ٣ سنوات مافكرت بيـه
ماصار نقص بحياتك
من تركت شخص جان وياك يوميـه
يعني لهاي الدرجه ماذكرتني

شنـو من كلب عندك انت؟؟؟؟
اني ماتوقعت الكاك موجود !
توقعت الكاك ميت!!

اي اي وصلت لهاي المرحلٌه فكرت انك تكون ميت
انك تكون مشلول

وصلت وياي لمرحلـه
كلت يكون ضايج من عافنـي وطلع بسياره وسوه حادث

اي وصلت لهل مرحله
تدري ليش ؟
لان الي اعرفه محمد مايعوفنـي ابد!!!

بس شنووووو؟؟؟؟
احجيلك ع خيبتي
احجيلك ع شنــو لگيتك وشلون

هههههههههههههههههه
صرت اضحك ودموعي تسابق بالنزول قبل ضحكاتي

تاليهـا بيروده اعصاب
الگاك شنو؟
ههههه مكمل حياتك بعدي ومتزوج وصايره عندك بنيـه وطاب للكليه الي تريدهه وحياتك كلش مرتاحه

بينمـا اني ؟
هدرت عمري كله واني انتظرك
عدت بسادس حته بس اكون وياك
اجيت محافظات وجذب ع ابويـه بَس حته اشوفك واكون وياك

وانت ههههه
انت كسرتني انكساررررر
بعمري وبحياتي ماشفتـه

انت تدري شنـو
لگيتنـي ورده وبعدهه مامفتحه
ورده صغيرونه
شسويتلهه؟
فتحتهه وربيتـهه وكملـت
صارت حلوه هلورده ونفس ماتريد
كبرت هلورده وصـار شي ميعجبك بيـهه
شلعتهه ودستهه موبس شلعتهه
وشسويت؟
ها كلي شسويت
جبت ورده ثانيـه!!!!!

اي اتصور انت بهل قسـاوه هاي
انت طعنتني ميـت طعنه
وهسه جاي
لك جاي من بعد شنو
من شنو حاجيني كُلي !!

جـنت احجي ويـا وابجي حيـل
وصوت بجي جان مسموع يمـه ماجان بس دموع
لا جانت شهگات وياهن تعبر عن كل الـي بگلبي

محمـد
كل هذا صار بيـج بسببي ؟
جا شكد اني حقير !

جنت تحبني اكثر ممـا احبك حتى
بينمَا هسه هه

محمـد
شوفي ثنينه جنـه بقتره مراهقه
نفس ما انتِ غلطتي اني غلطت
بس الفرق بـ انُ الفتره الي غلطت بيهه وياج
ماجانت الي حته اكدر اصرف بيـهه

من عفتج شفت الموت بعيونه
بديت ادخن وبده كلشي ينهـار داير مادايري
وبهـاي الايام جنت كارهج

اي كارهج بشكل خيـالي
لان الي سويتي خلانـي انصدم
خلا توقعاتـي بـ نقاوه شمس يروح
وخلانـي اشك بيـج و اكرهج ازيد و ازيد

بعدهه بيـت اهل رسل كلهم توفوا بحادث
واجت رسـل يمنه
ومن ابوي گـالي وعرض عليـه فكره الزواج
لانها راح تضل يمنه وحجي العالم ومدري شنو

امي بساعتها تدري بيـج
لذالك شجعتني على الزواج حتى انساج
ومن ابوي عرض علية رأسًا وافقت حته بَس اعالج روحي منج
بس انه غلطت بغلطه ثانيه عله غلطتيَ

مادري شصـار بعدهه بس حاولت ابعد روحي عنج
واجذب اذا اكول مانسيتج
اي نسيتج واني اعترف

رسـل درت بموضوعج وهواي حاولت حته تنسينيياج
وصدك نسيتـج

اجتني بنيـه وبهل يوم واكف يم ابو البيانات وگالي شسميهـا
صفنت واجيتي ببالي وگتلـه شمَس

