مَسـاء الخَير
باجُر ريست مو تنسون 🙈
عود ردت افاجئكُم واكتب الكُم بارت مُفاجئ باجُر بس باجُر عندي تدريب بالمُستشفى من ٨ لـ ١٢ ف راح اجي تعبانة وما الحك فَ حعوفها عَ المرة الجاية اسويلكُم احلى بارت مُفاجئ لعيونكُم🤭
__________________
سَبب
كلامة جان صواعِق بالنسبة الي، كِلمة ورة ثانية وهوَ يحجيها كلبي يدك بسرعة، اول مَرة احس بضربات كلبي هيج
هو مو جاي يسأل، ولا جاي يترجّى، هو جاي "يختارني"، بصمته، بثگلة، بثباته ومن بين الكل ..
صوت تنفسي تسارع، و وجهي صار شاحب، وعيوني تلمع مو من الفرح... لا، من الخوف، من الصدمة، من انُ أول مرة تحس إنُّ شي راح يصير إلها، إلها وحدها.
شفتي الجوة صارت ترجف، وإيدي لازمة بعبايتي حَيل، ودموعي سابقتني وتجمعن بزاوية عيني يردن ينزلـن بس اني جنت شادة نَفسي
التِفَتت بِأتجاه البيت وصوت نَفسي جان مسموع
زَعيم
اكدر اعتبُر انُ السكوت علامة الرضى؟
جنت ساكتة ما ناطقة ايّ حرف بس سكتت ومشيت، صار يمشي بمستواي ويحجي
زَعيم
ليش ساكتة؟
سَبب
الحياة ما علمتني افرح
ف ماعرُف شلـون اعبُر عن فرحتي حَتى
زَعيم
إذا الحياة ما سوت وياچ معروف، آنة راح أعلّمها شلون تعاملچ...
باوعتلة والدموع هل مـرة ماكدرن يمسكّن نفسهِن نزلن من عِندي ابتسم بوجهي وگال
زَعيم
راح اعتبرهن دموع فرح ؟
هزيت راسي بـ ايّ
يُمة جنت طايرة من الفرح وفرحتي هاي ماكدر انطيها لاحد
مشينـا للبيت وقَريب ما جاي نوصل كلي
زَعيم
ماشين هَسة للامام نعقِد
انة ويـاج و الشيـخ و امي شرآيج
سَبب
هَسة هَسة ؟؟
زَعيم
ايّ هَسة
هم نزور وهم نعقِد يم الامام
وان شاء الله بعَد سنة زَينب اسويلج الشي الي يليق بيج
بس المُهم اريد اثبت وجودج بهذا البيَت
اول ماطبيت شفت الشيخ ومرتة
جبُر
ها بشروا
استحيت ورأسًا طبيت للغرفة
رَحمة جان تشتغُل عافت شغلها واجتِ
رَحمة
هـاااااا ولج
اول ما اجت حضنتهـا حَيل
وسولفتلها عَ الصـار وجانت فرحانة هـواي
شوية واجتِ مرت الشيخ وجانت فرحانة حَيل وتباركلي
كلولي انُ يلا هَسة حنطلع للنجَف والله حَتى مادري شنو ارد
بس صدُك جانت صَدمة وكُل شي بسرعة بسرعة
مَرت الشيـخ كلتلي انُ البسي الوان
بَس حسيت انُ فَشلة وما اريد
فَ ضليت لابسة اسود
زَعيم كال لامة مارضت تروح بحِجة عَلاوي وابو هم ما راح ف رحنـا بس اني ومرت الشيخ وشيخ وزَعيم
جبُر
والله انة من اول مرة ردتج لزعيم
حسيت قالبج وي قالبة بس ماكدرت احجي
وسُبحان الله صارت هيَ بعَد
جانوا فرحانين حَيل بهذا الشي وزعيم جانت مرسومة ابتسامة عَ وجهة عريضة
اباوع بالمراية عليّ وصافنة
ياربي معقولة شخُص بهل شهامة ورجولة والحنية راح يكون زوجي؟
شنو سويت انة يم ربي وهيج هدآني هل هدية
غمضت عيوني واتنفست بعُمق
اجاني صوتة الفُجائي وهوَ يكول
زَعيم
خوما بيـج شي ؟؟
صالحة
يايمُة شبيج
فزيت وكتلهم
لالا مابية شـي
جبُر
خاف عدج دوخة من طريق بوية
زَعيم
انزل اجيبلج ماي ؟
تحبين نوكف شوية بكيفج
سَبب
لالا والله مابية شي هيج
وگف السيـارة يم محّل وجان جايب هواي شغلات انطة ماي للشيخ ومرتة وانطاني علاگة بيهـا هواي شغلات
طول الطَريق جـانت عيونة عَ الطريق وبَس
وحَتى ما باوعلي
جانوا يحجون بمواضيـع عامة
الطريق بعيد شوية تقريبًا ٤ ساعات
فَ حسيت نفسي دخت ونمت
اول ماوصلنـا هُمة راحوا واحنة رحنا من جِهة النِساء
زرنـة وهاي جانت اول مرة بحياتي ازور
كُل شي بهذا اليوم جان حلو
ضليت بضريـح والفرحة ما سايعتني
وكاعدة واندعي الله يتممها علية بالخَير
طلعنـا انة ومرت الشيـخ نمشي وتشبعني بدعواتها الحلوة
الهوى هناك غير... ريحته عود وبخور، الناس تمشي على رِجلين يحفون بيها حبّ وإيمان. القلوب مرتاحة، وكأن كل واحد جاي يحچي وجعه ويخليه ورا ضريح الإمام.
تلاگينا سوة احنة وياهم، انطاري بالارض وكلبي يدك، مو من الخوف، من الرهبة... أول مرة احِس إن خطوة بحياتي ماشية بإذن الله، مو غصب، مو ألم، مو وجع.
اجة زَعيم وصار يمي، لابس دشداشة بيضة، وشماغه مربوط مثل الشيوخ، يمشي بثكُل وعيونه ساكتة، بس تحچي هواي.
وصلنة للمكان المخصص للعقود، أكو غرفة خاصة، بسيطة، بس تعبّك طمأنينة. الشيخ هناك، لابس عمامة، صوته هادي،
كعدوا الشيخ ومرتة كدامنا وانة ويا كدام بعُض وبدة الشيخ يسألني
الشيخ
متفقين؟ على رضا ومحبة؟
زَعيم
بكل الرضا، وكل المحبة، وكل الأمان.
كلبي يهمِس وجسمي كلة يرجِف ومدري شلون كاعدة بمكاني
يا رب، أول مرة يصير شي إلي... لا تاخذه مني.
بـدة يعقد النة وگال
الشيخ
متفقين عَ المهر
زَعيم
انة بنسبة الي اطُبق شريعة العدل وبِما يقولهُ الله وبالشي الي لسانها ينطق بي وهاي كدامكُم وكدام شيخي وابوي الي تطلبة هيَ ويطلع من لسانها يصير
استحيت من حِجة هيج وكُلها صارت تكُلي مابيها شي واحجي
الشيخ
هذا دخيرة الج وحق من حقوقج الشرعية بنتي
فَ لا تستحين واحجي الي تردي
موشغلة رياء ولاشغلة اريد اتلوگ عَ حساي نفسي
بس ان كان شيخ جبُر او زَعيم ف قدمولي اشياء هـواي
و وكفوا بوجه اهلهم علمودي
فـ لساني مايكدر ينطُق شي ابد
شجعِت روحي وجاوبت
سَبب
اريد مُقدمي مَصحف
ومؤخري زيارة بيت الله الحرآم ويـا
حِجيت وانة مدنگة وكلبي هيـج يرجِف
كُلهم ضلوا يكلولي الله يبارك بيج وبدوا يسون العقِد
كملـتا والشيخ كال الحمدلله كملتوا
كمت باوعتلة وباس راسي
اتجهِت للشيخ ومَرتة ردت ابوس ايدة ما خلاني باس راسي ومرت الشيخ حضنتني وضلوا يباركولنا وجانوا حيل فرحانين بينة
طلعنـا من مكان العَقِد و اول خطوة سواهة زَعيم
اخذ بـ ايدي
استأذن مِن الشيخ وكال هَسة نجي
اخذ بـ ايدي وكفنة كِدام الامام وگالي وهوَ يباوع لعيوني بكُل تركيز
بنظرات ابد ما مباوعلي بيها مِن قَبِل
زَعيم بصوت مُتبهِج
أشهدُ يا إمام علي، ويا روحّ فاطمة الزهراء، ويا ابن حبيبُ الله صلو الله عليهِ وآلهِ وسلم، أني أمام ضريحك وطهرك
أصونها وأحفظها من كل شر، وأكون معها بكل لحظة، لا أتركها ولا أهون، بكل صبح معها أدعي لها، وبكل ليل أمضي جنبها. هذا عهد مني ويمين لا أرجع عنه أبدًا
ايدة اليسـار حاظنة ايدي اليمين ويباوعلي بكُل حُب
ابتسمت وبادرت لاول مَرة
سَبب
راح اكون الك خير الشريك
زَعيم
ماكو شك بهذا الموضوع
طلعنـا سوة وضل لازم ايدي بكُل قوة، وكإنما لكة شي جان من زمان مضيعة وخلاص مايريد يعوفة بعَد
الشيخ ومرتة يمشون كدامنة واحنة نمشي سوى
صح هادئين بس كلوبنـا تحچي
طبينـا لسوگ الجبير هذا السوگ مقابل الامام علي
متروس دهين وذهَب
الشيخ وگف وگال
جبُر
يلا طلعهن
سَبب تستاهل
زَعيم
افة شيخ جا المن ضام فلوسي انة؟
جبُر
عفية بالزَعيم
طبينـا للمحّل و اول شي سوا هوَ الحلقة اختارهة الي بكُل عناية وبكُل حب يباوع لعيوني وين تجول ب امل تصير على شـي وياخذليا
مرت الشيخ و الشيخ اشترولي هدايا وهوَ ماقصر
جان يحجي وي الصايغ ومستمُر بعَد كُل شي
باوعت صار اكثر من ١٥ مليون وهوَ مستمر
همستلة بـ
زَعيم كافي شنو سالفة
زعيم
انة جاي اشتري من طيب خاطِر انتِ شعليج بوية
جبُر
هوَ ما ميت عليج هوَ يريد يضم فلوسة بذهباتج
من كال هيج الكل ضحك حَتى الصايغ
زعيم
افة شيخ
فلوسي فلوسها
بس الفلوس الي تصير الها حَتى لو من عدي فَ هي تصير الها وتحرم علية ان جان اخذهن ..
اباوعلة بكُل حُب وعيوني مدمعات من العوض الي ب العالمين كرمني بي
كملنـا ورحنا مطعم كعدنا نتعشى والشيخ ومرتة يحجون النة عَ الحياة الزوجية ومدري شنـو
وهنانة بلشت احِس بالتغيير بزعيم
زعيم الي مجان يرفع انظارة علية صـار ياكلني اكل بيهن
وايدة ما فاركت ايدي ثواني
وكإنما جاي يثبت لكل الي بشارع انُ اني الة
زَعيم
ايّ شي يجي بـ بالج اشتري وبدون ايّ تردد
سّبب
بس ماكوشي بـ بالي
زَعيم
لا شني ماكوشي بـ بالج اشتري الي يعجبج
صدگ والله ما طلعنـا من سوگ إلا وهم مشتريلي هـواي اشياء وطب لمحب مال موبايلات اشترالي موبايل هماتين
حَسيتة جاي يعوضني عن كل شي فقدتة طول هل سنوات
لدرجة انّي خفت، خفت لا اخسرة او يضيع كل هذا الشي بسهولة
وجنت طول الطريق ارّدد ( يارّب لا تحرمني من هاي النعمة )
تاخرنا بالطلعَة ورجعنا تقريبًا بـ ٩
اباوعلة عيونة ما وخرهن عّني
وانة جنت مستحية وخجلانة وما مصدكة حَتى الي انة بي
نص الطَريق ونمِت وصلنـا للبيت متأخِر
اول ماوصلت رحِت نمت
الصُبح كعدنـا كُل احنة عَ ريوگ وزَعيم كال الهُم كلهم
الكُل صار يباركلنا وجان الكُل فرحان النة
عَدا سُراج وروان و ام زَعيم و ام علي
ماهتميت صراحة بس جان زَعيم حيل ضايج من سُراج
بس ضل ساكت وماحجة للشيخ حَتى لا يحجي عليّ
جانت اليوم مشية امير والكُل متحضر واني جنت متجهزة حَتى اروح وياهُم، شوية اندكت الباب واجة عمهُم ومرتة وبنية وياهُم
انة شايفة الرجال ومرتة بس مشايفة البنية
البنية حلوة وعيونها زرگ وتجنن بس جانت حاطة ميكب ومدري شنو اول ماشافها الشيخ رزلهـا طبت تحجي عليّ يم امها
صالحة
ولج يمصگوعة ما تسكتين انتِ لسانج شطولة
تبارك
بيبي يعني هوَ مكياج وخفيف انتوا معقدين ومدري يمتى تطورون
صالحة
ولج ما تنجبين لا اكوملج منو معقد هـاا
تبارك
بيبي زَعيم ويـن؟
صالحة
ما حجيتلكم البارحة جـان عقد زَعيم
عقدنالهم هيَ وسَبب
تبارك
شنووووووووووو !!!
هاي الدخيلة وزَعيم ؟!؟!!
يتبععععع ...