ومن شفتـج اول مره استغربت حيـل وجنت نافر الموضوع ومتعجب شلون كدرتي لسـه تذكريني

اني كلت نستني وخلاص!
مستحيـل اكو بنيه تفني عمرها عله ولد

بـس هَسه !
شمس لا تتوقعيني اعوفج ابد
وانتِ هلگد تحبيني
لا تتوقعين افرط بـ انسانه نفسج

يعني شنـو هسَه
هههه حسبالك دتلطف الجو
او مثلا حسبالك دتبري نفسك ؟
تره جاي تزيد قهري
جاي زيد بجروحي !

شلـون كدرت شلون تنساني وتستبدلني !!
حبك جـان موصدك
بـس حبي الــ صدك

انت شفتني هسـه شلون احبك وضليت متمسك بيـه
بَس انت ماتحبني ولاراح تحبنـي

راد يحجي سَديت الموبايل بوجهه
عفت الموبايل وضليـت ابجي

كُلشي بي جاي يخذلنـي
كُلشي جاي يدمرني

يحجي كلمـه يزرف كلبي بيهه من دون مايحس
من كالي رسل حاولت تنسينياج وصدك نستني
احس روحي انخذلت!

وكل هذا ويريدني استمر ويا

تنرفــزت ومتتت من حجاياته
شفتـه يراسل كومه مافتحت رسالاتـه ابد

گضيت هذا اليـوم بتعَب كُلش جبيـر
اليوم الي ورا جان عدنه عطله رسمية

بابا اقتـرح عليـه انُ نطلع سوى ونتونس بي
صدك والله طلعنـا وطبينـا مطعم وافترينـا

قررت انُ فكره محمد تتكنسـل نهائياً
ومستحيـل أتقرب الـه مره ثانيـه
لخاطر بابا عاد

اليـوم الي بعدة داومنـه
وبابا هنا حول ع شفت المسائي
يعنـي دوامه جـان بالعَكس مو صباحي لا يبدي بالـ ١
اني اعرف اسوق لهذا كتله واقترحت عليّ
انُ اروح للجامعه مالتـي بسيارته

مامانع هذا الشـي وكمت اروح بسياره بابا وارجع بيـهه

محمد يحاول يحجي وياي بـ شتى الـطرق بـس جنت احاول قدر الامكان ابتعد عنـه وجنت احط ابوية بعيوني بكُل مره واتنازل عن كُل مشاعري الي احسهه

حَسين جان يسلم عليـه دائما من بعيد
وكذالك يمـشي وي محمد
يعني مبين مابيناتهم شـي ومتفاهمين

طول الـ ٣ ايام هاي اني امثل القوى
احاول مافتح رسائله احاول اقراهن بس بطرق ماخلي يعرف اني قاريتهن احاول الزم روحـي ومارد عليّ وبدوام مالتقي بي هـواي

گاعده امشـي بالحديقه وحَدي شفته اجه
غيرت اتجـاه مشيتي حتـه ما احجي ويـا

سرع مشيتـه الي و وصـل الي

محمد
لا تتهربيـن مني خلـي احجي وياج

نعم محمد شتريـد ؟

محمد
اريدج انتِ !

من حجـه هيَج اتذكرت ماضينـه وسوالفنه قبل
بشكل غير ارادي منـي أبتسمت ودنگت
بس إبتسامة انكسار حقد الم

محمـد
ماجاي اشاقـه
بهاي الايام الـ انتِ صادتني بيـهن انه حجيت وي اهلـي وهايهيه راح نجـي ونتقدم الـج .