________________
فَرس
مِن بعَد ما سمعت اصوات حريق سمعت صوت صايح ايلول بس ماجنت اركز بشي
الدخان ملة المكـان و نفسي انعدم
عيوني ماكدرت افتحهن
ضليـت اهمِس بـ ( ايلول، ايلول )
وبعدهـا ماحَسيت بـ ايّ شي
رجعِت فتحت عيوني واني احِس امير يضرُب على خَدي
لقطات قليلة مُقتطفة الي اذكرها وكُل موقف بيهن ماجاوز الدقيقتين وارجَع افصُل
وما جِنت اشوف كدامي غير امير
وما جان بفكري غير ايلول
فَتحت عيوني واني بالمُستشفى
اريد اباوع ماكدر احس كُل شي اظلم رُغم انعدامة
حاطيلي الاوكسجين بَس احس نفسي فاقدتة بشكل موطبيعي
وماجاي اكدر ارتوي حَتى منة
باوعت لامير الي كاعِد مقابيلي
وجهة كُلة اسود من الصخَام
وشعرة مبعثر
وشكلة يخوف
اول ما شافني إجة بَسرعة
كعد عَ ركبة وصار بمستواي ويحاجيني
أمير
حبيبتي انتِ بخير حاجيني
لزم ايدي وصار يمسِد عليهن
وعيونة جان بيهن لمعة غَريبة
وكإنما يردن يبجن
وخر الاوكسجين عني لمن شافني اريد احجي
وكتلة بصوت خافت
فَرس
ايلول ويـن ؟
باوعلي وصُفن علية
بلعم وكال بارتباك
أمير
لتخافين ايلول مابيها شي ايلول يم علي صدكيني
بس لتعبين نفسج روحي انتِ حطي الاوكسجين عندج نقص جبير
رجَع حطلي الاوكسجين
واحس دموعي بعَد ما اسيطر عليهِن
ايلول بيها شي كلبي يكلي ايلول بيها شي
اني سمعت صيحتها سمعتها بنفسي
سمعتها صاحت اخخ احتركت
كمِت بسرعة من مكاني و أمير يحاول يلزمني ويحُطلي الاوكسجين
وخرتة عني وكتلة
فَرس
ماريد ماريددد اريددد ايلول ايلول وينننننن
أمير
ايلول مو هنا مو بهاي المُستشفى والله
بس اهدي فَرس اهدي انتِ بحاجة اوكسجين
لا توخررري
فَرس
كتلك عوفني عوفني اريد ايلول
لا تجدب علية ايلوللل ماتتت
ايلول صار بيها شي
احجي بصوت كوة يطلع ودموعي ينبهمرن مني
أمير
اسم الله اسم الله والله مابيهـا شي لا تكولين هيج
مثبِت ادية كوة
باوعلي وحِضن وجهي بـ ايدة
خلة وجنة مقابيل وجهي وكام يحجي
أمير
حبيبتي فرسي ايلول ما بيها شي والله العظيم
جاي احلف الج صدكيني بـس ارتاحي
ومن تصيرين زينة ترحين تشوفيها ارتاحي هَسة
كلبي خايف بس جَسدي وصحتي ما يسمحلي اسوي شي
عيوني مغوشات وكوة داباوع
رِجع نيمني عَ سرير وثبتلي الاوكسجين زَين
كعد يمي بالكاع ولزم ادية بقوة
أمير
ماراح ترحين مني، ماراح اخلي ايّ سبب ياخذج مني
راح اخليج وياي دائمًا واني وياج دائمًا لتخافين
يحجي وياي واني مستمرة اهمِس ب ايلول
أمير
ايلول والله مابيها شي صدكيني
انتِ بس غمضي عيونج وارتاحي
هَزيت راسي بـ ايّ
أمير
يلة لتخافين انة يمج
صرت اباوعلة وعيوني مغورگة دموع وبنفس الوقت ماكدرت اطول نظري تِجاهة من الدوخة الي جانت عِندي
رجعت نمت ساعتها ...
ما اذكر تفاصيـل اكثر وحَتى لو جنت صاحية ببعض الاحداث فما جنت بكامِل تركيزي
فتحت عيوني شوي شوي، وريحة عطر رجولي ناعم، مثل المسك، دخلت بأنفي قبل ما اشوف شي.
تحركت، وضجِت، ببطئ ...
لگيت نفسي متمددة على تخت چبير، الفرشة ناعمة وغطى أبيض مطرّز بخيط ذهبي خفيف. الجدار الي موجود جنبي عليّ رفوف ، مليانة كتب... مو كتب عاديّة، لا، مجلدات جلد، وعناوينها بخط عربي فخم: المتنبي، الجاحظ، نزار قباني، ومجموعة دواوين.
باوعت حواليَّ ... الغرفة واسْعة، كلشي بيها مرتب بنظام، كأنّه موزون بالمسطرة. الستائر لونها كحلي غامق، بس الشمس تتسلل منها بخيط خفيف، ينور المكان برقة.
على الطاولة الزجاجية جنب التخت، موجودة ساعة ، ومسبحة عقيق، وقلم حبر أسود محطوط على دفتر مفتوح، بيه شخبطة شعر.
لزمت الدَفتر داقرا، شفِتة كاتِب
وإنّي أحبُّكِ فوقَ احتمالي، كما يحتملُ البحرُ موتَ السفينة.
وجوا بسَطر
يا فرسَ القلبِ، يا فخري ومملكتي
بكِ استقامَ الزمانُ، وارتوى النَفَسُ
واخر شي كاتِب
اميرٌ في قلبهُ فَرس ..
كعدت عَ الجرباية داستوعب شصـاير وياي ملابسي متغيرة لابسة دشداشة سودة مو الي
صرت اتذكر الي صـاير ورجعِت اتذكر ايلول
راسي احِسة مصدع لدرجة موطبيعية
عيوني كل ما حاولت افتحهم شوية يرجعن ينسدن
زيـن ايلول هَسة وين ؟
هيَ بخير !
صاير الها شَي !!
والله خايفة وبالي يمها
اتذكرت صوتها من كالت اخ احتركت
احس كلبي مدري شصارلة
وعيوني غورگن بالدموع
بهـل اثناء طَب أمير
اول ما باوعلي اجاني بسرعة
أمير
فرس ليش كايمة من مكانج
انتِ تحتاجين راحة لازم تناميـن
راد يكومني وهوَ حاط ايدة على جتوفي
باوعتلة وكتلة
ايلول ويـن ؟
أمير
ليش هل دموع كلها !
ايلول بخير صدكيني بخير
فَرس
ايلول موبخير
ايلول لو بخير جان ضلت يمي وماعافتني لحظة
شبيهـا ايلول حباب كول امير
حجيَت هيج واحس ضربتني دوخة موطبيعية
لدرجّة انُ لو ما جان لازمني جان وكعت رأسُا بالكاع
أمير
الله الله الله
فَرسسس مو كتلج انتِ مريضة متكدرين حبيبتي
لازم ترتاحين شويـة
مَشاني لبداية الجرباية
كعدت واني دموعي ما نشفن ابـد
كعد كدامي ولزم ايدي
سحبتهن رأسًا
فَرس
أمير ايلول وين
داكُلك ايلول ويـن
ليش تخليني اموت اني خايفة عليها
حباب جاوبنيي
أمير
ايلول بالموصِل فَرس
فَرس
شنووو ومن يمتى رجعت!!
وشلون تعوفني وحدددي
أمير
ايلول تعبانة صحيًا فَرس
لا تعتبين عليها
فَرس
ادرررري سمعتها وهيَ تكول احتركت سمعتها
كلت هيج وزدت بالبجي حَيل
حباب ايلول بيهـا شي
متأذية هوووواي ؟
اريد احاجيها
أمير
متأذية قليل فَوس لتخافين بس هيَ رجعت للموصِل اهلها اخذوها
فَرس
اريد اروح اني ليش هنانة اريد اروحلها
حَط ايدة عَ خدي، وكإنهُ ديحضن وجهي كُلة
أمير
فَرس بس اهدئي وعوفي البجي
ايلول مابيها شي وهسة اخابرلجياهة
فَرس
ايّ حباب امير خابرها والله بالي يمها حباب
أمير
من عيوني هَسة بس اهدئي والي تردي يصيرلج تمام؟
هزيت راسي بـ ايّ
راح جاب موبايلة من عَ شحِن واجة
كعد يمي وباوعلي
مِسح دموعي بـ ايدة وگال
أمير
ماريدهن ينزلن خليج قويـة هذا ظرف وراح نجتازة سوية
مافهمِت شنو الي حجا بالضبُط
فتح موبايلة باوعت حَط خلفية صورة لادينـا بعقِد قُرآنة
كُل شي يدل على حُبة
بس هوَ مُستحيل يباوعلي ويبينليا
لازم بكُل مرة يضل مذكر غَلطي والي سويتة
راح عَ المُكالمات وخابر عَ ايلول
دگ عَ ايلول دگ ماترد ..
فَرس
امير انتَ دتضحك علية؟
كول احجي لا تقشمرني اني مو طفلة
ايلول بيهـا شي ؟؟
أمير
والله مابيها شَي اصُبري خل اخابُر علي
خابـر علي رأسًا جاوبة بَس علي مو ذاك علي
صوتة خافِت وتعبااااان بشكِل مبين
علي
هـلا صديق
أمير
علي هاي فَرس جاي تسمعك ايلول شلونها
علي
والله زينة ماعدها شي خل تدير بالها على نفَسها وبس
ايلول هسة نامت
فَرس
علي حباب لا تجذبون علية ايلول بيها شي
علي
لا فَرس صدكي مابيها شي انتِ ارتاحي
فَرس
زين هَسه هيَ وين بالموصل صحيح ؟
علي
اي احنة بالموصل
فَرس
اريد اجي
اريد اروح امير
علي
وين تجين هيَ اساسًا راح تجي ماضل عَ امتحاناتكم غير ٣ ايام
وباجُر ان شاء الله يكملون السكن حَتى تجي
أمير
هاهيّ صديق عاشت ايدك
يلا بعديـن نحجي
سدة والتفت الي
أمير
ها شكتلج
فَرس
اني ليش هنـا
أمير
جا وين ترحين مثلاً ؟
حُسام اجة شافج والبارحة كلة جان ويانة بس انة حرمصتلة حَتى يروح خطية دوامة، البارحة بليل طلعتج من المُستشفى، وهم السكن بعدة ما مأمن زَين فَ راح تضلين هنانة بينما تكمل كُل الاجراءات
فَرس
هاي غُرفتك؟
أمير بابتسامة
اي عجبتج ؟
فَرس
شنوو عجبتني اني ماريد اضل هنانة
ردت اكوم من الفراش هم رجعِت دخت
لزم بـ ايدي
أمير
موكتلج لا تتحركين بعدج دايخة ليش تعاندين
فَرس
عوفني اميـر اساسًا حُسام شلون قِبل ابقى هنانة !!
أمير
بَس ترة انتِ مرتي هَسة ؟
فَرس
مرتك شنـو
ما هيَ مُجرد مسرحية
لو تريد تعيشها ؟
أمير
فَرس حالتج هَسة ما تسمحلج تحجين ولا تسمحلي احجي فَ اكعدي هنانة وارتاحي خل انزل اجيبلج اكل
فَرس
اريد ارجع للموصل
أمير
شترجعين ؟ ترة ايلول وراح تجي متكوليلي وين ترجعين
فَرس
مادري اروح ب ايّ مكان المُهم ماضل هنا
يعني هَسة انتَ بليل نمت هنا ؟
وكف كدامي وكِتف ادي وابتسم وگالي
أمير
ليش هوَ اني شفت النوم؟
مساهِر وياج ..
فَرس
اساسًا اهلك شلون قبلوا تكون يمي بنفس الغرفة هاي انتوا عود عشائِر وتعرفون
أمير
بابا انتِ الظاهر ما طاخة بعقلج السالفة
ترة انتِ مرتي مرتي يعني حلالي
بس يلا جديدة عليج تتأقلمين عليها مِنا وجاي
فَرس
امير لتستفزني
أمير
كافي كلام ارتاحي راح اروح اجيبلج اكِل واجيج
مشتهية شي ؟
هزيت راسي بـ لا
أمير
تمام ماتاخر عليج ديري بالج على نفسج بينما اجي
واخذي راحتج محد يطُب
خلـة وراح
كمت من مكاني وتأففت
موبايلة يمي باقـي
ردت اشوف ايلول بلكت رادة عليّ
بس ماعرفت الرمِز
موبايلي حَتى ماندلة ويـن
كمِت من مكاني
حاولت دقيقتين ارستت نَفسي
لان الدوخة لازمتني حَيل
اتأكت عَ الحايط وامشي عَ كيفي
رحت للمراية
باوعت شعَري مخربط
و وجهي تعبـان
ياربييي شهل حالة المُزرية الي اني واصلتلها
ميز المراية جـان مرتب بشدة
خانة بيها ساعات وخانة بيهة شكم سبحة
وخانة بيها اقلام واللُخ حاط بيهة محابِس وبيهن حجر
امير يحِب هيج سوالف
شفت مشط موجود وياهِن اخذتة ومشطت شعري
حَتى ما الي خُلك اسوي شي
رجعِت ونمت بالفراش
زَين هوَ شلون طببني
وشلون راح انزل ؟
وشلون اسلم عليهُم
والله استحيييي ياربي
حَتى ايلول مو ويايّ
صافنة دافكر طب وهوَ شايل صينية الاكل سمعت صوت شخُص قبل لايطُب كلة
زَعيم
والله وكت
أمير
چا شنسوي ههههههههه
طَب وهوَ مبتسِم، كعد يمي وحَط الصينية بحُضنة
باوعت تمن ومرگ ولحّم داخِل المرگ ودجاجة فوك التمن
زَين شلون اصارحة هَسة انُ اني نباتية؟
والمُشكِلة جنت حيلللل جوعانـة
فَرس
ااااا ماريد اريد بس العَصير مال البُرتقال
اخذت العصير من الصينية وحطيتة بـ ايدي
رِجع اخذة
أمير
مايصيـر تشربين عَ معدة فارغة بالبداية اكلي وبعدين
اشربي العَصير
فَرس
بس
أمير
بَس شنو؟
خاف متاكلين هذا الاكل
فَرس
اني نباتية ما اكِل لا لحم ولا دجاج
أمير
اكول ليش وجهج اصفر
ابد ابددددد ؟
فَرس
تؤ ما اكل ابد
أمير
بس مُهم تاكلي هَسة شي بي بروتين
من البارحة لليوم مماكلة شي بس مُغذيات
فَرس
ماكدر اكلة والله من الصغر واني اكرهة، شكلة و طعمة كُلة ماكدر اتقبلة
أمير
ماكو شي اسمة ماكدر اكلة هاي انتِ حاطتهن ب بالج فَ عقلج الباطني قُفل عليهن شلون واحد يعيش بدون ما ياكل دجاج لو لحم لازم تاكلين ماكو
اخذ من الدجاجة وفلسهـا الي ومن حَط التمن بالخاشوكة حطلي وحدة ومدها الي
فَرس
امير ماريد كتلك ما اكدر
أمير
غمضي عيونج واكلي راح تكدرين تاكلين
ماكدرت اعاند اكثر استحيت
فَرس
طيب انطينياهة اني اكُل
أمير
تؤ بيدي
فَرس
أمير انتَ وين تريد توصل بتصرُفاتك؟
مو عَ اساس من سَتر مُسلم سترهُ الله ههههه
سِكت وتنهد ..
أمير
خليني اوجهج بـلة لو يوم من الايام انعجبتي بيـة ورُغم انعجابج سكتي لان انتِ ما تثقين ب احد او بالجُمجتمع الي انتِ ومن عاشر المُستحيلات تدخلين بعِلاقة وي احد بيهُم وفجـأة راويتج وبينت الج شكد اني احبج وانتِ قبلتي وصارت بينة عِلاقة ومع كُل عدم الثِقة الي عندجيا انتِ انطيتينيا وفجأة تندزلج مُحادثات بيني وبيـن صديقي نحجي واكول والله اني جاي اراهن عليها
شنـو جان سويتي ؟
هل راح تباوعين لوجهي بعَد ؟
راح تكدرين هيج لمُجرّد نظرة تنظريلي ؟
فَرس انتِ لعبتي علية ولعبتي بمشاعري
تدرين الذنب الي سويتي شكد قَبيح لو ماتدرين
فَرس
اذا تدري اني غلطانة لهدرجة واني داضحك عليك واني ماحبك فعلاً ليـش سويت كُل هذا ؟ ليش اني هَسة هنا اساسًا ...