من گال هيـج انصدمت حيـل
رفعت راسي وگتلٌه

انت من صدُك تحجي؟

محمـد
مامجذب ابـد راح نجـي واليوم هم
وراح اخـطبج وأذا مـا وافق ابـوج انـي مستعَد بـ انُ اكلـه ع كل علاقتنه و ع كل شـي جاي بصير بينـه وهوَ راح يوافقَ ساعتهـا

محمـد انت اكيد مخبـل
انت متزوج وعندك بنيـه شجااااي تحجي؟؟؟؟

محمـد
انـي قافل وكونـي على ثقـه راح اخذج
وانـي متاكد مراح ترفضين

شنـو الـي ماكدلك انـي راح اوافق
انت شبيـك؟؟؟؟

محمـد
كُلشي راح يصيـر واليـوم اني جاي احجي وي ابوج
بس اكلـج شي واروح
انتِ راح تضلين تحبيني ومستحيل تنسيني وراح تدمريـن حياتج بسببي
وانـي جاي ادمـر حياتي بسببـج وبسبب حُبج
خلينـا نجتمع احسـن

بنسَبه لرسل راح تكون بيت اهلي
وانتِ بـ بيت وحدج

ماراح اعوفج ابـد وكوني واثقـه

محمـد ماراح اوافق
وحتـى لو عندي ذره قبول ابويـه ماراح يوافق

محمـد
عندي شـي الي راح يخليج توافقين بيّ
جدج منو
جبـر ...
الشـيخ جبر الي الكل يعرفـه
ماعندي استعداد ابد بـ انُ اراوي كلشي بيناتنا وبهـاي الحاله راح يزوجج الـي وبدون تردد
بـس اني ماريد انزل راس ابوج واني اعرف المشاكل الي بين بيت جدج و ابـوج لذالك ارفعي راس ابـوج احسن مما ينزل

ماجـاي احاجيج بـ نذاله ابد
جـاي احاجيج بـ انانيـه بيج جـاي احاجيج بـ شخص شاريـج بروحَه
وعنده استعداد يخسر اي شي في سبيل يحصل عليـج
وماعندي اي مانـع يخليني
ما اكول لابـوج هيَج اذا اعترض

خلانـي أنصدم بحجـيه لدرجه ماعرفت شحجي

محمـد
روحَي
شمـسي ، ترا انـي شاريـج !
لا تضيعيني ابـد
لان صدگي من دونـج ماسوى شي
يجوز جنت غبي وخسرتج مره
بـس بهاي المره ماراح اخسرج
فكري بنفسـج وبَس
واحسبي رسـل ما موجوده

محمـد تره مستحيل ابويه يقبل ازوج واحد متزوج

مسح وجهه وباوعلي

محمـد
اني اقنعة ماعليج

شمس
اني ما مستعدة اهدم حياة انسان علمود سعادتي !

محمد
خوش هسة اثبتلج ضلي بمكانج كاعدة

ضليت كاعدة ومادري شنـو ببالة بس صار عندي أمل بعلاقتنا شوية وشفتة أجة هوَ ورسُل، تقدموا الي

محمـد
رسـل احجيلهـا بـ ارادتج الـشي الراح يصير

رسـل
أي بـ رضاتـي
شمس تره محمد هواي يحبـج ولا تخسرينـه
وبالنسـبه الي فـ اني مايهمني
انـي صيدلانيـه و ألي اسمـي بعد يوم يومين
واكدر اكون روحـي واعيش روحي وبنتـي
وانتِ اخذي محمـد خّلاص ..
الله يهنيكم

راحَت بسرعه وخلتني بصدمتي واني ماناطقه ولا حـرف

محمـد
شنـو اليمنع انـج تكونين الـي ؟
ترضـين نرجع نعيـش بالحُب الي عشنـا ؟
لا تضيعين حُبنـا هَــدر !

محمـد
واذا كتيـلي اي فـ راح اعيشـج بـ احلى حياه و اعوضج عن كلشي سيء عشتي بسببي
يتـبععع .......
______________________
📌
اخوان اريد ضروري ضروري تابعون صفحتي عَ الواتباد حتى انزل الكُم ع الواتباد اشياء مثلاً موعد البارت، مُلاحضات، اذا صادِف فد يوم ما اكدر انزل بارت لا سامح الله.. اللخ