باوعلي بعَصبية وسد عيونة
احس بحلكة حجي بس مايطلعة
فَرس
تدري ليش اكُلك ليش ؟
لان تدري اني ماضحكت عليك وكُل شي انطيتكيا حقيقي
كتلك وارجع اكلك بـ اول يوم بَس انلعب علية
وبعدها انسحبِت ميت خطوة
اني غلطانة واني اعترف
بَس ؟؟
انتَ غلطت كدي
بيوم عقدنـا و سالفة البارحة من سَتر مُسلم سترهُ الله ههههه
وكُلها بجِهة وجِهة يوم عقدنا مُستحيل انسى الي سويتة وياي مُستحيل
أمير
هَسة شنـو تاكلين او لا !
فَرس
ماريد ايّ شي
موبايلي تندلة ويـن ؟
أمير
الغراض وكُل شي بالغرفة ضال ما اجة ب بالي اجيب موبايلج
فَرس
اريد اخابر حُسام
أمير
فَرس بالوقت الي يجيبج حُسام ويرجعج يرادلج يومين خو بهل يومين ارتاحي ماضل شي لامتحاناتج
فَرس
بس اني ماريد اضل هنا
أمير
ماراح اضل يـمج لتخافين ما ازعجج
فَرس
يكون أحسن
أمير
تمام راح اطلع اجيبلج شي تاكلي شنو تردين
فَرس
ماريد ايّ شي
أمير
كافي عناد واحجي
سكتت
أمير
الله يساعدني چا
حَتى الطفلة موهيج تعاند
ضليت ساكتة وعاقجة وجهي
عـاف العَصير يمي وخلة ونزل
شربت العَصير ونمت
احس روحي دايخة حيـل
حَتى مالي خُلك احجي هواي او اعصُب
نمت شوية بعدهي سمعت صوتة كتلة ماريد بس جان يلح علية انُ اكل
جان جايبلي بيتـزا ومُقبلات
راح للكتُب جابلة كِتاب واجة كعد عَ الجُرباية من جهة ثانيـة
لابس تراك بيجي ولابس نظارة، اول مرة اشوفة يلبس نظارة مادري اذا كانت مال نظر او للقرائة بَس
كعد يقرة بالكتاب واني اكُل عَ كيفي ودايخة
ساعتها جِنت جوعانة حَيل بس استحيت كُلها اكملها خاف يكول هاي شبيها ماشايفة، وحُفاظًا عَ الاتكيت شوية ف اكتفيت بقُطعتين
أمير
ليش ماكلتي
باوعتلة يباوع للكِتاب ويحجي
فَرس
ماشتهي
أمير
تحتاجين طاقة عزيزتي
اكلي زين
فَرس
لتكُلي عزيزتي وتناديني كَ الكُل
ابتسم و وخر النظارة وباوعلي وصُفن
أمير
فَرسي ؟
من كال هيَج صُفنت لثواني
احسة يريد ياخذ خطوة بـس شي يمنعة
وكُل ما رجع يرجع ينسحب
دنگ عَ الكتاب مرة ثانية
سمعنا صوت الموبايل دز رسالة
فِتحة وكال
أمير
هاي ايلول
من كال هيَج كلبي فَززز راسًا كتلة
ايي انطينياهة
ابتسم وانطانيـا
ايلول
هلاو أُستاذ
خابرتهـا رأسًا، ماردت
ايلول اني فَرس ردي علية
ايلول
فَرس شلون صرتي ؟
فَرس
اني زينة بس بالي يمج حبابة ردي شلونج خوما متأذية
ايلول
لا حبيبتي ما عندي شي بس اني تعبانة شوية حَتى ماكدر احجي بس انتِ لتخافين اني زينة ويمي ماما وبابا حاولي تُقرين بهل ايام اني هم داقرا ترة ان شاء الله بهل ايام اني جاية
مادري ليـش رسالتها ما حسيتها صدُك
لحيت عليها تخابرني رفضت وكالت تعبانة هَسة عَ غيـر وقِت حَتى ماطولت وياي بالكلام مُجرد عرفتني زينة وبررت الي وخلت وراحت
منتظرة ترُد علية ماكو اصلاً متشوف الرسائل
فَرس
امير امانة الله عليك ايلول متأذية ؟
باوعلي وگال
امير
هيَ تاذت بس صارت زينـة الحمدلله
فَرس
يعني شنو الي تأذة منها ؟
امير
مادري بتفاصيل
فَرس
يعني هَسة تقنعني انتَ متدري ؟؟
والله احسكم تضحكون علية واحس ايلول بيها شي
امير
صدكيني ايلول زينة انتِ جاي تربكين روحج عَ الخالي بلاش
عفت الموبايل عَ الجرباية وكمت
باوعتلة بزعل ومّلل جبير وكتلة
فَرس
يعني شلون اضل هنانة؟ ماعرُف راسي من رجلية
اريد ابدل اريد غراضي اريد كُل شي شلون يعني
اني حَتى استحي من اهلك شنو قابل اضل هنا واسكُت
امير
ليش تضلين هنا وتسكتين ؟ هسة دنيا ظهُر وهمَّ نايمين هيج وقت تصير العَصر وتنزلين يمهُم هم تغيرين شوي جَو
فَرس
ماررريد
امير
جا شتردين شو كوليلي
عاف الكتاب البيدة وباوعلي
فَرس
اريد اسبح وين اسبح هَسة وشلبس اذا اسبح
امير
البنات نايمـات جان رحتِ الهن
بس تكدريو تستعيرين شي من ملابسي
عادي دام انتِ
باوعتلة بجِدية وخزرتة وكتلة
اميررر شبيك
امير
نيتي سليمة لتحرفيها بكيفج
فَرس
زين هَسة انتَ شسوي هنانة؟
امير
غرفتي شلون شسوي هنا
فَرس
يعني ماعدكُم غرفة غيرها ؟ اريد اخُذ راحتي شوية
تمَدد عَ الجُرباية وحط الغطة عَ نُصف رجلي ورجع لزم الكتاب ودنگ عليّ ويحجي
امير
ما لازملجيـاهة اعتبريني ما موجودد
بارِددد مُستفزززز ودي اركعة هَسة بالمُخدة وارتاح
فَرس
احد كالك قبل انُ انتَ بارد ومُستفز
غمض عيونة ورفع جبهتة وهز راسة اشارة عَ الـ ايّ
اوف يعني شسوي هَسة اني بحياتي المفروض علية انحبِس ويا واكعُد حَتى استحي وماعرُف شسـوي
اجيت حَتى انام عَ جرباية وسحبت الغطة كُلة حَتى اغطي نفسي من ورة سوة
تؤتؤتؤتؤ
ابتسمت بمكُر ورجعِت نمت
ما اجانـي نوم بس ضليت كاعدة بمكاني
شوي وسمعتـة فِتح فويس ويحجي
جان دينطي بيت شعري ويشرحة بالتفصيـل وشلون يجي للامتحان وشلون نحلة ويحجي مبيَن وي بنيـة ..
كمل الفويس الاول ورجَع ع ثاني وهم نفس الحالة يحجي ويشرح
اعتقد سجل اكثر من ٥ صوتيات وكُل صوتية يشرح بيها لشخُص شكِل واكثر كلامة ( عزيزتي ما عزيزتي )
احس بعد ما اتحمل وصبري نِفّذ عليّ
كمت من مكاني بس ضليت كاعدة عَ جرباية وباوعتلة وتأففت
فَرس
وتالي يعني ؟
امير
نـاس جاي تُقرة قابل مثلج
فَرس
اي صحيح طلابك شاطرين ما شاء الله محد عندة شغُل وعمل ومادة ثانية غير مادتك
ابتسم بمكُر وبرود وگال
امير
انتِ راح ترسبيـن اذا ما قريتي
فَرس
اني اريد ارسِب انتَ ماعليك احتار بعزيزاتك واسكُت
كلت هيـج وكمِت شو ماحس غير ضحك حيَل
امير
مسرحية عليش الغيَرة مادري
التفتت الة وكتلة
فَرس
اني ؟ و اغار ؟ عليش مثلاً اغار
ما اغار
امير
صح صح انتِ صح متغارين اصلاً
ياربي شكددد مُستفز وبارد عفتة ورحِت استكشف المكان
طلعِت من الغُرفة لكيت مثل الصالة الجبيـرة واكو بنُص تلفزون جبير ومقابيلة تُخم، بصراحة حَسيت نفسي بفلم عَ كد ما شلون كُل شي منظم داستكشف الاشيـاء صاح
امير
مو تطلعيـن وانتِ محاطة عَ راسج شي
ابتسمت وحسيت روحي البطلة الي بالافلام الي حبيبها يغار عليها
اتذكرت واقعنـا وغميت روحي
ورجعِت
فَرس
تكدر تصيحلي لهذي البنية الحلوة الي اجتِ بالعقِد ؟
باوعلي باستغراب وگال منو؟
فَرس
هذي المدبدبة الي عيونها عسلي
ابتسم وگال ها سيوف
دقيقـة اشوفهة كاعدة او نايمة
كام نفس الاولاد الشاطرين والمُهذبين
والله احِسة هيج لابسلي نظارة وتراك وبيدة كتاب وقلم
و اول ماكتلة كام
عجبتني الحركة للامانة
شوي وإجة واجت هـيَ ويا
اول مشافتني حضنتني واتحمدت الي عَ سلامة البنية حبابة وتجنن حيل كيوت
كتلها اكدر اروح ويـاج للغرفة كلتلي يلا
امير
حجابج بالكنتور
اوي شدعوة هذا مايريد ايّ شي مبعثر الظاهر
فتحت الكنتور وهنا جانت الطامة الكُبرى
ملابسة مرتبهن بصورة موطبيعية
خاف جان عندي أمل شويون انُ ننجمع اني ويـا
حاليًا ابد
وين اني وين هوَ
بعُمري وحياتي مسفطت ملابسي
وحتلى اسفطهن يتفركشن فَ اعوفهن هيج احسن
خو من اجيت للسكن ؟
اني و ايلول وحدة تذبهن عَ ثانية اخر شي ضلن بجُنط السفر
الكنتور مرتب بطريقة موطبيعية ابدًا
شنو القُمصان البيض وحد السود وحد الستر وحد
احس صابني دوار واني اباوع
ماريد اكمِل اساسًا
شفت الشال محطوط ومتعلك ومحترمة احترام من هذا الزين
اخذتة لبـستة ورحِت ويـاهة
قَبل لا اطلع كلي
امير
حضري روحج بـ ٤ ونُص هيج شي كملي كلشي حتى ننزل سوى
سكتت وخليت ومشيت
اول ما طلعِت احِس صابني ذهول
و اول كلمة نُطقتها ( ما شاء الله )
حَسيت عيب نسمي بيت ولازم نسمي قصُر عَ رتابتة وفخامتة
سيوف اخذتني اظن دقيقتين احنة نمشي
والغُرف كوووومة حسبالك بـ فندُق احنة
فَرس
سيوف تحتاجون تكسي هنانة
كالت اي والله وضحكت
ضحكت ويـاها
طَبينة لغرفتهُم
اول ماطبيت لكيت بنية كاعدة
يمة ما شاء الله عَ جمالها
والله استحي اباوع عليها عَ كد ماهيَ حلووووة
بيضة بشكِل موطبيعي وعيونها زرُگ وحلوة حَيل
اول ماشافتها ابتسمت كلت هلاو
باوعتلي وابتسمت كالت هلاو ودارت وِجهة
مدري ليش ماسلمت علية
احس وجودي ضوجهَا او شي
همست لسيوف
فَرس
سيوف اخـاف اضوجن
اني بَس ردت اسبح
سيوف
لا حبيبتي صدِك تحجين تعالي هنـا يمج كِل شي
راح انطيـج دشداشة هماتين من عندي حَتى تلبسيها
فَرس
ااا لا سيوف ولو ازحمج
بس اسمعي اني ما متعودة البس دشداشة هسة هاي واحسني راح اعثر بيها
ضحكت حيل وكالت
سيوف
يمة ولج احنة مانلبس غير دشاديش
فَرس
متلبسن تراكات ابددد ابددد
سيوف
لااا عدنة ممنوع جدي مايقبل
ابتسمت وكلت
لو يدري جدج شلبس جان شگال
فَرس
باعي سيوف ولو ازحمج اني
بس بعَد شوية كلي امير ننزل فَ عندج بشت او صاية البسهم؟
سيوف
اي اي عندي بس تلبسينة بـدون شي ؟
فَرس
لااااا البس ايّ شي جواهم حتلو دشداشة قصيرة عندجياهة المُهم البس شي خوما هيج
سيوف
ههههه تمام هسة طبي اسبحي ومن تطلعين
اختاري الي يعجبج
وهاج هاي دشداشة خفيفة وحلوة
اخذتها من عندها وطَبيت اسبح
هذيج البنية دايرة وجِهة واصلاً ما عبرتني
صُفنت وربُطت
عيونها زرگ معقولة هيَ نفسها الي جانوا رايديها لامير؟؟
جنت شاكة بهذا الشي بس ماكدرت اتاكد
كملت سبحي احِس تنشطِت شوية
مع انُ جان عندي دوخة قوية بكُل الوقت
بس حاولت اتغلب عليها
اول ماطلعت تلكتني سيوف بالنعيمًا
البنية تجنن وبريئة وتحس من تباوعلها تنملي ايجابية منها
والله عَجيب امير شلون ما اخذ من بنات عمة
يعني واحد يحجيها البنات يخبلن
بعدين صُفنت واتذكرت سيوف اُخت امير هيَ كلتلي اول ماشافتني بالعقد، الحمدلله عَ الذاكرة الفول
باوعت وجهي باهتت اريد ايّ شي احطة
فَرس
سيوف ماعندج شي احط لوجهي احس وجهي باهت
سيوف
تخبلين والله مابيـج شي + ماستعمل شي اني ماعندي يعني لا ميكب ولاشي احنة منحط
فَرس
ايّ جد القالب غالب متحتاجون اصلاً هههه
سيوف
والله انتِ هم تجنين ومتحتاجين
صُفنت عليها وكلت بكلبي والله لو تدرين شكد احب الميكب وشكد اخلي، اني من نوع احِب الميكب وحتى بجامعة اخلي بس اخلي هيج سمبُل بسيط وحلو مُجرد ايشدو للعيون و ايلاينر بسيط وحُمرة خفيفة ومرات اطوخها حَسب الحاجة
انطتني مُرطب و كحُل كلتلي بس ذني عدي
المُرطب حلو بي لون وردي حَطيت شوي لشفتي و لخدودي ولعيوني
شافتني سيوف وكعدت تكُلي شلون هيج سويتي خدودج وكعدت اشرحلها ونضحك اني ويـاها
اما ذيج البنية فَ صافنة بموبايلها وساكتة
حَطيت كحُل احس شكلي ترتب ورجعت نفس ما اني شلت شعـري وكلتلي تعاي اختاري جُبة ترديها
باوعت عدها جُبب يخبلن وكلهن راقيات
اختاريت وحدة ولبِستها جانت حلوة وعريضة كَ ردان وبدن من جوة فَ حبيتها وارتاحيت بيهـا شوي
بهـاي الاثناء دگ الباب امير
كتلها كوليلة هـَسة جاية
لفيت شالي ومادري ليش بس الشيطان وسوسلي اطلع شوي من شعري حَتى لفة الشال تصير خليجية بحّت
كملت وكتلها
فَرس
شرايج؟
سيوف
تخبلين تخبلين
هنيال اميرر بيـج
هاج هذا عُطر هم حُطي
طلعت عُطر وحطتلي منة
فَرس
انتِ مراح تنزلين؟
سيوف
لا جاية بس ابدل واغسل وانزل انزلي انتِ امير منتظرج
فَرس
لج والله استحيييي
سيوف
لتستحين والله الكل حباب
احنة حبابين والله
ابتسمتلها وكتلها تمام وطلعِت
حيل ارتاحيت لسيوف شكد ماكول حبابة قَليل
اول ما طلعت صـار كدامي
لابس دشداشة بيجي وشحاطة جوزي ولازم بسـدة سِبحّة
اول مرة اشوفة بهذا اللبِس
اجت عيونـة علية اول ما شافني تقَدم
ابتسم بـ برود وهاي الابتسامة الي يعتبر روحة مآن علينة بيها حَسبالك بـ فلوس وتقدم الي اكثر
أمير
تكدرين تفهميني ليـش شعرج طالِع
فَرس
هوَ هاي الشاطر بيها
ابتسم وهوَ يباوع لعيوني وگال
أمير
ليش جنتِ منتظرة من عندي غير شي ؟
مَد ايدة الشالي ونزلة
فَرس
اميرررر خربت شالي
أمير
ماخرب يابة مابي شي هاي وينة
فَرس
يوه شو وخر خلشوفة
أمير
دطبي طبي عدلي وتعاي فشلة ولد عمي واخواني جوة خير شعدنة عرسس
فَرس
يعني شنو هاي ملابسي مال عرس
أمير
لا بس طالعة نفس العروسة
فَرس
عروسة لابسة اسود تعيسة من حضها
أمير
كل هذا كدامج وتكولين تعيسة حَظ
أفة
فَرس
محد طلع عينة غير عزيزاتك
عفتة وطَبيت للغرفة
لكيت سيوف ماهيَ اعتقد دتسبح
وبس هاي البنية كاعدة
فَرس
ااا بس ردت اعدل شالي
هزتلي راسها وَطبيت
عدلت شالي وطلعت
أمير
سلمي عَ الكُل واكعدي يمي
فَرس
اكلك اني استحي ترة والله
أمير
منين تستحين عمي لازم تتعلمين ع هيج مشاهد منا وجاي
فَرس
مسرحية
أمير
هه
اول ما ردنـا ننزل بدرج دخت
الدرج مالتهم فَر واني كلش ادوخ بهيج درج
نوب شفتهم من جوة كاعدين واحس الفرق بين طابق الفوك ع الاول كومة احسني دخِت ازيد راسًا كتلة اوكف اوكف
فَرس
انتَ صير منا واني منا ادوخ لازم الزم الدرج
أمير
ميحتاج واني موجود
اخـذ بَ ايدي ونزلنا
ماكدرت احجي شي لان الانظار كلها توجهت النة
اني هنانة ياكاع انشكي وبلعيني
نسَيت الي وياي هوَ امير
وكُل ظني نفِس ايلول عادي وكمت اهمس
فَرس
يمة عزا
هوووواي
استحيييي والله استحييي
شراح اكول الهُم
اريد ارجع
ياربي شجابني هنـا
باوعلي بتفاجئ والضحكة شاگة حلگة وگال
أمير
صدك تحجين شنووو سالفة
قربنا نوصـل وبصوت حَيل عالي كال
أمير
تستحي تنزلل
صالحة
يا عليمن تستحي غيـر بيتها هذا
جان جِد امير كاعد ومرتة بصفة و العمام ملتمين و الاولاد عَ جِهة والكُل مخبوص
كلت السلام عليكُم كلها ردت السلام
سلمت عَ بيبيتهم والتفتت لجدهم
فَرس
شلونك جدوو
اني من كلت هيج اشو اميـر كام يضحك حَيل درت وجهي الكي ولد حاط المُخدة عَ وجهة وميت ضحك وكلها تضحك
حَسن
بوية بعَد شتريد صرت جدو
التفتت لامير الي جاي يضحك وماجاي ينقذ الوضِع وكتلة بهمِس
فَرس
كلت شي خطأ ؟؟
هز راسة بـ لا
ظنيتها كلمة عيب او موحلوة او شو شنو بلهجتهُم
جبُر
عمي كافي بسكم وترتوا البت
عادي يبوية بكيفج شصيحيني صيحيني ماعليج بـ ذولا
اخذ بـ ايدي امير وكعدنا سوة
امير
خلي اعرفج عَ الموجودين
اول شي نبلش بـ زعيم والي يمة سَبب
ابتسمت الهم وكتلة اي اعرفها
امير
عقدوا قبِل عقدنـا بيوم
باركتلهم وتشكروا مِن عندي
وصـار يعرفني عَ كل واحد موجود
واني اهز راسي وهمة يهزون راسهم بمعنى ترحيب
والطرفَين جـان مِستحي
بالبداية جِنت مستحية وخايفة وحاسة روحي نفس الغريبة
بس مدري شلون بلمتهُم كدروا يسحبوني لجوهُم
جبُر
اي بوية احجيلنـا عنج
احنة هم ما حالفنا الحظ نتعرف عليج اكثر
احجيلنـا عَ اهلج وحياتج قَبل
باوعت لامير رمشلي بعيونة حَتى احجي
فَرس
ااا مادري اذا تعرفون او لا بس امي وابوية متوفين
جبُر
نعم الله يرحمهم برحمتة الواسعة
صالحة
الله يرحمهم من يمتى؟
فَرس
من جان تقريبًا عمري ٣/٤ سنوات واخوية حُسام جان عُمرة ١٣ سنة، جانت امي حامِل وفجأة اجتها آلام الولادة، عافونـا مرة يم بيت جيرانة الي صارت يمهُم المَشية بيت ايلول صديقتي احنة وياهم علاقتنا نفس الاهل واكثر يعني، وراحـوا هيَ وابوية وقبِل لا يوصلون للمُستشفى سووا حادِث، امي ماتت رأسًا بس ابوية ضل ٥ ايام ومات ...
حجيت اخُر كم كلمة واحس غص الكلام وياي وكوة مسيطرة عَ دموعي
كُلها كالت الله يرحمهُم
إلا امير، حَط ايدة عَ ايدي وابتسم
اخذت نَفس وكالتلي
صالحة
سودة علية وشلـون عشتوا بعدهة ؟
فَرس
اخويـة حُسام جان يشتغل وبنفس الوقت يدرُس
جان اول او ثاني متوسط اعتقد
يشتغُل ورة الدوام وبليل يجي يدرُس
وحُسام جان شاطر وذكي والحمدُلله طلع مُعدل زين
وراح تحليلات
جبُر
والله ونعم منة اليوم الرجال الي يشيلة عائلة كاملة بركبتة والي يتحمل الضيم والفقر هذا صدِك رجال واخوج ما شاء الله مبين عليّ انسان راقي ومُحترم
هزيتلة براسي ايّ وابتسمت ..
بعدها حجيتلهُم شلـون صار الحَريق بالضبُط
أمير
تدرين انة بالطريق وشفت الدنيا اشتعلت
اسعاف وسيارات اطفاء ومدري شنـو
سئلت شكو كالولي سكن الـ ... احترك
مادري شلـون اجيت والله
اخر شي جان ازدحامات ومادري شنو سالفة
عفت السيارة ونزلت امشي في سبيـل اوصل
فَرس
اني ماذكر شي
بَس منو فتحلي الباب ؟
أمير
اني فتحتلجيا ساعتهـا
جبُر
الحمدلله من عدت على الخير
بس بوية هاي السالفة مقصودة
أمير
اي شيخ مقصودة حَتى علي كال هيج
جاي يحققون بالسالفة وان شاء الله خير
والله هوَ سكن عدنة نظامي حيل وكل اسبوع يودون الدكتورات الي ويانة يشوفنة ويجيكن الوضع كلة بس مادري شصاير
كالوا تماس كهرباء ومدري شنو
بس شي ما يقنِع
جبُر
انتِ هم بوية مو مال ضلين بالسكن
شيكولون علينة انوب جنة بيـت جبُر كاعدة بالسكِن مال الجامعة وبيت رجلها موجود
وبوية الدنيا مو أمآن بنية شو شسوي
سالفة منا منا
أمير
شيخ السكن امآن ومنظم
حَتى بالغرفة بس هيَ وصديقتها ايلول يعني لا منا ولامنا
جبُر
ها يعني انتَ عاجبك انتَ منشنش عَ البرد فوك بغرفتك ومرتك كاعدة بسكن الجامعة ؟
صالحة
اكيد ما عاجبة يا شيـخ بس شيسوي
خل تكمل هاي السَنة وبعدها تصير يمة بِ بويتة( بيتة )
جبُر
لا والله انة اكول خيقدمون عرسهُم
هاي الامتحانات راح تجي
حتى الامتحانات گضيهن يمنة
وبعدها عندج عطلة جبيرة مو؟
فَرس
اسبوعين
جبُر
اي بهل اسبوعين عرسوا
من يحجي يحجي باصرار وثقة
اني احِس الدنيا نلاصت فوك راسي
شيحجي هذا
امير
شيخ شسالفة شبيـة مستعجِل انة
زينب حتى ماصارلها هواي
جبُر
الحجيتة يصيـر امير
ردت انتَ وماعارضتك
بس مو كلشي ع كيفك
نفُض عبايتة وخلة وگام
اكو ولد جان كاعِد عيونة زرگ هم خلة وصعّد
امير
شنو سالفة يمة شبي جدي ؟
صالحة
ماعليك يُمة انة احاجي
فَرس
والله السكن مالتنة اصلاً حيل امان ومابي شي
حَسن
هوَ علمودج بوية يكول بـ بدال ما متبهذلة تكعد ب بويتها احسن الها وانة ويـا والله
أمير
بوية انة ما مستعِد بعدني
هم خلي نكمِل هاي السنة وان شاء الله خير
حَسن
بوية هيَ شنية وما مستعد الهة ماتكلي
حسين
خوية هسة عوف الولد على راحتة
كوم خل نمشي نشوف ابوك شبي شو ضايج اليوم
على عين جنتنا الجديدة
ابتسمت وكتلة لا عادي
بس اني كلبي كام يرجِف من الخوف
زَعيم
هسة انتَ شبيك كلة ايّ واسكت وماهل بي
شبيك كلبت خلقتك
أمير
لا لاكلبت خلقتي ولاشي ماعدي شي
يلا فَرس تكومين اشوفج بُستانة؟
هَزيت راسي بَ ايّ لان جنت محتاجة اكوم حتى انفجُر بالديصير
التفتت لسيوف وكلتلها
ترحين ويانة؟
سيوف
لا حبيبتي روحوا وحدكُم
حرمصتلها حَتى تروح بس هيَ جانت رافضة وتكول انُ شابعة من البُستان
تقرب من يمنا امير واحنة نحجي وگال لسيوف
امير
جيبيلهة عباية وياج حبيبتي
كالت تمام وخلت وراحت اني خزرتة
فَرس
هيَ شنية عباية شبي لبسي مستور
اصلاً اني ما اعرف امشي بيها
امير
تؤ ممنوع
فَرس
امير لا تتأمر علية
ماريد اروح احسَن
باوعتلة بانزعاج وكعدت
باوعت زَعيم وسَبب يباوعولنة
حاولت اخفي ضوجتي بس ماكدرت
وكف كدامي وكلي
امير
الي لابستة مابي شي ومستور بس احترامًا للموجودين هنا البسيها شبيـج هَسة
فَرس
بَس اني ماحبها موحلوة اطلع بيها
اجت سيوف وانطتنياها
اخذها منها وكال
امير
يلا البسيها خَل نشوف شلـون موحلوة
ماكدرت اكول لا خصوصًا زعيم وسبب موجودين والباقين هّم
لبستها عدلياهة بيدة وگال
امير
توب كلش حلوة يـلا نطلع
سيوف
ولك ياحلوة طالعة جنها باتمان
امير
سيوففف ههههههههههه
فَرس
مو كتلك موحلوة والله ادري موحلوة ماريدها
صالحة
هسة انتَ شچلبت للبنية هوَ منو بالبُستان خل تطلع جبتها مستورة
استحيت انُ هيَ جانت منتبهة النة رُغم نحجي بهمِس بس اعتقد الكُل فهم
امير
يلة عمي يلة امشي
مشينـا اني ويـا واباوع والذهول بعيني
وبشكِل لا ارادي كلت
فَرس
واو ما شاء الله احسني بالجَنة
امير
اي انة هم احس هيج، جَنة وحور عين وكل شي حلو
كلت بكلبي منك من شيطان تغازِل اليوم شعجَب
تمشينـة وشوية موبايلة رّن
عيني صـارت عليّ باوعت
بالتليجرام رقُم اميرة هـذا
فَرس
هـاي ليش دتخابرك؟
امير
اوووه نَسيت كلت الهـا اشرحلج هذا الموضوع بهيج وقِت
فَرس
ترة ما اعتقد اكو داعي للميانة الزايدة هاي
بنهاية انتَ استاذها وهيَ طالبتك
عدها شي ف تفتهمة داخِل المُحاضرة
مو هنا
لا وجمالة تخابر وطبيعي عندك؟
شهل ميانة الزايدة
امير
ترة لا تكبرين الموضوع اني كلتلها ذكريني فَ خابرت
فَرس
هـا تمام خلي ارجع حَتى تكدر تشرح الها براحتك
درت حَتى ارجع لِزم ايدي
امير
تغارينَ عليَّ؟
فذاك الدفءُ فيكِ يُحييني،
لكن...
لا تكوني كالشتاءِ إذا أحبَّ،
يُمطرُ حتى تغرَقُ الأرضُ... ثمَّ يرحلُ دونَ وداع."
سكت، وباوع علية ماريدت واكتفيَت ب انُ اتنهد
ضل لازِم ايدي ويمشي بالبُستان شوية وكتلة من دون تفكير
فَرس
شنـو نهايتنا ؟
_____________
للامانة؟
بارت اليـوم مو كد المقام ابد ٦٠٠٠ كلمة جان المفروض بعَد دور شكس ويصير البارت ٩٠٠٠ كلمة عَ الاقل، بس اعذروني صار عندي ظرف صحي وضغطي هبط وباجر وراي يوم طويل حَيل من ٨ ل ٢ وتدريب وفرة المُستشفى انتوا تعرفوها
واني لانّي ماحِب ابخس حقكم وانطيكم كُل شي ع اتم وجه اكول الكُم
باجُر صح ماكو ريست
بس وعد بارت عُكبة حيكون حيل طويل
وأعذروني من تقصير ..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!